Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ въ че́сть і҆кѡ́ны є҆ѧ̀ а҆бала́цкаѧ.

Оршанской (1631) Чухломской, или Галичской (1350), и Абалацкой ("Знамение") (1637) икон Божией Матери 2 августа 2026

Конда́къ а҃

И҆збра́нной предвѣ́чнымъ цр҃е́мъ въ на́ше вѣ́рныхъ сп҃се́нїе нб҃сѐ и҆ землѝ цр҃и́цѣ, бл҃года́рствєнныѧ похвалы̀ прино́симъ тѝ, бцⷣе! Ты́ же, ꙗ҆́кѡ и҆мꙋ́щаѧ держа́вꙋ непобѣди́мꙋю и҆ млⷭ҇рдїе неизрече́нное, ѿ всѧ́кихъ на́съ бѣ́дъ свободѝ и҆ всѧ̑ бл҃га̑ѧ на́мъ да́рꙋй, да зове́мъ тѝ:

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

І҆́косъ а҃

А҆рха́гг҃лы и҆ а҆́гг҃лы пою́тъ тебѣ̀, дв҃ѣ чи́стой, немѡ́лчныѧ пѣ́сни на нб҃сѝ. Мы́ же, грѣ́шнїи, на землѝ прекло́ньше колѣ̑на дꙋ́шъ и҆ серде́цъ на́шихъ пред̾ пречⷭ҇тымъ твои́мъ ѻ҆́бразомъ со слеза́ми ᲂу҆миле́нїѧ, бре́нными ᲂу҆ста́ми вопїе́мъ тѝ:

Ра́дꙋйсѧ, застꙋ́пнице на́ша ᲂу҆се́рднаѧ: ра́дꙋйсѧ, мт҃и на́ша премлⷭ҇рдаѧ.

Ра́дꙋйсѧ, сла́во на́ша непреходѧ́щаѧ: ра́дꙋйсѧ, бога́тство на́ше неистощи́мое.

Ра́дꙋйсѧ, помо́щнице на́ша непрело́жнаѧ: ра́дꙋйсѧ, покрови́тельнице на́ша при́снаѧ.

Ра́дꙋйсѧ, ра́досте на́ша, ѿ всѧ́кїѧ скве́рны пло́ти и҆ дꙋ́ха на́съ ѡ҆чища́ющаѧ: ра́дꙋйсѧ, цѣли́тельнице на́ша, болѣ́зней дꙋше́вныхъ и҆ тѣле́сныхъ на́съ и҆збавлѧ́ющаѧ.

Ра́дꙋйсѧ, похвало̀ на́ша, ра́достей дꙋхо́вныхъ на́съ не лиша́ющаѧ: ра́дꙋйсѧ, влⷣчце на́ша, по́мощїю твое́ю недꙋ́ги на̑ша и҆сцѣлѧ́ющаѧ.

Ра́дꙋйсѧ, прибѣ́жище на́ше, ѿ врагѡ́въ ви́димыхъ и҆ неви́димыхъ на́съ покрыва́ющаѧ: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ в҃

Ви́дѧщи въ трикра́тныхъ видѣ́нїихъ бг҃олюби́ваѧ вдови́ца марі́а всечⷭ҇тна́гѡ лица̀ твоегѡ̀, прест҃а́ѧ дв҃о, и҆зѡбраже́нїе, ᲂу҆́жасомъ вели́кимъ ѡ҆держи́ма, ᲂу҆боѧ́сѧ повѣ́дати ѡ҆ чꙋде́сныхъ видѣ́нїихъ свои́хъ лю́демъ, въ се́рдцѣ же свое́мъ, и҆з̾ глꙋбины̀ дꙋшѝ взыва́ше бг҃ꙋ: А҆ллилꙋ́їа.

І҆́косъ в҃

Ра́зꙋмъ неразꙋмѣва́емый чл҃вѣ́ческими по́мыслы и҆́щꙋщи разꙋмѣ́ти въ чꙋ́днѣмъ ꙗ҆вле́нїи пречⷭ҇тагѡ твоегѡ̀, бг҃ома́ти, ѻ҆́браза, бл҃же́ннаѧ мр҃і́а но́вагѡ ᲂу҆досто́исѧ видѣ́нїѧ, въ не́мже вели́кїй ст҃и́тель нїкола́й гро́знѡ повелѣ̀ є҆́й возвѣсти́ти ви́дѣнное, ѻ҆на́ же со стра́хомъ и҆ тре́петомъ всѣ̑мъ повѣ́да та́йнꙋ видѣ́нїѧ своегѡ̀ и҆ всѣ́хъ наꙋчѝ взыва́ти къ бцⷣѣ:

Ра́дꙋйсѧ, всѣ́хъ зижди́телѧ въ твои́хъ ложесна́хъ носи́вшаѧ: ра́дꙋйсѧ, бг҃а пло́тїю ро́ждшаѧ, мі́рꙋ спⷭ҇телѧ.

Ра́дꙋйсѧ, въ рождествѣ̀ дв҃ство нетлѣ́ннѡ сохра́ншаѧ: ра́дꙋйсѧ, на землѝ а҆́гг҃льски пожи́вшаѧ.

Ра́дꙋйсѧ, бг҃а съ чл҃вѣ́ки примири́вшаѧ: ра́дꙋйсѧ, ст҃ы́хъ всѣ́хъ прест҃ѣ́йшаѧ.

Ра́дꙋйсѧ, дв҃о прест҃а́ѧ, ди́внѡ ꙗ҆ви́вшаѧ на́мъ ѻ҆́бразъ сво́й: ра́дꙋйсѧ, бл҃года́тнаѧ, въ ꙗ҆вле́нїи ѻ҆́браза своегѡ̀ млⷭ҇рдїе на́мъ ꙗ҆влѧ́ющаѧ.

