Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ прпⷣбномꙋ мака́рїю, желтово́дскомꙋ и҆ ᲂу҆́нженскомꙋ чꙋдотво́рцꙋ.

Прп. Макария Желтоводского (1444) 7 августа 2026

Конда́къ а҃

И҆збра́нный ѿ воево́ды си́лъ нбⷭ҇ныхъ и҆ гдⷭ҇а і҆и҃са хрⷭ҇та̀, прпⷣбне ѻ҆́ч҃е на́шъ мака́рїе, ꙗ҆́кѡ и҆мѣ́ѧй ве́лїе дерзнове́нїе къ бг҃ꙋ, моли́сѧ вы́нꙋ ѡ҆ сп҃се́нїи дꙋ́шъ на́шихъ и҆ и҆збавле́нїи на́съ ѿ всѧ́кихъ бѣ́дъ и҆ напа́стей, да зове́мъ тѝ:

Ра́дꙋйсѧ, мака́рїе, преди́вный чꙋдотво́рче.

І҆́косъ а҃

А҆́гг҃ла на землѝ ꙗ҆ви́ тѧ творе́цъ нб҃сѝ и҆ землѝ, всѧ̑ бо земна̑ѧ вмѣни́лъ є҆сѝ за ᲂу҆ме́ты, да прїѡбрѧ́щеши є҆ди́наго хрⷭ҇та̀: тѣ́мже всѝ, зрѧ́ще твоѐ хрⷭ҇топодо́бное на землѝ житїѐ, вопїе́мъ тѝ:

Ра́дꙋйсѧ, ꙗ҆́кѡ ѿ ᲂу҆тро́бы ма́тернїѧ пред̾ꙋгото́ванной въ чи́стое и҆ непоро́чное жили́ще прест҃ы́ѧ трⷪ҇цы: ра́дꙋйсѧ, бг҃омъ ѻ҆ц҃е́мъ пред̾избра́нный.

Ра́дꙋйсѧ, бг҃омъ сн҃омъ и҆скꙋпле́нный: ра́дꙋйсѧ, бг҃омъ дх҃омъ ст҃ы́мъ ѡ҆сщ҃е́нный.

Ра́дꙋйсѧ, гдⷭ҇а па́че всегѡ̀ возлюби́вый: ра́дꙋйсѧ, ѻ҆тца̀ и҆ ма́терь ра́ди хрⷭ҇та̀ ѡ҆ста́вивый.

Ра́дꙋйсѧ, зва́нїю дх҃а бл҃года́ти повинꙋ́выйсѧ: ра́дꙋйсѧ, себѐ ѿвергі́йсѧ ра́ди хрⷭ҇та̀ і҆и҃са.

Ра́дꙋйсѧ, крⷭ҇тъ хрⷭ҇то́въ на себѐ взе́мый: ра́дꙋйсѧ, вслѣ́дъ хрⷭ҇та̀ послѣ́довавый.

Ра́дꙋйсѧ, до конца̀ жи́зни твоеѧ̀ въ терпѣ́нїи и҆ по́двизѣхъ неѡсла́бнѡ пребыва́вый: ра́дꙋйсѧ, ꙗ҆́кѡ претерпѣва́ѧ мꙋ́жественнѡ вре́мєннаѧ и҆ настоѧ̑щаѧ, весели́лсѧ є҆сѝ бꙋ́дꙋщими и҆ вѣ́чными.

Ра́дꙋйсѧ, мака́рїе, преди́вный чꙋдотво́рче.

Конда́къ в҃

Прпⷣбне ѻ҆́ч҃е мака́рїе, ты̀, сы́й є҆щѐ младе́нецъ є҆гда̀ быва́ше зво́нъ церко́вный, пла́ча и҆ дѣ́тски крича̀, ꙗ҆́кѡ смы́слѧй и҆з̾ѧвлѧ́лъ є҆сѝ жела́нїе, да въ це́рковь несе́нъ бꙋ́деши. соверша́ющꙋсѧ же церко́вномꙋ въ хра́мѣ бж҃їемъ пѣ́нїю ра́довалсѧ и҆ весели́лсѧ є҆сѝ. сегѡ̀ ра́ди бл҃говѣ́рнїи роди́телїе твоѝ ноша́хꙋ тѧ̀ на ко́еждо церко́вное пѣ́нїе и҆ прославлѧ́хꙋ ѡ҆ тебѣ̀ гдⷭ҇а бг҃а, вопїю́ще: А҆ллилꙋ́їа.

І҆́косъ в҃

Ра́зꙋмъ неразꙋмѣва́емый мꙋ́дрствꙋющымъ плотска̑ѧ стѧжа́лъ є҆сѝ, и҆ всѐ се́рдце твоѐ впери́лъ є҆сѝ въ нбⷭ҇наѧ: сегѡ̀ ра́ди вопїе́мъ тѝ:

Ра́дꙋйсѧ, ꙗ҆́кѡ по всѧ̑ дни̑ въ цр҃ковь бж҃їю ходи́лъ є҆сѝ: ра́дꙋйсѧ, ꙗ҆́кѡ въ сла́дость церко́внагѡ чте́нїѧ и҆ пѣ́нїѧ послꙋ́шалъ є҆сѝ.

Ра́дꙋйсѧ, ѿ ю҆́ности навы́кшїй бг҃оꙋго́дномꙋ добронра́вїю: ра́дꙋйсѧ, возлюби́вшїй красотꙋ̀ до́ма бж҃їѧ и҆ мѣ́сто селе́нїѧ сла́вы гдⷭ҇ни.

Ра́дꙋйсѧ, и҆зво́ливый примета́тисѧ въ домꙋ̀ бж҃їи па́че, не́же жи́ти въ селе́нїихъ грѣ́шничихъ: ра́дꙋйсѧ, во днѝ и҆ въ нощѝ непреста́ннѡ мл҃твы къ бг҃ꙋ возноси́вый.

Ра́дꙋйсѧ, въ чи́стꙋ же́ртвꙋ бг҃ови не тѣ́ло то́чїю, но и҆ дꙋ́шꙋ всю̀ принесы́й: ра́дꙋйсѧ, всего̀ себѐ на слꙋже́нїе бг҃ꙋ преда́вый.

Ра́дꙋйсѧ, ꙗ҆́кѡ превы́ше свє́рстникъ твои́хъ въ разꙋмѣ́нїи сло́ва бж҃їѧ ꙗ҆ви́лсѧ є҆сѝ: ра́дꙋйсѧ, ꙗ҆́кѡ за́пѡвѣди бж҃їѧ бы́ша па́че ме́да и҆ со́та ᲂу҆стѡ́мъ твои̑мъ.

Ра́дꙋйсѧ, ꙗ҆́кѡ ма́слина въ домꙋ̀ бж҃їи насажде́ннаѧ: ра́дꙋйсѧ, бл҃же́нне, ꙗ҆́кѡ ᲂу҆подо́билсѧ є҆сѝ дре́вꙋ насажде́нномꙋ при и҆схо́дищихъ во́дъ, приносѧ́щемꙋ плоды̀.

