Кондак 1
Избра́нней Предве́чным Царе́м в на́ше ве́рных спасе́ние Небесе́ и земли́ Цари́це благода́рственную похвалу́ прино́сим Ти́, Богоро́дице. Ты́ же, я́ко иму́щая милосе́рдие неизрече́нное, от вся́ких на́с бе́д свободи́ и ко спасе́нию наста́ви, да зове́м Ти́:
Ра́дуйся, Влады́чице, ми́лостивая пред Бо́гом Засту́пнице.
Икос 1
А́нгельскими усты́ подоба́ет сла́вити Тя́, Влады́чице Богоро́дице, я́ко нача́тки просвеще́ния христиа́нскаго в земли́ Сиби́рстей освяти́ла еси́ явле́нием Свои́м, Свята́я Де́во. Изво́лила еси́ благочести́вей вдови́це Мари́и откры́ти во́лю Свою́, е́же хра́м воздви́гнути для спасе́ния люде́й, пою́щих Тебе́ такова́я:
Ра́дуйся, ми́ра от пути́ поги́бельнаго обраще́ние; ра́дуйся, Це́ркве Христо́вы прославле́ние.
Ра́дуйся, пра́ведных духо́вное весе́лие; ра́дуйся, ка́ющихся гре́шников спасе́ние.
Ра́дуйся, правосла́вных утеше́ние; ра́дуйся, о́бразе любве́ и милосе́рдия.
Ра́дуйся, Влады́чице, ми́лостивая пред Бо́гом Засту́пнице.
Кондак 2
Ви́деша не́когда сиби́рстии наро́ди чу́дное виде́ние, е́же показа́ Госпо́дь, я́ко гра́д христиа́нский светя́йся с церква́ми и зво́ном ве́лиим на возду́се стоя́ше, иде́же ны́не гра́д Тобо́льск пребыва́ет, и диви́шася. Мы́ же, разуме́вше си́лу Бо́жию в приобще́нии сиби́рских наро́дов ве́ре правосла́вней, пое́м Бо́гу: Аллилу́иа.
Икос 2
Показа́ си́лу Бо́жию во язы́цех сиби́рских Васи́лий, сы́н Тимофе́я: со дружи́ною ма́лою, «С на́ми Бо́г» взыва́юще, Бо́гу те́м соде́йствующу, ополче́ние инове́рных прогна́ша, ве́ре правосла́вней на Абала́це послужи́ша, иде́же ны́не оби́тель Бо́жия Ма́тере Зна́мения; мы́ же вопие́м Е́й такова́я:
Ра́дуйся, благове́стия пропове́дание; ра́дуйся, наро́дов сиби́рских просвеще́ние.
Ра́дуйся, све́т во открове́ние язы́ков явля́ющая; ра́дуйся, от ве́чныя сме́рти ду́ши спаса́ющая.
Ра́дуйся, це́ркви Бо́жия созида́ющая; ра́дуйся, к жи́зни ве́чней на́с возводя́щая.
Ра́дуйся, Влады́чице, ми́лостивая пред Бо́гом Засту́пнице.
Кондак 3
Егда́ ма́лая дружи́на в моли́тве но́щь провожда́ше, яви́ся воево́де Ермаку́ святи́тель Никола́й, повелева́я в чистоте́ жи́ти и приле́жный по́ст име́ти, и прорече́, я́ко бу́дет во Абала́це оби́тель Пресвяте́й Богоро́дице. О се́м ди́вном явле́нии воево́да Васи́лий все́м возвести́, воспева́я Бо́гу: Аллилу́иа.
Икос 3
Ви́девши боголюби́вая вдови́ца Мари́я в трикра́тном виде́нии всечестна́го ли́ка Богома́тере изображе́ние, и услы́шавши повеле́ние святи́теля Никола́я возвести́ти во́лю Ея́, во смире́нии убоя́ся пове́дати лю́дем, и взыва́ше к Богоро́дице такова́я:
Ра́дуйся, та́ин Бо́жиих явле́ние; ра́дуйся, ве́ры правосла́вныя утвержде́ние.
Ра́дуйся, ми́лостивое о лю́дех попече́ние; ра́дуйся, сумне́ний душе́вных разреше́ние.
Ра́дуйся, призыва́ющим Тя́ помога́ющая; ра́дуйся, все́х скорбя́щих ра́дующая.
Ра́дуйся, Влады́чице, ми́лостивая пред Бо́гом Засту́пнице.
Кондак 4
Бу́ря помышле́ний сумни́тельных в ра́достную тишину́ преложи́ся, егда́ уви́де вдови́ца о́браз Пречи́стыя Богоро́дицы, подо́бный Зна́мению Новгоро́дскому, то́чию с предстоя́щими святи́телем Никола́ем и преподо́бною Мари́ею Еги́птянынею, к нему́же ны́не притека́юще, пое́м Бо́гу: Аллилу́иа.
Икос 4
Слы́шав Евфи́мий, разсла́бленный те́лом, сове́т, е́же написа́ти явле́нную ико́ну в но́вую це́рковь во Абала́це, потща́ся вда́ти де́ло сие́ иску́сному в иконописа́нии протодиа́кону Матфе́ю. Егда́ же о́браз се́й писа́шеся, боля́щий пома́лу исцеля́шеся и в ра́дости взыва́ше к Богоро́дице:
Ра́дуйся, наде́ждо на́шего спасе́ния; ра́дуйся, исто́чниче обновле́ния.
Ра́дуйся, боля́щих исцеле́ние; ра́дуйся, печа́льных утеше́ние.
Ра́дуйся, вражду́ющих примире́ние; ра́дуйся, благоче́стия укрепле́ние.
Ра́дуйся, Влады́чице, ми́лостивая пред Бо́гом Засту́пнице.
