Кондак 1
Взбра́нней Воево́де и Де́ве Богоро́дице, от все́х родо́в на спасе́ние на́ше избра́нней и, я́ко Ма́тери Христа́, Бо́га на́шего, достодо́лжно ублажа́емей, похва́льное пе́ние, ве́рнии, принесе́м и пред ико́ною Ея́ с наде́ждою и любо́вию моли́тву вознесе́м: изба́ви на́с, Влады́чице, от вра́г ви́димых и неви́димых, да спасе́ннии Тобо́ю воззове́м вси́ ра́достно:
Ра́дуйся, чи́стая Отрокови́це, те́плая Предста́тельнице о душа́х на́ших.
Икос 1
А́нгелов мно́жества и вся́ небе́сная во́инства сла́вят Тя́, Цари́цу Небесе́ и земли́. Просла́ви Тя́, Пречи́стая, и вели́кий кня́зь Дими́трий с во́и ру́сскими, егда́, я́ко победи́тель над нечести́выми ага́ряны, пу́ть сво́й к Первопресто́льному гра́ду соверша́я, в да́р чудотво́рную ико́ну Твою́ от люди́й гра́да Гре́бени прия́т. Те́мже, держа́ ю́ на объя́тиих свои́х, со дерзнове́нием возопи́ Преблагослове́нней:
Ра́дуйся, сре́тением ико́ны Твоея́ ве́рныя ратобо́рцы возвесели́вшая; ра́дуйся, е́ю благослове́ние Первопресто́льному гра́ду дарова́вшая.
Ра́дуйся, ше́ствием Твои́м зе́млю Ру́сскую освяти́вшая; ра́дуйся, к ве́ре христиа́нстей мно́гия лю́ди обрати́вшая.
Ра́дуйся, ага́рянскаго злове́рия Обличе́ние; ра́дуйся, ве́ры Правосла́вныя Утвержде́ние.
Ра́дуйся, с ве́рою прибега́ющим проше́ния исполня́ющая; ра́дуйся, лю́дем правосла́вным при́сно чудоде́ющая.
Ра́дуйся, ско́рая челове́ком Помо́щнице; ра́дуйся, прему́драя ве́рным Наста́внице.
Ра́дуйся, Вели́ких Моско́вских князе́й Покрови́тельнице; ра́дуйся, ро́да христиа́нскаго усе́рдная Засту́пнице.
Ра́дуйся, Чи́стая Отрокови́це, те́плая Предста́тельнице о душа́х на́ших.
Кондак 2
Ви́дяще христолюби́вии лю́дие, в страда́ниих и ско́рбех су́щии, чудеса́ от ико́ны Твоея́, Влады́чице, быва́емая, от мно́гих ме́ст к Тебе́ стека́хуся и моли́твы возсыла́ху. Те́мже, получи́вше с ве́рою проси́мая, благода́рне из глубины́ серде́ц взыва́ху Бо́гу: Аллилу́иа.
Икос 2
Разуме́ша лю́дие промышле́ние Бо́жие о себе́, егда́, всечестна́я ико́на Твоя́, Богома́ти, я́ко со́лнце пресве́тлое, в сто́льный гра́д Москву́ святы́м вели́ким кня́зем Дими́трием принесе́ся. Сего́ ра́ди, све́тло пра́зднующе честна́го о́браза Твоего́ сре́тение, с любо́вию к Тебе́ взыва́ху:
Ра́дуйся, я́ко ико́на Твоя́ во спасе́ние на́м дарова́ся; ра́дуйся, я́ко то́ю собо́рная це́рковь Успе́ния украси́ся.
Ра́дуйся, зе́млю Ру́сскую в уде́л Себе́ избра́вшая; ра́дуйся, мно́гими чудесы́ лю́ди гра́да Гре́бени удиви́вшая.
Ра́дуйся, заблу́ждших гре́шников ско́рое Вразумле́ние; ра́дуйся, серде́ц на́ших Умиле́ние.
Ра́дуйся, Покро́ве чистоты́ и де́вства; ра́дуйся, Огражде́ние блага́го супру́жества.
Ра́дуйся, прибега́ющих к Тебе́ милосе́рдая Спору́чнице; ра́дуйся, оста́вленных врача́ми безме́здная Цели́тельнице.
Ра́дуйся, Боже́ственною сла́вою украше́нная; ра́дуйся, ди́вными чудеса́ми Просла́вленная.
Ра́дуйся, чи́стая Отрокови́це, те́плая Предста́тельнице о душа́х на́ших.
Кондак 3
Си́лою, да́нною Ти́ свы́ше, мно́гая чудеса́ сотвори́ла еси́, Влады́чице, в земли́ на́шей и не возмо́жно е́сть исчи́слити сла́вныя побе́ды над супоста́ты. Кня́зие бо ру́сстии, име́юще ико́ну Твою́, безстра́шно отража́ху вра́жия по́лчища, вопию́ще Бо́гу: Аллилу́иа.
Икос 3
Иму́ще Тя́ неусыпа́ющую Моли́твенницу и усе́рдную Засту́пницу, вся́кое уны́ние и стра́х отча́яния побежда́ем. Ты́ бо, стяжа́вши ве́лие дерзнове́ние к Сы́ну Твоему́ и Бо́гу на́шему, любо́вию покрыва́еши зе́млю ру́сскую и все́м твори́ши спасти́ся. Сего́ ра́ди, а́ще и неради́ви су́ще о свое́м спасе́нии, оба́че дерза́ем со умиле́нием глаго́лати Тебе́ такова́я:
Ра́дуйся, в беда́х и ско́рбех ско́рая Помо́щнице; ра́дуйся, те́плая о на́с пред Бо́гом Моли́твеннице.
Ра́дуйся, правосла́вных во́инов на по́ли бра́ни укрепля́ющая; ра́дуйся, еле́ем благода́ти Твоея́ ра́ны и́х врачу́ющая.
Ра́дуйся, ве́рная ча́да на по́двиги благословля́ющая; ра́дуйся, неве́рныя под но́ги и́х покаря́ющая.
Ра́дуйся, гре́шником гро́зное Обличе́ние; ра́дуйся, ка́ющимся человеколю́бное снисхожде́ние.
Ра́дуйся, духо́вная о́чи, е́же ви́дети грехи́, на́м открыва́ющая; ра́дуйся, благода́тную по́мощь ко исправле́нию подаю́щая.
Ра́дуйся, страсте́й па́губных исцеле́ние; ра́дуйся ду́ш на́ших спасе́ние.
Ра́дуйся, чи́стая Отрокови́це, те́плая Предста́тельнице о душа́х на́ших.
Кондак 4
Бу́рею недоуме́ний обдержи́ми бы́ша лю́дие, ви́дяще це́рковь Успе́ния Твоего́, Влады́чице, огне́м объя́ту. Егда́ же узре́ша ико́ну Твою́ на возду́се верху́ пла́мене стоя́щу и не сгара́ющу, просла́виша Бо́га ди́внаго в чудесе́х Свои́х и Тя́, Пресвята́я Де́во, О́гнь Божества́ во чре́ве Твое́м вмести́вшую, в ра́дости пою́ще: Аллилу́иа.
Икос 4
Слы́шаще чу́до от ико́ны Твоея́, Всеми́лостивая Богоро́дице, быва́емое, ка́ко во огни́, я́ко Неопали́мая Купина́, яви́ся несгара́ема, удивля́емся и, разуме́юще зна́мение ми́лости Твоея́, воспева́ем си́це:
Ра́дуйся, ико́ну Твою́ чуде́сне во огни́ сохра́ньшая; ра́дуйся, си́м зна́мением любо́вь Твою́ к на́м я́вльшая.
Ра́дуйся, огнезра́чная Пала́то на херуви́мех Седя́щаго; ра́дуйся, одушевле́нный Престо́ле го́рними и до́льними Влады́чествующаго.
Ра́дуйся, вочелове́чению Еди́наго от Тро́ицы непоро́чно послужи́вшая; ра́дуйся, Творца́ Не́ба и земли́ без се́мени воплоти́вшая.
Ра́дуйся, О́гнь Божества́ во чре́ве Твое́м вмести́вшая; ра́дуйся, Христа́, Бо́жию Си́лу и Бо́жию Прему́дрость, на́м породи́вшая.
Ра́дуйся, пла́мень огня́ гее́нскаго росо́ю моли́тв Твои́х угаша́ющая; ра́дуйся, хла́дная сердца́ на́ша огне́м любве́ Бо́жия воспламеня́ющая.
Ра́дуйся, от вся́ких бе́д и скорбе́й на́с сохраня́ющая; ра́дуйся, жили́ща на́ша от о́гненнаго запале́ния соблюда́ющая.
Ра́дуйся, чи́стая Отрокови́це, те́плая Предста́тельнице о душа́х на́ших.
Кондак 5
Боголюби́вая Храни́тельница яви́лася еси́, Влады́чице, егда́ зли́и та́тие, прише́дше в це́рковь, тща́хуся ри́зу ико́ны Твоея́ восхи́тити. Ты́ же, Пречи́стая, наказу́ющи, наказа́ла еси́ святота́тцы сия́, ины́я попали́вши огне́м от ли́ка ико́ны Твоея́ исше́дшим, ины́я же вразуми́ла еси́ воспе́ти Бо́гу: Аллилу́иа.
Икос 5
Ве́мы, вои́стину ве́мы, Влады́чице, я́ко не оста́виши ны́, беззащи́тныя, и воспрети́ши враго́м ви́димым и неви́димым, тща́щимся погуби́ти ду́ши на́ша и Ца́рствия Небе́снаго лиши́ти. Те́мже, я́ко обличи́ла еси́ святота́тцы злы́я, соблюди́ и на́с от злы́х та́тей кня́зя возду́шнаго, да благода́рственно Ти́ вопие́м:
Ра́дуйся, ро́да христиа́нскаго те́плая Засту́пнице; ра́дуйся, во оби́тели ра́йския блага́я Путеводи́тельнице.