Ра́дꙋйсѧ, ѡ҆ всѣ́хъ чтꙋ́щихъ ѻ҆́бразъ тво́й ст҃ы́й промышлѧ́ющаѧ: ра́дꙋйсѧ, всѣ̑мъ молѧ́щымсѧ тебѣ̀ пред̾ ст҃ы́мъ ѻ҆́бразомъ твои́мъ по мѣ́рѣ вѣ́ры сп҃се́нїе подава́ющаѧ.

Ра́дꙋйсѧ, чꙋдесы̀ твоегѡ̀ ѻ҆́браза ᲂу҆мы̀ на̑ша къ го́рнемꙋ мі́рꙋ возводѧ́щаѧ: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ г҃

Си́лꙋ бж҃їю и҆́щꙋще ᲂу҆вѣ́дѣти бл҃говѣ́рнїи лю́дїе тобо́льстїи въ ди́вныхъ ꙗ҆вле́нїихъ ѻ҆́браза твоегѡ̀, бг҃ома́ти, собра́шасѧ вкꙋ́пѣ съ а҆рхїере́емъ свои́мъ некта́рїемъ, да ᲂу҆вѣ́рѧтсѧ, ꙗ҆́кѡ млⷭ҇рдїе цр҃и́цы нбⷭ҇ныѧ восхотѣ̀ посѣти́ти и҆ въ странѣ̀ на́шей всѣ́хъ, хотѧ́щихъ ᲂу҆лꙋчи́ти сп҃се́нїе: ᲂу҆вѣ́рившесѧ же и҆ ра́дꙋющесѧ ра́достїю вели́кою, воспѣ́ша бг҃ꙋ: А҆ллилꙋ́їа.

І҆́косъ г҃

И҆мꙋ́ще всеꙋсе́рднѡ жела́нїе стѧжа́ти сокро́вище нбⷭ҇ное, ст҃ы́й ли́къ тво́й, бцⷣе, всѝ є҆динодꙋ́шнѡ возжела́ша пе́рвѣе свои́ми рꙋка́ми ᲂу҆стро́ити на мѣ́стѣ ꙗ҆вле́нїѧ но́вꙋю въ че́сть зна́менїѧ бж҃їѧ мт҃ре це́рковь, ю҆́же и҆ воздвиго́ша, со всѣ́мъ ᲂу҆се́рдїемъ воспѣва́юще цр҃и́цѣ нбⷭ҇ной:

Ра́дꙋйсѧ, а҆́гг҃льское вели́кое ᲂу҆дивле́нїе: ра́дꙋйсѧ, праѻте́ческое ди́вное ᲂу҆тѣше́нїе.

Ра́дꙋйсѧ, прⷪ҇ро́ческаѧ высо́каѧ про́повѣдь: ра́дꙋйсѧ, а҆пⷭ҇льскаѧ пресла́внаѧ похвало̀.

Ра́дꙋйсѧ, ст҃и́телей и҆зрѧ́дное ᲂу҆краше́нїе: ра́дꙋйсѧ, мꙋ́ченикѡвъ крѣ́пкое ᲂу҆твержде́нїе.

Ра́дꙋйсѧ, прпⷣбныхъ сп҃си́тельное наставле́нїе: ра́дꙋйсѧ, по́стникѡвъ неизнемога́ющее воздержа́нїе.

Ра́дꙋйсѧ дѣ́вствꙋющихъ чистото̀ и҆ сла́во: ра́дꙋйсѧ, ѻ҆тцє́въ и҆ ма́терей ти́хое весе́лїе.

Ра́дꙋйсѧ, всѣ́хъ правосла́вныхъ хрⷭ҇тїа́нъ ᲂу҆добре́нїе: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ д҃

Бꙋ́рѧ помышле́нїй сꙋмни́тельныхъ въ ра́достнꙋю тишинꙋ̀ преложи́сѧ, є҆гда̀ ви́дѣвшаѧ въ видѣ́нїихъ ѻ҆́бразъ пречⷭ҇тыѧ дв҃ы бцⷣы ᲂу҆каза̀ бы́ти є҆гѡ̀ подо́бїе зна́менїѧ новгоро́дскагѡ, то́чїю съ предстоѧ́щима ст҃и́телемъ нїкола́емъ и҆ мр҃і́ею є҆гѵ́петскою: тѣ́мже и҆ возопи́ша всѝ бг҃ꙋ: А҆ллилꙋ́їа.

І҆́косъ д҃

Слы́шавъ є҆ѵѳѵ́мїй, разсла́бленный тѣ́ломъ, но не дꙋ́хомъ, ѿ нѣ́коегѡ ста́рца па́ѵла, є҆́же бы написа́ти ꙗ҆вле́ннꙋю і҆кѡ́нꙋ въ но́вꙋю це́рковь, созида́вшꙋюсѧ по повелѣ́нїю бж҃їю на а҆бала́кѣ, потща́сѧ вда́ти дѣ́ло сїѐ и҆скꙋ́сномꙋ въ живописа́нїи перводїа́конꙋ тобо́льскїѧ ка́ѳедры матѳе́ю, є҆гда́ же ѻ҆́бразъ се́й писа́ше, болѧ́щїй по ма́лꙋ цѣлѧ́шесѧ и҆ бцⷣѣ ᲂу҆се́рднѡ поѧ́ше:

Ра́дꙋйсѧ, цр҃и́це нбⷭ҇наѧ, ꙗ҆вле́нїемъ чтⷭ҇ны́ѧ твоеѧ̀ і҆кѡ́ны на́съ ѡ҆бра́довавшаѧ: ра́дꙋйсѧ, мт҃и бж҃їѧ, чꙋде́снымъ цѣле́нїемъ ѿ неѧ̀ на́съ ᲂу҆дивлѧ́ющаѧ.

