Акафист святому преподобному Стефану, игумену Махрищскому, чудотворцу

А́нгелом любе́зную чистоту́ от ю́ности твоея́ возлюби́в, о́тче Стефа́не, ми́р и вся́ красоты́ его́ тле́нныя презре́л еси́, служи́ти же Го́сподеви в преподо́бии и чистоте́ взыска́л еси́, и сего́ ра́ди во оби́тель Ки́ево-Пече́рскую прише́д, постриже́ние во и́ноческий о́браз та́мо восприя́л еси́, подража́я во все́х доброде́телех преподо́бным отце́м Анто́нию и Феодо́сию и про́чим преподо́бным Пече́рским. Те́мже сла́вим тя́ по достоя́нию и глаго́лем:

Ра́дуйся, гра́да Ки́ева до́брое прозябе́ние; ра́дуйся, роди́телей благочести́вых ча́до боголюбе́зное.

Ра́дуйся, Ева́нгелия Христо́ва ве́рный после́дователю; ра́дуйся, за́поведей Иису́совых ре́вностный исполни́телю.

Ра́дуйся, до́м роди́тельский любве́ ра́ди Бо́жия оста́вивый; ра́дуйся, во оби́тель Ки́ево-Пече́рскую на по́двиги духо́вныя прише́дый.

Ра́дуйся, богому́дрия душеспаси́тельнаго преиспо́лненный; ра́дуйся, смире́ние свято́е себе́ усво́ивый.

Ра́дуйся, посто́м душепа́губныя стра́сти в себе́ умертви́вый; ра́дуйся, моли́твами непреста́нными вся́ искуше́ния диа́вольския отрази́вый.

Ра́дуйся, слеза́ми покая́нными убели́вый ри́зу душе́вную; ра́дуйся, из глубины́ воздыха́ньми приобреты́й чистоту́ серде́чную.

Ра́дуйся, Стефа́не, вели́кий чудотво́рче.

Ра́зум небе́сный стяжа́в, о́тче преподо́бне, ри́мским лжеуче́нием, умно́жившимся во гра́де Ки́еве, смути́лся еси́ и предпоче́л еси́ удали́тися в страны́ се́верныя, ко гра́ду Москве́, иде́же сия́ше свято́е Правосла́вие, и мно́гия хра́мы Бо́жии и оби́тели и́ноческия бы́ша. Мы́ же разу́мное бе́гство твое́ ублажа́я, воспева́ем ти́ хвале́бныя пе́сни сицевы́я:

Ра́дуйся, правосла́вия побо́рниче; ра́дуйся, ри́мскаго лжеуче́ния обличи́телю.

Ра́дуйся, гра́д оте́чествия твоего́ оста́вивый, да гра́д Небе́сный Иерусали́м го́рний унасле́диши; ра́дуйся, стра́нник и пришле́ц бы́вый, да в сыновство́ Отцу́ Небе́сному сопричте́шися.

Ра́дуйся, безмо́лвия люби́телю, бу́ри ерети́ческия му́дро избежа́вый; ра́дуйся, моли́твы умиле́нныя Го́сподеви возноси́вый.

Ра́дуйся, звездо́, сия́ющая благода́ти Бо́жия заре́ю; ра́дуйся, от ю́га к се́веру прише́дый свети́ти лю́дем житие́м твои́м преподо́бным.

Ра́дуйся, трудолю́бче нелицеме́рный, пра́здность возненави́девый; ра́дуйся, по нестяжа́тельности и смире́нию твоему́ ве́тхия и многошве́нныя оде́жды носи́вый.

Ра́дуйся, с по́сохом стра́нника гра́ды и ве́си обше́дый и лю́ди благоче́стию поучи́вый; ра́дуйся, самоде́ржцев земли́ Росси́йския при́сный дру́г и сове́тник бы́вый.

Ра́дуйся, Стефа́не, вели́кий чудотво́рче.

Име́л еси́ еди́но попече́ние, преподо́бне, да спасе́ши ду́шу твою́ и предста́виши ю́ Христу́ без поро́ка, чи́сту от вся́кия скве́рны грехо́вныя; благи́й же Человеколю́бец Госпо́дь, ви́дев таково́е твое́ благо́е произволе́ние, поставля́ет тя́ па́стыря и́ноком пустыннолюби́вым и си́х собира́ет под твое́ руково́дство, да упасе́ши и́х во спасе́ние. О се́м тя́ прославля́ем и зове́м:

Ра́дуйся, учи́телю благоче́стия; ра́дуйся, наста́вниче богому́дрия.

Ра́дуйся, сотвори́вый и научи́вый; ра́дуйся, ве́лий нарече́нный во Ца́рствии Небе́снем.

Ра́дуйся, пустыннолюби́вая го́рлице; ра́дуйся, сладкопе́сненная ла́стовице.

Ра́дуйся, благоумиле́нный увеща́телю; ра́дуйся, многосле́зный моли́твенниче.

Ра́дуйся, пусты́ню во гра́д оби́тельный претвори́вый; ра́дуйся, де́брь непло́дную духо́вно уплодоноси́вый.

Ра́дуйся, спасе́ния мно́гих ду́ш челове́ческих вино́вниче; ра́дуйся, ангелонра́вный челове́че.

Ра́дуйся, Стефа́не, вели́кий чудотво́рче.

Слы́шавше бли́жнии и да́льнии о равноа́нгельнем житии́ твое́м, о́тче преподо́бне, прихожда́ху в пусты́нную оби́тель твою́, о́ви послу́шати поуче́ний твои́х душеполе́зных, о́ви же подвиза́тися вку́пе с тобо́ю под твои́м руково́дством; ты́ же все́х с оте́ческою любо́вию приима́л еси́ и неле́ностно служи́л еси́ спасе́нию ду́ш челове́ческих, те́мже и слы́шиши таковы́я тебе́ похвалы́:

Ра́дуйся, пра́вило ве́ры и́стинныя; ра́дуйся, о́бразе кро́тости духо́вныя.

Ра́дуйся, па́стырю до́брый па́ствы и́ноческия; ра́дуйся, устрои́телю богому́дрый кинови́и пусты́нныя.

Ра́дуйся, общежи́тельныя уста́вы зело́ возлюби́вый; ра́дуйся, вся́ о́бща име́ти бра́тии в оби́тели твое́й законоположи́вый.

Ра́дуйся, ратобо́рче до́блий, полки́ неви́димых враго́в кре́пко победи́вый; ра́дуйся, вождю́ благоиску́сный во́инов духо́вных.

Ра́дуйся, вели́ких пустынножи́телей ве́рный подража́телю; ра́дуйся, дре́вних богоно́сных отце́в ре́вностный после́дователю.

