Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ въ че́сть ст҃ы́ѧ є҆ѧ̀ і҆кѡ́ны ᲂу҆миле́нїе.

Гребневской (1380), Костромской (1672) и"Умиление" Серафимо-Дивеевской (1885) икон Божией Матери 10 августа 2026

Конда́къ а҃

И҆збра́ннѣй ѿ всѣ́хъ родѡ́въ бж҃їей мт҃ри и҆ цр҃и́цѣ, ᲂу҆миле́ннѡ молѧ́щейсѧ за ны̀ ко гдⷭ҇ꙋ и҆ ѻ҆́бразъ ᲂу҆миле́нїѧ своегѡ̀ на́мъ дарова́вшей млⷭ҇тивѡ, похва́льное пѣ́нїе и҆ моле́нїе прино́симъ тѝ, бцⷣе. ты́ же, ꙗ҆́кѡ всемлⷭ҇тиваѧ на́ша застꙋ́пница и҆ всебл҃га́ѧ помо́щница, ѿ всѧ́кихъ бѣ́дъ на́съ и҆зба́ви, да зове́мъ тѝ:

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

І҆́косъ а҃

А҆́гг҃лъ земны́й и҆ человѣ́къ нбⷭ҇ный, прпⷣбный ста́рецъ серафі́мъ і҆кѡ́нꙋ твою̀ ст҃ꙋ́ю, бцⷣе дв҃о, ꙗ҆́кѡ драгоцѣ́нное сокро́вище въ свое́й ке́ллїи стѧжа̀ и҆ пред̾ не́ю ᲂу҆сє́рдныѧ мл҃твы тебѣ̀ приносѧ̀, всепѣ́таѧ, во всѧ̑ дни̑ подви́жническагѡ житїѧ̀ своегѡ̀ бл҃гоꙋмиле́ннѡ, ра́достїю всѣ́хъ ра́достей тѧ̀ наименова̀, си́це тебѣ̀ взыва́ѧ:

Ра́дꙋйсѧ, ѡ҆бра́довавшаѧ па́дшее человѣ́чество всест҃ы́мъ твои́мъ ржⷭ҇тво́мъ: ра́дꙋйсѧ, сп҃си́телѧ мі́рꙋ нетлѣ́ннѡ ро́ждшаѧ и҆ двⷭ҇тво сохра́ньшаѧ преди́внѡ.

Ра́дꙋйсѧ, мт҃и и҆ дв҃о пребл҃гослове́ннаѧ: ра́дꙋйсѧ, бцⷣе препросла́вленнаѧ.

Ра́дꙋйсѧ, пала́то бг҃а сло́ва прекра́снаѧ: ра́дꙋйсѧ, свѣтоно́снаѧ ло́жнице цр҃ѧ̀ царе́й.

Ра́дꙋйсѧ, прⷪ҇ро́ческихъ глаго́лѡвъ сбытїѐ прине́сшаѧ: ра́дꙋйсѧ, а҆пⷭ҇льскїѧ про́повѣди крѣ́пкое вспоможе́нїе.

Ра́дꙋйсѧ, прпⷣбныхъ похвало̀ и҆ дѣ́въ велича́нїе: ра́дꙋйсѧ, человѣ́ческагѡ ро́да возвыше́нїе.

Ра́дꙋйсѧ, скорбѧ́щихъ ᲂу҆тѣше́нїе: ра́дꙋйсѧ, болѧ́щихъ и҆сцѣле́нїе.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ в҃

Ви́дѣвъ себѐ болѣ́знїю ѕѣ́льною ѡ҆держи́ма, бл҃же́нный серафі́мъ ᲂу҆се́рднѡ молѧ́ше тѧ̀, бцⷣе дв҃о, ѡ҆ по́мощи и҆ и҆сцѣле́нїи, и҆ сѐ, а҆́бїе предста́ла є҆сѝ є҆мꙋ̀ во свѣ́тѣ нбⷭ҇нѣмъ со а҆пⷭ҇лома петро́мъ и҆ і҆ѡа́нномъ бг҃осло́вомъ, и҆ ре́кши: се́й ѿ ро́да на́шегѡ є҆́сть, и҆сцѣле́нїе ско́рѡ є҆мꙋ̀ дарова́ла є҆сѝ, да пое́тъ немо́лчнѡ сн҃ꙋ твоемꙋ̀ и҆ бг҃ꙋ хвале́бнꙋю пѣ́снь: А҆ллилꙋ́їа.

І҆́косъ в҃

Разꙋмѣ́въ своѐ и҆сцѣле́нїе, твои́мъ посѣще́нїемъ бл҃года́тнымъ соверши́вшеесѧ, бл҃же́нный серафі́мъ прославлѧ́ше, бцⷣе, ве́лїю къ немꙋ̀ твою̀ млⷭ҇ть, і҆кѡ́нꙋ же ст҃ꙋ́ю бл҃гоговѣ́йнѡ почита́ше и҆ сїю̀ бл҃года́ти прича́стнꙋ и҆менова́ше, є҆́йже и҆ мы̀ ны́нѣ покланѧ́ющесѧ, си́це тебѣ̀ зове́мъ:

Ра́дꙋйсѧ, ѡ҆бра́довавшаѧ и҆збра́нника бж҃їѧ твои́мъ посѣще́нїемъ: ра́дꙋйсѧ, въ недꙋ́зѣ и҆сцѣле́нїе є҆мꙋ̀ пода́вшаѧ скоропредста́тельнѡ.

Ра́дꙋйсѧ, при́снымъ своемꙋ̀ ро́дꙋ млⷭ҇тивѡ є҆го̀ наре́кшаѧ: ра́дꙋйсѧ, ѿкровє́нїи бжⷭ҇твенными є҆го̀ просвѣти́вшаѧ.

