Православный календарь
Размер шрифта:

Ака́ѳістъ

А҆ка́ѳїстъ бл҃же́нномꙋ васі́лїю, хрⷭ҇та̀ ра́ди ю҆ро́дивомꙋ, моско́вскомꙋ чꙋдотво́рцꙋ.

Блаж. Василия Московского, Христа ради юрод. (1552) 15 августа 2026

Конда́къ а҃

И҆збра́нный сосꙋ́дъ бж҃їей блгⷣти, мѵ́ромъ добродѣ́телей преиспо́лненный, достоꙋго́дне васі́лїе, ꙗ҆́кѡ и҆збавлѧ́еми ѿ всѧ́кихъ бѣ́дъ и҆ напа́стей твои́мъ ѡ҆ на́съ ко гдⷭ҇ꙋ те́плымъ предста́тельствомъ, бл҃года́рственное сїѐ тебѣ̀ пѣ́нїе приносѧ́ще зове́мъ:

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

І҆́косъ а҃

А҆гг҃лоподо́бнѡ житїѐ твоѐ бы́сть бг҃обл҃же́нне и҆ чтⷭ҇ота̀ вои́стиннꙋ нескве́рна: вѣ́дый бо, ꙗ҆́кѡ любвѐ мі́ра сегѡ̀ вражда̀ бг҃ꙋ є҆́сть, не восхотѣ́лъ є҆сѝ дрꙋ́гъ мі́рꙋ бы́ти, но преда́лъ є҆сѝ всего̀ себє̀ бг҃ꙋ, таково́мꙋ вели́чїю по́двига твоегѡ̀ дивѧ́щесѧ вопїе́мъ:

Ра́дꙋйсѧ, вѣ́рный гдⷭ҇а слꙋжи́телю, лоза̀ преди́внаѧ хрⷭ҇то́ва вїногра́да: ра́дꙋйсѧ, житїѧ̀ добродѣ́тельнагѡ ᲂу҆чи́телю, ѻ҆вча̀ и҆збра́нное гдⷭ҇нѧ ста́да.

Ра́дꙋйсѧ, ло́на а҆враа́ма насе́льниче, раѧ̀ пресла́достнагѡ жи́тель: ра́дꙋйсѧ, црⷭ҇твїѧ нбⷭ҇нагѡ наслѣ́дниче, та́мѡ себѣ̀ воспрїѧ́вый ѻ҆би́тель.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ в҃

Ви́дѣ, ꙗ҆́кѡ всѧ̑ ꙗ҆́же въ мі́рѣ: по́хоть пло́ти, по́хоть ѻ҆че́съ и҆ го́рдость жите́йскаѧ, ᲂу҆чи́лъ є҆сѝ, пребл҃же́нне, презира́ти пло́ть, прехо́дитъ бо: прилежа́ти же ѡ҆ дꙋшѝ безсме́ртной, воспѣва́ѧ непреста́ннѡ бг҃ꙋ: А҆ллилꙋ́їа.

І҆́косъ в҃

Ра́зꙋмъ неꙋразꙋмѣ́ненъ, трꙋды̑ и҆ пѡ́двиги твоѧ̑, достобл҃же́нне васі́лїе, и҆́миже се́дмьдесѧтъ и҆ два̀ лѣ́та во гра́дѣ се́мъ москвѣ̀, пло́ть твою̀ ᲂу҆дрꙋча́лъ є҆сѝ. Мы́ же, многострада́льнымъ терпѣ́нїемъ твои́мъ ᲂу҆милѧ́еми, зове́мъ:

Ра́дꙋйсѧ, преꙋго́дный а҆́гг҃ле земны́й, земна̑ѧ въ се́рдцѣ всѧ̑ попра́вый: ра́дꙋйсѧ, преди́вный чл҃вѣ́че нбⷭ҇ный, нбⷭ҇нагѡ ѻ҆те́чества взыска́вый.

Ра́дꙋйсѧ, ѻ҆гнезра́чный херꙋві́ме, въ дꙋшѐ свое́й всѧ̑ стра̑сти попали́вый.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ г҃

Си́лою блгⷣти ѿ бг҃а свы́ше ᲂу҆крѣплѧ́емь, жела́нїемъ къ нбⷭ҇номꙋ возгорѣ́лсѧ є҆сѝ, всебл҃же́нне, и҆ чтⷭ҇ото́ю житїѧ̀ твоегѡ̀ ѻ҆би́телей вѣ́чныхъ дости́глъ є҆сѝ, въ ни́хъ ны́нѣ вопїе́ши бг҃ꙋ: А҆ллилꙋ́їа.

