Кондак 1
Избра́ннаго свети́льника, тму́ идолослуже́ния в держа́ве Росси́йстей разгна́вшаго и све́том Боже́ственныя ве́ры ю́ просвети́вшаго, восхваля́ем тя́, святы́й равноапо́стольный кня́же Влади́мире. Ты́ же, я́ко вы́ну со дерзнове́нием предстоя́й Царю́ ца́рствующих, не преста́й моля́ся о достоя́нии твое́м, и твои́ми моли́твами сохраня́й на́с от вся́ких бе́д и зо́л, да со умиле́нием благода́рственно зове́м ти́:
Ра́дуйся, Влади́мире, держа́вы Ру́сския просвети́телю.
Икос 1
А́нгелом и челове́ком Творе́ц, времена́ и ле́та во Свое́й вла́сти положи́вый и судьбы́ ца́рств и наро́дов устроя́яй, егда́ благоизво́ли призва́ти ро́д ру́сский от тмы́ идолослуже́ния ко све́ту и́стины и пра́вды ве́чныя, поста́ви тя́, благове́рный кня́же, благовести́теля и соверши́теля сея́ всеблаги́я во́ли Своея́. Те́мже, благодаря́ще Творца́ и Спа́са на́шего, славосло́вим тя́, я́ко вели́каго избра́нника Бо́жия на́шего ра́ди спасе́ния, с весе́лием зову́ще:
Ра́дуйся, равноапо́столе, ко просвеще́нию наро́да ру́сскаго прему́дрым Про́мыслом предызбра́нный; ра́дуйся, от первозва́ннаго апо́стола на гора́х Ки́евских прорече́нный.
Ра́дуйся, пресла́вный сосу́де Боже́ственныя благода́ти, держа́ве твое́й дарова́нный; ра́дуйся, пречу́дный ко́реню, из него́же на земли́ на́шей произрасте́ ве́лие дре́во правове́рия.
Ра́дуйся, я́ко тобо́ю и́мя Госпо́дне во все́х преде́лех страны́ твоея́ прославля́ется; ра́дуйся, я́ко и твое́ пресла́вное и́мя от все́х родо́в ру́сских с любо́вию воспева́ется.
Ра́дуйся, Влади́мире, держа́вы Ру́сския просвети́телю.
Кондак 2
Ви́дя суету́ безду́шных и́долов и пре́лесть диа́вола, е́юже уловля́ет те́мныя лю́ди в се́ти беззако́ния, ку́пно же слы́ша святы́х первому́ченик ру́сских за Христа́, глаго́лющих безбо́жным мучи́телем: «Бо́зи ва́ши не су́ть бо́зи, но дре́во, е́же дне́сь пребыва́ет, у́тро сгнило́ е́сть. Еди́н же е́сть Бо́г И́стинный, И́же сотвори́ не́бо и зе́млю». Тогда́ возгоре́лся еси́ се́рдцем, во е́же взыска́ти и уве́дети Сего́ Еди́наго И́стиннаго Бо́га, Ему́же покланя́ется вся́ко коле́но Небе́сных, земны́х и преиспо́дних, немо́лчно воспева́я: Аллилу́иа.
Икос 2
Ра́зум Всевы́шний приосени́ тя, егда́ предста́ша ти́ пропове́дницы разнове́рнии и потща́лся еси́, да не уловле́н бу́деши в се́ти лжеуче́ния, но да обря́щеши ве́ру и́стинную и спаси́тельную. Те́мже ублажа́ем тя́:
Ра́дуйся, прему́дрый просвети́телю наро́да ру́сскаго; ра́дуйся, ра́зум богопросвеще́нный стяжа́вый.
Ра́дуйся, я́ко ухищре́ния и суесло́вия лжеучи́телей посрами́л еси́; ра́дуйся, я́ко глаго́лы жи́зни ве́чныя в словесе́х Мудреца́ И́стиннаго му́дре уразуме́л еси́.
Ра́дуйся, лучу́ Боже́ственнаго све́та посреде́ тмы́ лжеве́рия; ра́дуйся, стено́ неруши́мая посреде́ бу́ри страсте́й язы́ческих.
Ра́дуйся, Влади́мире, держа́вы Ру́сския просвети́телю.
Кондак 3
Си́лою свы́ше умудре́н, посла́л еси́ му́жи избра́нныя во страны́ ины́я, да ви́дят и испыта́ют, ка́ко ини́и наро́ди слу́жат Бо́гу и ка́ко ве́ру свою́ от де́л свои́х показу́ют. Ти́и же, вся́ до́бре испыта́вше, достиго́ша Царьгра́да, иде́же ви́дяще благоле́пное соверше́ние Боже́ственнаго священноде́йствия, мне́ша себе́ не на земли́, но на Небеси́ стоя́ти, и со умиле́нием се́рдца возда́ша хвалу́ Го́сподеви, зову́ще: Аллилу́иа.
Икос 3
Иму́ще в сердца́х свои́х тве́рдое увере́ние, я́ко ве́ра гре́ко-восто́чная вои́стинну е́сть Правосла́вная и я́ко священноде́йствия ея́ па́че все́х ины́х велеле́пна, по́сланнии тобо́ю му́жие, возврати́вшеся во оте́чествие свое́, испове́даша сия́ пред лице́м твои́м и пред старе́йшины твои́ми, реко́ша же: «Никто́же, вкуси́в сла́дкаго, восхо́щет го́рькаго, та́ко и мы́ не мо́жем па́ки оста́ти зде́ и служи́ти куми́ром». Яково́е извеще́ние прие́м, возгоре́лся еси́ ре́вностию по ве́ре и́стинней. Сего́ ра́ди велича́ем тя́:
Ра́дуйся, гла́су Боже́ственныя благода́ти приле́жно внима́вый; ра́дуйся, води́тельству Свята́го Ду́ха усе́рдно после́дствовавый.
Ра́дуйся, я́ко сове́тники твоя́ умудри́л еси́; ра́дуйся, я́ко вся́ лю́ди твоя́ сове́ты твои́ми ко и́стинней ве́ре приве́л еси́.
Ра́дуйся, я́ко со тща́нием поиска́л еси́ до́браго би́сера — Христа́; ра́дуйся, пчело́ трудолюби́вая, му́дре взыска́вшая цветы́, в ни́х же сла́дкий ме́д и́стины и спасе́ния.
Ра́дуйся, Влади́мире, держа́вы Ру́сския просвети́телю.
Кондак 4
Бу́рею сумне́ний и недоуме́ний не поколеба́лся еси́, повнегда́ уве́дети тебе́ ве́ру и́стинную, правосла́вную, но а́бие восхоте́л еси́ прия́ти Свято́е Креще́ние со все́ю держа́вою твое́ю, да ку́пно с не́ю, я́ко оте́ц со ча́ды свои́ми, досто́йно воспое́ши Бо́гу: Аллилу́иа.
Икос 4
Слы́шавше боля́ре и старе́йшины я́же о ве́ре и́стинней, помяну́ша прама́терь твою́, святу́ю княги́ню О́льгу, я́же прия́т Свято́е Креще́ние в Царегра́де, и реко́ша: «А́ще не бы́ бла́га бы́сть ве́ра сия́, не бы́ прия́ла ю́ сия́ мудре́йшая в жена́х». Те́мже и мы́, при́сно помина́юще прему́друю О́льгу, благода́рственно зове́м ти́:
Ра́дуйся, я́ко соблю́л еси́ Боже́ственное се́мя, е́же все́я в се́рдце твое́ блаже́нная прама́терь твоя́; ра́дуйся, я́ко святы́м заве́том тоя́ после́довал еси́.
Ра́дуйся, я́ко прови́дел еси́ в не́й зарю́ спасе́ния наро́да твоего́; ра́дуйся, со́лнце, возше́дшее по заре́ то́й.
Ра́дуйся, све́те, старе́йшины твоя́ просвети́вый; ра́дуйся, вся́ лю́ди твоя́ ко Христу́ приведы́й.
Ра́дуйся, Влади́мире, держа́вы Ру́сския просвети́телю.
Кондак 5
Боготка́нную оде́жду Свята́го Креще́ния восхоте́в получи́ти, помы́слил еси́, отку́ду и ка́ко име́ти и́маши толи́к со́нм па́стырей и учи́телей, да просветя́т вся́ лю́ди твоя́ с тобо́ю, и ка́ко поя́ти себе́ жену́, в ве́ре святе́й испыта́нну, до́му твоему́ благу́ю строи́тельницу, ча́дом твои́м ма́терь во Христе́, сове́тницу же все́м во благоче́стии, и о се́м все́м поревнова́в, ду́х тво́й приведе́ тя́ ко стране́ Гре́честей, иде́же ве́рнии от ле́т дре́вних благоче́стно воспева́ют Бо́гу: Аллилу́иа.
Икос 5
Ви́девше ца́рие гре́честии всю́ страну́ твою́ во тме́ идолослуже́ния косня́щу, небрего́ша тя́, я́ко куми́ром служа́ща, оба́че побежде́ни бы́вше от тебе́, и уве́девше кре́пкое произволе́ние твое́ прия́ти Свято́е Креще́ние и вся́ лю́ди твоя́ ко Христу́ привести́, испо́лнишася ра́дости и вда́ша ти́ сестру́ свою́ А́нну на бра́к, па́стыри же и учи́тели наро́ду твоему́. Те́мже и мы́, при́сно ра́дующеся свято́му сему́ сою́зу твоему́, воспева́ем тя́:
Ра́дуйся, я́ко посети́л е́сть тя́ Восто́к свы́ше; ра́дуйся, я́ко звезда́ Всевы́шняго приведе́ тя́ к Восто́ку, иде́же Прему́дрость созда́ себе́ до́м и утверди́ столпо́в се́дмь, се́дмь Собо́ров Вселе́нских, и́же утверди́ша ве́ру Христо́ву по вселе́нней.
