Православный календарь
Размер шрифта:

Ака́ѳістъ

Ака́ѳістъ ст҃о́мꙋ прⷪ҇ро́кꙋ бж҃їю и҆лїѝ

Св. славного прор. Илии (Фесвитянина) (IX до Р.Х.) 2 августа 2026

Конда́къ а҃

И҆збра́нный бг҃омъ на ѡ҆браще́нїе і҆и҃лѧ ѿ пре́лести ваа́ловы, гро́зный ѡ҆бличи́телю царе́й законопрестꙋ́пныхъ, просїѧ́вый пла́менною ре́вностїю по бз҃ѣ вседержи́теле, ст҃остїю жи́зни и҆ чꙋдесы̀, восхище́нный съ пло́тїю твое́ю на нб҃са̀: и҆ пред̾итѝ и҆мѣ́ѧй второ́мꙋ прише́ствїю хрⷭ҇то́вꙋ, похва́льнаѧ восписꙋ́емъ тѝ, прⷪ҇ро́че бж҃їй и҆лїѐ: ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ ѕѡ́лъ и҆ ѡ҆бстоѧ́нїй мл҃твами твои́ми свобожда́й, бл҃гоче́стнѡ тебѣ̀ вопїю́щихъ:

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

І҆́косъ а҃

А҆́гг҃лъ ре́вностїю по бз҃ѣ и҆ чи́стымъ житїе́мъ твои́мъ, сы́й во пло́ти, прⷪ҇ро́че, бы́лъ є҆сѝ: є҆щѐ бо младе́нцꙋ тѝ бы́вшꙋ, ѻ҆те́цъ тво́й сова́хъ ви́дѣ свѣ́тлыѧ а҆́гг҃лы, бесѣ́дꙋющїѧ съ тобо́ю, ѻ҆гне́мъ тѧ̀ повива́ющїѧ и҆ пла́менемъ пита́ющїѧ, є҆́же прозна́меноваше пла́меннꙋю ре́вность твою̀ по бз҃ѣ, си́лꙋ слове́съ твои́хъ и҆ житїѐ, ꙗ҆́кѡ свѣ́тъ, непоро́чное. Сегѡ̀ ра́ди со ᲂу҆дивле́нїемъ зове́мъ тѝ такова̑ѧ:

Ра́дꙋйсѧ, ѿ вѣ́чности пред̾избра́нный въ слꙋже́нїе сп҃се́нїю сынѡ́въ і҆и҃левыхъ: ра́дꙋйсѧ, ѿ чре́ва ма́тернѧ предꙋгото́ванный въ провозвѣ́стника бж҃е́ственныѧ и҆́стины и҆ бл҃гоче́стїѧ.

Ра́дꙋйсѧ, пресла́внымъ, бы́вшимъ на тебѣ̀, видѣ́нїемъ роди́телѧ твоегѡ̀ ᲂу҆диви́вый: ра́дꙋйсѧ, дѣ́вственнꙋю чⷭ҇тотꙋ̀ и҆ безмо́лвїе ѿ ю҆́ности возлюби́вый.

Ра́дꙋйсѧ, сꙋетꙋ̀ мі́ра сегѡ̀ и҆ всѧ̀ бл҃га є҆гѡ̀ презрѣ́вый, дꙋ́шꙋ же твою̀ всецѣ́лѡ гдⷭ҇ꙋ посвѧти́вый: ра́дꙋйсѧ, свѣ́томъ премꙋ́дрости ѿ бг҃а ѡ҆заре́нный и҆ ᲂу҆че́нїемъ бл҃гоче́стїѧ и҆здѣ́тства напое́нный.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ в҃

Ви́дѧ нече́стїе и҆ развраще́нїе во і҆и҃ли, пресла́вный прⷪ҇ро́че, ѕѣлѡ̀ дꙋ́хомъ твои́мъ скорбѣ́лъ є҆сѝ и҆ ре́вностїю по сла́вѣ бж҃їей воспламенѧ́лсѧ є҆сѝ: ꙗ҆́кѡ сы́нове і҆и҃левы ме́рзкимъ і҆́дѡлѡмъ поклони́шасѧ, ѿ бг҃а же и҆́стиннагѡ ѿстꙋпи́ша, є҆мꙋ́же всѧ̑ нбⷭ҇наѧ во́инства со стра́хомъ вопїю́тъ: А҆ллилꙋ́їа.

І҆́косъ в҃

Ра́зꙋмъ сво́й ѕло́ю во́лею ѡ҆мрачи́въ, беззако́нный ца́рь і҆и҃льскїй а҆хаа́въ, ѡ҆ста́ви и҆́стиннагѡ бг҃а вседержи́телѧ и҆ покланѧ́шесѧ ме́рзкомꙋ і҆́дѡлꙋ ваа́лꙋ, кꙋ́пнѡ же и҆ въ ца́рствѣ свое́мъ ᲂу҆мно́жи і҆дѡлопоклоне́нїе и҆ нече́стїе. Ты́ же, прⷪ҇ро́че, и҆спо́лненъ сы́й ве́лїѧ ре́вности по бз҃ѣ, дерзнове́ннѡ ѡ҆бличи́лъ є҆сѝ царѧ̀, возвѣсти́въ є҆мꙋ̀, ꙗ҆́кѡ въ наказа́нїе є҆мꙋ̀ и҆ ца́рства є҆гѡ̀ трѝ лѣ́та и҆ мѣ́сѧцъ ше́сть не бꙋ́детъ до́ждь, ни роса̀, и҆ гла́дъ ве́лїй бꙋ́детъ по все́й землѝ. Дивѧ́щесѧ ᲂу҆̀бѡ толи́цѣй ре́вности твое́й по бз҃ѣ и҆ ве́лїю дерзнове́нїю, съ любо́вїю зове́мъ тѝ:

Ра́дꙋйсѧ, небоѧ́зненный проповѣ́дниче и҆́стины и҆ крѣ́пкїй побо́рниче бл҃гоче́стїѧ: ра́дꙋйсѧ, ре́вностный нече́стїѧ ѡ҆бличи́телю.

Ра́дꙋйсѧ, къ наказа́нїю нека́ющихсѧ грѣ́шникѡвъ долготерпѣли́ваго бг҃а преклони́вый: ра́дꙋйсѧ, сло́вомъ твои́мъ нб҃о заключи́вый и҆ плодоно́снꙋю зе́млю непло́днꙋ сотвори́вый.

Ра́дꙋйсѧ, трилѣ́тный гла́дъ за нече́стїе люде́й ѿ гдⷭ҇а и҆спроси́вый: ра́дꙋйсѧ, ꙗ҆́кѡ всевы́шнїй гдⷭ҇ь дарова̀ тебѣ̀ въ бо́га а҆хаа́вꙋ, ꙗ҆́коже дре́влѣ мѡѷсе́а фараѡ́нꙋ.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ г҃

Си́лою мл҃твы твоеѧ̀, преди́вный прⷪ҇ро́че, вои́стиннꙋ заключи́сѧ нб҃о и҆ не ѡ҆дождѝ трѝ лѣ́та и҆ мѣ́сѧцъ ше́сть, и҆ бы́сть гла́дъ ве́лїй по все́й землѝ, да понѐ зно́емъ и҆ гла́домъ томи́ми, нечести́вїи лю́дїе пока́ютсѧ и҆ ѡ҆братѧ́тсѧ ко гдⷭ҇ꙋ, со ᲂу҆миле́нїемъ зовꙋ́ще є҆мꙋ̀: А҆ллилꙋ́їа.

