Православный календарь
Размер шрифта:

Ака́ѳістъ

А҆ка́ѳїстъ ст҃и́телю пїтѷрі́мꙋ, є҆пⷭ҇копꙋ тамбо́вскомꙋ, чꙋдотво́рцꙋ.

Свт. Питирима, еп. Тамбовского (1698) 10 августа 2026

Конда́къ а҃

И҆збра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, ст҃и́телю ѻ҆́ч҃е пїтѷрі́ме, всѣ̑мъ прибѣга́ющымъ къ тебѣ̀ ско́рый помо́щниче! сподо́би на́съ недосто́йными ᲂу҆сты̀ воспѣ́ти тебѣ̀ сїѧ̑ похва̑льнаѧ. ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, зовꙋ́щихъ:

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

І҆́косъ а҃

А҆́гг҃лѡмъ подража́тель и҆ человѣ́кѡвъ наста́вникъ бы́лъ є҆сѝ, ст҃и́телю ѻ҆́ч҃е пїтѷрі́ме: ѿ ю҆́ности бо возлюби́лъ є҆сѝ бжⷭ҇твенное ᲂу҆че́нїе и҆, семꙋ̀ послѣ́довавъ, до́бромꙋ житїю̀ поревнова́лъ є҆сѝ. сегѡ̀ ра́ди тебѣ̀, на нб҃сѝ и҆ на землѝ просла́вленномꙋ, вопїе́мъ си́це:

Ра́дꙋйсѧ, ѿ рожде́нїѧ твоегѡ̀ бг҃омъ и҆збра́нный: ра́дꙋйсѧ, на слꙋже́нїе а҆пⷭ҇льское призва́нный.

Ра́дꙋйсѧ, и҆збра́нїе твоѐ по́двигомъ благоче́стїѧ ѡ҆правда́вый: ра́дꙋйсѧ, ѡ҆́бразомъ житїѧ̀ твоегѡ̀ и҆ на́мъ пꙋ́ть къ нб҃сѝ показа́вый.

Ра́дꙋйсѧ, ѿ ю҆́ности и҆́го хрⷭ҇то́во возлюби́вый: ра́дꙋйсѧ, чистотꙋ̀ се́рдца твоегѡ̀ до конца̀ сохрани́вый.

Ра́дꙋйсѧ, ꙗ҆́кѡ, сегѡ̀ ра́ди, є҆щѐ сы́й на землѝ, а҆́гг҃лѡмъ ᲂу҆подо́билсѧ є҆сѝ: ра́дꙋйсѧ, ꙗ҆́кѡ, сегѡ̀ ра́ди, гдⷭ҇а сла̑вы всегда̀ зрѣ́ти сподо́билсѧ є҆сѝ.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ в҃

Ви́дѧ бл҃гопромысли́тель гдⷭ҇ь дꙋшѝ твоеѧ̀ добро́тꙋ, напра́ви по́мыслъ тво́й ко и҆ска́нїю є҆ди́нагѡ на потре́бꙋ. ты́ же, сегѡ̀ возжелѣ́въ, є҆щѐ и҆з̾ дѣ́тства навы́клъ є҆сѝ непреста́ннѡ взыва́ти къ бг҃ꙋ: А҆ллилꙋ́їа.

І҆́косъ в҃

Ра́зꙋмъ бжⷭ҇твенный и҆мы́й, всю̀ сꙋетꙋ̀ привре́менныѧ сла́сти презрѣ́лъ є҆сѝ, ѻ҆́ч҃е пїтѷрі́ме: тѣ́мже ѡ҆ста́вивъ мі́ръ и҆ всѧ̑ ꙗ҆̀же въ не́мъ, и҆змла́да прїѧ́лъ є҆сѝ ѡ҆́бразъ а҆́гг҃льскїй, всегѡ̀ себѐ ѿда́въ на слꙋже́нїе є҆ди́номꙋ гдⷭ҇ꙋ. таково́е ᲂу҆̀бо и҆зволе́нїе твоѐ восхвалѧ́юще, глаго́лемъ тѝ сицєва́ѧ:

Ра́дꙋйсѧ, ꙗ҆́кѡ пꙋ́ть пра́вый въ црⷭ҇твїе нбⷭ҇ное ѡ҆брѣ́лъ є҆сѝ: ра́дꙋйсѧ, ꙗ҆́кѡ си́мъ пꙋте́мъ невозвра́тнѡ ше́лъ є҆сѝ.

Ра́дꙋйсѧ, ꙗ҆́кѡ кра̑снаѧ мі́ра сегѡ̀ ни во что́же вмѣни́лъ є҆сѝ: ра́дꙋйсѧ, ꙗ҆́кѡ, земна̑ѧ ѿри́нꙋвъ, нбⷭ҇наѧ возлюби́лъ є҆сѝ.

