Кондак 1
Избра́ннии чудотво́рцы и до́блественнии во́ини Христо́вы, блага́го ко́рене благи́я о́трасли, пресве́тлая дво́ице, в неду́зех безме́зднии вра́чеве и ко Спа́су о все́м ми́ре те́плии моли́твенницы, восхваля́ем ва́с любо́вию, святи́и и благове́рнии кня́зие Бори́се и Гле́бе. Вы́ же, я́ко иму́щии дерзнове́ние ко Пресвяте́й Тро́ице, от вся́ких на́с бе́д изба́вите, да зове́м к ва́м:
Ра́дуйтеся, Бори́се и Гле́бе, вели́цыи и сла́внии страстоте́рпцы.
Икос 1
А́нгелов Госпо́дних согра́ждане яви́стеся, святи́и благове́рнии Бори́се и Гле́бе, не оста́вльше согра́ждан земна́го ми́ра: по страда́нии бо ва́шем честна́я телеса́ ва́ша, му́ченическою кро́вию обагре́нная и благода́тию Бо́жиею просла́вленная, все́м с ве́рою к ни́м притека́ющим источа́ют многоразли́чная чуде́сная исцеле́ния; ду́ши же ва́ша предстоя́т с ли́ки А́нгельскими и со все́ми святы́ми Пресвяте́й Тро́ице. Те́мже мы́, удивля́ющеся ва́шему го́рнему и до́льнему гражда́нству, благогове́йно преклоня́юще пред ва́ми коле́на и сердца́ на́ша, уми́льно вопие́м си́це:
Ра́дуйтеся, оде́жды креще́ния непоро́чнии храни́телие; ра́дуйтеся, христиа́нскаго благоче́стия при́снии ревни́телие.
Ра́дуйтеся, Боже́ственных писа́ний ученицы́ до́брии; ра́дуйтеся, отца́ благове́рнаго ча́да возлю́бленная.
Ра́дуйтеся, Ева́нгелия Христо́ва после́дователие и́стиннии; ра́дуйтеся, Бо́гови сло́вом и житие́м благоугоди́вшии.
Ра́дуйтеся, чу́дным све́том богопозна́ния просвеще́ннии; ра́дуйтеся, ви́ссом чистоты́ и непоро́чности облече́ннии.
Ра́дуйтеся, неустраши́мо муче́ния прие́мшии; ра́дуйтеся, Го́споду Иису́су Христу́ в страсте́х подража́вшии.
Ра́дуйтеся, все́льшиися во оби́тели Отца́ Небе́снаго; ра́дуйтеся, восприе́мшии от Го́спода мзду́ трудо́в и терпе́ния.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 2
Ви́деша сы́нове Росси́йстии, ка́ко испо́лнися святы́й хра́м благоуха́ния пречу́днаго, егда́ отверзо́ша ра́ку ва́шу, и просла́виша вси́ Го́спода. Те́мже и мы́, гре́шнии и недосто́йнии, благогове́юще пред пречу́дною святы́нею, прославля́ем Ди́внаго во святы́х Свои́х Бо́га, непреста́нно вопию́ще: Аллилу́иа.
Икос 2
Ра́зум здра́вый стяжа́ли есте́ святы́м и богоуго́дным житие́м ва́шим, страстоте́рпцы Христо́вы Бори́се и Гле́бе. Егда́ услы́шасте о умышле́нии ка́инском лю́таго и властолюби́ваго бра́та ва́шего Святопо́лка, нима́ло не помы́слисте проти́ву его́ ра́тию ити́; возжела́сте па́че жи́зни своея́ лиши́тися, не́жели с бра́том име́ти бра́нь. Сего́ ра́ди мы́, предстоя́ще моли́твенно пред ва́ми, возво́дим очеса́ на́ша серде́чная горе́ к ва́м, на Небеси́ живу́щим, почита́юще честна́я ва́ша страда́ния си́ми похва́льными пе́сньми:
Ра́дуйтеся, су́етных помышле́ний презри́телие; ра́дуйтеся, за́поведей Христо́вых исполни́телие.
Ра́дуйтеся, тьмы́ грехо́вныя попра́телие; ра́дуйтеся, венцено́сцы наро́читии.
Ра́дуйтеся, ника́коже к земны́м се́рдце свое́ прилепи́вшии; ра́дуйтеся, Жива́го Бо́га па́че всего́ ми́ра возлюби́вшии.
Ра́дуйтеся, оправда́ний Госпо́дних пресве́тлыя свещи́; ра́дуйтеся, Небе́сных бла́г прича́стницы.
Ра́дуйтеся, пресла́дцыи слы́шателие Боже́ственных слове́с; ра́дуйтеся, те́плии ко Спа́су о на́с моли́твенницы.
Ра́дуйтеся, кро́вию свое́ю убеле́ннии; ра́дуйтеся, заре́ю Трисо́лнечнаго Све́та озаре́ннии.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 3
Си́лою Боже́ственною подвиза́еми покрови́телие есте́ на́м, защи́тницы и помо́щницы; страну́ бо на́шу от нападе́ний вра́жиих избавля́ете, стра́ждущих от вся́ких неду́гов и боле́зней исцеля́ете и во вся́ком бла́зе преспе́яние да́руете все́м, вопию́щим Бо́гу: Аллилу́иа.
Икос 3
Иму́ще вои́стину, во́ини Христо́вы Бори́се и Гле́бе, пла́менное се́рдце ко благохвале́нию ди́внаго в чудесе́х Бо́га, мо́литеся непреста́нно о спасе́нии ду́ш к ва́м усе́рдно прибега́ющих. Сего́ ра́ди мы́ от глубины́ серде́ц на́ших умиле́нно прино́сим ва́м такова́я пе́ния:
Ра́дуйтеся, Го́споду сла́вы вы́ну предстоя́щии; ра́дуйтеся, а́нгельскую трисвяту́ю пе́снь слы́шащии.
Ра́дуйтеся, го́рняго Иерусали́ма имени́тии гра́ждане; ра́дуйтеся, Ца́рства Христо́ва до́брии насле́дницы.
Ра́дуйтеся, невече́рняго дне́ зри́телие; ра́дуйтеся, нерукотво́рнаго хра́ма обита́телие.
Ра́дуйтеся, ра́йских селе́ний созерца́телие; ра́дуйтеся, слепы́м прозре́ния пода́телие.
Ра́дуйтеся, домо́в благочести́вых посети́телие; ра́дуйтеся, нерадя́щих о благоче́стии наказа́телие.
Ра́дуйтеся, вели́ких пра́здников почита́ния наста́вницы; ра́дуйтеся, в доброде́телех преспева́ющих споспе́шницы.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 4
Бу́рею неве́рия одержи́мых и ходя́щих во тьме́ злоче́стия огне́м наказа́ния опаля́ете, да уцелому́дрившеся и́стинно позна́ют и́стиннаго Бо́га, благоче́стно Его́ чту́ще и со стра́хом Ему́ вопию́ще: Аллилу́иа.
Икос 4
Слы́шаще ва́ша, страстоте́рпцы святи́и Бори́се и Гле́бе, чудеса́, росси́йстии сы́нове не то́кмо из бли́жних, но и из да́льних стра́н стека́хуся к ва́шим чудоде́йственным моще́м и, исцеля́ющеся от неду́гов и боле́зней, вопия́ху к ва́м такова́я:
Ра́дуйтеся, боже́ственныя лозы́ пресла́дкое ро́ждие; ра́дуйтеся, новопросвеще́нныя земли́ кра́снии цве́ти.
Ра́дуйтеся, пе́рвии просла́вленнии на Руси́ уго́дницы; ра́дуйтеся, в беда́х и ну́ждах благочести́вым посо́бницы.
Ра́дуйтеся, вели́цыи в напа́стех уте́шителие; ра́дуйтеся, ве́ры Христо́вы ревни́телие.
Ра́дуйтеся, Боже́ственныя слу́жбы пла́меннии люби́телие; ра́дуйтеся, благоче́стия до́брии строи́телие.
Ра́дуйтеся, хромы́м хожде́ния пода́телие; ра́дуйтеся, о спасе́нии ро́да христиа́нскаго хода́таи.
Ра́дуйтеся, виногра́да Христо́ва целе́бныя ве́тви; ра́дуйтеся, и́стиннии и безме́зднии вра́чеве.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 5
Боготе́чныя зве́зды яви́стеся на́м путево́дствующия: внегда́ обурева́тися на́м волна́ми жите́йских попече́ний и опа́сно ше́ствовати к ти́хому приста́нищу, све́том моли́тв ва́ших избавля́еми есмы́ от блужде́ния и потопле́ния. Сего́ ра́ди, сла́вяще Го́спода, вопие́м: Аллилу́иа.
Икос 5
Ви́деша сы́нове росси́йстии, я́ко притека́ющии с ве́рою прие́млют хода́тайством ва́шим в ну́ждах ско́рое утеше́ние и от зо́л избавле́ние, те́мже восхваля́ют ва́с си́це:
Ра́дуйтеся, и́дольскаго нече́стия обличи́телие; ра́дуйтеся, му́дрых ко благоче́стию упра́вителие.
