Православный календарь
Размер шрифта:

Ака́ѳістъ

А҆ка́ѳїстъ прпⷣбномꙋ мѡѷсе́ю ᲂу҆́гринꙋ.

Прп. Моисея Многострадального, Угрина (1043) 8 августа 2026

Конда́къ а҃

Возбра́нный чꙋдотво́рче и҆ дх҃а ст҃а́го и҆спо́лненный, прпⷣбный ѻ҆́тче мѡѷсе́е, ди́вный подви́жниче и҆ недꙋ́гѡвъ дꙋше́вныхъ и҆ тѣле́сныхъ цѣле́бниче, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ да въ ра́дости се́рдца зове́мъ тѝ:

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чистоты̀ побо́рниче.

І҆́косъ а҃

А҆́гг҃лѡвъ творе́цъ и҆ гдⷭ҇ь си́лъ ꙗ҆вѝ тѧ̀, досточꙋ́дне, а҆́гг҃ла во пло́ти и҆ вѣ́рныхъ предста́телѧ. прибѣга́юще ᲂу҆́бѡ къ застꙋпле́нїю твоемꙋ̀, сицева̑ѧ ра́дѡстнаѧ тебѣ̀ прино́симъ:

Ра́дꙋйсѧ, а҆́гг҃льскїѧ чⷭ҇тоты̀ ревни́телю: ра́дꙋйсѧ, предо́брый и҆́нокѡвъ наста́вниче.

Ра́дꙋйсѧ, цѣломꙋ́дрїѧ ди́вное свѣти́ло: ра́дꙋйсѧ, ᲂу҆се́рдный и҆сполни́телю поста̀ и҆ воздержа́нїѧ.

Ра́дꙋйсѧ, свѣ́тлый ѻ҆́бразе кро́тости и҆ смире́нїѧ: ра́дꙋйсѧ, ᲂу҆тѣше́нїе вѣ̑рнымъ ꙗ҆влѧ́ѧй.

Ра́дꙋйсѧ, ѡ҆би́телей земны́хъ покрови́телю нбⷭ҇ный: ра́дꙋйсѧ, ꙗ҆ре́мъ бл҃гі́й на сѧ̀ взе́мшїй.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ в҃

Ви́дѧ гдⷭ҇ь чистотꙋ̀ се́рдца твоегѡ̀, и҆збра̀ тѧ̀ зрѣ́ти сла́вꙋ нбⷭ҇нꙋю. Є҆гда̀ съ двꙋмѧ̀ бра́тїѧми твои́ми во гра́дъ кі́евъ пресели́лсѧ є҆сѝ и҆ ст҃ы̑мъ страстоте́рпцємъ бори́сꙋ и҆ глѣ́бꙋ ᲂу҆се́рднѡ порабо́талъ є҆сѝ, тогда̀ ты̀, бл҃же́нне, въ мл҃твахъ потща́лсѧ є҆сѝ, є҆ли́кѡ бѣ̀ мо́щно ю҆́ношѣ ст҃ы̑мъ подража́ти. Сегѡ̀ ра́ди съ весе́лїемъ возопїѧ́лъ є҆сѝ бг҃ꙋ: А҆ллилꙋ́їа.

І҆́косъ в҃

Ра́зꙋмъ бг҃одꙋхнове́нъ и҆мѣ́ѧ, ѡ҆ прпⷣбне ѻ҆́тче мѡѷсе́е, ди́внымъ смотре́нїемъ бж҃їимъ, є҆гда̀ на рѣцѣ̀ а҆́льтѣ бра́та твоего̀ геѡ́ргїа во́и свѧтопо́лка погꙋби́ша вкꙋ́пѣ со ст҃ы́ми стрⷭ҇тотє́рпцами бори́сомъ и҆ глѣ́бомъ, ты́ же є҆ди́нъ и҆зба́вивсѧ ᲂу҆бїе́нїѧ, прише́лъ во гра́дъ кі́евъ къ предисла́вѣ сестрѣ̀ ꙗ҆росла́влей и҆ бы́лъ та́мѡ молѧ́сѧ ко гдⷭ҇ꙋ приле́жнѡ, тѣ́мже похвалѧ́юще бг҃а, спа́сшаго тѧ̀, глаго́лемъ тѝ си́це:

Ра́дꙋйсѧ, нача́ло премꙋ́дрости стра́хъ бж҃їй пра́виломъ жи́зни себѣ̀ пред̾избра́вый: ра́дꙋйсѧ, ꙗ҆́кѡ а҆́гг҃ла храни́телѧ николи́же ѡ҆печа́лилъ є҆сѝ.