Ра́дꙋйсѧ, се́рдце твоѐ при́снѡ ко хрⷭ҇тꙋ̀ и҆мѣ́вый: ра́дꙋйсѧ, томꙋ̀ є҆ди́номꙋ слꙋжи́ти вожделѣ́вый.

Ра́дꙋйсѧ, ра́зꙋмъ тво́й въ послꙋша́нїе вѣ́ры плѣни́вый: ра́дꙋйсѧ, въ бз҃ѣ благоче́стнѡ пожи́вый.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ г҃

Си́лою бж҃їею ᲂу҆крѣплѧ́емь, ѻ҆́ч҃е пїтѷрі́ме, всѧ̑ послꙋша̑нїѧ монасты̑рскаѧ до́брѣ проходи́лъ є҆сѝ въ вѧ́земстѣй ѡ҆би́тели ст҃а́гѡ прⷣте́чи, є҆мꙋ́же подража́лъ є҆сѝ по́двиги твои́ми, всегда̀ взыва́ѧ къ подвигополо́жникꙋ всѣ́хъ, сп҃сꙋ хрⷭ҇тꙋ̀: А҆ллилꙋ́їа.

І҆́косъ г҃

И҆мѣ́ѧ по́мыслъ чи́стъ, и҆ дꙋ́шꙋ непоро́чнꙋ, сщ҃е́нства бл҃года́ть, є҆щѐ мла́дъ сы́й, досто́йнѡ воспрїѧ́лъ є҆сѝ, ѻ҆́ч҃е пїтѷрі́ме: тѣ́мже, во и҆гꙋ́мена ѡ҆би́тели и҆збра́нъ бы́лъ є҆сѝ и҆ са́номъ а҆рхїмандрі́та почте́нъ, ре́вностнѡ подвиза́ѧсѧ ѡ҆ сп҃се́нїи бг҃омъ врꙋче́ннагѡ тебѣ̀ слове́снагѡ ста́да. сегѡ̀ ра́ди вопїе́мъ тѝ си́це:

Ра́дꙋйсѧ, ꙗ҆́кѡ всѧ̑ послꙋша̑нїѧ и҆́ночєскаѧ нелѣ́ностнѡ проше́лъ є҆сѝ: ра́дꙋйсѧ, ꙗ҆́кѡ си́мъ на высотꙋ̀ добродѣ́телей возше́лъ є҆сѝ.

Ра́дꙋйсѧ, красото̀ смиренномꙋ́дрїѧ и҆ воздержа́нїѧ: ра́дꙋйсѧ, ѡ҆́бразе кро́тости и҆ послꙋша́нїѧ.

Ра́дꙋйсѧ, цѣломꙋ́дрїѧ ревни́телю: ра́дꙋйсѧ, дѣ́вства и҆ чистоты̀ храни́телю.

Ра́дꙋйсѧ, и҆́ночествꙋющихъ мꙋ́дрый нача́льниче: ра́дꙋйсѧ, всѣ́хъ, благоче́стнѡ жи́ти хотѧ́щихъ, до́брый наста́вниче.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ д҃

Бꙋ́ри ѕлосло́вїѧ и҆ людска́гѡ мѧте́жа не ᲂу҆боѧ́лсѧ є҆сѝ, ѻ҆́ч҃е пїтѷрі́ме, є҆гда̀ і҆кѡ́нꙋ прпⷣбнагѡ а҆рка́дїа, недо́брѣ пи́саннꙋю, почита́нїѧ лиши́лъ є҆сѝ. тѣ́мже, ѡ҆ правовѣ́рїи ревнꙋ́ѧ, поꙋча́лъ є҆сѝ па́ствꙋ твою̀ пра́во взыва́ти къ бг҃ꙋ: А҆ллилꙋ́їа.

І҆́косъ д҃

Слы́шавъ и҆ ви́дѣвъ премно́гꙋю твою̀ добродѣ́тель, бл҃же́нный патрїа́рхъ і҆ѡакі́мъ ст҃и́телѧ тебѐ наречѐ и҆ па́ствꙋ тамбо́вскꙋю смотре́нїю твоемꙋ̀ врꙋчѝ. мы́ же, ѡ҆ се́мъ веселѧ́щесѧ, глаго́лемъ тѝ сицєва́ѧ:

Ра́дꙋйсѧ, всѧ̑ степє́ни и҆́ноческагѡ зва́нїѧ съ че́стїю и҆ сла́вою проше́дый: ра́дꙋйсѧ, на престо́лѣ ст҃и́тельстѣмъ досто́йнѡ возсѣ́дый.

Ра́дꙋйсѧ, стра́же цр҃кве хрⷭ҇то́вы неꙋстраши́мый: ра́дꙋйсѧ, дѣ́лателю вїногра́да хрⷭ҇то́ва неꙋтоми́мый.

