Православный календарь
Размер шрифта:

Канѡ́нъ

Канѡ́нъ ст҃о́мꙋ прпⷣбномꙋ мака́рїю, желтово́дскомꙋ и҆ ᲂу҆́нженскомꙋ.

Прп. Макария Желтоводского (1444) 7 августа 2026
Глас 4

Пѣ́снь а҃

І҆рмо́съ

Колесни̑цы фараѡ́новы и҆ си́лꙋ є҆гѡ̀ вве́рже въ мо́ре крѣ́пкїй во бране́хъ: воспое́мъ пѣ́снь но́вꙋю, ꙗ҆́кѡ просла́висѧ.

Тропа́рь

Ве́сь ѡ҆свѧще́нъ бы́въ благода́тїю хрⷭ҇то́вою, мака́рїе прпⷣбне, вои́стиннꙋ ꙗ҆́кѡ и҆збра́нъ сосꙋ́дъ бг҃ови показа́лсѧ є҆сѝ, и҆ жили́ще че́стно ст҃а́гѡ дх҃а.

Тропа́рь

Ѿ ю҆́ности бг҃а возлюби́лъ є҆сѝ, прпⷣбне мака́рїе, и҆ томꙋ̀ ѿ всеѧ̀ дꙋшѝ порабо́талъ є҆сѝ, пребл҃же́нне. и҆ ны́нѣ помина́й на́съ, пресвѣ́тлѡ соверша́ющихъ па́мѧть твою̀.

Тропа́рь

Ѿ страсте́й дꙋшетлѣ́нныхъ мі́ра сегѡ̀ и҆збѣ́глъ є҆сѝ, прпⷣбне, и҆ въ пꙋсты́ню всели́лсѧ є҆сѝ глꙋбо́кꙋю. ны́нѣ же ᲂу҆́бѡ ра́дꙋетсѧ дꙋ́хъ тво́й въ небе́сныхъ ѻ҆би́телехъ.

Богороди́ченъ

Ѡ҆ тебѣ̀ ра́дꙋетсѧ всѧ́кое созда́нїе бж҃їе, мт҃и бг҃а вы́шнѧгѡ, є҆го́же понесла̀ є҆сѝ, носѧ́щаго всѧ́чєскаѧ. и҆ мы̀ чтꙋ́ще тѧ̀ вои́стиннꙋ, ꙗ҆́кѡ бцⷣꙋ въ пѣ́снехъ велича́емъ.

Пѣ́снь г҃

І҆рмо́съ

Оу҆твержда́ѧй гро́мъ, и҆ созида́ѧй дꙋ́хъ, ᲂу҆твердѝ менѐ, гдⷭ҇и, да тѧ̀ пою̀ и҆́стиннѡ, и҆ творю̀ во́лю твою̀, ꙗ҆́кѡ нѣ́сть свѧ́тъ, ꙗ҆́кѡ ты̀, бж҃е на́шъ.

Тропа́рь

Оу҆ха́етъ твоѧ̀ ра́ка бога́тнѡ, и҆ дае́тъ незави́стнѡ всѣ̑мъ и҆сцѣле́нїе: дꙋ́шы же ѿ бѣсо́вскихъ навѣ̑тъ и҆збавлѧ́еши моли́твами твои́ми, прпⷣбне.

Тропа́рь

Ѿгна́лъ є҆сѝ, прпⷣбне, ѿ люде́й твои́хъ бѣсѡ́вскаѧ ѡ҆ѕлоблє́нїѧ, и҆ грѧдꙋ́щаѧ и҆́хъ ѡ҆полчє́нїѧ, ꙗ҆̀же на на́съ, мо́лимъ тѧ̀ ᲂу҆кроти́ти, ꙗ҆́кѡ да при́снѡ соверша́емъ па́мѧть твою̀.

