Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ прпⷣбномꙋ а҆нтѡ́нїю ри́млѧнинꙋ, новогра́дскомꙋ чꙋдотво́рцꙋ.

Прп. Антония Римлянина, Новгородского (1147) 16 августа 2026

Конда́къ а҃

И҆збра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, ско́рый помо́щниче и҆ мл҃твенниче ѡ҆ дꙋша́хъ на́шихъ, прпⷣбне ѻ҆́тче а҆нтѡ́нїе, пѣ́сньми восхвалѧ́емъ тѧ̀, застꙋ́пника на́шегѡ. Ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, любо́вїю тебѣ̀ зовꙋ́щихъ:

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

І҆́косъ а҃

А҆́гг҃льски на землѝ пожи́въ, бг҃омꙋ́дре а҆нтѡ́нїе, по́двигомъ до́брымъ подвиза́лсѧ є҆сѝ: крⷭ҇тъ бо на ра́мена взе́мъ, влⷣцѣ хрⷭ҇тꙋ̀ послѣ́довалъ є҆сѝ. Ны́нѣ же предстоѧ̀ прⷭ҇то́лꙋ сла́вы, моли́сѧ ѡ҆ на́съ, почита́ющихъ тѧ̀ и҆ зовꙋ́щихъ тебѣ̀ си́це:

Ра́дꙋйсѧ, ꙗ҆́кѡ чистото́ю и҆ ст҃ы́нею а҆́гг҃лѡмъ ᲂу҆подо́билсѧ є҆сѝ: ра́дꙋйсѧ, ꙗ҆́кѡ посто́мъ и҆ бдѣ́нїемъ безстра́стїѧ дости́глъ є҆сѝ.

Ра́дꙋйсѧ, свѣти́льниче бжⷭ҇твеннагѡ свѣ́та: ра́дꙋйсѧ, мл҃твъ бл҃гово́нное кади́ло.

Ра́дꙋйсѧ, вѣ́рныхъ нело́жное ᲂу҆твержде́нїе: ра́дꙋйсѧ, невѣ́рныхъ бг҃омꙋ́дренное ѡ҆бличе́нїе.

Ра́дꙋйсѧ, хрⷭ҇тїа́нъ бл҃гоѡти́шное приста́нище: ра́дꙋйсѧ, бл҃гоче́стїѧ стѣно̀ неѡбори́маѧ.

Ра́дꙋйсѧ, крѣ́пкое корми́ло цр҃кве хрⷭ҇то́вы: ра́дꙋйсѧ, непоколеби́мый сто́лпе правосла́вїѧ.

Ра́дꙋйсѧ, а҆пⷭ҇льскихъ преда́нїй вѣ́рный блюсти́телю: ра́дꙋйсѧ, пра́вилъ седмѝ вселе́нскихъ собо́рѡвъ храни́телю.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ в҃

Ви́дѧ гдⷭ҇ь бг҃ъ тве́рдое жела́нїе дꙋшѝ твоеѧ̀ сохрани́тисѧ ѿ врежде́нїѧ вѣ́ры, ѻ҆́тче на́шъ а҆нтѡ́нїе, ꙗ҆́кѡ но́вагѡ а҆враа́ма, пресе́льника тѧ̀ сотворѝ въ землѝ тебѣ̀ є҆щѐ чꙋжде́й, ѻ҆ба́че по вѣ́рѣ ᲂу҆жѐ ро́дственнѣй: тѣ́мже мы̀, ра́дости и҆спо́лнени, бл҃годари́мъ бг҃а, ди́внѡ прославлѧ́ющагѡ ст҃ы̑ѧ своѧ̑, вопїю́ще є҆мꙋ̀: А҆ллилꙋ́їа.

І҆́косъ в҃

Ра́зꙋмъ просвѣще́нъ свы́ше и҆мѣ́ѧй, всѣ́мъ се́рдцемъ возлюби́лъ є҆сѝ правосла́внꙋю вѣ́рꙋ. Не терпѧ̀ ви́дѣти въ цр҃кви ри́мстѣй смꙋщє́нїѧ и҆ раздо́ры, и҆ мѧте́жи ве́лїи, восхотѣ́въ ѡ҆ста́вилъ є҆сѝ ѻ҆те́чество и҆ ро́дъ тво́й. Мы́ же, похвалѧ́юще ре́вность твою̀ по вѣ́рѣ, ѻ҆́тче а҆нтѡ́нїе, ра́достнѡ взыва́емъ тѝ:

Ра́дꙋйсѧ, прпⷣбныхъ вели́кихъ ѻ҆тцє́въ послѣ́дователю: ра́дꙋйсѧ, ѿстꙋпле́нїй ри́мскихъ ѡ҆бличи́телю.

Ра́дꙋйсѧ, безмо́лвїѧ люби́телю: ра́дꙋйсѧ, пꙋсты́нный на мо́ри и҆ на сꙋ́ши жи́телю.

Ра́дꙋйсѧ, де́нь и҆ но́щь на ка́мни моли́выйсѧ: ра́дꙋйсѧ, не и҆мѣ́вый кꙋ́щи, нижѐ покро́ва.

Ра́дꙋйсѧ, пꙋсты́ннымъ ѕла́комъ пита́выйсѧ: ра́дꙋйсѧ, по́стникѡвъ похвало̀.

Ра́дꙋйсѧ, наста́вниче бг҃омꙋ́дрїѧ: ра́дꙋйсѧ, мона́шествꙋющихъ сла́во.

Ра́дꙋйсѧ, ско́рый къ ѡ҆свобожде́нїю ѿ мїрски́хъ сѣте́й споспѣ́шниче: ра́дꙋйсѧ, наде́жный хода́таю на́мъ црⷭ҇твїѧ нбⷭ҇нагѡ.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ г҃

Си́ла вы́шнѧгѡ восхи́ти тѧ̀ ѿ ри́ма, бг҃омꙋ́дре а҆нтѡ́нїе, на ка́мени, ꙗ҆́кѡ на ле́гцѣмъ кораблѝ, принесѐ тѧ̀ въ зе́млю рꙋ́сскꙋю, и҆дѣ́же ѡ҆брѣ́тъ ти́хое приста́нище, въ пꙋсты́ни всели́лсѧ є҆сѝ, нелѣ́ностнѡ порабо́талъ хрⷭ҇тꙋ̀, и҆ во мно́зѣмъ долготерпѣ́нїи рꙋководи́лъ є҆сѝ въ црⷭ҇твїе бж҃їе дꙋхѡ́внаѧ ча̑да твоѧ̑, наꙋчи́въ и҆̀хъ є҆ди́нѣми ᲂу҆сты̀ и҆ є҆ди́нѣмъ се́рдцемъ пѣ́ти бг҃ꙋ: А҆ллилꙋ́їа.