Ра́дуйтеся, горды́ни и буесло́вия посрами́телие; ра́дуйтеся, зло́бы и мще́ния угаси́телие.
Ра́дуйтеся, вражду́ющих на оте́чество укроти́телие; ра́дуйтеся, по́лчищ вра́жеских расточи́телие.
Ра́дуйтеся, ми́ра и тишины́ возстанови́телие; ра́дуйтеся, Христо́вы до́брии вои́телие.
Ра́дуйтеся, благоро́дство земно́е носи́вшии; ра́дуйтеся, кро́вию порфи́ру освяти́вшии.
Ра́дуйтеся, просла́вившии Спа́са страстоте́рпцы; ра́дуйтеся, просла́вленнии от Бо́га чудотво́рцы.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 6
Пропове́дующи пропове́дует вся́ Ру́сская земля́ ва́ше Небе́сное предста́тельство у Всевы́шняго: вы́ бо я́ко кре́пцыи щити́ и я́ко тве́рдыя сте́ны, огражда́ете Оте́чество ва́ше непобеди́мым ору́жием, благода́тию Боже́ственною, дарова́нною ва́м свы́ше, сего́ ра́ди, хва́ляще Бо́га, пое́м: Аллилу́иа.
Икос 6
Возсия́ли есте́, я́ко пресве́тлыя зве́зды, просвеще́нием Свята́го Креще́ния среди́ тьмы́ идолослуже́ния; ве́ру бо правосла́вную прие́мше, се́мена благоче́стия христиа́нскаго в сердца́х по́дданных свои́х посе́ясте и на славосло́вие и́мене Бо́жия хра́мы боголе́пно сооруди́сте. Сего́ ра́ди, святи́и Бори́се и Гле́бе, ва́с почита́ем си́ми похва́льными пе́сньми:
Ра́дуйтеся, и́дольския ле́сти обличи́телие; ра́дуйтеся, дре́вняго зми́я попра́телие.
Ра́дуйтеся, жития́ непоро́чнаго рачи́телие; ра́дуйтеся, ева́нгельских пропове́даний блюсти́телие.
Ра́дуйтеся, те́рния поро́ков ре́вностнии искорени́телие; ра́дуйтеся, подвигополо́жнику Христу́ после́дователие.
Ра́дуйтеся, и́стиннии о́брази кро́тости и незло́бия; ра́дуйтеся, благода́ти си́лу подаю́щии мно́гим.
Ра́дуйтеся, нерастле́ннии хра́ми Бо́га Жива́го; ра́дуйтеся, доброде́телей чи́стая зерца́ла.
Ра́дуйтеся, в чу́дный све́т богопозна́ния пресе́льницы; ра́дуйтеся, вели́цыи Христо́вы уго́дницы.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 7
А́ще и мно́гажды злоумы́шленнии язы́цы покуша́хуся вни́ти вну́трь Оте́чествия на́шего и одоле́ти его́, оба́че неви́димым ва́шим предста́тельством пред Бо́гом постыжде́ни и прогна́ни бы́ша. Те́мже удивля́ющеся неизрече́нному к на́м Бо́жию милосе́рдию, пое́м: Аллилу́иа.
Икос 7
Но́выя благода́ти бы́вшии прича́стницы и даро́в Свята́го Ду́ха испо́лненнии, не то́чию в земли́ на́шей яви́лися есте́ до́брии споспе́шницы ве́ры и нра́вов благи́х; но среди́ чужди́х наро́дов сла́ву и́мене Госпо́дня и си́лу мы́шцы Его́ яви́сте. Сего́ ра́ди похва́льными пе́сньми ва́с ублажа́ем:
Ра́дуйтеся, неувяда́емии цве́ти земли́ Ру́сския; ра́дуйтеся, вертогра́да Небе́снаго благоле́пная гро́здия.
Ра́дуйтеся, непоро́чнии а́гнцы ста́да Христо́ва; ра́дуйтеся, я́ко го́лубие, укра́шеннии чистото́ю.
Ра́дуйтеся, на криле́х ве́ры возне́сшиися; ра́дуйтеся, в Небе́сный Иерусали́м пресе́льшиися.
Ра́дуйтеся, го́рняго Сио́на насле́дницы; ра́дуйтеся, лико́в Небе́сных собесе́дницы.
Ра́дуйтеся, я́ко зла́то в горни́ле, искуше́ннии; ра́дуйтеся, к ли́ку му́ченик причте́ннии.
Ра́дуйтеся, Христо́вы Це́ркве вели́кое удобре́ние; ра́дуйтеся, христиа́ном пода́телие ра́дости неизрече́нныя.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 8
Стра́нная и ужа́сная соде́яшася, егда́ злочести́вый варя́г дерзну́ попра́ти ме́сто свя́то, иде́же почива́ху блаже́нная телеса́ ва́ша: о́гнь бо изы́де из земли́, опали́ окая́ннаго и ве́дати научи́ си́лу ва́шу, уго́дницы Бо́жии. Ве́рнии же, прославля́юще чудоде́йства ва́ша, воспе́ша Ди́вному во святы́х Свои́х Бо́гу: Аллилу́иа.
Икос 8
Ве́сь у́м впери́вше в слу́жбу Боже́ственную и духо́вная псалмопе́ния, яви́лися есте́ непобеди́мии Христо́вы адама́нти, егда́ нечести́вии челове́цы приидо́ша от лю́таго Святопо́лка ру́ки на ва́с возложи́ти и непови́нную кро́вь ва́шу проли́ти. Мы́ же ве́рнии, честву́юще ве́ру и страда́ния ва́ша, взыва́ем си́це:
Ра́дуйтеся, слу́жбу Бо́жию в пути́ не оставля́вшии; ра́дуйтеся, богодухнове́нное пе́ние сла́достно внуша́вшии.
Ра́дуйтеся, Боже́ственная словеса́ во усте́х свои́х держа́вшии; ра́дуйтеся, в се́рдце сокро́вище моли́твы стяжа́вшии.
Ра́дуйтеся, А́гнца Бо́жия и́стиннии испове́дницы; ра́дуйтеся, апо́стольских пропове́даний ревни́тельнии прее́мницы.
Ра́дуйтеся, святы́х отце́в преда́ний ве́рнии блюсти́телие; ра́дуйтеся, братолю́бия и послуша́ния храни́телие.
Ра́дуйтеся, я́ко живо́т ве́чный па́че вре́меннаго возлюби́сте; ра́дуйтеся, я́ко Ца́рство Небе́сное земно́му предпочто́сте.
Ра́дуйтеся, я́ко се́рдце смире́нное в же́ртву Бо́гу принесо́сте; ра́дуйтеся, я́ко в ве́ре Христо́ве мно́гих утверди́сте.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 9
Вси́ ве́рнии чту́т благогове́йно па́мять ва́шу: во святы́я хра́мы стека́ющеся, сла́вят страда́ния ва́ша и возвеща́ют чудеса́, я́же соде́ясте си́лою Бо́га и Спа́са на́шего, Ему́же вопие́м: Аллилу́иа.
Икос 9
Вети́и неве́рнии всу́е тружда́ются му́дрствовати о святы́ни ва́шей, Бори́се и Гле́бе достохва́льнии: недоуме́ют бо изрещи́, ка́ко бре́нныя мо́щи чудотворя́т и челове́цы со А́нгелы спрославля́ются. Мы́ же, просвеща́еми ве́рою, благоле́пно вопие́м:
Ра́дуйтеся, Царя́ сла́вы прославле́ние; ра́дуйтеся, кня́зя тьмы́ посрамле́ние.
Ра́дуйтеся, глаго́лов Бо́жиих исполне́ние; ра́дуйтеся, Боже́ственныя прему́дрости оправда́ние.
Ра́дуйтеся, чуде́с Христо́вых пропове́дницы; ра́дуйтеся, ве́чныя ра́дости насле́дницы.
Ра́дуйтеся, во́ини Христо́вы непобеди́мии; ра́дуйтеся, броня́ во́инства на́шего необори́мая.
Ра́дуйтеся, я́ко жи́знь гряду́щую возлюби́ли есте́; ра́дуйтеся, я́ко бла́га вре́менная презре́ли есте́.
Ра́дуйтеся, я́ко по́мыслы ве́ка сего́ отри́нули есте́; ра́дуйтеся, я́ко красото́ю доброде́телей укра́шени есте́.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 10
Спасти́ хотя́ще ду́ши своя́, святи́и страстоте́рпцы, небрего́сте о телесе́х ва́ших и преда́сте и́х на убие́ние, вопию́ще Бо́гу: Аллилу́иа.
Икос 10
Сте́ны есте́, огражда́ющия Ру́сь, святи́и Бори́се и Гле́бе, и неутоми́мии стра́жи проти́ву вра́г на́ших пребыва́ете, непреста́нно моля́щеся Го́споду Бо́гу о спасе́нии ду́ш на́ших и исцеля́юще не́мощи на́ша. Сего́ ра́ди уми́льно вопие́м ко святы́ни ва́шей:
Ра́дуйтеся, я́ко сы́нове росси́йстии хода́тайством ва́шим спаса́ются; ра́дуйтеся, я́ко вси́ ве́рнии моли́твами ва́шими от бе́д и скорбе́й избавля́ются.