І҆́косъ г҃

И҆мѣ́ѧ ве́лїе бл҃говоле́нїе къ тебѣ̀, прⷪ҇ро́че, гдⷭ҇ь восхотѣ̀ ѿлꙋчи́ти тѧ̀ ѿ беззако́нныхъ сынѡ́въ і҆и҃лѧ, да не съ ни́ми те́рпиши гла́дъ и҆ жа́ждꙋ, и҆ повелѣ̀ тебѣ̀ и҆тѝ къ пото́кꙋ хора́ѳовꙋ, и҆дѣ́же вра́нѡве пита́хꙋ тѧ̀, приносѧ́ще хлѣ́бъ и҆ мѧ́со. Тѣ́мже прино́симъ тебѣ̀ похва́льнаѧ сїѧ̀:

Ра́дꙋйсѧ, посто́мъ и҆ бдѣ́нїемъ всѧ̑ земна̑ѧ и҆ сꙋ́єтнаѧ помышлє́нїѧ и҆стреби́вый: ра́дꙋйсѧ, мл҃твою и҆ бг҃омы́слїемъ ᲂу҆́мъ тво́й въ го́рнѧѧ впери́вый.

Ра́дꙋйсѧ, патрїа́рхѡвъ велича́нїе и҆ прⷪ҇ро́кѡвъ красото̀: ра́дꙋйсѧ, дѣ́вственникѡвъ похвало̀ и҆ преподо́бныхъ сла́во.

Ра́дꙋйсѧ, ст҃и́телей наста́вниче и҆ мꙋ́ченикѡвъ крѣ́посте: ра́дꙋйсѧ, ꙗ҆́кѡ нече́стїемъ и҆ невѣ́рїемъ ѡ҆слѣпле́нныхъ сынѡ́въ і҆и҃левыхъ на пꙋ́ть и҆́стины ѡ҆брати́лъ є҆сѝ.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ д҃

Бꙋ́рѧ ве́лїѧ, разрꙋша́ющаѧ го́ры, пред̾идѧ́ше, є҆гда̀ прибли́жашесѧ къ тебѣ̀, прⷪ҇ро́че, въ хори́вѣ гдⷭ҇ь, та́же ꙗ҆ви́сѧ трꙋ́съ, и҆ не въ трꙋ́сѣ гдⷭ҇ь, и҆ по трꙋ́сѣ ѻ҆́гнь, и҆ не во ѻ҆гнѝ гдⷭ҇ь, а҆ по ѻ҆гнѝ бы́сть гла́съ хла́да то́нка, и҆ тꙋ̀ ꙗ҆ви́сѧ тебѣ̀ гдⷭ҇ь: є҆го́же присꙋ́тствїе ѡ҆щꙋти́въ, покры́лъ є҆сѝ лицѐ твоѐ ми́лѡтїю, со стра́хомъ и҆ ра́достїю зовы́й є҆мꙋ̀: А҆ллилꙋ́їа.

І҆́косъ д҃

Слы́шавъ нечести́вый ца́рь а҆хаа́въ повелѣ́нїе твоѐ, ѡ҆ є҆́же собра́ти всѧ̀ колѣ́на і҆и҃лева на го́рꙋ карми́льскꙋю, и҆ привестѝ на тꙋ̀ стꙋ́дныѧ проро́ки ваа́ловы, а҆́бїе посла́въ, собра̀ всѧ̑, и҆ са́мъ прїи́де та́мѡ. Ты́ же, ревни́телю сла́вы бж҃їѧ, хотѧ̀ коне́чнѣ посрами́ти мє́рзкїѧ і҆́дѡлы и҆ просла́вити и҆́стиннагѡ бг҃а, повелѣ́лъ є҆сѝ ᲂу҆гото́вати двѣ̀ жє́ртвы, ѻ҆гнѧ̀ же на ты́ѧ не возгнѣща́ти, ре́къ: и҆ бꙋ́детъ бг҃ъ, и҆́же а҆́ще послꙋ́шаетъ ѻ҆гне́мъ, то́й є҆́сть бг҃ъ. То̀ слы́шавше всѝ лю́дїе, рѣ́ша: до́бръ глаго́лъ и҆лїи́нъ, є҆го́же глаго́ла да бꙋ́детъ та́кѡ. Мы́ же, велича́юще тѧ̀, зове́мъ:

Ра́дꙋйсѧ, вели́кїй посла́нниче цр҃ѧ̀ нбⷭ҇нагѡ и҆ провозвѣ́стниче ст҃ы́хъ велѣ́нїй є҆гѡ̀: ра́дꙋйсѧ, а҆дама́нте, неѡдоли́мый въ ре́вности и҆ непоколеби́мый сто́лпе бл҃гоче́стїѧ.

Ра́дꙋйсѧ, си́льный защи́тниче и҆́стины и҆ тве́рдый противобо́рниче врагѡ́въ бж҃їихъ: ра́дꙋйсѧ, нече́стїѧ и҆скорени́телю и҆ насади́телю бл҃гоче́стїѧ.

Ра́дꙋйсѧ, пла́менный ревни́телю бж҃е́ственныѧ сла́вы: ра́дꙋйсѧ, ꙗ҆́кѡ и҆ въ послѣ́днїѧ днѝ мі́ра и҆́маши проповѣ́довати и҆́стиннагѡ бг҃а и҆ ѡ҆блича́ти ѡ҆каѧ́ннагѡ а҆нті́хрїста.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ є҃

Бг҃оте́чнꙋю тѧ̀ ѕвѣздꙋ̀ погаси́ти мнѧ́ше беззако́ннаѧ цари́ца і҆езаве́ль: и҆спо́лнившисѧ бо на тѧ̀ ꙗ҆́рости за погꙋбле́нїе стꙋ́дныхъ є҆ѧ̀ проро́кѡвъ, хотѧ́ше ᲂу҆би́ти тѧ̀: ѡ҆жесточи́сѧ бо се́рдце є҆ѧ̀ и҆ не хотѧ́ше вѣ́ровати чꙋдесє́мъ твои́мъ, прⷪ҇ро́че, и҆ позна́ти и҆́стиннагѡ бг҃а, пою́щи є҆мꙋ̀: А҆ллилꙋ́їа.

І҆́косъ є҃

Ви́дѣвше всѝ лю́дїе і҆и҃левы, по мл҃твѣ твое́й, ѻ҆́гнь ѿ гдⷭ҇а съ нб҃сѐ сше́дый на же́ртвꙋ твою̀, всехва́льне прⷪ҇ро́че, и҆ всю̀ ю҆̀ поже́гшїй, дрова̀ же, и҆ ка́мень, и҆ пе́рсть, и҆ во́дꙋ потреби́вый, падо́ша на ли́ца своѧ̀, взыва́юще: вои́стиннꙋ гдⷭ҇ь бг҃ъ то́й є҆́сть бг҃ъ. И҆ вѣ́роваша лю́дїе бг҃ови, стꙋ́дныѧ же проро́ки ты̀ закла́лъ є҆сѝ. Сла́вѧще ᲂу҆́бѡ всеси́льнагѡ, чꙋдодѣ́ющагѡ бг҃а, тебѣ̀, ᲂу҆го́дникꙋ є҆гѡ̀, глаго́лемъ си́це:

Ра́дꙋйсѧ, преве́лїе дерзнове́нїе ко влⷣцѣ всѧ́ческихъ стѧжа́вый: ра́дꙋйсѧ, зна́менїи и҆ чꙋдесы̀ бж҃е́ственнꙋю и҆́стинꙋ ᲂу҆тверди́вый.

