Канон святым апостолам Силе Коринфскому, Силуану Солунскому и иже с ними

Предстоя́ще престо́лу Боже́ственному всегда́, сия́нием же просвеща́еми незаходи́мым, святи́и, просвеще́ние духо́вно все́м испроси́те от Отца́ све́тов низпосла́ти на́м, ве́рно ва́с почита́ющим.

Возсия́вшаго пра́вды Со́лнца, сла́внии, узре́вше от Де́вы Богоотрокови́цы, прилепи́стеся Ему́, Боже́ственным прича́стием све́т бы́вше, и отгна́сте пре́лести мра́к ве́сь.

Зако́н Боже́ственный на язы́це нося́ще, всю́ зе́млю проидо́сте, беззако́ние ея́ отъе́млюще, му́дрии Криске́нте и Андрони́че, Си́ло и Силуа́не, и всева́юще сло́во спаси́тельное.

Похва́лим Епене́та сла́внаго, карфаге́нов похвалу́ боже́ственну бы́вшу, и Сло́ва ученика́, и исцеле́ний исто́чника, и вели́ка пропове́дника су́щим па́че ума́, и ве́ры утвержде́ние.

Пропове́давше воплоще́ние Влады́чне и разруши́вше соу́з зло́бы, и́же дре́вле свя́занныя неве́рием, му́дрии, разреши́сте, великопропове́дницы, и к Бо́гу приведо́сте ве́рою.

Свети́льницы незаходи́маго светоли́тия бы́вше, тму́ безбо́жия отгна́сте, показу́юще челове́ком позна́ния све́т, прехва́льнии, сего́ ра́ди всегда́ блажи́ми есте́.

Во всю́ зе́млю изы́де, я́коже пое́т Дави́д, апо́стольское боже́ственное веща́ние, уча́щее страсте́м Спа́совым и воскресе́нию, и́мже воста́хом от гробо́в вси́ су́етства.

Кре́постию вся́ Сотво́ршаго проше́дше вселе́нную, я́коже крила́тии, спасо́сте су́щия, в пучи́не лю́тых, богоно́снии, бе́дствующия, и к ти́хому приста́нищу наста́висте.

Утвержда́я разсла́бленныя, сла́вне, мы́сли сло́вом, Си́ло, с Па́влом пропове́дником проше́д ты́ ве́сь ми́р, мно́гими напа́стьми облива́емь и ве́рным спа́с явля́яся.

Ве́лиими благода́тьми украша́емь, ше́ствовал еси́ от восто́ка до за́пада, я́коже заря́, с Па́влом, Си́ло прему́дре, светоза́рная со́лнцу су́щи, язы́ков сердца́ просвети́сте.

Да восхва́лится Криске́нт и Андрони́к, и с Си́лою да возвели́чится Силуа́н дне́сь, Епене́т же да похва́лится, Христо́ва виногра́да су́ще гро́здие, сла́дость иска́пающе спаси́тельную.

Взя́тся Твои́х учени́к превы́ше небе́с великоле́пие, пропове́дающих на земли́ Твое́ сла́вное прише́ствие, и стра́сти, и воскресе́ние, Сло́ве Бо́жий, Иису́се Преблаги́й.

Проза́рнаго и пресве́тлаго сосу́да Уте́шителева, заблу́ждших наставле́ние, Селу́ня пресла́вную похвалу́, апо́столов удобре́ние, ны́не Силуа́на му́драго восхва́лим.

Укре́плься тезоимени́тно Сло́ва посо́бием, прему́дре Андрони́че, прохо́диши, утвержда́я осла́бленая сердца́ искуше́ньми бори́теля и наставля́я в Бо́жие позна́ние.

Возводи́ми ко Го́споду чи́стыми манове́нии, прекло́ньшияся до́лу в поги́бельныя я́мы, привлеко́сте, му́дрии, к высоте́ небе́сней высо́каго виде́ния и дея́ния.

Еди́ницу у́бо Существо́м, Ли́цы же Тро́ицу, богоблаже́ннии, в конце́х пропове́давше, многобо́жную мглу́ до конца́ разори́сте и свети́льницы душа́м яви́стеся.

Вжили́в тво́й Христо́с по́мысл, Криске́нте прему́дре, пома́занием ра́дования, Халкидо́на первопа́стыря, я́ко сего́ ученика́ благоче́стно показа́, заблужде́нным стезю́ показу́ющаго.

Сосу́ды, вмести́вшия всю́ Уте́шителеву благода́ть, и прия́телища пре́лестей бы́вших погуби́вшия, и прия́тны Бо́гу сотвори́вшия, Си́лу и Силуа́на воспое́м согла́сно.

