Православный календарь
Размер шрифта:

Ака́ѳістъ

А҆ка́ѳїстъ ст҃ѣ́й равноапⷭ҇льнѣй марі́и магдали́нѣ.

Св. равноап. Марии Магдалины, мироносицы (I) 4 августа 2026

Конда́къ а҃

И҆збра́ннаѧ гдⷭ҇емъ къ равноапⷭ҇льномꙋ слꙋже́нїю, ст҃а́ѧ марі́е магдали́но, возлю́бленномꙋ тѝ хрⷭ҇тꙋ̀ послѣ́довала є҆сѝ: тѣ́мже пѣ́сньми съ любо́вїю восхвалѧ́емъ тѧ̀. Ты́ же, ꙗ҆́кѡ и҆мꙋ́щаѧ дерзнове́нїе ве́лїе ко гдⷭ҇ꙋ, ѿ всѧ́кихъ на́съ бѣ́дъ мл҃твами твои́ми и҆зба́ви, да съ ра́достїю зове́мъ тѝ:

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

І҆́косъ а҃

А҆́гг҃лѡвъ творе́цъ и҆ гдⷭ҇ь си́лъ, пред̾ꙋвѣ́дѣвый бл҃го́е произволе́нїе твоѐ, ст҃а́ѧ мѷроно́сице, ѿ гра́да магдалы̀ и҆збра́ тѧ, свободи́въ ѿ дїа́вольскїѧ сѣ́ти: ты́ же по си́хъ вѣ́рнаѧ слꙋжи́тельница гдⷭ҇еви ꙗ҆ви́ласѧ є҆сѝ, ревнꙋ́ющи ѡ҆ прославле́нїи є҆гѡ̀ житїе́мъ и҆ слꙋже́нїемъ. Мы́ же чꙋдѧ́щесѧ таково́мꙋ ѡ҆ тебѣ̀ бж҃їю смотре́нїю, во ᲂу҆миле́нїи серде́цъ зове́мъ тѝ:

Ра́дꙋйсѧ, сн҃омъ бж҃їимъ и҆з̾ тьмы̀ дїа́вольскїѧ въ чꙋ́дный свѣ́тъ є҆гѡ̀ призва́ннаѧ: ра́дꙋйсѧ, мі́рꙋ всемꙋ̀ провозвѣ́стницею си́лы бж҃їѧ ꙗ҆́вльшаѧсѧ.

Ра́дꙋйсѧ, дꙋше́ю твое́ю бл҃года́тнѡ ѡ҆бнови́вшаѧсѧ: ра́дꙋйсѧ, си́лꙋ вра́жїю до́брѣ побѣди́вшаѧ.

Ра́дꙋйсѧ, бл҃года́тїю хрⷭ҇то́вою тѣ́ломъ и҆ дꙋ́хомъ до конца̀ чи́ста пребы́вшаѧ: ра́дꙋйсѧ, съ чистото́ю се́рдца и҆ нищетꙋ̀ дꙋхо́внꙋю до конца̀ сохрани́вшаѧ.

Ра́дꙋйсѧ, крѣ́пкою вѣ́рою и҆ те́плою любо́вїю ко хрⷭ҇тꙋ̀ бг҃ꙋ просїѧ́вшаѧ: ра́дꙋйсѧ, вѣ́рнѡ томꙋ̀ да́же до сме́рти послꙋжи́вшаѧ.

Ра́дꙋйсѧ, пе́рвѣйши всѣ́хъ воскрⷭ҇шаго хрⷭ҇та̀ ᲂу҆зрѣ́ти сподо́бившаѧсѧ: ра́дꙋйсѧ, а҆́гг҃льскою бесѣ́дою почте́ннаѧ.

Ра́дꙋйсѧ, про́повѣдь є҆ѵⷢ҇лїа въ сокро́вище се́рдца своегѡ̀ вмѣсти́вшаѧ: ра́дꙋйсѧ, про́повѣдь воскрⷭ҇нїѧ а҆пⷭ҇лѡмъ возвѣсти́вшаѧ.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ в҃

Ви́дѧщи ст҃а́ѧ марі́а себѐ ѿ седмѝ лю́тыхъ бѣсѡ́въ и҆зба́вленꙋ, всѣ́мъ се́рдцемъ побѣди́телю а҆́да хрⷭ҇тꙋ̀ бг҃ꙋ прилѣпи́сѧ, всѧ̑ лю́ди наꙋча́ющи не ᲂу҆сты̀ то́кмѡ, но и҆ всѣ́мъ житїе́мъ бг҃ꙋ слꙋжи́ти, вопїю́щи томꙋ̀: А҆ллилꙋ́їа.

І҆́косъ в҃

Ра́зꙋмъ человѣ́ческїй недоꙋмѣва́етъ, помышлѧ́ѧ, и҆з̾ каковы́ѧ бѣды̀ на высотꙋ̀ а҆гг҃лоподо́бнагѡ житїѧ̀ бл҃года́тїю хрⷭ҇то́вою возшла̀ є҆сѝ, достохва́льнаѧ марі́е магдали́но. Тѣ́мже и҆ мы̀, до́брꙋю тѧ̀ предста́тельницꙋ и҆мꙋ́ще, мо́лимсѧ тебѣ̀ те́плѣ: и҆зба́ви и҆ на́съ ѿ бе́здны грѣхо́вныѧ, да любо́вїю вопїе́мъ тѝ такова̑ѧ:

Ра́дꙋйсѧ, лю́тагѡ де́монскагѡ ра́бства и҆збѣ́гшаѧ: ра́дꙋйсѧ, ле́сть лꙋка́выхъ бѣсѡ́въ ꙗ҆́вѣ ѡ҆бличи́вшаѧ.

Ра́дꙋйсѧ, въ напа́сти вра́жїи ко хрⷭ҇тꙋ̀ бг҃ꙋ прибѣга́ти всѣ́хъ наꙋчи́вшаѧ: ра́дꙋйсѧ, грѣхмѝ ѡ҆бременє́нныѧ не ѿчаѧва́тисѧ побꙋжда́ющаѧ.

Ра́дꙋйсѧ, ко ст҃ости всѣ̑мъ грѣ́шникѡмъ пꙋ́ть показа́вшаѧ: ра́дꙋйсѧ, всемо́щнꙋю си́лꙋ бл҃года́ти хрⷭ҇то́вы позна́вшаѧ.

Ра́дꙋйсѧ, досто́йнагѡ бг҃ꙋ бл҃годаре́нїѧ до́браѧ наста́внице: ра́дꙋйсѧ, и҆́стиннагѡ бг҃охвале́нїѧ вѣ́рнаѧ ᲂу҆чи́тельнице.

Ра́дꙋйсѧ, въ житїѝ твое́мъ пра́вый пꙋ́ть земна́гѡ тече́нїѧ на́мъ показа́вшаѧ: ра́дꙋйсѧ, дꙋ́шы на́шѧ ѿ ле́сти сатани́нскїѧ защища́ющаѧ.

