Канон Пресвятой Богородице пред иконой «Абалакская» («Знамение»)

Прекра́сный хра́ме Трисо́лнечнаго Све́та, украси́ моя́ чу́вства, молю́ся, да целому́дрен сы́й, честно́е Твое́ во Абала́це о́браза явле́ние воспою́, Чи́стая.

Ра́дуяся, к Твое́й честне́й ико́не припа́даю, Пречи́стая, ду́шу мою́ просвети́, те́ло от скве́рны очи́сти и, от лю́тых мя́ неду́гов свободи́вши, покажи́ прича́стника Небе́снаго Ца́рствия.

Изнемога́ющий у́м мо́й напра́ви, молю́ Тя, Еди́на Присноде́во, к позна́нию Еди́наго Су́щаго Бо́га, и щедролю́бие да́руй ми́, и благода́тию Христо́вою украси́ мя, Богоблагода́тная.

Зря́щи грехо́вность и ху́дость естества́ моего́, молю́ Тя, Де́во: да́ждь ми́ позна́ние моея́ не́мощи, да слеза́ми мно́гими омы́ю скве́рное мое́ житие́, Еди́на Богоблаже́нная.

Ра́ди ми́лости Твоея́ низложи́ во мне́ прило́ги бесо́вския, да, у́м очи́стив и се́рдце уцелому́дрив, к и́стинному богопозна́нию устремлю́ся, Еди́на Де́во Всепе́тая.

Изво́лила еси́ столпо́м о́блачным яви́ти добро́ту о́браза Твоего́ вдови́це смире́нней, та́ко и ны́не при́зри на рабы́ Твоя́, призыва́ющия Тя́ и тре́бующия Твоея́ по́мощи, Благода́тная.

Бу́дущее муче́ние, я́ко наказа́ние за суету́ дея́ний грехо́вных, и кра́ткий все́х веще́й и всего́ ми́ра тле́ннаго коне́ц, помышля́ти сподо́би мя́, Де́во, да благода́тию Сы́на Твоего́, на пу́ть и́стиннаго покая́ния наста́влен, ве́чнаго осужде́ния избе́гну, Пренепоро́чная.

Люби́ти бли́жняго и покрыва́ти согреше́ния его́ да́ждь ми́, Де́во, честолю́бие же, осужде́ние и праздносло́вие отдали́ от мене́, да плоды́ досто́йны принесу́ Сы́ну Твоему́, Еди́на Пречи́стая.

О Тебе́, Богома́ти, небе́сное торжеству́ет сосло́вие, с ни́мже и мы́, земноро́днии, пра́зднуем дне́сь, прославля́юще явле́ние о́браза Твоего́, Пречи́стая.

Се́рдце мое́ ожесточе́нное умягчи́, Де́во, и росо́ю милосе́рдия напои́ изсо́хшую ду́шу мою́, да, бли́жнему своему́ и́скренне послужи́в, просла́влю Тя́, Богоневе́сто Влады́чице.

Еди́на Присноде́во, от тле́нных и вре́менных у́м мо́й отврати́ и, милосе́рдием Твои́м покры́вши, пла́мень страсте́й мои́х угаси́.

Ра́бское сребролю́бие и забве́ние благоче́стия потреби́ от правосла́вных, Влады́чице, да, жи́знь нескве́рную восприе́мше, невозбра́нно еди́ными усты́ восхва́лят Тя́, Присноде́во.

Ди́внаго о́браза Богома́тере явле́ние, в не́мже святи́тель Никола́й наставля́ет вдови́цу чи́стую о Твое́м зна́мении пове́дати лю́дем, Пренепоро́чная, да, тьму́ суеве́рия отгна́вши, и́стинный све́т спасе́ния восприи́мут.

Испо́лни ра́дости се́рдце мое́, Пречи́стая, и, лю́тых собла́знов изба́вльши, мглу́ грехо́вную разве́й и бла́гостию Твое́ю хра́м чистоты́ и вся́кия доброде́тели мя́ соде́лай.