Ра́дуйся, преподо́бнаго чудотво́рца Се́ргия многолюби́мый дру́же и собесе́дниче; ра́дуйся, преподо́бнаго чудотво́рца Кири́лла духо́вный руководи́телю и наста́вниче.

Ра́дуйся, Стефа́не, вели́кий чудотво́рче.

Ви́дев неразу́мныя челове́ки, напра́сно гне́вавшияся на тя́, преподо́бне о́тче, ме́сто гне́ву и́х уступи́л еси́ и предпоче́л еси́ удали́тися из оби́тели твоея́ в преде́лы волого́дския на реку́ Авне́гу, иде́же но́вую оби́тель и́ноческую возгради́л еси́ во спасе́ние ду́ш челове́ческих, и в не́й при́сныя ученики́ твоя́ преподо́бных Григо́рия и Кассиа́на, я́ко кри́ны ра́йския, духо́вно возрасти́л еси́, с ни́миже тя́ ублажа́ем и зове́м:

Ра́дуйся, неусы́пный де́лателю виногра́да небе́снаго; ра́дуйся, плоды́ сла́дкия от де́лания твоего́ Христу́ принесы́й.

Ра́дуйся, и́мя Бо́жие спаси́тельное во усте́х твои́х вы́ну име́вый; ра́дуйся, па́мять пресла́дкаго Иису́са в се́рдце твое́ вне́дривый.

Ра́дуйся, и́го Христо́во благо́е и ле́гкое носи́вый; ра́дуйся, ско́рби мно́гия благоду́шно претерпе́вый.

Ра́дуйся, гне́вавшимся напра́сно на тя́ не пререка́вый; ра́дуйся, кро́тостию твое́ю зло́бу неразу́мных челове́ков побежда́вый.

Ра́дуйся, миротво́рец благослове́нный бы́вый; ра́дуйся, ми́ра ра́ди оби́тель твою́ оста́вивый.

Ра́дуйся, но́ву оби́тель на реце́ Авне́ге сооруди́вый; ра́дуйся, богоуго́дно в не́й со ученики́ твои́ми пожи́вый.

Ра́дуйся, Стефа́не, вели́кий чудотво́рче.

Возсия́в све́том богоразу́мия твоего́ в страна́х полу́нощных, Стефа́не богому́дре, повеле́нием вели́каго кня́зя Дими́трия, па́ки во оби́тель твою́, на реце́ Ма́хре тобо́ю устро́енную, возвраща́ешися, в оби́тели же твое́й на реце́ Авне́ге преподо́бныя ученики́ твоя́ Григо́рия и Кассиа́на оста́вил еси́, да продолжа́ют они́ та́мо по уче́нию и приме́ру твоему́ по́двиги духо́вныя, в ни́хже и венцы́ му́ченическими от Христо́вой десни́цы они́ увенча́шася и чудесы́ мно́гими свя́тость свою́ ознаменова́ша. Тебе́ у́бо, о́тче, таковы́я святы́я ученики́ стяжа́вшему, вопие́м хвале́бно:

Ра́дуйся, Ева́нгелия Христо́ва немо́лчный пропове́дниче; ра́дуйся, апо́стольских преда́ний ре́вностный блюсти́телю.

Ра́дуйся, язы́ческаго нече́стия искорени́телю; ра́дуйся, ве́ры правосла́вныя распространи́телю.

Ра́дуйся, во сле́д себе́ ко Христу́ ученики́ твоя́ приведы́й; ра́дуйся, свята́я ча́да о Христе́ стяжа́вый.

Ра́дуйся, с ни́ми возше́дый прия́ти мзду́ небе́сную от Го́спода; ра́дуйся, не сокры́вый тала́нт, вруче́нный тебе́ от Всевы́шняго Домовлады́ки.

Ра́дуйся, ку́плю мно́гу и́м сотвори́вый, спасе́ние ду́ш челове́ческих; ра́дуйся, заблу́ждшия на пу́ть пра́вый напра́вивый твои́ми уче́ньми.

Ра́дуйся, бли́жния твоя́ и́скренно возлюби́вый; ра́дуйся, спасе́нию и́х душе́вному усе́рдно послужи́вый.

Ра́дуйся, Стефа́не, вели́кий чудотво́рче.

Но́ваго тя́ ревни́теля по благоче́стию позна́в благове́рный вели́кий кня́зь Дими́трий, отца́ духо́внаго себе́ тя́ нарече́ и во все́м с любо́вию послу́шаше твои́х сове́тов богому́дрых, преподо́бне о́тче на́ш Стефа́не, ве́дая бли́зость твою́ к Царю́ царе́й Христу́ Бо́гу, Его́же умоля́ти не преста́й и о на́с гре́шных, вопию́щих ти́ хвале́бно:

Ра́дуйся, кри́не пусты́ннаго прозябе́ния; ра́дуйся, ми́ро Христо́ва благоуха́ния.

Ра́дуйся, смире́ния соверше́ннаго зерца́ло; ра́дуйся, от стре́л вра́жиих кре́пкое на́м забра́ло.

Ра́дуйся, смире́нием высо́кая стяжа́вый; ра́дуйся, бога́тство нетле́нное унасле́дивый.

Ра́дуйся, пусты́ню духо́вно просвети́вый; ра́дуйся, сле́зными пото́ки бразду́ душе́вную напои́вый.

Ра́дуйся, посеще́ния преподо́бнаго Се́ргия удосто́енный; ра́дуйся, благослове́нием и моли́твою его́ освяще́нный.

Ра́дуйся, преподо́бием све́тло украше́нный; ра́дуйся, дара́ми Бо́жия благода́ти преиспо́лненный.

Ра́дуйся, Стефа́не, вели́кий чудотво́рче.

Ве́сь в Бо́зе бы́в, преподо́бне о́тче, о Бо́зе и угожде́нии Ему́ всегда́ бесе́довал еси́ со ученики́ твои́ми и от любве́ серде́чныя ко Го́споду сле́зы мно́гия излива́л еси́ от оче́с твои́х при бесе́дах си́х, умоля́я ча́да твоя́ духо́вная ничто́же предпочита́ти па́че любве́ Христо́вы. Мо́лим тя́, уго́дниче Бо́жий, сподо́би и на́с хла́дных воспламени́тися любо́вию ко Го́споду, да возмо́жем неосужде́нно вопи́ти тебе́:

Ра́дуйся, гре́шники на покая́ние наста́вивый; ра́дуйся, ка́ющияся с Бо́гом примири́вый.

Ра́дуйся, оте́ц чадолюби́вый ученико́м твои́м бы́вый; ра́дуйся, не́мощи немощны́х любвеоби́льно носи́вый.

Ра́дуйся, уневе́стивый Христу́ мно́гия ду́ши челове́ческия; ра́дуйся, о́браз соверше́нства духо́внаго в себе́ яви́вый.

