Песнь 1
Ирмос
Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.
Тропарь
Се́й предпра́зднственный де́нь соверша́юще, ве́рнии, преображе́ния Христа́, Изба́вителя на́шего, воспле́щим пе́сньми.
Тропарь
Вхо́д пости́гши свята́го преображе́ния Христо́ва, и мы́ облиста́емся Боже́ственными измене́нии, сие́ облобыза́юще.
Тропарь
По ны́нешнем Христо́с дни́, пое́мь ученики́, на го́ру восхо́дит и, та́мо преобра́жся, облиста́ет Божество́м.
Тропарь
Го́ру Фаво́рскую, прииди́те вси́, дости́гше у́мно, Христа́ у́зрим, пред ученики́ Свои́ми стра́шно преобразу́ющася.
Тропарь
Я́ко Дави́д проро́к, вопие́м Ти́: Фаво́рская гора́ и Ермо́н о Твое́м И́мени, Христе́, возра́дуются, в преображе́нии Твое́м.
Тропарь
Го́ру превысо́кую — се́рдце, очище́но от страсте́й, иму́щии, у́зрим Христо́во преображе́ние, просвеща́ющее у́м на́ш.
Тро́ицу просла́вим правосла́вно, со Отце́м Сы́на и Ду́ха Свята́го, Еди́но Божество́, Еди́ницу Триипоста́сную.
Богородичен
Ма́терь и Де́ву Тя́ правосла́вно испове́дуем, ве́рнии, неизрече́нно ро́ждшую Христа́ Бо́га на́шего, еди́наго Многоми́лостиваго.
Песнь 8
Ирмос
Царя́ Христа́, Его́же испове́даша плене́ннии о́троцы, в пещи́ глаго́люще ве́лиим гла́сом: вся́ дела́, по́йте Го́спода.
Тропарь
Госпо́дня све́тлаго преображе́ния настоя́щий де́нь облиста́в, ми́рови повелева́ет вопи́ти: вся́ дела́, по́йте и превозноси́те Его́ во ве́ки.
Тропарь
Мы́слию, ве́рнии, прииди́те, по́йдем к горе́ святе́й ви́дети преображе́ние Христо́во всесве́тлое: вся́ бо просвеща́ет, славосло́вящия сие́ во ве́ки.
Тропарь
Дне́сь Христо́ву преображе́нию чи́стым се́рдцем предусре́тение сотвори́м и возопии́м све́тло: вся́ дела́, Го́спода по́йте и превозноси́те Его́ во ве́ки.
В Ли́цех Тре́х Еди́ное Божество́ богосло́вим, Отца́ и Сы́на и Ду́ха Пресвята́го, ку́пно, вся́ дела́, по́йте и превозноси́те Его́ во ве́ки.
Богородичен
Царя́ Христа́, Его́же на́м роди́ Де́ва Мари́я и по рождестве́ пребы́вши Де́ва Чиста́, вся́ дела́, по́йте и превозноси́те Его́ во ве́ки.
Песнь 9
Ирмос
Тя́, Неискусобра́чную Богоро́дицу, Небе́сный черто́г, ро́ждшую Нача́льника спасе́ния на́шего, пе́сньми велича́ем.
Тропарь
Се́й первовхо́дный де́нь Твоего́, Христе́, творя́ще пресла́внаго и всесве́тлаго преображе́ния, пе́сньми Тя́ велича́ем.
Тропарь
Усе́рдно, ве́дяще сла́вное преображе́ние Госпо́дне, озари́м духо́вно помышле́ния на́ша, сие́ велича́юще.
Тропарь
До́брым измене́нием изме́ньшеся, Христо́вым преображе́нием, обря́щемся светоявле́нни добродея́нии на́шими, сие́ велича́юще.
Тя́, Триипоста́сную Тро́ицу и Неразде́льное Существо́, Отца́ и Сы́на и Ду́ха Свята́го, пе́сньми велича́ем.
Богородичен
Тя́, купину́, ю́же Моисе́й ви́де горя́щую и неопаля́емую, о́гнь прие́мшую Божества́, пе́сньми велича́ем.
Пѣ́снь а҃
І҆рмо́съ
Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колесни̑цы фараѡ́новы и҆ си́лꙋ.
Тропа́рь
Се́й предпра́зднственный де́нь соверша́юще вѣ́рнїи, преѡбраже́нїѧ хрⷭ҇та̀ и҆зба́вителѧ на́шегѡ, воспле́щимъ пѣ́сньми.
Тропа́рь
Вхо́дъ пости́гши ст҃а́гѡ преѡбраже́нїѧ хрⷭ҇то́ва, и҆ мы̀ ѡ҆блиста́емсѧ бжⷭ҇твенными и҆змѣне́нїи, сїѐ ѡ҆блобыза́юще.
Тропа́рь
По ны́нѣшнемъ хрⷭ҇то́съ днѝ пое́мь ᲂу҆ченикѝ, на го́рꙋ восхо́дитъ, и҆ та́мѡ преѡбра́жсѧ, ѡ҆блиста́етъ бжⷭ҇тво́мъ.
Тропа́рь
Го́рꙋ ѳавѡ́рскꙋю, прїиди́те всѝ, дости́гше ᲂу҆́мнѡ, хрⷭ҇та̀ ᲂу҆́зримъ предъ ᲂу҆ч҃никѝ свои́ми стра́шнѡ преѡбразꙋ́ющасѧ.
