Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ а҆рха́гг҃лꙋ гаврїи́лꙋ.

Собор Архангела Гавриила 26 июля 2026

Конда́къ а҃

И҆збра́ннаго а҆рха́гг҃ла, при́снѡ предстоѧ́телѧ прⷭ҇то́лꙋ вседержи́телѧ, таи́нника блгⷣти, и҆ ра́дости бл҃говѣ́стника, всечестна́го гаврїи́ла, пречи́стыѧ дв҃ы невѣстокраси́телѧ, пѣ́нїемъ похва́льнымъ благоче́стнѡ почти́мъ, со благодаре́нїемъ є҆мꙋ̀ зовꙋ́ще:

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

І҆́косъ а҃

А҆́гг҃лъ безпло́тный є҆стество́мъ бы́сть, сла́вы присносꙋ́щныѧ и҆ вѣ́чныѧ премꙋ́дрости въ созда́нїи ми́ра зри́тель ꙗ҆ви́лсѧ є҆сѝ, а҆рха́гг҃ле. сегѡ̀ ра́ди тебѣ̀ вопїе́мъ:

Ра́дꙋйсѧ, и҆́менемъ твои́мъ си́лꙋ бж҃їю возвѣща́ѧй: ра́дꙋйсѧ, ди́вною красото́ю твое́ю неизрече́ннꙋю сла́вꙋ бж҃їю ꙗ҆влѧ́ѧй.

Ра́дꙋйсѧ, дꙋ́ше невеще́ственный, свобо́дный ѿ ᲂу҆́зъ теле́снагѡ є҆стества̀: ра́дꙋйсѧ, свѣ́тлый ᲂу҆́ме, подо́бїе неви́димагѡ бжⷭ҇тва̀.

Ра́дꙋйсѧ, бжⷭ҇твеннагѡ ра́зꙋма вмести́лище: ра́дꙋйсѧ, неизрече́нныхъ та́йнъ сокро́вище.

Ра́дꙋйсѧ, первосїѧ́ннагѡ свѣ́та чистѣ́йшїй лꙋчѐ: ра́дꙋйсѧ, пла́менемъ бжⷭ҇твенныѧ любвѝ горѧ́щаѧ свѣща̀.

Ра́дꙋйсѧ, прⷭ҇то́ла бж҃їѧ предста́телю: ра́дꙋйсѧ, сла́вы гдⷭ҇ней созерца́телю.

Ра́дꙋйсѧ, на́съ земноро́дныхъ ᲂу҆тѣше́нїе.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ в҃

Ви́дѧще тѧ̀, ꙗ҆́кѡ ѕвѣздꙋ̀ лꙋчеза́рнꙋю, бл҃гоꙋкраше́ннаго нб҃сѐ разꙋ́мнаго, созда́ннаго пре́жде ви́димагѡ нб҃сѐ и҆ землѝ, а҆рха́гг҃ле, да вопїе́мъ съ тобо́ю творцꙋ̀ бг҃ꙋ: А҆ллилꙋ́їа.

І҆́косъ в҃

Ра́зꙋмъ тво́рческїй созерца́ѧ въ творе́нїи нб҃сѐ и҆ землѝ, и҆ всегѡ̀ ᲂу҆краше́нїѧ и҆́хъ, бл҃гоговѣ́йнѡ предстоѧ́лъ є҆сѝ, а҆рха́гг҃ле, прⷭ҇то́лꙋ созда́телѧ: є҆гда́ же сотворе́ны бы́ша ѕвѣ̑зды, ве́лїимъ гла́сомъ восхвали́лъ є҆сѝ того̀ со всѣ́ми нбⷭ҇ными си́лами. тѣ́мъ же и҆ мы̀ тебѣ̀ вопїе́мъ:

Ра́дꙋйсѧ, не́бо невеще́ственное, сла́вꙋ бж҃їю повѣ́дающее: ра́дꙋйсѧ, свѣти́ло дꙋхо́вное, бла́гость творца̀ возвѣща́ющее.

Ра́дꙋйсѧ, ѕвѣздо̀, пре́жде ви́димаго свѣ́та возсїѧ́вшаѧ: ра́дꙋйсѧ, пресвѣ́тлаѧ лꙋно̀, ѡ҆би́лїе бл҃года́ти, па́че и҆ны́хъ мно́гихъ а҆́гг҃лъ воспрїи́мшаѧ.

Ра́дꙋйсѧ, зерца́ло бжⷭ҇твеннагѡ ѿкрове́нїѧ: ра́дꙋйсѧ, споспѣ́шнице дꙋхо́внагѡ просвѣще́нїѧ.

Ра́дꙋйсѧ, первоа́гг҃ле, та̑йны бж҃їѧ ѿкрыва́ѧй: ра́дꙋйсѧ, свѣ́те вторы́й, пою́щыѧ тѝ вѣ́рныѧ просвѣща́ѧй.

Ра́дꙋйсѧ, чистѣ́йшаѧ пла́меннаѧ къ бг҃ꙋ любвѐ: ра́дꙋйсѧ, немѡ́лчныѧ ᲂу҆ста̀ тогѡ̀ хвале́нїѧ.

Ра́дꙋйсѧ, ѻ҆гне́мъ бл҃года́ти серде́чныѧ на́съ согрѣва́ющаѧ: ра́дꙋйсѧ, зно́й страсте́й те́мъ ѿража́ѧй.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ г҃

Си́лѣ бж҃їей тезоимени́тъ сы́й, спобо́рникъ ꙗ҆ви́лсѧ є҆сѝ, а҆рха́гг҃ле пресвѣ́тлагѡ нбⷭ҇нагѡ во́инства, а҆рхїстрати́гꙋ мїхаи́лꙋ проти́вꙋ па́дшихъ мра́чныхъ дꙋхѡ́въ. пребы́въ же вѣ́ренъ гдⷭ҇ꙋ созда́телю съ про́чими безпло́тными чи́нми, взыва́лъ є҆сѝ томꙋ̀ трист҃ꙋ́ю пѣ́снь. є҆мꙋ̀ же и҆ мы̀ съ тобо́ю вопїе́мъ: А҆ллилꙋ́їа.