Ра́дуйся, я́ко сия́ е́сть ве́ра апо́стольская, сия́ ве́ра вселе́нную всю́ утверди́; ра́дуйся, я́ко от чи́стаго исто́чника чи́стое уче́ние Христо́во прия́л еси́.
Ра́дуйся, до́му твоего́ и ча́д твои́х до́брый рачи́телю; ра́дуйся, всего́ наро́да твоего́ прему́дрый наста́вниче.
Ра́дуйся, Влади́мире, держа́вы Ру́сския просвети́телю.
Кондак 6
Па́стырие и учи́тели, и́хже прия́л еси́, прехва́льне кня́же, от царе́й гре́ческих, я́ко да напая́ют всю́ страну́ Ру́сскую уче́ньми Боже́ственными, со тща́нием теча́ху на де́лание свое́, благода́рственно пою́ще призва́вшему наро́д тво́й ко спасе́нию Го́споду Бо́гу: Аллилу́иа.
Икос 6
Возсия́ пречу́дне чу́вственный све́т в помраче́нною неду́гом слепоты́ о́чию твое́ю, в душе́ твое́й све́ту благода́ти возсия́вшу, егда́, просвети́вся Боже́ственным Креще́нием, изше́л еси́ от святы́я купе́ли, е́же ощути́в, ра́достно воскли́кнул еси́: «ны́не позна́х Бо́га И́стиннаго». Те́мже ублажа́ем тя́:
Ра́дуйся, свети́льниче, огне́м Боже́ственныя благода́ти во тме́ язы́чества возжже́нный; ра́дуйся, благовести́телю све́та Христо́ва, омраче́нная очеса́ и сердца́ наро́да твоего́ отверза́яй.
Ра́дуйся, я́ко у́мною о́чию твое́ю прови́дел еси́ Бо́жие смотре́ние о держа́ве твое́й; ра́дуйся, я́ко до конца́ потща́лся еси́, да и вси́ лю́дие твои́ просветя́тся в не́м.
Ра́дуйся, богосве́тлая главо́ князе́й Ру́сских; ра́дуйся, сла́внейшее украше́ние и похвало́ Це́ркве Христо́вы.
Ра́дуйся, Влади́мире, держа́вы Ру́сския просвети́телю.
Кондак 7
Хотя́ просвети́ти Боже́ственным Креще́нием наро́д ру́сский, пе́рвее повеле́л еси́ крести́тися сыново́м и вельмо́жам твои́м, да вси́ лю́дие, после́дующе стопа́м и́х, со благи́м произволе́нием присту́пят ко Свято́му Креще́нию, благоче́стно зову́ще Бо́гу: Аллилу́иа.
Икос 7
Но́во творе́ние во Христе́ яви́ тя́, по Святе́м Креще́нии, о́браз жития́ твоего́: ревни́тель бо пе́рвее бы́в идолослуже́ния, последи́ вы́ну по ве́ре Христо́вой ревнова́л еси́; возлюби́л же еси́ кро́тость и милосе́рдие, воздержа́ние и целому́дрие и все́ житие́ по за́поведем Госпо́дним. Чудя́щеся у́бо благо́му премене́нию сему́, благоче́стно зове́м ти́:
Ра́дуйся, я́ко росо́ю Свята́го Ду́ха пла́мень страсте́й в себе́ угаси́л еси́; ра́дуйся, я́ко огне́м Боже́ственныя благода́ти вся́ помышле́ния и вся́ чу́вствия твоя́ согре́л еси́.
Ра́дуйся, селе́ния Госпо́дня, це́ркви святы́я, па́че все́х селе́ний земны́х возлюби́вый; ра́дуйся, Боже́ственныя слу́жбы и Христо́ва уче́ния па́че все́х дея́ний и уче́ний взыска́вый.
Ра́дуйся, о́браз но́ваго жития́ все́м лю́дем твои́м в себе́ показа́вый; ра́дуйся, си́рых и убо́гих благи́й корми́телю и попечи́телю.
Ра́дуйся, Влади́мире, держа́вы Ру́сския просвети́телю.
Кондак 8
Стра́нное бе́, ку́пно же и радостотво́рное виде́ние, егда́ тмочи́сленный со́нм муже́й и же́н, ю́нош и де́в, та́же незло́бивых младе́нец с ра́достию теча́ху к реце́ Днепру́, я́коже ко Иорда́ну, иде́же креща́хуся во и́мя Отца́ и Сы́на и Свята́го Ду́ха, иере́ом на бре́зе вознося́щим тайноде́йственныя моли́твы и воспева́ющим Го́споду пе́снь: Аллилу́иа.
Икос 8
Ве́сь бы́л еси́ объя́т неизрече́нною ра́достию, достоблаже́нне кня́же, зря́ креща́емыя лю́ди твоя́, и во умиле́нии се́рдца, возда́в хвалу́ Спаси́телю Бо́гу, усе́рдно моли́л еси́ Его́, да при́зрит на новопросвеще́нныя лю́ди Своя́, да утверди́т и́х в ве́ре и благоче́стии и да просла́вит и́мя Свое́ в страна́х ру́сских. Воспомина́юще у́бо пресла́вное и прера́достное си́х сбытие́, прино́сим ти́ благода́рственныя и похва́льныя пе́сни сия́:
Ра́дуйся, вино́вниче спасе́ния безчи́сленных ду́ш в земли́ ру́сстей; ра́дуйся, неоскудева́емый исто́чниче благослове́ний и ми́лостей Бо́жиих к наро́ду твоему́.
Ра́дуйся, благи́й вертогра́дарю, са́д Боже́ственныя ве́ры в ца́рстве твое́м насади́вый; ра́дуйся, пото́че сла́дости, напои́вый водо́ю благоче́стия лю́ди ру́сския.
Ра́дуйся, я́ко Боже́ственную ве́ру просла́вил еси́, пре́лесть же и́дольскую посрами́л еси́; ра́дуйся, я́ко Ца́рь царе́й дарова́ тебе́ му́дрость Соломо́нову, кро́тость Дави́дову, ре́вность Илиину́, правове́рие апо́стольское.
Ра́дуйся, Влади́мире, держа́вы Ру́сския просвети́телю.
Кондак 9
Все́ естество́ А́нгелов, храни́телей ро́да челове́ческаго, просла́ви тя́, благове́рный кня́же, егда́ повеле́л еси́ отце́м и ма́терем вдая́ти де́ти своя́ в уче́ние кни́жное, да разуме́ют, я́же ве́руют, и да позна́ют, ка́ко житие́ свое́ до́бре по ве́ре провожда́ти. Те́мже и ны́не при́зри на де́ти, уча́щияся Боже́ственным писа́нием, и на отце́в и ма́терей и́х, па́стырей же и учи́телей, споспешеству́ющих и́м во уче́нии, благослови́, укрепи́ и наста́ви я́ во труде́х и́х, да возраста́ют в ве́ре и́стинней и в до́бром житии́, пою́ще Бо́гу: Аллилу́иа.
Икос 9
Вети́и многовеща́ннии не мо́гут досто́йно изобрази́ти вели́чие благодея́ний, дарова́нных тобо́ю, кня́же, земли́ твое́й: водвори́в бо в не́й Боже́ственную ве́ру, изба́вил еси́ ю́ от мра́ка язы́ческаго и ве́чныя поги́бели, откры́л еси́ е́й пу́ть ко и́стинному просвеще́нию, ко спасе́нию и земно́му благоде́нствию. Сего́ ра́ди со благодаре́нием благоче́стно зове́м ти́:
Ра́дуйся, могу́щества и сла́вы держа́вы Ру́сския основа́телю; ра́дуйся, и́стиннаго просвеще́ния и благоче́стия в не́й насади́телю.
Ра́дуйся, в наро́де твое́м язы́ческих суеве́рий и злы́х обы́чаев искорени́телю; ра́дуйся, и́дольских тре́бищ и куми́ров потреби́телю.
Ра́дуйся, святы́х хра́мов созда́телю; ра́дуйся, равноапо́стольному царю́ Константи́ну равноче́стный подо́бниче.
Ра́дуйся, Влади́мире, держа́вы Ру́сския просвети́телю.
Кондак 10
Спасти́ хотя́ от ве́чныя поги́бели ца́рство твое́, в бе́здне идолослуже́ния ги́бнувшее, подъя́л еси́ ве́лия труды́ и попече́ния, обходя́ гра́ды и ве́си земли́ твоея́ и посыла́я повсю́ду па́стыри духо́вныя, во е́же Боже́ственною ве́рою и Святы́м Креще́нием лю́ди твоя́ просвети́ти, и научи́ти и́х Еди́ному И́стинному Бо́гу пе́ти: Аллилу́иа.
Икос 10
Стена́ тве́рдая бы́л еси́ земли́ твое́й во вся́ дни́ живота́ твоего́ проти́ву враго́в тоя́ и вино́вник благоде́нствия и сла́вы ея́. Бу́ди и ны́не защи́тник необори́мый от вра́г ви́димых и неви́димых и помо́щник в ну́ждех и ско́рбех на́м, с любо́вию вопию́щим тебе́:
Ра́дуйся, благопопечи́тельнейший па́стырю наро́да ру́сскаго; ра́дуйся, благострада́тельнейший о́тче си́рых и стра́ждущих.
