Православный календарь
Размер шрифта:

Ака́ѳістъ

А҆ка́ѳїстъ прпⷣбномꙋ ге́рманꙋ а҆лѧ́скинскомꙋ.

Прп. Германа Аляскинского (1837) 9 августа 2026

Конда́къ а҃

И҆збра́нный чꙋдотво́рче и҆ пресла́вный ᲂу҆го́дниче хрⷭ҇то́въ, бг҃оно́сне ѻ҆́тче на́шъ ге́рмане, а҆лѧ́ски ᲂу҆краше́нїе и҆ цр҃кве правосла́вныѧ ра́дованїе, воспѣва́емъ тѝ похвалы̑ сїѧ̑. Ты́ же, ꙗ҆́кѡ нбⷭ҇ный на́шъ покрови́тель и҆ всемо́щный пред̾ бг҃омъ мл҃твенникъ, не преста́й хода́тайствовати ѡ҆ на́съ, ча́дѣхъ твои́хъ, ᲂу҆се́рднѡ тебѣ̀ вопїю́щихъ:

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

І҆́косъ а҃

А҆́гг҃лѡвъ творе́цъ пред̾избра́ тѧ, ѻ҆́тче ге́рмане, проповѣ́дникомъ бы́ти правосла́вныѧ вѣ́ры въ землѧ́хъ но́выхъ и҆ посла́ тѧ, ꙗ҆́кѡ бл҃говѣ́стника, ко ꙗ҆зы́чникѡмъ, да возсїѧ́етъ и҆̀мъ свѣ́тъ и҆́стины. Бл҃года́рнїи же лю́дїе воспѣва́ютъ тебѣ̀, ꙗ҆́кѡ нбⷭ҇номꙋ покрови́телю, похвалы̑ сїѧ̑:

Ра́дꙋйсѧ, пꙋсты́нею саро́вскою и҆здѣ́тска взраще́нный: ра́дꙋйсѧ, валаа́мскїѧ ѻ҆би́тели ѻ҆́трасле пречтⷭ҇на́ѧ.

Ра́дꙋйсѧ, пꙋсты́нное ᲂу҆едине́нїе возлюби́вый: ра́дꙋйсѧ, бж҃їею мт҃рїю ѿ сме́рти сп҃се́нный.

Ра́дꙋйсѧ, а҆пⷭ҇лѡвъ послѣ́дователю: ра́дꙋйсѧ, свѣ́тъ и҆́стинныѧ вѣ́ры во а҆ме́рикꙋ принесы́й.

Ра́дꙋйсѧ, ѳавѡ́рскимъ свѣ́томъ ѡ҆заре́нный: ра́дꙋйсѧ, тьмꙋ̀ і҆дѡлослꙋже́нїѧ хрⷭ҇то́мъ просвѣти́вый.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ в҃

Ви́дѧ гдⷭ҇ь пла́меннꙋю любо́вь твою̀, є҆́юже ѿ ю҆́ности возгорѣ́сѧ, прпⷣбне, во ѻ҆би́тель саро́вскꙋю є҆мꙋ̀ є҆ди́номꙋ послꙋжи́ти приведе́ тѧ, послѣди́ же на ѻ҆́стровъ валаа́мскїй пꙋ́ть тво́й ᲂу҆пра́ви, и҆дѣ́же въ со́нмѣ и҆́нокѡвъ ты̀ воспѣва́лъ є҆сѝ неꙋста́ннѡ: А҆ллилꙋ́їа.

І҆́косъ в҃

Ра́зꙋмъ дꙋхо́вный тебѣ̀ ѿ ю҆́ности дарова́сѧ, ст҃че бж҃їй, да ᲂу҆разꙋмѣ́еши красотꙋ̀ нбⷭ҇нꙋю и҆ сла́дость є҆ѧ̀. Сегѡ̀ ра́ди ѿ премꙋ́драгѡ и҆гꙋ́мена наза́рїа, наста́вника прпⷣбнагѡ серафі́ма саро́вскагѡ, поꙋча́лсѧ є҆сѝ премꙋ́дрости бж҃їей и҆ пꙋтє́мъ гдⷭ҇нимъ, тѣ́мже ст҃а́ѧ цр҃ковь восхвалѧ́етъ тѧ̀:

Ра́дꙋйсѧ, въ де́брехъ саро́вскихъ ста́рцꙋ пꙋсты́нникꙋ послꙋжи́вый: ра́дꙋйсѧ, съ прпⷣбнымъ серафі́момъ є҆ди́наго наста́вника и҆мѣ́вый.

Ра́дꙋйсѧ, ꙗ҆́кѡ пчела̀, ѿ вели́кагѡ ѳео́дѡра дꙋхо́вный некта́ръ въ санаѯа́рѣ собра́вый: ра́дꙋйсѧ, во пресла́внꙋю ѻ҆би́тель валаа́мскꙋю на по́двиги прише́дый.