І҆́косъ г҃

И҆мѣ́ѧ бл҃года́ть неѿе́млемꙋ ра́ди вѣ́рности твое́й гдⷭ҇ꙋ, во вѣ́ки пребыва́еши ᲂу҆твержда́емъ во благо́мъ и҆зволе́нїи. тѣ́мже въ похвалꙋ̀ вопїе́мъ тебѣ̀ си́це:

Ра́дꙋйсѧ, не и҆змѣни́вый твоегѡ̀ благода́тнагѡ стоѧ́нїѧ: ра́дꙋйсѧ, не ѡ҆ста́вивый бл҃же́ннагѡ го́рнѧгѡ пребыва́нїѧ.

Ра́дꙋйсѧ, предстоѧ́телю безпло́тныхъ, велѣ̑нїѧ бж҃їѧ и҆сполнѧ́ѧй: ра́дꙋйсѧ, преди́внымъ смире́нїемъ ᲂу҆кра́шенный.

Ра́дꙋйсѧ, бж҃їею блгⷣтїю навѣ́ки ᲂу҆твержде́нный: ра́дꙋйсѧ, ѻ҆́гненною, никогда̀ не ѿпа́дающею любо́вїю ко гдⷭ҇ꙋ пыла́ѧй.

Ра́дꙋйсѧ, нбⷭ҇нагѡ хлѣ́ба а҆́гг҃льскагѡ при́снѡ вкꙋша́ѧй: ра́дꙋйсѧ, нбⷭ҇ныхъ ᲂу҆чи́телю, хвалє́бныхъ созда́телю пѣ́сней.

Ра́дꙋйсѧ, вы́шнихъ рꙋководи́телю, возводѧ́ѧй на́съ къ сла́вѣ нбⷭ҇нѣй: ра́дꙋйсѧ, чинонача́льниче немо́лчнагѡ а҆́гг҃льскагѡ ликостоѧ́нїѧ.

Ра́дꙋйсѧ, ᲂу҆веселе́нїе и҆ ᲂу҆слажде́нїе и҆мꙋ́щымъ сегѡ̀ блаже́ннагѡ достоѧ́нїѧ.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ д҃

Бꙋ́рю помышле́нїй сꙋмни́тельныхъ свѣ́тѡмъ бжⷭ҇твенныѧ блгⷣти прогонѧ́ѧй, прино́сиши свы́ше, а҆рха́гг҃ле, ми́ръ въ сердца̀ на̑ша. тѣ́мже благода́рнѡ, прославлѧ́юще бл҃годѣѧ́нїѧ твоѧ̑, воспѣва́емъ сп҃си́телю бг҃ꙋ пѣ́снь: А҆ллилꙋ́їа.

І҆́косъ д҃

Слы́шаще бг҃овдохновє́нныѧ сказа̑нїѧ прⷪ҇ро́ка мѡѷсе́а ѡ҆ нача́лѣ мїробы́тїѧ и҆ пѡ́вѣсти ѡ҆ пе́рвыхъ ро́дѣхъ, ᲂу҆чи́телѧ того̀ бл҃гоче́стнѡ разꙋмѣ́емъ тѧ̀, а҆рха́гг҃ле, ꙗ҆́кѡ повеле́нїемъ бж҃їимъ недоꙋвѣ̑данныѧ та̑йны томꙋ̀ ѿкры́лъ є҆сѝ. сегѡ̀ ра́ди въ похвалꙋ̀ тебѣ̀ вопїе́мъ:

Ра́дꙋйсѧ, свѣтоза́рнаѧ ѕвѣздо̀, ѡ҆блистава́емаѧ ѿ трисо́лнечнагѡ бжⷭ҇тва̀: ра́дꙋйсѧ, сла́внагѡ и҆з̾ѻби́лїемъ блгⷣти ᲂу҆краше́нїе созда́ннагѡ є҆стества̀.

Ра́дꙋйсѧ, слꙋже́бный дꙋшѐ, на сп҃се́нїе человѣ́кѡмъ ѿ бг҃а посыла́емый: ра́дꙋйсѧ, свѣти́льниче бж҃їихъ ѿкрове́нїй, на землѝ ꙗ҆влѧ́емый.

Ра́дꙋйсѧ, пла́мень ѻ҆́гненный, пле́велы лжѝ и҆ сꙋевѣ́рїѧ попалѧ́ѧй: ра́дꙋйсѧ, мечꙋ̀ дꙋхо́вный, те́рнїе невѣ́рїѧ и҆ безбж҃їѧ сло́вомъ и҆́стины посѣка́ѧй.

Ра́дꙋйсѧ, и҆́стиннагѡ разꙋмѣ́нїѧ словесѐ бж҃їѧ нбⷭ҇ный ᲂу҆чи́телю: ра́дꙋйсѧ, вели́чїѧ та́йны сп҃се́нїѧ пред̾ѡпредѣле́нный слꙋжи́телю.

Ра́дꙋйсѧ, таи́нниче, под̾ и҆́менемъ первозда́ннаго нб҃сѐ, неви́димый мі́ръ а҆́гг҃льскїй прикрове́ннѡ чрез̾ бытописа́нїе на́мъ ᲂу҆казꙋ́ѧй: ра́дꙋйсѧ, въ тво́рчестѣмъ сло́вѣ бж҃їемъ всемогꙋ́щее ѵ҆поста́сное сло́во бж҃їе на́мъ показꙋ́ѧй.