Ра́дꙋйсѧ, въ тече́нїе жи́зни є҆гѡ̀ многокра́тнѡ є҆мꙋ̀ ꙗ҆влѧ́вшаѧсѧ: ра́дꙋйсѧ, на по́двиги поста̀ и҆ мл҃твы неви́димѡ є҆го̀ ᲂу҆крѣплѧ́вшаѧ.

Ра́дꙋйсѧ, въ пꙋстынножи́тїи и҆ затво́рѣ сла́дкаѧ є҆гѡ̀ собесѣ́днице: ра́дꙋйсѧ, ѿ вра̑гъ ви́димыхъ и҆ неви́димыхъ держа́внаѧ є҆гѡ̀ застꙋ́пнице.

Ра́дꙋйсѧ, и҆ на́мъ грѣ̑шнымъ ꙗ҆влѧ́ющаѧ ѿ і҆кѡ́ны твоеѧ̀ мнѡ́гїѧ млⷭ҇ти и҆ щедрѡ́ты: ра́дꙋйсѧ, и҆ на́съ недосто́йныхъ не лиша́ющаѧ твои́хъ бл҃годѣѧ́нїй бл҃года́тныхъ.

Ра́дꙋйсѧ, недꙋ́ги на́шѧ врачꙋ́ющаѧ безме́зднѡ: ра́дꙋйсѧ, печа̑ли на́шѧ ᲂу҆толѧ́ющаѧ радостотво́рнѡ.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ г҃

Си́ла бж҃їѧ дѣ́йствоваше чрез̾ ст҃ꙋ́ю і҆кѡ́нꙋ твою̀, ᲂу҆миле́нїе и҆менꙋ́емꙋю, бцⷣе пречⷭ҇таѧ, є҆гда̀ сїѧ̀ въ ке́ллїи прпⷣбнагѡ серафі́ма пребыва́ше и҆ и҆сцѣлє́нїѧ вѣ̑рнымъ и҆сточа́ше, и҆̀же ѿвсю́дꙋ къ немꙋ̀ прихожда́хꙋ и҆ ѿ тебє̀ мнѡ́гїѧ да́ры бл҃года̑тныѧ ᲂу҆лꙋча́хꙋ, бл҃года́рнѡ пою́ще бг҃ꙋ: А҆ллилꙋ́їа.

І҆́косъ г҃

И҆мѣ́ѧ вѣ́рꙋ и҆ любо́вь къ тебѣ̀, бцⷣе, прпⷣбный серафі́мъ по бз҃ѣ всю̀ наде́ждꙋ свою̀ на тѧ̀ возлага́ше, і҆кѡ́нꙋ же твою̀ ст҃ꙋ́ю бл҃гоговѣ́йнѡ почита́ше, свѣщи̑ и҆ є҆ле́й пред̾ не́ю возжига́ѧ и҆ те́плѣ молѧ́сѧ тебѣ̀, да бꙋ́деши є҆мꙋ̀ помо́щница во сп҃се́нїе. Ѡ҆ се́мъ и҆ мы́ тѧ мо́лимъ, пребл҃га́ѧ, и҆ со ᲂу҆се́рдїемъ пое́мъ:

Ра́дꙋйсѧ, свѣщѐ всемі́рнаѧ, мра́къ ꙗ҆зы́ческїй просвѣти́вшаѧ свѣ́томъ хрⷭ҇то́вымъ: ра́дꙋйсѧ, ста́мно всезлата́ѧ, въ не́йже ᲂу҆гото́васѧ хлѣ́бъ нбⷭ҇ный.

Ра́дꙋйсѧ, денни́це сл҃нца пра́вды: ра́дꙋйсѧ, зарѐ невече́рнѧѧ безсме́ртныѧ жи́зни.

Ра́дꙋйсѧ, па́дшагѡ человѣ́ческагѡ є҆стества̀ ѡ҆бновле́нїе: ра́дꙋйсѧ, дре́внїѧ вражды̀ разрꙋше́нїе.

Ра́дꙋйсѧ, ра́достное ст҃ы́хъ созерца́нїе: ра́дꙋйсѧ, сла́досте, ᲂу҆слади́вшаѧ го́речь грѣхо́внꙋю.

Ра́дꙋйсѧ, ѻ҆́блаче, ро́сꙋ сп҃си́тельнꙋю и҆сточи́вый: ра́дꙋйсѧ, а҆лава́стре, мѵ́ра бжⷭ҇твеннагѡ по́лный.

Ра́дꙋйсѧ, ѡ҆камене́нныхъ серде́цъ ᲂу҆мѧгче́нїе: ра́дꙋйсѧ, вѣ́ры и҆ бл҃гоче́стїѧ возраще́нїе.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ д҃

Бꙋ́ри грѣхо́вныѧ и҆збѣжа́ти и҆ въ ти́хое приста́нище покаѧ́нїѧ прїитѝ помозѝ на́мъ, пречⷭ҇таѧ дв҃о, и҆скꙋпи́телѧ и҆ сп҃си́телѧ дꙋ́шъ на́шихъ ро́ждшаѧ и҆ мт҃рнее дерзнове́нїе къ немꙋ̀ и҆мꙋ́щаѧ: прострѝ къ немꙋ̀ бг҃оно́снѣи твоѝ рꙋ́цѣ и҆ ᲂу҆молѝ є҆гѡ̀ бл҃гость всѧ̑ ны̀ поми́ловати и҆ сп҃стѝ, да бл҃года́рнѣ пое́мъ є҆мꙋ̀ ѡ҆ тебѣ̀ славосло́вїѧ пѣ́снь: А҆ллилꙋ́їа.

