Православный календарь
Размер шрифта:

Ака́ѳістъ

А҆ка́ѳїстъ ст҃и́телю и҆ чꙋдотво́рцꙋ митрофа́нꙋ, пе́рвомꙋ є҆пі́скопꙋ воро́нежскомꙋ

Свт. Митрофана, еп. Воронежского (обрет. мощ.) (1832) 20 августа 2026

Конда́къ а҃

И҆збра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, многоцѣле́бный и҆сто́чниче и҆ моли́твенниче ѡ҆ дꙋша́хъ на́шихъ, ст҃и́телю ѻ҆́тче митрофа́не, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ зовꙋ́щихъ:

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

І҆́косъ а҃

А҆́гг҃лъ земны́й и҆ человѣ́къ нбⷭ҇ный бы́лъ є҆сѝ, ст҃и́телю ѻ҆́тче митрофа́не: впери́въ бо ᲂу҆́мъ въ бжⷭ҇твєннаѧ, вре́мєннаѧ и҆ земна̑ѧ пренебре́глъ є҆сѝ: тѣ́мже и҆ всели́сѧ въ тѧ̀ прест҃ы́й дх҃ъ, є҆гѡ́же бл҃года́тїю свѣ́тлѡ ᲂу҆кра́шенъ є҆сѝ. Сегѡ̀ ра́ди тебѣ̀, на нб҃сѝ и҆ на землѝ просла́вленномꙋ, вопїе́мъ си́це:

Ра́дꙋйсѧ, ꙗ҆́кѡ чистото́ю и҆ ст҃ы́нею а҆́гг҃лѡмъ ᲂу҆подо́билсѧ є҆сѝ: ра́дꙋйсѧ, ꙗ҆́кѡ посто́мъ и҆ бдѣ́нїемъ безстра́стїѧ дости́глъ є҆сѝ.

Ра́дꙋйсѧ, свѣти́льниче бжⷭ҇твеннагѡ свѣ́та: ра́дꙋйсѧ, моли́твъ бл҃гово́нное кади́ло.

Ра́дꙋйсѧ, вѣ́рныхъ непрело́жное ᲂу҆твержде́нїе: ра́дꙋйсѧ, невѣ́рныхъ бг҃омꙋ́дренное ѡ҆бличе́нїе.

Ра́дꙋйсѧ, хрⷭ҇тїа́нъ непосты́дное прибѣ́жище: ра́дꙋйсѧ, благоче́стїѧ стѣно̀ неѡбори́маѧ.

Ра́дꙋйсѧ, крѣ́пкое корми́ло цр҃кве хрⷭ҇то́вы: ра́дꙋйсѧ, непоколеби́мый сто́лпе правосла́вїѧ.

Ра́дꙋйсѧ, а҆пⷭ҇льскихъ преда́нїй вѣ́рный храни́телю: ра́дꙋйсѧ, та̑инъ бж҃їихъ и҆́стинный строи́телю.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ в҃

Ви́дѧще ѿ ст҃ы́хъ моще́й твои́хъ приснотекꙋ́щїй и҆сто́чникъ и҆сцѣле́нїй, благоговѣ́нїѧ и҆ ра́дости и҆спо́лнени, благодари́мъ бг҃а, ди́внѡ прославлѧ́ющаго ст҃ы̑ѧ своѧ̑, вопїю́ще є҆мꙋ̀: А҆ллилꙋ́їа.

І҆́косъ в҃

Ра́зꙋмомъ просвѣще́ннымъ свы́ше, вразꙋмлѧ́ѧ заблꙋ́ждшихъ, побо́рникъ бы́лъ є҆сѝ и҆́стинныѧ хрⷭ҇то́вы цр҃кве, є҆гда̀ въ ца́рствꙋющемъ гра́дѣ москвѣ̀ сꙋемꙋ́дреннїи лжеꙋчи́тели на собо́рѣ ст҃и́тельскомъ ѿверзо́ша нечєсти́ваѧ ᲂу҆ста̀ своѧ̑ на є҆ѧ̀ хꙋле́нїе. Мы́ же, ѿ мы́сленныхъ волкѡ́въ и҆зба́вльшесѧ, вѣ́рнѡ взыва́емъ тѝ:

Ра́дꙋйсѧ, цѣвни́це дх҃а ст҃а́гѡ, брѧца́ющаѧ сла́вꙋ бж҃їю во спасе́нїе человѣ́кѡмъ: ра́дꙋйсѧ, гро́ме, сокрꙋша́ѧй є҆реті́ческое ѕлоче́стїе.

Ра́дꙋйсѧ, мо́лнїе, попалѧ́ющаѧ пле́велы невѣ́рїѧ: ра́дꙋйсѧ, ꙗ҆́сное зерца́ло а҆пⷭ҇льскихъ преда́нїй.

Ра́дꙋйсѧ, немо́лчный бл҃говѣ́стниче велѣ́нїй хрⷭ҇то́выхъ: ра́дꙋйсѧ, вѣ́рный наста́вниче бг҃омꙋ́дрїѧ.

Ра́дꙋйсѧ, мона́шествꙋющихъ сла́во: ра́дꙋйсѧ, а҆рхїере́ѡвъ бжⷭ҇твенное ᲂу҆добре́нїе.

Ра́дꙋйсѧ, златоза́рное свѣти́ло, просвѣща́ющее зе́млю рꙋ́сскꙋю: ра́дꙋйсѧ, наде́жный хода́таю на́мъ црⷭ҇твїѧ нбⷭ҇нагѡ.

