Ин канон святому равноапостольному великому князю Владимиру

Прииди́те, ве́рнии, пе́снь духо́вную возопие́м и просла́вим Христа́, И́же све́тло просла́вил е́сть честна́го Влади́мира, вели́каго кня́зя.

И́же се́мя се́ющему да́руя, Ты́ и мне́ да́руй сло́во, Да́телю благи́х, разреша́я ми́ соу́з язы́ка, и обнови́, Спа́се, к славословле́нию ве́рно.

И́же во́лею, а не ну́ждею к Тебе́ все́х призыва́еши, я́коже дре́вле Моисе́я и Иса́ию, та́кожде и ны́не в се́рдце возгласи́л еси́ ве́рнаго и достохва́льнаго кня́зя.

И́же Па́вла просвети́вый и избра́нна сотвори́вый, та́ко и Васи́лия ны́не, отца́ Росси́йскаго, очны́й неду́г отто́ргнул еси́, Ми́лостиве, Твои́м креще́нием.

Константи́на ве́рнаго подо́бник яви́лся еси́, Христа́ в се́рдцы твое́м прии́м, и Его́ за́поведем, я́коже апо́стол, всю́ зе́млю Росси́йскую научи́л еси́.

Боже́ственною си́лою ты́ возмога́я, безбо́жнаго Перу́на, ку́чу бесо́вскую, сокруши́л еси́, и ко о́паши ко́нстей того́ привяза́в, повеле́л еси́ во́ином разби́ти и́дола.

Чу́до стра́шное, и пресла́вное, и неизглаго́ланное соверша́ет Влады́ка Христо́с: обновля́ет бо боже́ственным креще́нием всю́ Росси́йскую зе́млю и просвеща́ет кня́зя Васи́лия.

Све́тло прииди́те и достоле́пно возгласи́те, сы́нове росси́йстии, ко отцу́ на́шему Влади́миру, и па́мять его́ ве́рно вси́ да пра́зднуем све́тло.

О́тчее нече́стие отгна́л еси́, всечестны́я же твоея́ прама́тере правове́рную ве́ру возлюби́л еси́, ра́вне апо́столом Христо́вым, кня́же вели́кий Влади́мире.

Дне́сь а́нгели Бо́жии ра́дуются све́тло на небесе́х в па́мять твою́ святу́ю: спа́сл бо еси́ на́с от вся́каго лука́вства и же́ртв бесо́вских лю́ди мно́ги изба́вил еси́ и всю́ зе́млю Росси́йскую.

Рыда́ет бесо́вское мно́жество и те́мное собо́рище, ви́дяще на земли́ попира́емы и́долы, и́же на поги́бель воздви́женныя челове́ком, и́хже Бо́жиим повеле́нием, Васи́лие, сокруши́л еси́.

Ра́дуйся и весели́ся, ра́бе Христо́в, кня́же вели́кий и му́дрый, моле́бниче о душа́х на́ших: тобо́ю бо мы́ вси́ изба́влени есмы́ бесо́вския ле́сти. Те́мже, — ра́дуйся, — вопие́м ти́.

Си́лою Бо́жиею попра́н е́сть сатана́ душегу́бец и ле́стныя его́ же́ртвы: побе́дника бо яви́л на́м е́сть Христо́с, Васи́лия, ве́рнаго кня́зя, сокруши́ти и поврещи́ того́ под но́ги на́ша.

Спасе́ пре́жде Госпо́дь руко́ю Моисе́овою Изра́иля от рабо́ты, То́йже и ны́не руко́ю Васи́лия, ве́рнаго кня́зя, все́х на́с от ле́сти и́дольския спа́сл е́сть.

Досто́йно ти́ взыва́ем и вопие́м вси́: ра́дуйся, всече́стне преблаже́нне, тя́ бо изба́вителя с Бо́гом, Васи́лие, и́мамы. Не пре́зри рабо́в твои́х, но при́сно сохраня́й на́с.

Еле́ны ты́ но́выя любо́вию извести́лся еси́, вну́к бы́в преблаже́нныя О́льги, Константи́н же Вели́кий но́вый яви́лся еси́, Христу́, Васи́лие, вопия́: благослове́н еси́, Бо́же оте́ц на́ших.

