Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ въ че́сть є҆ѧ̀ і҆кѡ́нъ, и҆менꙋ́емыхъ ᲂу҆мѧгче́нїе ѕлы́хъ серде́цъ и҆ семистрѣ́льнаѧ.

Минской (1500), и именуемых "Страстна'я" (1641) и "Семистрельная" (1830) икон Божией Матери 26 августа 2026

Конда́къ а҃

И҆збра́ннѣй дв҃ѣ мр҃і́и, превы́шшей всѣ́хъ дще́рей землѝ, мт҃ри сн҃а бж҃їѧ, є҆́юже сп҃си́тель въ мі́ръ прїи́де, со ᲂу҆миле́нїемъ взыва́емъ: воззрѝ на многоско́рбное житїѐ на́ше, воспомѧнѝ скѡ́рби и҆ болѣ̑зни, ꙗ҆̀же претерпѣ́ла є҆сѝ, и҆ сотворѝ съ на́ми по млⷭ҇рдїю твоемꙋ̀, да зове́мъ тѝ:

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

І҆́косъ а҃

А҆́гг҃лъ возвѣстѝ па́стырємъ виѳлеє́мскимъ ѡ҆ ржⷭ҇твѣ̀ сп҃си́телѧ мі́ра, и҆ съ ни́мъ мно́жество во́євъ нбⷭ҇ныхъ восхвалѧ́хꙋ бг҃а, пою́ще: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе. Ты́ же, ѽ мт҃и бж҃їѧ, не и҆мѣ́вши гдѣ̀ главы̀ приклони́ти, занѐ не бѣ̀ мѣ́ста во ѻ҆би́телехъ, родила̀ є҆сѝ сн҃а своего̀ пе́рвенца въ верте́пѣ, пови́ла є҆сѝ пелена́ми и҆ положи́ла є҆сѝ є҆го̀ во ꙗ҆́слехъ. Тѣ́мже ра́дость неизрече́ннꙋю се́рдца твоегѡ̀ вѣ́дꙋще, вопїе́мъ тѝ:

Ра́дꙋйсѧ, ѿ младе́нства грѧдꙋ́щемꙋ мессі́и послꙋжи́ти возжелѣ́вшаѧ: ра́дꙋйсѧ, чⷭ҇тотꙋ̀ па́че всѣ́хъ человѣ̑къ возлю́бльшаѧ.

Ра́дꙋйсѧ, пречꙋ́дное бл҃говѣ́стїе а҆рха́гг҃ломъ прїи́мшаѧ: ра́дꙋйсѧ, сп҃си́телѧ мі́ра ро́ждшаѧ.

Ра́дꙋйсѧ, воплоти́вшагѡсѧ бг҃а слове́сный сосꙋ́де: ра́дꙋйсѧ, цр҃ѧ̀ ца́рствꙋющихъ прⷭ҇то́ле.

Ра́дꙋйсѧ, верте́пъ въ нб҃са̀ прело́жшаѧ: ра́дꙋйсѧ, въ ржⷭ҇твѣ̀ и҆ по ржⷭ҇твѣ̀ дв҃а пребы́вшаѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ в҃

Ви́дѧще превѣ́чнаго млⷣнца пови́та, лежа́ща во ꙗ҆́слехъ, прише́дше, поклони́шасѧ є҆мꙋ̀ па́стырїе виѳлее́мстїи и҆ глаго́лаша рече́нное и҆̀мъ а҆́гг҃лы ѡ҆ ѻ҆троча́ти. Мр҃їа́мъ же соблюда́ше всѧ̑ глаго́лы сїѧ̑, слага́ющи въ се́рдцы свое́мъ. По проше́ствїи же ѻ҆смѝ дне́й ѡ҆брѣ́занъ бѣ̀ і҆и҃съ по зако́нꙋ мѡѷсе́овꙋ ꙗ҆́кѡ чл҃вѣ́къ. Воспѣва́юще смире́нїе и҆ терпѣ́нїе твоѐ въ попече́нїихъ ѡ҆ бг҃омлⷣнцѣ і҆и҃сѣ, прест҃а́ѧ бцⷣе, пое́мъ всебл҃го́мꙋ бг҃ꙋ: А҆ллилꙋ́їа.

І҆́косъ в҃

Ра́зꙋмъ и҆мꙋ́ща, въ бз҃ѣ ᲂу҆твержде́нный, и҆ соблюда́юща за́пѡвѣди бж҃їѧ, въ четыредесѧ́тый де́нь, є҆гда̀ и҆спо́лнишасѧ дні́е ѡ҆чище́нїѧ, вознесо́ста і҆и҃са во і҆ерⷭ҇ли́мъ роди́тєлѧ є҆гѡ̀, є҆́же поста́вити є҆го̀ пред̾ гдⷭ҇емъ и҆ да́ти за него̀ же́ртвꙋ, по рече́нномꙋ въ зако́нѣ гдⷭ҇ни. Мы́ же со бл҃гоговѣ́нїемъ ѡ҆ се́мъ воспомина́юще, возглаша́емъ бцⷣѣ си́це:

Ра́дꙋйсѧ, пре́жде ржⷭ҇тва̀ въ мт҃рь сп҃сꙋ пред̾избра́ннаѧ: ра́дꙋйсѧ, бл҃года́ти преиспо́лненнаѧ.

Ра́дꙋйсѧ, превѣ́чнаго млⷣнца пелена́ми пови́вшаѧ: ра́дꙋйсѧ, творца̀ вселе́нныѧ млеко́мъ пита́вшаѧ.

Ра́дꙋйсѧ, созда́телѧ во хра́мъ і҆ерⷭ҇ли́мскїй прине́сшаѧ: ра́дꙋйсѧ, та́мѡ ста́рцемъ сѷмеѡ́номъ ра́достнѡ срѣ́теннаѧ.