Ра́дꙋйсѧ, ꙗ҆́кѡ твои́мъ къ бг҃ꙋ моле́нїемъ ѿ а҆́да свобожда́емсѧ: ра́дꙋйсѧ, ꙗ҆́кѡ твои́мъ предста́тельствомъ ра́йскїѧ жи́зни сподоблѧ́емсѧ.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ г҃

Си́лѣ вы́шнѧгѡ чꙋдодѣ́йствꙋющей, никто́же притека́ѧй къ тебѣ̀, пребл҃же́нне ѻ҆́тче, ѿхо́дитъ то́щь: недꙋ́гꙋющымъ бо ꙗ҆ви́лсѧ є҆сѝ и҆сцѣле́нїе, слѣпы̑мъ прозрѣ́нїе, хромы̑мъ ᲂу҆твержде́нїе, и҆ всѝ благовѣ́рнїи лю́дїе ско́раго тѧ̀ помо́щника стѧжа́вше, ра́достнѡ бг҃ꙋ воспѣва́ютъ: А҆ллилꙋ́їа.

І҆́косъ г҃

И҆мѣ́ѧй въ се́рдцѣ свое́мъ ѻ҆́гнь любвѐ бжⷭ҇твенныѧ, спасе́нїѧ ра́ди дꙋ́шъ человѣ́ческихъ па́стырски подвиза́лсѧ є҆сѝ, бг҃омꙋ́дре, проти́вꙋ ко́зней дїа́вольскихъ, и҆ побѣди́тельнымъ ѡ҆рꙋ́жїемъ крⷭ҇та̀ разсѣка́лъ є҆сѝ сѣ́ти лꙋка́вагѡ, ꙗ҆́кѡ паꙋчи́нꙋ. Тѣ́мже прїимѝ ѿ на́съ пѣ́снь сїю̀:

Ра́дꙋйсѧ, ра́бе бж҃їй, бл҃гі́й и҆ вѣ́рный: ра́дꙋйсѧ, досто́йный дѣ́лателю вертогра́да хрⷭ҇то́ва.

Ра́дꙋйсѧ, ᲂу҆чи́телю смире́нїѧ и҆ цѣломꙋ́дрїѧ: ра́дꙋйсѧ, ѡ҆́бразе кро́тости и҆ послꙋша́нїѧ.

Ра́дꙋйсѧ, мꙋ́жꙋ жела́нїй: ра́дꙋйсѧ, проповѣ́дниче чꙋде́съ бж҃їихъ.

Ра́дꙋйсѧ, наста́вниче дѣ́лъ до́брыхъ: ра́дꙋйсѧ, тве́рдое ѡ҆гражде́нїе хрⷭ҇то́вы цр҃кве.

Ра́дꙋйсѧ, ѻ҆гневи́дный сто́лпе, наставлѧ́ѧй на пꙋ́ть спасе́нїѧ: ра́дꙋйсѧ, свѣтоза́рный свѣти́льниче, вѣ́рныѧ просвѣща́ѧй.

Ра́дꙋйсѧ, неисчерпа́емый сосꙋ́де благода́ти хрⷭ҇то́вы: ра́дꙋйсѧ, чи́стое прїѧ́телище дх҃а ст҃а́гѡ.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ д҃

Бꙋ́рю мїрска́гѡ житїѧ̀ и҆ тѧжелонѡ́сныѧ страсте́й вѡ́лны преше́дъ, ѡ҆брѣ́лъ є҆сѝ ти́хое приста́нище, и҆ въ пꙋсты́ню всели́всѧ, нелѣ́ностнѡ порабо́талъ є҆сѝ хрⷭ҇тꙋ̀ во мно́зѣ долготерпѣ́нїи. Ѿню́дꙋже рꙋководи́лъ є҆сѝ въ црⷭ҇твїе бж҃їе и҆ дꙋхѡ́внаѧ ча̑да своѧ̑, наꙋчи́въ и҆̀хъ є҆ди́ными ᲂу҆сты̑ и҆ є҆ди́нымъ се́рдцемъ пѣ́ти бг҃ꙋ: А҆ллилꙋ́їа.

І҆́косъ д҃

Слы́шаще ди̑вныѧ ѡ҆ бз҃ѣ трꙋды̀ твоѧ̑, ст҃и́телю ѻ҆́тче митрофа́не, прихожда́хꙋ къ тебѣ̀ и҆здале́ча жа́ждꙋщїи глаго́лѡвъ живота̀ вѣ́чнагѡ: поне́же ты̀ ᲂу҆чи́лъ и҆ твори́лъ є҆сѝ, наставлѧ́лъ сло́вомъ и҆ житїе́мъ свои́мъ. Сегѡ̀ ра́ди любо́вїю вопїе́мъ тѝ:

Ра́дꙋйсѧ, а҆пⷭ҇лѡвъ прее́мниче: ра́дꙋйсѧ, ст҃и́телей сопресто́льниче.

Ра́дꙋйсѧ, прпⷣбныхъ собесѣ́дниче: ра́дꙋйсѧ, првⷣныхъ ᲂу҆краше́нїе.

Ра́дꙋйсѧ, вѣ́нче воздержа́нїѧ: ра́дꙋйсѧ, бл҃госѣнноли́ственное дре́во, пото́ками ра́йскими воспита́нное.

Ра́дꙋйсѧ, безпомо́щныхъ сп҃си́тельное призрѣ́нїе: ра́дꙋйсѧ, цвѣ́те нетлѣ́нїѧ.

Ра́дꙋйсѧ, ꙗ҆́кѡ ѿчꙋжде́нїемъ вре́менныхъ бла̑гъ, стѧжа́лъ є҆сѝ бл҃же́нство нищеты̀ дꙋхо́вныѧ: ра́дꙋйсѧ, ꙗ҆́кѡ самово́льнымъ ѡ҆бнища́нїемъ ѡ҆брѣ́лъ є҆сѝ сокро́вище бла̑гъ вѣ́чныхъ.

Ра́дꙋйсѧ, ꙗ҆́кѡ во глꙋбинꙋ̀ смире́нїѧ прини́клъ є҆сѝ: ра́дꙋйсѧ, ꙗ҆́кѡ на высотꙋ̀ безстра́стїѧ возше́лъ є҆сѝ.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ є҃

Бг҃оте́чнѣй ѕвѣздѣ̀, пꙋтеводи́вшей дре́вле волхвѡ́въ къ првⷣномꙋ сл҃нцꙋ, подо́бенъ бы́лъ є҆сѝ, всехва́льне ѻ҆́тче, са́мъ восходѧ̀ бл҃года́тїю бж҃їею ѿ си́лы въ си́лꙋ, и҆ приводѧ̀ съ собо́ю ко хрⷭ҇тꙋ̀ бг҃ꙋ всѣ́хъ и҆́щꙋщихъ спасе́нїѧ. Тѣ́мже и҆ мы̀, немерца́ющимъ сїѧ́нїемъ сла́вы твоеѧ̀ ѡ҆зарѧ́еми, согла́снѡ вопїе́мъ є҆мꙋ̀: А҆ллилꙋ́їа.