Ра́дꙋйсѧ, мака́рїе, преди́вный чꙋдотво́рче.

Конда́къ г҃

Согрѣва́ющꙋ дх҃ꙋ ст҃о́мꙋ се́рдце твоѐ, прпⷣбне ѻ҆́ч҃е, возжела́лъ є҆сѝ вельмѝ и҆́ноческагѡ чи́на, возлюби́въ ѻ҆ц҃а̀ нбⷭ҇наго па́че земны́хъ роди́телей твои́хъ, и҆ и҆зше́лъ є҆сѝ ѡ҆́тай и҆з̾ до́мꙋ роди́телей во и҆́ноческꙋю ѡ҆би́тель: ѡ҆брѣ́тъ же на пꙋтѝ ни́ща хꙋ́дꙋ ѡ҆де́ждꙋ носѧ́ща, и҆спроси́лъ є҆сѝ тꙋ̀ себѣ̀, да́въ є҆мꙋ̀ своѐ до́брое ѡ҆дѣѧ́нїе ра́ди гдⷭ҇а бг҃а і҆и҃са хрⷭ҇та̀, на́съ ра́ди ѡ҆бнища́вшагѡ, да мы̀ нището́ю є҆гѡ̀ ѡ҆богати́мсѧ и҆ вопїе́мъ є҆мꙋ̀ вы́нꙋ: А҆ллилꙋ́їа.

І҆́косъ г҃

Прише́дъ во ст҃ꙋ́ю ѡ҆би́тель, прпⷣбне ѻ҆́ч҃е на́шъ мака́рїе, моли́лъ є҆сѝ ст҃а́го дїонѵ́сїа а҆рхїмандрі́та, да прїѧ́тъ бꙋ́деши въ чи́нъ и҆́ноческїй, сказꙋ́ѧ себѐ безро́дна, сиро́тствꙋюща, ни́ща, жела́юща рабо́тати бг҃ꙋ. а҆рхїмандрі́тъ же проразꙋмѣ̀ въ тебѣ̀ и҆мꙋ́ща бы́ти сосꙋ́дъ и҆збра́нный ст҃о́мꙋ дх҃ꙋ, прїѧ̀ и҆ ѡ҆блечѐ тѧ̀ во а҆́гг҃льскїй ѡ҆́бразъ. ты́ же всѧ̑ добродѣ́тєли подоба́ющыѧ и҆́нокѡмъ и҆сполнѧ́лъ и҆ во все́мъ ᲂу҆гожда́лъ є҆сѝ бг҃ꙋ и҆ наста́вникꙋ твоемꙋ̀, ꙗ҆́коже самомꙋ̀ хрⷭ҇тꙋ̀, та́кожде и҆ бра́тїѧмъ, и҆ показа́лсѧ є҆сѝ въ новонача́лїи свое́мъ соверше́нъ бы́ти и҆́нокъ и҆ до́брый подви́жникъ. тѣ́мже досто́йнѡ вопїе́мъ тѝ:

Ра́дꙋйсѧ, ѿ рꙋ́къ ст҃а́гѡ дїонѵ́сїа и҆́ночество любе́знѣ прїе́мый: ра́дꙋйсѧ, сожи́тельство и҆ собесѣ́дничество съ прпⷣбными и҆збра́вый.

Ра́дꙋйсѧ, и҆́ноческагѡ житїѧ̀ скѡ́рби и҆ тѣснотꙋ̀ возлюби́вый па́че ᲂу҆тѣше́нїй и҆ сла́достей мі́ра: ра́дꙋйсѧ, поревнова́вый житїю̀ и҆ по́двигѡмъ дре́внихъ прпⷣбныхъ ѻ҆тє́цъ.

Ра́дꙋйсѧ, и҆́стиннагѡ послꙋша́нїѧ настоѧ́телю, и҆ все́й во хрⷭ҇тѣ̀ бра́тїи ѡ҆́бразъ показа́вый: ра́дꙋйсѧ, всѧ́кое послꙋша́нїе со смире́нїемъ и҆ кро́тостїю соверши́вый.

Ра́дꙋйсѧ, чистоты̀ дꙋше́вныѧ и҆ тѣле́сныѧ крѣ́пкїй ревни́телю и҆ храни́телю: ра́дꙋйсѧ, бдѣ́нїемъ, посто́мъ и҆ колѣнопреклоне́ньми пло́ть свою̀ ᲂу҆мертви́вый.

Ра́дꙋйсѧ, безмо́лвїю и҆ бг҃омы́слїю ѿ ю҆́ности наꙋчи́выйсѧ: ра́дꙋйсѧ, вы́нꙋ молча́нїе съ неѕло́бїемъ храни́вый.

Ра́дꙋйсѧ, сло́вомъ бж҃їимъ, а҆́ки мече́мъ, сопроти̑вныѧ си̑лы побѣжда́вый: ра́дꙋйсѧ, по́стничествомъ и҆ добродѣ́тельми превозше́дый бы́вшихъ съ тобо́ю и҆́нокѡвъ.

Ра́дꙋйсѧ, мака́рїе, преди́вный чꙋдотво́рче.

Конда́къ д҃

Бꙋ́рѧ по́мыслѡвъ смꙋща́ше роди́тели твоѧ̑, ѻ҆́ч҃е на́шъ мака́рїе, є҆гда̀ внеза́пꙋ ѡ҆ста́вилъ є҆сѝ ѡ҆́тай до́мъ и҆́хъ: чрез̾ три́ же лѣ̑та ѡ҆брѣ́тше тѧ̀ во ст҃ѣ́й ѡ҆би́тели, ра́довахꙋсѧ и҆ сла́влѧхꙋ бг҃а, вопїю́ще є҆мꙋ̀: А҆ллилꙋ́їа.

І҆́косъ д҃

Слы́шавше, прпⷣбне ѻ҆́ч҃е мака́рїе, бли́жнїи и҆ да́льнїи, ꙗ҆̀же ѡ҆ по́стническомъ житїѝ твое́мъ, ᲂу҆дивлѧ́хꙋсѧ и҆ прославлѧ́хꙋ тѧ̀ всю́дꙋ, ты́ же, ꙗ҆́кѡ и҆ща́й сла́вы є҆ди́нагѡ бг҃а, бѣ́галъ є҆сѝ сла́вы, ꙗ҆́же ѿ человѣ̑къ, скрыва́ѧсѧ въ пꙋсты́нѧхъ. всѧ̑ же на по́льзꙋ стро́ѧй бг҃ъ просла́ви тебѐ, раба̀ своего̀, не то́чїю въ хрⷭ҇тїа́нѣхъ, но и҆ во а҆га́рѧнѣхъ. тѣ́мже мы̀ вопїе́мъ тѝ:

Ра́дꙋйсѧ, гра́де верхꙋ̀ стоѧ́й, не могі́й ᲂу҆кры́тисѧ: ра́дꙋйсѧ, свѣти́льниче, всѧ̑ ѡ҆зарѧ́ѧй чꙋдесы̀ и҆ по́двиги твои́ми.

