Кано́нъ ст҃о́мꙋ преподо́бномꙋ мїхаи́лꙋ малеи́нꙋ

Светолу́чными мо́лниями Ду́ха освяща́емь и Того́ дохнове́нием испо́лнен, я́коже орга́н, преблаже́нне, оглаша́емь, души́ моея́ мра́к отжени́ и пода́ждь ми́ сло́во по достоя́нию пе́ти тя́.

Роди́телей любве́ предпоче́л еси́ Соде́телеву, и теку́щаго жития́ — житие́ равноа́нгельно, и мирски́я красоты́ — нетле́нное вои́стинну украше́ние все́х Царя́, и́миже наслажда́ешися, ра́дуяся.

Восто́ка трисо́лнечнаго бы́л еси́ заря́ всесве́тлая, трисия́нным све́том жития́ твоего́ земли́ все́ лице́ осия́ бога́тно и греха́ тму́, о́тче, разоря́я словесы́ твои́ми.

Возненави́дев от души́ сласте́й го́ресть и до́льния возгнуша́вся сла́вы, мирска́го са́на во́лею по́яс отве́рг, су́щих на земли́ царе́й предпоче́т все́х Царя́.

От пеле́н освяще́н, от ложе́сн избра́н яви́лся еси́: честне́й бо ма́тери твое́й Ро́ждшая Христа́ обеща́ да́ти тя́ и, я́ко освяще́н да́р, тя́ а́бие прия́т.

Ми́ром ты́ мы́сленным ду́шу и у́м очи́стив и те́ло а́лчбою истни́в, всели́л еси́ Христа́, глаго́люща Сего́ име́я в себе́, и ходя́ща, и ми́р благоуха́юща.

Струя́ жи́зни твою́ мы́сль напои́ Боже́ственнаго Ду́ха де́йством, отню́дуже го́ресть сласте́й отри́нувши, боже́ственныя сла́дости напо́лнися. Е́юже сы́тости непреста́нныя прие́млющи, пое́т: си́ле Твое́й сла́ва, Человеколю́бче.

О́гнь искуше́ний и страсте́й пе́щь слеза́ми твои́х, о́тче, тече́ний и духо́вною бога́тною угаси́л еси́ росо́ю, соблю́дся неопале́н, опаля́емь бо любо́вию все́х Царя́, ве́щная увяди́л еси́ жела́ния.

У́м возне́с к житию́ небе́сному, плотско́е, о́тче, облегчи́л еси́, отягча́вшее ве́щи страсте́й, те́мже Тро́ице неукло́нно послужи́л еси́. Моисе́я же нра́в и Илиино́ житие́ подража́я, ви́дел еси́ Го́спода.

Дрема́ние уны́ния о́чи се́рдца твоего́ не покры́, но ума́ твоего́ и жела́ния боже́ственнаго жа́лом уязвля́емь, всено́щным стоя́нием и в моли́тве терпе́л еси́, пло́ти не покрыва́я бро́ви.

Смиреному́дрие сожи́тельно име́я от ю́ности, виде́нии боже́ственными и поуче́нии у́м просвеща́я, льсти́ваго по́мыслом не укра́лся еси́, но смире́нно име́л еси́ мудрова́ние.

Умертви́в сла́сти, оживи́лся еси́ ду́хом, и, связа́в кре́пкаго, сосу́ды расхи́тил еси́ его́, и благопотре́бным доброде́телем прия́телища разшири́л еси́ уче́нии твои́ми.

Малосло́вие ле́ностное ума́ отгна́в, хле́б живо́тный, и е́же ко изоби́лию, руко́ю и язы́ком твои́м раздава́я, о́тче, сугу́б хотя́щим бы́л еси́.

И́же тала́нт от Бо́жия уче́ния обре́т, я́ко сы́й боже́ственным спе́хом возрасти́в без ме́ры, гла́с Влады́ки твоего́ слы́шиши ра́достен, к лу́чшим зову́щь тя́.

Се́мя прие́м в се́рдцы за́поведей Бо́жиих па́че стори́ц, и ты́сяща пло́д прине́сл еси́ кла́с боже́ственный — мона́хов, вопию́щих: благослове́н Бо́г оте́ц на́ших.

Ду́ха сосу́д Пресвята́го яви́шася устне́ твои́ и я́коже наводне́нии язы́к честна́я уче́ния, Тро́ице согла́сно зову́щим: благослове́н Бо́г оте́ц на́ших.

