Акафист Успению Пресвятой Богородицы

А́нгел предста́тель по́слан бы́сть рещи́ Богоро́дице ко преми́рным Ея́ возше́ствие и приити́ предъявля́ше к Не́й Сы́ну Ея́ и Бо́гу, све́тло о Не́й блиста́яся и стоя́, зовы́й такова́я:

Ра́дуйся, прера́дованная Ма́ти Царе́ва; ра́дуйся, Небе́сная Цари́це, Ма́ти Бо́га и Го́спода Небесе́ и земли́.

Ра́дуйся, предпочте́нная превели́чеством прише́ствия к Тебе́ Сы́на Твоего́ и Бо́га; ра́дуйся, возвели́ченная извеще́нием Твоего́ к Сы́ну отше́ствия.

Ра́дуйся, от все́х родо́в Бо́гом избра́нная; ра́дуйся, свято́е вмести́лище Сло́ва Бо́жия.

Ра́дуйся, проро́ческаго прорече́ния исполне́ние; ра́дуйся, Апо́столом пречестны́й ве́нче.

Ра́дуйся, святи́телем украше́ние и свяще́нником добро́то; ра́дуйся, прави́телем удобре́ние и держа́во.

Ра́дуйся, Богому́дрых и́ноков возведе́ние к Го́рнему Ца́рствию; ра́дуйся, отверза́ющая ра́йския две́ри христиа́нскому ро́ду, при́сно Тя́ блажа́щему.

Ра́дуйся, Обра́дованная, во Успе́нии Твое́м на́с не оставля́ющая.

Разу́мная вся́ тва́рь, старе́йшая чинонача́лия а́нгельская приидо́ша со свои́м Царе́м, И́же во Своя́ живонача́льнейшия ру́це ду́шу Ма́тере Своея́ прия́т; те́плый же ве́рою Пе́тр со слеза́ми мно́гая к Не́й изрече́, зовы́й:

Ра́дуйся, ко преми́рным, Ма́ти Творца́ ми́ру, восходя́щая; ра́дуйся, к пренебе́сным, простра́ннейшая небе́с, взе́млющаяся.

Ра́дуйся, четвероча́стное стихи́й освяти́вшая Твои́м восхожде́нием; ра́дуйся, Небе́сных возвесели́вшая Твои́м прехожде́нием.

Ра́дуйся, во Иерусали́м Го́рний прекра́сный прия́тая; ра́дуйся, в нерукотворе́нныя хра́мы прера́достно вше́дшая.

Ра́дуйся, Херуви́мов и Серафи́мов Цари́це; ра́дуйся, Арха́нгелов и А́нгелов Влады́чице.

Ра́дуйся, прибе́жище ве́рным и избавле́ние; ра́дуйся, достоя́нию Твоему́ по́мощь и защище́ние.

Ра́дуйся, о все́м ми́ре христиа́нстем к Бо́гу Хода́таице; ра́дуйся, бла́г вся́ческих Всеблага́я Пода́тельнице.

Ра́дуйся, Обра́дованная, во Успе́нии Твое́м на́с не оставля́ющая.

Име́я в себе́ помышле́ние учени́к, я́ко Бо́жиим смотре́нием бе́ ему́ не обрести́ся ко провожде́нию Богома́тере с про́чими вку́пе, обра́дован бы́в о безсме́ртнем Ея́ Успе́нии, сия́ вопия́ше к Не́й:

Ра́дуйся, восприе́млемая от земли́ дла́ньма Сы́на Твоего́; ра́дуйся, ко превы́шним возше́дшая наслажда́тися сла́вы Его́.

Ра́дуйся, провожда́емая от все́х чинонача́лий а́нгельских в Го́рняя; ра́дуйся, подъе́млемая Херуви́мы в Небе́сная и Наднебе́сная.

Ра́дуйся, в Небе́сных врате́х от старе́йших Си́л велеле́пно пе́сньми возноси́мая; ра́дуйся, от все́х Небе́сных гра́ждан окружа́емая и блажи́мая.

Ра́дуйся, Не́бо земно́е, к Го́рнему селе́нию возвы́шенное; ра́дуйся, Престо́ле Госпо́день, от земли́ вознесе́нный в Ца́рствие Небе́сное.

Ра́дуйся, предста́тельство на́ше и кре́пкое заступле́ние; ра́дуйся, гре́шником Спору́чнице во спасе́ние.

