Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ въ че́сть є҆ѧ̀ і҆кѡ́ны, и҆менꙋ́емыѧ ѻ҆рша́нскаѧ.

Оршанской (1631) Чухломской, или Галичской (1350), и Абалацкой ("Знамение") (1637) икон Божией Матери 2 августа 2026

Конда́къ а҃

И҆збра́ннѣй ѿ сложе́нїѧ мі́ра предвѣ́чнымъ бг҃омъ и҆ цр҃е́мъ на сп҃се́нїе ро́да человѣ́ческагѡ, ꙗ҆́кѡ вои́стиннꙋ и҆зба́вльшей на́съ ѿ всѧ́кагѡ ѕла̀, бцⷣѣ бл҃года́рственнꙋю пѣ́снь пое́мъ: и҆́мать бо дерзнове́нїе ко всемлⷭ҇тивомꙋ влⷣцѣ ѿ всѧ́кихъ на́съ бѣ́дъ свобожда́ти. Сегѡ̀ ра́ди, сла́вѧще пречꙋ́дное ꙗ҆вле́нїе ст҃ы́ѧ і҆кѡ́ны є҆ѧ̀, зове́мъ є҆́й:

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

І҆́косъ а҃

А҆́гг҃лѡвъ ст҃ы́хъ со́нми, ви́дѧще близ̾ дре́внѧгѡ гра́да ѻ҆́рши пресла́вное чꙋдотво́рныѧ і҆кѡ́ны твоеѧ̀ ꙗ҆вле́нїе, восхвалѧ́ютъ тѧ̀, бцⷣе, и҆ мы̀ грѣ́шнїи, зрѧ́ще толи́кꙋю млⷭ҇ть твою̀ на на́съ, со ᲂу҆миле́нїемъ дерзнове́ннѡ тебѣ̀ вопїе́мъ:

Ра́дꙋйсѧ, гра́да ѻ҆́рши просвѣще́нїе: ра́дꙋйсѧ, всегѡ̀ мі́ра сп҃се́нїе.

Ра́дꙋйсѧ, ѿпа́дшихъ ѿ вѣ́ры правосла́вныѧ воста́нїе: ра́дꙋйсѧ, є҆ресе́й погꙋбле́нїе.

Ра́дꙋйсѧ, бжⷭ҇твеннагѡ свѣ́та ѡ҆заре́нїе: ра́дꙋйсѧ, къ тебѣ̀ прибѣга́ющымъ покро́ве.

Ра́дꙋйсѧ, сле́зъ на́шихъ и҆збавле́нїе: ра́дꙋйсѧ, ꙗ҆́кѡ ѿ тебє̀ никто́же то́щъ и҆ неꙋтѣ́шенъ ѿи́де.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ в҃

Ви́дѣ, прест҃а́ѧ, лю́ди правосла̑вныѧ землѝ ѻ҆рша́нскїѧ, въ ско́рбехъ и҆ печа́лехъ къ тебѣ̀ прибѣга́ющыѧ, застꙋпле́нїѧ твоегѡ̀ и҆́щꙋщыѧ, и҆ просѧ́щыѧ тѧ̀ ѿ ѕлочести́выхъ є҆ретїкѡ́въ и҆̀хъ и҆зба́вити. И҆ дарова́ла є҆сѝ и҆̀мъ ми́ръ и҆ въ вѣ́рѣ ᲂу҆крѣпле́нїе, да всѝ вѣ́рнїи, вѣ́дꙋще сїѧ̑, бг҃ꙋ воспою́тъ: А҆ллилꙋ́їа.

І҆́косъ в҃

Ра́зꙋмъ неꙋразꙋмѣ́нный чꙋ́да твоегѡ̀, бцⷣе, лю́дїе правосла́внїи разꙋмѣ́ти жела́ютъ, ка́кѡ ꙗ҆ви́ла є҆сѝ і҆кѡ́нꙋ твою̀ ст҃ꙋ́ю близ̾ пресла́вныѧ ѻ҆би́тели кꙋте́инскїѧ, и҆́нокѡмъ въ поможе́нїе и҆ всѣ̑мъ вѣ̑рнымъ во сп҃се́нїе. Сегѡ̀ ра́ди и҆ мы̀, млⷭ҇ть твою̀ къ на́мъ, бцⷣе, прославлѧ́юще, пое́мъ тѝ такова̑ѧ:

Ра́дꙋйсѧ, ѡ҆би̑димымъ застꙋпле́нїе: ра́дꙋйсѧ, гони́телємъ вѣ́рныхъ ѡ҆бличе́нїе.

