Православный календарь
Размер шрифта:

Ака́ѳістъ

А҆ка́ѳїстъ а҆рха́гг҃лꙋ гаврїи́лꙋ.

Собор Архангела Гавриила 26 июля 2026

Конда́къ а҃

И҆збра́нный бг҃омъ ѿ всѣ́хъ нбⷭ҇ныхъ си́лъ послꙋжи́ти предвѣ́чной та́йнѣ сп҃се́нїѧ ро́да человѣ́ческагѡ, ди́вный предстоѧ́телю прⷭ҇то́лꙋ ст҃ы́ѧ трⷪ҇цы, носи́телю та́йнъ и҆ чꙋде́съ бж҃їихъ, а҆рха́гг҃ле гаврїи́ле, къ тебѣ̀ припа́даемъ и҆ ᲂу҆миле́ннѡ воспѣва́емъ тѝ:

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

І҆́косъ а҃

А҆́гг҃лѡвъ творе́цъ и҆ всѧ́ческихъ и҆збра̀ тѧ̀, тайнови́дче гаврїи́ле, въ пречꙋ́днѣмъ совѣ́тѣ ст҃ы́ѧ трⷪ҇цы, да послꙋ́жиши та́йнѣ бг҃овоплоще́нїѧ, и҆ повелѣ̀ бы́ти тебѣ̀ носи́телемъ си́лы и҆ чꙋде́съ бж҃їихъ. сегѡ̀ ра́ди вопїе́мъ тѝ си́це:

Ра́дꙋйсѧ, гаврїи́ле, и҆збра́нный творцо́мъ слꙋжи́телю: ра́дꙋйсѧ, гаврїи́ле, промышле́нїѧ бж҃їѧ носи́телю.

Ра́дꙋйсѧ, ꙗ҆́кѡ тобо́ю хва́лѧтсѧ си́лы нбⷭ҇ныѧ: ра́дꙋйсѧ, ꙗ҆́кѡ тебѐ сла́вѧтъ сердца̀ земноро́дныхъ.

Ра́дꙋйсѧ, вѣ́рнѡ послꙋжи́вый прⷭ҇то́лꙋ ст҃ы́ѧ трⷪ҇цы: ра́дꙋйсѧ, со дрꙋ́ги свои́ми сокрꙋши́вый и҆ и҆зри́нꙋвый денни́цꙋ.

Ра́дꙋйсѧ, ѡ҆бличи́вый заблꙋждє́нїѧ тогѡ̀: ра́дꙋйсѧ, и҆з̾ пе́рвыхъ пѣ́снь трист҃ꙋ́ю воспѣ́вый.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ в҃

Ви́дѧ творе́цъ тѧ̀ ᲂу҆се́рднаго и҆ вѣ́рнаго слꙋжи́телѧ своегѡ̀, возлюбѝ тѧ̀ и҆ вознесѐ пред̾ а҆́гг҃льскими чи́нми, и҆ ᲂу҆крѣпле́нный блгⷣтїю є҆гѡ̀ въ свои́хъ вели́кихъ до́блестехъ, ты̀ воспѣва́еши съ ли́ки а҆́гг҃льскими ᲂу҆се́рднѡ бг҃ꙋ: А҆ллилꙋ́їа.

І҆́косъ в҃

Ра́зꙋмомъ смиренномꙋ́дреннѡ прекло́ньшесѧ пред̾ та́йною непостижи́мою є҆диносꙋ́щности ст҃ы́ѧ трⷪ҇цы, ты̀ бл҃года́тныхъ ѿкрове́нїй прїѧ́лъ є҆сѝ неистощи́мый и҆сто́чникъ бл҃гоговѣ́йнаго тре́пета, любвѝ къ творцꙋ̀, и҆ ра́дости и҆спо́лненный сїѧ́еши, а҆рха́гг҃ле, пред̾ прⷭ҇то́ломъ всевы́шнѧгѡ, ꙗ҆́кѡ свѣти́льникъ пла́менный. ѡ҆ се́мъ бл҃гоговѣ́йнѡ воспѣва́ти дерза́емъ:

Ра́дꙋйсѧ, лампа́до неꙋгаси́маѧ седмисвѣ́щника вели́кагѡ: ра́дꙋйсѧ, ѕвѣздо̀ свѣтоза́рнаѧ нб҃осво́да дх҃о́внагѡ.