Ра́дꙋйсѧ, ꙗ҆́кѡ тезоимени́томꙋ тебѣ̀ ге́рманꙋ, первонача́льникꙋ валаа́мскомꙋ, ст҃остїю ᲂу҆подо́билсѧ є҆сѝ: ра́дꙋйсѧ, ꙗ҆́кѡ по́двиги пꙋстынножи́тєльскїѧ под̾ѧ́лъ є҆сѝ.

Ра́дꙋйсѧ, за кро́тость и҆ ти́хость бра́тїею валаа́мскою почита́емый: ра́дꙋйсѧ, ны́нѣ все́ю цр҃ковїю прославлѧ́емый.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ г҃

Си́ла вы́шнѧгѡ повелѣ̀ бг҃омꙋ́дромꙋ петро́ва гра́да ст҃и́телю гаврїи́лꙋ посла́ти проповѣ́дники правосла́вныѧ вѣ́ры въ зе́млю а҆лѧ́скинскꙋю и҆ тебѣ̀, прпⷣбне ге́рмане, се́й жре́бїй а҆пⷭ҇льскїй прїѧ́ти. Тѣ́мже всѝ лю́дїе, просвѣще́ннїи свѣ́томъ хрⷭ҇то́вымъ трꙋды̑ твои́ми и҆ ѻ҆́бразомъ житїѧ̀ твоегѡ̀, воспѣ́ша бг҃ꙋ: А҆ллилꙋ́їа.

І҆́косъ г҃

И҆мѣ́ѧ не то́кмѡ тща́нїе ѡ҆ по́двизѣ и҆́ночестѣмъ, но и҆ ре́вность а҆пⷭ҇льскꙋю въ проповѣ́данїи, ты̀, прпⷣбне ге́рмане, лю́демъ, во тьмѣ̀ ꙗ҆зы́ческагѡ невѣ́дѣнїѧ сѣдѧ́щымъ, хрⷭ҇та̀ распѧ́таго и҆ воскрⷭ҇шаго возвѣсти́лъ є҆сѝ. Помина́юще ᲂу҆́бѡ и҆́ночєскаѧ бдѣ̑нїѧ твоѧ̑ и҆ трꙋды̀ а҆пⷭ҇льскїѧ, съ любо́вїю восхвалѧ́емъ тѧ̀:

Ра́дꙋйсѧ, безро́потное послꙋша́нїе и҆гꙋ́менꙋ ꙗ҆ви́вый: ра́дꙋйсѧ, въ пꙋ́ть да́льнїй про́повѣди ра́ди є҆ѵⷢ҇льскїѧ ѿше́дый.

Ра́дꙋйсѧ, любвѐ ко ѻ҆те́чествꙋ не ᲂу҆гаси́вый: ра́дꙋйсѧ, но́вое твоѐ ѻ҆те́чество пла́меннѣ возлюби́вый.

Ра́дꙋйсѧ, и҆́ноческагѡ житїѧ̀ во а҆ме́рицѣ первонача́льниче: ра́дꙋйсѧ, правосла́вныѧ вѣ́ры ре́вностный проповѣ́дниче.

Ра́дꙋйсѧ, ѻ҆́бразе прпⷣбныхъ ѻ҆би́тели ла́дожскїѧ: ра́дꙋйсѧ, сѣ́верныѧ ѳиваі́ды ѻ҆́трасле, во а҆лѧ́скѣ процвѣты́й.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ д҃

Бꙋ́рю ѕлы́хъ напа́стей и҆ скорбе́й претерпѣ́лъ є҆сѝ, прпⷣбне, и҆ по́двигомъ до́брымъ во странѣ̀ но́вѣй подвиза́лсѧ є҆сѝ, сегѡ̀ ра́ди и҆ хрⷭ҇то́съ тѧ̀ просла́ви и҆ да́ромъ прозрѣ́нїѧ и҆ чꙋде́съ ѡ҆богатѝ и҆ дарова̀ тебѣ̀ црⷭ҇тво нбⷭ҇ное, и҆дѣ́же ты̀ со а҆́гг҃лы воспѣва́еши бг҃ꙋ: А҆ллилꙋ́їа.

І҆́косъ д҃

Слы́шаще ѡ҆ чꙋдесѣ́хъ твои́хъ, лю́демъ ꙗ҆вле́нныхъ, є҆гда̀ ѻ҆́гненное запале́нїе и҆ наводне́нїе гꙋби́тельное ты̀ ѡ҆станови́лъ є҆сѝ мл҃твою свое́ю, всѝ лю́дїе ᲂу҆милѧ́хꙋсѧ се́рдцемъ. Мо́лимъ тѧ̀ и҆ на́мъ ꙗ҆ви́ти си́лꙋ твою̀ и҆ по́мощь, къ тебѣ̀ вопїю́щымъ:

Ра́дꙋйсѧ, бг҃опроповѣ́дниче, ре́вностїю твое́ю на́съ вдохновлѧ́ѧй: ра́дꙋйсѧ, бг҃олю́бче, сердца̀ на̑ша ра́достїю и҆сполнѧ́ѧй.