Ра́дꙋйсѧ, и҆́нокѡмъ прибѣ́жище: ра́дꙋйсѧ, сщ҃е́нникѡмъ весе́лїе.

Ра́дꙋйсѧ, лю́демъ правосла̑внымъ попече́нїе: ра́дꙋйсѧ, ᲂу҆бѡ́гимъ ра́дованїе.

Ра́дꙋйсѧ, скорбѧ́щымъ ᲂу҆пова́нїе: ра́дꙋйсѧ, припа́дающымъ къ і҆кѡ́нѣ твое́й въ напа́стехъ ᲂу҆крѣпле́нїе.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ г҃

Си́ла свы́ше ѡ҆блечѐ лю́ди правосла̑вныѧ, взира́вшыѧ, бцⷣе, на ѻ҆́бразъ тво́й ст҃ы́й, є҆го́же полꙋчи́ша ѿ тебє̀ ꙗ҆́кѡ ве́лїю ст҃ы́ню въ по́мощь и҆ застꙋпле́нїе, тѣ́мже и҆́мѧ твоѐ просла́виша и҆ бг҃ꙋ воспѣ́ша: А҆ллилꙋ́їа.

І҆́косъ г҃

И҆мꙋ́щи, прест҃а́ѧ, попече́нїе ѡ҆ ст҃ѣ́й ѻ҆би́тели кꙋте́инстѣй, восхотѣ̀ ᲂу҆стро́ити та́мѡ ла́ѵрꙋ ве́лїю, да ꙗ҆ви́тсѧ та̀ покро́въ и҆ прибѣ́жище всѣ̑мъ правосла̑внымъ, да и҆́ноцы смире́ннїи, пред̾ пречⷭ҇тымъ твои́мъ ѻ҆́бразомъ въ не́й молѧ́щїисѧ, взыва́ютъ тебѣ̀ си́це:

Ра́дꙋйсѧ, пред̾ бг҃омъ за на́съ предста́тельствꙋющаѧ: ра́дꙋйсѧ, на пꙋ́ть пра́вый наставлѧ́ющаѧ.

Ра́дꙋйсѧ, страсте́й свобожда́ющаѧ: ра́дꙋйсѧ, ти́хостїю дꙋ́шы на́шѧ и҆сполнѧ́ющаѧ.

Ра́дꙋйсѧ, и҆з̾ глꙋбины̀ грѣхо́вныѧ возведе́нїе: ра́дꙋйсѧ, ѿ напра́сныѧ сме́рти спасе́нїе.

Ра́дꙋйсѧ, а҆́гг҃лѡвъ велича́нїе: ра́дꙋйсѧ, бѣсѡ́въ прогна́нїе.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ д҃

Бꙋ́рю внꙋ́трь и҆мѣ́ѧ помышле́нїй сꙋмни́тельныхъ, печа́тникъ спѷрїдѡ́нъ притечѐ ко ѻ҆́бразꙋ твоемꙋ̀, бцⷣе, просѧ̀ по́мощи твоеѧ̀ и҆ ᲂу҆тѣше́нїѧ: прїѧ́въ же ѿ тебє̀ крѣ́пость на трꙋды̀ своѧ̑, влⷣчце, бг҃ꙋ возопѝ: А҆ллилꙋ́їа.

І҆́косъ д҃

Слы́шаще гони́телїе вѣ́ры правосла́вныѧ, ꙗ҆́кѡ сама̀ влⷣчца ꙗ҆вѝ і҆кѡ́нꙋ свою̀ ст҃ꙋ́ю въ застꙋпле́нїе вѣ̑рнымъ, ᲂу҆боѧ́шасѧ ѕѣлѡ̀, не смѣ́юще же нико́егѡ ѕла̀ сотвори́ти ѻ҆би́тели кꙋте́инстѣй, ѿстꙋпи́ша ѿ неѧ̀. Мы́ же дивѧ́щесѧ таково́мꙋ попече́нїю твоемꙋ̀ ѡ҆ и҆́ноцѣхъ правосла́вныхъ, пое́мъ тѝ си́це:

Ра́дꙋйсѧ, тишинꙋ̀ и҆ ми́ръ подава́ющаѧ: ра́дꙋйсѧ, напа́стей прило́ги ѿгонѧ́ющаѧ.

