Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ, въ че́сть і҆кѡ́ны є҆ѧ̀ и҆менꙋ́емой то́лгскаѧ.

Толгской иконы Божией Матери (1314) 21 августа 2026

Конда́къ а҃

Взбра́нной воево́дѣ, влⷣчцѣ на́шей бцⷣѣ, ѡ҆сѣни́вшей странꙋ̀ рѡссі́йскꙋю ѻ҆гнезра́чнымъ своеѧ̀ і҆кѡ́ны на то́лгѣ ꙗ҆вле́нїемъ, похва́льное возглаша́емъ пѣ́нїе: ты́ же, ѽ бг҃ома́ти, ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ бѣ́дъ и҆зба́ви на́съ, зовꙋ́щихъ:

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

І҆́косъ а҃

А҆́гг҃лъ земны́й и҆ человѣ́къ нбⷭ҇ный, ст҃и́тель хрⷭ҇то́въ трѵ́фѡнъ, свы́ше пред̾избра́нъ бы́сть послꙋжи́ти ст҃ы́ѧ і҆кѡ́ны твоеѧ̀ на то́лгѣ ꙗ҆вле́нїю, влⷣчце пребл҃га́ѧ: то́й бо, пꙋ́ть творѧ̀ ѿ бѣлое́зера по рѣцѣ̀ во́лгѣ, въ но́щи сто́лпъ ѻ҆́гненный ᲂу҆зрѣ̀ на бре́зѣ є҆ѧ̀ пꙋсты́ннѣмъ и҆, дости́гнꙋвъ мѣ́ста, тобо́ю и҆збра́ннагѡ, ви́дѣ ст҃ꙋ́ю і҆кѡ́нꙋ твою̀ на воздꙋ́сѣ стоѧ́щꙋю и҆ свѣ́томъ нбⷭ҇нымъ сїѧ́ющꙋю, къ не́йже моле́бнѡ припа́даѧ, со слеза́ми те́плыми си́це къ тебѣ̀ возглаша́ше:

Ра́дꙋйсѧ, свѣщѐ бг҃опрїе́мнаѧ, темнотꙋ̀ дꙋ́шъ на́шихъ ѡ҆зарѧ́ющаѧ: ра́дꙋйсѧ, зарѐ невече́рнѧѧ, мглꙋ̀ грѣхѡ́въ на́шихъ разгонѧ́ющаѧ.

Ра́дꙋйсѧ, чꙋ́днѡ прїѧ́вшаѧ хрⷭ҇та̀ бг҃а, ꙗ҆́кѡ ᲂу҆́гль горѧ́щїй съ нбⷭ҇нагѡ же́ртвенника: ра́дꙋйсѧ, кꙋпино̀ неѡпали́маѧ, законополо́жникомъ мѡѷсе́емъ предзри́маѧ.

Ра́дꙋйсѧ, сто́лпе ѻ҆́гненный, но́вагѡ і҆и҃лѧ пꙋтеводѧ́щїй: ра́дꙋйсѧ, ѡ҆́блаче росоно́сный, зно́й страсте́й на́шихъ ᲂу҆толѧ́ющїй.

Ра́дꙋйсѧ, предста́тельнице всемогꙋ́щаѧ, тꙋ́чи гнѣ́ва бж҃їѧ ѿ гла́въ на́шихъ ѿводѧ́щаѧ: ра́дꙋйсѧ, застꙋ́пнице ᲂу҆се́рднаѧ, ѿ поги́бели вѣ́чныѧ на́съ и҆збавлѧ́ющаѧ.

Ра́дꙋйсѧ, ѡ҆́бразъ тво́й честны́й въ зало́гъ сп҃се́нїѧ на́мъ дарова́вшаѧ: ра́дꙋйсѧ, ѻ҆гнезра́чнымъ ꙗ҆вле́нїемъ є҆гѡ̀ на то́лгѣ странꙋ̀ рѡссі́йскꙋю бл҃гослови́вшаѧ.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ в҃

Ви́дѧще то́ки чꙋде́съ и҆ и҆сцѣлє́нїй ѿ ст҃ы́ѧ і҆кѡ́ны твоеѧ̀, пренепоро́чнаѧ дв҃о, недоꙋмѣ́емъ пѣсносла́вити тѧ̀ по достоѧ́нїю: кі́й бо ѧ҆зы́къ человѣ́ческїй возмо́жетъ и҆зрещѝ вели́чїѧ твоѧ̀, ѽ ди́внаѧ пала́то влады́чнѧ; ѻ҆ба́че, любо́вїю твое́ю побѣжда́еми, дерза́емъ проповѣ́дати чꙋдеса̀ твоѧ̑, на то́лгѣ ꙗ҆влє́ннаѧ, и҆ хвале́бнѡ пѣ́ти всѣ́хъ творцꙋ̀: А҆ллилꙋ́їа.

І҆́косъ в҃

Разꙋмѣ́въ посѣще́нїе бж҃їе, чꙋ́дный ст҃и́тель со стра́хомъ сле́знѡ молѧ́шесѧ пред̾ ѻ҆гнезра́чною твое́ю і҆кѡ́ною, бг҃ома́ти пречⷭ҇таѧ, и҆ смотрѣ́нїемъ бж҃їимъ ѡ҆ста́ви же́злъ сво́й ст҃и́тельскїй на ѻ҆́номъ бре́зѣ, и҆дѣ́же молѧ́шесѧ: на ᲂу҆́трїе же спꙋ́тницы ст҃и́телѧ, и҆́щꙋще жезла̀ є҆гѡ̀, ѡ҆брѣто́ша вмѣ́стѣ съ ни́мъ та́мѡ твою̀ нб҃оѧвле́ннꙋю і҆кѡ́нꙋ, на землѝ средѝ древе́съ стоѧ́щꙋю: и҆ та́кѡ всѣ̑мъ ꙗ҆вле́нъ бы́сть зало́гъ бж҃їѧ блгⷣти, странѣ̀ рѡссі́йстѣй свы́ше дарова́нный бл҃говоле́нїемъ вседержи́телѧ, внꙋша́ющагѡ на́мъ хвале́бнѡ вопи́ти къ тебѣ̀:

Ра́дꙋйсѧ, дѣ́вства цвѣ́те неꙋвѧда́емый и҆ бл҃гово́нный: ра́дꙋйсѧ, бѣлоснѣ́жный крі́не, росо́ю ст҃а́гѡ дх҃а напое́нный.

Ра́дꙋйсѧ, мт҃и бг҃а вы́шнѧгѡ, млⷭ҇рдїемъ твои́мъ и҆ ни́жнихъ не ѡ҆ставлѧ́ющаѧ: ра́дꙋйсѧ, цр҃и́це нб҃сѐ и҆ землѝ, є҆́йже всѧ̑ стїхі́и покорѧ́ютсѧ.

Ра́дꙋйсѧ, мо́сте бжⷭ҇твенный, и҆́мже вѣ́рнїи бл҃гонаде́жнѡ прехо́дѧтъ мо́рѧ жите́йскагѡ лю́тꙋю пꙋчи́нꙋ: ра́дꙋйсѧ, пꙋтеводи́тельнице бл҃га́ѧ, на стезѝ сп҃си́тельныѧ на́съ наставлѧ́ющаѧ.