Ра́дуйтеся, я́ко врази́ на́ши ва́с устраша́ются и в бе́гство обраща́ются; ра́дуйтеся, я́ко Оте́чество на́ше заступле́нием ва́шим утвержда́ется.
Ра́дуйтеся, я́ко похва́льными венцы́ Це́рковь ва́с венча́ет; ра́дуйтеся, я́ко по́двиги ва́ша правове́рнии немо́лчно воспева́ют.
Ра́дуйтеся, я́ко ста́рцы и ю́ноши к покро́ву ва́шему прибега́ют; ра́дуйтеся, я́ко ца́рие и во́ини, бога́тии и убо́зии ва́с прославля́ют.
Ра́дуйтеся, му́ченическую сме́рть прие́мшии; ра́дуйтеся, терпе́нием жи́знь ве́чную стяжа́вшии.
Ра́дуйтеся, ско́рии помо́щницы; ра́дуйтеся, благомо́щнии засту́пницы.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 11
Пе́ние всеумиле́нное не умолче́ во усте́х ва́ших, егда́ лю́тии губи́телие устреми́шася на ва́с, я́ко на а́гнцев, гото́вых на заколе́ние. Сие́ воспомина́юще и сла́вяще Го́спода, да́вшаго ва́м си́лу такову́ю, взыва́ем к Нему́: Аллилу́иа.
Икос 11
Светоза́рныя свещи́ зри́м ва́с, святи́и благове́рнии кня́зие Бори́се и Гле́бе, освеща́ющия Ру́сскую Це́рковь и все́х ве́рных ча́д ея́, да прославля́ют святу́ю па́мять ва́шу, вопию́ще:
Ра́дуйтеся, во еди́нем ду́се благоче́стия ходи́вшии; ра́дуйтеся, в бра́тстем едине́нии и любви́ пожи́вшии.
Ра́дуйтеся, подража́вшии иску́пльшему на́с Влады́це; ра́дуйтеся, сла́внии и всехва́льнии му́ченицы.
Ра́дуйтеся, подвиза́вшиися по́двигом до́брым; ра́дуйтеся, венча́ннии венце́м сла́вы невече́рния.
Ра́дуйтеся, тече́ние жития́ му́ченически сконча́вшии; ра́дуйтеся, во оби́тели Отца́ Небе́снаго водвори́вшиися.
Ра́дуйтеся, Ру́сския Це́ркве похвало́; ра́дуйтеся, градо́в на́ших ле́пото.
Ра́дуйтеся, сы́нове и засту́пницы земли́ Ру́сския; ра́дуйтеся, я́ко па́мять ва́ша присносла́вна.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 12
Благода́ть, да́нную ва́м от Бо́га на бла́го сыно́в Руси́, о чудотво́рцы Бори́се и Гле́бе, не вотще́ оста́вили есте́: яви́сте бо ся цели́телие боля́щих, уте́шителие су́щих в ско́рбех и заключе́ниих, наста́вницы заблу́ждших и ско́рии помо́щницы все́м, с ве́рою призыва́ющим ва́с и вопию́щим ко Го́споду: Аллилу́иа.
Икос 12
Пою́ще и восхваля́юще чудеса́ ва́ша, честву́ет святу́ю па́мять ва́шу пресла́вная Це́рковь Ру́сская, и мы́, ча́да ея́, о́чи се́рдца возводя́ще ко Го́споду, си́це вопие́м:
Ра́дуйтеся, ко́рене честна́го благи́я о́трасли; ра́дуйтеся, соприча́стницы А́нгельскаго со́нма.
Ра́дуйтеся, сопроти́вных победи́телие; ра́дуйтеся, неду́гующих вра́чеве.
Ра́дуйтеся, градо́в и ве́сей на́ших пресве́тлое сия́ние; ра́дуйтеся, во́инства ру́сскаго тве́рдое огражде́ние.
Ра́дуйтеся, я́ко страда́ньми ва́шими сниска́сте ра́дость ве́чную; ра́дуйтеся, я́ко муче́ньми прешли́ есте́ к блаже́нному безсме́ртию.
Ра́дуйтеся, в горни́ле лю́тых обстоя́ний искуше́ннии; ра́дуйтеся, добро́тою благоче́стия чисте́е зла́та блиста́ющии.
Ра́дуйтеся, Бо́гови всепло́дие себе́ прине́сшии; ра́дуйтеся, живота́ ве́чнаго и Ца́рствия Бо́жия насле́дницы.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 13
О святи́и и всесла́внии чудотво́рцы Бори́се и Гле́бе, вели́цыи росси́йстии помо́щницы в беда́х и напа́стех! Не пре́зрите на́с гре́шных, но приими́те моле́ние на́ше, я́коже прия́ли есте́ моли́твы благове́рных росси́йских князе́й Алекса́ндра и Дими́трия, и принеси́те Всеми́лостивому Спа́су на́ше моле́бное приноше́ние, да изба́вит на́с от вся́ких бе́д и напа́стей, да охрани́т Оте́чество на́ше от вра́г ви́димых и неви́димых, е́же на́м в ми́ре глубо́це пе́ти с ва́ми Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелов Госпо́дних согра́ждане яви́стеся, святи́и благове́рнии Бори́се и Гле́бе, не оста́вльше согра́ждан земна́го ми́ра: по страда́нии бо ва́шем честна́я телеса́ ва́ша, му́ченическою кро́вию обагре́нная и благода́тию Бо́жиею просла́вленная, все́м с ве́рою к ни́м притека́ющим источа́ют многоразли́чная чуде́сная исцеле́ния; ду́ши же ва́ша предстоя́т с ли́ки А́нгельскими и со все́ми святы́ми Пресвяте́й Тро́ице. Те́мже мы́, удивля́ющеся ва́шему го́рнему и до́льнему гражда́нству, благогове́йно преклоня́юще пред ва́ми коле́на и сердца́ на́ша, уми́льно вопие́м си́це:
Ра́дуйтеся, оде́жды креще́ния непоро́чнии храни́телие; ра́дуйтеся, христиа́нскаго благоче́стия при́снии ревни́телие.
Ра́дуйтеся, Боже́ственных писа́ний ученицы́ до́брии; ра́дуйтеся, отца́ благове́рнаго ча́да возлю́бленная.
Ра́дуйтеся, Ева́нгелия Христо́ва после́дователие и́стиннии; ра́дуйтеся, Бо́гови сло́вом и житие́м благоугоди́вшии.
Ра́дуйтеся, чу́дным све́том богопозна́ния просвеще́ннии; ра́дуйтеся, ви́ссом чистоты́ и непоро́чности облече́ннии.
Ра́дуйтеся, неустраши́мо муче́ния прие́мшии; ра́дуйтеся, Го́споду Иису́су Христу́ в страсте́х подража́вшии.
Ра́дуйтеся, все́льшиися во оби́тели Отца́ Небе́снаго; ра́дуйтеся, восприе́мшии от Го́спода мзду́ трудо́в и терпе́ния.
Ра́дуйтеся, Бори́се и Гле́бе, вели́цыи и сла́внии страстоте́рпцы.
Кондак 1
Избра́ннии чудотво́рцы и до́блественнии во́ини Христо́вы, блага́го ко́рене благи́я о́трасли, пресве́тлая дво́ице, в неду́зех безме́зднии вра́чеве и ко Спа́су о все́м ми́ре те́плии моли́твенницы, восхваля́ем ва́с любо́вию, святи́и и благове́рнии кня́зие Бори́се и Гле́бе. Вы́ же, я́ко иму́щии дерзнове́ние ко Пресвяте́й Тро́ице, от вся́ких на́с бе́д изба́вите, да зове́м к ва́м:
Ра́дуйтеся, Бори́се и Гле́бе, вели́цыи и сла́внии страстоте́рпцы.