І҆́косъ д҃

Слы́шавше ѡ҆ премно́гихъ чꙋдесѣ́хъ твои́хъ, бцⷣе дв҃о, ѿ і҆кѡ́ны твоеѧ̀ ст҃ы́ѧ ꙗ҆вле́нныхъ и҆ присноѧвлѧ́емыхъ вѣ̑рнымъ, ра́дꙋемсѧ мы̀ грѣ́шнїи, ꙗ҆́кѡ дарова́ла є҆сѝ на́мъ таковы́й бл҃года́тный зало́гъ твоегѡ̀ къ на́мъ бл҃говоле́нїѧ, всебл҃га́ѧ, и҆ ѿ ра́достныхъ и҆ бл҃года́рныхъ ᲂу҆сте́нъ сицево́е прино́симъ тѝ пѣ́нїе:

Ра́дꙋйсѧ, ѻ҆би́тель дѣ́въ под̾ мт҃рнїй покро́въ тво́й млⷭ҇тивѡ прїе́мшаѧ: ра́дꙋйсѧ, ѻ҆би́тель ма́лꙋю и҆ ᲂу҆бо́гꙋю распространи́вшаѧ и҆ дх҃о́внѡ ѡ҆богати́вшаѧ.

Ра́дꙋйсѧ, ѡ҆бѣтова́нїе твоѐ, првⷣномꙋ серафі́мꙋ ѡ҆ не́й и҆зрече́нное, вѣ́рнѡ и҆спо́лнившаѧ: ра́дꙋйсѧ, і҆кѡ́ною твое́ю пребыва́ти въ не́й и҆зво́лившаѧ.

Ра́дꙋйсѧ, наде́ждо на́ша прест҃а́ѧ: ра́дꙋйсѧ, мт҃и на́ша пребл҃га́ѧ.

Ра́дꙋйсѧ, до́браѧ младопита́тельнице дѣ́вамъ: ра́дꙋйсѧ, вдо́въ и҆ сиро́тъ попечи́тельнице бл҃гоми́лостиваѧ.

Ра́дꙋйсѧ, застꙋпле́нїе на́ше ѿ врагѡ́въ неви́димыхъ: ра́дꙋйсѧ, помо́щнице на́ша въ неча́ѧнныхъ бѣда́хъ.

Ра́дꙋйсѧ, стѣно̀, ѡ҆гражда́ющаѧ на́съ ѿ грѣхо́вныхъ собла́знѡвъ мі́ра: ра́дꙋйсѧ, покро́ве, покрыва́ѧй всѣ́хъ къ тебѣ̀ притека́ющихъ.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ є҃

Бг҃оте́чнаѧ ѕвѣзда̀, ст҃а́ѧ і҆кѡ́на твоѧ̀, бцⷣе дв҃о, лꙋчѝ бж҃їѧ бл҃года́ти неви́димѡ и҆спꙋща́етъ и҆ дꙋ́шы вѣ́рныхъ ѡ҆зарѧ́етъ. Сїю̀ и҆ мы̀ съ вѣ́рою и҆ бл҃гоговѣ́нїемъ лобыза́юще, въ ско́рбехъ ᲂу҆тѣше́нїе, въ болѣ́знехъ врачество̀ безме́здное ѿ тебє̀, влⷣчце, прїе́млемъ, и҆ славосло́вѧще многопѣ́тое и҆ пребл҃гослове́нное и҆́мѧ твоѐ, ра́достнѡ пое́мъ бг҃ꙋ: А҆ллилꙋ́їа.

І҆́косъ є҃

Ви́дѣвъ тѧ̀, бцⷣе, прпⷣбный серафі́мъ въ пресла́вный де́нь бл҃говѣ́щенїѧ, прише́дшꙋю къ немꙋ̀ въ смире́ннꙋю є҆гѡ̀ ке́ллїю со а҆́гг҃лы, прⷣте́чею, бг҃осло́вомъ и҆ ли́комъ ст҃ы́хъ дѣ́въ, ра́дости премі́рныѧ и҆спо́лнисѧ, и҆ сїѧ́ше лицѐ є҆гѡ̀ ста́рческое красото́ю нбⷭ҇ною. Ты́ же, сла́вою бжⷭ҇твенною є҆го̀ ѡ҆зарѧ́ющи, млⷭ҇тивѡ бесѣ́довала є҆сѝ съ ни́мъ, ꙗ҆́коже со дрꙋ́гомъ при́снымъ, ѡ҆бѣтова̑нїи бл҃ги́ми возвеселѧ́ющи дꙋ́шꙋ є҆гѡ̀ и҆ си́ми подвиза́ющи на́съ вопи́ти тебѣ̀:

Ра́дꙋйсѧ, ѡ҆бра́дованнаѧ приснодв҃о: ра́дꙋйсѧ, невѣ́сто неневѣ́стнаѧ.

Ра́дꙋйсѧ, цр҃и́це го́рнихъ и҆ до́льнихъ: ра́дꙋйсѧ, предводи́тельнице дѣ́вственныхъ ликостоѧ́нїй.

Ра́дꙋйсѧ, ѿ нбⷭ҇ныхъ высо́тъ посѣща́ющаѧ земноро́дныхъ: ра́дꙋйсѧ, ꙗ҆влѧ́ющаѧ лицѐ твоѐ пречⷭ҇тое и҆збра́нникѡмъ бж҃їимъ.

Ра́дꙋйсѧ, ли́ки ст҃ы́хъ спꙋтеше́ствꙋющыѧ тебѣ̀ и҆мѣ́вшаѧ: ра́дꙋйсѧ, собо́ръ ст҃ы́хъ дѣ́въ съ собо́ю приве́дшаѧ.

