Канон святому преподобному Максиму Исповеднику

Всю́ мне́ богодухнове́нную от медото́чнаго и сла́дкаго твоего́ иска́пай язы́ка, боже́ственный Макси́ме, благода́ть Ду́ха.

Огнь горя́щь яви́лся еси́ на е́реси, блаже́нне: я́ко бо тро́стие, сия́ изнури́л еси́ ре́вностию Ду́ха.

Безслове́сное предложи́ся от злочести́вейшаго произволе́ния единово́льное уче́ние, словесы́ же твои́ми, о́тче, обличи́ся.

Велича́йший Макси́м, благочести́выя Христо́вы ве́ры всеи́стинно пропове́дник же и му́ченик показа́ся кро́вию.

Макси́ме блаже́нне, ты́ поще́нием бы́л еси́ боголе́пное любому́дрия и чи́стое жили́ще.

Излия́ язы́к тво́й реку́ Христо́вых уче́ний благоче́стне, Макси́ме всеблаже́нне, прему́дрости пита́тель.

Земноро́дных тя́ почита́ют, и небе́сных чи́ни чудя́тся, любо́вию бо му́дрости показа́лся еси́, о́тче, я́ко безпло́тен.

Су́ров у́бо мучи́тель, но терпе́ние твое́ непрекло́нно, те́м ты́ у́бо ублажи́лся еси́, вселука́вый же изве́ржеся.

Состра́ждет тебе́, Макси́ме, ученико́в дво́ица преблаже́нная, твои́м страда́нием приобщи́вшеся, те́мже и по́честей ра́вно получи́ша.

Тече́нием твоея́ кро́ве напая́ема, Це́рковь Христо́ва прозяба́ет оте́ческаго преда́ния Боже́ственное се́мя твои́м уче́нием, преподо́бне.

Ра́зум земноро́дных собра́в и небе́сных, впра́вду филосо́ф имену́ется Макси́м.

Прему́дрости безме́рным жела́нием Христа́ твоего́ подо́бник изря́днейший яви́лся еси́, сла́вный Макси́ме.

Гне́вом изгна́н бы́л еси́ мучи́теля, обре́л же еси́, блаже́нне, Иису́са утеше́ние.

Непреста́нно прино́сиши Бо́гу, богому́дре, мольбу́, душе́вных же и теле́сных страсте́й и тле́ния мя́ изба́вити.

Изсуши́ся ересе́й исто́чник му́тный ве́сь, сла́вне Макси́ме, загражда́емь шу́мом язы́ка твоего́.

Очи́сти мя́, Еди́не Бла́же, и исто́чник благода́ти, Христе́, се́рдцу моему́ Твоего́ преподо́бнаго моли́твами источи́.

Еди́но естество́ Тро́ицы, еди́но хоте́ние ре́кл еси́, еди́но де́йство, Бо́га же, вопло́щшагося во двою́ естеству́, хоте́нию же и де́йству пропове́дал еси́. Отце́в на́ших Бо́же, благослове́н еси́.

Не во́ли две́ разделя́емыя ра́зума проти́вностию, ка́чеством же па́че пропове́дал еси́, о́тче, есте́ственным ра́знствующия. Отце́в на́ших Бо́же, благослове́н еси́.

Сто́лп правосла́вия боже́ственная твоя́ словеса́, о́тче, держа́ще, Еди́наго от Тро́ицы во дву́х существа́х и во́лях почита́ем. Отце́в на́ших Бо́же, благослове́н еси́.

Весьма́ возлюби́в Превозлюби́вшаго ро́д челове́ческий, кре́ст Тво́й взя́л еси́ и Тому́, блаже́нне, сраспя́лся еси́, — благослови́те, — поя́, — дела́ Госпо́дня, Го́спода.

Устрани́вся вся́кия сла́сти, блаже́нне, смертоно́сныя, тебе́ соде́лал еси́ всего́ нескве́рно зерца́ло боже́ственное, поя́: благослови́те, вся́ дела́ Госпо́дня, Го́спода.

Живоно́сну зарю́ от Еди́наго Божества́ Триипоста́снаго прие́м, яви́лся еси́ су́щим во тме́ со́лнце заблу́ждшим, — благослови́те, — поя́, — вся́ дела́ Госпо́дня, Го́спода.