Ра́дꙋйсѧ, странѣ̀ на́шей свѣ́тлое просвѣще́нїе: ра́дꙋйсѧ, землѝ на́шей несокрꙋши́мое ѡ҆гражде́нїе.

Ра́дꙋйсѧ, по вода́мъ пла́вающимъ тишино̀: ра́дꙋйсѧ, ѡ҆бꙋрева́емымъ небꙋ́рное приста́нище.

Ра́дꙋйсѧ, пꙋтеше́ствꙋющымъ ле́гкое прехожде́нїе: ра́дꙋйсѧ, блꙋжда́ющымъ млⷭ҇рдаѧ наста́внице.

Ра́дꙋйсѧ, трꙋжда́ющымсѧ бл҃го́е поко́ище: ра́дꙋйсѧ, ѡ҆бременє́ннымъ ти́хое прибѣ́жище.

Ра́дꙋйсѧ, въ бѣда́хъ сꙋ́щимъ ско́раѧ застꙋ́пнице: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ є҃

Бг҃оте́чнѣй ѕвѣздѣ̀, приве́дшей и҆ногда̀ волхвѡ́въ къ сл҃нцꙋ пра́вды хрⷭ҇тꙋ̀ бг҃ꙋ на́шемꙋ, подо́бнѡ бы́сть ꙗ҆вле́нїе і҆кѡ́ны твоеѧ̀, бжⷭ҇твеннаѧ дв҃о, въ предѣ́лѣхъ на́шихъ: ви́дѧще бо и҆ молѧ́щесѧ пред̾ не́ю, пра́ѻтцы на́ши и҆з̾ тебє̀ познава́хꙋ сн҃а твоегѡ̀, сп҃са на́шегѡ, мы́ же наꙋча́емсѧ ᲂу҆се́рднѣе пѣ́ти є҆мꙋ̀: А҆ллилꙋ́їа.

І҆́косъ є҃

Ви́дѣвше лю́дїе тобо́льстїи чтⷭ҇нꙋ́ю і҆кѡ́нꙋ бж҃їѧ мт҃ре, ꙗ҆ви́вшꙋю чꙋде́сное и҆сцѣле́нїе ᲂу҆се́рдствовавшемꙋ написа́ти ю҆̀, ꙗ҆́кѡ бжⷭ҇твенное сокро́вище прїѧ́ша ю҆̀ и҆ ꙗ҆́кѡ многосвѣ́тлый свѣти́льникъ поста́виша въ но́вомъ хра́мѣ, и҆́ми созда́нномъ, ра́дꙋющесѧ и҆ вопїю́ще къ бцⷣѣ:

Ра́дꙋйсѧ, свѣтоза́рное свѣти́ло, странꙋ̀ на́шꙋ ѡ҆зарѧ́ющее: ра́дꙋйсѧ, сп҃се́нїе дꙋша́мъ на́шимъ ᲂу҆строѧ́ющаѧ.

Ра́дꙋйсѧ, нбⷭ҇нымъ свѣ́томъ сердца̀ на̑ша просвѣща́ющаѧ: ра́дꙋйсѧ, ми́ръ, тишинꙋ̀ и҆ бл҃годе́нствїе на́мъ ꙗ҆влѧ́ющаѧ.

Ра́дꙋйсѧ, болѧ́щимъ дꙋхо́внѡ и҆ тѣле́снѡ здра́вїе подава́ющаѧ: ра́дꙋйсѧ, ѻ҆би́димыхъ свое́ю чⷭ҇тно́ю ри́зою покрыва́ющаѧ.

Ра́дꙋйсѧ, безнаде́жныхъ и҆звѣ́стное надѣ́ѧнїе: ра́дꙋйсѧ, младе́нцєвъ ра́зꙋмъ просвѣща́ющаѧ.

Ра́дꙋйсѧ, вдови́цъ и҆ сирѡ́тъ корми́тельнице: ра́дꙋйсѧ, наги́хъ ѡ҆дѣѧ́нїе и҆ плѣ́нныхъ и҆збавле́нїе.

Ра́дꙋйсѧ, просѧ́щымъ по́мощи ско́раѧ помо́щнице: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ ѕ҃

Проповѣ́дницы неле́стнїи вели́кагѡ млⷭ҇рдїѧ твоегѡ̀, влⷣчце, къ лю́демъ бы́ша всѝ прїѧ́вшїи чꙋдє́снаѧ и҆сцѣлє́нїѧ ѿ ст҃ы́ѧ і҆кѡ́ны твоеѧ̀: вси́ же слы́шавшїи и҆ ви́дѣвшїи бл҃года́тныѧ то́ки, и҆злива́ющїѧсѧ ѻ҆би́льнѡ ѿ тебє̀ на стра́ждꙋщихъ и҆ бѣ́дствꙋющихъ, вкꙋ́пѣ съ ни́ми ра́достнѡ воспѣва́хꙋ бг҃ꙋ: А҆ллилꙋ́їа.