Ра́дꙋйсѧ, дѣ́вѣ смире́ннѣй и҆ трепе́щꙋщей ꙗ҆вле́нїѧ твоегѡ̀ сла́вꙋ показа́вшаѧ: ра́дꙋйсѧ, бесѣ́ды твоеѧ̀ бжⷭ҇твенныѧ тꙋ̀ ᲂу҆досто́ившаѧ.

Ра́дꙋйсѧ, ста́рца серафі́ма посѣще́нїемъ твои́мъ ѡ҆бл҃года́тствовавшаѧ: ра́дꙋйсѧ, съ ни́мъ и҆ всѧ̑ ны̀ дꙋхо́внѡ возвесели́вшаѧ.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ ѕ҃

Проповѣ́дꙋемо и҆ вездѣ̀ похвалѧ́емо є҆́сть ѿ вѣ́рныхъ посѣще́нїе твоѐ, мт҃и бж҃їѧ, є҆гѡ́же прпⷣбнаго серафі́ма сподо́била є҆сѝ. Сїѐ посѣще́нїе твоѐ всебл҃го́е и҆ мы̀ дне́сь бл҃гоговѣ́йнѡ воспомина́юще, бл҃года́рствєнныѧ пѣ̑сни тебѣ̀ прино́симъ, пречⷭ҇таѧ, и҆ хвале́бнѡ восклица́емъ сн҃ꙋ твоемꙋ̀ и҆ бг҃ꙋ: А҆ллилꙋ́їа.

І҆́косъ ѕ҃

Возсїѧ̀ сїѧ́нїе сла́вы нбⷭ҇ныѧ въ смире́ннѣй ке́ллїи прпⷣбнагѡ серафі́ма, є҆гда̀ ѿ го́рнихъ высо́тъ пришла̀ є҆сѝ, бцⷣе, съ ли́комъ ст҃ы́хъ того̀ посѣти́ти. Сегѡ́ же не терпѧ́щи зрѣ́ти, дѣ́ва сотаи́нница бжⷭ҇твеннагѡ видѣ́нїѧ ни́цъ падѐ на зе́млю, но млⷭ҇тивѡ тꙋ̀ воздви́гла є҆сѝ, влⷣчце, и҆ премлⷭ҇тивыѧ глаго́лы твоѧ̑ є҆́й прорекла̀ є҆сѝ. Таково́мꙋ бл҃госнизхожде́нїю твоемꙋ̀ дивѧ́щесѧ, съ любо́вїю и҆ бл҃гоговѣ́нїемъ тебѣ̀ вопїе́мъ:

Ра́дꙋйсѧ, дв҃о всебл҃га́ѧ, дѣ́вство похвали́вшаѧ дѣ́вѣ земнѣ́й: ра́дꙋйсѧ, вѣне́цъ црⷭ҇твїѧ нбⷭ҇нагѡ є҆́й ѡ҆бѣща́вшаѧ за вѣ́рность женихꙋ̀ хрⷭ҇тꙋ̀.

Ра́дꙋйсѧ, а҆́гг҃лы чти́маѧ и҆ пѣва́емаѧ ѿ херꙋві̑мъ: ра́дꙋйсѧ, а҆рха̑гг҃лы ѡ҆крꙋжа́емаѧ и҆ сла́вимаѧ ѿ серафі̑мъ.

Ра́дꙋйсѧ, прⷣте́чꙋ, бг҃осло́ва и҆ ли́къ ст҃ы́хъ дѣ́въ съ тобо́ю въ ꙗ҆вле́нїи чꙋде́снѡ показа́вшаѧ: ра́дꙋйсѧ, въ ꙗ҆вле́нїи твое́мъ ѡ҆бѣтова̑нїѧ бл҃га̑ѧ и҆збра́нникꙋ бж҃їю дарова́вшаѧ.

Ра́дꙋйсѧ, сбытїе́мъ ѡ҆бѣтова́нїй твои́хъ и҆́стинꙋ ꙗ҆вле́нїѧ твоегѡ̀ засвидѣ́тельствовавшаѧ: ра́дꙋйсѧ, на́ше похвало̀ и҆ ᲂу҆твержде́нїе.

Ра́дꙋйсѧ, ѻ҆би́телей и҆́ноческихъ млⷭ҇тивое попече́нїе и҆ призрѣ́нїе: ра́дꙋйсѧ, цр҃кве хрⷭ҇то́вы бжⷭ҇твеннаѧ лѣ́пота.

Ра́дꙋйсѧ, по́стникѡвъ и҆ прпⷣбныхъ та́йное ᲂу҆тѣше́нїе: ра́дꙋйсѧ, хрⷭ҇тїа́нскагѡ ро́да непосты́дное ᲂу҆пова́нїе.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ з҃

Хотѧ́щымъ на́мъ, влⷣчце, лобыза́ти ст҃ꙋ́ю и҆ всечтⷭ҇нꙋ́ю твою̀ і҆кѡ́нꙋ, не возбранѝ на́мъ сїѐ грѣхѡ́въ ра́ди на́шихъ, и҆ ꙗ҆́кѡ многобл҃гоꙋтро́бнаѧ мт҃и млⷭ҇тивагѡ бг҃а, не возгнꙋша́йсѧ на́шихъ нечи́стыхъ ᲂу҆сте́нъ, но прїимѝ на́съ млⷭ҇тивѡ, припа́дающихъ къ тебѣ̀ съ любо́вїю, да́ры бл҃года̑тныѧ ще́дрѡ на́мъ подава́ющи ѿ многочꙋде́снагѡ твоегѡ̀ ѻ҆́браза, да зове́мъ со ᲂу҆миле́нїемъ трїеди́номꙋ бг҃ꙋ: А҆ллилꙋ́їа.