Ра́дуйся, с пла́кавшими пла́кавый; ра́дуйся, боля́щия посеща́вый и ни́щия пита́вый.

Ра́дуйся, вдо́в и сиро́т защи́тниче; ра́дуйся, оби́димых и гони́мых засту́пниче.

Ра́дуйся, си́льным ми́ра суда́ Бо́жия провозве́стниче; ра́дуйся, вся́кия непра́вды нелицеприя́тный обличи́телю.

Ра́дуйся, Стефа́не, вели́кий чудотво́рче.

Вети́я богому́дрый бы́л еси́, преподо́бне о́тче Стефа́не, и язы́ком твои́м, я́ко тро́стию кни́жника скоропи́сца, зако́н Бо́га твоего́ начертава́л еси́ на сердца́х челове́ческих, все́м ве́рно показу́я пу́ть ко спасе́нию, по нему́же са́м неукло́нно ше́ствовал еси́ до блаже́нныя твоея́ кончи́ны. Те́мже приими́ от на́с похвалы́ таковы́я:

Ра́дуйся, главо́ свята́я, благода́тию Бо́жиею осене́нная; ра́дуйся, пропове́дниче сладкоглаго́ливый, веща́вый словеса́ жи́зни ве́чныя.

Ра́дуйся, пусты́нный граждани́не, его́же уче́ньми спасо́шася мно́зи; ра́дуйся, приведы́й ко Христу́ соверше́нныя подви́жники.

Ра́дуйся, воево́до добропобе́дный ра́тующих со враги́ неви́димыми; ра́дуйся, руководи́телю предо́брый пустынножи́телей.

Ра́дуйся, псалмопе́нии немо́лчными Бо́га сла́вивый; ра́дуйся, моли́твы умиле́нныя вы́ну Го́сподеви приноси́вый.

Ра́дуйся, коленопреклоне́ния мно́гая соверша́вый; ра́дуйся, посто́м и сухояде́нием пло́ть твою́ изнури́вый.

Ра́дуйся, ве́тхаго в себе́ челове́ка всеце́ло ду́ху покори́вый; ра́дуйся, вся́ стра́сти грехо́вныя в себе́ обузда́вый.

Ра́дуйся, Стефа́не, вели́кий чудотво́рче.

Царя́ Небе́снаго Христа́, Ему́же в житии́ земно́м благоугоди́л еси́, преподо́бне о́тче, по сме́рти твое́й прославля́еши чудотворе́нии твои́ми, прие́м от Него́ благода́ть исцеле́ний вся́ких неду́гов: те́мже вси́, насыща́ющиися чрез тебе́ даро́в Его́ боже́ственных, велича́ют Его́ щедро́ты, тебе́ же, чудотво́рца пресла́внаго, ублажа́ют си́це:

Ра́дуйся, свя́то и преподо́бно жи́знь земну́ю сконча́вый; ра́дуйся, во исхо́де твое́м благоуха́ние сла́достное испусти́вый.

Ра́дуйся, сме́рть вкуси́вый, тле́ния же не позна́вый; ра́дуйся, с све́тлым лице́м во гро́бе возлежа́вый.

Ра́дуйся, дерзнове́ние ве́лие ко Го́споду стяжа́вый; ра́дуйся, чудотворе́ния да́р свы́ше получи́вый.

Ра́дуйся, пресели́выйся от земли́ к оби́телем небе́сным; ра́дуйся, та́мо со святы́ми наслажда́яйся блаже́нства ве́чнаго.

Ра́дуйся, врачу́ благода́тный и безме́здный; ра́дуйся, целе́бниче, не мзды́, еди́ныя то́кмо ве́ры тре́буяй.

Ра́дуйся, боля́щия здра́вы сотворя́яй; ра́дуйся, исцеле́ния неду́жным неоску́дно подава́яй.

Ра́дуйся, Стефа́не, вели́кий чудотво́рче.

Све́т небе́сный возсия́ на гро́бе твое́м, Стефа́не чудотво́рче, и о́гненная луча́ в нощи́ озари́ ме́сто посме́ртнаго твоего́ поко́я, в зна́мение вели́кия твоея́ свя́тости. Мо́лим тя́, преподо́бне, луче́ю Бо́жией благода́ти, в тебе́ живу́щей, озари́ и на́ша мра́чныя ду́ши и приведи́ ны́ ко све́ту спасе́ния твои́ми моли́твами, да возмо́жем досто́йно благохвали́ти тя́ пе́сньми сицевы́ми:

Ра́дуйся, от го́рних высо́т к земноро́дным ми́лостиво приника́яй; ра́дуйся, от ра́ки твоея́ святы́я исцеле́ния боля́щим подава́яй.

Ра́дуйся, в со́ниих и виде́ниих ве́рныя посеща́яй; ра́дуйся, оби́тель твою́ и по сме́рти моли́твенно назира́яй.

Ра́дуйся, скорбя́щих благи́й уте́шителю; ра́дуйся, уныва́ющих благода́тный ободри́телю.

Ра́дуйся, реко́ приснотеку́щая чуде́с; ра́дуйся, ми́лования исто́чниче неоску́дный.

Ра́дуйся, благоутро́бия щедро́ты оби́льно все́м да́руяй; ра́дуйся, бли́жних и да́льних ми́лостьми твои́ми ущедря́яй.

Ра́дуйся, и неве́дущим тя́ благодея́ния целе́бная источа́яй; ра́дуйся, еди́ным призыва́нием и́мене твоего́ неду́ги неисце́льныя врачу́яй.

Ра́дуйся, Стефа́не, вели́кий чудотво́рче.

Пою́ще свято́е и равноа́нгельное житие́ твое́ прославля́ем мно́гая и пресла́вная чудотворе́ния твоя́, преподо́бне чудотво́рче, о́тче на́ш Стефа́не; ты́ же, я́ко бла́г и ми́лостив, не возгнуша́йся пе́ний на́ших моле́бных, но оте́ческою любо́вию твое́ю приими́ я́ в воню́ благоуха́ния духо́внаго и ниспосли́ на́м гре́шным вся́ благопотре́бныя ко спасе́нию да́ры бла́гости Бо́жией, да благода́рственно тебе́ вопие́м:

Ра́дуйся, Пресвяты́я Тро́ицы благоволе́нием осене́нный; ра́дуйся, Пресвяты́я Богоро́дицы ми́лостьми уще́дренный.

Ра́дуйся, а́нгелов сожи́телю; ра́дуйся, святы́х все́х сонасле́дниче.

Ра́дуйся, гре́шных ми́лостивый засту́пниче; ра́дуйся, бе́дствующих ско́рый помо́щниче.

Ра́дуйся, сла́во и похвало́ святы́я твоея́ оби́тели; ра́дуйся, благода́тное удобре́ние земли́ Росси́йския.

