Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ прпⷣбномꙋ і҆́ѡвꙋ, ᲂу҆ще́льскомꙋ чꙋдотво́рцꙋ.

Прп. Иова Ущельского (1628) 19 августа 2026

Конда́къ а҃

Взбра́ннаго хрⷭ҇то́ва во́ина дне́сь дерза́емъ ᲂу҆блажи́ти тѧ̀, прпⷣбне і҆́ѡве! ты́ бо въ терпѣ́нїи мно́зѣ прете́къ житїѐ, прило́ги врагѡ́въ разори́лъ є҆сѝ и҆ страда́нїемъ ᲂу҆краси́всѧ, ᲂу҆го́денъ бг҃ови ꙗ҆ви́лсѧ є҆сѝ, є҆мꙋ́же, на нб҃сѣ́хъ предстоѧ̀, вы́нꙋ мо́лишисѧ ѡ҆ вопїю́щихъ тебѣ̀ такѡва́ѧ:

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

І҆́косъ а҃

А҆гг҃лоѡбра́знымъ бг҃ови ᲂу҆го́денъ житїе́мъ, вои́стиннꙋ и҆́щꙋщымъ спасе́нїѧ свѣти́льникъ ꙗ҆ви́лсѧ є҆сѝ, прпⷣбне і҆́ѡве, и҆́хже ра́ди ѡ҆би́тель созда́въ, мезе́нскꙋю странꙋ̀ ѿ лю́тагѡ мїроде́ржца свободи́лъ є҆сѝ. тѣ́мже тѝ вопїе́мъ:

Ра́дꙋйсѧ, мі́ра сла́вою неꙋѧзвле́нный: ра́дꙋйсѧ, въ ѡ҆би́тели солове́цтѣй и҆́гꙋ хрⷭ҇то́вꙋ поклони́выйсѧ.

Ра́дꙋйсѧ, ꙗ҆́кѡ та́мѡ, пло́ть ᲂу҆мертви́въ, дꙋ́хомъ просвѣти́лсѧ є҆сѝ: ра́дꙋйсѧ, ꙗ҆́кѡ послѣдѝ въ мезе́нстѣй странѣ̀ водвори́лсѧ є҆сѝ.

Ра́дꙋйсѧ, ꙗ҆́кѡ тꙋ̀, на спасе́нїе люде́й, ѡ҆би́тель ᲂу҆ще́льскꙋю согради́лъ є҆сѝ, въ не́йже въ по́двизѣхъ до́брыхъ до конца̀ подвиза́лсѧ є҆сѝ: ра́дꙋйсѧ, въ сконча́нїи житїѧ̀ до́брый страда́льче.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ в҃

Ви́дѧй, прпⷣбне і҆́ѡве, ꙗ҆́кѡ мі́ра кра̑снаѧ ни во что́ же вмѣнѧ́ютсѧ, кꙋ́плѧми къ томꙋ̀ жите́йскими не ѡ҆бѧза́лсѧ є҆сѝ. ѻ҆ба́че, дꙋ́хомъ влеко́мь, во ѡ҆би́тель преше́дъ солове́цкꙋю, хрⷭ҇то́ви є҆ди́номꙋ порабо́тати возжела́лъ є҆сѝ, смире́ннѡ поѧ̀: А҆ллилꙋ́їа.

І҆́косъ в҃

Ра́зꙋмъ хрⷭ҇то́въ стѧжава́ѧ во ѡ҆би́тели прпⷣбныхъ ѻ҆ц҃ъ посты̀ и҆ мл҃твами пло́ть и҆стончи́въ, дх҃ъ же ѡ҆крили́въ, въ мѣ́рꙋ во́зраста и҆сполне́нїѧ хрⷭ҇то́ва дости́глъ є҆сѝ, прпⷣбне і҆́ѡве. сегѡ̀ ра́ди рце́мъ:

Ра́дꙋйсѧ, хрⷭ҇то́вꙋ ста́дꙋ прїѻбщи́выйсѧ: ра́дꙋйсѧ, во бдѣ́нїи не ѡ҆слабѣ́вый.

Ра́дꙋйсѧ, ᲂу҆ны́нїемъ не преѡдолѣ́нный: ра́дꙋйсѧ, терпѣ́нїемъ въ по́двизѣхъ ᲂу҆крѣпи́выйсѧ, и҆ всѣ́ми добродѣ́тельми ᲂу҆краси́выйсѧ.