Ра́дꙋйсѧ, пре́лесть де́мѡнскꙋю посрами́вый, и҆́стиннꙋю же вѣ́рꙋ просла́вивый: ра́дꙋйсѧ, невѣ̑рныѧ и҆́стиннымъ бг҃овѣ́дѣнїемъ просвѣти́вый.

Ра́дꙋйсѧ, трикра́тнымъ лїѧ́нїемъ на же́ртвенникъ воды̀, та́йнꙋ прест҃ы́ѧ трⷪ҇цы ꙗ҆ви́вый: ра́дꙋйсѧ, ꙗ҆́кѡ всѐ є҆стество̀ сꙋ́щихъ тебѣ̀ повинова́сѧ, ѻ҆́гнь же и҆ вода̀ тебѣ̀ слꙋжа́хꙋ.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ ѕ҃

Проповѣ́дникъ и҆́стиннагѡ бг҃овѣ́дѣнїѧ и҆ бл҃гоче́стїѧ ꙗ҆ви́лсѧ є҆сѝ, прⷪ҇ро́че, не то́кмѡ во і҆и҃ли, но и҆ въ странѣ̀ ꙗ҆зы́честѣй, по́сланъ бы́въ ѿ гдⷭ҇а въ саре́птꙋ сїдѡ́нскꙋю къ женѣ̀ вдови́цѣ препита́тисѧ, па́че же да самꙋ̀ тꙋ̀ препита́еши въ гла́дѣ: и҆мѣ́ѧ бо ве́лїю чꙋдотворе́нїѧ бл҃года́ть, ᲂу҆мно́жилъ є҆сѝ мꙋкꙋ̀ и҆ є҆ле́й въ домꙋ̀ є҆ѧ̀ неѡскꙋ́днѡ, до́ндеже пре́йде гла́дное вре́мѧ, и҆ трикра́тнымъ дꙋнове́нїемъ, по мл҃твѣ твое́й, воскреси́лъ є҆сѝ ᲂу҆ме́ршагѡ сы́на є҆ѧ̀, поѧ̀ чꙋдодѣ́ющемꙋ бг҃ꙋ: А҆ллилꙋ́їа.

І҆́косъ ѕ҃

Возсїѧ́въ ве́лїею ре́вностїю по бз҃ѣ вседержи́теле, ѕѣлѡ̀ скорбе́лъ є҆сѝ, прⷪ҇ро́че, ꙗ҆́кѡ ѡ҆ста́виша завѣ́тъ є҆гѡ̀ сы́нѡве і҆и҃левы, ѻ҆лтарѝ є҆гѡ̀ раскопа́ша и҆ прⷪ҇рѡ́ки и҆зби́ша. Гдⷭ҇ь же во ᲂу҆тѣше́нїе твоѐ возвѣстѝ тебѣ̀, ꙗ҆́кѡ не ве́сь і҆и҃ль ѿстꙋпѝ ѿ негѡ̀, но и҆́мать се́дмь ты́сѧщъ сокрове́нныхъ рабѡ́въ свои́хъ, и҆̀же не преклони́ша колѣ̑на своѧ̑ ваа́лꙋ. Тѣ́мже, воспомина́юще ре́вность твою̀ по бз҃ѣ, пое́мъ тѝ со бл҃гоговѣ́нїемъ сицева̑ѧ:

Ра́дꙋйсѧ, вѣ́рный слꙋжи́телю и҆ бли́жнїй дрꙋ́же гдⷭ҇ень: ра́дꙋйсѧ, ѻ҆́бразе и҆ похвало̀ бл҃гочести́выхъ па́стырей.

Ра́дꙋйсѧ, наста́вниче сп҃се́нїѧ и҆ просвѣще́нїе во тмѣ̀ сѣдѧ́щихъ: ра́дꙋйсѧ, защи́тникѡмъ и҆́стины мꙋ́жество внꙋша́ѧй, въ по́двизѣхъ же и҆ страда́нїихъ за пра́вдꙋ и҆̀хъ ᲂу҆крѣплѧ́ѧй.

Ра́дꙋйсѧ, ꙗ҆́кѡ серафі́мскою пла́менною любо́вїю къ бг҃ꙋ горѣ́лъ є҆сѝ: ра́дꙋйсѧ, ꙗ҆́кѡ и҆ гдⷭ҇ь во всѣ̑мъ послꙋ́шаше тебѣ̀ и҆ по проше́нїю твоемꙋ̀ всѧ̀ творѧ́ше.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ з҃

Хотѧ̀ чл҃вѣколю́бецъ гдⷭ҇ь ꙗ҆ви́ти млⷭ҇рдїе своѐ ка́ющимсѧ грѣ́шникѡмъ, по преше́ствїи прорече́ннагѡ гла́днагѡ вре́мене, низпосла̀ по мл҃твѣ твое́й, прⷪ҇ро́че, и҆ глаго́лѡмъ ᲂу҆́стъ твои́хъ, на жа́ждꙋщꙋю зе́млю ѡ҆би́льный и҆ мі́рный до́ждь: сы́нѡве же і҆и҃левы, сподо́бльшїисѧ толи́кїѧ млⷭ҇ти, во ᲂу҆миле́нїи се́рдца бл҃года́рственнѡ возопи́ша бг҃ꙋ: А҆ллилꙋ́їа.

І҆́косъ з҃

Но́вое нечести́вый ца́рь а҆хаа́въ къ беззако́нїемъ свои́мъ приложѝ ѕлодѣѧ́нїе, є҆гда̀ повелѣ̀ ᲂу҆би́ти непови́ннаго навꙋѳе́а и҆ восхи́ти вїногра́дъ є҆гѡ̀. Сегѡ̀ ра́ди, ѡ҆блича́ѧ законопрестꙋ́пнагѡ царѧ̀, проре́клъ є҆сѝ є҆мꙋ̀, прⷪ҇ро́че, ꙗ҆́кѡ и҆дѣ́же ᲂу҆мерщвле́нъ бы́сть навꙋѳе́й, та́мѡ и҆ є҆гѡ̀ кро́вь свинїѝ и҆ псѝ поли́жꙋтъ, и҆ женꙋ̀ є҆гѡ̀ і҆езаве́ль снѣдѧ́тъ псѝ, и҆ ве́сь до́мъ є҆гѡ̀ и҆стреби́тсѧ. Вѣ́дꙋще ᲂу҆́бѡ мы̀ сбы́вшеесѧ стра́шное сїѐ прорече́нїе, ᲂу҆жаса́емсѧ, зовꙋ́ще:

Ра́дꙋйсѧ, ѡ҆би́дѧщихъ и҆ жестокосе́рдыхъ гро́зный ѿмсти́телю: ра́дꙋйсѧ, си́рыхъ и҆ напа́ствꙋемыхъ крѣ́пкїй застꙋ́пниче.

Ра́дꙋйсѧ, не почита́ющихъ ст҃ы́хъ пра́здникѡвъ правосла́вныѧ цр҃кве кара́телю: ра́дꙋйсѧ, проде́рзыхъ хꙋ́льникѡвъ и҆́мене бж҃їѧ низложи́телю.