І҆́косъ ѕ҃

Возсїѧ̀ блгⷣть ѿ ѻ҆́браза твоегѡ̀, дв҃о чⷭ҇таѧ, ꙗ҆́кѡ сл҃нце пресвѣ́тлое въ предѣ́лѣхъ на́шихъ, лꙋча́ми чꙋде́съ, и҆стека́ющихъ ѿ негѡ̀, гра́дъ на́шъ и҆ всѧ̑ гра́ды и҆ страны̀ не то́чїю землѝ сиби́рскїѧ, но и҆ рѡссі́йскїѧ ѡ҆зарѧ́ющаѧ, сегѡ̀ ра́ди недоꙋмѣва́юще и҆зрещѝ вели́чїе чꙋде́съ, ѿ і҆кѡ́ны твоеѧ̀ бы́вшихъ, бцⷣе, во ᲂу҆миле́нїи се́рдца, вѣ́рою и҆ любо́вїю вопїе́мъ тѝ:

Ра́дꙋйсѧ, че́рною не́мощїю ѡ҆держи́мыхъ и҆сцѣлѧ́ющаѧ: ра́дꙋйсѧ, болѧ́щихъ ѻ҆ча́ми ᲂу҆здравлѧ́ющаѧ.

Ра́дꙋйсѧ, падꙋ́чихъ болѣ́зней и҆збавлѧ́ющаѧ: ра́дꙋйсѧ, слѣпы́мъ зрѣ́нїе ѿверза́ющаѧ.

Ра́дꙋйсѧ, ѕлы̑ѧ де́моны ѿ люде́й ѿгонѧ́ющаѧ: ра́дꙋйсѧ, бѣснꙋ́ющымсѧ здра́вїе подава́ющаѧ.

Ра́дꙋйсѧ, разсла́бленныхъ ѿ ѻ҆дра̀ воздвиза́ющаѧ: ра́дꙋйсѧ, нѣмы̑мъ ѧ҆зы́къ и҆ глаго́ланїе возвраща́ющаѧ.

Ра́дꙋйсѧ, ѿ всѣ́хъ лю́тыхъ недꙋ́гѡвъ врачꙋ́ющаѧ: ра́дꙋйсѧ, въ со́нїихъ и҆ видѣ́нїихъ стра́ждꙋщимъ ꙗ҆влѧ́ющаѧсѧ.

Ра́дꙋйсѧ, ѿ всѧ́кихъ напа́стей чꙋде́снѡ свобожда́ющаѧ: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ з҃

Хотѧ́й просла́вити ст҃ꙋ́ю і҆кѡ́нꙋ твою̀, бцⷣе дв҃о, сн҃ъ тво́й и҆ бг҃ъ на́шъ гдⷭ҇ь і҆и҃съ хрⷭ҇то́съ, воѻ́чїю всѣ́хъ и҆злїѧ̀ ѿ неѧ̀ неисчерпа́емое чꙋде́съ мо́ре, въ не́мже всѝ погрꙋжа́ющїѧсѧ съ вѣ́рою и҆ ᲂу҆пова́нїемъ прїе́млютъ блгⷣть и҆сцѣле́нїй и҆, бл҃годарѧ́ще гдⷭ҇а, со стра́хомъ и҆ любо́вїю ᲂу҆миле́ннѡ вопїю́тъ є҆мꙋ̀: А҆ллилꙋ́їа.

І҆́косъ з҃

Но́ваѧ и҆ пресла́внаѧ чꙋдеса̀ блгⷣти твоеѧ̀, бцⷣе, ꙗ҆вѝ на́мъ гдⷭ҇ь, є҆гда̀ ст҃а́ѧ і҆кѡ́на твоѧ̀ носи́ма бѣ̀ по градѡ́мъ и҆ ве́сємъ страны̀ на́шеѧ: мно́зи бо вѣ́рꙋющїи внеза́пꙋ и҆сцѣлѧ́хꙋсѧ ѿ разноѻбра́зныхъ неисцѣ́льныхъ недꙋ́гѡвъ, и҆ невѣ́рнїи къ вѣ́рѣ ѡ҆браща́хꙋсѧ, со ᲂу҆дивле́нїемъ, ᲂу҆миле́нїемъ и҆ любо́вїю воспѣва́ѧ тебѣ̀:

Ра́дꙋйсѧ, всѧ́кїѧ болѣ̑зни и҆сцѣлѧ́ющаѧ: ра́дꙋйсѧ, всѧ̑ недꙋ́ги ѿгонѧ́ющаѧ.

Ра́дꙋйсѧ, любо́вїю серафі́мскою присногорѧ́щаѧ: ра́дꙋйсѧ, дꙋ́ши и҆ сердца̀ на̑ша любо́вїю бжⷭ҇твенною воспламенѧ́ющаѧ.

Ра́дꙋйсѧ, ѻ҆́гнь бжⷭ҇тва̀ въ себѣ̀ вмѣсти́вшаѧ: ра́дꙋйсѧ, пла́мѧ страсте́й на́шихъ и҆змѣнѧ́ющаѧ.

Ра́дꙋйсѧ, ѿ ѻ҆гнѧ̀ грѣхо́внагѡ вѣ́рꙋющихъ въ тѧ̀ соблюда́ющаѧ: ра́дꙋйсѧ, ѿ ѻ҆гнѧ̀ гее́нскагѡ лю́бѧщихъ тѧ̀ и҆збавлѧ́ющаѧ.

Ра́дꙋйсѧ, ѿ запале́нїѧ ѻ҆́гненнагѡ жили́ща на̑ша сохранѧ́ющаѧ: ра́дꙋйсѧ, свѣ́та твоегѡ̀ зарѧ́ми мра́къ невѣ́дѣнїѧ на́шегѡ разгонѧ́ющаѧ.