Еще́ твоя́, я́ко А́велева, кро́вь и во ве́ки богодохнове́нныя догма́ты гла́сом я́сным Христо́ве Це́ркви пропове́дует, Макси́ме всеблаже́нне и превели́кий.

Отсече́ся рука́, пи́шет же боже́ственным пе́рстом, я́ко тро́стию и черни́лом, отре́занным язы́ком и твое́ю кро́вию честно́ю ве́ру в сердца́х правосла́вную.

Ста́л еси́ пред престо́лом Боже́ственным с му́ченики, и́хже ре́вности и ве́ры приобщи́лся еси́, о́тче, и на́с усво́й Влады́це и твоя́ подража́тели соде́лай.

Всю̀ мнѣ̀ бг҃одꙋхнове́ннꙋю ѿ медото́чнагѡ и҆ сла́дкагѡ твоегѡ̀ и҆ска́пай ѧ҆зы́ка, бж҃е́ственный маѯі́ме, благода́ть дх҃а.

Ѻ҆́гнь горѧ́щь ꙗ҆ви́лсѧ є҆сѝ на є҆́рєси, блаже́нне: ꙗ҆́кѡ бо тро́стїе сїѧ̑ и҆знꙋри́лъ є҆сѝ ре́вностїю дх҃а.

Безслове́сное предложи́сѧ ѿ ѕлочести́вѣйшагѡ произволе́нїѧ, є҆диново́льное ᲂу҆че́нїе: словесы́ же твои́ми, ѻ҆́тче, ѡ҆бличи́сѧ.

Велича́йшїй маѯі́мъ бл҃гочести́выѧ хрⷭ҇то́вы вѣ́ры всеи́стиннѡ проповѣ́дникъ же и҆ мꙋ́ченикъ показа́сѧ кро́вїю.

Маѯі́ме блаже́нне, ты̀ поще́нїемъ бы́лъ є҆сѝ бг҃олѣ́пное любомꙋ́дрїѧ и҆ чи́стое жили́ще.

И҆злїѧ̀ ѧ҆зы́къ тво́й рѣкꙋ̀ хрⷭ҇то́выхъ ᲂу҆че́нїй, бл҃гоче́стне, маѯі́ме всебл҃же́нне, премꙋ́дрости пита́тель.

Земноро́дныхъ тѧ̀ почита́ютъ, и҆ небе́сныхъ чи́ни чꙋдѧ́тсѧ: любо́вїю бо мꙋ́дрости показа́лсѧ є҆сѝ, ѻ҆́тче, ꙗ҆́кѡ безпло́тенъ.

Сꙋ́ровъ ᲂу҆́бѡ мꙋчи́тель, но терпѣ́нїе твоѐ непрекло́нно: тѣ́мъ ты̀ ᲂу҆́бѡ ᲂу҆блажи́лсѧ є҆сѝ, вселꙋка́вый же и҆зве́ржесѧ.

Состра́ждетъ тебѣ̀, маѯі́ме, ᲂу҆ченикѡ́въ дво́ица преблаже́ннаѧ, твои̑мъ страда́нїємъ приѡбщи́вшесѧ: тѣ́мже и҆ по́честей ра́внѡ полꙋчи́ша.

Тече́нїемъ твоеѧ̀ кро́ве напаѧ́ема цр҃ковь хрⷭ҇то́ва, прозѧба́етъ ѻ҆те́ческагѡ преда́нїѧ бжⷭ҇твенное сѣ́мѧ, твои́мъ ᲂу҆че́нїемъ, преподо́бне.

Ра́зꙋмъ земноро́дныхъ собра́въ и҆ нбⷭ҇ныхъ, впра́вдꙋ фїлосо́фъ и҆менꙋ́етсѧ маѯі́мъ.

Премꙋ́дрости безмѣ́рнымъ жела́нїемъ, хрⷭ҇та̀ твоегѡ̀ подо́бникъ и҆зрѧ́днѣйшїй ꙗ҆ви́лсѧ є҆сѝ, сла́вный маѯі́ме.

Гнѣ́вомъ и҆згна́нъ бы́лъ є҆сѝ мꙋчи́телѧ, ѡ҆брѣ́лъ же є҆сѝ, бл҃же́нне, і҆и҃са ᲂу҆тѣше́нїе.

