Песнь 1
Ирмос
Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Тропарь
Я́ко послу́шник, смире́ния испо́лненный, прия́л еси́ блаже́нный пу́ть Христо́в, ми́ра сего́ зла́ избежа́в. Блаже́ни ни́щии ду́хом, я́ко те́х е́сть Ца́рство Небе́сное.
Тропарь
Нищету́ духо́вную напо́лнил еси́ душепита́тельным бога́тством и́стины ева́нгельския. Блаже́ни ни́щии ду́хом, я́ко те́х е́сть Ца́рство Небе́сное.
Тропарь
Многоце́нный же́мчуг Ца́рства Небе́снаго, я́ко да́р Христо́в, взыска́л еси́, преподо́бне о́тче Ге́рмане. Блаже́ни ни́щии ду́хом, я́ко те́х е́сть Ца́рство Небе́сное.
Тропарь
Воспои́м пе́снь Христу́ Изба́вителю вку́пе с преподо́бным Ге́рманом, благодаря́ще о да́ре бла́зем Ца́рствия Его́. Блаже́ни ни́щии ду́хом, я́ко те́х е́сть Ца́рство Небе́сное.
Богородичен
Пресвята́я Де́во, помози́ на́м на стези́ пра́вей стоя́ти, да велича́ем и сла́вим Тя́, Христа́ Спа́са на́шего ро́ждшую.
Песнь 3
Ирмос
Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.
Тропарь
Покая́ния сле́зы пла́мень грехо́вный утиша́ют. Блаже́ни пла́чущии, я́ко ти́и уте́шатся.
Тропарь
Сле́зы пролива́я о лю́дех, грехо́м преслуша́ния плене́нных, утеше́ние иска́л еси́ у Христа́. Блаже́ни пла́чущии, я́ко ти́и уте́шатся.
Тропарь
Притеце́м ко Го́споду, утеше́ния и́щуще в любви́ Его́ всеми́лостивей к челове́ку па́дшему и ка́ющемуся. Блаже́ни пла́чущии, я́ко ти́и уте́шатся.
Тропарь
Пред гони́тели хода́тайствовал еси́ о лю́дех гони́мых и му́чимых, Христо́с бо Еди́ный сле́зы покая́ния утира́ет. Блаже́ни пла́чущии, я́ко ти́и уте́шатся.
Богородичен
Во́лею Отца́ Небе́снаго Сло́во Бо́жие воплоще́но бы́сть из Тебе́, Богоро́дице, да па́дшии грехо́в свободя́тся. С Небе́сными Си́лами Тя́ велича́ем.
Песнь 4
Ирмос
Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Тропарь
В тишине́ и кро́тости по́т лица́ твоего́ проли́л еси́, плоды́ чуде́сныя в земли́ но́вей возраща́я. Блаже́ни кро́тцыи, я́ко ти́и насле́дят зе́млю.
Тропарь
В соверше́нней кро́тости пред си́льными ми́ра сего́ о но́вем ста́де твое́м предста́тельствовал еси́. Блаже́ни кро́тцыи, я́ко ти́и насле́дят зе́млю.
Тропарь
Дне́сь мо́лит тя́ но́вое ста́до твое́, преподо́бне о́тче Ге́рмане, да хода́тайствуеши пред Престо́лом Бо́жиим о пра́веднем и́х достоя́нии. Блаже́ни кро́тцыи, я́ко ти́и насле́дят зе́млю.
Богородичен
Зо́в Отца́ Небе́снаго во смире́нии прия́ла еси́, Гаврии́лом Арха́нгелом благовеще́нный, Пресвята́я Богоро́дице, с ни́м и мы́ Тебе́ возопии́м: ра́дуйся, Благода́тная, Госпо́дь с Тобо́ю.
Песнь 5
Ирмос
У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.
Тропарь
В житии́ твое́м, преподо́бне, а́лчущим и жа́ждущим пра́вды яви́лся еси́, сего́ ра́ди прославля́ем тя́ и велича́ем пра́ведно. Блаже́ни а́лчущии и жа́ждущии пра́вды, я́ко ти́и насы́тятся.
Тропарь
Учи́л еси́ все́х, пра́вды и́щущих: взыщи́те Бо́га и пра́вды Его́ превы́ше вся́ческих бла́г. Блаже́ни а́лчущии и жа́ждущии пра́вды, я́ко ти́и насы́тятся.
Тропарь
Вода́ жива́я еди́н Христо́с Госпо́дь, жа́жду души́ утоли́ти моги́й, спаси́тельныя пра́вды взыску́ющия. Блаже́ни а́лчущии и жа́ждущии пра́вды, я́ко ти́и насы́тятся.
Богородичен
Ма́ти Бо́жия, Христа́ ро́ждшая, Во́ду жи́ву, ко спасе́нию, рождество́ Твое́ прославля́юще, велича́ем Сы́на Твоего́ и Бо́га на́шего.
Песнь 6
Ирмос
Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.
Тропарь
Сле́зы сострада́ния пролива́я, ми́лости проси́л еси́ ма́лым ста́да твоего́. Блаже́ни ми́лостивии, я́ко ти́и поми́ловани бу́дут.
Тропарь
В ма́лем ми́лостив бы́л еси́, сего́ ра́ди вопие́м ти́, преподо́бне: моли́ся, о́тче Ге́рмане, да уми́лостивиши к на́м Го́спода. Блаже́ни ми́лостивии, я́ко ти́и поми́ловани бу́дут.
