Православный календарь
Размер шрифта:

Ака́ѳістъ

А҆ка́ѳїстъ прпⷣбномꙋ и҆ бг҃оно́сномꙋ а҆нато́лїю мла́дшемꙋ, ста́рцꙋ ѻ҆́птинскомꙋ.

Прп. Анатолия Оптинского (младшего) (1922) 12 августа 2026

Конда́къ а҃

И҆зрѧ́дный ᲂу҆тѣ́шителю наро́да бж҃їѧ, ѻ҆́птинскагѡ ста́рчества ти́хаѧ похвало̀, мона́хѡвъ и҆ мїрѧ́нъ ᲂу҆чи́телю любе́знѣйшїй, ѻ҆́тче а҆нато́лїе прпⷣбне, похва́льное пѣ́нїе прїимѝ тебѣ̀ любо́вїю зовꙋ́щихъ:

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

І҆́косъ а҃

Заре́ю бл҃гоче́стїѧ просїѧ́лъ є҆сѝ въ мі́рѣ и҆здѣ́тска, бг҃а возлюби́лъ є҆сѝ прпⷣбне всѣ́мъ се́рдцемъ твои́мъ и҆ да́же до ста́рости ѻ҆́гнь любвѐ не ᲂу҆гаси́лъ є҆сѝ. Сегѡ̀ ра́ди лꙋча́ми твоегѡ̀ попече́нїѧ просвѣти́вшесѧ си́це тебѣ̀ зове́мъ:

Ра́дꙋйсѧ, лꙋчꙋ̀ ти́хїѧ ра́дости: ра́дꙋйсѧ, лицѐ и҆мѣ́ѧй и҆спо́лненное свѣ́тлости.

Ра́дꙋйсѧ, ѕвѣздо̀ прекра́снаѧ на тве́рди цр҃ко́внѣй: ра́дꙋйсѧ, дꙋ́ха ᲂу҆тѣ́шителѧ хла́де то́нкїй.

Ра́дꙋйсѧ, чи́стаѧ рѣко̀ бжⷭ҇твенныхъ поꙋче́нїй: ра́дꙋйсѧ, бездо́ннаѧ глꙋбино̀ хрⷭ҇то́ва млⷭ҇рдїѧ.

Ра́дꙋйсѧ, подража́телю чл҃вѣколю́бїѧ бж҃їѧ: ра́дꙋйсѧ, непостижи́маѧ широто̀ бжⷭ҇твеннагѡ долготерпѣ́нїѧ.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ в҃

Мі́ръ ѡ҆ста́вилъ є҆сѝ ѻ҆́тче а҆нато́лїе, ма́тере твоеѧ̀ бл҃гослове́нїе и҆спо́лнивъ и҆ свобо́дꙋ ѿ жите́йскихъ попече́нїй ᲂу҆лꙋчи́въ, бг҃ꙋ посвѧти́лъ є҆сѝ живо́тъ тво́й, бл҃года́рнѡ поѧ̀: А҆ллилꙋ́їа.

І҆́косъ в҃

И҆спи́лъ є҆сѝ ѿ и҆сто́чника премꙋ́дрости ста́рческїѧ, при а҆мвро́сїи послꙋша́нїе проходѧ̀, по́слѣжде при ста́рцѣ і҆ѡ́сифе сла́дкꙋю во́дꙋ ᲂу҆че́нїѧ ст҃оѻте́ческагѡ съ наслажде́нїемъ пїѧ̀. Сегѡ̀ ра́ди зно́й страсте́й на́шихъ прохлажда́еши, вопїю́щихъ тебѣ̀ сїѧ̀:

Ра́дꙋйсѧ, стрꙋѐ сле́знагѡ ᲂу҆миле́нїѧ: ра́дꙋйсѧ, є҆́зеро кро́тости невозмꙋти́мое.

Ра́дꙋйсѧ, волно̀ небꙋ́рнаѧ воздыха́нїй ст҃ы́хъ: ра́дꙋйсѧ, ти́хаѧ при́стань сладча́йшихъ моли́твъ.

Ра́дꙋйсѧ, ꙗ҆́кѡ на кора́блицѣ послꙋша́нїѧ преплы́лъ є҆сѝ мо́ре страсте́й: ра́дꙋйсѧ, ꙗ҆́кѡ во глꙋбинѣ̀ безмо́лвїѧ ѡ҆брѣ́лъ є҆сѝ би́серъ добродѣ́телей.