Молитвы
О святи́и страстоте́рпцы, боголюби́вая дво́ице, благове́рнии кня́зие Бори́се и Гле́бе, измла́да все́ю душе́ю Христа́ возлюби́вшии, целому́дрие, кро́тость, смире́ние и про́чия доброде́тели стяжа́вшии и, я́ко а́гнцы незло́бивии, от бра́та своего́ непра́ведное убие́ние претерпе́вшии, чи́стыя своя́ ду́ши в благоприя́тную же́ртву Бо́гу прине́сшии и от Него́ венцы́ нетле́нныя прие́мшии! Припа́дающе к честно́му о́бразу ва́шему, мо́лим ва́с в ду́се сокруше́нне и смире́нне: вознеси́те своя́ усе́рдныя моли́твы ко Всеми́лостивому Спа́су, да пода́ст на́м, чту́щим святу́ю па́мять ва́шу, вели́кия Своя́ и бога́тыя ми́лости. Це́рковь Свою́ Святу́ю да соблюде́т от ересе́й и раско́лов, в ча́дех ея́ да оживи́т ду́х пра́выя ве́ры и любве́, ду́х ве́дения и благоче́стия, да да́рует все́м на́м вся́ к жи́зни вре́менней и ве́чней потре́бная. Е́й, святи́и страстоте́рпцы, ускори́те на по́мощь на́м, я́коже сро́днику ва́шему благове́рному кня́зю Алекса́ндру Не́вскому, и изба́вите страну́ на́шу от вра́г ви́димых и неви́димых, от гла́да, огня́, смертоно́сныя я́звы, от вся́ких бе́д и напа́стей; разжени́те облежа́щий ны́ мра́к неве́рия и развраще́ния, да ми́рно и благоче́стно поживе́м в ве́це се́м, и сподо́бимся христиа́нския кончи́ны и до́браго отве́та на Стра́шнем Суде́ Христа́ Бо́га на́шего, Ему́же подоба́ет че́сть и поклоне́ние, со Безнача́льным Его́ Отце́м, и Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Конда́къ а҃
И҆збра́ннїи чꙋдотво́рцы и҆ до́блественнїи во́ини хрⷭ҇тѡ́вы, бл҃га́гѡ ко́рене бл҃гі̑ѧ ѻ҆́трасли, пресвѣ́тлаѧ дво́ице, въ недꙋ́зѣхъ безме́зднїи вра́чеве и҆ ко сп҃сꙋ ѡ҆ все́мъ мі́рѣ те́плїи мл҃твєнницы, восхвалѧ́емъ ва́съ любо́вїю, ст҃і́и и҆ бл҃говѣ́рнїи кнѧ́зїе бори́се и҆ глѣ́бе. Вы́ же ꙗ҆́кѡ и҆мꙋ́щїи дерзнове́нїе ко прест҃ѣ́й трⷪ҇цѣ, ѿ всѧ́кихъ на́съ бѣ́дъ и҆зба́вите, да зове́мъ къ ва́мъ:
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
І҆́косъ а҃
А҆́гг҃лѡвъ гдⷭ҇нихъ согра́ждане ꙗ҆ви́стесѧ, ст҃і́и бл҃говѣ́рнїи бори́се и҆ глѣ́бе, не ѡ҆ста́вльше согра́жданъ земна́гѡ мі́ра: по страда́нїи бо ва́шемъ чтⷭ҇на̑ѧ тѣлеса̀ ва̑ша, мч҃нческою кро́вїю ѡ҆багрє́ннаѧ и҆ бл҃года́тїю бж҃їею просла́влєннаѧ, всѣ̑мъ съ вѣ́рою къ ни̑мъ притека́ющымъ и҆сточа́ютъ многоразли̑чнаѧ чꙋдє́снаѧ и҆сцѣлє́нїѧ: дꙋ́шы же ва́шѧ предстоѧ́тъ съ ли̑ки а҆́гг҃льскими и҆ со всѣ́ми ст҃ы́ми прест҃ѣ́й трⷪ҇цѣ. Тѣ́мже мы̀, ᲂу҆дивлѧ́ющесѧ ва́шемꙋ го́рнемꙋ и҆ до́льнемꙋ гражда́нствꙋ, бл҃гоговѣ́йнѡ преклонѧ́юще пред̾ ва́ми колѣ̑на и҆ сердца̀ на̑ша, ᲂу҆ми́льнѡ вопїе́мъ си́це:
Ра́дꙋйтесѧ, ѻ҆де́жды кр҃ще́нїѧ непоро́чнїи храни́телїе: ра́дꙋйтесѧ, хрⷭ҇тїа́нскагѡ бл҃гоче́стїѧ при́снїи ревни́телїе.
Ра́дꙋйтесѧ, бжⷭ҇твенныхъ писа́нїй ᲂу҆ченицы̀ до́брїи: ра́дꙋйтесѧ, ѻ҆тца̀ бл҃говѣ́рнагѡ ча̑да возлю́блєннаѧ.
Ра́дꙋйтесѧ, є҆ѵⷢ҇лїа хрⷭ҇то́ва послѣ́дователїе и҆́стиннїи: ра́дꙋйтесѧ, бг҃ови сло́вомъ и҆ житїе́мъ бл҃гоꙋгоди́вшїи.
Ра́дꙋйтесѧ, чꙋ́днымъ свѣ́томъ бг҃опозна́нїѧ просвѣще́ннїи: ра́дꙋйтесѧ, вѵ́ссомъ чистоты̀ и҆ непоро́чности ѡ҆блече́ннїи.
Ра́дꙋйтесѧ, неꙋстраши́мѡ мꙋчє́нїѧ прїе́мшїи: ра́дꙋйтесѧ, гдⷭ҇ꙋ і҆и҃сꙋ хрⷭ҇тꙋ̀ въ стрⷭ҇те́хъ подража́вшїи.
Ра́дꙋйтесѧ, все́льшїисѧ во ѻ҆би́тєли ѻ҆ц҃а̀ нбⷭ҇нагѡ: ра́дꙋйтесѧ, воспрїе́мшїи ѿ гдⷭ҇а мздꙋ̀ трꙋдѡ́въ и҆ терпѣ́нїѧ.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ в҃
Ви́дѣша сы́нове рѡссі́йстїи, ка́кѡ и҆спо́лнисѧ ст҃ы́й хра́мъ бл҃гоꙋха́нїѧ пречꙋ́днагѡ, є҆гда̀ ѿверзо́ша ра́кꙋ ва́шꙋ, и҆ просла́виша всѝ гдⷭ҇а. Тѣ́мже и҆ мы̀, грѣ́шнїи и҆ недосто́йнїи, бл҃гоговѣ́юще пред̾ пречꙋ́дною ст҃ы́нею, прославлѧ́емъ ди́внаго во ст҃ы́хъ свои́хъ бг҃а, непреста́ннѡ вопїю́ще: А҆ллилꙋ́їа.
І҆́косъ в҃
Ра́зꙋмъ здра́вый стѧжа́ли є҆стѐ ст҃ы́мъ и҆ бг҃оꙋго́днымъ житїе́мъ ва́шимъ, стрⷭ҇тоте́рпцы хрⷭ҇тѡ́вы бори́се и҆ глѣ́бе. Е҆гда̀ ᲂу҆слы́шасте ѡ҆ ᲂу҆мышле́нїи ка́инскомъ лю́тагѡ и҆ властолюби́вагѡ бра́та ва́шегѡ свѧтопо́лка, нима́лѡ не помы́слисте проти́вꙋ є҆гѡ̀ ра́тїю и҆тѝ: возжела́сте па́че жи́зни своеѧ̀ лиши́тисѧ, не́жели съ бра́томъ и҆мѣ́ти бра́нь. Сегѡ̀ ра́ди мы̀, предстоѧ́ще мл҃твеннѡ пред̾ ва́ми, возво́димъ ѻ҆чеса̀ на̑ша сердє́чнаѧ горѣ̀ къ ва́мъ, на нб҃сѝ живꙋ́щымъ, почита́юще чтⷭ҇на̑ѧ ва̑ша страда̑нїѧ си́ми похва́льными пѣ́сньми:
Ра́дꙋйтесѧ, сꙋ́етныхъ помышле́нїй презри́телїе: ра́дꙋйтесѧ, за́повѣдей хрⷭ҇то́выхъ и҆сполни́телїе.
Ра́дꙋйтесѧ, тьмы̀ грѣхо́вныѧ попра́телїе: ра́дꙋйтесѧ, вѣнцено́сцы наро́читїи.
Ра́дꙋйтесѧ, ника́коже къ земны̑мъ се́рдце своѐ прилѣпи́вшїи: ра́дꙋйтесѧ, жива́го бг҃а па́че всегѡ̀ мі́ра возлюби́вшїи.
Ра́дꙋйтесѧ, ѡ҆правда́нїй гдⷭ҇нихъ пресвѣ̑тлыѧ свѣщы̀: ра́дꙋйтесѧ, нбⷭ҇ныхъ бла̑гъ прича̑стницы.
Ра́дꙋйтесѧ, пресла́дцыи слы́шателїе бжⷭ҇твенныхъ слове́съ: ра́дꙋйтесѧ, те́плїи ко сп҃сꙋ ѡ҆ на́съ мл҃твєнницы.
Ра́дꙋйтесѧ, кро́вїю свое́ю ᲂу҆бѣле́ннїи: ра́дꙋйтесѧ, заре́ю трисл҃нечнагѡ свѣ́та ѡ҆заре́ннїи.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ г҃
Си́лою бжⷭ҇твенною подвиза́еми покрови́телїе є҆стѐ на́мъ, защи̑тницы и҆ помѡ́щницы: странꙋ̀ бо на́шꙋ ѿ нападе́нїй вра́жїихъ и҆збавлѧ́ете, стра́ждꙋщихъ ѿ всѧ́кихъ недꙋ́гѡвъ и҆ болѣ́зней и҆сцѣлѧ́ете и҆ во всѧ́комъ бл҃зѣ преспѣ́ѧнїе да́рꙋете всѣ̑мъ, вопїю́щымъ бг҃ꙋ: А҆ллилꙋ́їа.