Ра́дуйся, пра́ведный гне́в Бо́жий на ми́лость претворя́ющая; ра́дуйся, отча́янных и отве́рженных непреста́нно ми́лующая.
Ра́дуйся, помраче́нных смы́слом благода́тное Просвеще́ние; ра́дуйся, творя́щих злы́я по́хоти гро́зное Вразумле́ние.
Ра́дуйся, лука́выя прави́тели стро́го облича́ющая; ра́дуйся, оби́женныя и́ми любо́вию огражда́ющая.
Ра́дуйся, умерщвле́нныя грехми́ благода́тию Твое́ю оживля́ющая; ра́дуйся, наде́ждою бла́г ве́чных и́х увеселя́ющая.
Ра́дуйся, злы́я ра́спри умиря́ющая; ра́дуйся, и в ма́лых ско́рбех на́м помога́ющая.
Ра́дуйся, чи́стая Отрокови́це, те́плая Предста́тельнице о душа́х на́ших.
Кондак 6
Пропове́дуют гра́ди и ве́си земли́ на́шея чудеса́ Твоя́, Богороди́тельнице, и́хже Ты́ яви́ла еси́ в защище́нии люде́й правосла́вных. Те́мже и ико́на Твоя́ просла́вися мно́гими чудесы́ и яви́ся ру́сским вели́ким князе́м, я́ко щи́т и огражде́ние и на враги́ одоле́ние, и́же побе́ды улуча́вше, вопия́ху Бо́гу: Аллилу́иа.
Икос 6
Возсия́ оте́честву на́шему от ико́ны Твоея́, Влады́чице, ди́вная побе́да, егда́ правосла́внии во́ини изнесо́ша ю́ проти́ву изме́нников и инове́рных, хотя́щих гра́д Москву́ разори́ти и ве́ру Правосла́вную погуби́ти. Ты́ же, одоле́ние на враги́ дарова́вши, тьму́ неве́рия отгна́ла еси́, все́х же научи́ла еси́ с любо́вию взыва́ти:
Ра́дуйся, Зе́млю Ру́сскую возлюби́вшая; ра́дуйся, оте́чество на́ше в уде́л Себе́ избра́вшая.
Ра́дуйся, враго́в на́ших гро́зное Устраше́ние; ра́дуйся, ве́ры Правосла́вныя всемо́щное Защище́ние.
Ра́дуйся, Покро́вом Твои́м на́с покрыва́ющая; ра́дуйся, заблу́ждших к позна́нию И́стины приводя́щая.
Ра́дуйся, в де́нь ско́рби пла́ч ве́рных в ра́дость обрати́вшая; ра́дуйся, зна́мением ми́лости Твоея́ и́х сердца́ возвесели́вшая.
Ра́дуйся, щедро́ты Твоя́ ве́рным лю́дем излива́ющая; ра́дуйся, ико́ною Твое́ю и́м помога́ющая.
Ра́дуйся, несумне́нная на́ша Наде́ждо; ра́дуйся, ти́хое и до́брое Приста́нище.
Ра́дуйся, чи́стая Отрокови́це, те́плая Предста́тельнице о душа́х на́ших.
Кондак 7
Хотя́щи обнови́ти чудотво́рную ико́ну Твою́, Богома́ти, от мно́г ле́т в ве́тхость прише́дшу, сестра́ царе́ва со усе́рдием украси́ ю́ и, соверши́вши моле́бное пе́ние, возврати́ в новосозда́нную це́рковь, прославля́ющи Тя́, Пречи́стая, Бо́гу же взыва́ющи: Аллилу́иа.
Икос 7
Ди́вна дела́ Твоя́, Влады́чице, и кто́ возмо́жет досто́йно воспе́ти я́, издре́вле бо, я́ко зало́г ми́лости, ико́ну Твою́ оте́честву на́шему дарова́ла еси́ скорбя́щим на утеше́ние, боля́щим во здра́вие и все́м христиа́ном во спасе́ние. Сего́ ра́ди, благода́рни су́ще, на о́браз Тво́й с любо́вию взира́юще, со умиле́нием зове́м:
Ра́дуйся, пу́ть ко спасе́нию на́м указу́ющая; ра́дуйся, ду́ши ве́рных к ти́хому приста́нищу приводя́щая.
Ра́дуйся, пла́ч ма́терей о ча́дех свои́х утиша́ющая; ра́дуйся, ю́ных от растле́ния ми́ра сего́ спаса́ющая.
Ра́дуйся, подвиза́ющихся к Ца́рствию Небе́сному Путеводи́тельнице; ра́дуйся, душепа́губных ересе́й и раско́лов Искорени́тельнице.
Ра́дуйся, мра́к грехо́вный ду́ш на́ших просвеща́ющая; ра́дуйся, у́м на́ш в го́рняя вперя́ющая.
Ра́дуйся, пристра́стие к тле́нному бога́тству от на́с отража́ющая; ра́дуйся, сокро́вище нетле́нное на Небеси́ иска́ти все́х науча́ющая.
Ра́дуйся, моля́щихся Тебе́ и Сы́ну Твоему́ Покро́в и Заступле́ние; ра́дуйся, лю́те стра́ждущим ско́рое Вспоможе́ние.
Ра́дуйся, Чи́стая Отрокови́це, те́плая Предста́тельнице о душа́х на́ших.
Кондак 8
Стра́нное чу́до яви́ла еси́, Богоро́дице, не́коей жене́, я́же глу́ха и не́ма су́щи, мимоходя́ше и моля́шеся пред ико́ною Твое́ю. Ты́ же, Милосе́рдая Ма́ти, не презре́вши моле́ния ея́, дарова́ла еси́ слу́х, безгла́сная же уста́ подви́гла еси́ благода́рно воспе́ти Бо́гу: Аллилу́иа.
Икос 8
Все́ житие́ на́ше на земли́ боле́знено и вся́кия ско́рби испо́лнено е́сть. Но ве́дуще Тя́, Пречи́стая, ско́рую Помо́щницу и благу́ю Засту́пницу ро́да христиа́нскаго, с ве́рою несумне́нною к Тебе́ прибега́ем и пред ико́ною Твое́ю чудотво́рною сле́зы пролива́ем, во умиле́нии зову́ще си́це:
Ра́дуйся, иере́ев честны́х Благослове́ние; ра́дуйся, и́ноком в по́двизех Поможе́ние.
Ра́дуйся, безма́терних сиро́т любе́зное Воспита́ние; ра́дуйся, отроко́в благода́тное Просвеще́ние.
Ра́дуйся, супру́гом в любви́ Единомы́слие; ра́дуйся, ста́рцем наде́жное Подкрепле́ние.
Ра́дуйся, а́лчущих и жа́ждущих Пита́тельнице; ра́дуйся, о все́х на́с при́сная Моли́твеннице.
Ра́дуйся, благода́тное Утеше́ние все́х скорбя́щих; ра́дуйся, несокруши́мое защище́ние на Тя́ упова́ющих.
Ра́дуйся, в ча́с сме́ртный на́м помога́ющая; ра́дуйся, смире́нным Ца́рствие Небе́сное уготовля́ющая.
Ра́дуйся, Чи́стая Отрокови́це, те́плая Предста́тельнице о душа́х на́ших.
Кондак 9
Все́ естество́ а́нгельское диви́тся Твоему́ неизрече́нному милосе́рдию, Всеми́лостивая Влады́чице, зане́ те́плым Твои́м предста́тельством пред Сы́ном Твои́м ро́д челове́ческий заступа́еши, ве́сь ми́р от бе́д избавля́еши и от ве́чныя сме́рти спаса́еши все́х, с ве́рою к Тебе́ притека́ющих, Бо́гу же вопию́щих: Аллилу́иа.
Икос 9
Вети́и боговеща́ннии мно́гая пе́ния соста́виша в че́сть Твою́, Богоро́дице, в ни́хже по достоя́нию просла́виша Тя́ и воспе́ша чудеса́ от ико́н Твои́х явле́нная. Та́кожде и мы́, любо́вию объя́ти су́ще, дерза́ем благода́рственно принести́ Тебе́ похвалы́ сия́:
Ра́дуйся, Влады́чице, ми́лостивая о на́с пред Бо́гом Засту́пнице; ра́дуйся, христиа́ном Помо́щнице и милосе́рдая о гре́шных Предста́тельнице.
Ра́дуйся, Всецари́це, неду́ги на́ша благода́тию исцеля́ющая; ра́дуйся, блага́я Врата́рнице, две́ри ра́йския ве́рным отверза́ющая.
Ра́дуйся, благода́тная Богоро́дице Де́во, поги́бших Взыска́ние и все́х скорбя́щих Ра́досте; ра́дуйся, Ма́ти Де́во всепе́тая, христиа́н Похвало́.
Ра́дуйся, всеблага́я Скоропослу́шнице, проше́ния на́ша во бла́го исполня́ющая; ра́дуйся, неча́янную ра́дость ве́рным да́рующая.
Ра́дуйся, Благода́тная, Купино́ неопали́мая, о́гненнаго запале́ния на́с избавля́ющая; ра́дуйся, Влады́чице, неупива́емая Ча́ше, духо́вную на́шу жа́жду утоля́ющая.
Ра́дуйся, Пречи́стая, от ико́ны Твоея́ ми́лости на́м источа́ющая; ра́дуйся, Обра́дованная, во успе́нии Твое́м на́с не оставля́ющая.
Ра́дуйся, Чи́стая Отрокови́це, те́плая Предста́тельнице о душа́х на́ших.
Кондак 10
Спасти́ хотя́ ро́д челове́ческий, Человеколю́бец Госпо́дь дарова́ на́м Ма́терь Свою́ в покро́в и защище́ние. Те́мже, благода́рни су́ще, на Тя́ наде́емся, Влады́чице, и умиле́нно про́сим: бу́ди на́м всеблага́я Помо́щница, да в ра́дости воспои́м Бо́гу благода́рственную пе́снь: Аллилу́иа.