Ра́дꙋйсѧ, первопрїе́мниче бжⷭ҇твенныхъ сїѧ́нїй: ра́дꙋйсѧ, сокро́вище бжⷭ҇твенныхъ велѣ́нїй.

Ра́дꙋйсѧ, кла́дезь смире́нїѧ неисчерпа́емый: ра́дꙋйсѧ, рѣко̀, послꙋша́нїѧ и҆спо́лненнаѧ.

Ра́дꙋйсѧ, ꙗ҆́кѡ ты̀ ᲂу҆ прⷭ҇то́ла вы́нꙋ пребыва́еши: ра́дꙋйсѧ, ꙗ҆́кѡ ты̀ ве́лїе дерзнове́нїе къ бг҃ꙋ и҆́маши.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ г҃

Си́лы нбⷭ҇ныѧ ра́дꙋютсѧ ѡ҆ тебѣ̀, а҆рха́гг҃ле, и҆ защище́нныѧ нѣ́когда ѿ ѕловре́дныхъ заблꙋжде́нїй денни́цы, въ го́рдости возста́вшаго проти́въ творца̀ своегѡ̀, съ весе́лїемъ взыва́ютъ непреста́ннѡ бг҃ꙋ: А҆ллилꙋ́їа.

І҆́косъ г҃

И҆мꙋ́ще ве́лїе дерзнове́нїе ко ст҃ѣ́й трⷪ҇цѣ, ве́лїю блгⷣть прїе́млеши ѿ бг҃а непреста́ннѡ, и҆ ꙗ҆́кѡ лꙋ́чь бжⷭ҇твеннагѡ трисїѧ́тельнагѡ сл҃нца, повсю́дꙋ разлива́еши свѣ́тъ велѣ́нїй бж҃їихъ, да сла́витсѧ сп҃си́тельное и҆́мѧ бж҃їе сердца́ми земноро́дныхъ, тебѣ̀ пою́щихъ:

Ра́дꙋйсѧ, нбⷭ҇ныхъ си́лъ нача́льниче: ра́дꙋйсѧ, пра́вды вѣ́чныѧ побо́рниче.

Ра́дꙋйсѧ, твоѧ̀ крѣ́пкаѧ пре́данность бг҃ꙋ чи́ны а҆́гг҃льскїѧ ᲂу҆крѣпѝ: ра́дꙋйсѧ, чрез̾ тебє̀ гдⷭ҇нѧ блгⷣть и҆́хъ сꙋгꙋ́бо просвѣтѝ.

Ра́дꙋйсѧ, и҆ землѣ̀ ты̀ блгⷣть ѿ бг҃а прино́сиши: ра́дꙋйсѧ, ты̀ ѻ҆́гнь нбⷭ҇ный въ сердца̀ человѣ́кѡвъ низво́диши.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ д҃

Бꙋ́рѧ ѕлочести́выхъ за́мыслѡвъ врага̀ бж҃їѧ разбїѧ̀ ѡ҆ скалꙋ̀ вѣ́рности слꙋ́гъ гдⷭ҇нихъ, и҆ побѣди́вши свои́мъ смире́нїемъ горды́ню тогѡ̀, воспѣ́ли бг҃ꙋ: А҆ллилꙋ́їа.

І҆́косъ д҃

Слы́ша гдⷭ҇ь и҆сповѣ̑дованїѧ тобо́ю вели́кагѡ и҆́мени є҆гѡ̀, а҆рха́гг҃ле, и҆спо́лнисѧ бл҃говоле́нїѧ, и҆ ѡ҆зари́въ тѧ̀ свое́ю блгⷣтїю, всѧ̑ просвѣтѝ воспѣ́ти тѝ:

Ра́дꙋйсѧ, а҆дама́нте нбⷭ҇ный: ра́дꙋйсѧ, сто́лпе це́ркви вселе́нскїй.