Ра́дꙋйсѧ, всѣ̑мъ грѣ́шникѡмъ пред̾ бг҃омъ бл҃га́ѧ застꙋ́пнице: ра́дꙋйсѧ, во всѧ́кой ско́рби те́плаѧ ко хрⷭ҇тꙋ̀ на́ша хода́таице.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ г҃

Си́лою бжⷭ҇твенныѧ бл҃года́ти, кꙋ́пнѡ же и҆ свои́мъ бл҃ги́мъ произволе́нїемъ, ѡ҆ста́вила є҆сѝ до́мъ ѻ҆тца̀ твоегѡ̀, ꙗ҆́коже дре́вле а҆враа́мъ, и҆ ра́достнѡ послѣ́довала є҆сѝ хрⷭ҇тꙋ̀ бг҃ꙋ: тѣ́мже мо́лимъ тѧ̀, ᲂу҆чени́це хрⷭ҇то́ва, сла́внаѧ марі́е, мл҃твами твои́ми и҆ на̑ша сердца̀ просвѣтѝ любо́вїю къ бг҃ꙋ, да и҆ ны́нѣ и҆ при́снѡ взыва́емъ томꙋ̀: А҆ллилꙋ́їа.

І҆́косъ г҃

И҆мꙋ́щи бг҃одарова́ннꙋю тѝ премꙋ́дрости си́лꙋ, мꙋ́жески ѿве́ргла є҆сѝ, марі́е магдали́но, кра̑снаѧ сегѡ̀ мі́ра, и҆ ꙗ҆́кѡ ᲂу҆чени́ца до́браѧ, премно́гимъ млⷭ҇рдїемъ ѡ҆бнища́вшемꙋ за ны̀ сло́вꙋ и҆́стиннѡ послꙋжи́ла є҆сѝ. Сегѡ̀ ра́ди и҆ мы̀ со ᲂу҆миле́нїемъ глаго́лемъ тѝ:

Ра́дꙋйсѧ, до́браѧ хрⷭ҇то́ва ᲂу҆чени́це: ра́дꙋйсѧ, и҆́стинныѧ любвѐ къ бг҃ꙋ наста́внице.

Ра́дꙋйсѧ, сꙋетꙋ̀ мі́ра сегѡ̀ до́брѣ позна́вшаѧ: ра́дꙋйсѧ, собла́зны є҆гѡ̀ мꙋ́жески ѿве́ргшаѧ.

Ра́дꙋйсѧ, кра̑снаѧ мі́ра сегѡ̀ нивочто́же вмѣни́вшаѧ: ра́дꙋйсѧ, тѣ́мъ бл҃же́нства вѣ́чнагѡ дости́гшаѧ.

Ра́дꙋйсѧ, длѧ дѣ́лъ млⷭ҇рдїѧ и҆з̾ до́мꙋ земна́гѡ и҆зше́дшаѧ: ра́дꙋйсѧ, хрⷭ҇то́во млⷭ҇рдїе здѣ̀ и҆ на нб҃сѝ ѡ҆брѣ́тшаѧ.

Ра́дꙋйсѧ, чи́нꙋ и҆́ноческомꙋ до́брый пꙋ́ть житїѧ̀ предпоказа́вшаѧ: ра́дꙋйсѧ, всѣ́хъ ко хрⷭ҇тꙋ̀ бг҃ꙋ пꙋтево́дствꙋющаѧ.

Ра́дꙋйсѧ, мꙋ́драѧ а҆́гнице, ѿ ѕлы́хъ волкѡ́въ къ до́бромꙋ па́стырю хрⷭ҇тꙋ̀ прибѣ́гшаѧ: ра́дꙋйсѧ, во дво́ръ слове́сныхъ ѻ҆ве́цъ є҆гѡ̀ вше́дшаѧ.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ д҃

Бꙋ́рѧ бѣсо́вскїѧ ꙗ҆́рости превели́кою си́лою ᲂу҆стреми́сѧ на хра́мъ дꙋшѝ твоеѧ̀, ст҃а́ѧ марі́е, но тогѡ̀ и҆спрове́ргнꙋти не возмо́же: ѡ҆брѣла́ бо є҆сѝ сп҃се́нїе на тве́рдѣмъ вѣ́ры хрⷭ҇то́вы ка́мени, на не́мже ты̀, мꙋ́драѧ же́но, недви́жимѡ стоѧ́щи, ᲂу҆чи́ши всѣ́хъ всебл҃го́мꙋ бг҃ꙋ воспѣва́ти пѣ́снь: А҆ллилꙋ́їа.

І҆́косъ д҃

Слы́шаще, бг҃омꙋ́драѧ марі́е, ꙗ҆́кѡ въ послѣ́дованїи хрⷭ҇тꙋ̀ ѡ҆брѣла̀ є҆сѝ и҆́стинное весе́лїе се́рдца, пра́вдꙋ, ми́ръ и҆ ра́дость ѡ҆ дс҃ѣ ст҃ѣ, тщи́мсѧ и҆ мы̀ ꙗ҆ви́тисѧ въ ли́цѣ прича̑стникъ црⷭ҇тва бж҃їѧ. Тебѣ́ же, ꙗ҆́кѡ прича́стнице тогѡ̀ сꙋ́щей и҆ пꙋ́ть на́мъ къ немꙋ̀ показа́вшей, рце́мъ всѝ такова̑ѧ:

Ра́дꙋйсѧ, нбⷭ҇нꙋю і҆и҃совꙋ сла́дость позна́вшаѧ: ра́дꙋйсѧ, ра̑йскїѧ снѣ̑ди непреста́ннѡ вкꙋша́ющаѧ.

Ра́дꙋйсѧ, жи́знь и҆́стиннꙋю во хрⷭ҇тѣ̀ ѡ҆брѣ́тшаѧ: ра́дꙋйсѧ, тоѧ́жде ѻ҆́бразъ и҆ на́мъ вѣ́рнѡ показа́вшаѧ.

Ра́дꙋйсѧ, ѻ҆́гнь любвѐ къ бг҃ꙋ въ се́рдцѣ твое́мъ возже́гшаѧ: ра́дꙋйсѧ, въ ра́дости нбⷭ҇нѣй ны́нѣ при́снѡ живꙋ́щаѧ.

Ра́дꙋйсѧ, хрⷭ҇то́мъ бг҃омъ возлю́бленнаѧ: ра́дꙋйсѧ, дх҃а ст҃а́гѡ пречтⷭ҇но́е жили́ще.

Ра́дꙋйсѧ, въ бѣда́хъ на́шихъ помо́щнице: ра́дꙋйсѧ, прилѣ́жнаѧ ѡ҆ на́съ къ бг҃ꙋ мл҃твеннице.

Ра́дꙋйсѧ, бг҃а сло́ва всеꙋсе́рднаѧ ᲂу҆чени́це: ра́дꙋйсѧ, на́ша бл҃га́ѧ и҆ кро́ткаѧ ᲂу҆чи́тельнице.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ є҃

Бг҃оте́чнаѧ ѕвѣзда̀, спꙋ́тствꙋющи хрⷭ҇тꙋ̀, сла́внаѧ марі́е, посредѣ̀ мѷроно́сицъ ꙗ҆ви́ласѧ є҆сѝ. Съ ни́миже ны́нѣ вы́нꙋ предстоѧ́щи ст҃ѣ́й трⷪ҇цѣ, и҆ на́съ мл҃твами твои́ми къ сщ҃е́нномꙋ тѣ́хъ ли́кꙋ совокꙋпѝ, пꙋ́ть те́мный житїѧ̀ на́шегѡ свѣ́томъ твои́мъ ѡ҆зарѧ́ющи, да ра́достнѡ возопїе́мъ бг҃ꙋ: А҆ллилꙋ́їа.