І҆́косъ г҃
И҆мꙋ́ще вои́стиннꙋ, во́ини хрⷭ҇тѡ́вы бори́се и҆ глѣ́бе, пла́менное се́рдце ко бл҃гохвале́нїю ди́внагѡ въ чꙋдесѣ́хъ бг҃а, мо́литесѧ непреста́ннѡ ѡ҆ сп҃се́нїи дꙋ́шъ къ ва́мъ ᲂу҆се́рднѡ прибѣга́ющихъ. Сегѡ̀ ра́ди мы̀ ѿ глꙋбины̀ серде́цъ на́шихъ ᲂу҆миле́ннѡ прино́симъ ва́мъ такова̑ѧ пѣ̑нїѧ:
Ра́дꙋйтесѧ, гдⷭ҇ꙋ сла́вы вы́нꙋ предстоѧ́щїи: ра́дꙋйтесѧ, а҆́гг҃льскꙋю трист҃ꙋ́ю пѣ́снь слы́шащїи.
Ра́дꙋйтесѧ, го́рнѧгѡ і҆ерⷭ҇ли́ма и҆мени́тїи гра́ждане: ра́дꙋйтесѧ, црⷭ҇тва хрⷭ҇то́ва до́брїи наслѣ̑дницы.
Ра́дꙋйтесѧ, невече́рнѧгѡ днѐ зри́телїе: ра́дꙋйтесѧ, нерꙋкотво́рнагѡ хра́ма ѡ҆бита́телїе.
Ра́дꙋйтесѧ, ра́йскихъ селе́нїй созерца́телїе: ра́дꙋйтесѧ, слѣпы̑мъ прозрѣ́нїѧ пода́телїе.
Ра́дꙋйтесѧ, домѡ́въ бл҃гочести́выхъ посѣти́телїе: ра́дꙋйтесѧ, нерадѧ́щихъ ѡ҆ бл҃гоче́стїи наказа́телїе.
Ра́дꙋйтесѧ, вели́кихъ пра́здникѡвъ почита́нїѧ наста̑вницы: ра́дꙋйтесѧ, въ добродѣ́телехъ преспѣва́ющихъ споспѣ̑шницы.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ д҃
Бꙋ́рею невѣ́рїѧ ѡ҆держи́мыхъ и҆ ходѧ́щихъ во тьмѣ̀ ѕлоче́стїѧ ѻ҆гне́мъ наказа́нїѧ ѡ҆палѧ́ете, да ᲂу҆цѣломꙋ́дрившесѧ и҆́стиннѡ позна́ютъ и҆́стиннаго бг҃а, бл҃гоче́стнѡ є҆го̀ чтꙋ́ще и҆ со стра́хомъ є҆мꙋ̀ вопїю́ще: А҆ллилꙋ́їа.
І҆́косъ д҃
Слы́шаще ва̑ша, стрⷭ҇тоте́рпцы ст҃і́и бори́се и҆ глѣ́бе, чꙋдеса̀, рѡссі́йстїи сы́нове не то́кмѡ и҆з̾ бли́жнихъ, но и҆ и҆з̾ да́льнихъ стра́нъ стека́хꙋсѧ къ ва́шымъ чꙋдодѣ́йствєннымъ моще́мъ, и҆ исцѣлѧ́ющесѧ ѿ недꙋ́гѡвъ и҆ болѣ́зней, вопїѧ́хꙋ къ ва́мъ такова̑ѧ:
Ра́дꙋйтесѧ, бжⷭ҇твенныѧ лозы̀ пресла́дкое ро́ждїе: ра́дꙋйтесѧ, новопросвѣще́нныѧ землѝ кра́снїи цвѣ́ти.
Ра́дꙋйтесѧ, пе́рвїи просла́вленнїи на рꙋсѝ ᲂу҆гѡ́дницы: ра́дꙋйтесѧ, въ бѣда́хъ и҆ нꙋ́ждахъ бл҃гочести̑вымъ посѡ́бницы.
Ра́дꙋйтесѧ, вели́цыи въ напа́стехъ ᲂу҆тѣ́шителїе: ра́дꙋйтесѧ, вѣ́ры хрⷭ҇то́вы ревни́телїе.
Ра́дꙋйтесѧ, бжⷭ҇твенныѧ слꙋ́жбы пла́меннїи люби́телїе: ра́дꙋйтесѧ, бл҃гоче́стїѧ до́брїи строи́телїе.
Ра́дꙋйтесѧ, хромы̑мъ хожде́нїѧ пода́телїе: ра́дꙋйтесѧ, ѡ҆ сп҃се́нїи ро́да хрⷭ҇тїа́нскагѡ хода̑таи.
Ра́дꙋйтесѧ, вїногра́да хрⷭ҇то́ва цѣлє́бныѧ вѣ̑тви: ра́дꙋйтесѧ, и҆́стиннїи и҆ безме́зднїи вра́чеве.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ є҃
Бг҃отє́чныѧ ѕвѣ́зды ꙗ҆ви́стесѧ на́мъ пꙋтево́дствꙋющыѧ: внегда̀ ѡ҆бꙋрева́тисѧ на́мъ волна́ми жите́йскихъ попече́нїй и҆ ѻ҆па́снѡ ше́ствовати къ ти́хомꙋ приста́нищꙋ, свѣ́томъ мл҃твъ ва́шихъ и҆збавлѧ́еми є҆смы̀ ѿ блꙋжде́нїѧ и҆ потопле́нїѧ. Сегѡ̀ ра́ди сла́вѧще гдⷭ҇а, вопїе́мъ: А҆ллилꙋ́їа.
І҆́косъ є҃
Ви́дѣша сы́нове рѡссі́йстїи, ꙗ҆́кѡ притека́ющїи съ вѣ́рою прїе́млютъ хода́тайствомъ ва́шимъ въ нꙋ́ждахъ ско́рое ᲂу҆тѣше́нїе и҆ ѿ ѕѡ́лъ и҆збавле́нїе, тѣ́мже восхвалѧ́ютъ ва́съ си́це:
Ра́дꙋйтесѧ, і҆́дѡльскагѡ нече́стїѧ ѡ҆бличи́телїе: ра́дꙋйтесѧ, мꙋ́дрыхъ ко бл҃гоче́стїю ᲂу҆пра́вителїе.
Ра́дꙋйтесѧ, горды́ни и҆ бꙋесло́вїѧ посрами́телїе: ра́дꙋйтесѧ, ѕло́бы и҆ мще́нїѧ ᲂу҆гаси́телїе.
Ра́дꙋйтесѧ, враждꙋ́ющихъ на ѻ҆те́чество ᲂу҆кроти́телїе: ра́дꙋйтесѧ, по́лчищъ вра́жескихъ расточи́телїе.
Ра́дꙋйтесѧ, ми́ра и҆ тишины̀ возстанови́телїе: ра́дꙋйтесѧ, хрⷭ҇тѡ́вы до́брїи вои́телїе.
Ра́дꙋйтесѧ, бл҃горо́дство земно́е носи́вшїи: ра́дꙋйтесѧ, кро́вїю порфѵ́рꙋ ѡ҆ст҃и́вшїи.
Ра́дꙋйтесѧ, просла́вившїи сп҃са стрⷭ҇тоте́рпцы: ра́дꙋйтесѧ, просла́вленнїи ѿ бг҃а чꙋдотво́рцы.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ ѕ҃
Проповѣ́дꙋющи проповѣ́дꙋетъ всѧ̀ рꙋ́сскаѧ землѧ̀ ва́ше нбⷭ҇ное предста́тельство ᲂу҆ всевы́шнѧгѡ: вы́ бо ꙗ҆́кѡ крѣ́пцыи щитѝ и҆ ꙗ҆́кѡ твє́рдыѧ стѣ́ны, ѡ҆гражда́ете ѻ҆те́чество ва́ше непобѣди́мымъ ѻ҆рꙋ́жїемъ, бл҃года́тїю бжⷭ҇твенною, дарова́нною ва́мъ свы́ше, сегѡ̀ ра́ди хва́лѧще бг҃а, пое́мъ: А҆ллилꙋ́їа.
І҆́косъ ѕ҃
Возсїѧ́ли є҆стѐ, ꙗ҆́кѡ пресвѣ̑тлыѧ ѕвѣ́зды, просвѣще́нїемъ ст҃а́гѡ кр҃ще́нїѧ средѝ тьмы̀ і҆дѡлослꙋже́нїѧ: вѣ́рꙋ бо правосла́внꙋю прїе́мше, сѣ́мена бл҃гоче́стїѧ хрⷭ҇тїа́нскагѡ въ сердца́хъ по́дданныхъ свои́хъ посѣ́ѧсте и҆ на славосло́вїе и҆́мене бж҃їѧ хра́мы бг҃олѣ́пнѡ соѡрꙋди́сте. Сегѡ̀ ра́ди, ст҃і́и бори́се и҆ глѣ́бе, ва́съ почита́емъ си́ми похва́льными пѣ́сньми:
Ра́дꙋйтесѧ, і҆́дѡльскїѧ ле́сти ѡ҆бличи́телїе: ра́дꙋйтесѧ, дре́внѧгѡ ѕмі́ѧ попра́телїе.