Еди́но души́ моея́ упова́ние, Богоро́дице, кра́сная ми́ра сего́ возненави́дети мя́ наста́ви, молю́ Тя, Чи́стая, да помраче́ния мы́сленнаго изба́влься, улучу́ нетле́нное Сы́на Твоего́ насле́дие.

Молю́ Тя, Влады́чице, па́мять сме́ртную и благи́м воздая́ние во мне́ утверди́, да, сия́ вы́ну во уме́ содержа́, вся́кая беззако́ния оста́влю и Ца́рствия Небе́снаго дости́гну.

Возводя́щи лю́ди от тьмы́ грехо́вныя явле́нием о́браза Твоего́, Влады́чице, подае́ши заступле́ние и предста́тельство, да еди́ными усты́ и чи́стым се́рдцем просла́вят Тя́, Еди́на Пречи́стая.

Сло́ва Бо́жия Роди́тельнице, за́висти грехо́вныя изба́ви мя́, да, и́скреннее братолю́бие явля́я, жи́зни ве́чныя в Ца́рстве Сы́на Твоего́ сподо́блюся, Преблагослове́нная.

Еди́на Богома́ти, ра́дости мое́ се́рдце испо́лни и, печа́ли мглу́ грехо́вную ско́ро потребля́ющи, наста́ви мя́ пе́ти: ра́дуйся, Благода́тная, Спа́са Христа́ на́м ро́ждшая.

Пресвята́я Богоро́дице, благода́тию Твое́ю любо́вь к Сы́ну Твоему́ во мне́ возгре́й и бли́жнему моему́ от души́ благотвори́ти наста́ви, да не пре́дан бу́ду Суду́ без ми́лости, я́ко не сотвори́вый ми́лости, Всенепоро́чная.

А́нгельский ли́к на небеси́ песносло́вит пресве́тлое Твое́ явле́ние и челове́ческий ро́д восхваля́ет Тя́ на земли́, Пренепоро́чная Богоро́дице, я́ко Ма́ти су́щи Живота́, мо́лиши о на́с Сы́на Твоего́, Христа́ Бо́га на́шего, пою́щих: отце́в Бо́же, благослове́н еси́.

Я́дию в тле́ние па́дших лю́те Рождество́м Твои́м возста́вила еси́, Богоро́дице Де́во. Сего́ ра́ди презре́ние вре́менных и жела́ние бла́г ве́чных пода́ждь ве́рою пою́щим: отце́в Бо́же, благослове́н еси́.

Бесо́вския прило́ги потребля́ющи, по́хоти плотски́я укроти́ во мне́, Де́во, и, души́ мое́й здра́вие да́рующи, сподо́би вку́пе со святы́ми пе́ти: отце́в Бо́же, благослове́н еси́.

Оскверни́х ду́шу мою́ греха́ми мно́гими и невоздержа́нием вся́ческим сотвори́х себе́ непотре́бна пред Тобо́ю, Пречи́стая Влады́чице, но очи́сти мя́ и на богоуго́дное житие́ наста́ви, да со святы́ми вку́пе воспою́: отце́в Бо́же, благослове́н еси́.

Грехо́вное томле́ние души́ моея́ утоли́, Богоро́дице, росо́ю же благода́ти Твоея́ со́вестное жже́ние угаси́ и, от клеветы́ наве́тующих изба́вльши, не́нависть и памятозло́бие отврати́ от мене́, да благода́рне воспою́: хвали́те Бо́га и превозноси́те Его́ во вся́ ве́ки.

О́браз Тво́й, Богоро́дице, во Абала́це я́вльшийся, по́мощь и заступле́ние подае́т все́м, с ве́рою к нему́ притека́ющим и благода́рне вопию́щим: хвали́те Бо́га и превозноси́те Его́ во вся́ ве́ки.

Ра́дость вме́сто печа́ли души́ мое́й пода́ждь, Всечи́стая, и ми́лостию Твое́ю утверди́ в ми́ре се́рдце мое́, мяте́ж ми́ра сего́ потребля́ющи, да благода́рне воспою́: хвали́те Бо́га и превозноси́те Его́ во вся́ ве́ки.