И́же пренепостижи́мую Госпо́дню красоту́ ели́ко жела́ние бя́ше, во пло́ти зря́ ума́ све́тлостию, ны́не пе́рсть оста́вль и к небеси́ до конца́ пресели́вся, пред лице́м предстои́ши Тро́ицы, зовы́й: лю́дие, превозноси́те Го́спода во вся́ ве́ки.

Многоце́нный тебе́ вене́ц, по́двиг сконча́вшу, и́же на де́моны, Влады́ка подаде́, зла́та светле́йши и би́сера красне́йши, ца́рства и безсме́ртия, о о́тче, сия́я па́че со́лнца, зове́ши: лю́дие, превозноси́те Го́спода во вся́ ве́ки.

О, сла́дкаго язы́ка твоего́, и́мже прему́дро улови́л еси́ поглоще́нныя враго́м льсти́вым! И ко измене́нию боже́ственному премени́л еси́, водрузи́в единообра́зно се́ни, я́ко песо́к, и зовя́ непреста́нно: свяще́нницы, благослови́те, лю́дие, превозноси́те Го́спода во вся́ ве́ки.

Дне́сь вся́ земля́ прии́де, пропове́дающи Христо́во боже́ственное и́мя, пресла́вную и боже́ственную па́мять твою́ торжеству́я: ты́ бо онебеси́л еси́ ю́ монахообра́зными уче́ньми и уясни́л еси́ а́нгельским ревну́ющия чино́м.

Освети́ша мо́лнии твои́х чуде́с вся́ концы́, моля́щим бо ся ве́рою ра́ка твоя́ источа́ет исцеле́ния. И тебе́ у́бо и́мать не́бо, земля́ же земну́ю се́нь те́ла, ю́же пре́жде гро́ба истни́вшуюся воздержа́нием твои́м.

Зе́млен у́м не мо́жет све́т о́н разуме́ти, пресве́тлый и пренеизглаго́ланный Тро́ический, его́же ны́не прия́л еси́, и́мже и обожа́емь я́ве. Помина́ющих тя́, преблаже́нне, помяни́, Тро́ице Святе́й предстоя́.

Свѣтолꙋ́чными мо́лнїѧми дх҃а ѡ҆свѧща́емь, и҆ тогѡ̀ дохнове́нїемъ и҆спо́лненъ, ꙗ҆́коже ѻ҆рга́нъ, преблаже́нне, ѡ҆глаша́емь, дꙋшѝ моеѧ̀ мра́къ ѿженѝ, и҆ пода́ждь мѝ сло́во по достоѧ́нїю пѣ́ти тѧ̀.

Роди́телей любвѐ, предпоче́лъ є҆сѝ содѣ́телевꙋ, и҆ текꙋ́щагѡ житїѧ̀, житїѐ равноа́гг҃льно, и҆ мїрскі́ѧ красоты̀ нетлѣ́нное вои́стиннꙋ ᲂу҆краше́нїе всѣ́хъ цр҃ѧ̀: и҆́миже наслажда́ешисѧ ра́дꙋѧсѧ.

Восто́ка трисо́лнечнагѡ бы́лъ є҆сѝ зарѧ̀ всесвѣ́тлаѧ, трисїѧ́ннымъ свѣ́томъ житїѧ̀ твоегѡ̀, землѝ всѐ лицѐ ѡ҆сїѧ̀ бога́тнѡ, и҆ грѣха̀ тмꙋ̀, ѻ҆́тче, разорѧ́ѧ словесы̀ твои́ми.

Возненави́дѣвъ ѿ дꙋшѝ сласте́й го́ресть, и҆ до́льнїѧ возгнꙋша́всѧ сла́вы, мїрска́гѡ са́на во́лею по́ѧсъ ѿве́ргъ, сꙋ́щихъ на землѝ царе́й, предпоче́тъ всѣ́хъ цр҃ѧ̀.

Ѿ пеле́нъ ѡ҆свѧще́нъ, ѿ ложе́снъ и҆збра́нъ ꙗ҆ви́лсѧ є҆сѝ: честнѣ́й бо ма́тери твое́й ро́ждшаѧ хрⷭ҇та̀, ѡ҆бѣща̀ да́ти тѧ̀, и҆ ꙗ҆́кѡ ѡ҆свѧще́нъ да́ръ тѧ̀ а҆́бїе прїѧ́тъ.