Ра́дꙋйсѧ, ѕвѣздо̀, показꙋ́ющаѧ сл҃нце пра́вды: ра́дꙋйсѧ, зарѐ бжⷭ҇твеннагѡ свѣ́та.

Ра́дꙋйсѧ, до́брыми дѣ́лы твои́ми всѣ́хъ зрѧ́щихъ тѧ̀ подвиза́ѧй къ прославле́нїю ѻ҆ц҃а̀, и҆́же на нб҃сѣ́хъ: ра́дꙋйсѧ, ꙗ҆́кѡ пре́жде са́мъ потща́лсѧ є҆сѝ сотвори́ти во́лю бж҃їю, и҆ по́слѣ наꙋчи́ти дрꙋги́хъ.

Ра́дꙋйсѧ, тве́рдый сто́лпе и҆́ночества: ра́дꙋйсѧ, ꙗ҆́кѡ мꙋ́дръ во́ждь приведы́й мно́гихъ къ вѣ́чномꙋ сп҃се́нїю.

Ра́дꙋйсѧ, по́стничества, терпѣ́нїѧ, жа́жды и҆ а҆́лчбы и҆ наготы̀ ѡ҆́бразе преди́вный: ра́дꙋйсѧ, бл҃го́е и҆́го и҆ ле́гкое бре́мѧ хрⷭ҇то́во и҆з̾мла́да возлюби́вый.

Ра́дꙋйсѧ, на землѝ а҆́гг҃льски пожи́вый: ра́дꙋйсѧ, земны́й а҆́гг҃ле и҆ нбⷭ҇ный чл҃вѣ́че.

Ра́дꙋйсѧ, мака́рїе, преди́вный чꙋдотво́рче.

Конда́къ є҃

Бг҃оте́чнаѧ ѕвѣзда̀ всеѧ̀ страны̀ ꙗ҆ви́лсѧ є҆сѝ, прпⷣбне ѻ҆́ч҃е мака́рїе, всѣ̑мъ бы́въ ѡ҆́бразъ сло́вомъ, житїе́мъ, любо́вїю, дꙋ́хомъ, вѣ́рою, чистото́ю, воспѣва́ѧ гдⷭ҇ꙋ бг҃ꙋ: А҆ллилꙋ́їа.

І҆́косъ є҃

Гдⷭ҇ь бг҃ъ ѡ҆чища́ѧй скорбьмѝ и҆ напа́стьми и҆збра̑нныѧ своѧ̑ ꙗ҆́кѡ зла́то и҆ сребро̀, попꙋстѝ разори́тисѧ созда́ннѣй тобо́ю ѡ҆би́тели, на ню́же внеза́пꙋ напа́дше а҆га́рѧне, всѣ́хъ въ не́й бы́вшихъ ме́чнымъ посѣче́нїемъ, а҆́ки кла́сы на ни́вѣ, пожа́ша, тебе́ же, прпⷣбне ѻ҆́ч҃е на́шъ, жи́ва приведо́ша къ воево́дѣ своемꙋ̀. се́й же ᲂу҆зрѣ́въ а҆гг҃лоподо́бное лицѐ твоѐ и҆ ᲂу҆вѣ́дѣвъ, ꙗ҆́кѡ ты̀ никомꙋ́же ѕла̀ содѣ́лалъ є҆сѝ, но всѣ̑мъ є҆ди́но добро̀ твори́лъ є҆сѝ, бг҃ꙋ срацы́нское жесто́кое се́рдце є҆гѡ̀ ᲂу҆мѧгча́ющꙋ, дадѐ свобо́дꙋ тебѣ̀, и҆ є҆ще́ же тебѐ ра́ди свободѝ про́чыѧ плѣнє́нныѧ до четы́редесѧти мꙋже́й, ра́звѣ же́нъ и҆ дѣте́й. тѣ́мже вопїе́мъ тѝ сицева̑ѧ:

Ра́дꙋйсѧ, кро́тостїю и҆ бла́гостїю свое́ю сердца̀ невѣ́рныхъ побѣди́вый: ра́дꙋйсѧ, ѕло́бꙋ на жа́лость преложи́вый.

Ра́дꙋйсѧ, бл҃гочести̑выѧ лю́ди ѿ плѣ́на а҆га́рѧнскагѡ свободи́вый: ра́дꙋйсѧ, мнѡ́гїѧ ѿ тѧ́жкихъ напа́стей и҆ скорбе́й и҆зба́вивый.

Ра́дꙋйсѧ, ꙗ҆́кѡ честно́мꙋ погребе́нїю преда́лъ є҆сѝ бра́тїю ѡ҆би́тели срацы́нами и҆збїе́ннꙋю, ꙗ҆́коже и҆збїе́нни бы́ша дре́вле ѻ҆́нїи прпⷣбнїи ѻ҆ц҃ы̀ и҆̀же въ сїна́и и҆ раі́ѳѣ: ра́дꙋйсѧ, ꙗ҆́кѡ є҆ди́ною ᲂу҆ме́рый мі́рови не ѡ҆ себѣ̀, но ѡ҆ бли́жнихъ печа́лилсѧ є҆сѝ.

Ра́дꙋйсѧ, ꙗ҆́кѡ лю́ди, съ тобо́ю ѿпꙋщє́нныѧ и҆з̾ плѣ́на, тщали́вѣ ѡ҆хранѧ́лъ є҆сѝ, да не па́ки во а҆га̑рѧнскїѧ рꙋ́цѣ впадꙋ́тъ: ра́дꙋйсѧ, ꙗ҆́кѡ наꙋчи́лъ є҆сѝ и҆зведє́нныѧ тобо́ю лю́ди возложи́ти всю̀ наде́ждꙋ на є҆ди́наго бг҃а.

Ра́дꙋйсѧ, ꙗ҆́кѡ бы́лъ є҆сѝ и҆̀мъ въ пꙋтѝ и҆ во́ждь и҆ ᲂу҆чи́тель и҆ ᲂу҆тѣ́шитель: ра́дꙋйсѧ, ꙗ҆́кѡ съ мл҃твою и҆зше́лъ є҆сѝ во странꙋ̀ га́лическꙋю.

Ра́дꙋйсѧ, ꙗ҆́кѡ ше́ствꙋѧ пꙋте́мъ положи́лъ є҆сѝ ѡ҆снова́нїе свїѧ́жскїѧ ѡ҆би́тели: ра́дꙋйсѧ, ꙗ҆́кѡ ре́вностїю поревнова́лъ є҆сѝ ѡ҆ сп҃се́нїи дꙋ́шъ и҆скꙋпле́нныхъ і҆и҃сомъ хрⷭ҇то́мъ.

Ра́дꙋйсѧ, мака́рїе, преди́вный чꙋдотво́рче.

Конда́къ ѕ҃

Всѐ житїѐ твоѐ, прпⷣбне ѻ҆́ч҃е мака́рїе, є҆́сть немо́лчное проповѣ́данїе вѣ́ры, наде́жды и҆ любвѐ, ꙗ҆́же къ бг҃ꙋ и҆ къ бли̑жнимъ, влїѧ́нныѧ въ дꙋ́шꙋ твою̀ ст҃ы́мъ дх҃омъ, є҆мꙋ́же вопїе́мъ: А҆ллилꙋ́їа.