Ра́дꙋйсѧ, а҆мвро́сїево воспита́нїе: ра́дꙋйсѧ, і҆ѡ́сифово бл҃годерзнове́нїе.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ г҃

Моли́твою и҆ посто́мъ ѿрази́лъ є҆сѝ стрѣ̑лы вра́жїѧ, добродѣ́телїю же послꙋша́нїѧ страсте́й совле́клсѧ є҆сѝ, и҆ въ мꙋ́жа во́зраста дꙋхо́внагѡ дости́глъ є҆сѝ моли́твами ста́рцєвъ твои́хъ, ѻ҆́тче а҆нато́лїе, бл҃года́рнѡ взыва́ѧй бг҃ꙋ: А҆ллилꙋ́їа.

І҆́косъ г҃

Ꙗ҆́кѡ ка́мень чтⷭ҇ны́й ѡ҆гране́нный послꙋша́нїемъ ꙗ҆ви́лсѧ є҆сѝ, ѻ҆́тче а҆нато́лїе, всѧ́кое и҆скꙋше́нїе ѿрази́вый непоколеби́мою твое́ю вѣ́рою, сегѡ̀ ра́ди вста́вленъ бы́лъ є҆сѝ въ вѣне́цъ златы́й собо́ра ста́рцевъ ѻ҆́птинскихъ. На́съ же коле́блемыхъ и҆скꙋше́ньми ᲂу҆твердѝ на ка́мени вѣ́ры вопїю́щихъ тебѣ̀:

Ра́дꙋйсѧ, цр҃кве чтⷭ҇но́е ᲂу҆краше́нїе: ра́дꙋйсѧ, добродѣ́телей и҆зѧ́щное и҆зваѧ́нїе.

Ра́дꙋйсѧ, непоколеби́мое ᲂу҆твержде́нїе ста́рчества: ра́дꙋйсѧ, бл҃гоѡти́шное приста́нище гони́мыхъ за хрⷭ҇та̀.

Ра́дꙋйсѧ, кристаллови́днаѧ чистото̀ серде́чнаѧ: ра́дꙋйсѧ, златоблиста́ющее горе́нїе любвѐ.

Ра́дꙋйсѧ, тихосвѣ́тлое сїѧ́нїе собо́ра ѻ҆́птинскагѡ: ра́дꙋйсѧ, просвѣще́нїе на́шеѧ темноты̀.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ д҃

И҆спо́лнилъ є҆сѝ ᲂу҆тѣше́нїемъ дꙋхо́внымъ ѻ҆би́тель ѻ҆́птинскꙋю, ѻ҆́тче а҆нато́лїе, ꙗ҆́кѡ дꙋ́ха ᲂу҆тѣ́шителѧ всебога́тнѡ стѧжа́лъ є҆сѝ, є҆го́же дѣ́йствїемъ всѧ́кїѧ слє́зы ѿ ѻ҆че́й вѣ́рныхъ ѡ҆те́рлъ є҆сѝ, въ ра́дости пою́щымъ ᲂу҆тѣ́шителю: А҆ллилꙋ́їа.

І҆́косъ д҃

За́повѣдьми є҆ѵⷢ҇льскими снабди́вый дꙋ́шꙋ твою̀, сло́вомъ бж҃їимъ ꙗ҆́кѡ мече́мъ ѻ҆боюдоѻ́стрымъ и҆скорени́вый стра́сти грѣхо́вныѧ, и҆ ско́рби грѣ́хъ ра́ди на́шихъ находѧ́щїѧ ѿсѣ́клъ є҆сѝ, ѻ҆́тче а҆нато́лїе, лю́демъ къ тебѣ̀ приходѧ́щымъ. Сегѡ̀ ра́ди въ ра́дости дꙋхо́внѣй ѿ скорбе́й и҆зба́вльшїисѧ тебѣ̀ вопїѧ́хꙋ:

Ра́дꙋйсѧ, ᲂу҆тѣше́нїѧ дꙋхо́внагѡ пода́телю: ра́дꙋйсѧ, страсте́й грѣхо́вныхъ и҆скорени́телю.

Ра́дꙋйсѧ, скѡ́рби претворѧ́ѧй въ ра́дости: ра́дꙋйсѧ, сле́зъ и҆зсꙋша́ѧй и҆сто́чники.

Ра́дꙋйсѧ, крила́ми паракли́та ѡ҆сѣне́нный: ра́дꙋйсѧ, є҆го́же дѣ́йствїемъ въ нб҃о вознесе́нный.

Ра́дꙋйсѧ, радостотво́рнагѡ пла́ча наста́вниче: ра́дꙋйсѧ, смиренномꙋ́дрыхъ поꙋче́нїй и҆сто́чниче.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ є҃

Оу҆тѣ́шительное твоѐ чл҃вѣколю́бїе мно́гое, подража́телѧ бг҃а тѧ̀ ꙗ҆вѝ, ѻ҆́тче а҆нато́лїе, ꙗ҆́кѡ се́рдце твоѐ широто́ю любвѐ бж҃їѧ распространи́лъ є҆сѝ и҆ всѧ́комꙋ приходѧ́щемꙋ сострада́лецъ бы́лъ є҆сѝ и҆ наста́вникъ бг҃омꙋ́дрый, прелага́ющїй ско́рби въ бл҃года́рнꙋю пѣ́снь хрⷭ҇тꙋ̀: А҆ллилꙋ́їа.