Ра́дꙋйсѧ, высотꙋ̀ по́двигѡвъ ᲂу҆таева́вый смире́нїемъ, пребыва́ѧй въ молча́нїи: ра́дꙋйсѧ, тѣ́мже всеѧ̀ бра́тїи люби́миче.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ г҃

Си́лꙋ бл҃года́ти, ꙗ҆́кѡ спасе́нїѧ шле́мъ, вѣ́рꙋ а҆́ки щи́тъ воспрїѧ́въ, чре́сла и҆́стиною препоѧ́савъ, всѧ́кое и҆скꙋше́нїе ѿрази́лъ є҆сѝ, прпⷣбне і҆́ѡве, дꙋхо́внымъ мече́мъ, и҆́же є҆́сть бж҃їй глаго́лъ: А҆ллилꙋ́їа.

І҆́косъ г҃

И҆мѣ́ѧй вы́нꙋ крⷭ҇тъ хрⷭ҇то́въ пред̾ ѻ҆чи́ма, мꙋ́жъ жела́нїй дꙋхо́вныхъ нело́жнѡ ꙗ҆ви́лсѧ є҆сѝ, прпⷣбне і҆́ѡве. всѣ́хъ бо твоѧ̑ и҆справлє́нїѧ, па́че со́лнца свѣтлѣ̑йшаѧ, воздвиза́ша вопи́ти тебѣ̀:

Ра́дꙋйсѧ, зѡсі́мы, савва́тїа и҆ ге́рмана воспита́нїе ди́вное: ра́дꙋйсѧ, а҆нтѡ́нїа и҆ і҆рина́рха ча́до всехва́льное.

Ра́дꙋйсѧ, є҆леаза́ра, є҆лїссе́а и҆ дїодѡ́ра сподви́жниче: ра́дꙋйсѧ, а҆гг҃лозра́чнагѡ во́инства совои́телю, и҆ въ па́гꙋбꙋ ло́вчихъ сѣте́й разори́телю.

Ра́дꙋйсѧ, ꙗ҆́кѡ мі́рꙋ незри́мый, ѡ҆ мі́рѣ хода́тай ꙗ҆ви́лсѧ є҆сѝ: ра́дꙋйсѧ, ꙗ҆́кѡ ѡ҆ сверше́нїи всѧ́кагѡ бла́га ᲂу҆се́рднѡ моли́лсѧ є҆сѝ.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ д҃

Бꙋ́рю грѣхо́внꙋю, мі́ромъ воздвиза́емꙋю, хрⷭ҇то́съ, ᲂу҆тиши́ти хотѧ́й, трапе́зѣ свое́й предстоѧ́ти сподо́би тѧ̀, прпⷣбне і҆́ѡве. ты́ же, досто́йнѣ же́ртвꙋ ст҃ꙋ́ю творѧ̀, и҆сцѣлѧ́ѧ недꙋ́ги благода́рными ᲂу҆сты̀ воспѣва́лъ є҆сѝ є҆мꙋ̀: А҆ллилꙋ́їа.

І҆́косъ д҃

Слы́ша влады́ка і҆сі́дѡръ проше́нїе бра́тїи, ви́дѣвъ же свѣ́тъ добродѣ́телей твои́хъ, прпⷣбне і҆́ѡве, сщ҃е́нства тебѐ ᲂу҆досто́и, є҆гѡ́же ра́ди ᲂу҆сꙋгꙋ́билъ є҆сѝ по́двиги воздержа́нїѧ бра́тїи слꙋже́нїемъ, прїе́млѧ ѿ всѣ́хъ сицева̑ѧ:

Ра́дꙋйсѧ, ст҃ѣ́йшагѡ чи́стый слꙋжи́телю: ра́дꙋйсѧ, непоро́чный тѣ́ла и҆ кро́ве є҆гѡ̀ препода́телю.

Ра́дꙋйсѧ, ѡ҆ грѣ́шницѣхъ хода́таю: ра́дꙋйсѧ, скорбѧ́щымъ ᲂу҆тѣше́нїе.

Ра́дꙋйсѧ, ꙗ҆́кѡ мл҃тва твоѧ̀ на пꙋ́ть всѣ́хъ благі́й наставлѧ́ше: ра́дꙋйсѧ, ꙗ҆́кѡ ᲂу҆со́пшихъ сїѧ̀ лю́тыхъ мыта́рствъ свобожда́ше.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ є҃

Бг҃оте́чный, а҆́ки дре́вле ѕвѣзда̀, ко хрⷭ҇то́ви приведе́нїемъ мꙋдрецы̀ ѿ востѡ́къ просвѣти́вшаѧ, къ мезе́нстѣй странѣ̀ ᲂу҆стреми́лсѧ є҆сѝ, прпⷣбне і҆́ѡве, и҆дѣ́же ро́ждшꙋсѧ ѿ дв҃ы до́мъ мл҃твы созда́въ, наꙋчи́лъ є҆сѝ всѧ̑ смире́ннѡ пѣ́ти є҆мꙋ̀: А҆ллилꙋ́їа.