Ра́дꙋйсѧ, чернецє́мъ смирє́ннымъ покро́ве: ра́дꙋйсѧ, ѻ҆би́телемъ правосла̑внымъ ᲂу҆твержде́нїе.

Ра́дꙋйсѧ, ѿ ѕлодѣ́йствїѧ сꙋпоста̑тъ ѡ҆гражда́ющаѧ: ра́дꙋйсѧ, ѿ сме́рти и҆ тлѝ на́съ сп҃са́ющаѧ.

Ра́дꙋйсѧ, въ ско́рбехъ лю́тыхъ ᲂу҆тѣше́нїе: ра́дꙋйсѧ, въ гоне́нїихъ вра́жескихъ защище́нїе.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ є҃

Бг҃оте́чнаѧ ѕвѣзда̀ и҆ покро́въ ꙗ҆ви́ласѧ є҆сѝ, бцⷣе, всѣ̑мъ, притека́ющымъ ко ст҃ѣ́й і҆кѡ́нѣ твое́й ѻ҆рша́нстѣй, ꙗ҆́кѡ свѣти́ло свѣтоза́рное во тьмѣ̀ є҆ресе́й возсїѧ́вшей, да и҆ на́съ грѣ́шныхъ, на тꙋ̀ взира́ющихъ, бг҃ꙋ наꙋчи́ши взыва́ти: А҆ллилꙋ́їа.

І҆́косъ є҃

Ви́дѣ прпⷣбный а҆ѳана́сїй, ꙗ҆́кѡ въ годи́нꙋ лю́тꙋю никто́же ѿ человѣ̑къ возмо́же помощѝ є҆мꙋ̀, но то́чїю ѿ тебє̀, влⷣчце, ча́ѧ по́мощи, возложѝ на тѧ̀ всѐ ᲂу҆пова́нїе своѐ: полꙋчи́въ же ѿвѣ́тъ бл҃гопрїѧ́тенъ, та́кѡ воспросла́ви и҆́мѧ твоѐ:

Ра́дꙋйсѧ, мі́рови прибѣ́жище: ра́дꙋйсѧ, млⷭ҇ти и҆сто́чниче.

Ра́дꙋйсѧ, застꙋпле́нїѧ ᲂу҆ тебє̀ и҆́щꙋщымъ стѣно̀: ра́дꙋйсѧ, въ жите́йстѣмъ мо́ри пла́вающымъ приста́нище.

Ра́дꙋйсѧ, бл҃года́тнагѡ ми́ра пода́нїе: ра́дꙋйсѧ, ѿ напа́стей ѡ҆гражде́нїе.

Ра́дꙋйсѧ, мглꙋ̀ дꙋ́шъ на́шихъ ѡ҆зарѧ́ющаѧ: ра́дꙋйсѧ, нетлѣ́ннꙋю бл҃года́ть да́рꙋющаѧ.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ ѕ҃

Проповѣ́дꙋетъ ѻ҆би́тель кꙋте́инскаѧ чꙋдеса̀ твоѧ̑, бцⷣе, ѿ ст҃ы́ѧ і҆кѡ́ны твоеѧ̀ и҆стека̑ющаѧ, ты́ бо ѡ҆зари́ла є҆сѝ свѣ́томъ правосла́вїѧ всѧ̑ зе́мли бѣ́лыѧ рꙋсѝ, попра́вши хитросплетє́нїѧ вра̑жїѧ. Та́кѡ и҆ на́шѧ дꙋ́шы ѡ҆зарѝ свѣ́томъ любвѐ твоеѧ̀, да и҆ мы̀ под̾ ѡ҆мофо́ромъ твои́мъ чтⷭ҇ны́мъ просла́вимъ бг҃а, вопїю́ще є҆мꙋ̀: А҆ллилꙋ́їа.

І҆́косъ ѕ҃

Возсїѧ̀ па́ки свѣ́тъ і҆кѡ́ны твоеѧ̀, бцⷣе, є҆гда̀ бл҃говоли́ла є҆сѝ подо́бїю пречꙋ́днагѡ ѻ҆́браза твоегѡ̀ написа́тисѧ длѧ ѻ҆рша́нскїѧ же́нскїѧ ѻ҆би́тели ст҃а́гѡ ᲂу҆спе́нїѧ, да и҆́нѡкини правосла̑вныѧ, зрѧ́ще на ли́къ тво́й ст҃ы́й, взыва́ютъ тебѣ̀ си́це:

Ра́дꙋйсѧ, и҆́ночествꙋющымъ ᲂу҆крѣпле́нїе: ра́дꙋйсѧ, вдови́цъ пра́ведныхъ ᲂу҆тѣше́нїе.