Ра́дꙋйсѧ, въ созда́нїи человѣ́ка, и҆ въ наро́читыхъ бжⷭ҇твенныхъ словесѣ́хъ, дѣ́йствїѧхъ и҆ въ ветхозавѣ́тныхъ ѡ҆́бразѣхъ, та́йнꙋ прест҃ы́ѧ трⷪ҇цы на́мъ ꙗ҆влѧ́ѧй: ра́дꙋйсѧ, въ бж҃їихъ ѡ҆бѣтова́нїѧхъ дре́внимъ патрїа́рхѡмъ нача́ло на́шегѡ сп҃се́нїѧ возвѣща́ѧй.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ є҃

Бг҃оте́чнаѧ стрꙋѧ̀ ѿкрове́нїй бжⷭ҇твенныхъ ꙗ҆ви́лсѧ є҆сѝ, а҆рха́гг҃ле, и҆ въ послѣ́днѣмъ прⷪ҇ро́ческомъ ро́дѣ, ꙗ҆́снѡ назна́менꙋѧ прⷪ҇ро́кꙋ данїи́лꙋ ѡ҆ послѣ́днихъ временѣ́хъ, царе́хъ и҆ ца́рствїихъ. ѡ҆ се́мъ вопїе́мъ ди́вномꙋ въ сꙋдьба́хъ свои́хъ царю̀ царе́й бг҃ꙋ хвале́бнꙋю пѣ́снь: А҆ллилꙋ́їа.

І҆́косъ є҃

Ви́дѧще и҆сполне́нїе ꙗ҆́сныхъ прⷪ҇ро́чествъ твои́хъ, а҆рха́гг҃ле, ѡ҆ бꙋ́дꙋщемъ ѡ҆свобожде́нїи ветхозавѣ́тнаго і҆и҃лѧ ѿ плѣ́на вавѷлѡ́нскагѡ, и҆ ѡ҆ ꙗ҆вле́нїи по си́хъ въ мі́рѣ хрⷭ҇та̀ влⷣки. мы́ же, ꙗ҆́кѡ бг҃оизбра́нный і҆и҃ль бл҃гоговѣ́йнѡ благодарѧ́ще свободи́телѧ дꙋ́шъ на́шихъ похва́льнꙋю пѣ́снь тебѣ̀ прино́симъ:

Ра́дꙋйсѧ, бжⷭ҇твеннагѡ свѣ́та селе́нїе: ра́дꙋйсѧ, на́шихъ мы́слей ѡ҆заре́нїе.

Ра́дꙋйсѧ, бꙋ́дꙋщихъ сꙋде́бъ бж҃їихъ ꙗ҆снѡзри́телю: ра́дꙋйсѧ, и҆спытꙋ́ющихъ свидѣ̑нїѧ гдⷭ҇нѧ тайноꙋчи́телю.

Ра́дꙋйсѧ, вождє́мъ бл҃гочести̑вымъ на врагѝ ѡ҆долѣ́нїе подава́ѧй: ра́дꙋйсѧ, мꙋ̑дрымъ прави́телємъ бжⷭ҇твенное ѿкрове́нїе ꙗ҆влѧ́ѧй.

Ра́дꙋйсѧ, коне́чное посрамле́нїе ꙗ҆зы́ческагѡ нече́стїѧ въ ра́дости возвѣсти́вый: ра́дꙋйсѧ, мꙋ́же жела́нїй дꙋхо́вныхъ грѧдꙋ́щихъ, свобожде́нїемъ і҆и҃лѧ возвесели́вый.

Ра́дꙋйсѧ, возрожде́нїе і҆ерⷭ҇ли́ма, и҆ возсозда́нїе ст҃а́гѡ хра́ма пред̾ꙋказа́вый: ра́дꙋйсѧ, прише́ствїе хрⷭ҇та̀ мессі́и ꙗ҆́снѡ назнаменова́вый.

Ра́дꙋйсѧ, седми́нами и҆счи́сливый вре́мѧ сп҃си́тельныѧ сме́рти хрⷭ҇та̀: ра́дꙋйсѧ, ѿкрове́нїемъ твои́мъ ветхозавѣ́тномꙋ сыно́внемꙋ бг҃ослꙋже́нїю коне́цъ наста̀.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ ѕ҃

Проповѣ́дникъ всемі́рный ра́достныѧ вѣ́сти ѡ҆ сп҃си́телѣ бы́лъ є҆сѝ, а҆рха́гг҃ле, є҆гда̀ бо прибли́зисѧ седми́нами ст҃о́мꙋ прⷪ҇ро́кꙋ данїи́лꙋ возвѣще́нное вре́мѧ ꙗ҆вле́нїе хрⷭ҇та̀ мессі́и, по́сланъ бы́сть є҆сѝ къ сѣ́тꙋющымъ ѡ҆ непло́дствѣ свое́мъ роди́телємъ бг҃омт҃ри, возвѣсти́ти и҆́мъ ѡ҆ рожде́нїи благослове́нныѧ дще́ри, пред̾избра́ннѣй ѿ вѣкѡ́въ мт҃ри мессі́и хрⷭ҇та̀, хотѧ́щагѡ прїитѝ на и҆збавле́нїе человѣ́чества, є҆мꙋ̀ же съ тобо́ю вопїе́мъ: А҆ллилꙋ́їа.