Непреста́ннѡ прино́сиши бг҃ꙋ, бг҃омꙋ́дре, мольбꙋ̀, дꙋше́вныхъ же и҆ тѣле́сныхъ страсте́й и҆ тлѣ́нїѧ мѧ̀ и҆зба́вити.

И҆зсꙋши́сѧ є҆ресе́й и҆сто́чникъ мꙋ́тный ве́сь, сла́вне маѯі́ме, загражда́емь шꙋ́момъ ѧ҆зы́ка твоегѡ̀.

Ѡ҆чи́сти мѧ̀, є҆ди́не бл҃же, и҆ и҆сто́чникъ бл҃года́ти, хрⷭ҇тѐ, се́рдцꙋ моемꙋ̀ твоегѡ̀ преподо́бнагѡ моли́твами и҆сточѝ.

Є҆ди́но є҆стество̀ трⷪ҇цы, є҆ди́но хотѣ́нїе ре́клъ є҆сѝ, є҆ди́но дѣ́йство: бг҃а же вопло́щшагосѧ во двою̀ є҆стествꙋ̑, хотѣ̑нїю же и҆ дѣ̑йствꙋ проповѣ́далъ є҆сѝ, ѻ҆ц҃є́въ на́шихъ бж҃е, бл҃гослове́нъ є҆сѝ.

Не вѡ́ли двѣ̀ раздѣлѧ́ємыѧ, ра́зꙋма проти́вностїю, ка́чествомъ же па́че проповѣ́далъ є҆сѝ, ѻ҆́тче, є҆сте́ственнымъ ра́знствꙋющыѧ, ѻ҆ц҃є́въ на́шихъ бж҃е, бл҃гослове́нъ є҆сѝ.

Сто́лпъ правосла́вїѧ, бжⷭ҇твєннаѧ твоѧ̑ словеса̀, ѻ҆́тче, держа́ще, є҆ди́наго ѿ трⷪ҇цы во двꙋ́хъ сꙋщества́хъ и҆ во́лѧхъ почита́емъ, ѻ҆ц҃є́въ на́шихъ бж҃е, бл҃гослове́нъ є҆сѝ.

Весьма̀ возлюби́въ превозлюби́вшаго ро́дъ человѣ́ческїй, крⷭ҇тъ тво́й взѧ́лъ є҆сѝ, и҆ томꙋ̀, бл҃же́нне, сраспѧ́лсѧ є҆сѝ, благослови́те поѧ̀, дѣла̀ гдⷭ҇нѧ, гдⷭ҇а.

Оу҆страни́всѧ всѧ́кїѧ сла́сти, бл҃же́нне, смертоно́сныѧ, тебѐ содѣ́лалъ є҆сѝ всего̀ нескве́рно зерца́ло бж҃е́ственное, поѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Живоно́снꙋ зарю̀ ѿ є҆ди́нагѡ бжⷭ҇тва̀ трїѷпоста́снагѡ прїе́мъ, ꙗ҆ви́лсѧ є҆сѝ сꙋ́щымъ во тмѣ̀ со́лнце заблꙋ́ждшымъ, бл҃гослови́те, поѧ̀, всѧ̑ дѣла̀ гдⷭ҇нѧ, гдⷭ҇а.

Є҆щѐ твоѧ̀, ꙗ҆́кѡ а҆́велева, кро́вь и҆ во вѣ́ки бг҃одохнове́нныѧ догма́ты гла́сомъ ꙗ҆́снымъ хрⷭ҇то́вѣ цр҃кви проповѣ́дꙋетъ, маѯі́ме всебл҃же́нне и҆ превели́кїй.

Ѿсѣче́сѧ рꙋка̀, пи́шетъ же бж҃е́ственнымъ пе́рстомъ, ꙗ҆́кѡ тро́стїю и҆ черни́ломъ, ѿрѣ́заннымъ ѧ҆зы́комъ, и҆ твое́ю кро́вїю честно́ю вѣ́рꙋ въ сердца́хъ правосла́внꙋю.

Ста́лъ є҆сѝ пред̾ прⷭ҇то́ломъ бж҃е́ственнымъ съ мꙋ́ченики, и҆́хже ре́вности и҆ вѣ́ры приѡбщи́лсѧ є҆сѝ, ѻ҆́тче, и҆ на́съ ᲂу҆сво́й влⷣцѣ, и҆ твоѧ̑ подража́тели содѣ́лай.