Лю́тый льсте́ц двиза́шеся на христиа́ны воева́ти, Превели́кий же Госпо́дь в Корсу́не тя́ просвеща́ет, и креще́нию боже́ственному сподобля́ет, и Ца́рствие небе́сное тебе́ дарова́л е́сть.

Обветша́вшую ле́сть бесо́вскую прогна́л еси́, я́ко вели́кий Христо́в учени́к, обнови́в, просвети́л еси́ все́х на́с вопи́ти Го́сподеви немо́лчно: благослове́н Бо́г оте́ц на́ших.

От безбо́жных и́долов все́х на́с изба́вил еси́, ко Христу́ же Бо́гу приве́л еси́, о́тче, ве́рных князе́й, наказа́теля ста́д твои́х, Христа́ пою́щих во ве́ки.

Константи́н но́вый ты́ извести́лся еси́ во все́й Росси́йстей земли́, блаже́нне Васи́лие: ты́ бо и́мя Христо́во изъясни́л еси́, Его́же превозно́сим во ве́ки.

Царю́ ве́чному ны́не ты́ предстои́ши и десни́цею Его́ венча́н еси́, моли́ся Ему́ за недосто́йныя рабы́ твоя́, я́ко да пое́м Его́ и превозно́сим во ве́ки.

Сла́док, я́коже фи́никс высо́к израща́емь, и, цве́т творя́ ма́сличный, ве́тви многопло́дныя, ты́ быва́еши ви́нное израще́ние, ки́сти две́ созре́лы му́ченики принося́, Рома́на и Дави́да честны́я.

Ли́цы князе́й ны́не благоро́дных предстоя́т, от тебе́ благоче́стие нося́ще, с людьми́ ве́рными хва́ляще тя́: наста́вниче и ско́рый засту́пниче, помина́й все́х на́с, я́ко да в ми́ре тобо́ю живо́т обря́щем.

Лю́дие Росси́йстии, прииди́те, сни́дитеся в честне́й це́ркви Влади́мира свята́го, нарече́ннаго Васи́лия, преблаже́ннаго вели́каго кня́зя, уго́дника Христо́ва пресла́внаго, и приими́те живо́т и спасе́ние, благода́ть и ве́лию ми́лость.

Прїиди́те вѣ́рнїи, пѣ́снь дꙋхо́внꙋю возопїе́мъ, и҆ просла́вимъ хрⷭ҇та̀, и҆́же свѣ́тлѡ просла́вилъ є҆́сть честна́го влади́мїра вели́каго кнѧ́зѧ.

И҆́же сѣ́мѧ сѣ́ющемꙋ да́рꙋѧ, ты̀ и҆ мнѣ̀ да́рꙋй сло́во, да́телю благи́хъ, разрѣша́ѧ мѝ соꙋ́зъ ѧ҆зы́ка, и҆ ѡ҆бновѝ, сп҃се, къ славословле́нїю вѣ́рнѡ.

И҆́же во́лею, а҆ не нꙋ́ждею къ тебѣ̀ всѣ́хъ призыва́еши, ꙗ҆́коже дре́вле мѡѷсе́а и҆ и҆са́їю: та́кожде и҆ ны́нѣ въ се́рдцѣ возгласи́лъ є҆сѝ вѣ́рнагѡ и҆ достохва́льнагѡ кнѧ́зѧ.

И҆́же па́ѵла просвѣти́вый, и҆ и҆збра́нна сотвори́вый, та́кѡ и҆ васі́лїа ны́нѣ ѻ҆тца̀ рѡссі́йскагѡ ѻ҆чны́й недꙋ́гъ ѿто́ргнꙋлъ є҆сѝ, ми́лостиве, твои́мъ креще́нїемъ.

Кѡнстанті́на вѣ́рнагѡ подо́бникъ ꙗ҆ви́лсѧ є҆сѝ, хрⷭ҇та̀ въ се́рдцы твое́мъ прїи́мъ, и҆ є҆гѡ̀ за́повѣдемъ ꙗ҆́коже а҆пⷭ҇тѡлъ всю̀ зе́млю рѡссі́йскꙋю наꙋчи́лъ є҆сѝ.