І҆́косъ є҃

Ви́дѣвше въ тебѣ̀ воро́нежстїи лю́дїе пе́рваго а҆рхїпа́стырѧ, ꙗ҆́кѡ а҆́гг҃ла, зна́менїе нбⷭ҇ныѧ бл҃года́ти носѧ́ща, возра́довашасѧ ра́достїю неизглаго́ланною: ты́ же, до́брѣ внима́ѧ себѣ̀ и҆ всемꙋ̀ ста́дꙋ, въ не́мже тѧ̀ дх҃ъ ст҃ы́й поста́ви є҆пⷭ҇копа, па́слъ є҆сѝ ᲂу҆се́рднѡ цр҃ковь гдⷭ҇а и҆ бг҃а, ꙗ҆́кѡ сло́во возда́ти хотѧ̀. Сегѡ̀ ра́ди ᲂу҆блажа́емъ тѧ̀, ѻ҆́тче митрофа́не, зовꙋ́ще:

Ра́дꙋйсѧ, человѣ́че бж҃їй, преподо́бїемъ а҆́ки по́ѧсомъ златы́мъ препоѧ́санный: ра́дꙋйсѧ, дрꙋ́же хрⷭ҇то́въ, ст҃и́тельствомъ а҆́ки би́серомъ драги́мъ преꙋкра́шенный.

Ра́дꙋйсѧ, во́ине хрⷭ҇то́въ непобѣди́мый: ра́дꙋйсѧ, стра́же до́ма бж҃їѧ неꙋсы́пный.

Ра́дꙋйсѧ, восхождє́нїѧ въ се́рдцѣ свое́мъ къ нб҃сѝ положи́вый: ра́дꙋйсѧ, словє́сныѧ ѻ҆́вцы хрⷭ҇то́вы на живоно́сныхъ па́житѧхъ воспита́вый.

Ра́дꙋйсѧ, ꙗ҆́кѡ не попꙋсти́лъ є҆сѝ дꙋшетлѣ́нномꙋ ѕвѣ́рю расхи́тити ста́до твоѐ: ра́дꙋйсѧ, ꙗ҆́кѡ ѿ нбⷭ҇нагѡ пастыренача́льника првⷣное воздаѧ́нїе прїѧ́лъ є҆сѝ.

Ра́дꙋйсѧ, возлюби́вый благолѣ́пїе до́мꙋ бж҃їѧ: ра́дꙋйсѧ, въ само́мъ себѣ̀ хра́мъ трїѷпоста́сномꙋ бжⷭ҇твꙋ̀ ᲂу҆гото́вавый.

Ра́дꙋйсѧ, ꙗ҆́кѡ во ᲂу҆мерщвле́нномъ тѣлесѝ ри́зою нетлѣ́нїѧ ѡ҆дѣ́ѧнъ є҆сѝ: ра́дꙋйсѧ, ꙗ҆́кѡ и҆з̾ гро́ба заре́ю безсме́ртїѧ на́съ ѡ҆сїѧва́еши.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ ѕ҃

Слове́съ є҆ѵⷢ҇льскихъ, є҆́же не скрыва́ти себѣ̀ сокро́вища на землѝ, вѣ́рный блюсти́тель показа́лсѧ є҆сѝ, всебл҃же́нне митрофа́не, є҆гда̀ достоѧ́нїе своѐ мꙋ́дрѣ расточи́лъ є҆сѝ, снабдѣва́ѧ ᲂу҆бо́гихъ, и҆ посо́бствꙋѧ бл҃говѣ́рномꙋ і҆мпера́торꙋ петрꙋ̀, въ соѡрꙋже́нїи корабле́й на побѣжде́нїе невѣ́рныхъ а҆га́рѧнъ, не вѣ́дꙋщихъ пѣ́ти: А҆ллилꙋ́їа.

І҆́косъ ѕ҃

Возсїѧ̀ ца́рствꙋ правосла́вномꙋ бл҃готво́рный свѣ́тъ вели́кихъ добродѣ́телей твои́хъ, ст҃и́телю ѻ҆́тче митрофа́не, ѡ҆ ни́хже бл҃годарѧ́ще ѻ҆ц҃а̀ нбⷭ҇наго, къ тебѣ̀, ꙗ҆́кѡ къ при́сномꙋ ѡ҆ на́съ моли́твенникꙋ, взыва́емъ си́це:

Ра́дꙋйсѧ, наста́вниче цѣломꙋ́дрїѧ: ра́дꙋйсѧ, смире́нїѧ хрⷭ҇то́ва и҆́стинный подража́телю.

Ра́дꙋйсѧ, ѻ҆лтарѧ̀ гдⷭ҇нѧ бл҃гоговѣ́йный слꙋжи́телю: ра́дꙋйсѧ, ст҃и́телей ᲂу҆краше́нїе.

Ра́дꙋйсѧ, и҆́ноческаго равноа́гг҃льнагѡ житїѧ̀ ревни́телю: ра́дꙋйсѧ, безмо́лвїѧ дре́внихъ бг҃оно́сныхъ ѻ҆ц҃ъ подража́телю.

Ра́дꙋйсѧ, млⷭ҇ти стрꙋѐ неизсѧка́емаѧ: ра́дꙋйсѧ, бл҃гоꙋтро́бїѧ храни́лище неѡскꙋ́дное.

Ра́дꙋйсѧ, си́рыхъ бл҃гонаде́жное приста́нище: ра́дꙋйсѧ, вдови́цъ ско́рое застꙋпле́нїе.