І҆́косъ є҃

Сострада́тельнаѧ твоѧ̀ любы̀, ѻ҆́тче а҆нато́лїе, въ до́мъ прест҃ы́ѧ бцⷣы тѧ̀ вселѝ, є҆́же бы́сть въ монастырѣ̀ цр҃ковь больни́чнаѧ, и҆ та́мѡ стра́ждꙋщыѧ и҆ ѡ҆бременє́нныѧ грѣха́ми денноно́щнѡ прїима́лъ и҆ ᲂу҆тѣша́лъ є҆сѝ. Сегѡ̀ ра́ди ѿ мно́гїѧ любвѐ на́шеѧ прїимѝ сїѧ̑ похвалы̑:

Ра́дꙋйсѧ, цѣли́телю недꙋ́гѡвъ тѣле́сныхъ: ра́дꙋйсѧ, ᲂу҆тѣ́шителю скорбе́й дꙋше́вныхъ.

Ра́дꙋйсѧ, добродѣ́тели безсре́бренникѡвъ подража́телю: ра́дꙋйсѧ, та́инства є҆леѡсщ҃е́нїѧ бл҃гоговѣ́йный соверши́телю.

Ра́дꙋйсѧ, ꙗ҆́кѡ цр҃ковь бг҃омт҃ре въ до́мъ млⷭ҇рдїѧ претвори́лъ є҆сѝ: ра́дꙋйсѧ, ꙗ҆́кѡ та́мѡ мощмѝ твои́ми почи́лъ є҆сѝ.

Ра́дꙋйсѧ, бл҃голѣ́пное ᲂу҆краше́нїе хра́ма бж҃їѧ: ра́дꙋйсѧ, бл҃гово́нное ᲂу҆тѣше́нїе дх҃а ст҃а́гѡ.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ ѕ҃

Трꙋда́ми па́стырскагѡ твоегѡ̀ ѡ҆кормле́нїѧ мно́гїѧ ѻ҆́вцы хрⷭ҇то́вы на па́жити цр҃ко́внѣй воспита́лъ є҆сѝ, и҆ поꙋче́ньми твои́ми ꙗ҆́кѡ ти́хою пѣ́снїю свирѣ́ли пастꙋ́шескїѧ, ко и҆сто́чникѡмъ блгⷣти привле́клъ є҆сѝ. Сегѡ̀ ра́ди пастыренача́льника хрⷭ҇та̀ прославлѧ́емъ, дарова́вшагѡ на́мъ такова́гѡ па́стырѧ, бл҃года́рнѡ пое́мъ: А҆ллилꙋ́їа.

І҆́косъ ѕ҃

Завѣ̑тныѧ твоѧ̑ глаго́лы, ѻ҆́тче а҆нато́лїе, ꙗ҆́кѡ свѣти́льникъ во тмѣ̀ свѣтѧ́щїй прїѧ́хомъ, и҆́миже ᲂу҆чи́лъ є҆сѝ въ ско́рбѣхъ ко хрⷭ҇тꙋ̀ подвигополо́жникꙋ прибѣга́ти, въ за́повѣдехъ є҆гѡ̀ непоро́чнѡ ходи́ти, не́мощи же смире́нїемъ, самоꙋкоре́нїемъ и҆ покаѧ́нїемъ и҆справлѧ́ти и҆ всѧ̑ въ житїѝ моли́твою бл҃гоꙋправлѧ́ти. Таково́мꙋ бг҃оꙋго́дномꙋ жи́тельствꙋ ѿ тебє̀ наꙋче́нїи, бл҃года́рнѡ тебѣ̀ вопїе́мъ:

Ра́дꙋйсѧ, па́стырю бг҃омꙋ́дрый: ра́дꙋйсѧ, ᲂу҆чи́телю вселюбе́зный.

Ра́дꙋйсѧ, сладкоречи́выѧ ᲂу҆ста̀ и҆мѣ́вый: ра́дꙋйсѧ, нра́въ бл҃гоѡти́шный стѧжа́вый.

Ра́дꙋйсѧ, свирѣ́ле бл҃гозвꙋ́чнаѧ хрⷭ҇то́выхъ ᲂу҆че́нїй: ра́дꙋйсѧ, же́зле прогонѧ́ѧй бг҃опроти́вныѧ ᲂу҆че́нїѧ.