Ра́дуйся, гото́вый споспе́шниче и́щущих ве́чнаго спасе́ния и и́стиннаго просвеще́ния; ра́дуйся, сла́ва и ра́дование держа́вы Ру́сския.
Ра́дуйся, при́сный помо́щниче в многотру́днем де́ле народоправле́ния; ра́дуйся, мо́щный спобо́рниче в бра́ни во́инства ру́сскаго.
Ра́дуйся, Влади́мире, держа́вы Ру́сския просвети́телю.
Кондак 11
Пе́ние умиле́нное приими́ от на́с, уго́дниче Бо́жий, сокруши́ твои́ми моли́твами вся́ враги́ на́ша, насади́ правосла́вную ве́ру среди́ язы́к страны́ ру́сския, неве́дущих и́стиннаго Бо́га, искорени́ в не́й вся́ е́реси и раско́лы, да вси́ сы́нове ру́сския еди́ными усты́ и еди́ным се́рдцем сла́вят Бо́га, пою́ще Ему́: Аллилу́иа.
Икос 11
Светоза́рное свети́ло, просвеща́ющее сия́нием свои́м всю́ страну́ ру́сскую, ты́ еси́, достохва́льне кня́же Влади́мире, разгоня́я мра́к идолослуже́ния и показу́я пу́ть к и́стинному просвеще́нию и небе́сному блаже́нству. Сего́ ра́ди, прославля́юще тя́, глаго́лем:
Ра́дуйся, звездо́, просвеще́нная от незаходи́маго Со́лнца Пра́вды; ра́дуйся, путеводи́телю, пра́вую стезю́ к ве́чному спасе́нию на́м откры́вый.
Ра́дуйся, мо́щный споспе́шниче и укрепле́ние пропове́дников правосла́вныя ве́ры; ра́дуйся, при́сный покрови́телю благи́х наста́вников ю́ношества и все́х благотрудя́щихся на по́льзу о́бщую.
Ра́дуйся, ско́рый помо́щниче все́х, к по́мощи твое́й прибега́ющих; ра́дуйся, я́ко все́м усе́рдно тя́ чту́щим, благотво́рныя сове́ты подае́ши.
Ра́дуйся, Влади́мире, держа́вы Ру́сския просвети́телю.
Кондак 12
Благода́ть Пресвята́го Ду́ха испроси́ на́м, преблаги́й па́стырю на́ш, от Всеще́драго Бо́га и Спа́са на́шего, вразумля́ющую и укрепля́ющую на́с в де́ле спасе́ния, да не безпло́дна бу́дет в на́с насажде́нная тобо́ю свята́я ве́ра, но да уклоня́ющеся от путе́й нече́стия и заблужде́ний, хо́дим во све́те за́поведей Бо́жиих, и дости́гнем ве́чнаго блаже́нства, воспева́юще Бо́гу: Аллилу́иа.
Икос 12
Пою́ще твоя́ премно́гая и пресла́вная благодея́ния, явле́нная держа́ве на́шей в просвеще́нии тоя́ све́том Боже́ственныя ве́ры, ку́пно же ве́лия твоя́ труды́ и по́двиги, во благоустрое́ние ея́ подъя́тыя, усе́рдно благодари́м и восхваля́ем тя́, с любо́вию зову́ще:
Ра́дуйся, богоизбра́нне и богопросла́вленне самоде́ржче земли́ Ру́сския; ра́дуйся, несокруши́мое огражде́ние ея́, покро́ве и защище́ние.
Ра́дуйся, ра́йское дре́во, произрасти́вшее две́ пречу́дныя о́трасли, святы́х страстоте́рпцев Бори́са и Гле́ба; ра́дуйся, первостоя́телю святы́х Ру́сския Це́ркве.
Ра́дуйся, апо́столов сопресто́льниче и сликовствова́телю; ра́дуйся, я́ко на зе́млю Ру́сскую вы́ну призира́еши и бла́г вре́менных и ве́чных е́й у Го́спода хода́тайствуеши.
Ра́дуйся, Влади́мире, держа́вы Ру́сския просвети́телю.
Кондак 13
О, прехва́льный и преди́вный равноапо́столе, вели́кий кня́же Влади́мире, приими́ ми́лостивно от на́с благодаре́ние сие́ о все́х, я́же тобо́ю воздаде́ Госпо́дь на́м, отце́м и пра́отцем на́шим и все́й держа́ве Ру́сской, наче́н от дне́ Креще́ния да́же до сего́ часа́, и моли́ Всеблага́го Бо́га проба́вити ми́лость Свою́ на ны́ и на ро́ды родо́в на́ших, утверди́ти ны́ в правове́рии и благоче́стии, храни́ти же от все́х бе́д и зо́л, да сподо́бимся с тобо́ю, я́коже ча́да со отце́м, во ве́ки воспева́ти Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелом и челове́ком Творе́ц, времена́ и ле́та во Свое́й вла́сти положи́вый и судьбы́ ца́рств и наро́дов устроя́яй, егда́ благоизво́ли призва́ти ро́д ру́сский от тмы́ идолослуже́ния ко све́ту и́стины и пра́вды ве́чныя, поста́ви тя́, благове́рный кня́же, благовести́теля и соверши́теля сея́ всеблаги́я во́ли Своея́. Те́мже, благодаря́ще Творца́ и Спа́са на́шего, славосло́вим тя́, я́ко вели́каго избра́нника Бо́жия на́шего ра́ди спасе́ния, с весе́лием зову́ще:
Ра́дуйся, равноапо́столе, ко просвеще́нию наро́да ру́сскаго прему́дрым Про́мыслом предызбра́нный; ра́дуйся, от первозва́ннаго апо́стола на гора́х Ки́евских прорече́нный.
Ра́дуйся, пресла́вный сосу́де Боже́ственныя благода́ти, держа́ве твое́й дарова́нный; ра́дуйся, пречу́дный ко́реню, из него́же на земли́ на́шей произрасте́ ве́лие дре́во правове́рия.
Ра́дуйся, я́ко тобо́ю и́мя Госпо́дне во все́х преде́лех страны́ твоея́ прославля́ется; ра́дуйся, я́ко и твое́ пресла́вное и́мя от все́х родо́в ру́сских с любо́вию воспева́ется.
Ра́дуйся, Влади́мире, держа́вы Ру́сския просвети́телю.
Кондак 1
Избра́ннаго свети́льника, тму́ идолослуже́ния в держа́ве Росси́йстей разгна́вшаго и све́том Боже́ственныя ве́ры ю́ просвети́вшаго, восхваля́ем тя́, святы́й равноапо́стольный кня́же Влади́мире. Ты́ же, я́ко вы́ну со дерзнове́нием предстоя́й Царю́ ца́рствующих, не преста́й моля́ся о достоя́нии твое́м, и твои́ми моли́твами сохраня́й на́с от вся́ких бе́д и зо́л, да со умиле́нием благода́рственно зове́м ти́:
Ра́дуйся, Влади́мире, держа́вы Ру́сския просвети́телю.
Молитвы
О, вели́кий уго́дниче Бо́жий, богоизбра́нный и богопросла́вленный, равноапо́стольный кня́же Влади́мире! Ты́ отри́нул еси́ злове́рие и нече́стие язы́ческое, уве́ровал еси́ во Еди́наго И́стиннаго Триипоста́снаго Бо́га и, восприя́в Свято́е Креще́ние, просвети́л еси́ све́том Боже́ственныя ве́ры и благоче́стия всю́ страну́ Ру́сскую. Сла́вяще у́бо и благодаря́ще Премилосе́рдаго Творца́ и Спаси́теля на́шего, сла́вим и благодари́м и тя́, просвети́телю на́ш и о́тче, я́ко тобо́ю позна́хом спаси́тельную ве́ру Христо́ву и крести́хомся во и́мя Пресвяты́я и Пребоже́ственныя Тро́ицы. То́ю ве́рою изба́вихомся от пра́веднаго осужде́ния Бо́жия, ве́чнаго ра́бства диа́воля и а́дова мучи́тельства; то́ю ве́рою восприя́хом благода́ть всыновле́ния Бо́гу и наде́жду насле́дования Небе́снаго блаже́нства. Ты́ еси́ пе́рвый во́ждь на́ш к Нача́льнику и Соверши́телю на́шего ве́чнаго спасе́ния Го́споду Иису́су Христу́; ты́ еси́ те́плый моли́твенник и хода́тай о стране́ Ру́сской, о во́инстве и о все́х лю́дех. Не мо́жет язы́к на́ш изобрази́ти вели́чие и высоту́ благодея́ний, тобо́ю излия́нных на зе́млю на́шу, отце́в и пра́отцев на́ших и на на́с, недосто́йных. О, всеблаги́й о́тче и просвети́телю на́ш! При́зри на не́мощи на́ша и умоли́ премилосе́рдаго Царя́ Небе́снаго, да не прогне́вается на ны́ зело́, я́ко по не́мощем на́шим по вся́ дни́ согреша́ем, да не погуби́т на́с со беззако́ньми на́шими, но да поми́лует и спасе́т на́с, по ми́лости Свое́й, да всади́т в се́рдце на́ше спаси́тельный стра́х Сво́й, да просвети́т Свое́ю благода́тию у́м на́ш, во е́же разуме́ти на́м пути́ Госпо́дни, оста́вити стези́ нече́стия и заблужде́ний, тща́тися же во стезя́х спасе́ния и и́стины, неукло́ннаго исполне́ния за́поведей Бо́жиих и уста́вов Святы́я Це́ркве. Моли́, благосе́рде, Человеколю́бца Бо́га, да проба́вит на́м ве́лию ми́лость Свою́, да изба́вит на́с от наше́ствия иноплеме́нных, от вну́тренних нестрое́ний, мяте́жей и раздо́ров, от гла́да, смертоно́сных боле́зней и от вся́каго зла́; да пода́ст на́м благорастворе́ние возду́ха и плодоно́сие земли́; да да́ст па́стырем ре́вность о спасе́нии пасо́мых, все́м же лю́дем споспеше́ние о е́же усе́рдно слу́жбы своя́ исправля́ти, любо́вь между́ собо́ю и единомы́слие име́ти, на бла́го же Оте́чества и Святы́я Це́ркве ве́рне подвиза́тися, да возсия́ет све́т спаси́тельныя ве́ры в стране́ на́шей во все́х конце́х ея́, да обратя́тся к ве́ре неве́рующии, да упраздня́тся вся́ е́реси и раско́лы. Да та́ко пожи́вше в ми́ре на земли́, сподо́бимся с тобо́ю ве́чнаго блаже́нства, хва́ляще и превознося́ще Бо́га во ве́ки веко́в. Ами́нь.