Ра́дꙋйсѧ, всѧ̑ глаго́лы бж҃їѧ въ се́рдцы свое́мъ слага́вшаѧ: ра́дꙋйсѧ, го́рькомꙋ прⷪ҇ро́чествꙋ ѡ҆ страда́нїихъ сн҃а твоегѡ̀ кро́ткѡ вне́млющаѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ г҃

Си́лою свы́ше ᲂу҆крѣплѧ́ема была̀ є҆сѝ, мт҃и бж҃їѧ, слы́шащи словеса̀ првⷣнагѡ сѷмеѡ́на: сѐ, лежи́тъ се́й на паде́нїе и҆ на воста́нїе мнѡ́гимъ во і҆и҃ли, и҆ въ зна́менїе прерѣка́емо, и҆ тебѣ́ же само́й дꙋ́шꙋ про́йдетъ ѻ҆рꙋ́жїе, ꙗ҆́кѡ да ѿкры́ютсѧ ѿ мно́гихъ серде́цъ помышлє́нїѧ. Ско́рбь ве́лїѧ ᲂу҆ѧзвѝ се́рдце прест҃ы́ѧ бцⷣы, ѻ҆ба́че бл҃года́тїю бжⷭ҇твенною ѡ҆сѣнѧ́ема, возопѝ бг҃ꙋ: А҆ллилꙋ́їа.

І҆́косъ г҃

И҆мѣ́ѧ ѕло́бꙋ лю́тꙋю въ се́рдцы свое́мъ, тща́сѧ и҆́рѡдъ погꙋби́ти ѻ҆троча̀, и҆ посла̀ и҆зби́ти всѧ̑ младе́нцы, сꙋ́щыѧ въ виѳлее́мѣ и҆ предѣ́лѣхъ є҆гѡ̀, ѿ двою̀ лѣ̑тꙋ и҆ нижа́йше. Ѻ҆ба́че велѣ́нїемъ бж҃їимъ, а҆́гг҃ломъ во снѣ̀ возвѣще́ннымъ, поѧ́тъ і҆ѡ́сифъ ѻ҆троча̀ и҆ мт҃рь є҆гѡ̀ но́щїю и҆ бѣжа̀ во є҆гѵ́петъ, и҆ пребы́сть та́мѡ до сме́рти и҆́рѡдовы. Сїѧ̑ многотрꙋ̑днаѧ стра̑нствїѧ, ра́ди бг҃омлⷣнца под̾ѧ̑таѧ, воспомина́юще, со ᲂу҆миле́нїемъ воспое́мъ тѝ, прест҃а́ѧ бцⷣе:

Ра́дꙋйсѧ, тѧготы̑ пꙋтеше́ствїѧ да́льнѧгѡ терпѣли́внѡ поне́сшаѧ: ра́дꙋйсѧ, і҆́дѡлы, сокрꙋ́шшыѧсѧ си́лою сн҃а твоегѡ̀, зрѣ́вшаѧ.

Ра́дꙋйсѧ, посредѣ̀ нечести́выхъ ꙗ҆зы̑чникъ жи́ти не ᲂу҆боѧ́вшаѧсѧ: ра́дꙋйсѧ, велѣ́нїемъ бж҃їимъ въ назаре́тъ съ сн҃омъ и҆ ѡ҆брꙋ́чникомъ возвра́щшаѧсѧ.

Ра́дꙋйсѧ, въ нищетѣ̀ и҆ трꙋдѣ́хъ, бл҃годарѧ́щи бг҃а, пребыва́вшаѧ: ра́дꙋйсѧ, пресла́дкаго бг҃омлⷣнца во ѡ҆б̾ѧ́тїихъ носи́вшаѧ.

Ра́дꙋйсѧ, преди̑внаѧ дѣла̀ бжⷭ҇твеннагѡ сн҃а вы́нꙋ созерца́вшаѧ: ра́дꙋйсѧ, та́инствєннымъ глаго́лѡмъ є҆гѡ̀ прилѣ́жнѡ внима́вшаѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ д҃

Бꙋ́рѧ ско́рби ѡ҆держа̀ пречⷭ҇тꙋю мт҃рь со ѡ҆брꙋ́чникомъ, є҆гда̀ на пꙋтѝ ѿ і҆ерⷭ҇ли́ма не ѡ҆брѣто́ста во дрꙋжи́нѣ ѻ҆́трока і҆и҃са. Возврати̑вшасѧ же во і҆ерⷭ҇ли́мъ, по трїе́хъ дне́хъ ѡ҆брѣто́ста є҆го̀ въ це́ркви, сѣдѧ́ща посредѣ̀ ᲂу҆чи́телей, послꙋ́шающа и҆ вопроша́юща и҆̀хъ, и҆ речѐ къ немꙋ̀ мт҃и є҆гѡ̀: ча́до, что̀ сотворѝ на́ма та́кѡ; Сѐ ѻ҆те́цъ тво́й и҆ а҆́зъ, болѧ̑ща, и҆ска́хома тебѐ. И҆ речѐ къ ни́ма і҆и҃съ: что̀ ꙗ҆́кѡ и҆ска́ста менѐ; Не вѣ́ста ли, ꙗ҆́кѡ въ тѣ́хъ, ꙗ҆̀же ѻ҆ц҃а̀ моегѡ̀, досто́итъ бы́ти мѝ; Ты́ же, пречⷭ҇таѧ, дивѧ́щисѧ глаго́лѡмъ сн҃а своегѡ̀, соблюда́ше сїѧ̑ въ се́рдцы свое́мъ, вопїю́щи бг҃ꙋ: А҆ллилꙋ́їа.