Кондак 5
Име́юще нело́жная свиде́тельства милосе́рдия Бо́жия, прия́ша вси́ благослове́ние Тобо́льскаго архипа́стыря Некта́рия устро́ити це́рковь Богоро́дицы во Абала́це, в ра́дости пою́ще Бо́гу: Аллилу́иа.
Икос 5
Ви́девше лю́дие тобо́льстии честну́ю ико́ну Бо́жия Ма́тере, яви́вшую чуде́сное исцеле́ние боля́щему Евфи́мию, я́ко Боже́ственное сокро́вище прия́ша ю́ и поста́виша в но́вем хра́ме во Абала́це, пою́ще к Богоро́дице:
Ра́дуйся, явле́нием Свои́м зе́млю Сиби́рскую освяти́вшая; ра́дуйся, ико́ною Свое́ю благода́ть подаю́щая.
Ра́дуйся, до́брая начина́ния благословля́ющая; ра́дуйся, гре́шных с Бо́гом примиря́ющая.
Ра́дуйся, хра́мов Бо́жиих украше́ние; ра́дуйся, серде́ц на́ших умиле́ние.
Ра́дуйся, Влады́чице, ми́лостивая пред Бо́гом Засту́пнице.
Кондак 6
Пропове́дницы си́лы Бо́жия яви́шася вси́ прия́вшии чуде́сное укрепле́ние и исцеле́ния от святы́я ико́ны Твоея́, Влады́чице, сего́ ра́ди мно́зи от неве́рия и идолослуже́ния к Бо́гу обраща́хуся, и неради́вии житие́ исправля́ху, в покая́нии зову́ще: Аллилу́иа.
Икос 6
Возсия́ла е́сть благода́ть Бо́га Всевы́шняго от цельбоно́снаго исто́чника, ико́ны Пресвяты́я Богома́тере, Сиби́рстей земли́ в покро́в явле́нныя, здра́вие ду́ш и теле́с на́м подаю́щия. Сего́ ра́ди вопие́м Богоро́дице такова́я:
Ра́дуйся, на́ше кре́пкое упова́ние; ра́дуйся, благода́ти стяжа́ние.
Ра́дуйся, ка́ющихся проще́ние; ра́дуйся, пла́чущих утеше́ние.
Ра́дуйся, слепы́х прозре́ние; ра́дуйся, стра́ждущих исцеле́ние.
Ра́дуйся, Влады́чице, ми́лостивая пред Бо́гом Засту́пнице.
Кондак 7
Хотя́й все́м челове́ком спасти́ся и в покая́нии благода́тную по́мощь обрести́, услы́ша Госпо́дь моли́твы Ма́тере Своея́, егда́ тобо́льская земля́ от до́лгаго дождя́ и водна́го потопле́ния погиба́ше, и наро́д, пред ико́ною Твое́ю моли́вшийся, от отча́яния изба́ви, на́с же благода́рно пе́ти научи́: Аллилу́иа.
Икос 7
Хотя́й архипа́стырь Тобо́льский Корни́лий па́стве свое́й помощи́, в беде́ от мно́гих дожде́й пребыва́ющей, ико́ну Бо́жия Ма́тере Абала́кскую во гра́д принести́ повеле́ и, па́д пред не́ю с наро́дом, взыва́ше:
Ра́дуйся, милосе́рдие Бо́жие на́м явля́ющая; ра́дуйся, ве́ру на́шу утвержда́ющая.
Ра́дуйся, безве́дрие прекраща́ющая; ра́дуйся, посе́вы от вре́да сохраня́ющая.
Ра́дуйся, градо́в и селе́ний упова́ние; ра́дуйся, спасе́ния на́шего основа́ние.
Ра́дуйся, Влады́чице, ми́лостивая пред Бо́гом Засту́пнице.
Кондак 8
Ди́вно бы́сть, ка́ко при моли́твах чту́щих о́браз Богома́тере корабли́ неви́димою си́лою Бо́жиею с якоре́й сня́шася и вве́рх по реце́ поидо́ша, до́ндеже достиго́ша ме́ста, иде́же ны́не гра́д Семипала́тинский, и недви́жимо ста́ша. Лю́дие же, чудеси́ сему́ дивя́щеся, возопи́ша Бо́гу: Аллилу́иа.
Икос 8
Про́мыслом Бо́жиим определи́ святи́тель Филофе́й Тобо́льский о́бразу Богома́тере зри́мым свиде́телем покро́ва и огражде́ния всего́ Сиби́рскаго кра́я бы́ти, да и ме́стнии наро́ди, к све́ту Правосла́вия приобщи́вшеся, воспева́ют Благослове́нней та́ко:
Ра́дуйся, Ду́хом Святы́м води́мая; ра́дуйся, Воево́до христиа́н непобеди́мая.
Ра́дуйся, нището́ю ду́ха блаже́нство восприя́вшая; ра́дуйся, смире́нием и кро́тостию просия́вшая.
Ра́дуйся, жа́ждущим спасе́ния Скоропослу́шнице; ра́дуйся, щедро́т духо́вных Пода́тельнице.
Ра́дуйся, Влады́чице, ми́лостивая пред Бо́гом Засту́пнице.
Кондак 9
Вся́кое жите́йское отложи́вше попече́ние, к Тебе́ притека́ем, Всеми́лостивая Влады́чице. Яви́ на́м ми́лость Твою́, да укрепи́мся в ве́ре и воспое́м Бо́гу: Аллилу́иа.
Икос 9
Вети́и челове́честии недоуме́ют, ка́ко прибега́ющии к ико́не Твое́й восприе́млют Боже́ственную благода́ть и по́мощь ско́рую, мы́ же, укрепля́еми глаго́лом Бо́жиим, я́ко вся́ возмо́жна ве́рующему, притека́ем к о́бразу Твоему́ и благода́рно зове́м:
Ра́дуйся, Пода́тельнице Боже́ственныя бла́гости; ра́дуйся, исто́чниче благода́тныя ра́дости.