Тропарь
Ми́лость Бо́жию позна́л еси́ и ми́лость ко все́м яви́л еси́. Блаже́ни ми́лостивии, я́ко ти́и поми́ловани бу́дут.
Богородичен
Явле́на бы́сть ми́лость Бо́жия к ро́ду челове́ческому прише́ствием Сы́на Его́, от Де́вы Мари́и пло́ть прие́мшаго. Сего́ ра́ди вси́ Тя́, Ма́терь Бо́жию, велича́ем.
Песнь 7
Ирмос
От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Тропарь
Сосу́д Свята́го Ду́ха бы́л еси́ досто́йный вои́стинну, се́рдцем чи́стым лю́ди наставля́я к богозре́нию и богосла́вию непреста́нному. Блаже́ни чи́стии се́рдцем, я́ко ти́и Бо́га у́зрят.
Тропарь
Ра́зум тво́й ко Го́споду отве́рзл еси́, чистоту́ у́мную и серде́чную стяжа́в, вся́ призыва́я к прославле́нию Бо́га. Блаже́ни чи́стии се́рдцем, я́ко ти́и Бо́га у́зрят.
Тропарь
Проро́к избра́нный яви́лся еси́ в земли́ се́й но́вей, де́нь успе́ния твоего́ в Бо́зе предви́дев и прославле́ние гряду́щее предсказа́в. Блаже́ни чи́стии се́рдцем, я́ко ти́и Бо́га у́зрят.
Богородичен
Се́рдце чи́сто Бо́гу принесла́ еси́, воплоще́нна Сы́на Бо́жия во чре́ве понесла́ еси́, сего́ ра́ди ро́д челове́ческий ве́сь Тя́, и́стинную Богоро́дицу, велича́ет.
Песнь 8
Ирмос
Богоглаго́ливии о́троцы, в пещи́ со огне́м пла́мень попира́юще, поя́ху: благослови́те, дела́ Госпо́дня, Го́спода.
Тропарь
В зе́млю но́вую прине́сл еси́ ми́ра Ева́нгелие, во Христе́ между́ Бо́гом и людьми́ запечатле́нное. Блаже́ни миротво́рцы, я́ко ти́и сы́нове Бо́жии нареку́тся.
Тропарь
Ми́ра Ева́нгелие пропове́дал еси́, о гони́мых пред гони́тели предста́тельствуя, к житию́ пра́ведному си́х призыва́я. Блаже́ни миротво́рцы, я́ко ти́и сы́нове Бо́жии нареку́тся.
Тропарь
Преподо́бне о́тче на́ш Ге́рмане, Правосла́вием во Аме́рице препросла́вленный, не преста́й моля́ся о ста́де твое́м, прося́ у Христа́ Спа́са ми́ра ми́рови и соедине́ния все́х. Блаже́ни миротво́рцы, я́ко ти́и сы́нове Бо́жии нареку́тся.
Богородичен
Я́ко Ма́терь ми́ра, почита́ем Тя́, Богороди́тельнице, Плодо́м бо чре́ва Твоего́, Христо́м Го́сподом, примири́ на́с Себе́ Бо́г, Оте́ц на́ш Небе́сный, па́дшее естество́ на́ше возста́вив.
Песнь 9
Ирмос
Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.
Тропарь
В мона́сех иере́й Иувена́лий пе́рвый бы́сть от бра́тства твоего́ апо́стольскаго, во е́же прия́ти му́ченический вене́ц и Бо́га просла́вити, егда́ преда́ше ду́х сво́й. Блаже́ни изгна́ни пра́вды ра́ди, я́ко те́х е́сть Ца́рство Небе́сное.
Тропарь
Егда́ услы́шал еси́ о муче́нии еди́наго от ста́да твоего́, моли́тву си́це сотвори́л еси́: святы́й новому́чениче Пе́тре, моли́ Бо́га о на́с! Блаже́ни изгна́ни пра́вды ра́ди, я́ко те́х е́сть Ца́рство Небе́сное.
Тропарь
Духо́вное достоя́ние твое́, о́тче Ге́рмане, с на́ми согла́сно мо́лится о Це́ркви Святе́й в земли́ но́вей, на кро́вех му́чеников со́зданней по́двигом и же́ртвою святы́х ея́. Блаже́ни есте́, егда́ поно́сят ва́м, и иждену́т, и реку́т вся́к зо́л глаго́л, на вы́ лжу́ще Мене́ ра́ди.
Тропарь
Воста́ни с на́ми, правосла́вный собо́ре вселе́нский, почти́м и просла́вим по́двиги апо́стольския преподо́бнаго отца́ Ге́рмана с ли́ком му́ченик и святы́х, се́мя пра́вды ева́нгельския во Аме́рице посе́явших. Ра́дуйтеся и весели́теся, я́ко мзда́ ва́ша мно́га на Небесе́х.
Богородичен
От пле́мене Дави́дова, Ма́ти Бо́жия, пле́мени Ца́рствия сочета́лася еси́. Предста́тельствуй о чту́щих Тя́, непреста́нно моля́щися, да пода́ст на́м Бо́г ми́р и душа́м на́шим ве́лию ми́лость.