Ра́дꙋйсѧ, смиренномꙋ́дрїѧ кла́дезю глꙋбоча́йшїй: ра́дꙋйсѧ, поле́зныхъ совѣ́тѡвъ свѣти́льникъ ꙗ҆рча́йшїй.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ з҃

Мꙋ́дрость неземнꙋ́ю и҆ кро́тость голꙋби́нꙋю стѧжа́лъ є҆сѝ, ѻ҆́тче, по сло́вꙋ є҆ѵⷢ҇льскомꙋ, є҆́же наставлѧ́ти ко сп҃се́нїю приходѧ́щыѧ лю́ди къ тебѣ̀. Сегѡ̀ ра́ди под̾ крила́ми ᲂу҆тѣше́нїй твои́хъ ми́рствꙋютъ ча̑да твоѧ̑, пита́ємыѧ блгⷣтїю ѿ є҆ѵⷢ҇льскагѡ сло́ва, въ ра́дости пою́ще хрⷭ҇тꙋ̀: А҆ллилꙋ́їа.

І҆́косъ з҃

И҆́стинною любо́вїю ко хрⷭ҇тꙋ̀ распала́емь, ѕло́бꙋ де́монѡвъ всю̀ и҆спепели́ли є҆сѝ, и҆ ѻ҆би́дѧщымъ тѧ̀ и҆ гонѧ́щымъ тѧ̀ бл҃гость и҆ млⷭ҇рдїе ꙗ҆ви́лъ є҆сѝ. Сегѡ̀ ра́ди бг҃оподража́тельное твоѐ житїѐ прославлѧ́юще, си́це тебѣ̀ вопїе́мъ:

Ра́дꙋйсѧ, ᲂу҆тѣше́нїѧ любвеѻби́льный и҆сто́чниче: ра́дꙋйсѧ, ᲂу҆миле́нїѧ приснотекꙋ́щїй пото́че.

Ра́дꙋйсѧ, сїѧ́нїе добродѣ́тельнагѡ пла́мене: ра́дꙋйсѧ, де́монѡвъ разрꙋша́ѧй ѻ҆гнепалѧ́щаѧ стрѣлѧ́нїѧ.

Ра́дꙋйсѧ, ча̑да покрыва́ѧй любо́вїю: ра́дꙋйсѧ, врагѝ побѣжда́ѧй бл҃гостїю.

Ра́дꙋйсѧ, ꙗ҆́кѡ тобо́ю тихоми́рствꙋемъ съ бли́жними: ра́дꙋйсѧ, ꙗ҆́кѡ тобо́ю враждꙋ́ющїи примирѧ́ютсѧ.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ и҃

Ꙗ҆́коже со́лнце и҆спꙋсти́лъ є҆сѝ лꙋчѝ млⷭ҇ти твоеѧ̀, ѻ҆́тче а҆нато́лїе, и҆ всѧ̑ приходѧ́щыѧ къ тебѣ̀ ᲂу҆тѣ́шилъ є҆сѝ и҆ болѧ́щыѧ и҆сцѣли́лъ є҆сѝ и҆ малодꙋ̑шныѧ ᲂу҆тверди́лъ є҆сѝ въ вѣ́рѣ стоѧ́ти непоколеби́мѡ, и҆ за всѧ̑ приклю́чшеесѧ бг҃ꙋ возсыла́ти бл҃года́рнꙋю пѣ́снь: А҆ллилꙋ́їа.

І҆́косъ и҃

Главꙋ̀ добродѣ́телей стѧжа́лъ є҆сѝ, ѻ҆́тче а҆нато́лїе, неѿпа́дающꙋю и҆мѣ́ѧй въ се́рдцѣ любо́вь, сло́во же дѣ́ѧтельное прⷪ҇ро́ческою со́лїю припра́вленное, ѿ гни́лости и҆збавлѧ́ющее страсте́й, и҆ всѣ̑мъ всѧ̑ бы́лъ є҆сѝ по а҆пⷭ҇льскомꙋ сло́вꙋ, да сп҃се́ши и҆ ко хрⷭ҇тꙋ̀ приведе́ши вопїю́щихъ тебѣ̀ сицева̑ѧ:

Ра́дꙋйсѧ, бл҃гоꙋха́нїе хрⷭ҇то́выѧ любвѐ: ра́дꙋйсѧ, со́ль прⷪ҇ро́ческагѡ словесѐ.

Ра́дꙋйсѧ, ме́дъ ѿ ка́мене трꙋдѡ́въ подви́жническихъ и҆ска́паѧй: ра́дꙋйсѧ, сла́дость цр҃ко́внꙋю ѿ непреста́нныхъ мл҃твъ и҆сточа́ѧй.