Тропа́рь

Оу҆твердѝ се́рдце моѐ, свѣ́тлѡ воспѣва́ти па́мѧть твою̀, ѻ҆́тче всеблаже́нне мака́рїе: поще́нїемъ бо и҆ бдѣ́нїемъ ꙗ҆́кѡ а҆́гг҃лъ показа́лсѧ є҆сѝ, въ моли́твахъ воспѣва́ѧ бг҃а, подаю́щаго на́мъ тобо́ю всѣ̑мъ и҆сцѣле́нїе.

Богороди́ченъ

Всепѣ́таѧ мт҃и бж҃їѧ, ро́ждшаѧ на́мъ жизнода́вца, и҆ сп҃са всѣ́хъ бг҃а: того̀ ᲂу҆́бѡ, гпⷭ҇жѐ, молѝ бо́дренною твое́ю моли́твою, да спасе́тъ дꙋ́шы на́шѧ.

Пѣ́снь д҃

І҆рмо́съ

Оу҆слы́шахъ, бж҃е, слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ, гдⷭ҇и: ꙗ҆́кѡ твоегѡ̀ хвале́нїѧ и҆спо́лнь землѧ̀.

Тропа́рь

Сѐ ᲂу҆дали́лсѧ є҆сѝ бѣ́гаѧ мі́ра, и҆ сꙋ́щихъ въ не́мъ, и҆ прилѣпи́лсѧ є҆сѝ гдⷭ҇еви твоемꙋ̀, влⷣцѣ и҆ бг҃ꙋ всѣ́хъ. є҆мꙋ́же при́снѡ поѧ̀ благоꙋгоди́лъ є҆сѝ, мꙋ́дре мака́рїе.

Тропа́рь

Оу҆диви́шасѧ а҆́гг҃льстїи ли́цы твоемꙋ̀ трꙋдолю́бїю, блаже́нне, и҆ мы̀ вѣ́рнїи при́снѡ тѧ̀ сла́вимъ, ꙗ҆́кѡ да моли́твами твои́ми и҆зба́вимсѧ бꙋ́дꙋщагѡ ѡ҆сꙋжде́нїѧ.

Тропа́рь

Оу҆краша́етсѧ дне́сь вѣ́рныхъ собо́ръ, торжествꙋ́ѧ, преподо́бне, въ па́мѧть твою̀: пога́ныхъ же сѡ́нмища ᲂу҆жаса́ютсѧ, ви́дѧще тѧ̀ крѣ́пка застꙋ́пника гра́дꙋ твоемꙋ̀ и҆ живꙋ́щымъ въ не́мъ.

Богороди́ченъ

И҆сцѣлѝ, дв҃о, болѣ̑зни серде́цъ на́шихъ, тебе́ бо и҆́мамы помо́щницꙋ, и҆ хода́таицꙋ къ сн҃ꙋ твоемꙋ̀ и҆ бг҃ꙋ на́шемꙋ. є҆го́же родила̀ є҆сѝ сп҃са и҆ врача̀ всѣ́хъ, и҆сточи́вшаго спасе́нїе дꙋша́мъ на́шымъ.

Пѣ́снь є҃

І҆рмо́съ

Возсїѧ́й мѝ, гдⷭ҇и, свѣ́тъ повелѣ́нїй твои́хъ, ꙗ҆́кѡ къ тебѣ̀ дꙋ́хъ мо́й ᲂу҆́тренюетъ и҆ пое́тъ тѧ̀: ты́ бо є҆сѝ бг҃ъ на́шъ, и҆ къ тебѣ̀ прибѣга́ю, цр҃ю̀ ми́ра.

Тропа́рь

Въ пꙋсты́ни ꙗ҆́снѡ возсїѧ́лъ є҆сѝ, бг҃одохнове́нне мака́рїе, носѧ̀ во ᲂу҆стѣ́хъ твои́хъ непреста̑нныѧ моли̑твы, тѣ́мъ мра̑чныѧ собла́зны, и҆ бѣсѡ́вскїѧ полкѝ до конца̀ потреби́лъ є҆сѝ.