Ра́дуйся, Христиа́ном Цари́це и по Бо́зе Наде́ждо Небе́снаго Ца́рствия; ра́дуйся, Ма́ти Живота́ и по Го́споде на́м упова́ние жи́зни ве́чныя.

Ра́дуйся, Обра́дованная, во Успе́нии Твое́м на́с не оставля́ющая.

Слы́шавше таи́нницы и самови́дцы Сло́ва А́нгелов, пою́щих превы́шними пе́сньми при погребе́нии Богоприя́тнаго те́ла Бо́жия Ма́тере, и че́сть пода́ти хотя́ще Богоуго́дную, потща́шася согла́сно пе́ти, глаго́люще:

Ра́дуйся, благове́стие прие́мшая о преше́ствии Твое́м в Го́рнее Ца́рствие; ра́дуйся, от благовести́вшаго Гаврии́ла прие́мшая ра́достнаго рая́ вра́вие.

Ра́дуйся, пречестно́е херуви́мское мно́жество просвети́вшая; ра́дуйся, пресла́вное серафи́мское естество́ возра́довавшая.

Ра́дуйся, от патриа́рхов прообразова́нная; ра́дуйся, от проро́ков предвозвеще́нная.

Ра́дуйся, злу́ю де́рзость иуде́еву ско́ро отмсти́вшая; ра́дуйся, исцеле́ние тому́жде пода́вшая.

Ра́дуйся, обрати́вшая в ве́ру Аффо́ниево неве́рие; ра́дуйся, ве́рное того́ прие́мшая испове́дание.

Ра́дуйся, возводя́щая к Небеси́ любо́вь и ве́ру к Тебе́ иму́щих; ра́дуйся, спаса́ющая ве́рою и́мя Твое́ призыва́ющих.

Ра́дуйся, Обра́дованная, во Успе́нии Твое́м на́с не оставля́ющая.

Ви́девше Богови́дцы своего́ Влады́ку, в ру́це Ма́тере Своея́ ду́шу прие́мша, и Го́спода Того́ разуме́вше, потща́шася священносло́вия пе́сньми благосло́вне воспе́ти Ю́:

Ра́дуйся, Цари́це, над все́ми Ца́рствующаго носи́вшая; ра́дуйся, и Сама́ рука́ма Его́ Сыно́внима носи́мая.

Ра́дуйся, ски́птре ца́рский в Христо́вой десни́це; ра́дуйся, в руце́ Но́я ве́твь голуби́цы.

Ра́дуйся, же́зле Ааро́нов, прозя́бший нетле́ние; ра́дуйся, кри́не неувяда́емый, процве́тший безсме́ртие.

Ра́дуйся, Богоотца́ Дави́да цевни́це Богодохнове́нная; ра́дуйся, проро́чествия его́ воста́вшая сла́во, псалти́рю и гу́сли прекра́сныя.

Ра́дуйся, одушевле́нный святы́ни Госпо́дни киво́те; ра́дуйся, в поко́й Госпо́день воскре́сший на́ш животе́.

Ра́дуйся, ски́ние, от Херуви́мов осеня́емая; ра́дуйся, Свята́я святы́х, от Серафи́мов глаго́лемая.

Ра́дуйся, Обра́дованная, во Успе́нии Твое́м на́с не оставля́ющая.

Возсия́ на́м Со́лнце пра́вды, Христо́с Бо́г от Твои́х пречи́стых ложе́сн, во́лею и благоразу́мием пропове́дания чрез Апо́столы ми́р просвети́ и Тя́, Богома́терь, от ро́да и в ро́д просла́ви. Те́мже и мы́ вси́ ублажа́ем Тя́, вопию́ще Ти́:

Ра́дуйся, Присноблаже́нная от все́х родо́в во ве́ки; ра́дуйся, благоутро́бная и Ми́лостивая на челове́ки.

Ра́дуйся, учени́ческому ли́ку обеща́ние испо́лнившая; ра́дуйся, присеще́нием Твои́м от Сы́на Твоего́ и Бо́га ми́р тому́ пода́вшая.

Ра́дуйся, всежела́тельное святы́х сла́дкое зре́ние; ра́дуйся, преподо́бных ма́терей и де́в святы́х всевеселя́щее ра́дование.