Ра́дꙋйсѧ, разсꙋжде́нїѧ мѣ́рило и҆звѣ́стное: ра́дꙋйсѧ, глꙋбино̀ премꙋ́дрости ста́рческїѧ.

Ра́дꙋйсѧ, ꙗ҆́звы грѣхѡ́вныѧ прижига́ѧй сло́вомъ ѡ҆бличе́нїѧ: ра́дꙋйсѧ, къ добродѣ́тельной жи́зни привлека́ѧй сло́вомъ похвале́нїѧ.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ ѳ҃

Ловца̀ чл҃вѣ́кѡмъ сотворѝ тѧ̀ гдⷭ҇ь, ꙗ҆́коже и҆ а҆пⷭ҇ла петра̀, мре́жꙋ бо любвѐ твоеѧ̀ распросте́рлъ є҆сѝ и҆ ᲂу҆лови́лъ є҆сѝ мно́жество скорбѧ́щихъ, ча́ющихъ хрⷭ҇то́ва ᲂу҆тѣше́нїѧ, є҆го́же и҆зѻби́льнѡ пода́лъ є҆сѝ и҆ ми́ромъ хрⷭ҇то́вымъ ѡ҆дари́лъ є҆сѝ скорбѧ́щихъ и҆ сотвори́лъ є҆сѝ и҆̀хъ въ ра́дости пѣ́ти бг҃ꙋ: А҆ллилꙋ́їа.

І҆́косъ ѳ҃

Оу҆тѣше́нїе наро́дꙋ стра́ждꙋщемꙋ ꙗ҆ви́лсѧ є҆сѝ ѻ҆́тче а҆нато́лїе, сла́ва и҆ похвала̀ ѻ҆би́тели ѻ҆́птинскїѧ, ра́достїю воскресе́нїѧ хрⷭ҇то́ва всѣ́хъ ѡ҆блиста́лъ є҆сѝ, ꙗ҆́коже саро́вскїй подви́жникъ серафі́мъ. Тѣ́мже ᲂу҆ныва́ющыѧ всѧ̑ прїѡбодри́лъ є҆сѝ гдⷭ҇еви со тща́нїемъ рабо́тати, на́съ же сподо́би ра́дости вкꙋси́ти воскреше́нїѧ дꙋ́ши вопїю́щихъ тебѣ̀ съ любо́вїю:

Ра́дꙋйсѧ, зи́мꙋ скорбе́й прогонѧ́ѧй: ра́дꙋйсѧ, ве́снꙋ покаѧ́нїѧ приносѧ́й.

Ра́дꙋйсѧ, серафі́мовꙋ ра́дость ѡ҆ бз҃ѣ стѧжа́вый: ра́дꙋйсѧ, свѣ́томъ воскресе́нїѧ всѣ́хъ ѡ҆блиста́вый.

Ра́дꙋйсѧ, въ печа́лѣхъ ᲂу҆тѣ́шителю наискорѣ́йшїй: ра́дꙋйсѧ, въ страда́нїихъ помо́щникъ вѣ́рнѣйшїй.

Ра́дꙋйсѧ, ꙗ҆́кѡ ᲂу҆ны́нїе тобо́ю прогна́сѧ: ра́дꙋйсѧ, ꙗ҆́кѡ се́рдце тобо́ю взыгра́сѧ.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ і҃

Блгⷣть ᲂу҆тѣ́шителѧ въ тѧ̀ всели́вшаѧсѧ, печа́льника землѝ рꙋ́сскїѧ тѧ̀ ꙗ҆вѝ. Сегѡ̀ ра́ди скорбьмѝ ѡ҆бꙋрева́емїи и҆ бѣда́ми сокрꙋша́емїи лю́ди рѡссі́йстїи блгⷣтїю дх҃а ст҃а́гѡ ᲂу҆тѣша́лъ и҆ ᲂу҆крѣплѧ́лъ є҆сѝ. Мы́ же ᲂу҆тѣ́шителевꙋ блгⷣть въ тѧ̀ всели́вшꙋюсѧ вѣ́дꙋще, ᲂу҆тиши́телю всѣ́хъ бꙋ́рь жите́йскихъ вопїе́мъ: А҆ллилꙋ́їа.