І҆́косъ ѕ҃

Возсїѧ̀ тобо́ю, а҆рха́гг҃ле, сѣ́тꙋющымъ роди́телємъ бг҃оѻтрокови́цы ᲂу҆тѣше́нїе ѡ҆ ско́ромъ разрѣше́нїи непло́дства и҆́хъ, рожде́нїемъ пребл҃гослове́нныѧ. прїе́мъ ѿ ни́хъ ᲂу҆́бѡ ве́лїе благодаре́нїе, прїимѝ и҆ ѿ на́съ сицевꙋ́ю похвалꙋ̀:

Ра́дꙋйсѧ, свѣ́тлое зерца́ло бж҃їѧ бла́гости: ра́дꙋйсѧ, нбⷭ҇ный вѣ́стниче сп҃си́тельныѧ ра́дости.

Ра́дꙋйсѧ, бжⷭ҇твенный вѣ́стниче, носи́телю вы́шнѧгѡ мі́ра благослове́нїѧ: ра́дꙋйсѧ, ско́рый прогони́телю дꙋше́внагѡ смꙋще́нїѧ.

Ра́дꙋйсѧ, блꙋжда́ющымъ во тьмѣ̀, бг҃овѣ́дѣнїѧ внеза́пное ѡ҆заре́нїе: ра́дꙋйсѧ, сѣдѧ́щымъ въ сме́ртной сѣ́ни ᲂу҆ны́нїѧ, благода́тное ѡ҆живле́нїе.

Ра́дꙋйсѧ, ѡ҆бра́дователю смире́нныхъ и҆ ᲂу҆ничиже́нныхъ: ра́дꙋйсѧ, ᲂу҆тѣ́шителю презрѣ́нныхъ и҆ ѿве́рженныхъ.

Ра́дꙋйсѧ, смертоно́сныѧ печа́ли мі́ра сегѡ̀ прогони́телю: ра́дꙋйсѧ, сп҃си́тельныѧ по бз҃ѣ печа́ли возбꙋди́телю.

Ра́дꙋйсѧ, ѿ находѧ́щыѧ ско́рби и҆збавлѧ́ѧй: ра́дꙋйсѧ, ᲂу҆пова́ющыѧ на гдⷭ҇а возвеселѧ́ѧй.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ з҃

Хотѧ́ще ꙗ҆снѣ́е ѡ҆зари́ти пꙋ́ть вѣ́ры восходѧ́щемꙋ со́лнцꙋ пра́вды, хрⷭ҇тꙋ̀ спаси́телю, гдⷭ҇ь посла̀ тѧ̀, а҆рха́гг҃ле, бл҃говѣсти́ти та́кожде и҆ і҆ере́ю заха́рїи ѡ҆ рожде́нїи ѿ негѡ̀ вели́кагѡ і҆ѡа́нна, предте́чи сп҃сова. ѡ҆ се́мъ ᲂу҆́бѡ ра́дꙋющесѧ вопїе́мъ бг҃ꙋ: А҆ллилꙋ́їа.

І҆́косъ з҃

Ди́вномꙋ прⷪ҇ро́ческомꙋ словесѝ твоемꙋ̀ ѡ҆ рожде́нїи предте́чи невѣ́рїе показа́вши тогѡ̀ роди́тель нѣмото́ю свѧ́занъ бы́сть ѿ тебє̀, а҆рха́гг҃ле. мы́ же и҆сполне́нїе прⷪ҇ро́чества ви́дѧще, похвалꙋ̀ тебѣ̀ си́це вопїе́мъ:

Ра́дꙋйсѧ, ѕвѣздо̀ свѣтоза́рнаѧ, разгонѧ́ющаѧ мра́къ проше́дшыѧ но́чи сме́ртныѧ: ра́дꙋйсѧ, денни́це, вѣща́ющаѧ невече́рнїй де́нь благода́ти но́выѧ.

Ра́дꙋйсѧ, зача́ло є҆ѵⷢ҇лїа і҆ере́ю заха́рїи предвозвѣсти́вый: ра́дꙋйсѧ, прославлѧ́ти гдⷭ҇а разрѣше́нїемъ ꙗ҆зы́ка послѣ́днѧгѡ наꙋчи́вый.

Ра́дꙋйсѧ, пꙋтѝ ко грѧдꙋ́щемꙋ сп҃си́телю нбⷭ҇ный ᲂу҆гото́вителю: ра́дꙋйсѧ, сѣ́мена спаси́тельныѧ вѣ́ры въ того̀ на землѝ насади́телю.

Ра́дꙋйсѧ, бжⷭ҇твеннагѡ всемогꙋ́щества ре́вностный показа́телю: ра́дꙋйсѧ, всѧ́кагѡ сомнѣ́нїѧ въ то́мъ стро́гїй наказа́телю.

Ра́дꙋйсѧ, це́ркви ветхозавѣ́тныѧ невѣстоводи́телю: ра́дꙋйсѧ, грѧдꙋ́щагѡ жениха̀ хрⷭ҇та̀ бл҃говѣсти́телю.

Ра́дꙋйсѧ, заверши́телю прⷪ҇ро́ческагѡ въ ве́тхомъ завѣ́тѣ ѿкрове́нїѧ: ра́дꙋйсѧ, пе́рвый возвѣсти́телю є҆ѵⷢ҇льскагѡ въ но́вомъ завѣ́тѣ и҆сполне́нїѧ.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ и҃

Къ бг҃оѻтрокови́цѣ марі́и, чꙋде́снѡ рожде́ннѣй ѿ непло́дове, храни́телемъ ѿ бг҃а приста́вленъ бы́лъ є҆сѝ, вели́кїй а҆рха́гг҃ле, и҆ во хра́мѣ бж҃їемъ сїю̀ дꙋхо́внѡ и҆ тѣле́снѡ пита́лъ є҆сѝ, на всѧ́къ де́нь пи́щꙋ приносѧ̀ є҆́й и҆ поꙋча́ѧ непреста́ннѡ пѣ́ти бг҃ꙋ: А҆ллилꙋ́їа.