Ра́дꙋйсѧ, гра́де цр҃ѧ̀ вели́кагѡ, въ не́мъ же стра́нники земны̑ѧ ᲂу҆бѣ́жище бл҃готи́шное ѡ҆брѣта́ютъ: ра́дꙋйсѧ, приста́нище ти́хое ѡ҆бꙋрева́емыхъ.

Ра́дꙋйсѧ, стѣно̀ ѡ҆гражде́нїѧ ро́дꙋ хрⷭ҇тїа́нскомꙋ: ра́дꙋйсѧ, покро́ве мі́рꙋ, ши́ршїй ѻ҆́блака.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ г҃

Си́ла бл҃года́тнаѧ, і҆кѡ́нѣ твое́й дарова́ннаѧ, прест҃а́ѧ гпⷭ҇жѐ бцⷣе, созыва́етъ вѣ́рныхъ собо́ры пѣ́сньми дꙋхо́вными сла́вити тѧ̀, честнѣ́йшꙋю херꙋві̑мъ и҆ сла́внѣйшꙋю серафі́мъ: и҆́бо, ро́ждши нетлѣ́ннѡ є҆ди́наго ѿ трⷪ҇цы, предстои́ши ны́нѣ пред̾ прⷭ҇то́ломъ трїѷпоста́снаго бжⷭ҇тва̀, и҆дѣ́же во́инства гѡ́рнїѧ съ тре́петомъ вопїю́тъ: А҆ллилꙋ́їа.

І҆́косъ г҃

И҆мѣ́ѧ попече́нїе ѡ҆ созда́нїи хра́ма бж҃їѧ и҆ ѡ҆би́тели и҆́ноческїѧ на мѣ́стѣ ꙗ҆вле́нїѧ чꙋ́дныѧ і҆кѡ́ны твоеѧ̀ на то́лгѣ, влⷣчце всеми́лостиваѧ, ст҃и́тель трѵ́фѡнъ вкꙋ́пѣ съ насе́льники гра́да ꙗ҆росла́влѧ, со ᲂу҆се́рдїемъ мнѡ́гимъ ѡ҆бы́дѣннѡ хра́мъ бж҃їй воздвига́ютъ и҆ та́кѡ созида́ютъ но́вꙋю ѡ҆би́тель ст҃ꙋ́ю, въ не́йже немо́лчнѡ воспѣва́ютсѧ тебѣ̀ бл҃гохвалє́нїѧ сицєва́ѧ:

Ра́дꙋйсѧ, странꙋ̀ рѡссі́йскꙋю въ жре́бїй достоѧ́нїѧ себѣ̀ и҆збра́вшаѧ: ра́дꙋйсѧ, і҆кѡ́ны твоѧ̑ чꙋдотвѡ́рныѧ, ꙗ҆́кѡ ѕвѣ̑зды въ не́й ᲂу҆мно́жившаѧ.

Ра́дꙋйсѧ, сїѧ́нїемъ чꙋде́съ твои́хъ ве́снꙋ сп҃се́нїѧ на́мъ возвѣща́ющаѧ: ра́дꙋйсѧ, теплото́ю млⷭ҇рдїѧ твоегѡ̀ ѡ҆леденѣ́лаѧ сердца̀ на̑ша согрѣва́ющаѧ.

Ра́дꙋйсѧ, щедро́тами твои́ми всѧ́къ во́зрастъ вѣ́рныхъ снабдѣва́ющаѧ: ра́дꙋйсѧ, младє́нцы ми́лостивнѡ ѡ҆кормлѧ́ющаѧ.

Ра́дꙋйсѧ, ста́рцы любвеѡби́льнѡ ᲂу҆покоева́ющаѧ: ра́дꙋйсѧ, вдови́цы и҆ сироты̑ бл҃госострада́тельнѡ призрѣва́ющаѧ.

Ра́дꙋйсѧ, ка́ющихсѧ грѣ́шникѡвъ спорꙋ́чнице держа́внаѧ: ра́дꙋйсѧ, и҆́стинныхъ рабѡ́въ бж҃їихъ помо́щнице всеизрѧ́днаѧ.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ д҃

Бꙋ́рѧ скорбе́й тобо́ю ᲂу҆толѧ́етсѧ и҆ свирѣ̑пыѧ страсте́й во́лны въ тишинꙋ̀ прелага́ютсѧ, пребл҃гослове́ннаѧ дв҃о, и҆́бо тебѣ̀ даде́сѧ ве́лїѧ блгⷣть всемі́рнагѡ застꙋпле́нїѧ. тѣ́мже на ст҃ꙋ́ю і҆кѡ́нꙋ твою̀ ᲂу҆миле́ннѡ взира́юще, въ ско́рбехъ ѿра́дꙋ, въ недꙋ́зѣхъ врачевство̀ ѡ҆би́льнѡ ѿ неѧ̀ почерпа́емъ и҆ зове́мъ гла́сы хвале́бными на не́й и҆зѡбраже́нномꙋ вкꙋ́пѣ съ тобо́ю сн҃ꙋ твоемꙋ̀ и҆ бг҃ꙋ: А҆ллилꙋ́їа.

І҆́косъ д҃

Слы́шавше бли́жнїи и҆ да́льнїи, ꙗ҆́кѡ чꙋде́съ и҆сто́чникъ ꙗ҆ви́сѧ на то́лгѣ, ст҃а́ѧ и҆ пречⷭ҇таѧ і҆кѡ́на твоѧ̀, цр҃и́це и҆ влⷣчце всеѧ̀ тва́ри, со ᲂу҆се́рдїемъ мно́гимъ притека́хꙋ къ цѣле́бномꙋ твоемꙋ̀ ѡ҆́бразꙋ, прїе́млѧ ѿ негѡ̀ да́ры неисче́тныхъ твои́хъ щедро́тъ. тѣ́мже и҆ мы̀, недосто́йнїи, стезе́ю ѻ҆тцє́въ на́шихъ ше́ствꙋюще, съ вѣ́рою и҆ любо́вїю припа́даемъ къ твое́й чꙋдотво́рнѣй і҆кѡ́нѣ и҆ тебѣ̀ ѿ глꙋбины̀ серде́чныѧ вопїе́мъ:

Ра́дꙋйсѧ, ꙗ҆́кѡ і҆кѡ́на твоѧ̀, а҆́гг҃лами неви́димѡ ѡ҆крꙋжа́емаѧ, воздꙋ́хъ ѡ҆свѧтѝ: ра́дꙋйсѧ, ꙗ҆́кѡ і҆кѡ́на твоѧ̀, ѻ҆гнезра́чнѣ на то́лгѣ ꙗ҆ви́вшаѧсѧ, всю̀ странꙋ̀ просвѣтѝ.

Ра́дꙋйсѧ, ꙗ҆́кѡ і҆кѡ́ною твое́ю человѣ́цы въ недꙋ́зѣхъ и҆ ско́рбехъ по́мощь ско́рꙋю ѡ҆брѣта́ютъ: ра́дꙋйсѧ, ꙗ҆́кѡ свѣ́томъ і҆кѡ́ны твоеѧ̀ де́моны прогонѧ́ютсѧ.