Ра́дꙋйсѧ, те́плаѧ на́ша застꙋ́пнице и҆ ᲂу҆се́рднаѧ къ бг҃ꙋ ѡ҆ на́съ моли́твеннице: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ и҃

Стра́нное видѣ́нїе чтⷭ҇ны́ѧ і҆кѡ́ны бг҃ома́тере, свы́ше ꙗ҆вле́нное съ предстоѧ́щими ст҃и́телемъ нїкола́емъ и҆ марі́ею є҆гѵ́петскою, разꙋмѣ́вше, ᲂу҆страни́мсѧ, мꙋ́жїе и҆ жены̑, мі́ра сꙋ́етнагѡ, ᲂу҆́мъ къ нбⷭ҇нымъ возводѧ́ще: сегѡ̀ бо ра́ди и҆ даде́сѧ на́мъ чꙋ́днаѧ і҆кѡ́на бцⷣы, да взира́юще на ню̀, го́рнѧѧ мꙋ́дрствꙋемъ, а҆ не земна́ѧ, вопїю́ще къ бг҃ꙋ: А҆ллилꙋ́їа.

І҆́косъ и҃

Всѧ̀ є҆сѝ въ вы́шнихъ, но и҆ ни́жнихъ не ѡ҆ставлѧ́еши, бцⷣе дв҃о, чꙋдесы̑ бо твои́ми, ѿ ст҃ы́ѧ і҆кѡ́ны твоеѧ̀, ꙗ҆́кѡ ѿ жива́гѡ и҆ незави́стнагѡ и҆сто́чника, и҆злива́ющимисѧ, при́снѡ на́съ просвѣща́еши, вѣ́рою къ тебѣ̀ притека́ющихъ и҆ зовꙋ́щихъ такова̑ѧ:

Ра́дꙋйсѧ, ни́щихъ дꙋ́хомъ неистощи́мое бога́тство и҆ ми́лостей бе́здно: ра́дꙋйсѧ, мт҃и чадолюби́ваѧ, печа́льныхъ незри́мое ᲂу҆тѣше́нїе.

Ра́дꙋйсѧ, голꙋби́це кро́ткаѧ, ти́хаѧ и҆ неѕло́биваѧ: ра́дꙋйсѧ, го́рлице бл҃гогла́снаѧ, ненави́димыхъ та́йное ᲂу҆спокое́нїе.

Ра́дꙋйсѧ, грѣ́шникѡвъ сп҃се́нїе и҆ къ бг҃ꙋ присвое́нїе: ра́дꙋйсѧ, правовѣ́рныхъ всѣ́хъ тве́рдое ѡ҆гражде́нїе.

Ра́дꙋйсѧ, неви́димое надѣ́ющымсѧ на тѧ̀ поможе́нїе и҆ застꙋпле́нїе: ра́дꙋйсѧ, а҆́гг҃льскїй ᲂу҆́ме, при́снѡ зрѧ́щїй бг҃а.

Ра́дꙋйсѧ, свѣтоза́рнаѧ ѕвѣздо̀ ᲂу҆́мнагѡ сл҃нца: ра́дꙋйсѧ, херꙋві́мѡвъ и҆ серафі́мѡвъ сла́внѣйшаѧ.

Ра́дꙋйсѧ, а҆рха́гг҃лѡвъ и҆ а҆́гг҃лѡвъ чтⷭ҇нѣ́йшаѧ: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ ѳ҃

Всѧ̀ страна̀ на́ша бг҃охрани́маѧ, млⷭ҇тьми твои́ми, бг҃ома́ти, ѡ҆бл҃года́тствованнаѧ, и҆мꙋ́щи і҆кѡ́нꙋ твою̀ чꙋдотво́рнꙋю въ щи́тъ и҆ ѡ҆гражде́нїе ѿ врагѡ́въ ви́димыхъ и҆ неви́димыхъ, незри́мою твое́ю по́мощїю побѣжда́етъ всѧ̑ сꙋпоста́ты своѧ̑, бг҃ꙋ же въ ра́дости се́рдца бл҃гоговѣ́йнѡ вопїе́тъ: А҆ллилꙋ́їа.

І҆́косъ ѳ҃

Вѣті́йство на́ше пѣ́сненное, ꙗ҆́кѡ дѣ́тское нѣмотствова́нїе, не довлѣ́етъ къ и҆зглаго́ланїю всѣ́хъ чꙋде́съ и҆ бл҃годѣѧ́нїй, тобо́ю, влⷣчце, ꙗ҆вле́нныхъ и҆ при́снѡ ꙗ҆влѧ́емыхъ на́мъ ѿ ди́вныѧ і҆кѡ́ны твоеѧ̀: сегѡ̀ ра́ди недоꙋмѣва́юще бл҃гохвали́ти тѧ̀ по достоѧ́нїю, со смире́нїемъ взыва́емъ тѝ:

Ра́дꙋйсѧ, сла́вѧщихъ тѧ̀ всегда̀ прославлѧ́ющаѧ: ра́дꙋйсѧ, ѿ ѻ҆гнѧ̀ гра́ды и҆ вє́си на́ши хожде́нїемъ і҆кѡ́ны твоеѧ̀ сохранѧ́ющаѧ.

Ра́дꙋйсѧ, хра́мы и҆ до́мы на̑ша і҆кѡ́ною твое́ю бл҃года́тнѡ посѣща́ющаѧ: ра́дꙋйсѧ, моли̑твы молѧ́щихсѧ тебѣ̀ къ бг҃ꙋ возносѧ́щаѧ.

Ра́дꙋйсѧ, рыда́нїй и҆ воздыха́нїй на́шихъ никогда́же ѿмета́ющаѧ: ра́дꙋйсѧ, прише́ствїемъ твоеѧ̀ і҆кѡ́ны ра́дости на̑ша ᲂу҆сꙋгꙋблѧ́ющаѧ.