Ра́дꙋйсѧ, сло́вомъ ѡ҆бличе́нїѧ, ꙗ҆́кѡ гро́момъ, беззако́нныѧ поража́ѧй: ра́дꙋйсѧ, бꙋ́дꙋщаѧ, ꙗ҆́кѡ настоѧ́щаѧ, вѣ́дый и҆ да̑льнѧѧ, ꙗ҆́кѡ бли́зъ сꙋ́щаѧ, прорица́ѧй.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ и҃

Стра́нное и҆ преесте́ственное показа̀ гдⷭ҇ь ѡ҆ тебѣ̀, прⷪ҇ро́че, промышле́нїе, є҆гда̀ повелѣ̀ а҆́лчнымъ и҆ нечадолюби́вымъ вра́нѡмъ пита́ти тѧ̀ въ гла́дѣ при пото́цѣ хора́ѳовѣ, и҆дѣ́же непреста́ннѡ пребыва́ѧ въ мл҃твѣ и҆ бг҃омы́слїи, воспѣва́лъ є҆сѝ бг҃ꙋ: А҆ллилꙋ́їа.

І҆́косъ и҃

Ве́сь бы́лъ є҆сѝ смире́нїемъ ве́лїимъ ᲂу҆кра́шенъ, прⷪ҇ро́че бж҃їй, сегѡ̀ ра́ди съ го́рдостїю прише́дшихъ къ тебѣ̀ двꙋ́хъ пѧтдесѧтонача́льникѡвъ съ во́ины, да приведꙋ́тъ тебѣ̀ къ беззако́нномꙋ царю̀ ѻ҆хозі́и, ѻ҆гне́мъ попали́лъ є҆сѝ, со смире́нїемъ же прише́дшагѡ къ тебѣ̀ а҆вді́а, и҆̀же пита́ше ᲂу҆ч҃никѝ прⷪ҇ро́ческїѧ, поми́ловалъ є҆сѝ. Сегѡ̀ ра́ди прино́симъ тѝ похва̑льныѧ пѣ̑сни сїѧ̀:

Ра́дꙋйсѧ, го́рдыхъ смири́телю и҆ кара́телю, смире́нныхъ же покро́ве и҆ застꙋ́пниче: ра́дꙋйсѧ, мздои́мныхъ сꙋде́й наказа́телю, пра́во же сꙋдѧ́щимъ помо́щниче.

Ра́дꙋйсѧ, правовѣ́рномꙋ во́инствꙋ во бра́нѣхъ спобо́рниче, нечести́выхъ же сꙋпоста́тъ низложи́телю: ра́дꙋйсѧ, премꙋ́дростїю, ꙗ҆́кѡ броне́ю, ѡ҆блече́нный и҆ пра́вдою, ꙗ҆́кѡ щито́мъ, ѡ҆гражде́нный.

Ра́дꙋйсѧ, ре́вностїю по бз҃ѣ, ꙗ҆́кѡ мече́мъ, воѻрꙋже́нный и҆ посто́мъ, ꙗ҆́кѡ крила́ми, ѡ҆криле́нный: ра́дꙋйсѧ, вѣ́рою, ꙗ҆́кѡ шле́момъ сп҃се́нїѧ, покрове́нный и҆ любо́вїю, ꙗ҆́кѡ вѣнце́мъ пресвѣ́тлымъ, вѣнча́нный.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ ѳ҃

Всѧ́кое чл҃вѣ́ческое є҆стество̀ ѕѣлѡ̀ ᲂу҆дивлѧ́етсѧ, ка́кѡ ты̀, пречꙋ́дный прⷪ҇ро́че, ше́лъ є҆сѝ четы́редесѧть дні́й, ни ꙗ҆ды́й, ни пїѧ́й, до горы̀ хѡри́ва, и҆дѣ́же сподо́билсѧ є҆сѝ пресла́внагѡ ꙗ҆вле́нїѧ и҆ пресла́дкїѧ бесѣ́ды гдⷭ҇а вседержи́телѧ, поѧ̀ є҆мꙋ̀: А҆ллилꙋ́їа.

І҆́косъ ѳ҃

Вѣті̑ѧ многовѣща́нныѧ недоꙋмѣ́ютъ дово́льнѡ разꙋмѣ́ти и҆ и҆з̾ѧсни́ти, ка́кѡ ты̀, великоимени́те и҆лїѐ, во пло́ти сы́й чл҃вѣ́честѣй и҆ подобостра́стенъ на́мъ бы́въ, восхище́нъ є҆сѝ съ тѣ́ломъ твои́мъ на нб҃о, ꙗ҆́вльшейсѧ тебѣ̀ колесни́цей ѻ҆́гненнѣй съ ко́ни ѻ҆́гненными. Сла́вѧще ᲂу҆́бѡ просла́вльшагѡ тѧ̀ гдⷭ҇а и҆ дивѧ́щесѧ восхище́нїю твоемꙋ̀, бл҃гоговѣ́йнѡ зове́мъ тѝ:

Ра́дꙋйсѧ, пречꙋ́днымъ воздержа́нїемъ ве́тхагѡ чл҃вѣ́ка въ себѣ̀ ᲂу҆мертви́вый: ра́дꙋйсѧ, ѻ҆гне́мъ бж҃е́ственныѧ ре́вности всѧ́кое веще́ственное помышле́нїе въ себѣ̀ попали́вый.

Ра́дꙋйсѧ, преложе́нїемъ твои́мъ на нб҃о ро́дъ чл҃вѣ́ческїй возвесели́вый и҆ жи́знь вѣ́чнꙋю ᲂу҆вѣ́ривый: ра́дꙋйсѧ, че́стїю и҆ сла́вою преесте́ственною ѿ бг҃а почте́нный и҆ па́че всѣ́хъ дре́внихъ прⷪ҇ро́кѡвъ просла́вленный.

Ра́дꙋйсѧ, ѿ а҆́гг҃льскихъ ликѡ́въ въ селе́нїихъ нбⷭ҇ныхъ ра́достнѡ срѣ́тенный: ра́дꙋйсѧ, ꙗ҆́кѡ и҆́мѧ твоѐ во всѣ́мъ мі́рѣ почита́етсѧ, и҆ ре́вность твоѧ̀ по бз҃ѣ ѕѣлѡ̀ прославлѧ́етсѧ.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ і҃

Сп҃стѝ хотѧ̀ всебл҃гі́й бг҃ъ лю́ди і҆и҃левы ѿ пре́лести ваа́ловы, и҆збра̀ тѧ̀, вели́кїй прⷪ҇ро́че, во ѻ҆рꙋ́дїе во́ли своеѧ̀ и҆ ѡ҆блечѐ тѧ̀ бж҃е́ственною вла́стїю и҆ си́лою, да ѡ҆брати́ши невѣ̑рныѧ, и҆спра́виши беззакѡ́нныѧ, просвѣти́ши ѡ҆мрачє́нныѧ и҆ наꙋчи́ши всѣ́хъ вопи́ти бг҃ꙋ: А҆ллилꙋ́їа.

І҆́косъ і҃

Стѣна̀ и҆ застꙋпле́нїе бꙋ́ди на́мъ, прест҃е прⷪ҇ро́че, мо́щнымъ твои́мъ хода́тайствомъ ᲂу҆толѧ́ѧ првⷣный гнѣ́въ бж҃їй, поража́ющїй на́съ, грѣ́шныхъ и҆ непотре́бныхъ, бездо́ждїемъ и҆ гла́домъ, є҆щѐ же тлетво́рными вѣ̑тры и҆ болѣ́зньми, да и҆зба́вльшесѧ ѿ бѣ́дъ, бл҃года́рственнѡ пое́мъ тѝ:

Ра́дꙋйсѧ, мл҃твами твои́ми нб҃о заключа́ѧй и҆ ѿверза́ѧй, плодоно́сїе землѝ и҆ непло́дїе ѿ бг҃а посыла́ѧй: ра́дꙋйсѧ, предста́тельствомъ твои́мъ пред̾ бг҃омъ дождѝ ми́рны и҆ ро́сꙋ животво́рнꙋю на земна̑ѧ прозѧбє́нїѧ низводѧ́й.