Ра́дꙋйсѧ, дѣ́вамъ цѣломꙋ́дрєннымъ похвало̀: ра́дꙋйсѧ, всѣ̑мъ вѣ̑рнымъ покро́ве.

Ра́дꙋйсѧ, пла́мень страсте́й ᲂу҆гаша́ющаѧ: ра́дꙋйсѧ, ᲂу҆́мъ на́шъ просвѣща́ющаѧ.

Ра́дꙋйсѧ, цр҃ѧ̀ превѣ́чнагѡ мт҃и: ра́дꙋйсѧ, чⷭ҇тоты̀ неꙋвѧда́емый цвѣ́те.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ з҃

Хотѧ́щи просла́вити ᲂу҆го́дника твоего̀ прпⷣбнаго а҆ѳана́сїа, да по́двигомъ мч҃нческимъ стѧ́жетъ вѣне́цъ ѿ гдⷭ҇а, ᲂу҆пра́вила є҆сѝ є҆го̀ въ кꙋпѧ́тицкїй монасты́рь, бцⷣе, и҆дѣ́же гдⷭ҇ꙋ рабо́таше, и҆́мѧ твоѐ прославлѧ́ше и҆ бг҃ꙋ вы́нꙋ взыва́ше: А҆ллилꙋ́їа.

І҆́косъ з҃

Ди́внаго, прест҃а́ѧ, ꙗ҆ви́ла є҆сѝ свѣти́льника землѝ бѣлорꙋ́сской, прпⷣбнаго а҆ѳана́сїа, застꙋ́пника и҆ мл҃твенника за на́съ недосто́йныхъ, да и҆ мы̀, зрѧ́ще таковꙋ́ю твою̀ млⷭ҇ть къ лю́демъ правосла̑внымъ, и҆ чл҃вѣколю́бїе твоѐ восхвалѧ́юще, воспое́мъ тебѣ̀ си́це:

Ра́дꙋйсѧ, бл҃года́ти и҆сто́чниче: ра́дꙋйсѧ, ѡ҆ мі́рѣ на́шемъ хода́таице.

Ра́дꙋйсѧ, млⷭ҇рдїѧ бе́здно: ра́дꙋйсѧ, прпⷣбныхъ сла́во.

Ра́дꙋйсѧ, ѻ҆́гненнагѡ мꙋче́нїѧ на́съ свобожда́ющаѧ: ра́дꙋйсѧ, нача́льника мыта́рствъ дале́че ѿгонѧ́ющаѧ.

Ра́дꙋйсѧ, на́съ ѿ клѧ́твы и҆збавлѧ́ющаѧ: ра́дꙋйсѧ, пла́чь на́шъ въ ра́дость претворѧ́ющаѧ.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ и҃

Стра́нное зри́мъ чꙋ́до, бцⷣе, ка́кѡ трꙋды̀ є҆ретїкѡ́въ тщє́тны сотвори́ла є҆сѝ и҆ печа́тникꙋ спѷрїдѡ́нꙋ дꙋ́хъ мꙋ́дрости дарова́ла є҆сѝ, сегѡ̀ ра́ди то́й трꙋда́ми свои́ми всѧ̑ зе́мли бѣлорꙋ̑сскїѧ премꙋ́дростїю кни́жною и҆спо́лни, и҆ бг҃а просла́ви, глаго́лѧ: А҆ллилꙋ́їа.

І҆́косъ и҃

Ве́сь гра́дъ дре́внїй ѻ҆́рша, чꙋ́дною і҆кѡ́ною твое́ю ѡ҆сѣнѧ́емый, бы́сть вои́стиннꙋ стѣна̀ и҆ прибѣ́жище правосла̑внымъ, влⷣчце, къ тебѣ́ бо притека́ющымъ застꙋпле́нїе была̀ є҆сѝ, и҆ на́мъ недостѡ́йнымъ, взира́ющымъ на ѻ҆́бразъ тво́й, бцⷣе, покро́въ бꙋ́ди и҆ ᲂу҆тѣше́нїе, да и҆ мы̀, ꙗ҆́коже ст҃ы́й а҆ѳана́сїй и҆ печа́тникъ спѷрїдѡ́нъ, восхва́лимъ и҆́мѧ твоѐ пребл҃го́е та́кѡ:

Ра́дꙋйсѧ, всечтⷭ҇ны́й черто́же бж҃їй: ра́дꙋйсѧ, мт҃и, вы́шшаѧ нб҃съ.