Ра́дꙋйсѧ, раѧ̀ гдⷭ҇нѧ храни́телю: ра́дꙋйсѧ, цвѣ́те бл҃гоче́стїѧ.

Ра́дꙋйсѧ, лꙋчꙋ̀ прⷭ҇то́ла бж҃їѧ: ра́дꙋйсѧ, ᲂу҆краше́нїе порфѵ́ры цр҃ѧ̀ хрⷭ҇та̀.

Ра́дꙋйсѧ, знамено́сче бж҃їй: ра́дꙋйсѧ, ᲂу҆краше́нїе военача́льникѡвъ нбⷭ҇ныхъ си́лъ.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ є҃

Бг҃ото́чною ѕвѣздо́ю те́клъ ѿ высо́тъ надзвѣ́здныхъ, гаврїи́ле, да возвѣсти́ши земны́мъ ра́дость бли́зкагѡ сп҃се́нїѧ, предста́лъ є҆сѝ првⷣнымъ і҆ѡакі́мꙋ и҆ а҆́ннѣ и҆ провѣща́лъ є҆сѝ и҆́мъ млⷭ҇ть бж҃їю, и҆ ра́дꙋѧсѧ съ ни́ми кꙋ́пнѡ, воспѣ́лъ бг҃ꙋ: А҆ллилꙋ́їа.

І҆́косъ є҃

Ви́дѣвши тѧ̀ є҆диновре́меннѡ роди́тели бг҃оѻтрокови́цы, сꙋ́щїи въ страна́хъ разли́чныхъ, сше́дшихсѧ ᲂу҆ двере́й хра́ма по твоемꙋ̀ глаго́лꙋ, диви́шасѧ и҆ въ ра́дости взыва́хꙋ тѝ:

Ра́дꙋйсѧ, слꙋжи́телю ст҃ы́ѧ трⷪ҇цы: ра́дꙋйсѧ, ди́вный бл҃говѣ́стниче.

Ра́дꙋйсѧ, бж҃їй и҆збра́нниче: ра́дꙋйсѧ, гдⷭ҇нѣй во́ли провозвѣ́стниче.

Ра́дꙋйсѧ, ꙗ҆́кѡ тобо́ю ра́дость лю́демъ прино́ситсѧ: ра́дꙋйсѧ, ꙗ҆́кѡ тебѣ̀ хвала̀ во сла́вꙋ бж҃їю земноро́дными пое́тсѧ.

Ра́дꙋйсѧ, пла́нѡвъ тво́рческихъ и҆спо́лнителю: ра́дꙋйсѧ щедрѡ́тъ бж҃їихъ раздаѧ́телю.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ ѕ҃

Проповѣ́дникомъ бж҃їѧ милосе́рдїѧ ты̀, гаврїи́ле, ꙗ҆ви́лсѧ заха́рїи, вѣща́ѧ є҆мꙋ̀ бжⷭ҇твенныѧ глаго́лы и҆ наꙋча́ѧ є҆го̀ пѣ́ти бг҃ꙋ: А҆ллилꙋ́їа.

І҆́косъ ѕ҃

Возсїѧ́въ блгⷣтїю бж҃їею пред̾ ѻ҆чи́ма заха́рїи, ᲂу҆жаси́лъ є҆сѝ є҆го̀, и҆ вла́стїю тѝ бг҃омъ да́нною смири́лъ є҆сѝ є҆го̀, да не де́рзнетъ сомнѣ́нїемъ ᲂу҆ма́лити си́лꙋ бж҃їю. и҆ ᲂу҆мꙋдре́нный свы́ше заха́рїа безмо́лвнымъ ᲂу҆́мнымъ гла́сомъ воспѣ́лъ тѝ такѡва́ѧ:

Ра́дꙋйсѧ, досто́инствъ бж҃їихъ храни́телю: ра́дꙋйсѧ, вели́кїй въ ли́цѣ а҆́гг҃льстѣмъ.