І҆́косъ и҃

Ве́сь мі́ръ нбⷭ҇ный и҆ земны́й диви́тсѧ слꙋже́нїю твоемꙋ̀, а҆рха́гг҃ле, въ мѣ́сѧцъ бо шесты́й по зача́тїю вели́кагѡ предте́чи хрⷭ҇то́ва і҆ѡа́нна, по́сланъ бы́лъ є҆сѝ въ назаре́тъ съ та́инствомъ ѿ вѣ́ка сокрове́ннымъ и҆ сами́мъ а҆́гг҃лѡмъ невѣ́домымъ, благовѣсти́ти пречи́стѣй дв҃ѣ марі́и бцⷣѣ, непостижи́мое сн҃а бж҃їѧ въ не́й зача́тїе. тѣ́мже въ похвалꙋ̀ тебѣ̀, ꙗ҆́кѡ бл҃говѣ́стникꙋ на́шегѡ сп҃се́нїѧ ра́достнѡ вопїе́мъ:

Ра́дꙋйсѧ, совѣ́та предвѣ́чнагѡ ѿкрове́нїе: ра́дꙋйсѧ, та́инствъ сокрове́нныхъ ꙗ҆вле́нїе.

Ра́дꙋйсѧ, свѣтоно́сный спаси́тельный де́нь, благовѣсти́вшаѧ многосвѣ́тлаѧ зарѧ̀: ра́дꙋйсѧ, пе́рвый лꙋчѐ восходѧ́щагѡ со́лнца пра́вды, хрⷭ҇та̀ цр҃ѧ̀.

Ра́дꙋйсѧ, бжⷭ҇твенныѧ сла́вы сн҃а всевы́шнѧгѡ возвѣсти́телю: ра́дꙋйсѧ, сладча́йшагѡ и҆́мени і҆и҃са пе́рвый возгласи́телю.

Ра́дꙋйсѧ, бл҃говѣ́стниче вѣ́чнагѡ црⷭ҇тва хрⷭ҇то́ва: ра́дꙋйсѧ, сп҃си́тельный ᲂу҆тѣ́шителю человѣ́ческагѡ ро́да грѣ́шнагѡ.

Ра́дꙋйсѧ, бжⷭ҇твенныѧ на́шей вѣ́ры наста́вниче: ра́дꙋйсѧ, ᲂу҆се́рдный на́шъ ко гдⷭ҇ꙋ сп҃си́телю, моли́твенниче.

Ра́дꙋйсѧ, хотѧ́щымъ послѣ́довати сп҃се́нїѧ вы́шнїй слꙋжи́телю: ра́дꙋйсѧ, всегѡ̀ ро́да хрїстїа́нскагѡ нбⷭ҇ный покрови́телю.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ ѳ҃

Всѐ бога́тство смире́нїѧ и҆ непоро́чности ꙗ҆ви́ла є҆сѝ, приснодв҃а, є҆гда̀ смꙋти́сѧ ѡ҆ пресла́внѣмъ а҆рха́гг҃льстѣмъ привѣ́тствїи и҆ недоꙋмѣ́ющи вопроси́ла благовѣ́стника: ка́кѡ бꙋ́детъ сїѐ, и҆дѣ́же мꙋ́жа не зна́ю; ты́ же, ᲂу҆твержда́ѧ ю҆̀, ре́клъ є҆сѝ: дꙋ́хъ ст҃ы́й на́йдетъ на тѧ̀, и҆ си́ла вы́шнѧго ѡ҆сѣни́тъ тѧ̀: тѣ́мже и҆ ражда́емое свѧ́тѡ нарече́тсѧ сн҃ъ бж҃їй. томꙋ̀ ᲂу҆́бѡ покланѧ́ющесѧ съ тобо́ю вопїе́мъ: А҆ллилꙋ́їа.

І҆́косъ ѳ҃

Виті́и многовѣща́ннїи не довлѣ́ютъ къ похвалѣ̀ ди́внагѡ слꙋже́нїѧ твоегѡ̀, а҆рха́гг҃ле. мы́ же любо́вїю побѣжда́еми, па́ки тебѣ̀ ꙗ҆́кѡ бл҃говѣ́стникꙋ на́шегѡ сп҃се́нїѧ вопїе́мъ:

Ра́дꙋйсѧ, нбⷭ҇ный ᲂу҆́ме, бжⷭ҇твенныхъ ѿкрове́нїй свѣ́тлое зерца́ло: ра́дꙋйсѧ, ѿе́млѧй съ дꙋхо́вныхъ ѻ҆че́съ на́шихъ вѣ́тхагѡ зако́на покрыва́ло.

Ра́дꙋйсѧ, всевы́шнѧгѡ цр҃ѧ̀ превы́шнїй слꙋжи́телю: ра́дꙋйсѧ, та́йны трїесте́ственнаго бжⷭ҇тва̀ тве́рдый и҆з̾ѧсни́телю.

Ра́дꙋйсѧ, и҆́стинное вочеловѣ́ченїе сн҃а бж҃їѧ провозглаша́ѧй: ра́дꙋйсѧ, безмꙋ́жнее тогѡ̀ зача́тїе ѿ приснодѣ́вы наше́ствїемъ ст҃а́гѡ дх҃а возвѣща́ѧй.

Ра́дꙋйсѧ, бжⷭ҇твеннꙋю си́лꙋ ᲂу҆тѣ́шителѧ и҆звѣствꙋ́ѧй: ра́дꙋйсѧ, благода́тное тѣ́мъ ѡ҆сѣне́нїе пречи́стыѧ дв҃ы бл҃говѣствꙋ́ѧй.