Икос 10
Стена́ необори́мая от ле́т дре́вних яви́лася еси́, Пречи́стая Влады́чице, в стране́ на́шей, излива́ющи чудеса́ и осеня́ющи благода́тною по́мощию христолюби́выя во́ины. Сия́ ве́дуще, благове́рнии кня́зие и вси́ лю́дие со благогове́нием вопия́ху Ти́ си́це:
Ра́дуйся, при́сно о на́с, гре́шных, промышля́ющая; ра́дуйся, в го́ды лю́тых испыта́ний на́с не оставля́ющая.
Ра́дуйся, в пра́вой ве́ре Укрепле́ние; ра́дуйся, наде́ждою спасе́ния Ободре́ние.
Ра́дуйся, Еди́ному Бо́гу рабо́тати науча́ющая; ра́дуйся, за́поведи Бо́жия исполня́ти помога́ющая.
Ра́дуйся, и́щущим спасе́ния пу́ть указу́ющая; ра́дуйся, и благода́ть и́м ниспосыла́ющая.
Ра́дуйся, го́рестная воздыха́ния на́ша утиша́ющая; ра́дуйся, сле́зы с лани́т отира́ющая.
Ра́дуйся, николи́же на́с, гре́шных, забыва́ющая; ра́дуйся, непреста́нно за на́с Христу́ моля́щаяся.
Ра́дуйся, Чи́стая Отрокови́це, те́плая Предста́тельнице о душа́х на́ших.
Кондак 11
Пе́ние умиле́нное и благода́рственное прино́сим Ти́, Пречи́стая Влады́чице, я́ко во дни́ гоне́ния безбо́жнаго зе́млю на́шу сохрани́ла еси́. Умоли́, Милосе́рдая Ма́ти, Сы́на Твоего́ и Бо́га на́шего, е́же Це́ркви росси́йстей в ми́ре и благоде́нствии пребыва́ти и огради́ти ю́ от неве́рия, раско́ла и ересе́й, да вси́ еди́ными усты́ и еди́ным се́рдцем сподо́бимся воспева́ти Бо́гу: Аллилу́иа.
Икос 11
Светоза́рная Твоя́ ико́на, Всепе́тая Богоро́дице, ю́же дре́вле благове́рный кня́зь Дими́трий на объя́тиях свои́х ноша́ше, и до дне́сь благогове́йно почита́ется в преде́лех земли́ Моско́вския. Ве́рнии бо лю́дие, возжеле́вше благода́ти тоя́ име́ти прича́стие, хра́мы во сла́ву Твою́ созида́ют и пред о́бразом Твои́м взыва́ют си́це:
Ра́дуйся, все́х притека́ющих к Тебе́ ско́рая Услы́шательнице; ра́дуйся, изнемога́ющих от уны́ния и печа́ли блага́я Уте́шительнице.
Ра́дуйся, воздыха́ний на́ших не отверга́ющая; ра́дуйся, смяте́нным душа́м ми́р и поко́й подаю́щая.
Ра́дуйся, на кня́зи и сы́ны челове́ческия наде́ятися на́м возбраня́ющая; ра́дуйся, ко́зни диа́вольския побежда́ти на́м помога́ющая.
Ра́дуйся, я́ко Моско́вскую зе́млю возлюби́ла еси́; ра́дуйся, я́ко хра́мы Гре́бневския в не́й устро́ити благоволи́ла еси́.
Ра́дуйся, Богоро́дских преде́лов ди́вное украше́ние; ра́дуйся, гра́да Одинцо́ва незри́мое охране́ние.
Ра́дуйся, ве́сь на реце́ Кля́зьме ико́ною Твое́ю благослови́вшая; ра́дуйся, все́х на́с Твои́м Покро́вом не оставля́ющая.
Ра́дуйся, Чи́стая Отрокови́це, те́плая Предста́тельнице о душа́х на́ших.
Кондак 12
Благода́ти Твоея́ не лиши́ на́с, Влады́чице, погря́зших в пучи́не беззако́ний и лю́те стра́ждущих. Оба́че всю́ наде́жду на Тя́ возлага́ем и, на о́браз Тво́й со умиле́нием взира́ем, от него́же вси́ скорбя́щии и обремене́ннии грехми́ мно́гими спасе́ние и цельбы́ прие́млют и ра́достно о Тебе́ воспева́ют Всеблаго́му Бо́гу: Аллилу́иа.
Икос 12
Пою́ще Твоя́ чудеса́, взира́ем на о́браз Тво́й, Богома́ти. Ты́ бо, десни́цею Младе́нца Христа́ объе́млющи, мо́лишися о на́с, О́н же, мольбы́ Твоя́ прие́мля, ми́лостивно благословля́ет Тя́ в зна́мение Своего́ благоволе́ния. О се́м у́бо удивля́ющеся, с любо́вию вопие́м Ти́ си́це:
Ра́дуйся, Творца́ вся́ческих на руку́ Твое́ю держа́щая; ра́дуйся, о на́с к Нему́ при́сно хода́тайствующая.
Ра́дуйся, Цари́це, Царе́м ца́рствующих избра́нная; ра́дуйся, Влады́чице, Го́сподем госпо́дствующих просла́вленная.
Ра́дуйся, све́том ра́дости ду́ши ободря́ющая; ра́дуйся, грехо́вную мглу́ на́шу разгоня́ющая.
Ра́дуйся, лука́вых духо́в Низложе́ние; ра́дуйся, все́х христиа́н Упова́ние.
Ра́дуйся, Свети́льниче златы́й, не́бо и зе́млю освяща́ющий; ра́дуйся, Же́зле пра́вый, пу́ть к Бо́гу указу́ющий.
Ра́дуйся, неугаси́мая Лампа́до, в нощи́ жития́ на́м светя́щая; ра́дуйся, светови́дная Ле́ствице, к престо́лу Госпо́дню приводя́щая.
Ра́дуйся, Чи́стая Отрокови́це, те́плая Предста́тельнице о душа́х на́ших.
Кондак 13
О, Всепе́тая Ма́ти, Пречи́стая Де́во, Всеми́лостивая Госпоже́ Богоро́дице, приими́ от на́с, недосто́йных ра́б Твои́х, ма́лое сие́ моле́ние, в простоте́ се́рдца Тебе́ приноси́мое, и изба́ви на́с от вся́кия ско́рби, зо́л и боле́зней, не оста́ви на́с ма́терним Твои́м предста́тельством и Ца́рствия Небе́снаго сподо́би, о Тебе́ вопию́щих: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелов мно́жества и вся́ небе́сная во́инства сла́вят Тя́, Цари́цу Небесе́ и земли́. Просла́ви Тя́, Пречи́стая, и вели́кий кня́зь Дими́трий с во́и ру́сскими, егда́, я́ко победи́тель над нечести́выми ага́ряны, пу́ть сво́й к Первопресто́льному гра́ду соверша́я, в да́р чудотво́рную ико́ну Твою́ от люди́й гра́да Гре́бени прия́т. Те́мже, держа́ ю́ на объя́тиих свои́х, со дерзнове́нием возопи́ Преблагослове́нней:
Ра́дуйся, сре́тением ико́ны Твоея́ ве́рныя ратобо́рцы возвесели́вшая; ра́дуйся, е́ю благослове́ние Первопресто́льному гра́ду дарова́вшая.
Ра́дуйся, ше́ствием Твои́м зе́млю Ру́сскую освяти́вшая; ра́дуйся, к ве́ре христиа́нстей мно́гия лю́ди обрати́вшая.
Ра́дуйся, ага́рянскаго злове́рия Обличе́ние; ра́дуйся, ве́ры Правосла́вныя Утвержде́ние.
Ра́дуйся, с ве́рою прибега́ющим проше́ния исполня́ющая; ра́дуйся, лю́дем правосла́вным при́сно чудоде́ющая.
Ра́дуйся, ско́рая челове́ком Помо́щнице; ра́дуйся, прему́драя ве́рным Наста́внице.
Ра́дуйся, Вели́ких Моско́вских князе́й Покрови́тельнице; ра́дуйся, ро́да христиа́нскаго усе́рдная Засту́пнице.
Ра́дуйся, Чи́стая Отрокови́це, те́плая Предста́тельнице о душа́х на́ших.
Кондак 1
Взбра́нней Воево́де и Де́ве Богоро́дице, от все́х родо́в на спасе́ние на́ше избра́нней и, я́ко Ма́тери Христа́, Бо́га на́шего, достодо́лжно ублажа́емей, похва́льное пе́ние, ве́рнии, принесе́м и пред ико́ною Ея́ с наде́ждою и любо́вию моли́тву вознесе́м: изба́ви на́с, Влады́чице, от вра́г ви́димых и неви́димых, да спасе́ннии Тобо́ю воззове́м вси́ ра́достно:
Ра́дуйся, чи́стая Отрокови́це, те́плая Предста́тельнице о душа́х на́ших.
Молитвы
О, Цари́це Всеблага́я и те́плая Засту́пнице! К Тебе́, еди́ней на́шей Наде́жди и Упова́нию, прекло́ньше коле́на, приле́жно мо́лимся: услы́ши проше́ния на́ша, из глубины́ се́рдца Тебе́ приноси́мая и бу́ди на́м, блужда́ющим по распу́тиям ско́рбныя жи́зни, ве́рная ко спасе́нию Путеводи́тельница.
