Православный календарь
Размер шрифта:

Ака́ѳістъ

А҆ка́ѳїстъ прпⷣбномꙋ и҆ бг҃оно́сномꙋ ѻ҆тцꙋ̀ на́шемꙋ ѳеодо́сїю, и҆гꙋ́менꙋ пече́рскомꙋ, чꙋдотво́рцꙋ.

Прп. Феодосия Киево-Печерского (перен. мощ.) (1091) 27 августа 2026

Конда́къ а҃

И҆збра́нный ѿ цр҃ѧ̀ си́лъ гдⷭ҇а і҆и҃са, и҆ ѿ ю҆́ности твоеѧ̀ призва́нный во и҆́ночество, ѻ҆́бщагѡ въ рѡссі́и житїѧ̀ первонача́льниче и҆ вели́кїй чꙋдотво́рче, прпⷣбне ѻ҆́тче на́шъ ѳеодо́сїе, ᲂу҆молѝ гдⷭ҇а бг҃а ѿ всѧ́кихъ бѣ́дъ и҆ грѣхо́вныхъ страсте́й и҆зба́вити ны̀, зовꙋ́щїѧ тѝ:

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

І҆́косъ а҃

А҆́гг҃лъ земны́й и҆ чл҃вѣ́къ нбⷭ҇ный бы́лъ є҆сѝ, прпⷣбне ѻ҆́тче ѳеодо́сїе, и҆, ꙗ҆́кѡ ѕвѣзда̀ ᲂу҆́треннѧѧ, возсїѧ́лъ є҆сѝ на тве́рди рѡссі́йскїѧ цр҃кве, прогонѧ́ѧ всѧ́кꙋ тмꙋ̀ грѣхо́внꙋю свѣтоза́рнымъ твои́мъ житїе́мъ и҆ ᲂу҆че́нїемъ, и҆ приводѧ̀ къ свѣ́тꙋ хрⷭ҇то́вꙋ мно́гїѧ лю́ди. Тѣ́мже прїимѝ ѿ на́съ бл҃гохвалє́нїѧ сицева̑ѧ:

Ра́дꙋйсѧ, гра́да васі́льева ст҃о́е порожде́нїе: ра́дꙋйсѧ, гра́да кꙋ́рска до́брое воспита́нїе.

Ра́дꙋйсѧ, ѿ млады́хъ лѣ́тъ хрⷭ҇та̀ премно́гѡ возлюби́вый: ра́дꙋйсѧ, є҆гѡ̀ ра́ди ᲂу҆́же желѣ́зное на тѣ́лѣ твое́мъ въ ю҆́ности носи́вый.

Ра́дꙋйсѧ, ᲂу҆се́рднѡ примета́выйсѧ ко хра́мꙋ гдⷭ҇ню: ра́дꙋйсѧ, слꙋжи́вый цр҃кви бж҃їей ѿ трꙋдѡ́въ твои́хъ пра́ведныхъ.

Ра́дꙋйсѧ, сиро́тствовавый ѿ ѻ҆тца̀ плотска́гѡ, и҆ въ сыновство̀ причте́нный ѻ҆ц҃ꙋ̀ нбⷭ҇номꙋ: ра́дꙋйсѧ, мно́гїѧ ско́рби и҆ бїє́нїѧ ѿ ма́тере твоеѧ̀, любвѐ ра́ди бж҃їей претерпѣ́вый.

Ра́дꙋйсѧ, мꙋ́ченикъ самопроизво́ленъ бы́вый: ра́дꙋйсѧ, свѣ́тлость са́на вре́меннагѡ ни во что́же вмѣни́вый.

Ра́дꙋйсѧ, рꙋка́ма твои́ма хлѣ́бы предложе́нїѧ длѧ ѻ҆лтарѧ̀ гдⷭ҇нѧ ᲂу҆готовлѧ́вый: ра́дꙋйсѧ, дꙋ́шꙋ твою̀ въ хлѣ́бъ чи́стый, прест҃ѣ́й трⷪ҇цѣ принесы́й.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ в҃

Ви́дѣвши ма́терь твоѧ̀, ѻ҆́тче ѳеодо́сїе, ꙗ҆́кѡ презира́лъ є҆сѝ всѧ̑ дѡ́льнаѧ, и҆ ѡ҆ го́рнихъ вы́нꙋ помышлѧ́лъ є҆сѝ въ ю҆́ности твое́й, гнѣ́вашесѧ на тѧ̀ ѕѣлѡ̀, и҆ тща́шесѧ тѧ̀ ѿ слꙋже́нїѧ гдⷭ҇еви ѿврати́ти, ѻ҆́во моле́нїемъ, ѻ҆́во преще́нїемъ и҆ ра́нами: ѻ҆ба́че ничто́же ᲂу҆спѣ̀, ᲂу҆крѣплѧ́ющꙋ тѧ̀ гдⷭ҇ꙋ, є҆го́же ра́ди бїє́нїѧ и҆ поношє́нїѧ ѿ ма́тере твоеѧ̀ ра́достнѡ терпѣ́лъ є҆сѝ, и҆ є҆мꙋ́же во днѝ и҆ въ нощѝ воспѣва́лъ є҆сѝ а҆́гг҃льскꙋю пѣ́снь: А҆ллилꙋ́їа.

І҆́косъ в҃

Разꙋмѣ́въ до́брѣ, ꙗ҆́кѡ въ сꙋетѣ̀ мі́ра живѧ̀, неꙋдо́бнѡ ѡ҆брѣстѝ сп҃се́нїе, прпⷣбне ѻ҆́тче ѳеодо́сїе, во гра́дъ і҆ерⷭ҇ли́мъ ᲂу҆дали́тисѧ возжелѣ́лъ є҆сѝ, да покло́нишисѧ та́мѡ гро́бꙋ гдⷭ҇ню, и҆ по́двиги дꙋхо́вными дости́гнеши і҆ерⷭ҇ли́ма нбⷭ҇нагѡ: ѻ҆ба́че воспѧще́нъ ѿ ма́тере твоеѧ̀, па́ки во гра́дѣ ѻ҆те́чествїѧ твоегѡ̀ ѡ҆бита́ти принꙋжде́нъ бы́лъ є҆сѝ. Помина́ѧ таковꙋ́ю твою̀ ре́вность ѡ҆ сп҃се́нїи дꙋше́внѣмъ, вопїе́мъ тѝ:

Ра́дꙋйсѧ, па́че роди́вшїѧ тѧ̀ пло́тїю, гдⷭ҇а возлюби́вый: ра́дꙋйсѧ, ма́тернею любо́вїю неꙋловле́нъ пребы́вый.

Ра́дꙋйсѧ, слꙋжи́ти мі́рꙋ ѿрекі́йсѧ: ра́дꙋйсѧ, рабо́тати є҆ди́номꙋ бг҃ꙋ возжелѣ́вый.