Ра́дуйся, все́м приходя́щим к тебе́ на поклоне́ние да́ры целе́бныя ще́дро подава́яй; ра́дуйся, боле́зни неисце́льныя еди́ным прикоснове́нием к ра́це твое́й исцеля́яй.

Ра́дуйся, по Бо́зе и Богоро́дице кре́пкое на́ше упова́ние; ра́дуйся, ду́ш и теле́с на́ших богодарова́нное врачева́ние.

Ра́дуйся, Стефа́не, вели́кий чудотво́рче.

А҆́гг҃лѡмъ любе́знꙋю чистотꙋ̀ ѿ ю҆́ности твоеѧ̀ возлюби́въ, ѻ҆́тче стефа́не, мі́ръ и҆ всѧ̑ красѡты̀ є҆гѡ̀ тлѣ̑нныѧ презрѣ́лъ є҆сѝ, слꙋжи́ти же гдⷭ҇ви въ прпⷣбїи и҆ чистотѣ̀ взыска́лъ є҆сѝ, и҆ сегѡ̀ ра́ди во ѡ҆би́тель кі́ево-пече́рскꙋю прише́дъ, постриже́нїе во и҆́ноческїй ѡ҆́бразъ та́мѡ воспрїѧ́лъ є҆сѝ, подража́ѧ во всѣ́хъ добродѣ́телехъ прпⷣбнымъ ѻ҆тцє́мъ а҆нтѡ́нїю и҆ ѳеодо́сїю и҆ прѡ́чимъ прпⷣбнымъ печє́рскимъ. тѣ́мже сла́вимъ тѧ̀ по достоѧ́нїю и҆ глаго́лемъ:

Ра́дꙋйсѧ, гра́да кі́ева до́брое прозѧбе́нїе: ра́дꙋйсѧ, роди́телей бл҃гочести́выхъ ча́до боголюбе́зное.

Ра́дꙋйсѧ, є҆ѵⷢ҇лїа хрⷭ҇то́ва вѣ́рный послѣ́дователю: ра́дꙋйсѧ, за́повѣдей і҆и҃совыхъ ре́вностный и҆сполни́телю.

Ра́дꙋйсѧ, до́мъ роди́тельскїй любвѐ ра́ди бж҃їѧ ѡ҆ста́вивый: ра́дꙋйсѧ, во ѡ҆би́тель кі́ево-пече́рскꙋю на пѡ́двиги дх҃ѡ́вныѧ прише́дый.

Ра́дꙋйсѧ, бг҃омꙋ́дрїѧ дꙋшесп҃си́тельнагѡ преиспо́лненный: ра́дꙋйсѧ, смире́нїе ст҃о́е себѣ̀ ᲂу҆сво́ивый.

Ра́дꙋйсѧ, посто́мъ дꙋшепа̑гꙋбныѧ стра̑сти въ себѣ̀ ᲂу҆мертви́вый: ра́дꙋйсѧ, моли́твами непреста́нными всѧ̑ и҆скꙋшє́нїѧ дїа́вѡльскїѧ ѿрази́вый.

Ра́дꙋйсѧ, слеза́ми покаѧ́нными ᲂу҆бѣли́вый ри́зꙋ дꙋше́внꙋю: ра́дꙋйсѧ, и҆з̾ глꙋбины̀ воздыха́ньми прїѡбрѣты́й чистотꙋ̀ серде́чнꙋю.

Ра́дꙋйсѧ, стефа́не, вели́кїй чꙋдотво́рче.

Ра́зꙋмъ нбⷭ҇ный стѧжа́въ, ѻ҆́тче прпⷣбне, ри́мскимъ лжеꙋче́нїемъ, ᲂу҆мно́жившимсѧ во гра́дѣ кі́евѣ, смꙋти́лсѧ є҆сѝ и҆ предпоче́лъ є҆сѝ ᲂу҆дали́тисѧ въ страны̑ сѣ́вєрныѧ, ко гра́дꙋ москвѣ̀, и҆дѣ́же сїѧ́ше ст҃о́е правосла́вїе, и҆ мнѡ́гїѧ хра́мы бж҃їи и҆ ѡ҆би́тєли и҆́ночєскїѧ бы́ша. мы́ же разꙋ́мное бѣ́гство твоѐ ᲂу҆блажа́ѧ, воспѣва́емъ тѝ хвалє́бныѧ пѣ́сни сицевы́ѧ:

Ра́дꙋйсѧ, правосла́вїѧ побо́рниче: ра́дꙋйсѧ, ри́мскагѡ лжеꙋче́нїѧ ѡ҆бличи́телю.

Ра́дꙋйсѧ, гра́дъ ѻ҆те́чествїѧ твоегѡ̀ ѡ҆ста́вивый, да гра́дъ нбⷭ҇ный і҆ерⷭ҇ли́мъ го́рнїй ᲂу҆наслѣ́диши: ра́дꙋйсѧ, стра́нникъ и҆ пришле́цъ бы́вый, да въ сн҃овство̀ ѻ҆ц҃ꙋ̀ нбⷭ҇номꙋ сопричте́шисѧ.

Ра́дꙋйсѧ, безмо́лвїѧ люби́телю, бꙋ́ри є҆реті́чєскїѧ мꙋ́дрѡ и҆збѣжа́вый: ра́дꙋйсѧ, моли̑твы ᲂу҆милє́нныѧ гдⷭ҇ви возноси́вый.

Ра́дꙋйсѧ, ѕвѣздо̀, сїѧ́ющаѧ блгⷣти бж҃їѧ заре́ю: ра́дꙋйсѧ, ѿ ю҆́га къ сѣ́верꙋ прише́дый свѣти́ти лю́демъ житїе́мъ твои́мъ прпⷣбнымъ.

Ра́дꙋйсѧ, трꙋдолю́бче нелицемѣ́рный, пра́здность возненави́дѣвый: ра́дꙋйсѧ, по нестѧжа́тельности и҆ смире́нїю твоемꙋ̀ вє́тхїѧ и҆ многошвє́нныѧ ѡ҆дє́жды носи́вый.

Ра́дꙋйсѧ, съ по́сохомъ стра́нника гра̑ды и҆ вє́си ѡ҆бше́дый и҆ лю́ди бл҃гоче́стїю поꙋчи́вый: ра́дꙋйсѧ, самоде́ржцєвъ землѝ рѡссі́йскїѧ при́сный дрꙋ́гъ и҆ совѣ́тникъ бы́вый.

Ра́дꙋйсѧ, стефа́не, вели́кїй чꙋдотво́рче.