Ра́дуйся, преходя́щая ра́йское селе́ние пра́ведных; ра́дуйся, посеща́ющая все́х во сла́ве небе́сней су́щих.

Ра́дуйся, нача́ло челове́ческаго спасе́ния; ра́дуйся, исполне́ние все́х благи́х жела́ния.

Ра́дуйся, по Бо́зе, Царе́ ца́рствующих, Богоро́дице Цари́це; ра́дуйся, по Го́споде госпо́дствующих, Влады́це на́шем, Госпоже́ и Влады́чице.

Ра́дуйся, Обра́дованная, во Успе́нии Твое́м на́с не оставля́ющая.

Но́вую показа́ тва́рь, я́влься на́м, все́х Творе́ц Госпо́дь Тобо́ю, Богоро́дице. Ты́ же сро́дное промышле́ние о на́с к Нему́ иму́щи, че́стне почита́ющих пречестно́е Твое́ Успе́ние, приими́ сицева́я Тебе́ вопию́щих:

Ра́дуйся, Ма́ти Бо́гу, избра́нная от земны́х; ра́дуйся, превы́шшая земны́х и Небе́сных.

Ра́дуйся, Херуви́мов и Серафи́мов горе́ превозше́дшая; ра́дуйся, ли́к учени́ческий о́блаком ко погребе́нию Ти́ до́ле совоку́пльшая.

Ра́дуйся, Фому́ по погребе́нии Твое́м си́лою Бо́жиею предпоста́вившая изря́днее; ра́дуйся, чрез него́ уве́рившая Твое́ на Не́бо с пло́тию преселе́ние.

Ра́дуйся, красото́ю все́х доброде́телей укра́шенная; ра́дуйся, красне́йшему па́че сыно́в челове́ческих Сы́нови Своему́ сопричте́нная.

Ра́дуйся, я́ко фи́никс, пло́тию воскре́сшею процве́тшая; ра́дуйся, я́ко ке́др в Лива́не небе́сном, умно́жившаяся.

Ра́дуйся, дре́во живота́, насажде́нное посреде́ рая́ превы́шняго; ра́дуйся, ковче́же мы́сленный возвы́шенный в Го́рняя от пото́па сме́ртнаго.

Ра́дуйся, Обра́дованная, во Успе́нии Твое́м на́с не оставля́ющая.

Вся́ бы́вши горе́, к Небе́сным взята́ и, земны́х не оставля́я, Богома́ти, рука́ма Сыно́внима носи́ма, в незаходи́мая вни́де, во о́ный гра́д всесветя́щий и прекра́сный, Иерусали́м вы́шний, Херуви́мы обстои́ма со все́ми Небе́сными си́лами, иде́же слы́шит пою́щих сия́:

Ра́дуйся, Ея́же пресвята́я душа́ в вы́шнем всесве́тлом Сио́не вселя́ется; ра́дуйся, Ея́же и нетле́нное те́ло та́можде с душе́ю ку́пно прославля́ется.

Ра́дуйся, вше́дшая в престо́льный гра́д Самаго́ Вседержи́теля; ра́дуйся, возне́сшаяся в прекра́сный ра́й Вы́шняго Насади́теля.

Ра́дуйся, пренесе́нная во гра́д, основа́нный от ка́меней всесветя́щих; ра́дуйся, введе́нная во огра́ду, обстои́мую во́и си́л превы́шних.

Ра́дуйся, превы́шше Небе́с во благоле́пие Бо́жие взя́тая; ра́дуйся, па́че все́х невеще́ственных умо́в почте́нная.

Ра́дуйся, принося́щая к Сы́ну Своему́ и Бо́гу моле́ние ве́рных; ра́дуйся, и Сама́ непреста́нно у Престо́ла Сы́на Твоего́ и Бо́га моля́щаяся о все́х.

Ра́дуйся, Предста́тельнице к Бо́гу, ми́р спаса́ющая; ра́дуйся, Засту́пнице, ро́ду христиа́нскому от Бо́га дарова́нная.

Ра́дуйся, Обра́дованная, во Успе́нии Твое́м на́с не оставля́ющая.