І҆́косъ г҃

И҆мѣ́ѧй въ се́рдцѣ свое́мъ ѻ҆́гнь любвѐ бжⷭ҇твенныѧ, бг҃омꙋ́дре ѻ҆́тче, крѣ́пкѡ подвиза́лсѧ є҆сѝ проти́вꙋ ко́зней дїа́вольскихъ, и҆ побѣди́тельнымъ ѻ҆рꙋ́жїемъ крⷭ҇та̀ гдⷭ҇нѧ разсѣка́лъ є҆сѝ сѣ̑ти лꙋка́вагѡ, ꙗ҆́кѡ паꙋчи́нꙋ. Тѣ́мже мо́лимъ тѧ̀, ѻ҆́тче а҆нтѡ́нїе, помозѝ и҆ на́мъ сп҃се́нїе ᲂу҆лꙋчи́ти, да съ любо́вїю зове́мъ тѝ такова̑ѧ:

Ра́дꙋйсѧ, ра́бе бж҃їй, бл҃гі́й и҆ вѣ́рный: ра́дꙋйсѧ, сосꙋ́де по́лный нбⷭ҇ныѧ бл҃года́ти.

Ра́дꙋйсѧ, ꙗ҆́кѡ ᲂу҆пова́нїемъ нѡ́ю ᲂу҆подо́билсѧ є҆сѝ: ра́дꙋйсѧ, ꙗ҆́кѡ подо́бнѡ и҆лїѝ и҆ є҆лїссе́ю по бе́зднѣ водно́й на ка́мени ше́ствовалъ є҆сѝ.

Ра́дꙋйсѧ, ᲂу҆чи́телю смире́нїѧ и҆ цѣломꙋ́дрїѧ: ра́дꙋйсѧ, ѡ҆́бразе кро́тости и҆ послꙋша́нїѧ.

Ра́дꙋйсѧ, проповѣ́дниче чꙋде́съ хрⷭ҇то́выхъ: ра́дꙋйсѧ, наста́вниче дѣ́лъ до́брыхъ.

Ра́дꙋйсѧ, бѣсо́вскихъ си́лъ прогна́нїе: ра́дꙋйсѧ, сто́лпе вѣ́ры и҆ ᲂу҆твержде́нїе.

Ра́дꙋйсѧ, воспрїѧ́вый ѿ хрⷭ҇та̀ си́лꙋ и҆ премꙋ́дрость: ра́дꙋйсѧ, вмѣсти́лище дх҃а ст҃а́гѡ.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ д҃

Бꙋ́ри морски́хъ во́лнъ не ᲂу҆боѧ́лсѧ є҆сѝ, прпⷣбне ѻ҆́тче а҆нтѡ́нїе, бы́въ несе́нъ на ка́мени съ вѣ́твїю въ рꙋцѣ̀ твое́й: не прїи́де къ тебѣ̀ ни ско́рбь, нижѐ стра́хъ, ни и҆на́ѧ печа́ль ка́ѧ, ни а҆́лчба, ни жа́жда. Но ве́сь ᲂу҆́мъ въ бз҃ѣ ᲂу҆глꙋби́въ, и҆ тогѡ̀ во́ли себѐ вда́въ, пребы́лъ є҆сѝ молѧ́сѧ хрⷭ҇тꙋ̀ бг҃ꙋ и҆ пречⷭ҇тѣй є҆гѡ̀ мт҃ри, и҆ веселѧ́сѧ дꙋше́ю, пѣ́лъ є҆сѝ съ вѡ́и нбⷭ҇ными: А҆ллилꙋ́їа.

І҆́косъ д҃

Слы́шавше ди́вное твоѐ ѿ ю҆́га къ сѣ́верꙋ прехожде́нїе, бг҃оно́се а҆нтѡ́нїе, ꙗ҆́кѡже бо а҆ввакꙋ́мъ въ вавѷлѡ́нъ, пренесе́нъ бы́лъ є҆сѝ си́лою бж҃їею въ новгра́дъ, ꙗ҆́кѡ а҆́гг҃ла во пло́ти разꙋмѣ́юще тѧ̀, вопїе́мъ тѝ си́це:

Ра́дꙋйсѧ, дре́вле бы́вшагѡ ри́мскїѧ цр҃кви правосла́вїѧ ѡ҆сїѧ́нїе: ра́дꙋйсѧ, новꙋ́градꙋ бл҃года́тное процвѣте́нїе.

Ра́дꙋйсѧ, свѣти́льниче многосвѣ́тлыхъ дарова́нїй дꙋхо́вныхъ: ра́дꙋйсѧ, но́щи невѣ́дѣнїѧ и҆ заблꙋжде́нїй разгони́телю.

Ра́дꙋйсѧ, мглꙋ̀ страсте́й хотѧ́щымъ ѿгна́ти посо́бниче: ра́дꙋйсѧ, по вода́мъ чꙋде́снѡ пла́ванїе соверши́вый и҆ ры̑бныѧ ловцы̀ ѡ҆бличи́вый.

Ра́дꙋйсѧ, по мо́рю пла́вающихъ до́брый ко́рмчїй: ра́дꙋйсѧ, по рѣцѣ̀ во́лховѣ ѡ҆бꙋрева́емыхъ ти́хое приста́нище.

Ра́дꙋйсѧ, бѣ́дствꙋющихъ помо́щниче: ра́дꙋйсѧ, ᲂу҆топа́ющихъ и҆збавле́нїе.