Ра́дꙋйтесѧ, житїѧ̀ непоро́чнагѡ рачи́телїе: ра́дꙋйтесѧ, є҆ѵⷢ҇льскихъ проповѣ́данїй блюсти́телїе.
Ра́дꙋйтесѧ, те́рнїѧ поро́кѡвъ ре́вностнїи и҆скорени́телїе: ра́дꙋйтесѧ, подвигополо́жникꙋ хрⷭ҇тꙋ̀ послѣ́дователїе.
Ра́дꙋйтесѧ, и҆́стиннїи ѻ҆́брази кро́тости и҆ неѕло́бїѧ: ра́дꙋйтесѧ, бл҃года́ти си́лꙋ подаю́щїи мнѡ́гимъ.
Ра́дꙋйтесѧ, нерастлѣ́ннїи хра́ми бг҃а жива́гѡ: ра́дꙋйтесѧ, добродѣ́телей чи̑стаѧ зерца̑ла.
Ра́дꙋйтесѧ, въ чꙋ́дный свѣ́тъ бг҃опозна́нїѧ пресє́льницы: ра́дꙋйтесѧ, вели́цыи хрⷭ҇тѡ́вы ᲂу҆гѡ́дницы.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ з҃
А҆́ще и҆ мно́гажды ѕлоꙋмы́шленнїи ꙗ҆зы́цы покꙋша́хꙋсѧ вни́ти внꙋ́трь ѻ҆те́чєствїѧ на́шегѡ и҆ ѡ҆долѣ́ти є҆го̀, ѻ҆ба́че неви́димымъ ва́шимъ предста́тельствомъ пред̾ бг҃омъ постыжде́ни и҆ прогна́ни бы́ша. Тѣ́мже ᲂу҆дивлѧ́ющесѧ неизрече́нномꙋ къ на́мъ бж҃їю млⷭ҇рдїю, пое́мъ: А҆ллилꙋ́їа.
І҆́косъ з҃
Но́выѧ бл҃года́ти бы́вшїи прича̑стницы и҆ дарѡ́въ ст҃а́гѡ дх҃а и҆спо́лненнїи, не то́чїю въ землѝ на́шей ꙗ҆ви́лисѧ є҆стѐ до́брїи споспѣ̑шницы вѣ́ры и҆ нра́вѡвъ бл҃ги́хъ: но средѝ чꙋжди́хъ наро́дѡвъ сла́вꙋ и҆́мене гдⷭ҇нѧ и҆ си́лꙋ мы́шцы є҆гѡ̀ ꙗ҆ви́сте. Сегѡ̀ ра́ди похва́льными пѣ́сньми ва́съ ᲂу҆бл҃жа́емъ:
Ра́дꙋйтесѧ, неꙋвѧда́емїи цвѣ́ти землѝ рꙋ́сскїѧ: ра́дꙋйтесѧ, вертогра́да нбⷭ҇нагѡ бл҃голѣ̑пнаѧ грѡ́здїѧ.
Ра́дꙋйтесѧ, непоро́чнїи а҆́гнцы ста́да хрⷭ҇то́ва: ра́дꙋйтесѧ, ꙗ҆́кѡ го́лꙋбїе, ᲂу҆кра́шеннїи чистото́ю.
Ра́дꙋйтесѧ, на крилѣ́хъ вѣ́ры возне́сшїисѧ: ра́дꙋйтесѧ, въ нбⷭ҇ный і҆ерⷭ҇ли́мъ пресе́льшїисѧ.
Ра́дꙋйтесѧ, го́рнѧгѡ сїѡ́на наслѣ̑дницы: ра́дꙋйтесѧ, ликѡ́въ нбⷭ҇ныхъ собесѣ̑дницы.
Ра́дꙋйтесѧ, ꙗ҆́кѡ зла́то въ горни́лѣ, и҆скꙋше́ннїи: ра́дꙋйтесѧ, къ ли́кꙋ мч҃нкъ причте́ннїи.
Ра́дꙋйтесѧ, хрⷭ҇то́вы цр҃кве вели́кое ᲂу҆добре́нїе: ра́дꙋйтесѧ, хрⷭ҇тїа́нѡмъ пода́телїе ра́дости неизрече́нныѧ.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ и҃
Стра̑ннаѧ и҆ ᲂу҆жа̑снаѧ содѣ́ѧшасѧ, є҆гда̀ ѕлочести́вый варѧ́гъ дерзнꙋ̀ попра́ти мѣ́сто ст҃о, и҆дѣ́же почива́хꙋ бл҃жє́ннаѧ тѣлеса̀ ва̑ша: ѻ҆́гнь бо и҆зы́де и҆з̾ землѝ, ѡ҆палѝ ѻ҆каѧ́ннаго и҆ вѣ́дати наꙋчѝ си́лꙋ ва́шꙋ, ᲂу҆гѡ́дницы бж҃їи. Вѣ́рнїи же прославлѧ́юще чꙋдодѣ̑йства ва̑ша, воспѣ́ша ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.
І҆́косъ и҃
Ве́сь ᲂу҆́мъ впери́вше въ слꙋ́жбꙋ бжⷭ҇твеннꙋю и҆ дꙋхѡ́внаѧ ѱалмопѣ̑нїѧ, ꙗ҆ви́лисѧ є҆стѐ непобѣди́мїи хрⷭ҇тѡ́вы а҆дама́нти, є҆гда̀ нечести́вїи человѣ́цы прїидо́ша ѿ лю́тагѡ свѧтопо́лка рꙋ́ки на ва́съ возложи́ти и҆ непови́ннꙋю кро́вь ва́шꙋ проли́ти. Мы́ же вѣ́рнїи, чествꙋ́юще вѣ́рꙋ и҆ страда̑нїѧ ва̑ша, взыва́емъ си́це:
Ра́дꙋйтесѧ, слꙋ́жбꙋ бж҃їю въ пꙋтѝ не ѡ҆ставлѧ́вшїи: ра́дꙋйтесѧ, бг҃одꙋхнове́нное пѣ́нїе сла́достнѡ внꙋша́вшїи.
Ра́дꙋйтесѧ, бжⷭ҇твєннаѧ словеса̀ во ᲂу҆стѣ́хъ свои́хъ держа́вшїи: ра́дꙋйтесѧ, въ се́рдцѣ сокро́вище мл҃твы стѧжа́вшїи.
Ра́дꙋйтесѧ, а҆́гнца бж҃їѧ и҆́стиннїи и҆сповѣ̑дницы: ра́дꙋйтесѧ, а҆пⷭ҇льскихъ проповѣ́данїй ревни́тельнїи преє́мницы.
Ра́дꙋйтесѧ, ст҃ы́хъ ѻ҆тцє́въ преда́нїй вѣ́рнїи блюсти́телїе: ра́дꙋйтесѧ, братолю́бїѧ и҆ послꙋша́нїѧ храни́телїе.
Ра́дꙋйтесѧ, ꙗ҆́кѡ живо́тъ вѣ́чный па́че вре́меннагѡ возлюби́сте: ра́дꙋйтесѧ, ꙗ҆́кѡ црⷭ҇тво нбⷭ҇ное земно́мꙋ предпочто́сте.
Ра́дꙋйтесѧ, ꙗ҆́кѡ се́рдце смире́нное въ же́ртвꙋ бг҃ꙋ принесо́сте: ра́дꙋйтесѧ, ꙗ҆́кѡ въ вѣ́рѣ хрⷭ҇то́вѣ мно́гихъ ᲂу҆тверди́сте.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ ѳ҃
Всѝ вѣ́рнїи чтꙋ́тъ бл҃гоговѣ́йнѡ па́мѧть ва́шꙋ: во ст҃ы̑ѧ хра́мы стека́ющесѧ, сла́вѧтъ страда̑нїѧ ва̑ша и҆ возвѣща́ютъ чꙋдеса̀, ꙗ҆̀же содѣ́ѧсте си́лою бг҃а и҆ сп҃са на́шегѡ, є҆мꙋ́же вопїе́мъ: А҆ллилꙋ́їа.
І҆́косъ ѳ҃
Вѣті̑и невѣ́рнїи всꙋ́е трꙋжда́ютсѧ мꙋ́дрствовати ѡ҆ ст҃ы́ни ва́шей, бори́се и҆ глѣ́бе достохва́льнїи: недоꙋмѣ́ютъ бо и҆зрещѝ, ка́кѡ брє́нныѧ мо́щи чꙋдотворѧ́тъ и҆ человѣ́цы со а҆́гг҃лы спрославлѧ́ютсѧ. Мы́ же просвѣща́еми вѣ́рою, бл҃голѣ́пнѡ вопїе́мъ:
Ра́дꙋйтесѧ, цр҃ѧ̀ сла́вы прославле́нїе: ра́дꙋйтесѧ, кнѧ́зѧ тьмы̀ посрамле́нїе.
Ра́дꙋйтесѧ, глаго́лѡвъ бж҃їихъ и҆сполне́нїе: ра́дꙋйтесѧ, бжⷭ҇твенныѧ премꙋ́дрости ѡ҆правда́нїе.