Ра́дꙋйсѧ, грѣхо́внꙋю печа́ль потреблѧ́ющаѧ: ра́дꙋйсѧ, и҆сцѣле́нїй бога́тство и҆злива́ющаѧ.

Ра́дꙋйсѧ, сокро́вище сп҃се́нїѧ: ра́дꙋйсѧ, и҆сто́чниче нетлѣ́нїѧ.

Ра́дꙋйсѧ, горо̀ несѣко́маѧ, ю҆́же данїи́лъ прови́дѣ: ра́дꙋйсѧ, же́зле пречтⷭ҇ны́й, є҆го́же и҆са́їа проречѐ.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ ѳ҃

Всѧ̑кїѧ и҆сцѣлѝ болѣ̑зни, и҆ печа́ли го́рькїѧ и҆зба́ви на́съ, бцⷣе, ᲂу҆се́рднѡ молѧ́щихсѧ пред̾ чꙋдотво́рнымъ ѻ҆́бразомъ твои́мъ, вѣ́си бо скѡ́рби на́шѧ, пречⷭ҇таѧ. Бꙋ́ди на́мъ по́мощь и҆ прибѣ́жище нерꙋши́мое, да сподо́бившесѧ млⷭ҇тей ѿ тебє̀, пребл҃га́ѧ, и҆́мѧ твоѐ просла́вимъ и҆ бг҃ꙋ возопїе́мъ: А҆ллилꙋ́їа.

І҆́косъ ѳ҃

Вѣті̑и лжемꙋ́дреннїи, ви́дѧще чꙋдеса̀, ѿ і҆кѡ́ны твоеѧ̀, прест҃а́ѧ, и҆сходѧ̑щаѧ, недоꙋмѣва́ютъ, ка́кѡ хитросплетє́нїѧ и҆́хъ растерза́вши, лю́демъ правосла̑внымъ ми́ръ и҆ безмѧте́жїе подала̀ є҆сѝ. Мы́ же твоемꙋ̀ промышле́нїю ѡ҆ на́съ, бцⷣе, чꙋдѧ́щесѧ, воспѣва́емъ тѝ си́це:

Ра́дꙋйсѧ, дре́внюю клѧ́твꙋ разрꙋши́вшаѧ: ра́дꙋйсѧ, є҆реті́ческое лжемꙋ́дрїе ѡ҆бличи́вшаѧ.

Ра́дꙋйсѧ, храни́тельнице живота̀ на́шегѡ: ра́дꙋйсѧ, две́ре, є҆́юже про́йде хрⷭ҇то́съ.

Ра́дꙋйсѧ, ка́ющымсѧ проще́нїе: ра́дꙋйсѧ, недꙋ́гꙋющымъ и҆сцѣле́нїе.

Ра́дꙋйсѧ, па́дшымъ воста́нїе: ра́дꙋйсѧ, погиба́ющымъ ᲂу҆пова́нїе.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ і҃

Сп҃стѝ хотѧ̀ лю́ди твоѧ̑, бцⷣе, ѿ є҆реті́ческагѡ ѕлосмра́дїѧ, ꙗ҆ви́ла є҆сѝ на́мъ ѻ҆́бразъ тво́й чꙋдотво́рный, млⷭ҇ти вѣ̑рныѧ и҆сполнѧ́ющїй, нече́стїе же вра́жїе ѡ҆палѧ́ющїй, и҆ всѣ̑мъ лю́демъ правосла̑внымъ да́рꙋющїй бл҃гопрїѧ́тнѡ пѣ́ти бг҃ꙋ: А҆ллилꙋ́їа.