Не́сть дово́лен кто́ похвали́ти Епене́та чу́днаго, сообрази́ бо ся Христу́, Его́ ра́ди подъе́мь стра́сти, Ца́рствия же причасти́ся Его́, до́бре подвиза́вся.

Пе́т бу́ди, Кри́ск, пе́сньми боже́ственными, сокрове́нныя пути́ Христо́вы показа́вый, и осуди́вый пло́тию свое́ю осужде́нный гре́х, и мно́ги неосужде́нны показа́вый.

Не да́ша сна́ очи́ма бо́дрии Сло́ва служи́тели, до́ндеже сна́ тя́жкаго ве́рныя ле́сти изба́виша и све́та и дне́ сы́ны показа́ша.

Бы́вше колесни́ца Бо́жия, стяжа́сте Того́, веду́ща к небе́сному ше́ствию ва́с, апо́столи сла́внии, и ору́жия вся́ пре́лести сокруша́юща.

Прему́дрый Си́ла, я́ко Христо́в служи́тель, досто́йно да похва́лится, и с ни́м да просла́вится ве́рно Кри́ск и Андрони́к, свети́льницы, вся́ язы́ки просвети́вшия.

Воспои́м Живонача́льную Тро́ицу, Ипоста́сьми устро́енную, разумева́емую же Естество́м Еди́ным, и, пою́ще, рце́м: благослови́те, вся́ дела́ Госпо́дня, Го́спода.

Вра́чеве ду́ш же и теле́с бы́сте спаси́тельнии, духо́вными лечба́ми очища́ете неду́жныя и здра́вие показу́ете сугу́бо, богосия́ннии апо́столи, те́мже досто́йно блажи́ми есте́.

Яви́стеся, теплото́ю Ду́ха вже́гшеся, я́ко у́глие, и ле́д пре́лести растопи́сте, и сердца́ поме́рзшая ве́рою согре́ясте, и к весне́, прему́дрии, спаси́тельней наста́висте.

Соста́вим ли́к в дому́ Бо́га на́шего, сла́вяще Силуа́на и Си́лу, и Андрони́ка, и вели́каго Епене́та, и Криске́нта всему́драго, я́ко и́стины пропове́дники и моли́твенники на́ша су́щия.

Свята́ и полна́ дарова́ний Боже́ственнаго Ду́ха свяще́нная вои́стинну и достохва́льная ва́ша па́мять, богоде́тельными заря́ми осия́ющи благочести́вых исполне́ние, пе́ти ва́с, му́дрии, повелева́ет.

Предстоѧ́ще прⷭ҇то́лꙋ бжⷭ҇твенномꙋ всегда̀, сїѧ́нїемъ же просвѣща́еми незаходи́мымъ, ст҃і́и, просвѣще́нїе дꙋхо́вно всѣ̑мъ и҆спроси́те ѿ ѻ҆ц҃а̀ свѣ́тѡвъ низпосла́ти на́мъ, вѣ́рнѡ ва́съ почита́ющымъ.

Возсїѧ́вшаго пра́вды сл҃нца, сла́внїи, ᲂу҆зрѣ́вше ѿ дв҃ы бг҃оѻтрокови́цы, прилѣпи́стесѧ є҆мꙋ̀ бжⷭ҇твеннымъ прича́стїемъ, свѣ́тъ бы́вше, и҆ ѿгна́сте пре́лести мра́къ ве́сь.

Зако́нъ бжⷭ҇твенный на ѧ҆зы́цѣ носѧ́ще, всю̀ зе́млю проидо́сте, беззако́нїе є҆ѧ̀ ѿе́млюще, мꙋ́дрїи криске́нте и҆ а҆ндроні́че, сі́ло и҆ сїлꙋа́не, и҆ всѣва́юще сло́во спаси́тельное.

Похва́лимъ є҆пене́та сла́внаго, карѳаге́нѡвъ похвалꙋ̀ бжⷭ҇твеннꙋ бы́вшꙋ, и҆ сло́ва ᲂу҆ч҃ника̀, и҆ и҆сцѣле́нїй и҆сто́чника, и҆ вели́ка проповѣ́дника, сꙋ́щымъ па́че ᲂу҆ма̀, и҆ вѣ́ры ᲂу҆твержде́нїе.

Проповѣ́давше воплоще́нїе влⷣчне, и҆ разрꙋши́вше соꙋ́зъ ѕло́бы, и҆̀же дре́вле свѧ̑занныѧ невѣ́рїемъ мꙋ́дрїи разрѣши́сте, великопроповѣ́дницы, и҆ къ бг҃ꙋ приведо́сте вѣ́рою.