І҆́косъ є҃

Ви́дѧще, страны̀ тоѧ̀ лю́дїе, ꙗ҆́кѡ дре́внѧгѡ і҆́ѡва сбы́стсѧ ᲂу҆пова́нїе, є҆гда̀ и҆скꙋпи́тель за ны̀ ꙗ҆ви́сѧ хрⷭ҇то́съ, ѡ҆ прише́ствїи твое́мъ веселѧ́хꙋсѧ. хрⷭ҇тꙋ́ бо вѣ́рнѡ слꙋжи́ти ᲂу҆ча́й, і҆́ѡвъ но́вый ꙗ҆ви́лсѧ є҆сѝ, прпⷣбне, слы́ша ѿ всѣ́хъ такова̑ѧ:

Ра́дꙋйсѧ, зва́вшихъ тѧ̀ ᲂу҆слы́шавый: ра́дꙋйсѧ, ꙗ҆́кѡ мра́зныѧ страны̀, дꙋ́хомъ горѧ́й, не ᲂу҆боѧ́лсѧ є҆сѝ.

Ра́дꙋйсѧ, во бла́го лю́демъ тоѧ̀ и҆знесы́й блгⷣть и҆скꙋпле́нїѧ: ра́дꙋйсѧ, и҆сповѣ́данїѧ нело́жнагѡ наꙋчи́телю.

Ра́дꙋйсѧ, житїѧ̀ бг҃оꙋго́днагѡ наказа́телю: ра́дꙋйсѧ, свѣти́льниче, є҆го́же до́мꙋ влады́ка под̾ спꙋ́домъ не скры̀.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ ѕ҃

Проповѣ́дникъ хрⷭ҇то́ва ᲂу҆че́нїѧ дѣла́ми всѧ̑ словеса̀ ѡ҆правда́лъ є҆сѝ, прпⷣбне і҆́ѡве. живы́й бо въ мезе́нстѣй странѣ̀, лю́демъ глаго́лѧ, ꙗ҆́кѡ до́брыми дѣ́лы бл҃гоꙋгожда́етсѧ бг҃ъ, пе́рвѣе сїѧ̑ сотвори́лъ є҆сѝ са́мъ, жизнода́вцꙋ хрⷭ҇тꙋ̀ смире́ннѡ поѧ̀: А҆ллилꙋ́їа.

І҆́косъ ѕ҃

Возсїѧ́въ, ꙗ҆́кѡ сл҃нце, въ полꙋ́нощнѣй странѣ̀, свѣ́томъ твои́хъ добродѣ́телей, мно́гихъ привле́клъ є҆сѝ, прпⷣбне і҆́ѡве, и҆̀же, крⷭ҇то́мъ пло́ть распѧ́въ, чꙋ́жди мі́рови, ѡ҆ хрⷭ҇тѣ̀ восхвалѧ́хꙋ тебѐ:

Ра́дꙋйсѧ, хрⷭ҇то́вы любвѐ и҆сполне́нїе: ра́дꙋйсѧ, ѡ҆́бразе наде́жды крѣ́пкїѧ.

Ра́дꙋйсѧ, въ гѡ́рнѧѧ ᲂу҆пра́вителю: ра́дꙋйсѧ, бл҃гоче́стїѧ страны̀ ᲂу҆тверди́телю.

Ра́дꙋйсѧ, а҆́ки сто́лпъ свѣ́телъ, и҆́мже де́мѡнѡмъ пꙋ́ть во странꙋ̀ загради́сѧ: ра́дꙋйсѧ, а҆́ки лѣ́ствица, є҆́юже къ нб҃сє́мъ ѿкры́сѧ восхожде́нїе.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ з҃

Спасе́нїѧ ра́ди соше́дшихсѧ ѡ҆би́тель ᲂу҆ще́льскꙋю согради́лъ є҆сѝ, прпⷣбне і҆́ѡве. хрⷭ҇то́ва рождества̀ ю҆̀ хра́момъ ᲂу҆краси́въ, и҆́ноческагѡ житїѧ̀ ᲂу҆ста́вы ᲂу҆тверди́лъ є҆сѝ, да и҆́ноцы, небла́зненнѡ живꙋ́ще, вы́нꙋ бг҃ови пою́тъ: А҆ллилꙋ́їа.

І҆́косъ з҃

Но́ваѧ кꙋпѣ́ль сїлѡа́мскаѧ бы́сть ѡ҆би́тель твоѧ̀, прпⷣбне і҆́ѡве. въ не́йже ꙗ҆́звами грѣха̀ и҆зможде́ннїи дꙋ́шы ми́ръ ᲂу҆лꙋча́хꙋ, по сло́вꙋ хрⷭ҇то́вꙋ живꙋ́ще: и҆́же и҆тѝ по мнѣ̀ хо́щетъ, да ѿве́ржетъ себѐ, и҆ взе́мъ крⷭ҇тъ сво́й, менѐ вслѣ́дъ грѧде́тъ: и҆́го бо бла́го и҆ бре́мѧ моѐ є҆́сть легко̀. тѣ́мже чти́мъ тѧ̀, глаго́люще:

Ра́дꙋйсѧ, па́стырю до́брый, дꙋ́шꙋ за ѻ҆́вцы своѧ̑ полага́вый: ра́дꙋйсѧ, сѣ́ѧтелю до́брагѡ сѣ́мене, сло́ва хрⷭ҇то́ва.