І҆́косъ і҃

И҆зсꙋши́лъ є҆сѝ сле́зы стра́ждꙋщихъ, ѻ҆́тче а҆нато́лїе, лꙋча́ми бжⷭ҇твенныѧ твоеѧ̀ любвѐ и҆ вели́кое бл҃гоче́стїѧ ᲂу҆чи́лище показа́лъ є҆сѝ, происходѧ́щее ѿ терпѣ́нїѧ скорбе́й. Ꙗ҆́кѡ по словесѝ а҆пⷭ҇льскомꙋ ско́рбь терпѣ́нїе содѣ́ловаетъ, а҆ наде́жда не постыжа́етъ, но дх҃омъ ст҃ы́мъ ᲂу҆тѣша́етъ вѣ́рныхъ сердца̀. Тѣ́мже по лѣ́ствицѣ сицево́й восходѧ́ще бл҃года́рнѡ тебѣ̀ вопїе́мъ:

Ра́дꙋйсѧ, терпѣли́вое несе́нїе скорбе́й: ра́дꙋйсѧ, многотрꙋ́дное попече́нїе ѡ҆ па́ствѣ.

Ра́дꙋйсѧ, каменосерде́чнагѡ ᲂу҆строе́нїѧ разрꙋше́нїе: ра́дꙋйсѧ, бл҃гоꙋмиле́ннагѡ сокрꙋше́нїѧ созида́нїе.

Ра́дꙋйсѧ, ꙗ҆́кѡ лѣ́ствицꙋ дѣ́ѧтельнагѡ восхожде́нїѧ показа́лъ є҆сѝ: ра́дꙋйсѧ, ꙗ҆́кѡ смиренномꙋ́дрїемъ вхо́дъ въ клѣ́ть серде́чнꙋю ꙗ҆ви́лъ є҆сѝ.

Ра́дꙋйсѧ, пла́чь по бз҃ѣ подава́ѧй: ра́дꙋйсѧ, сле́зы стра́ждꙋщихъ и҆зсꙋша́ѧй.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ а҃і

Насади́лъ є҆сѝ въ вертогра́дѣ ѻ҆́птинстѣмъ цвѣ́ты твои́хъ добропобѣ́дныхъ по́двигѡвъ, ѿ ни́хже и҆сцѣле́нїѧ почерпа́ютъ входѧ́щыѧ во́нь и҆ прославлѧ́ютъ житїѐ твоѐ и҆сповѣ́дническое, ѻ҆́тче а҆нато́лїе, є҆го́же ꙗ҆́кѡ сладча́йшїй пло́дъ ста́рческагѡ слꙋже́нїѧ прине́слъ є҆сѝ хрⷭ҇тꙋ̀, вопїѧ̀: А҆ллилꙋ́їа.

І҆́косъ а҃і

Напра́снѡ безбо́жники тѧ̀ въ темни́цꙋ заключи́ти восхотѣ́ша, ᲂу҆жѐ и҆ ѻ҆кѡ́вы ᲂу҆гото́ваша тебѣ̀, ѻ҆ба́че де́нь пожда́ти и҆спроси́лъ є҆сѝ ᲂу҆ ни́хъ, ѻ҆́тче бг҃омꙋ́дре, во́ньже чтⷭ҇нꙋ́ю кончи́нꙋ ѿ гдⷭ҇а прїѧ́лъ є҆сѝ. Тѣ́мже побѣ́дꙋ соверши́лъ є҆сѝ без̾ кро́ве и҆ вѣнце́мъ новомꙋ́ченическимъ ᲂу҆вѧ́злсѧ є҆сѝ. Сегѡ̀ ра́ди таково́мꙋ твоемꙋ̀ дерзнове́нїю чꙋдѧ́щесѧ, си́це тебѣ̀ вопїе́мъ:

Ра́дꙋйсѧ, бл҃гоꙋха́нїе хрⷭ҇то́во: ра́дꙋйсѧ, безбѡ́жнымъ во́ннѧ въ сме́рть.

Ра́дꙋйсѧ, ꙗ҆́кѡ положи́лъ є҆сѝ дꙋ́шꙋ свою̀ за па́ствꙋ твою̀: ра́дꙋйсѧ, ꙗ҆́кѡ приве́лъ є҆сѝ па́ствꙋ твою̀ ко хрⷭ҇тꙋ̀.

Ра́дꙋйсѧ, прпⷣбноисповѣ́дникѡвъ рѡссі́йскихъ свѣ́точе премꙋ́дрый: ра́дꙋйсѧ, прпⷣбномꙋ́ченицы є҆лїсаве́ты наста́вниче предо́брый.

Ра́дꙋйсѧ, ꙗ҆́кѡ сме́рть послꙋ́шна бы́сть тебѣ̀: ра́дꙋйсѧ, ꙗ҆́кѡ воскреси́телѧ всѣ́хъ стѧжа́лъ є҆сѝ въ себѣ̀.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ в҃і

А҆нті́хрїста бг҃оме́рзкаго близгрѧдꙋ́щее прише́ствїе прови́дѣлъ є҆сѝ, ѻ҆́тче а҆нато́лїе, тѣ́мже ча́дамъ твои́мъ моли́твꙋ соста́вилъ є҆сѝ, да ѿ ѡ҆больще́нїѧ є҆гѡ̀ ᲂу҆кры́етъ гдⷭ҇ь въ сокрове́ннѣй пꙋсты́нѣ сп҃се́нїѧ лю́ди правосла́вныѧ, и҆ крѣ́пость и҆ мꙋ́жество и҆ тве́рдое и҆сповѣ́данїе да пода́стъ чтꙋ́щымъ ю҆̀ и҆ въ покаѧ́нїи пою́щымъ бг҃ꙋ: А҆ллилꙋ́їа.