О, Пренепоро́чная Де́во, терпе́ние тве́рдое да́руй ми́ во искуше́нии, кро́тостию и незло́бием испо́лни мя́ во озлобле́нии, да, ра́дуяся, воспою́: хвали́те Бо́га и превозноси́те Его́ во вся́ ве́ки.

До́м Пречи́стыя Богоро́дицы яви́ся оби́тель Абала́кская, в не́мже чудотво́рный о́браз пребыва́ет, я́ко зна́мение спасе́ния земли́ Сиби́рстей и все́м, с ве́рою к нему́ притека́ющим.

Испо́лни ра́дости се́рдце мое́, Де́во Чи́стая, уныва́ющаго мя́ оживи́ и отча́янием па́дшаго возста́ви, ле́ность же души́ моея́ потребля́ющи, во вся́цей доброде́тели укрепи́, да со безпло́тными ли́ки непреста́нно Тя́ велича́ю.

Целому́дренно се́рдце сози́жди во мне́, Присноде́во Богоро́дице, ко исполне́нию во́ли Сы́на Твоего́ при́сно наставля́ющи, и в моли́тве постоя́нство да́руй ми́, Путеводи́тельнице моего́ спасе́ния.

Еди́ная Пречи́стая Чи́стая Присноде́во, мно́гия ми́лости о́бразом Твои́м чудотво́рным во Абала́це на́м яви́вшая, ны́не благода́рственное славосло́вие воспева́ем Ти́: ра́дуйся, Благода́тная, земли́ Сиби́рстей Покро́в и Утвержде́ние.

Прекра́сный хра́ме трисл҃нечнаго свѣ́та, ᲂу҆красѝ моѧ̑ чꙋ̑вства, молю́сѧ, да цѣломꙋ́дренъ сы́й, чтⷭ҇но́е твоѐ во а҆бала́цѣ ѻ҆́браза ꙗ҆вле́нїе воспою̀, чⷭ҇таѧ.

Ра́дꙋѧсѧ, къ твое́й чтⷭ҇нѣ́й і҆кѡ́нѣ припа́даю, пречⷭ҇таѧ, дꙋ́шꙋ мою̀ просвѣтѝ, тѣ́ло ѿ скве́рны ѡ҆чи́сти, и҆ ѿ лю́тыхъ мѧ̀ недꙋ́гѡвъ свободи́вши, покажѝ прича́стника нбⷭ҇нагѡ црⷭ҇твїѧ.

И҆знемога́ющїй ᲂу҆́мъ мо́й напра́ви, молю́ тѧ, є҆ди́на приснодв҃о, къ позна́нїю є҆ди́нагѡ сꙋ́щагѡ бг҃а, и҆ щедролю́бїе да́рꙋй мѝ, и҆ бл҃года́тїю хрⷭ҇то́вою ᲂу҆краси́ мѧ, бг҃обл҃года́тнаѧ.

Зрѧ́щи грѣхо́вность и҆ хꙋ́дость є҆стества̀ моегѡ̀, молю́ тѧ, дв҃о: да́ждь мѝ позна́нїе моеѧ̀ не́мощи, да слеза́ми мно́гими ѡ҆мы́ю скве́рное моѐ житїѐ, є҆ди́на бг҃обл҃же́ннаѧ.

Ра́ди млⷭ҇ти твоеѧ̀ низложѝ во мнѣ̀ прило́ги бѣсѡ́вскїѧ, да ᲂу҆́мъ ѡ҆чи́стивъ и҆ се́рдце ᲂу҆цѣломꙋ́дривъ, къ и҆́стинномꙋ бг҃опозна́нїю ᲂу҆стремлю́сѧ, є҆ди́на дв҃о всепѣ́таѧ.

И҆зво́лила є҆сѝ столпо́мъ ѻ҆́блачнымъ ꙗ҆ви́ти добро́тꙋ ѻ҆́браза твоегѡ̀ вдови́цѣ смире́ннѣй, та́кѡ и҆ ны́нѣ при́зри на рабы̑ твоѧ̑, призыва́ющыѧ тѧ̀ и҆ тре́бꙋющыѧ твоеѧ̀ по́мощи, бл҃года́тнаѧ.