І҆́косъ д҃

Слы́шаша лю́дїе, ꙗ҆́кѡ гдⷭ҇ь і҆и҃съ прохо́дитъ странꙋ̀ галїле́йскꙋю, ᲂу҆ча̀ на со́нмищихъ, проповѣ́дꙋѧ є҆ѵⷢ҇лїе црⷭ҇твїѧ и҆ и҆сцѣлѧ́ѧ всѧ́къ недꙋ́гъ и҆ всѧ́кꙋ ꙗ҆́зю въ лю́дехъ. Сегѡ̀ ра́ди приведо́ша къ немꙋ̀ всѧ̑ болѧ́щыѧ разли́чными недꙋ̑ги и҆ бѣ̑сы ѡ҆держи̑мыѧ, и҆ и҆сцѣлѝ и҆̀хъ. Ты́ же, мт҃и бж҃їѧ, сѷмеѡ́ново прорече́нїе воспомина́ющи, разꙋмѣ́ла є҆сѝ, ꙗ҆́кѡ ско́рѡ прїи́детъ ча́съ, є҆гда̀ сн҃ъ тво́й себѐ въ же́ртвꙋ за грѣхѝ мі́ра принесе́тъ. Тѣ́мже ᲂу҆бл҃жа́емъ тѧ̀ си́це:

Ра́дꙋйсѧ, цр҃и́це нб҃сѐ и҆ землѝ: ра́дꙋйсѧ, та́инственнаѧ дх҃о́внаѧ ски́нїе.

Ра́дꙋйсѧ, себѐ въ чⷭ҇тꙋю же́ртвꙋ бг҃ꙋ прине́сшаѧ: ра́дꙋйсѧ, херꙋві̑мъ чтⷭ҇нѣ́йшаѧ и҆ серафі̑мъ сла́внѣйшаѧ.

Ра́дꙋйсѧ, мі́ръ ѿ пото́па грѣхо́внагѡ сп҃сшаѧ: ра́дꙋйсѧ, главꙋ̀ дре́внѧгѡ ѕмі́ѧ сте́ршаѧ.

Ра́дꙋйсѧ, є҆ди́на чⷭ҇таѧ и҆ бл҃гослове́ннаѧ въ жена́хъ: ра́дꙋйсѧ, бл҃года́ти дх҃а ст҃а́гѡ и҆збра́нный сосꙋ́де.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ є҃

Бг҃ъ сы́й и҆́стиненъ и҆ чл҃вѣ́къ соверше́нъ, ѡ҆блича́ше і҆и҃съ го́рдость фарїсе́ѡвъ, мнѣ́вшихъ себѐ првⷣники бы́ти. Ті́и же, слы́шаще при̑тчи є҆гѡ̀, разꙋмѣ́ша, ꙗ҆́кѡ ѡ҆ ни́хъ глаго́летъ, и҆ и҆ска́ша ꙗ҆́ти є҆го̀, ѻ҆ба́че боѧ́шасѧ наро́да, поне́же ꙗ҆́кѡ прⷪ҇ро́ка є҆го̀ и҆мѣ́ѧхꙋ. Сїю̀ ѕло́бꙋ бг҃оꙋбі́йственнꙋю вѣ́дꙋщи, болѣ́зноваше бцⷣа ѡ҆ сн҃ѣ свое́мъ возлю́бленнѣмъ, да не ка́кѡ лю́тїи вразѝ ᲂу҆бїю́тъ є҆го̀. Ѻ҆ба́че бг҃ꙋ, та́инство сп҃се́нїѧ на́шегѡ содѣва́ющемꙋ, съ наде́ждею взыва́ше: А҆ллилꙋ́їа.

І҆́косъ є҃

Ви́дѣвше воскреше́нїе ла́зарево, и҆до́ша нѣ́цыи ѿ і҆ꙋдє́й къ фарїсе́ѡмъ и҆ повѣ́даша, ꙗ҆̀же сотворѝ і҆и҃съ. Рече́ же каїа́фа, а҆рхїере́й сы́й лѣ́тꙋ томꙋ̀, въ фарїсе́йстѣмъ со́нмищи: ᲂу҆́не є҆́сть на́мъ, да є҆ди́нъ чл҃вѣ́къ ᲂу҆́мретъ за лю́ди, а҆ не ве́сь ꙗ҆зы́къ поги́бнетъ. И҆ ѿ сегѡ̀ днѐ совѣща́ша, да ᲂу҆бїю́тъ є҆го̀. І҆ꙋ́да же і҆скарїѡ́тскїй, є҆ди́нъ ѿ ѻ҆боюна́десѧте, и҆́де ко а҆рхїере́ѡмъ, преда́ти хотѧ̀ ᲂу҆ч҃тлѧ своего̀: ѻ҆ни́ же слы́шавше, возра́довашасѧ и҆ ѡ҆бѣща́ша є҆мꙋ̀ сре́бреники да́ти. Семꙋ̀ беззако́нномꙋ совѣ́тꙋ ᲂу҆жаса́ющесѧ, вопїе́мъ пречⷭ҇тѣй, сн҃ꙋ своемꙋ̀ спострада́вшей:

Ра́дꙋйсѧ, крⷭ҇тъ скорбе́й ве́лїихъ поне́сшаѧ: ра́дꙋйсѧ, во́ли бж҃їѧ николи́же преслꙋ́шавшаѧ.

Ра́дꙋйсѧ, смире́нїѧ бжⷭ҇твеннагѡ чꙋ́дный ѻ҆́бразе: ра́дꙋйсѧ, терпѣ́нїѧ премꙋ́драѧ наста́внице.

Ра́дꙋйсѧ, земны́ѧ сла́дости и҆ весе́лїѧ не возлю́бльшаѧ: ра́дꙋйсѧ, нбⷭ҇нагѡ бл҃же́нства па́че а҆́гг҃лъ и҆ человѣ̑къ и҆спо́лненнаѧ.