Ра́дꙋйсѧ, прекра́сное творе́нїе творца̀: ра́дꙋйсѧ, та́йнъ сокрове́нныхъ мі́рꙋ ѿкрове́нїе.

Ра́дꙋйсѧ, вели́кихъ ѻ҆бѣ́тѡвъ бж҃їихъ соверше́нїе: ра́дꙋйсѧ, пра́вды бж҃їей и҆спо́лненный.

Ра́дꙋйсѧ, блгⷣтїю бж҃їей ѡ҆сїѧ́нный.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ з҃

Хотѧ́щꙋ бг҃ꙋ воплоти́тисѧ и҆ на землѝ ꙗ҆ви́тисѧ человѣ́комъ, предста́лъ є҆сѝ, слꙋжи́телю, провозвѣ́стникомъ ко и҆збра́ннѣй ѿ вѣ́ка дѣ́вѣ и҆ ѿкры́лъ є҆сѝ є҆́й во́лю созда́вшаго ю҆̀, воспѣва́ѧ бг҃ꙋ: А҆ллилꙋ́їа.

І҆́косъ з҃

Но́вꙋю и҆ непостижи́мꙋю та́йнꙋ бг҃овоплоще́нїѧ ѿкры́лъ є҆сѝ бг҃оѻтрокови́цѣ, гаврїи́ле сла́вне, не постига́ѧ и҆ са́мъ сеѧ̀ вели́кїѧ та́йны, дивѧ́сѧ безпредѣ́льной любвѝ и҆ милосе́рдїю бж҃їю къ лю́демъ. ѡ҆ се́мъ и҆ мы̀, земноро́днїи, со стра́хомъ и҆ ра́достїю диви́мсѧ и҆ вопїе́мъ тѝ си́це:

Ра́дꙋйсѧ, совѣ́та предвѣ́чнагѡ слꙋжи́телю: ра́дꙋйсѧ, къ бг҃оневе́стѣ бг҃омъ ниспо́сланный.

Ра́дꙋйсѧ, пречⷭ҇тыѧ дв҃ы нбⷭ҇ный храни́телю: ра́дꙋйсѧ, мт҃ри бж҃їей ди́вный слꙋжи́телю.

Ра́дꙋйсѧ, бжⷭ҇твенной ѻ҆трокови́цы ᲂу҆чи́телю: ра́дꙋйсѧ, є҆ѧ̀ хлѣ́бомъ нбⷭ҇нымъ пита́телю.

Ра́дꙋйсѧ, во ст҃а́ѧ ст҃ы́хъ съ не́ю глаго́лавый: ра́дꙋйсѧ, глꙋбины̀ бж҃їѧ про́мысла є҆́й ѿкры́вый.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ и҃

Стра́ннѡ человѣ́кѡмъ зрѣ́ти ли́къ а҆́гг҃льскїй, стра́ннѡ и҆ глаго́лы нбⷭ҇ныѧ слы́шати, но ᲂу҆мꙋдре́ннаѧ бжⷭ҇твенною мꙋ́дростїю приснодв҃а, не ᲂу҆страши́ласѧ зра́ка твоегѡ̀ и҆ вознесла̀ къ творцꙋ̀ и҆ бг҃ꙋ пѣ́снь: А҆ллилꙋ́їа.

І҆́косъ и҃

Ве́сь бѣ̀ въ ни́жнихъ, ᲂу҆зрѣ́лъ є҆сѝ бг҃оѻтрокови́цꙋ вы́сшꙋю чинѡ́въ а҆́гг҃льскихъ, гаврїи́ле, и҆ трепе́ща ѿкры́лъ є҆сѝ є҆́й во́лю влⷣки, и҆ ᲂу҆жаса́ѧсѧ та́йнѣ бг҃овоплоще́нїѧ, и҆спо́лнисѧ бл҃гоговѣ́нїѧ къ бг҃оизбра́нной дв҃ѣ. ви́дѧще вели́кое твоѐ слꙋже́нїе прⷭ҇то́лꙋ и҆ зрѧ́ще неизглаго́ланное смире́нїе твоѐ пред̾ дв҃ою, пое́мъ тѝ си́це:

Ра́дꙋйсѧ, первопрїе́мниче сїѧ́нїй трⷪ҇чєскїхъ: ра́дꙋйсѧ, сїѧ́ньми тѣ́ми ѡ҆сїѧ́нный.