Бꙋ́дꙋщее мꙋче́нїе, ꙗ҆́кѡ наказа́нїе за сꙋетꙋ̀ дѣѧ́нїй грѣхо́вныхъ, и҆ кра́ткїй всѣ́хъ веще́й и҆ всегѡ̀ мі́ра тлѣ́ннагѡ коне́цъ, помышлѧ́ти сподо́би мѧ̀, дв҃о, да бл҃года́тїю сн҃а твоегѡ̀, на пꙋ́ть и҆́стиннагѡ покаѧ́нїѧ наста́вленъ, вѣ́чнагѡ ѡ҆сꙋжде́нїѧ и҆збѣ́гнꙋ, пренепоро́чнаѧ.

Люби́ти бли́жнѧго и҆ покрыва́ти согрѣшє́нїѧ є҆гѡ̀ да́ждь мѝ, дв҃о, честолю́бїе же, ѡ҆сꙋжде́нїе и҆ праздносло́вїе ѿдалѝ ѿ менє̀, да плоды̀ достѡ́йны принесꙋ̀ сн҃ꙋ твоемꙋ̀, є҆ди́на пречⷭ҇таѧ.

Ѡ҆ тебѣ̀, бг҃омт҃и, нбⷭ҇ное торжествꙋ́етъ сосло́вїе, съ ни́мже и҆ мы̀ земноро́днїи пра́зднꙋемъ дне́сь, прославлѧ́юще ꙗ҆вле́нїе ѻ҆́браза твоегѡ̀, пречⷭ҇таѧ.

Се́рдце моѐ ѡ҆жесточе́нное ᲂу҆мѧгчѝ, дв҃о, и҆ росо́ю млⷭ҇рдїѧ напоѝ и҆зсо́хшꙋю дꙋ́шꙋ мою̀, да бли́жнемꙋ своемꙋ̀ и҆́скреннѣ послꙋжи́въ, просла́влю тѧ̀, бг҃оневѣ́сто влⷣчце.

Е҆ди́на приснодв҃о, ѿ тлѣ́нныхъ и҆ вре́менныхъ ᲂу҆́мъ мо́й ѿвратѝ, и҆ млⷭ҇рдїемъ твои́мъ покры́вши, пла́мень страсте́й мои́хъ ᲂу҆гасѝ.

Ра́бское сребролю́бїе и҆ забве́нїе бл҃гоче́стїѧ потребѝ ѿ правосла́вныхъ, влⷣчце, да жи́знь нескве́рнꙋю воспрїе́мше, невозбра́ннѡ є҆ди́ными ᲂу҆сты̀ восхва́лѧтъ тѧ̀, приснодв҃о.

Ди́внагѡ ѻ҆́браза бг҃омт҃ре ꙗ҆вле́нїе, въ не́мже ст҃и́тель нїкола́й наставлѧ́етъ вдови́цꙋ чи́стꙋю ѡ҆ твое́мъ зна́менїи повѣ́дати лю́демъ, пренепоро́чнаѧ, да тьмꙋ̀ сꙋевѣ́рїѧ ѿгна́вши, и҆́стинный свѣ́тъ сп҃се́нїѧ воспрїи́мꙋтъ.

И҆спо́лни ра́дости се́рдце моѐ, пречⷭ҇таѧ, и҆ лю́тыхъ собла́знѡвъ и҆зба́вльши, мглꙋ̀ грѣхо́внꙋю развѣ́й и҆ бл҃гостїю твое́ю хра́мъ чистоты̀ и҆ всѧ́кїѧ добродѣ́тели мѧ̀ содѣ́лай.

Е҆ди́но дꙋшѝ моеѧ̀ ᲂу҆пова́нїе, бцⷣе, кра̑снаѧ мі́ра сегѡ̀ возненави́дѣти мѧ̀ наста́ви, молю́ тѧ, чⷭ҇таѧ, да помраче́нїѧ мы́сленнагѡ и҆зба́вльсѧ, ᲂу҆лꙋчꙋ̀ нетлѣ́нное сн҃а твоегѡ̀ наслѣ́дїе.