Бжⷭ҇твенною си́лою ты̀ возмога́ѧ, безбо́жнаго перꙋ́на, кꙋ́чꙋ бѣсо́вскꙋю сокрꙋши́лъ є҆сѝ, и҆ ко ѻ҆́паши ко́нстѣй того̀ привѧза́въ, повелѣ́лъ є҆сѝ во́инѡмъ разби́ти і҆́дѡла.

Чꙋ́до стра́шное и҆ пресла́вное и҆ неизглаго́ланное соверша́етъ влⷣка хрⷭ҇то́съ: ѡ҆бновлѧ́етъ бо бжⷭ҇твеннымъ креще́нїемъ всю̀ рѡссі́йскꙋю зе́млю, и҆ просвѣща́етъ кнѧ́зѧ васі́лїа.

Свѣ́тлѡ прїиди́те, и҆ достолѣ́пнѡ возгласи́те, сы́нове рѡссі́йстїи, ко ѻ҆тцꙋ̀ на́шемꙋ влади́мїрꙋ, и҆ па́мѧть є҆гѡ̀ вѣ́рнѡ всѝ да пра́зднꙋемъ свѣ́тлѡ.

Ѻ҆́тчее нече́стїе ѿгна́лъ є҆сѝ, всечестны́ѧ же твоеѧ̀ прама́тере правовѣ́рнꙋю вѣ́рꙋ возлюби́лъ є҆сѝ ра́вне а҆пⷭ҇лѡмъ хрⷭ҇тѡ́вымъ кнѧ́же, вели́кїй влади́мїре.

Дне́сь а҆́гг҃ли бж҃їи ра́дꙋютсѧ свѣ́тлѡ на нб҃сѣ́хъ въ па́мѧть твою̀ свѧтꙋ́ю: спа́слъ бо є҆сѝ на́съ ѿ всѧ́кагѡ лꙋка́вства, и҆ же́ртвъ бѣсо́вскихъ лю́ди мнѡ́ги и҆зба́вилъ є҆сѝ, и҆ всю̀ зе́млю рѡссі́йскꙋю.

Рыда́етъ бѣсо́вское мно́жество и҆ те́мное собо́рище, ви́дѧще на землѝ попира́ємы і҆́дѡлы, и҆̀же на поги́бель воздви́жєнныѧ человѣ́кѡмъ: и҆́хже бж҃їимъ повелѣ́нїемъ, васі́лїе, сокрꙋши́лъ є҆сѝ.

Ра́дꙋйсѧ и҆ весели́сѧ, ра́бе хрⷭ҇то́въ, кнѧ́же вели́кїй и҆ мꙋ́дрый, моле́бниче ѡ҆ дꙋша́хъ на́шихъ: тобо́ю бо мы̀ всѝ и҆зба́влени є҆смы̀ бѣсо́вскїѧ ле́сти. тѣ́мже ра́дꙋйсѧ, вопїе́мъ тѝ.

Си́лою бж҃їею попра́нъ є҆́сть сатана̀ дꙋшегꙋ́бецъ, и҆ лє́стныѧ є҆гѡ̀ жє́ртвы: побѣ́дника бо ꙗ҆ви́лъ на́мъ є҆́сть хрⷭ҇то́съ, васі́лїа вѣ́рнаго кнѧ́зѧ, сокрꙋши́ти и҆ поврещѝ того̀ подъ но́ги на́шѧ.

Спасѐ пре́жде гдⷭ҇ь рꙋко́ю мѡѷсе́овою і҆и҃лѧ ѿ рабо́ты: то́йже и҆ ны́нѣ рꙋко́ю васі́лїа, вѣ́рнагѡ кнѧ́зѧ, всѣ́хъ на́съ ѿ ле́сти і҆́дѡльскїѧ спа́слъ є҆́сть.

Досто́йнѡ тѝ взыва́емъ, и҆ вопїе́мъ всѝ: ра́дꙋйсѧ, всече́стне пребл҃же́нне, тѧ́ бо и҆зба́вителѧ съ бг҃омъ, васі́лїе, и҆́мамы. не пре́зри рабѡ́въ твои́хъ, но при́снѡ сохранѧ́й на́съ.