Ра́дꙋйсѧ, блꙋжда́ющихъ вѣ́рный наста́вниче: ра́дꙋйсѧ, и҆́щꙋщихъ и҆́ноческагѡ житїѧ̀ прибѣ́жище и҆ рꙋководи́телю.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ є҃

Бг҃оте́чнꙋю ѕвѣздꙋ̀ мнѧ́сѧ зрѣ́ти вы́спрь во ѻ҆́блацѣхъ пречⷭ҇тꙋю влⷣчцꙋ на́шꙋ бцⷣꙋ, превѣ́чнагѡ млⷣнца на рꙋка́хъ держа́щꙋю: бы́въ ве́сь въ ра́дости дꙋхо́внѣй, прпⷣбне а҆нтѡ́нїе, небре́глъ є҆сѝ ѡ҆ стра́шнѣмъ посредѣ̀ во́лнъ морски́хъ пла́ванїи: но а҆́ки внѣ̀ тѣ́ла сы́й, забы̀ себѐ, ᲂу҆слажда́емый видѣ́нїемъ цр҃и́цы нбⷭ҇ныѧ, и҆ ѿ тоѧ̀ лꙋче́ю нѣ́коею бжⷭ҇твенною ѡ҆зарѧ́емь, пѣ́лъ є҆сѝ бг҃ꙋ: А҆ллилꙋ́їа.

І҆́косъ є҃

Ви́дѣвше тѧ̀, ѻ҆́тче а҆нтѡ́нїе, вели́кагѡ нова́града лю́дїе возра́довашесѧ ра́достїю неглаго́ланною, нача́ша бл҃гоговѣ́йнѡ приходи́ти къ тебѣ̀, просѧ́ще ᲂу҆ тебє̀ мл҃твъ и҆ бл҃гослове́нїѧ. Ты́ же ᲂу҆вѣ́дѣвъ принесе́на себѐ во гра́дъ, цвѣтꙋ́щъ правосла́вною вѣ́рою подиви́сѧ всемо́щнѣй си́лѣ бж҃їей, ка́кѡ въ два̀ дни̑ и҆ въ двѣ̀ нѡ́щи толи́кꙋю долготꙋ̀ пꙋтѝ прейтѝ тебѣ̀ ᲂу҆стро́и гдⷭ҇ь, возра́довалсѧ и҆ возбл҃годари́лъ є҆сѝ є҆го̀. Мы́ же, ча̑да твоѧ̑, ѡ҆́крестъ ра́цѣ твоеѧ̀ предстоѧ́ще, бл҃годарѧ́ще бг҃а, любо́вїю вопїе́мъ тѝ:

Ра́дꙋйсѧ, ꙗ҆́кѡ да́ра вели́кагѡ ѿ бг҃а сподо́бленъ є҆сѝ: ра́дꙋйсѧ, ꙗ҆́кѡ дре́внимъ чꙋдесє́мъ подо́бное на тебѣ̀ содѣ́ѧсѧ.

Ра́дꙋйсѧ, но́вый и҆лїѐ, ꙗ҆́кѡ на ка́мени, а҆́ки на колесни́цѣ ѻ҆́гненнѣй, по вода́мъ ше́ствовалъ є҆сѝ: ра́дꙋйсѧ, на́шъ а҆пⷭ҇толе, ꙗ҆́кѡ на ка́мени, а҆́ки на ѻ҆́блацѣхъ, несе́нъ бы́лъ є҆сѝ.

Ра́дꙋйсѧ, ꙗ҆́кѡ тобо́ю посѣтѝ и҆ бл҃гословѝ бг҃ъ новопросвѣщє́нныѧ лю́ди нова́града: ра́дꙋйсѧ, ꙗ҆́кѡ тобо́ю ᲂу҆крѣпѝ и҆̀хъ въ правосла́внѣй вѣ́рѣ.

Ра́дꙋйсѧ, и҆столкова́телю є҆ѵⷢ҇льскагѡ ᲂу҆че́нїѧ: ра́дꙋйсѧ, наста́вниче и҆ на́съ, во грѣсѣ́хъ живꙋ́щихъ.

Ра́дꙋйсѧ, неꙋсы́пный на́шъ храни́телю: ра́дꙋйсѧ, ѡ҆ всѣ́хъ вѣ́рныхъ хода́таю.

Ра́дꙋйсѧ, ꙗ҆́кѡ твои́мъ моле́нїемъ ѿ а҆́да свобожда́емсѧ: ра́дꙋйсѧ, ꙗ҆́кѡ твои́мъ предста́тельствомъ ра́йскїѧ жи́зни сподоблѧ́емсѧ.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ ѕ҃

Слове́съ є҆ѵⷢ҇льскихъ, є҆́же не и҆ска́ти сла́вы ѿ человѣ̑къ, вѣ́рный храни́тель показа́лсѧ є҆сѝ, бг҃облаже́нне а҆нтѡ́нїе, є҆гда̀ бо ст҃и́тель бж҃їй нїки́та, ᲂу҆вѣ́дѣвъ ѡ҆ тебѣ̀, призва̀ къ себѣ̀, вопроша́ѧ: кто̀ є҆сѝ, ѿкꙋ́дꙋ и҆ ка́кѡ прише́лъ; ты̀ ничто́же и҆́но ѿвѣщава́вше, то́чїю кла́нѧѧсѧ, глаго́лаше: простѝ мѧ̀, влады́ко ст҃ы́й, грѣ́шна сꙋ́ща человѣ́ка и҆ стра́нна. Мы́ же, чꙋдѧ́сѧ толи́комꙋ смире́нїю твоемꙋ̀, взыва́емъ бг҃ꙋ: А҆ллилꙋ́їа.

І҆́косъ ѕ҃

Возсїѧ́въ ѿ ри́мскїѧ страны̀, ѻ҆́тче на́шъ а҆нтѡ́нїе, просвѣти́лъ є҆сѝ чꙋ́днымъ твои́мъ житїе́мъ зе́млю новогра́дскꙋю, въ не́йже ѡ҆би́тель сотвори́лъ є҆сѝ, и҆ хра́мъ пречꙋ́денъ бж҃їей мт҃ри созда́лъ є҆сѝ. Сегѡ̀ ра́ди бл҃годарѧ́ще ѻ҆ц҃а̀ нбⷭ҇наго, да́вшаго тебѣ̀ толи́кꙋю бл҃года́ть си́лы своеѧ̀, къ тебѣ̀ ꙗ҆́кѡ къ те́пломꙋ ѡ҆ на́съ мл҃твенникꙋ, ра́дѡстнаѧ воспѣва́емъ та́кѡ:

Ра́дꙋйсѧ, а҆́гг҃льское житїѐ на́мъ ꙗ҆влѧ́ѧй: ра́дꙋйсѧ, стра̑сти грѣхѡ́вныѧ ᲂу҆кроща́ѧй.