Ра́дꙋйсѧ, ꙗ҆́кѡ сїѐ на ни́вꙋ благꙋ́ю падѐ: ра́дꙋйсѧ, ꙗ҆́кѡ тѣ́мъ и҆зрастѐ бл҃гоче́стїѧ дре́во.

Ра́дꙋйсѧ, ꙗ҆́кѡ и҆збра̑ннымъ плодѡ́мъ согради́лъ є҆сѝ ко́шницꙋ: ра́дꙋйсѧ, ꙗ҆́кѡ цр҃кве зижди́телѧ трꙋдѡ́мъ прїѻбщи́лсѧ є҆сѝ.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ и҃

Стра́нное ꙗ҆ви́сѧ видѣ́нїе, ꙗ҆́кѡ тоѧ̀ бы́въ нача́льникъ ѡ҆би́тели, тѧ̑жкїѧ трꙋды̀ прїима́лъ є҆сѝ, прпⷣбне і҆́ѡве. во пло́ти бо, ꙗ҆́кѡ безпло́тенъ, въ постѣ́хъ и҆ мл҃твахъ живы́й, ничто́же себѐ недосто́йно возмни́лъ є҆сѝ, вы́нꙋ сла́дцѣ хрⷭ҇то́ви поѧ̀: А҆ллилꙋ́їа.

І҆́косъ и҃

Всѣ̑мъ є҆ди́ножды бра́тїемъ на селѣ̀ трꙋдѧ́щымсѧ, є҆ди́нъ, ѡ҆би́тель блюдѧ́й, помышлѧ́лъ є҆сѝ въ себѣ̀, прпⷣбне і҆́ѡве: трава̀ ꙗ҆́кѡ дні́е сꙋ́ть на́ши, ꙗ҆́же ѡ҆жестѣ́етъ и҆ и҆́зсхнетъ, и҆ мно́жае въ ни́хъ трꙋ́дъ и҆ болѣ́знь, є҆гда̀ прїидо́ша разбо́йницы, ѡ҆ ни́хже помышлѧ́юще со стра́хомъ, тѝ рце́мъ:

Ра́дꙋйсѧ, а҆́гг҃льскагѡ ѡ҆́браза блаже́нный носи́телю: ра́дꙋйсѧ, и҆́нокѡмъ бра́тїемъ незави́стный содѣ́телю.

Ра́дꙋйсѧ, трꙋ́дникѡмъ ѡ҆́бразе: ра́дꙋйсѧ, ꙗ҆́кѡ тобо́ю трꙋ́дъ всѧ́кїй ѡ҆свѧти́сѧ.

Ра́дꙋйсѧ, ꙗ҆́кѡ тѣ́мъ пра́здность го́рдыхъ ѡ҆бличи́сѧ: ра́дꙋйсѧ, ѡ҆би́тели своеѧ̀ да́же до кро́ве защи́тниче.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ ѳ҃

Всѧ́кїѧ и҆спо́лньше ꙗ҆́рости, ѡ҆ сокро́вищехъ разбо́йницы вопроша́хꙋ тѧ̀, прпⷣбне і҆́ѡве! и҆̀мже противꙋста́лъ є҆сѝ кро́тцѣ глаго́лѧ: ча́дца, ничесо́же си́хъ и҆́мамы: на́мъ хрⷭ҇то́съ є҆́сть є҆ди́но сокро́вище, во є҆́же жи́ти ѡ҆ не́мъ и҆ ᲂу҆мре́ти, смире́ннѡ поѧ̀ во трꙋдѣ́хъ: А҆ллилꙋ́їа.

І҆́косъ ѳ҃

Виті́йствомъ твои́мъ посра́мленнїи ничесо́же поѧ́ти могꙋ́ще, сі́и срⷣце своѐ ѡ҆ѕло́биша на тѧ̀ прпⷣбне і҆́ѡве. жгꙋ́ще бо тѧ̀, неща́днѡ влача́хꙋ, пха́хꙋ, бїѧ́хꙋ, ꙗ҆́кѡ тѣ́ло твоѐ, посто́мъ и҆зсꙋше́нное, раздира́шесѧ, кро́вь же твоѧ̀ напаѧ́ше сїю̀ ѡ҆свѧще́ннꙋю зе́млю. зрѧ́ще сїѧ̑ ᲂу҆миле́ннѡ вопїе́мъ тѝ:

Ра́дꙋйсѧ, ꙗ҆́кѡ даде́сѧ тѝ ѡ҆́бласть страда́нїѧ: ра́дꙋйсѧ, ꙗ҆́кѡ терпѣ́нїемъ гꙋби́телей ᲂу҆ничижи́лъ є҆сѝ.