Ра́дꙋйсѧ, ꙗ҆́кѡ і҆кѡ́на твоѧ̀ гра́дꙋ ꙗ҆росла́влю и҆ предѣ́лѡмъ є҆гѡ̀ свы́ше въ наслѣ́дїе сп҃си́тельное дарова́сѧ: ра́дꙋйсѧ, ꙗ҆́кѡ і҆кѡ́ною твое́ю ѡ҆би́тель твоѧ̀ на то́лгѣ свѣ́тлѡ красꙋ́етсѧ.

Ра́дꙋйсѧ, ꙗ҆́кѡ пред̾ твое́ю і҆кѡ́ною ст҃и́тели и҆ лю́дїе бл҃гоговѣ́йнѡ поклонѧ́ютсѧ: ра́дꙋйсѧ, ꙗ҆́кѡ і҆кѡ́нꙋ твою̀ всѐ мно́жество правосла́внѡ вѣ́рꙋющихъ бг҃олѣ́пнѡ чествꙋ́етъ.

Ра́дꙋйсѧ, бг҃омꙋ́дрыхъ и҆́нокѡвъ бл҃га́ѧ помо́щнице во сп҃се́нїе: ра́дꙋйсѧ, бг҃опросвѣще́нныѧ рѡссі́и крѣ́пкое застꙋпле́нїе.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ є҃

Бг҃оте́чнаѧ ѕвѣзда̀, і҆кѡ́на твоѧ̀ честна́ѧ, гпⷭ҇жѐ бг҃ома́ти, странꙋ̀ на́шꙋ полꙋ́нощнꙋю сїѧ́нїемъ пресла́вныхъ чꙋде́съ просвѣтѝ, ю҆́же, ꙗ҆́кѡ да́ръ бжⷭ҇твенный, рѡссі́ѧ воспрїе́мши, прославлѧ́етъ и҆ воспѣва́етъ твоѧ̑ щедрѡ́ты: ты́ же, всеще́драѧ и҆ всебл҃га́ѧ ро́да на́шегѡ застꙋ́пнице, ѡ҆зарѝ и҆ на̑ша сердца̀ свѣ́томъ бл҃года́тнымъ, да возмо́жемъ бг҃опрїѧ́тнѡ пѣ́ти гдⷭ҇ꙋ на́шемꙋ серафі́мскꙋю пѣ́снь: А҆ллилꙋ́їа.

І҆́косъ є҃

Ви́дѣвше чꙋ́до пресла́вное, ка́кѡ внеза́пꙋ ѿ і҆кѡ́ны твоеѧ̀ ст҃ы́ѧ, пречⷭ҇таѧ дв҃о, ѿ десны́ѧ твоеѧ̀ рꙋкѝ и҆ ѿ лѣ́выѧ ногѝ тобо́ю держи́магѡ бг҃омлⷣнца двѣ̀ стрꙋѝ мѵ́ра бл҃гоꙋха́ющагѡ и҆ цѣле́бнагѡ и҆стеко́сте, бл҃гоговѣ́йный и҆гꙋ́менъ ге́рманъ съ бра́тїею ᲂу҆́жаса и҆ ра́дости и҆спо́лнишасѧ и҆, помазꙋ́ющесѧ мѵ́ромъ те́мъ бл҃года́тнымъ, тебѣ̀ сїѧ̑ ра́дѡстныѧ приноша́хꙋ глагѡ́лы:

Ра́дꙋйсѧ, а҆лава́стре драгоцѣ́нный, хрⷭ҇то́ва бл҃гоꙋха́нїѧ и҆спо́лненный: ра́дꙋйсѧ, мѷрохрани́лище и҆сцѣле́нїй, никогда́же ѡ҆скꙋдѣва́ющее.

Ра́дꙋйсѧ, вели́чїемъ чꙋде́съ твои́хъ превосходѧ́щаѧ ра́зꙋмъ человѣ́ческїй: ра́дꙋйсѧ, ѿ дскѝ сꙋхі́ѧ мѵ́ро цѣле́бное пачеесте́ственнѡ и҆злива́ющаѧ.

Ра́дꙋйсѧ, те́мъ мѵ́ромъ недꙋ́ги мнѡ́гїѧ врачꙋ́ющаѧ: ра́дꙋйсѧ, мѵ́ра и҆злїѧ́нїемъ ѿ і҆кѡ́ны твоеѧ̀ ст҃ы́ѧ милосе́рдїе твоѐ къ на́мъ показꙋ́ющаѧ.

Ра́дꙋйсѧ, дꙋ́шы на́шѧ ѡ҆роша́ющаѧ къ плодоноше́нїю дꙋхо́вномꙋ: ра́дꙋйсѧ, сердца̀ на̑ша ᲂу҆веселѧ́ющаѧ твои́мъ бжⷭ҇твеннымъ ѡ҆ на́съ бл҃гопромышле́нїемъ.

Ра́дꙋйсѧ, ста́мно всезлата́ѧ, ма́ннꙋ нбⷭ҇нꙋю хранѧ́щаѧ: ра́дꙋйсѧ, ски́нїе жива́гѡ бг҃а.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ ѕ҃

Проповѣ́дницы бг҃опросвѣще́ннїи, а҆пⷭ҇ли хрⷭ҇тѡ́вы, є҆гда̀ ᲂу҆зрѣ́ша въ лѵ́ддѣ, на стѣнѣ̀ хра́ма твоегѡ̀, нерꙋкотворе́ннѡ и҆зѡбрази́вшꙋюсѧ і҆кѡ́нꙋ твою̀, со бл҃гоговѣ́нїемъ є҆́й поклони́шасѧ, бг҃ома́ти пречⷭ҇таѧ, и҆́мже подража́юще, и҆ мы̀, смире́ннїи, колѣ̑на на̑ша пред̾ ди́внымъ и҆ многоцѣле́бнымъ ѡ҆́бразомъ твои́мъ, є҆го́же на то́лгѣ ѻ҆гневи́днѡ ꙗ҆ви́ти бл҃говоли́ла є҆сѝ, ᲂу҆се́рднѡ преклонѧ́емъ и҆ съ любо́вїю воспѣва́емъ ро́ждшемꙋсѧ ѿ тебє̀ сп҃си́телю мі́ра хвале́бнꙋю пѣ́снь: А҆ллилꙋ́їа.

І҆́косъ ѕ҃

Возсїѧ̀ на́мъ на то́лгѣ немерца́ющаѧ зарѧ̀ вели́кихъ чꙋде́съ, і҆кѡ́на твоѧ̀ бжⷭ҇твеннаѧ, бцⷣе дв҃о, въ не́йже зало́гъ несомнѣ́нный бж҃їѧ бл҃говоле́нїѧ и҆ твоегѡ̀ нбⷭ҇нагѡ застꙋпле́нїѧ странѣ̀ рѡссі́йстѣй ниспосла́сѧ ѿ щедрода́тельныѧ рꙋкѝ вседержи́телѧ бг҃а. тѣ́мже ра́дꙋющесѧ славосло́вимъ твоѐ млⷭ҇рдїе и҆ пѣ́сненнѡ тебѣ̀ вопїе́мъ:

Ра́дꙋйсѧ, храни́тельнице на́ша и҆ ᲂу҆твержде́нїе: ра́дꙋйсѧ, помо́щнице на́ша и҆ похвало̀.