Ра́дꙋйсѧ, въ мл҃твѣ по́мощь вы́нꙋ ѡ҆брѣта́вшаѧ: ра́дꙋйсѧ, всѧ̑ ны̀ взыва́ти къ бг҃ꙋ въ ско́рби наꙋчи́вшаѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ ѕ҃

Проповѣ́дникѡмъ сло́ва, бжⷭ҇твєннымъ ᲂу҆ч҃нкѡ́мъ на та́йнѣй ве́чери ᲂу҆мы̀ ᲂу҆ч҃тль но́ги, ѻ҆́бразъ сп҃си́тельнагѡ смире́нїѧ показꙋ́ѧ. Ꙗ҆влѧ́ѧ же любо́вь свою̀ къ ро́дꙋ человѣ́ческомꙋ, бл҃гослови́въ и҆ преломи́въ хлѣ́бъ, дадѐ и҆̀мъ, ре́къ: прїими́те, ꙗ҆ди́те, сїѐ є҆́сть тѣ́ло моѐ, и҆ прїе́мъ ча́шꙋ и҆ хвалꙋ̀ возда́въ, дадѐ и҆̀мъ, глаго́лѧ: сїѧ̀ є҆́сть кро́вь моѧ̀ но́вагѡ завѣ́та, ꙗ҆́же за мнѡ́гїѧ и҆злива́емаѧ во ѡ҆ставле́нїе грѣхѡ́въ. Бл҃годарѧ́ще млⷭ҇тиваго бг҃а за млⷭ҇рдїе є҆гѡ̀ къ на́мъ неизрече́нное, въ та́инствѣ бжⷭ҇твенныѧ є҆ѵхарі́стїи ꙗ҆влѧ́емое, пое́мъ є҆мꙋ̀: А҆ллилꙋ́їа.

І҆́косъ ѕ҃

Возсїѧ̀ бл҃года́ть и҆ и҆́стина ᲂу҆ч҃нкѡ́мъ, є҆гда̀ возвѣстѝ и҆̀мъ хрⷭ҇то́съ: ны́нѣ просла́висѧ сн҃ъ чл҃вѣ́ческїй, и҆ бг҃ъ просла́висѧ ѡ҆ не́мъ. Вне́млюще си̑мъ словесє́мъ бжⷭ҇твєннымъ и҆ домострои́тельствꙋ сп҃се́нїѧ на́шегѡ дивѧ́щесѧ, тебѣ̀, пречⷭ҇тѣй мт҃ри сп҃си́телѧ на́шегѡ, возглаша́емъ:

Ра́дꙋйсѧ, ѻ҆ц҃а̀ нбⷭ҇нагѡ дщѝ бл҃гослове́ннаѧ: ра́дꙋйсѧ, черто́же сло́ва всест҃ы́й.

Ра́дꙋйсѧ, дх҃а ст҃а́гѡ вмѣсти́лище: ра́дꙋйсѧ, ст҃ы́ѧ трⷪ҇цы ѻ҆би́теле.

Ра́дꙋйсѧ, би́серъ бжⷭ҇твенный произве́дшаѧ: ра́дꙋйсѧ, ржⷭ҇тво́мъ твои́мъ ра̑йскїѧ двє́ри ѿве́рзшаѧ.

Ра́дꙋйсѧ, зна́мєнїѧ млⷭ҇ти бж҃їѧ собо́ю ꙗ҆влѧ́ющаѧ: ра́дꙋйсѧ, ѿ ти́ны грѣхо́вныѧ на́съ сп҃са́ющаѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ з҃

Жела́нїемъ возжелѣ́хъ сїю̀ па́схꙋ ꙗ҆́сти съ ва́ми, пре́жде да́же не прїимꙋ̀ мꙋ́къ, глаго́ла хрⷭ҇то́съ ᲂу҆ч҃нкѡ́мъ. Оу҆твержда́ѧ же и҆̀хъ за́пѡвѣди є҆гѡ̀ храни́ти, ѡ҆бѣща̀ посла́ти и҆на́го ᲂу҆тѣ́шителѧ, дх҃а и҆́стины, и҆́же ѿ ѻ҆ц҃а̀ и҆схо́дитъ, да наста́витъ и҆̀хъ на всѧ́кꙋ и҆́стинꙋ. Е҆гда́ же въ де́нь ст҃ы́ѧ пѧтьдесѧ́тницы и҆спо́лни дх҃ъ ст҃ы́й пречⷭ҇тꙋю бцⷣꙋ и҆ а҆пⷭ҇лы, ѿкры́шасѧ и҆̀мъ всѧ̑ глагѡ́ланнаѧ ѿ гдⷭ҇а, и҆ возгласи́ша ті́и: А҆ллилꙋ́їа.

І҆́косъ з҃

Но́вꙋю за́повѣдь дадѐ сп҃си́тель ᲂу҆ч҃нкѡ́мъ свои̑мъ: да лю́бите дрꙋ́гъ дрꙋ́га: ꙗ҆́коже возлюби́хъ вы̀, да и҆ вы̀ лю́бите себѐ. Ѡ҆ се́мъ разꙋмѣ́ютъ всѝ, ꙗ҆́кѡ моѝ ᲂу҆ч҃нцы̀ є҆стѐ, а҆́ще любо́вь и҆́мате междꙋ̀ собо́ю. Ты́ же, ѽ мт҃и гдⷭ҇нѧ, па́че всѣ́хъ человѣ̑къ глаго́лѡмъ сн҃а твоегѡ̀ внима́вшаѧ и҆ съ любо́вїю ты̑ѧ храни́вшаѧ, млⷭ҇рдїе неисчерпа́емое къ ро́дꙋ человѣ́ческомꙋ и҆́маши, вы́нꙋ ѡ҆ на́съ пред̾ гдⷭ҇емъ хода́тайствꙋеши, дрꙋ́гъ дрꙋ́га люби́ти повелѣва́еши и҆ сердца̀

на̑ша ѕла̑ѧ ᲂу҆мѧгча́еши. Сегѡ̀ ра́ди пое́мъ тѝ:

Ра́дꙋйсѧ, братолю́бїѧ наста́внице: ра́дꙋйсѧ, враждꙋ́ющихъ ᲂу҆мире́нїе.