І҆́косъ г҃

И҆мѣ́ѧй въ се́рдцѣ сло́во гдⷭ҇не: ка́ѧ бо по́льза чл҃вѣ́кꙋ, а҆́ще прїѡбрѧ́щетъ мі́ръ ве́сь, и҆ ѿщети́тъ дꙋ́шꙋ свою̀: всѧ̑ кра̑снаѧ мі́ра сегѡ̀ во ᲂу҆мє́ты вмѣни́лъ є҆сѝ, тѣ́мже прославлѧ́юще тѧ̀, зове́мъ:

Ра́дꙋйсѧ, въ мі́рѣ се́мъ внѣ̀ мі́ра жи́вый, и҆ сла́вꙋ всю̀ є҆гѡ̀ презрѣ́вый: ра́дꙋйсѧ, во пло́ти а҆́ки безпло́тенъ бы́вый, нбⷭ҇ныѧ сла́вы восхотѣ́вый.

Ра́дꙋйсѧ, дꙋ́шꙋ свою̀ возлюби́вый, сп҃се́нїѧ вѣ́чнагѡ и҆ска́вый: ра́дꙋйсѧ, тѣ́ло своѐ ꙗ҆́кѡ врага̀ смири́вый, пꙋ́ть по́двига и҆збра́вый.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ д҃

Бꙋ́рю ве́лїю ѕло́бы многомѧте́жный дїа́волъ воздви́же на тѧ̀, бг҃обл҃же́нне васі́лїе, ты́ же ᲂу҆бѣжа́лъ є҆сѝ ловле́нїѧ льсти́вагѡ сегѡ̀ мїроде́ржца, и҆ ᲂу҆вѧ́злсѧ є҆сѝ вѣнце́мъ нетлѣ́нїѧ, воспѣва́ѧ бг҃ꙋ: А҆ллилꙋ́їа.

І҆́косъ д҃

Слы́ша хрⷭ҇то́вꙋ за́повѣдь: и҆щи́те пре́жде всегѡ̀ црⷭ҇твїѧ бж҃їѧ и҆ пра́вды є҆гѡ̀, ѡ҆трѧ́слъ є҆сѝ всѧ́кое мїрско́е пристра́стїе. Восхвалѧ́юще таковꙋ́ю ѡ҆ бз҃ѣ ре́вность твою̀, вопїе́мъ:

Ра́дꙋйсѧ, ѿ ю҆́ности до́мъ ѻ҆те́ческїй ѡ҆ста́вивый и҆ сро́дники своѧ̑ и҆ дрꙋ́ги всѧ̑ поки́нꙋвый: ра́дꙋйсѧ, къ до́мꙋ ѻ҆тца̀ нбⷭ҇нагѡ стопы̀ своѧ̀ напра́вивый, широ́кїй пꙋ́ть сласте́й ѿри́нꙋвый.

Ра́дꙋйсѧ, неѧ́сыти пꙋсты́ннѣй ᲂу҆подо́бивыйсѧ, кро́ва себѣ̀ на землѝ не и҆мѣ́вый: ра́дꙋйсѧ, ѻ҆би́телей ра́йскихъ сподо́бивыйсѧ, приста́нище бл҃гоѡти́шное та́мѡ ѡ҆брѣты́й.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ є҃

Бг҃оте́чнѣй ѕвѣздѣ̀, свѣтоза́рный пꙋ́ть сп҃се́нїѧ показꙋ́ющей, ᲂу҆подо́билсѧ, бл҃же́нне, на́съ, во тмѣ̀ грѣхо́внѣй блꙋжда́ющихъ, на пꙋ́ть пра́вый наста́ви, да сп҃се́ннїи тобо́ю, воспое́мъ бг҃ꙋ: А҆ллилꙋ́їа.