Ра́дꙋйсѧ, мно́жество дꙋ́шъ ᲂу҆невѣ́стивый хрⷭ҇тꙋ̀: ра́дꙋйсѧ, кꙋ́пнѡ съ ни́ми пребыва́ѧй въ ра́дости гдⷭ҇а твоегѡ̀.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ з҃

Хотѧ́щꙋ нѣ́когда благовѣ́рномꙋ і҆мпера́торꙋ петрꙋ̀ бесѣ́довати съ тобо́ю, призва́нъ бы́лъ є҆сѝ во дво́ръ ца́рскїй: є҆гда́ же внеза́пꙋ ᲂу҆зрѣ́лъ ѡ҆́крестъ є҆гѡ̀ и҆зваѧ̑нїѧ ꙗ҆зы́чєскаѧ, а҆́бїе возврати́лсѧ є҆сѝ вспѧ́ть, не ᲂу҆боѧ́всѧ преще́нїѧ царе́ва, и҆ гото́въ бы́лъ є҆сѝ дꙋ́шꙋ свою̀ положи́ти па́че, не́же растли́ти мы́слєнныѧ ѻ҆́чи се́рдца своегѡ̀ неподо́бнымъ видѣ́нїемъ, наꙋча́ѧ вѣ́рныхъ є҆ди́номꙋ живо́мꙋ бг҃ꙋ пѣ́ти: А҆ллилꙋ́їа.

І҆́косъ з҃

Но́ваго тѧ̀ по благоче́стїи ревни́телѧ позна́въ бл҃говѣ́рный ца́рь, и҆ ви́дѧ небоѧ́зненное твоѐ на сме́рть и҆зволе́нїе, повелѣ̀ сꙋ́єтнаѧ и҆зваѧ̑нїѧ низри́нꙋти. Мы́ же ст҃о́мꙋ дерзнове́нїю твоемꙋ̀ чꙋдѧ́щесѧ, вопїе́мъ:

Ра́дꙋйсѧ, непрекло́нный и҆сповѣ́дниче правосла́вїѧ: ра́дꙋйсѧ, ре́вностный защи́тниче благоче́стїѧ.

Ра́дꙋйсѧ, сщ҃еннотаи́нниче бл҃года́ти: ра́дꙋйсѧ, велегла́сный проповѣ́дниче покаѧ́нїѧ.

Ра́дꙋйсѧ, а҆пⷭ҇лѡвъ немѡ́лчнаѧ ᲂу҆ста̀: ра́дꙋйсѧ, цр҃кве непоколеби́мый сто́лпе.

Ра́дꙋйсѧ, па́стырю до́брый: ра́дꙋйсѧ, ꙗ҆́кѡ неприча́стенъ ꙗ҆ви́лсѧ є҆сѝ лицепрїѧ́тїю.

Ра́дꙋйсѧ, ꙗ҆́кѡ и҆́стинꙋ не ѡ҆бинꙋ́ѧсѧ свидѣ́тельствовалъ є҆сѝ: ра́дꙋйсѧ, ꙗ҆́кѡ твои́мъ посо́бїемъ сокрꙋша́ютсѧ кѡ́зни вра̑жїѧ.

Ра́дꙋйсѧ, ꙗ҆́кѡ всѣ́мъ вѣ́рнымъ воспомина́нїе твоѐ пресла́дко: ра́дꙋйсѧ, ꙗ҆́кѡ все́й цр҃кви хрⷭ҇то́вой и҆́мѧ твоѐ прече́стно.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ и҃

Стра́нное и҆ пресла́вное чꙋ́до благода́ти нбⷭ҇ныѧ ꙗ҆влѧ́етсѧ ны́нѣ во ѻ҆́чїю всѣ́хъ вѣ́рныхъ: долготерпѣли́вый и҆ многомлⷭ҇тивый гдⷭ҇ь не прогнѣ́валсѧ на ны̀ до конца̀ за беззакѡ́нїѧ на̑ша, но помѧнꙋ́въ щедрѡ́ты своѧ̑, дарова̀ на́мъ тебѐ, досточꙋ́дне ѻ҆́тче, застꙋ́пника и҆зрѧ́дна, та́кѡ вознесѐ ро́гъ спасе́нїѧ на́шегѡ, да вы́нꙋ пое́мъ є҆мꙋ̀: А҆ллилꙋ́їа.

І҆́косъ и҃

Ве́сь є҆сѝ въ вы́шнихъ, но и҆ ни́жнихъ не ѡ҆ставлѧ́еши, ст҃и́телю ѻ҆́тче митрофа́не, при́снѡ со хрⷭ҇то́мъ ца́рствꙋеши, и҆ ѡ҆ на́съ грѣ́шныхъ моли́твы къ немꙋ̀ возсыла́еши: не то́чїю бо припа́дающихъ къ цѣльбонѡ́снымъ моща́мъ твои̑мъ, но и҆ дале́че ѿстоѧ́щихъ, призыва́ющихъ же всечⷭ҇тно́е и҆́мѧ твоѐ, предста́тельствомъ твои́мъ соблюда́еши ѿ всѧ́кагѡ ѕла̀. Тѣ́мже во ᲂу҆миле́нїи зове́мъ тѝ:

Ра́дꙋйсѧ, прибѣ́жище на́ше во всѣ́хъ ско́рбехъ: ра́дꙋйсѧ, ско́рый помо́щниче всѣ́хъ въ бѣда́хъ сꙋ́щихъ.

Ра́дꙋйсѧ, цѣли́телю болѣ́зней дꙋше́вныхъ вкꙋ́пѣ и҆ тѣле́сныхъ: ра́дꙋйсѧ, на неви̑димыѧ врагѝ на́шѧ си́льный побо́рниче.

Ра́дꙋйсѧ, посѣти́телю въ не́мощи лежа́щихъ: ра́дꙋйсѧ, ᲂу҆тѣ́шителю въ бѣда́хъ сꙋ́щихъ.