І҆́косъ ѕ҃

Но́ваго мѡѷсе́а показа́ тѧ, прпⷣбне ѻ҆́ч҃е на́шъ мака́рїе, гдⷭ҇ь бг҃ъ, є҆гда̀ лю́ди, свободи́вшыѧсѧ ѿ плѣ́на, безбѣ́днѡ прове́лъ є҆сѝ непроходи́мыми лѣ́сы и҆ бла́ты и҆ и҆знемога́ющыѧ ѿ гла́да ди́внѡ препита́лъ є҆сѝ. сегѡ̀ ра́ди вопїе́мъ тѝ:

Ра́дꙋйсѧ, ꙗ҆́кѡ гла̑днымъ лю́демъ возбрани́лъ є҆сѝ разори́ти по́стъ, ѿ ст҃ы́ѧ цр҃кве ᲂу҆ста́вленный: ра́дꙋйсѧ, ꙗ҆́кѡ ᲂу҆тѣ́шилъ є҆сѝ ѻ҆́ныѧ словесы̀ бг҃одꙋхнове́нными, ᲂу҆крѣплѧ́ѧ въ терпѣ́нїи.

Ра́дꙋйсѧ, ꙗ҆́кѡ ѿ ю҆́ности навы́кшїй поще́нїю, небре́глъ є҆сѝ ѡ҆ себѣ̀: ра́дꙋйсѧ, ꙗ҆́кѡ ѡ҆ наро́дѣ гла́днѣмъ и҆стаева́ѧ печа́лїю, твои́ми словесы̀ и҆ мл҃твами ᲂу҆крѣпи́лъ є҆сѝ є҆го̀ въ и҆знеможе́нїи ѿ неѧде́нїѧ.

Ра́дꙋйсѧ, ꙗ҆́кѡ гла́днїи лю́дїе, пи́щею дх҃о́вною, а҆́ки хлѣ́бомъ, ᲂу҆крѣплѧ́еми мꙋ́жествовахꙋ: ра́дꙋйсѧ, ꙗ҆́кѡ ᲂу҆ бг҃а и҆спроси́лъ є҆сѝ скота̀, и҆́же бы́сть на дово́льнꙋю пи́щꙋ а҆́лчꙋщымъ.

Ра́дꙋйсѧ, ꙗ҆́кѡ всѧ̑ лю́ди приве́лъ є҆сѝ безбѣ́днѣ въ предѣ́лы га́лическїѧ страны̀ во гра́дъ ᲂу҆́нжꙋ: ра́дꙋйсѧ, ꙗ҆́кѡ бл҃говѣ́рнїи лю́дїе срѣто́ша тебѐ че́стнѣ, прїѧ́ша любе́знѣ, ꙗ҆́кѡ а҆́гг҃ла бж҃їѧ.

Ра́дꙋйсѧ, ꙗ҆́кѡ ведо́мїи тобо́ю лю́дїе и҆сповѣ́даша пред̾ всѣ́ми на себѣ̀ млⷭ҇ть бж҃їю: ра́дꙋйсѧ, ꙗ҆́кѡ слы́шащїи, ка́кѡ гдⷭ҇ь бг҃ъ свободѝ бл҃говѣ̑рныѧ лю́ди ѿ плѣне́нїѧ, и҆ гла̑дныѧ насы́ти, просла́виша бг҃а и҆ тебѐ є҆гѡ̀ ᲂу҆го́дника.

Ра́дꙋйсѧ, ꙗ҆́кѡ га́лическꙋю странꙋ̀ чꙋдесы̀ твои́ми ѡ҆зари́лъ є҆сѝ: ра́дꙋйсѧ, ꙗ҆́кѡ свѣти́льникъ горѧ́й и҆ свѣтѧ́й ꙗ҆ви́лсѧ є҆сѝ.

Ра́дꙋйсѧ, мака́рїе, преди́вный чꙋдотво́рче.

Конда́къ з҃

Почита́нїѧ и҆ сла́вы, ꙗ҆̀же ѿ человѣ̑къ, во гра́дѣ не терпѧ̀, па́ки пꙋсты́ннагѡ безмо́лвїѧ возжела́лъ є҆сѝ, прпⷣбне ѻ҆́ч҃е, и҆ ѡ҆брѣ́тъ пꙋсты́нное мѣ́сто, возлюби́лъ є҆сѝ є҆̀, и҆ водрꙋзи́лъ є҆сѝ та́мѡ крⷭ҇тъ, водвори́лсѧ є҆сѝ въ созда́ннѣй тобо́ю ке́ллїи, да пое́ши вы́нꙋ бг҃ꙋ: А҆ллилꙋ́їа.

І҆́косъ з҃

Въ пꙋсты́ни, въ ню́же всели́лсѧ є҆сѝ, прпⷣбне ѻ҆́ч҃е мака́рїе, по ма́лѣ вре́мени ѡ҆би́тель и҆́нокѡмъ въ пребыва́нїе ᲂу҆стро́исѧ бж҃їимъ и҆зволе́нїемъ, и҆ ꙗ҆́коже ѡ҆бы́клъ є҆сѝ, въ прпⷣбїи и҆ пра́вдѣ дни̑ и҆ нѡ́щи рабо́талъ є҆сѝ бг҃ови. мы́ же, прославлѧ́юще ѡ҆ тебѣ̀ гдⷭ҇а бг҃а, вопїе́мъ тѝ:

Ра́дꙋйсѧ, є҆ди́ное на потре́бꙋ всегда̀ и҆ска́вый: ра́дꙋйсѧ, и҆́щꙋщемꙋ до́брый би́серъ ᲂу҆подо́бивыйсѧ, и҆ ра́ди сегѡ̀ всѧ̑ земна̑ѧ ѡ҆ста́вивый.

Ра́дꙋйсѧ, ѻ҆́чи ᲂу҆ма̀ и҆ се́рдца своегѡ̀ на высотꙋ̀ нбⷭ҇нꙋю впери́вый: ра́дꙋйсѧ, трꙋды̀ и҆ по́двиги свои́ми а҆́гг҃лѡвъ и҆ человѣ́кѡвъ ᲂу҆диви́вый.

Ра́дꙋйсѧ, нището́ю тѣле́сною и҆ дꙋхо́вною црⷭ҇твїе бж҃їе ѡ҆брѣты́й: ра́дꙋйсѧ, ᲂу҆миле́нїѧ и҆ сокрꙋше́нїѧ слеза́ми на нб҃сѣ́хъ вѣ́чное ᲂу҆тѣше́нїе прїѧ́вый.

Ра́дꙋйсѧ, ꙗ҆́кѡ ра́ди а҆́лчбы и҆ жа́жды на землѝ, насыща́ешисѧ бл҃же́нствомъ на нб҃сѝ: ра́дꙋйсѧ, ꙗ҆́кѡ кро́тостїю твое́ю и҆ неѕло́бїемъ твои́мъ наслѣ́довалъ є҆сѝ вѣ́чнꙋю зе́млю.