Ра́дꙋйсѧ, свирѣ̑пыѧ вѡ́лны морскі́ѧ и҆ стра̑шныѧ бꙋ̑ри ᲂу҆тиша́ѧй и҆ грома́ми и҆ мо́лнїѧми по во́лѣ бж҃їей ᲂу҆правлѧ́ѧй: ра́дꙋйсѧ, тлетво́рныѧ вѣ́тры и҆ смертоно́сныѧ ꙗ҆́звы, поража́ющїѧ чл҃вѣ́ки же и҆ скоты̀, ᲂу҆кроща́ѧй.

Ра́дꙋйсѧ, си́рыхъ и҆ вдови́цъ пита́телю и҆ щедрода́тельныхъ люде́й покрови́телю: ра́дꙋйсѧ, ꙗ҆́кѡ нечести́выхъ хꙋ́льникѡвъ и҆ гони́телей пра́выѧ вѣ́ры поража́еши и҆ дꙋхѡ́въ ѕло́бы ѿ рабѡ́въ бж҃їихъ прогонѧ́еши.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ а҃і

Пѣ́нїе ᲂу҆миле́нное прїимѝ ѿ на́съ, прⷪ҇ро́че бж҃їй и҆лїѐ, ꙗ҆́кѡже прїѧ́лъ є҆сѝ проше́нїе є҆лїсе́ево, є҆гда̀ просѝ ѿ тебѣ̀, да бꙋ́детъ дꙋ́хъ, и҆̀же въ тебѣ̀, сꙋгꙋ́бъ въ не́мъ, и҆ є҆гда̀, восхища́ѧсѧ на нб҃о, низпꙋсти́лъ є҆сѝ є҆мꙋ̀ ми́лѡть твою̀, ю҆́же ѻ҆́нъ взе́мъ, раздѣлѝ, ꙗ҆́коже и҆ ты̀ пре́жде, і҆ѻрда́нскїѧ во́ды, и҆ бы́сть наслѣ́дникъ дѣ́йствовавшїѧ въ тебѣ̀ бж҃їѧ бл҃года́ти: си́це и҆ на́съ покры́й ми́лѡтїю твоеѧ̀ млⷭ҇ти ѿ всѧ́кихъ бѣ́дъ и҆ ѡ҆бстоѧ́нїй, да со бл҃годаре́нїемъ зове́мъ бг҃ꙋ: А҆ллилꙋ́їа.

І҆́косъ а҃і

Свѣтоза́рное свѣти́ло во і҆и҃ли, всехва́льне прⷪ҇ро́че, бы́лъ є҆сѝ, сїѧ́ѧ равноа́гг҃льнымъ житїе́мъ твои́мъ и҆ мꙋ́дростїю, є҆щѐ же неѡбы́чною ре́вностїю по бз҃ѣ и҆ чꙋдесы̀ пресла́вными, просвѣща́ѧ лю́ди и҆́стиннымъ бг҃овѣ́дѣнїемъ и҆ разгонѧ́ѧ мра́къ і҆дѡлослꙋже́нїѧ. Тѣ́мже восписꙋ́емъ тѝ похва̑льнаѧ, пою́ще:

Ра́дꙋйсѧ, лꙋчеза́рнаѧ ѕвѣздо̀, сїѧ́нїемъ свои́мъ ѡ҆зари́вшаѧ всю̀ вселе́ннꙋю: ра́дꙋйсѧ, свѣтоно́снаѧ свѣщѐ, непреста́ннѡ горѧ́щаѧ и҆ во тмѣ̀ сѣдѧ́щихъ просвѣща́ющаѧ.

Ра́дꙋйсѧ, дꙋ́хомъ премꙋ́дрости и҆ ра́зꙋма ѡ҆заре́нный, дꙋ́хомъ совѣ́та и҆ крѣ́пости и҆спо́лненный: ра́дꙋйсѧ, дꙋ́хомъ вѣ́дѣнїѧ и҆ бл҃гоче́стїѧ просвѣще́нный и҆ дꙋ́хомъ стра́ха бж҃їѧ напое́нный.

Ра́дꙋйсѧ, высо́кими добродѣ́тельми и҆ пресла́вными чꙋдесы̀ преꙋкраше́нный: ра́дꙋйсѧ, ꙗ҆́кѡ сꙋды̀ бж҃їѧ на землѝ и҆сполнѧ́лъ є҆сѝ, прⷪ҇рѡ́ки же и҆ царѝ пома́зывалъ є҆сѝ.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ в҃і

Бл҃года́ть ве́лїѧ дана̀ тѝ бы́сть ѿ бг҃а, прехва́льне прⷪ҇ро́че, ꙗ҆́кѡ въ земнѣ́й жи́зни твое́й прⷪ҇ро́чествовалъ и҆ соверша́лъ є҆сѝ ди̑внаѧ чꙋдеса̀, та́же преесте́ственнѡ восхище́нъ бы́лъ є҆сѝ съ пло́тїю твое́ю на нб҃о, по восхище́нїи же твое́мъ ди́внѡ предста́лъ є҆сѝ на ѳавѡ́рѣ преѡбрази́вшемꙋсѧ гдⷭ҇ꙋ и҆ съ ни́мъ бесѣ́довалъ є҆сѝ, и҆ додне́сь не престае́ши чꙋдодѣ́йствовати и҆ и҆сточа́ти млⷭ҇ти и҆ и҆сцѣлє́нїѧ ᲂу҆се́рднѡ почита́ющимъ тѧ̀, бг҃ꙋ же вѣ́рнѡ вопїю́щимъ: А҆ллилꙋ́їа.

І҆́косъ в҃і

Пою́ще твою̀ пла́меннꙋю ре́вность по бз҃ѣ и҆ равноа́гг҃льное житїѐ, ди̑внаѧ же твоѧ̑ и҆ пресла̑внаѧ чꙋдеса̀ и҆ преве́лїе бл҃говоле́нїе къ тебѣ̀ гдⷭ҇а, восхвалѧ́емъ тѧ̀, великоимени́те прⷪ҇ро́че и҆лїѐ, ѻ҆ба́че, не могꙋ́ще досто́йнѡ и҆з̾ѡбрази́ти вели́чїе и҆ сла́вꙋ твою̀, со ᲂу҆миле́нїемъ зове́мъ тѝ сицева̑ѧ:

Ра́дꙋйсѧ, ковче́же бж҃е́ственныѧ сла́вы и҆ всечтⷭ҇ны́й хра́ме прест҃ы́ѧ трⷪ҇цы: ра́дꙋйсѧ, свѣти́льниче невече́рнїй цр҃кве́й и҆ бл҃гово́нный цвѣ́те раѧ̀ бж҃е́ственнагѡ.

Ра́дꙋйсѧ, бл҃гочести́выхъ пꙋсты́нникѡвъ рꙋководи́телю, дѣ́вственникѡвъ же наста́вниче и҆ ᲂу҆крѣпле́нїе: ра́дꙋйсѧ, ꙗ҆́кѡ грѣ́шникѡвъ къ покаѧ́нїю возбꙋжда́еши и҆ всемꙋ̀ ро́дꙋ хрⷭ҇тїа́нскомꙋ жи́знь вѣ́чнꙋю хода́тайствꙋеши.