Тропа́рь

Возгремѣ̀ и҆лїа̀ на колесни́цѣ, ты́ же, свѧ́те, воспѣва́лъ є҆сѝ бг҃одохнове́ннꙋю пѣ́снь въ пꙋсты́ни, со а҆́гг҃лы всѧ́ческихъ влⷣкꙋ ᲂу҆молѧ́ѧ, є҆́же ᲂу҆лꙋчи́ти го́рнее пребыва́нїе.

Тропа́рь

Водвори́лсѧ є҆сѝ, бл҃же́нне, въ нбⷭ҇ныѧ ѻ҆би́тєли, и҆ со а҆́гг҃лы, прпⷣбне, ликꙋ́еши въ го́рнихъ селе́нїихъ, и҆ та́мѡ вседержи́телѧ вы́нꙋ зри́ши бг҃а, є҆го́же непреста́ннѡ молѝ ѡ҆ всѣ́хъ на́съ.

Богороди́ченъ

Вы́шша є҆стества̀ бг҃а пло́тїю породила̀ є҆сѝ, дв҃о, ꙗ҆́коже са́мъ восхотѣ̀. тѣ́мъ вѣ́рнїи мо́лимъ тѧ̀ и҆зба́витисѧ на́мъ ржⷭ҇тво́мъ твои́мъ вѣ́чнагѡ мꙋче́нїѧ.

Пѣ́снь ѕ҃

І҆рмо́съ

Бꙋ́рѧ мѧ̀ помышле́нїй пости́гши, во глꙋбинꙋ̀ низвлачи́тъ мѧ̀ безмѣ́рныхъ грѣхѡ́въ: но ты̀, ᲂу҆пра́вителю бл҃гі́й, предвари́въ ᲂу҆пра́ви, ꙗ҆́кѡ прⷪ҇ро́ка, и҆ спаси́ мѧ.

Тропа́рь

Безпло́тныхъ житїѐ подража́лъ є҆сѝ, прпⷣбне, ꙗ҆́кѡ а҆́гг҃лъ непоро́чнѡ на землѝ пожи́въ, воздержа́нїемъ плотскі̑ѧ стра̑сти ᲂу҆мертви́лъ є҆сѝ, ѻ҆́тче мака́рїе, сла́вꙋ же мі́ра сегѡ̀ возненави́дѣлъ є҆сѝ, бг҃омꙋ́дре.

Тропа́рь

Бжⷭ҇твенный гла́съ внѧ́лъ є҆сѝ себѣ̀, премꙋ́дре, тѣ́мъ и҆ въ пꙋсты́ню водвори́лсѧ є҆сѝ, послꙋша́нїемъ любе́знѡ носѧ̀ кре́стъ є҆гѡ̀. и҆ сегѡ̀ ра́ди потща́лсѧ є҆сѝ чи́ста себѐ сохрани́ти до конца̀, прпⷣбне.

Тропа́рь

Бжⷭ҇твеннымъ манове́нїемъ тебѣ̀ ѕвѣ́рїе ди́вїи въ пꙋсты́ни покори́шасѧ: стра̑сти бо тебѣ̀ плотскі̑ѧ всѧ̑ ᲂу҆мири́шасѧ. сегѡ̀ ра́ди и҆ бѣсѡ́вскаѧ льщє́нїѧ посрами́лъ є҆сѝ.

Богороди́ченъ

Бжⷭ҇твенное селе́нїе ты̀ є҆сѝ, пречⷭ҇таѧ бцⷣе: ѿ твоеѧ́ бо ᲂу҆тро́бы произы́де сло́во ѻ҆́ч҃ее, и҆ бы́сть бг҃ъ и҆ чл҃вѣ́къ, ꙗ҆́кѡ да за неизрече́нное милосе́рдїе спасе́тъ человѣ́ческїй ро́дъ.