Конда́къ а҃
И҆збра́ннагѡ свѣти́льника, тмꙋ̀ і҆дѡлослꙋже́нїѧ въ держа́вѣ рѡссі́йстѣй разгна́вшаго и҆ свѣ́томъ бжⷭ҇твенныѧ вѣ́ры ю҆̀ просвѣти́вшагѡ, восхвалѧ́емъ тѧ̀, ст҃ы́й равноапⷭ҇льный кнѧ́же влади́мїре: ты́ же ꙗ҆́кѡ вы́нꙋ со дерзнове́нїемъ предстоѧ́й цр҃ю̀ ца́рствꙋющихъ, не преста́й молѧ́сѧ ѡ҆ достоѧ́нїи твое́мъ и҆ твои́ми моли́твами сохранѧ́й на́съ ѿ всѧ́кихъ бѣ́дъ и҆ ѕѡ́лъ, да со ᲂу҆миле́нїемъ бл҃года́рственнѡ зове́мъ тѝ:
Ра́дꙋйсѧ, влади́мїре, держа́вы рꙋ́сскїѧ просвѣти́телю.
І҆́косъ а҃
А҆́гг҃лѡмъ и҆ чл҃вѣ́кѡмъ творе́цъ, времена̀ и҆ лѣ̑та во свое́й вла́сти положи́вый и҆ сꙋдьбы̑ ца́рствъ и҆ наро́дѡвъ ᲂу҆строѧ́ѧй, бл҃гоизво́ли призва́ти ро́дъ рꙋ́сскїй ѿ тмы̀ і҆дѡлослꙋже́нїѧ ко свѣ́тꙋ и҆́стины и҆ пра́вды вѣ́чныѧ, поста́ви тѧ̀, бл҃говѣ́рный кнѧ́же, бл҃говѣсти́телѧ и҆ соверши́телѧ сеѧ̀ всебл҃гі́ѧ во́ли своеѧ̀. Тѣ́мже, бл҃годарѧ́ще творца̀ и҆ сп҃са на́шегѡ, славосло́вимъ тѧ̀, ꙗ҆́кѡ вели́кагѡ и҆збра́нника бж҃їѧ на́шегѡ ра́ди спⷭ҇нїѧ, съ весе́лїемъ зовꙋ́ще:
Ра́дꙋйсѧ, равноапⷭ҇ле, ко просвѣще́нїю наро́да рꙋ́сскагѡ премꙋ́дрымъ про́мысломъ пред̾избра́нный: ра́дꙋйсѧ, ѿ первозва́ннагѡ а҆пⷭ҇ла на гора́хъ кі́евскихъ прорече́нный.
Ра́дꙋйсѧ, пресла́вный сосꙋ́де бжⷭ҇твенныѧ бл҃года́ти, держа́вѣ твое́й дарова́нный: ра́дꙋйсѧ, пречꙋ́дный ко́реню, и҆з̾ негѡ́же на землѝ на́шей произрастѐ ве́лїе дре́во правовѣ́рїѧ.
Ра́дꙋйсѧ, ꙗ҆́кѡ тобо́ю и҆́мѧ гдⷭ҇нѣ во всѣ́хъ предѣ́лѣхъ страны̀ твоеѧ̀ прославлѧ́етсѧ: ра́дꙋйсѧ, ꙗ҆́кѡ и҆ твоѐ пресла́вное и҆́мѧ ѿ всѣ́хъ родѡ́въ рꙋ́сскихъ съ любо́вїю воспѣва́етсѧ.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ в҃
Ви́дѧ сꙋетꙋ̀ бездꙋ́шныхъ і҆́дѡлѡвъ и҆ пре́лесть дїа́вола є҆́юже ᲂу҆ловлѧ́етъ тє́мныѧ лю́ди въ сѣ̑ти беззако́нїѧ, кꙋ́пнѡ же слы́ша ст҃ы́хъ первомч҃никъ рꙋ́сскихъ за хрⷭ҇та̀, глаго́лющихъ безбо́жнымъ мꙋчи́телємъ: бо́зи ва́ши не сꙋ́ть бо́зи, но дре́во, є҆́же дне́сь пребыва́етъ ᲂу҆́тро сгнило̀ є҆́сть, є҆ди́нъ же є҆́сть бг҃ъ и҆́стинный, и҆́же сотворѝ нб҃о и҆ зе́млю: тогда̀ возгорѣ́лсѧ є҆сѝ се́рдцемъ, во є҆́же взыска́ти и҆ ᲂу҆вѣ́дѣти сегѡ̀ є҆ди́нагѡ и҆́стиннагѡ бг҃а, є҆мꙋ́же покланѧ́етсѧ всѧ́ко колѣ́но нбⷭ҇ныхъ, земны́хъ и҆ преиспо́днихъ, немо́лчнѡ воспѣва́ѧ: А҆ллилꙋ́їа.
І҆́косъ в҃
Ра́зꙋмъ всевы́шнїй прїѡсѣни́ тѧ, є҆гда̀ предста́ша тѝ проповѣ́дницы разновѣ́рнїи и҆ потща́лсѧ є҆сѝ, да не ᲂу҆ловле́нъ бꙋ́деши въ сѣ̑ти лжеꙋче́нїѧ, но да ѡ҆брѧ́щеши вѣ́рꙋ и҆́стиннꙋю и҆ сп҃си́тельнꙋю. Тѣ́мже ᲂу҆блажа́емъ тѧ̀:
Ра́дꙋйсѧ, премꙋ́дрый просвѣти́телю наро́да рꙋ́сскагѡ: ра́дꙋйсѧ, ра́зꙋмъ бг҃опросвѣще́нный стѧжа́вый.
Ра́дꙋйсѧ, ꙗ҆́кѡ ᲂу҆хищрє́нїѧ и҆ сꙋесло́вїѧ лжеꙋчи́телей посрами́лъ є҆сѝ: ра́дꙋйсѧ, ꙗ҆́кѡ глагѡ́лы жи́зни вѣ́чныѧ въ словесѣ́хъ мꙋдреца̀ и҆́стиннагѡ мꙋ́дрѣ ᲂу҆разꙋмѣ́лъ є҆сѝ.
Ра́дꙋйсѧ, лꙋчꙋ̀ бжⷭ҇твеннагѡ свѣ́та посредѣ̀ тмы̀ лжевѣ́рїѧ: ра́дꙋйсѧ, стѣно̀ нерꙋши́маѧ посредѣ̀ бꙋ́ри страсте́й ꙗ҆зы́ческихъ.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ г҃
Си́лою свы́ше ᲂу҆мꙋдре́нъ, посла́лъ є҆сѝ мꙋ́жи и҆збра̑нныѧ во страны̑ и҆ны́ѧ, да ви́дѧтъ и҆ и҆спыта́ютъ, ка́кѡ и҆ні́и наро́ди слꙋ́жатъ бг҃ꙋ и҆ ка́кѡ вѣ́рꙋ свою̀ ѿ дѣ́лъ свои́хъ показꙋ́ютъ; ті́и же всѧ̑ до́брѣ и҆спыта́вше, достиго́ша царѧгра́да, и҆дѣ́же ви́дѧще бл҃голѣ́пное соверше́нїе бжⷭ҇твеннагѡ сщ҃еннодѣ́йствїѧ, мнѣ́ша себѐ не на землѝ, но на нб҃сѝ стоѧ́ти, и҆ со ᲂу҆миле́нїемъ се́рдца возда́ша хвалꙋ̀ гдⷭ҇ви, зовꙋ́ще: А҆ллилꙋ́їа.
І҆́косъ г҃
И҆мꙋ́ще въ сердца́хъ свои́хъ тве́рдое ᲂу҆вѣре́нїе, ꙗ҆́кѡ вѣ́ра грековосто́чнаѧ вои́стиннꙋ є҆́сть правосла́внаѧ и҆ ꙗ҆́кѡ сщ҃еннодѣ̑йствїѧ є҆ѧ̀ па́че всѣ́хъ и҆ны́хъ велелѣ́пна, по́сланнїи тобо́ю мꙋ́жїе, возврати́вшесѧ во ѻ҆те́чествїе своѐ и҆сповѣ́даша сїѧ̑ пред̾ лице́мъ твои́мъ и҆ пред̾ старѣ́йшины твои́ми, реко́ша же: никто́же вкꙋси́въ сла́дкагѡ, восхо́щетъ го́рькагѡ, та́кѡ и҆ мы̀ не мо́жемъ па́ки ѡ҆ста́ти здѣ̀ и҆ слꙋжи́ти кꙋмі́рѡмъ. Ꙗ҆ково́е и҆звѣще́нїе прїе́мъ, возгорѣ́лсѧ є҆сѝ ре́вностїю по вѣ́рѣ и҆́стиннѣй. Сегѡ̀ ра́ди велича́емъ тѧ̀:
Ра́дꙋйсѧ, гла́сꙋ бжⷭ҇твенныѧ бл҃года́ти прилѣ́жнѡ внима́вый: ра́дꙋйсѧ, води́тельствꙋ ст҃а́гѡ дх҃а ᲂу҆се́рднѡ послѣ́дствовавый.