І҆́косъ з҃

Ди́внѡ и҆ ст҃ѡ сконча́тисѧ бл҃говоли́ла є҆сѝ, влⷣчце, и҆збра́нникꙋ твоемꙋ̀, бл҃же́нномꙋ серафі́мꙋ: то́й бо колѣнопреклоне́нный на мл҃твѣ пред̾ і҆кѡ́ною твое́ю ст҃о́ю предадѐ првⷣнꙋю дꙋ́шꙋ свою̀ въ рꙋ́цѣ бж҃їи, и҆ ѿи́де ѿ земны́хъ на гѡ́рнѧѧ созерца́ти сла́вꙋ твою̀ нбⷭ҇нꙋю и҆ вы́нꙋ зрѣ́ти тѧ̀, цр҃и́це а҆́гг҃лѡвъ, ю҆́же мы̀ земні́и немо́лчнѡ ᲂу҆бл҃жа́емъ и҆ пое́мъ тѝ ра́достнѡ:

Ра́дꙋйсѧ, мі́ра го́рнѧгѡ пе́рвѣйшее ᲂу҆краше́нїе: ра́дꙋйсѧ, мі́ра до́льнѧгѡ всекрѣ́пкое ѡ҆гражде́нїе.

Ра́дꙋйсѧ, ѿ нбⷭ҇нагѡ всест҃а́гѡ твоегѡ̀ жили́ща приника́ющаѧ къ земнорѡ́днымъ: ра́дꙋйсѧ, ѿ ѻ҆би́телей го́рнихъ снизходѧ́щаѧ въ ю҆до́ль на́шꙋ многоско́рбнꙋю и҆ многогрѣхо́внꙋю.

Ра́дꙋйсѧ, ѡ҆тира́ющаѧ сле́зы ѿ ѻ҆че́съ пла́чꙋщихъ и҆ печа́льныхъ: ра́дꙋйсѧ, влива́ющаѧ ѿра́дꙋ и҆ ᲂу҆тѣше́нїе въ сердца̀ ѡ҆горче́нныхъ.

Ра́дꙋйсѧ, вдови́цъ неимꙋ́щихъ некра́домое бога́тство: ра́дꙋйсѧ, безма́тернихъ сиро́тъ призрѣ́нїе и҆ покро́ве.

Ра́дꙋйсѧ, и҆́нокѡвъ помо́щнице всеизрѧ́днаѧ: ра́дꙋйсѧ, и҆́нокинь предста́тельнице всест҃а́ѧ.

Ра́дꙋйсѧ, цѣломꙋ́дрїѧ хрⷭ҇тїа́нскагѡ нача́ло и҆ ѡ҆снова́нїе: ра́дꙋйсѧ, дѣ́вства пречꙋ́днаѧ красото̀.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ и҃

Стра́нно є҆́сть ви́дѣти, ка́кѡ і҆кѡ́на твоѧ̀ ст҃а́ѧ, бцⷣе дв҃о, си́лою бж҃їею бл҃года́ти преисполнѧ́етсѧ и҆ ди̑внаѧ чꙋдеса̀ и҆сточа́етъ бл҃говоле́нїемъ твои́мъ, всебл҃га́ѧ. Сїю̀ и҆ мы̀ стѧжа́вше во ᲂу҆тѣше́нїе и҆ цѣльбꙋ̀, бл҃года́рственнѡ тѧ̀ сла́вимъ, влⷣчце пречⷭ҇таѧ, и҆ пое́мъ ро́ждшемꙋсѧ ѿ тебє̀ бг҃ꙋ сло́вꙋ а҆́гг҃льскꙋю пѣ́снь: А҆ллилꙋ́їа.

І҆́косъ и҃

Всѧ̑ дѡ́браѧ и҆ полє́знаѧ да́рꙋеши на́мъ, бцⷣе, ѿ всечⷭ҇тна́гѡ и҆ многочꙋде́снагѡ твоегѡ̀ ѻ҆́браза: ᲂу҆милѧ́еши дꙋ́шы на́шѧ и҆ врачꙋ́еши болѣ̑зни на́шѧ, ꙗ҆́кѡ вои́стиннꙋ многобл҃гоꙋтро́бнаѧ мт҃и ча̑дъ твои́хъ, ѡ҆ хрⷭ҇тѣ̀ бз҃ѣ. Тѣ́мже по достоѧ́нїю бл҃жи́ма є҆сѝ ѿ на́съ бл҃гохвалє́нїи таковы́ми:

Ра́дꙋйсѧ, ѿ восто́ка и҆ до за́пада сла́вимаѧ и҆ превозноси́маѧ: ра́дꙋйсѧ, ѿ всѣ́хъ хрⷭ҇тїа́нскихъ родѡ́въ пѣва́емаѧ и҆ бл҃жи́маѧ.

Ра́дꙋйсѧ, дꙋшеполе́зныхъ дарѡ́въ пода́тельнице незави́стнаѧ: ра́дꙋйсѧ, дꙋше́вныхъ и҆ тѣле́сныхъ недꙋ̑гъ цѣли́тельнице бл҃года́тнаѧ.

Ра́дꙋйсѧ, безнаде́жныхъ наде́ждо: ра́дꙋйсѧ, ѡ҆горче́нныхъ ѿра́до.

Ра́дꙋйсѧ, гони́мыхъ прибѣ́жище: ра́дꙋйсѧ, вѣ́рныхъ крѣ́пкое застꙋпле́нїе.

Ра́дꙋйсѧ, невѣ́рныхъ ѡ҆браще́нїе: ра́дꙋйсѧ, чꙋдесы̀ твои́ми всѣ́хъ ᲂу҆дивлѧ́ющаѧ.