Вети́йства Боговеща́нных проро́ческих рече́ний ны́не зри́м о Тебе́ сбы́вшаяся, Богоро́дице, я́ко вои́стину Бо́га пло́тию родила́ еси́ на́м. Те́мже та́инству словесе́ Бо́жия ве́рующе, вопие́м:

Ра́дуйся, зако́на и проро́ков глави́зно соверше́нная; ра́дуйся, звездо́ Иа́ковля, Валаа́мом пророкова́нная.

Ра́дуйся, о́дре Царя́ Вели́каго, веща́нный Соломо́ном; ра́дуйся, руно́, ороше́нное Иису́сом, образова́нное Гедео́ном.

Ра́дуйся, Неопали́мая Купино́, законополо́жником предзри́мая; ра́дуйся, горо́ свята́я, му́жем жела́ния усмотре́нная.

Ра́дуйся, ле́ствице небе́сная, Иа́ковом предви́димая; ра́дуйся, две́ре непроходи́мая, Иезеки́илем предзри́мая.

Ра́дуйся, со́лнце селе́ния Христо́ва, псалмопе́вцем предъявле́нное; ра́дуйся, та́инство, многообра́зне проро́ки пронарече́нное.

Ра́дуйся, проро́ческих глаго́л все́х, предрече́нных о Тебе́, коне́ц прине́сшая; ра́дуйся, Вы́шняго смотре́ния вся́ за спасе́ние ми́ра соверши́вшая.

Ра́дуйся, Обра́дованная, во Успе́нии Твое́м на́с не оставля́ющая.

Стена́ еси́ ве́рным, Богоро́дице Де́во, и заступле́ние все́м, к Тебе́ прибега́ющим, и́бо Небесе́ и земли́ Творе́ц, от Тебе́ пло́тию проше́д, Пречи́стая, ду́хом и те́лом в Небе́сная Тя́ пресели́, ко ближа́йшему предста́тельству о все́х, и́хже приглаша́ти научи́:

Ра́дуйся, гра́де Царя́ Вели́каго верху́ горы́ Небе́сныя; ра́дуйся, стено́ и покро́ве, не кры́ющийся от на́шего притека́ния.

Ра́дуйся, ве́рным на враги́ посо́бствующая; ра́дуйся, наше́ствия ага́рянская побежда́ющая.

Ра́дуйся, ве́ры благочести́выя недви́жимое сохране́ние; ра́дуйся, ерети́чествующих полко́в разоре́ние.

Ра́дуйся, ра́дость и умире́ние ми́ру су́щая; ра́дуйся, всегуби́тельнаго а́да попра́вшая.

Ра́дуйся, во́инствующих на пло́ть целому́дрием изря́дное венча́ние; ра́дуйся, му́ченических по́двигов всечестно́е прославле́ние.

Ра́дуйся, преподо́бных трудо́м Хода́таице блаже́ннаго упокое́ния; ра́дуйся, и́ноком благоскорбя́щим Пода́тельнице ве́чнаго ра́дования.

Ра́дуйся, Обра́дованная, во Успе́нии Твое́м на́с не оставля́ющая.

Светоприе́мная свеща́ и́стиннаго Све́та су́щим на́м на земли́ я́вльшися, ду́ши просвеща́еши и чту́щих Твое́ всечестно́е преставле́ние к ра́зуму Боже́ственному наставля́еши, да пое́м Ти́ сицева́я:

Ра́дуйся, свеще́ неугаси́мая огня́ невеще́ственнаго; ра́дуйся, заре́ незаходи́мая Све́та невече́рняго.

Ра́дуйся, луно́, от Со́лнца пра́вды облистава́емая; ра́дуйся, све́тлосте, во тьме́ светя́щая.

Ра́дуйся, свети́льниче, на све́щнице превы́шнем поста́вленный; ра́дуйся, исто́чниче жи́зни, из гро́ба во све́т изведе́нный.

Ра́дуйся, Ма́ти Све́та у́мнаго, благочести́вых ду́ши просвеща́ющаго; ра́дуйся, Ма́ти все́х Бо́га, озло́бленных ду́ши утеша́ющаго.

Ра́дуйся, упова́ющим на Тя́ живота́ коне́ц непосты́дный да́рующая; ра́дуйся, достоя́ние Бо́жиим и Свои́м рабо́м на Суде́ Сы́на Твоего́ одесну́ю Его́ устроя́ющая.