І҆́косъ і҃

Стѣна̀ є҆сѝ похвалѧ́ющымъ чꙋдеса̀ твоѧ̑, бцⷣе, и҆ покро́въ всѣ̑мъ, ко бл҃гоꙋтро́бїю твоемꙋ̀ прибѣга́ющымъ, тѣ́мже и҆ мы̀, недосто́йнїи рабѝ твоѝ, прест҃а́ѧ, вѣ́дꙋще промышле́нїе твоѐ ѡ҆ на́съ, мо́лимъ ѡ҆ хода́тайствѣ твое́мъ пред̾ сн҃омъ є҆диноро́днымъ, да стѧжа́вше сп҃се́нїе дꙋша́мъ на́шымъ, съ любо́вїю воспое́мъ тебѣ̀ сицева̑ѧ:

Ра́дꙋйсѧ, помо́щнице на́ша неѡбори́маѧ: ра́дꙋйсѧ, мл҃твеннице на́ша неꙋсыпа́емаѧ.

Ра́дꙋйсѧ, ѡ҆кормле́нїе въ ю҆́ности: ра́дꙋйсѧ, же́зле въ ста́рости.

Ра́дꙋйсѧ, ѿ тѧ́жкихъ и҆ лю́тыхъ грѣхѡ́въ сп҃са́ющаѧ: ра́дꙋйсѧ, неможе́нїе дꙋ́шъ на́шихъ и҆сцѣлѧ́ющаѧ.

Ра́дꙋйсѧ, ѿ прило́гѡвъ дїа́вольскихъ и҆збавлѧ́ющаѧ: ра́дꙋйсѧ, всѧ̑ бл҃га̑ѧ твори́ти на́мъ подава́ющаѧ.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ а҃і

Пѣ́нїе ᲂу҆миле́нное прино́симъ тѝ, ѽ мт҃и на́ша, вѣ́дꙋще тѧ̀ застꙋ́пницꙋ ро́да хрⷭ҇тїа́нскагѡ, да́рꙋющꙋю на́мъ ᲂу҆пова́нїе и҆ любо́вїю напоѧ́ющꙋю сердца̀ на̑ша. Ты́ же и҆мꙋ́щи дерзнове́нїе ко гдⷭ҇ꙋ бг҃ꙋ, всеѧ̀ тва́ри содѣ́телю, не преста́й моли́тисѧ ѡ҆ на́съ пред̾ прⷭ҇то́ломъ влⷣчнимъ, да поми́лꙋетъ всѣ́хъ, вопїю́щихъ є҆мꙋ̀: А҆ллилꙋ́їа.

І҆́косъ а҃і

Свѣтоза́рное свѣти́ло і҆кѡ́на твоѧ̀, ѽ пречⷭ҇таѧ дв҃о, бы́сть на́мъ: то́ю бо бжⷭ҇твеннымъ свѣ́томъ ᲂу҆́мъ на́шъ просвѣща́еши, и҆ тьмꙋ̀ є҆реті́ческїѧ пре́лести ѿгонѧ́еши, всѣ̑мъ же вѣ̑рнымъ ми́ръ, ра́зꙋмъ и҆ въ вѣ́рѣ ᲂу҆крѣпле́нїе да́рꙋеши, вопїю́щымъ къ тебѣ̀ такова̑ѧ:

Ра́дꙋйсѧ, свѣ́томъ бжⷭ҇твеннымъ на́съ ѡ҆сїѧва́ющаѧ: ра́дꙋйсѧ, ра́достїю сердца̀ на̑ша и҆сполнѧ́ющаѧ.

Ра́дꙋйсѧ, мра́къ невѣ́денїѧ ѿгонѧ́ющаѧ: ра́дꙋйсѧ, и҆з̾ нездра́вїѧ во здра́вїе претворѧ́ющаѧ.

Ра́дꙋйсѧ, две́ре вседꙋше́внагѡ покаѧ́нїѧ: ра́дꙋйсѧ, дꙋ́шъ всесоверше́нное сп҃се́нїе.

Ра́дꙋйсѧ, невозбра́нное ѿ землѝ на нб҃о преселе́нїе: ра́дꙋйсѧ, на нб҃сѣ́хъ на́ше ѡ҆правда́нїе.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ в҃і

Бл҃года́ти и҆сто́чникъ бы́сть на́мъ ѻ҆́бразъ тво́й прест҃ы́й, влⷣчце, ѿ скорбе́й и҆збавлѧ́ѧй и҆ на покаѧ́нїе на́съ призыва́ѧй, да зрѧ́ще на пречⷭ҇тый ли́къ тво́й, ѡ҆чи́стимсѧ ѿ скве́рны дꙋхо́вныѧ, и҆ и҆спро́симъ ᲂу҆ великодарови́тагѡ бг҃а всѣ̑мъ долгѡ́мъ на́шымъ ѿпꙋще́нїе, въ чистотѣ̀ и҆ ст҃ости поживе́мъ и҆ и҆́мѧ є҆гѡ̀ просла́вимъ, въ ра́дости глаго́люще: А҆ллилꙋ́їа.