Ра́дꙋйтесѧ, чꙋде́съ хрⷭ҇то́выхъ проповѣ̑дницы: ра́дꙋйтесѧ, вѣ́чныѧ ра́дости наслѣ̑дницы.
Ра́дꙋйтесѧ, во́ини хрⷭ҇тѡ́вы непобѣди́мїи: ра́дꙋйтесѧ, бронѧ̀ во́инства на́шегѡ неѡбори́маѧ.
Ра́дꙋйтесѧ, ꙗ҆́кѡ жи́знь грѧдꙋ́щꙋю возлюби́ли є҆стѐ: ра́дꙋйтесѧ, ꙗ҆́кѡ бла̑га вре́мєннаѧ презрѣ́ли є҆стѐ.
Ра́дꙋйтесѧ, ꙗ҆́кѡ по́мыслы вѣ́ка сегѡ̀ ѿри́нꙋли є҆стѐ: ра́дꙋйтесѧ, ꙗ҆́кѡ красото́ю добродѣ́телей ᲂу҆кра́шени є҆стѐ.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ і҃
Сп҃стѝ хотѧ́ще дꙋ́шы своѧ̑, ст҃і́и стрⷭ҇тоте́рпцы, небрего́сте ѡ҆ тѣлесѣ́хъ ва́шихъ и҆ преда́сте и҆̀хъ на ᲂу҆бїе́нїе, вопїю́ще бг҃ꙋ: А҆ллилꙋ́їа.
І҆́косъ і҃
Стѣ́ны є҆стѐ, ѡ҆гражда́ющыѧ рꙋ́сь, ст҃і́и бори́се и҆ глѣ́бе, и҆ неꙋтоми́мїи стра̑жи проти́вꙋ вра̑гъ на́шихъ пребыва́ете, непреста́ннѡ молѧ́щесѧ гдⷭ҇ꙋ бг҃ꙋ ѡ҆ сп҃се́нїи дꙋ́шъ на́шихъ и҆ и҆сцѣлѧ́юще не́мѡщи на́шѧ. Сегѡ̀ ра́ди ᲂу҆ми́льнѡ вопїе́мъ ко ст҃ы́ни ва́шей:
Ра́дꙋйтесѧ, ꙗ҆́кѡ сы́нове рѡссі́йстїи хода́тайствомъ ва́шимъ сп҃са́ютсѧ: ра́дꙋйтесѧ, ꙗ҆́кѡ всѝ вѣ́рнїи мл҃твами ва́шими ѿ бѣ́дъ и҆ скорбе́й и҆збавлѧ́ютсѧ.
Ра́дꙋйтесѧ, ꙗ҆́кѡ вразѝ на́ши ва́съ ᲂу҆страша́ютсѧ и҆ въ бѣ́гство ѡ҆браща́ютсѧ: ра́дꙋйтесѧ, ꙗ҆́кѡ ѻ҆те́чество на́ше застꙋпле́нїемъ ва́шимъ ᲂу҆твержда́етсѧ.
Ра́дꙋйтесѧ, ꙗ҆́кѡ похва́льными вѣнцы̑ цр҃ковь ва́съ вѣнча́етъ: ра́дꙋйтесѧ, ꙗ҆́кѡ по́двиги ва́шѧ правовѣ́рнїи немо́лчнѡ воспѣва́ютъ.
Ра́дꙋйтесѧ, ꙗ҆́кѡ ста́рцы и҆ ю҆́нѡши къ покро́вꙋ ва́шемꙋ прибѣга́ютъ: ра́дꙋйтесѧ, ꙗ҆́кѡ ца́рїе и҆ во́ини, бога́тїи и҆ ᲂу҆бо́зїи ва́съ прославлѧ́ютъ.
Ра́дꙋйтесѧ, мч҃нческꙋю сме́рть прїе́мшїи: ра́дꙋйтесѧ, терпѣ́нїемъ жи́знь вѣ́чнꙋю стѧжа́вшїи.
Ра́дꙋйтесѧ, ско́рїи помѡ́щницы: ра́дꙋйтесѧ, бл҃гомо́щнїи застꙋ̑пницы.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ а҃і
Пѣ́нїе всеꙋмиле́нное не ᲂу҆молчѐ во ᲂу҆стѣ́хъ ва́шихъ, є҆гда̀ лю́тїи гꙋби́телїе ᲂу҆стреми́шасѧ на ва́съ, ꙗ҆́кѡ на а҆́гнцєвъ, гото́выхъ на заколе́нїе. Сїѐ воспомина́юще и҆ сла́вѧще гдⷭ҇а, да́вшаго ва́мъ си́лꙋ таковꙋ́ю, взыва́емъ къ немꙋ̀: А҆ллилꙋ́їа.
І҆́косъ а҃і
Свѣтоза̑рныѧ свѣщы̀ зри́мъ ва́съ, ст҃і́и бл҃говѣ́рнїи кнѧ́зїе бори́се и҆ глѣ́бе, ѡ҆свѣща́ющыѧ рꙋ́сскꙋю цр҃ковь и҆ всѣ́хъ вѣ́рныхъ ча̑дъ є҆ѧ̀, да прославлѧ́ютъ ст҃ꙋ́ю па́мѧть ва́шꙋ, вопїю́ще:
Ра́дꙋйтесѧ, во є҆ди́нѣмъ дꙋ́сѣ бл҃гоче́стїѧ ходи́вшїи: ра́дꙋйтесѧ, въ бра́тстѣмъ є҆дине́нїи и҆ любвѝ пожи́вшїи.
Ра́дꙋйтесѧ, подража́вшїи и҆скꙋ́пльшемꙋ на́съ влⷣцѣ: ра́дꙋйтесѧ, сла́внїи и҆ всехва́льнїи мч҃нцы.
Ра́дꙋйтесѧ, подвиза́вшїисѧ по́двигомъ до́брымъ: ра́дꙋйтесѧ, вѣнча́ннїи вѣнце́мъ сла́вы невече́рнїѧ.
Ра́дꙋйтесѧ, тече́нїе житїѧ̀ мч҃нчески сконча́вшїи: ра́дꙋйтесѧ, во ѻ҆би́тєли ѻ҆ц҃а̀ нбⷭ҇нагѡ водвори́вшїисѧ.
Ра́дꙋйтесѧ, рꙋ́сскїѧ цр҃кве похвало̀: ра́дꙋйтесѧ, градѡ́въ на́шихъ лѣ́пото.
Ра́дꙋйтесѧ, сы́нове и҆ застꙋ̑пницы землѝ рꙋ́сскїѧ: ра́дꙋйтесѧ, ꙗ҆́кѡ па́мѧть ва́ша присносла́вна.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ в҃і
Бл҃года́ть, да́ннꙋю ва́мъ ѿ бг҃а на бл҃го сынѡ́въ рꙋсѝ, ѽ чꙋдотво́рцы бори́се и҆ глѣ́бе, не вотщѐ ѡ҆ста́вили є҆стѐ: ꙗ҆ви́сте бо сѧ цѣли́телїе болѧ́щихъ, ᲂу҆тѣ́шителїе сꙋ́щихъ въ ско́рбехъ и҆ заключе́нїихъ, наста̑вницы заблꙋ́ждшихъ и҆ ско́рїи помѡ́щницы всѣ̑мъ, съ вѣ́рою призыва́ющымъ ва́съ и҆ вопїю́щымъ ко гдⷭ҇ꙋ: А҆ллилꙋ́їа.
І҆́косъ в҃і
Пою́ще и҆ восхвалѧ́юще чꙋдеса̀ ва̑ша, чествꙋ́етъ ст҃ꙋ́ю па́мѧть ва́шꙋ пресла́внаѧ цр҃ковь рꙋ́сскаѧ, и҆ мы̀, ча̑да є҆ѧ̀, ѻ҆́чи се́рдца возводѧ́ще ко гдⷭ҇ꙋ, си́це вопїе́мъ:
Ра́дꙋйтесѧ, ко́рене чтⷭ҇на́гѡ бл҃гі̑ѧ ѻ҆́трасли: ра́дꙋйтесѧ, соприча̑стницы а҆́гг҃льскагѡ со́нма.
Ра́дꙋйтесѧ, сопроти́вныхъ побѣди́телїе: ра́дꙋйтесѧ, недꙋ́гꙋющихъ вра́чеве.
Ра́дꙋйтесѧ, градѡ́въ и҆ ве́сей на́шихъ пресвѣ́тлое сїѧ́нїе: ра́дꙋйтесѧ, во́инства рꙋ́сскагѡ тве́рдое ѡ҆гражде́нїе.
Ра́дꙋйтесѧ, ꙗ҆́кѡ страда́ньми ва́шими сниска́сте ра́дость вѣ́чнꙋю: ра́дꙋйтесѧ, ꙗ҆́кѡ мꙋче́ньми прешлѝ є҆стѐ къ бл҃же́нномꙋ безсме́ртїю.
Ра́дꙋйтесѧ, въ горни́лѣ лю́тыхъ ѡ҆бстоѧ́нїй и҆скꙋше́ннїи: ра́дꙋйтесѧ, добро́тою бл҃гоче́стїѧ чистѣ́е зла́та блиста́ющїи.