Є҆ле́ны ты̀ но́выѧ любо́вїю и҆звѣсти́лсѧ є҆сѝ, внꙋ́къ бы́въ преблаже́нныѧ ѻ҆́льги: кѡнстанті́нъ же вели́кїй но́вый ꙗ҆ви́лсѧ є҆сѝ, хрⷭ҇тꙋ̀, васі́лїе, вопїѧ̀: бл҃гослове́нъ є҆сѝ, бж҃е ѻ҆тє́цъ на́шихъ.

Лю́тый льсте́цъ двиза́шесѧ на хрⷭ҇тїа́ны воева́ти: превели́кїй же гдⷭ҇ь въ корсꙋ́нѣ тѧ̀ просвѣща́етъ, и҆ креще́нїю бжⷭ҇твенномꙋ сподоблѧ́етъ: и҆ црⷭ҇твїе нбⷭ҇ное тебѣ̀ дарова́лъ є҆́сть.

Ѡ҆бветша́вшꙋю ле́сть бѣсо́вскꙋю прогна́лъ є҆сѝ, ꙗ҆́кѡ вели́кїй хрⷭ҇то́въ ᲂу҆чени́къ, ѡ҆бнови́въ просвѣти́лъ є҆сѝ всѣ́хъ на́съ, вопи́ти гдⷭ҇еви немо́лчнѡ: бл҃гослове́нъ бг҃ъ ѻ҆тє́цъ на́шихъ.

Ѿ безбо́жныхъ і҆́дѡлѡвъ всѣ́хъ на́съ и҆зба́вилъ є҆сѝ, ко хрⷭ҇тꙋ́ же бг҃ꙋ приве́лъ є҆сѝ, ѻ҆́ч҃е, вѣ́рныхъ кнѧзе́й, наказа́телѧ ста́дъ твои́хъ, хрⷭ҇та̀ пою́щихъ во вѣ́ки.

Кѡнстанті́нъ но́вый ты̀ и҆звѣсти́лсѧ є҆сѝ во все́й рѡссі́йстѣй землѝ, бл҃же́нне васі́лїе: ты́ бо и҆́мѧ хрⷭ҇то́во и҆з̾ѧсни́лъ є҆сѝ, є҆го́же превозно́симъ во вѣ́ки.

Цр҃ю̀ вѣ́чномꙋ ны́нѣ ты̀ предстои́ши, и҆ десни́цею є҆гѡ̀ вѣнча́нъ є҆сѝ: моли́сѧ є҆мꙋ̀ за недостѡ́йныѧ рабы̑ твоѧ̑, ꙗ҆́кѡ да пое́мъ є҆го̀, и҆ превозно́симъ во вѣ́ки.

Сла́докъ ꙗ҆́коже фі́нїѯъ, высо́къ и҆зраща́емь, и҆ цвѣ́тъ творѧ̀ ма́сличный, вѣ̑тви многоплѡ́дныѧ, ты̀ быва́еши ві́нное и҆зраще́нїе, ки́сти двѣ̀ созрѣ̑лы мꙋ́ченики приносѧ̀, рѡма́на и҆ даві́да честны̑ѧ.

Ли́цы кнѧзе́й ны́нѣ благоро́дныхъ предстоѧ́тъ, ѿ тебє̀ благоче́стїе носѧ́ще, съ людьмѝ вѣ́рными хва́лѧще тѧ̀: наста́вниче и҆ ско́рый застꙋ́пниче, помина́й всѣ́хъ на́съ, ꙗ҆́кѡ да въ ми́рѣ тобо́ю живо́тъ ѡ҆брѧ́щемъ.

Лю́дїе рѡссі́йстїи, прїиди́те, сни́дитесѧ въ чⷭ҇тнѣ́й цр҃кви влади́мїра ст҃а́гѡ, нарече́ннагѡ васі́лїа, пребл҃же́ннагѡ вели́кагѡ кнѧ́зѧ, ᲂу҆го́дника хрⷭ҇то́ва пресла́внагѡ, и҆ прїими́те живо́тъ и҆ спасе́нїе, бл҃года́ть и҆ ве́лїю ми́лость.