Ра́дꙋйсѧ, лꙋчꙋ̀ бж҃е́ственнагѡ свѣ́та: ра́дꙋйсѧ, бл҃гоꙋха́нный крі́не дѣ́вства и҆ нетлѣ́нїѧ.

Ра́дꙋйсѧ, ꙗ҆́кѡ бл҃гоче́стїемъ твои́мъ ᲂу҆годи́лъ є҆сѝ хрⷭ҇тꙋ̀ бг҃ꙋ: ра́дꙋйсѧ, къ бцⷣѣ мл҃твенниче на́шъ неꙋсы́пный.

Ра́дꙋйсѧ, не́мощей на́шихъ и҆зрѧ́дный цѣле́бниче: ра́дꙋйсѧ, и҆збра́нный сосꙋ́де дх҃а ст҃а́гѡ.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ г҃

Си́лою вы́шнѧго, дарова́нною тебѣ̀, и҆ долготерпѣ́нїемъ твои́мъ бы́лъ є҆сѝ вельмѝ преꙋкра́шенъ, є҆гда́ же ведо́ша тѧ̀ по рꙋ́кꙋ и҆ но́гꙋ желѣ́зы тѧ́жкими ѡ҆ко́вана и҆ тве́рдо стрежа́хꙋ, любо́вїю къ бг҃ꙋ вы́нꙋ пламенѣ́ѧ, вопїѧ́лъ є҆сѝ: А҆ллилꙋ́їа.

І҆́косъ г҃

И҆мѣ́ѧ бл҃гопрїѧ́тнꙋю по бл҃гоче́стїи ре́вность, бы́лъ є҆сѝ и҆скꙋша́емь ѿ нѣ́кїѧ жены̀ млады́ѧ, и҆мꙋ́щей бога́тство мно́гое, є҆ѧ́ же мꙋ́жъ съ болесла́вомъ и҆ды́й не возврати́сѧ: та̀ ᲂу҆́бѡ прїе́мши во ᲂу҆́мъ видѣ́нїѧ, добро́тꙋ ᲂу҆ѧзви́сѧ вожделѣ́нїемъ плотски́мъ къ прпⷣбномꙋ, ѻ҆́нъ же всѧ̑ терпѧ̀ молѧ́шесѧ. Семꙋ̀ ᲂу҆́бѡ бл҃гоговѣ́йнѡ ᲂу҆дивлѧ́ющесѧ, съ ра́достїю вопїе́мъ тебѣ̀:

Ра́дꙋйсѧ, ѿ мла́да во́зраста вда́вый себє̀ на слꙋже́нїе гдⷭ҇ꙋ: ра́дꙋйсѧ, того̀ є҆ди́наго па́че всегѡ̀ возлюби́вый.

Ра́дꙋйсѧ, пло́ть дꙋ́хꙋ покори́вый: ра́дꙋйсѧ, всѧ̑ по бз҃ѣ терпѣ́ти и҆зво́ливый.

Ра́дꙋйсѧ, кѡ́зни вдовы̀ бо́дрѡ ѿрази́вый: ра́дꙋйсѧ, тѣ́снымъ пꙋте́мъ є҆ѵⷢ҇льскимъ ше́ствовавый.

Ра́дꙋйсѧ, кі́ево­-пече́рскїѧ ла́ѵры сщ҃е́нное ᲂу҆краше́нїе: ра́дꙋйсѧ, ꙗ҆́кѡ тобо́ю гдⷭ҇ь прославлѧ́етсѧ.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ д҃

Бꙋ́рею ѡ҆держи́ма помышле́нїй, возшꙋмѣ̀ нечести́ваѧ вдова̀ на хра́мъ дꙋшѝ твоеѧ̀ прпⷣбне, ᲂу҆вѣ́дѣвъ же тѧ̀ вѣ́рнаго бы́ти раба̀ хрⷭ҇то́ва, ѕѣлѡ̀ смѧте́сѧ, тѣ́мже и҆ мы̀ зрѧ̀ жите́йское мо́ре воздвиза́емое бꙋ́рею страсте́й и҆ напа́стей, притека́емъ къ ти́хомꙋ приста́нищꙋ мл҃твъ твои́хъ, вопїѧ̀ хрⷭ҇тꙋ̀ бг҃ꙋ: А҆ллилꙋ́їа.