Ра́дꙋйсѧ, бл҃года́ти и҆спо́лненный: ра́дꙋйсѧ, приснодв҃ѣ бл҃года́ть прине́сшїй.

Ра́дꙋйсѧ, въ ли́цѣ а҆́гг҃лѡвъ вы́сшихъ: ра́дꙋйсѧ, пред̾ дв҃ою мр҃і́ею колѣ̑на склони́вшїй.

Ра́дꙋйсѧ, и҆збра́ннѣй ра́дость возвѣсти́вый: ра́дꙋйсѧ, и҆ са́мъ се́й ра́дости возра́довавыйсѧ.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ ѳ҃

Всѧ́кїй чи́нъ а҆́гг҃льскїй превосходѧ̀, ты̀ пред̾ бжⷭ҇твенною земноро́дною бг҃оѻтрокови́цею смире́ннѡ предстои́ши, взыва́ѧ ра́достїю творцꙋ̀ бг҃ꙋ: А҆ллилꙋ́їа.

І҆́косъ ѳ҃

Виті̑йства многовѣща́нныѧ всѣ́хъ виті́й человѣ́ческихъ ничто̀ сꙋ́ть пред̾ безгла́сною ве́твью ра́йскою, тобо́ю принесе́нною, є҆гда̀ воспѣ́лъ є҆сѝ ст҃ꙋ́ю дв҃ꙋ, благовѣствꙋ́ѧ є҆́й и҆збра́нїе є҆ѧ̀ бы́ти бг҃ома́терїю и҆ па́ки возвѣща́ѧ сп҃си́тельное ᲂу҆спе́нїе є҆ѧ̀. твое́й вели́кой мꙋ́дрости ᲂу҆диви́шасѧ землѧ̀ и҆ возопѝ:

Ра́дꙋйсѧ, смире́нїѧ ᲂу҆чи́телю: ра́дꙋйсѧ, вели́кихъ та́йнъ бг҃отво́рческихъ зри́телю.

Ра́дꙋйсѧ, ве́твью чистотꙋ̀ мт҃редвⷭ҇тва пречⷭ҇тыѧ знамена́вый: ра́дꙋйсѧ, благоꙋха́нїемъ кри́на ра́йскагѡ благоꙋха́нїе дꙋшѝ чистѣ́йшїѧ показа́вый.

Ра́дꙋйсѧ, неꙋвѧда́нїем цвѣ́та нбⷭ҇нагѡ неꙋвѧда́емость жи́зни бг҃омт҃ри предвѣща́вый: ра́дꙋйсѧ, смире́нной ве́твью смире́нїе вѣ́тви црⷭ҇твеннѣй восхвали́вый.

Ра́дꙋйсѧ, красото́ю цвѣ́та нбⷭ҇нагѡ дх҃о́внꙋю красотꙋ̀ приснодѣ́вы воспѣ́вый: ра́дꙋйсѧ, всю̀ сла́вꙋ дв҃ы мр҃і́и си́мъ и҆з̾ѡбрази́вый.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ і҃

Сп҃се́нїе дꙋ́шъ человѣ́ческихъ предвозвѣща́ѧ, а҆рха́гг҃ле бж҃їй, наꙋчи́лъ є҆сѝ на́съ воспѣва́ти бг҃ꙋ: А҆ллилꙋ́їа.