И҆мѣ́лъ є҆сѝ є҆ди́но попече́нїе, прпⷣбне, да спасе́ши дꙋ́шꙋ твою̀ и҆ предста́виши ю҆̀ хрⷭ҇тꙋ̀ без̾ поро́ка, чи́стꙋ ѿ всѧ́кїѧ скве́рны грѣхо́вныѧ: бл҃гі́й же чл҃вѣколю́бецъ гдⷭ҇ь, ви́дѣвъ таково́е твоѐ бл҃го́е произволе́нїе, поставлѧ́етъ тѧ̀ па́стырѧ и҆́нокѡмъ пꙋстыннолюби̑вымъ и҆ си́хъ собира́етъ под̾ твоѐ рꙋково́дство, да ᲂу҆пасе́ши и҆̀хъ во сп҃се́нїе. ѡ҆ се́мъ тѧ̀ прославлѧ́емъ и҆ зове́мъ:

Ра́дꙋйсѧ, ᲂу҆чи́телю бл҃гоче́стїѧ: ра́дꙋйсѧ, наста́вниче бг҃омꙋ́дрїѧ.

Ра́дꙋйсѧ, сотвори́вый и҆ наꙋчи́вый: ра́дꙋйсѧ, ве́лїй нарече́нный во црⷭ҇твїи нбⷭ҇нѣмъ.

Ра́дꙋйсѧ, пꙋстыннолюби́ваѧ го́рлице: ра́дꙋйсѧ, сладкопѣ́сненнаѧ ла́стовице.

Ра́дꙋйсѧ, бл҃гоꙋмиле́нный ᲂу҆вѣща́телю: ра́дꙋйсѧ, многосле́зный мл҃твенниче.

Ра́дꙋйсѧ, пꙋсты́ню во гра́дъ ѡ҆би́тельный претвори́вый: ра́дꙋйсѧ, де́брь непло́днꙋю дꙋхо́внѡ ᲂу҆плодоноси́вый.

Ра́дꙋйсѧ, спасе́нїѧ мно́гихъ дꙋ́шъ человѣ́ческихъ вино́вниче: ра́дꙋйсѧ, а҆гг҃елонра́вный человѣ́че.

Ра́дꙋйсѧ, стефа́не, вели́кїй чꙋдотво́рче.

Слы́шавше бли́жнїи и҆ да́льнїи ѡ҆ равноа́гг҃льнемъ житїѝ твое́мъ, ѻ҆́тче прпⷣбне, прихожда́хꙋ въ пꙋсты́ннꙋю ѡ҆би́тель твою̀, ѻ҆́ви послꙋ́шати поꙋче́нїй твои́хъ дꙋшеполе́зныхъ, ѻ҆́ви же подвиза́тисѧ вкꙋ́пѣ съ тобо́ю под̾ твои́мъ рꙋково́дствомъ: ты́ же всѣ́хъ съ ѻ҆те́ческою любо́вїю прїима́лъ є҆сѝ и҆ нелѣ́ностнѡ слꙋжи́лъ є҆сѝ сп҃се́нїю дꙋ́шъ человѣ́ческихъ, тѣ́мже и҆ слы́шиши таковы́ѧ тебѣ̀ похвалы̀:

Ра́дꙋйсѧ, пра́вило вѣ́ры и҆́стинныѧ: ра́дꙋйсѧ, ѡ҆́бразе кро́тости дꙋхо́вныѧ.

Ра́дꙋйсѧ, па́стырю до́брый па́ствы и҆́ночєскїѧ: ра́дꙋйсѧ, ᲂу҆строи́телю бг҃омꙋ́дрый кїнові́и пꙋсты́нныѧ.

Ра́дꙋйсѧ, ѻ҆бщежи́тєльныѧ ᲂу҆ста̑вы ѕѣлѡ̀ возлюби́вый: ра́дꙋйсѧ, всѧ̑ ѻ҆́бща и҆мѣ́ти бра́тїи въ ѡ҆би́тели твое́й законоположи́вый.

Ра́дꙋйсѧ, ратобо́рче до́блїй, полкѝ неви́димыхъ врагѡ́въ крѣ́пкѡ побѣди́вый: ра́дꙋйсѧ, вождю̀ бл҃гоискꙋ́сный во́инѡвъ дꙋхо́вныхъ.

Ра́дꙋйсѧ, вели́кихъ пꙋстынножи́телей вѣ́рный подража́телю: ра́дꙋйсѧ, дре́внихъ бг҃оно́сныхъ ѻ҆тцє́въ ре́вностный послѣ́дователю.

Ра́дꙋйсѧ, прпⷣбнагѡ чꙋдотво́рца се́ргїа многолюби́мый дрꙋ́же и҆ собесѣ́дниче: ра́дꙋйсѧ, прпⷣбнагѡ чꙋдотво́рца кѷрі́лла дꙋхо́вный рꙋководи́телю и҆ наста́вниче.

Ра́дꙋйсѧ, стефа́не, вели́кїй чꙋдотво́рче.

Ви́дѣвъ неразꙋ̑мныѧ человѣ̑ки, напра́снѡ гнѣ́вавшїѧсѧ на тѧ̀, прпⷣбне ѻ҆́тче, мѣ́сто гнѣ́вꙋ и҆́хъ ᲂу҆стꙋпи́лъ є҆сѝ и҆ предпоче́лъ є҆сѝ ᲂу҆дали́тисѧ и҆з̾ ѡ҆би́тели твоеѧ̀ въ предѣ́лы вологѡ́дскїѧ на рекꙋ̀ а҆внѣ́гꙋ, и҆дѣ́же но́вꙋю ѡ҆би́тель и҆́ноческꙋю возгради́лъ є҆сѝ во сп҃се́нїе дꙋ́шъ человѣ́ческихъ, и҆ въ не́й при̑сныѧ ᲂу҆ченикѝ твоѧ̑ прпⷣбныхъ григо́рїѧ и҆ кассїа́на, ꙗ҆́кѡ крі́ны ра́йскїѧ, дꙋхо́внѡ возрасти́лъ є҆сѝ, съ ни́миже тѧ̀ ᲂу҆блажа́емъ и҆ зове́мъ:

Ра́дꙋйсѧ, неꙋсы́пный дѣ́лателю вїногра́да нбⷭ҇нагѡ: ра́дꙋйсѧ, плоды̑ сла̑дкїѧ ѿ дѣ́ланїѧ твоегѡ̀ хрⷭ҇тꙋ̀ принесы́й.

Ра́дꙋйсѧ, и҆́мѧ бж҃їе спаси́тельное во ᲂу҆стѣ́хъ твои́хъ вы́нꙋ и҆мѣ́вый: ра́дꙋйсѧ, па́мѧть пресла́дкагѡ і҆и҃са въ се́рдце твоѐ внѣ́дривый.