І҆́косъ д҃

Слы́шавше и҆ ви́дѣвше ст҃о́е житїѐ твоѐ, ᲂу҆дивлѧ́хꙋсѧ си́лѣ бл҃года́ти, и҆зъ ᲂу҆́стъ твои́хъ и҆сходѧ́щей, и҆ прославлѧ́хꙋ бг҃а, сегѡ̀ ра́ди и҆ мы̀ ра́достно ᲂу҆бл҃жа́емъ тѧ̀:

Ра́дꙋйсѧ, ди́вный и҆збра́нниче бж҃їй: ра́дꙋйсѧ, сꙋ́етнꙋю сла́вꙋ ми́ра сего̀ во ᲂу҆ме́ты вмѣни́вый.

Ра́дꙋйсѧ, за сладча́йшаго і҆и҃са дꙋ́шꙋ твою̀ положи́вый: ра́дꙋйсѧ, ᲂу҆ прⷭ҇то́ла бж҃їѧ предстоѧ́й съ го́рними си́лами.

Ра́дꙋйсѧ, на высотꙋ̀ безстра́стїѧ возше́дый: ра́дꙋйсѧ, прпⷣбне ѻ҆́тче, въ терпѣ́нїи неѡдолѣ́нный.

Ра́дꙋйсѧ, свѣ́та невече́рнѧго прича́стниче: ра́дꙋйсѧ, ве́лїю бл҃года́ть ѿ гдⷭ҇а стѧжа́вый.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ є҃

Бг҃оте́чною ѕвѣздо́ю ꙗ҆вѝ тѧ̀ мі́рꙋ житїѐ твоѐ, прпⷣбне ѻ҆́тче мѡѷсе́е, ꙗ҆́кѡ всего̀ па́че возлюби́лъ є҆сѝ чистотꙋ̀ дꙋше́внꙋю и҆ тѣле́снꙋю, и҆ ра́ди мꙋ́къ вре́менныхъ ᲂу҆пова́ѧ и҆зба́вленъ бы́ти вѣ́чныхъ мꙋ́къ, воспѣва́лъ є҆сѝ бл҃года́рнѣ бг҃ꙋ: А҆ллилꙋ́їа.

І҆́косъ є҃

Ви́дѧ вра́гъ ро́да чл҃вѣ́ческагѡ чⷭ҇тое и҆ ст҃о́е житїѐ твоѐ, па́че распалѧ́етъ вдовꙋ̀, ꙗ҆́же ѻ҆блече́ тѧ въ ри̑зы многоцѣ̑нныѧ, и҆ сла́дкими бра́шны пита́ше, безстꙋ́дно влача́ше на дѣ́ло непотре́бное, ты́ же, ѻ҆́тче ст҃ы́й, прилѣжа́ше па́че постꙋ̀ и҆ мл҃твѣ. Сегѡ̀ ра́ди воспѣва́емъ тѝ си́це:

Ра́дꙋйсѧ, до́брый во́ине хрⷭ҇то́въ: ра́дꙋйсѧ, ст҃ы́ѧ цр҃кве похвало̀ и҆ ра́дованїе.

Ра́дꙋйсѧ, дара́ми бл҃года́тными преиспо́лненный: ра́дꙋйсѧ, не сло́вомъ то́чїю, но мно́жае па́че дѣ́ломъ на́съ поꙋча́ѧй.

Ра́дꙋйсѧ, разли́чными напа́стьми и҆ и҆скꙋше́ньми ѡ҆тѧгче́нныхъ ско́ро посо́бствꙋющїй: ра́дꙋйсѧ, и҆збра́нниче хрⷭ҇то́въ, чꙋдесы̀ свидѣ́тельствованный.