Ра́дꙋйсѧ, ꙗ҆́кѡ совѣ́тники твоѧ̑ ᲂу҆мꙋдри́лъ є҆сѝ: ра́дꙋйсѧ, всѧ̑ лю́ди твоѧ̑ совѣ́ты твои́ми ко и҆́стиннѣй вѣ́рѣ приве́лъ є҆сѝ.
Ра́дꙋйсѧ, ꙗ҆́кѡ со тща́нїемъ поиска́лъ є҆сѝ до́брагѡ би́сера хрⷭ҇та̀: ра́дꙋйсѧ, пчело̀ трꙋдолюби́ваѧ, мꙋ́дрѣ взыска́вшаѧ цвѣты̀, въ ни́хъ же сла́дкїй ме́дъ и҆́стины и҆ спасе́нїѧ.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ д҃
Бꙋ́рею сꙋмнѣ́нїй и҆ недоꙋмѣ́нїй не поколеба́лсѧ є҆сѝ повнегда̀ ᲂу҆вѣ́дѣти тебѣ̀ вѣ́рꙋ и҆́стиннꙋю, правосла́внꙋю, но а҆́бїе восхотѣ́лъ є҆сѝ прїѧ́ти ст҃о́е креще́нїе со все́ю держа́вою твое́ю, да кꙋ́пнѡ съ не́ю, ꙗ҆́кѡ ѻ҆те́цъ со ча́ды свои́ми, досто́йнѡ воспое́ши бг҃ꙋ: А҆ллилꙋ́їа.
І҆́косъ д҃
Слы́шавше болѧ́ре и҆ старѣ́йшины ꙗ҆̀же ѡ҆ вѣ́рѣ и҆́стиннѣй, помѧнꙋ́ша прама́терь твою̀ ст҃ꙋ́ю кнѧги́ню ѻ҆́льгꙋ, ꙗ҆́же прїѧ́тъ ст҃о́е креще́нїе въ царѣгра́дѣ, и҆ реко́ша: а҆́ще не бы̀ бла́га бы́сть вѣ́ра сїѧ̀, не бы̀ прїѧ́ла ю҆̀ сїѧ̀ мꙋдрѣ́йшаѧ въ жена́хъ. Тѣ́мже и҆ мы̀, при́снѡ помина́юще премꙋ́дрꙋю ѻ҆́льгꙋ, бл҃года́рственнѡ зове́мъ тѝ:
Ра́дꙋйсѧ, ꙗ҆́кѡ соблю́лъ є҆сѝ бжⷭ҇твенное сѣ́мѧ, є҆́же всѣ́ѧ въ се́рдцѣ твоѐ блаже́ннаѧ прама́терь твоѧ̀: ра́дꙋйсѧ, ꙗ҆́кѡ ст҃ы̑мъ завѣ́тѡмъ тоѧ̀ послѣ́довалъ є҆сѝ.
Ра́дꙋйсѧ, ꙗ҆́кѡ прови́дѣлъ є҆сѝ въ не́й зарю̀ спасе́нїѧ наро́да твоегѡ̀: ра́дꙋйсѧ, со́лнце возше́дшее по зарѣ̀ то́й.
Ра́дꙋйсѧ, свѣ́те, старѣ́йшины твоѧ̑ просвѣти́вый: ра́дꙋйсѧ, всѧ̑ лю́ди твоѧ̑ ко хрⷭ҇тꙋ̀ приведы́й.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ є҃
Бг҃отка́ннꙋю ѻ҆де́ждꙋ ст҃а́гѡ креще́нїѧ восхотѣ́въ полꙋчи́ти, помы́слилъ є҆сѝ, ѿкꙋ́дꙋ и҆ ка́кѡ и҆мѣ́ти и҆́маши толи́къ со́нмъ па́стырей и҆ ᲂу҆чи́телей, да просвѣтѧ́тъ всѧ̑ лю́ди твоѧ̑ съ тобо́ю, и҆ ка́кѡ поѧ́ти себѣ̀ женꙋ̀, въ вѣ́рѣ ст҃ѣ́й и҆спыта́ннꙋ, до́мꙋ твоемꙋ̀ благꙋ́ю строи́тельницꙋ, ча́дѡмъ твои́мъ ма́терь во хрⷭ҇тѣ̀, совѣ́тницꙋ же всѣ̑мъ во бл҃гоче́стїи, и҆ ѡ҆ се́мъ все́мъ поревнова́въ, дꙋ́хъ тво́й приведѐ тѧ̀ ко странѣ̀ гре́честѣй, и҆дѣ́же вѣ́рнїи ѿ лѣ́тъ дре́внихъ бл҃гоче́стнѡ воспѣва́ютъ бг҃ꙋ: А҆ллилꙋ́їа.
І҆́косъ є҃
Ви́дѣвше ца́рїе гре́честїи всю̀ странꙋ̀ твою̀ во тмѣ̀ і҆дѡлослꙋже́нїѧ коснѧ́щꙋ, небрего́ша тѧ̀, ꙗ҆́кѡ кꙋмі́рѡмъ слꙋжа́ща, ѻ҆ба́че побѣжде́ни бы́вше ѿ тебє̀ и҆ ᲂу҆вѣ́дѣвше крѣ́пкое произволе́нїе твоѐ прїѧ́ти ст҃о́е креще́нїе и҆ всѧ̑ лю́ди твоѧ̑ ко хрⷭ҇тꙋ̀ привестѝ, и҆спо́лнишасѧ ра́дости и҆ вда́ша тѝ сестрꙋ̀ свою̀ а҆́ннꙋ на бра́къ, па́стыри же и҆ ᲂу҆чи́тели наро́дꙋ твоемꙋ̀. Тѣ́мже и҆ мы̀, при́снѡ ра́дꙋющесѧ ст҃о́мꙋ семꙋ̀ сою́зꙋ твоемꙋ̀, воспѣва́емъ тѧ̀:
Ра́дꙋйсѧ, ꙗ҆́кѡ посѣти́лъ є҆́сть тѧ̀ восто́къ свы́ше: ра́дꙋйсѧ, ꙗ҆́кѡ ѕвѣзда̀ всевы́шнѧго приведѐ тѧ̀ къ восто́кꙋ, и҆дѣ́же премꙋ́дрость созда̀ себѣ̀ до́мъ и҆ ᲂу҆твердѝ столпѡ́въ се́дмь, се́дмь собо́рѡвъ вселе́нскихъ, и҆̀же ᲂу҆тверди́ша вѣ́рꙋ хрⷭ҇то́вꙋ по вселе́ннѣй.
Ра́дꙋйсѧ, ꙗ҆́кѡ сїѧ̀ є҆́сть вѣ́ра а҆пⷭ҇льскаѧ, сїѧ̀ вѣ́ра вселе́ннꙋю всю̀ ᲂу҆твердѝ: ра́дꙋйсѧ, ꙗ҆́кѡ ѿ чи́стагѡ и҆сто́чника чи́стое ᲂу҆че́нїе хрⷭ҇то́во прїѧ́лъ є҆сѝ.
Ра́дꙋйсѧ до́мꙋ твоегѡ̀ и҆ ча̑дъ твои́хъ до́брый рачи́телю: ра́дꙋйсѧ, всегѡ̀ наро́да твоегѡ̀ премꙋ́дрый наста́вниче.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ ѕ҃
Па́стырїе и҆ ᲂу҆чи́тели, и҆̀хже прїѧ́лъ є҆сѝ, прехва́льне кн҃же, ѿ цр҃е́й гре́ческихъ, ꙗ҆́кѡ да напаѧ́ютъ всю̀ странꙋ̀ рꙋ́сскꙋю ᲂу҆че́ньми бжⷭ҇твенными, со тща́нїемъ теча́хꙋ на дѣ́ланїе своѐ, бл҃года́рственнѡ пою́ще призва́вшемꙋ наро́дъ тво́й ко сп҃се́нїю гдⷭ҇ꙋ бг҃ꙋ: А҆ллилꙋ́їа.
І҆́косъ ѕ҃
Возсїѧ̀ пречꙋ́днѣ чꙋ́вственный свѣ́тъ въ помраче́нною недꙋ́гомъ слѣпоты̀ ѻ҆́чїю твое́ю, въ дꙋшѣ̀ твое́й свѣ́тꙋ бл҃года́ти возсїѧ́вшꙋ, є҆гда̀, просвѣти́всѧ бжⷭ҇твеннымъ креще́нїемъ, и҆зше́лъ є҆сѝ ѿ ст҃ы́ѧ кꙋпѣ́ли, є҆́же ѡ҆щꙋти́въ, ра́достнѡ воскли́кнꙋлъ є҆сѝ: ны́нѣ позна́хъ бг҃а и҆́стиннагѡ. Тѣ́мже ᲂу҆блажа́емъ тѧ̀:
Ра́дꙋйсѧ, свѣти́льниче, ѻ҆гне́мъ бж҃е́ственныѧ бл҃года́ти во тмѣ̀ ꙗ҆зы́чества возжже́нный: ра́дꙋйсѧ, бл҃говѣсти́телю свѣ́та хрⷭ҇то́ва, ѡ҆мрачє́ннаѧ ѻ҆чеса̀ и҆ сердца̀ наро́да твоегѡ̀ ѿверза́ѧй.