Свѣти́льницы незаходи́магѡ свѣтоли́тїѧ бы́вше, тмꙋ̀ безбо́жїѧ ѿгна́сте, показꙋ́юще человѣ́кѡмъ позна́нїѧ свѣ́тъ прехва́льнїи: сегѡ̀ ра́ди всегда̀ блажи́ми є҆стѐ.

Во всю̀ зе́млю и҆зы́де, ꙗ҆́коже пое́тъ дв҃дъ, а҆пⷭ҇льское бжⷭ҇твенное вѣща́нїе, ᲂу҆ча́щее стрⷭ҇те́мъ сп҃сѡвымъ и҆ воскресе́нїю, и҆́мже воста́хомъ ѿ гробѡ́въ всѝ сꙋ́етства.

Крѣ́постїю всѧ̑ сотво́ршагѡ, проше́дше вселе́ннꙋю ꙗ҆́коже крила́тїи, спасо́сте сꙋ́щыѧ въ пꙋчи́нѣ лю́тыхъ, бг҃оно́снїи бѣ́дствꙋющыѧ, и҆ къ ти́хомꙋ приста́нищꙋ наста́висте.

Оу҆твержда́ѧ разсла́блєнныѧ, сла́вне, мы́сли сло́вомъ, сі́ло съ па́ѵломъ проповѣ́дникомъ, проше́дъ ты̀ ве́сь мі́ръ, мно́гими напа́стьми ѡ҆блива́емь, и҆ вѣ̑рнымъ спа́съ ꙗ҆влѧ́ѧсѧ.

Ве́лїими бл҃года́тьми ᲂу҆краша́емь, ше́ствовалъ є҆сѝ ѿ восто́ка до за́пада, ꙗ҆́коже зарѧ̀, съ па́ѵломъ сі́ло премꙋ́дре, свѣтоза́рнаѧ со́лнцꙋ сꙋ́щи, ꙗ҆зы́кѡвъ сердца̀ просвѣти́сте.

Да восхва́литсѧ криске́нтъ и҆ а҆ндроні́къ, и҆ съ сі́лою да возвели́читсѧ сїлꙋа́нъ дне́сь, є҆пене́тъ же да похва́литсѧ, хрⷭ҇то́ва вїногра́да сꙋ́ще гро́здїе, сла́дость и҆ска́пающе спаси́тельнꙋю.

Взѧ́тсѧ твои́хъ ᲂу҆чєни́къ превы́ше небе́съ великолѣ́пїе, проповѣ́дающихъ на землѝ твоѐ сла́вное прише́ствїе, и҆ стрⷭ҇ти и҆ воскресе́нїе, сло́ве бж҃їй, і҆и҃се пребл҃гі́й.

Проза́рнаго и҆ пресвѣ́тлаго сосꙋ́да ᲂу҆тѣ́шителева, заблꙋ́ждшихъ наставле́нїе, селꙋ́нѧ пресла́внꙋю похвалꙋ̀, а҆пⷭ҇лѡвъ ᲂу҆добре́нїе, ны́нѣ сїлꙋа́на мꙋ́драго восхва́лимъ.

Оу҆крѣ́пльсѧ тезоимени́тнѡ сло́ва посо́бїемъ, премꙋ́дре а҆ндроні́че, прохо́диши, ᲂу҆твержда́ѧ ѡ҆сла́блєнаѧ сердца̀ и҆скꙋше́ньми бори́телѧ, и҆ наставлѧ́ѧ въ бж҃їе позна́нїе.

Возводи́ми ко гдⷭ҇ꙋ чи́стыми манове́нїи, прекло́ншыѧсѧ до́лꙋ въ поги́бєльныѧ ꙗ҆́мы, привлеко́сте, мꙋ́дрїи, къ высотѣ̀ небе́снѣй высо́кагѡ видѣ́нїѧ и҆ дѣѧ́нїѧ.

Є҆ди́ницꙋ ᲂу҆́бѡ сꙋщество́мъ, ли́цы же трⷪ҇цꙋ, бг҃облаже́ннїи въ концѣ́хъ проповѣ́давше, многобо́жнꙋю мглꙋ̀ до конца̀ разори́сте, и҆ свѣти́льницы дꙋша́мъ ꙗ҆ви́стесѧ.