Ра́дꙋйсѧ, въ по́двигахъ земно́е тече́нїе соверши́вый: ра́дꙋйсѧ, сподо́бившїйсѧ зрѣ́ти сла́вꙋ бж҃їю.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ ѕ҃

Проповѣ́дꙋетсѧ во все́мъ мі́рѣ до́блесть по́двига твоегѡ̀, бл҃же́нне, и҆́бо ни во что́ же вмѣнѧ́лъ є҆сѝ житїѐ мі́ра сегѡ̀. Гла́домъ ᲂу҆мы́сли ѕла́ѧ жена̀ ᲂу҆мори́ти тѧ̀, вве́рженнаго въ темни́цꙋ. Дрꙋзі́и же ᲂу҆вѣщава́хꙋ тѧ̀, глаго́люще: кто̀ не посмѣе́тсѧ твоемꙋ̀ безꙋ́мїю; Оу҆́не тѝ є҆́сть покори́тисѧ женѣ̀ се́й. Ты́ же, бл҃же́нне, речѐ: вы́шнѧгѡ ра́ди црⷭ҇тва всѧ̑ сїѧ̑ преѡби́дѣхъ, поѧ̀ бг҃ꙋ: А҆ллилꙋ́їа.

І҆́косъ ѕ҃

Возсїѧ́лъ є҆сѝ въ бре́ннѣй пло́ти свѣ́томъ нбⷭ҇нымъ, глаго́лѧ слова̀ є҆ѵⷢ҇льскїѧ: не ѡ҆жени́выйсѧ пече́тсѧ ѡ҆ гдⷭ҇нихъ, ка́кѡ ᲂу҆годи́ти гдⷭ҇еви. Тѣ́мъ же вопїе́мъ тѝ:

Ра́дꙋйсѧ, ѻ҆́тче, свѣ́томъ добродѣ́телей твои́хъ мі́ръ ѡ҆зари́вый: ра́дꙋйсѧ, ѻ҆́гнь любвѐ хрⷭ҇то́вы въ себѐ носи́вый.

Ра́дꙋйсѧ, въ бѣда́хъ ско́рый помо́щниче: ра́дꙋйсѧ, а҆́гг҃льское житїѐ ꙗ҆влѧ́ѧй.

Ра́дꙋйсѧ, не приложи́вый се́рдца къ земно́мꙋ наслажде́нїю: ра́дꙋйсѧ, мл҃твенниче ѡ҆ чтꙋ́щихъ ст҃ꙋ́ю па́мѧть твою̀.

Ра́дꙋйсѧ, поко́ѧ вѣ́чнаго дости́гнꙋвый: ра́дꙋйсѧ, неизрече́нныхъ бла̑гъ наслѣ́дниче.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ з҃

Хотѧ́й непреста́нно житїе́мъ и҆ вѣ́рою гдⷭ҇ꙋ бл҃гоꙋгожда́ти, бы́лъ є҆сѝ ѿ чернори́зца ст҃ы́ѧ а҆ѳѡ́нскїѧ горы̀ ѡ҆блече́нъ во ст҃ы́й, а҆́гг҃льскїй, и҆́ноческїй ѻ҆́бразъ. тѣ́мъ же сїѧ́нїемъ по́двигѡвъ твои́хъ просвѣще́нни ᲂу҆се́рдно велича́емъ тѧ̀, и҆ просла́вльшемꙋ тѧ̀ хрⷭ҇тꙋ̀ бг҃ꙋ вопїе́мъ: А҆ллилꙋ́їа.

І҆́косъ з҃

Но́вое показа̀ ѕло̀ ѻ҆́наѧ лꙋка́ваѧ жена̀ є҆гда̀ въ безꙋ́мїи свое́мъ ѡ҆скопи́ти тѧ̀ повелѣ́ла, ты́ же ꙗ҆́кѡ ме́ртвъ лежа́лъ є҆сѝ ѿ тече́нїѧ кро́ве, є҆два̀ ма́ло въ себѣ̀ дыха́нїѧ и҆мѣ́ѧ. Бл҃гоговѣ́йнѣ ᲂу҆́бѡ воспомина́ѧ долготерпѣ́нїе твоѐ, блажи́мъ тѧ̀ похвала́ми си́ми:

Ра́дꙋйсѧ, ꙗ҆́кѡ ѻ҆́гнь любвѐ къ бг҃ꙋ въ се́рдце твое́мъ непреста́ннѡ сохрани́вый: ра́дꙋйсѧ, бо́дрости и҆ трезвѣ́нїѧ предо́брый ᲂу҆чи́телю.