Ра́дꙋйсѧ, и҆́го хрⷭ҇то́во благо́е и҆ ле́гкое носи́вый: ра́дꙋйсѧ, скѡ́рби мнѡ́гїѧ благодꙋ́шнѡ претерпѣ́вый.

Ра́дꙋйсѧ, гнѣ́вавшымсѧ напра́снѡ на тѧ̀ не пререка́вый: ра́дꙋйсѧ, кро́тостїю твое́ю ѕло́бꙋ неразꙋ́мныхъ человѣ́кѡвъ побѣжда́вый.

Ра́дꙋйсѧ, миротво́рецъ бл҃гослове́нный бы́вый: ра́дꙋйсѧ, ми́ра ра́ди ѡ҆би́тель твою̀ ѡ҆ста́вивый.

Ра́дꙋйсѧ, но́вꙋ ѡ҆би́тель на рѣцѣ̀ а҆внѣ́гѣ соѡрꙋди́вый: ра́дꙋйсѧ, бг҃оꙋго́днѡ въ не́й со ᲂу҆ченикѝ твои́ми пожи́вый.

Ра́дꙋйсѧ, стефа́не, вели́кїй чꙋдотво́рче.

Возсїѧ́въ свѣ́томъ бг҃оразꙋ́мїѧ твоегѡ̀ въ страна́хъ полꙋ́нощныхъ, стефа́не бг҃омꙋ́дре, повелѣ́нїемъ вели́кагѡ кнѧ́зѧ дими́трїа, па́ки во ѡ҆би́тель твою̀, на рѣцѣ̀ ма́хрѣ тобо́ю ᲂу҆стро́еннꙋю, возвраща́ешисѧ, въ ѡ҆би́тєли же твое́й на рѣцѣ̀ а҆внѣ́гѣ прпⷣбныѧ ᲂу҆ченикѝ твоѧ̑ григо́рїѧ и҆ кассїа́на ѡ҆ста́вилъ є҆сѝ, да продолжа́ютъ ѻ҆нѝ та́мѡ по ᲂу҆че́нїю и҆ примѣ́рꙋ твоемꙋ̀ по́двиги дꙋхѡ́вныѧ, въ ни́хже и҆ вѣнцы̀ мꙋ́ченическими ѿ хрⷭ҇то́вой десни́цы ѻ҆нѝ ᲂу҆венча́шасѧ и҆ чꙋдесы̀ мно́гими ст҃ость свою̀ ѡ҆знаменова́ша. тебѣ̀ ᲂу҆̀бо, ѻ҆́тче, таковы́ѧ ст҃ы́ѧ ᲂу҆ченикѝ стѧжа́вшемꙋ, вопїе́мъ хвале́бнѡ:

Ра́дꙋйсѧ, є҆ѵа́нгєлїѧ хрⷭ҇то́ва немо́лчный проповѣ́дниче: ра́дꙋйсѧ, а҆пⷭ҇льскихъ преда́нїй ре́вностный блюсти́телю.

Ра́дꙋйсѧ, ꙗ҆зы́ческагѡ нече́стїѧ и҆скорени́телю: ра́дꙋйсѧ, вѣ́ры правосла́вныѧ распространи́телю.

Ра́дꙋйсѧ, во слѣ́дъ себѣ̀ ко хрⷭ҇тꙋ̀ ᲂу҆ченикѝ твоѧ̑ приведы́й: ра́дꙋйсѧ, ст҃а̑ѧ ча̑да ѡ҆ хрⷭ҇тѐ стѧжа́вый.

Ра́дꙋйсѧ, съ ни́ми возше́дый прїѧ́ти мздꙋ̀ нбⷭ҇нꙋю ѿ гдⷭ҇а: ра́дꙋйсѧ, не сокры́вый тала́нтъ, врꙋче́нный тебѣ̀ ѿ всевы́шнѧгѡ домовлады́ки.

Ра́дꙋйсѧ, кꙋ́плю мно́гꙋ и҆́мъ сотвори́вый, сп҃се́нїе дꙋ́шъ человѣ́ческихъ: ра́дꙋйсѧ, заблꙋ́ждшыѧ на пꙋ́ть пра́вый напра́вивый твои́ми ᲂу҆че́ньми.

Ра́дꙋйсѧ, бли̑жнїѧ твоѧ̑ и҆́скреннѡ возлюби́вый: ра́дꙋйсѧ, сп҃се́нїю и҆́хъ дꙋше́вномꙋ ᲂу҆се́рднѡ послꙋжи́вый.

Ра́дꙋйсѧ, стефа́не, вели́кїй чꙋдотво́рче.

Но́ваго тѧ̀ ревни́телѧ по бл҃гоче́стїю позна́въ бл҃говѣ́рный вели́кїй кнѧ́зь дими́трїй, ѻ҆тца̀ дꙋхо́внаго себѣ̀ тѧ̀ наречѐ и҆ во все́мъ съ любо́вїю послꙋ́шаше твои́хъ совѣ́тѡвъ бг҃омꙋ́дрыхъ, прпⷣбне ѻ҆́тче на́шъ стефа́не, вѣ́даѧ бли́зость твою̀ къ цр҃ю̀ царе́й хрⷭ҇тꙋ̀ бг҃ꙋ, є҆го́же ᲂу҆молѧ́ти не преста́й и҆ ѡ҆ на́съ грѣ́шныхъ, вопїю́щихъ тѝ хвале́бнѡ:

Ра́дꙋйсѧ, крі́не пꙋсты́ннагѡ прозѧбє́нїѧ: ра́дꙋйсѧ, мѵ́ро хрⷭ҇то́ва благоꙋха́нїѧ.

Ра́дꙋйсѧ, смире́нїѧ соверше́ннагѡ зерца́ло: ра́дꙋйсѧ, ѿ стрѣ́лъ вра́жїихъ крѣ́пкое на́мъ забра́ло.

Ра́дꙋйсѧ, смире́нїемъ высѡ́каѧ стѧжа́вый: ра́дꙋйсѧ, бога́тство нетлѣ́нное ᲂу҆наслѣ́дивый.

Ра́дꙋйсѧ, пꙋсты́ню дꙋхо́внѡ просвѣти́вый: ра́дꙋйсѧ, сле́зными пото́ки браздꙋ̀ дꙋше́внꙋю напои́вый.

Ра́дꙋйсѧ, посѣще́нїѧ прпⷣбнаго се́ргїа ᲂу҆досто́енный: ра́дꙋйсѧ, бл҃гослове́нїемъ и҆ моли́твою є҆гѡ̀ ѡ҆свѧще́нный.

Ра́дꙋйсѧ, прпⷣбїемъ свѣ́тлѡ ᲂу҆краше́нный: ра́дꙋйсѧ, дара́ми бж҃їѧ блгⷣти преиспо́лненный.