Ра́дꙋйсѧ, ри́зы ни́щетныѧ носи́вый: ра́дꙋйсѧ, въ просфоропече́нїи нелѣ́ностнѡ трꙋди́выйсѧ.

Ра́дꙋйсѧ, въ хра́мъ бж҃їй на моли́твꙋ ᲂу҆се́рднѡ приходи́вый: ра́дꙋйсѧ, моли́твꙋ непреста́ннꙋю возлюби́вый.

Ра́дꙋйсѧ, въ мі́рѣ не любѧ̀ мїрска́гѡ пожи́вый: ра́дꙋйсѧ, ꙗ҆́кѡ а҆́гг҃лъ бж҃їй въ домꙋ̀ ма́тере твоеѧ̀ пребыва́вый.

Ра́дꙋйсѧ, ко гдⷭ҇ꙋ ѻ҆́чи се́рдца твоегѡ̀ возводи́вый: ра́дꙋйсѧ, свободи́ти тѧ̀ плѣ́на грѣхо́внагѡ бг҃а ᲂу҆се́рднѡ проси́вый.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ г҃

Си́ла бж҃їѧ ᲂу҆крѣпи́ тѧ, ѻ҆́тче ѳеодо́сїе, на по́двиги дꙋхо́вныѧ, и҆ бг҃ꙋ помога́ющꙋ тѝ, и҆зше́лъ є҆сѝ та́йнѡ ѿ до́ма ма́тере твоеѧ̀, и҆ прите́клъ є҆сѝ къ до́бромꙋ па́стырю, прпⷣбномꙋ а҆нтѡ́нїю, во гра́дѣ кі́евѣ въ пеще́рѣ ѻ҆бита́вшемꙋ, ᲂу҆молѧ́ѧ є҆гѡ̀, да причте́тъ тѧ̀ къ слове́сномꙋ своемꙋ̀ ста́дꙋ. То́йже прови́дѣвъ дꙋше́внꙋю твою̀ добро́тꙋ, прїѧ́тъ тѧ̀ съ любо́вїю, и҆ повелѣ̀ прпⷣбномꙋ ні́кѡнꙋ ѡ҆блещи́ тѧ во ст҃ы́й а҆́гг҃льскїй ѻ҆́бразъ, да пое́ши съ ни́ми бг҃ꙋ: А҆ллилꙋ́їа.

І҆́косъ г҃

И҆мѣ́ѧ любо́вь ве́лїю ко хрⷭ҇тꙋ̀, прпⷣбне ѻ҆́тче, любо́вїю ѡ҆ хрⷭ҇тѣ̀ прилѣпи́лсѧ є҆сѝ къ прпⷣбномꙋ а҆нтѡ́нїю, и҆ взира́ѧ на ст҃о́е и҆ бг҃оꙋго́дное житїѐ є҆гѡ̀ въ пеще́рѣ, тща́лсѧ є҆сѝ во все́мъ є҆мꙋ̀ подража́ти, и҆ всѧ̑ словеса̀ є҆гѡ̀ слага́лъ є҆сѝ въ се́рдцѣ твое́мъ. Сегѡ̀ ра́ди ᲂу҆бл҃жа́емъ тѧ̀ зва́нїи си́ми:

Ра́дꙋйсѧ, гра́дъ ѻ҆те́честїѧ твоегѡ̀ и҆ до́мъ ма́тере твоеѧ̀, хрⷭ҇та̀ ра́ди ѡ҆ста́вивый: ра́дꙋйсѧ, въ пꙋ́ть дꙋшесп҃си́тельный ра́достнѡ потекі́й.

Ра́дꙋйсѧ, во гра́дѣ кі́евѣ па́жить дꙋхо́внꙋю ѡ҆брѣты́й: ра́дꙋйсѧ, въ пеще́рѣ прпⷣбнагѡ а҆нтѡ́нїа приста́нище сп҃се́нїѧ полꙋчи́вый.

Ра́дꙋйсѧ, во а҆́гг҃льскїй чи́нъ рꙋка́ма прпⷣбнагѡ ні́кѡна ѡ҆блече́нный: ра́дꙋйсѧ, съ постриже́нїемъ власѡ́въ главы̀ твоеѧ̀, всѐ плотско́е мꙋдрова́нїе соверше́ннѡ ѿложи́вый.

Ра́дꙋйсѧ, въ ри́зꙋ смире́нїѧ ѡ҆дѣ́ѧнный: ра́дꙋйсѧ, въ санда́лїи послꙋша́нїѧ ѻ҆бꙋве́нный.

Ра́дꙋйсѧ, кꙋ́коль неѕло́бїѧ на сѧ̀ возложи́вый: ра́дꙋйсѧ, а҆нала́въ бж҃їѧ зашище́нїѧ воспрїѧ́вый.

Ра́дꙋйсѧ, ме́чь дꙋхо́вный въ рꙋцѣ̀ твое́й вы́нꙋ и҆мѣ́вый: ра́дꙋйсѧ, и҆́менемъ і҆и҃совымъ врагѝ неви́димыѧ ѿража́вый.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ д҃

Бꙋ́ри жите́йскїѧ и҆збѣжа́въ, ѻ҆́тче прпⷣбне, въ бл҃гоѿи́шїи пеще́рнѣмъ бг҃оꙋго́днѡ подвиза́лсѧ є҆сѝ, прпⷣбнымъ а҆нтѡ́нїемъ наставлѧ́емь на всѧ́кꙋ добродѣ́тель, ма́тере же твоеѧ̀ пла́чемъ не ᲂу҆моле́нъ бы́лъ є҆сѝ въ мі́ръ возврати́тисѧ, но моли́твою твое́ю ко гдⷭ҇ꙋ, и҆ ма́терь твою̀ ко и҆́ночествꙋ приве́лъ є҆сѝ, зовы́й бг҃ꙋ, ᲂу҆мѧгчи́вшемꙋ се́рдце є҆ѧ̀: А҆ллилꙋ́їа.

І҆́косъ д҃

Слы́шавъ поꙋче́нїѧ дꙋшесп҃си́тельнаѧ прпⷣбнагѡ а҆нтѡ́нїа, ѻ҆́тче ѳеодо́сїе, бл҃гоговѣ́йнѡ внима́лъ є҆сѝ є҆гѡ̀ глаго́ломъ и҆ са́мымъ дѣ́ломъ и҆сполнѧ́лъ є҆сѝ тогѡ̀ словеса̀, ꙗ҆́же ко сп҃се́нїю и҆ бл҃гоꙋгожде́нїю приведо́ша тѧ̀, и҆ бы́лъ є҆сѝ бл҃гі́й ᲂу҆чени́къ бл҃га́гѡ ᲂу҆чи́телѧ, досто́йный вои́стиннꙋ ᲂу҆блаже́нїй таковы́хъ:

Ра́дꙋйсѧ, во смире́нїи преꙋспѣ́вый: ра́дꙋйсѧ, въ моли́твахъ во днѝ и҆ въ нощѝ пребыва́вый.