Ра́дꙋйсѧ, вѣ́рныхъ ко сп҃се́нїю наставлѧ́ющїй: ра́дꙋйсѧ, твердѣ́е а҆дама́нта въ терпѣ́нїи ꙗ҆ви́выйсѧ, и҆́бо кро́вїю твое́ю, ꙗ҆́кѡ багрѧни́цею цр҃ковь ᲂу҆краси́сѧ.

Ра́дꙋйсѧ, къ прпⷣбномꙋ а҆нтѡ́нїю рабо́тати гдⷭ҇еви прише́дый: ра́дꙋйсѧ, чꙋдесы̑ твои́ми ѡ҆би́тель пече́рскꙋю просла́вивый.

Ра́дꙋйсѧ, покори́вый во́лю свою̀ во́лѣ ѻ҆ц҃а̀ нбⷭ҇нагѡ.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ и҃

Стра́нное чꙋ́до ꙗ҆влѧ́етсѧ притека́ющымъ къ тебѣ̀, бл҃же́нне мѡѷсе́е, и҆́бо дарова̀ тебѣ̀ гдⷭ҇ь побѣжда́ти стра̑сти. Та́же подража́ѧ пе́рвомꙋ мѡѷсе́ю, творѧ́щемꙋ жезло́мъ чꙋдеса̀, жезло́мъ стра́сть бра́тнюю и҆сцѣли́лъ є҆сѝ. Мы́ же, бл҃годарѧ̀ ѡ҆ се́мъ бг҃а, дарова́вшемꙋ тебѣ̀ таковꙋ́ю крѣ́пость, съ любо́вїю взыва́емъ: А҆ллилꙋ́їа.

І҆́косъ и҃

Ве́сь бл҃года́тныхъ дарова́нїй и҆спо́лненный, десѧтолѣ́тнымъ безмо́лвїемъ пеще́рнымъ равноа́гг҃льскимъ просїѧ́лъ є҆сѝ свѣ́томъ нбⷭ҇нымъ и҆ сподо́билсѧ є҆сѝ бг҃ови́децъ бы́ти, ѡ҆брѣ́тесѧ бо досто́инъ бл҃же́нства чи́стыхъ се́рдцемъ, прпⷣбне ѻ҆́тче мѡѷсе́е. Сегѡ̀ ра́ди по до́лгꙋ зове́мъ тѝ:

Ра́дꙋйсѧ, ꙗ҆́кѡ тобо́ю гдⷭ҇ь ѿ страсте́й и҆сцѣле́нїе да́рꙋетъ: ра́дꙋйсѧ, бл҃же́нне, за́повѣдь чи́стымъ се́рдцемъ бы́ти вѣ́рно и҆спо́лнивый.

Ра́дꙋйсѧ, ꙗ҆́кѡ свѣ́тъ бж҃е́ственный зрѣ́ти сподо́билсѧ є҆сѝ: ра́дꙋйсѧ, ѡ҆ дꙋша́хъ на́шихъ непреста́нный моли́твенниче.

Ра́дꙋйсѧ, дре́внихъ ст҃ы́хъ бг҃оно́сныхъ ѻ҆тє́цъ нра́вы себѣ̀ ᲂу҆сво́ивый: ра́дꙋйсѧ, высо́каѧ прпⷣбныхъ похвало̀.

Ра́дꙋйсѧ, во смире́нїи ѕѣлѡ̀ преꙋспѣ́вый: ра́дꙋйсѧ, ꙗ҆́кѡ ᲂу҆спе́нїе твоѐ прославлѧ́етъ ст҃а́ѧ цр҃ковь.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ ѳ҃

Всѐ є҆стество̀ а҆́гг҃льское ᲂу҆диви́сѧ высотѣ̀ чⷭ҇тоты̀ твоеѧ̀, цр҃ковь же па́ки прославлѧ́етъ тѧ̀, ꙗ҆́кѡ вели́кїй таи́нникъ бж҃їѧ бл҃года́ти бы́лъ є҆сѝ и҆ зрѣ́ти лице́мъ къ лицꙋ̀ гдⷭ҇а ᲂу҆досто́илсѧ, да и҆ мы̀ съ тобо́ю вы́нꙋ вопїе́мъ: А҆ллилꙋ́їа.