Ра́дꙋйсѧ, млⷭ҇тїю твое́ю на́съ посѣща́ющаѧ: ра́дꙋйсѧ, преи́скреннѣ сп҃сти́сѧ всѣ̑мъ хотѧ́щаѧ.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ ѳ҃

Всѝ ро́ди хрⷭ҇тїа́нстїи и҆́мꙋтъ тѧ̀, влⷣчце, помо́щницꙋ и҆зрѧ́днꙋю: ꙗ҆́коже бо ѡ҆бѣща́ла є҆сѝ во всечⷭ҇тнѣ́мъ твое́мъ ᲂу҆спе́нїи не ѡ҆ста́вити на́съ си́рыхъ и҆ безпомо́щныхъ, та́кѡ и҆ до дне́сь сїѐ ѡ҆бѣтова́нїе всебл҃го́е и҆сполнѧ́еши въ цр҃кви хрⷭ҇то́вѣ на землѝ, бцⷣе дв҃о, ᲂу҆щедрѧ́ющи и҆ сп҃са́ющи лю́ди, вѣ́рнѡ тѧ̀ сла́вѧщыѧ и҆ правосла́внѡ пою́щыѧ бг҃ꙋ: А҆ллилꙋ́їа.

І҆́косъ ѳ҃

Вѣті́йство человѣ́ческое не мо́жетъ и҆зрещѝ ѻ҆би́лїе щедро́тъ и҆ млⷭ҇тей твои́хъ, мт҃и бж҃їѧ, сла́вити же тѧ̀ по достоѧ́нїю недоꙋмѣва́ютъ ᲂу҆́ми безпло́тнїи, ѻ҆ба́че бл҃га́ѧ сꙋ́щи, не возгнꙋша́йсѧ и҆ на́шихъ недосто́йныхъ похва́лъ, и҆̀хже любо́вїю тебѣ̀ прино́симъ и҆ дерза́емъ воспѣва́ти тѧ̀ си́це:

Ра́дꙋйсѧ, лꙋно̀ по́лнаѧ, но́щь грѣхѡ́въ на́шихъ просвѣща́ющаѧ: ра́дꙋйсѧ, крѣ́пкимъ сїѧ́нїемъ твои́мъ мглꙋ̀ страсте́й на́шихъ разгонѧ́ющаѧ.

Ра́дꙋйсѧ, пꙋтеводи́тельнице заблꙋ́ждшихъ: ра́дꙋйсѧ, вразꙋми́тельнице бꙋ́їихъ.

Ра́дꙋйсѧ, ю҆́ныхъ наста́внице цѣломꙋ́дрїѧ: ра́дꙋйсѧ, дѣ́вства покро́ве и҆ ѡ҆гражде́нїе.

Ра́дꙋйсѧ, ѻ҆би́тель дѣ́въ бл҃гоꙋстро́ившаѧ пречꙋ́днѡ: ра́дꙋйсѧ, ꙗ҆́вльшаѧ є҆́й твоѐ бл҃говоле́нїе ѻ҆́бразомъ свои́мъ всечⷭ҇тны́мъ.

Ра́дꙋйсѧ, ᲂу҆пова́ющымъ на тѧ̀ коне́цъ бл҃гі́й да́рꙋющаѧ: ра́дꙋйсѧ, лю́бѧщыѧ и҆ чтꙋ́щыѧ тѧ̀ непосрамлѧ́ющаѧ.

Ра́дꙋйсѧ, є҆ди́на до́браѧ и҆ бл҃гослове́ннаѧ въ жена́хъ: ра́дꙋйсѧ, є҆ди́на чⷭ҇таѧ и҆ непоро́чнаѧ приснодв҃о.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ і҃

Сп҃си́телю бг҃ꙋ пло́ть взаимода́вшаѧ, нетлѣ́ннаѧ и҆ пречⷭ҇таѧ мт҃и бж҃їѧ, ѡ҆чи́сти на́съ, ѡ҆скверне́нныхъ грѣхи̑ мно́гими, ѵ҆ссѡ́помъ мл҃твъ твои́хъ ст҃ы́хъ, въ цѣломꙋ́дрїи и҆ чистотѣ̀ ᲂу҆твердѝ и҆ сподо́би бг҃оꙋго́днѡ и҆ првⷣнѡ препроводи́ти житїѐ сїѐ земно́е, да бл҃гоꙋгоди́вше хрⷭ҇тꙋ̀ бг҃ꙋ, ᲂу҆наслѣ́дꙋемъ црⷭ҇твїе є҆гѡ̀ нбⷭ҇ное и҆ со ст҃ы́ми воспое́мъ є҆мꙋ̀ побѣ́днꙋю пѣ́снь: А҆ллилꙋ́їа.

І҆́косъ і҃

Стѣна̀ є҆сѝ дѣ́вамъ, бцⷣе дв҃о, и҆ всѣ̑мъ дꙋша́мъ хрⷭ҇тїа̑нскимъ, ᲂу҆невѣ́стившымсѧ нбⷭ҇номꙋ женихꙋ̀, ꙗ҆̀же въ треволне́нїи страсте́й ѡ҆брѣта́ютъ всегда̀ крѣ́пкꙋю твою̀ по́мощь. Мо́лимъ тѧ̀, всебл҃га́ѧ, не попꙋстѝ и҆ на́мъ грѣ̑шнымъ поги́бнꙋти во бла́тѣ страсте́й, но прострѝ на́мъ держа́внꙋю десни́цꙋ твою̀ и҆ возста́ви на́съ на покаѧ́нїе и҆ цѣломꙋ́дренное житїѐ, да бл҃года́рнѡ тебѣ̀ зове́мъ:

Ра́дꙋйсѧ, приста́нище ти́хое пловцє́мъ жите́йскагѡ мо́рѧ: ра́дꙋйсѧ, прибѣ́жище бл҃гоѡти́шное ᲂу҆томлє́ннымъ бꙋ́рею страсте́й.