І҆́косъ і҃

Стѣна̀ грѣхо́внаѧ междꙋ̀ нб҃омъ и҆ земле́ю не загради́ла пꙋ́ть тебѣ̀, а҆рха́гг҃ле, но ꙗ҆́кѡ ды́мъ и҆ мра́къ разсѣ́ѧсѧ пред̾ ст҃остїю твое́ю и҆ ты̀ предста́лъ є҆сѝ пречⷭ҇тѣй дв҃ѣ благовѣ́стникомъ нбⷭ҇нымъ въ назаре́тѣ, вѣща́ѧ: ра́дꙋйсѧ, прине́слъ є҆сѝ є҆́й, си́мъ ра́дость воскрⷭ҇нїѧ хрⷭ҇то́ва возвѣща́ѧ, и҆ ра́ди ра́дости возвѣще́нной тобо́ю дв҃ѣ, и҆ чрез̾ дѣ́вꙋ мі́рꙋ, мі́ръ принестѝ тебѣ̀ дерза́етъ:

Ра́дꙋйсѧ, ра́дости мі́рꙋ вѣща́нїе: ра́дꙋйсѧ, бж҃їихъ дарѡ́въ раздаѧ́нїе.

Ра́дꙋйсѧ, гаврїи́ле, свѣти́льниче свѣтоза́рный: ра́дꙋйсѧ, дрꙋ́гъ и҆ сослꙋжи́тель вели́кагѡ а҆рхїстрати́га мїхаи́ла.

Ра́дꙋйсѧ, ѕвѣздо̀, ꙗ҆вле́нїе сл҃нца хрⷭ҇та̀ возвѣсти́вый: ра́дꙋйсѧ, мно́гажды бжⷭ҇твеннѣй мт҃ри є҆гѡ̀ послꙋжи́вый.

Ра́дꙋйсѧ, вели́кихъ ѡ҆бѣтова́нїй бж҃їихъ соверши́телю: ра́дꙋйсѧ, ꙗ҆́кѡ ты̀ при гро́бѣ: воскре́се хрⷭ҇то́съ, нѣ́сть здѣ̀, мѷроно́сицамъ возвѣстѝ.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ а҃і

Пѣ́снь ликѡ́въ а҆́гг҃льскихъ прине́слъ є҆сѝ землѣ̀ ты̀, а҆рха́гг҃ле, и҆ вѣща́ти бл҃гоговѣ́йное, досто́йнѡ, а҆ѳѡ́нскїѧ горы̀ и҆́нока наꙋчи́лъ є҆сѝ, и҆ наꙋче́ннїи тобо́ю чрез̾ того̀ лю́дїе бл҃года́рнѡ ѡ҆ се́мъ воспѣ́ша бг҃ꙋ: А҆ллилꙋ́їа.

І҆́косъ а҃і

Свѣтоза́рный ли́къ сво́й сокры́лъ є҆сѝ ты̀, гаврїи́ле, ѡ҆бле́кшисѧ ѡ҆де́ждою и҆́ноческою, дабы̀ не ᲂу҆жаснꙋ́лсѧ сме́ртный бг҃олѣ́пнагѡ зра́ка твоегѡ̀, но ᲂу҆мꙋдри́лсѧ бы пости́гнꙋти и҆ ᲂу҆ѧсни́ти себѣ̀ пѣснопѣ́нїе нбⷭ҇ное, и҆ да не мни́тсѧ пре́лестїю лꙋка́вагѡ и҆́нокꙋ смире́нномꙋ ꙗ҆вле́нїе чинонача́льника си́лъ вы́шнихъ бы́ти, ᲂу҆достовѣ́рити и҆́стинꙋ ꙗ҆вле́нїѧ твоегѡ̀ возжела́лъ є҆сѝ. сегѡ̀ ра́ди, ка́мень ве́лїй взе́мше, на не́мъ пе́рстомъ безпло́тнымъ, ꙗ҆́кѡ по во́скꙋ, начерта́лъ є҆сѝ нбⷭ҇ное: досто́йнѡ. ᲂу҆ви́дѣвъ чꙋ́до сїѐ ве́лїе, всѝ и҆́ноцы а҆ѳѡ́нскїѧ горы̀ воспѣ́ша тѝ согла́снѡ:

Ра́дꙋйсѧ, бж҃їй слꙋжи́телю: ра́дꙋйсѧ, бжⷭ҇твенный а҆рха́гг҃ле.

Ра́дꙋйсѧ, бл҃говѣ́стниче преди́вный: ра́дꙋйсѧ, бг҃оѻтрокови́цы храни́телю.