Молю́ тѧ, влⷣчце, па́мѧть сме́ртнꙋю и҆ бл҃ги̑мъ воздаѧ́нїе во мнѣ̀ ᲂу҆твердѝ, да сїѧ̑ вы́нꙋ во ᲂу҆мѣ̀ содержа̀, всѧ̑каѧ беззакѡ́нїѧ ѡ҆ста́влю и҆ црⷭ҇твїѧ нбⷭ҇нагѡ дости́гнꙋ.

Возводѧ́щи лю́ди ѿ тьмы̀ грѣхо́вныѧ ꙗ҆вле́нїемъ ѻ҆́браза твоегѡ̀, влⷣчце, подае́ши застꙋпле́нїе и҆ предста́тельство, да є҆ди́ными ᲂу҆сты̀ и҆ чи́стымъ се́рдцемъ просла́вѧтъ тѧ̀, є҆ди́на пречⷭ҇таѧ.

Сло́ва бж҃їѧ роди́тельнице, за́висти грѣхо́вныѧ и҆зба́ви мѧ̀, да и҆́скреннее братолю́бїе ꙗ҆влѧ́ѧ, жи́зни вѣ́чныѧ въ црⷭ҇твѣ сн҃а твоегѡ̀ сподо́блюсѧ, пребл҃гослове́ннаѧ.

Е҆ди́на бг҃омт҃и, ра́дости моѐ се́рдце и҆спо́лни, и҆ печа́ли мглꙋ̀ грѣхо́внꙋю ско́рѡ потреблѧ́ющи, наста́ви мѧ̀ пѣ́ти: ра́дꙋйсѧ, бл҃года́тнаѧ, сп҃са хрⷭ҇та̀ на́мъ ро́ждшаѧ.

Прест҃а́ѧ бцⷣе, бл҃года́тїю твое́ю любо́вь къ сн҃ꙋ твоемꙋ̀ во мнѣ̀ возгрѣ́й и҆ бли́жнемꙋ моемꙋ̀ ѿ дꙋшѝ бл҃готвори́ти наста́ви, да не пре́данъ бꙋ́дꙋ сꙋдꙋ̀ без̾ млⷭ҇ти, ꙗ҆́кѡ не сотвори́вый млⷭ҇ти, всенепоро́чнаѧ.

А҆́гг҃льскїй ли́къ на нб҃сѝ пѣсносло́витъ пресвѣ́тлое твоѐ ꙗ҆вле́нїе и҆ человѣ́ческїй ро́дъ восхвалѧ́етъ тѧ̀ на землѝ, пренепоро́чнаѧ бцⷣе, ꙗ҆́кѡ мт҃и сꙋ́щи живота̀, мо́лиши ѡ҆ на́съ сн҃а твоегѡ̀, хрⷭ҇та̀ бг҃а на́шегѡ, пою́щихъ: ѻ҆тцє́въ бж҃е, бл҃гослове́нъ є҆сѝ.

Ꙗ҆́дїю въ тлѣ́нїе па́дшихъ лю́тѣ ржⷭ҇тво́мъ твои́мъ возста́вила є҆сѝ, бцⷣе дв҃о. сегѡ̀ ра́ди презрѣ́нїе вре́менныхъ и҆ жела́нїе бла̑гъ вѣ́чныхъ пода́ждь вѣ́рою пою́щымъ: ѻ҆тцє́въ бж҃е, бл҃гослове́нъ є҆сѝ.

Бѣсѡ́вскїѧ прило́ги потреблѧ́ющи, по́хѡти плотскі̑ѧ ᲂу҆кротѝ во мнѣ̀, дв҃о, и҆ дꙋшѝ мое́й здра́вїе да́рꙋющи, сподо́би вкꙋ́пѣ со ст҃ы́ми пѣ́ти: ѻ҆тцє́въ бж҃е, бл҃гослове́нъ є҆сѝ.

Ѡ҆скверни́хъ дꙋ́шꙋ мою̀ грѣха́ми мно́гими и҆ невоздержа́нїемъ всѧ́ческимъ сотвори́хъ себѐ непотре́бна пред̾ тобо́ю, пречⷭ҇таѧ влⷣчце, но ѡ҆чи́сти мѧ̀ и҆ на бг҃оꙋго́дное житїѐ наста́ви, да со ст҃ы́ми вкꙋ́пѣ воспою̀: ѻ҆тцє́въ бж҃е, бл҃гослове́нъ є҆сѝ.