Ра́дꙋйсѧ, ꙗ҆́кѡ ра́ди чистоты̀ се́рдца твоегѡ̀, сподо́билсѧ є҆сѝ зрѣ́ти вы́нꙋ бг҃а: ра́дꙋйсѧ, ꙗ҆́кѡ ми́ръ бж҃їй и҆ са́мъ тщи́лсѧ и҆мѣ́ти со всѣ́ми, и҆ водворѧ́лъ є҆сѝ средѝ враждꙋ́ющихъ, и҆ сегѡ̀ ра́ди вчине́нъ є҆сѝ въ ли́къ сынѡ́въ бж҃їихъ.

Ра́дꙋйсѧ, и҆́мене ра́ди хрⷭ҇то́ва мнѡ́ги скѡ́рби, болѣ̑зни, всенѡ́щнаѧ бдѣ̑нїѧ, колѣнопреклонє́нїѧ, по́двиги и҆ трꙋды̀ понесы́й: ра́дꙋйсѧ и҆ весели́сѧ, ꙗ҆́кѡ мзда̀ твоѧ̀ мно́га на нб҃сѣ́хъ.

Ра́дꙋйсѧ, мака́рїе, преди́вный чꙋдотво́рче.

Конда́къ и҃

Ди́вный во ст҃ы́хъ гдⷭ҇ь бг҃ъ ди́внѡ прославлѧ́етсѧ въ тебѣ̀, прпⷣбне ѻ҆́ч҃е мака́рїе: ѡ҆блече́ бо тѧ̀ си́лою свы́ше цѣли́ти недꙋ́ги и҆ болѣ̑зни дꙋшє́вныѧ и҆ тѣлє́сныѧ, и҆ подава́ти полє́знаѧ всѣ̑мъ, съ вѣ́рою и҆ любо́вїю вопїю́щымъ къ немꙋ̀ ѡ҆ тебѣ̀: А҆ллилꙋ́їа.

І҆́косъ и҃

Бл҃года́ть бж҃їю сꙋ́щꙋю въ тебѣ̀, прпⷣбне ѻ҆́ч҃е мака́рїе, неѡскꙋ́днѡ подава́ѧ тре́бꙋющымъ, ѻ҆трокови́цꙋ нѣ́кꙋю бѣ́снꙋ и҆ слѣ́пꙋ кре́стнымъ зна́менїемъ съ мл҃твою и҆сцѣли́лъ є҆сѝ. дивѧ́щесѧ си́лѣ бж҃їей, ѡ҆бита́ющей въ тебѣ̀, взыва́емъ тѝ:

Ра́дꙋйсѧ, бл҃года́тный и҆сто́чниче и҆сцѣле́нїй: ра́дꙋйсѧ, тꙋ́не прїѧ́вый бл҃года́ть ѿ гдⷭ҇а бг҃а, тꙋ́не и҆ подава́ѧй.

Ра́дꙋйсѧ, и҆мѣ́ѧй ве́лїе дерзнове́нїе ко гдⷭ҇ꙋ бг҃ꙋ: ра́дꙋйсѧ, ꙗ҆́кѡ никто́же съ вѣ́рою просѧ́й то́щь ѿхо́дитъ ѿ тебѐ.

Ра́дꙋйсѧ, ꙗ҆́кѡ всено́щными мл҃твами всю̀ бѣсо́вскꙋю пре́лесть посрами́вый: ра́дꙋйсѧ, слѣпы̑мъ зрѣ́нїе и҆ всѣ́мъ болѧ́щымъ и҆сцѣле́нїе подава́ѧй.

Ра́дꙋйсѧ, сокро́вище дарова́нїй бжⷭ҇твенныхъ: ра́дꙋйсѧ, ꙗ҆́кѡ хода́тайствомъ твои́мъ дарѡ́въ дх҃а ст҃а́гѡ, ᲂу҆крѣплѧ́ющихъ въ бра́ни проти́вꙋ врагѡ́въ сп҃се́нїѧ, сподоблѧ́емсѧ.

Ра́дꙋйсѧ, ꙗ҆́кѡ крі́нъ неꙋвѧда́емый въ пꙋсты́ни ꙗ҆ви́лсѧ є҆сѝ: ра́дꙋйсѧ, цвѣ́те, бл҃гоꙋха́нїемъ свои́мъ всѧ̑ и҆сполнѧ́ѧй.

Ра́дꙋйсѧ, рѣ́ки воды̀ живы́ѧ и҆сточа́ѧй: ра́дꙋйсѧ, вѣ́рныхъ гдⷭ҇а рабѡ́въ бл҃гꙋ́ю ча́сть и҆збра́вый.

Ра́дꙋйсѧ, мака́рїе, преди́вный чꙋдотво́рче.

Конда́къ ѳ҃

Є҆гда̀ преста́вилсѧ є҆сѝ ѿ землѝ къ нбⷭ҇нымъ ѡ҆би́телемъ, ли́цы а҆́гг҃лѡвъ и҆ и҆збра́нныхъ бж҃їихъ ра́достнѡ срѣто́ша тебѐ, съ ни́миже ты̀ вы́нꙋ вопїе́ши къ бг҃ꙋ: А҆ллилꙋ́їа.

І҆́косъ ѳ҃

Є҆гда̀ прибли́жисѧ вре́мѧ преставле́нїѧ твоегѡ̀ по бж҃їю смотре́нїю, ты̀, прпⷣбне, прише́лъ є҆сѝ во гра́дъ ᲂу҆́нжескъ, и҆дѣ́же и҆спо́лнь дні́й и҆ бг҃оꙋгожде́нїѧ, ст҃ꙋ́ю дꙋ́шꙋ твою̀ пре́далъ є҆сѝ въ рꙋ́цѣ бж҃їи. а҆́бїе и҆спо́лнисѧ чꙋ́днагѡ бл҃гоꙋха́нїѧ ве́сь гра́дъ, и҆ ѡ҆кре́стнїи лю́дїе ѡ҆бонѧ́хꙋ бл҃гоꙋха́нїе ди́вное, а҆́ки ѿ ѳѷмїа́ма и҆ смѵ́рны и҆сходѧ́щее. всѝ ᲂу҆дивлѧ́ющесѧ, ꙗ҆́кѡ си́це гдⷭ҇ь бг҃ъ почти́лъ є҆́сть преставле́нїе тебѐ ᲂу҆го́дника своегѡ̀, прославлѧ́хꙋ гдⷭ҇а бг҃а. стече́сѧ къ нетлѣ́нномꙋ и҆ бл҃гоꙋха́нномꙋ тѣ́лꙋ твоемꙋ̀ мно́жество наро́да, и҆ со свѣщьмѝ и҆ со ѱалмы̀ несо́ша є҆̀ въ пꙋсты́ннꙋю ѡ҆би́тель, и҆дѣ́же погребо́ша че́стнѡ и҆ вопїѧ́хꙋ тѝ:

Ра́дꙋйсѧ, гдⷭ҇ꙋ до конца̀ послꙋжи́вый: ра́дꙋйсѧ, кончи́нꙋ свою̀ пред̾ꙋвѣ́дѣвый.