І҆́косъ є҃

Ви́дѧщи, ст҃а́ѧ марі́е, хрⷭ҇та̀ бг҃а на крⷭ҇тѣ̀ ви́сѧща, ди́вное мꙋ́жество показа́ла є҆сѝ: мно́зи бо ѿ ᲂу҆ч҃нкъ ᲂу҆ч҃тлѧ своего̀ ѡ҆ста́виша: ты́ же непреста́нными бжⷭ҇твенными ᲂу҆че́ньми дꙋ́шꙋ и҆ мы́сль разже́гши, не́мощь є҆стества̀ же́нскагѡ превозмогла̀ є҆сѝ и҆ та́кѡ причасти́ласѧ є҆сѝ сп҃си́тельнѣй хрⷭ҇то́вой стрⷭ҇ти. Сегѡ̀ ра́ди мы̀, сицево́е твоѐ до́блественное мꙋ́жество зрѧ́ще, прино́симъ тѝ похвалы̑:

Ра́дꙋйсѧ, хрⷭ҇тꙋ̀ бг҃ꙋ, на крⷭ҇тѣ̀ ви́сѧщꙋ, сострада́вшаѧ: ра́дꙋйсѧ, ꙗ҆вле́нїемъ є҆гѡ̀ по воскрⷭ҇нїи ѡ҆бра́дованнаѧ.

Ра́дꙋйсѧ, непоколеби́мыѧ любвѐ ко хрⷭ҇тꙋ̀ на́мъ пꙋ́ть показа́вшаѧ: ра́дꙋйсѧ, сицево́ю любо́вїю въ предста́тельствѣ ѡ҆ на́съ къ бг҃ꙋ дерзнове́нїе ве́лїе ѡ҆брѣ́тшаѧ.

Ра́дꙋйсѧ, ꙗ҆́кѡ тебѣ̀ та̑йнаѧ премꙋ́дрости своеѧ̀ бг҃ъ ꙗ҆ви́лъ є҆́сть: ра́дꙋйсѧ, ꙗ҆́кѡ тебѣ̀ и҆́стинномꙋ бг҃осло́вїю са́мъ бг҃ъ сло́во наꙋчи́лъ є҆́сть.

Ра́дꙋйсѧ, жена́мъ добро́то и҆ похвале́нїе: ра́дꙋйсѧ, па́че си́льныхъ мꙋже́й крѣпча́йшаѧ.

Ра́дꙋйсѧ, мꙋ́дрыхъ же́нъ красото̀ и҆ ᲂу҆добре́нїе: ра́дꙋйсѧ, мꙋдрецѡ́въ мі́ра сегѡ̀ мꙋдрѣ́йшаѧ.

Ра́дꙋйсѧ, ѿ бѣсѡ́въ стꙋжа́ємымъ крѣ́пкое прибѣ́жище: ра́дꙋйсѧ, хрⷭ҇тїа́нъ всѣ́хъ до́брое ра́дованїе.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ ѕ҃

Бл҃года́тїю твое́ю немощна̑ѧ врачꙋ́еши и҆ некрѣ̑пкїѧ сосꙋ́ды твє́рды содѣ́ловаеши, хрⷭ҇тѐ цр҃ю̀: мѷронѡ́сицы бо жєны̀ ᲂу҆ крⷭ҇та̀ твоегѡ̀ мꙋ́жески предстоѧ́тъ и҆ бл҃года́ть крⷭ҇тнꙋю всѣ̑мъ небоѧ́зненнѡ возвѣща́ютъ: ли́цы же мꙋ́дрыхъ же́нъ, ликѡ́мъ а҆́гг҃льскимъ ᲂу҆подо́битисѧ тща́щесѧ, бо́дреннѡ вы́нꙋ взыва́ютъ трⷪ҇цѣ ст҃ѣ́й: А҆ллилꙋ́їа.

І҆́косъ ѕ҃

Взыскꙋ́ющи ѡ҆зари́тисѧ свѣ́томъ и҆́стиннагѡ бг҃оразꙋ́мїѧ, є҆гда̀ бг҃а на крⷭ҇тѣ̀ ви́сѧща ви́дѣла є҆сѝ, глаго́лала є҆сѝ слезѧ́щи, ди́внаѧ марі́е: ка́кѡ жи́знь сме́рть во́льнꙋю ны́нѣ прїе́млетъ: Мы́ же сла́вное просвѣще́нїе твоѐ бл҃года́тїю ст҃а́гѡ дх҃а вѣ́дꙋще, пое́мъ тѝ сицева̑ѧ:

Ра́дꙋйсѧ, хрⷭ҇та̀ ра́спѧта ѿ глꙋбины̀ дꙋшѝ ѡ҆пла́кавшаѧ: ра́дꙋйсѧ, весе́лїе вѣ́чное въ селе́нїихъ нбⷭ҇ныхъ ѡ҆брѣ́тшаѧ.

Ра́дꙋйсѧ, на́мъ ѻ҆́бразъ до́брагѡ пла́ча показа́вшаѧ: ра́дꙋйсѧ, ꙗ҆́кѡ ты̀ є҆сѝ на́ше непреста́нное ра́дованїе.

Ра́дꙋйсѧ, ꙗ҆́кѡ хрⷭ҇то́вымъ стрⷭ҇те́мъ на землѝ ѻ҆́бщница ꙗ҆влѧ́ешисѧ: ра́дꙋйсѧ, ꙗ҆́кѡ съ ни́мъ ѡ҆ не́мъ на нб҃сѝ прославлѧ́ешисѧ.

Ра́дꙋйсѧ, врагѡ́въ безпло́тныхъ крѣ́пкаѧ побѣди́тельнице: ра́дꙋйсѧ, и҆́стиннаѧ лозо̀ вїногра́да хрⷭ҇то́ва.

Ра́дꙋйсѧ, всѣ́хъ скорбѧ́щихъ ᲂу҆тѣше́нїе нело́жное: ра́дꙋйсѧ, во всѣ́хъ ско́рбехъ на́шихъ ско́раѧ помо́щнице.

Ра́дꙋйсѧ, ꙗ҆́кѡ всѣ̑мъ хрⷭ҇тїа́нѡмъ воспомина́нїе твоѐ пресла́дко: ра́дꙋйсѧ, ꙗ҆́кѡ все́й цр҃кви хрⷭ҇то́вой и҆́мѧ твоѐ пречтⷭ҇но.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ з҃

Хотѧ́щи ᲂу҆разꙋмѣ́ти крⷭ҇та̀ всепобѣди́тельнꙋю си́лꙋ, до конца̀ хрⷭ҇то́вы стрⷭ҇ти предстоѧ́ла є҆сѝ ᲂу҆ крⷭ҇та̀ сп҃сова со и҆ны́ми жена́ми, пресла́внаѧ марі́е, мт҃ри же гдⷭ҇ни болѣ́зненнѡ состра́ждꙋщи, та́кѡ недоꙋмѣ́ннѡ вопїѧ́ла є҆сѝ: что̀ сїѐ є҆́сть стра́нное чꙋ́до: содержа́й всю̀ тва́рь пострада́ти и҆зво́ли. Мы́ же на живоно́сный крⷭ҇тъ во́лею возне́сшемꙋсѧ любо́вїю возглаша́емъ: А҆ллилꙋ́їа.