Пѣ́снь з҃

І҆рмо́съ

Гл҃го́лавый на горѣ̀ съ мѡѷсе́омъ, и҆ ѻ҆́бразъ дѣ́вства ꙗ҆вле́й въ кꙋпинѣ̀: бл҃гослове́нъ є҆сѝ, бж҃е ѻ҆тє́цъ на́шихъ.

Тропа́рь

Гла́сомъ любе́знымъ трⷪ҇цꙋ воспѣва́ѧ, и҆ ꙗ҆́кѡ бг҃одохнове́ненъ ѻ҆рга́нъ ꙗ҆ви́лсѧ є҆сѝ, мака́рїе прпⷣбне, и҆́же велегла́снѡ всѣ̑мъ зовы́й: бл҃гослове́нъ бг҃ъ ѻ҆тє́цъ на́шихъ.

Тропа́рь

Пꙋсты̑ннаѧ вита̑нїѧ бога́тнѡ полꙋчи́въ, свѧ́те мака́рїе, ю҆́же прехожда́лъ є҆сѝ непреста́нною моли́твою, и҆ та́мѡ полꙋчи́въ дꙋхо́внꙋю пи́щꙋ, зовы́й: бл҃гослове́нъ бг҃ъ ѻ҆тє́цъ на́шихъ.

Тропа́рь

Гл҃го́лъ гдⷭ҇ень и҆сполнѧ́ѧ, за́пѡвѣди бг҃а твоегѡ̀ ѿ ю҆́ности сохрани́лъ є҆сѝ, ѻ҆́тче мака́рїе, и҆ тогѡ̀ бл҃года́тїю возмо́глъ є҆сѝ пога́ныхъ собѡ́рища твои́ми чꙋдесы̀ ᲂу҆диви́ти. сегѡ̀ ра́ди зове́мъ: бл҃гослове́нъ бг҃ъ ѻ҆тє́цъ на́шихъ.

Богороди́ченъ

Глаго́лъ дѣви́чь і҆ѡ́сифъ тѧ̀ наречѐ, ꙗ҆́кѡ пра́во є҆́сть: ᲂу҆тро́бꙋ же не дв҃и́чꙋ, но нбⷭ҇ный крꙋ́гъ, и҆ земнꙋ́ю широтꙋ̀. во твое́й бо ᲂу҆тро́бѣ ѻ҆́ч҃ее сло́во бы́сть, бл҃гослове́нъ бг҃ъ ѻ҆тє́цъ на́шихъ.

Пѣ́снь и҃

І҆рмо́съ

Землѧ̀, и҆ всѧ̑ ꙗ҆̀же на не́й, мо́ре и҆ всѝ и҆сто́чницы, небеса̀ небе́съ, свѣ́тъ и҆ тма̀, мра́зъ и҆ зно́й, сы́нове человѣ́честїи, свѧще́нницы благослови́те гдⷭ҇а, и҆ превозноси́те є҆го̀ во вѣ́ки.

Тропа́рь

Земна̑ѧ всѧ̑ ѡ҆ста́вивъ, пи́щꙋ же и҆ сла́вꙋ мі́ра сегѡ̀ ꙗ҆́кѡ пра́хъ вмѣни́лъ є҆сѝ, и҆ є҆ди́наго бг҃а возжелѣ́лъ є҆сѝ, ѻ҆́тче. є҆го́же молѝ, пла́мень страсте́й ᲂу҆гаси́ти въ на́съ, пою́щихъ и҆ превозносѧ́щихъ є҆го̀ во вѣ́ки.