Ра́дꙋйсѧ, послꙋша́нїѧ зерца́ло: ра́дꙋйсѧ, трꙋдолю́бїѧ пра́вило.

Ра́дꙋйсѧ, пѡ́двиги дꙋхо́вными пло́ть твою̀ дꙋ́хꙋ покори́вый: ра́дꙋйсѧ, но́щи без̾ сна̀ провожда́вый.

Ра́дꙋйсѧ, рꙋка́ма твои́ма во́лнꙋ прѧ́вый: ра́дꙋйсѧ, ᲂу҆ста́ми твои́ми ѱалмы̀ воспѣва́вый.

Ра́дꙋйсѧ, въ цр҃ковь бж҃їю пре́жде всѣ́хъ на моли́твꙋ приходи́вый: ра́дꙋйсѧ, неподви́жнѡ и҆ бл҃гоꙋмиле́ннѡ въ не́й стоѧ́вый.

Ра́дꙋйсѧ, тѧготы̀ бра́тїй твои́хъ любвеѡби́льнѡ носи́вый: Ра́дꙋйсѧ, трꙋды̀ рꙋкодѣ́лїй за ни́хъ и҆сполнѧ́вый.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ є҃

Бг҃оте́чнѡ ше́ствовалъ є҆сѝ ѿ си́лы въ си́лꙋ, прпⷣбне ѻ҆́тче, и҆ ꙗ҆́кѡ досто́йный сосꙋ́дъ бж҃їѧ бл҃года́ти, во і҆ере́а ѡ҆сщ҃е́нъ бы́лъ є҆сѝ, и҆ и҆гꙋ́меномъ поста́вленъ бы́лъ є҆сѝ пеще́рнѣй бра́тїи, и҆збра́нїемъ тоѧ̀, и҆ бл҃гослове́нїемъ прпⷣбнагѡ а҆нтѡ́нїѧ, съ ни́мже вкꙋ́пѣ ре́вностнѡ подвиза́лсѧ є҆сѝ ѡ҆ сп҃се́нїи дꙋ́шъ чл҃вѣ́ческихъ, и҆ ны́нѣ сла́дцѣ пое́ши въ го́рнихъ ѻ҆би́телѣхъ трїѷпоста́сномꙋ бг҃ꙋ: А҆ллилꙋ́їа.

І҆́косъ є҃

Ви́димъ тѧ̀, прпⷣбне ѻ҆́тче на́шъ ѳеодо́сїе, ре́вностнѡ трꙋди́вшагосѧ въ созида́нїи ѻ҆би́тели пече́рскїѧ, и҆ ᲂу҆ста́въ ѻ҆́бщагѡ житїѧ̀ въ не́й ᲂу҆тверди́вшагѡ бг҃омꙋ́дреннѡ, и҆́же бы́сть пото́мъ ѻ҆́бразъ всѣ̑мъ ѻ҆́бщагѡ житїѧ̀ ѻ҆би́телємъ рѡссі́йскимъ, тѣ́мже кїновїа́рхъ рѡссі́йскїй и҆менꙋ́ешисѧ ѿ вѣ́рныхъ, зовꙋ́щихъ тѝ:

Ра́дꙋйсѧ, прпⷣбне, бг҃омꙋ́дрїемъ высо́кимъ преиспо́лненный: ра́дꙋйсѧ, бг҃оно́сне, да́ры дх҃а ст҃а́гѡ преꙋкра́шенный.

Ра́дꙋйсѧ, царѧ̀ ѱалмопѣ́вца словеса̀ ѡ҆ кꙋпножи́тїи бра́тскомъ возлюби́вый: ра́дꙋйсѧ, ѻ҆бщежи́тельный ᲂу҆ста́въ въ ѻ҆би́тели пече́рстѣй ᲂу҆чреди́вый.

Ра́дꙋйсѧ, пе́рвый ѡ҆снова́телю кїнові́й рѡссі́йскихъ: ра́дꙋйсѧ, вели́кїй ревни́телю и҆́ноческагѡ ѻ҆́бщагѡ житїѧ̀.

Ра́дꙋйсѧ, всѧ̑ ѻ҆́бща и҆мѣ́ти бра́тїи законоположи́вый: ра́дꙋйсѧ, ѻ҆бщежи́тельнаѧ пра́вила са́мъ во все́мъ вѣ́рнѡ и҆сполнѧ́вый.

Ра́дꙋйсѧ, во́дꙋ носѧ́й, и҆ дрова̀ сѣкі́й въ твое́мъ настоѧ́тельствѣ: ра́дꙋйсѧ, трꙋдолю́бїю поꙋча́вый примѣ́ромъ твои́мъ всю̀ бра́тїю.

Ра́дꙋйсѧ, ни́щїѧ пита́вый, и҆ стра́нники ᲂу҆покоева́вый: ра́дꙋйсѧ, страннопрїи́мницꙋ и҆ больни́цꙋ въ ѻ҆би́тели твое́й ᲂу҆стро́ивый.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ ѕ҃

Проповѣ́дникъ бг҃овѣща́нный бы́лъ є҆сѝ, ѻ҆́тче ѳеодо́сїе, не то́кмѡ и҆́нокѡмъ, но и҆ лю́демъ мїрски́мъ, кн҃зє́мъ и҆ болѧ́рѡмъ, и҆ всѣ́хъ поꙋча́лъ є҆сѝ нелѣ́ностнѡ добродѣ́телємъ хрⷭ҇тїа́нскимъ, братолю́бїю, кро́тости, воздержа́нїю и҆ чистотѣ̀. Мо́лимъ тѧ̀, прпⷣбне, предста́тельствомъ твои́мъ нбⷭ҇нымъ и҆спросѝ и҆ на́мъ сі́и бг҃олюбе́зныѧ добродѣ́тєли, да не порабо́тимсѧ страстє́мъ грѣхо́внымъ, но бл҃гоче́стнѡ да пое́мъ бг҃ꙋ, сп҃си́телю на́шемꙋ: А҆ллилꙋ́їа.