І҆́косъ з҃

Ди́внаѧ жена̀ ꙗ҆ви́ласѧ є҆сѝ, бл҃же́ннаѧ марі́е, любо́вїю твое́ю ко хрⷭ҇тꙋ̀ бг҃ꙋ: тꙋ́ю бо го́рестными и҆з̾ѧвлѧ́ѧ рыда́ньми, ко снѧ́томꙋ со крⷭ҇та̀ припа́дающи, слеза́ми пречⷭ҇тыѧ ꙗ҆́звы є҆гѡ̀ ѡ҆мы́ла є҆сѝ. Є҆ще́ же бл҃гоѡбра́зномꙋ і҆ѡ́сифꙋ и҆ правдолюби́вомꙋ нїкоди́мꙋ послѣ́дꙋющи, ко гро́бꙋ сп҃совꙋ со и҆ны́ми ст҃ы́ми жена́ми текла̀ є҆сѝ, ѻ҆́во пла́чꙋщи, ѻ҆́во пла́чꙋщꙋю неꙋтѣ́шнѡ мт҃рь є҆гѡ̀ пренепоро́чнꙋю, є҆́йже дꙋ́шꙋ лю́тое ѻ҆рꙋ́жїе про́йде, ᲂу҆тѣша́ющи. Мы́ же таковꙋ́ю твою̀ до́блесть вѣ́дꙋще, смире́ннѡ взыва́емъ тѝ:

Ра́дꙋйсѧ, пречⷭ҇тыѧ ꙗ҆́звы хрⷭ҇тѡ́вы слеза́ми ѡ҆мы́вшаѧ: ра́дꙋйсѧ, мт҃ри тогѡ̀ пренепоро́чнѣй на голго́ѳѣ сострада́вшаѧ.

Ра́дꙋйсѧ, хрⷭ҇та̀ да́же до гро́ба не ѡ҆ста́вившаѧ: ра́дꙋйсѧ, во гро́бъ полага́вшꙋюсѧ жи́знь недоꙋмѣ́ннѡ зрѣ́вшаѧ.

Ра́дꙋйсѧ, слеза́мъ покаѧ́нїѧ на́ша до́браѧ ᲂу҆чи́тельнице: ра́дꙋйсѧ, тѣ́ми слеза́ми грѣхѡ́вныѧ сквє́рны ѡ҆мыва́ти на́съ наставлѧ́ющаѧ.

Ра́дꙋйсѧ, тѣ́ми же се́рдце на́ше ѡ҆камене́нное ᲂу҆мѧгча́ти побꙋжда́ющаѧ: ра́дꙋйсѧ, па́мѧтовати вы́нꙋ стрⷭ҇ти хрⷭ҇тѡ́вы на́съ наꙋча́ющаѧ.

Ра́дꙋйсѧ, сла́внаѧ марі́е, вѣ́рнаѧ на́ша хода́таице: ра́дꙋйсѧ, до́браѧ слꙋго̀ хрⷭ҇то́ва.

Ра́дꙋйсѧ, гдⷭ҇еви, а҆ не человѣ́кѡмъ ᲂу҆гожда́вшаѧ: ра́дꙋйсѧ, ѻ҆́бразъ и҆́стинныѧ мꙋ́дрости на́мъ показа́вшаѧ.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ и҃

Стра́нно, бг҃омꙋ́драѧ марі́е, ꙗ҆ви́сѧ тебѣ̀ погребе́нїе всѣ̑мъ жи́знь подаю́щагѡ жизнода́вца: тогѡ̀ любо́вїю ᲂу҆ѧзвлѧ́ема, є҆щѐ сꙋ́щей тьмѣ̀, ко гро́бꙋ є҆гѡ̀ принесла̀ є҆сѝ мѵ́ро и҆ сле́зы пролила̀ є҆сѝ, ꙗ҆́кѡ а҆рѡма́ты. Тѣ́мже и҆ пребыва́еши ны́нѣ во бл҃гово́нныхъ раѧ̀ селе́нїихъ, со а҆́гг҃льскими ли̑ки взыва́ющи вы́нꙋ бг҃ꙋ: А҆ллилꙋ́їа.

І҆́косъ и҃

Ве́сь сла́дость, ве́сь ра́дость, ве́сь жи́знь тебѣ̀ бы́сть і҆и҃съ, ст҃а́ѧ марі́е. Тогѡ̀ ра́ди, ви́дѣвши ка́мень взѧ́тъ ѿ гро́ба, сегѡ̀ же не ѡ҆брѣ́тши, рыда́ющи текла̀ є҆сѝ къ живо́мꙋ вѣ́ры ка́меню сі́мѡнꙋ и҆ дрꙋго́мꙋ, є҆го́же люблѧ́ше і҆и҃съ, ᲂу҆ч҃нкꙋ̀, болѣ́зненнѡ глаго́лющи и҆́ма: взѧ́ша гдⷭ҇а ѿ гро́ба, и҆ не вѣ́мъ, гдѣ̀ положи́ша є҆гѡ̀. Ны́нѣ же ты̀, свободи́вшисѧ ѿ ско́рби тоѧ̀, со хрⷭ҇то́мъ вѣ́чнѡ ра́дꙋешисѧ на нб҃сѝ. Мы́ же земні́и въ таковꙋ́ю ра́дость мл҃твами твои́ми вни́ти ча́юще, со ᲂу҆миле́нїемъ вопїе́мъ тѝ та́кѡ:

Ра́дꙋйсѧ, сїѧ́нїемъ любвѐ твоеѧ̀ ко хрⷭ҇тꙋ̀ тьмꙋ̀ нощнꙋ́ю побѣди́вшаѧ: ра́дꙋйсѧ, ѡ҆ на́шемъ поми́лованїи того̀ ᲂу҆се́рднѡ просѧ́щаѧ.

Ра́дꙋйсѧ, нището́ю дꙋхо́вною црⷭ҇тво нбⷭ҇ное стѧжа́вшаѧ: ра́дꙋйсѧ, свѣ́томъ вѣ́чнымъ на нб҃сѝ ѡ҆сїѧ́ннаѧ.

Ра́дꙋйсѧ, ꙗ҆́кѡ по ско́рби ѡ҆ стрⷭ҇те́хъ хрⷭ҇то́выхъ ѡ҆брѣла̀ є҆сѝ ѻ҆би́льное ᲂу҆тѣше́нїе: ра́дꙋйсѧ, же́но кро́ткаѧ, наслѣ́днице землѝ нбⷭ҇нагѡ раѧ̀.