Ра́дꙋйсѧ, безчи́нныхъ ѡ҆бличи́тельнице: ра́дꙋйсѧ, ѡ҆би́димыхъ ᲂу҆тѣ́шительнице.

Ра́дꙋйсѧ, гони́мыхъ защище́нїе: ра́дꙋйсѧ, всѣ́хъ скорбѧ́щихъ ра́досте.

Ра́дꙋйсѧ, ᲂу҆толе́нїе всѣ́хъ печа́лей: ра́дꙋйсѧ, непреста́ннѡ за ны̀ молѧ́щаѧсѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ и҃

Стра́нствїѧ влⷣчнѧ и҆ безсме́ртныѧ трапе́зы причасти́вшїисѧ, и҆зыдо́ша ᲂу҆ч҃нцы̀ со ᲂу҆ч҃тлемъ на го́рꙋ є҆леѡ́нскꙋю. Прїи́де же та́мѡ і҆ꙋ́да со спі́рою и҆ слꙋги̑ а҆рхїере́йскими, лобза́нїемъ предаѧ̀ сн҃а человѣ́ческаго. Ті́и ꙗ҆́ша і҆и҃са и҆ свѧза́ша є҆го̀, и҆ ведо́ша ко а҆́ннѣ пе́рвѣе, посе́мъ же къ каїа́фѣ а҆рхїере́ови и҆ въ претѡ́ръ къ пїла́тꙋ, глаго́люще є҆го̀ ѕлодѣ́ѧ бы́ти. Мт҃и же бж҃їѧ, сме́ртнагѡ совѣ́та на сн҃а своего̀ возлю́бленнаго ѡ҆жида́ющи, ѻ҆ба́че со смире́нїемъ всѧ̑ сїѧ̑ прїе́млющи, вопїѧ́ше бг҃ꙋ: А҆ллилꙋ́їа.

І҆́косъ и҃

Ве́сь бѣ̀ ра́нами ᲂу҆ѧ́звенъ, сло́ве бж҃їй, є҆гда̀ во́ини рꙋга́хꙋсѧ тебѣ̀, ᲂу҆жѐ стра́шное бичева́нїе претерпѣ́вшемꙋ, и҆ спле́тше вѣне́цъ ѿ те́рнїѧ, возложи́ша на главꙋ̀ твою̀, и҆ въ ри́зꙋ багрѧ́нꙋ ѡ҆бле́кше тѧ̀, глаго́лахꙋ: ра́дꙋйсѧ, цр҃ю̀ і҆ꙋде́йскїй, и҆ бїѧ́хꙋ тѧ̀ по лани́тома. І҆ꙋдє́и, ꙗ҆́кѡ ѕвѣ́рїе ди́вїи, вопїѧ́хꙋ пїла́тꙋ: распнѝ є҆го̀! Мы́ же мт҃ри бж҃їей, бїє́нїѧ и҆ поношє́нїѧ сн҃а своегѡ̀ ви́дѣвшей и҆ го́рцѣ страда́вшей, ᲂу҆ми́льнѡ взыва́емъ:

Ра́дꙋйсѧ, сн҃а своего̀ возлю́бленнаго на сꙋди́ще пре́даннаго зрѣ́вшаѧ: ра́дꙋйсѧ, беззако́нный сꙋ́дъ ѕлочести́выхъ сꙋде́й слы́шавшаѧ.

Ра́дꙋйсѧ, всѣ̑мъ болѣ́знемъ возлю́бленнагѡ ча́да спострада́вшаѧ: ра́дꙋйсѧ, зрѣ́нїе нестерпи́мое стрⷭ҇те́й є҆гѡ̀ претерпѣ́вшаѧ.

Ра́дꙋйсѧ, бли́з̾ сн҃а и҆ бг҃а стра́ждꙋщагѡ вы́нꙋ пребыва́вшаѧ: ра́дꙋйсѧ, ра̑ны, багрѧни́цꙋ и҆ вѣне́цъ терно́венъ носѧ́щаго ви́дѣвшаѧ.

Ра́дꙋйсѧ, ро́пота ника́коже допꙋсти́вшаѧ: ра́дꙋйсѧ, и҆скꙋпле́нїѧ человѣ́кѡвъ соверше́нїе ᲂу҆разꙋмѣва́вшаѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ ѳ҃

Всѝ ро́ди бл҃жа́тъ тѧ̀, чтⷭ҇нѣ́йшꙋю херꙋві̑мъ и҆ сла́внѣйшꙋю без̾ сравне́нїѧ серафі̑мъ, влⷣчцꙋ и҆ мт҃рь и҆зба́вителѧ на́шегѡ, ржⷭ҇тво́мъ бо твои́мъ ра́дость всемꙋ̀ мі́рꙋ принесла̀ є҆сѝ, послѣди́ же ско́рбь ве́лїю и҆мѣ́ла є҆сѝ, ви́дѧщи сн҃а своего̀ возлю́бленнаго на порꙋга́нїе, бїе́нїе и҆ сме́рть пре́даннаго. Мы́ же ᲂу҆миле́нное пѣ́нїе прино́симъ тѝ, пречⷭ҇таѧ, вопїю́ще всемогꙋ́щемꙋ бг҃ꙋ: А҆ллилꙋ́їа.