Ра́дуйся, страны́ на́шея духо́вное просвеще́ние; ра́дуйся, Правосла́вия сохране́ние.
Ра́дуйся, стра́ху Бо́жию науча́ющая; ра́дуйся, неради́вых на по́двиг вдохновля́ющая.
Ра́дуйся, Влады́чице, ми́лостивая пред Бо́гом Засту́пнице.
Кондак 10
Спаси́тельное прибе́жище от па́губных собла́знов ми́ра яви́ла еси́ во Абала́це, Богоро́дице, устро́ивши оби́тель и́ноческую, в не́йже под покро́вом ико́ны Твоея́ с ве́рою притека́ющих от греха́ отвраща́еши и до́брому жи́тельству науча́еши. Мы́ же в сердца́х на́ших пое́м Бо́гу: Аллилу́иа.
Икос 10
Стена́ и покро́в земли́ Сиби́рстей даде́ся свята́я ико́на Твоя́, Богоро́дице, и́бо Небесе́ и земли́ Творе́ц в де́вственную утро́бу Твою́ всели́ся, те́мже ублажа́ти и воспева́ти Тя́ науча́ет на́с та́ко:
Ра́дуйся, честне́йшая Херуви́м; ра́дуйся, сла́внейшая без сравне́ния Серафи́м.
Ра́дуйся, са́д духо́вный в Сиби́ри насажда́ющая; ра́дуйся, де́ти благословля́ющая.
Ра́дуйся, ю́ныя к позна́нию и́стины направля́ющая; ра́дуйся, ста́рость благода́тно укрепля́ющая.
Ра́дуйся, Влады́чице, ми́лостивая пред Бо́гом Засту́пнице.
Кондак 11
Пе́ние хвале́бное во гла́се у́ст и серде́ц на́ших приими́ от на́с, Влады́чице, я́ко со́лнце светле́йшее отгоня́щая тьму́ неве́дения. Мы́ же, благодаря́ще Бо́га о явле́нии Твое́м, вопие́м: Аллилу́иа.
Икос 11
Светоприе́мная свеща́ и́стиннаго Све́та на́м, су́щим на земли́, я́вльшаяся, ду́ши просвеща́еши и чту́щих святу́ю ико́ну Твою́ к ра́зуму Боже́ственному наставля́еши, да пое́м Ти́ такова́я:
Ра́дуйся, све́том благода́ти озаря́ющая; ра́дуйся, Хле́бом Жи́зни на́с пита́ющая.
Ра́дуйся, земна́го пути́ освяще́ние; ра́дуйся, о душа́х на́ших попече́ние.
Ра́дуйся, на суде́ Бо́жием заступле́ние; ра́дуйся, христиа́н ве́чное ра́дование.
Ра́дуйся, Влады́чице, ми́лостивая пред Бо́гом Засту́пнице.
Кондак 12
Благода́ть Бо́жию чрез ико́ну Свою́, Богоро́дице, на на́с излива́ющая и благи́ми помышле́ньми сердца́ на́ша озаря́ющая, Пресвята́я Де́во, от грехо́внаго пути́ на́с отведи́ и к доброде́тели напра́ви, да благода́рственно воспое́м Бо́гу: Аллилу́иа.
Икос 12
Пою́ще Тя́, Де́во всепе́тая, пред чудотво́рною Абала́кскою ико́ною Твое́ю, благода́рно припа́дающе и с любо́вию лобыза́юще ю́, мо́лим Тя́: наста́ви на́с немощны́х на пу́ть спасе́ния, да досто́йни бу́дем ми́лости Твоея́, воспева́юще Ти́ та́ко:
Ра́дуйся, пу́ть спасе́ния ми́ру возвести́вшая; ра́дуйся, основа́ние Абала́кския оби́тели положи́вшая.
Ра́дуйся, притека́ющих к святы́ни Твое́й исцеле́ние; ра́дуйся, и́щущих спасе́ния вразумле́ние.
Ра́дуйся, и́ноков укрепле́ние; ра́дуйся, все́х христиа́н утеше́ние.
Ра́дуйся, Влады́чице, ми́лостивая пред Бо́гом Засту́пнице.
Кондак 13
О всепе́тая Ма́ти Го́спода на́шего Иису́са Христа́, от А́нгел досто́йно чти́мая и ли́ком Сиби́рских святы́х прославля́емая, ми́лостивно приими́ благодаре́ние, Тебе́ приноси́мое, да Твои́ми моли́твами спаса́еми, пое́м Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгельскими усты́ подоба́ет сла́вити Тя́, Влады́чице Богоро́дице, я́ко нача́тки просвеще́ния христиа́нскаго в земли́ Сиби́рстей освяти́ла еси́ явле́нием Свои́м, Свята́я Де́во. Изво́лила еси́ благочести́вей вдови́це Мари́и откры́ти во́лю Свою́, е́же хра́м воздви́гнути для спасе́ния люде́й, пою́щих Тебе́ такова́я:
Ра́дуйся, ми́ра от пути́ поги́бельнаго обраще́ние; ра́дуйся, Це́ркве Христо́вы прославле́ние.
Ра́дуйся, пра́ведных духо́вное весе́лие; ра́дуйся, ка́ющихся гре́шников спасе́ние.
Ра́дуйся, правосла́вных утеше́ние; ра́дуйся, о́бразе любве́ и милосе́рдия.
Ра́дуйся, Влады́чице, ми́лостивая пред Бо́гом Засту́пнице.
Кондак 1
Избра́нней Предве́чным Царе́м в на́ше ве́рных спасе́ние Небесе́ и земли́ Цари́це благода́рственную похвалу́ прино́сим Ти́, Богоро́дице. Ты́ же, я́ко иму́щая милосе́рдие неизрече́нное, от вся́ких на́с бе́д свободи́ и ко спасе́нию наста́ви, да зове́м Ти́:
Ра́дуйся, Влады́чице, ми́лостивая пред Бо́гом Засту́пнице.