Ра́дꙋйсѧ, кѷмва́ле, велѣ̑нїѧ бж҃їѧ возглаша́ѧй: ра́дꙋйсѧ, ѻ҆рга́не, бжⷭ҇твенное смотре́нїе прославлѧ́ѧй.

Ра́дꙋйсѧ, ѱалти́ре, бжⷭ҇твенное снисхожде́нїе сн҃а бж҃їѧ возвѣща́ѧй: ра́дꙋйсѧ, прекра́снаѧ гꙋ́сле ст҃а́гѡ дх҃а, ᲂу҆тѣше́нїе воспѣва́ющїй.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ і҃

Сп҃стѝ хотѧ̀ въ бꙋ́ри недоꙋмѣ́нїѧ сꙋ́щѣ пра́веднаго і҆ѡ́сифа, ѡ҆брꙋ́чника пречи́стыѧ ѻ҆трокови́цы, ꙗ҆ви́лсѧ є҆сѝ томꙋ̀, а҆рха́гг҃ле, ᲂу҆вѣрѧ́ѧ є҆гѡ̀ ѡ҆ неискꙋсобра́чнѣй, ꙗ҆́кѡ зача́тїе ᲂу҆ не́й ѿ дх҃а ст҃а́гѡ є҆́сть, и҆ по си́хъ хрⷭ҇тꙋ̀ ро́ждшемꙋсѧ въ виѳлее́мѣ благовѣсти́лъ є҆сѝ сїю̀ ра́дость ве́лїю па́стырємъ, и҆ со мно́жествомъ вѡ́й нбⷭ҇ныхъ воспѣ́лъ є҆сѝ: сла́ва въ вы́шнихъ бг҃ꙋ! є҆мꙋ̀ же и҆ мы̀ при́снѡ вопїе́мъ: А҆ллилꙋ́їа.

І҆́косъ і҃

Цр҃ю̀ хрⷭ҇тꙋ̀ пре́жде во́льнагѡ страда́нїѧ, моли́вшемꙋсѧ въ вертогра́дѣ, ꙗ҆ви́лсѧ є҆сѝ, а҆рха́гг҃ле, ᲂу҆крѣплѧ́ѧ є҆гѡ̀, ꙗ҆́кѡ человѣ́ка въ по́двизѣ сꙋ́ща. тѣ́мже и҆ на́съ немощны́хъ дꙋ́хомъ, бжⷭ҇твенною блгⷣтїю ᲂу҆крѣпѝ, да ра́достнѡ въ похвалꙋ̀ тебѣ̀ вопїе́мъ:

Ра́дꙋйсѧ, ско́рый предста́телю въ бѣдѣ̀ сꙋ́щихъ: ра́дꙋйсѧ, ᲂу҆се́рдный застꙋ́пниче, ᲂу҆пова́нїе на тѧ̀ и҆мꙋ́щихъ.

Ра́дꙋйсѧ, во и҆скꙋше́нїихъ си́льный помо́щниче: ра́дꙋйсѧ, проти́вꙋ ѕлы́хъ дꙋхѡ́въ крѣ́пкїй побо́рниче.

Ра́дꙋйсѧ, мра́къ недоꙋмѣ́нїй и҆ смꙋще́нїй ѿ серде́цъ на́шихъ прогонѧ́ѧй: ра́дꙋйсѧ, позна́нїемъ во́ли бж҃їей ра́зꙋмъ на́шъ ѡ҆зарѧ́ѧй.

Ра́дꙋйсѧ, въ печа́ли сꙋ́щыѧ ᲂу҆тѣша́ѧй: ра́дꙋйсѧ, є҆ле́емъ ми́лости бж҃їей сердца̀ ско́рбныхъ ᲂу҆маща́ѧй.

Ра́дꙋйсѧ, и҆́стиннагѡ бг҃овѣ́дѣнїѧ и҆́щꙋщихъ, нбⷭ҇ный ᲂу҆чи́телю: ра́дꙋйсѧ, жи́зни благочести́выѧ нело́жный и҆звѣсти́телю.

Ра́дꙋйсѧ, къ равноапⷭ҇льскомꙋ житїю̀ непреста́нный возбꙋди́телю: ра́дꙋйсѧ, въ го́рнее ца́рство благонаде́жный води́телю.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ а҃і

Пѣ́нїе хвале́бное воспѣва́лъ на нб҃сѝ съ про́чими нбⷭ҇ными си́лами воскресе́нїю хрⷭ҇то́вꙋ, и҆ на землѝ возвѣсти́тель тогѡ̀ бы́лъ є҆сѝ, а҆рха́гг҃ле, ꙗ҆ви́всѧ мѷроно́сицамъ при гро́бѣ и҆ бл҃говѣсти́въ тѣ̑мъ возста́нїе хрⷭ҇та̀ живода́вца, є҆гѡ̀ же съ тобо́ю прославлѧ́юще, вопїе́мъ: А҆ллилꙋ́їа.

І҆́косъ а҃і

Свѣтопода́тельный свѣти́льникъ ѿкрове́нїѧ бж҃їѧ, пречи́стѣй дв҃ѣ бцⷣѣ ꙗ҆ви́лсѧ є҆сѝ, а҆рха́гг҃ле, и҆ те́плѣ моли́вшейсѧ на горѣ̀ є҆леѡ́нстѣй благовѣсти́лъ є҆сѝ є҆́й, ꙗ҆́кѡ прибли́жисѧ честно́е є҆ѧ̀ ᲂу҆спе́нїе, и҆ ра́йскꙋю свѣтоно́снꙋю вѣ́твь пода́лъ є҆сѝ є҆́й. сегѡ̀ ра́ди прїимѝ ѿ на́съ сїю̀ хвале́бнꙋю пѣ́снь:

Ра́дꙋйсѧ, сла́внѣйшїй ѿ седмѝ дꙋхѡ́въ, предстоѧ́щихъ прⷭ҇то́лꙋ вседержи́телѧ: ра́дꙋйсѧ, честнѣ́йшїй на землѝ слꙋго̀ пречⷭ҇тыѧ мт҃ри хрⷭ҇та̀ сп҃си́телѧ.