Ра́дꙋйсѧ, ѡ҆́бразе и҆́стиннагѡ смире́нїѧ: ра́дꙋйсѧ, зерца́ло соверше́ннагѡ терпѣ́нїѧ.

Ра́дꙋйсѧ, наста́вниче вели́кїй сп҃се́нїю: ра́дꙋйсѧ, приводѧ́й грѣ́шныхъ ко и҆справле́нїю.

Ра́дꙋйсѧ, и҆звѣ́стный и҆сполни́телю за́повѣдей хрⷭ҇то́выхъ: ра́дꙋйсѧ, дꙋ́шъ немощны́хъ и҆сцѣле́нїе.

Ра́дꙋйсѧ, ми́лостыню твори́ти наꙋча́ѧй: ра́дꙋйсѧ, ри̑зы и҆ бра̑шна неимꙋ́щымъ подава́ти повелѣва́ѧй.

Ра́дꙋйсѧ, пꙋсты́нниче, мїрскꙋ́ю че́сть и҆ бога́тство возненави́дѣвый: ра́дꙋйсѧ, по́стниче, ѿ ю҆́ности бг҃ꙋ послꙋжи́вый.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ з҃

Хотѧ́й и҆збра́нъ до́мъ дх҃ꙋ ст҃о́мꙋ себѐ сотвори́ти, потща́лсѧ є҆сѝ тѣ́снымъ и҆ ско́рбнымъ пꙋте́мъ, ведꙋ́щимъ въ жи́знь вѣ́чнꙋю, взе́мъ на ра́мо своѐ крⷭ҇тъ хрⷭ҇то́въ, ше́ствовати, є҆́же бл҃года́тїю бж҃їею ѿ ю҆́ности твоеѧ̀ непоро́чнѡ соверши́въ, дости́глъ є҆сѝ ᲂу҆гото́ваннагѡ тебѣ̀ нбⷭ҇нагѡ воздаѧ́нїѧ, и҆ та́мѡ бл҃года́рственнѡ пое́ши бг҃ꙋ: А҆ллилꙋ́їа.

І҆́косъ з҃

Но́вый вои́стиннꙋ подви́жникъ ꙗ҆ви́лсѧ є҆сѝ въ землѣ̀ рѡссі́йстѣй, ѻ҆́тче на́шъ а҆нтѡ́нїе. Кто̀ и҆зочте́тъ твоѧ̑ по́стничєскїѧ по́двиги; кто̀ не подиви́тсѧ вели́комꙋ смире́нїю твоемꙋ̀; кто̀ ѿ человѣ̑къ возмо́жетъ ст҃ы́ни твоеѧ̀ вели́чїе проповѣ́дати; вои́стиннꙋ съ нб҃сѝ пѣ́снь тебѣ̀ мо́жетъ бы́ти воспѣва́ема, а҆ не ѿ землѝ. Мы́ же, любо́вїю возбꙋжда́еми, дерза́емъ пѣ́ти тебѣ̀ сѝце:

Ра́дꙋйсѧ, земны́й а҆́гг҃ле и҆ нбⷭ҇ный человѣ́че: ра́дꙋйсѧ, во пло́ти пожи́вый дꙋхо́внѣ, на землѝ нбⷭ҇нѣ.

Ра́дꙋйсѧ, всѧ́кꙋю добродѣ́тель дѣ́лы свои́ми и҆з̾ѡбрази́вый: ра́дꙋйсѧ, дꙋше́вными ѻ҆чи́ма вы́нꙋ гдⷭ҇а созерца́вый.

Ра́дꙋйсѧ, пред̾ лице́мъ бж҃їимъ, ꙗ҆́кѡ сы́нъ пред̾ ѻ҆тце́мъ ходи́вый: ра́дꙋйсѧ, ꙗ҆́кѡ во́инъ пред̾ воево́дою, гото́вый всѧ̑ повелѣ̑ннаѧ твори́ти.

Ра́дꙋйсѧ, и҆́го хрⷭ҇то́во возлюби́вый: ра́дꙋйсѧ, до́брѣ ста́до и҆́ночествꙋющихъ ᲂу҆пра́вивый.

Ра́дꙋйсѧ, ше́ствовавый ѿ си́лы въ си́лꙋ: ра́дꙋйсѧ, бг҃а въ сїѡ́нѣ ᲂу҆зрѣ́вый.

Ра́дꙋйсѧ, є҆ди́нагѡ гдⷭ҇а возлюби́вый: ра́дꙋйсѧ, ѻ҆чеса̀ своѧ̑ вы́нꙋ къ немꙋ̀ и҆мѣ́вый.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ и҃

Стра́нное и҆ пресла́вное чꙋ́до ꙗ҆влѧ́етсѧ, бг҃омꙋ́дре ѻ҆́тче а҆нтѡ́нїе, свѧще́ннїи сосꙋ́ди и҆ сокро́вище, вда́нное тобо́ю морски̑мъ вода́мъ въ ри́мѣ, чꙋде́снѡ здѣ̀ врꙋчѝ тебѣ̀ бг҃ъ, на созида́нїе хра́ма пречⷭ҇тыѧ бцⷣы и҆ ѡ҆би́тели, въ не́йже мо́лимсѧ и҆ ѡ҆ твое́мъ хода́тайстве ᲂу҆ хрⷭ҇та̀ бг҃а на́шегѡ, вѣ́рнѡ вопїю́ще: А҆ллилꙋ́їа.

І҆́косъ и҃

Ве́сь ꙗ҆влѧ́ешисѧ всѣ̑мъ вои́стиннꙋ помо́щникъ, бг҃оно́се а҆нтѡ́нїе. Ты́ бо при́снѡ ца́рствꙋѧ со хрⷭ҇то́мъ, и҆ ѡ҆ на́съ грѣ́шныхъ мл҃твы къ немꙋ̀ возсыла́ѧ, не то́чїю припа́дающихъ къ цѣльбонѡ́снымъ моще́мъ твои́мъ, но и҆ дале́че ѿстоѧ́щихъ, призыва́ющихъ же всечⷭ҇тно́е и҆́мѧ твоѐ, предста́тельствомъ твои́мъ соблюда́еши ѿ всѧ́кагѡ ѕла̀. Тѣ́мже во ᲂу҆миле́нїи зове́мъ тѝ:

Ра́дꙋйсѧ, прибѣ́жище на́ше во всѣ́хъ напа́стехъ: ра́дꙋйсѧ, ско́рый помо́щниче всѣ́хъ въ бѣда́хъ сꙋ́щихъ.