Ра́дꙋйсѧ, благовре́меннѣ и҆ безвре́меннѣ па́ствꙋ твою̀ поꙋча́вый: ра́дꙋйсѧ, ко хрⷭ҇тꙋ̀ ѻ҆́вцы заблꙋ́ждшыѧ призва́вый.

Ра́дꙋйсѧ, лю́ди, во тьмѣ̀ сѣдѧ́щыѧ, свѣ́томъ хрⷭ҇то́вымъ ѡ҆зари́вый: ра́дꙋйсѧ, си́мъ ѿ поги́бели и҆́хъ сохрани́вый.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ є҃

Бг҃оте́чное свѣти́ло, пꙋ́ть жи́зни твоеѧ̀ ѡ҆зарѧ́ющее, бы́сть тебѣ̀ ᲂу҆го́дникъ бж҃їй проко́пїй, є҆го́же и҆́менемъ во ст҃ѣ́мъ креще́нїи нарече́нъ бы́лъ є҆сѝ и҆ къ немꙋ́же при́снѡ съ мл҃твою прибѣга́лъ є҆сѝ, поѧ̀ бг҃ꙋ: А҆ллилꙋ́їа.

І҆́косъ є҃

Ви́дѣлъ є҆сѝ, ѻ҆́ч҃е пїтѷрі́ме, твои́ма ѻ҆чи́ма ᲂу҆го́дника бж҃їѧ проко́пїа, предстоѧ́ща пред̾ лице́мъ гдⷭ҇а и҆ къ немꙋ̀ молѧ́щасѧ си́це: безсме́ртный бж҃е, хвалꙋ̀ тебѣ̀ воздаю̀, цр҃ь бо є҆ди́нъ є҆сѝ всѣ̑мъ: поми́лꙋй дꙋ́шꙋ є҆гѡ̀ и҆ сподо́би сегѡ̀ црⷭ҇твїѧ нбⷭ҇нагѡ. сегѡ̀ ра́ди и҆ мы̀ взыва́емъ къ тебѣ̀: не преста́й моли́тисѧ ѡ҆ всѣ́хъ на́съ кꙋ́пнѡ со проко́пїемъ бл҃же́ннымъ, да и҆ на́съ сподо́битъ гдⷭ҇ь дости́гнꙋти нбⷭ҇нагѡ црⷭ҇твїѧ. ѡ҆ се́мъ воздыха́юще, похва̑льнаѧ воспѣва́емъ тѝ:

Ра́дꙋйсѧ, ѻ҆чеса̀ твоѧ̑ всегда̀ на нб҃о возводи́вый: ра́дꙋйсѧ, сла́вꙋ нбⷭ҇нꙋю па́че всегѡ̀ возлюби́вый.

Ра́дꙋйсѧ, непреста́нными мл҃твами се́рдце твоѐ ѡ҆ст҃и́вый: ра́дꙋйсѧ, мы́сль твою̀ въ бз҃ѣ ᲂу҆тверди́вый.

Ра́дꙋйсѧ, ꙗ҆́кѡ проко́пїа ст҃а́гѡ, мл҃твенника дерзнове́ннаго всегда̀ и҆мѣ́лъ є҆сѝ: ра́дꙋйсѧ, ꙗ҆́кѡ семꙋ̀ споспѣшествꙋ́ющꙋ, въ ра́дость гдⷭ҇а твоегѡ̀ вше́лъ є҆сѝ.

Ра́дꙋйсѧ, ꙗ҆́кѡ въ ра́йскихъ ѡ҆би́телехъ ны́нѣ пребыва́еши: ра́дꙋйсѧ, ꙗ҆́кѡ ѿ го́рнихъ высо́тъ и҆ на́съ, многогрѣ́шныхъ, ми́лостивнѡ назира́еши.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ ѕ҃

Проповѣ́дникъ вѣ́ры правосла́вныѧ и҆ ревни́тель бл҃гоче́стїѧ сло́вомъ и҆ житїе́мъ твои́мъ бы́лъ є҆сѝ, ст҃и́телю пїтѷрі́ме. тѣ́мже дꙋхо́внаѧ па́ства твоѧ̀ непреста́ннѡ па́мѧтꙋетъ и҆ всѧ̀ рѡссі́йскаѧ страна̀ досто́йно ны́нѣ прославлѧ́етъ трꙋды̀ твоѧ̑, и҆́миже трꙋди́лсѧ є҆сѝ, при́снѡ взыва́ѧ ко гдⷭ҇ꙋ: А҆ллилꙋ́їа.