Ра́дꙋйсѧ, всѧ̑ ско́рби на̑ша и҆ го́рькїѧ бѣды̑ є҆́ю ᲂу҆слажда́ющаѧ: ра́дꙋйсѧ, ᲂу҆ныва́ющихъ твои́мъ чл҃вѣколю́бїемъ ѡ҆бодрѧ́ющаѧ.

Ра́дꙋйсѧ, поклонѧ́ющымсѧ ꙗ҆вле́ннѣй твое́й і҆кѡ́нѣ ра́дость и҆ здра́вїе подава́ющаѧ: ра́дꙋйсѧ, дꙋ́ши вѣ́рныхъ млⷭ҇рдїемъ твои́мъ ᲂу҆милѧ́ющаѧ.

Ра́дꙋйсѧ, ра́досте на́ша, і҆кѡ́ною твое́ю ст҃о́ю при́снѡ на́съ ᲂу҆тѣша́ющаѧ: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ і҃

Сп҃стѝ хотѧ́й ро́дъ чл҃вѣ́ческїй ѿ вѣ́чнагѡ мꙋче́нїѧ и҆ да́ти є҆мꙋ̀ црⷭ҇тво нбⷭ҇ное, чл҃вѣколюби́вый гдⷭ҇ь дарова̀ на́мъ, грѣ̑шнымъ, мт҃рь свою̀ въ по́мощь, покро́въ и҆ защище́нїе: бꙋ́ди же на́мъ, ѡ҆ всебл҃га́ѧ, помо́щница, застꙋ́пница и҆ рꙋководи́тельница во все́мъ житїѝ на́шемъ, и҆ во и҆схо́дѣ и҆ по кончи́нѣ на́шей не ѡ҆ста́ви на́съ, ᲂу҆ми́льнѡ вопїю́щихъ: А҆ллилꙋ́їа.

І҆́косъ і҃

Стѣна̀ є҆сѝ вои́стиннꙋ неѡбори́маѧ, бцⷣе дв҃о, всѣ̑мъ къ тебѣ̀ прибѣга́ющымъ: никто́же бо притека́ѧй къ тебѣ̀ ѿхо́дитъ то́щь. Тѣ́мже ᲂу҆щедрѧ́еми млⷭ҇тїю твое́ю, во ᲂу҆миле́нїи дꙋшѝ мо́лимъ тѧ̀: покры́й, застꙋпѝ и҆ сп҃сѝ всѣ́хъ на́съ, безпомо́щныхъ, ѿ всѧ́кихъ бѣ́дъ, и҆скꙋше́нїй и҆ ѡ҆ѕлобле́нїй, тебѣ̀ съ любо́вїю взыва́ющихъ:

Ра́дꙋйсѧ, крѣ́пкаѧ защи́то возложи́вшихъ на тѧ̀ ᲂу҆пова́нїе: ра́дꙋйсѧ, во́инствꙋ спобора́ющаѧ.

Ра́дꙋйсѧ, сꙋдїѧ́мъ немздопрїе́мнымъ споспѣ́шнице: ра́дꙋйсѧ, наста́вникѡвъ и҆ дѣтоводи́телей вразꙋмле́нїе.

Ра́дꙋйсѧ, позна́нїѧ и҆́стины чⷭ҇тое зерца́ло: ра́дꙋйсѧ, сохране́нїѧ вѣ́ры крѣ́пкое забра́ло.

Ра́дꙋйсѧ, всебл҃га́ѧ ᲂу҆тѣ́шительнице несча́стныхъ: ра́дꙋйсѧ, сирота́мъ безпрїю̑тнымъ покрови́тельнице.

Ра́дꙋйсѧ, всѣ́хъ дѣте́й бл҃гословлѧ́ющаѧ: ра́дꙋйсѧ, всѧ́кꙋю ю҆́ность къ добрꙋ̀ направлѧ́ющаѧ.

Ра́дꙋйсѧ, всѣ́хъ во́зрастныхъ въ ст҃о́й жи́зни ᲂу҆крѣплѧ́ющаѧ: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ а҃і

Пѣ́нїѧ и҆ молє́нїѧ на̑ша пред̾ ст҃о́ю и҆ чꙋдотво́рною і҆кѡ́ною твое́ю, тебѣ̀ возноси́маѧ, прїи́мши, бл҃госе́рдаѧ влⷣчце, застꙋпѝ, сп҃сѝ, поми́лꙋй и҆ сохранѝ на́съ ѿ всѧ́кагѡ ѕла́гѡ ѡ҆бстоѧ́нїѧ, да ти́хое и҆ безмо́лвное житїѐ под̾ кро́вомъ твои́мъ поживе́мъ во всѧ́комъ бл҃гоче́стїи и҆ чистотѣ̀, и҆з̾ глꙋбины̀ дꙋшѝ ᲂу҆миле́ннѡ воспѣва́ѧ бг҃ꙋ: А҆ллилꙋ́їа.

І҆́косъ а҃і

Свѣтопрїе́мнꙋю свѣщꙋ̀ свѣ́та бжⷭ҇твеннагѡ, ꙗ҆́кѡ бцⷣꙋ и҆ мт҃рь свѣ́та невече́рнѧгѡ, разꙋмѣва́юще и҆ почита́юще тѧ̀, пречⷭ҇таѧ, ка́кѡ возмо́жемъ и҆зрещѝ бл҃года̑тнаѧ твоѧ̑ ѡ҆зарє́нїѧ, при́снѡ текꙋ́щаѧ ѿ і҆кѡ́ны твоеѧ̀, ꙗ҆́кѡ ѿ сл҃нца лꙋчеза́рнагѡ; ѻ҆ба́че ѡ҆заре́нїѧ твоегѡ̀ млⷭ҇тивагѡ, всебл҃га́ѧ, и҆́щꙋще, дерза́емъ воспѣва́ти тебѣ̀:

Ра́дꙋйсѧ, зарѐ незаходи́маѧ, свѣ́томъ вѣ́чнымъ на́съ ѡ҆сїѧва́ющаѧ: ра́дꙋйсѧ, лꙋно̀, ѿ сл҃нца пра́вды на́съ ѡ҆блистава́ющаѧ.