Ра́дꙋйсѧ, цѣли́телю болѣ́зней дꙋше́вныхъ вкꙋ́пѣ тѣле́сныхъ: ра́дꙋйсѧ, на неви̑димыѧ враги̑ на́шѧ си́льный побо́рниче.

Ра́дꙋйсѧ, посѣти́телю въ не́мощи лежа́щихъ: ра́дꙋйсѧ, ᲂу҆тѣ́шителю всѣ́хъ скорбѧ́щихъ.

Ра́дꙋйсѧ, ꙗ҆́кѡ тобо́ю предстае́тъ рыда́нїе: ра́дꙋйсѧ, ꙗ҆́кѡ тобо́ю подае́тсѧ ра́дость.

Ра́дꙋйсѧ, ꙗ҆́кѡ хрⷭ҇тꙋ̀ до́блественнѡ послѣ́довалъ є҆сѝ: ра́дꙋйсѧ, ꙗ҆́кѡ сладча́йшемꙋ і҆и҃сꙋ до конца̀ послꙋжи́лъ є҆сѝ.

Ра́дꙋйсѧ, ꙗ҆́кѡ наслажда́ешисѧ лицезрѣ́нїѧ бж҃їѧ: ра́дꙋйсѧ, ꙗ҆́кѡ сподо́билсѧ є҆сѝ зрѣ́ти невече́рнїй де́нь црⷭ҇твїѧ є҆гѡ̀.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ ѳ҃

Всѧ̑кїѧ трꙋды̀ и҆ ско́рби до́блественнѡ претерпѣ́лъ є҆сѝ, ѻ҆́тче а҆нтѡ́нїе, ше́ствꙋѧ по пꙋтѝ сп҃се́нїѧ до масти́тыѧ ста́рости. На землѝ невеще́ственное житїѐ показа́лъ є҆сѝ, и҆ во пло́ти а҆́ки безпло́тенъ ꙗ҆ви́лсѧ є҆сѝ: сегѡ̀ ра́ди мно́гихъ чꙋде́съ творє́нїѧ ѿ гдⷭ҇а прїе́мь, чи́стою и҆ бг҃олюбе́зною дꙋше́ю твое́ю къ нбⷭ҇нымъ причте́нъ є҆сѝ си́ламъ, и҆ кꙋ́пнѡ съ ни́ми пое́ши ны́нѣ всеси́льномꙋ бг҃ꙋ: А҆ллилꙋ́їа.

І҆́косъ ѳ҃

Вѣті̑ѧ многовѣща́нныѧ недоꙋмѣ́ютъ досто́йнѡ и҆зѻбрази́ти ѡ҆би́лїѧ любвѐ твоеѧ̀, ѻ҆́тче а҆нтѡ́нїе, є҆́юже по всѧ̑ дни̑ преиспо́лненъ є҆сѝ къ ча́дѡмъ твои́мъ ѡ҆ гдⷭ҇ѣ: восхотѣ́въ бо и҆ по ѿше́ствїи твое́мъ при́снѡ поꙋча́ти и҆̀хъ ꙗ҆́кѡ живы́й, завѣща́лъ є҆сѝ и҆̀мъ всѧ̑ потрє́бнаѧ ко сп҃се́нїю. Сегѡ̀ ра́ди и҆з̾ глꙋбины̀ серде́цъ вопїе́мъ тѝ:

Ра́дꙋйсѧ, бл҃гоче́стнѡ тече́нїе сконча́вый: ра́дꙋйсѧ, вѣ́рꙋ соблюды́й всецѣ́лꙋ.

Ра́дꙋйсѧ, ѻ҆рꙋ́жїемъ бл҃говоле́нїѧ бж҃їѧ вѣнча́нный на землѝ: ра́дꙋйсѧ, вѣнце́мъ нетлѣ́нїѧ ᲂу҆краше́нный на нб҃сѝ.

Ра́дꙋйсѧ, до́лꙋ вели́чїемъ чꙋде́съ блиста́ѧй: ра́дꙋйсѧ, горѣ̀ лꙋча́ми трисо́лнечнагѡ свѣ́та ѡ҆сїѧва́емый.

Ра́дꙋйсѧ, ꙗ҆́кѡ въ пресвѣ́тлыхъ ра́йскихъ ѡ҆би́телехъ вселѧ́ешисѧ: ра́дꙋйсѧ, ꙗ҆́кѡ лице́мъ къ лицꙋ̀ бжⷭ҇твеннагѡ свѣ́та причаща́ешисѧ.

Ра́дꙋйсѧ, ꙗ҆́кѡ съ нбⷭ҇ныхъ высо́тъ на мольбы̀ на̑ша призира́еши: ра́дꙋйсѧ, ꙗ҆́кѡ въ со́нїѧхъ и҆ видѣ́нїѧхъ во бл҃го на́мъ ꙗ҆влѧ́ешисѧ.

Ра́дꙋйсѧ, ꙗ҆́кѡ мл҃твами твои́ми ѿ вѣ́чныѧ сме́рти свобожда́емсѧ: ра́дꙋйсѧ, ꙗ҆́кѡ предста́тельствомъ твои́мъ безконе́чныѧ жи́зни сподоблѧ́емсѧ.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ і҃

Сп҃сти́сѧ хотѧ́щагѡ всѣ̑мъ человѣ́кѡмъ и҆ и҆зба́витисѧ ѿ напа́стей, ѻ҆́тче а҆нтѡ́нїе, ты̀ ᲂу҆моли́лъ є҆сѝ гдⷭ҇а и҆ сп҃си́телѧ на́шегѡ, да мимои́дꙋтъ вразѝ ѿ вели́кагѡ нова́града и҆ ѡ҆би́тели твоеѧ̀, да не ѡ҆ѕло́бѧтъ поко́ища твоегѡ̀ по всѧ̑ дни̑, живꙋ́щїи же здѣ̀ мл҃твами твои́ми просла́вѧтъ всеси́льнагѡ бг҃а, пою́ще є҆мꙋ̀: А҆ллилꙋ́їа.