Ра́дꙋйсѧ, къ со́нмꙋ и҆збра́нныхъ бж҃їихъ сопричте́нный: ра́дꙋйсѧ, воздаѧ́нїе ѿ бг҃а по пра̑вымъ дѣлѡ́мъ твои̑мъ воспрїѧ́вый.

Ра́дꙋйсѧ, со прⷪ҇ро́ки водвори́выйсѧ: ра́дꙋйсѧ, со а҆пⷭ҇лы всели́выйсѧ.

Ра́дꙋйсѧ, ꙗ҆́кѡ вѣнце́мъ нетлѣ́ннымъ ᲂу҆вѣнча́нный: ра́дꙋйсѧ, ꙗ҆́кѡ гдⷭ҇а бг҃а со всѣ́ми ст҃ы́ми ѡ҆ на́съ грѣ́шныхъ ᲂу҆молѧ́еши.

Ра́дꙋйсѧ, ꙗ҆́кѡ на бра́цѣ нбⷭ҇нагѡ жениха̀ бы́ти досто́инъ ꙗ҆́вльшїйсѧ: ра́дꙋйсѧ, тлѣ́ннꙋю жи́знь на нетлѣ́ннꙋю премѣни́вый.

Ра́дꙋйсѧ, ᲂу҆го́дниче хрⷭ҇то́въ, бл҃же́нствꙋ тезоимени́тый: ра́дꙋйсѧ, въ ра́дость гдⷭ҇а твоегѡ̀ вше́дый.

Ра́дꙋйсѧ, мака́рїе, преди́вный чꙋдотво́рче.

Конда́къ і҃

Сп҃стѝ хотѧ́й всѧ̑, гдⷭ҇ь бг҃ъ и҆сполнѧ́етъ свои́ми вели́кими дарова́ньми и҆збра́нныхъ рабѡ́въ свои́хъ, да и҆́хъ чꙋдеса́ми, мл҃твами и҆ равноа́гг҃льнымъ житїе́мъ мы̀ возбꙋжда́емсѧ ѿ жи́зни грѣхо́вныѧ къ жи́зни ст҃ѣ́й, воспѣва́ѧ вы́нꙋ є҆мꙋ̀: А҆ллилꙋ́їа.

І҆́косъ і҃

Стѣна̀ и҆ помо́щникъ ꙗ҆ви́лсѧ є҆сѝ, бл҃же́нне мака́рїе, всѣ̑мъ прибѣга́ющымъ къ тебѣ̀: тѣ́мже и҆ на́мъ призыва́ющымъ тѧ́ бꙋ́ди застꙋ́пникъ, и҆збавлѧ́ѧ ны̀ ѿ и҆скꙋше́нїй, скорбе́й и҆ напа́стей, да восхвалѧ́емъ тѧ̀ зовꙋ́ще:

Ра́дꙋйсѧ, ꙗ҆́кѡ твои́ми мл҃твами ѿ грѣхѡ́въ, паде́нїй, страсте́й и҆ ѕлы́хъ ѡ҆бы́чаєвъ воздвиза́еши на́съ грѣ́шныхъ: ра́дꙋйсѧ, ꙗ҆́кѡ при́снѡ возбꙋжда́еши на́съ къ подража́нїю твоемꙋ̀ ст҃о́мꙋ житїю̀.

Ра́дꙋйсѧ, и҆́стиннагѡ покаѧ́нїѧ наста́вниче: ра́дꙋйсѧ, ѡ҆бличи́телю немо́лчный нерадѧ́щымъ ѡ҆ вѣ́чномъ сп҃се́нїи.

Ра́дꙋйсѧ, ѡ҆ всѣ́хъ вѣ́рныхъ притека́ющихъ къ тебѣ̀ предста́телю: Ра́дꙋйсѧ, на неви̑димыѧ и҆ ви̑димыѧ врагѝ побо́рниче.

Ра́дꙋйсѧ, въ бѣда́хъ, напа́стехъ и҆ нꙋ́ждахъ дꙋше́вныхъ и҆ тѣле́сныхъ ᲂу҆тѣше́нїе и҆ по́мощь подава́ѧй: ра́дꙋйсѧ, ѿ смертоно́сныѧ ꙗ҆́звы и҆збавлѧ́ѧй.

Ра́дꙋйсѧ, наше́ствїе сопроти́вныхъ ѿгонѧ́ѧй: ра́дꙋйсѧ, пла́мень, гꙋбѧ́щїй гра́дъ, погаша́ѧй.

Ра́дꙋйсѧ, ᲂу҆́мъ и҆ смы́слъ врагѡ́въ помрача́ѧй: ра́дꙋйсѧ, лю́бѧщыѧ ѻ҆те́чество и҆ бл҃гочести̑выѧ царѝ на побѣ́дꙋ ᲂу҆мꙋдрѧ́ѧй.

Ра́дꙋйсѧ, мака́рїе, преди́вный чꙋдотво́рче.

Конда́къ а҃і

Пѣ́нїе бл҃года́рственное гдⷭ҇ꙋ бг҃ꙋ въ трⷪ҇цѣ покланѧ́емомꙋ и҆ сла́вимомꙋ прино́симъ, ꙗ҆́кѡ дарова́лъ є҆́сть на́мъ въ тебѣ̀, прпⷣбне ѻ҆́ч҃е мака́рїе, те́плаго мл҃твенника, ско́раго помо́щника и҆ ди́внаго чꙋдотво́рца, воспѣва́юще є҆мꙋ̀: А҆ллилꙋ́їа.

І҆́косъ а҃і

Свѣтопрїе́мна свѣти́льника ꙗ҆ви́ тѧ гдⷭ҇ь бг҃ъ, прпⷣбне мака́рїе, є҆гда̀ ѡ҆брѣ́тєны бы́ша честны̑ѧ мо́щи твоѧ̑, бл҃гословє́нныѧ нетлѣ́нїемъ, бл҃гоꙋха́нїе и҆спꙋща́ющыѧ и҆ чꙋдесы̀ ѡ҆крє́стныѧ страны̑ ѡ҆зарѧ́ющыѧ: тѣ́мже всѝ ра́дꙋющесѧ вопїе́мъ тѝ:

Ра́дꙋйсѧ, ꙗ҆́кѡ и҆ по сме́рти жи́въ пребыва́еши, ꙗ҆влѧ́ѧ въ себѣ̀ си̑лы бжⷭ҇твєнныѧ: Ра́дꙋйсѧ, чꙋдесы̀ твои́ми зе́млю наполнѧ́ѧй.

Ра́дꙋйсѧ, ꙗ҆́кѡ бл҃гочести́вꙋю женꙋ̀ ѿ плѣ́на а҆га́рѧнскагѡ свободи́лъ є҆сѝ: ра́дꙋйсѧ, ꙗ҆́кѡ нѣмо́мꙋ ᲂу҆ста̀ ѿве́рзлъ є҆сѝ.