Мѵ́ромъ ты̀ мы́сленнымъ дꙋ́шꙋ и҆ ᲂу҆́мъ ѡ҆чи́стивъ, и҆ тѣ́ло а҆́лчбою и҆стни́въ, всели́лъ є҆сѝ хрⷭ҇та̀, глаго́люща сего̀ и҆мѣ́ѧ въ себѣ̀, и҆ ходѧ́ща, и҆ мі́ръ бл҃гоꙋха́юща.

Стрꙋѧ̀ жи́зни твою̀ мы́сль напоѝ бжⷭ҇твеннагѡ дх҃а дѣ́йствомъ: ѿню́дꙋже го́ресть сласте́й ѿри́нꙋвши, бжⷭ҇твенныѧ сла́дости напо́лнисѧ. є҆́юже сы́тѡсти непреста̑нныѧ прїе́млющи, пое́тъ: си́лѣ твое́й сла́ва, чл҃вѣколю́бче.

Ѻ҆́гнь и҆скꙋше́нїй, и҆ страсте́й пе́щь, слеза́ми твои́хъ, ѻ҆́тче, тече́нїй, и҆ дꙋхо́вною бога́тною ᲂу҆гаси́лъ є҆сѝ росо́ю, соблю́дсѧ неѡпале́нъ: ѡ҆палѧ́емь бо любо́вїю всѣ́хъ цр҃ѧ̀, вє́щнаѧ ᲂу҆вѧди́лъ є҆сѝ жела̑нїѧ.

Оу҆́мъ возне́съ къ житїю̀ нбⷭ҇номꙋ, плотско́е, ѻ҆́тче, ѡ҆блегчи́лъ є҆сѝ ѡ҆тѧгча́вшее ве́щи страсте́й. тѣ́мже трⷪ҇цѣ неꙋкло́ннѡ послꙋжи́лъ є҆сѝ: мѡѷсе́а же нра́въ, и҆ и҆лїино̀ житїѐ подража́ѧ, ви́дѣлъ є҆сѝ гдⷭ҇а.

Дрема́нїе ᲂу҆ны́нїѧ ѻ҆́чи се́рдца твоегѡ̀ не покры̀, но ᲂу҆ма̀ твоегѡ̀, и҆ жела́нїѧ бжⷭ҇твеннагѡ жа́ломъ ᲂу҆ѧзвлѧ́емь, всено́щнымъ стоѧ́нїемъ, и҆ въ моли́твѣ терпѣ́лъ є҆сѝ, пло́ти не покрыва́ѧ бро́ви.

Смиреномꙋ́дрїе сожи́тельно и҆мѣ́ѧ ѿ ю҆́ности, видѣ̑нїи бжⷭ҇твенными и҆ поꙋчє́нїи ᲂу҆́мъ просвѣща́ѧ, льсти́вагѡ по́мысломъ не ᲂу҆кра́лсѧ є҆сѝ: но смире́нно и҆мѣ́лъ є҆сѝ мꙋдрова́нїе.

Оу҆мертви́въ сла̑сти, ѡ҆живи́лсѧ є҆сѝ дꙋ́хомъ, и҆ свѧза́въ крѣ́пкаго, сосꙋ́ды расхи́тилъ є҆сѝ є҆гѡ̀, и҆ благопотрє́бнымъ добродѣ́телемъ прїѧ́тєлища разшири́лъ є҆сѝ ᲂу҆чє́нїи твои́ми.

Малосло́вїе лѣ́ностное ᲂу҆ма̀ ѿгна́въ, хлѣ́бъ живо́тный, и҆ є҆́же ко и҆з̾ѻби́лїю, рꙋко́ю и҆ ѧ҆зы́комъ твои́мъ раздава́ѧ, ѻ҆́тче, сꙋгꙋ́бъ хотѧ́щымъ бы́лъ є҆сѝ.

И҆́же тала́нтъ ѿ бж҃їѧ ᲂу҆че́нїѧ ѡ҆брѣ́тъ, ꙗ҆́кѡ сы́й бж҃е́ственнымъ спѣ́хомъ возрасти́въ безъ мѣ́ры, гла́съ влⷣки твоегѡ̀ слы́шиши ра́достенъ, къ лꙋ́чшымъ зовꙋ́щь тѧ̀.