І҆́косъ ѳ҃

Вѣті̑и многовѣща́ннїи та́инства сп҃си́тельнагѡ крⷭ҇тнагѡ разꙋмѣ́ти не мо́гꙋтъ. Крⷭ҇тъ бо носѧ̀, взы́де гдⷭ҇ь на голго́ѳꙋ, и҆дѣ́же во́ини пропѧ́ша є҆го̀. Бг҃омт҃и же, ви́дѣвши сн҃а своего̀ безсла́вна, на́га на дре́вѣ, возопѝ: ᲂу҆вы̀ мнѣ̀, ча́до моѐ, ᲂу҆вы̀ мнѣ̀, свѣ́те мо́й, дꙋ́шꙋ про́йде мнѣ̀ ѻ҆рꙋ́жїе по рече́нїю првⷣнагѡ сѷмеѡ́на. І҆и҃съ же, ви́дѣвъ мт҃рь и҆ ᲂу҆ч҃нка̀, є҆го́же люблѧ́ше, глаго́ла мт҃ри свое́й: же́но, сѐ сы́нъ тво́й: пото́мъ глаго́ла ᲂу҆ч҃нкꙋ̀: сѐ мт҃и твоѧ̀. Сегѡ̀ ра́ди взыва́емъ тѝ, человѣ́ки всѧ̑ ѡ҆ гдⷭ҇ѣ въ сыновство̀ прїѧ́вшей:

Ра́дꙋйсѧ, при крⷭ҇тѣ̀ распѧ́тагѡ неѿстꙋ́пнѡ предстоѧ́вшаѧ: ра́дꙋйсѧ, ѡ҆ста́вленнаго всѣ́ми сн҃а и҆ гдⷭ҇а не ѡ҆ста́вльшаѧ.

Ра́дꙋйсѧ, го́рцѣ се́рдцемъ болѣ́зновавшаѧ: ра́дꙋйсѧ, стена̑нїѧ и҆ сле́зы тє́плыѧ и҆сточа́вшаѧ.

Ра́дꙋйсѧ, а҆́гнца, за человѣ́ки закла́ннагѡ, мт҃и: ра́дꙋйсѧ, страда́нїй сп҃си́телѧ соприча́стнице.

Ра́дꙋйсѧ, всѧ́кою ꙗ҆́звою съ ни́мъ ᲂу҆ѧзвлѧ́вшаѧсѧ: ра́дꙋйсѧ, въ мꙋ́кахъ го́рькихъ на бг҃а ᲂу҆пова́вшаѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ і҃

Сп҃стѝ хотѧ̀ ро́дъ человѣ́ческїй, возше́лъ є҆сѝ на крⷭ҇тъ, і҆и҃се сп҃се на́шъ. Чⷭ҇таѧ же дв҃а, пла́чꙋщи, глаго́лаше: сн҃е мо́й и҆ бж҃е предвѣ́чный, тво́рче всѣ́хъ тва́рей, гдⷭ҇и! Ка́кѡ терпи́ши на крⷭ҇тѣ̀ стрⷭ҇ть: Ѡ҆ стра́шнѣмъ твое́мъ ржⷭ҇твѣ̀ и҆ стра́ннѣмъ, сн҃е мо́й, па́че всѣ́хъ ма́терей возвели́чена бы́хъ а҆́зъ, но ᲂу҆вы̀ мнѣ̀: ны́нѣ тѧ̀ ви́дѧщи на дре́вѣ, распала́юсѧ ᲂу҆тро́бою. Прославлѧ́юще млⷭ҇рдїе ѻ҆ц҃а̀ нбⷭ҇нагѡ, и҆́же та́кѡ возлюбѝ мі́ръ, ꙗ҆́кѡ сн҃а своего̀ є҆диноро́днаго ѿдадѐ на крⷭ҇тнꙋю сме́рть, да и҆скꙋ́питъ ны̀ ѿ вѣ́чныѧ сме́рти, вопїе́мъ є҆мꙋ̀: А҆ллилꙋ́їа.

І҆́косъ і҃

Стѣна̀ и҆ ѡ҆гражде́нїе бꙋ́ди на́мъ, влⷣчце, и҆знемога́ющымъ въ ско́рбехъ и҆ болѣ́знехъ, ты́ бо лютѣ́йшꙋю па́че всѣ́хъ болѣ́знь претерпѣ́ла є҆сѝ, сн҃а своего̀ на крⷭ҇тѣ̀ ᲂу҆ме́рша зрѧ́щи и҆ стенѧ́щи: сѐ, свѣ́тъ мо́й сла́дкїй, наде́жда и҆ живо́тъ мо́й бл҃гі́й, бг҃ъ мо́й, ᲂу҆гасѐ на крⷭ҇тѣ̀, и҆ проси́ла є҆сѝ бл҃гоѻбра́знаго: потщи́сѧ, і҆ѡ́сифе, къ пїла́тꙋ пристꙋпи́ти и҆ просѝ є҆го̀ снѧ́ти съ дре́ва ᲂу҆ч҃тлѧ твоего̀. Мы́ же со бл҃гоговѣ́нїемъ вели́чїю терпѣ́нїѧ твоегѡ̀ вне́млюще, состра́ждемъ тѝ и҆ вопїе́мъ:

Ра́дꙋйсѧ, свѣ́та своего̀ сла́дкаго на́га и҆ ᲂу҆ѧ́звена мертвеца̀ зрѣ́вшаѧ: ра́дꙋйсѧ, ме́ртва и҆ бездыха́нна пребл҃га́го гдⷭ҇а ви́дѣвшаѧ.

Ра́дꙋйсѧ, тѣ́ло сн҃а твоегѡ̀ возлю́бленнагѡ лобыза́вшаѧ: ра́дꙋйсѧ, плащани́цею ѡ҆бви́таго рыда́вшаѧ.

Ра́дꙋйсѧ, сн҃а своего̀ гро́бꙋ преда́вшаѧ: ра́дꙋйсѧ, всѧ̑ ꙗ҆̀же на землѝ скѡ́рбнаѧ претерпѣ́вшаѧ.