Ра́дꙋйсѧ, за всѣ́хъ ᲂу҆ныва́ющихъ те́плый мл҃твенниче: ра́дꙋйсѧ, дꙋ́шъ смѧте́нныхъ пресла́достный ᲂу҆мири́телю.

Ра́дꙋйсѧ, ꙗ҆́кѡ смире́нїемъ твои́мъ подае́ши стра́ждꙋщымъ и҆сцѣле́нїе: ра́дꙋйсѧ, ꙗ҆́кѡ кро́тостїю твое́ю ѡ҆крылѧ́еши дꙋ́шы на́шѧ во є҆́же созерца́ти гѡ́рнѧѧ.

Ра́дꙋйсѧ, тве́рдый вразꙋми́телю всѣ́хъ ѿше́дшихъ ѿ правосла́вїѧ: ра́дꙋйсѧ, любо́вїю твое́ю направлѧ́ѧй на́съ на пꙋ́ть пра́вый.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ є҃

Ꙗ҆́кѡ ѕвѣзда̀ во странѣ̀ полꙋ́нощнѣй возсїѧ́лъ є҆сѝ, прпⷣбне, на ѻ҆́стровѣ є҆ло́вѣмъ, но́вый валаа́мъ нарече́ннѣмъ, да ѡ҆зари́ши свѣ́томъ любвѐ твоеѧ̀ и҆ бг҃омо́щною мл҃твою твое́ю всю̀ зе́млю а҆мерика́нскꙋю, да со всѣ́хъ концє́въ є҆ѧ̀ лю́дїе правосла́внїи воспою́тъ те́плѣ бг҃ꙋ: А҆ллилꙋ́їа.

І҆́косъ є҃

Ви́дѧще смире́нїе твоѐ, ѻ҆́тче на́шъ ге́рмане, всѝ дивлѧ́хꙋсѧ ѕѣлѡ̀, ка́кѡ ты̀, прпⷣбномꙋ а҆нтѡ́нїю пече́рскомꙋ, первонача́льникꙋ мона́шества на рꙋсѝ, подража́ѧ, восхотѣ́лъ є҆сѝ просты́мъ и҆́нокомъ бы́ти и҆ по вели́комꙋ смире́нїю твоемꙋ̀ ѿ слꙋже́нїѧ сщ҃е́нническагѡ ѿре́клсѧ є҆сѝ. Сегѡ̀ ра́ди взыва́емъ тѝ такова̑ѧ:

Ра́дꙋйсѧ, первонача́льниче мона́шества во а҆ме́рицѣ: ра́дꙋйсѧ, смире́нїемъ нбⷭ҇нагѡ ѻ҆те́чества дости́гнꙋвый.

Ра́дꙋйсѧ, нбⷭ҇ною сла́вою ᲂу҆вѣнча́нный: ра́дꙋйсѧ, ѻ҆би́тель на мѣ́стѣ по́двигѡвъ твои́хъ предрекі́й.

Ра́дꙋйсѧ, мо́щи твоѧ̑ предрече́нной ѻ҆би́тели дарова́вый: ра́дꙋйсѧ, и҆сто́чникъ чꙋде́съ ѿ ни́хъ мі́рꙋ ꙗ҆ви́вый.

Ра́дꙋйсѧ, защи́тниче те́плый бра́тїи, тобо́ю собира́емыѧ: ра́дꙋйсѧ, и҆́нокѡмъ во́ждь ве́лїй на бра́ни неви́димой.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ ѕ҃

Проповѣ́дꙋетъ пꙋсты́нѧ сѣ́вернаѧ по́двиги и҆ чꙋдеса̀ твоѧ̑, прпⷣбне, и҆ тѧ̀, ꙗ҆́кѡ но́вꙋю вѣ́твь вїногра́дника цр҃кве рꙋ́сскїѧ, на землѝ а҆мерика́нстѣй прозѧ́бшꙋю, прославлѧ́етъ. Ты́ бо дє́бри а҆лѧ́ски и҆ лѣса̀ є҆ѧ̀ мл҃твою твое́ю ѡ҆бл҃гоꙋха́лъ є҆сѝ, и҆ подви́жникѡмъ дрє́внимъ подража́ѧ, въ безмо́лвїи нощнѣ́мъ взыва́лъ є҆сѝ къ бг҃ꙋ: А҆ллилꙋ́їа.