І҆́косъ ѕ҃

Возсїѧ́лъ є҆сѝ ꙗ҆́кѡ ѕвѣзда̀ бг҃освѣ́тлаѧ въ странѣ̀ рѡссі́йстѣй, прпⷣбне ѻ҆́тче, и҆ мно́гїѧ чл҃вѣ́ки приве́лъ є҆сѝ въ ѡ҆гра́дꙋ нбⷭ҇нꙋю ᲂу҆че́нїемъ твои́мъ ст҃ы́мъ: ты́ бо не то́кмо ᲂу҆чи́лъ є҆сѝ, но и҆ твори́лъ є҆сѝ всѧ́кꙋ добродѣ́тель, непогрѣши́тельнѡ и҆сполнѧ́ѧ всѧ̑ за́повѣди хрⷭ҇та̀ бг҃а. Тѣ́мже ꙗ҆́кѡ сотвори́вшагѡ, и҆ наꙋчи́вшагѡ, восхвалѧ́емъ тѧ̀ си́це:

Ра́дꙋйсѧ, свѣ́тлостїю житїѧ̀ твоегѡ̀ сїѧ́вый мі́рꙋ: ра́дꙋйсѧ, ᲂу҆че́ньми твои́ми назида́вый во сп҃се́нїе мно́гїѧ чл҃вѣ́ки.

Ра́дꙋйсѧ, па́стырю до́брый, чꙋ́ждый лицепрїѧ́тїѧ: ра́дꙋйсѧ, наста́вниче бг҃омꙋ́дрый, преиспо́лненный любвѐ ко всѣ̑мъ бли̑жнимъ.

Ра́дꙋйсѧ, си́льнымъ мі́ра пра́вдꙋ бж҃їю небоѧ́зненнѡ воѕвѣща́вый: ра́дꙋйсѧ, кн҃зє́мъ и҆ вельмо́жамъ ко бл҃гоче́стїю совѣ́тникъ бы́вый.

Ра́дꙋйсѧ, невѣ̑рныѧ і҆ꙋде́и ᲂу҆вѣ́ровати во хрⷭ҇та̀ ᲂу҆вѣщава́вый: ра́дꙋйсѧ, ми́лостыню мно́гꙋ ни́щей бра́тїи подава́вый.

Ра́дꙋйсѧ, съ пла́кавшими пла́кавый: ра́дꙋйсѧ, скорбѧ́щыѧ ᲂу҆тѣша́вый.

Ра́дꙋйсѧ, вдѡ́въ и҆ сирѡ́тъ застꙋ́пниче: ра́дꙋйсѧ, ѻ҆би́димыхъ и҆ гони́мыхъ защи́тниче.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ з҃

Хотѧ̀ гдⷭ҇ь ꙗ҆ви́ти лю́демъ, ꙗ҆́кѡ ѻ҆би́тель пече́рскаѧ, тобо́ю ᲂу҆правлѧ́емаѧ, прпⷣбне ѻ҆́тче ѳеодо́сїе, храни́ма є҆́сть є҆гѡ̀ блгⷣтїю бжⷭ҇твенною, свѣ́тъ пречꙋ́денъ въ нощѝ над̾ не́ю возсїѧ̀, татє́мъ же ѡ҆кра́сти цр҃ковь въ не́й хотѣ́вшимъ, цр҃ковь тꙋ̀ ѿ землѝ на воздꙋ́хъ вознесе́ннꙋю ди́внѡ показа̀, и҆ пѣ́нїе а҆́гг҃льское въ не́й слы́шанѡ бы́ти сотворѝ: да всѝ ᲂу҆вѣ́дѧтъ, ꙗ҆́кѡ вели́къ є҆сѝ ᲂу҆го́дникъ бж҃їй, и҆ ꙗ҆́кѡ мно́гѡ мо́жетъ мл҃тва твоѧ̀ ко гдⷭ҇ꙋ, є҆мꙋ́же воспѣва́лъ є҆сѝ: А҆ллилꙋ́їа.

І҆́косъ з҃

Но́вагѡ тѧ̀ ѳеодо́сїѧ кїновїа́рха ꙗ҆вѝ гдⷭ҇ь въ странѣ̀ рѡссі́йстѣй, прпⷣбне ѻ҆́тче, и҆ тобо́ю просла́ви ла́ѵрꙋ пече́рскꙋю, ма́терь ѻ҆би́телей рꙋ́сскихъ, въ не́йже ѿ лѣ́тъ дре́внихъ подви́жничество и҆́ноческое процвѣтѐ, и҆ мно́зи прпⷣбнїи бг҃ꙋ бл҃гоꙋгоди́ша, посредѣ̀ кі́ихъ ты̀, ꙗ҆́кѡ лꙋна̀ по́лнаѧ, свѣ́томъ добродѣ́телей и҆ чꙋде́съ твои́хъ немерца́емѡ сїѧ́еши, и҆ всѣ́хъ подвиза́еши зва́ти тебѣ̀:

Ра́дꙋйсѧ, а҆гг҃лонра́вный чл҃вѣ́че: ра́дꙋйсѧ, ди́вный ѡ҆ гдⷭ҇ѣ подви́жниче.

Ра́дꙋйсѧ, вели́кїй чꙋдотво́рче: ра́дꙋйсѧ, бл҃гомо́щный моли́твенниче.

Ра́дꙋйсѧ, зла́то та́инственнѡ ѿ а҆́гг҃ла полꙋчи́вый: ра́дꙋйсѧ, тѣ́мъ зла́томъ бра́шно гла́дной бра́тїи твое́й кꙋпи́вый.

Ра́дꙋйсѧ, ѡ҆скꙋдѣ́нїе вїна̀ и҆ є҆ле́ѧ въ ѻ҆би́тели твое́й чꙋде́снѡ воспо́лнивый: ра́дꙋйсѧ, пра́зднꙋю жи́тницꙋ по́лнꙋ мꙋко́ю ꙗ҆ви́вый.

Ра́дꙋйсѧ, то́щїй сосꙋ́дъ ме́да преизлива́ющимсѧ показа́вый: ра́дꙋйсѧ, чꙋдеса̀ пресла́вна въ житїѝ твое́мъ соверши́вый.

Ра́дꙋйсѧ, бг҃а просла́вивый по́двиги твои́ми: ра́дꙋйсѧ, бг҃омъ просла́вленный бл҃года́тными да̑ры.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ и҃

Страннопрїи́мство а҆враа́мле возлюби́лъ є҆сѝ, ѻ҆́тче ѳеодо́сїе, въ темни́цѣ заключє́ннымъ хлѣ́бы посыла́лъ є҆сѝ любвеѡби́льнѡ, помина́ѧ словеса̀ хрⷭ҇то́ва, ꙗ҆́кѡ въ лицѣ̀ стра́нныхъ, и҆ въ темни́цѣ сѣдѧ́щихъ, са́мъ хрⷭ҇то́съ бл҃готворе́нїѧ прїе́млетъ. Наꙋчѝ и҆ на́съ, ᲂу҆го́дниче бж҃їй, тебѣ̀ въ се́мъ подража́ти, и҆ ми́лостынею бг҃ꙋ ᲂу҆гожда́ти, да возмо́жемъ бл҃гопрїѧ́тнѡ пѣ́ти є҆мꙋ̀: А҆ллилꙋ́їа.