Молитвы
О Всеблагослове́нная Влады́чице, Богоро́дице Де́во, приими́, хода́тайством вели́каго святи́теля и чудотво́рца Никола́я вку́пе с преподо́бною Мари́ею Еги́петскою, сию́ моли́тву, Тебе́ ны́не приноси́мую от на́с, недосто́йных ра́б Твои́х, к цельбоно́сному о́бразу Твоему́ со умиле́нием притека́ющих. Услы́ши моле́ние на́с гре́шных, с ве́рою благода́тныя по́мощи прося́щих. Я́коже дре́вле стра́ждущим лю́дем тобо́льским помогла́ еси́, и небеса́ от мно́гих дождено́сных ту́ч очи́стила еси́, и зе́млю плодоно́сием испо́лнила еси́, си́це и ны́не о́блак неве́рия и вся́каго зла́, на страну́ на́шу наше́дший, моли́твами Твои́ми отведи́, и во благоче́стии и ве́ре правосла́вней лю́ди Твоя́ возрасти́, отсту́пльшия же и неве́рныя к Це́ркви Святе́й приведи́, да вси́ в единомы́слии, и бла́зей наде́жди на спасе́ние ве́чное, прославля́ем Бо́га в Тро́ице сла́вимаго, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Конда́къ а҃
И҆збра́ннѣй предвѣ́чнымъ цр҃е́мъ въ на́ше вѣ́рныхъ сп҃се́нїе нб҃сѐ и҆ землѝ цр҃и́цѣ бл҃года́рственнꙋю похвалꙋ̀ прино́симъ тѝ, бцⷣе. Ты́ же, ꙗ҆́кѡ и҆мꙋ́щаѧ млⷭ҇рдїе неизрече́нное, ѿ всѧ́кихъ на́съ бѣ́дъ свободѝ и҆ ко сп҃се́нїю наста́ви, да зове́мъ тѝ:
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
І҆́косъ а҃
А҆́гг҃льскими ᲂу҆сты̀ подоба́етъ сла́вити тѧ̀, влⷣчце бцⷣе, ꙗ҆́кѡ нача́тки просвѣще́нїѧ хрⷭ҇тїа́нскагѡ въ землѝ сиби́рстѣй ѡ҆ст҃и́ла є҆сѝ ꙗ҆вле́нїемъ свои́мъ, ст҃а́ѧ дв҃о. И҆зво́лила є҆сѝ бл҃гочести́вѣй вдови́цѣ марі́и ѿкры́ти во́лю свою̀, є҆́же хра́мъ воздви́гнꙋти длѧ сп҃се́нїѧ люде́й, пою́щихъ тебѣ̀ такова̑ѧ:
Ра́дꙋйсѧ, мі́ра ѿ пꙋтѝ поги́бельнагѡ ѡ҆браще́нїе: ра́дꙋйсѧ, цр҃кве хрⷭ҇то́вы прославле́нїе.
Ра́дꙋйсѧ, првⷣныхъ дꙋхо́вное весе́лїе: ра́дꙋйсѧ, ка́ющихсѧ грѣ́шникѡвъ сп҃се́нїе.
Ра́дꙋйсѧ, правосла́вныхъ ᲂу҆тѣше́нїе: ра́дꙋйсѧ, ѻ҆́бразе любвѐ и҆ млⷭ҇рдїѧ.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ в҃
Ви́дѣша нѣ́когда сиби́рстїи наро́ди чꙋ́дное видѣ́нїе, є҆́же показа̀ гдⷭ҇ь, ꙗ҆́кѡ гра́дъ хрⷭ҇тїа́нскїй свѣтѧ́йсѧ съ цр҃ква́ми и҆ зво́номъ ве́лїимъ на воздꙋ́сѣ стоѧ́ше, и҆дѣ́же ны́нѣ гра́дъ тобо́льскъ пребыва́етъ, и҆ диви́шасѧ. Мы́ же разꙋмѣ́вше си́лꙋ бж҃їю въ прїѡбще́нїи сиби́рскихъ наро́дѡвъ вѣ́рѣ правосла́внѣй, пое́мъ бг҃ꙋ: А҆ллилꙋ́їа.
І҆́косъ в҃
Показа̀ си́лꙋ бж҃їю во ꙗ҆зы́цѣхъ сиби́рскихъ васі́лїй, сы́нъ тїмоѳе́а: со дрꙋжи́ною ма́лою, съ на́ми бг҃ъ взыва́юще, бг҃ꙋ тѣ̑мъ содѣ́йствꙋющꙋ, ѡ҆полче́нїе и҆новѣ́рныхъ прогна́ша, вѣ́рѣ правосла́внѣй на а҆бала́цѣ послꙋжи́ша, и҆дѣ́же ны́нѣ ѻ҆би́тель бж҃їѧ мт҃ре зна́менїѧ:
мы́ же вопїе́мъ є҆́й такова̑ѧ:
Ра́дꙋйсѧ, бл҃говѣ́стїѧ проповѣ́данїе: ра́дꙋйсѧ, наро́дѡвъ сиби́рскихъ просвѣще́нїе.
Ра́дꙋйсѧ, свѣ́тъ во ѿкрове́нїе ꙗ҆зы́кѡвъ ꙗ҆влѧ́ющаѧ: ра́дꙋйсѧ, ѿ вѣ́чныѧ сме́рти дꙋ́шы сп҃са́ющаѧ.