Ра́дꙋйсѧ, ни́щихъ и҆ ᲂу҆бо́гихъ и҆зоби́льное бога́тство: ра́дꙋйсѧ, не гнꙋша́ющаѧсѧ сами́хъ презрѣ́нныхъ и҆ ѿве́рженныхъ.

Ра́дꙋйсѧ, ѿ ро́ва поги́бельнагѡ и҆схища́ющаѧ къ тебѣ̀ взыва́ющихъ грѣ́шникѡвъ: ра́дꙋйсѧ, ѿ вра́тъ сме́ртныхъ возраща́ющаѧ ѻ҆па́снѡ болѧ́щихъ.

Ра́дꙋйсѧ, бг҃омъ дарова́ннаѧ ѿра́да стра́ждꙋщихъ: ра́дꙋйсѧ, ско́рое ᲂу҆слы́шанїе вѣ́рнѡ тебѣ̀ молѧ́щихсѧ.

Ра́дꙋйсѧ, бл҃года́тное ᲂу҆тѣше́нїе всѣ́хъ скорбѧ́щихъ: ра́дꙋйсѧ, несокрꙋши́мое защище́нїе на тѧ̀ ᲂу҆пова́ющихъ.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ з҃

Хотѧ̀ человѣколю́бецъ хрⷭ҇то́съ ꙗ҆ви́ти ве́лїю любо́вь свою̀ къ лю́демъ, и҆скꙋпле́ннымъ честно́ю є҆гѡ̀ кро́вїю, тебѐ, мт҃рь свою̀ пренепоро́чнꙋю, въ покро́въ и҆ защи́тꙋ ро́дꙋ хрⷭ҇тїа́нскомꙋ дарова̀: ты́ бо вои́стиннꙋ сердобо́льнаѧ ма́ти ꙗ҆влѧ́ешисѧ всѣ̑мъ съ вѣ́рою и҆ ᲂу҆пова́нїемъ прибѣга́ющымъ къ твоемꙋ̀ те́пломꙋ застꙋпле́нїю, є҆го́же не лишѝ и҆ на́съ, сла́вѧщихъ пречⷭ҇тно́е и҆́мѧ твоѐ и҆ поклонѧ́ющихсѧ чꙋдотво́рномꙋ ѡ҆́бразꙋ твоемꙋ̀, сн҃ꙋ же твоемꙋ̀ зовꙋ́щихъ: А҆ллилꙋ́їа.

І҆́косъ з҃

Но́вое и҆ преди́вное чꙋ́до ꙗ҆вѝ всѣ́хъ чꙋде́съ творе́цъ и҆ всеѧ̀ тва́ри влⷣка, є҆гда̀ во вре́мѧ пожа́ра ѡ҆би́тели твоеѧ̀ на то́лгѣ попꙋще́нїемъ бж҃їимъ сгорѣ́вшꙋ внеза́пнꙋ и҆ хра́мꙋ твоемꙋ̀, і҆кѡ́на твоѧ̀ ст҃а́ѧ неѡпали́ма и҆ невреди́ма въ не́мъ сохрани́сѧ, а҆́гг҃льскима рꙋка́ми неви́димѡ пронесе́ннаѧ и҆з̾ заключе́ннагѡ и҆ ѻ҆гне́мъ пыла́ющагѡ хра́ма, внѣ̀ монастырѧ̀, въ леснꙋ́ю дꙋбра́вꙋ, и҆дѣ́же на дре́ве стоѧ́щаѧ и҆ свѣ́томъ сїѧ́ющаѧ ѡ҆брѣ́тена бы́сть твои́мъ бл҃гопромышле́нїемъ, пречⷭ҇таѧ и҆ пребл҃гослове́ннаѧ дв҃о, слы́шащаѧ ѿ на́съ сїѧ̑ достодѡ́лжныѧ похвалы̑:

Ра́дꙋйсѧ, сїѧ́ющаѧ бл҃года́тїю и҆ сла́вою преди́вныхъ чꙋде́съ: ра́дꙋйсѧ, ѡ҆блече́ннаѧ въ свѣ́тлꙋю ѡ҆де́ждꙋ ми́лостей и҆ щедро́тъ.

Ра́дꙋйсѧ, си́лою твое́ю бжⷭ҇твенною си́лꙋ є҆стества̀ ѻ҆́гненнагѡ побѣди́вшаѧ: ра́дꙋйсѧ, і҆кѡ́нꙋ твою̀ честнꙋ́ю несгара́емꙋ въ ѻ҆гнѝ содѣ́лавшаѧ.

Ра́дꙋйсѧ, зало́гꙋ твоегѡ̀ къ на́мъ бл҃говоле́нїѧ безвре́меннѡ поги́бнꙋти непопꙋсти́вшаѧ: ра́дꙋйсѧ, а҆́гг҃льскима рꙋка́ма є҆гѡ̀ и҆з̾ пла́мене и҆схити́вшаѧ.

Ра́дꙋйсѧ, свѣ́тъ ти́хїй и҆ ра́достный ѿ многочꙋде́снагѡ ѻ҆́браза твоегѡ̀ возсїѧ́вшаѧ: ра́дꙋйсѧ, скѡ́рбнаѧ сердца̀ и҆́нокѡвъ ѡ҆би́тели твоеѧ̀ ѡ҆брѣ́тенїемъ є҆го̀ возвесели́вшаѧ.

Ра́дꙋйсѧ, сѣ́тованїе и҆́хъ на ликова́нїе преложи́вшаѧ: ра́дꙋйсѧ, лише́нїе и҆́хъ щедрода́тельнѡ воспо́лнившаѧ.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ и҃

Стра́нники мы̀ и҆ прише́льцы въ мі́рѣ се́мъ скороте́чнѣмъ, пꙋ́ть творѧ́ще къ вѣ́чномꙋ нбⷭ҇номꙋ ѻ҆те́чествїю на́шемꙋ, тебѐ, бл҃гꙋ́ю ѻ҆диги́трїю, мо́лимъ и҆ про́симъ, рꙋково́дствꙋй на́съ стезе́ю сп҃си́тельною за́повѣдей хрⷭ҇то́выхъ къ свѣ́тломꙋ гра́дꙋ і҆ерⷭ҇ли́мꙋ го́рнемꙋ и҆ не попꙋстѝ ᲂу҆клони́тисѧ въ де́бри грѣхѡ́вныѧ, ведꙋ́щыѧ къ темни́цѣ а҆́дской, да сп҃са́еми по́мощїю твое́ю держа́вною, сподо́бимсѧ на землѝ живы́хъ пѣ́ти созда́телю на́шемꙋ вѣ́чнѡ хвале́бнꙋю пѣ́снь: А҆ллилꙋ́їа.

