Канон памяти святых седми мученик Маккавей, и матере их Соломонии, и учителя их Елеазара

Ли́к седмочи́сленных страда́лец, я́влься еди́ным нра́вом в лю́тых, по утвержде́нию оте́ческаго зако́на, умре́ти не отреко́шася.

Сла́ву презре́вше, я́же на земли́, жела́нием Боже́ственнаго Ца́рствия, вся́ку боле́знь претерпе́ша Боже́ственнии Маккаве́и, те́мже досто́йно ны́не чту́тся.

Зако́на храни́телие Моисе́ева, вои́стинну до́блии Маккаве́и, бра́тия дру́г со дру́гом яви́шася, внегда́ попра́ти и́м Антио́хово безбо́жие.

По оте́ческим ходя́ще исправле́нием зако́нным, блаже́ннии Христо́вы страда́льцы, жи́знь нестаре́емую ва́шими стяжа́сте кровьми́, прехва́льнии.

Ни о́гнь, ни ме́чь преврати́ти когда́ возмо́же до́блесть нра́ва, Блаже́ннии, ва́шу, я́же в ве́ре, в не́йже упраздни́сте мучи́телей шата́ния.

Му́ки претерпе́ша за Христа́ Бо́га прехва́льнии му́ченицы и свы́ше прия́ша побе́ды по́чести, непреста́нно моля́щеся спасти́ ду́ши на́ша.

Зако́н, Блаже́ннии, написа́вше, я́коже дре́вле Моисе́й, во свои́х скрижа́лех по́мысла не преступи́сте сего́ да́же до сме́рти, но тве́рдо подвиза́стеся.

Зако́нныя Бо́гу принося́ще же́ртвы и моисе́йскому ревну́юще житию́, преоби́деша вся́ко законоположе́ние мучи́тельское, страстоте́рпцы Христо́вы.

Я́коже ка́мень во́лненное стоя́ние, си́це мно́ги му́ки, страда́льцы, му́жеским умо́м, Маккаве́и, да́же до сме́рти претерпе́сте.

Я́коже оте́ческий зако́н не разо́рше, святи́и му́ченицы, венцы́ пра́ведными Христо́с ва́с Са́м венча́.

Елеаза́ру равноста́тни в ра́зуме я́вльшеся, блаже́ннии де́ти, и принесо́стеся со о́нем Христу́, духо́вное всесожже́ние.

И́же святы́ми свобожда́яй от ле́сти вся́ческая, спаси́ на́с, Го́споди, те́х моли́твами, я́ко Благоутро́бен.

Ри́зою себе́ му́ченическою оде́явше, святи́и, сию́ труды́ страда́ния ва́шего испестри́сте.

Жела́юще бы́ти со Христо́м, всесла́внии му́ченицы, тече́ние страда́ния неукло́нным по́мыслом преидо́сте.

Зако́н, и́же предаде́ Моисе́й, храня́ще, святи́и, зако́нно пострада́ша, посра́мльше Антио́ха мучи́теля.

Му́ченическими пострада́вше боле́зньми, мучи́тельских не устраши́стеся преще́ний, Христу́ вопию́ще: Благослове́н Бо́г оте́ц на́ших.

Терпе́ния пожда́вше боле́зней, вра́жия лю́тая победи́сте кова́рства, Христу́ вопию́ще: благослове́н Бо́г оте́ц на́ших.

И́стины рачи́телие и зако́на изве́стнии храни́телие бы́вше, прехва́льнии му́ченицы, пое́те Христа́ во ве́ки.

Седмора́сленный пло́д свята́го ко́рене я́ко вои́стинну, се́дмь Маккаве́и, му́ченики Госпо́дни, почти́м досто́йно.

Зако́ну ревни́тели, единоду́шныя страда́льцы, ве́рнии, се́дмь Маккаве́й с ро́ждшею и́х почти́м досто́йно.

Сокро́вище Боже́ственных дарова́ний вои́стинну показа́стеся, бога́тство неотъе́млемое, всехва́льнии му́ченицы.

Моли́твенницы до́блии к Зижди́телю все́х су́ще, испроси́те невла́емую жи́знь душа́м на́шим.

И́же Боже́ственною ре́вностию и теплото́ю души́ творя́щия ва́шу па́мять сохрани́те неснеда́еми от лука́ваго.

Ли́къ седмочи́сленныхъ страда́лєцъ ꙗ҆́вльсѧ, є҆ди́нымъ нра́вомъ въ лю́тыхъ, по ᲂу҆твержде́нїю ѻ҆те́ческагѡ зако́на, ᲂу҆мре́ти не ѿреко́шасѧ.

Сла́вꙋ презрѣ́вше, ꙗ҆́же на землѝ, жела́нїемъ бжⷭ҇твеннагѡ црⷭ҇твїѧ, всѧ́кꙋ болѣ́знь претерпѣ́ша бжⷭ҇твеннїи маккаве́и: тѣ́мже досто́йнѡ ны́нѣ чтꙋ́тсѧ.

Зако́на храни́телїе мѡѷсе́ева, вои́стиннꙋ до́блїи маккаве́и, бра́тїѧ дрꙋ́гъ со дрꙋ́гомъ ꙗ҆ви́шасѧ, внегда̀ попра́ти и҆̀мъ а҆нтїо́хово безбо́жїе.