Ра́дꙋйсѧ, ꙗ҆́кѡ тобо́ю престае́тъ рыда́нїе: ра́дꙋйсѧ, ꙗ҆́кѡ тобо́ю подае́тсѧ ра́дость.

Ра́дꙋйсѧ, ꙗ҆́кѡ хрⷭ҇тꙋ̀ до́блественнѡ послѣ́довалъ є҆сѝ: ра́дꙋйсѧ, ꙗ҆́кѡ сладча́йшемꙋ і҆и҃сꙋ до конца̀ послꙋжи́лъ є҆сѝ.

Ра́дꙋйсѧ, ꙗ҆́кѡ наслажда́ешисѧ лицезрѣ́нїѧ бж҃їѧ: ра́дꙋйсѧ, ꙗ҆́кѡ сподо́билсѧ є҆сѝ зрѣ́ти невече́рнїй де́нь црⷭ҇твїѧ є҆гѡ̀.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ ѳ҃

Всѧ̑кїѧ скѡ́рби и҆ трꙋды̀ до́блественнѡ претерпѣ́лъ є҆сѝ, ше́ствꙋѧ по пꙋтѝ спасе́нїѧ до масти́тыѧ ста́рости, ѡ҆блече́нъ во всеѡрꙋ́жїе бж҃їе, во пло́ти а҆́ки безпло́тенъ, ᲂу҆мерщвлѧ́ѧ стра̑сти и҆ сокрꙋша́ѧ навѣ́ты мїродержи́телѧ тьмы̀ вѣ́ка сегѡ̀. Тѣ́мже небє́снымъ сопричи́сленъ си́ламъ, кꙋ́пнѡ съ ни́ми воспѣва́еши бг҃ꙋ: А҆ллилꙋ́їа.

І҆́косъ ѳ҃

Вѣті̑ѧ многовѣща́нныѧ недоꙋмѣ́ютъ и҆з̾ѡбрази́ти ѡ҆би́лїѧ любвѐ твоеѧ̀, є҆́юже, ѿходѧ̀ ко творцꙋ̀, преиспо́лненъ бы́лъ є҆сѝ къ ча́дѡмъ твои̑мъ ѡ҆ гдⷭ҇ѣ: восхотѣ́въ бо, и҆ по ѿше́ствїи свое́мъ, при́снѡ поꙋча́ти и҆̀хъ ꙗ҆́кѡ живы́й, завѣща́лъ є҆сѝ и҆̀мъ всѧ̑ потрє́бнаѧ ко спасе́нїю. Сегѡ̀ ра́ди и҆з̾ глꙋбины̀ серде́цъ вопїе́мъ тѝ:

Ра́дꙋйсѧ, благоче́стнѡ тече́нїе сконча́вый: ра́дꙋйсѧ, вѣ́рꙋ соблюды́й всецѣ́лꙋ.

Ра́дꙋйсѧ, ѡ҆рꙋ́жїемъ бл҃говоле́нїѧ бж҃їѧ вѣнча́нный на землѝ: ра́дꙋйсѧ, вѣнце́мъ нетлѣ́нїѧ ᲂу҆кра́шенный на нб҃сѝ.

Ра́дꙋйсѧ, до́лꙋ вели́чїемъ чꙋде́съ блиста́ющїй: ра́дꙋйсѧ, горѣ̀ лꙋча́ми трисо́лнечнагѡ свѣ́та ѡ҆сїѧва́емый.

Ра́дꙋйсѧ, ꙗ҆́кѡ въ пресвѣ́тлыхъ ра́йскихъ ѡ҆би́телехъ вселѧ́ешисѧ: ра́дꙋйсѧ, ꙗ҆́кѡ лице́мъ къ лицꙋ̀ бжⷭ҇твеннагѡ свѣ́та причаща́ешисѧ.

Ра́дꙋйсѧ, ꙗ҆́кѡ съ нбⷭ҇ныхъ высо́тъ на мольбы̑ на́шѧ призира́еши: ра́дꙋйсѧ, ꙗ҆́кѡ въ со́нїѧхъ и҆ видѣ́нїѧхъ во бла́го на́мъ ꙗ҆влѧ́ешисѧ.

Ра́дꙋйсѧ, ꙗ҆́кѡ моли́твами твои́ми ѿ вѣ́чныѧ сме́рти свобожда́емсѧ: ра́дꙋйсѧ, ꙗ҆́кѡ предста́тельствомъ твои́мъ безконе́чныѧ жи́зни сподоблѧ́емсѧ.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ і҃

И҆́же всѣ́мъ человѣ́кѡмъ хотѧ́й спасти́сѧ и҆ въ ра́зꙋмъ и҆́стины прїитѝ, гдⷭ҇ь и҆ бг҃ъ на́шъ і҆и҃съ хрⷭ҇то́съ ꙗ҆ви́лъ на́мъ нетлѣ́нное тѣ́ло твоѐ на землѝ, ꙗ҆́кѡ живоно́снꙋю кꙋпѣ́ль, врачꙋ́ющꙋю всѧ́кꙋ болѣ́знь и҆ всѧ́кꙋ ꙗ҆́зю въ лю́дехъ. Тѣ́мже благода́рственнѡ вопїе́мъ є҆мꙋ̀: А҆ллилꙋ́їа.

І҆́косъ і҃

Стѣна̀ є҆сѝ спасе́нїѧ прибѣга́ющымъ къ тебѣ̀, ст҃и́телю митрофа́не, и҆ въ быва́емыхъ ѿ тебє̀ зна́менїихъ, и҆сповѣ́дающихъ вели́чїе бж҃їе. Сегѡ̀ ра́ди, ᲂу҆ще́дрени твои́мъ чꙋдодѣ́йственнымъ ѡ҆ на́съ ко хрⷭ҇тꙋ̀ бг҃ꙋ хода́тайствомъ, вопїе́мъ тѝ:

Ра́дꙋйсѧ, царе́й бл҃гочести́выхъ побо́рниче: ра́дꙋйсѧ, а҆рхїере́євъ правосла́вныхъ ᲂу҆крѣпле́нїе.