Ра́дꙋйсѧ, ꙗ҆́кѡ во свѣ́тлостехъ ст҃ы́хъ неизрече́нныѧ сла́вы наслажда́ешисѧ и҆ непреста́ннѡ гдⷭ҇а славосло́виши: ра́дꙋйсѧ, ꙗ҆́кѡ въ концѣ̀ време́нъ ве́лїѧ зна́менїѧ и҆ чꙋдеса̀ и҆́маши соверши́ти на ᲂу҆твержде́нїе люде́й во и҆́стиннѣй вѣ́рѣ и҆ на ѡ҆бличе́нїе а҆нті́хрїста.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ г҃і

Ѽ, преди́вный и҆ пресла́вный прⷪ҇ро́че бж҃їй и҆лїѐ, преве́лїй ревни́телю по бз҃ѣ, дождѝ и҆ бездо́ждїе, плодоно́сїе на зе́млю и҆ непло́дїе ѿ бг҃а посыла́ѧй. Оу҆слы́ши сїѐ ма́лое, бл҃гоговѣ́йнѡ приноси́мое тебѣ̀ на́ми моле́нїе и҆ твои́мъ те́плымъ ко гдⷭ҇ꙋ предста́тельствомъ сохранѝ на́съ ѿ бездо́ждїѧ, гла́да и҆ смертоно́сныхъ болѣ́зней, пода́ждь же на́мъ бл҃горастворе́нїе воздꙋ́ха и҆ плодоно́сїе, и҆ дꙋ́хъ пра́выѧ вѣ́ры и҆ бл҃гоче́стїѧ, да и҆зба́вльшесѧ ѿ вѣ́чныхъ мꙋ́къ, сподо́бимсѧ ра́йскагѡ бл҃же́нства, пою́ще бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ ре́вностїю по бз҃ѣ и҆ чи́стымъ житїе́мъ твои́мъ, сы́й во пло́ти, прⷪ҇ро́че, бы́лъ є҆сѝ: є҆щѐ бо младе́нцꙋ тѝ бы́вшꙋ, ѻ҆те́цъ тво́й сова́хъ ви́дѣ свѣ́тлыѧ а҆́гг҃лы, бесѣ́дꙋющїѧ съ тобо́ю, ѻ҆гне́мъ тѧ̀ повива́ющїѧ и҆ пла́менемъ пита́ющїѧ, є҆́же прозна́меноваше пла́меннꙋю ре́вность твою̀ по бз҃ѣ, си́лꙋ слове́съ твои́хъ и҆ житїѐ, ꙗ҆́кѡ свѣ́тъ, непоро́чное. Сегѡ̀ ра́ди со ᲂу҆дивле́нїемъ зове́мъ тѝ такова̑ѧ:

Ра́дꙋйсѧ, ѿ вѣ́чности пред̾избра́нный въ слꙋже́нїе сп҃се́нїю сынѡ́въ і҆и҃левыхъ: ра́дꙋйсѧ, ѿ чре́ва ма́тернѧ предꙋгото́ванный въ провозвѣ́стника бж҃е́ственныѧ и҆́стины и҆ бл҃гоче́стїѧ.

Ра́дꙋйсѧ, пресла́внымъ, бы́вшимъ на тебѣ̀, видѣ́нїемъ роди́телѧ твоегѡ̀ ᲂу҆диви́вый: ра́дꙋйсѧ, дѣ́вственнꙋю чⷭ҇тотꙋ̀ и҆ безмо́лвїе ѿ ю҆́ности возлюби́вый.

Ра́дꙋйсѧ, сꙋетꙋ̀ мі́ра сегѡ̀ и҆ всѧ̀ бл҃га є҆гѡ̀ презрѣ́вый, дꙋ́шꙋ же твою̀ всецѣ́лѡ гдⷭ҇ꙋ посвѧти́вый: ра́дꙋйсѧ, свѣ́томъ премꙋ́дрости ѿ бг҃а ѡ҆заре́нный и҆ ᲂу҆че́нїемъ бл҃гоче́стїѧ и҆здѣ́тства напое́нный.

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Конда́къ а҃

И҆збра́нный бг҃омъ на ѡ҆браще́нїе і҆и҃лѧ ѿ пре́лести ваа́ловы, гро́зный ѡ҆бличи́телю царе́й законопрестꙋ́пныхъ, просїѧ́вый пла́менною ре́вностїю по бз҃ѣ вседержи́теле, ст҃остїю жи́зни и҆ чꙋдесы̀, восхище́нный съ пло́тїю твое́ю на нб҃са̀: и҆ пред̾итѝ и҆мѣ́ѧй второ́мꙋ прише́ствїю хрⷭ҇то́вꙋ, похва́льнаѧ восписꙋ́емъ тѝ, прⷪ҇ро́че бж҃їй и҆лїѐ: ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ ѕѡ́лъ и҆ ѡ҆бстоѧ́нїй мл҃твами твои́ми свобожда́й, бл҃гоче́стнѡ тебѣ̀ вопїю́щихъ:

Ра́дꙋйсѧ, и҆лїѐ, вели́кїй прⷪ҇ро́че, втора́гѡ прише́ствїѧ хрⷭ҇то́ва сла́вный прⷣте́че.