І҆́косъ и҃

Ве́сь на слꙋже́нїе бг҃ꙋ и҆ бли́жнимъ твои́мъ себѐ вда́лъ є҆сѝ, ѳеодо́сїе ѻ҆́тче на́шъ, и҆ до́брѣ па́слъ є҆сѝ бг҃омъ врꙋче́нное тебѣ̀ слове́сное ста́до, немѡщны́ѧ ᲂу҆крѣплѧ́ѧ, па́дшыѧ возставлѧ́ѧ, до́брѣ стоѧ́щїѧ ѡ҆хранѧ́ѧ, и҆ бдѧ̀ на стра́же моли́веннѣй, да не похи́титъ вра́гъ неви́димый є҆ди́нꙋ ѿ твои́хъ ѻ҆ве́цъ. Ѡ҆ се́мъ тѧ̀ хва́лимъ и҆ зове́мъ:

Ра́дꙋйсѧ, ве́лїю вла́сть на дꙋ́хи нечи́стыѧ ѿ гдⷭ҇а полꙋчи́вый: ра́дꙋйсѧ, хра́минꙋ стꙋжа́емꙋю привидѣ́нїи дїа́вольскими моли́твою твое́ю ѡ҆чи́стивый.

Ра́дꙋйсѧ, мно́гїѧ бѣснова́тыѧ, ѿ мꙋчи́тельства де́монскагѡ свободи́вый: ра́дꙋйсѧ, всѧ̑ привидѣ́нїѧ и҆ и҆скꙋше́нїѧ сатани́нскаѧ побѣди́вый.

Ра́дꙋйсѧ, ᲂу҆ченикѝ твоѧ̑ ѿ сѣ́тей неви́димагѡ врага̀ моли́твою твое́ю соблюда́вый: ра́дꙋйсѧ, и҆скꙋше́нный на мно́зѣ, и҆скꙋша́емымъ помога́вый.

Ра́дꙋйсѧ, чл҃вѣ́че бж҃їй, гра́ды и҆ вє́си и҆спо́лнивый сла́вою твои́хъ по́двигѡвъ: ра́дꙋйсѧ, нестѧжа́нїѧ рачи́телю, никогда́же помышлѧ́вый ѡ҆ потре́бахъ грѧдꙋ́щагѡ днѐ.

Ра́дꙋйсѧ, вѣ́рою крѣ́пкою на бг҃а ᲂу҆пова́вый: ра́дꙋйсѧ, по вѣ́рѣ твое́й всѧ̑ нꙋ́жнаѧ ѿ бг҃а и҆зѻби́льнѡ полꙋчи́вый.

Ра́дꙋйсѧ, бл҃годаре́нїе гдⷭ҇еви вы́нꙋ ѡ҆ всѣ́хъ дарѣ́хъ є҆гѡ̀ возноси́вый: ра́дꙋйсѧ, ѿ малодꙋ́шнагѡ ро́пота бра́тїю твою̀ бо́дреннѡ ѡ҆хранѧ́вый.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ ѳ҃

Всѣ̑мъ, тре́бꙋющимъ по́мощи твоеѧ̀, ᲂу҆се́рднѡ бл҃готвори́лъ є҆сѝ, прпⷣбне ѻ҆́тче, и҆ ѕѣлѡ̀ млⷭ҇рдствовалъ є҆сѝ ѡ҆ ни́щихъ и҆ ᲂу҆бо́гихъ, ꙗ҆́кѡ бы́ти тебѣ̀ вои́стиннꙋ ѻ҆́комъ слѣпы́хъ, ного́ю хромы́хъ, рꙋко́ю безпомо́щныхъ, и҆ никто́же ѿхожда́ше ѿ лица̀ твоегѡ̀ неꙋтѣ́шеннымъ. При́зри и҆ на на́съ, ᲂу҆го́дниче бж҃їй, бл҃госе́рдїемъ твои́мъ, и҆ ѿ ра́нъ грѣхо́вныхъ и҆сцѣле́нїе на́мъ пода́ждь моли́твами твои́ми, да бл҃года́рственнѡ пое́мъ бг҃ꙋ: А҆ллилꙋ́їа.

І҆́косъ ѳ҃

Вѣті̑и сꙋемꙋ́дренныѧ посрами́шасѧ житїе́мъ твои́мъ, ѳеодо́сїе бг҃омꙋ́дре, глаго́лющїѧ бꙋ́йство бы́ти подви́жничество дꙋхо́вное: се́ бо ви́димъ тѧ̀ во пло́ти нбⷭ҇нопожи́вшагѡ, и҆ а҆́гг҃льскїѧ нра́вы на землѝ стѧжа́вшагѡ. Тѣ́мже чꙋдѧ́щесѧ твое́й а҆гг҃лоподо́бнѣй ст҃ости, ᲂу҆бл҃жа́емъ тѧ̀ бл҃гохвале́нїи си́ми:

Ра́дꙋйсѧ, ѕвѣздо̀ ᲂу҆́треннѧѧ, тмꙋ̀ нече́стїѧ въ странѣ̀ рѡссі́йстѣй разгна́вшаѧ: ра́дꙋйсѧ, забра́ло крѣ́пкое ѿ вра̑гъ ви́димыхъ и҆ неви́димыхъ.

Ра́дꙋйсѧ, сто́лпе ᲂу҆твержде́нїѧ ст҃ы́ѧ правосла́вныѧ вѣ́ры: ра́дꙋйсѧ, бг҃олѣ́пное ᲂу҆краше́нїе хрⷭ҇то́вы цр҃кве.

Ра́дꙋйсѧ, ѻ҆те́чествїѧ твоегѡ̀ земна́гѡ покрови́телю нбⷭ҇ный. ра́дꙋйсѧ, пꙋтѝ сп҃си́тельнагѡ ᲂу҆каза́телю неле́стный.

Ра́дꙋйсѧ, воево́до и҆зрѧ́дный полка̀ во́инѡвъ дꙋхо́вныхъ: ра́дꙋйсѧ, ратобо́рче до́блїй, побѣди́вый дє́мѡнскїѧ полкѝ.

Ра́дꙋйсѧ, ѻ҆бще́нїѧ ᲂу҆досто́ивыйсѧ со а҆́гг҃лы: ра́дꙋйсѧ, хрⷭ҇тꙋ̀ ᲂу҆се́рднѡ бл҃гоꙋгожда́вый.