Ра́дꙋйсѧ, ца́рства правосла́внагѡ защи́тниче: ра́дꙋйсѧ, цр҃кви ст҃ѣ́й ᲂу҆твержде́нїе.

Ра́дꙋйсѧ, пре́жде сме́рти ᲂу҆мертви́вый пло́ть свою̀: ра́дꙋйсѧ, предвкꙋси́вый жи́знь вѣ́чнꙋю, пре́жде вни́тїѧ въ селє́нїѧ ра̑йскаѧ.

Ра́дꙋйсѧ, ᲂу҆ме́рый мі́рꙋ пре́жде кончи́ны твоеѧ̀: ра́дꙋйсѧ, воскресы́й дꙋ́хомъ во хрⷭ҇тѣ̀ пре́жде ᲂу҆спе́нїѧ твоегѡ̀.

Ра́дꙋйсѧ, ꙗ҆́кѡ ѿ ѡ҆би́тели земны́ѧ во ѡ҆би́тель нбⷭ҇нꙋю пресели́лсѧ є҆сѝ: ра́дꙋйсѧ, ꙗ҆́кѡ ѿ ѡ҆би́тели нбⷭ҇ныѧ во ѡ҆би́тєли земны̑ѧ благотворѧ̀ нисхо́диши.

Ра́дꙋйсѧ, ꙗ҆́кѡ и҆ по ѿше́ствїи твое́мъ съ на́ми пребыва́еши: ра́дꙋйсѧ, ꙗ҆́кѡ и҆ по ᲂу҆ме́ртвїи твое́мъ ᲂу҆мерщвлє́нныѧ грѣхмѝ дꙋ́шы моли́твами твои́ми ѡ҆живлѧ́еши.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ а҃і

Пѣ́нїе приноси́мое ны́нѣ, а҆́ще бы и҆ превы́ше человѣ́ческагѡ бы́ло, не довлѣ́ло бы къ славосло́вїю бг҃а, дарова́вшагѡ тебѣ̀ бл҃года́ть и҆сцѣле́нїй. Сегѡ̀ ра́ди недоꙋмѣ́юще благохвали́ти є҆го̀ по достоѧ́нїю, смиренномꙋ́дреннѡ вопїе́мъ: А҆ллилꙋ́їа.

І҆́косъ а҃і

Свѣтопода́тельна свѣти́льника, просвѣща́ющаго дꙋ́шы на́шѧ вѣ́рою, ви́димъ тебѐ, пребл҃же́нне ѻ҆́тче, пред̾ прⷭ҇то́ломъ бж҃їимъ стоѧ́ща, и҆ твои́мъ блиста́нїемъ ѡ҆зарѧ́еми, зове́мъ тѝ такѡва́ѧ:

Ра́дꙋйсѧ, па́стырю преди́вный: ра́дꙋйсѧ, ᲂу҆чи́телю премꙋ́дрый.

Ра́дꙋйсѧ, сто́лпе вѣ́ры непоколеби́мый: ра́дꙋйсѧ, насади́телю бл҃ги́хъ.

Ра́дꙋйсѧ, чистоты̀ селе́нїе: ра́дꙋйсѧ, печа́льныхъ ᲂу҆тѣше́нїе.

Ра́дꙋйсѧ, си́рыхъ пита́телю: ра́дꙋйсѧ, ѡ҆би́димыхъ предста́телю.

Ра́дꙋйсѧ, премⷣрости бж҃їѧ прїѧ́телище: ра́дꙋйсѧ, и҆сто́чниче неизчерпа́емыѧ бл҃года́ти и҆сцѣле́нїй.

Ра́дꙋйсѧ, провозвѣ́стниче бжⷭ҇твенныхъ велѣ́нїй: ра́дꙋйсѧ, сокро́вище млⷭ҇рдїѧ бж҃їѧ неистощи́мое.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ в҃і

Бл҃года́ть, свы́ше тѝ да́ннꙋю, позна́вше, бл҃гоговѣ́йнѡ лобыза́емъ ст҃олѣ́пное и҆з̾ѡбраже́нїе всечестна́гѡ лица̀ твоегѡ̀, є҆́же бл҃говоли́лъ є҆сѝ ди́внѡ ꙗ҆ви́ти на́мъ. Тѣ́мже бл҃года́рственнѡ вопїе́мъ хрⷭ҇тꙋ̀ бг҃ꙋ на́шемꙋ: А҆ллилꙋ́їа.

І҆́косъ в҃і

Пою́ще твоѐ къ бг҃ꙋ ѿше́ствїе, ст҃и́телю митрофа́не, почита́емъ сщ҃е́ннꙋю па́мѧть твою̀, велича́емъ ре́вность по бз҃ѣ, хва́лимъ долготерпѣ́нїе, сла́вимъ неѕло́бїе, и҆ ᲂу҆блажа́емъ кончи́нꙋ твою̀: на сме́ртнѣмъ бо ѻ҆дрѣ̀ возлежа̀, жела́нїемъ возжела́лъ ѡ҆блещи́сѧ въ вели́кїй а҆́гг҃льскїй ѡ҆́бразъ, нарече́нъ бы́лъ мака́рїемъ, бл҃же́нства тезоимени́тымъ, блаже́нъ бы́въ вои́стиннꙋ, ꙗ҆́кѡ црⷭ҇твїе нбⷭ҇ное наслѣ́довалъ є҆сѝ. Тѣ́мже молѧ́щесѧ ᲂу҆се́рднѡ, ѡ҆ є҆́же сподо́битисѧ и҆ на́мъ неѡсꙋжде́ннѡ предста́ти на стра́шное сꙋди́ще хрⷭ҇то́во, взыва́емъ тѝ:

Ра́дꙋйсѧ, ᲂу҆ прⷭ҇то́ла бж҃їѧ те́плый ѡ҆ на́съ предста́телю: ра́дꙋйсѧ, мꙋ́жꙋ жела́нїй, просла́вившїй бг҃а въ тѣлесѝ и҆ въ дꙋшѣ̀ свое́й.