Ра́дуйся, Преблаже́нная, я́ко Тобо́ю блаже́ни есмы́ и мы́, и́же Помо́щницу Тя́ и́мамы; ра́дуйся, Преблагослове́нная в ро́д и ро́д, я́ко Госпо́дь с Тобо́ю, и Тобо́ю с на́ми.

Ра́дуйся, Обра́дованная, во Успе́нии Твое́м на́с не оставля́ющая.

Пою́ще всечестно́е Твое́ Успе́ние, восхваля́ем вси́ ко пренебе́сным возше́ствие Твое́, Цари́це Богома́ти. Ты́ же освяти́, просла́ви и спаси́ все́х, любо́вию пою́щих Тебе́:

Ра́дуйся, очи́стившая зе́млю пречи́стыми но́г Твои́х стопа́ми; ра́дуйся, освяти́вшая возду́х восхожде́нием Твои́м к Небеси́.

Ра́дуйся, на Небе́сный кру́г возступи́вшая; ра́дуйся, вся́ добро́ты неизрече́нныя зря́щая.

Ра́дуйся, во сла́ве приседя́щая престо́лу Сы́на Твоего́ и Бо́га; ра́дуйся, с Сы́ном и Бо́гом ве́чно ца́рствующая.

Ра́дуйся, красото́ в десни́це Госпо́дней, украша́ющая блажа́щих Тя́ все́х Небе́сных; ра́дуйся, обра́довавшая наде́янием на Тя́ все́х земны́х.

Ра́дуйся, облече́нная в со́лнце, сия́ющая благода́тию и сла́вою все́й вселе́нней; ра́дуйся, обеща́вшая сохраня́ти и спаса́ти призыва́ющих Тя́ все́х в поднебе́сней.

Ра́дуйся, от христиа́нских родо́в Ма́ти Бо́жия почита́емая и Богоро́дица имену́емая; ра́дуйся, от восто́к со́лнца до за́пад пресла́вно и правосла́вно от все́х благочести́вых сла́вимая.

Ра́дуйся, Обра́дованная, во Успе́нии Твое́м на́с не оставля́ющая.

А҆́гг҃лъ предста́тель по́сланъ бы́сть, рещѝ бцⷣѣ ко премі̑рнымъ є҆ѧ̀ возше́ствїе: и҆ прїитѝ пред̾ѧвлѧ́ше къ не́й сн҃ꙋ є҆ѧ̀ и҆ бг҃ꙋ, свѣ́тлѡ ѡ҆ не́й блиста́ѧсѧ, и҆ стоѧ̀, зовы́й такова̑ѧ:

Ра́дꙋйсѧ, прера́дованнаѧ мт҃и цр҃е́ва: ра́дꙋйсѧ, нбⷭ҇наѧ цр҃и́це, мт҃и бг҃а и҆ гдⷭ҇а нб҃сѐ и҆ землѝ.

Ра́дꙋйсѧ, предпочте́ннаѧ превели́чествомъ прише́ствїѧ къ тебѣ̀ сн҃а твоегѡ̀ и҆ бг҃а: ра́дꙋйсѧ, возвели́ченнаѧ и҆звѣще́нїемъ твоегѡ̀ къ сн҃ꙋ ѿше́ствїѧ.

Ра́дꙋйсѧ, ѿ всѣ́хъ родѡ́въ бг҃омъ и҆збра́ннаѧ: ра́дꙋйсѧ, ст҃о́е вмѣсти́лище сло́ва бж҃їѧ.

Ра́дꙋйсѧ, прⷪ҇ро́ческагѡ прорече́нїѧ и҆сполне́нїе: ра́дꙋйсѧ, а҆пⷭ҇лѡмъ пречестны́й вѣ́нче.

Ра́дꙋйсѧ, ст҃и́телємъ ᲂу҆краше́нїе, и҆ сщ҃е́нникѡмъ добро́то: ра́дꙋйсѧ, прави́телємъ ᲂу҆добре́нїе и҆ держа́во.