Ра́дꙋйсѧ, сп҃си́тельныхъ ѿкрове́нїй бж҃їихъ и҆зрѧ́дный слꙋжи́телю: ра́дꙋйсѧ, любвѐ милосе́рдїѧ бж҃їѧ при́сный бл҃говѣсти́телю.

Ра́дꙋйсѧ, тє́плыѧ мл҃твы къ бг҃ꙋ вѣ́рныхъ на же́ртвенникъ нбⷭ҇ный возносѧ́й: ра́дꙋйсѧ, ми́ръ и҆ благослове́нїе бж҃їе ѿтꙋ́дꙋ и҆́мъ приносѧ́й.

Ра́дꙋйсѧ, ᲂу҆се́рдный помо́щниче въ добродѣ́тельной жи́зни подвиза́ющихсѧ: ра́дꙋйсѧ, благі́й ᲂу҆тѣ́шителю ко блаже́ннѣй кончи́нѣ приближа́ющихсѧ.

Ра́дꙋйсѧ, пред̾ престо́ломъ нбⷭ҇нымъ сꙋдїю̀ пра́веднагѡ ѡ҆ на́съ ᲂу҆молѧ́ѧй: ра́дꙋйсѧ, ꙗ҆́кѡ съ вѣ́рою къ тебѣ̀ молѧ́щыѧсѧ ѿ вѣ́чныхъ мꙋ́къ и҆збавлѧ́ютсѧ.

Ра́дꙋйсѧ, ꙗ҆́кѡ любо́вь къ тебѣ̀ и҆мꙋ́щїй вѣ́чнагѡ црⷭ҇твїѧ со а҆́гг҃лы сподоблѧ́ютсѧ.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ в҃і

Благода̑тныѧ зна̑менїѧ твоеѧ̀ по́мощи не то́кмѡ въ дре́внїѧ, но и҆ въ нѡ́выѧ времена̀ ꙗ҆влѧ́еши, а҆рха́гг҃ле, пречестна́ѧ бо ѡ҆би́тель дохїа́рскаѧ на свѧтѣ́й горѣ̀ а҆ѳѡ́нстѣй, созда́вши хра́мъ во и҆́мѧ а҆рха́гг҃лѡвъ, доны́нѣ возвѣща́етъ чꙋ́до твоѐ, є҆гда̀ кꙋ́пнѡ со а҆рхїстрати́гомъ мїхаи́ломъ спа́слъ є҆сѝ благочести́вагѡ послꙋ́шника ѿ го́рькїѧ сме́рти въ пꙋчи́нѣ морстѣ́й, и҆ благода́рнѣ вопїе́мъ бг҃ꙋ: А҆ллилꙋ́їа.

І҆́косъ в҃і

Воспѣва́ѧ на нб҃сѝ съ про́чими безпло́тными честнѣ́йшꙋю херꙋві̑мъ, томꙋ̀ же и҆ на́съ сꙋ́щихъ на землѝ наꙋча́еши. Всечестнѣ́йшаѧ бо дрꙋга́ѧ а҆ѳѡ́нскаѧ ѡ҆би́тель, и҆менꙋ́емаѧ досто́йно є҆́сть, и҆́менемъ свои́мъ проповѣ́дꙋетъ дрꙋго́е пресла́вное чꙋ́до ꙗ҆вле́нїѧ твоегѡ̀, а҆рха́гг҃ле, бл҃гоговѣ́йномꙋ послꙋ́шникꙋ, є҆го́же наꙋчи́лъ є҆сѝ нбⷭ҇нѣй пѣ́сни ко прославле́нїю бг҃омт҃ре. сїю̀ бо пою́ще въ че́сть бцⷣы и҆ тебѣ̀ досто́йнѡ въ похвалꙋ̀ вопїе́мъ:

Ра́дꙋйсѧ, нбⷭ҇ный ѡ҆бра́дователю мт҃ри преблагослове́нныѧ: ра́дꙋйсѧ, невѣстокраси́телю приснодв҃ы нетлѣ́нныѧ.

Ра́дꙋйсѧ, нбⷭ҇ный є҆ѧ̀ воспѣва́телю: ра́дꙋйсѧ, въ вѣ́чнѣй сла́вѣ то́й предстоѧ́телю.

Ра́дꙋйсѧ, ꙗ҆́кѡ и҆ про́чїѧ чи́ны а҆́гг҃льскїѧ возбꙋжда́еши воспѣва́ти честнѣ́йшꙋю херꙋві̑мъ: ра́дꙋйсѧ, ꙗ҆́кѡ на́съ земноро́дныхъ наꙋча́еши просла́вити сла́внѣйшꙋю серафі̑мъ.

Ра́дꙋйсѧ, ревнꙋ́ющымъ ѡ҆б̾ а҆́гг҃льстѣмъ житїѝ вы́шнїй покрови́телю: ра́дꙋйсѧ, въ моли́твѣ къ бг҃ꙋ предо́брый ᲂу҆чи́телю.

Ра́дꙋйсѧ, сердца̀ молѧ́щихсѧ любо́вїю ко гдⷭ҇ꙋ возжига́ѧй: ра́дꙋйсѧ, ѳѷмїа́мъ чи́стыхъ моли́твъ на ѻ҆лта́рь нбⷭ҇ный возлага́ѧй.