Тропа́рь
Ꙗ҆́кѡ дв҃дъ прⷪ҇ро́къ вопїе́мъ тѝ: ѳавѡ́рскаѧ гора̀ и҆ є҆рмѡ́нъ ѡ҆ твое́мъ и҆́мени, хрⷭ҇тѐ, возра́дꙋютсѧ въ преѡбраже́нїи твое́мъ.
Тропа́рь
Го́рꙋ превысо́кꙋю, се́рдце ѡ҆чище́но ѿ страсте́й и҆мꙋ́щїи, ᲂу҆́зримъ хрⷭ҇то́во преѡбраже́нїе, просвѣща́ющее ᲂу҆́мъ на́шъ.
Трⷪ҇цꙋ просла́вимъ правосла́внѡ, со ѻ҆ц҃е́мъ сн҃а и҆ дх҃а ст҃а́го, є҆ди́но бж҃ество̀, є҆ди́ницꙋ трїѷпоста́снꙋю.
Богороди́ченъ
Мт҃рь и҆ дв҃ꙋ тѧ̀ правосла́внѡ и҆сповѣ́дꙋемъ вѣ́рнїи, неизрече́ннѡ ро́ждшꙋю хрⷭ҇та̀ бг҃а на́шего, є҆ди́наго многоми́лостиваго.
Пѣ́снь и҃
І҆рмо́съ
Цр҃ѧ̀ хрⷭ҇та̀, є҆го́же и҆сповѣ́даша плѣне́ннїи ѻ҆́троцы, въ пещѝ глаго́люще ве́лїимъ гла́сомъ, всѧ̑ дѣла̀ по́йте гдⷭ҇а.
Тропа́рь
Гдⷭ҇нѧ свѣ́тлагѡ преѡбраже́нїѧ, настоѧ́щїй де́нь ѡ҆блиста́въ, мі́рови повелѣва́етъ вопи́ти: всѧ̑ дѣла̀ по́йте, и҆ превозноси́те є҆го̀ во вѣ́ки.
Тропа́рь
Мы́слїю вѣ́рнїи прїиди́те по́йдемъ къ горѣ̀ ст҃ѣ́й, ви́дѣти преѡбраже́нїе хрⷭ҇то́во всесвѣ́тлое: всѧ̑ бо просвѣща́етъ, славосло́вѧщыѧ сїѐ во вѣ́ки.
Тропа́рь
Дне́сь хрⷭ҇то́вꙋ преѡбраже́нїю, чи́стымъ се́рдцемъ пред̾ꙋсрѣ́тенїе сотвори́мъ, и҆ возопїи́мъ свѣ́тлѡ: всѧ̑ дѣла̀ гдⷭ҇а по́йте, и҆ превозноси́те є҆го̀ во вѣ́ки.
Въ ли́цѣхъ тре́хъ є҆ди́ное бжⷭ҇тво̀ бг҃осло́вимъ, ѻ҆ц҃а̀ и҆ сн҃а и҆ дх҃а прест҃а́го, кꙋ́пнѡ всѧ̑ дѣла̀ по́йте, и҆ превозноси́те є҆го̀ во вѣ́ки.
Богороди́ченъ
Цр҃ѧ̀ хрⷭ҇та̀, є҆го́же на́мъ родѝ дв҃а марі́а, и҆ по рождествѣ̀ пребы́вши дв҃а чⷭ҇та̀, всѧ̑ дѣла̀, по́йте, и҆ превозноси́те є҆го̀ во вѣ́ки.
Пѣ́снь ѳ҃
І҆рмо́съ
Тѧ̀ неискꙋсобра́чнꙋю бцⷣꙋ, нбⷭ҇ный черто́гъ, ро́ждшꙋю нача́льника спасе́нїѧ на́шегѡ, пѣ́сньми велича́емъ.
Тропа́рь
Се́й первовхо́дный де́нь твоегѡ̀, хрⷭ҇тѐ, творѧ́ще пресла́внагѡ и҆ всесвѣ́тлагѡ преѡбраже́нїѧ, пѣ́сньми тѧ̀ велича́емъ.
Тропа́рь
Оу҆се́рднѡ вѣ́дѧще сла́вное преѡбраже́нїе гдⷭ҇не, ѡ҆зари́мъ дꙋхо́внѡ помышлє́нїѧ на̑ша, сїѐ велича́юще.
Тропа́рь
До́брымъ и҆змѣне́нїемъ и҆змѣ́ньшесѧ, хрⷭ҇то́вымъ преѡбраже́нїемъ, ѡ҆брѧ́щемсѧ свѣтоѧвле́нни добродѣѧ̑нїи на́шими, сїѐ велича́юще.
Тѧ̀ трїѷпоста́снꙋю трⷪ҇цꙋ, и҆ нераздѣ́льное сꙋщество̀, ѻ҆ц҃а̀ и҆ сн҃а и҆ дх҃а ст҃а́го, пѣ́сньми велича́емъ.
Богороди́ченъ
Тѧ̀ кꙋпинꙋ̀, ю҆́же мѡѷсе́й ви́дѣ, горѧ́щꙋю и҆ неѡпалѧ́емꙋю, ѻ҆́гнь прїе́мшꙋю бжⷭ҇тва̀, пѣ́сньми велича́емъ.