Ра́дꙋйсѧ, ꙗ҆́кѡ малодꙋ́шнымъ мꙋ́жества ѡ҆́бразъ ꙗ҆ви́лсѧ є҆сѝ: ра́дꙋйсѧ, ꙗ҆́кѡ въ страда́нїи творца̀ не ᲂу҆кори́лъ є҆сѝ.

Ра́дꙋйсѧ, ꙗ҆́кѡ дїа́вола дре́внюю лжꙋ̀ па́ки ѡ҆бличи́лъ є҆сѝ: ра́дꙋйсѧ, і҆́ѡва тїді́йскагѡ досто́йный соиме́нниче.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ і҃

Спа́слъ є҆сѝ тѣ́ла страда́нїемъ дꙋ́шꙋ твою̀, прпⷣбне і҆́ѡве, терпѣ́нїемъ бо твои́мъ и҆зможде́ннїи разбо́йницы тѝ ᲂу҆сѣко́ша главꙋ̀, и҆ тѣ́ло пове́ргше, ѿидо́ша въ поги́бель. ты́ же хрⷭ҇то́ви предста́въ, съ ли́ки ста́рцевъ є҆мꙋ̀ вопїе́ши: А҆ллилꙋ́їа.

І҆́косъ і҃

Стѣ́нꙋ тѧ̀ и҆мꙋ́щи, ᲂу҆зрѣ́въ же ᲂу҆бїе́на, ᲂу҆жасе́сѧ ѡ҆ се́мъ бра́тїѧ, привлача́щи ѡ҆крє́стнаѧ пла́чемъ. є҆гда̀ кꙋ́пнѡ всѝ соидо́шасѧ, че́стнѣ тѣ́ло твоѐ погребо́ша, къ немꙋ́же притека́юще, мл҃твы творѧ́ще, вопїѧ́хꙋ тебѣ̀:

Ра́дꙋйсѧ, страда́нїѧ свѣ́тлое соверше́нїе: ра́дꙋйсѧ, ꙗ҆́кѡ рꙋ́цѣ твоѝ мечꙋ̀ не прикоснꙋ́шасѧ.

Ра́дꙋйсѧ, ꙗ҆́кѡ сѣди́ны твоѧ̑ кро́вїю за ны̀ ѡ҆багри́шасѧ: ра́дꙋйсѧ, ꙗ҆́кѡ ᲂу҆сѣче́нїемъ главы̀ та́йна житїѧ̀ твоегѡ̀ запечатлѣ́сѧ.

Ра́дꙋйсѧ, ꙗ҆́кѡ дш҃а̀ твоѧ̀ а҆́гг҃лы на нб҃са̀ возведе́сѧ и҆ цр҃е́ви предста̀: ра́дꙋйсѧ, ꙗ҆́кѡ въ ри̑зы бра̑чныѧ ѡ҆дѣ́ѧвсѧ, хрⷭ҇тꙋ̀, на ѳавѡ́рѣ преѡбрази́вшꙋсѧ, ᲂу҆подо́бисѧ.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ а҃і

Пѣ́нїе рожде́нномꙋ ѿ дв҃ы бл҃года́тныѧ і҆ере́и и҆ всѝ лю́дїе принесо́ша ве́лїе, зрѧ́ще, ꙗ҆́кѡ по мно́зѣхъ лѣ́тѣхъ нетлѣ́ннѡ тѣ́ло твоѐ соблюде́сѧ, чꙋдесы̀ же и҆сточа́ѧ, наꙋчѝ всѧ̑ вопи́ти ѡ҆ тебѣ̀: А҆ллилꙋ́їа.

І҆́косъ а҃і

Свѣтоза́ренъ, ꙗ҆́кѡ сїѧ́нїе нб҃съ, чꙋдесы̀, а҆́ки свѣ́та столпы̀ ѡ҆блиста́лъ є҆сѝ, прпⷣбне і҆́ѡве, мра́чнꙋю странꙋ̀. те́плыми же бг҃ови мл҃твами хла́дъ тоѧ̀ и҆спраздни́лъ є҆сѝ, ѿ лю́бѧщихъ тѧ̀ прїе́млѧ серде́цъ такѡвы́ѧ хвалы̑:

Ра́дꙋйсѧ, сїѧ́нїе мра́ка си̑лы разгонѧ́ющее: ра́дꙋйсѧ, лꙋно̀, ᲂу҆мире́нїе дш҃а́мъ подаю́щаѧ.