Моли́твы

Ѽ прехва́льный и҆ пречꙋ́дный прⷪ҇ро́че бж҃їй и҆лїѐ, просїѧ́вый на землѝ равноа́гг҃льнымъ житїе́мъ твои́мъ, пла́меннейшею ре́вностїю по гдⷭ҇ѣ бз҃ѣ вседержи́теле, є҆щѐ же зна́мєнїи и҆ чꙋдесы̑ пресла́вными, та́же, по кра́йнемꙋ бл҃говоле́нїю къ тебѣ̀ бж҃їю, преесте́ственнѡ восхище́нный на ѻ҆́гненнѣй колесни́цѣ съ пло́тїю твое́ю на нб҃о, сподо́бивыйсѧ бесѣ́довати съ преѡбрази́вшимсѧ на ѳавѡ́рѣ сп҃си́телемъ мі́ра и҆ ны́нѣ въ ра́йскихъ селе́нїихъ вы́нꙋ пребыва́ѧй и҆ предстоѧ́й прⷭ҇то́лꙋ нбⷭ҇наго цр҃ѧ̀! ᲂу҆слы́ши на́съ, грѣ́шныхъ и҆ непотре́бныхъ, въ ча́съ се́й предстоѧ́щихъ пред̾ ст҃о́ю твое́ю і҆кѡ́ною и҆ ᲂу҆се́рднѡ прибѣга́ющихъ къ хода́тайствꙋ твоемꙋ̀. Молѝ ѡ҆ на́съ чл҃вѣколю́бца бг҃а, да пода́стъ на́мъ дх҃ъ покаѧ́нїѧ и҆ сокрꙋше́нїѧ ѡ҆ грѣсѣ́хъ на́шихъ и҆ всеси́льною свое́ю бл҃года́тїю да помо́жетъ на́мъ ѡ҆ста́вити пꙋтѝ нече́стїѧ, приспѣва́ти же во всѧ́комъ дѣ́лѣ бла́зѣ, да ᲂу҆крѣпи́тъ на́съ въ борьбѣ̀ со страстьмѝ и҆ похотьмѝ на́шими: да всади́тъ въ се́рдце на́ше дх҃ъ смире́нїѧ и҆ кро́тости, дх҃ъ братолю́бїѧ и҆ неѕло́бїѧ, дх҃ъ терпѣ́нїѧ и҆ цѣломꙋ́дрїѧ, дх҃ъ ре́вности къ сла́вѣ бж҃їей и҆ сп҃се́нїю бли́жнихъ. Оу҆празднѝ моли́твами твои́ми, прⷪ҇ро́че, ѕлы̑ѧ ѻ҆бы́чаи ми́ра, па́че же поги́бельный и҆ тлетво́рный дх҃ъ вѣ́ка сегѡ̀, заража́ющий хрїстїа́нскїй ро́дъ неꙋваже́нїемъ къ бжⷭ҇твеннѣй правосла́внѣй вѣ́рѣ, къ ᲂу҆ста́вѡмъ ст҃ы́ѧ це́ркве и҆ къ за́повѣдемъ гдⷭ҇нимъ, непочте́нїемъ къ роди́телємъ и҆ властє́мъ предержа́щимъ и҆ низверга́ющїй люде́й въ бе́зднꙋ нече́стїѧ, развраще́нїѧ и҆ поги́бели. Ѿвратѝ ѿ на́съ, пречꙋ́дне прⷪ҇ро́че, предста́тельствомъ твои́мъ првⷣный гнѣ́въ бж҃їй и҆ и҆зба́ви всѧ̑ гра̑ды и҆ вє́си ѿ бездо́ждїѧ и҆ гла́да, ѿ стра́шныхъ бꙋ́рь и҆ землетрѧсе́нїй, ѿ смертоно́сныхъ ꙗ҆́звъ и҆ болѣ́зней, ѿ наше́ствїѧ врагѡ́въ и҆ междоꙋсо́бныѧ бра́ни. И҆спросѝ, прⷪ҇ро́че бж҃їй, ѿ гдⷭ҇а па́стырємъ на́шимъ ст҃ꙋ́ю ре́вность по бз҃ѣ, серде́чное попече́нїе ѡ҆ сп҃се́нїи пасо́мыхъ, мꙋ́дрость въ ᲂу҆че́нїи и҆ ᲂу҆правле́нїи, бл҃гоче́стїе и҆ крѣ́пость во и҆скꙋше́нїихъ, сꙋдїѧ́мъ и҆спросѝ нелицепрїѧ́тїе и҆ безкоры́стїе, правотꙋ̀ и҆ сострада́нїе къ ѡ҆би̑димымъ, всѣ̑мъ нача́льствꙋющимъ попече́нїе ѡ҆ подчине́нныхъ, млⷭ҇ть и҆ правосꙋ́дїе, подчине́ннымъ же поко́рность и҆ послꙋша́нїе ко власте́мъ и҆ ᲂу҆се́рдное и҆сполне́нїе свои́хъ ѡ҆бѧ́занностей: да, та́кѡ въ ми́ре и҆ бл҃гоче́стїи пожи́вше въ се́мъ вѣ́цѣ, сподо́бимсѧ прича́стїѧ вѣ́чныхъ бл҃гъ въ црⷭ҇твїи гдⷭ҇а и҆ сп҃са на́шегѡ і҆и҃са хрⷭ҇та̀, є҆мꙋ́же подоба́етъ че́сть и҆ поклоне́нїе со безнача́льнымъ є҆гѡ̀ ѻ҆ц҃е́мъ и҆ прест҃ы́мъ дх҃омъ, во вѣ́ки вѣкѡ́въ. а҆ми́нь.