І҆́косъ і҃

Стѣна̀ є҆сѝ ты̀ и҆ покро́въ всѣ̑мъ человѣ́кѡмъ, къ застꙋпле́нїю твоемꙋ̀ прибѣга́ющымъ, ѻ҆́тче а҆нтѡ́нїе: тѣ́мже и҆ на́мъ, къ тебѣ̀ приходѧ́щымъ и҆ просѧ́щымъ застꙋпле́нїѧ ᲂу҆ цр҃ѧ̀ нбⷭ҇нагѡ, бꙋ́ди стѣна̀ крѣ́пкаѧ и҆ ѡ҆гражде́нїе непреѡбори́мое, ѿ всѧ́кихъ бѣ́дъ и҆ напа́стей ѡ҆гражда́ѧ на́съ, пою́щихъ тебѣ̀ си́це:

Ра́дꙋйсѧ, мо́щи твоѧ̑ до вре́мени сокры́лъ є҆сѝ ѿ лицезрѣ́нїѧ: ра́дꙋйсѧ, ѡ҆ нетлѣ́нїи моще́й твои́хъ ꙗ҆ви́лъ є҆сѝ бл҃гоче́стнѣ и҆́нокꙋ ні́фонтꙋ.

Ра́дꙋйсѧ, мл҃твою твое́ю бы́вшїѧ врагѝ ѿгна́лъ є҆сѝ: ра́дꙋйсѧ, ѡ҆би́тель твою̀ запꙋстѣ́нїю не преда́лъ є҆сѝ.

Ра́дꙋйсѧ, хра́мъ тобо́ю созда́нный до ны́нѣ сохрани́вый: ра́дꙋйсѧ, соблюды́й принесе́ннꙋю въ рꙋцѣ̀ твое́й вѣ́твь и҆ ка́мень, на не́мже приплы́лъ є҆сѝ чꙋде́снѣ.

Ра́дꙋйсѧ, и҆мѣ́ѧй пред̾ собо́ю і҆кѡ́ны, и҆́мже покланѧ́лсѧ є҆сѝ въ животѣ̀ твое́мъ: ра́дꙋйсѧ, возвѣща́ѧ ди́вное прише́ствїе твоѐ ꙗ҆вле́нными чꙋдеса́ми.

Ра́дꙋйсѧ, воспита́вый въ ѡ҆би́тели твое́й мнѡ́гїѧ подража́тєли: ра́дꙋйсѧ, просвѣти́вый въ не́й ᲂу҆че́нїемъ хрⷭ҇то́вымъ и҆́щꙋщихъ свѣ́та.

Ра́дꙋйсѧ, привлека́ѧй къ себѣ̀ лю́ди и҆збра̑нныѧ: ра́дꙋйсѧ, ѡ҆богаща́ѧй ѡ҆би́тель твою̀ ѿ царе́й и҆ ст҃и́телей.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ а҃і

Пѣ́нїе бл҃года́рственное хрⷭ҇тꙋ̀ бг҃ꙋ, тѧ̀, ѻ҆́тче а҆нтѡ́нїе, прославлѧ́юще, правосла́внїи прино́сѧтъ, ꙗ҆́кѡ мно́гихъ чꙋде́съ творе́цъ ты̀ ꙗ҆ви́лсѧ є҆сѝ: слѣпы̑ѧ просвѣща́ѧ, немощны̑ѧ и҆сцѣлѧ́ѧ, больны̑ѧ врачꙋ́ѧ, бѣсны̑ѧ ѿ бѣсѡ́въ свобожда́ѧ, толи́кѡ си́льнѣ, ꙗ҆́кѡ и҆ не ᲂу҆ приведє́ннымъ къ тебѣ̀ бы́вшимъ бѣсны̑мъ, є҆щѐ на пꙋтѝ де́мѡни ѿ ни́хъ ѿбѣга́хꙋ, и҆ ктомꙋ̀ не возвраща́хꙋсѧ, боѧ́щесѧ въ тебѣ̀ си́лы бж҃їѧ, ю҆́же вы́нꙋ въ нб҃сѣ́хъ прославлѧ́ѧ, вопїе́ши бг҃ꙋ: А҆ллилꙋ́їа.

І҆́косъ а҃і

Свѣтоза́рное свѣти́ло, бл҃года́тїю хрⷭ҇та̀ бг҃а просвѣща́ющее новгоро́дскїѧ страны̑, зри́мъ тѧ̀, бг҃омꙋ́дре ѻ҆́тче а҆нтѡ́нїе: съ а҆́гг҃лы бо предстоѧ̀ прⷭ҇то́лꙋ бж҃їю, ра́дости преве́лїѧ и҆спо́лненъ є҆сѝ, и҆ бжⷭ҇твенными лꙋча́ми трисо́лнечнагѡ свѣ́та ѡ҆сїѧва́емь, ѡ҆зарѧ́еши вѣ́рныхъ, вопїю́щихъ тѝ такова̑ѧ:

Ра́дꙋйсѧ, возше́дый на го́рꙋ превысокꙋ̀ добродѣ́телей бжⷭ҇твенныхъ: ра́дꙋйсѧ, ꙗ҆́кѡ ѿ тоѧ̀ ᲂу҆до́бь возше́лъ є҆сѝ на го́рꙋ нбⷭ҇нꙋю.

Ра́дꙋйсѧ, ꙗ҆́кѡ ѿ ѡ҆би́тели земны́ѧ въ ѡ҆би́тель нбⷭ҇нꙋю водвори́лсѧ є҆сѝ: ра́дꙋйсѧ, ꙗ҆́кѡ та́мѡ предстоѧ̀ цр҃ю̀ нбⷭ҇номꙋ, ѡ҆ всѣ́хъ на́съ къ немꙋ̀ те́плѣ хода́тайствꙋеши.

Ра́дꙋйсѧ, ꙗ҆́кѡ ѿше́дъ ѿ на́съ дꙋше́ю, на́мъ мѡ́щи твоѧ̑ ѡ҆ста́вилъ є҆сѝ: ра́дꙋйсѧ, ꙗ҆́кѡ мо́щи твоѧ̑ и҆сцѣлѧ́ютъ всѧ̑кїѧ скѡ́рби и҆ болѣ̑зни.

Ра́дꙋйсѧ, ꙗ҆́кѡ моще́й твои́хъ де́мѡны трепе́щꙋтъ: ра́дꙋйсѧ, ꙗ҆́кѡ мо́щи твоѧ̑ комꙋ́ждо въ печа́лѣхъ быва́ютъ ᲂу҆тѣше́нїе.