Ра́дꙋйсѧ, цр҃кви бж҃їѧ созида́ющаѧ: ра́дꙋйсѧ, къ жи́зни вѣ́чнѣй на́съ возводѧ́щаѧ.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ г҃
Є҆гда̀ ма́лаѧ дрꙋжи́на въ мл҃твѣ но́щь провожда́ше, ꙗ҆ви́сѧ воево́дѣ є҆рмакꙋ̀ ст҃и́тель нїкола́й, повелѣва́ѧ въ чистотѣ̀ жи́ти и҆ прилѣ́жный по́стъ и҆мѣ́ти, и҆ проречѐ, ꙗ҆́кѡ бꙋ́детъ во а҆бала́цѣ ѻ҆би́тель прест҃ѣ́й бцⷣѣ. Ѡ҆ се́мъ ди́вномъ ꙗ҆вле́нїи воево́да васі́лїй всѣ̑мъ возвѣстѝ, воспѣва́ѧ бг҃ꙋ: А҆ллилꙋ́їа.
І҆́косъ г҃
Ви́дѣвши бг҃олюби́ваѧ вдови́ца марі́а въ трикра́тномъ видѣ́нїи всечтⷭ҇на́гѡ ли́ка бг҃омт҃ре и҆з̾ѡбраже́нїе, и҆ ᲂу҆слы́шавши повелѣ́нїе ст҃и́телѧ нїкола́а возвѣсти́ти во́лю є҆ѧ̀, во смире́нїи ᲂу҆боѧ́сѧ повѣ́дати лю́демъ, и҆ взыва́ше къ бцⷣѣ такова̑ѧ:
Ра́дꙋйсѧ, та̑инъ бж҃їихъ ꙗ҆вле́нїе: ра́дꙋйсѧ, вѣ́ры правосла́вныѧ ᲂу҆твержде́нїе.
Ра́дꙋйсѧ, млⷭ҇тивое ѡ҆ лю́дехъ попече́нїе: ра́дꙋйсѧ, сꙋмнѣ́нїй дꙋше́вныхъ разрѣше́нїе.
Ра́дꙋйсѧ, призыва́ющымъ тѧ̀ помога́ющаѧ: ра́дꙋйсѧ, всѣ́хъ скорбѧ́щихъ ра́дꙋющаѧ.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ д҃
Бꙋ́рѧ помышле́нїй сꙋмни́тельныхъ въ ра́достнꙋю тишинꙋ̀ преложи́сѧ, є҆гда̀ ᲂу҆ви́дѣ вдови́ца ѻ҆́бразъ пречⷭ҇тыѧ бцⷣы, подо́бный зна́менїю новгоро́дскомꙋ, то́чїю съ предстоѧ́щими ст҃и́телемъ нїкола́емъ и҆ прпⷣбною марі́ею є҆гѵ́птѧнынею, къ немꙋ́же ны́нѣ притека́юще, пое́мъ бг҃ꙋ: А҆ллилꙋ́їа.
І҆́косъ д҃
Слы́шавъ є҆ѵѳѵ́мїй, разсла́бленный тѣ́ломъ, совѣ́тъ, є҆́же написа́ти ꙗ҆вле́ннꙋю і҆кѡ́нꙋ въ но́вꙋю цр҃ковь во а҆бала́цѣ, потща́сѧ вда́ти дѣ́ло сїѐ и҆скꙋ́сномꙋ въ і҆кѡнописа́нїи прѡтодїа́конꙋ матѳе́ю. Е҆гда́ же ѻ҆́бразъ се́й писа́шесѧ, болѧ́щїй пома́лꙋ и҆сцѣлѧ́шесѧ и҆ въ ра́дости взыва́ше къ бцⷣѣ:
Ра́дꙋйсѧ, наде́ждо на́шегѡ сп҃се́нїѧ: ра́дꙋйсѧ, и҆сто́чниче ѡ҆бновле́нїѧ.
Ра́дꙋйсѧ, болѧ́щихъ и҆сцѣле́нїе: ра́дꙋйсѧ, печа́льныхъ ᲂу҆тѣше́нїе.
Ра́дꙋйсѧ, враждꙋ́ющихъ примире́нїе: ра́дꙋйсѧ, бл҃гоче́стїѧ ᲂу҆крѣпле́нїе.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ є҃
И҆мѣ́юще нелѡ́жнаѧ свидѣ́тєльства млⷭ҇рдїѧ бж҃їѧ, прїѧ́ша всѝ бл҃гослове́нїе тобо́льскагѡ а҆рхїпа́стырѧ некта́рїа ᲂу҆стро́ити цр҃ковь бцⷣы во а҆бала́цѣ, въ ра́дости пою́ще бг҃ꙋ: А҆ллилꙋ́їа.
І҆́косъ є҃
Ви́дѣвше лю́дїе тобо́льстїи чтⷭ҇нꙋ́ю і҆кѡ́нꙋ бж҃їѧ мт҃ре, ꙗ҆ви́вшꙋю чꙋде́сное и҆сцѣле́нїе болѧ́щемꙋ є҆ѵѳѵ́мїю, ꙗ҆́кѡ бжⷭ҇твенное сокро́вище прїѧ́ша ю҆̀ и҆ поста́виша въ но́вѣмъ хра́мѣ во а҆бала́цѣ, пою́ще къ бцⷣѣ:
Ра́дꙋйсѧ, ꙗ҆вле́нїемъ свои́мъ зе́млю сиби́рскꙋю ѡ҆ст҃и́вшаѧ: ра́дꙋйсѧ, і҆кѡ́ною свое́ю бл҃года́ть подаю́щаѧ.
Ра́дꙋйсѧ, дѡ́браѧ начина̑нїѧ бл҃гословлѧ́ющаѧ: ра́дꙋйсѧ, грѣ́шныхъ съ бг҃омъ примирѧ́ющаѧ.