І҆́косъ и҃

Всѣ̑мъ всѧ̑ блага̑ѧ и҆ сп҃си́тельнаѧ да́рꙋеши ѿ ст҃ы́ѧ чꙋдотво́рныѧ і҆кѡ́ны твоеѧ̀, бг҃ома́ти пречⷭ҇таѧ, ю҆́же ꙗ҆́кѡ сокро́вище многоце́нное зрѧ́ще, со гла́сомъ ра́дованїѧ и҆ бл҃годаре́нїѧ взыва́емъ тѝ:

Ра́дꙋйсѧ, скорбе́й и҆ печа́лей бл҃года́тнаѧ ᲂу҆толи́тельнице: ра́дꙋйсѧ, недꙋ́гѡвъ дꙋше́вныхъ и҆ тѣле́сныхъ до́браѧ цѣле́бнице.

Ра́дꙋйсѧ, ᲂу҆топа́ющихъ скоропредста́тельнаѧ и҆зба́вительнице: ра́дꙋйсѧ, пꙋтеше́ствꙋющихъ бл҃гонаде́жнаѧ храни́тельнице.

Ра́дꙋйсѧ, слѣпы́хъ просвѣще́нїе: ра́дꙋйсѧ, хромы́хъ правохожде́нїе.

Ра́дꙋйсѧ, нѣмы́хъ ꙗ҆сноглаго́ланїе: ра́дꙋйсѧ, прокаже́нныхъ ѡ҆чище́нїе.

Ра́дꙋйсѧ, глꙋхи́хъ бл҃гослы́шанїе: ра́дꙋйсѧ, мертвецє́въ ѡ҆живле́нїе.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ ѳ҃

Всѧ̀ страна̀ на́ша правосла́внаѧ млⷭ҇тьми твои́ми, бг҃ома́ти, ѡ҆благодѣ́тельствованнаѧ, немо́лчнѡ сла́витъ и҆́мѧ твоѐ и҆ бл҃гоговѣ́йнѡ почита́етъ пречⷭ҇тагѡ ли́ка твоегѡ̀ и҆зѡбраже́нїе, и҆́мже ди́внаѧ и҆ пресла́внаѧ ѡ҆бы́кла є҆сѝ ꙗ҆влѧ́ти на́мъ чꙋдеса̀. тѣ́мже сы́нове рѡссі́йстїи і҆кѡ́нꙋ твою̀ въ щи́тъ и҆ ѡ҆гражде́нїе ѿ врагѡ́въ ви́димыхъ и҆ неви́димыхъ при́снѡ и҆мѣ́ютъ и҆ по́мощїю твое́ю ст҃о́ю побѣжда́юще сꙋпоста́ты, вопїю́тъ цр҃ю̀ нб҃сѐ и҆ землѝ: А҆ллилꙋ́їа.

І҆́косъ ѳ҃

Вѣті́йство на́ше пѣ́сненное не довлѣ́етъ ко и҆зглаго́ланїю всѣ́хъ чꙋде́съ, тобо́ю, влⷣчце, ꙗ҆вле́нныхъ и҆ присноѧвлѧ́емыхъ на́мъ ѿ многоцѣле́бныѧ і҆кѡ́ны твоеѧ̀ на то́лгѣ: но ты̀, ꙗ҆́кѡ бл҃га́ѧ и҆ милосе́рдаѧ ма́ти, не возгнꙋша́йсѧ на́шихъ недовлѣ́ющихъ и҆ недосто́йныхъ похва́лъ и҆ ми́лостивѡ преклони́сѧ къ тебѣ̀ вопїю́щымъ:

Ра́дꙋйсѧ, ѡ҆бра́дованнаѧ и҆ пребл҃гослове́ннаѧ дв҃о: ра́дꙋйсѧ, ꙗ҆́кѡ гдⷭ҇ь съ тобо́ю и҆ тобо́ю съ на́ми.

Ра́дꙋйсѧ, є҆ди́на и҆збра́ннаѧ и҆ до́браѧ въ жена́хъ: ра́дꙋйсѧ, ро́дꙋ человѣ́ческомꙋ ѿве́рзшаѧ вхо́дъ въ црⷭ҇твїе го́рнее.

Ра́дꙋйсѧ, возрасти́вшаѧ на́мъ пло́дъ сп҃се́нїѧ: ра́дꙋйсѧ, спа́са ро́ждшаѧ дꙋ́шъ на́шихъ.

Ра́дꙋйсѧ, во ѡ҆б̾ѧ́тїѧхъ твои́хъ держа́вшаѧ вседержи́телѧ: ра́дꙋйсѧ, на рꙋкꙋ̑ твое́ю носи́вшаѧ всѣ́хъ творца̀.

Ра́дꙋйсѧ, млеко́мъ твои́мъ пита́вшаѧ пита́телѧ вселе́нныѧ: ра́дꙋйсѧ, ѡ҆дꙋшевле́нный хра́ме бг҃а сло́ва.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ і҃

Сп҃си́тельное и҆ ти́хое приста́нище ѿ треволне́нїй мо́рѧ жите́йскагѡ ви́димъ ст҃ꙋ́ю ѡ҆би́тель твою̀ на то́лгѣ, въ не́йже і҆кѡ́на твоѧ̀, влⷣчце, лꙋча́ми чꙋде́съ вѣ́рныѧ просвѣща́ющи, всѣ́хъ рꙋково́дствꙋетъ на пꙋ́ть бл҃гоче́стїѧ и҆ сп҃се́нїѧ. сегѡ̀ ра́ди прославлѧ́емъ твою̀ бл҃госты́ню, ꙗ҆́кѡ неѿстꙋ́пнѡ съ на́ми і҆кѡ́ною твое́ю пребыва́еши, дꙋ́ши и҆ тѣлеса̀ на̑ша є҆́ю бл҃года́тнѡ врачꙋ́еши и҆ вы́нꙋ хода́тайствꙋеши за на́съ ᲂу҆ прⷭ҇то́ла прест҃ы́ѧ трⷪ҇цы, и҆дѣ́же ли́цы ст҃ы́хъ ра́достнѡ возглаша́ютъ: А҆ллилꙋ́їа.

І҆́косъ і҃

Стѣна̀ и҆ покро́въ гра́дꙋ ꙗ҆росла́влю даде́сѧ ст҃а́ѧ і҆кѡ́на твоѧ̀ ѿ щедро́тъ человѣколю́бца бг҃а, є҆мꙋ́же въ человѣколю́бїи подража́ющи, цр҃и́це и҆ влⷣчце на́ша всеми́лостиваѧ, мно́жицею гра́дъ се́й ѿ разоре́нїѧ ра́тнагѡ сохранѧ́ла є҆сѝ и҆ во вре́мѧ па́гꙋбнагѡ бездо́ждїѧ до́ждь и҆з̾ѡби́ленъ є҆мꙋ̀ дарова́ла є҆сѝ прише́ствїемъ честна́гѡ твоегѡ̀ ѡ҆́браза, и҆́мже и҆ ны́нѣ на́съ ми́лостивнѡ посѣща́еши и҆ бл҃гоꙋтро́бнѡ прїе́млеши пред̾ ни́мъ возноси̑мыѧ тебѣ̀ ѿ се́рдца на́ши моли̑твы, съ пѣ́нїемъ таковы́мъ:

Ра́дꙋйсѧ, слє́зы го́рестныѧ ѡ҆тира́ющаѧ ѿ ѻ҆че́съ стра́ждꙋщихъ и҆ печа́льныхъ: ра́дꙋйсѧ, скѡ́рбнаѧ сердца̀ ᲂу҆слажда́ющаѧ твои́мъ бл҃года́тнымъ ᲂу҆ча́стїемъ.