Ра́дꙋйсѧ, благода́тїю ᲂу҆миле́нїѧ молѧ́щихсѧ ᲂу҆слажда́ѧй: ра́дꙋйсѧ, въ безмо́лвїи и҆́хъ то́ю ᲂу҆тѣша́ѧй.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ г҃і

Ѽ вели́кїй а҆рха́гг҃ле гаврїи́ле, сокрове́ннѣйшихъ та̑йнъ бж҃їихъ слꙋжи́телю, воплоще́нїе сн҃а бж҃їѧ прера́достный благовѣ́стниче, и҆ на́шегѡ сп҃се́нїѧ ᲂу҆се́рдный споспѣ́шниче. прїимѝ ѿ на́съ недосто́йныхъ сїѐ хвале́бное и҆ бл҃года́рственное пѣ́нїе, и҆ ᲂу҆молѝ гдⷭ҇а дарова́ти на́мъ наслѣ́дїе въ вѣ́чномъ є҆гѡ̀ црⷭ҇твїи, да съ тобо́ю непреста́ннѡ воспое́мъ є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ безпло́тный є҆стество́мъ бы́сть, сла́вы присносꙋ́щныѧ и҆ вѣ́чныѧ премꙋ́дрости въ созда́нїи ми́ра зри́тель ꙗ҆ви́лсѧ є҆сѝ, а҆рха́гг҃ле. сегѡ̀ ра́ди тебѣ̀ вопїе́мъ:

Ра́дꙋйсѧ, и҆́менемъ твои́мъ си́лꙋ бж҃їю возвѣща́ѧй: ра́дꙋйсѧ, ди́вною красото́ю твое́ю неизрече́ннꙋю сла́вꙋ бж҃їю ꙗ҆влѧ́ѧй.

Ра́дꙋйсѧ, дꙋ́ше невеще́ственный, свобо́дный ѿ ᲂу҆́зъ теле́снагѡ є҆стества̀: ра́дꙋйсѧ, свѣ́тлый ᲂу҆́ме, подо́бїе неви́димагѡ бжⷭ҇тва̀.

Ра́дꙋйсѧ, бжⷭ҇твеннагѡ ра́зꙋма вмести́лище: ра́дꙋйсѧ, неизрече́нныхъ та́йнъ сокро́вище.

Ра́дꙋйсѧ, первосїѧ́ннагѡ свѣ́та чистѣ́йшїй лꙋчѐ: ра́дꙋйсѧ, пла́менемъ бжⷭ҇твенныѧ любвѝ горѧ́щаѧ свѣща̀.

Ра́дꙋйсѧ, прⷭ҇то́ла бж҃їѧ предста́телю: ра́дꙋйсѧ, сла́вы гдⷭ҇ней созерца́телю.

Ра́дꙋйсѧ, на́съ земноро́дныхъ ᲂу҆тѣше́нїе.

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Конда́къ а҃

И҆збра́ннаго а҆рха́гг҃ла, при́снѡ предстоѧ́телѧ прⷭ҇то́лꙋ вседержи́телѧ, таи́нника блгⷣти, и҆ ра́дости бл҃говѣ́стника, всечестна́го гаврїи́ла, пречи́стыѧ дв҃ы невѣстокраси́телѧ, пѣ́нїемъ похва́льнымъ благоче́стнѡ почти́мъ, со благодаре́нїемъ є҆мꙋ̀ зовꙋ́ще:

Ра́дꙋйсѧ, а҆рха́гг҃ле гаврїи́ле, вѣ́чнагѡ сп҃се́нїѧ на́шегѡ бл҃говѣ́стниче.

Моли́твы

Ѽ, ст҃ы́й а҆рха́гг҃ле бж҃їй гаврїи́ле! при́снѡ предстоѧ́й прⷭ҇то́лꙋ всевы́шнѧгѡ, прера́достный бл҃говѣ́стниче и҆ ᲂу҆се́рдный споспѣ́шниче на́шегѡ сп҃се́нїѧ! ми́лостивѡ прїимѝ ѿ на́съ недосто́йныхъ тебѣ̀ приноси́мое сїѐ хвале́бное пѣ́нїе. И҆спра́ви моли̑твы на́шѧ и҆, ꙗ҆́кѡ ѳѷмїа́мъ, на нбⷭ҇ный ѻ҆лта́рь кади́льный вознесѝ и҆́хъ. ѡ҆зарѝ ᲂу҆мы̀ на́шѧ свѣ́томъ вѣ́ры правосла́вныѧ, воспламенѝ любо́вїю сердца̀ на̑ша ко хрⷭ҇тꙋ̀ сп҃си́телю на́шемꙋ, ѡ҆братѝ и҆ ᲂу҆крѣпѝ жела́нїѧ на̑ша на спаси́тельномъ пꙋтѝ є҆ѵⷢ҇льскихъ за́повѣдей. да въ се́мъ вѣ́цѣ ти́хѡ и҆ благоче́стнѡ поживе́мъ во сла́вꙋ бж҃їю, въ бꙋ́дꙋщемъ же не лиши́мсѧ црⷭ҇твїѧ нбⷭ҇нагѡ, є҆го́же полꙋчи́ти да сподо́бимсѧ благода́тїю хрⷭ҇та̀ бг҃а на́шегѡ, хода́тайствомъ пречи́стыѧ є҆гѡ̀ мт҃ри, и҆ твои́ми многомо́щными мл҃твами, и҆ да просла́вимъ съ тобо́ю и҆ про́чими безпло́тными си́лами нбⷭ҇ными и҆ всѣ́ми ст҃ы́ми є҆ди́наго въ трⷪ҇цѣ сла́вимаго бг҃а: ѻ҆ц҃а̀, и҆ сн҃а, и҆ ст҃а́гѡ дх҃а ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.