Ра́дꙋйсѧ, хра́мѡвъ бж҃їихъ ᲂу҆краше́нїе: ра́дꙋйсѧ, серде́цъ на́шихъ ᲂу҆миле́нїе.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ ѕ҃
Проповѣ̑дницы си́лы бж҃їѧ ꙗ҆ви́шасѧ всѝ прїѧ́вшїи чꙋде́сное ᲂу҆крѣпле́нїе и҆ и҆сцѣлє́нїѧ ѿ ст҃ы́ѧ і҆кѡ́ны твоеѧ̀, влⷣчце, сегѡ̀ ра́ди мно́зи ѿ невѣ́рїѧ и҆ і҆дѡлослꙋже́нїѧ къ бг҃ꙋ ѡ҆браща́хꙋсѧ, и҆ неради́вїи житїѐ и҆справлѧ́хꙋ, въ покаѧ́нїи зовꙋ́ще: А҆ллилꙋ́їа.
І҆́косъ ѕ҃
Возсїѧ́ла є҆́сть бл҃года́ть бг҃а всевы́шнѧгѡ ѿ цѣльбоно́снагѡ и҆сто́чника, і҆кѡ́ны прест҃ы́ѧ бг҃омт҃ре, сиби́рстѣй землѝ въ покро́въ ꙗ҆вле́нныѧ, здра́вїе дꙋ́шъ и҆ тѣле́съ на́мъ подаю́щїѧ. Сегѡ̀ ра́ди вопїе́мъ бцⷣѣ такова̑ѧ:
Ра́дꙋйсѧ, на́ше крѣ́пкое ᲂу҆пова́нїе: ра́дꙋйсѧ, бл҃года́ти стѧжа́нїе.
Ра́дꙋйсѧ, ка́ющихсѧ проще́нїе: ра́дꙋйсѧ, пла́чꙋщихъ ᲂу҆тѣше́нїе.
Ра́дꙋйсѧ, слѣпы́хъ прозрѣ́нїе: ра́дꙋйсѧ, стра́ждꙋщихъ и҆сцѣле́нїе.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ з҃
Хотѧ́й всѣ̑мъ человѣ́кѡмъ сп҃сти́сѧ и҆ въ покаѧ́нїи бл҃года́тнꙋю по́мощь ѡ҆брѣстѝ, ᲂу҆слы́ша гдⷭ҇ь мл҃твы мт҃ре своеѧ̀, є҆гда̀ тобо́льскаѧ землѧ̀ ѿ до́лгагѡ дождѧ̀ и҆ водна́гѡ потопле́нїѧ погиба́ше, и҆ наро́дъ, пред̾ і҆кѡ́ною твое́ю моли́вшїйсѧ, ѿ ѿча́ѧнїѧ и҆зба́ви, на́съ же бл҃года́рнѡ пѣ́ти наꙋчѝ: А҆ллилꙋ́їа.
І҆́косъ з҃
Хотѧ́й а҆рхїпа́стырь тобо́льскїй корни́лїй па́ствѣ свое́й помощѝ, въ бѣдѣ̀ ѿ мно́гихъ дожде́й пребыва́ющей, і҆кѡ́нꙋ бж҃їѧ мт҃ре а҆бала́кскꙋю во гра́дъ принестѝ повелѣ̀, и҆ па́дъ пред̾ не́ю съ наро́домъ, взыва́ше:
Ра́дꙋйсѧ, млⷭ҇рдїе бж҃їе на́мъ ꙗ҆влѧ́ющаѧ: ра́дꙋйсѧ, вѣ́рꙋ на́шꙋ ᲂу҆твержда́ющаѧ.
Ра́дꙋйсѧ, безве́дрїе прекраща́ющаѧ: ра́дꙋйсѧ, посѣ́вы ѿ вре́да сохранѧ́ющаѧ.
Ра́дꙋйсѧ, градѡ́въ и҆ селе́нїй ᲂу҆пова́нїе: ра́дꙋйсѧ, сп҃се́нїѧ на́шегѡ ѡ҆снова́нїе.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ и҃
Ди́вно бы́сть, ка́кѡ при мл҃твахъ чтꙋ́щихъ ѻ҆́бразъ бг҃омт҃ре корабли̑ неви́димою си́лою бж҃їею съ ꙗ҆коре́й снѧ́шасѧ и҆ вве́рхъ по рѣцѣ̀ поидо́ша, до́ндеже достиго́ша мѣ́ста, и҆дѣ́же ны́нѣ гра́дъ семипала́тинскїй, и҆ недви́жимѡ ста́ша. Лю́дїе же чꙋдесѝ семꙋ̀ дивѧ́щесѧ, возопи́ша бг҃ꙋ: А҆ллилꙋ́їа.
І҆́косъ и҃
Про́мысломъ бж҃їимъ ѡ҆предѣлѝ ст҃и́тель фїлоѳе́й тобо́льскїй ѻ҆́бразꙋ бг҃омт҃ре зри́мымъ свидѣ́телемъ покро́ва и҆ ѡ҆гражде́нїѧ всегѡ̀ сиби́рскагѡ кра́ѧ бы́ти, да и҆ мѣ́стнїи наро́ди, къ свѣ́тꙋ правосла́вїѧ прїѡбщи́вшесѧ, воспѣва́ютъ бл҃гослове́ннѣй та́кѡ:
Ра́дꙋйсѧ, дх҃омъ ст҃ы́мъ води́маѧ: ра́дꙋйсѧ, воево́до хрⷭ҇тїа́нъ непобѣди́маѧ.
Ра́дꙋйсѧ, нището́ю дꙋ́ха бл҃же́нство воспрїѧ́вшаѧ: ра́дꙋйсѧ, смире́нїемъ и҆ кро́тостїю просїѧ́вшаѧ.
Ра́дꙋйсѧ, жа́ждꙋщымъ сп҃се́нїѧ скоропослꙋ́шнице: ра́дꙋйсѧ, щедро́тъ дꙋхо́вныхъ пода́тельнице.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ ѳ҃
Всѧ́кое жите́йское ѿложи́вше попече́нїе, къ тебѣ̀ притека́емъ, всемлⷭ҇тиваѧ влⷣчце. Ꙗ҆вѝ на́мъ млⷭ҇ть твою̀, да ᲂу҆крѣпи́мсѧ въ вѣ́рѣ и҆ воспое́мъ бг҃ꙋ: А҆ллилꙋ́їа.