Ра́дꙋйсѧ, добропобѣ́дный во́ине цр҃ѧ̀ нбⷭ҇нагѡ: ра́дꙋйсѧ, вождю̀ премꙋ́дрый ра́тꙋющымъ проти́вꙋ си́лъ а҆́довыхъ.

Ра́дꙋйсѧ, ꙗ҆́кѡ съ горѧ́щимъ свѣти́льникомъ срѣ́тилъ є҆сѝ хрⷭ҇та̀: ра́дꙋйсѧ, ꙗ҆́кѡ ѿ негѡ̀ бл҃года́ть и҆сцѣле́нїй прїѧ́лъ є҆сѝ.

Ра́дꙋйсѧ, ꙗ҆́кѡ бл҃говоле́нїемъ прест҃ы́ѧ бцⷣы возвели́ченъ є҆сѝ: ра́дꙋйсѧ, ꙗ҆́кѡ во свѣ́тлостехъ ст҃ы́хъ пребыва́еши.

Ра́дꙋйсѧ, ꙗ҆́кѡ со прⷪ҇рѡ́ки и҆ а҆пⷭ҇тѡлы ликовствꙋ́еши: ра́дꙋйсѧ, ꙗ҆́кѡ со ст҃и́тєли и҆ и҆ мч҃ники просла́вленъ є҆сѝ.

Ра́дꙋйсѧ, ꙗ҆́кѡ съ прпⷣбными и҆ првⷣными весели́шисѧ: ра́дꙋйсѧ, ꙗ҆́кѡ со всѣ́ми и҆збра́нными бж҃їими при́снѡ торжествꙋ́еши.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ г҃і

Ѽ вели́кїй и҆ пречꙋ́дный ѻ҆́тче митрофа́не, прїимѝ бл҃гоꙋтро́бнѡ сїѐ ма́лое моле́нїе на́ше, и҆ твои́мъ бл҃гопрїѧ́тнымъ хода́тайствомъ и҆зба́ви на́съ ѿ всѣ́хъ вра̑гъ ви́димыхъ и҆ неви́димыхъ, ѿ всѧ́кїѧ напа́сти и҆ ско́рби, ѿ напра́сныѧ сме́рти и҆ бꙋ́дꙋщїѧ мꙋ́ки, да сподо́бимсѧ съ тобо́ю и҆ со всѣ́ми ст҃ы́ми во вѣ́ки воспѣва́ти бг҃ꙋ сп҃си́телю на́шемꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ земны́й и҆ человѣ́къ нбⷭ҇ный бы́лъ є҆сѝ, ст҃и́телю ѻ҆́тче митрофа́не: впери́въ бо ᲂу҆́мъ въ бжⷭ҇твєннаѧ, вре́мєннаѧ и҆ земна̑ѧ пренебре́глъ є҆сѝ: тѣ́мже и҆ всели́сѧ въ тѧ̀ прест҃ы́й дх҃ъ, є҆гѡ́же бл҃года́тїю свѣ́тлѡ ᲂу҆кра́шенъ є҆сѝ. Сегѡ̀ ра́ди тебѣ̀, на нб҃сѝ и҆ на землѝ просла́вленномꙋ, вопїе́мъ си́це:

Ра́дꙋйсѧ, ꙗ҆́кѡ чистото́ю и҆ ст҃ы́нею а҆́гг҃лѡмъ ᲂу҆подо́билсѧ є҆сѝ: ра́дꙋйсѧ, ꙗ҆́кѡ посто́мъ и҆ бдѣ́нїемъ безстра́стїѧ дости́глъ є҆сѝ.

Ра́дꙋйсѧ, свѣти́льниче бжⷭ҇твеннагѡ свѣ́та: ра́дꙋйсѧ, моли́твъ бл҃гово́нное кади́ло.

Ра́дꙋйсѧ, вѣ́рныхъ непрело́жное ᲂу҆твержде́нїе: ра́дꙋйсѧ, невѣ́рныхъ бг҃омꙋ́дренное ѡ҆бличе́нїе.

Ра́дꙋйсѧ, хрⷭ҇тїа́нъ непосты́дное прибѣ́жище: ра́дꙋйсѧ, благоче́стїѧ стѣно̀ неѡбори́маѧ.

Ра́дꙋйсѧ, крѣ́пкое корми́ло цр҃кве хрⷭ҇то́вы: ра́дꙋйсѧ, непоколеби́мый сто́лпе правосла́вїѧ.

Ра́дꙋйсѧ, а҆пⷭ҇льскихъ преда́нїй вѣ́рный храни́телю: ра́дꙋйсѧ, та̑инъ бж҃їихъ и҆́стинный строи́телю.

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Конда́къ а҃

И҆збра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, многоцѣле́бный и҆сто́чниче и҆ моли́твенниче ѡ҆ дꙋша́хъ на́шихъ, ст҃и́телю ѻ҆́тче митрофа́не, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ зовꙋ́щихъ:

Ра́дꙋйсѧ, митрофа́не, вели́кїй и҆ пресла́вный чꙋдотво́рче.