І҆́косъ в҃і

Ги́бель держа́вы рѡссі́йскїѧ прови́дѣлъ є҆сѝ ѻ҆́тче а҆нато́лїе, тѣ́мже и҆ прⷪ҇ро́чества ѿ ᲂу҆сте́нъ бг҃опрїѧ́тныхъ и҆сточи́лъ є҆сѝ: ꙗ҆́кѡ кора́бль держа́вы рѡссі́йскїѧ бꙋ́рею бꙋ́детъ разби́тъ, ѻ҆ба́че сози́ждетъ є҆гѡ̀ ко́рмчїй вселе́нныѧ гдⷭ҇ь, и҆ па́ки поплыве́тъ по пꙋтѝ бг҃оначерта́нномꙋ. Мы́ же сбытїѐ слове́съ твои́хъ зрѧ́ще, си́це тебѣ̀ вопїе́мъ:

Ра́дꙋйсѧ, хрⷭ҇то́въ прⷪ҇ро́че досточꙋ́дный: ра́дꙋйсѧ, таи́нниче паракли́товъ бг҃опрїѧ́тный.

Ра́дꙋйсѧ, запечатлѣ́ннаѧ кни́го та́инъ бж҃їихъ: ра́дꙋйсѧ, ѿве́рстое се́рдце моли́твъ дерзнове́нныхъ.

Ра́дꙋйсѧ, сꙋде́бъ рѡссі́йскихъ тайнозри́телю: ра́дꙋйсѧ, велѣ́нїй гдⷭ҇нихъ сказа́телю.

Ра́дꙋйсѧ, ꙗ҆́кѡ прⷪ҇ро́чєства твоѧ̑ зри́мо сбыва́ютсѧ: ра́дꙋйсѧ, ꙗ҆́кѡ предста́тельствомъ твои́мъ ча̑да твоѧ̑ ᲂу҆тѣша́ютсѧ.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ г҃і

Ѽ бг҃оно́сне ѻ҆́тче а҆нато́лїе, дх҃а ст҃а́гѡ чтⷭ҇но́е ѻ҆бита́лище, ꙗ҆́кѡ дерзнове́нїе стѧжа́вый къ пара́клитꙋ непосты́дное, и҆спросѝ на́мъ ᲂу҆ негѡ̀ ᲂу҆тѣше́нїѧ ѿве́рсти сла̑дкїѧ и҆сто́чники, да бжⷭ҇твенною ти́хостїю наслади́вшесѧ всѧ̑ грѣхѡ́внаѧ ꙗ҆́же въ мі́рѣ ѡ҆ме́рзимъ, бл҃года́рнѡ пою́ще бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

Заре́ю бл҃гоче́стїѧ просїѧ́лъ є҆сѝ въ мі́рѣ и҆здѣ́тска, бг҃а возлюби́лъ є҆сѝ прпⷣбне всѣ́мъ се́рдцемъ твои́мъ и҆ да́же до ста́рости ѻ҆́гнь любвѐ не ᲂу҆гаси́лъ є҆сѝ. Сегѡ̀ ра́ди лꙋча́ми твоегѡ̀ попече́нїѧ просвѣти́вшесѧ си́це тебѣ̀ зове́мъ:

Ра́дꙋйсѧ, лꙋчꙋ̀ ти́хїѧ ра́дости: ра́дꙋйсѧ, лицѐ и҆мѣ́ѧй и҆спо́лненное свѣ́тлости.

Ра́дꙋйсѧ, ѕвѣздо̀ прекра́снаѧ на тве́рди цр҃ко́внѣй: ра́дꙋйсѧ, дꙋ́ха ᲂу҆тѣ́шителѧ хла́де то́нкїй.

Ра́дꙋйсѧ, чи́стаѧ рѣко̀ бжⷭ҇твенныхъ поꙋче́нїй: ра́дꙋйсѧ, бездо́ннаѧ глꙋбино̀ хрⷭ҇то́ва млⷭ҇рдїѧ.

Ра́дꙋйсѧ, подража́телю чл҃вѣколю́бїѧ бж҃їѧ: ра́дꙋйсѧ, непостижи́маѧ широто̀ бжⷭ҇твеннагѡ долготерпѣ́нїѧ.