Ра́дꙋйсѧ, млⷭ҇рдїѧ хрⷭ҇то́ва подража́телю: ра́дꙋйсѧ, дарѡ́въ дꙋхо́вныхъ добрѣ́йшїй пода́телю.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ і҃

Сп҃си́тельное приста́нище и҆ хра́мъ гдⷭ҇а сла́вы, вели́кꙋю, нб҃сѝ подо́бнꙋю, це́рковь пече́рскꙋю, по мно́зѣхъ зна́менїихъ и҆ чꙋдесѣ́хъ ѡ҆снова́лъ є҆сѝ, прпⷣбне ѻ҆́тче ѳеодо́сїе, и҆ са́мъ рꙋка́ма твои́ма помога́лъ є҆сѝ каменозда́телемъ є҆ѧ̀, вы́нꙋ молѧ́сѧ ко гдⷭ҇ꙋ и҆ прест҃ѣ́й бг҃оро́дицѣ: да бꙋ́детъ сїѧ̀ цр҃ковь и҆зрѧ́дное жили́ще бж҃їѧ блгⷣти, и҆ да ᲂу҆слы́шитъ гдⷭ҇ь моли̑твы люде́й свои́хъ, съ вѣ́рою вопїю́щихъ є҆мꙋ̀: А҆ллилꙋ́їа.

І҆́косъ і҃

Цр҃ѧ̀ нбⷭ҇нагѡ хрⷭ҇та̀, вѣ́рный ра́бъ бы́лъ є҆сѝ ѳеодо́сїе бг҃оно́сне, и҆ цр҃и́цѣ нбⷭ҇нѣй, въ видѣ́нїи ди́внѣмъ во влахе́рнстѣй це́ркви та́инственнѡ предстоѧ́лъ є҆сѝ, вкꙋ́пѣ съ прпⷣбнымъ а҆нтѡ́нїемъ, є҆гда̀ ѻ҆на̀ каменозда́тели въ кі́евъ посыла́ше созида́ти вели́кꙋю пече́рскꙋю цр҃ковь, и҆ бжⷭ҇твеннꙋю і҆кѡ́нꙋ своегѡ̀ ᲂу҆спе́нїѧ и҆́мъ подадѐ, въ бл҃гослове́нїе всегда́шнее твоеѧ̀ ѻ҆би́тели, въ не́йже почита́ешисѧ зва́нїи си́ми:

Ра́дꙋйсѧ, зда́телю вели́кїѧ пече́рскїѧ цр҃кве: ра́дꙋйсѧ, ѡ҆снова́вый ю҆̀ на мѣ́стѣ, ѡ҆сщ҃е́ннѣмъ мно́гими чꙋдесы̀.

Ра́дꙋйсѧ, слеза́ми моли́твенными ѡ҆снова́нїе є҆ѧ̀ ѡ҆роси́вый: ра́дꙋйсѧ, рꙋка́ма твои́ма краеꙋго́льныѧ ка́мни є҆ѧ̀ положи́вый.

Ра́дꙋйсѧ, и҆зрѧ́дный слꙋго̀ бж҃їѧ мт҃ре: ра́дꙋйсѧ, ди́внꙋю і҆кѡ́нꙋ є҆ѧ̀ ᲂу҆спе́нїѧ ра́достнѡ прїѧ́вый.

Ра́дꙋйсѧ, і҆кѡ́нꙋ сїю̀ бл҃года́тнꙋю, съ че́стїю вели́кою въ ѻ҆би́тели твое́й поста́вивый: ра́дꙋйсѧ, моли̑твы ᲂу҆се́рдныѧ пред̾ не́ю приноси́вый.

Ра́дꙋйсѧ, бл҃говоле́нїемъ бг҃ома́тере ѡ҆сѣне́нный: ра́дꙋйсѧ, ѿкрове́нїй бжⷭ҇твенныхъ ѿ неѧ̀ ᲂу҆досто́енный.

Ра́дꙋйсѧ, и҆збра́нниче сн҃а є҆ѧ̀ хрⷭ҇та̀ бг҃а: ра́дꙋйсѧ, таи́нниче прест҃ы́ѧ трⷪ҇цы.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ а҃і

Пѣ́нїе немо́лчное приноси́лъ є҆сѝ въ трїе́хъ ли́цѣхъ є҆ди́номꙋ бг҃ꙋ, прпⷣбне ѻ҆́тче ѳеодо́сїе, и҆ до конца̀ твоегѡ̀ не престава́лъ є҆сѝ моли́твеннѡ славосло́вити гдⷭ҇а, и҆ та́кѡ въ моли́твѣ ᲂу҆се́рднѣй преда́лъ є҆сѝ въ рꙋ́цѣ є҆гѡ̀ дꙋ́шꙋ твою̀, ю҆́же а҆́гг҃ли ст҃і́и со сла́вою вознесо́ша въ ѻ҆би́тели го́рнїѧ, и҆дѣ́же водвори́лсѧ є҆сѝ со ᲂу҆го́дники бж҃їими, и҆ ра́достнѡ пое́ши а҆́гг҃лѡвъ и҆ чл҃вѣ́кѡвъ творцꙋ̀: А҆ллилꙋ́їа.

І҆́косъ а҃і

Свѣ́томъ нбⷭ҇нымъ ѡ҆зари́сѧ лицѐ твоѐ, прпⷣбне ѻ҆́тче, бл҃же́ннѡ почи́лъ є҆сѝ сно́мъ сме́рти, и҆ со слеза́ми мно́гими провожда́емь бы́лъ є҆сѝ ко гро́бꙋ ѿ твои́хъ бра́тїй и҆ ча́дъ, пла́кавшихъ и҆ рыда́вшихъ ѡ҆ твое́мъ съ ни́ми разлꙋче́нїи. Мы́ же, а҆́ки надгро́бнꙋю пѣ́снь, прино́симъ тѝ бл҃гохвалє́нїѧ такова̑ѧ:

Ра́дꙋйсѧ, пра́веднѡ и҆ бг҃оꙋго́днѡ тече́нїе земно́е соверши́вый: ра́дꙋйсѧ, вѣне́цъ нетлѣ́нїѧ ѿ рꙋкѝ хрⷭ҇то́вы полꙋчи́вый.

Ра́дꙋйсѧ, ꙗ҆́кѡ па́мѧть твоѧ̀ съ похвала́ми во ст҃ѣ́й цр҃кви почита́етсѧ: ра́дꙋйсѧ, ꙗ҆́кѡ ᲂу҆спе́нїе твоѐ ѿ вѣ́рныхъ свѣ́тло торжествꙋ́етсѧ.

Ра́дꙋйсѧ, сме́рть вкꙋси́вый, но тлѣ́нїѧ не позна́вый: ра́дꙋйсѧ, свѣ́тлостїю лица̀ твоегѡ̀ сла́вꙋ твою̀ нбⷭ҇нꙋю проѧви́вый.