І҆́косъ ѳ҃
Вѣті̑и человѣ́честїи недоꙋмѣ́ютъ, ка́кѡ прибѣга́ющїи къ і҆кѡ́нѣ твое́й воспрїе́млютъ бжⷭ҇твеннꙋю бл҃года́ть и҆ по́мощь ско́рꙋю, мы́ же ᲂу҆крѣплѧ́еми глаго́ломъ бж҃їимъ, ꙗ҆́кѡ всѧ̑ возмѡ́жна вѣ́рꙋющемꙋ, притека́емъ къ ѻ҆́бразꙋ твоемꙋ̀ и҆ бл҃года́рнѡ зове́мъ:
Ра́дꙋйсѧ, пода́тельнице бжⷭ҇твенныѧ бл҃гости: ра́дꙋйсѧ, и҆сто́чниче бл҃года́тныѧ ра́дости.
Ра́дꙋйсѧ, страны̀ на́шеѧ дꙋхо́вное просвѣще́нїе: ра́дꙋйсѧ, правосла́вїѧ сохране́нїе.
Ра́дꙋйсѧ, стра́хꙋ бж҃їю наꙋча́ющаѧ: ра́дꙋйсѧ, неради́выхъ на по́двигъ вдохновлѧ́ющаѧ.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ і҃
Сп҃си́тельное прибѣ́жище ѿ па́гꙋбныхъ собла́знѡвъ мі́ра ꙗ҆ви́ла є҆сѝ во а҆бала́цѣ, бцⷣе, ᲂу҆стро́ивши ѻ҆би́тель и҆́ноческꙋю, въ не́йже под̾ покро́вомъ і҆кѡ́ны твоеѧ̀ съ вѣ́рою притека́ющихъ ѿ грѣха̀ ѿвраща́еши и҆ до́бромꙋ жи́тельствꙋ наꙋча́еши. Мы́ же въ сердца́хъ на́шихъ пое́мъ бг҃ꙋ: А҆ллилꙋ́їа.
І҆́косъ і҃
Стѣна̀ и҆ покро́въ землѝ сиби́рстѣй даде́сѧ ст҃а́ѧ і҆кѡ́на твоѧ̀, бцⷣе, и҆́бо нб҃сѐ и҆ землѝ творе́цъ въ двⷭ҇твеннꙋю ᲂу҆тро́бꙋ твою̀ всели́сѧ,
тѣ́мже ᲂу҆бл҃жа́ти и҆ воспѣва́ти тѧ̀ наꙋча́етъ на́съ та́кѡ:
Ра́дꙋйсѧ, чтⷭ҇нѣ́йшаѧ херꙋві̑мъ: ра́дꙋйсѧ, сла́внѣйшаѧ без̾ сравне́нїѧ серафі̑мъ.
Ра́дꙋйсѧ, са́дъ дꙋхо́вный въ сиби́ри насажда́ющаѧ: ра́дꙋйсѧ, дѣ́ти бл҃гословлѧ́ющаѧ.
Ра́дꙋйсѧ, ю҆́ныѧ къ позна́нїю и҆́стины направлѧ́ющаѧ: ра́дꙋйсѧ, ста́рость бл҃года́тнѡ ᲂу҆крѣплѧ́ющаѧ.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ а҃і
Пѣ́нїе хвалѣ́бное во гла́сѣ ᲂу҆́стъ и҆ серде́цъ на́шихъ прїимѝ ѿ на́съ, влⷣчце, ꙗ҆́кѡ со́лнце свѣтлѣ́йшее ѿгонѧ́щаѧ тьмꙋ̀ невѣ́дѣнїѧ. Мы́ же бл҃годарѧ́ще бг҃а ѡ҆ ꙗ҆вле́нїи твое́мъ, вопїе́мъ: А҆ллилꙋ́їа.
І҆́косъ а҃і
Свѣтопрїе́мнаѧ свѣща̀ и҆́стиннагѡ свѣ́та на́мъ, сꙋ́щымъ на землѝ, ꙗ҆́вльшаѧсѧ, дꙋ́шы просвѣща́еши и҆ чтꙋ́щихъ ст҃ꙋ́ю і҆кѡ́нꙋ твою̀ къ ра́зꙋмꙋ бжⷭ҇твенномꙋ наставлѧ́еши, да пое́мъ тѝ такова̑ѧ:
Ра́дꙋйсѧ, свѣ́томъ бл҃года́ти ѡ҆зарѧ́ющаѧ: ра́дꙋйсѧ, хлѣ́бомъ жи́зни на́съ пита́ющаѧ.
Ра́дꙋйсѧ, земна́гѡ пꙋтѝ ѡ҆сщ҃е́нїе: ра́дꙋйсѧ, ѡ҆ дꙋша́хъ на́шихъ попече́нїе.
Ра́дꙋйсѧ, на сꙋдѣ̀ бж҃їемъ застꙋпле́нїе: ра́дꙋйсѧ, хрⷭ҇тїа́нъ вѣ́чное ра́дованїе.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ в҃і
Бл҃года́ть бж҃їю чрез̾ і҆кѡ́нꙋ свою̀, бцⷣе, на на́съ и҆злива́ющаѧ и҆ бл҃ги́ми помышле́ньми сердца̀ на̑ша ѡ҆зарѧ́ющаѧ, прест҃а́ѧ дв҃о, ѿ грѣхо́внагѡ пꙋтѝ на́съ ѿведѝ и҆ къ добродѣ́тели напра́ви, да бл҃года́рственнѡ воспое́мъ бг҃ꙋ: А҆ллилꙋ́їа.