Ра́дꙋйсѧ, земноро́дныхъ пѣ́сне нбⷭ҇нѣй наꙋчи́вый: ра́дꙋйсѧ, са́мъ пре́жде пѣ́снь сїю̀ ди́внꙋю пред̾ и҆́нокомъ воспѣ́вый.

Ра́дꙋйсѧ, бжⷭ҇твенныѧ слова̀ чꙋ́днѡ на ка́мени начерта́вый: ра́дꙋйсѧ, се́й ка́мень въ зало́гъ и҆́стиннагѡ зна́менїѧ твоегѡ̀ горѣ̀ а҆ѳѡ́нстѣй да́вый.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ в҃і

Благода́тныѧ твоѧ̑ ꙗ҆влє́нїѧ воспомина́ѧ, бл҃годаре́нїе прино́симъ творцꙋ̀ и҆ бг҃ꙋ, сп҃са́ющемꙋ ро́дъ человѣ́ческїй, и҆ пое́мъ бг҃ꙋ ᲂу҆се́рднѡ: А҆ллилꙋ́їа.

І҆́косъ в҃і

Пою́ще всѐ на́мъ вѣ́дѡмыѧ, гаврїи́ле, до́блєсти твоѧ̑, невѣ́дѡмыѧ же ча́емъ за предста́тельство твоѐ ѡ҆ на́съ ᲂу҆вѣ́дѣти въ нбⷭ҇номъ црⷭ҇твїи. ны́нѣ же по си́лѣ на́шей дерза́емъ тѝ воспѣ́ти:

Ра́дꙋйсѧ, совѣ́та превѣ́чнагѡ ст҃ы́ѧ трⷪ҇цы предначерта́нїѧ прїѧ́вшїй: ра́дꙋйсѧ, домострои́тельства бж҃їѧ всѐ пла́ны ѡ҆хранѧ́вый.

Ра́дꙋйсѧ, ѡ҆хране́нїемъ ѻ҆́ныхъ творцꙋ̀ слꙋжи́вый: ра́дꙋйсѧ, мі́рꙋ сп҃се́нїе возвѣсти́вый.

Ра́дꙋйсѧ, мт҃ри бж҃їей храни́телю: ра́дꙋйсѧ, цр҃кви хрⷭ҇то́вой блюсти́телю.

Ра́дꙋйсѧ, и҆ втора́гѡ прише́ствїѧ хрⷭ҇то́ва на зе́млю возвѣсти́телю: ра́дꙋйсѧ, ꙗ҆́кѡ ты̀ пред̾и́деши си́ламъ нбⷭ҇нымъ съ вели́кимъ трꙋ́бнымъ гла́сомъ въ де́нь стра́шнагѡ сꙋда̀ бж҃їѧ.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ г҃і

Ѽ ди́вный тайнови́дче и҆ пресла́вный а҆рха́гг҃ле, вели́кѡ дерзнове́нїе твоѐ пред̾ гдⷭ҇омъ и҆ си́льна мл҃тва твоѧ̀. припа́даемъ къ тебѣ̀ и҆ мо́лимъ, гаврїи́ле пречꙋ́дне, прїимѝ на́съ немощны́хъ под̾ кро́въ кри́лъ твои́хъ и҆ защитѝ ѿ ко́зней врагѡ́въ ви́димыхъ и҆ неви́димыхъ. помѧнѝ на́съ недосто́йныхъ въ твое́мъ предста́тельствѣ пред̾ прⷭ҇то́ломъ всевы́шнѧгѡ, да воспое́мъ є҆мꙋ̀ по неизрече́нномꙋ млⷭ҇рдїю є҆гѡ̀ въ црⷭ҇твѣ сла́вы съ ликѡ́мъ а҆́гг҃лѡвъ и҆ всѣ́ми ст҃ы́ми: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ и҆ всѧ́ческихъ и҆збра̀ тѧ̀, тайнови́дче гаврїи́ле, въ пречꙋ́днѣмъ совѣ́тѣ ст҃ы́ѧ трⷪ҇цы, да послꙋ́жиши та́йнѣ бг҃овоплоще́нїѧ, и҆ повелѣ̀ бы́ти тебѣ̀ носи́телемъ си́лы и҆ чꙋде́съ бж҃їихъ. сегѡ̀ ра́ди вопїе́мъ тѝ си́це:

Ра́дꙋйсѧ, гаврїи́ле, и҆збра́нный творцо́мъ слꙋжи́телю: ра́дꙋйсѧ, гаврїи́ле, промышле́нїѧ бж҃їѧ носи́телю.