І҆́косъ є҃

Ви́дѧ ѕлохи́трство дїа́вола, и҆́щꙋща жите́йскими попече́ньми ѡ҆держи́мыхъ въ сѣ́ти своѧ̑ ᲂу҆ловлѧ́ти, противꙋста́лъ є҆сѝ ко́знемъ вра́жїимъ, ни ѡ҆ че́мъ же земнѣ́мъ печа́сѧ. Ви́дѧще сицево́е твоѐ бл҃го́е произволе́нїе, зове́мъ тѝ:

Ра́дꙋйсѧ, всегѡ̀ себє̀ и҆змла́да гдⷭ҇ꙋ врꙋчи́вый и҆ къ томꙋ̀ є҆ди́номꙋ напра́вивый ве́сь тво́й слꙋ́хъ: ра́дꙋйсѧ, того̀ є҆ди́наго всѣ́мъ се́рдцемъ возлюби́вый, и҆ тогѡ̀ є҆ди́нагѡ смире́нный ра́бъ и҆ вѣ́рный дрꙋ́гъ.

Ра́дꙋйсѧ, стезе́ю по́двига всѐ житїѐ своѐ проше́дшїй, и҆ добродѣ́телїю свое́ю со́нмы а҆́гг҃лѡвъ ᲂу҆диви́вый: ра́дꙋйсѧ, нбⷭ҇ный би́серъ многоцѣ́нный на землѝ ѡ҆брѣ́тшїй, чтⷭ҇ото́ю твое́ю ли́къ првⷣныхъ возвесели́вый.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ ѕ҃

Проповѣ́дꙋѧ па́че всѧ́кагѡ сло́ва житїе́мъ твои́мъ не люби́ти мі́ра, ни ꙗ҆́же въ мі́рѣ, добродѣ́телей кꙋ́плю мно́гꙋ стѧжа́лъ є҆сѝ и҆ влⷣцѣ хрⷭ҇тꙋ̀ ꙗ҆́кѡ всепло́дїе же́ртвенное прине́слъ є҆сѝ, вопїѧ̀ є҆мꙋ̀: А҆ллилꙋ́їа.

І҆́косъ ѕ҃

Возсїѧ̀, ꙗ҆́кѡ свѣти́ло лꙋчеза́рное, по́двиги твоѧ̑, всебл҃же́нне, ре́вностїю дꙋхо́вною разгорѣ́всѧ, ко мно́жайшемꙋ трꙋдꙋ̀ просте́рлъ є҆сѝ себє̀: а҆да́мꙋ первозда́нномꙋ подо́бѧсѧ, на́гъ на землѝ ходи́лъ є҆сѝ, пло́ть свою̀ ᲂу҆дрꙋча́ѧ. Таковꙋ́ю крѣ́пость дꙋшѝ твоеѧ̀ восхвалѧ́юще, зове́мъ:

Ра́дꙋйсѧ, ѡ҆дѣѧ́нїй тлѣ́нныхъ совле́кшїйсѧ, тѣ́ло своѐ наготѣ̀ преда́вый: ра́дꙋйсѧ, безстра́стїемъ ст҃ы́мъ ѡ҆бле́кшїйсѧ, добродѣ́тели ри́зꙋ свѣ́тлꙋю и҆збра́вый.

Ра́дꙋйсѧ, мра́за лю́тагѡ не ᲂу҆боѧ́выйсѧ, теплоты̀ ра́йскїѧ и҆ска́вый: ра́дꙋйсѧ, зно́ѧ со́лнечнагѡ не ᲂу҆клони́выйсѧ, прохлажде́нїѧ нбⷭ҇нагѡ жела́вый.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ з҃

Хотѧ́й мꙋ́дрости нбⷭ҇ныѧ сподо́битисѧ, послѣ́довалъ є҆сѝ гла́сꙋ па́ѵла а҆пⷭ҇тола: а҆́ще кто̀ мни́тсѧ мꙋ́дръ бы́ти въ вѣ́цѣ се́мъ, ю҆ро́дъ да быва́етъ, да премꙋ́дръ бꙋ́детъ, и҆ хрⷭ҇та̀ ра́ди ю҆ро́дъ бы́лъ, ꙗ҆́кѡ безꙋ́мна ꙗ҆влѧ́ѧ себѧ̀ мі́рꙋ, ᲂу҆мꙋдри́вшемꙋ же тѧ̀ гдⷭ҇ꙋ воспѣва́ѧ: А҆ллилꙋ́їа.