Грѣхо́вное томле́нїе дꙋшѝ моеѧ̀ ᲂу҆толѝ, бцⷣе, росо́ю же бл҃года́ти твоеѧ̀ со́вѣстное жже́нїе ᲂу҆гасѝ, и҆ ѿ клеветы̀ навѣ́тꙋющихъ и҆зба́вльши, не́нависть и҆ памѧтоѕло́бїе ѿвратѝ ѿ менє̀, да бл҃года́рнѣ воспою̀: хвали́те бг҃а и҆ превозноси́те є҆го̀ во всѧ̑ вѣ́ки.

Ѻ҆́бразъ тво́й, бцⷣе, во а҆бала́цѣ ꙗ҆́вльшїйсѧ, по́мощь и҆ застꙋпле́нїе подае́тъ всѣ̑мъ, съ вѣ́рою къ немꙋ̀ притека́ющымъ и҆ бл҃года́рнѣ вопїю́щымъ: хвали́те бг҃а и҆ превозноси́те є҆го̀ во всѧ̑ вѣ́ки.

Ра́дость вмѣ́стѡ печа́ли дꙋшѝ мое́й пода́ждь, всечⷭ҇таѧ, и҆ млⷭ҇тїю твое́ю ᲂу҆твердѝ въ ми́рѣ се́рдце моѐ, мѧте́жъ мі́ра сегѡ̀ потреблѧ́ющи, да бл҃года́рнѣ воспою̀: хвали́те бг҃а и҆ превозноси́те є҆го̀ во всѧ̑ вѣ́ки.

ѽ пренепоро́чнаѧ дв҃о, терпѣ́нїе тве́рдое да́рꙋй мѝ во и҆скꙋше́нїи, кро́тостїю и҆ неѕло́бїемъ и҆спо́лни мѧ̀ во ѡ҆ѕлобле́нїи, да ра́дꙋѧсѧ, воспою̀: хвали́те бг҃а и҆ превозноси́те є҆го̀ во всѧ̑ вѣ́ки.

До́мъ пречⷭ҇тыѧ бцⷣы ꙗ҆ви́сѧ ѻ҆би́тель а҆бала́кскаѧ, въ не́мже чꙋдотво́рный ѻ҆́бразъ пребыва́етъ, ꙗ҆́кѡ зна́менїе сп҃се́нїѧ землѝ сиби́рстѣй и҆ всѣ̑мъ, съ вѣ́рою къ немꙋ̀ притека́ющымъ.

И҆спо́лни ра́дости се́рдце моѐ, дв҃о чⷭ҇таѧ, ᲂу҆ныва́ющаго мѧ̀ ѡ҆живѝ и҆ ѿча́ѧнїемъ па́дшаго возста́ви, лѣ́ность же дꙋшѝ моеѧ̀ потреблѧ́ющи, во всѧ́цѣй добродѣ́тели ᲂу҆крѣпѝ, да со безпло́тными ли̑ки непреста́ннѡ тѧ̀ велича́ю.

Цѣломꙋ́дренно се́рдце сози́жди во мнѣ̀, приснодв҃о бцⷣе, ко и҆сполне́нїю во́ли сн҃а твоегѡ̀ при́снѡ наставлѧ́ющи, и҆ въ мл҃твѣ постоѧ́нство да́рꙋй мѝ, пꙋтеводи́тельнице моегѡ̀ сп҃се́нїѧ.

Е҆ди́наѧ пречⷭ҇таѧ чⷭ҇таѧ приснодв҃о, мнѡ́гїѧ млⷭ҇ти ѻ҆́бразомъ твои́мъ чꙋдотво́рнымъ во а҆бала́цѣ на́мъ ꙗ҆ви́вшаѧ, ны́нѣ бл҃года́рственное славосло́вїе воспѣва́емъ тѝ: ра́дꙋйсѧ, бл҃года́тнаѧ, землѝ сиби́рстѣй покро́въ и҆ ᲂу҆твержде́нїе.