О, держа́вная Засту́пнице! Ты́ дре́вле князе́м ру́сским была́ еси́ во бра́нех Вспоможе́ние и на враги́ Одоле́ние, мно́гажды зе́млю на́шу от наше́ствия иноплеме́нных сохраня́ющи и лю́ди ру́сския спаса́ющи. Ны́не же, пред святы́м о́бразом Твои́м предстоя́ще, усе́рдное благодаре́ние прино́сим и те́пле мо́лимся: заступа́й и на бу́дущее вре́мя зе́млю Ру́сскую, умилосе́рдися о на́с, в суете́ жи́знь свою́ провожда́ющих, и прости́ недосто́йных, водвори́ в душа́х на́ших ми́р и тишину́, егда́ же пости́гнет искуше́ние, помози́ прия́ти е́, я́ко вразумле́ние, па́че же принести́ и́стинныя плоды́ покая́ния.
О, Пречи́стая Богоро́дице! Да́руй па́стырем Це́ркве ре́вность и благоче́стие, прави́телем му́дрость и правосу́дие, во́ином му́жество и кре́пость и все́м лю́дем, я́же ко спасе́нию поле́зная. В ча́с же кончи́ны на́шея отжени́ от на́с духо́в зло́бы поднебе́сных, и́щущих поги́бели на́шея, и сподо́би, Всеми́лостивая Влады́чице, непреткнове́нно проити́ возду́шная мыта́рства и дости́гнути Ца́рства Небе́снаго, иде́же вси́ святи́и вку́пе с Тобо́ю прославля́ют Триеди́наго Бо́га Отца́, и Сы́на, и Свята́го Ду́ха во ве́ки веко́в. Ами́нь.
О пречу́дная и превы́шшая все́х тва́рей Цари́це Богоро́дице, Небе́снаго Царя́ Христа́ Бо́га на́шего Ма́ти, пречи́стая Одиги́трие Мари́е! услы́ши на́с гре́шных и недосто́йных в ча́с се́й моля́щихся и припа́дающих к Твоему́ пречи́стому о́бразу со слеза́ми и умиле́нно глаго́лющих: изведи́ на́с от ро́ва страсте́й, Влады́чице Преблага́я, изба́ви на́с от вся́кия ско́рби и печа́ли, огради́ от вся́кия напа́сти и злы́я клеветы́, и от непра́веднаго и лю́таго наве́та вра́жия. Мо́жеши бо, о благода́тная Ма́ти на́ша от вся́каго зла́ сохрани́ти лю́ди Твоя́ и вся́ким благодея́нием снабди́ти и спасти́: ра́зве Тебе́ ины́я Предста́тельницы в бе́дах и обстоя́ниих, и те́плыя Хода́таицы о на́с, гре́шных, не и́мамы. Умоли́, Госпоже́ пресвята́я, Сы́на Твоего́ Христа́ Бо́га на́шего, да удосто́ит на́с Ца́рствия Небе́снаго: сего́ ра́ди всегда́ сла́вим Тя́, я́ко вино́вницу спасе́ния на́шего, и превозно́сим свято́е и великоле́пное и́мя Отца́ и Сы́на и Свята́го Ду́ха, в Тро́ице сла́вимаго и поклоня́емаго Бо́га, во ве́ки веко́в. Ами́нь.
Конда́къ а҃
Взбра́ннѣй воево́дѣ и҆ дв҃ѣ бцⷣѣ, ѿ всѣ́хъ родѡ́въ на сп҃се́нїе на́ше и҆збра́ннѣй и҆, ꙗ҆́кѡ мт҃ри хрⷭ҇та̀, бг҃а на́шегѡ, достодо́лжнѡ ᲂу҆бл҃жа́емѣй, похва́льное пѣ́нїе, вѣ́рнїи, принесе́мъ и҆ пред̾ і҆кѡ́ною є҆ѧ̀ съ наде́ждою и҆ любо́вїю моли́твꙋ вознесе́мъ: и҆зба́ви на́съ, влⷣчце, ѿ вра̑гъ ви́димыхъ и҆ неви́димыхъ, да сп҃се́ннїи тобо́ю воззове́мъ всѝ ра́достнѡ:
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
І҆́косъ а҃
А҆́гг҃лѡвъ мно́жества и҆ всѧ̑ нбⷭ҇наѧ во́инства сла́вѧтъ тѧ̀, цр҃и́цꙋ нб҃сѐ и҆ землѝ. Просла́ви тѧ̀, пречⷭ҇таѧ, и҆ вели́кїй кнѧ́зь дими́трїй съ во́и рꙋ́сскими, є҆гда̀, ꙗ҆́кѡ побѣди́тель над̾ нечести́выми а҆га́рѧны, пꙋ́ть сво́й къ первопресто́льномꙋ гра́дꙋ соверша́ѧ, въ да́ръ чꙋдотво́рнꙋю і҆кѡ́нꙋ твою̀ ѿ люді́й гра́да гре́бени прїѧ́тъ. Тѣ́мже, держа̀ ю҆̀ на ѡ҆б̾ѧ́тїихъ свои́хъ, со дерзнове́нїемъ возопѝ пребл҃гослове́ннѣй:
Ра́дꙋйсѧ, срѣ́тенїемъ і҆кѡ́ны твоеѧ̀ вѣ́рныѧ ратобо́рцы возвесели́вшаѧ: ра́дꙋйсѧ, є҆́ю бл҃гослове́нїе первопресто́льномꙋ гра́дꙋ дарова́вшаѧ.
Ра́дꙋйсѧ, ше́ствїемъ твои́мъ зе́млю рꙋ́сскꙋю ѡ҆ст҃и́вшаѧ: ра́дꙋйсѧ, къ вѣ́рѣ хрⷭ҇тїа́нстѣй мнѡ́гїѧ лю́ди ѡ҆брати́вшаѧ.
Ра́дꙋйсѧ, а҆га́рѧнскагѡ ѕловѣ́рїѧ ѡ҆бличе́нїе: ра́дꙋйсѧ, вѣ́ры правосла́вныѧ ᲂу҆твержде́нїе.
Ра́дꙋйсѧ, съ вѣ́рою прибѣга́ющимъ проше́нїѧ и҆сполнѧ́ющаѧ: ра́дꙋйсѧ, лю́демъ правосла́внымъ прⷭ҇нѡ чꙋдодѣ́ющаѧ.
Ра́дꙋйсѧ, ско́раѧ чл҃вѣ́кѡмъ помо́щнице: ра́дꙋйсѧ, премꙋ́драѧ вѣ́рнымъ наста́внице.
Ра́дꙋйсѧ, вели́кихъ моско́вскихъ кн҃зе́й покрови́тельнице: ра́дꙋйсѧ, ро́да хрⷭ҇тїа́нскагѡ ᲂу҆се́рднаѧ застꙋ́пнице.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ в҃
Ви́дѧще хрⷭ҇толюби́вїи лю́дїе, въ страда́нїихъ и҆ ско́рбѣхъ сꙋ́щїи, чꙋдеса̀ ѿ і҆кѡ́ны твоеѧ̀, влⷣчце, быва̑емаѧ, ѿ мно́гихъ мѣ́стъ къ тебѣ̀ стека́хꙋсѧ и҆ моли́твы возсыла́хꙋ. Тѣ́мже, полꙋчи́вше съ вѣ́рою проси̑маѧ, бл҃года́рнѣ и҆з̾ глꙋбины̀ серде́цъ взыва́хꙋ бг҃ꙋ: А҆ллилꙋ́їа.
І҆́косъ в҃
Разꙋмѣ́ша лю́дїе промышле́нїе бж҃їе ѡ҆ себѣ̀, є҆гда̀, всечтⷭ҇на́ѧ і҆кѡ́на твоѧ̀, бг҃ома́ти, ꙗ҆́кѡ со́лнце пресвѣ́тлое, въ сто́льный гра́дъ москвꙋ̀ ст҃ы́мъ вели́кимъ кн҃земъ дими́трїемъ принесе́сѧ. Сегѡ̀ ра́ди, свѣ́тло пра́зднꙋюще чтⷭ҇на́гѡ ѻ҆́браза твоегѡ̀ срѣ́тенїе, съ любо́вїю къ тебѣ̀ взыва́хꙋ:
Ра́дꙋйсѧ, ꙗ҆́кѡ і҆кѡ́на твоѧ̀ во сп҃сѣ́нїе на́мъ дарова́сѧ: ра́дꙋйсѧ, ꙗ҆́кѡ то́ю собо́рнаѧ це́рковь ᲂу҆спе́нїѧ ᲂу҆краси́сѧ.
Ра́дꙋйсѧ, зе́млю рꙋ́сскꙋю въ ᲂу҆дѣ́лъ себѣ̀ и҆збра́вшаѧ: ра́дꙋйсѧ, мно́гими чꙋдесы̀ лю́ди гра́да гре́бени ᲂу҆диви́вшаѧ.
Ра́дꙋйсѧ, заблꙋ́ждшихъ грѣ́шникѡвъ ско́рое вразꙋмле́нїе: ра́дꙋйсѧ, серде́цъ на́шихъ ᲂу҆миле́нїе.
Ра́дꙋйсѧ, покро́ве чистоты̀ и҆ дѣ́вства: ра́дꙋйсѧ, ѡ҆гражде́нїе бл҃га́гѡ сꙋпрꙋ́жества.
Ра́дꙋйсѧ, прибѣга́ющихъ къ тебѣ̀ млⷭ҇рдаѧ спорꙋ́чнице: ра́дꙋйсѧ, ѡ҆ста́вленныхъ врача́ми безме́зднаѧ цѣли́тельнице.
Ра́дꙋйсѧ, бжⷭ҇твенною сла́вою ᲂу҆краше́ннаѧ: ра́дꙋйсѧ, ди́вными чꙋдеса́ми просла́вленнаѧ.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ г҃
Си́лою, да́нною тѝ свы́ше, мнѡ́гаѧ чꙋдеса̀ сотвори́ла є҆сѝ, влⷣчце, въ землѝ на́шей и҆ не возмо́жнѡ є҆́сть и҆счи́слити сла́вныѧ побѣ́ды над̾ сꙋпоста́ты. Кнѧ́зїе бо рꙋ́сстїи, и҆мѣ́юще і҆кѡ́нꙋ твою̀, безстра́шнѡ ѿража́хꙋ вра́жїѧ по́лчища, вопїю́ще бг҃ꙋ: А҆ллилꙋ́їа.