Ра́дꙋйсѧ, стефа́не, вели́кїй чꙋдотво́рче.

Ве́сь въ бз҃ѣ бы́въ, прпⷣбне ѻ҆́тче, ѡ҆ бз҃ѣ и҆ ᲂу҆гожде́нїи є҆мꙋ̀ всегда̀ бесѣ́довалъ є҆сѝ со ᲂу҆ченикѝ твои́ми и҆ ѿ любвѐ сердє́чныѧ ко гдⷭ҇ꙋ сле́зы мнѡ́гїѧ и҆злива́лъ є҆сѝ ѿ ѻ҆че́съ твои́хъ при бесѣ́дахъ си́хъ, ᲂу҆молѧ́ѧ ча̑да твоѧ̑ дꙋхѡ́внаѧ ничто́же предпочита́ти па́че любвѐ хрⷭ҇то́вы. мо́лимъ тѧ̀, ᲂу҆го́дниче бж҃їй, сподо́би и҆ на́съ хла́дныхъ воспламени́тисѧ любо́вїю ко гдⷭ҇ꙋ, да возмо́жемъ неѡсꙋжде́ннѡ вопи́ти тебѣ̀:

Ра́дꙋйсѧ, грѣ̑шники на покаѧ́нїе наста́вивый: ра́дꙋйсѧ, ка́ющыѧсѧ съ бг҃омъ примири́вый.

Ра́дꙋйсѧ, ѻ҆те́цъ чадолюби́вый ᲂу҆ченикѡ́мъ твои̑мъ бы́вый: ра́дꙋйсѧ, не́мѡщи немощны́хъ любвеѡби́льнѡ носи́вый.

Ра́дꙋйсѧ, ᲂу҆невѣ́стивый хрⷭ҇тꙋ̀ мнѡ́гїѧ дꙋ́ши человѣ́чєскїѧ: ра́дꙋйсѧ, ѡ҆́бразъ соверше́нства дꙋхо́внагѡ въ себѣ̀ ꙗ҆ви́вый.

Ра́дꙋйсѧ, съ пла́кавшими пла́кавый: ра́дꙋйсѧ, болѧ́щыѧ посѣща́вый и҆ ни́щыѧ пита́вый.

Ра́дꙋйсѧ, вдѡ́въ и҆ сирѡ́тъ защи́тниче: ра́дꙋйсѧ, ѡ҆би́димыхъ и҆ гони́мыхъ застꙋ́пниче.

Ра́дꙋйсѧ, си́льнымъ мі́ра сꙋда̀ бж҃їѧ провозвѣ́стниче: ра́дꙋйсѧ, всѧ́кїѧ непра́вды нелицепрїѧ́тный ѡ҆бличи́телю.

Ра́дꙋйсѧ, стефа́не, вели́кїй чꙋдотво́рче.

Вѣті̑ѧ бг҃омꙋ́дрый бы́лъ є҆сѝ, прпⷣбне ѻ҆́тче стефа́не, и҆ ꙗ҆зы́комъ твои́мъ, ꙗ҆́кѡ тро́стїю кни́жника скоропи́сца, зако́нъ бг҃а твоегѡ̀ начертава́лъ є҆сѝ на сердца́хъ человѣ́ческихъ, всѣ̑мъ вѣ́рнѡ показꙋ́ѧ пꙋ́ть ко сп҃се́нїю, по немꙋ́же са́мъ неꙋкло́ннѡ ше́ствовалъ є҆сѝ до бл҃же́нныѧ твоеѧ̀ кончи́ны. тѣ́мже прїимѝ ѿ на́съ похвалы̑ таковы̑ѧ:

Ра́дꙋйсѧ, главо̀ ст҃а́ѧ, бл҃года́тїю бж҃їею ѡ҆сѣне́ннаѧ: ра́дꙋйсѧ, проповѣ́дниче сладкоглаго́ливый, вѣща́вый словеса̀ жи́зни вѣ́чныѧ.

Ра́дꙋйсѧ, пꙋсты́нный граждани́не, є҆гѡ́же ᲂу҆че́ньми спасо́шасѧ мно́зи: ра́дꙋйсѧ, приведы́й ко хрⷭ҇тꙋ̀ соверше́нныѧ подви́жники.

Ра́дꙋйсѧ, воево́до добропобѣ́дный ра́тꙋющихъ со враги̑ неви́димыми: ра́дꙋйсѧ, рꙋководи́телю предо́брый пꙋстынножи́телей.

Ра́дꙋйсѧ, ѱалмопѣ́нїи немо́лчными бг҃а сла́вивый: ра́дꙋйсѧ, моли̑твы ᲂу҆милє́нныѧ вы́нꙋ гдⷭ҇ви приноси́вый.

Ра́дꙋйсѧ, колѣнопреклонє́нїѧ мнѡ́гаѧ соверша́вый: ра́дꙋйсѧ, посто́мъ и҆ сꙋхоѧде́нїемъ пло́ть твою̀ и҆знꙋри́вый.

Ра́дꙋйсѧ, ве́тхаго въ себѣ̀ человѣ́ка всецѣ́лѡ дх҃ꙋ покори́вый: ра́дꙋйсѧ, всѧ̑ стра̑сти грѣхѡ́вныѧ въ себѣ̀ ѡ҆б̾ꙋзда́вый.

Ра́дꙋйсѧ, стефа́не, вели́кїй чꙋдотво́рче.

Цр҃ѧ̀ нбⷭ҇наго хрⷭ҇та̀, є҆мꙋ́же въ житїѝ земно́мъ бл҃гоꙋгоди́лъ є҆сѝ, прпⷣбне ѻ҆́тче, по сме́рти твое́й прославлѧ́еши чꙋдотворє́нїи твои́ми, прїе́мъ ѿ него̀ блгⷣть и҆сцѣле́нїй всѧ́кихъ недꙋ́гѡвъ: тѣ́мже всѝ, насыща́ющїисѧ чрез̾ тебѐ дарѡ́въ є҆гѡ̀ бжⷭ҇твенныхъ, велича́ютъ є҆гѡ̀ щедрѡ́ты, тебѐ же, чꙋдотво́рца пресла́внаго, ᲂу҆блажа́ютъ си́це:

Ра́дꙋйсѧ, ст҃ѡ и҆ прпⷣбнѡ жи́знь земнꙋ́ю сконча́вый: ра́дꙋйсѧ, во и҆схо́дѣ твое́мъ бл҃гоꙋха́нїе сла́достное и҆спꙋсти́вый.

Ра́дꙋйсѧ, сме́рть вкꙋси́вый, тлѣ́нїѧ же не позна́вый: ра́дꙋйсѧ, съ свѣ́тлымъ лице́мъ во гро́бѣ возлѣжа́вый.