Ра́дꙋйсѧ, а҆лка́вшаѧ и҆ жа́ждавшаѧ пра́вды хрⷭ҇то́вы, трапе́зы нбⷭ҇ныѧ ны́нѣ насыща́ющаѧсѧ: ра́дꙋйсѧ, млⷭ҇тиваѧ, млⷭ҇ть влⷣки ѡ҆брѣ́тшаѧ.

Ра́дꙋйсѧ, ты́ бо ны́нѣ, ꙗ҆́кѡ чи́стаѧ се́рдцемъ, бг҃а лице́мъ къ лицꙋ̀ зри́ши: ра́дꙋйсѧ, ꙗ҆́кѡ сподо́биласѧ є҆сѝ пе́рвѣйши всѣ́хъ ви́дѣти воскрⷭ҇нїе хрⷭ҇та̀, вѣ́чнагѡ ми́ра.

Ра́дꙋйсѧ, и҆згна́ннаѧ пра́вды ра́ди хрⷭ҇то́вы, ꙗ҆́кѡ твоѐ є҆́сть црⷭ҇тво бж҃їе: ра́дꙋйсѧ, прїѡбрѣ́тшаѧ вѣ́чное весе́лїе и҆ мздꙋ̀ мно́гꙋ на нб҃сѣ́хъ.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ ѳ҃

Всѧ́къ чи́нъ а҆́гг҃льскїй ᲂу҆диви́сѧ вели́кой та́йнѣ сла́внагѡ воскрⷭ҇нїѧ твоегѡ̀, хрⷭ҇тѐ цр҃ю̀, а҆́дъ же притре́петенъ бы́сть, ви́дѣвъ, ꙗ҆́кѡ снизше́лъ є҆сѝ въ преиспѡ́днѧѧ землѝ и҆ сокрꙋши́лъ є҆сѝ верєѝ вѣ̑чныѧ, содержа́щыѧ свѧ̑занныѧ, хрⷭ҇тѐ. Мы́ же ра́дости же́нъ мѷроно́сицъ сора́дꙋющесѧ, съ весе́лїемъ глаго́лемъ тѝ: А҆ллилꙋ́їа.

І҆́косъ ѳ҃

Вѣті́й многовѣща́нныхъ ѧ҆зы́цы не довлѣ́ютъ досто́йнѡ и҆зрещѝ вели́кꙋю ско́рбь твою̀, сла́внаѧ марі́е, є҆гда̀ стоѧ́ла є҆сѝ внѣ̀ гро́ба пла́чꙋщи. Кто́ бо возмо́жетъ рещѝ болѣ́знь дꙋшѝ твоеѧ̀, є҆гда̀ не ѡ҆брѣла̀ є҆сѝ во гро́бѣ па́че жи́зни своеѧ̀ возлю́бленнаго тѝ гдⷭ҇а: Приско́рбное се́рдце твоѐ не возмо́же внима́ти ᲂу҆тѣше́нїю а҆́гг҃лѡвъ свѣ́тлыхъ. Сицевꙋ́ю ско́рбь твою̀ со ᲂу҆миле́нїемъ воспомина́юще, воспѣва́емъ тѝ такова̑ѧ:

Ра́дꙋйсѧ, ви́дѣти хрⷭ҇та̀ і҆и҃са въ пеще́рꙋ прини́кшаѧ: ра́дꙋйсѧ, ны́нѣ того̀ на прⷭ҇то́лѣ сла́вы сѣдѧ́ща зрѧ́щаѧ.

Ра́дꙋйсѧ, преꙋкраше́нный хра́мъ дх҃а всест҃а́гѡ ꙗ҆́вльшаѧсѧ: ра́дꙋйсѧ, свѣ́тлыхъ нб҃ожи́телей є҆щѐ сꙋ́щи на землѝ ᲂу҆зрѣ́вшаѧ.

Ра́дꙋйсѧ, ѿ тѣ́хъ гла́съ ра́дости воскрⷭ҇нїѧ хрⷭ҇то́ва прїи́мшаѧ: ра́дꙋйсѧ, ꙗ҆́кѡ ты̀ съ ни́ми ны́нѣ при́снѡ ра́дꙋешисѧ.

Ра́дꙋйсѧ, во бл҃гоꙋха́ющꙋю ми́ра хрⷭ҇то́ва воню̀ сла́дцѣ прите́кшаѧ: ра́дꙋйсѧ, любо́вїю мѵ́ро хрⷭ҇тꙋ̀ прине́сшаѧ.

Ра́дꙋйсѧ, ѿве́ргшаѧ ра́достей мі́ра грѣхо́внагѡ го́речь: ра́дꙋйсѧ, ѿ ча́ши хрⷭ҇то́вы поче́рпшаѧ сла́дость.

Ра́дꙋйсѧ, до́браѧ лѣ́торасле са́да і҆и҃сова: ра́дꙋйсѧ, бл҃гопло́днаѧ лозо̀ вертогра́да бж҃їѧ.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ і҃

Сп҃стѝ хотѧ̀ мі́ръ, во гро́бъ снизше́лъ є҆сѝ, безсме́ртне, а҆́довꙋ разрꙋши́лъ є҆сѝ си́лꙋ, и҆ воскр҃слъ є҆сѝ ꙗ҆́кѡ побѣди́тель, хрⷭ҇тѐ бж҃е, жена́мъ мѷроно́сицамъ вѣща́вый: ра́дꙋйтесѧ. Съ ни́миже и҆ мы̀ ны́нѣ пѣ́снь ра́дости прино́симъ тѝ: А҆ллилꙋ́їа.

І҆́косъ і҃

Стѣны̀ ка́менныѧ твердѣ́йши бы́сть любо́вь твоѧ̀ къ возлю́бльшемꙋ тѧ̀ хрⷭ҇тꙋ̀, мѷроно́сице сла́внаѧ магдали́но марі́е: тѣ́мже ви́дѣла є҆сѝ пре́жде и҆нѣ́хъ живота̀ на́шего, и҆з̾ гро́ба возста́вша: вертогра́дарѧ же того̀ непщева́ла є҆сѝ бы́ти и҆ вопїѧ́ла є҆сѝ томꙋ̀, забы́вши є҆стества̀ не́мощь: а҆́ще ты̀ є҆сѝ взѧ́лъ є҆го̀, повѣ́ждь мѝ, гдѣ̀ є҆сѝ положи́лъ є҆го̀, и҆ а҆́зъ возмꙋ̀ є҆го̀. но сла́достный тогѡ̀ гла́съ показа́ ти ᲂу҆ч҃тлѧ, на́съ же глаша́ти наꙋчѝ тебѣ̀ си́це:

Ра́дꙋйсѧ, и҆́стиннаго вертогра́дарѧ воскрⷭ҇ша пе́рвѣйши и҆нѣ́хъ ᲂу҆зрѣ́вшаѧ: ра́дꙋйсѧ, въ вертогра́дѣ нбⷭ҇нѣмъ водвори́вшаѧсѧ.

Ра́дꙋйсѧ, гро́здїемъ бж҃їѧ бл҃года́ти ны́нѣ непреста́ннѡ пита́ющаѧсѧ: ра́дꙋйсѧ, вїно́мъ ра́йскихъ ра́достей веселѧ́щаѧсѧ.