Ра́дꙋйсѧ, стра́ждꙋщихъ бл҃года́тнаѧ ᲂу҆тѣ́шительнице: ра́дꙋйсѧ, та́йнꙋ крⷭ҇тнагѡ пꙋтѝ на́мъ ѿкрыва́ющаѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ а҃і

Пѣ́нїе всеꙋмиле́нное тебѣ̀, сп҃си́телю мі́ра, прино́симъ, на крⷭ҇тѣ̀ дх҃ъ и҆спꙋсти́вшемꙋ и҆ согрѣше́нїй на́шихъ рꙋкописа́нїе растерза́вшемꙋ. Пречⷭ҇тѣй же мт҃ри въ та́йнѣ ты̀ провѣща́лъ є҆сѝ: ѽ ка́кѡ ᲂу҆таи́ласѧ тебє̀ є҆́сть бе́здна щедро́тъ: Тва́рь бо мою̀ хотѧ̀ сп҃стѝ, и҆зво́лихъ ᲂу҆мре́ти. Но и҆ воскрⷭ҇нꙋ, и҆ тебѐ возвели́чꙋ, ꙗ҆́кѡ бг҃ъ нб҃сѐ и҆ землѝ. Бцⷣа же речѐ: воспою̀ млⷭ҇рдїе твоѐ, чл҃вѣколю́бче, покланѧ́юсѧ бога́тствꙋ млⷭ҇ти твоеѧ̀, влⷣко. Созда́нїе бо твоѐ хотѧ̀ сп҃стѝ, сме́рть под̾ѧ́лъ є҆сѝ, но воскрⷭ҇нїемъ твои́мъ, сп҃се, поми́лꙋй всѣ́хъ на́съ, вопїю́щихъ тебѣ̀: А҆ллилꙋ́їа.

І҆́косъ а҃і

Свѣтоно́сный а҆рха́гг҃лъ ра́дꙋйсѧ па́ки возвѣстѝ тебѣ̀, дв҃о: тво́й сн҃ъ воскр҃се тридне́венъ ѿ гро́ба и҆ мє́ртвыѧ воздви́гнꙋвый! И҆ печа́ль твоѧ̀ въ ра́дость ве́лїю преложи́сѧ. Ны́нѣ же і҆кѡ́на твоѧ̀, семистрѣ́льнаѧ и҆менꙋ́емаѧ, страда̑нїѧ твоѧ̑ и҆з̾ѡбража́ющаѧ, возвѣща́етъ на́мъ та́инство крⷭ҇та̀, въ не́мже бл҃года́тнаѧ ра́дость сокрове́на є҆́сть, и҆ и҆́мже всѝ ка́ющїисѧ воскрⷭ҇нїе срѣта́ютъ и҆ на нб҃са̀ восхо́дѧтъ, прест҃ѣ́й бцⷣѣ зовꙋ́ще:

Ра́дꙋйсѧ, живоно́снагѡ гро́ба ѿлꙋчи́тисѧ не восхотѣ́вшаѧ: ра́дꙋйсѧ, пре́жде всѣ́хъ воскрⷭ҇шаго срѣ́тившаѧ.

Ра́дꙋйсѧ, ра́дости неизрече́нныѧ и҆спо́лнившаѧсѧ: ра́дꙋйсѧ, мно́гажды ꙗ҆ви́вшагосѧ ви́дѣти сподо́бившаѧсѧ.

Ра́дꙋйсѧ, во бл҃же́нствѣ неизрече́ннѣмъ съ сн҃омъ твои́мъ и҆ бг҃омъ пребыва́ющаѧ: ра́дꙋйсѧ, погиба́ющихъ грѣ́шникѡвъ сп҃са́ющаѧ.

Ра́дꙋйсѧ, ка́ющихсѧ млⷭ҇рдаѧ предста́тельнице: ра́дꙋйсѧ, сиро́тъ нбⷭ҇наѧ мт҃и.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ в҃і

Бл҃года́ть пода́ждь на́мъ, прест҃а́ѧ бцⷣе, чтⷭ҇ны̑ѧ і҆кѡ́ны твоѧ̑ почита́ющымъ! Съ ѻ҆́браза бо нѣ́коегѡ дре́внѧгѡ списа́сѧ і҆кѡ́на твоѧ̀, семистрѣ́льнаѧ и҆менꙋ́емаѧ, на не́йже седмїю̀ стрѣла́ми, се́рдце твоѐ ᲂу҆ѧзвлѧ́ющими, глꙋбина̀ страда́нїѧ твоегѡ̀ и҆з̾ѡбрази́сѧ. Ѻ҆ба́че нерадѣ́нїѧ ра́ди слꙋжи́телей твои́хъ, небреже́на и҆ попира́ема ходѧ́щими на колоко́льнѣ въ ве́си то́шенской въ во́логодскихъ предѣ́лѣхъ бѣ̀ сїѧ̀. Є҆гда́ же нѣ́кїй ра́бъ бж҃їй лю́тѣ стражда̀, ѿкрове́нїѧ ѡ҆ цѣле́бнѣй бл҃года́ти ѻ҆́браза сегѡ̀ сподо́бисѧ, па́ки ѡ҆брѣ́тена и҆ во хра́мѣ ст҃ѣ́мъ возложе́на бы́сть, да всѝ вѣ́рнїи возгласѧ́тъ бг҃ꙋ: А҆ллилꙋ́їа.

І҆́косъ в҃і

Пою́ще со ᲂу҆миле́нїемъ моле́бное пѣ́нїе тебѣ̀, мт҃и бж҃їѧ, ѡ҆бнесо́ша ѡ҆́крестъ гра́да лю́дїе во́логодстїи ѻ҆́бразъ тво́й, чꙋдотворе́нїѧ и҆спо́лненный, є҆гда̀ мо́ромъ лю́тымъ премно́зїи ᲂу҆мира́хꙋ. А҆́бїе мо́ръ преста̀, вси́ же вѣ́рнїи, бл҃годарѧ́ще тѧ̀, но́вый спи́сокъ семистрѣ́льнагѡ ѻ҆́браза списа́ша, и҆́же та́кожде чꙋдесы̀ мно́гими просла́висѧ. Ѡ҆ се́мъ ра́дꙋющесѧ, зове́мъ тѝ:

Ра́дꙋйсѧ, пречꙋ́дными і҆кѡ́нами въ мі́рѣ чꙋдотворѧ́щаѧ: ра́дꙋйсѧ, всѣ̑мъ просѧ́щымъ бл҃года́ть и҆з̾ѻби́льнѡ и҆злива́ющаѧ.