Вжили́въ тво́й хрⷭ҇то́съ по́мыслъ, криске́нте премꙋ́дре, пома́занїемъ ра́дованїѧ, халкидо́на первопа́стырѧ, ꙗ҆́кѡ сегѡ̀ ᲂу҆ченика̀ благоче́стнѡ показа̀, заблꙋждє́ннымъ стезю̀ показꙋ́ющаго.

Сосꙋ́ды вмѣсти́вшыѧ всю̀ ᲂу҆тѣ́шителевꙋ бл҃года́ть, и҆ прїѧ́тєлища пре́лестей бы́вшихъ погꙋби́вшыѧ, и҆ прїѧ́тны бг҃ꙋ сотвори́вшыѧ, сі́лꙋ и҆ сїлꙋа́на воспое́мъ согла́снѡ.

Нѣ́сть дово́ленъ кто̀ похвали́ти є҆пене́та чꙋ́днаго, соѡбрази́ бо сѧ хрⷭ҇тꙋ̀, є҆гѡ̀ ра́ди под̾е́мь стра̑сти, црⷭ҇твїѧ же причасти́сѧ є҆гѡ̀, до́брѣ подвиза́всѧ.

Пѣ́тъ бꙋ́ди крі́скъ пѣ́сньми бжⷭ҇твенными, сокровє́нныѧ пꙋти̑ хрⷭ҇то́вы показа́вый, и҆ ѡ҆сꙋди́вый пло́тїю свое́ю ѡ҆сꙋжде́нный грѣ́хъ, и҆ мно́ги неѡсꙋжде́нны показа́вый.

Не да́ша сна̀ ѻ҆чи́ма бо́дрїи сло́ва слꙋжи́тели, до́ндеже сна̀ тѧ́жкагѡ вѣ̑рныѧ ле́сти и҆зба́виша, и҆ свѣ́та и҆ днѐ сы́ны показа́ша.

Бы́вше колесни́ца бж҃їѧ, стѧжа́сте того̀ ведꙋ́ща къ нбⷭ҇номꙋ ше́ствїю, ва́съ а҆пⷭ҇ли сла́внїи, и҆ ѻ҆рꙋ̑жїѧ всѧ̑ пре́лести сокрꙋша́юща.

Премꙋ́дрый сі́ла, ꙗ҆́кѡ хрⷭ҇то́въ слꙋжи́тель, досто́йнѡ да похва́литсѧ, и҆ съ ни́мъ да просла́витсѧ вѣ́рнѡ крі́скъ и҆ а҆ндроні́къ, свѣти́льницы всѧ̑ ꙗ҆зы́ки просвѣти́вшыѧ.

Воспои́мъ живонача́льнꙋю трⷪ҇цꙋ, ѵ҆поста́сьми ᲂу҆стро́еннꙋю, разꙋмѣва́емꙋю же є҆стество́мъ є҆ди́нымъ, и҆ пою́ще рце́мъ: благослови́те, всѧ̑ дѣла̀ гдⷭ҇нѧ, гдⷭ҇а.

Вра́чеве дꙋ́шъ же и҆ тѣле́съ бы́сте спаси́тельнїи, дꙋхо́вными лѣчба́ми ѡ҆чища́ете недꙋ̑жныѧ, и҆ здра́вїе показꙋ́ете сꙋгꙋ́бо, бг҃осїѧ́ннїи а҆пⷭ҇ли: тѣ́мже досто́йнѡ блажи́ми є҆стѐ.

Ꙗ҆ви́стесѧ теплото́ю дх҃а вже́гшесѧ ꙗ҆́кѡ ᲂу҆́глїе, и҆ ле́дъ пре́лести растопи́сте, и҆ сердца̀ помє́рзшаѧ вѣ́рою согрѣ́ѧсте, и҆ къ веснѣ̀, премꙋ́дрїи, спаси́тельнѣй наста́висте.

Соста́вимъ ли́къ въ домꙋ̀ бг҃а на́шегѡ, сла́вѧще сїлꙋа́на и҆ сі́лꙋ, и҆ а҆ндроні́ка и҆ вели́каго є҆пене́та, и҆ криске́нта всемꙋ́драго, ꙗ҆́кѡ и҆́стины проповѣ́дники и҆ моли́твенники на́шѧ сꙋ́щыѧ.

Ст҃а̀ и҆ полна̀ дарова́нїй бжⷭ҇твеннагѡ дх҃а, свѧще́ннаѧ вои́стиннꙋ и҆ достохва́льнаѧ ва́ша па́мѧть, бг҃одѣ́тельными зарѧ́ми ѡ҆сїѧ́ющи благочести́выхъ и҆сполне́нїе, пѣ́ти ва́съ мꙋ́дрїи повелѣва́етъ.