Ра́дꙋйсѧ, пꙋсты́ни мра́зныѧ согрѣ́ѧнїе и҆ ви́хрей хла́дныхъ ᲂу҆тише́нїе: ра́дꙋйсѧ, ѻ҆кеа́на-мо́рѧ ᲂу҆краше́нїе, въ не́мже пла́вающихъ ѿ потопле́нїѧ спаса́еши.

Ра́дꙋйсѧ, ꙗ҆́кѡ ѿ бѣсѡ́въ дрꙋчи́мыхъ свобожда́еши и҆ всѧ̑кїѧ недꙋ́ги цѣли́ши: ра́дꙋйсѧ, ꙗ҆́кѡ ѕвѣзда̀ и҆ на́мъ пꙋ́ть ᲂу҆казꙋ́етъ твоѐ житїѐ.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ в҃і

Бл҃года́ти прича́стникъ, чꙋдеса̀ показꙋ́еши всѣ̑мъ, прпⷣбне і҆́ѡве, ꙗ҆́кѡ при̑сныѧ тѝ не ѡ҆ставлѧ́еши, ѡ҆ба́че со ст҃ы́ми ᲂу҆се́рднѡ молѧ́сѧ ѡ҆ на́съ, кѡ́зни ѕлы́хъ разорѧ́еши мꙋ́ринѡвъ, побѣ́днѣ цр҃е́ви поѧ̀: А҆ллилꙋ́їа.

І҆́косъ в҃і

Пѣ́сньми превозносѧ́ще хрⷭ҇та̀, є҆мꙋ́же послꙋжи́въ, приложи́лсѧ є҆сѝ цр҃кве ст҃ы́хъ, ꙗ҆́же бо, зрѧ́щи на текꙋ́щыѧ, спасе́нїѧ и҆́щꙋщымъ ве́лїе твори́тъ вспоможе́нїе, си́це тѧ̀, велича́емъ:

Ра́дꙋйсѧ, трⷪ҇цы є҆диносꙋ́щныѧ предстоѧ́телю, въ ра́йскихъ кꙋ́щехъ ра́дости вели́кїѧ наслажда́ѧйсѧ: ра́дꙋйсѧ, ро́ждшїѧ сн҃а бж҃їѧ ᲂу҆блажа́телю.

Ра́дꙋйсѧ, сѷмеѡ́нови и҆ а҆́ннѣ со предте́чею соꙋтѣ́шенный: ра́дꙋйсѧ, і҆́ѡва многострада́льнагѡ совсе́льниче.

Ра́дꙋйсѧ, всѣ̑мъ ст҃ы̑мъ сотаи́нниче: ра́дꙋйсѧ, ꙗ҆́кѡ на землѝ тѧ̀ чтꙋ́щыѧ призира́еши и҆ молє́нїѧ си́хъ любе́знѣ прїе́млеши.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ г҃і

Ѽ прпⷣбне ѻ҆́ч҃е на́шъ і҆́ѡве! вѣ́чнѡ живы́й въ невече́рнѣмъ днѝ црⷭ҇твїѧ хрⷭ҇то́ва, ᲂу҆молѝ всѣ́хъ влⷣкꙋ, да, вѣ́рою тѧ̀ ᲂу҆блажа́юще, мл҃твами твои́ми, на́ше житїѐ преѡбрази́въ во бл҃го́е, тоѧ́жде причасти́мсѧ бл҃года́ти, во вѣ́ки пою́ще и҆скꙋпи́вшемꙋ на́съ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆гг҃лоѡбра́знымъ бг҃ови ᲂу҆го́денъ житїе́мъ, вои́стиннꙋ и҆́щꙋщымъ спасе́нїѧ свѣти́льникъ ꙗ҆ви́лсѧ є҆сѝ, прпⷣбне і҆́ѡве, и҆́хже ра́ди ѡ҆би́тель созда́въ, мезе́нскꙋю странꙋ̀ ѿ лю́тагѡ мїроде́ржца свободи́лъ є҆сѝ. тѣ́мже тѝ вопїе́мъ:

Ра́дꙋйсѧ, мі́ра сла́вою неꙋѧзвле́нный: ра́дꙋйсѧ, въ ѡ҆би́тели солове́цтѣй и҆́гꙋ хрⷭ҇то́вꙋ поклони́выйсѧ.

Ра́дꙋйсѧ, ꙗ҆́кѡ та́мѡ, пло́ть ᲂу҆мертви́въ, дꙋ́хомъ просвѣти́лсѧ є҆сѝ: ра́дꙋйсѧ, ꙗ҆́кѡ послѣдѝ въ мезе́нстѣй странѣ̀ водвори́лсѧ є҆сѝ.