І҆́косъ г҃
И҆мꙋ́ще тѧ̀ неꙋсыпа́ющꙋю моли́твенницꙋ и҆ ᲂу҆се́рднꙋю застꙋ́пницꙋ, всѧ́кое ᲂу҆ны́нїе и҆ стра́хъ ѿча́ѧнїѧ побѣжда́емъ. Ты́ бо, стѧжа́вши ве́лїе дерзнове́нїе къ сн҃ꙋ твоемꙋ̀ и҆ бг҃ꙋ на́шемꙋ, любо́вїю покрыва́еши зе́млю рꙋ́сскꙋю и҆ всѣ̑мъ твори́ши сп҃сти́сѧ. Сегѡ̀ ра́ди, а҆́ще и҆ неради́ви сꙋ́ще ѡ҆ свое́мъ сп҃се́нїи, ѻ҆ба́че дерза́емъ со ᲂу҆миле́нїемъ глаго́лати тебѣ̀ такова̑ѧ:
Ра́дꙋйсѧ, въ бѣда́хъ и҆ ско́рбѣхъ ско́раѧ помо́щнице: ра́дꙋйсѧ, те́плаѧ ѡ҆ на́съ пред̾ бг҃омъ мл҃твеннице.
Ра́дꙋйсѧ, правосла́вныхъ во́инѡвъ на по́ли бра́ни ᲂу҆крѣплѧ́ющаѧ: ра́дꙋйсѧ, є҆ле́емъ блгⷣти твоеѧ̀ ра̑ны и҆̀хъ врачꙋ́ющаѧ.
Ра́дꙋйсѧ, вѣ́рнаѧ ча̑да на по́двиги бл҃гословлѧ́ющаѧ: ра́дꙋйсѧ, невѣ̑рныѧ под̾ но́ги и҆̀хъ покарѧ́ющаѧ.
Ра́дꙋйсѧ, грѣ́шникѡмъ гро́зное ѡ҆бличе́нїе: ра́дꙋйсѧ, ка́ющымсѧ чл҃вѣколю́бное снисхожде́нїе.
Ра́дꙋйсѧ, дꙋхѡ́внаѧ ѻ҆́чи, є҆́же ви́дѣти грѣхѝ, на́мъ ѿкрыва́ющаѧ: ра́дꙋйсѧ, блгⷣтнꙋю по́мощь ко и҆справле́нїю подаю́щаѧ.
Ра́дꙋйсѧ, страсте́й па́гꙋбныхъ и҆сцѣле́нїе: ра́дꙋйсѧ, дꙋ́шъ на́шихъ сп҃се́нїе.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ д҃
Бꙋ́рею недоꙋмѣ́нїй ѡ҆бдержи́ми бы́ша лю́дїе, ви́дѧще це́рковь ᲂу҆спе́нїѧ твоегѡ̀, влⷣчце, ѻ҆гне́мъ ѡ҆б̾ѧ́тꙋ. Є҆гда́ же ᲂу҆зрѣ́ша і҆кѡ́нꙋ твою̀ на воздꙋ́сѣ верхꙋ̀ пла́мене стоѧ́щꙋ и҆ не сгара́ющꙋ, просла́виша бг҃а ди́внагѡ въ чꙋдесѣ́хъ свои́хъ и҆ тѧ̀, прест҃а́ѧ дв҃о, ѻ҆́гнь бжⷭ҇тва̀ во чре́вѣ твое́мъ вмѣсти́вшꙋю, въ ра́дости пою́ще: А҆ллилꙋ́їа.
І҆́косъ д҃
Слы́шаще чꙋ́до ѿ і҆кѡ́ны твоеѧ̀, всемлⷭ҇тиваѧ бцⷣе, быва́емое, ка́кѡ во ѻ҆гнѝ, ꙗ҆́кѡ неѡпали́маѧ кꙋпина̀, ꙗ҆ви́сѧ несгара́ема, ᲂу҆дивлѧ́емсѧ и҆, разꙋмѣ́юще зна́менїе млⷭ҇ти твоеѧ̀, воспѣва́емъ си́це:
Ра́дꙋйсѧ, і҆кѡ́нꙋ твою̀ чꙋде́снѣ во ѻ҆гнѝ сохра́ньшаѧ: ра́дꙋйсѧ, си́мъ зна́менїемъ любо́вь твою̀ къ на́мъ ꙗ҆́вльшаѧ.
Ра́дꙋйсѧ, ѻ҆гнезра́чнаѧ пала́то на херꙋві́мѣхъ сѣдѧ́щагѡ: ра́дꙋйсѧ, ѡ҆дꙋшевле́нный прⷭ҇то́ле го́рними и҆ до́льними влады́чествꙋющагѡ.
Ра́дꙋйсѧ, вочл҃вѣ́ченїю є҆ди́нагѡ ѿ трⷪ҇цы непоро́чнѡ послꙋжи́вшаѧ: ра́дꙋйсѧ, творца̀ нб҃а и҆ землѝ без̾ сѣ́мени воплоти́вшаѧ.
Ра́дꙋйсѧ, ѻ҆́гнь бжⷭ҇тва̀ во чре́вѣ твое́мъ вмѣсти́вшаѧ: ра́дꙋйсѧ, хрⷭ҇та̀, бж҃їю си́лꙋ и҆ бж҃їю премꙋ́дрость, на́мъ породи́вшаѧ.
Ра́дꙋйсѧ, пла́мень ѻ҆гнѧ̀ гее́нскагѡ росо́ю мл҃твъ твои́хъ ᲂу҆гаша́ющаѧ: ра́дꙋйсѧ, хла̑днаѧ сердца̀ на̑ша ѻ҆гне́мъ любвѐ бж҃їѧ воспламенѧ́ющаѧ.
Ра́дꙋйсѧ, ѿ всѧ́кихъ бѣ́дъ и҆ скорбе́й на́съ сохранѧ́ющаѧ: ра́дꙋйсѧ, жили́ща на̑ша ѿ ѻ҆́гненнагѡ запале́нїѧ соблюда́ющаѧ.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ є҃
Бг҃олюби́ваѧ храни́тельница ꙗ҆ви́ласѧ є҆сѝ, влⷣчце, є҆гда̀ ѕлі́и та́тїе, прише́дше въ це́рковь, тща́хꙋсѧ ри́зꙋ і҆кѡ́ны твоеѧ̀ восхи́тити. Ты́ же, пречⷭ҇таѧ, наказꙋ́ющи, наказа́ла є҆сѝ ст҃ота́тцы сїѧ̑, и҆ны́ѧ попали́вши ѻ҆гне́мъ ѿ ли́ка і҆кѡ́ны твоеѧ̀ и҆сше́дшимъ, и҆ны́ѧ же вразꙋми́ла є҆сѝ воспѣ́ти бг҃ꙋ: А҆ллилꙋ́їа.
І҆́косъ є҃
Вѣ́мы, вои́стиннꙋ вѣ́мы, влⷣчце, ꙗ҆́кѡ не ѡ҆ста́виши ны̀, беззащи́тныѧ, и҆ воспрети́ши врагѡ́мъ ви̑димымъ и҆ неви̑димымъ, тща́щимсѧ погꙋби́ти дꙋ́ши на̑ша и҆ црⷭ҇твїѧ нбⷭ҇нагѡ лиши́ти. Тѣ́мже, ꙗ҆́кѡ ѡ҆бличи́ла є҆сѝ ст҃ота́тцы ѕлы̑ѧ, соблюдѝ и҆ на́съ ѿ ѕлы́хъ та́тей кнѧ́зѧ воздꙋ́шнагѡ, да бл҃года́рственнѡ тѝ вопїе́мъ:
Ра́дꙋйсѧ, ро́да хрⷭ҇тїа́нскагѡ те́плаѧ застꙋ́пнице: ра́дꙋйсѧ, во ѻ҆би́тєли ра́йскїѧ бл҃га́ѧ пꙋтеводи́тельнице.
Ра́дꙋйсѧ, пра́ведный гнѣ́въ бж҃їй на млⷭ҇ть претворѧ́ющаѧ: ра́дꙋйсѧ, ѿча́ѧнныхъ и҆ ѿве́рженныхъ непреста́ннѡ ми́лꙋющаѧ.
Ра́дꙋйсѧ, помраче́нныхъ смы́сломъ блгⷣтное просвѣще́нїе: ра́дꙋйсѧ, творѧ́щихъ ѕлы́ѧ по́хоти гро́зное вразꙋмле́нїе.
Ра́дꙋйсѧ, лꙋка́выѧ прави́тели стро́гѡ ѡ҆блича́ющаѧ: ра́дꙋйсѧ, ѻ҆би́женныѧ и҆́ми любо́вїю ѡ҆гражда́ющаѧ.
Ра́дꙋйсѧ, ᲂу҆мерщвле́нныѧ грѣхмѝ блгⷣтїю твое́ю ѡ҆живлѧ́ющаѧ: ра́дꙋйсѧ, наде́ждою бл҃гъ вѣ́чныхъ и҆̀хъ ᲂу҆веселѧ́ющаѧ.
Ра́дꙋйсѧ, ѕлы́ѧ ра́спри ᲂу҆мирѧ́ющаѧ: ра́дꙋйсѧ, и҆ въ ма́лыхъ ско́рбѣхъ на́мъ помога́ющаѧ.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ ѕ҃
Проповѣ́дꙋютъ гра́ди и҆ ве́си землѝ на́шеѧ чꙋдеса̀ твоѧ̀, бг҃ороди́тельнице, и҆̀хже ты̀ ꙗ҆ви́ла є҆сѝ въ защище́нїи люде́й правосла́вныхъ. Тѣ́мже и҆ і҆кѡ́на твоѧ̀ просла́висѧ мно́гими чꙋдесы̀ и҆ ꙗ҆ви́сѧ рꙋ́сскимъ вели́кимъ кнѧзє́мъ, ꙗ҆́кѡ щи́тъ и҆ ѡ҆гражде́нїе и҆ на врагѝ ѡ҆долѣ́нїе, и҆́же побѣ́ды ᲂу҆лꙋча́вше, вопїѧ́хꙋ бг҃ꙋ: А҆ллилꙋ́їа.