Сѣ́мѧ прїе́мъ въ се́рдцы за́повѣдей бж҃їихъ па́че стори́цъ, и҆ ты́сѧща плѡ́дъ прине́слъ є҆сѝ кла́съ бжⷭ҇твенный, мона́хѡвъ вопїю́щихъ: бл҃гослове́нъ бг҃ъ ѻ҆тє́цъ на́шихъ.

Дх҃а сосꙋ́дъ прест҃а́гѡ ꙗ҆ви́шасѧ ᲂу҆стнѣ̀ твоѝ, и҆ ꙗ҆́коже наводне́нїе ѧ҆зы́къ честна̑ѧ ᲂу҆чє́нїѧ, трⷪ҇цѣ согла́снѡ зовꙋ́щымъ: бл҃гослове́нъ бг҃ъ ѻ҆тє́цъ на́шихъ.

И҆́же пренепостижи́мꙋю гдⷭ҇ню красотꙋ̀, є҆ли́кѡ жела́нїе бѧ́ше, во пло́ти зрѧ̀ ᲂу҆ма̀ свѣ́тлостїю, ны́нѣ пе́рсть ѡ҆ста́вль, и҆ къ нб҃сѝ до конца̀ пресели́всѧ, предъ лице́мъ предстои́ши трⷪ҇цы, зовы́й: лю́дїе, превозноси́те гдⷭ҇а во всѧ̑ вѣ́ки.

Многоцѣ́нный тебѣ̀ вѣне́цъ, по́двигъ сконча́вшꙋ, и҆́же на де́мѡны, влⷣка подадѐ, зла́та свѣтлѣ́йши, и҆ би́сера краснѣ́йши, црⷭ҇тва и҆ безсме́ртїѧ, ѽ ѻ҆́тче! сїѧ́ѧ па́че со́лнца, зове́ши: лю́дїе, превозноси́те гдⷭ҇а во всѧ̑ вѣ́ки.

Ѽ сла́дкагѡ ѧ҆зы́ка твоегѡ̀, и҆́мже премꙋ́дрѡ ᲂу҆лови́лъ є҆сѝ поглощє́нныѧ враго́мъ льсти́вымъ! и҆ ко и҆змѣне́нїю бжⷭ҇твенномꙋ премѣни́лъ є҆сѝ, водрꙋзи́въ є҆диноѻбра́знѡ сѣ̑ни ꙗ҆́кѡ песо́къ, и҆ зовѧ̀ непреста́ннѡ, свѧще́нницы благослови́те, лю́дїе превозноси́те гдⷭ҇а во всѧ̑ вѣ́ки.

Дне́сь всѧ̀ землѧ̀ прїи́де, проповѣ́дающи хрⷭ҇то́во бжⷭ҇твенное и҆́мѧ, пресла́внꙋю и҆ бжⷭ҇твеннꙋю па́мѧть твою̀ торжествꙋ́ѧ: ты́ бо ѡ҆небеси́лъ є҆сѝ ю҆̀ монахоѻбра́зными ᲂу҆че́ньми, и҆ ᲂу҆ѧсни́лъ є҆сѝ а҆́гг҃льскимъ ревнꙋ́ющыѧ чинѡ́мъ.

Ѡ҆свѣти́ша мѡ́лнїи твои́хъ чꙋде́съ всѧ̑ концы̀: молѧ́щымбосѧ вѣ́рою, ра́ка твоѧ̀ и҆сточа́етъ и҆сцѣлє́нїѧ. и҆ тебѐ ᲂу҆́бѡ и҆́мать нб҃о, землѧ́ же земнꙋ́ю сѣ́нь тѣ́ла, ю҆́же пре́жде гро́ба и҆стни́вшꙋюсѧ воздержа́нїемъ твои́мъ.

Зе́мленъ ᲂу҆́мъ не мо́жетъ свѣ́тъ ѻ҆́нъ разꙋмѣ́ти, пресвѣ́тлый и҆ пренеизглаго́ланный трⷪ҇ческїй, є҆го́же ны́нѣ прїѧ́лъ є҆сѝ, и҆́мже и҆ ѡ҆божа́емь ꙗ҆́вѣ: помина́ющихъ тѧ̀, преблаже́нне, помѧнѝ, трⷪ҇цѣ ст҃ѣ́й предстоѧ̀.