Ра́дꙋйсѧ, ꙗ҆́кѡ тꙋ̀, на спасе́нїе люде́й, ѡ҆би́тель ᲂу҆ще́льскꙋю согради́лъ є҆сѝ, въ не́йже въ по́двизѣхъ до́брыхъ до конца̀ подвиза́лсѧ є҆сѝ: ра́дꙋйсѧ, въ сконча́нїи житїѧ̀ до́брый страда́льче.

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Конда́къ а҃

Взбра́ннаго хрⷭ҇то́ва во́ина дне́сь дерза́емъ ᲂу҆блажи́ти тѧ̀, прпⷣбне і҆́ѡве! ты́ бо въ терпѣ́нїи мно́зѣ прете́къ житїѐ, прило́ги врагѡ́въ разори́лъ є҆сѝ и҆ страда́нїемъ ᲂу҆краси́всѧ, ᲂу҆го́денъ бг҃ови ꙗ҆ви́лсѧ є҆сѝ, є҆мꙋ́же, на нб҃сѣ́хъ предстоѧ̀, вы́нꙋ мо́лишисѧ ѡ҆ вопїю́щихъ тебѣ̀ такѡва́ѧ:

Ра́дꙋйсѧ, і҆́ѡве, при́сный на́шъ споспѣ́шниче, ᲂу҆ще́льскїй чꙋдотво́рче.

Моли́твы

Прпⷣбне ѻ҆́ч҃е на́шъ і҆́ѡве, мл҃твою твое́ю и҆ вѣ́рою и҆ любо́вїю и҆ чистото́ю се́рдца є҆щѐ на землѝ во ѡ҆би́тель предвѣ́чнагѡ бг҃а сло́ва дꙋ́шꙋ свою̀ ᲂу҆стро́ивый и҆ ме́чнымъ ѿ разбѡ́йникъ ᲂу҆сѣче́нїемъ главы̀ твоеѧ̀ житїѐ запечатлѣ́вый, по ѿше́ствїи же твое́мъ ѿ земны́хъ наипа́че къ бг҃ꙋ прибли́живыйсѧ, но и҆ ѿ на́съ дꙋ́хомъ любвѐ твоеѧ̀ не ѿстꙋпи́вый, и҆ честны̑ѧ твоѧ̑ мо́щи, ꙗ҆́кѡ сосꙋ́дъ блгⷣти по́лный, на́мъ ѡ҆ста́вивый. ве́лїе и҆мѣ́ѧ дерзнове́нїе ко всемлⷭ҇тивомꙋ влⷣцѣ, молѝ є҆го̀ сп҃сти́ ны вѣ́рꙋющыѧ и҆ къ тебѣ̀ съ любо́вїю и҆ те́плою мл҃твою притека́ющыѧ. хода́тайствꙋй пред̾ ни́мъ: стра́ждꙋщꙋю странꙋ̀ рѡссі́йскꙋю ѿ лю́тыхъ безбѡ́жникъ и҆ вла́сти и҆́хъ да свободи́тъ, и҆ да возста́витъ престо́лъ правосла́вныхъ прави́телей: вѣ́рныхъ рабѡ́въ є҆гѡ̀, въ ско́рби и҆ печа́ли де́нь и҆ но́щь вопїю́щихъ къ немꙋ̀, многоболѣ́зный во́пль да ᲂу҆слы́шитъ и҆ да и҆зведе́тъ ѿ поги́бели живо́тъ на́шъ. и҆спросѝ на́мъ ᲂу҆ великодарови́тагѡ бг҃а на́шегѡ всѧ́кїй да́ръ, коемꙋ́ждо бл҃гопотре́бенъ во сп҃се́нїе, вѣ́ры непоро́чны соблюде́нїе, градѡ́въ на́шихъ ᲂу҆твержде́нїе, мі́ра ᲂу҆мире́нїе, ѿ наше́ствїѧ и҆ноплеме́нныхъ и҆збавле́нїе, ѿ гла́да и҆ па́гꙋбы сохране́нїе, младе́нцємъ воспита́нїе, ю҆́нымъ наставле́нїе, сирота́мъ и҆ вдови́цамъ застꙋпле́нїе, скорбѧ́щымъ ᲂу҆тѣше́нїе, по мо́рю пла́вающымъ, хла̑дныѧ пꙋсты̑ни и҆ тє́мныѧ дє́бри преходѧ́щымъ вѣ́рное ко приста́нищꙋ приведе́нїе, недꙋ́гꙋющымъ и҆сцѣле́нїе, бѣсны̑мъ ѿ де́мѡнскагѡ наше́ствїѧ свобожде́нїе, па́дшымъ во грѣхѝ покаѧ́нїе и҆ возста́нїе, ѿ цр҃кви хрⷭ҇то́вы ѿпа́дшымъ вразꙋмле́нїе и҆ на пꙋ́ть сп҃се́нїѧ возвраще́нїе, подвиза́ющымсѧ ᲂу҆крѣпле́нїе, бл҃годѣ́лающымъ въ дѣ́лѣхъ бл҃ги́хъ преспѣ́ѧнїе и҆ бл҃гослове́нїе, ѿходѧ́щымъ ѿ сегѡ̀ вре́меннагѡ житїѧ̀ къ вѣ́чномꙋ бл҃го́е напꙋ́тствїе, ѿше́дшымъ бл҃же́нное ᲂу҆покое́нїе. ѽ сщ҃е́ннаѧ главо̀! посѣтѝ мѣ́сто сїѐ ст҃о́е, дре́вле кро́вїю твое́ю чтⷭ҇но́ю ѡ҆багре́нное и҆ ѡ҆мове́нное: соблюдѝ и҆ ᲂу҆крѣпѝ мл҃твами твои́ми ѡ҆би́тель твою̀, разширѝ ю҆̀, ᲂу҆красѝ добродѣ́тельми тоѧ̀ сєстры̀, и҆ всѧ̑ притека́ющыѧ къ тебѣ̀ до́брѣ сохранѝ во вѣ́ки вѣкѡ́въ. А҆ми́нь.