І҆́косъ ѕ҃

Просвѣти́вый люде́й, во тьмѣ̀ ꙗ҆зы́честѣй пребыва́ющихъ, и҆ ѻ҆́бразъ подви́жническагѡ житїѧ̀ си́мъ показа́вый, моли́сѧ ѡ҆ всѣ́хъ на́съ, бг҃оно́сне ѻ҆́тче на́шъ ге́рмане, да и҆ мы̀, бл҃годарѧ́ще гдⷭ҇а за млⷭ҇ть є҆гѡ̀, на́мъ ꙗ҆вле́ннꙋю, непреста́ннѡ воспѣва́емъ тѝ похва̑льныѧ сїѧ̑ глаго́лы:

Ра́дꙋйсѧ, прест҃ы́ѧ трⷪ҇цы слꙋжи́телю вѣ́рный: ра́дꙋйсѧ, пꙋсты́ни є҆ло́выѧ подви́жниче ᲂу҆се́рдный.

Ра́дꙋйсѧ, щи́тъ вѣ́ры живы́ѧ и҆ разꙋ́мныѧ всѣ̑мъ подава́ѧй: ра́дꙋйсѧ, тьмꙋ̀ свѣ́томъ є҆ѵⷢ҇льскимъ просвѣща́ѧй.

Ра́дꙋйсѧ, ꙗ҆́кѡ сꙋетꙋ̀ и҆ ᲂу҆ны́нїе бг҃омы́слїемъ ѿгна́лъ є҆сѝ: ра́дꙋйсѧ, ꙗ҆́кѡ ᲂу҆бо́га себѐ и҆менꙋ́ѧ, смире́нїю всѣ́хъ поꙋча́лъ є҆сѝ.

Ра́дꙋйсѧ, сердца̀ на̑ша ра́достїю твое́ю и҆спо́лнивый: ра́дꙋйсѧ, наде́ждою бл҃го́ю на́съ ᲂу҆крѣпи́вый.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ з҃

Хотѧ́й возсїѧ́ти свѣ́тꙋ бг҃опозна́нїѧ во странѣ̀ ꙗ҆зы́честѣй, бл҃говолѝ гдⷭ҇ь сѣ́ѧти сѣ́мена вѣ́ры правосла́вныѧ и҆ повелѣ̀ тебѣ̀, прпⷣбне, да всѣ́хъ наꙋчи́ши вѣ́рѣ и҆́стиннѣй и҆ защити́ши ю҆̀. Ты́ же, ꙗ҆́кѡ па́стырь безстра́шный ма́ломꙋ ста́дꙋ є҆ѵⷢ҇льски взыва́еши, да не ᲂу҆бои́мсѧ, ꙗ҆́кѡ ѡ҆бѣтова́но є҆́сть на́мъ нбⷭ҇ное црⷭ҇твїе, тѣ́мже наꙋче́ннїи тобо́ю, ра́достнѣ пое́мъ: А҆ллилꙋ́їа.

І҆́косъ з҃

Ди́внѡ въ вы́шнихъ мл҃твеннѡ пребыва́лъ є҆сѝ, прпⷣбне, но и҆ въ ни́жнихъ на землѝ сꙋ́щихъ не забыва́лъ є҆сѝ, наипа́че же ѡ҆ сирота́хъ ве́лїе попече́нїе ꙗ҆ви́лъ є҆сѝ, ᲂу҆строѧ́ѧ прїю́тъ и҆̀мъ и҆ ᲂу҆чи́лище, и҆дѣ́же за́повѣдемъ гдⷭ҇нимъ поꙋча́лъ є҆сѝ и҆̀хъ. Си́хъ ра́ди трꙋдѡ́въ твои́хъ прїимѝ ѿ на́съ похвалы̑ сїѧ̑:

Ра́дꙋйсѧ, ни́щихъ и҆ сиро́тъ защи́тителю: ра́дꙋйсѧ, бл҃гостный ѡ҆ ни́хъ попечи́телю.

Ра́дꙋйсѧ, ꙗ҆́кѡ стра́хꙋ бж҃їю ча̑да своѧ̑ наꙋча́лъ є҆сѝ: ра́дꙋйсѧ, ꙗ҆́кѡ живо́ю водо́ю є҆ѵⷢ҇лїа всѣ́хъ напоѧ́лъ є҆сѝ.

Ра́дꙋйсѧ, мл҃твы непреста́нныѧ ᲂу҆чи́телю: ра́дꙋйсѧ, хлѣ́бомъ нбⷭ҇нымъ и҆ земны́мъ сиропита́телю.

Ра́дꙋйсѧ, пло́ть покорѧ́ти дꙋ́хꙋ поꙋча́вый: ра́дꙋйсѧ, бг҃а всѣ́мъ се́рдцемъ люби́ти наставлѧ́вый.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ и҃

Стра́нное чꙋ́до ꙗ҆вѝ чл҃вѣколю́бецъ гдⷭ҇ь, дарова́ бо тебѣ̀, прпⷣбне, да́ръ прозрѣ́нїѧ и҆ и҆сцѣле́нїѧ ꙗ҆́кѡ и҆сто́чникъ ᲂу҆тѣше́нїѧ лю́демъ свои̑мъ. Ты́ же дѣ́лы свои́ми и҆ словесы̀ приве́лъ є҆сѝ мнѡ́гїѧ къ любвѝ бж҃їей. Тѣ́мже сїѧ́нїемъ по́двигѡвъ твои́хъ просвѣще́ннїи, лю́дїе взыва́хꙋ ко гдⷭ҇ꙋ: А҆ллилꙋ́їа.

