Песнь 1
Ирмос
Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.
Тропарь
По́двигом, му́чениче, до́брым подвиза́вся, и вра́чь изря́ден бы́в, исцели́ боле́зни моя́, и обдержа́щий о́гнь ороше́нием твои́м отжени́, здра́вие ми́ соверше́нное подава́я.
Тропарь
Боле́зней изба́ви мя́ лю́тых, о Пантелеи́моне, и надлежа́щую ми́ не́мощь вско́ре от мене́ отжени́, и коне́чное исцеле́ние ми́ да́руй, я́ко да засту́пника вели́каго ве́рою ублажа́ю тя́.
Тропарь
Цели́телю душа́м и телесе́м, исцели́ стра́сти моя́ лю́тыя, теле́сныя же и душе́вныя, прите́кшаго, о Пантелеи́моне, под кро́в тво́й спаси́тельный, му́чениче Спа́сов, я́ко да хвала́ми ублажа́ю тя́.
Богородичен
Милосе́рда су́щи, Чи́стая, я́ко благоутро́бное Сло́во Бо́жие роди́вшая, исцели́ неду́г раба́ своего́, и ско́рую да́руй цельбу́ и здра́вие, ве́рою прося́щему твоея́ ми́лости.
Песнь 3
Ирмос
Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.
Тропарь
Разруши́в многоко́зненное мучи́тельство, страстоте́рпче, живо́т даю́щими о Христе́ по́двигами, умерщвля́ющыя стра́сти отжени́ от неду́гующаго зело́, моли́твою твое́ю.
Тропарь
Согни́вшей злы́ми по́мыслами и де́л я́звами душе́ мое́й, сла́вне, посеще́нием твои́м да́ждь исцеле́ние, и не оста́ви мене́ поги́бнути окая́ннаго, молю́ тя́.
Тропарь
Безбо́жия пе́щь угаси́л еси́ тече́нием крове́й твои́х, страстоте́рпче, те́мже ти́ молю́ся, огня́ боле́зни мя́ свободи́.
Богородичен
Низри́ну мя́ мно́жество прегреше́ний, Чи́стая, в пучи́ну неду́гов, но Сама́, Чи́стая, окорми́ мя́ к тишине́ здра́вия, Богоро́дице.
Песнь 4
Ирмос
Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ ти́: сла́ва си́ле Твое́й, Го́споди.
Тропарь
Уврачу́й неисце́льно боля́щаго мя́, безме́здный врачу́, от Бо́га дарова́ние исцеле́ний прие́мый, и не посрами́ мене́, от моего́ упова́ния с ве́рою моля́щагося ти́.
Тропарь
Умерщвля́ющыя мя́ боле́зни, Пантелеи́моне, лечба́ми твои́ми исцели́, и ко здра́вию привлецы́, я́ко да с ра́достию и весе́лием сла́влю тя́, достоблаже́нне.
Тропарь
Глаго́лы моя́ боле́зненныя услы́ши, свя́те, вопию́ ти́ ра́б тво́й, я́коже дре́вле слепа́го, исцели́, молю́ся, отча́яннаго и ко а́ду прибли́жшагося.
Богородичен
Я́ко все́х Влады́це с ве́рою ти́ мо́лимся, принеси́ моле́ние Сы́ну Твоему́ и Бо́гу на́шему, да от обдержа́щей беды́ изба́вит раба́ Твоего́, Чи́стая.
Песнь 5
Ирмос
Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.
Тропарь
Ты́ ме́ртва дре́вле воскреси́л еси́, Пантелеи́моне, та́кожде помози́ и сему́ рабу́ твоему́, мо́лимся ти́, и соверше́нное исцеле́ние тому́ вско́ре да́руй.
Тропарь
Цели́ти мно́гих неду́ги, с ве́рою к тебе́ притека́ющих, та́кожде и мене́ исцели́, и не посрами́ моего́ упова́ния, не постыди́ мя́, му́чениче Пантелеи́моне.
Тропарь
Исто́чник сы́й мно́гих даро́в Ду́ха, Пантелеи́моне, утоли́ го́ресть боле́зни моея́, и исцели́, блаже́нне, лю́те разсла́бленнаго.
Богородичен
Я́ко о́гнь снеда́ет мя́, Пречи́стая Влады́чице, неду́г, от него́же изба́ви мя́, и спаси́ мольба́ми Твои́ми, я́ко Жи́знь все́х неизрече́нно ро́ждшая.