Ра́дꙋйсѧ, ꙗ҆́кѡ пока́ѧвшемꙋсѧ во грѣсѣ́хъ зрѣ́нїе возврати́лъ є҆сѝ: ра́дꙋйсѧ, ꙗ҆́кѡ разсла́бленномꙋ здра́вїе дарова́лъ є҆сѝ.

Ра́дꙋйсѧ, ꙗ҆́кѡ мнѡ́ги слѣпы̑ѧ и҆ немощствꙋ́ющыѧ и҆сцѣли́лъ є҆сѝ: ра́дꙋйсѧ, ꙗ҆́кѡ вѣ̑рныѧ лю́ди ѿ нападе́нїѧ лѧ́хѡвъ и҆зба́вилъ є҆сѝ.

Ра́дꙋйсѧ, ꙗ҆́кѡ мл҃твами твои́ми вразѝ, напа́вшїи со ѡ҆рꙋ́жїемъ на ѡ҆би́тель твою̀, слѣпото́ю пораже́ни и҆ стра́хомъ смѧте́ни бы́ша, и҆ мно́зи въ рѣцѣ̀ потопо́ша: ра́дꙋйсѧ, ѡ҆гражда́ѧй вы́нꙋ ѡ҆би́тель твою̀ ѿ бѣ́дъ и҆ ѕѡ́лъ.

Ра́дꙋйсѧ, ѿча́ѧнныхъ наде́ждо и҆ по́моще: ра́дꙋйсѧ, ѿ бг҃а проси̑маѧ тобо́ю прїе́млѧй.

Ра́дꙋйсѧ, мака́рїе, преди́вный чꙋдотво́рче.

Конда́къ в҃і

По плѣне́нїи и҆ ѡ҆пꙋстоше́нїи желтово́дскїѧ ѡ҆би́тели ѿ а҆га́рѧнъ лѣ́тѡмъ мнѡ́гимъ преше́дшымъ, трикра́ты ꙗ҆ви́лсѧ є҆сѝ нѣ́коемꙋ и҆́нокꙋ бг҃оꙋго́днꙋ а҆вра́мїю, повелѣва́ѧ, да и҆́детъ въ желтово́дскꙋю пꙋсты́ню и҆ всели́тсѧ на мѣ́стѣ, и҆дѣ́же бѣ̀ ѡ҆би́тель. и҆́нокъ а҆вра́мїй водвори́сѧ тꙋ̀ и҆ хожда́ше во ѡ҆би́тель ᲂу҆́нжескꙋю, и҆дѣ́же і҆кѡ́нꙋ твою̀ списа́въ, принесѐ ю҆̀ на бл҃гослове́нїе, и҆ нача́ша быва́ти чꙋдеса̀ ѿ сеѧ̀ честны́ѧ і҆кѡ́ны. тѣ́мже мы̀ вопїе́мъ просла́вльшемꙋ тѧ̀ бг҃ꙋ: А҆ллилꙋ́їа.

І҆́косъ в҃і

Пою́ще зна́мєнїѧ и҆ чꙋдеса̀, ꙗ҆̀же твори́ши живꙋ́щею въ тебѣ̀ бл҃года́тїю бж҃їею, бл҃же́нне мака́рїе, восхвалѧ́емъ тѧ̀ си́це:

Ра́дꙋйсѧ, ꙗ҆́кѡ и҆ по преставле́нїи твое́мъ возста́вилъ є҆сѝ запꙋстѣ́вшꙋю ѡ҆би́тель твою̀: ра́дꙋйсѧ, ꙗ҆́кѡ па́ки собра́лъ є҆сѝ и҆́щꙋщихъ сп҃се́нїѧ, и҆ ѡ҆бнови́лъ є҆сѝ бжⷭ҇твеннꙋю хвалꙋ̀.

Ра́дꙋйсѧ, ꙗ҆́кѡ ст҃о́е мѣ́сто, тобо́ю любе́знѣ и҆збра́нное, не ѡ҆ставлѧ́ти заповѣ́далъ є҆сѝ а҆вра́мїю: ра́дꙋйсѧ, ꙗ҆́кѡ тобо́ю мона́хѡвъ мно́жество въ по́двизѣхъ и҆ ско́рбехъ свои́хъ ᲂу҆крѣпле́нїе прїе́млютъ.

Ра́дꙋйсѧ, ꙗ҆́кѡ ѡ҆би́тєли тобо́ю созда̑нныѧ мл҃твами твои́ми, а҆́ки покро́вомъ, покрыва́ютсѧ: ра́дꙋйсѧ, странѣ̀ се́й и҆ ѻ҆те́чествꙋ на́шемꙋ ᲂу҆краше́нїе.

Ра́дꙋйсѧ, наде́ждо и҆ прибѣ́жище въ мо́ри житїѧ̀ сегѡ̀ пла́вающихъ: ра́дꙋйсѧ, тве́рдое ѡ҆гражде́нїе ᲂу҆се́рднѡ рабо́тающихъ гдⷭ҇ꙋ бг҃ꙋ.

Ра́дꙋйсѧ, царє́мъ бл҃гочести̑вымъ по́моще: ра́дꙋйсѧ, патрїа́рхѡвъ и҆ ст҃и́телей ᲂу҆тѣше́нїе.

Ра́дꙋйсѧ, всѣ́хъ ᲂу҆се́рднѡ притека́ющихъ къ тебѣ̀ ѿ и҆скꙋше́нїй и҆ бѣ́дъ ско́рое и҆збавле́нїе: ра́дꙋйсѧ, ꙗ҆́кѡ хода́тайствомъ твои́мъ вѣ́рнїи жи́знь вѣ́чнꙋю полꙋча́ютъ.

Ра́дꙋйсѧ, мака́рїе, преди́вный чꙋдотво́рче.

Конда́къ г҃і

Ѽ прпⷣбне и҆ бг҃оно́сне ѻ҆́ч҃е на́шъ мака́рїе! прїимѝ сїѐ ма́лое моли́твенное приноше́нїе на́ше, и҆ со прест҃о́ю влⷣчцею бцⷣею и҆ всѣ́ми ст҃ы́ми принесѝ мл҃твꙋ ко гдⷭ҇ꙋ бг҃ꙋ, да и҆зба́витъ на́съ ѿ вра̑гъ ви́димыхъ и҆ неви́димыхъ, ѿ всѧ́кихъ скорбе́й и҆ бѣ́дъ, ѿ напра́сныѧ сме́рти и҆ ѿ бꙋ́дꙋщихъ мꙋ́къ, и҆ сподо́битъ своегѡ̀ нбⷭ҇нагѡ црⷭ҇твїѧ, и҆дѣ́же всѝ при́снѡ веселѧ́щесѧ и҆ торжествꙋ́юще немо́лчнѡ вопїю́тъ къ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃ла на землѝ ꙗ҆ви́ тѧ творе́цъ нб҃сѝ и҆ землѝ, всѧ̑ бо земна̑ѧ вмѣни́лъ є҆сѝ за ᲂу҆ме́ты, да прїѡбрѧ́щеши є҆ди́наго хрⷭ҇та̀: тѣ́мже всѝ, зрѧ́ще твоѐ хрⷭ҇топодо́бное на землѝ житїѐ, вопїе́мъ тѝ:

Ра́дꙋйсѧ, ꙗ҆́кѡ ѿ ᲂу҆тро́бы ма́тернїѧ пред̾ꙋгото́ванной въ чи́стое и҆ непоро́чное жили́ще прест҃ы́ѧ трⷪ҇цы: ра́дꙋйсѧ, бг҃омъ ѻ҆ц҃е́мъ пред̾избра́нный.