І҆́косъ в҃і
Пою́ще тѧ̀, дв҃о всепѣ́таѧ, пред̾ чꙋдотво́рною а҆бала́кскою і҆кѡ́ною твое́ю, бл҃года́рнѡ припа́дающе и҆ съ любо́вїю лобыза́юще ю҆̀, мо́лимъ тѧ̀: наста́ви на́съ немощны́хъ на пꙋ́ть сп҃се́нїѧ, да досто́йни бꙋ́демъ млⷭ҇ти твоеѧ̀, воспѣва́юще тѝ та́кѡ:
Ра́дꙋйсѧ, пꙋ́ть сп҃се́нїѧ мі́рꙋ возвѣсти́вшаѧ: ра́дꙋйсѧ, ѡ҆снова́нїе а҆бала́кскїѧ ѻ҆би́тели положи́вшаѧ.
Ра́дꙋйсѧ, притека́ющихъ къ ст҃ы́ни твое́й и҆сцѣле́нїе: ра́дꙋйсѧ, и҆́щꙋщихъ сп҃се́нїѧ вразꙋмле́нїе.
Ра́дꙋйсѧ, и҆́нокѡвъ ᲂу҆крѣпле́нїе: ра́дꙋйсѧ, всѣ́хъ хрⷭ҇тїа́нъ ᲂу҆тѣше́нїе.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ г҃і
Ѽ всепѣ́таѧ мт҃и гдⷭ҇а на́шегѡ і҆и҃са хрⷭ҇та̀, ѿ а҆́гг҃лъ досто́йнѡ чти́маѧ и҆ ли́комъ сиби́рскихъ ст҃ы́хъ прославлѧ́емаѧ, млⷭ҇тивнѡ прїимѝ бл҃годаре́нїе, тебѣ̀ приноси́мое, да твои́ми мл҃твами сп҃са́еми, пое́мъ бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃льскими ᲂу҆сты̀ подоба́етъ сла́вити тѧ̀, влⷣчце бцⷣе, ꙗ҆́кѡ нача́тки просвѣще́нїѧ хрⷭ҇тїа́нскагѡ въ землѝ сиби́рстѣй ѡ҆ст҃и́ла є҆сѝ ꙗ҆вле́нїемъ свои́мъ, ст҃а́ѧ дв҃о. И҆зво́лила є҆сѝ бл҃гочести́вѣй вдови́цѣ марі́и ѿкры́ти во́лю свою̀, є҆́же хра́мъ воздви́гнꙋти длѧ сп҃се́нїѧ люде́й, пою́щихъ тебѣ̀ такова̑ѧ:
Ра́дꙋйсѧ, мі́ра ѿ пꙋтѝ поги́бельнагѡ ѡ҆браще́нїе: ра́дꙋйсѧ, цр҃кве хрⷭ҇то́вы прославле́нїе.
Ра́дꙋйсѧ, првⷣныхъ дꙋхо́вное весе́лїе: ра́дꙋйсѧ, ка́ющихсѧ грѣ́шникѡвъ сп҃се́нїе.
Ра́дꙋйсѧ, правосла́вныхъ ᲂу҆тѣше́нїе: ра́дꙋйсѧ, ѻ҆́бразе любвѐ и҆ млⷭ҇рдїѧ.
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Конда́къ а҃
И҆збра́ннѣй предвѣ́чнымъ цр҃е́мъ въ на́ше вѣ́рныхъ сп҃се́нїе нб҃сѐ и҆ землѝ цр҃и́цѣ бл҃года́рственнꙋю похвалꙋ̀ прино́симъ тѝ, бцⷣе. Ты́ же, ꙗ҆́кѡ и҆мꙋ́щаѧ млⷭ҇рдїе неизрече́нное, ѿ всѧ́кихъ на́съ бѣ́дъ свободѝ и҆ ко сп҃се́нїю наста́ви, да зове́мъ тѝ:
Ра́дꙋйсѧ, влⷣчце, млⷭ҇тиваѧ пред̾ бг҃омъ застꙋ́пнице.
Моли́твы
Ѽ всебл҃гослове́ннаѧ влⷣчце, бцⷣе дв҃о, прїимѝ, хода́тайствомъ вели́кагѡ ст҃и́телѧ и҆ чꙋдотво́рца нїкола́а вкꙋ́пѣ съ прпⷣбною марі́ею є҆гѵ́петскою, сїю̀ мл҃твꙋ, тебѣ̀ ны́нѣ приноси́мꙋю ѿ на́съ, недосто́йныхъ ра̑бъ твои́хъ, къ цѣльбоно́сномꙋ ѻ҆́бразꙋ твоемꙋ̀ со ᲂу҆миле́нїемъ притека́ющихъ. Оу҆слы́ши моле́нїе на́съ грѣ́шныхъ, съ вѣ́рою бл҃года́тныѧ по́мощи просѧ́щихъ. Ꙗ҆́коже дре́вле стра́ждꙋщымъ лю́демъ тобѡ́льскимъ помогла̀ є҆сѝ, и҆ небеса̀ ѿ мно́гихъ дождено́сныхъ тꙋ́чь ѡ҆чи́стила є҆сѝ, и҆ зе́млю плодоно́сїемъ и҆спо́лнила є҆сѝ, си́це и҆ ны́нѣ ѻ҆́блакъ невѣ́рїѧ и҆ всѧ́кагѡ ѕла̀, на странꙋ̀ на́шꙋ наше́дшїй, мл҃твами твои́ми ѿведѝ, и҆ во бл҃гоче́стїи и҆ вѣ́рѣ правосла́внѣй лю́ди твоѧ̑ возрастѝ, ѿстꙋ́пльшыѧ же и҆ невѣ̑рныѧ къ цр҃кви ст҃ѣ́й приведѝ, да всѝ въ є҆диномы́слїи, и҆ бл҃зѣй наде́жди на сп҃се́нїе вѣ́чное, прославлѧ́емъ бг҃а въ трⷪ҇цѣ сла́вимаго, ѻ҆ц҃а̀, и҆ сн҃а, и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.