Ра́дꙋйсѧ, ꙗ҆́кѡ тобо́ю хва́лѧтсѧ си́лы нбⷭ҇ныѧ: ра́дꙋйсѧ, ꙗ҆́кѡ тебѐ сла́вѧтъ сердца̀ земноро́дныхъ.

Ра́дꙋйсѧ, вѣ́рнѡ послꙋжи́вый прⷭ҇то́лꙋ ст҃ы́ѧ трⷪ҇цы: ра́дꙋйсѧ, со дрꙋ́ги свои́ми сокрꙋши́вый и҆ и҆зри́нꙋвый денни́цꙋ.

Ра́дꙋйсѧ, ѡ҆бличи́вый заблꙋждє́нїѧ тогѡ̀: ра́дꙋйсѧ, и҆з̾ пе́рвыхъ пѣ́снь трист҃ꙋ́ю воспѣ́вый.

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Конда́къ а҃

И҆збра́нный бг҃омъ ѿ всѣ́хъ нбⷭ҇ныхъ си́лъ послꙋжи́ти предвѣ́чной та́йнѣ сп҃се́нїѧ ро́да человѣ́ческагѡ, ди́вный предстоѧ́телю прⷭ҇то́лꙋ ст҃ы́ѧ трⷪ҇цы, носи́телю та́йнъ и҆ чꙋде́съ бж҃їихъ, а҆рха́гг҃ле гаврїи́ле, къ тебѣ̀ припа́даемъ и҆ ᲂу҆миле́ннѡ воспѣва́емъ тѝ:

Ра́дꙋйсѧ, гаврїи́ле, тайнозри́телю ст҃ы́ѧ трⷪ҇цы.

Моли́твы

Ѽ, ст҃ы́й вели́кїй а҆рха́гг҃ле гаврїи́ле, бж҃їю прⷭ҇то́лꙋ предстоѧ́й и҆ ѡ҆заре́нїемъ ѿ бжⷭ҇твеннагѡ свѣ́та ѡ҆сїѧ́нный, вѣ́дѣнїемъ же непостижи́мыхъ та́йнъ ѡ҆ превѣ́чнѣй премꙋ́дрости є҆гѡ̀ просвѣще́нный! всеꙋсе́рднѡ молю̀ тѧ̀, наста́ви мѧ̀ къ покаѧ́нїю ѿ ѕлы́хъ дѣ́лъ и҆ ко ᲂу҆твержде́нїю въ вѣ́рѣ мое́й, ᲂу҆крѣпѝ и҆ ѡ҆градѝ дꙋ́шꙋ мою̀ ѿ и҆скꙋше́нїй прельсти́тельныхъ и҆ ᲂу҆молѝ созда́телѧ на́шего ѡ҆ ѿпꙋще́нїи грѣхѡ́въ мои́хъ.

Ѽ, ст҃ы́й вели́кїй гаврїи́ле а҆рха́гг҃ле! не пре́зри менѐ грѣ́шнаго молѧ́щаго тебѐ ѡ҆ по́мощи и҆ застꙋпле́нїи твое́мъ въ вѣ́цѣ се́мъ и҆ въ бꙋ́дꙋщемъ, но при́снѡ помо́щникъ мнѣ̀ ꙗ҆ви́сѧ, да непреста́ннѡ сла́влю ѻ҆ц҃а̀ и҆ сн҃а и҆ ст҃а́гѡ дх҃а держа́вꙋ и҆ твоѐ предста́тельство во вѣ́ки вѣкѡ́въ. А҆ми́нь.