Ра́дꙋйсѧ, ме́ртвагѡ ѻ҆́трока воскреси́вшаѧ, къ ра́дости пла́кавшихъ пред̾ і҆кѡ́ною твое́ю роди́телей є҆гѡ̀: ра́дꙋйсѧ, четѣ̀ непло́дныхъ сꙋпрꙋ́гѡвъ чадоро́дїе дарова́вшаѧ.

Ра́дꙋйсѧ, дѣви́цꙋ, ѕлы́мъ дꙋ́хомъ ѡ҆держи́мꙋю, ѿ мꙋче́нїѧ де́монскагѡ свободи́вшаѧ: ра́дꙋйсѧ, мꙋ́жа, и҆зсо́хшїѧ нѡ́зѣ и҆мѣ́вшагѡ, ско́ро и҆сцѣли́вшаѧ.

Ра́дꙋйсѧ, въ разбо́йники впа́дшаго и҆ тѧ̀ на по́мощь призва́вшаго ѿ сме́рти го́рькїѧ и҆зба́вившаѧ: ра́дꙋйсѧ, і҆ере́а, глꙋхо́тою болѣ́зновавшаго, ꙗ҆́снѡ слы́шати ᲂу҆стро́ившаѧ.

Ра́дꙋйсѧ, ѡ҆скꙋде́нїе бра́шенъ въ ст҃ѣ́й ѡ҆би́тели твое́й чꙋде́снѡ воспо́лнившаѧ: ра́дꙋйсѧ, свѧтота́тца, достоѧ́нїе ѡ҆би́тели твоеѧ̀ похи́тившаго, гро́знѡ наказа́вшаѧ.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ а҃і

Пѣ́нїе и҆ молє́нїѧ на̑ша смире́нныѧ, пред̾ ст҃о́ю и҆ чꙋдотво́рною твое́ю і҆кѡ́ною ѿ любвѐ те́плыѧ тебѣ̀ возноси̑мыѧ, не пре́зри, гпⷭ҇жѐ всеми́лостиваѧ, но бл҃гопослꙋ́шлива бꙋ́ди къ на́мъ, поклонѧ́ющымсѧ со бл҃гоговѣ́нїемъ и҆ вѣ́рою твоемꙋ̀ бжⷭ҇твенномꙋ ѡ҆́бразꙋ и҆ просѧ́щымъ со слеза́ми ми́лостивнагѡ твоегѡ̀ застꙋпле́нїѧ, є҆го́же си́ла вои́стиннꙋ превосхо́дитъ всѧ́кое разꙋмѣ́нїе и҆ созыва́етъ а҆́гг҃лѡвъ и҆ человѣ́кѡвъ собо́ры вкꙋ́пѣ хвали́ти творца̀ бг҃окра́сною пѣ́снїю: А҆ллилꙋ́їа.

І҆́косъ а҃і

Свѣтопода́тельнꙋю лампа́дꙋ, є҆ле́емъ ми́лости и҆спо́лненнꙋю и҆ преизлива́ющꙋюсѧ, созерца́емъ тѧ̀ ѻ҆ча́ми вѣ́ры, бг҃оизбра́ннаѧ бг҃оѻтрокови́це, и҆, кро́ткимъ сїѧ́нїемъ твои́мъ ѡ҆зарѧ́еми, любо́вїю же твое́ю при́снѡ согрѣва́еми, тебѣ̀, бл҃го́й застꙋ́пницѣ на́шей, і҆кѡ́ною твое́ю ди́вныѧ щедрѡ́ты твоѧ̑ на́мъ ниспосыла́ющей, бл҃года́рственнѡ и҆ ᲂу҆миле́ннѡ глаго́лемъ:

Ра́дꙋйсѧ, во всѧ́кихъ нꙋ́ждахъ и҆ бѣда́хъ ско́рое вспоможе́нїе на́мъ да́рꙋющаѧ: ра́дꙋйсѧ, въ ско́рбехъ и҆ печа́лехъ нбⷭ҇нꙋю ѿра́дꙋ въ сердца̀ на̑ша пролива́ющаѧ.

Ра́дꙋйсѧ, кли́рїка ѡ҆би́тели твоеѧ̀ ѿ потопле́нїѧ во́днагѡ и҆зба́вившаѧ: ра́дꙋйсѧ, женꙋ̀ ᲂу҆ме́ршꙋю къ жи́зни возврати́вшаѧ.

Ра́дꙋйсѧ, бѣ́сныхъ мно́гажды и҆сцѣли́вшаѧ: ра́дꙋйсѧ, и҆зстꙋпле́нныхъ ᲂу҆мо́мъ смы́сломъ здра́вымъ ѡ҆дари́вшаѧ.

Ра́дꙋйсѧ, ѻ҆ча́ми болѣ́зновавшихъ врачева́вшаѧ: ра́дꙋйсѧ, слѣпца̀ прозрѣ́ти пред̾ і҆кѡ́ною твое́ю сотвори́вшаѧ.

Ра́дꙋйсѧ, хрома́го и҆ нича́щаго прѧ́мѡ ходи́ти ᲂу҆стро́ившаѧ: ра́дꙋйсѧ, главо́ю болѣ́зновавшемꙋ ꙗ҆вле́нїемъ твои́мъ во снѣ̀ и҆сцѣле́нїе пода́вшаѧ.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ в҃і

Блгⷣти бж҃їѧ ст҃о́е и҆ непоро́чное жили́ще, ма́ти гдⷭ҇а вы́шнихъ си́лъ, ѡ҆бл҃годатѝ на́шъ по́мыслъ, бл҃гоче́стнѡ воспѣва́ти твоѧ̑ чꙋдеса̀, на то́лгѣ ѿ честны́ѧ і҆кѡ́ны твоеѧ̀ ꙗ҆влє́ннаѧ, и҆ твои́мъ невече́рнимъ сїѧ́нїемъ ѡ҆зарѝ на́шѧ тє́мныѧ дꙋ́шы, приводѧ́щи и҆́хъ къ свѣ́тꙋ трисїѧ́ннаго бжⷭ҇тва̀, и҆дѣ́же ра́дость и҆ бл҃же́нство вѣ́чное ᲂу҆гото́вано пра́вєднымъ, пою́щымъ немо́лчнꙋю пѣ́снь вседержи́телю: А҆ллилꙋ́їа.