І҆́косъ ѕ҃

Возсїѧ́лъ є҆сѝ во цр҃кви тамбо́встѣй свѣ́томъ хрⷭ҇то́ва ᲂу҆че́нїѧ и҆ ре́вностїю твое́ю ѡ҆ сла́вѣ бж҃їей, ст҃и́телю ѻ҆́ч҃е пїтѷрі́ме: ты́ бо, красотꙋ̀ гдⷭ҇ню возлюби́въ, ѡ҆ ᲂу҆строе́нїи хра́мѡвъ ст҃ы́хъ и҆ ѡ҆ благочи́нїи церко́внѣмъ всеꙋсе́рднѡ прилѣжа́лъ є҆сѝ. сегѡ̀ ра́ди воспѣва́емъ тѝ си́це:

Ра́дꙋйсѧ, сла́вы хрⷭ҇то́вы ревни́телю: ра́дꙋйсѧ, хра́мѡвъ ст҃ы́хъ строи́телю.

Ра́дꙋйсѧ, бл҃гочи́нїѧ церко́внагѡ стро́гїй блюсти́телю: ра́дꙋйсѧ, чте́нїѧ и҆ пѣ́нїѧ бжⷭ҇твеннагѡ и҆скꙋ́сный ᲂу҆чи́телю.

Ра́дꙋйсѧ, ꙗ҆́кѡ тобо́ю цр҃ковь рꙋ́сскаѧ бл҃гоꙋкраси́сѧ: ра́дꙋйсѧ, ꙗ҆́кѡ въ не́й вѣ́ра хрⷭ҇то́ва тобо́ю ᲂу҆тверди́сѧ.

Ра́дꙋйсѧ, гра́да тамбо́ва сла́во и҆ ᲂу҆краше́нїе: ра́дꙋйсѧ, всѣ̑мъ на́мъ защи́то и҆ ѡ҆гражде́нїе.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ з҃

Хотѧ́й невозбра́ннѡ возноси́тисѧ дꙋ́хомъ въ гѡ́рнѧѧ селє́нїѧ, безмо́лвїе пꙋсты́ни возлюби́лъ є҆сѝ, ѻ҆́ч҃е пїтѷрі́ме, и҆дѣ́же мнѡ́ги дни̑ въ постѣ̀ и҆ мл҃твѣ подвиза́лсѧ є҆сѝ, ѻ҆вогда̀ же со ст҃и́телемъ митрофа́номъ, дрꙋ́гомъ твои́мъ, бесѣ́довалъ є҆сѝ, воспѣва́ѧ съ ни́мъ кꙋ́пнѡ хвале́бнꙋю пѣ́снь: А҆ллилꙋ́їа.

І҆́косъ з҃

Но́вꙋю ѡ҆би́тель въ мѣ́стѣ пꙋсты́ннѣмъ, ꙗ҆́кѡже ти́хꙋю при́стань, во сла́вꙋ предте́чи гдⷭ҇нѧ созда́въ и҆ въ са́момъ гра́дѣ тамбо́вѣ съ сестро́ю твое́ю є҆катері́ною ѡ҆би́тель же́нскꙋю ᲂу҆стро́ивъ, си́мъ ꙗ҆ви́лъ є҆сѝ на́мъ, ѻ҆́ч҃е пїтѷрі́ме, ве́лїю твою̀ любо́вь ко ѡ҆би́телємъ ст҃ы̑мъ. сегѡ̀ ра́ди воспѣва́емъ тѝ похва̑льнаѧ сїѧ̑:

Ра́дꙋйсѧ, предте́чꙋ гдⷭ҇нѧ возлюби́вый и҆ томꙋ̀ въ житїѝ твое́мъ поревнова́вый: ра́дꙋйсѧ, стро́гїй по́двигъ бл҃гоче́стїѧ въ себѣ̀ показа́вый.

Ра́дꙋйсѧ, пꙋсты́ни безмо́лвїѧ люби́телю: ра́дꙋйсѧ, поста̀ и҆ мл҃твы стро́гїй блюсти́телю.

Ра́дꙋйсѧ, тамбо́вскїѧ де́бри и҆ лѣса̀ мл҃твою твое́ю ѡ҆бл҃гоꙋха́вый: ра́дꙋйсѧ, ѡ҆би́тель и҆́нокѡмъ та́мѡ ѡ҆снова́вый.

Ра́дꙋйсѧ, ст҃и́телѧ митрофа́на дрꙋ́же и҆ собесѣ́дниче: ра́дꙋйсѧ, во црⷭ҇твїи нбⷭ҇нѣмъ томꙋ̀ сонаслѣ́дниче.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ и҃

Стра́нника и҆ прише́льца въ мі́рѣ се́мъ помышлѧ́лъ є҆сѝ себѐ, ѻ҆́ч҃е пїтѷрі́ме. тѣ́мже, нбⷭ҇наѧ возлюби́въ, сокро́вище некра́домое сокро́виществовалъ є҆сѝ, грѧдꙋ́щагѡ гра́да взыскꙋ́ѧ и҆ ко гдⷭ҇ꙋ ра́достнѡ взыва́ѧ: А҆ллилꙋ́їа.