Ра́дꙋйсѧ, спорꙋ́чнице покаѧ́нїѧ грѣ́шныхъ: ра́дꙋйсѧ, ка́ющихсѧ съ бг҃омъ примире́нїе.

Ра́дꙋйсѧ, сꙋдїѝ првⷣнагѡ и҆звѣ́стное ᲂу҆моле́нїе: ра́дꙋйсѧ, всежела́тельное и҆ всесла́дкое ст҃ы́хъ ᲂу҆тѣше́нїе.

Ра́дꙋйсѧ, го́рнихъ а҆́гг҃льскихъ во́инствъ ᲂу҆дивле́нїе: ра́дꙋйсѧ, мч҃нческихъ свѣ́тлыхъ полкѡ́въ непрестаю́щее велича́нїе.

Ра́дꙋйсѧ, првⷣныхъ же́нъ всевеселѧ́щее ра́дованїе: ра́дꙋйсѧ, дѣ́въ ст҃ы́хъ вѣ́нче.

Ра́дꙋйсѧ, прпⷣбныхъ многопѣ́таѧ сла́во: ра́дꙋйсѧ, ст҃и́телей въ пра́вѣй вѣ́рѣ ᲂу҆крѣпле́нїе.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ а҃і

Пѣ́нїе хвале́бное прино́симъ тѝ, бцⷣе пречⷭ҇таѧ, ст҃о́ю и҆ многочꙋде́сною і҆кѡ́ною твое́ю ѡ҆сѣнѧ́еми и҆ мл҃твами ста́рца серафі́ма ᲂу҆крѣплѧ́еми. Ѡ҆ держа́вномъ же застꙋпле́нїи твое́мъ ра́дꙋющесѧ, вопїе́мъ бг҃ꙋ: А҆ллилꙋ́їа.

І҆́косъ а҃і

Свѣ́тлыми лꙋча́ми чꙋде́съ твои́хъ, бг҃омт҃и влⷣчце, ѡ҆зарѧ́еши мра̑чныѧ на́шѧ дꙋ́шы средѝ сꙋевѣ́рїѧ и҆ невѣ́рїѧ на́шихъ дне́й. Зрѧ́ще же млⷭ҇ти и҆ щедрѡ́ты твоѧ̑, ѿ і҆кѡ́ны твоеѧ̀ на́мъ и҆сточа́ємыѧ, всебл҃га́ѧ, и҆ припа́дающе къ не́й, си́це тебѣ̀ вопїе́мъ:

Ра́дꙋйсѧ, правосла́вїѧ ᲂу҆твержде́нїе: ра́дꙋйсѧ, вѣ́ры хрⷭ҇то́вы распростране́нїе.

Ра́дꙋйсѧ, є҆ресе́й и҆ раско́лѡвъ посрамле́нїе: ра́дꙋйсѧ, невѣ́рїѧ и҆скорене́нїе.

Ра́дꙋйсѧ, чꙋдесы̀ твои́ми вѣ̑рныѧ ᲂу҆тѣша́ющаѧ: ра́дꙋйсѧ, млⷭ҇рдїемъ твои́мъ грѣ̑шники неѡставлѧ́ющаѧ.

Ра́дꙋйсѧ, въ ча́съ кончи́ны ᲂу҆пова́ющымъ на тѧ̀ помога́ющаѧ: ра́дꙋйсѧ, лю́бѧщымъ тѧ̀ любо́вїю ст҃о́ю воздаю́щаѧ.

Ра́дꙋйсѧ, въ ско́рбехъ и҆ бѣда́хъ на по́мощь ᲂу҆скорѧ́ющаѧ: ра́дꙋйсѧ, болѣ̑зни неисцѣ̑льныѧ врачꙋ́ющаѧ.

Ра́дꙋйсѧ, скоропослꙋ́шливаѧ къ мл҃твамъ смирє́ннымъ: ра́дꙋйсѧ, прошє́нїѧ бл҃га̑ѧ предварѧ́ющаѧ и҆сполне́нїемъ.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ в҃і

Бл҃года́ть бж҃їѧ ѿ і҆кѡ́ны твоеѧ̀, бцⷣе дв҃о, и҆сходѧ́щаѧ, ѡ҆сѣнѧ́етъ ѻ҆би́тель дѣ́въ, и҆збра́нникомъ твои́мъ серафі́мѡмъ со́браннꙋю и҆ ᲂу҆стро́еннꙋю до́брѣ. Сїю̀ і҆кѡ́нꙋ твою̀, ꙗ҆́кѡ зало́гъ бл҃говоле́нїѧ твоегѡ̀, ди́внѡ стѧжа́вше, сла́вимъ и҆ велича́емъ тѧ̀, влⷣчце премлⷭ҇тиваѧ, и҆ ра́бски вопїе́мъ всѣ́хъ творцꙋ̀: А҆ллилꙋ́їа.

І҆́косъ в҃і

Пою́ще млⷭ҇рдїе твоѐ неисче́тное и҆ мнѡ́гаѧ твоѧ̑ чꙋдеса̀, дв҃о всепѣ́таѧ, ра́дꙋемсѧ мы̀ грѣ́шнїи, зрѧ́ще на і҆кѡ́нѣ ли́къ тво́й ст҃ы́й, ᲂу҆миле́нїѧ преиспо́лненный, и҆́же и҆ въ на́шѧ дꙋ́шы ᲂу҆миле́нїе влива́етъ и҆ къ мл҃твамъ ᲂу҆сє́рднымъ на́съ привлека́етъ, да си́це тебѣ̀ взыва́емъ:

Ра́дꙋйсѧ, ни́во неѡра́ннаѧ, кла́съ сп҃си́тельный человѣ́кѡмъ и҆зрасти́вшаѧ: ра́дꙋйсѧ, лѣ́ствице нбⷭ҇наѧ, є҆́юже сни́де бг҃ъ.