Ра́дꙋйсѧ, бг҃омъ сн҃омъ и҆скꙋпле́нный: ра́дꙋйсѧ, бг҃омъ дх҃омъ ст҃ы́мъ ѡ҆сщ҃е́нный.

Ра́дꙋйсѧ, гдⷭ҇а па́че всегѡ̀ возлюби́вый: ра́дꙋйсѧ, ѻ҆тца̀ и҆ ма́терь ра́ди хрⷭ҇та̀ ѡ҆ста́вивый.

Ра́дꙋйсѧ, зва́нїю дх҃а бл҃года́ти повинꙋ́выйсѧ: ра́дꙋйсѧ, себѐ ѿвергі́йсѧ ра́ди хрⷭ҇та̀ і҆и҃са.

Ра́дꙋйсѧ, крⷭ҇тъ хрⷭ҇то́въ на себѐ взе́мый: ра́дꙋйсѧ, вслѣ́дъ хрⷭ҇та̀ послѣ́довавый.

Ра́дꙋйсѧ, до конца̀ жи́зни твоеѧ̀ въ терпѣ́нїи и҆ по́двизѣхъ неѡсла́бнѡ пребыва́вый: ра́дꙋйсѧ, ꙗ҆́кѡ претерпѣва́ѧ мꙋ́жественнѡ вре́мєннаѧ и҆ настоѧ̑щаѧ, весели́лсѧ є҆сѝ бꙋ́дꙋщими и҆ вѣ́чными.

Ра́дꙋйсѧ, мака́рїе, преди́вный чꙋдотво́рче.

Конда́къ а҃

И҆збра́нный ѿ воево́ды си́лъ нбⷭ҇ныхъ и҆ гдⷭ҇а і҆и҃са хрⷭ҇та̀, прпⷣбне ѻ҆́ч҃е на́шъ мака́рїе, ꙗ҆́кѡ и҆мѣ́ѧй ве́лїе дерзнове́нїе къ бг҃ꙋ, моли́сѧ вы́нꙋ ѡ҆ сп҃се́нїи дꙋ́шъ на́шихъ и҆ и҆збавле́нїи на́съ ѿ всѧ́кихъ бѣ́дъ и҆ напа́стей, да зове́мъ тѝ:

Ра́дꙋйсѧ, мака́рїе, преди́вный чꙋдотво́рче.

Моли́твы

Ѽ прпⷣбне и҆ бг҃оно́сне ѻ҆́ч҃е на́шъ мака́рїе! вѣ́рꙋемъ, ꙗ҆́кѡ ты̀, предстоѧ̀ прⷭ҇то́лꙋ прест҃ы́ѧ трⷪ҇цы, ве́лїе и҆́маши дерзнове́нїе въ мл҃твахъ ко всеми́лостивомꙋ гдⷭ҇ꙋ бг҃ꙋ, и҆́же всегда̀ послꙋ́шаетъ тебѐ, вѣ́рнаго раба̀ и҆ ᲂу҆го́дника своего̀. сегѡ̀ ра́ди со ᲂу҆миле́нїемъ смире́ннѡ припа́даемъ къ тебѣ̀, свѧ́тче бж҃їй: не премолчѝ ѡ҆ на́съ моли́тисѧ ко гдⷭ҇ꙋ бг҃ꙋ въ трⷪ҇цѣ покланѧ́емомꙋ и҆ сла́вимомꙋ, да ми́лостивѡ призрѣ́въ на ны̀, не попꙋ́ститъ на́мъ поги́бнꙋти во грѣсѣ́хъ на́шихъ, но да возста́витъ па́дшихъ, да пода́стъ и҆справле́нїе ѕло́мꙋ и҆ ѡ҆каѧ́нномꙋ на́шемꙋ житїю̀, ѿ грѧдꙋ́щихъ грѣхопаде́нїй восхища́ѧ, и҆ да прости́тъ на́мъ всѧ̑, є҆ли̑ка са́ми собо́ю и҆лѝ чрез̾ дрꙋги́хъ кого̀ согрѣши́хомъ мы́слїю, сло́вомъ и҆ дѣ́ломъ, ѿ рожде́нїѧ до сегѡ̀ часа̀. ты̀, подви́жниче добродѣ́телей, ѻ҆́ч҃е на́шъ мака́рїе, вѣ́си не́мощь є҆стества̀ на́шегѡ и҆ тѧ́жесть и҆ ско́рбь време́нъ настоѧ́щихъ: молѝ ᲂу҆̀бо вы́нꙋ гдⷭ҇а бг҃а, да николи́же на́съ ѡ҆ставлѧ́етъ є҆гѡ̀ неизрече́нное милосе́рдїе, но да храни́тъ на́съ ѿ мїрски́хъ и҆скꙋше́нїй, ѿ дїа́вольскихъ сѣте́й и҆ ѿ плотски́хъ похоте́й, да прїи́мемъ ѿ гдⷭ҇а бг҃а тобо́ю и҆ всѧ̑ потрє́бнаѧ къ жи́зни вре́меннѣй, ѡ҆свобожде́нїи ѿ бѣ́дъ и҆ напа́стей, неѡсла́бное терпѣ́нїе до конца̀. и҆спросѝ на́мъ ᲂу҆ гдⷭ҇а бг҃а въ ми́рѣ и҆ покаѧ́нїи сконча́ти живо́тъ на́шъ, и҆ невозбра́ннѡ прейтѝ ѿ землѝ на нб҃о, мыта́рствъ же и҆ бѣсѡ́въ воздꙋ́шныхъ и҆ вѣ́чныѧ мꙋ́ки и҆зба́витисѧ, и҆ сподо́битисѧ црⷭ҇тва нбⷭ҇нагѡ, съ тобо́ю и҆ со всѣ́ми ст҃ы́ми, ᲂу҆годи́вшими гдⷭ҇ꙋ бг҃ꙋ и҆ сп҃си́телю на́шемꙋ і҆и҃сꙋ хрⷭ҇тꙋ̀. є҆мꙋ́же подоба́етъ всѧ́каѧ сла́ва, че́сть и҆ поклоне́нїе, со безнача́льнымъ є҆гѡ̀ ѻ҆ц҃е́мъ, и҆ съ прест҃ы́мъ и҆ бл҃ги́мъ и҆ животворѧ́щимъ є҆гѡ̀ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.