Ра́дꙋйсѧ, свѣти́льниче, на свѣ́щницѣ превы́шшемъ поста́вленный: ра́дꙋйсѧ, свѣщѐ неꙋгаси́маѧ ѻ҆гнѧ̀ невеще́ственнагѡ.

Ра́дꙋйсѧ, мт҃и свѣ́та и҆́стиннагѡ, бл҃гочести́выхъ дꙋ́ши просвѣща́ющаѧ: ра́дꙋйсѧ, свѣ́тъ ра́йскїѧ жи́зни на́мъ и҆сточа́ющаѧ.

Ра́дꙋйсѧ, при́снѡ бл҃жа́щихъ тѧ̀ пресвѣ́тло ᲂу҆бл҃жа́ющаѧ: ра́дꙋйсѧ, ᲂу҆се́рднѡ молѧ́щихсѧ тебѣ̀ свѣ́томъ блгⷣти ѡ҆зарѧ́ющаѧ.

Ра́дꙋйсѧ, всѧ́кꙋю ста́рость ѻ҆́бразомъ ст҃ы́ѧ жи́зни содѣ́ловающаѧ: ра́дꙋйсѧ, тмꙋ̀, въ не́йже ꙗ҆зы̑чницы, невѣ́рꙋющїи, є҆ретїцы̀ и҆ раско́льницы пребыва́ютъ, и҆стреблѧ́ющаѧ.

Ра́дꙋйсѧ, всѣ́хъ грѣ́шникѡвъ свѣ́томъ твои́мъ просвѣща́ющаѧ и҆ къ покаѧ́нїю приводѧ́щаѧ: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ в҃і

Блгⷣти зало́гъ да́вшаѧ на́мъ ст҃ꙋ́ю і҆кѡ́нꙋ твою̀, мт҃и бг҃а вы́шнѧгѡ, и҆спросѝ на́мъ ᲂу҆ нбⷭ҇нагѡ влⷣки, сн҃а твоегѡ̀ и҆ бг҃а на́шегѡ, блгⷣть ст҃а́гѡ дх҃а: воздви́гни на́съ и҆з̾ глꙋбины̀ грѣхо́вныѧ, просвѣтѝ серде́чныѧ ѻ҆́чи на̑ша къ зрѣ́нїю сп҃се́нїѧ, ѡ҆животворѝ сердца̀ на̑ша дꙋ́хомъ бл҃гоче́стїѧ и҆ стра́ха бж҃їѧ, дꙋ́хомъ чⷭ҇тоты̀ и҆ пра́вды, дꙋ́хомъ любвѐ и҆ млⷭ҇рдїѧ, да всегда̀ пое́мъ бг҃ꙋ: А҆ллилꙋ́їа.

І҆́косъ в҃і

Пою́ще твоѧ̑ дрє́внѧѧ и҆ нѡ́ваѧ млⷭ҇ти и҆ чꙋдеса̀, бг҃ороди́тельнице, хва́лимъ тѧ̀ всѝ, ꙗ҆́кѡ тве́рдꙋю и҆ наде́жнꙋю предста́тельницꙋ на́шꙋ, со ᲂу҆миле́нїемъ покланѧ́емсѧ тебѣ̀, вы́нꙋ молѧ́щейсѧ ѡ҆ на́съ и҆ бл҃готворѧ́щей на́мъ: вѣ́рꙋемъ бо и҆ ᲂу҆пова́емъ, ꙗ҆́кѡ и҆спро́сиши и҆ пода́си на́мъ всѧ̑ бл҃га́ѧ и҆ сп҃си́тельнаѧ, вре́меннаѧ и҆ вѣ́чнаѧ, воспѣва́ющымъ тѝ:

Ра́дꙋйсѧ, непосты́дное ᲂу҆пова́нїе въ животѣ̀, во и҆схо́дѣ и҆ по кончи́нѣ на́шей: ра́дꙋйсѧ, ᲂу҆пова́ющымъ на тѧ̀ ми́ренъ коне́цъ живота̀ сегѡ̀ подаю́щаѧ.

Ра́дꙋйсѧ, въ де́нь сꙋ́дный на́ша наде́ждо и҆ защище́нїе: ра́дꙋйсѧ, сꙋдїѝ пра́веднагѡ ᲂу҆моле́нїе.

Ра́дꙋйсѧ, всѣ́хъ ка́ющихсѧ грѣ́шникѡвъ прибѣ́жище и҆ застꙋпле́нїе: ра́дꙋйсѧ, всѣ́хъ пра́ведныхъ сла́во и҆ ᲂу҆тѣше́нїе.

Ра́дꙋйсѧ, ра́дость вы́нꙋ тебѣ̀ приносѧ́щихъ ра́дости вѣ́чныѧ сподоблѧ́ющаѧ: ра́дꙋйсѧ, слє́знаѧ молє́нїѧ на̑ша ми́лостивнѡ прїе́млющаѧ.

Ра́дꙋйсѧ, покро́вомъ твои́мъ ѿ врагѡ́въ ви́димыхъ и҆ неви́димыхъ на́съ покрыва́ющаѧ: ра́дꙋйсѧ, всѣ́хъ на́съ, грѣ́шныхъ, ко сп҃се́нїю и҆ воспрїѧ́тїю бл҃гъ вѣ́чныхъ наставлѧ́ющаѧ.