І҆́косъ ѳ҃

Вѣті́и многовѣща́ннїи не возмо́гꙋтъ и҆зрещѝ чистотꙋ̀ твою̀, бл҃же́нне, мы́ же любо́вїю побѣжда́еми дерза́емъ воспѣ́ти тебѣ̀ похвалы̑ такова̑ѧ:

Ра́дꙋйсѧ, немощны́хъ ᲂу҆крѣпле́нїе: ра́дꙋйсѧ, ско́рбныхъ и҆ печа́льныхъ ᲂу҆тѣше́нїе.

Ра́дꙋйсѧ, до́брыхъ насади́телю: ра́дꙋйсѧ, за дѣ́вственнꙋю чⷭ҇тотꙋ̀ ѿ гдⷭ҇а вѣнча́нный.

Ра́дꙋйсѧ, бж҃їѧ сла́вы те́плый рачи́телю: ра́дꙋйсѧ, тала́нтъ врꙋче́нный тѝ ᲂу҆мно́живый.

Ра́дꙋйсѧ, хрⷭ҇та̀ бг҃а всѣ́мъ се́рдцемъ возлюби́вый: ра́дꙋйсѧ, свѣти́льниче, просвѣща́ющїй сердца̀ па́мѧть твою̀ чтꙋ́щихъ.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ і҃

Спастѝ хотѧ̀ твою̀ дꙋ́шꙋ, нерадѣ́лъ є҆сѝ ѡ҆ твое́й пло́ти и҆ въ ла́ѵрѣ пече́рстѣй ст҃а́гѡ а҆нтѡ́нїа коне́цъ стра́нствїѧ земна́гѡ соверши́лъ є҆сѝ, почи́въ ѡ҆ гдⷭ҇ѣ кончи́ною пра́ведною и҆ ст҃о́ю, ꙗ҆́кѡ побѣди́тель не съ человѣ́ки, но со а҆́гг҃лы воспѣва́лъ є҆сѝ бг҃ꙋ: А҆ллилꙋ́їа.

І҆́косъ і҃

Стѣно́ю терпѣ́нїѧ ѡ҆гради́всѧ, цр҃ѧ̀ нбⷭ҇нагѡ хрⷭ҇та̀ вѣ́рный слꙋжи́тель бы́лъ є҆сѝ, житїѐ твоѐ тѣ́сною стезе́ю проше́лъ є҆сѝ. Мы́ же чтꙋ́ще любо́вїю па́мѧть твоегѡ̀ преставле́нїѧ и҆ моще́й твои́хъ честны́хъ ѡ҆брѣ́тенїѧ, ᲂу҆блажа́емъ тѧ̀, вопїю́ще такова̑ѧ:

Ра́дꙋйсѧ, пресла́вный на́шъ застꙋ́пниче: ра́дꙋйсѧ, предварѧ́ющїй прошє́нїѧ призыва́ющихъ тѧ̀ во и҆скꙋше́нїѧхъ.

Ра́дꙋйсѧ, мно́гими скорбьмѝ въ ра́дость гдⷭ҇а вше́дый: ра́дꙋйсѧ, сле́зъ и҆злїѧ́ньми дꙋ́шꙋ твою̀ ѡ҆мы́вый.

Ра́дꙋйсѧ, ꙗ҆́кѡ сло́во а҆пⷭ҇льское: любы̀ долготерпи́тъ, и҆спо́лнивый.

Ра́дꙋйсѧ, бл҃же́нство ра́йское со ст҃ы́ми ᲂу҆наслѣ́довавый: ра́дꙋйсѧ, бг҃оꙋго́днымъ житїе́мъ вѣ́рꙋ ᲂу҆тверди́вый.

Ра́дꙋйсѧ, бли̑жнимъ и҆ да̑льнимъ по́мощь свою̀ подава́ѧй: ра́дꙋйсѧ, мі́ра го́рнѧгѡ бл҃же́нный ѻ҆бита́телю.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ а҃і

Пѣ́нїемъ а҆ка́ѳїста чествꙋ́емъ тѧ̀ и҆ велича́емъ, прпⷣбне ѻ҆́тче мѡѷсе́е, ре́вностнѡ соверша́юще ст҃ꙋ́ю па́мѧть твою̀. Ты́ же, млⷭ҇тивѡ прїи́мше ма́лое моле́нїе на́ше, на́мъ побо́рникомъ, предста́телемъ и҆ моли́твенникомъ ко гдⷭ҇ꙋ бꙋ́ди. Мы́ же помина́ѧ житїѐ твоѐ бг҃оꙋго́дное и҆ по́двиги твоѧ̑ многотрꙋ̑дныѧ, воспѣва́емъ просла́вльшемꙋ тѧ̀ творцꙋ̀: А҆ллилꙋ́їа.