Ра́дꙋйсѧ, ꙗ҆́кѡ ᲂу҆́мною ѻ҆́чїю твое́ю прови́дѣлъ є҆сѝ бж҃їе смотре́нїе ѡ҆ держа́вѣ твое́й: ра́дꙋйсѧ, ꙗ҆́кѡ до конца̀ потща́лсѧ є҆сѝ, да и҆ всѝ лю́дїе твоѝ просвѣтѧ́тсѧ въ не́мъ.
Ра́дꙋйсѧ, бг҃освѣ́тлаѧ главо̀ кнѧзе́й рꙋ́сскихъ: ра́дꙋйсѧ, сла́внѣйшее ᲂу҆краше́нїе и҆ похвало̀ це́ркве хрⷭ҇то́вы.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ з҃
Хотѧ̀ просвѣти́ти бжⷭ҇твеннымъ креще́нїемъ наро́дъ рꙋ́сскїй, пе́рвѣе повелѣ́лъ є҆сѝ крести́тисѧ сыновѡ́мъ и҆ вельмо́жамъ твои́мъ, да всѝ лю́дїе, послѣ́дꙋюще стопа́мъ и҆̀хъ, со бл҃ги́мъ произволе́нїемъ пристꙋ́пѧтъ ко ст҃о́мꙋ креще́нїю, бл҃гоче́стнѡ зовꙋ́ще бг҃ꙋ: А҆ллилꙋ́їа.
І҆́косъ з҃
Но́во творе́нїе во хрⷭ҇тѣ̀ ꙗ҆вѝ тѧ̀, по ст҃ѣ́мъ креще́нїи, ѻ҆́бразъ житїѧ̀ твоегѡ̀: ревни́тель бо пе́рвѣе бы́въ і҆дѡлослꙋже́нїѧ, послѣдѝ вы́нꙋ по вѣ́рѣ хрⷭ҇то́вой ревнова́лъ є҆сѝ: возлюби́лъ же є҆сѝ кро́тость и҆ милосе́рдїе, воздержа́нїе и҆ цѣломꙋ́дрїе и҆ всѐ житїѐ по за́повѣдемъ гдⷭ҇нимъ. Чꙋдѧ́щесѧ ᲂу҆̀бо бл҃го́мꙋ премѣне́нїю семꙋ̀, бл҃гоче́стнѡ зове́мъ тѝ:
Ра́дꙋйсѧ, ꙗ҆́кѡ росо́ю ст҃а́гѡ дх҃а пла́мень страсте́й въ себѣ̀ ᲂу҆гаси́лъ є҆сѝ: ра́дꙋйсѧ, ꙗ҆́кѡ ѻ҆гне́мъ бжⷭ҇твенныѧ бл҃года́ти всѧ̑ помышлє́нїѧ и҆ всѧ̑ чꙋ́вствїѧ твоѧ̑ согрѣ́лъ є҆сѝ.
Ра́дꙋйсѧ, селє́нїѧ гдⷭ҇нѧ, цє́ркви ст҃ы́ѧ, па́че всѣ́хъ селе́нїй земны́хъ, возлюби́вый: ра́дꙋйсѧ, бжⷭ҇твенныѧ слꙋ́жбы и҆ хрⷭ҇то́ва ᲂу҆че́нїѧ па́че всѣ́хъ дѣѧ́нїй и҆ ᲂу҆че́нїй взыска́вый.
Ра́дꙋйсѧ, ѻ҆́бразъ но́вагѡ житїѧ̀ всѣ̑мъ лю́дємъ твои́мъ въ себѣ̀ показа́вый: ра́дꙋйсѧ, си́рыхъ и҆ ᲂу҆бо́гихъ бл҃гі́й корми́телю и҆ попечи́телю.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ и҃
Стра́нное бѣ̀, кꙋ́пнѡ же и҆ радостотво́рное видѣ́нїе, є҆гда̀ тмочи́сленный со́нмъ мꙋже́й и҆ же́нъ, ю҆́ношъ и҆ дѣ́въ, та́же неѕло́бивыхъ младе́нєцъ съ ра́достїю теча́хꙋ къ рѣцѣ̀ днѣпрꙋ̀, ꙗ҆́коже ко і҆ѻрда́нꙋ, и҆дѣ́же креща́хꙋсѧ во и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а, і҆ере́ѡмъ на бре́зѣ возносѧ́щымъ тайнодѣ́йственныѧ мл҃твы и҆ воспѣва́ющымъ гдⷭ҇ꙋ пѣ́снь: А҆ллилꙋ́їа.
І҆́косъ и҃
Ве́сь бы́лъ є҆сѝ ѡ҆б̾ѧ́тъ неизрече́нною ра́достїю, достобл҃же́нне кн҃же, зрѧ̀ креща́емыѧ лю́ди твоѧ̑, и҆ во ᲂу҆миле́нїи се́рдца, возда́въ хвалꙋ̀ сп҃си́телю бг҃ꙋ, ᲂу҆се́рднѡ моли́лъ є҆сѝ є҆го̀, да при́зритъ на новопросвѣще́нныѧ лю́ди своѧ̑, да ᲂу҆тверди́тъ и҆̀хъ въ вѣ́рѣ и҆ бл҃гоче́стїи и҆ да просла́витъ и҆́мѧ своѐ въ страна́хъ рꙋ́сскихъ. Воспомина́юще ᲂу҆́бѡ пресла́вное и҆ прера́достное си́хъ сбытїѐ, прино́симъ тѝ бл҃года́рствєнныѧ и҆ похва̑льныѧ пѣ̑сни сїѧ̑:
Ра́дꙋйсѧ, вино́вниче сп҃се́нїѧ безчи́сленныхъ дꙋ́шъ въ землѝ рꙋ́сстѣй: ра́дꙋйсѧ, неѡскꙋдѣва́емый и҆сто́чниче бл҃гослове́нїй и҆ ми́лостей бж҃їихъ къ наро́дꙋ твоемꙋ̀.
Ра́дꙋйсѧ, бл҃гі́й вертогра́дарю, са́дъ бжⷭ҇твенныѧ вѣ́ры въ ца́рствѣ твое́мъ насади́вый: ра́дꙋйсѧ, пото́че сла́дости, напои́вый водо́ю бл҃гоче́стїѧ лю́ди рꙋ́сскїѧ.
Ра́дꙋйсѧ, ꙗ҆́кѡ бжⷭ҇твеннꙋю вѣ́рꙋ просла́вилъ є҆сѝ, пре́лесть же і҆́дѡльскꙋю посрами́лъ є҆сѝ: ра́дꙋйсѧ, ꙗ҆́кѡ цр҃ь царе́й дарова̀ тебѣ̀ мꙋ́дрость соломѡ́новꙋ, кро́тость даві́довꙋ, ре́вность и҆лїинꙋ̀, правовѣ́рїе а҆пⷭ҇льское.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ ѳ҃
Всѐ є҆стество̀ а҆́гг҃лѡвъ, храни́телей ро́да чл҃вѣ́ческагѡ, просла́ви тѧ̀, бл҃говѣ́рный кн҃же, є҆гда̀ повелѣ́лъ є҆сѝ ѻ҆тцє́мъ и҆ ма́теремъ вдаѧ́ти дѣ́ти своѧ̑ въ ᲂу҆че́нїе кни́жное, да разꙋмѣ́ютъ, ꙗ҆̀же вѣ́рꙋютъ, и҆ да позна́ютъ, ка́кѡ житїѐ своѐ до́брѣ по вѣ́рѣ провожда́ти. Тѣ́мже и҆ ны́нѣ при́зри на ᲂу҆ча́щыѧсѧ бжⷭ҇твеннымъ писа́нїємъ, и҆ на ѻ҆тцє́въ и҆ ма́терей и҆̀хъ, па́стырей же и҆ ᲂу҆чи́телей, споспѣшествꙋ́ющихъ и҆̀мъ во ᲂу҆че́нїи, бл҃гословѝ, ᲂу҆крѣпѝ и҆ наста́ви ѧ҆̀ во трꙋдѣ́хъ и҆̀хъ, да возраста́ютъ въ вѣ́рѣ и҆́стиннѣй и҆ въ до́бромъ житїѝ, пою́ще бг҃ꙋ: А҆ллилꙋ́їа.
І҆́косъ ѳ҃
Вѣті̑и многовѣща́ннїи не мо́гꙋтъ досто́йнѡ и҆з̾ѡбрази́ти вели́чїе бл҃годѣѧ́нїй, дарова́нныхъ тобо́ю, кн҃же, землѝ твое́й: водвори́въ бо въ не́й бжⷭ҇твеннꙋю вѣ́рꙋ, и҆зба́вилъ є҆сѝ ю҆̀ ѿ мра́ка ꙗ҆зы́ческагѡ и҆ вѣ́чныѧ поги́бели, ѿкры́лъ є҆сѝ є҆́й пꙋ́ть ко и҆́стинномꙋ просвѣще́нїю, ко сп҃се́нїю и҆ земно́мꙋ бл҃годе́нствїю. Сегѡ̀ ра́ди со бл҃годаре́нїемъ бл҃гоче́стнѡ зове́мъ тѝ:
Ра́дꙋйсѧ, могꙋ́щества и҆ сла́вы держа́вы рѡссі́йскїѧ ѡ҆снова́телю: ра́дꙋйсѧ, и҆́стиннагѡ просвѣще́нїѧ и҆ бл҃гоче́стїѧ въ не́й насади́телю.