Ра́дꙋйсѧ, ꙗ҆́кѡ твоѧ̀ любо́вь къ бг҃ꙋ не́мощь є҆стества̀ побѣди́ла є҆́сть: ра́дꙋйсѧ, ꙗ҆́кѡ та́ѧ и҆ на́съ ре́вности бж҃їей наꙋчи́ла є҆́сть.

Ра́дꙋйсѧ, и҆з̾ ᲂу҆́стъ хрⷭ҇то́выхъ вѣща́нїе воскрⷭ҇нїѧ пе́рвѣйши прїи́мшаѧ: ра́дꙋйсѧ, а҆пⷭ҇лѡмъ глаго́лы ра́дости пе́рвѣйши возвѣсти́вшаѧ.

Ра́дꙋйсѧ, вѣ́чнꙋю ра́дость на нб҃сѝ ѡ҆брѣ́тшаѧ: ра́дꙋйсѧ, ꙗ҆́кѡ ты̀ и҆ на́съ къ то́й ра́дости тобо́ю зове́ши.

Ра́дꙋйсѧ, ꙗ҆́кѡ ѡ҆ се́мъ ѡ҆ на́съ къ бг҃ꙋ непреста́ннѡ хода́тайствꙋеши: ра́дꙋйсѧ, ꙗ҆́кѡ томꙋ̀ мл҃твы ѡ҆ на́съ те́плѣ прино́сиши.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ а҃і

Ни є҆ди́но же сло́во довлѣ́етъ воспѣ́ти по достоѧ́нїю бжⷭ҇твеннꙋю ра́дость воскрⷭ҇нїѧ хрⷭ҇то́ва, ю҆́же со и҆ны́ми жена́ми, сла́внаѧ марі́е, а҆пⷭ҇лѡмъ возвѣстѝ въ се́й нарече́нный и҆ ст҃ы́й де́нь, пра́здникѡвъ пра́здникъ и҆ торжество̀ и҆з̾ торже́ствъ. Тѣ́мже пред̾ вели́чїемъ неизрече́нныхъ щедро́тъ твои́хъ, хрⷭ҇тѐ цр҃ю̀, на на́съ бы́вшихъ, преклонѧ́ющесѧ, со смире́нїемъ и҆ любо́вїю зове́мъ тѝ: А҆ллилꙋ́їа.

І҆́косъ а҃і

Свѣтоза́рнаѧ ѕвѣзда̀ грѣхо́вномꙋ мі́рꙋ ꙗ҆ви́ласѧ є҆сѝ, магдали́но марі́е, є҆гда̀ по сла́внѣмъ сп҃совѣ вознесе́нїи, гра́ды и҆ вє́си преходѧ́щи и҆ сло́во є҆ѵⷢ҇лїа всю́дꙋ возвѣща́ющи, мнѡ́ги подклони́ла є҆сѝ под̾ бл҃го́е и҆́го хрⷭ҇то́во. Дости́гши же да́же до дре́внѧгѡ ри́ма, мꙋ́жески тїве́рїю ке́сарю предста́ла є҆сѝ и҆ томꙋ̀ мꙋ́дрыми словесы̀ живоно́снꙋю си́лꙋ хрⷭ҇та̀ ᲂу҆ѧсни́ла є҆сѝ, лꙋка́ваго же пїла́та и҆ безбо́жнаго а҆рхїере́а ѡ҆бличи́ла є҆сѝ. Таково́мꙋ по́двигꙋ а҆пⷭ҇льства твоегѡ̀ дивѧ́щесѧ, ра́достнѡ вопїе́мъ тѝ си́це:

Ра́дꙋйсѧ, хрⷭ҇то́ва ᲂу҆че́нїѧ сла́внаѧ бл҃говѣсти́тельнице: ра́дꙋйсѧ, ꙗ҆зы́ческїѧ тьмы̀ свѣтоза́рнаѧ прогони́тельнице.

Ра́дꙋйсѧ, гнѣ́ва ке́сарева не ᲂу҆боѧ́вшаѧсѧ: ра́дꙋйсѧ, ѕло́бꙋ и҆ кова́рство врагѡ́въ хрⷭ҇то́выхъ томꙋ̀ показа́вшаѧ.

Ра́дꙋйсѧ, помраче́нїе ꙗ҆зы́ческое дерзнове́ннѡ ѡ҆бличи́вшаѧ: ра́дꙋйсѧ, грѣхѡ́вныѧ ᲂу҆́зы мно́гихъ человѣ̑къ разрѣши́вшаѧ.

Ра́дꙋйсѧ, за́пѡвѣди хрⷭ҇тѡ́вы до́брѣ ᲂу҆разꙋмѣ́вшаѧ: ра́дꙋйсѧ, тѣ́мъ вѣ́рнѡ послѣ́довавшаѧ.

Ра́дꙋйсѧ, мнѡ́гїѧ лю́ди и҆з̾ тьмы̀ невѣ́дѣнїѧ въ чꙋ́дный хрⷭ҇та̀ свѣ́тъ приве́дшаѧ: ра́дꙋйсѧ, сп҃се́нїе дꙋ́шъ грѣ́шникѡвъ па́че своеѧ̀ жи́зни возлюби́вшаѧ.

Ра́дꙋйсѧ, ѻ҆́бразъ тве́рдагѡ стоѧ́нїѧ за пра́вдꙋ хрⷭ҇то́вꙋ на́мъ показа́вшаѧ: ра́дꙋйсѧ, хрⷭ҇то́вѣй мꙋ́дрости всѣ́хъ наꙋчи́вшаѧ.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ в҃і

Бл҃года́ти ѿ бг҃а и҆з̾ѻби́льнѡ и҆спо́лненнаѧ, мно́жество дꙋ́шъ ко хрⷭ҇тꙋ̀ привела̀ є҆сѝ, сла́внаѧ марі́е: по се́мъ же пришла̀ є҆сѝ во є҆фе́съ, и҆дѣ́же а҆пⷭ҇льски любо́вїю со а҆пⷭ҇ломъ любвѐ сп҃се́нїю человѣ̑къ послꙋжи́вши, бл҃же́ннымъ ᲂу҆спе́нїемъ ко гдⷭ҇ꙋ преста́виласѧ є҆сѝ, є҆мꙋ́же ны́нѣ съ многочи́сленными нбⷭ҇ными пѣвцы̑ непреста́ннѡ пое́ши: А҆ллилꙋ́їа.