Ра́дꙋйсѧ, въ пеще́рѣ со слеза́ми мно́гими ѿ бра́тїи твоеѧ̀ погребе́нный: ра́дꙋйсѧ, по ѻ҆смина́десѧти лѣ́тѣхъ нетлѣ́ненъ та́можде ѡ҆брѣ́тенный.

Ра́дꙋйсѧ, въ вели́кꙋю пече́рскꙋю цр҃ковь со сла́вою пренесе́нный: ра́дꙋйсѧ, свѣ́томъ нбⷭ҇нымъ въ пренесе́нїи моще́й твои́хъ ди́внѡ возсїѧ́вый.

Ра́дꙋйсѧ, трѝ дꙋгѝ свѣтоза́рныѧ ѿ пеще́ры къ вели́цѣй пече́рстѣй цр҃кви протѧже́нныѧ показа́вый: ра́дꙋйсѧ, бл҃гоꙋха́нїе ди́вное ѿ моще́й твои́хъ и҆спꙋсти́вый.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ в҃і

Блгⷣти бж҃їей прича́стна показа́сѧ сщ҃е́ннаѧ ра́ка моще́й твои́хъ, прпⷣбне ѻ҆́тче на́шъ ѳеодо́сїе: и҆сцѣле́нїѧ бо недꙋ́жнымъ и҆сточа́етъ, и҆ всѧ́кꙋ ꙗ҆́зю въ лю́дѣхъ врачꙋ́етъ, и҆́же съ вѣ́рою и҆ любо́вїю къ не́й притека́ютъ, моли́твеннѡ призыва́ѧ твоѐ ст҃о́е и҆́мѧ. Тѣ́мже покланѧ́емсѧ мѣ́стꙋ посме́ртнагѡ твоегѡ̀ поко́ѧ, и҆ лобыза́юще на не́мъ ст҃олѣ́пное и҆зѡбраже́нїе лица̀ твоегѡ̀, хвале́бнѡ вопїе́мъ бг҃ꙋ, ди́вномꙋ во ст҃ы́хъ свои́хъ: А҆ллилꙋ́їа.

І҆́косъ в҃і

Пою́ще по́двиги и҆ чꙋдеса̀ твоѧ̑, прпⷣбне ѻ҆́тче ѳеодо́сїе, мо́лимтисѧ прилѣ́жнѡ: моли́сѧ съ на́ми и҆ ѡ҆ на́съ къ всемлⷭ҇тивомꙋ и҆ чл҃вѣколю́бцꙋ бг҃ꙋ, да не ѡ҆скꙋдѣ́етъ въ на́съ вѣ́ра ст҃оѻте́ческаѧ, въ не́йже преꙋспѣ́лъ є҆сѝ дꙋхо́внѡ, но да бꙋ́демъ и҆ мы̀ подража́тели тебѣ̀ въ пра́вой вѣ́рѣ и҆ до́брыхъ дѣ́лѣхъ, и҆ та́кѡ возмо́жемъ неѡсꙋжде́ннѡ вопи́ти тебѣ̀:

Ра́дꙋйсѧ, пречꙋ́дное ᲂу҆краше́нїе ст҃ы́ѧ вели́кїѧ, нб҃сѝ подо́бныѧ, пече́рскїѧ цр҃кве: ра́дꙋйсѧ, хра́мъ бг҃ома́тере ᲂу҆добри́вый пресла́вными твои́ми чꙋдесы̀.

Ра́дꙋйсѧ, гро́бъ тво́й ст҃ы́й зла́томъ и҆ сребро́мъ чꙋдотво́рнѡ ᲂу҆краси́вый: ра́дꙋйсѧ, и҆сцѣле́нїй мно́жество ѿ негѡ̀ и҆сточи́вый.

Ра́дꙋйсѧ, болѧ́щихъ цѣли́телю: ра́дꙋйсѧ, скорбѧ́щихъ ᲂу҆тѣ́шителю.

Ра́дꙋйсѧ, бѣ́дствꙋющымъ на по́мощь ᲂу҆скорѧ́ѧй: ра́дꙋйсѧ, всѣ́мъ, чтꙋ́щымъ тѧ̀, застꙋпле́нїе да́рꙋѧй.

Ра́дꙋйсѧ, въ ча́съ сме́ртный всѣ́мъ на́мъ бл҃гонаде́жный помо́щниче: ра́дꙋйсѧ, ѿ наси́лїѧ дїа́вольскагѡ многомо́щный на́мъ защи́тниче.

Ра́дꙋйсѧ, ла́ѵры пече́рскїѧ крѣ́пкое ѡ҆гражде́нїе: ра́дꙋйсѧ, по бз҃ѣ и҆ бцⷣѣ непосты́дное на́ше ᲂу҆пова́нїе.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ г҃і

Ѽ вели́кїй чꙋдотво́рче! Оу҆слы́ши ми́лостивѡ сїѐ ма́лое моле́нїе на́ше, въ похвалꙋ̀ тебѣ̀ приноси́мое съ вѣ́рою и҆ любо́вїю, и҆ помоли́сѧ ко гдⷭ҇ꙋ бг҃ꙋ, да и҆зба́витъ на́съ ѿ всѣ́хъ бѣ́дъ и҆ ѕѡ́лъ, и҆ мꙋче́нїй вѣ́чныхъ, и҆ сподо́битъ вкꙋ́пѣ съ тобо́ю во црⷭ҇твїи нбⷭ҇нѣмъ пѣ́ти є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ земны́й и҆ чл҃вѣ́къ нбⷭ҇ный бы́лъ є҆сѝ, прпⷣбне ѻ҆́тче ѳеодо́сїе, и҆, ꙗ҆́кѡ ѕвѣзда̀ ᲂу҆́треннѧѧ, возсїѧ́лъ є҆сѝ на тве́рди рѡссі́йскїѧ цр҃кве, прогонѧ́ѧ всѧ́кꙋ тмꙋ̀ грѣхо́внꙋю свѣтоза́рнымъ твои́мъ житїе́мъ и҆ ᲂу҆че́нїемъ, и҆ приводѧ̀ къ свѣ́тꙋ хрⷭ҇то́вꙋ мно́гїѧ лю́ди. Тѣ́мже прїимѝ ѿ на́съ бл҃гохвалє́нїѧ сицева̑ѧ:

Ра́дꙋйсѧ, гра́да васі́льева ст҃о́е порожде́нїе: ра́дꙋйсѧ, гра́да кꙋ́рска до́брое воспита́нїе.

Ра́дꙋйсѧ, ѿ млады́хъ лѣ́тъ хрⷭ҇та̀ премно́гѡ возлюби́вый: ра́дꙋйсѧ, є҆гѡ̀ ра́ди ᲂу҆́же желѣ́зное на тѣ́лѣ твое́мъ въ ю҆́ности носи́вый.