По ѻ҆те́ческимъ ходѧ́ще и҆справле́нїємъ закѡ́ннымъ, блаже́ннїи хрⷭ҇то́вы страда́льцы, жи́знь нестарѣ́емꙋю, ва́шими стѧжа́сте кровьмѝ, прехва́льнїи.

Ни ѻ҆́гнь, ни ме́чь преврати́ти когда̀ возмо́же, до́блесть нра́ва, блаже́ннїи, ва́шꙋ, ꙗ҆́же въ вѣ́рѣ: въ не́йже ᲂу҆праздни́сте мꙋчи́телей шата̑нїѧ.

Мꙋ̑ки претерпѣ́ша за хрⷭ҇та̀ бг҃а, прехва́льнїи мꙋ́чєницы, и҆ свы́ше прїѧ́ша побѣ́ды по́чєсти, непреста́ннѡ молѧ́щесѧ, спастѝ дꙋ́шы на́шѧ.

Зако́нъ бл҃же́ннїи написа́вше, ꙗ҆́коже дре́вле мѡѷсе́й во свои́хъ скрижа́лѣхъ по́мысла: не престꙋпи́сте сегѡ̀ да́же до сме́рти, но тве́рдѡ подвиза́стесѧ.

Закѡ́нныѧ бг҃ꙋ приносѧ́ще жє́ртвы, и҆ мѡѷсе́йскомꙋ ревнꙋ́юще житїю̀, преѡби́дѣша всѧ́ко законоположе́нїе мꙋчи́тельское, страстоте́рпцы хрⷭ҇то́вы.

Ꙗ҆́коже ка́мень во́лненное стоѧ́нїе, си́це мно́ги мꙋ̑ки, страда́льцы, мꙋ́жескимъ ᲂу҆мо́мъ, маккаве́и, да́же до сме́рти претерпѣ́сте.

Ꙗ҆́коже ѻ҆те́ческїй зако́нъ не разо́рше, ст҃і́и мꙋ́чєницы, вѣнцы̀ пра́ведными хрⷭ҇то́съ ва́съ са́мъ вѣнча̀.

Є҆леаза́рꙋ равноста́тни въ ра́зꙋмѣ ꙗ҆́вльшесѧ, блаже́ннїи дѣ́ти, и҆ принесо́стесѧ со ѻ҆́нѣмъ хрⷭ҇тꙋ̀, дꙋхо́вное всесожже́нїе.

И҆́же ст҃ы́ми свобожда́ѧй ѿ ле́сти всѧ́чєскаѧ, спасѝ на́съ, гдⷭ҇и, тѣ́хъ моли́твами, ꙗ҆́кѡ бл҃гоꙋтро́бенъ.

Ри́зою себѐ мꙋ́ченическою ѡ҆дѣ́ѧвше ст҃і́и, сїю̀ трꙋды̑ страда́нїѧ ва́шегѡ и҆спестри́сте.

Жела́юще бы́ти со хрⷭ҇то́мъ, всесла́внїи мꙋ́чєницы, тече́нїе страда́нїѧ неꙋкло́ннымъ по́мысломъ преидо́сте.

Зако́нъ, и҆́же предадѐ мѡѷсе́й, хранѧ́ще ст҃і́и, зако́ннѡ пострада́ша, посра́мльше а҆нтїо́ха мꙋчи́телѧ.

Мч҃ническими пострада́вше болѣ́зньми, мꙋчи́тельскихъ не ᲂу҆страши́стесѧ преще́нїй, хрⷭ҇тꙋ̀ вопїю́ще: бл҃гослове́нъ бг҃ъ ѻ҆тє́цъ на́шихъ.

Терпѣ́нїѧ пожда́вше болѣ́зней, вра̑жїѧ лю̑таѧ побѣди́сте кова̑рства, хрⷭ҇тꙋ̀ вопїю́ще: бл҃гослове́нъ бг҃ъ ѻ҆тє́цъ на́шихъ.

И҆́стины рачи́телїе, и҆ зако́на и҆звѣ́стнїи храни́телїе бы́вше, прехва́льнїи мꙋ́чєницы, пое́те хрⷭ҇та̀ во вѣ́ки.

Седмора́сленный пло́дъ ст҃а́гѡ ко́рене, ꙗ҆́кѡ вои́стиннꙋ се́дмь маккаве́и, мꙋ́ченики гдⷭ҇ни почти́мъ досто́йнѡ.

Зако́нꙋ ревни́тели, є҆динодꙋ́шныѧ страда́льцы вѣ́рнїи, се́дмь маккаве́й съ ро́ждшею и҆̀хъ, почти́мъ досто́йнѡ.

Сокро́вище бжⷭ҇твенныхъ дарова́нїй, вои́стиннꙋ показа́стесѧ, бога́тство неѿе́млемое, всехва́льнїи мꙋ́чєницы.

Моли́твєнницы до́блїи къ зижди́телю всѣ́хъ сꙋ́ще, и҆спроси́те невла́емꙋю жи́знь дꙋша́мъ на́шымъ.

И҆́же бжⷭ҇твенною ре́вностїю и҆ теплото́ю дꙋшѝ, творѧ́щыѧ ва́шꙋ па́мѧть, сохрани́те неснѣда́еми ѿ лꙋка́вагѡ.