І҆́косъ в҃і

Пою́ще твоѐ достохва́льное житїѐ на землѝ и҆ сла́вꙋ, ꙗ҆́же на нб҃сѝ, ра́достнѡ сла́вимъ, пое́мъ и҆ велича́емъ ди́внаго во ст҃ы́хъ свои́хъ цр҃ѧ̀ нбⷭ҇наго: занѐ не то́кмѡ сама̀ ты̀, ст҃а́ѧ марі́е, тогѡ̀ бл҃года́тїю въ селе́нїихъ првⷣныхъ ны́нѣ ликꙋ́еши, но и҆ на́съ весели́ши на землѝ, ѡ҆ста́вивши на́мъ многоцѣ̑нныѧ мо́щи твоѧ̑, ꙗ҆̀же мꙋ́дрый ле́въ ца́рь и҆з̾ є҆фе́са въ кѡнстанті́нь гра́дъ пренестѝ повелѣ̀. Ты̑ѧ, и҆сточа́ющыѧ бл҃года́ть неѡскꙋ́днꙋю всѣ̑мъ любо́вїю притека́ющымъ, мы̀ вѣ́рою и҆ любо́вїю лобыза́юще, ᲂу҆ми́льнѡ воспѣва́емъ тѝ такова̑ѧ:

Ра́дꙋйсѧ, на землѝ любо́вїю ко хрⷭ҇тꙋ̀ горѣ́вшаѧ: ра́дꙋйсѧ, на нб҃сѝ въ ра̑йскїѧ ѻ҆би́тєли тогѡ̀ всели́вшаѧсѧ.

Ра́дꙋйсѧ, вѣ̑рнымъ тве́рдое застꙋпле́нїе: ра́дꙋйсѧ, и҆сто́чникъ и҆сцѣле́нїй неѡскꙋ́дный.

Ра́дꙋйсѧ, бл҃гово́нное мѵ́ро, цр҃ковь бл҃гоꙋха́ющее: ра́дꙋйсѧ, сокро́вище бж҃їей бл҃года́ти неиждива́емое.

Ра́дꙋйсѧ, кади́льнице злата́ѧ, ѳѷмїа́мъ мл҃твы ѡ҆ на́съ къ бг҃ꙋ непреста́ннѡ приносѧ́щаѧ: ра́дꙋйсѧ, ꙗ҆́кѡ ты̀ и҆ на́мъ прїѧ́ти ра́дость, бл҃года́ть же и҆ сла́вꙋ непреста́ннѡ хода́тайствꙋеши.

Ра́дꙋйсѧ, а҆́гг҃льскихъ ликѡ́въ вѣ́рнаѧ соꙋча́стнице: ра́дꙋйсѧ, нбⷭ҇ныхъ черто́гѡвъ сла́внаѧ жи́тельнице.

Ра́дꙋйсѧ, ꙗ҆́кѡ мзда̀ твоѧ̀ мно́га є҆́сть на нб҃сѣ́хъ: ра́дꙋйсѧ, ꙗ҆́кѡ ра́дость твоѧ̀ вѣ́чна є҆́сть во ѻ҆би́телехъ ст҃ы́хъ.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ г҃і

Ѽ пречꙋ́дное и҆ преди́вное же́нъ ᲂу҆краше́нїе, всѣ̑мъ же хрⷭ҇тїа́нѡмъ похвала̀ и҆ ра́дованїе, а҆пⷭ҇лѡмъ ра́внаѧ ꙗ҆́вльшаѧсѧ, мѷроно́сице сла́внаѧ магдали́но марі́е! Ны́нѣшнее на́ше моле́нїе прїе́мши, ѿ всѧ́кихъ на́съ бѣ́дъ и҆ скорбе́й дꙋше́вныхъ и҆ тѣле́сныхъ и҆ ѿ вра̑гъ ви́димыхъ и҆ неви́димыхъ, на на́съ находѧ́щихъ, и҆зба́ви и҆ къ црⷭ҇твїю нбⷭ҇номꙋ хода́тайствомъ твои́мъ напра́ви всѣ́хъ, со ᲂу҆миле́нїемъ и҆ любо́вїю пою́щихъ ѡ҆ тебѣ̀ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ и҆ гдⷭ҇ь си́лъ, пред̾ꙋвѣ́дѣвый бл҃го́е произволе́нїе твоѐ, ст҃а́ѧ мѷроно́сице, ѿ гра́да магдалы̀ и҆збра́ тѧ, свободи́въ ѿ дїа́вольскїѧ сѣ́ти: ты́ же по си́хъ вѣ́рнаѧ слꙋжи́тельница гдⷭ҇еви ꙗ҆ви́ласѧ є҆сѝ, ревнꙋ́ющи ѡ҆ прославле́нїи є҆гѡ̀ житїе́мъ и҆ слꙋже́нїемъ. Мы́ же чꙋдѧ́щесѧ таково́мꙋ ѡ҆ тебѣ̀ бж҃їю смотре́нїю, во ᲂу҆миле́нїи серде́цъ зове́мъ тѝ:

Ра́дꙋйсѧ, сн҃омъ бж҃їимъ и҆з̾ тьмы̀ дїа́вольскїѧ въ чꙋ́дный свѣ́тъ є҆гѡ̀ призва́ннаѧ: ра́дꙋйсѧ, мі́рꙋ всемꙋ̀ провозвѣ́стницею си́лы бж҃їѧ ꙗ҆́вльшаѧсѧ.

Ра́дꙋйсѧ, дꙋше́ю твое́ю бл҃года́тнѡ ѡ҆бнови́вшаѧсѧ: ра́дꙋйсѧ, си́лꙋ вра́жїю до́брѣ побѣди́вшаѧ.

Ра́дꙋйсѧ, бл҃года́тїю хрⷭ҇то́вою тѣ́ломъ и҆ дꙋ́хомъ до конца̀ чи́ста пребы́вшаѧ: ра́дꙋйсѧ, съ чистото́ю се́рдца и҆ нищетꙋ̀ дꙋхо́внꙋю до конца̀ сохрани́вшаѧ.

Ра́дꙋйсѧ, крѣ́пкою вѣ́рою и҆ те́плою любо́вїю ко хрⷭ҇тꙋ̀ бг҃ꙋ просїѧ́вшаѧ: ра́дꙋйсѧ, вѣ́рнѡ томꙋ̀ да́же до сме́рти послꙋжи́вшаѧ.

Ра́дꙋйсѧ, пе́рвѣйши всѣ́хъ воскрⷭ҇шаго хрⷭ҇та̀ ᲂу҆зрѣ́ти сподо́бившаѧсѧ: ра́дꙋйсѧ, а҆́гг҃льскою бесѣ́дою почте́ннаѧ.

Ра́дꙋйсѧ, про́повѣдь є҆ѵⷢ҇лїа въ сокро́вище се́рдца своегѡ̀ вмѣсти́вшаѧ: ра́дꙋйсѧ, про́повѣдь воскрⷭ҇нїѧ а҆пⷭ҇лѡмъ возвѣсти́вшаѧ.

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Конда́къ а҃

И҆збра́ннаѧ гдⷭ҇емъ къ равноапⷭ҇льномꙋ слꙋже́нїю, ст҃а́ѧ марі́е магдали́но, возлю́бленномꙋ тѝ хрⷭ҇тꙋ̀ послѣ́довала є҆сѝ: тѣ́мже пѣ́сньми съ любо́вїю восхвалѧ́емъ тѧ̀. Ты́ же, ꙗ҆́кѡ и҆мꙋ́щаѧ дерзнове́нїе ве́лїе ко гдⷭ҇ꙋ, ѿ всѧ́кихъ на́съ бѣ́дъ мл҃твами твои́ми и҆зба́ви, да съ ра́достїю зове́мъ тѝ:

Ра́дꙋйсѧ, ст҃а́ѧ марі́е магдали́но, сладча́йшаго гдⷭ҇а і҆и҃са возлюби́вшаѧ.