Ра́дꙋйсѧ, бг҃омꙋ́дрыхъ и҆́нокѡвъ возведе́нїе къ го́рнемꙋ црⷭ҇твїю: ра́дꙋйсѧ, ѿверза́ющаѧ ра̑йскїѧ двє́ри хрⷭ҇тїа́нскомꙋ ро́дꙋ, при́снѡ тѧ̀ блажа́щемꙋ.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Разꙋ́мнаѧ всѧ̀ тва́рь, старѣ̑йшаѧ чинонача̑лїѧ а҆́гг҃льскаѧ, прїидо́ша со свои́мъ цр҃е́мъ, и҆́же во своѧ̑ живонача́льнѣйшыѧ рꙋ́цѣ дꙋ́шꙋ мт҃ре своеѧ̀ прїѧ́тъ: те́плый же вѣ́рою пе́тръ со слеза́ми мнѡ́гаѧ къ не́й и҆зречѐ, зовы́й:

Ра́дꙋйсѧ, ко премі̑рнымъ, мт҃и творца̀ мі́рꙋ, восходѧ́щаѧ: ра́дꙋйсѧ, къ пренебє́снымъ, простра́ннѣйшаѧ нб҃съ, взе́млющаѧсѧ.

Ра́дꙋйсѧ, четвероча́стное стїхі́й ѡ҆свѧти́вшаѧ твои́мъ восхожде́нїемъ: ра́дꙋйсѧ, нбⷭ҇ныхъ возвесели́вшаѧ твои́мъ прехожде́нїемъ.

Ра́дꙋйсѧ, во і҆ерꙋсали́мъ го́рнїй прекра́сный прїѧ́таѧ: ра́дꙋйсѧ, въ нерꙋкотворє́нныѧ хра́мы прера́достнѡ вше́дшаѧ.

Ра́дꙋйсѧ, херꙋві́мѡвъ и҆ серафі́мѡвъ цр҃и́це: ра́дꙋйсѧ, а҆рха́гг҃лѡвъ и҆ а҆́гг҃лѡвъ влⷣчце.

Ра́дꙋйсѧ, прибѣ́жище вѣ̑рнымъ, и҆ и҆збавле́нїе: ра́дꙋйсѧ, достоѧ́нїю твоемꙋ̀ по́мощь и҆ защище́нїе.

Ра́дꙋйсѧ, ѡ҆ все́мъ мі́рѣ хрⷭ҇тїа́нстѣмъ къ бг҃ꙋ хода́таице: ра́дꙋйсѧ, бла̑гъ всѧ́ческихъ всеблага́ѧ пода́тельнице.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

И҆мѣ́ѧ въ себѣ̀ помышле́нїе ᲂу҆чени́къ, ꙗ҆́кѡ бж҃їимъ смотре́нїемъ бѣ̀ є҆мꙋ̀, не ѡ҆брѣсти́сѧ ко провожде́нїю бг҃ома́тере съ про́чими вкꙋ́пѣ, ѡ҆бра́дованъ бы́въ ѡ҆ безсме́ртнѣмъ є҆ѧ̀ ᲂу҆спе́нїи, сїѧ̑ вопїѧ́ше къ не́й:

Ра́дꙋйсѧ, воспрїе́млемаѧ ѿ землѝ дла́ньма сн҃а твоегѡ̀: ра́дꙋйсѧ, ко превы̑шнимъ возше́дшаѧ наслажда́тисѧ сла́вы є҆гѡ̀.

Ра́дꙋйсѧ, провожда́емаѧ ѿ всѣ́хъ чинонача́лїй а҆́гг҃льскихъ въ гѡ́рнѧѧ: ра́дꙋйсѧ, под̾е́млемаѧ херꙋві́мы въ нбⷭ҇наѧ и҆ наднбⷭ҇наѧ.

Ра́дꙋйсѧ, въ нбⷭ҇ныхъ вратѣ́хъ ѿ старѣ́йшихъ си́лъ велелѣ́пнѡ пѣ́сньми возноси́маѧ: ра́дꙋйсѧ, ѿ всѣ́хъ нбⷭ҇ныхъ гра́жданъ ѡ҆крꙋжа́емаѧ и҆ блажи́маѧ.

Ра́дꙋйсѧ, не́бо земно́е, къ го́рнемꙋ селе́нїю возвы́шенное: ра́дꙋйсѧ, прⷭ҇то́ле гдⷭ҇нь, ѿ землѝ вознесе́нный въ црⷭ҇твїе нбⷭ҇ное.

Ра́дꙋйсѧ, предста́тельство на́ше и҆ крѣ́пкое застꙋпле́нїе: ра́дꙋйсѧ, грѣ́шникѡмъ спорꙋ́чнице во сп҃се́нїе.