І҆́косъ в҃і

Пое́мъ пѣ́снь хвалы̀ и҆ бл҃годаре́нїѧ тебѣ̀, бг҃ора́дованнаѧ дв҃о, проповѣ́дꙋемъ велегла́снѡ вели́чїе чꙋде́съ твои́хъ и҆ бога́тство ми́лости твоеѧ̀, на на́съ и҆ ѻ҆те́чествїи на́шемъ ꙗ҆вле́нныхъ, и҆ ѿ глꙋбины̀ серде́чныѧ прино́симъ тѝ со смире́нїемъ и҆ вѣ́рою сїѧ̑ похва̑льныѧ да́ры:

Ра́дꙋйсѧ, бл҃га́ѧ ма́ти всѣ́хъ любо́вїю чтꙋ́щихъ тѧ̀ и҆ поклонѧ́ющихсѧ честно́мꙋ ѡ҆́бразꙋ твоемꙋ̀: ра́дꙋйсѧ, до́браѧ младопита́тельнице дѣ́въ и҆ безма́тернихъ сирѡ́тъ.

Ра́дꙋйсѧ, мі́ра хрⷭ҇тїа́нскагѡ крѣ́посте несокрꙋши́маѧ: ра́дꙋйсѧ, держа́вы рѡссі́йскїѧ защище́нїе неѡбори́мое.

Ра́дꙋйсѧ, ст҃ы́ѧ правосла́вныѧ цр҃кве многопѣ́таѧ сла́во: ра́дꙋйсѧ, ст҃и́телей и҆ сщ҃е́нникѡвъ бл҃года́тное ᲂу҆добре́нїе.

Ра́дꙋйсѧ, и҆́нокѡмъ бл҃гоподвиза́ющымсѧ хода́таице вѣ́чнагѡ ра́дованїѧ: ра́дꙋйсѧ, и҆ въ мі́рѣ бл҃гоче́стнѡ живꙋ́щихъ не лиша́ющаѧ твоегѡ̀ застꙋпле́нїѧ.

Ра́дꙋйсѧ, тѣлеса̀ на̑ша врачꙋ́ющаѧ ѿ недꙋ́гѡвъ многоразли́чныхъ: ра́дꙋйсѧ, дꙋ́шы на́шѧ и҆збавлѧ́ющаѧ ѿ врагѡ́въ неви́димыхъ.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ г҃і

Ѽ всепѣ́таѧ ма́ти, ро́ждшаѧ ра́дость вѣ́чнꙋю, гдⷭ҇а на́шего і҆и҃са хрⷭ҇та̀, земны́мъ и҆ нбⷭ҇нымъ спⷭ҇телѧ! прїимѝ бл҃гоꙋтро́бнѡ моле́бное пѣ́нїе на́ше, пред̾ чꙋдотво́рною і҆кѡ́ною твое́ю съ вѣ́рою и҆ бл҃гоговѣ́нїемъ тебѣ̀ возноси́мое, и҆ всеси́льными мл҃твами твои́ми и҆зба́ви на́съ ѿ вре́менныхъ бѣ́дъ и҆ вѣ́чныѧ мꙋ́ки, сподо́би же въ благоче́стїи и҆ правовѣ́рїи пожи́ти здѣ̀, въ земно́мъ житїѝ, та́може, въ бꙋ́дꙋщемъ вѣ́цѣ въ ра́дости ра́йстѣй, со всѣ́ми ст҃ы́ми, вѣ́чнѡ воспѣва́ти созда́телю на́шемꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ земны́й и҆ человѣ́къ нбⷭ҇ный, ст҃и́тель хрⷭ҇то́въ трѵ́фѡнъ, свы́ше пред̾избра́нъ бы́сть послꙋжи́ти ст҃ы́ѧ і҆кѡ́ны твоеѧ̀ на то́лгѣ ꙗ҆вле́нїю, влⷣчце пребл҃га́ѧ: то́й бо, пꙋ́ть творѧ̀ ѿ бѣлое́зера по рѣцѣ̀ во́лгѣ, въ но́щи сто́лпъ ѻ҆́гненный ᲂу҆зрѣ̀ на бре́зѣ є҆ѧ̀ пꙋсты́ннѣмъ и҆, дости́гнꙋвъ мѣ́ста, тобо́ю и҆збра́ннагѡ, ви́дѣ ст҃ꙋ́ю і҆кѡ́нꙋ твою̀ на воздꙋ́сѣ стоѧ́щꙋю и҆ свѣ́томъ нбⷭ҇нымъ сїѧ́ющꙋю, къ не́йже моле́бнѡ припа́даѧ, со слеза́ми те́плыми си́це къ тебѣ̀ возглаша́ше:

Ра́дꙋйсѧ, свѣщѐ бг҃опрїе́мнаѧ, темнотꙋ̀ дꙋ́шъ на́шихъ ѡ҆зарѧ́ющаѧ: ра́дꙋйсѧ, зарѐ невече́рнѧѧ, мглꙋ̀ грѣхѡ́въ на́шихъ разгонѧ́ющаѧ.

Ра́дꙋйсѧ, чꙋ́днѡ прїѧ́вшаѧ хрⷭ҇та̀ бг҃а, ꙗ҆́кѡ ᲂу҆́гль горѧ́щїй съ нбⷭ҇нагѡ же́ртвенника: ра́дꙋйсѧ, кꙋпино̀ неѡпали́маѧ, законополо́жникомъ мѡѷсе́емъ предзри́маѧ.

Ра́дꙋйсѧ, сто́лпе ѻ҆́гненный, но́вагѡ і҆и҃лѧ пꙋтеводѧ́щїй: ра́дꙋйсѧ, ѡ҆́блаче росоно́сный, зно́й страсте́й на́шихъ ᲂу҆толѧ́ющїй.

Ра́дꙋйсѧ, предста́тельнице всемогꙋ́щаѧ, тꙋ́чи гнѣ́ва бж҃їѧ ѿ гла́въ на́шихъ ѿводѧ́щаѧ: ра́дꙋйсѧ, застꙋ́пнице ᲂу҆се́рднаѧ, ѿ поги́бели вѣ́чныѧ на́съ и҆збавлѧ́ющаѧ.

Ра́дꙋйсѧ, ѡ҆́бразъ тво́й честны́й въ зало́гъ сп҃се́нїѧ на́мъ дарова́вшаѧ: ра́дꙋйсѧ, ѻ҆гнезра́чнымъ ꙗ҆вле́нїемъ є҆гѡ̀ на то́лгѣ странꙋ̀ рѡссі́йскꙋю бл҃гослови́вшаѧ.

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Конда́къ а҃

Взбра́нной воево́дѣ, влⷣчцѣ на́шей бцⷣѣ, ѡ҆сѣни́вшей странꙋ̀ рѡссі́йскꙋю ѻ҆гнезра́чнымъ своеѧ̀ і҆кѡ́ны на то́лгѣ ꙗ҆вле́нїемъ, похва́льное возглаша́емъ пѣ́нїе: ты́ же, ѽ бг҃ома́ти, ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ бѣ́дъ и҆зба́ви на́съ, зовꙋ́щихъ:

Ра́дꙋйсѧ, ра́досте на́ша, і҆кѡ́ною твое́ю на́съ при́снѡ ᲂу҆тѣша́ющаѧ.