І҆́косъ ѕ҃
Возсїѧ̀ ѻ҆те́чествꙋ на́шемꙋ ѿ і҆кѡ́ны твоеѧ̀, влⷣчце, ди́внаѧ побѣ́да, є҆гда̀ правосла́внїи во́ини и҆знесо́ша ю҆̀ проти́вꙋ и҆змѣ́нникѡвъ и҆ и҆новѣ́рныхъ, хотѧ́щихъ гра́дъ москвꙋ̀ разори́ти и҆ вѣ́рꙋ правосла́внꙋю погꙋби́ти. Ты́ же, ѡ҆долѣ́нїе на врагѝ дарова́вши, тмꙋ̀ невѣ́рїѧ ѿгна́ла є҆сѝ, всѣ́хъ же наꙋчи́ла є҆сѝ съ любо́вїю взыва́ти:
Ра́дꙋйсѧ, зе́млю рꙋ́сскꙋю возлюби́вшаѧ: ра́дꙋйсѧ, ѻ҆те́чество на́ше въ ᲂу҆дѣ́лъ себѣ̀ и҆збра́вшаѧ.
Ра́дꙋйсѧ, врагѡ́въ на́шихъ гро́зное ᲂу҆страше́нїе: ра́дꙋйсѧ, вѣ́ры правосла́вныѧ всемо́щное защище́нїе.
Ра́дꙋйсѧ, покро́вомъ твои́мъ на́съ покрыва́ющаѧ: ра́дꙋйсѧ, заблꙋ́ждшихъ къ позна́нїю и҆́стины приводѧ́щаѧ.
Ра́дꙋйсѧ, въ де́нь ско́рби пла́чь вѣ́рныхъ въ ра́дость ѡ҆брати́вшаѧ: ра́дꙋйсѧ, зна́менїемъ млⷭ҇ти твоеѧ̀ и҆̀хъ сердца̀ возвесели́вшаѧ.
Ра́дꙋйсѧ, щедрѡ́ты твоѧ̑ вѣ́рнымъ лю́демъ и҆злива́ющаѧ: ра́дꙋйсѧ, і҆кѡ́ною твое́ю и҆́мъ помога́ющаѧ.
Ра́дꙋйсѧ, несꙋмнѣ́ннаѧ на́ша наде́ждо: ра́дꙋйсѧ, ти́хое и҆ до́брое приста́нище.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ з҃
Хотѧ́щи ѡ҆бнови́ти чꙋдотво́рнꙋю і҆кѡ́нꙋ твою̀, бг҃ома́ти, ѿ мно́гъ лѣ́тъ въ ве́тхость прише́дшꙋ, сестра̀ царе́ва со ᲂу҆се́рдїемъ ᲂу҆красѝ ю҆̀ и҆, соверши́вши моле́бное пѣ́нїе, возвратѝ въ новосозда́ннꙋю це́рковь, прославлѧ́ющи тѧ̀, пречⷭ҇таѧ, бг҃ꙋ же взыва́ющи: А҆ллилꙋ́їа.
І҆́косъ з҃
Ди́вна дѣла̀ твоѧ̑, влⷣчце, и҆ кто̀ возмо́жетъ досто́йнѡ воспѣ́ти ѧ҆̀, и҆здре́вле бо, ꙗ҆́кѡ зало́гъ млⷭ҇ти, і҆кѡ́нꙋ твою̀ ѻ҆те́чествꙋ на́шемꙋ дарова́ла є҆сѝ скорбѧ́щимъ на ᲂу҆тѣше́нїе, болѧ́щимъ во здра́вїе и҆ всѣ̑мъ хрⷭ҇тїа́нѡмъ во сп҃се́нїе. Сегѡ̀ ра́ди, бл҃года́рни сꙋ́ще, на ѻ҆́бразъ тво́й съ любо́вїю взира́юще, со ᲂу҆миле́нїемъ зове́мъ:
Ра́дꙋйсѧ, пꙋ́ть ко сп҃се́нїю на́мъ ᲂу҆казꙋ́ющаѧ: ра́дꙋйсѧ, дꙋ́ши вѣ́рныхъ къ ти́хомꙋ приста́нищꙋ приводѧ́щаѧ.
Ра́дꙋйсѧ, пла́чь ма́терей ѡ҆ ча́дѣхъ свои́хъ ᲂу҆тиша́ющаѧ: ра́дꙋйсѧ, ю҆́ныхъ ѿ растлѣ́нїѧ мі́ра сегѡ̀ сп҃са́ющаѧ.
Ра́дꙋйсѧ, подвиза́ющихсѧ къ црⷭ҇твїю нбⷭ҇номꙋ пꙋтеводи́тельнице: ра́дꙋйсѧ, дꙋшепа́гꙋбныхъ є҆ресе́й и҆ раско́лѡвъ и҆скорени́тельнице.
Ра́дꙋйсѧ, мра́къ грѣхо́вный дꙋ́шъ на́шихъ просвѣща́ющаѧ: ра́дꙋйсѧ, ᲂу҆́мъ на́шъ въ го́рнѧѧ вперѧ́ющаѧ.
Ра́дꙋйсѧ, пристра́стїе къ тлѣ́нномꙋ бога́тствꙋ ѿ на́съ ѿража́ющаѧ: ра́дꙋйсѧ, сокро́вище нетлѣ́нное на нб҃сѝ и҆ска́ти всѣ́хъ наꙋча́ющаѧ.
Ра́дꙋйсѧ, молѧ́щихсѧ тебѣ̀ и҆ сн҃ꙋ твоемꙋ̀ покро́въ и҆ застꙋпле́нїе: ра́дꙋйсѧ, лю́тѣ стра́ждꙋщимъ ско́рое вспоможе́нїе.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ и҃
Стра́нное чꙋ́до ꙗ҆ви́ла є҆сѝ, бцⷣе, нѣ́коей женѣ̀, ꙗ҆́же глꙋ́ха и҆ нѣ́ма сꙋ́щи, мимоходѧ́ше и҆ молѧ́шесѧ пред̾ і҆кѡ́ною твое́ю. Ты́ же, млⷭ҇рдаѧ мт҃и, не презрѣ́вши молє́нїѧ є҆ѧ̀, дарова́ла є҆сѝ слꙋ́хъ, безгла́снаѧ же ᲂу҆ста̀ подви́гла є҆сѝ бл҃года́рнѡ воспѣ́ти бг҃ꙋ: А҆ллилꙋ́їа.
І҆́косъ и҃
Всѐ житїѐ на́ше на землѝ болѣ́зненѡ и҆ всѧ́кїѧ ско́рби и҆спо́лненѡ є҆́сть. Но вѣ́дꙋще тѧ̀, пречⷭ҇таѧ, ско́рꙋю помо́щницꙋ и҆ бл҃гꙋ́ю застꙋ́пницꙋ ро́да хрⷭ҇тїа́нскагѡ, съ вѣ́рою несꙋмнѣ́нною къ тебѣ̀ прибѣга́емъ и҆ пред̾ і҆кѡ́ною твое́ю чꙋдотво́рною сле́зы пролива́емъ, во ᲂу҆миле́нїи зовꙋ́ще си́це:
Ра́дꙋйсѧ, і҆ере́євъ чтⷭ҇ны́хъ бл҃гослове́нїе: ра́дꙋйсѧ, и҆́нокѡмъ въ по́двизѣхъ поможе́нїе.
Ра́дꙋйсѧ, безма́тернихъ сирѡ́тъ любе́зное воспита́нїе: ра́дꙋйсѧ, ѻ҆трокѡ́въ блгⷣтное просвѣще́нїе.
Ра́дꙋйсѧ, сꙋпрꙋ́гѡмъ въ любвѝ є҆диномы́слїе: ра́дꙋйсѧ, ста́рцємъ наде́жное подкрѣпле́нїе.
Ра́дꙋйсѧ, а҆́лчꙋщихъ и҆ жа́ждꙋщихъ пита́тельнице: ра́дꙋйсѧ, ѡ҆ всѣ́хъ на́съ прⷭ҇наѧ мл҃твеннице.
Ра́дꙋйсѧ, блгⷣтное ᲂу҆тѣше́нїе всѣ́хъ скорбѧ́щихъ: ра́дꙋйсѧ, несокрꙋши́мое защище́нїе на тѧ̀ ᲂу҆пова́ющихъ.
Ра́дꙋйсѧ, въ ча́съ сме́ртный на́мъ помога́ющаѧ: ра́дꙋйсѧ, смире́ннымъ црⷭ҇твїе нбⷭ҇ное ᲂу҆готовлѧ́ющаѧ.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ ѳ҃
Всѐ є҆стество̀ а҆́гг҃льское диви́тсѧ твоемꙋ̀ неизрече́нномꙋ млⷭ҇рдїю, всемлⷭ҇тиваѧ влⷣчце, занѐ те́плымъ твои́мъ предста́тельствомъ пред̾ сн҃омъ твои́мъ ро́дъ чл҃вѣ́ческїй застꙋпа́еши, ве́сь мі́ръ ѿ бѣ́дъ и҆збавлѧ́еши и҆ ѿ вѣ́чныѧ сме́рти сп҃са́еши всѣ́хъ, съ вѣ́рою къ тебѣ̀ притека́ющихъ, бг҃ꙋ же вопїю́щихъ: А҆ллилꙋ́їа.