Песнь 6
Ирмос
В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.
Тропарь
Блаже́нных наде́жд получи́в дарова́ние, и мою́ наде́жду испо́лни, внеза́пу спаси́ мя́ от обдержа́щия мя́ сме́ртныя боле́зни, Пантелеи́моне.
Тропарь
Мо́ре обурева́ет мя́ неду́гов, приста́нище тя́ ти́хое яви́ ми́, свя́те, твою́ спаси́тельную по́мощь низпосла́в, вопие́т ти́ ра́б тво́й.
Тропарь
Уны́ния, блаже́нне, ражже́ния и пренемога́ния тяготу́ облегчи́ к твоему́ заступле́нию притека́ющаго, Пантелеи́моне.
Богородичен
Те́плую Твою́, Пречи́стая, по́мощь одожди́ рабу́ Твоему́, лю́те горя́щу грехи́, и теле́сными неду́ги одержи́му, Препе́тая.
Песнь 7
Ирмос
Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.
Тропарь
Пребы́л еси́ неподви́жим во вре́мя муче́ния, Пантелеи́моне, те́мже лю́те одержи́маго лю́тыми боле́зньми, и бе́дствующа исцели́ раба́ твоего́, да ве́рою сла́вит заступле́ние твое́.
Тропарь
Ми́лостию ви́дев тя́ богатя́щася Бо́г многоми́лостивый, му́дре Пантелеи́моне, благода́ть ти́ дарова́ подава́ти исцеле́ния; те́мже ти́ молю́ся приле́жно, ума́ моего́ неду́ги исцели́.
Тропарь
У́зы врага́ злоде́я духо́вным ору́жием, му́дре, расто́ргл еси́, те́мже мо́лимся ти́: неду́гом свя́зана и бе́дствующа исцели́ боля́щаго, да при́сно почита́ем заступле́ние твое́.
Богородичен
Исцели́ сокруше́ние челове́ческое, Пречи́стая, ро́ждшая Бо́га неизрече́нно, Того́ у́бо моли́, я́ко Преблага́го, исцеле́ние ми́ пода́ти, Де́во, рабу́ Твоему́, лю́те стра́ждущему.
Песнь 8
Ирмос
Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.
Тропарь
Да́н бы́л еси́ ве́рным огражде́ние, стена́ и врачевство́, свя́те, изря́дное, те́мже, моя́ я́звы душе́вныя, му́дре, исцели́, и облегчи́ боле́зни теле́сныя, Пантелеи́моне, лю́те обдержа́щия мя́.
Тропарь
К твоему́ ми́лостивому покро́ву притека́ющим отъе́млеши вся́ку боле́знь, и ны́не посети́ прибега́юща с ве́рою к тебе́, свя́те, раба́ твоего́, и изба́ви многообра́зных неду́г.
Богородичен
Напра́ви, Чи́стая, к приста́нищу здра́вия неду́гом бе́дствующа, и во глубину́ погружа́ема, и не да́ждь поги́бнути ми́, Боже́ственной по́мощи твое́й любо́вию и́щуща, е́ю же ве́рныя спаса́ются.
Песнь 9
Ирмос
Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.
Тропарь
Я́ко све́т, я́ко со́лнце возсия́л еси́, блаже́нне, луча́ми исцеле́ний все́х просвеща́я, те́мже с ве́рою мо́лимся ти́: от неду́г и тя́жкия тмы́ вско́ре изба́ви лю́те обурева́емаго.
Тропарь
Тебе́ ны́не мо́лим, святы́й Пантелеи́моне, тебе́ припа́даем и те́пле мо́лимся, сме́ртною боле́знию одержи́маго от наве́та лю́тых неду́г посети́в исцели́, да любо́вию ублажа́ет тя́.
Тропарь
Де́нь возсия́й здра́вия рабу́ твоему́, лежа́щему в нощи́ лю́таго неду́га, да благода́рственным се́рдцем прии́дет в честны́й ти́ хра́м, твою́ испове́дуя благода́ть, Пантелеи́моне.
Богородичен
Блага́я Влады́чице! Ма́нием Твои́м милосе́рдым приосени́ огорче́ннаго мя́ грехи́ мно́гими, и обдержа́щей мя́ боле́зни и не́мощей изба́ви, да благода́рственно ублажа́ю Тя́, Влады́чице, ю́же по достоя́нию блажа́т вси́ ро́ди.