Тропа́рь

Зе́млю ѿ младе́нства слеза́ми твои́ми, ꙗ҆́кѡ тꙋ́чами напои́лъ є҆сѝ, бл҃же́нне. по́ты же и҆ по́двиги трꙋдѡ́въ твои́хъ кто̀ и҆сповѣ́сть; и҆́хже ра́ди вѣнча́ тѧ хрⷭ҇то́съ въ црⷭ҇твїи свое́мъ: є҆го́же пое́мъ, и҆ превозно́симъ во вѣ́ки.

Тропа́рь

Землѧ̀ ꙗ҆́кѡ плодови́та ꙗ҆ви́лсѧ є҆сѝ, ѻ҆́тче мака́рїе: и҆зне́слъ бо є҆сѝ бг҃осажде́нный пло́дъ, вѣ́рныхъ напитава́ющъ сердца̀ бра́шномъ живоно́снымъ є҆ѵⷢ҇льскагѡ ᲂу҆че́нїѧ хрⷭ҇то́выхъ ᲂу҆сте́нъ: є҆го́же пое́мъ и҆ превозно́симъ во вѣ́ки.

Богороди́ченъ

Землѐ ст҃а́ѧ и҆ непоро́чнаѧ дв҃о, и҆зъ тебє́ бо напослѣ́докъ прозѧбѐ хрⷭ҇то́съ бг҃ъ, ꙗ҆́коже клѧ́лсѧ є҆́сть а҆враа́мꙋ рабꙋ̀ своемꙋ̀, є҆́же ᲂу҆мно́жити сѣ́мѧ є҆гѡ̀, и҆ тобо́ю спастѝ сѣдѧ́щыѧ во тмѣ̀. спасѝ, влⷣчце, всѣ́хъ пою́щихъ тѧ̀, и҆ превозносѧ́щихъ гдⷭ҇а во вѣ́ки.

Пѣ́снь ѳ҃

І҆рмо́съ

Ꙗ҆́кѡ сотворѝ мнѣ̀ вели̑чїѧ си́льный, и҆ свѧ́то и҆́мѧ є҆гѡ̀, и҆ ми́лость є҆гѡ̀ въ ро́дъ и҆ ро́дъ боѧ́щымсѧ є҆гѡ̀.

Тропа́рь

Ꙗ҆́кѡ те́пла застꙋ́пника стѧжа́хомъ тѧ̀ въ бране́хъ, ѻ҆́тче мака́рїе: плѣнє́нныѧ бо моли́твами твои́ми свобожда́еши, и҆ невѣ̑рнаѧ сѡ́нмища посрамлѧ́еши.

Тропа́рь

Ꙗ҆́кѡ со́лнце свѣтоно́сное чꙋдесы̀ сїѧ́еши, мака́рїе, и҆ равноа́гг҃льнѡ на землѝ пожи́лъ є҆сѝ, бг҃омꙋ́дре: бжⷭ҇твеннѣй же сла́вѣ со а҆́гг҃лы предстоѧ́ти сподо́билсѧ є҆сѝ.

Тропа́рь

Прекра́сенъ до́мъ ст҃а́гѡ дх҃а ꙗ҆ви́лсѧ є҆сѝ, и҆ цр҃ѧ̀ всѣ́хъ хрⷭ҇та̀ бг҃а ѿ всеѧ̀ дꙋшѝ возлюби́лъ є҆сѝ: є҆гѡ́же ра́ди въ чꙋдесѣ́хъ прославлѧ́ешисѧ, досточꙋ́дне ѻ҆́тче мака́рїе прпⷣбне.

Богороди́ченъ

Всѧ̀ тва́рь воспѣва́етъ тѧ̀, бцⷣе, и҆ нбⷭ҇нїи чи́нове тебѐ велича́ютъ непреста́ннѡ: бг҃а бо и҆ цр҃ѧ̀ всѣ́хъ родила̀ є҆сѝ, дв҃о чⷭ҇таѧ. є҆го́же молѝ, всѧ̀ гра́ды и҆ страны̑ вѣ̑рныѧ соблюстѝ ѿ навѣ́та вра́жїѧ.