І҆́косъ з҃

Ди́внѡ и҆ пречꙋ́днѡ ю҆ро́дство твоѐ бы́сть, пребл҃же́нне, всѧ́кое нече́стїе и҆ беззако́нїе небоѧ́зненнѡ ѡ҆блича́лъ є҆сѝ, мно́гїѧ досаждє́нїѧ и҆ ра̑ны за то̀ претерпѣва́ѧ. Таково́й вели́кїй по́двигъ тво́й ᲂу҆бл҃жа́ѧ, зове́мъ тѝ:

Ра́дꙋйсѧ, ᲂу҆́мъ земно́й ѿри́нꙋвый, нбⷭ҇ный ра́зꙋмъ воспрїѧ́вый: ра́дꙋйсѧ, земнꙋ́ю мꙋ́дрость всю̀ поки́нꙋвый, ю҆ро́дства по́двиги себѣ̀ и҆збра́вый.

Ра́дꙋйсѧ, дїа́вола свои́мъ ю҆ро́дствомъ прехитри́вый и҆ льсти́выхъ сѣте́й є҆гѡ̀ и҆збѣжа́вый: ра́дꙋйсѧ, безꙋ́мна мі́рꙋ себє̀ ꙗ҆ви́вый, мꙋ́дрыхъ вѣ́ка сегѡ̀ всѣ́хъ попра́вый.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ и҃

Стра́нникъ и҆ прише́лецъ бы́лъ є҆сѝ, пребл҃же́нне васі́лїе, нбⷭ҇нагѡ гра́да і҆ерⷭ҇ли́ма взыскꙋ́ѧ, є҆го́же дости́глъ є҆сѝ, и҆ ны́нѣ воспѣва́еши та́мѡ бг҃ꙋ немо́лчнѡ: А҆ллилꙋ́їа.

І҆́косъ и҃

Ве́сь къ бг҃ꙋ впери́въ тво́й ᲂу҆́мъ, и҆ возлюбѝ нбⷭ҇наѧ, земно́е всѐ ѡ҆трѧ́слъ є҆сѝ, тѣ́мже на́съ ны́нѣ землѝ приве́рженныхъ къ нбⷭ҇номꙋ ѡ҆братѝ, да и҆зба́вльшесѧ ѿ земна́гѡ пристра́стїѧ и҆ сꙋеты̀ мїрскі́ѧ, бл҃года́рственнѡ возопїи́мъ тѝ:

Ра́дꙋйсѧ, тѣ́ломъ на землѝ пребыва́вый, но земна̑ѧ всѧ̑ презрѣ́вый: ра́дꙋйсѧ, дꙋ́хомъ же на нб҃ѣ ѡ҆бита́вый.

Ра́дꙋйсѧ, ди́вный бж҃їй ᲂу҆го́дниче, житїе́мъ свои́мъ, ꙗ҆́кѡ со́лнце, сїѧ́ющїй: ра́дꙋйсѧ, многотерпѣли́вый хрⷭ҇то́въ подви́жниче, и҆ на́съ къ по́двигѡмъ призыва́ющїй.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ ѳ҃

Всѧ̑ чи́нове а҆́гг҃льстїи съ нб҃съ на зе́млю мы́сленными прини́кше ѻ҆чи́ма и҆ ви́дѧще твоѧ̑ по́двиги, во ᲂу҆миле́нїи воспѣва́хꙋ бг҃ꙋ: А҆ллилꙋ́їа.

І҆́косъ ѳ҃

Вѣті́йствовати хотѧ́щїй ѧ҆зы́къ на́шъ безгла́сїемъ свѧзꙋ́етсѧ, ꙗ҆́кѡ не могꙋ́щїй по достоѧ́нїю восхвали́ти добродѣ̑тели твоѧ̑. Не пре́зри на́съ, зовꙋ́щихъ тѝ:

Ра́дꙋйсѧ, росо́ю блгⷣти дꙋ́шꙋ свою̀ напои́вый и҆ сѣ́мена бл҃гі́е и҆змла́да въ не́й насади́вый: ра́дꙋйсѧ, плоды̀ сп҃си́тельныѧ въ се́рдцѣ свое́мъ возрасти́вый по́двигами свои́ми, ꙗ҆́кѡ ка́менїемъ многоцѣ́ннымъ, себє̀ ᲂу҆краси́вый.