І҆́косъ в҃і

Пою́ще твоѧ̑ чꙋдеса̀, прославлѧ́емъ и҆́мѧ твоѐ, бцⷣе, и҆мꙋ́ще бо тѧ̀ застꙋ́пницꙋ ᲂу҆се́рднꙋю, ѿ неѧ́же са́мъ бг҃ъ воплоти́сѧ и҆ сп҃се́нїе всѣ̑мъ вѣ̑рнымъ дарова̀, взира́емъ на ѻ҆́бразъ тво́й ст҃ы́й, влⷣчце, и҆ со ᲂу҆миле́нїемъ воспѣва́емъ тѝ си́це:

Ра́дꙋйсѧ, роди́тельнице неискꙋсомꙋ́жнаѧ сн҃а превѣ́чнагѡ: ра́дꙋйсѧ, прїѧ́телище непоро́чное дх҃а ст҃а́гѡ.

Ра́дꙋйсѧ, ра́дости хода́таице всемꙋ̀ мі́рꙋ: ра́дꙋйсѧ, свѣтоно́снаѧ сѣ́не нбⷭ҇наѧ.

Ра́дꙋйсѧ, вре́меннымъ наказа́нїемъ невѣ̑жды ᲂу҆мꙋдрѧ́ющаѧ: ра́дꙋйсѧ, согрѣша́ющихъ покаѧ́нїе млⷭ҇тивѡ прїе́млющаѧ.

Ра́дꙋйсѧ, воздыха́нїй на́шихъ ᲂу҆слы́шанїе: ра́дꙋйсѧ, въ ча́съ и҆спыта́нїй на́ше застꙋпле́нїе.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ г҃і

Ѽ преди́внаѧ мт҃и, всѣ́хъ ст҃ы́хъ ст҃ѣ́йшаѧ, пребл҃гослове́ннаѧ влⷣчце на́ша бцⷣе, ны́нѣшнее на́ше прїимѝ моле́нїе, и҆ ѿ всѧ́кагѡ ѕла́гѡ ѡ҆бстоѧ́нїѧ на́съ и҆зба́ви, и҆ ѿ тьмы̀ и҆зведѝ, да ᲂу҆зрѣ́вше свѣ́тъ неизрече́нный сн҃а твоегѡ̀, и҆́мѧ твоѐ просла́вимъ и҆ бг҃ꙋ воспое́мъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ ст҃ы́хъ со́нми, ви́дѧще близ̾ дре́внѧгѡ гра́да ѻ҆́рши пресла́вное чꙋдотво́рныѧ і҆кѡ́ны твоеѧ̀ ꙗ҆вле́нїе, восхвалѧ́ютъ тѧ̀, бцⷣе, и҆ мы̀ грѣ́шнїи, зрѧ́ще толи́кꙋю млⷭ҇ть твою̀ на на́съ, со ᲂу҆миле́нїемъ дерзнове́ннѡ тебѣ̀ вопїе́мъ:

Ра́дꙋйсѧ, гра́да ѻ҆́рши просвѣще́нїе: ра́дꙋйсѧ, всегѡ̀ мі́ра сп҃се́нїе.

Ра́дꙋйсѧ, ѿпа́дшихъ ѿ вѣ́ры правосла́вныѧ воста́нїе: ра́дꙋйсѧ, є҆ресе́й погꙋбле́нїе.

Ра́дꙋйсѧ, бжⷭ҇твеннагѡ свѣ́та ѡ҆заре́нїе: ра́дꙋйсѧ, къ тебѣ̀ прибѣга́ющымъ покро́ве.

Ра́дꙋйсѧ, сле́зъ на́шихъ и҆збавле́нїе: ра́дꙋйсѧ, ꙗ҆́кѡ ѿ тебє̀ никто́же то́щъ и҆ неꙋтѣ́шенъ ѿи́де.