Ѽ прпⷣбне и҆ бг҃оно́сне ѻ҆́ч҃е на́шъ і҆́ѡве! ве́лїе и҆мѣ́ѧ къ бг҃ꙋ дерзнове́нїе, моли́сѧ непреста́ннѡ ѡ҆ всѣ́хъ на́съ, занѐ бꙋ́рѧ мно́гихъ бѣ́дъ и҆ скорбе́й ѡ҆бдержи́тъ ны̀: се́ бо недꙋ́зи тѣле́снїи, болѣ́зни дꙋшє́вныѧ, приражє́нїѧ вра̑жїѧ ѡ҆бꙋрева́ютъ ны̀. хо́дитъ бо вра́гъ на́шъ, и҆скі́й кого̀ поглоти́ти: мы́ же ѡ҆ сп҃се́нїи на́шемъ нерадѧ́ще, нѣ́смы досто́йни нижѐ воззрѣ́ти на высотꙋ̀ нбⷭ҇нꙋю, ни гдⷭ҇а въ по́мощь свою̀ призва́ти. но ты̀ бꙋ́ди на́мъ помо́щникъ во сп҃се́нїе ско́рый и҆ ѿ ѕѡ́лъ и҆зба́витель неѡдоли́мый. пода́ждь на́мъ па́мѧть сме́ртнꙋю, сле́зы покаѧ́нїѧ и҆ наде́ждꙋ сп҃се́нїѧ, да не въ ѿча́ѧнїе впаде́мъ, нижѐ де́рзостнымъ на млⷭ҇рдїе бж҃їе ᲂу҆пова́нїемъ, во грѣсѣ́хъ же пребыва́нїемъ, въ коне́цъ себѐ погꙋби́мъ: но да бꙋ́детъ на́мъ па́мѧть грѣхѡ́въ на́шихъ во и҆сто́чникъ те́плыхъ сле́зъ и҆ сокрꙋше́нїѧ серде́чнагѡ, млⷭ҇рдїе же бж҃їе и҆ бл҃года́ть є҆гѡ̀ во сп҃се́нїе на́ше, мл҃твами твои́ми, да пода́стсѧ на́мъ твои̑мъ ча́дѡмъ, во вѣ́ки вѣкѡ́въ. А҆ми́нь.

Ѽ прпⷣбне ѻ҆́ч҃е и҆ бг҃оно́сне на́шъ і҆́ѡве! предстоѧ̀ прⷭ҇то́лꙋ прест҃ы́ѧ трⷪ҇цы, моли́сѧ непреста́ннѡ: стра́ждꙋщꙋю странꙋ̀ рѡссі́йскꙋю ѿ лю́тыхъ безбѡ́жникъ и҆ вла́сти и҆́хъ да свободи́тъ, и҆ да возста́витъ престо́лъ правосла́вныхъ прави́телей: вѣ́рныхъ рабѡ́въ є҆гѡ̀, въ ско́рби и҆ печа́ли де́нь и҆ но́щь вопїю́щихъ къ немꙋ̀, многоболѣ́зный во́пль да ᲂу҆слы́шитъ и҆ да и҆зведе́тъ ѿ поги́бели живо́тъ на́шъ: да хо́димъ кі́йждо досто́йнѡ зва́нїѧ на́шегѡ, въ не́мже зва́ни бы́хомъ, и҆ да бꙋ́детъ землѧ̀ на́ша землѧ̀ добра̀, и҆ всѝ живꙋ́щїи на не́й ро́дъ и҆збра́нъ, ца́рское свѧще́нїе, ꙗ҆зы́къ свѧ́тъ, лю́дїе ѡ҆бновле́нїѧ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.