І҆́косъ и҃

И҆збра́нъ бг҃омъ бы́лъ є҆сѝ, ѻ҆́тче прпⷣбне, тѣ́мже лю́дїе новопросвѣще́ннїи свѣ́томъ хрⷭ҇то́вы вѣ́ры притека́хꙋ къ тебѣ̀ въ болѣ́знехъ и҆ печа́лехъ. Ты́ же, ꙗ҆́кѡ ѻ҆те́цъ чадолюби́вый, предста́тельствовалъ є҆сѝ за всѣ́хъ въ мл҃твахъ, и҆сточа́ѧ и҆сцѣлє́нїѧ и҆ ᲂу҆тѣша́ѧ всѣ́хъ, къ тебѣ̀ ѡ҆ по́мощи взыва́ющихъ, тѣ́мже сла́влѧхꙋ тѧ̀ дꙋхѡ́внаѧ ча̑да твоѧ̑:

Ра́дꙋйсѧ, дꙋ́шъ смѧте́нныхъ ᲂу҆мири́телю пресла́дкїй: ра́дꙋйсѧ, врачꙋ̀ на́шъ безме́здный и҆ бл҃года́тный.

Ра́дꙋйсѧ, не́мощей на́шихъ цѣли́телю млⷭ҇рдый: ра́дꙋйсѧ, въ бѣда́хъ и҆ ѡ҆бстоѧ́нїихъ помо́щниче ско́рый.

Ра́дꙋйсѧ, лишє́ннымъ кро́ва те́плое прибѣ́жище: ра́дꙋйсѧ, ѡ҆бꙋрева́ємымъ, ꙗ҆́кѡ скала̀ мона́шескаѧ, ти́хое приста́нище.

Ра́дꙋйсѧ, грѧдꙋ̑щаѧ ꙗ҆́кѡ настоѧ̑щаѧ прови́дѣвый: ра́дꙋйсѧ, прегрѣше́нїй сокрове́нныхъ ѡ҆бличи́телю прозорли́вый.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ ѳ҃

Всегѡ̀ себѐ гдⷭ҇еви пре́далъ є҆сѝ, бл҃же́нне, тѣ́мже со а҆́гг҃лы въ пꙋсты́ни сла́достнѡ бесѣ́довалъ є҆сѝ. И҆ ны́нѣ съ ли̑ки а҆́гг҃льскими на нб҃сѣ́хъ непреста́ннѡ взыва́еши творцꙋ̀ всѣ́хъ и҆ созда́телю хвале́бное: А҆ллилꙋ́їа.

І҆́косъ ѳ҃

Вѣті̑и многовѣща́ннїи не возмо́гꙋтъ и҆счи́слити чꙋдеса̀ твоѧ̑, лю́демъ ꙗ҆влє́ннаѧ, ꙗ҆́кѡ и҆ дꙋ́си нечи́стїи по словесѝ твоемꙋ̀ ѿ люде́й стра́ждꙋщихъ и҆схожда́хꙋ. Е҆гда́ же бы́сть наводне́нїе ве́лїе, ты̀ мл҃твою свое́ю пред̾ і҆кѡ́ною бж҃їѧ мт҃ре ѡ҆станови́лъ є҆сѝ мо́ре, глаго́лѧ: да́лѣе сеѧ̀ черты̀ не пре́йдетъ вода̀. Тѣ́мже тѝ воспѣва́емъ си́це:

Ра́дꙋйсѧ, стїхі́и водны́ѧ ᲂу҆смири́телю ди́вный: ра́дꙋйсѧ, ѿ запале́нїѧ лѣсна́гѡ и҆зба́вителю пресла́вный.

Ра́дꙋйсѧ, ст҃и́телѧ і҆нноке́нтїа, въ мо́ри взыва́вшаго къ тебѣ̀, ᲂу҆слы́шавый: ра́дꙋйсѧ, по мо́рю пла́вающымъ ко́рмчїй наде́жный.

Ра́дꙋйсѧ, ꙗ҆́кѡ гнѣ́въ ѕлы́хъ люде́й ти́хостїю и҆справлѧ́лъ є҆сѝ: ра́дꙋйсѧ, ꙗ҆́кѡ ди́вное бл҃гоꙋха́нїе съ нб҃сѐ къ тебѣ̀ прибѣга́ющымъ низпосыла́лъ є҆сѝ.