Ра́дꙋйсѧ, крі́не ра́йскїй, добродѣ́телѧми бл҃гоꙋха́ющїй и҆ се́рдце на́ше ᲂу҆слажда́ющїй: ра́дꙋйсѧ, свѣти́льникъ пресвѣ́тлый во тмѣ̀ грѣхо́внѣй сїѧ́ющїй, на́съ же свѣ́томъ бл҃горазꙋ́мїѧ просвѣща́ющїй.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ і҃

Сп҃стѝ хотѧ́й ѿ бꙋ́ри въ мо́рѣ потоплѧ́емыхъ и҆ къ тебѣ̀ ѡ҆ сп҃се́нїи свое́мъ возопи́вшихъ, ꙗ҆ви́лсѧ є҆сѝ и҆́мъ на мо́ри, во гра́дѣ москвѣ̀ неѿстꙋ́пнѡ пребыва́ѧ, и҆ ѿ потопле́нїѧ и҆зба́вилъ є҆сѝ, да восхвалѧ́ютъ бг҃а, чꙋде́снѣ тобо́ю и҆̀хъ спа́сшаго, и҆ возопїю́тъ є҆мꙋ̀: А҆ллилꙋ́їа.

І҆́косъ і҃

Гдⷭ҇а бг҃а непреста́ннѡ ᲂу҆мо́мъ зрѧ̀, не да́лъ є҆сѝ ѻ҆чи́ма свои́ма сна̀, ни вѣ́ждома дрема́нїѧ, въ мл҃твѣ цр҃ко́внѣй но́щи пребыва́ѧ. Лю́дїе же ви́дѧще таково́е твоѐ къ бг҃ꙋ ᲂу҆се́рдїе, взыва́хꙋ тѝ:

Ра́дꙋйсѧ, высото́ю смире́нїѧ твоегѡ̀ ᲂу҆мы̀ на̑ша ᲂу҆дивлѧ́ющїй, глꙋбино́ю смире́нїѧ сердца̀ на̑ша ᲂу҆милѧ́ющїй: ра́дꙋйсѧ, дꙋ́шꙋ свою̀ хра́минꙋ дꙋ́ха ст҃а́гѡ сотвори́вый и҆ страстє́мъ вхо́дъ въ ню̀ загради́вый.

Ра́дꙋйсѧ, креста̀ гдⷭ҇нѧ носи́тель терпѣли́вый, всѣ́мъ се́рдцемъ є҆го̀ взыска́вый: ра́дꙋйсѧ, и҆́го гдⷭ҇нѣ ꙗ҆́кѡ бл҃го́е возлюби́вый, бре́мѧ ле́гкое є҆гѡ̀ ра́достнѡ под̾ѧ́вый.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ а҃і

Пѣ́нїе всеꙋмиле́нное тебѣ̀, всебл҃же́нне, приносѧ́ще, вопїе́мъ: ꙗ҆́коже дре́влѣ чꙋдодѣ́йствꙋѧ, разсла́бленныхъ и҆сцѣлѧ́лъ є҆сѝ, слѣпы̑мъ прозрѣ́нїе дарова́лъ є҆сѝ, та́кѡ и҆ ны́нѣ дꙋ́ши на̑ша, грѣха́ми разсла́бленныѧ и҆ похотьмѝ ѡ҆слѣпле́нныѧ, и҆сцѣлѝ, да вопїе́мъ бг҃ꙋ: А҆ллилꙋ́їа.

І҆́косъ а҃і

Свѣтопода́тельна свѣти́льника вели́кагѡ зри́мъ тебѐ, пребл҃же́нне васі́лїе, наставлѧ́юща на пꙋ́ть пра́вый блꙋжда́ющихъ во тмѣ̀ и҆ сѣ́ни сме́ртнѣй. Тогѡ̀ ра́ди вопїе́мъ тѝ:

Ра́дꙋйсѧ, лꙋчꙋ̀ пра́вды хрⷭ҇то́вой посо́бствꙋющїй, мглꙋ̀ помыслѡ́въ сꙋ́етныхъ разгонѧ́ющїй: ра́дꙋйсѧ, зарѐ и҆́стины є҆ѵⷢ҇льскїѧ, тмꙋ̀ страсте́й ѡ҆свѣща́ющаѧ и҆ ѡ҆б̾ѧ́тыхъ є҆́ю ѿ ги́бели вѣ́чныѧ сп҃са́ющаѧ.