Ра́дꙋйтесѧ, бг҃ови всепло́дїе себѐ прине́сшїи: ра́дꙋйтесѧ, живота̀ вѣ́чнагѡ и҆ црⷭ҇твїѧ бж҃їѧ наслѣ̑дницы.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ г҃і
Ѽ ст҃і́и и҆ всесла́внїи чꙋдотво́рцы бори́се и҆ глѣ́бе, вели́цыи рѡссі́йстїи помѡ́щницы въ бѣда́хъ и҆ напа́стехъ! Не пре́зрите на́съ грѣ́шныхъ, но прїими́те моле́нїе на́ше, ꙗ҆́коже прїѧ́ли є҆стѐ мл҃твы бл҃говѣ́рныхъ рѡссі́йскихъ кнѧзе́й а҆леѯа́ндра и҆ дими́трїа, и҆ принеси́те всемлⷭ҇тивомꙋ сп҃сꙋ на́ше моле́бное приноше́нїе, да и҆зба́витъ на́съ ѿ всѧ́кихъ бѣ́дъ и҆ напа́стей, да ѡ҆храни́тъ ѻ҆те́чество на́ше ѿ вра̑гъ ви́димыхъ и҆ неви́димыхъ, є҆́же на́мъ въ ми́рѣ глꙋбо́цѣ пѣ́ти съ ва́ми бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡвъ гдⷭ҇нихъ согра́ждане ꙗ҆ви́стесѧ, ст҃і́и бл҃говѣ́рнїи бори́се и҆ глѣ́бе, не ѡ҆ста́вльше согра́жданъ земна́гѡ мі́ра: по страда́нїи бо ва́шемъ чтⷭ҇на̑ѧ тѣлеса̀ ва̑ша, мч҃нческою кро́вїю ѡ҆багрє́ннаѧ и҆ бл҃года́тїю бж҃їею просла́влєннаѧ, всѣ̑мъ съ вѣ́рою къ ни̑мъ притека́ющымъ и҆сточа́ютъ многоразли̑чнаѧ чꙋдє́снаѧ и҆сцѣлє́нїѧ: дꙋ́шы же ва́шѧ предстоѧ́тъ съ ли̑ки а҆́гг҃льскими и҆ со всѣ́ми ст҃ы́ми прест҃ѣ́й трⷪ҇цѣ. Тѣ́мже мы̀, ᲂу҆дивлѧ́ющесѧ ва́шемꙋ го́рнемꙋ и҆ до́льнемꙋ гражда́нствꙋ, бл҃гоговѣ́йнѡ преклонѧ́юще пред̾ ва́ми колѣ̑на и҆ сердца̀ на̑ша, ᲂу҆ми́льнѡ вопїе́мъ си́це:
Ра́дꙋйтесѧ, ѻ҆де́жды кр҃ще́нїѧ непоро́чнїи храни́телїе: ра́дꙋйтесѧ, хрⷭ҇тїа́нскагѡ бл҃гоче́стїѧ при́снїи ревни́телїе.
Ра́дꙋйтесѧ, бжⷭ҇твенныхъ писа́нїй ᲂу҆ченицы̀ до́брїи: ра́дꙋйтесѧ, ѻ҆тца̀ бл҃говѣ́рнагѡ ча̑да возлю́блєннаѧ.
Ра́дꙋйтесѧ, є҆ѵⷢ҇лїа хрⷭ҇то́ва послѣ́дователїе и҆́стиннїи: ра́дꙋйтесѧ, бг҃ови сло́вомъ и҆ житїе́мъ бл҃гоꙋгоди́вшїи.
Ра́дꙋйтесѧ, чꙋ́днымъ свѣ́томъ бг҃опозна́нїѧ просвѣще́ннїи: ра́дꙋйтесѧ, вѵ́ссомъ чистоты̀ и҆ непоро́чности ѡ҆блече́ннїи.
Ра́дꙋйтесѧ, неꙋстраши́мѡ мꙋчє́нїѧ прїе́мшїи: ра́дꙋйтесѧ, гдⷭ҇ꙋ і҆и҃сꙋ хрⷭ҇тꙋ̀ въ стрⷭ҇те́хъ подража́вшїи.
Ра́дꙋйтесѧ, все́льшїисѧ во ѻ҆би́тєли ѻ҆ц҃а̀ нбⷭ҇нагѡ: ра́дꙋйтесѧ, воспрїе́мшїи ѿ гдⷭ҇а мздꙋ̀ трꙋдѡ́въ и҆ терпѣ́нїѧ.
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Конда́къ а҃
И҆збра́ннїи чꙋдотво́рцы и҆ до́блественнїи во́ини хрⷭ҇тѡ́вы, бл҃га́гѡ ко́рене бл҃гі̑ѧ ѻ҆́трасли, пресвѣ́тлаѧ дво́ице, въ недꙋ́зѣхъ безме́зднїи вра́чеве и҆ ко сп҃сꙋ ѡ҆ все́мъ мі́рѣ те́плїи мл҃твєнницы, восхвалѧ́емъ ва́съ любо́вїю, ст҃і́и и҆ бл҃говѣ́рнїи кнѧ́зїе бори́се и҆ глѣ́бе. Вы́ же ꙗ҆́кѡ и҆мꙋ́щїи дерзнове́нїе ко прест҃ѣ́й трⷪ҇цѣ, ѿ всѧ́кихъ на́съ бѣ́дъ и҆зба́вите, да зове́мъ къ ва́мъ:
Ра́дꙋйтесѧ, бори́се и҆ глѣ́бе, вели́цыи и҆ сла́внїи стрⷭ҇тоте́рпцы.
Моли́твы
Ѽ ст҃і́и стрⷭ҇тоте́рпцы, бг҃олюби́ваѧ дво́ице, бл҃говѣ́рнїи кнѧ́зїе бори́се и҆ глѣ́бе, и҆змла́да все́ю дꙋше́ю хрⷭ҇та̀ возлюби́вшїи, цѣломꙋ́дрїе, кро́тость, смире́нїе и҆ прѡ́чїѧ добродѣ́тєли стѧжа́вшїи, и҆ ꙗ҆́кѡ а҆́гнцы неѕло́бивїи, ѿ бра́та своегѡ̀ непра́ведное ᲂу҆бїе́нїе претерпѣ́вшїи, чи̑стыѧ своѧ̑ дꙋ́шы въ бл҃гопрїѧ́тнꙋю же́ртвꙋ бг҃ꙋ прине́сшїи и҆ ѿ негѡ̀ вѣнцы̀ нетлѣ̑нныѧ прїе́мшїи! Припа́дающе къ чтⷭ҇но́мꙋ ѻ҆́бразꙋ ва́шемꙋ, мо́лимъ ва́съ въ дꙋ́сѣ сокрꙋше́ннѣ и҆ смире́ннѣ: вознеси́те своѧ̑ ᲂу҆сє́рдныѧ мл҃твы ко всемлⷭ҇тивомꙋ сп҃сꙋ, да пода́стъ на́мъ, чтꙋ́щымъ ст҃ꙋ́ю па́мѧть ва́шꙋ, вели̑кїѧ своѧ̑ и҆ бога̑тыѧ млⷭ҇ти. Цр҃ковь свою̀ ст҃ꙋ́ю да соблюде́тъ ѿ є҆ресе́й и҆ раско́лѡвъ, въ ча́дѣхъ є҆ѧ̀ да ѡ҆живи́тъ дꙋ́хъ пра̑выѧ вѣ́ры и҆ любвѐ, дꙋ́хъ вѣ́дѣнїѧ и҆ бл҃гоче́стїѧ, да да́рꙋетъ всѣ̑мъ на́мъ всѧ̑ къ жи́зни вре́меннѣй и҆ вѣ́чнѣй потрє́бнаѧ. Є҆́й, ст҃і́и стрⷭ҇тоте́рпцы, ᲂу҆скори́те на по́мощь на́мъ, ꙗ҆́коже сро́дникꙋ ва́шемꙋ бл҃говѣ́рномꙋ кнѧ́зю а҆леѯа́ндрꙋ не́вскомꙋ, и҆ и҆зба́вите странꙋ̀ на́шꙋ ѿ вра̑гъ ви́димыхъ и҆ неви́димыхъ, ѿ гла́да, ѻ҆гнѧ̀, смертоно́сныѧ ꙗ҆́звы, ѿ всѧ́кихъ бѣ́дъ и҆ напа́стей: разжени́те ѡ҆блежа́щїй ны̀ мра́къ невѣ́рїѧ и҆ развраще́нїѧ, да ми́рнѡ и҆ бл҃гоче́стнѡ поживе́мъ въ вѣ́цѣ се́мъ, и҆ сподо́бимсѧ хрⷭ҇тїа́нскїѧ кончи́ны и҆ до́брагѡ ѿвѣ́та на стра́шнѣмъ сꙋдѣ̀ хрⷭ҇та̀ бг҃а на́шегѡ, є҆мꙋ́же подоба́етъ че́сть и҆ поклоне́нїе, со безнача́льнымъ є҆гѡ̀ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.