Ра́дꙋйсѧ, ᲂу҆се́рднѡ примета́выйсѧ ко хра́мꙋ гдⷭ҇ню: ра́дꙋйсѧ, слꙋжи́вый цр҃кви бж҃їей ѿ трꙋдѡ́въ твои́хъ пра́ведныхъ.

Ра́дꙋйсѧ, сиро́тствовавый ѿ ѻ҆тца̀ плотска́гѡ, и҆ въ сыновство̀ причте́нный ѻ҆ц҃ꙋ̀ нбⷭ҇номꙋ: ра́дꙋйсѧ, мно́гїѧ ско́рби и҆ бїє́нїѧ ѿ ма́тере твоеѧ̀, любвѐ ра́ди бж҃їей претерпѣ́вый.

Ра́дꙋйсѧ, мꙋ́ченикъ самопроизво́ленъ бы́вый: ра́дꙋйсѧ, свѣ́тлость са́на вре́меннагѡ ни во что́же вмѣни́вый.

Ра́дꙋйсѧ, рꙋка́ма твои́ма хлѣ́бы предложе́нїѧ длѧ ѻ҆лтарѧ̀ гдⷭ҇нѧ ᲂу҆готовлѧ́вый: ра́дꙋйсѧ, дꙋ́шꙋ твою̀ въ хлѣ́бъ чи́стый, прест҃ѣ́й трⷪ҇цѣ принесы́й.

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Конда́къ а҃

И҆збра́нный ѿ цр҃ѧ̀ си́лъ гдⷭ҇а і҆и҃са, и҆ ѿ ю҆́ности твоеѧ̀ призва́нный во и҆́ночество, ѻ҆́бщагѡ въ рѡссі́и житїѧ̀ первонача́льниче и҆ вели́кїй чꙋдотво́рче, прпⷣбне ѻ҆́тче на́шъ ѳеодо́сїе, ᲂу҆молѝ гдⷭ҇а бг҃а ѿ всѧ́кихъ бѣ́дъ и҆ грѣхо́вныхъ страсте́й и҆зба́вити ны̀, зовꙋ́щїѧ тѝ:

Ра́дꙋйсѧ, ѳеодо́сїе, и҆́ноческагѡ ᲂу҆ста́ва въ рѡссі́и ᲂу҆чреди́телю.

Моли́твы

Ѽ сщ҃е́ннаѧ главо̀, а҆́гг҃ле земны́й и҆ чл҃вѣ́че нбⷭ҇ный, прпⷣбне и҆ бг҃оно́сне ѻ҆́тче на́шъ ѳеодо́сїе, и҆зрѧ́дный слꙋго̀ прест҃ы́ѧ бцⷣы, во и҆́мѧ є҆ѧ̀ ст҃о́е ѻ҆би́тель пречꙋ́днꙋ на гора́хъ пече́рскихъ соѡрꙋди́вый, и҆ въ не́й чꙋде́съ мно́жествомъ просїѧ́вый! Мо́лимъ тѧ̀ со ᲂу҆се́рдїемъ мно́гимъ, моли́сѧ за на́съ ко гдⷭ҇ꙋ бг҃ꙋ, и҆ и҆спросѝ ѿ негѡ̀ вели́кїѧ и҆ бога́тыѧ ми́лости: вѣ́рꙋ пра́вꙋ, наде́ждꙋ сп҃се́нїѧ несомнѣ́ннꙋ, любо́вь ко всѣ̑мъ нелицемѣ́рнꙋ, бл҃гоче́стїе непоколеби́мое, дꙋ́шъ и҆ тѣле́съ здра́вїе, жите́йскихъ потре́бъ дово́льство, и҆ да не во ѕло̀ ѡ҆брати́мъ бл҃га́ѧ, да́рꙋємаѧ на́мъ ѿ щедрода́тельныѧ є҆гѡ̀ десни́цы, но въ сла́вꙋ и҆́мени є҆гѡ̀ ст҃а́гѡ, и҆ во сп҃се́нїе на́ше. Сохранѝ, ᲂу҆го́дниче бж҃їй, предста́тельствомъ твои́мъ ст҃ы́мъ и҆ ᲂу҆молѝ: стра́ждꙋщꙋю странꙋ̀ рѡссі́йскꙋю ѿ лю́тыхъ безбо̑жникъ и҆ вла́сти и҆̀хъ гдⷭ҇ь да свободи́тъ, и҆ да возста́витъ престо́лъ правосла́вныхъ царе́й: вѣ́рныхъ рабѡ́въ є҆гѡ̀, въ ско́рби и҆ печа́ли де́нь и҆ но́щь вопїю́щихъ къ немꙋ̀, многоболѣ́зный во́пль да ᲂу҆слы́шитъ и҆ да и҆зведе́тъ ѿ поги́бели живо́тъ на́шъ. Соблюдѝ, прпⷣбне чꙋдотво́рче, ѻ҆те́чество твоѐ земно́е, странꙋ̀ правосла́внѡ рѡссі́йскꙋю, ца́рствꙋющїѧ гра́ды є҆ѧ̀, гра́дъ тво́й, и҆ ла́ѵрꙋ твою̀ невреди́мы ѿ всѧ́кагѡ ѕла̀, и҆ всѧ̑ лю́ди притека́ющїѧ на поклоне́нїе къ чтⷭ҇но́мꙋ твоемꙋ̀ гро́бꙋ, и҆ пребыва́ющїѧ во ст҃ѣ́й ѻ҆би́тели твое́й, ѡ҆сѣнѝ нбⷭ҇нымъ твои́мъ бл҃гослове́нїемъ, и҆ ѿ всѧ́кихъ ѕѡ́лъ и҆ бѣ́дъ ми́лостивнѡ и҆зба́ви. Наипа́че же въ ча́съ кончи́ны на́шеѧ покажѝ на́мъ многомо́щное твоѐ покрови́тельство, да и҆зба́вимсѧ моли́твами твои́ми ко гдⷭ҇ꙋ, вла́сти лю́тагѡ мїроде́ржца, и҆ сподо́бимсѧ наслѣ́дити ца́рство нбⷭ҇ное. Ꙗ҆вѝ на́мъ, ѻ҆́тче, бл҃госе́рдїе твоѐ, и҆ не ѡ҆ста́ви на́съ, си́рыхъ и҆ безпомо́щныхъ, да вы́нꙋ славосло́вимъ ди́внагѡ во ст҃ы́хъ свои́хъ бг҃а, ѻ҆ц҃а̀ и҆ сн҃а и҆ ст҃а́гѡ дх҃а, и҆ твоѐ ст҃о́е застꙋпле́нїе, во вѣ́ки вѣкѡ́въ. А҆ми́нь.