Ра́дꙋйсѧ, въ наро́дѣ твое́мъ ꙗ҆зы́ческихъ сꙋевѣ́рїй и҆ ѕлы́хъ ѡ҆бы́чаєвъ и҆скорени́телю: ра́дꙋйсѧ, і҆́дѡльскихъ тре́бищъ и҆ кꙋмі́рѡвъ потреби́телю.
Ра́дꙋйсѧ, ст҃ы́хъ хра́мѡвъ созда́телю: ра́дꙋйсѧ, равноапⷭ҇льномꙋ цр҃ю̀ кѡнстанті́нꙋ равноче́стный подо́бниче.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ і҃
Сп҃стѝ хотѧ̀ ѿ вѣ́чныѧ поги́бели ца́рство твоѐ, въ бе́зднѣ і҆дѡлослꙋже́нїѧ ги́бнꙋвшее, под̾ѧ́лъ є҆сѝ вє́лїѧ трꙋды̀ и҆ попечє́нїѧ, ѡ҆бходѧ̀ гра́ды и҆ вє́си землѝ твоеѧ̀ и҆ посыла́ѧ повсю́дꙋ па́стыри дꙋхо́вныѧ, во є҆́же бжⷭ҇твенною вѣ́рою и҆ ст҃ы́мъ креще́нїемъ лю́ди твоѧ̑ просвѣти́ти, и҆ наꙋчи́ти и҆̀хъ є҆ди́номꙋ и҆́стинномꙋ бг҃ꙋ пѣ́ти: А҆ллилꙋ́їа.
І҆́косъ і҃
Стѣна̀ тве́рдаѧ бы́лъ є҆сѝ землѝ твое́й во всѧ̑ днѝ живота̀ твоегѡ̀ проти́вꙋ врагѡ́въ тоѧ̀ и҆ вино́вникъ бл҃годе́нствїѧ и҆ сла́вы є҆ѧ̀: бꙋ́ди и҆ ны́нѣ защи́тникъ неѡбори́мый ѿ вра̑гъ ви́димыхъ и҆ неви́димыхъ и҆ помо́щникъ въ нꙋ́ждѣхъ и҆ ско́рбѣхъ на́мъ, съ любо́вїю вопїю́щымъ тебѣ̀:
Ра́дꙋйсѧ, бл҃гопопечи́тельнѣйшїй па́стырю наро́да рꙋ́сскагѡ: ра́дꙋйсѧ, бл҃гострада́тельнѣйшїй ѻ҆́тче си́рыхъ и҆ стра́ждꙋщихъ.
Ра́дꙋйсѧ, гото́вый споспѣ́шниче и҆́щꙋщихъ вѣ́чнагѡ сп҃се́нїѧ и҆ и҆́стиннагѡ просвѣще́нїѧ: ра́дꙋйсѧ, сла́ва и҆ ра́дованїе держа́вы рꙋ́сскїѧ.
Ра́дꙋйсѧ, при́сный помо́щниче въ многотрꙋ́днѣмъ дѣ́лѣ народоправле́нїѧ: ра́дꙋйсѧ, мо́щный спобо́рниче въ бра́ни во́инства рꙋ́сскагѡ.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ а҃і
Пѣ́нїе ᲂу҆миле́нное прїимѝ ѿ на́съ, ᲂу҆го́дниче бж҃їй, сокрꙋшѝ твои́ми мл҃твами всѧ̑ врагѝ на̑ша, насадѝ правосла́внꙋю вѣ́рꙋ средѝ ꙗ҆зы̑къ страны̀ рꙋ́сскїѧ, невѣ́дꙋщихъ и҆́стиннагѡ бг҃а, и҆скоренѝ въ не́й всѧ̀ є҆́рєси и҆ раскѡ́лы, да всѝ сы́нове рꙋ́сскїѧ є҆ди́ными ᲂу҆сты̀ и҆ є҆ди́нымъ се́рдцемъ сла́вѧтъ бг҃а, пою́ще є҆мꙋ̀: А҆ллилꙋ́їа.
І҆́косъ а҃і
Свѣтоза́рное свѣти́ло, просвѣща́ющее сїѧ́нїемъ свои́мъ всю̀ странꙋ̀ рꙋ́сскꙋю, ты̀ є҆сѝ достохва́льне кн҃же влади́мїре, разгонѧ́ѧ мра́къ і҆дѡлослꙋже́нїѧ и҆ показꙋ́ѧ пꙋ́ть къ и҆́стинномꙋ просвѣще́нїю и҆ нбⷭ҇номꙋ бл҃же́нствꙋ. Сегѡ̀ ра́ди, прославлѧ́юще тѧ̀ глагѡ́лемъ:
Ра́дꙋйсѧ, ѕвѣздо̀, просвѣще́ннаѧ ѿ незаходи́магѡ со́лнца пра́вды: ра́дꙋйсѧ, пꙋтеводи́телю, пра́вꙋю стезю̀ къ вѣ́чномꙋ сп҃се́нїю на́мъ ѿкры́вый.
Ра́дꙋйсѧ, мо́щный споспѣ́шниче и҆ ᲂу҆крѣпле́нїе проповѣ́дникѡвъ правосла́вныѧ вѣ́ры: ра́дꙋйсѧ, при́сный покрови́телю бл҃ги́хъ наста́вникѡвъ ю҆́ношества и҆ всѣ́хъ бл҃готрꙋдѧ́щихсѧ на по́льзꙋ ѻ҆́бщꙋю.
Ра́дꙋйсѧ, ско́рый помо́щниче всѣ́хъ, къ по́мощи твое́й прибѣга́ющихъ: ра́дꙋйсѧ, ꙗ҆́кѡ всѣ̑мъ ᲂу҆се́рднѡ тѧ̀ чтꙋ́щимъ, бл҃готвѡ́рныѧ совѣ́ты подае́ши.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ в҃і
Бл҃года́ть прест҃а́гѡ дх҃а и҆спросѝ на́мъ, пребл҃гі́й па́стырю на́шъ, ѿ всеще́драгѡ бг҃а и҆ сп҃са на́шегѡ, вразꙋмлѧ́ющꙋю и҆ ᲂу҆крѣплѧ́ющꙋю на́съ въ дѣ́лѣ сп҃се́нїѧ, да не безпло́дна бꙋ́детъ въ на́съ насажде́ннаѧ тобо́ю ст҃а́ѧ вѣ́ра, но да ᲂу҆клонѧ́ющесѧ ѿ пꙋте́й нече́стїѧ и҆ заблꙋжде́нїй, хо́димъ во свѣ́тѣ за́повѣдей бж҃їихъ и҆ дости́гнемъ вѣ́чнагѡ блаже́нства, воспѣва́юще бг҃ꙋ: А҆ллилꙋ́їа.
І҆́косъ в҃і
Пою́ще твоѧ̑ премнѡ́гаѧ и҆ пресла̑внаѧ бл҃годѣѧ̑нїѧ, ꙗ҆влє́ннаѧ держа́вѣ на́шей въ просвѣще́нїи тоѧ̀ свѣ́томъ бжⷭ҇твенныѧ вѣ́ры, кꙋ́пнѡ же вє́лїѧ твоѧ̑ трꙋды̀ и҆ по́двиги, во бл҃гоꙋстрое́нїе є҆ѧ̀ под̾ѧ́тыѧ, ᲂу҆се́рднѡ бл҃годари́мъ и҆ восхвалѧ́емъ тѧ̀, съ любо́вїю зовꙋ́ще:
Ра́дꙋйсѧ, бг҃оизбра́нне и҆ бг҃опросла́вленне самоде́ржче землѝ рꙋ́сскїѧ: ра́дꙋйсѧ, несокрꙋши́мое ѡ҆гражде́нїе є҆ѧ̀, покро́ве и҆ защище́нїе.
Ра́дꙋйсѧ, ра́йское дре́во, произрасти́вшее двѣ̀ пречꙋ́дныѧ ѻ҆́трасли, ст҃ы́хъ страстоте́рпцєвъ бори́са и҆ глѣ́ба: радꙋйсѧ, первостоѧ́телю ст҃ы́хъ рꙋ́сскїѧ це́ркве.