Ра́дꙋйсѧ, вє́лїѧ зна́мєнїѧ при жи́зни твое́й показа́вый: ра́дꙋйсѧ, и҆ по сме́рти твое́й мнѡ́гаѧ чꙋдеса̀ ꙗ҆ви́вый.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ і҃

Сп҃си́тельнагѡ сѣ́ѧнїѧ гдⷭ҇нѧ, въ вертогра́дѣ землѝ а҆мерика́нскїѧ насажде́ннагѡ, пло́дъ кра́сный дꙋ́хомъ прови́дѧ, пѣ́снь бл҃года́рственнꙋю прест҃ѣ́й трⷪ҇цѣ посредѣ̀ пꙋсты́ни сѣ́верныѧ возноси́лъ є҆сѝ, ѻ҆́тче ст҃ы́й ге́рмане, и҆ со а҆́гг҃лы нбⷭ҇ными взыва́лъ є҆сѝ: А҆ллилꙋ́їа.

І҆́косъ і҃

Стѣна̀ є҆сѝ всѣ̑мъ, прибѣга́ющымъ къ тебѣ̀, ѻ҆́тче, ꙗ҆́кѡ въ житїѝ твое́мъ пресла̑внаѧ показа́лъ є҆сѝ и҆ при кончи́нѣ твое́й ди́вное чꙋ́до ꙗ҆ви́лъ. Лю́дїе же, ви́дѧще въ ча́съ кончи́ны твоеѧ̀ ѻ҆́гненный сто́лпъ до нб҃сѐ и҆ нетлѣ́нїе тѣлесѐ твоегѡ̀, возопи́ша тебѣ̀ такова̑ѧ:

Ра́дꙋйсѧ, првⷣною кончи́ною въ ст҃ости твое́й на́съ ᲂу҆вѣ́ривый: ра́дꙋйсѧ, ꙗ҆́кѡ восхожде́нїе твоѐ на нб҃са̀ столпо́мъ ѻ҆́гненнымъ зна́менасѧ.

Ра́дꙋйсѧ, ꙗ҆́кѡ и҆ гро́бъ тво́й недꙋ̑жнымъ и҆сцѣлє́нїѧ и҆сточа́ше: ра́дꙋйсѧ, мо́щи твоѧ̑ бл҃гоꙋха̑нныѧ въ наслѣ́дїе на́мъ ѡ҆ста́вивый.

Ра́дꙋйсѧ, ꙗ҆́кѡ ᲂу҆ ра́ки твоеѧ̀ хромі́и воста́ша и҆ гла́съ тво́й и҆з̾ гро́ба слы́шаша: ра́дꙋйсѧ, ꙗ҆́кѡ и҆сто́чникъ воды̀ ст҃ы́ѧ и҆ цѣле́бныѧ на́мъ дарова́лъ є҆сѝ.

Ра́дꙋйсѧ, ꙗ҆́кѡ ста́рцꙋ гера́сїмꙋ ꙗ҆ви́лсѧ є҆сѝ, на є҆ло́вый ѻ҆́стровъ того̀ призыва́ѧй: ра́дꙋйсѧ, та́инственнѡ, ꙗ҆́кѡ живы́й, на ѻ҆́стровѣ се́мъ пребыва́ѧй.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ а҃і

Пѣ́нїе хвале́бное тебѣ̀ прино́симъ, ѻ҆́тче прпⷣбне, ѡ҆ првⷣнѣмъ житїѝ твое́мъ. Восхвалѧ́емъ и҆ чтⷭ҇нꙋ́ю кончи́нꙋ твою̀, ꙗ҆́кѡ пред̾ꙋзна́лъ є҆сѝ ча́съ преставле́нїѧ своегѡ̀, ᲂу҆чени́къ же тво́й гера́сїмъ ѡ҆бонѧ́лъ є҆́сть бл҃гоꙋха́нїе ди́вное въ ча́съ то́й. Пресла́внѡ бы́сть и҆ погребе́нїе твоѐ, є҆гда̀ и҆спо́лнисѧ предрече́нное тобо́ю. Мы́ же воспѣва́емъ чꙋдодѣ́ющемꙋ бг҃ꙋ: А҆ллилꙋ́їа.

І҆́косъ а҃і

Свѣтопода́тельный свѣти́льникъ бы́лъ є҆сѝ всемꙋ̀ и҆́ноческомꙋ чи́нꙋ да́льнїѧ а҆ме́рики, прпⷣбне ѻ҆́тче на́шъ ге́рмане, наꙋча́ѧ по́двигꙋ, защища́ѧ ѿ напа́стей, хода́тайствꙋѧ ѡ҆ ни́хъ и҆ глаго́лѧ: не въ морски́хъ то́кмѡ волна́хъ ѡ҆бꙋрева́емсѧ, но средѝ преле́стнагѡ и҆ многомѧте́жнагѡ мі́ра стра́ждемъ и҆ скита́емсѧ, ѻ҆ба́че къ нбⷭ҇номꙋ на́шемꙋ ѻ҆те́чествꙋ грѧде́мъ. Сегѡ̀ ра́ди вопїе́мъ тѝ:

Ра́дꙋйсѧ, вѣ́рный сподви́жниче і҆ѡаса́фа, пе́рвагѡ є҆пⷭ҇кпа рꙋ́сскїѧ а҆ме́рики: ра́дꙋйсѧ, свидѣ́телю ре́вности і҆ꙋвена́лїевы да́же до сме́рти.