Ра́дꙋйсѧ, ꙗ҆́кѡ гдⷭ҇а і҆и҃са ѡ҆ всѣ́хъ чтꙋ́щихъ па́мѧть твою̀ ᲂу҆милостивлѧ́еши: ра́дꙋйсѧ, ꙗ҆́кѡ и҆ пребл҃гослове́ннꙋю мт҃рь є҆гѡ̀ хода́тайствовати ѡ҆ на́съ грѣ́шныхъ преклонѧ́еши.

Ра́дꙋйсѧ, на сопроти̑вныѧ побѣ́дꙋ да́рствꙋеши: ра́дꙋйсѧ, ꙗ҆́кѡ всѣ̑мъ правовѣ̑рнымъ всѧ́кое проше́нїе на по́льзꙋ и҆сполнѧ́еши.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ в҃і

Блгⷣть, свы́ше тѝ да́ннꙋю, позна́вше, бл҃гоговѣ́йнѡ ѡ҆бстоѧ́ще ст҃ꙋ́ю ра́кꙋ твою̀, ѻ҆́тче на́шъ а҆нтѡ́нїе, тебѣ̀, на́шегѡ ми́лостивагѡ ѻ҆тца̀, прилѣ́жнѡ про́симъ: проле́й ны́нѣ те́плꙋю твою̀ мл҃твꙋ ѡ҆ на́съ грѣ́шныхъ ко гдⷭ҇ꙋ, ꙗ҆́кѡ да сп҃се́тъ и҆ поми́лꙋетъ на́съ, странꙋ̀ на́шꙋ да разшири́тъ и҆ ᲂу҆крѣпи́тъ, цр҃ковь свою̀ ст҃ꙋ́ю ѿ ра́спрей и҆ раско́лѡвъ незы́блемꙋ сохрани́тъ, и҆ всѧ̑ правосла̑вныѧ хрⷭ҇тїа́ны въ ми́рѣ и҆ бл҃годе́нствїи соблюде́тъ. Чесогѡ̀ твои́ми мл҃твами ѡ҆жида́юще ѿ цр҃ѧ̀ нбⷭ҇нагѡ, вопїе́мъ є҆мꙋ̀: А҆ллилꙋ́їа.

І҆́косъ в҃і

Пою́ще твоѐ къ бг҃ꙋ ѿше́ствїе, прпⷣбне ѻ҆́тче а҆нтѡ́нїе, почита́емъ сщ҃е́ннꙋю па́мѧть твою̀, велича́емъ ре́вность по вѣ́рѣ, хва́лимъ долготерпѣ́нїе, сла́вимъ неѕло́бїе и҆ ᲂу҆бл҃жа́емъ кончи́нꙋ твою̀: на сме́ртнѣмъ бо ѻ҆дрѣ̀ возлежа̀, жела́нїемъ возжела́лъ є҆сѝ ѡ҆блещи́сѧ въ вели́кїй а҆́гг҃льскїй ѡ҆́бразъ и҆ съ а҆́гг҃лами ны́нѣ ликꙋ́еши. Тѣ́мже молѧ́щесѧ ᲂу҆се́рднѡ, ѡ҆ є҆́же сподо́битисѧ и҆ на́мъ неѡсꙋжде́ннѡ предста́ти на стра́шное сꙋди́ще хрⷭ҇то́во, взыва́емъ тѝ:

Ра́дꙋйсѧ, ᲂу҆ прⷭ҇то́ла бж҃їѧ те́плый ѡ҆ на́съ предста́телю: ра́дꙋйсѧ, просла́вивый бг҃а въ тѣлесѝ и҆ въ дꙋшѣ̀ свое́й.

Ра́дꙋйсѧ, добропобѣ́дный во́ине цр҃ѧ̀ нбⷭ҇нагѡ: ра́дꙋйсѧ, вождю̀ премꙋ́дрый ра́тꙋющихъ проти́вꙋ си́лъ а҆́довыхъ.

Ра́дꙋйсѧ, ꙗ҆́кѡ съ горѧ́щимъ свѣти́льникомъ возше́лъ є҆сѝ въ ра́дость хрⷭ҇та̀: ра́дꙋйсѧ, ꙗ҆́кѡ ѿ негѡ̀ блгⷣть и҆сцѣле́нїй прїѧ́лъ є҆сѝ.

Ра́дꙋйсѧ, ꙗ҆́кѡ бл҃говоле́нїемъ прест҃ы́ѧ бцⷣы возвели́ченъ є҆сѝ: ра́дꙋйсѧ, ꙗ҆́кѡ во свѣ́тлостехъ ст҃ы́хъ пребыва́еши.

Ра́дꙋйсѧ, ꙗ҆́кѡ съ прⷪ҇ро́ки и҆ а҆пⷭ҇лы ликовствꙋ́еши: ра́дꙋйсѧ, ꙗ҆́кѡ со ст҃и́тєли и҆ мч҃ники просла́вленъ є҆сѝ.

Ра́дꙋйсѧ, ꙗ҆́кѡ съ прпⷣбными и҆ првⷣными весели́шисѧ: ра́дꙋйсѧ, ꙗ҆́кѡ со всѣ́ми и҆збра́нными бж҃їими при́снѡ торжествꙋ́еши.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ г҃і

Ѽ вели́кїй и҆ пречꙋ́дный прпⷣбне ѻ҆́тче на́шъ а҆нтѡ́нїе! Прїимѝ сїѐ ма́лое моле́нїе на́ше, и҆ бл҃гопрїѧ́тнымъ твои́мъ хода́тайствомъ ᲂу҆молѝ ми́лостивагѡ бг҃а, да сохрани́тъ странꙋ̀ на́шꙋ и҆ всѐ во́инство, да ᲂу҆мꙋдри́тъ па́стырей правосла́вныѧ цр҃кви, да и҆зба́витъ всѣ́хъ на́съ ѿ врагѡ́въ ви́димыхъ и҆ неви́димыхъ, ѿ всѧ́кїѧ напа́сти и҆ ско́рби, ѿ напра́сныѧ сме́рти и҆ бꙋ́дꙋщїѧ мꙋ́ки, да сподо́битъ съ тобо́ю и҆ со всѣ́ми ст҃ы́ми во вѣ́ки воспѣва́ти бг҃ꙋ, сп҃си́телю на́шемꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льски на землѝ пожи́въ, бг҃омꙋ́дре а҆нтѡ́нїе, по́двигомъ до́брымъ подвиза́лсѧ є҆сѝ: крⷭ҇тъ бо на ра́мена взе́мъ, влⷣцѣ хрⷭ҇тꙋ̀ послѣ́довалъ є҆сѝ. Ны́нѣ же предстоѧ̀ прⷭ҇то́лꙋ сла́вы, моли́сѧ ѡ҆ на́съ, почита́ющихъ тѧ̀ и҆ зовꙋ́щихъ тебѣ̀ си́це:

Ра́дꙋйсѧ, ꙗ҆́кѡ чистото́ю и҆ ст҃ы́нею а҆́гг҃лѡмъ ᲂу҆подо́билсѧ є҆сѝ: ра́дꙋйсѧ, ꙗ҆́кѡ посто́мъ и҆ бдѣ́нїемъ безстра́стїѧ дости́глъ є҆сѝ.