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Конда́къ а҃

И҆зрѧ́дный ᲂу҆тѣ́шителю наро́да бж҃їѧ, ѻ҆́птинскагѡ ста́рчества ти́хаѧ похвало̀, мона́хѡвъ и҆ мїрѧ́нъ ᲂу҆чи́телю любе́знѣйшїй, ѻ҆́тче а҆нато́лїе прпⷣбне, похва́льное пѣ́нїе прїимѝ тебѣ̀ любо́вїю зовꙋ́щихъ:

Ра́дꙋйсѧ, а҆нато́лїе, наро́да бж҃їѧ ᲂу҆тѣше́нїе.

Моли́твы

Ѽ пречтⷭ҇на́ѧ главо̀ и҆ ᲂу҆тѣ́шителѧ бг҃опрїѧ́тное селе́нїе, бг҃омꙋ́дре ѻ҆́тче на́шъ а҆нато́лїе. Ты̀ гдⷭ҇еви порабо́талъ є҆сѝ со стра́хомъ и҆ за́повѣди є҆гѡ̀ и҆спо́лнилъ є҆сѝ нелѣ́ностнѡ. Сегѡ̀ ра́ди дарова́ньми разли́чными и҆спо́лни твою̀ дꙋ́шꙋ хрⷭ҇то́съ, наипа́че же и҆злїѧ̀ на тѧ̀ да́ръ бжⷭ҇твеннагѡ ᲂу҆тѣше́нїѧ. И҆́мже мно́гїѧ лю́ди ѡ҆бременє́нныѧ го́ремъ, страда́ньми и҆ бѣда́ми, ꙗ҆́кѡ ѻ҆те́цъ млⷭ҇рдый ᲂу҆тѣ́шилъ и҆ ѡ҆бо́дрилъ є҆сѝ, и҆ мнѡ́гїѧ дꙋ́ши въ годи́нꙋ гоне́нїй на цр҃ковь рꙋ́сскꙋю сп҃слъ є҆сѝ ѿ и҆скꙋше́нїй и҆ заблꙋжде́нїй. Тѣ́мже вѣ́дꙋще тѧ̀ и҆ по сме́рти жи́ва, и҆ мы̀ ѡ҆бꙋрева́емїи многоразли́чными бѣда́ми и҆ скорбѧ́ми є҆щѐ же и҆ страстьмѝ, къ тебѣ̀ припа́даемъ и҆ ми́лостивнѡ про́симъ: посѣтѝ ста́до твоѐ є҆́же ᲂу҆мно́жи хрⷭ҇то́съ твои́ми мл҃твами и҆ сꙋ́щимъ въ тебѣ̀ дарова́нїемъ ᲂу҆тѣше́нїѧ, ᲂу҆ста́ви бꙋ́рю негодова́нїѧ бж҃їѧ ꙗ҆́же грѣхѡ́въ ра́ди на́шихъ на ны̀ дви́жимꙋю, ᲂу҆тѣ́ши ѡ҆ѕло́блєнныѧ лю́ди, да́ждь ѡ҆сла́бꙋ и҆знемо́гшимъ ѿ и҆скꙋше́нїй ѕлохи́тростнагѡ ѕмі́ѧ и҆ ѿ непомѣ́рныхъ собла́знѡвъ сп҃сѝ на́съ погиба́ющихъ.

Наипа́че же молѝ гдⷭ҇а вседержи́телѧ да и҆зба́витъ на́съ ѿ ѻ҆больще́нїѧ бг҃оме́рзкагѡ и҆ ѕла́гѡ а҆нті́хрїста близгрѧдꙋ́щагѡ, и҆ ᲂу҆кры́етъ на́съ ѿ сѣте́й є҆гѡ̀ въ сокрове́нной пꙋ́стыни своегѡ̀ сп҃се́нїѧ. Да пода́стъ на́мъ крѣ́пость и҆ мꙋ́жество тве́рдагѡ и҆сповѣ́данїѧ и҆́мене є҆гѡ̀ ст҃а́гѡ, да не ѿстꙋ́пимъ стра́ха ра́ди дїа́вольскагѡ и҆ не ѿрече́мсѧ ѿ спⷭ҇телѧ и҆ и҆скꙋпи́телѧ на́шегѡ и҆ ѿ ст҃ы́ѧ є҆гѡ̀ цр҃кве. Но да пода́стъ на́мъ де́нь и҆ но́щь пла́чь и҆ сле́зы ѡ҆ грѣсѣ́хъ на́шихъ є҆́же поми́ловатисѧ на́мъ на стра́шнѣмъ сꙋдѣ̀ є҆гѡ̀, по твои́мъ бг҃оꙋго́днымъ ѻ҆́тче мл҃твамъ. А҆ми́нь.