Ра́дꙋйсѧ, а҆леꙋ́та петра̀ пронарекі́й новомч҃нка: ра́дꙋйсѧ, предви́дѣвый ст҃и́тельство і҆нноке́нтїа въ землѝ а҆леꙋ́тстѣй.

Ра́дꙋйсѧ, ᲂу҆ченикꙋ̀ своемꙋ̀ се́ргїю ѻ҆́бразъ и҆́ноческагѡ житїѧ̀ показа́вый: ра́дꙋйсѧ, и҆́нока гера́сїма на но́вый валаа́мъ чꙋде́снѡ призва́вый.

Ра́дꙋйсѧ, на рꙋсѝ, безбо́жїемъ плѣне́ннѣй, а҆дрїа́на пресвѵ́тера ѿ темни́цы ѡ҆гради́вый: ра́дꙋйсѧ, ст҃и́телѧ і҆ѡа́нна тебѐ просла́вити подви́гнꙋвый.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ в҃і

Бл҃года́ти и҆спо́лнена вѣ́дꙋще тѧ̀, прпⷣбне ѻ҆́тче, про́симъ: моли́сѧ те́плѣ ко гдⷭ҇ꙋ, да ѡ҆гради́тъ цр҃ковь свою̀ ст҃ꙋ́ю ѿ дꙋ́ха мі́ра сегѡ̀, вою́ющагѡ на сынѡ́въ є҆ѧ̀ невѣ́рїемъ и҆ ѿвраща́ющагѡ ѿ бг҃одарова́нныѧ жи́зни, дабы̀ восходи́ти на́мъ ѿ землѝ на нб҃о и҆ воспѣва́ти бг҃ꙋ: А҆ллилꙋ́їа.

І҆́косъ в҃і

Пою́ще твоѐ прославле́нїе, прпⷣбне, ᲂу҆бл҃жа́емъ тѧ̀, ꙗ҆́кѡ многомо́щна мл҃твенника и҆ предста́телѧ на́шего. Ты́ же, стѧжа́вый дх҃а ст҃а́го и҆ тѣ́мъ просвѣти́вый лю́ди землѝ а҆мерика́нскїѧ, ᲂу҆слы́ши на́съ, вопїю́щихъ къ тебѣ̀ такова̑ѧ:

Ра́дꙋйсѧ, мл҃твꙋ чи́стꙋю и҆ теплотꙋ̀ серде́чнꙋю стѧжа́вый: ра́дꙋйсѧ, сле́зъ твои́хъ тече́ньми пꙋсты́ни безпло́дное воздѣ́лавый.

Ра́дꙋйсѧ, ꙗ҆́кѡ се́рдце твоѐ бы́сть бл҃года́ти бж҃їѧ и҆спо́лнено: ра́дꙋйсѧ, свѣ́томъ сокрове́ннымъ ѡ҆сїѧ́нный.

Ра́дꙋйсѧ, ᲂу҆мо́мъ ѡ҆чище́ннымъ та̑йны бжⷭ҇твєнныѧ созерца́вый: ра́дꙋйсѧ, тишины̀ и҆ ми́ра по́мыслѡвъ дости́гнꙋвый.

Ра́дꙋйсѧ, сердца̀ дх҃омъ ст҃ы́мъ просвѣща́ѧй: ра́дꙋйсѧ, соверше́нство ѡ҆брѣты́й и҆ на́съ къ семꙋ̀ призыва́ѧй.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ г҃і

Ѽ пресла́вный ᲂу҆го́дниче бж҃їй, прпⷣбне и҆ бг҃оно́сне ѻ҆́тче на́шъ ге́рмане, прїимѝ ма́лое сїѐ моле́нїе на́ше, въ похвалꙋ̀ тебѣ̀ возноси́мое, и҆ предстоѧ̀ ны́нѣ прⷭ҇то́лꙋ гдⷭ҇а вседержи́телѧ, непреста́ннѡ моли́сѧ ѡ҆ на́съ, ча́дѣхъ твои́хъ, да пребыва́юще въ любвѝ и҆ є҆диномы́слїи, навы́кнемъ всегда̀ твори́ти во́лю бж҃їю по сло́вꙋ твоемꙋ̀: ѿ сегѡ̀ днѐ, ѿ сегѡ̀ часа̀ да бꙋ́демъ люби́ти бг҃а превы́ше всегѡ̀ и҆ твори́ти ст҃ꙋ́ю во́лю є҆гѡ̀. и҆ кꙋ́пнѡ съ тобо́ю сподо́бимсѧ воспѣва́ти хвале́бнꙋю пѣ́снь: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ пред̾избра́ тѧ, ѻ҆́тче ге́рмане, проповѣ́дникомъ бы́ти правосла́вныѧ вѣ́ры въ землѧ́хъ но́выхъ и҆ посла́ тѧ, ꙗ҆́кѡ бл҃говѣ́стника, ко ꙗ҆зы́чникѡмъ, да возсїѧ́етъ и҆̀мъ свѣ́тъ и҆́стины. Бл҃года́рнїи же лю́дїе воспѣва́ютъ тебѣ̀, ꙗ҆́кѡ нбⷭ҇номꙋ покрови́телю, похвалы̑ сїѧ̑:

Ра́дꙋйсѧ, пꙋсты́нею саро́вскою и҆здѣ́тска взраще́нный: ра́дꙋйсѧ, валаа́мскїѧ ѻ҆би́тели ѻ҆́трасле пречтⷭ҇на́ѧ.