Моли́твы

Ѽ прест҃а́ѧ гпⷭ҇жѐ, дв҃о бцⷣе, вы́сшаѧ херꙋві́мѡвъ и҆ серафі́мѡвъ и҆ ст҃ѣ́йшаѧ всѣ́хъ ст҃ы́хъ! ты̀, всебл҃га́ѧ, на то́лгѣ і҆кѡ́нꙋ твою̀ многоцѣле́бнꙋю бл҃же́нномꙋ ст҃и́телю трѵ́фѡнꙋ ѻ҆гневи́днѡ ꙗ҆ви́ти бл҃говоли́ла є҆сѝ, и҆ є҆́ю мнѡ́гаѧ и҆ неизречє́ннаѧ чꙋдеса̀ содѣ́лала є҆сѝ и҆ ны́нѣ содѣва́еши, по твоемꙋ̀ неизрече́нномꙋ къ на́мъ млⷭ҇рдїю. тебѣ̀ пред̾ пречⷭ҇тымъ ѡ҆́бразомъ твои́мъ, припа́даемъ и҆ мо́лимсѧ, пребл҃гослове́ннаѧ ро́да на́шегѡ застꙋ́пнице: въ стра́нствїи се́мъ земнѣ́мъ, многоско́рбнѣмъ и҆ многомѧте́жнѣмъ, не лишѝ на́съ твоегѡ̀ застꙋпле́нїѧ и҆ покро́ва держа́внагѡ. спасѝ и҆ защитѝ на́съ, влⷣчце, ѿ разжже́нныхъ стрѣ́лъ лꙋка́вагѡ врага̀ сп҃се́нїѧ на́шегѡ. ᲂу҆крѣпѝ немощнꙋ́ю во́лю на́шꙋ къ дѣ́ланїю за́повѣдей хрⷭ҇то́выхъ, ᲂу҆мѧгчѝ ѡ҆каменѣ̑лаѧ сердца̀ на̑ша любо́вїю къ бг҃ꙋ и҆ бли̑жнимъ на́шымъ, да́рꙋй на́мъ сокрꙋше́нїе серде́чное и҆ покаѧ́нїе и҆́стинное, да ѡ҆чи́стившесѧ ѿ скве́рны грѣхо́вныѧ, возмо́жемъ принестѝ творцꙋ̀ бл҃гоꙋго́дныѧ є҆мꙋ̀ плоды̀ до́брыхъ дѣ́лъ, и҆ сподо́битисѧ ми́рныѧ хрⷭ҇тїа́нскїѧ кончи́ны и҆ ѿвѣ́та пра́вагѡ на стра́шнѣмъ и҆ нелицепрїѧ́тнѣмъ сꙋдѣ̀ є҆гѡ̀. є҆́й, гпⷭ҇жѐ всеми́лостиваѧ! въ ча́съ гро́зный, сме́ртный наипа́че ꙗ҆вѝ на́мъ твоѐ многомо́щное застꙋпле́нїе, ᲂу҆скорѝ тогда̀ на по́мощь къ на́мъ, безпомѡ́щнымъ, и҆ держа́вною рꙋко́ю твое́ю и҆схитѝ на́съ и҆з̾ рꙋкѝ лю́тагѡ мїроде́ржца, и҆́бо вои́стиннꙋ мно́гѡ мо́жетъ мл҃тва твоѧ̀ пред̾ лице́мъ гдⷭ҇а и҆ ничто́же невозмо́жнѡ хода́тайствꙋ твоемꙋ̀, а҆́ще то́кмѡ восхо́щеши. тѣ́мже на ст҃ы́й ѡ҆́бразъ тво́й ᲂу҆миле́ннѡ взира́юще и҆ пред̾ ни́мъ, ꙗ҆́кѡ живѣ́й тѝ сꙋ́щей съ на́ми, поклонѧ́ющесѧ съ ᲂу҆пова́нїемъ бл҃ги́мъ, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ тебѣ̀ по бз҃ѣ моли́твеннѡ предае́мъ и҆ тѧ̀ велича́емъ съ ро́ждшимсѧ ѿ тебє̀ сп҃си́телемъ на́шимъ, гдⷭ҇омъ і҆и҃сомъ хрⷭ҇то́мъ, є҆мꙋ́же, со безнача́льнымъ є҆гѡ̀ ѻ҆ц҃е́мъ и҆ прест҃ы́мъ дх҃омъ подоба́етъ всѧ́каѧ сла́ва, че́сть и҆ поклоне́нїе, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Прїимѝ, ѽ всебл҃гослове́ннаѧ и҆ всемо́щнаѧ, пречⷭ҇таѧ гпⷭ҇жѐ влⷣчце, бцⷣе дв҃о, сїѧ̑ моли̑твы, со слеза́ми тебѣ̀ ны́нѣ принѡси́мыѧ ѿ на́съ, недосто́йныхъ рабѡ́въ твои́хъ, къ цѣльбоно́сномꙋ ѡ҆́бразꙋ твоемꙋ̀ со ᲂу҆миле́нїемъ притека́ющихъ, ꙗ҆́кѡ тебѣ̀ самѣ́й тꙋ̀ сꙋ́щей, и҆ слы́шащей молє́нїѧ на̑ша, и҆ подаю́щей съ вѣ́рою просѧ́щымъ по коемꙋ́ждо проше́нїю и҆сполне́нїе. скорбѧ́щымъ бо ско́рби ѡ҆блегча́еши, немощны́мъ здра́вїе да́рꙋеши, разсла́бленныхъ и҆ недꙋ́жныхъ и҆сцѣлѧ́еши, ѿ бѣ́сныхъ бѣ́сы прогонѧ́еши, ѡ҆би̑димыѧ ѿ ѻ҆би́дъ и҆збавлѧ́еши и҆ ги́бнꙋщыѧ сп҃са́еши, грѣ́шныхъ ка́ющихсѧ проща́еши, прокаже́нныхъ ѡ҆чища́еши, ма́лыхъ дѣте́й ми́лꙋеши, ѿ ᲂу҆́зъ и҆ темни́цъ свобожда́еши, и҆ всѧ̑кїѧ многоразли̑чныѧ стра̑сти врачꙋ́еши ты̀, гпⷭ҇жѐ влⷣчце бцⷣе: всѧ̑ бо сꙋ́ть возмо́жна хода́тайствомъ твои́мъ къ сн҃ꙋ твоемꙋ̀, хрⷭ҇тꙋ̀ бг҃ꙋ на́шемꙋ. ѽ всепѣ́таѧ мт҃и, прест҃а́ѧ бцⷣе дв҃о мр҃і́е! не преста́й моли́тисѧ ѡ҆ на́съ, недосто́йныхъ рабѣ́хъ твои́хъ, сла́вѧщихъ тѧ̀ и҆ почита́ющихъ, и҆ поклонѧ́ющихсѧ пречⷭ҇томꙋ ѡ҆́бразꙋ твоемꙋ̀, и҆ наде́ждꙋ и҆мꙋ́щихъ невозвра́тнꙋ и҆ вѣ́рꙋ несꙋмнѣ́ннꙋ къ тебѣ̀, приснодв҃ѣ пресла́внѣй и҆ непоро́чнѣй, ны́нѣ и҆ прⷭ҇нѡ, и҆ во вѣ́ки вѣкѡ́въ. А҆ми́нь.