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Конда́къ а҃

И҆збра́ннѣй ѿ сложе́нїѧ мі́ра предвѣ́чнымъ бг҃омъ и҆ цр҃е́мъ на сп҃се́нїе ро́да человѣ́ческагѡ, ꙗ҆́кѡ вои́стиннꙋ и҆зба́вльшей на́съ ѿ всѧ́кагѡ ѕла̀, бцⷣѣ бл҃года́рственнꙋю пѣ́снь пое́мъ: и҆́мать бо дерзнове́нїе ко всемлⷭ҇тивомꙋ влⷣцѣ ѿ всѧ́кихъ на́съ бѣ́дъ свобожда́ти. Сегѡ̀ ра́ди, сла́вѧще пречꙋ́дное ꙗ҆вле́нїе ст҃ы́ѧ і҆кѡ́ны є҆ѧ̀, зове́мъ є҆́й:

Ра́дꙋйсѧ, премлⷭ҇тиваѧ влⷣчце, ѻ҆рша́нскаѧ похвало̀ и҆ всѣ̑мъ вѣ̑рнымъ ᲂу҆тѣше́нїе.

Моли́твы

Ѽ пребл҃гослове́ннаѧ влⷣчце на́ша бцⷣе! Вы́шшаѧ нб҃съ и҆ всѧ̑ гѡ́рнѧѧ вѡ́инства превосходѧ́щаѧ, прострѝ рꙋ́кꙋ твою̀ держа́внꙋю на на́съ, недосто́йныхъ ра̑бъ твои́хъ, и҆ сохранѝ ми́ръ и҆ безмѧте́жїе въ лю́дехъ правосла́вныхъ, сщ҃е́нники бл҃гословѝ, мона́хи защитѝ, лю́ди всѧ̑ ᲂу҆мирѝ, во́инство же ᲂу҆крѣпѝ, гра́дъ се́й соблюдѝ, и҆ на́съ всѣ́хъ, молѧ́щихсѧ тебѣ̀ пред̾ пречⷭ҇тымъ ѻ҆́бразомъ твои́мъ, покры́й свои́мъ чл҃вѣколю́бїемъ. И҆ ꙗ҆́коже дре́вле дарова́ла є҆сѝ ѻ҆би́тели кꙋте́инстѣй и҆ всемꙋ̀ гра́дꙋ ѻ҆́рши ѿ є҆реті́ческагѡ ѕлово́нїѧ и҆збавле́нїе, та́кѡ и҆ ны́нѣ и҆зба́ви на́съ ѿ всѧ́кїѧ скве́рны дꙋхо́вныѧ. И҆ ꙗ҆́коже не ѡ҆ста́вила є҆сѝ прпⷣбнаго а҆ѳана́сїа въ годи́нꙋ тѧ́жкꙋю, та́кѡ и҆ на́съ, малодꙋ́шныхъ, во вре́мѧ скорбе́й на́шихъ не ѡ҆ста́ви, влⷣчце, но бꙋ́ди на́мъ всѣ̑мъ ѿра́да и҆ ᲂу҆тѣше́нїе. Да сподо́бившесѧ млⷭ҇ти твоеѧ̀, полꙋчи́мъ грѣхѡ́въ на́шихъ ѡ҆ставле́нїе и҆ житїѧ̀ на́шегѡ и҆справле́нїе. Ты́ бо є҆сѝ мт҃и на́ша и҆ застꙋ́пница, немощны́хъ си́ла и҆ малодꙋ́шныхъ крѣ́пость! Ты̀ на́ше ᲂу҆пова́нїе и҆ покро́въ! И҆сцѣлѝ на́съ ѿ всѧ́кїѧ болѣ́зни дꙋше́вныѧ и҆ тѣле́сныѧ, да́рꙋй на́мъ, дв҃о пребл҃га́ѧ, въ житїѝ на́шемъ тишинꙋ̀ и҆ поко́й. И҆ сподо́би ны̀, є҆гда̀ ꙗ҆ви́тсѧ сꙋдїѧ̀ вселе́ннѣй во второ́мъ прише́ствїи свое́мъ, вни́ти въ нбⷭ҇ное црⷭ҇тво, и҆дѣ́же всѝ ст҃і́и прославлѧ́ютъ въ трⷪ҇цѣ сла́вимаго бг҃а, ѻ҆ц҃а̀, и҆ сн҃а, и҆ ст҃а́го дх҃а, и҆ твоѐ млⷭ҇тивое предста́тельство, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.