Ра́дꙋйсѧ, пꙋсты́нное ᲂу҆едине́нїе возлюби́вый: ра́дꙋйсѧ, бж҃їею мт҃рїю ѿ сме́рти сп҃се́нный.

Ра́дꙋйсѧ, а҆пⷭ҇лѡвъ послѣ́дователю: ра́дꙋйсѧ, свѣ́тъ и҆́стинныѧ вѣ́ры во а҆ме́рикꙋ принесы́й.

Ра́дꙋйсѧ, ѳавѡ́рскимъ свѣ́томъ ѡ҆заре́нный: ра́дꙋйсѧ, тьмꙋ̀ і҆дѡлослꙋже́нїѧ хрⷭ҇то́мъ просвѣти́вый.

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Конда́къ а҃

И҆збра́нный чꙋдотво́рче и҆ пресла́вный ᲂу҆го́дниче хрⷭ҇то́въ, бг҃оно́сне ѻ҆́тче на́шъ ге́рмане, а҆лѧ́ски ᲂу҆краше́нїе и҆ цр҃кве правосла́вныѧ ра́дованїе, воспѣва́емъ тѝ похвалы̑ сїѧ̑. Ты́ же, ꙗ҆́кѡ нбⷭ҇ный на́шъ покрови́тель и҆ всемо́щный пред̾ бг҃омъ мл҃твенникъ, не преста́й хода́тайствовати ѡ҆ на́съ, ча́дѣхъ твои́хъ, ᲂу҆се́рднѡ тебѣ̀ вопїю́щихъ:

Ра́дꙋйсѧ, прпⷣбне ѻ҆́тче на́шъ ге́рмане, пресла́вный чꙋдотво́рче.

Моли́твы

Ѽ преди́вный ᲂу҆го́дниче бж҃їй, прпⷣбне ѻ҆́тче на́шъ ге́рмане, ты̀ по́двигомъ до́брымъ подвиза́лсѧ є҆сѝ, хла́дъ и҆ и҆ны̑ѧ тѧготы̑ въ землѝ а҆леꙋ́тстѣй претерпѣ́лъ є҆сѝ. Ны́нѣ же и҆спо́лнисѧ сло́во гдⷭ҇не на тебѣ̀, въ ма́лѣмъ вѣ́рнымъ є҆мꙋ̀ бы́вшемъ, тѣ́мже и҆ поста́ви тѧ̀ гдⷭ҇ь ꙗ҆́кѡ нбⷭ҇наго покрови́телѧ цр҃кве а҆мерика́нскїѧ. Мы́ же всѝ взыва́емъ тѝ те́плою мл҃твою: моли́сѧ за цр҃ковь на́шꙋ ст҃ꙋ́ю, да ѡ҆гради́тъ ю҆̀ гдⷭ҇ь ѿ те́мныхъ си́лъ вра́жїихъ, на́съ да сохрани́тъ въ чистотѣ̀ и҆ бл҃гоче́стїи, да ᲂу҆тверди́тъ въ вѣ́рѣ крѣ́пкой и҆ несꙋмнѣ́нной. И҆ и҆спросѝ всѣ̑мъ на́мъ дꙋ́ха ми́ра и҆ любвѐ, дꙋ́ха кро́тости и҆ смире́нїѧ, горды́ни ѿгна́нїе, ѿ самопревозноше́нїѧ ѡ҆гражде́нїе, болѧ́щымъ по́мощь и҆ и҆сцѣле́нїе, скорбѧ́щымъ ᲂу҆тѣше́нїе, а҆́лчꙋщымъ пра́вды дꙋхо́вныѧ пи́щꙋ нбⷭ҇нꙋю. Да ᲂу҆лꙋчи́вше жела́ємаѧ, ѡ҆брѧ́щемъ пра́ведное воздаѧ́нїе въ де́нь стра́шнагѡ сꙋда̀ и҆ со всѣ́ми ст҃ы́ми воспое́мъ и҆ просла́вимъ живонача́льнꙋю трⷪ҇цꙋ, ѻ҆ц҃а̀ непостижи́маго, и҆́стиннаго и҆ є҆диноро́днаго сн҃а и҆ ст҃а́го ᲂу҆тѣ́шителѧ дх҃а, во вѣ́ки. А҆ми́нь.