Ра́дꙋйсѧ, горо̀ несѣко́маѧ, ᲂу҆сыре́ннаѧ дх҃омъ ст҃ы́мъ: ра́дꙋйсѧ, ски́нїе селе́нїѧ вы́шнѧгѡ.

Ра́дꙋйсѧ, ст҃а̑ѧ ст҃ы́хъ превосходѧ́щаѧ: ра́дꙋйсѧ, клещѐ та́инственнаѧ, ᲂу҆́гль бжⷭ҇тва̀ неѡпа́льнѡ прїе́мшаѧ.

Ра́дꙋйсѧ, хла̑днаѧ сердца̀ на̑ша любо́вїю ко гдⷭ҇ꙋ воспламенѧ́ющаѧ: ра́дꙋйсѧ, нечистотꙋ̀ дꙋ́шъ на́шихъ бл҃года́тїю ѡ҆чища́ющаѧ.

Ра́дꙋйсѧ, на по́двиги дꙋхѡ́вныѧ неви́димѡ на́съ ᲂу҆крѣплѧ́ющаѧ: ра́дꙋйсѧ, и҆сполнѧ́ти велѣ̑нїѧ хрⷭ҇тѡ́ва на́мъ помога́ющаѧ.

Ра́дꙋйсѧ, дꙋшеврє́дныѧ на́выки въ на́съ и҆скоренѧ́ющаѧ: ра́дꙋйсѧ, стра̑сти дꙋшетлѣ̑нныѧ попалѧ́ющаѧ.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ г҃і

Ѽ всепѣ́таѧ мт҃и! Ѽ цр҃и́це всемлⷭ҇тиваѧ! бцⷣе всебл҃га́ѧ! Оу҆молѝ сн҃а твоего̀, хрⷭ҇та̀ бг҃а на́шего, и҆зба́вити на́съ гее́нны ѻ҆́гненныѧ и҆ сподо́бити сп҃се́нныхъ ча́сти, да со и҆збра́нными воспое́мъ є҆мꙋ̀ во вѣ́ки: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ земны́й и҆ человѣ́къ нбⷭ҇ный, прпⷣбный ста́рецъ серафі́мъ і҆кѡ́нꙋ твою̀ ст҃ꙋ́ю, бцⷣе дв҃о, ꙗ҆́кѡ драгоцѣ́нное сокро́вище въ свое́й ке́ллїи стѧжа̀ и҆ пред̾ не́ю ᲂу҆сє́рдныѧ мл҃твы тебѣ̀ приносѧ̀, всепѣ́таѧ, во всѧ̑ дни̑ подви́жническагѡ житїѧ̀ своегѡ̀ бл҃гоꙋмиле́ннѡ, ра́достїю всѣ́хъ ра́достей тѧ̀ наименова̀, си́це тебѣ̀ взыва́ѧ:

Ра́дꙋйсѧ, ѡ҆бра́довавшаѧ па́дшее человѣ́чество всест҃ы́мъ твои́мъ ржⷭ҇тво́мъ: ра́дꙋйсѧ, сп҃си́телѧ мі́рꙋ нетлѣ́ннѡ ро́ждшаѧ и҆ двⷭ҇тво сохра́ньшаѧ преди́внѡ.

Ра́дꙋйсѧ, мт҃и и҆ дв҃о пребл҃гослове́ннаѧ: ра́дꙋйсѧ, бцⷣе препросла́вленнаѧ.

Ра́дꙋйсѧ, пала́то бг҃а сло́ва прекра́снаѧ: ра́дꙋйсѧ, свѣтоно́снаѧ ло́жнице цр҃ѧ̀ царе́й.

Ра́дꙋйсѧ, прⷪ҇ро́ческихъ глаго́лѡвъ сбытїѐ прине́сшаѧ: ра́дꙋйсѧ, а҆пⷭ҇льскїѧ про́повѣди крѣ́пкое вспоможе́нїе.

Ра́дꙋйсѧ, прпⷣбныхъ похвало̀ и҆ дѣ́въ велича́нїе: ра́дꙋйсѧ, человѣ́ческагѡ ро́да возвыше́нїе.

Ра́дꙋйсѧ, скорбѧ́щихъ ᲂу҆тѣше́нїе: ра́дꙋйсѧ, болѧ́щихъ и҆сцѣле́нїе.

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.

Конда́къ а҃

И҆збра́ннѣй ѿ всѣ́хъ родѡ́въ бж҃їей мт҃ри и҆ цр҃и́цѣ, ᲂу҆миле́ннѡ молѧ́щейсѧ за ны̀ ко гдⷭ҇ꙋ и҆ ѻ҆́бразъ ᲂу҆миле́нїѧ своегѡ̀ на́мъ дарова́вшей млⷭ҇тивѡ, похва́льное пѣ́нїе и҆ моле́нїе прино́симъ тѝ, бцⷣе. ты́ же, ꙗ҆́кѡ всемлⷭ҇тиваѧ на́ша застꙋ́пница и҆ всебл҃га́ѧ помо́щница, ѿ всѧ́кихъ бѣ́дъ на́съ и҆зба́ви, да зове́мъ тѝ:

Ра́дꙋйсѧ, влⷣчце, ра́досте, ᲂу҆миле́нїе и҆ сп҃се́нїе дꙋ́шъ на́шихъ.