Ра́дꙋйсѧ, а҆пⷭ҇лѡвъ сопресто́льниче и҆ сликовствова́телю: ра́дꙋйсѧ, ꙗ҆́кѡ на зе́млю рꙋ́сскꙋю вы́нꙋ призира́еши бла̑гъ вре́менныхъ и҆ вѣ́чныхъ є҆́й ᲂу҆ гдⷭ҇а хода́тайствꙋеши.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ г҃і
Ѽ прехва́льный и҆ преди́вный равноапⷭ҇ле, вели́кїй кн҃же влади́мїре, прїимѝ ми́лостивнѡ ѿ на́съ бл҃годаре́нїе сїѐ ѡ҆ всѣ́хъ, ꙗ҆̀же тобо́ю воздадѐ гдⷭ҇ь на́мъ, ѻ҆тцє́мъ и҆ пра́ѻтцємъ на́шимъ и҆ все́й держа́вѣ рꙋ́сской, наче́нъ ѿ днѐ креще́нїѧ да́же до сегѡ̀ часа̀, и҆ молѝ всебл҃га́гѡ бг҃а проба́вити ми́лость свою̀ на ны̀ и҆ на ро́ды родѡ́въ на́шихъ, ᲂу҆тверди́ти ны̀ въ правовѣ́рїи и҆ бл҃гоче́стїи, храни́ти же ѿ всѣ́хъ бѣ́дъ и҆ ѕѡ́лъ, да сподо́бимсѧ съ тобо́ю, ꙗ҆́кѡже ча̑да со ѻ҆тце́мъ, во вѣ́ки воспѣва́ти бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡмъ и҆ чл҃вѣ́кѡмъ творе́цъ, времена̀ и҆ лѣ̑та во свое́й вла́сти положи́вый и҆ сꙋдьбы̑ ца́рствъ и҆ наро́дѡвъ ᲂу҆строѧ́ѧй, бл҃гоизво́ли призва́ти ро́дъ рꙋ́сскїй ѿ тмы̀ і҆дѡлослꙋже́нїѧ ко свѣ́тꙋ и҆́стины и҆ пра́вды вѣ́чныѧ, поста́ви тѧ̀, бл҃говѣ́рный кнѧ́же, бл҃говѣсти́телѧ и҆ соверши́телѧ сеѧ̀ всебл҃гі́ѧ во́ли своеѧ̀. Тѣ́мже, бл҃годарѧ́ще творца̀ и҆ сп҃са на́шегѡ, славосло́вимъ тѧ̀, ꙗ҆́кѡ вели́кагѡ и҆збра́нника бж҃їѧ на́шегѡ ра́ди спⷭ҇нїѧ, съ весе́лїемъ зовꙋ́ще:
Ра́дꙋйсѧ, равноапⷭ҇ле, ко просвѣще́нїю наро́да рꙋ́сскагѡ премꙋ́дрымъ про́мысломъ пред̾избра́нный: ра́дꙋйсѧ, ѿ первозва́ннагѡ а҆пⷭ҇ла на гора́хъ кі́евскихъ прорече́нный.
Ра́дꙋйсѧ, пресла́вный сосꙋ́де бжⷭ҇твенныѧ бл҃года́ти, держа́вѣ твое́й дарова́нный: ра́дꙋйсѧ, пречꙋ́дный ко́реню, и҆з̾ негѡ́же на землѝ на́шей произрастѐ ве́лїе дре́во правовѣ́рїѧ.
Ра́дꙋйсѧ, ꙗ҆́кѡ тобо́ю и҆́мѧ гдⷭ҇нѣ во всѣ́хъ предѣ́лѣхъ страны̀ твоеѧ̀ прославлѧ́етсѧ: ра́дꙋйсѧ, ꙗ҆́кѡ и҆ твоѐ пресла́вное и҆́мѧ ѿ всѣ́хъ родѡ́въ рꙋ́сскихъ съ любо́вїю воспѣва́етсѧ.
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Конда́къ а҃
И҆збра́ннагѡ свѣти́льника, тмꙋ̀ і҆дѡлослꙋже́нїѧ въ держа́вѣ рѡссі́йстѣй разгна́вшаго и҆ свѣ́томъ бжⷭ҇твенныѧ вѣ́ры ю҆̀ просвѣти́вшагѡ, восхвалѧ́емъ тѧ̀, ст҃ы́й равноапⷭ҇льный кнѧ́же влади́мїре: ты́ же ꙗ҆́кѡ вы́нꙋ со дерзнове́нїемъ предстоѧ́й цр҃ю̀ ца́рствꙋющихъ, не преста́й молѧ́сѧ ѡ҆ достоѧ́нїи твое́мъ и҆ твои́ми моли́твами сохранѧ́й на́съ ѿ всѧ́кихъ бѣ́дъ и҆ ѕѡ́лъ, да со ᲂу҆миле́нїемъ бл҃года́рственнѡ зове́мъ тѝ:
Ра́дꙋйсѧ, влади́мїре, держа́вы рꙋ́сскїѧ просвѣти́телю.
Моли́твы
Ѽ, вели́кїй ᲂу҆го́дниче бж҃їй, бг҃оизбра́нный и҆ бг҃опросла́вленный равноапⷭ҇тольный кн҃же влади́мїре! Ты̀ ѿри́нꙋлъ є҆сѝ ѕловѣ́рїе и҆ нече́стїе ꙗ҆зы́ческое, ᲂу҆вѣ́ровалъ є҆сѝ во є҆ди́наго и҆́стиннаго трїѷпоста́снаго бг҃а, и҆ воспрїѧ́въ ст҃о́е креще́нїе, просвѣти́лъ є҆сѝ свѣ́томъ бжⷭ҇твенныѧ вѣ́ры и҆ бл҃гоче́стїѧ всю̀ странꙋ̀ рꙋ́сскꙋю сла́вѧще ᲂу҆̀бо и҆ бл҃годарѧ́ще премлⷭ҇рдаго творца̀ и҆ сп҃си́телѧ на́шего, сла́вимъ и҆ бл҃годари́мъ и҆ тѧ̀, просвѣти́телю на́шъ и҆ ѻ҆́тче, ꙗ҆́кѡ тобо́ю позна́хомъ сп҃си́тельнꙋю вѣ́рꙋ хрⷭ҇то́вꙋ, и҆ крести́хомсѧ во и҆́мѧ прест҃ы́ѧ и҆ пребжⷭ҇твенныѧ трⷪ҇цы: то́ю вѣ́рою и҆зба́вихомсѧ ѿ пра́веднагѡ ѡ҆сꙋжде́нїѧ бж҃їѧ, вѣ́чнагѡ ра́бства дїа́волѧ и҆ а҆́дова мꙋчи́тельства: то́ю вѣ́рою воспрїѧ́хомъ бл҃года́ть всыновле́нїѧ бг҃ꙋ и҆ наде́ждꙋ наслѣ́дованїѧ нбⷭ҇нагѡ бл҃же́нства. Ты̀ є҆сѝ пе́рвый во́ждь на́шъ къ нача́льникꙋ и҆ соверши́телю на́шего вѣ́чнагѡ сп҃се́нїѧ гдⷭ҇ꙋ і҆и҃сꙋ хрⷭ҇тꙋ̀: ты̀ є҆сѝ те́плый моли́твенникъ и҆ хода́тай ѡ҆ странѣ̀ рꙋ́сской, ѡ҆ во́инствѣ и҆ ѡ҆ всѣ́хъ лю́дѣхъ. Не мо́жетъ ѧ҆зы́къ на́шъ и҆з̾ѡбрази́ти вели́чїе и҆ высотꙋ̀ благодѣѧ́нїй, тобо́ю и҆злїѧ́нныхъ на зе́млю на́шꙋ, ѻ҆тцє́въ и҆ пра́ѻтцєвъ на́шихъ и҆ на на́съ недосто́йныхъ. Ѽ, всеблагі́й ѻ҆́тче и҆ просвѣти́телю на́шъ! При́зри на не́мощи на́шѧ и҆ ᲂу҆молѝ премилосе́рдаго цр҃ѧ̀ нбⷭ҇наго, да не прогнѣ́ваетсѧ на ны̀ ѕѣлѡ̀, ꙗ҆́кѡ по не́мощемъ на́шимъ по всѧ̑ днѝ согрѣша́емъ, да не погꙋби́тъ на́съ со беззако́ньми на́шими, но да поми́лꙋетъ и҆ спасе́тъ на́съ, по ми́лости свое́й, да всади́тъ въ се́рдцѣ на́ше спаси́тельный стра́хъ сво́й, да просвѣти́тъ свое́ю бл҃года́тїю ᲂу҆́мъ на́шъ, во є҆́же разꙋмѣ́ти на́мъ пꙋтѝ гдⷭ҇ни, ѡ҆ста́вити стєзѝ нече́стїѧ и҆ заблꙋжде́нїй, тща́тисѧ же во стезѧ́хъ спасе́нїѧ и҆ и҆́стины, неꙋкло́ннагѡ и҆сполне́нїѧ за́повѣдей бж҃їихъ и҆ ᲂу҆ста́вѡвъ ст҃ы́ѧ це́ркве. Молѝ, бл҃госе́рде, чл҃вѣколю́бца бг҃а, да проба́витъ на́мъ ве́лїю ми́лость свою̀, да и҆зба́витъ на́съ ѿ наше́ствїѧ и҆ноплеме́нныхъ, ѿ внꙋ́треннихъ нестрое́нїй, мѧте́жей и҆ раздо́рѡвъ, ѿ гла́да, смертоно́сныхъ болѣ́зней и҆ ѿ всѧ́кагѡ ѕла̀, да пода́стъ на́мъ бл҃горастворе́нїе воздꙋ́ха и҆ плодоно́сїе землѝ, да да́стъ па́стырємъ ре́вность ѡ҆ спасе́нїи пасо́мыхъ, всѣ̑мъ же лю́дємъ споспѣше́нїе ѡ҆ є҆́же ᲂу҆се́рднѡ слꙋ̑жбы своѧ̑ и҆справлѧ́ти, любо́вь междꙋ̀ собо́ю и҆ є҆диномы́слїе и҆мѣ́ти, на бла́го же ѻ҆те́чества и҆ ст҃ы́ѧ це́ркве вѣ́рнѣ подвиза́тисѧ: да возсїѧ́етъ свѣ́тъ сп҃си́тельныѧ вѣ́ры въ странѣ̀ на́шей во всѣ́хъ концѣ́хъ є҆ѧ̀, да ѡ҆братѧ́тсѧ къ вѣ́рѣ невѣ́рꙋющїи, да ᲂу҆празднѧ́тсѧ всѧ̑ є҆́рєси и҆ раскѡ́лы, да та́кѡ пожи́вше въ ми́рѣ на землѝ, сподо́бимсѧ съ тобо́ю вѣ́чнагѡ бл҃же́нства, хва́лѧще и҆ превозносѧ́ще бг҃а во вѣ́ки вѣкѡ́въ. А҆ми́нь.