І҆́косъ ѳ҃
Вѣті̑и бг҃овѣща́ннїи мнѡ́гаѧ пѣ̑нїѧ соста́виша въ че́сть твою̀, бцⷣе, въ ни́хже по достоѧ́нїю просла́виша тѧ̀ и҆ воспѣ́ша чꙋдеса̀ ѿ і҆кѡ́нъ твои́хъ ꙗ҆вле́ннаѧ. Та́кожде и҆ мы̀, любо́вїю ѡ҆б̾ѧ́ти сꙋ́ще, дерза́емъ бл҃года́рственнѡ принестѝ тебѣ̀ похвалы̑ сїѧ̑:
Ра́дꙋйсѧ, влⷣчце, млⷭ҇тиваѧ ѡ҆ на́съ пред̾ бг҃омъ застꙋ́пнице: ра́дꙋйсѧ, хрⷭ҇тїа́нѡмъ помо́щнице и҆ млⷭ҇рдаѧ ѡ҆ грѣ́шныхъ предста́тельнице.
Ра́дꙋйсѧ, всецр҃и́це, недꙋ́ги на̑ша блгⷣтїю и҆сцѣлѧ́ющаѧ: ра́дꙋйсѧ, бл҃га́ѧ врата́рнице, две́ри ра́йскїѧ вѣ́рнымъ ѿверза́ющаѧ.
Ра́дꙋйсѧ, блгⷣтнаѧ бцⷣе дв҃о, поги́бшихъ взыска́нїе и҆ всѣ́хъ скорбѧ́щихъ ра́досте: ра́дꙋйсѧ, мт҃и дв҃о всепѣ́таѧ, хрⷭ҇тїа́нъ похвало̀.
Ра́дꙋйсѧ, всебл҃га́ѧ скоропослꙋ́шнице, проше́нїѧ на̑ша во бл҃го и҆сполнѧ́ющаѧ: ра́дꙋйсѧ, неча́ѧннꙋю ра́дость вѣ̑рнымъ да́рꙋющаѧ.
Ра́дꙋйсѧ, блгⷣтнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ: ра́дꙋйсѧ, влⷣчце, неꙋпива́емаѧ ча́ше, дꙋхо́внꙋю на́шꙋ жа́ждꙋ ᲂу҆толѧ́ющаѧ.
Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ: ра́дꙋйсѧ, ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ і҃
Сп҃стѝ хотѧ̀ ро́дъ чл҃вѣ́ческїй, чл҃вѣколю́бецъ гдⷭ҇ь дарова̀ на́мъ мт҃рь свою̀ въ покро́въ и҆ защище́нїе. Тѣ́мже, бл҃года́рни сꙋ́ще, на тѧ̀ надѣ́емсѧ, влⷣчце, и҆ ᲂу҆миле́ннѡ про́симъ: бꙋ́ди на́мъ всебл҃га́ѧ помо́щница, да въ ра́дости воспои́мъ бг҃ꙋ бл҃года́рственнꙋю пѣ́снь: А҆ллилꙋ́їа.
І҆́косъ і҃
Стѣна̀ неѡбори́маѧ ѿ лѣ́тъ дре́внихъ ꙗ҆ви́ласѧ є҆сѝ, пречⷭ҇таѧ влⷣчце, въ странѣ̀ на́шей, и҆злива́ющи чꙋдеса̀ и҆ ѡ҆сѣнѧ́ющи блгⷣтною по́мощїю хрⷭ҇толюби́выѧ во́ины. Сїѧ̀ вѣ́дꙋще, бл҃говѣ́рнїи кнѧ́зїе и҆ всѝ лю́дїе со бл҃гоговѣ́нїемъ вопїѧ́хꙋ тѝ си́це:
Ра́дꙋйсѧ, прⷭ҇нѡ ѡ҆ на́съ, грѣ́шныхъ, промышлѧ́ющаѧ: ра́дꙋйсѧ, въ го́ды лю́тыхъ и҆спыта́нїй на́съ не ѡ҆ставлѧ́ющаѧ.
Ра́дꙋйсѧ, въ пра́вой вѣ́рѣ ᲂу҆крѣпле́нїе: ра́дꙋйсѧ, наде́ждою сп҃се́нїѧ ѡ҆бодре́нїе.
Ра́дꙋйсѧ, є҆ди́номꙋ бг҃ꙋ рабо́тати наꙋча́ющаѧ: ра́дꙋйсѧ, за́повѣди бж҃їѧ и҆сполнѧ́ти помога́ющаѧ.
Ра́дꙋйсѧ, и҆́щꙋщимъ сп҃се́нїѧ пꙋ́ть ᲂу҆казꙋ́ющаѧ: ра́дꙋйсѧ, и҆ блгⷣть и҆́мъ ниспосыла́ющаѧ.
Ра́дꙋйсѧ, го́рестнаѧ воздыха́нїѧ на̑ша ᲂу҆тиша́ющаѧ: ра́дꙋйсѧ, сле́зы съ лани́тъ ѡ҆тира́ющаѧ.
Ра́дꙋйсѧ, николи́же на́съ, грѣ́шныхъ, забыва́ющаѧ: ра́дꙋйсѧ, непреста́ннѡ за на́съ хрⷭ҇тꙋ̀ молѧ́щаѧсѧ.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ а҃і
Пѣ́нїе ᲂу҆миле́нное и҆ бл҃года́рственное прино́симъ тѝ, пречⷭ҇таѧ влⷣчце, ꙗ҆́кѡ во днѝ гоне́нїѧ безбо́жнагѡ зе́млю на́шꙋ сохрани́ла є҆сѝ. Оу҆молѝ, млⷭ҇рдаѧ мт҃и, сн҃а твоегѡ̀ и҆ бг҃а на́шегѡ, є҆́же цр҃кви рѡссі́йстѣй въ ми́рѣ и҆ бл҃годе́нствїи пребыва́ти и҆ ѡ҆гради́ти ю҆̀ ѿ невѣ́рїѧ, раско́ла и҆ є҆ресе́й, да всѝ є҆ди́ными ᲂу҆сты̀ и҆ є҆ди́нымъ се́рдцемъ сподо́бимсѧ воспѣва́ти бг҃ꙋ: А҆ллилꙋ́їа.
І҆́косъ а҃і
Свѣтоза́рнаѧ твоѧ̀ і҆кѡ́на, всепѣ́таѧ бцⷣе, ю҆́же дре́вле бл҃говѣ́рный кнѧ́зь дими́трїй на ѡ҆б̾ѧ́тїѧхъ свои́хъ ноша́ше, и҆ до дне́сь бл҃гоговѣ́йнѡ почита́етсѧ въ предѣ́лѣхъ землѝ моско́вскїѧ. Вѣ́рнїи бо лю́дїе, возжелѣ́вше блгⷣти тоѧ̀ и҆мѣ́ти прича́стїе, хра́мы во сла́вꙋ твою̀ созида́ютъ и҆ пред̾ ѻ҆́бразомъ твои́мъ взыва́ютъ си́це:
Ра́дꙋйсѧ, всѣ́хъ притека́ющихъ къ тебѣ̀ ско́раѧ ᲂу҆слы́шательнице: ра́дꙋйсѧ, и҆знемога́ющихъ ѿ ᲂу҆ны́нїѧ и҆ печа́ли бл҃га́ѧ ᲂу҆тѣ́шительнице.
Ра́дꙋйсѧ, воздыха́нїй на́шихъ не ѿверга́ющаѧ: ра́дꙋйсѧ, смѧте́ннымъ дꙋша́мъ ми́ръ и҆ поко́й подаю́щаѧ.
Ра́дꙋйсѧ, на кнѧ́зи и҆ сы́ны чл҃вѣ́ческїѧ надѣ́ѧтисѧ на́мъ возбранѧ́ющаѧ: ра́дꙋйсѧ, ко́зни дїа́вольскїѧ побѣжда́ти на́мъ помога́ющаѧ.
Ра́дꙋйсѧ, ꙗ҆́кѡ моско́вскꙋю зе́млю возлюби́ла є҆сѝ: ра́дꙋйсѧ, ꙗ҆́кѡ хра́мы гре́бневскїѧ въ не́й ᲂу҆стро́ити бл҃говоли́ла є҆сѝ.
Ра́дꙋйсѧ, бг҃оро́дскихъ предѣ́лѡвъ ди́вное ᲂу҆краше́нїе: ра́дꙋйсѧ, гра́да ѻ҆динцо́ва незри́мое ѡ҆хране́нїе.
Ра́дꙋйсѧ, ве́сь на рѣцѣ̀ клѧ́зьмѣ і҆кѡ́ною твое́ю бл҃гослови́вшаѧ: ра́дꙋйсѧ, всѣ́хъ на́съ твои́мъ покро́вомъ не ѡ҆ставлѧ́ющаѧ.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ в҃і
Блгⷣти твоеѧ̀ не лишѝ на́съ, влⷣчце, погрѧ́зшихъ въ пꙋчи́нѣ беззако́нїй и҆ лю́тѣ стра́ждꙋщихъ. Ѻ҆ба́че всю̀ наде́ждꙋ на тѧ̀ возлага́емъ и҆, на ѻ҆́бразъ тво́й со ᲂу҆миле́нїемъ взира́емъ, ѿ него́же всѝ скорбѧ́щїи и҆ ѡ҆бремене́ннїи грѣхмѝ мно́гими сп҃се́нїе и҆ цѣльбы̑ прїе́млютъ и҆ ра́достнѡ ѡ҆ тебѣ̀ воспѣва́ютъ всебл҃го́мꙋ бг҃ꙋ: А҆ллилꙋ́їа.