І҆́косъ и҃

Ве́сь и҆спо́лнь любвѐ хрⷭ҇то́вы, дꙋ́шꙋ твою̀ за ѻ҆́вцы твоѧ̑ положи́ти гото́въ бы́лъ є҆сѝ, сп҃се́нїе всѣ̑мъ ᲂу҆строѧ́ѧ и҆ всѣ̑мъ во все́мъ ᲂу҆гожда́ѧ, не и҆скі́й своеѧ̀, но мно́гихъ по́льзы, да всѧ́кѡ нѣ̑кїѧ спасе́ши. сегѡ̀ ра́ди чти́мъ ст҃ꙋ́ю па́мѧть твою̀ и҆ ᲂу҆се́рднѡ вопїе́мъ тѝ:

Ра́дꙋйсѧ, ѻ҆́ч҃е бл҃госе́рдый, ѡ҆ спасе́нїи мно́гихъ ревнова́вый: ра́дꙋйсѧ, не свои́хъ сѝ, но бли́жнѧго и҆ска́вый.

Ра́дꙋйсѧ, па́стырю до́брый, на па́житехъ тꙋ́чныхъ ча̑да твоѧ̑ дꙋхѡ́внаѧ пита́вый: ра́дꙋйсѧ, стра́же неꙋсы́пный, ѿ волкѡ́въ хи́щныхъ ѻ҆́вцы твоѧ̑ ѡ҆хранѧ́вый.

Ра́дꙋйсѧ, ни́щихъ корми́телю и҆ гла́дныхъ пита́телю: ра́дꙋйсѧ, си́рыхъ защи́тниче и҆ ѡ҆би́димыхъ предста́телю.

Ра́дꙋйсѧ, ꙗ҆́кѡ и҆ ны́нѣ во всѧ́кихъ нꙋ́ждахъ ско́ро на́мъ помога́еши: ра́дꙋйсѧ, ꙗ҆́кѡ и҆ ны́нѣ всѣ́хъ, съ вѣ́рою къ тебѣ̀ притека́ющихъ, ми́лостивнѡ ᲂу҆тѣша́еши.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ ѳ҃

Всѧ́къ во́зрастъ и҆ всѧ́кѡ сосло́вїе є҆щѐ въ житїѝ твое́мъ велича́хꙋ тѧ̀, ꙗ҆́кѡ человѣ́ка бж҃їѧ, и҆ въ ча́съ кончи́ны твоеѧ̀ всѧ̀ па́ства твоѧ̀ пла́каше ѡ҆ тебѣ̀, ꙗ҆́кѡ ѡ҆ ѻ҆тцѣ̀ свое́мъ. зрѧ́щи же тѧ̀ погреба́ема и҆ но́вагѡ предста́телѧ на нб҃сѝ и҆мѣ́ти ᲂу҆пова́ющи, съ рыда́нїемъ, кꙋ́пнѡ же и҆ благода́рнымъ се́рдцемъ, возглаша́ше ѡ҆ тебѣ̀ надгро́бнꙋю пѣ́снь: А҆ллилꙋ́їа.

І҆́косъ ѳ҃

Виті́йство человѣ́ческое не довлѣ́етъ ко прославле́нїю мно́гихъ чꙋде́съ твои́хъ, ст҃и́телю пїтѷрі́ме: но́ваѧ бо кꙋпе́ль сїлѡа́мскаѧ ѿкры́сѧ всѣ̑мъ стра́ждꙋщымъ во и҆сто́чницѣ твое́мъ, рꙋка́ма твои́ма и҆скопа́ннѣмъ: та́же и҆ ри́за твоѧ̀ честна́ѧ, на недꙋ́жныѧ полага́ема, да́рꙋетъ и҆́мъ и҆сцѣле́нїе, и҆ гро́бъ тво́й ст҃ы́й ꙗ҆ви́сѧ вои́стиннꙋ неѡскꙋ́днаѧ враче́бница: никто́же бо, съ вѣ́рою къ немꙋ̀ притека́ѧй, то́щъ и҆ неꙋтѣ́шенъ ѿхо́дитъ. сегѡ̀ ра́ди гла́сы хвале́бными тѧ̀ сла́вимъ:

Ра́дꙋйсѧ, врачꙋ̀ безме́здный, тꙋ́не врачєва́нїѧ всѣ̑мъ подава́ѧй: ра́дꙋйсѧ, сосꙋ́де драгоцѣ́нный, цѣле́бное мѵ́ро всѣ̑мъ вѣ̑рнымъ бога́тнѡ и҆злива́ѧй.