Ра́дꙋйсѧ, ᲂу҆́гль бжⷭ҇твенный, по́хѡти на̑ша ѡ҆палѧ́ющїй, лꙋка́выѧ ко́зни бѣсо́вскїѧ потреблѧ́ющїй: ра́дꙋйсѧ, пла́мень нбⷭ҇ный, хла́дныѧ сердца̀ на̑ша возгрѣва́ющїй, ᲂу҆мы́ же свѣ́томъ бжⷭ҇твеннымъ ѡ҆зарѧ́ющїй.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ в҃і

Блгⷣтїю бж҃їею просвѣща́емый, бг҃обл҃же́нне васі́лїе, просвѣтѝ на́шъ ᲂу҆́мъ и҆ ѡ҆чи́сти на́ше се́рдце, да сподо́бимсѧ и҆ мы̀ воспѣва́ти съ тобо́ю кꙋ́пнѡ бг҃ꙋ: А҆ллилꙋ́їа.

І҆́косъ в҃і

Пою́щихъ твоѧ̑ по́двиги, восхвалѧ́ющихъ твоѧ̑ ѕлострада̑нїѧ, прославлѧ́ющихъ твоѐ ю҆ро́дство, дивѧ́щихсѧ твои̑мъ добродѣ́телємъ не ѡ҆ста́ви свои́мъ хода́тайствомъ пред̾ гдⷭ҇омъ, да воспое́мъ тѝ:

Ра́дꙋйсѧ, непреста́нный ѡ҆ на́съ бг҃ꙋ мл҃твенниче, млⷭ҇ть бж҃їю на на́съ призыва́ющїй: ра́дꙋйсѧ, крѣ́пкїй на́шъ защи́тниче, ѿ бѣ́дъ и҆ скорбе́й на́съ ѡ҆хранѧ́ющїй.

Ра́дꙋйсѧ, напа́ствꙋемыхъ ско́рый и҆зба́вителю, на пꙋ́ть сп҃се́нїѧ наставлѧ́ющїй: ра́дꙋйсѧ, гра́дꙋ на́шемꙋ москвѣ̀ всегда́шнїй покрови́телю, по́мощь свою̀ всѣ̑мъ чтꙋ́щымъ тѧ̀ прⷭ҇нѡ ꙗ҆влѧ́ющїй.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ г҃і

Ѽ пребл҃же́нне и҆ достоꙋго́дне васі́лїе, ма́лое сїѐ похвале́нїе ѿ на́съ ꙗ҆́кѡ пло́дъ бл҃годаре́нїѧ прїимѝ, ꙗ҆́кѡ гла́съ проше́нїѧ ᲂу҆слы́ши, да и҆зба́вимсѧ твои́ми ѡ҆ на́съ бг҃ꙋ мл҃твами ѿ ѡ҆быше́дшихъ ѕѡ́лъ и҆ напа́стей, и҆ возопїе́мъ бг҃ꙋ, сп҃си́телю на́шемꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆гг҃лоподо́бнѡ житїѐ твоѐ бы́сть бг҃обл҃же́нне и҆ чтⷭ҇ота̀ вои́стиннꙋ нескве́рна: вѣ́дый бо, ꙗ҆́кѡ любвѐ мі́ра сегѡ̀ вражда̀ бг҃ꙋ є҆́сть, не восхотѣ́лъ є҆сѝ дрꙋ́гъ мі́рꙋ бы́ти, но преда́лъ є҆сѝ всего̀ себє̀ бг҃ꙋ, таково́мꙋ вели́чїю по́двига твоегѡ̀ дивѧ́щесѧ вопїе́мъ:

Ра́дꙋйсѧ, вѣ́рный гдⷭ҇а слꙋжи́телю, лоза̀ преди́внаѧ хрⷭ҇то́ва вїногра́да: ра́дꙋйсѧ, житїѧ̀ добродѣ́тельнагѡ ᲂу҆чи́телю, ѻ҆вча̀ и҆збра́нное гдⷭ҇нѧ ста́да.

Ра́дꙋйсѧ, ло́на а҆враа́ма насе́льниче, раѧ̀ пресла́достнагѡ жи́тель: ра́дꙋйсѧ, црⷭ҇твїѧ нбⷭ҇нагѡ наслѣ́дниче, та́мѡ себѣ̀ воспрїѧ́вый ѻ҆би́тель.