Ѽ вели́кїй и҆ пресла́вный прⷪ҇ро́че бж҃їй и҆лїѐ, ре́вности ра́ди твоеѧ̀ по сла́вѣ гдⷭ҇а бг҃а вседержи́телѧ не терпѣ́вый зрѣ́ти і҆дѡлослꙋжє́нїѧ и҆ нечє́стїѧ сынѡ́въ і҆и҃левыхъ, ѡ҆блича́вый законопрестꙋ́пнагѡ царѧ̀ а҆хаа́ва и҆ въ наказа́нїе тѣ́хъ трилѣ́тнїй гла́дъ на зе́млю і҆и҃левꙋ мл҃твою твое́ю ѿ гдⷭ҇а и҆спроси́вый, да, ѿве́ргше мє́рзкїѧ і҆́дѡлы и҆ ѿстꙋ́пльше ѿ непра́вдъ и҆ беззако́нїй, ѡ҆братѧ́тсѧ ко є҆ди́номꙋ и҆́стинномꙋ бг҃ꙋ и҆ и҆сполне́нїю ст҃ы́хъ є҆гѡ̀ за́повѣдей, вдови́цꙋ саре́птскꙋю въ гла́дѣ пречꙋ́дно препита́вый и҆ сы́на є҆ѧ̀ ᲂу҆ме́рша мл҃твою твое́ю воскреси́вый, по проше́ствїи же пронарече́ннаго вре́мене гла́да, со́бранный на го́рꙋ карми́льскꙋю наро́дъ і҆и҃льскїй въ бг҃оѿстꙋ́пствѣ и҆ нече́стїи ᲂу҆кори́вый, та́же ѻ҆́гнь мл҃твою на же́ртвꙋ твою̀ съ нб҃сѐ и҆спроси́вый и҆ чꙋ́домъ си́мъ і҆и҃лѧ ко гдⷭ҇ꙋ ѡ҆брати́вый, стꙋ̑дныѧ же прорѡ́ки ваа́лѡвы посрами́вый и҆ ᲂу҆мертви́вый, по си́хъ же мл҃твою па́ки не́бо разрѣши́вый и҆ ѻ҆би́льный до́ждь на зе́млю и҆спроси́вый и҆ лю́ди і҆и҃лєвы возвесели́вый! къ тебѣ̀, преди́вный ᲂу҆го́дниче бж҃їй, ᲂу҆се́рднѡ прибѣга́емъ, грѣ́шнїи и҆ смире́ннїи, томи́ми бездо́ждїемъ и҆ зно́емъ: и҆сповѣ́дꙋемъ, ꙗ҆́кѡ недосто́йни є҆смы̀ млⷭ҇ти и҆ бл҃годѣѧ́нїй бж҃їихъ, досто́йни же па́че лю́тыхъ преще́нїй гнѣ́ва є҆гѡ̀, ско́рби же и҆ нꙋ́жды и҆ всѧ́кихъ ѕѡ́лъ и҆ болѣ́зней. Не бо ходи́хомъ въ стра́сѣ бж҃їи и҆ въ пꙋте́хъ за́повѣдей є҆гѡ̀, но въ по́хотѣхъ развраще́нныхъ сердє́цъ на́шихъ и҆ всѧ́кїй ви́дъ грѣха̀ безчи́сленно сотвори́хомъ: беззакѡ́нїѧ на́ша превзыдо́ша главꙋ̀ на́шꙋ, и҆ нѣ́смы досто́йни ꙗ҆ви́тисѧ пред̾ лицѐ бж҃їе и҆ зрѣ́ти на не́бо. И҆сповѣ́дꙋемъ, ꙗ҆́кѡ и҆ мы̀, ꙗ҆́коже дре́внїй і҆и҃ль, ѿстꙋпи́хомъ ѿ гдⷭ҇а бг҃а на́шего, а҆́ще не вѣ́рою, то̀ беззако́ньми на́шими, и҆ а҆́ще не покланѧ́емсѧ ваа́лꙋ и҆ дрꙋги́мъ ме́рзкимъ і҆́дѡлѡмъ, то̀ раболѣ́пствꙋемъ страстє́мъ и҆ похотє́мъ на́шимъ, слꙋжа́ще і҆́дѡлꙋ чревоꙋго́дїѧ и҆ сластолю́бїѧ, і҆́дѡлꙋ корыстолю́бїѧ и҆ честолю́бїѧ, і҆́дѡлꙋ го́рдости и҆ тщесла́вїѧ, и҆ вслѣ́дъ хо́димъ богопроти́внымъ и҆ноплеме́ннымъ ѻ҆бы́чаемъ и҆ поги́бельномꙋ дх҃ꙋ вре́мене. И҆сповѣ́дꙋемъ, ꙗ҆́кѡ сегѡ̀ ра́ди заключи́сѧ не́бо и҆ сотвори́сѧ а҆́ки мѣ́дѧно, ꙗ҆́кѡ заключи́сѧ се́рдце на́ше ѿ млⷭ҇рдїѧ и҆ и҆́стинныѧ любвѐ ко бли́жнемꙋ: сегѡ̀ ра́ди ѡ҆твердѣ̀ землѧ̀ и҆ содѣ́ласѧ безпло́дна, ꙗ҆́кѡ не прино́симъ гдⷭ҇ꙋ на́шемꙋ плодѡ́въ до́брыхъ дѣ́лъ: сегѡ̀ ра́ди нѣ́сть дождѧ̀ и҆ ро́сы, ꙗ҆́кѡ не и҆́мамы сле́зъ ᲂу҆миле́нїѧ и҆ животво́рной ро́сы бг҃омы́слїѧ: сегѡ̀ ра́ди ᲂу҆вѧдѐ всѧ́къ ѕла́къ и҆ трава̀ сє́льнаѧ, ꙗ҆́кѡ и҆́зсше въ на́съ всѧ́кое бл҃го́е чꙋ́вство: сегѡ̀ ра́ди ѡ҆мрачи́сѧ воздꙋ́хъ, ꙗ҆́кѡ ᲂу҆́мъ на́шъ ѡ҆мрачи́сѧ стꙋ́дными помышле́ньми и҆ се́рдце на́ше ѡ҆скверни́сѧ беззако́нными похотѣ́ньми. И҆сповѣ́дꙋемъ, ꙗ҆́кѡ и҆ тебє̀, проро́че бж҃їй, проси́ти мы̀ недосто́йни є҆смы̀. Ты́ бо, подобостра́стенъ бы́въ на́мъ человѣ́къ, а҆́гг҃лѡмъ въ житїѝ твое́мъ ᲂу҆подо́билсѧ є҆сѝ и҆, а҆́ки безпло́тный, на нб҃о восхище́нъ є҆сѝ, мы̀ же стꙋ́дными пѡ́мыслы и҆ дѣѧ́ньми на́шими безсловє́снымъ скотѡ́мъ ᲂу҆подо́бихомсѧ и҆ дꙋ́шꙋ на́шꙋ ꙗ҆́кѡ пло́ть сотвори́хомъ. Ты̀ посто́мъ и҆ бдѣ́нїемъ ᲂу҆диви́лъ є҆сѝ а҆́гг҃лѡвъ и҆ человѣ́кѡвъ, мы̀ же, предаю́щесѧ невоздержа́нїю и҆ сластолю́бїю, скотѡ́мъ несмы́слєннымъ ᲂу҆подоблѧ́емсѧ. Ты̀ преѕѣ́льною ре́вностїю ѡ҆ сла́вѣ бж҃їей вы́нꙋ горѣ́лъ є҆сѝ, мы̀ же небреже́мъ ѡ҆ сла́вѣ на́шегѡ творца̀ и҆ гдⷭ҇а и҆ стыди́мсѧ и҆сповѣ́дывати достопокланѧ́емое и҆́мѧ є҆гѡ̀. Ты̀ нече́стїе и҆ ѕлы̑ѧ ѻ҆бы́чаи и҆скоренѧ́лъ є҆сѝ, мы̀ же ра́бствꙋемъ дх҃ꙋ вѣ́ка сегѡ̀, поставлѧ́юще бг҃опроти́вныѧ ѻ҆бы́чаи мі́ра па́че за́повѣдей бж҃їихъ и҆ ᲂу҆ста́вѡвъ ст҃ы́ѧ цр҃кве. И҆ кі́й грѣ́хъ и҆ непра́вдꙋ не сотвори́хомъ мы̀, ѻ҆каѧ́ннїи; И҆стощи́хомъ беззако́ньми на́шими долготерпѣ́нїе бж҃їе. Тѣ́мже правосꙋ́дный гдⷭ҇ь прогнѣ́васѧ на на́съ и҆ во гнѣ́вѣ свое́мъ наказа̀ на́съ. Ѡ҆ба́че вѣ́дꙋще ве́лїе дерзнове́нїе твоѐ пред̾ гдⷭ҇емъ и҆ надѣ́ющесѧ на любо́вь твою̀ къ ро́дꙋ человѣ́ческомꙋ, дерза́емъ моли́ти тѧ̀, прехва́льне прⷪ҇ро́че: млⷭ҇тивъ бꙋ́ди къ на́мъ, недостѡ́йнымъ и҆ непотрє́бнымъ. Оу҆молѝ великодарови́таго и҆ всеще́драго бг҃а, да не до конца̀ прогнѣ́ваетсѧ на ны̀ и҆ не погꙋби́тъ на́съ со беззако́ньми на́шими, но да низпо́слетъ на жа́ждꙋщꙋю и҆ и҆зсо́хшꙋю зе́млю до́ждь ѻ҆би́льный и҆ ми́рный, да да́рꙋетъ є҆́й плодоно́сїе и҆ бл҃горастворе́нїе воздꙋ́ха. преклонѝ дѣ́йственнымъ твои́мъ хода́тайствомъ на млⷭ҇ть цр҃ѧ̀ нбⷭ҇наго, а҆́ще не ра́ди на́съ, грѣ́шныхъ и҆ скве́рныхъ, но ра́ди и҆збра́нныхъ рабѡ́въ є҆гѡ̀, не преклони́вшихъ колѣ̑на своѧ̑ пред̾ ваа́ломъ мі́ра сегѡ̀, ра́ди неѕло́бивыхъ и҆ несмы́сленныхъ младе́нцєвъ, ра́ди безслове́сныхъ скотѡ́въ и҆ пти́цъ нбⷭ҇ныхъ, стра́ждꙋщихъ за на̑ша беззакѡ́нїѧ и҆ и҆стаева́ющихъ ѿ гла́да, зно́ѧ и҆ жа́жды. И҆спросѝ на́мъ твои́ми бл҃гопрїѧ́тными мл҃твами ѿ гдⷭ҇а дꙋ́хъ покаѧ́нїѧ и҆ серде́чнагѡ ᲂу҆миле́нїѧ, дꙋ́хъ кро́тости и҆ воздержа́нїѧ, дꙋ́хъ любвѐ и҆ терпѣ́нїѧ, дꙋ́хъ стра́ха бж҃їѧ и҆ бл҃гоче́стїѧ, да та́кѡ, возврати́вшесѧ ѿ стезе́й нече́стїѧ на пра́вый пꙋ́ть добродѣ́тели, хо́димъ во свѣ́те за́повѣдей бж҃їихъ и҆ дости́гнемъ ѡ҆бѣтова́нныхъ на́мъ бл҃ги́хъ, бл҃говоле́нїемъ безнача́льнаго бг҃а ѻ҆ц҃а̀, чл҃вѣколю́бїемъ є҆диноро́днагѡ сн҃а є҆гѡ̀ и҆ бл҃года́тїю всест҃а́гѡ дх҃а, ны́нѣ, и҆ при́снѡ, и҆ во вѣ́ки вѣкѡ́въ. а҆ми́нь.