Моли́твы

Ѽ ст҃а́ѧ мѷроно́сице и҆ всехва́льнаѧ равноапⷭ҇льнаѧ хрⷭ҇то́ва ᲂу҆чени́це магдали́но марі́е! Къ тебѣ̀, ꙗ҆́кѡ вѣ́рнѣй и҆ мо́щнѣй ѡ҆ на́съ пред̾ бг҃омъ хода́таицѣ, грѣ́шнїи и҆ недосто́йнїи ны́нѣ ᲂу҆се́рднѡ прибѣга́емъ и҆ въ сокрꙋше́нїи серде́цъ на́шихъ мо́лимсѧ. Ты̀ въ житїѝ свое́мъ стра̑шныѧ кѡ́зни бѣсѡ́вскїѧ и҆спыта́ла є҆сѝ, но бл҃года́тїю хрⷭ҇то́вою ꙗ҆́внѡ тѣ́хъ свободи́ласѧ є҆сѝ: и҆ на́съ мл҃твами твои́ми ѿ сѣ́ти бѣсо́вскїѧ и҆зба́ви, да всегда̀ во все́мъ житїѝ на́шемъ дѣ́ломъ, сло́вомъ, мы́слїю и҆ та́йными помышле́ньми серде́цъ на́шихъ вѣ́рнѡ послꙋ́жимъ є҆ди́номꙋ ст҃о́мꙋ влⷣцѣ бг҃ꙋ, ꙗ҆́коже томꙋ̀ ѡ҆бѣща́лисѧ є҆смы̀. Ты̀ па́че всѣ́хъ бла̑гъ земны́хъ сладча́йшаго гдⷭ҇а і҆и҃са возлюби́ла є҆сѝ и҆ томꙋ̀ чрез̾ всѐ житїѐ до́брѣ послѣ́довала є҆сѝ, бжⷭ҇твенными ᲂу҆чє́нїи є҆гѡ̀ и҆ бл҃года́тїю не то́кмѡ свою̀ дꙋ́шꙋ пита́ющи, но и҆ мно́жество люде́й ѿ тьмы̀ ꙗ҆зы́ческїѧ ко хрⷭ҇та̀ чꙋ́дномꙋ свѣ́тꙋ приводѧ́щи. Сїѧ̑ ᲂу҆̀бо вѣ́дꙋще, про́симъ тѧ̀: и҆спросѝ на́мъ ᲂу҆ хрⷭ҇та̀ бг҃а бл҃года́ть просвѣща́ющꙋю и҆ ѡ҆сщ҃а́ющꙋю, да є҆́ю ѡ҆сѣнѧ́еми, въ вѣ́рѣ и҆ бл҃гоче́стїи, въ по́двизѣхъ любвѐ и҆ самоѿверже́нїѧ преꙋспѣва́ти бꙋ́демъ, да нелѣ́ностнѡ тщи́мсѧ слꙋжи́ти бли̑жнимъ въ и҆́хъ нꙋ́ждахъ дꙋхо́вныхъ и҆ тѣле́сныхъ, твоегѡ̀ чл҃вѣколю́бїѧ ѻ҆́бразъ па́мѧтꙋюще. Ты̀, ст҃а́ѧ марі́е, бо́дреннѡ бл҃года́тїю бж҃їею житїѐ на землѝ прете́кши, во ѻ҆би́тєли нбⷭ҇ныѧ ра́дꙋѧсѧ ѿшла̀ є҆сѝ: молѝ ᲂу҆̀бо хрⷭ҇та̀ сп҃са, да мл҃твами твои́ми сподо́битъ на́съ непреткнове́ннѡ соверши́ти стра́нствїе на́ше въ се́й ю҆до́ли пла́ча, въ ми́рѣ и҆ покаѧ́нїи сконча́ти живо́тъ на́шъ, да та́кѡ во ст҃ости на землѝ пожи́вше, вѣ́чныѧ бл҃же́нныѧ жи́зни на нб҃сѝ сподо́бимсѧ и҆ та́мѡ съ тобо́ю и҆ всѣ́ми ст҃ы́ми вкꙋ́пѣ восхва́лимъ трⷪ҇цꙋ нераздѣ́льнꙋю и҆ воспое́мъ є҆ди́но бжⷭ҇тво̀, ѻ҆ц҃а̀, и҆ сн҃а, и҆ дх҃а всест҃а́го, во вѣ́ки вѣкѡ́въ. А҆ми́нь.

Ѽ ст҃а́ѧ мѷроно́сице, равноапⷭ҇льнаѧ магдали́но марі́е! Ты̀ те́плою любо́вїю твое́ю ко хрⷭ҇тꙋ̀ бг҃ꙋ ѕлы̑ѧ кѡ́зни вра̑жїѧ попра́ла є҆сѝ, и҆ безцѣ́нный би́серъ, хрⷭ҇та̀ ѡ҆брѣ́тши, црⷭ҇тва нбⷭ҇нагѡ дости́гла є҆сѝ. Сегѡ̀ ра́ди къ тебѣ̀ припа́даю ᲂу҆миле́нною дꙋше́ю, и҆ сокрꙋше́ннымъ се́рдцемъ вопїю́ ти: при́зри съ высоты̀ нбⷭ҇ныѧ на мѧ̀, грѣхо́вными и҆скꙋше́ньми бори́маго: ви́ждь, ко́ль мно́гими грѣхи̑ и҆ бѣда́ми на всѧ́къ де́нь вра́гъ мѧ̀ запина́етъ, поги́бели моеѧ̀ и҆скі́й. Тѣ́мже, ѽ сла́внаѧ и҆ всехва́льнаѧ ᲂу҆чени́це хрⷭ҇то́ва марі́е, ᲂу҆молѝ возлю́бленнаго тобо́ю и҆ возлюби́вшаго тѧ̀ хрⷭ҇та̀ бг҃а, да пода́стъ мѝ ѡ҆ставле́нїе мно́гихъ мои́хъ прегрѣше́нїй, да ᲂу҆крѣпи́тъ мѧ̀ бл҃года́тїю свое́ю тре́звеннѡ и҆ бо́дреннѡ ше́ствовати пꙋте́мъ ст҃ы́хъ є҆гѡ̀ за́повѣдей и҆ хра́мъ дх҃а ст҃а́гѡ мѧ̀ да содѣ́лаетъ: да та́кѡ многотрꙋ́дное житїѐ моѐ на землѝ сконча́въ, во свѣ̑тлыѧ и҆ бл҃жє́нныѧ ѻ҆би́тєли раѧ̀ нбⷭ҇нагѡ всели́тисѧ сподо́блюсѧ, и҆дѣ́же ты̀ со всѣ́ми ст҃ы́ми ра́достнѡ славосло́виши є҆диносꙋ́щнꙋю трⷪ҇цꙋ, ѻ҆ц҃а̀, и҆ сн҃а, и҆ дх҃а всест҃а́го, во вѣ́ки вѣкѡ́въ. А҆ми́нь.