Ра́дꙋйсѧ, покланѧ́ющымсѧ і҆кѡ́нѣ твое́й и҆ тѧ̀ на по́мощь призыва́ющимъ ско́ро помога́ющаѧ: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ г҃і

Ѽ всебл҃га́ѧ мт҃и дв҃о, бцⷣе, при́снѡ бл҃годѣ́ющаѧ на́мъ во ст҃ѣ́й і҆кѡ́нѣ твое́й, ны́нѣшнее прїе́мши тебѣ̀ є҆ди́нѣй прикла́дное приноше́нїе, ѿ всѧ́кихъ на́съ бѣ́дъ, напа́стей и҆ скорбе́й вре́менныхъ и҆ вѣ́чныхъ и҆зба́ви и҆ сподо́би на́съ, рабѡ́въ твои́хъ, въ селе́нїихъ ра́йскихъ водвори́тисѧ, да во всѧ̑ вѣ́ки пое́мъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆рха́гг҃лы и҆ а҆́гг҃лы пою́тъ тебѣ̀, дв҃ѣ чи́стой, немѡ́лчныѧ пѣ́сни на нб҃сѝ. Мы́ же, грѣ́шнїи, на землѝ прекло́ньше колѣ̑на дꙋ́шъ и҆ серде́цъ на́шихъ пред̾ пречⷭ҇тымъ твои́мъ ѻ҆́бразомъ со слеза́ми ᲂу҆миле́нїѧ, бре́нными ᲂу҆ста́ми вопїе́мъ тѝ:

Ра́дꙋйсѧ, застꙋ́пнице на́ша ᲂу҆се́рднаѧ: ра́дꙋйсѧ, мт҃и на́ша премлⷭ҇рдаѧ.

Ра́дꙋйсѧ, сла́во на́ша непреходѧ́щаѧ: ра́дꙋйсѧ, бога́тство на́ше неистощи́мое.

Ра́дꙋйсѧ, помо́щнице на́ша непрело́жнаѧ: ра́дꙋйсѧ, покрови́тельнице на́ша при́снаѧ.

Ра́дꙋйсѧ, ра́досте на́ша, ѿ всѧ́кїѧ скве́рны пло́ти и҆ дꙋ́ха на́съ ѡ҆чища́ющаѧ: ра́дꙋйсѧ, цѣли́тельнице на́ша, болѣ́зней дꙋше́вныхъ и҆ тѣле́сныхъ на́съ и҆збавлѧ́ющаѧ.

Ра́дꙋйсѧ, похвало̀ на́ша, ра́достей дꙋхо́вныхъ на́съ не лиша́ющаѧ: ра́дꙋйсѧ, влⷣчце на́ша, по́мощїю твое́ю недꙋ́ги на̑ша и҆сцѣлѧ́ющаѧ.

Ра́дꙋйсѧ, прибѣ́жище на́ше, ѿ врагѡ́въ ви́димыхъ и҆ неви́димыхъ на́съ покрыва́ющаѧ: ра́дꙋйсѧ, ст҃а́ѧ, ст҃ы́хъ бо́льшаѧ.

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Конда́къ а҃

И҆збра́нной предвѣ́чнымъ цр҃е́мъ въ на́ше вѣ́рныхъ сп҃се́нїе нб҃сѐ и҆ землѝ цр҃и́цѣ, бл҃года́рствєнныѧ похвалы̀ прино́симъ тѝ, бцⷣе! Ты́ же, ꙗ҆́кѡ и҆мꙋ́щаѧ держа́вꙋ непобѣди́мꙋю и҆ млⷭ҇рдїе неизрече́нное, ѿ всѧ́кихъ на́съ бѣ́дъ свободѝ и҆ всѧ̑ бл҃га̑ѧ на́мъ да́рꙋй, да зове́мъ тѝ:

Ра́дꙋйсѧ, мт҃и дв҃о, всепѣ́таѧ хрⷭ҇тїа́нъ похвало̀.

Моли́твы

Ѽ прест҃а́ѧ влⷣчце моѧ̀ бцⷣе, млⷭ҇рдїѧ сꙋ́щи и҆сто́чникъ, покро́ве, ᲂу҆пова́нїе и҆ прибѣ́жище хрⷭ҇тїа́нъ! Тебѣ̀, всеси́льнѣй предста́тельнице и҆ спорꙋ́чнице покаѧ́нїѧ и҆ сп҃се́нїѧ моегѡ̀, а҆́зъ, грѣ́шный ра́бъ тво́й, врꙋча́ю дꙋ́шꙋ и҆ тѣ́ло моѐ, вхо́ды и҆ и҆схо́ды моѧ̑, вѣ́рꙋ и҆ жи́тельство моѐ, кончи́нꙋ и҆ число̀ дне́й мои́хъ, глаго́лы и҆ помышле́нїѧ моѧ̑, дѣла̀ и҆ начина́нїѧ моѧ̑: ты́ же, млⷭ҇тиваѧ мт҃и бж҃їѧ, мно́ю рꙋково́дствꙋй, покрыва́й, соблюда́й и҆ сп҃са́й мѧ̀ ѿ всѣ́хъ вра́жескихъ ко́зней невреди́мо, да немо́лчнѡ, до послѣ́днѧгѡ и҆здыха́нїѧ моегѡ̀, взыва́ю тѝ: ра́дꙋйсѧ, невѣ́сто неневѣ́стнаѧ! Ра́дꙋйсѧ, ст҃а́ѧ, ст҃ы́хъ бо́льшаѧ! Прест҃а́ѧ бцⷣе, сп҃сѝ мѧ̀! А҆ми́нь.