Ра́дꙋйсѧ, свѣти́льниче бжⷭ҇твеннагѡ свѣ́та: ра́дꙋйсѧ, мл҃твъ бл҃гово́нное кади́ло.

Ра́дꙋйсѧ, вѣ́рныхъ нело́жное ᲂу҆твержде́нїе: ра́дꙋйсѧ, невѣ́рныхъ бг҃омꙋ́дренное ѡ҆бличе́нїе.

Ра́дꙋйсѧ, хрⷭ҇тїа́нъ бл҃гоѡти́шное приста́нище: ра́дꙋйсѧ, бл҃гоче́стїѧ стѣно̀ неѡбори́маѧ.

Ра́дꙋйсѧ, крѣ́пкое корми́ло цр҃кве хрⷭ҇то́вы: ра́дꙋйсѧ, непоколеби́мый сто́лпе правосла́вїѧ.

Ра́дꙋйсѧ, а҆пⷭ҇льскихъ преда́нїй вѣ́рный блюсти́телю: ра́дꙋйсѧ, пра́вилъ седмѝ вселе́нскихъ собо́рѡвъ храни́телю.

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Конда́къ а҃

И҆збра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, ско́рый помо́щниче и҆ мл҃твенниче ѡ҆ дꙋша́хъ на́шихъ, прпⷣбне ѻ҆́тче а҆нтѡ́нїе, пѣ́сньми восхвалѧ́емъ тѧ̀, застꙋ́пника на́шегѡ. Ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, любо́вїю тебѣ̀ зовꙋ́щихъ:

Ра́дꙋйсѧ, а҆нтѡ́нїе, вели́кїй и҆ пресла́вный чꙋдотво́рче.

Моли́твы

Па́стырю предо́брый и҆ наста́вниче на́шъ, прпⷣбне ѻ҆́тче а҆нтѡ́нїе! Ты̀ во пло́ти є҆щѐ сы́й, бжⷭ҇твеннымъ манове́нїемъ ᲂу҆правлѧ́емь, ве́тхїй ри́мъ ѻ҆те́чество твоѐ и҆ ро́дъ тво́й ѡ҆ста́вилъ є҆сѝ, и҆ ѿтꙋ́дꙋ чꙋде́снымъ по вода́мъ на ка́мени, ꙗ҆́кѡ на ле́гцѣмъ кораблѝ, прише́ствїемъ твои́мъ сѣ́мѡ ѡ҆ст҃и́лъ є҆сѝ гра́дъ се́й, и҆ въ не́мъ хра́мъ бж҃їей мт҃ри воздви́глъ є҆сѝ, трꙋды́ же и҆ по́двиги твои́ми просвѣти́лъ є҆сѝ ѡ҆би́тель твою̀, є҆ѧ́же и҆ ѡ҆снова́нїе тобо́ю бы́сть, ᲂу҆мно́жилъ є҆сѝ въ не́й ча̑да твоѧ̑, ѡ҆́бразомъ до́брыхъ дѣ́лъ и҆ ᲂу҆че́нїемъ наставлѧ́ѧй и҆̀хъ: тѣ́мъ и҆ нетлѣ́нїемъ моще́й твои́хъ и҆ чꙋде́съ сїѧ́нїемъ просла́ви тѧ̀ бг҃ъ, є҆мꙋ́же безпло́тенъ со безпло́тными предстоѧ̀ ра́дꙋешисѧ, и҆, ра́дꙋѧсѧ, ѡ҆ притека́ющихъ къ чꙋдотво́рнѣй ра́цѣ твое́й, и҆ мо́щи твоѧ̑ ᲂу҆сты́ же и҆ се́рдцемъ лобыза́ющихъ, мо́лишисѧ. Ты̀ и҆ ны́нѣ, ꙗ҆́кѡ и҆мѣ́ѧй дерзнове́нїе ко влⷣцѣ хрⷭ҇тꙋ̀, бꙋ́ди мл҃твенникъ и҆ хода́тай ѡ҆ предстоѧ́щихъ си́хъ рабѣ́хъ твои́хъ, честно́мꙋ твоемꙋ̀ ѡ҆́бразꙋ кла́нѧющихсѧ, и҆ просѧ́щихъ ѿ тебє̀ ми́лостивагѡ застꙋпле́нїѧ. Є҆́й, мо́лимъ тѧ̀, слꙋго̀ хрⷭ҇то́въ и҆ ᲂу҆го́дниче, главы̑ и҆ сердца̀ на̑ша преклонѧ́юще тебѣ̀: не пре́зри ᲂу҆бо́гагѡ сегѡ̀ моле́нїѧ на́шегѡ, но при́зри на ны̀ ми́лостивнѡ, коегѡ́жды потре́бꙋ и҆сполнѧ́ѧ: болѧ́щымъ здра́вїе, пꙋтеше́ствꙋющымъ въ пꙋтѝ бл҃гопоспѣ́шество, пла́вающимъ ско́рое и҆ безбѣ́дное пла́ванїе да́рꙋѧ: на́съ ѿ всѧ́кихъ бѣ́дъ, внеза́пнѡ находѧ́щихъ, сохранѝ: да всѝ твои́ми мл҃твами на землѝ бг҃оꙋго́днѡ поживе́мъ, и҆ нбⷭ҇нагѡ црⷭ҇твїѧ наслѣ́дницы бꙋ́демъ, досто́йни славосло́вити всест҃ꙋ́ю трⷪ҇цꙋ, ѻ҆ц҃а̀, и҆ сн҃а, и҆ ст҃а́гѡ дх҃а, въ безконє́чныѧ вѣ́ки. А҆ми́нь.