І҆́косъ а҃і

Свѣтопода́тельномꙋ свѣти́льникꙋ подѡ́бны честны̑ѧ и҆ цѣльбонѡ́сныѧ мо́щы твоѧ̑, досточꙋ́дне ѻ҆́тче мѡѷсе́е, свѣ́тъ бо невече́рнїй возсїѧва́етъ ѿ ни́хъ чрез̾ чꙋдесы̀ ѻ҆би̑льныѧ. Тѣ́мъ же ѿ любвѐ серде́чныѧ восклица́емъ тебѣ̀ ра́достно:

Ра́дꙋйсѧ, сме́ртїю вре́менной преше́дый въ живо́тъ вѣ́чный: ра́дꙋйсѧ, і҆ѡа́нна многострада́льнагѡ чꙋде́сно ᲂу҆врачева́вый.

Ра́дꙋйсѧ, крі́не возраще́нный на землѝ длѧ ра́йскихъ селе́нїй: ра́дꙋйсѧ, дѣ́лателю до́брый вїногра́да нбⷭ҇нагѡ.

Ра́дꙋйсѧ, ма́слино многопло́днаѧ са́да і҆и҃сова: ра́дꙋйсѧ, прпⷣбныхъ пече́рскихъ ѻ҆ц҃є́въ велича́нїе.

Ра́дꙋйсѧ, ти́хое приста́нище ѡ҆бꙋрева́емыхъ страстьмѝ: ра́дꙋйсѧ, во все́мъ мі́рѣ бг҃омъ просла́вленный.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ в҃і

Блгⷣть дана̀ тѝ ѿ бг҃а соблюда́ти ѿ нечи́стыѧ стра́сти всѧ́каго человѣ́ка, съ вѣ́рою и҆ любо́вїю къ застꙋпле́нїю твоемꙋ̀ прибѣга́ющаго. Мы́ же гдⷭ҇ꙋ, дарова́вшемꙋ на́мъ тебѐ, ско́раго, млⷭ҇тиваго врачева́телѧ, бл҃года́рственнѣ воспѣва́емъ: А҆ллилꙋ́їа.

І҆́косъ в҃і

Пою́ще равноа́гг҃льское житїѐ твоѐ, ᲂу҆бл҃жа́емъ тѧ̀, ѻ҆́тче мѡѷсе́е, ꙗ҆́кѡ моли́твенника ѡ҆ на́съ пред̾ гдⷭ҇емъ, застꙋ́пника и҆ наста́вника ко сп҃се́нїю, и҆ со ᲂу҆миле́нїемъ возглаша́емъ тѝ такова̑ѧ:

Ра́дꙋйсѧ, ѡ҆ мі́рѣ моли́твенниче преизрѧ́дне: ра́дꙋйсѧ, не то́чїю и҆́нокѡмъ, но и҆ мїрѧ́нѡмъ пꙋ́ть къ нб҃ꙋ ѡ҆зарѧ́ющїй.

Ра́дꙋйсѧ, всѣ́хъ сердца̀ любо́вїю твое́ю къ себѣ̀ привлека́ющїй: ра́дꙋйсѧ, мно́жествомъ чꙋде́съ ѿ бг҃а просла́вленный.

Ра́дꙋйсѧ, стра́нниче, ѻ҆те́чествїѧ нбⷭ҇наго дости́гнꙋвый: ра́дꙋйсѧ, терпе́нїемъ скорбе́й дре́внемꙋ і҆́ѡвꙋ подража́вый.

Ра́дꙋйсѧ, во и҆скꙋше́нїѧхъ при́сный помо́щниче: ра́дꙋйсѧ, мѵ́ро цѣле́бное бж҃їѧ бл҃года́ти.