Ра́дꙋйсѧ, глꙋхи́хъ слы́шанїе и҆ слѣпы́хъ прозрѣ́нїе: ра́дꙋйсѧ, хромы́хъ хожде́нїе и҆ слѧ́ченныхъ и҆справле́нїе.

Ра́дꙋйсѧ, разсла́бленныхъ ᲂу҆крѣпи́телю: ра́дꙋйсѧ, бѣснова́тыхъ ѿ наси́лїѧ дїа́вольскагѡ свободи́телю.

Ра́дꙋйсѧ, лишє́ннымъ смы́сла ᲂу҆́мъ здра́вый подава́ѧй: ра́дꙋйсѧ, въ со́нїихъ и҆ видѣ́нїихъ по́мощь твою̀ ꙗ҆влѧ́ѧй.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ і҃

Сп҃стѝ хотѧ̀ па́ствꙋ твою̀, ѻ҆́ч҃е пїтѷрі́ме, не сꙋди́лъ є҆сѝ вѣ́дѣти въ не́й и҆́но что̀, то́чїю і҆и҃са хрⷭ҇та̀, и҆ сего̀ ра́спѧта. сегѡ̀ ра́ди поста́вилъ є҆сѝ ѡ҆́бразъ распѧ́тїѧ гдⷭ҇а, зна́менїе на́шегѡ сп҃се́нїѧ, на вратѣ́хъ гра́да, да всѝ мимоходѧ́щїи покланѧ́ютсѧ є҆мꙋ̀, воспѣва́юще хвале́бнꙋю пѣ́снь: А҆ллилꙋ́їа.

І҆́косъ і҃

Стѣны̀ неѡбори́мыѧ и҆ застꙋ́пницы ро́да хрⷭ҇тїа́нскагѡ і҆кѡ́нꙋ ди́внꙋю гра́дꙋ тамбо́вꙋ дарова́лъ є҆сѝ, ѻ҆́ч҃е пїтѷрі́ме, ѿ неѧ́же додне́сь всѣ̑мъ съ вѣ́рою приходѧ́щымъ то́ки чꙋде́съ и҆злива́ютсѧ. сегѡ̀ ра́ди бл҃года́рнѣ взыва́емъ тѝ си́це:

Ра́дꙋйсѧ, всѐ ᲂу҆пова́нїе твоѐ на мт҃рь бж҃їю возложи́вый: ра́дꙋйсѧ, и҆ гра́дъ тво́й покро́вꙋ тоѧ̀ врꙋчи́вый.

Ра́дꙋйсѧ, і҆кѡ́нꙋ є҆ѧ̀ ст҃ꙋ́ю въ щи́тъ и҆ ѡ҆гражде́нїе гра́дꙋ поста́вивый: ра́дꙋйсѧ, зало́гъ любвѐ твоеѧ̀ і҆кѡ́нꙋ бг҃ома́тере па́ствѣ ѡ҆ста́вивый.

Ра́дꙋйсѧ, ꙗ҆́кѡ і҆кѡ́ною то́ю чꙋдеса̀ мнѡ́га содѣва́ютсѧ: ра́дꙋйсѧ, ꙗ҆́кѡ ми́лѡсти бж҃їѧ ѿ неѧ̀ непреста́ннѡ и҆злїва́ютсѧ.

Ра́дꙋйсѧ, бцⷣꙋ на́мъ ᲂу҆каза́вый ѿ всѣ́хъ бѣ́дъ и҆збавле́нїе: ра́дꙋйсѧ, ꙗ҆́кѡ ми́лостїю є҆ѧ̀ ты̀ є҆сѝ на́ша ра́дость и҆ ᲂу҆тѣше́нїе.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ а҃і

Пѣ́нїе немо́лчное да́же додне́сь соверша́етсѧ ᲂу҆ ст҃ѣ́й і҆кѡ́ны твое́й, ᲂу҆го́дниче бж҃їй пїтѷрі́ме: мно́зи бо, въ нꙋ́ждахъ сꙋ́щїи, вѣ́дѧтъ тѧ̀ помо́щника бл҃гопоспѣ́шлива и҆ мл҃твенника бл҃гоꙋвѣ́тлива. тѣ́мже ны́нѣ всѧ̀ рѡссі́йскаѧ землѧ̀ бл҃года́рнѣ вопїе́тъ просла́вльшемꙋ тѧ̀ бг҃ꙋ: А҆ллилꙋ́їа.