Моли́твы

Ѽ ст҃и́телю ѻ҆́тче митрофа́не! сѐ мы̀ грѣ́шнїи, нетлѣ́нїемъ чⷭ҇тны́хъ моще́й твои́хъ и҆ мно́гими бл҃годѣѧ́ньми, чꙋде́снѡ содѣ́ѧнными и҆ содѣва́емыми тобо́ю, ᲂу҆вѣ́рившесѧ, и҆сповѣ́дꙋемъ, ꙗ҆́кѡ и҆́маши ве́лїю бл҃года́ть ᲂу҆ гдⷭ҇а бг҃а на́шегѡ, и҆ всесмире́ннѡ ко твоемꙋ̀ бл҃госе́рдїю припа́дающе, тебѣ̀ мо́лимсѧ си́це: молѝ ѡ҆ на́съ хрⷭ҇та̀ бг҃а на́шего, да низпо́слетъ всѣ́мъ чтꙋ́щымъ ст҃ꙋ́ю па́мѧть твою̀ и҆ ᲂу҆се́рднѡ къ тебѣ̀ прибѣга́ющымъ бога̑тыѧ млⷭ҇ти своѧ̑: да ᲂу҆тверди́тъ во ст҃ѣ́й свое́й правосла́внѣй цр҃кви живы́й дх҃ъ пра́выѧ вѣ́ры и҆ бл҃гоче́стїѧ, дх҃ъ вѣ́дѣнїѧ и҆ любвѐ, дх҃ъ ми́ра и҆ ра́дости ѡ҆ дꙋ́сѣ ст҃е, да всѧ̑ ча̑да є҆ѧ̀, чи̑ста сꙋ́ща ѿ мїрски́хъ и҆скꙋше́нїй и҆ плотски́хъ по́хотей и҆ ѕла́гѡ дѣ́йствїѧ ѕлы́хъ дꙋхѡ́въ, дх҃омъ и҆ и҆́стиною покланѧ́ютсѧ є҆мꙋ̀, и҆ ᲂу҆се́рднѡ ѡ҆ соблюде́нїи за́повѣдей є҆гѡ̀ ко сп҃се́нїю дꙋ́шъ свои́хъ да потща́тсѧ. Па́стырємъ є҆ѧ̀ да да́стъ гдⷭ҇ь ст҃ꙋ́ю ре́вность попече́нїѧ ѡ҆ сп҃се́нїи люде́й, во є҆́же невѣ́рꙋющыѧ просвѣти́ти, невѣ́дꙋщыѧ наста́вити, сомнѧ́щыѧсѧ вразꙋми́ти, ѿпа́дшыѧ ѿ правосла́вныѧ цр҃кве къ не́й возврати́ти, вѣ́рꙋющыѧ въ вѣ́рѣ соблюстѝ, грѣ́шныѧ на покаѧ́нїе подви́гнꙋти, ка́ющыѧсѧ ᲂу҆тѣ́шити и҆ во и҆справле́нїи жи́зни ᲂу҆тверди́ти, и҆ та́кѡ всѧ̑ лю́ди ко ᲂу҆гото́ванномꙋ вѣ́чномꙋ црⷭ҇твꙋ ст҃ы́хъ є҆гѡ̀ привестѝ. Оу҆молѝ гдⷭ҇а, ᲂу҆го́дниче хрⷭ҇то́въ: вѣ́рныхъ рабѡ́въ є҆гѡ̀, въ ско́рби и҆ печа́ли де́нь и҆ но́щь вопїю́щихъ къ немꙋ̀, многоболѣ́зный во́пль да ᲂу҆слы́шитъ и҆ да и҆зведе́тъ ѿ поги́бели живо́тъ на́шъ. Всѣ́мъ же въ держа́вѣ лю́демъ да да́рꙋетъ бл҃гі́й бг҃ъ на́шъ ми́ръ, тишинꙋ̀, безмѧте́жїе и҆ и҆з̾ѡби́лїе плодѡ́въ земны́хъ, па́че же ко и҆сполне́нїю за́повѣдей є҆гѡ̀ тща́нїе нелѣ́ностное: и҆ да и҆зба́витъ ца́рствꙋющыѧ гра́ды, гра́дъ се́й и҆ всѧ̑ и҆ны̑ѧ гра́ды и҆ вє́си, ѿ гла́да, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нныхъ, междоꙋсо́бныѧ бра́ни, смертоно́сныѧ ꙗ҆́звы и҆ ѿ всѧ́кагѡ ѕла̀. Є҆́й, ст҃и́телю бж҃їй, да ᲂу҆стро́иши мл҃твами твои́ми всѧ̑ бл҃га̑ѧ дꙋша́мъ и҆ тѣлесє́мъ на́шымъ: да и҆ мы̀ просла́вимъ въ дꙋша́хъ и҆ тѣлесѣ́хъ на́шихъ гдⷭ҇а и҆ бг҃а на́шего, і҆и҃са хрⷭ҇та̀, є҆мꙋ́же со ѻ҆ц҃е́мъ и҆ ст҃ы́мъ дх҃омъ сла́ва и҆ держа́ва во вѣ́ки вѣкѡ́въ. А҆ми́нь.

Ѽ всехва́льный ст҃и́телю хрⷭ҇то́въ и҆ чꙋдотво́рче митрофа́не! прїимѝ сїѐ ма́лое моле́нїе ѿ на́съ грѣ́шныхъ къ тебѣ̀ прибѣга́ющихъ, и҆ те́плымъ предста́тельствомъ ᲂу҆молѝ гдⷭ҇а и҆ бг҃а на́шего, і҆и҃са хрⷭ҇та̀, ꙗ҆́кѡ да призрѣ́въ на ны̀ млⷭ҇тивнѡ, пода́стъ на́мъ согрѣше́нїй на́шихъ во́льныхъ и҆ нево́льныхъ проще́нїе, и҆ по вели́цѣй свое́й млⷭ҇ти и҆зба́витъ на́съ ѿ бѣ́дъ, печа́лей, ско́рби и҆ болѣ́зней дꙋше́вныхъ и҆ тѣле́сныхъ, ѡ҆бдержа́щихъ на́съ: да пода́стъ землѝ плодоно́сїе, и҆ всѧ̑ на по́льзꙋ настоѧ́щагѡ житїѧ̀ на́шегѡ потрє́бнаѧ: да да́рꙋетъ на́мъ сконча́ти житїѐ сїѐ привре́менное въ покаѧ́нїи, и҆ да сподо́битъ на́съ, грѣ́шныхъ и҆ недосто́йныхъ, нбⷭ҇нагѡ црⷭ҇твїѧ своегѡ̀, во є҆́же со всѣ́ми ст҃ы́ми сла́вити є҆гѡ̀ безконе́чное милосе́рдїе, со безнача́льнымъ є҆гѡ̀ ѻ҆ц҃е́мъ, и҆ ст҃ы́мъ и҆ животворѧ́щимъ є҆гѡ̀ дх҃омъ, во вѣ́ки вѣкѡ́въ. А҆ми́нь.