Ра́дꙋйсѧ, ѡ҆ тебѣ́ бо ра́дꙋютсѧ а҆́гг҃ли и҆ бг҃а сла́вѧтъ человѣ́цы.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ г҃і

Ѽ преди́вный ᲂу҆го́дниче и҆ ст҃ы́й чꙋдотво́рче, прпⷣбне ѻ҆́тче мѡѷсе́е, ма́лое сїѐ пѣсносло́вїе, съ любо́вїю въ похвалꙋ̀ тебѣ̀ приноси́мое, ѿ на́съ ми́лостивно прїе́мши, ᲂу҆молѝ всѣ́хъ творца̀ и҆ гдⷭ҇а дарова́ти на́мъ дꙋше́вное сп҃се́нїе и҆ тѣле́сное здра́вїе, вѣ́рнѡ воспѣва́ющихъ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ и҆ гдⷭ҇ь си́лъ ꙗ҆вѝ тѧ̀, досточꙋ́дне, а҆́гг҃ла во пло́ти и҆ вѣ́рныхъ предста́телѧ. прибѣга́юще ᲂу҆́бѡ къ застꙋпле́нїю твоемꙋ̀, сицева̑ѧ ра́дѡстнаѧ тебѣ̀ прино́симъ:

Ра́дꙋйсѧ, а҆́гг҃льскїѧ чⷭ҇тоты̀ ревни́телю: ра́дꙋйсѧ, предо́брый и҆́нокѡвъ наста́вниче.

Ра́дꙋйсѧ, цѣломꙋ́дрїѧ ди́вное свѣти́ло: ра́дꙋйсѧ, ᲂу҆се́рдный и҆сполни́телю поста̀ и҆ воздержа́нїѧ.

Ра́дꙋйсѧ, свѣ́тлый ѻ҆́бразе кро́тости и҆ смире́нїѧ: ра́дꙋйсѧ, ᲂу҆тѣше́нїе вѣ̑рнымъ ꙗ҆влѧ́ѧй.

Ра́дꙋйсѧ, ѡ҆би́телей земны́хъ покрови́телю нбⷭ҇ный: ра́дꙋйсѧ, ꙗ҆ре́мъ бл҃гі́й на сѧ̀ взе́мшїй.

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чⷭ҇тоты̀ побо́рниче.

Конда́къ а҃

Возбра́нный чꙋдотво́рче и҆ дх҃а ст҃а́го и҆спо́лненный, прпⷣбный ѻ҆́тче мѡѷсе́е, ди́вный подви́жниче и҆ недꙋ́гѡвъ дꙋше́вныхъ и҆ тѣле́сныхъ цѣле́бниче, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ да въ ра́дости се́рдца зове́мъ тѝ:

Ра́дꙋйсѧ, прпⷣбне ѻ҆́тче мѡѷсе́е, ди́вный чꙋдотво́рче и҆ чистоты̀ побо́рниче.

Моли́твы

Ѽ пречꙋ́дный и҆ бг҃оно́сный ѻ҆́тче мѡѷсе́е, и҆зрѧ́дный ᲂу҆го́дниче хрⷭ҇то́въ и҆ вели́кїй чꙋдотво́рче, къ тебѣ̀ смире́нно припа́даемъ и҆ мо́лимсѧ: да́ждь на́мъ бы́ти прича́стникѡмъ любвѐ твоеѧ̀ къ бг҃ꙋ и҆ бли́жнемꙋ, помозѝ на́мъ твори́ти во́лю гдⷭ҇ню въ простотѣ̀ се́рдца и҆ смире́нїи, за́пѡвѣди гдⷭ҇ни соверша́ти непогрѣши́тельнѡ, при́зри бл҃гоꙋтро́бнѡ на всѧ́кꙋю дꙋ́шꙋ вѣ́рныхъ твои́хъ чти́телей, ми́лости и҆ по́мощи твоеѧ̀ и҆́щꙋщихъ.

Є҆́й, всебл҃гі́й ᲂу҆го́дниче бж҃їй, ᲂу҆слы́ши на́съ, молѧ́щихсѧ тебѣ̀, и҆ не пре́зри на́съ, тре́бꙋющихъ твоегѡ̀ застꙋпле́нїѧ и҆ досто́йнꙋю пѣ́снь тебѣ̀ приносѧ́щихъ: тебѐ ᲂу҆блажа́емъ, ѻ҆́тче мѡѷсе́е, тѧ̀ воспѣва́емъ, чⷭ҇тоты̀ свѣти́льниче, прославлѧ́юще млⷭ҇тиваго бг҃а, во ст҃ѣ́й безнача́льнѣй трⷪ҇цѣ сла́вимагѡ: ѻ҆ц҃а̀ и҆ сн҃а и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.