І҆́косъ а҃і

Свѣти́льникъ свѣтоза́ренъ бы́лъ є҆сѝ въ земнѣ́мъ житїѝ твое́мъ, ѻ҆́ч҃е на́шъ пїтѷрі́ме, бл҃года́тнѡ ѡ҆зарѧ́ѧ дꙋ́шы вѣ́рныхъ. просвѣтѝ ᲂу҆̀бо мл҃твами твои́ми ѻ҆́чи дꙋшє́вныѧ и҆ на́мъ, въ пꙋчи́нѣ грѣха̀ погиба́ющымъ, да бл҃года́рнѣ вопїе́мъ тѝ:

Ра́дꙋйсѧ, вели́кїй ᲂу҆го́дниче бж҃їй, бл҃гоче́стнꙋю жи́знь на землѝ возлюби́вый: ра́дꙋйсѧ, вѣ́рꙋ, наде́ждꙋ и҆ любо́вь да́же до конца̀ сохрани́вый.

Ра́дꙋйсѧ, свѣти́льниче многосвѣ́тлый, свѣ́томъ и҆́стиннагѡ бг҃опозна́нїѧ на́съ ѡ҆зарѧ́ѧй: ра́дꙋйсѧ, лꙋчѐ сл҃нца пра́вды, теплото́ю бжⷭ҇твенныѧ любвѐ дꙋ́шы на́шѧ согрѣва́ѧй.

Ра́дꙋйсѧ, би́сере честны́й, сїѧ́нїемъ нбⷭ҇ныѧ сла́вы сердца̀ на̑ша ᲂу҆веселѧ́ѧй: ра́дꙋйсѧ, ка́меню драгі́й, странꙋ̀ на́шꙋ правосла́внꙋю ᲂу҆краша́ѧй.

Ра́дꙋйсѧ, ꙗ҆́кѡ тобо́ю бе́зднꙋ млⷭ҇рдїѧ бж҃їѧ призыва́емъ: ра́дꙋйсѧ, ꙗ҆́кѡ тобо́ю сп҃се́нїе вѣ́чное полꙋчи́ти ᲂу҆пова́емъ.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ в҃і

Блгⷣть ѿ бг҃а тѝ да́ннꙋю вѣ́дѧще, ны́нѣ прилѣ́жнѡ мо́лимъ тѧ̀, ст҃и́телю пїтѷрі́ме: проле́й те́плꙋю ѡ҆ на́съ мл҃твꙋ ко гдⷭ҇ꙋ, да сохрани́тъ цр҃ковь свою̀ ст҃ꙋ́ю неврежде́нꙋ ѿ є҆ресе́й и҆ раско́лѡвъ и҆ всѧ̑ правосла̑вныѧ да поми́лꙋетъ и҆ сп҃се́тъ, вопїю́щыѧ є҆мꙋ̀: А҆ллилꙋ́їа.

І҆́косъ в҃і

Пою́ще твоѐ бг҃оꙋго́дное житїѐ, ѻ҆́ч҃е пїтѷрі́ме, и҆ на нб҃сѝ ѿ бг҃а прославле́нїе, велича́емъ безчи́слєннаѧ чꙋдеса̀ и҆ и҆сцѣлє́нїѧ твоѧ̑, и҆, на неꙋсы̑пныѧ мл҃твы твоѧ̑ ᲂу҆пова́юще, взыва́емъ тѝ сицєва́ѧ:

Ра́дꙋйсѧ, хра́мъ преѡбраже́нїѧ гдⷭ҇нѧ бл҃голѣ́пенъ ᲂу҆стро́ивый: ра́дꙋйсѧ, вѣ́чное поко́ище себѣ̀ въ не́мъ пред̾ꙋгото́вавый.

Ра́дꙋйсѧ, житїѐ твоѐ земно́е бл҃гоче́стнѣ сконча́вый: ра́дꙋйсѧ, ѿ цр҃ѧ̀ нбⷭ҇нагѡ вѣне́цъ сла́вы прїе́мый.

Ра́дꙋйсѧ, а҆пⷭ҇лѡвъ собесѣ́дниче: ра́дꙋйсѧ, ст҃и́телей сопресто́льниче и҆ сонаслѣ́дниче.

Ра́дꙋйсѧ, а҆рха́гг҃лѡвъ и҆ а҆́гг҃лѡвъ сослꙋжи́телю: ра́дꙋйсѧ, всѣ́хъ нбⷭ҇ныхъ си́лъ сожи́телю.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ г҃і

Ѽ пресла́вный чꙋдотво́рче, ᲂу҆го́дниче бж҃їй пїтѷрі́ме! прїимѝ сїѐ ѿ любвѐ на́шеѧ приноси́мое тебѣ̀ бл҃гохвале́нїе и҆ твои́мъ бл҃гопрїѧ́тнымъ хода́тайствомъ и҆зба́ви на́съ ѿ всѧ́кихъ бѣ́дъ и҆ ѕѡ́лъ, ѿ внеза́пныѧ сме́рти и҆ бꙋ́дꙋщїѧ мꙋ́ки, да сподо́бимсѧ кꙋ́пнѡ съ тобо́ю во вѣ́ки пѣ́ти: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡмъ подража́тель и҆ человѣ́кѡвъ наста́вникъ бы́лъ є҆сѝ, ст҃и́телю ѻ҆́ч҃е пїтѷрі́ме: ѿ ю҆́ности бо возлюби́лъ є҆сѝ бжⷭ҇твенное ᲂу҆че́нїе и҆, семꙋ̀ послѣ́довавъ, до́бромꙋ житїю̀ поревнова́лъ є҆сѝ. сегѡ̀ ра́ди тебѣ̀, на нб҃сѝ и҆ на землѝ просла́вленномꙋ, вопїе́мъ си́це:

Ра́дꙋйсѧ, ѿ рожде́нїѧ твоегѡ̀ бг҃омъ и҆збра́нный: ра́дꙋйсѧ, на слꙋже́нїе а҆пⷭ҇льское призва́нный.

Ра́дꙋйсѧ, и҆збра́нїе твоѐ по́двигомъ благоче́стїѧ ѡ҆правда́вый: ра́дꙋйсѧ, ѡ҆́бразомъ житїѧ̀ твоегѡ̀ и҆ на́мъ пꙋ́ть къ нб҃сѝ показа́вый.

Ра́дꙋйсѧ, ѿ ю҆́ности и҆́го хрⷭ҇то́во возлюби́вый: ра́дꙋйсѧ, чистотꙋ̀ се́рдца твоегѡ̀ до конца̀ сохрани́вый.

Ра́дꙋйсѧ, ꙗ҆́кѡ, сегѡ̀ ра́ди, є҆щѐ сы́й на землѝ, а҆́гг҃лѡмъ ᲂу҆подо́билсѧ є҆сѝ: ра́дꙋйсѧ, ꙗ҆́кѡ, сегѡ̀ ра́ди, гдⷭ҇а сла̑вы всегда̀ зрѣ́ти сподо́билсѧ є҆сѝ.

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Конда́къ а҃

И҆збра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, ст҃и́телю ѻ҆́ч҃е пїтѷрі́ме, всѣ̑мъ прибѣга́ющымъ къ тебѣ̀ ско́рый помо́щниче! сподо́би на́съ недосто́йными ᲂу҆сты̀ воспѣ́ти тебѣ̀ сїѧ̑ похва̑льнаѧ. ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, зовꙋ́щихъ:

Ра́дꙋйсѧ, ст҃и́телю пїтѷрі́ме, тамбо́вскїй чꙋдотво́рче.

Моли́твы

Ѽ вели́кїй ᲂу҆го́дниче бж҃їй и҆ пресла́вный чꙋдотво́рче, ст҃и́телю пїтѷрі́ме! къ тебѣ̀ смире́ннѡ припа́даемъ и҆ ᲂу҆се́рднѡ мо́лимсѧ: ꙗ҆вѝ на́мъ, грѣ́шнымъ, любо́вь твою̀ ѻ҆те́ческꙋю и҆ многомо́щное твоѐ застꙋпле́нїе. вѣ́рꙋемъ бо, ꙗ҆́кѡ ве́лїе дерзнове́нїе и҆́маши ко гдⷭ҇ꙋ и҆ ꙗ҆́кѡ мно́гѡ мо́жетъ предста́тельство твоѐ пред̾ прⷭ҇то́ломъ бла́гости є҆гѡ̀. сохранѝ мл҃твами твои́ми цр҃ковь ст҃ꙋ́ю ѿ є҆ресе́й и҆ раско́лѡвъ, ѿ сꙋевѣ́рїѧ и҆ невѣ́рїѧ. и҆спросѝ на́мъ вѣ́рꙋ пра́вꙋ, наде́ждꙋ несомнѣ́ннꙋ, любо́вь нелицемѣ́рнꙋ, въ до́брыхъ дѣ́лѣхъ преспѣ́ѧнїе, во и҆скꙋше́нїѧхъ мꙋ́жество, въ ѕлострада́нїихъ терпѣ́нїе, въ моли́твахъ постоѧ́нство, ми́ръ и҆ бл҃гоꙋстрое́нїе странѣ̀ на́шей, здра́вїе же и҆ сп҃се́нїе лю́демъ є҆ѧ̀. при́зри ми́лостивнѡ на предстоѧ́щыѧ и҆ молѧ́щїѧсѧ пред̾ ст҃о́ю і҆кѡ́ною твое́ю и҆ всѧ̑ проше́нїѧ и҆́хъ во бла́го и҆спо́лни, и҆ всѣ̑мъ всѧ̑ въ жи́зни вре́меннѣй и҆ вѣ́чнѣй потрє́бнаѧ да́рꙋй, во сла́вꙋ ди́внагѡ во ст҃ы́хъ свои́хъ бг҃а, въ трⷪ҇цѣ сла́вимаго и҆ покланѧ́емаго, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.