Ра́дꙋйсѧ, дерзнове́нїе ве́лїе ко гдⷭ҇ꙋ стѧжа́вый: ра́дꙋйсѧ, чꙋдотворе́нїѧ да́ръ свы́ше полꙋчи́вый.

Ра́дꙋйсѧ, пресели́выйсѧ ѿ землѝ къ ѡ҆би́телемъ нбⷭ҇нымъ: ра́дꙋйсѧ, та́мѡ со ст҃ы́ми наслажда́ѧйсѧ бл҃же́нства вѣ́чнагѡ.

Ра́дꙋйсѧ, врачꙋ̀ бл҃года́тный и҆ безме́здный: ра́дꙋйсѧ, цѣле́бниче, не мзды̀, є҆ди́ныѧ то́кмѡ вѣ́ры тре́бꙋѧй.

Ра́дꙋйсѧ, болѧ́щыѧ здра̑вы сотворѧ́ѧй: ра́дꙋйсѧ, и҆сцѣлє́нїѧ недꙋ̑жнымъ неѡскꙋ́днѡ подава́ѧй.

Ра́дꙋйсѧ, стефа́не, вели́кїй чꙋдотво́рче.

Свѣ́тъ нбⷭ҇ный возсїѧ̀ на гро́бѣ твое́мъ, стефа́не чꙋдотво́рче, и҆ ѻ҆́гненнаѧ лꙋча̀ въ нощѝ ѡ҆зарѝ мѣ́сто посме́ртнагѡ твоегѡ̀ поко́ѧ, въ зна́менїе вели́кїѧ твоеѧ̀ свѧ́тости. мо́лимъ тѧ̀, прпⷣбне, лꙋче́ю бж҃їей блгⷣти, въ тебѣ̀ живꙋ́щей, ѡ҆зарѝ и҆ на́шѧ мра̑чныѧ дꙋ́шы и҆ приведи́ ны ко свѣ́тꙋ спⷭ҇нїѧ твои́ми моли́твами, да возмо́жемъ досто́йно бл҃гохвали́ти тѧ̀ пѣ́сньми сицевы́ми:

Ра́дꙋйсѧ, ѿ го́рнихъ высо́тъ къ земнорѡ́днымъ млⷭ҇тивѡ приника́ѧй: ра́дꙋйсѧ, ѿ ра́ки твоеѧ̀ ст҃ы́ѧ и҆сцѣлє́нїѧ болѧ́щимъ подава́ѧй.

Ра́дꙋйсѧ, въ со́нїихъ и҆ видѣ́нїихъ вѣ̑рныѧ посѣща́ѧй: ра́дꙋйсѧ, ѡ҆би́тель твою̀ и҆ по сме́рти моли́твеннѡ назира́ѧй.

Ра́дꙋйсѧ, скорбѧ́щихъ бл҃гі́й ᲂу҆тѣ́шителю: ра́дꙋйсѧ, ᲂу҆ныва́ющихъ бл҃года́тный ѡ҆бодри́телю.

Ра́дꙋйсѧ, рѣко̀ приснотекꙋ́щаѧ чꙋде́съ: ра́дꙋйсѧ, ми́лованїѧ и҆сто́чниче неѡскꙋ́дный.

Ра́дꙋйсѧ, бл҃гоꙋтро́бїѧ щедрѡ́ты ѡ҆би́льнѡ всѣ̑мъ да́рꙋѧй: ра́дꙋйсѧ, бли́жнихъ и҆ да́льнихъ млⷭ҇тьми твои́ми ᲂу҆щедрѧ́ѧй.

Ра́дꙋйсѧ, и҆ невѣ́дꙋщимъ тѧ̀ бл҃годѣѧ̑нїѧ цѣлє́бнаѧ и҆сточа́ѧй: ра́дꙋйсѧ, є҆ди́нымъ призыва́нїемъ и҆́мене твоегѡ̀ недꙋ́ги неисцѣ̑льныѧ врачꙋ́ѧй.

Ра́дꙋйсѧ, стефа́не, вели́кїй чꙋдотво́рче.

Пою́ще ст҃о́е и҆ равноа́гг҃льное житїѐ твоѐ прославлѧ́емъ мнѡ́гаѧ и҆ пресла̑внаѧ чꙋдотворє́нїѧ твоѧ̑, прпⷣбне чꙋдотво́рче, ѻ҆́тче на́шъ стефа́не: ты́ же, ꙗ҆́кѡ бл҃гъ и҆ млⷭ҇тивъ, не возгнꙋша́йсѧ пѣ́нїй на́шихъ моле́бныхъ, но ѻ҆те́ческою любо́вїю твое́ю прїимѝ ѧ҆̀ въ воню̀ бл҃гоꙋха́нїѧ дꙋхо́внагѡ и҆ ниспослѝ на́мъ грѣ̑шнымъ всѧ̑ бл҃гопотрє́бныѧ ко сп҃се́нїю да́ры бл҃гости бж҃їей, да бл҃года́рственнѡ тебѣ̀ вопїе́мъ:

Ра́дꙋйсѧ, прест҃ы́ѧ трⷪ҇цы бл҃говоле́нїемъ ѡ҆сѣне́нный: ра́дꙋйсѧ, прест҃ы́ѧ бцⷣы млⷭ҇тьми ᲂу҆ще́дренный.

Ра́дꙋйсѧ, а҆́гг҃лѡвъ сожи́телю: ра́дꙋйсѧ, ст҃ы́хъ всѣ́хъ сонаслѣ́дниче.

Ра́дꙋйсѧ, грѣ́шныхъ млⷭ҇тивый застꙋ́пниче: ра́дꙋйсѧ, бѣ́дствꙋющихъ ско́рый помо́щниче.

Ра́дꙋйсѧ, сла́во и҆ похвало̀ ст҃ы́ѧ твоеѧ̀ ѡ҆би́тели: ра́дꙋйсѧ, блгⷣтное ᲂу҆добре́нїе землѝ рѡссі́йскїѧ.

Ра́дꙋйсѧ, всѣ̑мъ приходѧ́щымъ къ тебѣ̀ на поклоне́нїе да́ры цѣлє́бныѧ ще́дрѡ подава́ѧй: ра́дꙋйсѧ, болѣ̑зни неисцѣ̑льныѧ є҆ди́нымъ прикоснове́нїемъ къ ра́цѣ твое́й и҆сцѣлѧ́ѧй.

Ра́дꙋйсѧ, по бз҃ѣ и҆ бцⷣѣ крѣ́пкое на́ше ᲂу҆пова́нїе: ра́дꙋйсѧ, дꙋ́шъ и҆ тѣле́съ на́шихъ бг҃одарова́нное врачева́нїе.

Ра́дꙋйсѧ, стефа́не, вели́кїй чꙋдотво́рче.