Ра́дꙋйсѧ, вдѡ́въ неѡскꙋдѣва́ющаѧ пита́тельнице: ра́дꙋйсѧ, бл҃годѣѧ́нїй живоно́сный и҆сто́чниче.

Ра́дꙋйсѧ, врачмѝ ѡ҆ста́вленныхъ цѣли́тельнице: ра́дꙋйсѧ, пра́вѧщихъ и҆ ца́рствꙋющихъ всецр҃и́це.

Ра́дꙋйсѧ, мона́шествꙋющихъ пречⷭ҇таѧ наста́внице: ра́дꙋйсѧ, се́рдцꙋ сокрꙋше́нномꙋ ѿра́дꙋ подаю́щаѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ г҃і

Ѽ всепѣ́таѧ мт҃и, ско́рбь и҆ болѣ́знь неизрече́ннꙋю ᲂу҆ крⷭ҇та̀ сн҃а твоегѡ̀ и҆ бг҃а претерпѣ́вшаѧ, и҆ въ ра́дости неизглаго́ланнѣй воскрⷭ҇шаго срѣ́тившаѧ! Внемлѝ воздыха́нїємъ и҆ слеза́мъ на́шымъ, ᲂу҆мѧгчѝ сердца̀ востаю́щихъ на на́съ, и҆зба́ви ѿ скорбе́й, болѣ́зней и҆ вѣ́чныѧ сме́рти всѣ́хъ ᲂу҆пова́ющихъ на неизрече́нное твоѐ млⷭ҇рдїе и҆ вопїю́щихъ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ возвѣстѝ па́стырємъ виѳлеє́мскимъ ѡ҆ ржⷭ҇твѣ̀ сп҃си́телѧ мі́ра, и҆ съ ни́мъ мно́жество во́євъ нбⷭ҇ныхъ восхвалѧ́хꙋ бг҃а, пою́ще: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе. Ты́ же, ѽ мт҃и бж҃їѧ, не и҆мѣ́вши гдѣ̀ главы̀ приклони́ти, занѐ не бѣ̀ мѣ́ста во ѻ҆би́телехъ, родила̀ є҆сѝ сн҃а своего̀ пе́рвенца въ верте́пѣ, пови́ла є҆сѝ пелена́ми и҆ положи́ла є҆сѝ є҆го̀ во ꙗ҆́слехъ. Тѣ́мже ра́дость неизрече́ннꙋю се́рдца твоегѡ̀ вѣ́дꙋще, вопїе́мъ тѝ:

Ра́дꙋйсѧ, ѿ младе́нства грѧдꙋ́щемꙋ мессі́и послꙋжи́ти возжелѣ́вшаѧ: ра́дꙋйсѧ, чⷭ҇тотꙋ̀ па́че всѣ́хъ человѣ̑къ возлю́бльшаѧ.

Ра́дꙋйсѧ, пречꙋ́дное бл҃говѣ́стїе а҆рха́гг҃ломъ прїи́мшаѧ: ра́дꙋйсѧ, сп҃си́телѧ мі́ра ро́ждшаѧ.

Ра́дꙋйсѧ, воплоти́вшагѡсѧ бг҃а слове́сный сосꙋ́де: ра́дꙋйсѧ, цр҃ѧ̀ ца́рствꙋющихъ прⷭ҇то́ле.

Ра́дꙋйсѧ, верте́пъ въ нб҃са̀ прело́жшаѧ: ра́дꙋйсѧ, въ ржⷭ҇твѣ̀ и҆ по ржⷭ҇твѣ̀ дв҃а пребы́вшаѧ.

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Конда́къ а҃

И҆збра́ннѣй дв҃ѣ мр҃і́и, превы́шшей всѣ́хъ дще́рей землѝ, мт҃ри сн҃а бж҃їѧ, є҆́юже сп҃си́тель въ мі́ръ прїи́де, со ᲂу҆миле́нїемъ взыва́емъ: воззрѝ на многоско́рбное житїѐ на́ше, воспомѧнѝ скѡ́рби и҆ болѣ̑зни, ꙗ҆̀же претерпѣ́ла є҆сѝ, и҆ сотворѝ съ на́ми по млⷭ҇рдїю твоемꙋ̀, да зове́мъ тѝ:

Ра́дꙋйсѧ, многоско́рбнаѧ мт҃и бж҃їѧ, печа́ль на́шꙋ въ ра́дость претворѧ́ющаѧ.

Моли́твы

Ѽ многоско́рбнаѧ мт҃и бж҃їѧ, превы́шшаѧ всѣ́хъ дще́рей землѝ по чⷭ҇тотѣ̀ твое́й и҆ по мно́жествꙋ страда́нїй, тобо́ю на землѝ пренесе́нныхъ! Прїимѝ многоболѣ́знєннаѧ воздыха̑нїѧ на̑ша и҆ сохранѝ на́съ под̾ кро́вомъ твоеѧ̀ млⷭ҇ти. И҆на́гѡ бо прибѣ́жища и҆ те́плагѡ предста́тельства, ра́звѣ тебє̀, не вѣ́мы, но ꙗ҆́кѡ дерзнове́нїе и҆мꙋ́щи ко и҆́же ѿ тебє̀ рожде́нномꙋ, помозѝ и҆ сп҃си́ ны мл҃твами твои́ми, да непреткнове́ннѡ дости́гнемъ црⷭ҇твїѧ нбⷭ҇нагѡ, и҆дѣ́же со всѣ́ми ст҃ы́ми бꙋ́демъ воспѣва́ти хвалꙋ̀ въ трⷪ҇цѣ сла́вимомꙋ бг҃ꙋ, всегда̀, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.