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Конда́къ а҃

И҆збра́нный сосꙋ́дъ бж҃їей блгⷣти, мѵ́ромъ добродѣ́телей преиспо́лненный, достоꙋго́дне васі́лїе, ꙗ҆́кѡ и҆збавлѧ́еми ѿ всѧ́кихъ бѣ́дъ и҆ напа́стей твои́мъ ѡ҆ на́съ ко гдⷭ҇ꙋ те́плымъ предста́тельствомъ, бл҃года́рственное сїѐ тебѣ̀ пѣ́нїе приносѧ́ще зове́мъ:

Ра́дꙋйсѧ, пребл҃же́нне васі́лїе, ю҆ро́де бг҃омꙋ́дре, моско́вскїй чꙋдотво́рче.

Моли́твы

Ѽ вели́кїй ᲂу҆го́дниче хрⷭ҇то́въ, и҆́стинный дрꙋ́же и҆ вѣ́рный ра́бе всетворца̀ гдⷭ҇а бг҃а, пребл҃же́нне васі́лїе! Оу҆слы́ши ны̀ многогрѣ́шныѧ, ны́нѣ вопїю́щыѧ къ тебѣ̀ и҆ призыва́ющыѧ и҆́мѧ твоѐ ст҃о́е: поми́лꙋй ны̀ припа́дающыѧ дне́сь къ ра́цѣ моще́й твои́хъ: прїимѝ ма́лое на́ше и҆ недосто́йное сїѐ моле́нїе, ᲂу҆милосе́рдисѧ над̾ ᲂу҆бо́жествомъ на́шимъ, и҆ мл҃твами твои́ми и҆сцѣлѝ всѧ́къ недꙋ́гъ и҆ болѣ́знь дꙋ́ши и҆ тѣ́ла на́шегѡ грѣ́шнагѡ, и҆ сподо́би ны̀ тече́нїе жи́зни сеѧ̀ невреди́мѡ ѿ ви́димыхъ и҆ неви́димыхъ вра̑гъ безгрѣ́шнѡ прейтѝ, и҆ хрⷭ҇тїа́нскꙋю кончи́нꙋ непосты́днꙋ, ми́рнꙋ, безмѧте́жнꙋ, и҆ нбⷭ҇нагѡ црⷭ҇твїѧ наслѣ́дїе полꙋчи́ти со всѣ́ми ст҃ы́ми во вѣ́ки вѣкѡ́въ. А҆ми́нь.

Ѽ бл҃же́ннаѧ дꙋшѐ, ѽ премꙋ́дрости и҆спо́лненный ра́зꙋме: возсїѧ̀ бо на́мъ свѣтонезаходи́мое со́лнце весе́лїѧ, просвѣща́ѧ рѡссі́йское ца́рство: ѿ бѣсѡ́въ ᲂу҆ѧ́звленныхъ и҆сцѣли́тель, па́че же и҆ сами́хъ бѣсѡ́въ прогони́тель, слѣпы́мъ прозрѣ́нїе, хромы̑мъ хожде́нїе, слѧ́чєннымъ и҆справле́нїе, болѧ́щымъ всѣ̑мъ и҆сцѣле́нїе и҆ здра́вїе: ѿ бѣ́дъ и҆ скорбе́й и҆збавле́нїе, печа̑льнымъ ᲂу҆тѣше́нїе.

Ѽ ᲂу҆го́дниче хрⷭ҇то́въ, пребл҃же́нне васі́лїе! Оу҆слы́ши ны̀, многогрѣ̑шныѧ, ны́нѣ вопїю́щїѧ къ тебѣ̀: поми́лꙋй ны̀, ра́бъ бж҃їихъ (и҆́мⷬ҇къ), и҆ ᲂу҆млⷭ҇рдисѧ над̾ ᲂу҆бо́жествомъ на́шимъ. И҆ мл҃твами твои́ми и҆сцѣлѝ всѧ́къ недꙋ́гъ и҆ болѣ́знь дꙋ́ши и҆ тѣ́ла на́шегѡ грѣ́шнагѡ, и҆ сподо́би ны̀ тече́нїе жи́зни сеѧ̀ невреди́мо, ѿ ви́димыхъ и҆ неви́димыхъ вра̑гъ, и҆ безгрѣ́шнѡ прейтѝ, и҆ хрⷭ҇тїа́нскꙋю кончи́нꙋ непосты́днꙋ, ми́рнꙋ, безмѧте́жнꙋ, и҆ нбⷭ҇нагѡ црⷭ҇твїѧ наслѣ́дїе полꙋчи́ти, со всѣ́ми ст҃ы́ми, во вѣ́ки вѣкѡ́въ.