І҆́косъ в҃і
Пою́ще твоѧ̑ чꙋдеса̀, взира́емъ на ѻ҆́бразъ тво́й, бг҃ома́ти. Ты́ бо, десни́цею младе́нца хрⷭ҇та̀ ѡ҆б̾е́млющи, мо́лишисѧ ѡ҆ на́съ, ѻ҆́нъ же, мольбы̑ твоѧ̑ прїе́млѧ, млⷭ҇тивнѡ бл҃гословлѧ́етъ тѧ̀ въ зна́менїе своегѡ̀ бл҃говоле́нїѧ. Ѡ҆ се́мъ ᲂу҆́бѡ ᲂу҆дивлѧ́ющесѧ, съ любо́вїю вопїе́мъ тѝ си́це:
Ра́дꙋйсѧ, творца̀ всѧ́ческихъ на рꙋкꙋ̀ твое́ю держа́щаѧ: ра́дꙋйсѧ, ѡ҆ на́съ къ немꙋ̀ прⷭ҇нѡ хода́тайствꙋющаѧ.
Ра́дꙋйсѧ, цр҃и́це, цр҃е́мъ ца́рствꙋющихъ и҆збра́ннаѧ: ра́дꙋйсѧ, влⷣчце, гдⷭ҇емъ госпо́дствꙋющихъ просла́вленнаѧ.
Ра́дꙋйсѧ, свѣ́томъ ра́дости дꙋ́ши ѡ҆бодрѧ́ющаѧ: ра́дꙋйсѧ, грѣхо́внꙋю мглꙋ̀ на́шꙋ разгонѧ́ющаѧ.
Ра́дꙋйсѧ, лꙋка́выхъ дꙋхѡ́въ низложе́нїе: ра́дꙋйсѧ, всѣ́хъ хрⷭ҇тїа́нъ ᲂу҆пова́нїе.
Ра́дꙋйсѧ, свѣти́льниче златы́й, нб҃о и҆ зе́млю ѡ҆сщ҃а́ющїй: ра́дꙋйсѧ, же́зле пра́вый, пꙋ́ть къ бг҃ꙋ ᲂу҆казꙋ́ющїй.
Ра́дꙋйсѧ, неꙋгаси́маѧ лампа́до, въ нощѝ житїѧ̀ на́мъ свѣтѧ́щаѧ: ра́дꙋйсѧ, свѣтови́днаѧ лѣ́ствице, къ прⷭ҇то́лꙋ гдⷭ҇ню приводѧ́щаѧ.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ г҃і
Ѽ всепѣ́таѧ мт҃и, пречⷭ҇таѧ дв҃о, всемлⷭ҇тиваѧ гпⷭ҇жѐ бцⷣе, прїимѝ ѿ на́съ, недосто́йныхъ ра̑бъ твои́хъ, ма́лое сїѐ моле́нїе, въ простотѣ̀ се́рдца тебѣ̀ приноси́мое, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней, не ѡ҆ста́ви на́съ мт҃рнимъ твои́мъ предста́тельствомъ и҆ црⷭ҇твїѧ нбⷭ҇нагѡ сподо́би, ѡ҆ тебѣ̀ вопїю́щихъ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡвъ мно́жества и҆ всѧ̑ нбⷭ҇наѧ во́инства сла́вѧтъ тѧ̀, цр҃и́цꙋ нб҃сѐ и҆ землѝ. Просла́ви тѧ̀, пречⷭ҇таѧ, и҆ вели́кїй кнѧ́зь дими́трїй съ во́и рꙋ́сскими, є҆гда̀, ꙗ҆́кѡ побѣди́тель над̾ нечести́выми а҆га́рѧны, пꙋ́ть сво́й къ первопресто́льномꙋ гра́дꙋ соверша́ѧ, въ да́ръ чꙋдотво́рнꙋю і҆кѡ́нꙋ твою̀ ѿ люді́й гра́да гре́бени прїѧ́тъ. Тѣ́мже, держа̀ ю҆̀ на ѡ҆б̾ѧ́тїихъ свои́хъ, со дерзнове́нїемъ возопѝ пребл҃гослове́ннѣй:
Ра́дꙋйсѧ, срѣ́тенїемъ і҆кѡ́ны твоеѧ̀ вѣ́рныѧ ратобо́рцы возвесели́вшаѧ: ра́дꙋйсѧ, є҆́ю бл҃гослове́нїе первопресто́льномꙋ гра́дꙋ дарова́вшаѧ.
Ра́дꙋйсѧ, ше́ствїемъ твои́мъ зе́млю рꙋ́сскꙋю ѡ҆ст҃и́вшаѧ: ра́дꙋйсѧ, къ вѣ́рѣ хрⷭ҇тїа́нстѣй мнѡ́гїѧ лю́ди ѡ҆брати́вшаѧ.
Ра́дꙋйсѧ, а҆га́рѧнскагѡ ѕловѣ́рїѧ ѡ҆бличе́нїе: ра́дꙋйсѧ, вѣ́ры правосла́вныѧ ᲂу҆твержде́нїе.
Ра́дꙋйсѧ, съ вѣ́рою прибѣга́ющимъ проше́нїѧ и҆сполнѧ́ющаѧ: ра́дꙋйсѧ, лю́демъ правосла́внымъ прⷭ҇нѡ чꙋдодѣ́ющаѧ.
Ра́дꙋйсѧ, ско́раѧ чл҃вѣ́кѡмъ помо́щнице: ра́дꙋйсѧ, премꙋ́драѧ вѣ́рнымъ наста́внице.
Ра́дꙋйсѧ, вели́кихъ моско́вскихъ кн҃зе́й покрови́тельнице: ра́дꙋйсѧ, ро́да хрⷭ҇тїа́нскагѡ ᲂу҆се́рднаѧ застꙋ́пнице.
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Конда́къ а҃
Взбра́ннѣй воево́дѣ и҆ дв҃ѣ бцⷣѣ, ѿ всѣ́хъ родѡ́въ на сп҃се́нїе на́ше и҆збра́ннѣй и҆, ꙗ҆́кѡ мт҃ри хрⷭ҇та̀, бг҃а на́шегѡ, достодо́лжнѡ ᲂу҆бл҃жа́емѣй, похва́льное пѣ́нїе, вѣ́рнїи, принесе́мъ и҆ пред̾ і҆кѡ́ною є҆ѧ̀ съ наде́ждою и҆ любо́вїю моли́твꙋ вознесе́мъ: и҆зба́ви на́съ, влⷣчце, ѿ вра̑гъ ви́димыхъ и҆ неви́димыхъ, да сп҃се́ннїи тобо́ю воззове́мъ всѝ ра́достнѡ:
Ра́дꙋйсѧ, чⷭ҇таѧ ѻ҆трокови́це, те́плаѧ предста́тельнице ѡ҆ дꙋша́хъ на́шихъ.
Моли́твы
Ѽ цр҃и́це всебл҃га́ѧ и҆ те́плаѧ застꙋ́пнице. Къ тебѣ̀, є҆ди́нѣй на́шей наде́жди и҆ ᲂу҆пова́нїю, прекло́ньше колѣ̑на, приле́жнѡ мо́лимсѧ: ᲂу҆слы́ши проше́нїѧ на̑ша, и҆з̾ глꙋбины̀ се́рдца тебѣ̀ приноси́маѧ и҆ бꙋ́ди на́мъ, блꙋжда́ющымъ по распꙋ́тїѧмъ ско́рбныѧ жи́зни, вѣ́рнаѧ ко сп҃се́нїю пꙋтеводи́тельница.
Ѽ держа́внаѧ застꙋ́пнице. Ты̀ дре́вле кн҃зє́мъ рꙋ́сскимъ была̀ є҆сѝ во бра́нехъ вспоможе́нїе и҆ на врагѝ ѡ҆долѣ́нїе, мно́гажды зе́млю на́шꙋ ѿ наше́ствїѧ и҆ноплеме́нныхъ сохранѧ́ющи и҆ лю́ди рꙋ́сскїѧ сп҃са́ющи. Ны́нѣ же, пред̾ ст҃ы́мъ ѻ҆́бразомъ твои́мъ предстоѧ́ще, ᲂу҆се́рдное бл҃годаре́нїе прино́симъ и҆ те́плѣ мо́лимсѧ: застꙋпа́й и҆ на бꙋ́дꙋщее вре́мѧ зе́млю рꙋ́сскꙋю, ᲂу҆милосе́рдисѧ ѡ҆ на́съ, въ сꙋетѣ̀ жи́знь свою̀ провожда́ющихъ, и҆ простѝ недосто́йныхъ, водворѝ въ дꙋша́хъ на́шихъ ми́ръ и҆ тишинꙋ̀, є҆гда̀ же пости́гнетъ и҆скꙋше́нїе, помозѝ прїѧ́ти є҆̀, ꙗ҆́кѡ вразꙋмле́нїе, па́че же принестѝ и҆́стинныѧ плоды̀ покаѧ́нїѧ.
Ѽ пречⷭ҇таѧ бцⷣе. Да́рꙋй па́стырємъ цр҃кве ре́вность и҆ бл҃гоче́стїе, прави́телємъ мꙋ́дрость и҆ правосꙋ́дїе, во́инѡмъ мꙋ́жество и҆ крѣ́пость и҆ всѣ̑мъ лю́демъ, ꙗ҆́же ко сп҃се́нїю поле́знаѧ. Въ ча́съ же кончи́ны на́шеѧ ѿженѝ ѿ на́съ дꙋхѡ́въ ѕло́бы поднебе́сныхъ, и҆́щꙋщихъ поги́бели на́шеѧ, и҆ сподо́би, всемлⷭ҇тиваѧ влⷣчце, непреткнове́ннѡ проитѝ воздꙋ̑шнаѧ мыта̑рства и҆ дости́гнꙋти црⷭ҇тва нбⷭ҇нагѡ, и҆дѣ́же всѝ ст҃і́и вкꙋ́пѣ съ тобо́ю прославлѧ́ютъ трїеди́нагѡ бг҃а ѻ҆ц҃а̀, и҆ сн҃а, и҆ ст҃а́гѡ дх҃а во вѣ́ки вѣкѡ́въ. А҆ми́нь.