Ра́дꙋйсѧ, хрⷭ҇тїа́нѡмъ цр҃и́це, и҆ по бз҃ѣ наде́ждо нбⷭ҇нагѡ црⷭ҇твїѧ: ра́дꙋйсѧ, мт҃и живота̀, и҆ по гдⷭ҇ѣ на́мъ ᲂу҆пова́нїе жи́зни вѣ́чныѧ.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Слы́шавше таи̑нницы и҆ самови́дцы сло́ва а҆́гг҃лѡвъ пою́щихъ превы́шними пѣ́сньми, при погребе́нїи бг҃опрїѧ́тнагѡ тѣ́ла бж҃їѧ мт҃ре, и҆ че́сть пода́ти хотѧ́ще бг҃оꙋго́днꙋю, потща́шасѧ согла́снѡ пѣ́ти, глаго́люще:

Ра́дꙋйсѧ, благовѣ́стїе прїе́мшаѧ ѡ҆ преше́ствїи твое́мъ въ го́рнее црⷭ҇твїе: ра́дꙋйсѧ, ѿ бл҃говѣсти́вшагѡ гаврїи́ла прїе́мшаѧ ра́достнагѡ раѧ̀ вра́вїе.

Ра́дꙋйсѧ, пречⷭ҇тно́е херꙋві́мское мно́жество просвѣти́вшаѧ: ра́дꙋйсѧ, пресла́вное серафі́мское є҆стество̀ возра́довавшаѧ.

Ра́дꙋйсѧ, ѿ патрїа́рхѡвъ проѡбразова́ннаѧ: ра́дꙋйсѧ, ѿ прⷪ҇ро́кѡвъ предвозвѣще́ннаѧ.

Ра́дꙋйсѧ, ѕлꙋ́ю де́рзость і҆ꙋде́євꙋ ско́рѡ ѿмсти́вшаѧ: ра́дꙋйсѧ, и҆сцѣле́нїе томꙋ́жде пода́вшаѧ.

Ра́дꙋйсѧ, ѡ҆брати́вшаѧ въ вѣ́рꙋ а҆фѳо́нїево невѣ́рїе: ра́дꙋйсѧ, вѣ́рное тогѡ̀ прїе́мшаѧ и҆сповѣ́данїе.

Ра́дꙋйсѧ, возводѧ́щаѧ къ нб҃сѝ, любо́вь и҆ вѣ́рꙋ къ тебѣ̀ и҆мꙋ́щихъ: ра́дꙋйсѧ, сп҃са́ющаѧ вѣ́рою и҆́мѧ твоѐ призыва́ющихъ.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Ви́дѣвше бг҃ови́дцы своего̀ влⷣкꙋ, въ рꙋ́цѣ мт҃ре своеѧ̀ дꙋ́шꙋ прїе́мша, и҆ гдⷭ҇а того̀ разꙋмѣ́вше, потща́шасѧ свѧщенносло́вїѧ пѣ́сньми бл҃госло́внѣ воспѣ́ти ю҆̀:

Ра́дꙋйсѧ, цр҃и́це, над̾ всѣ́ми црⷭ҇твꙋющаго носи́вшаѧ: ра́дꙋйсѧ, и҆ сама̀ рꙋка́ма є҆гѡ̀ сн҃о́внима носи́маѧ.

Ра́дꙋйсѧ, ски́птре црⷭ҇кїй въ хрⷭ҇то́вой десни́цѣ: ра́дꙋйсѧ, въ рꙋцѣ̀ нѡ́а, вѣ́тве голꙋби́цы.

Ра́дꙋйсѧ, же́зле а҆арѡ́новъ, прозѧ́бшїй нетлѣ́нїе: ра́дꙋйсѧ, крі́не неꙋвѧда́емый, процвѣ́тшїй безсме́ртїе.

Ра́дꙋйсѧ, бг҃оѻтца̀ дв҃да цѣвни́це бг҃одохнове́ннаѧ: ра́дꙋйсѧ, прⷪ҇ро́чествїѧ є҆гѡ̀ воста́вшаѧ сла́во, ѱалти́рю и҆ гꙋ́сли прекра́сныѧ.

Ра́дꙋйсѧ, ѡ҆дꙋшевле́нный ст҃ы́ни гдⷭ҇ни кївѡ́те: ра́дꙋйсѧ, въ поко́й гдⷭ҇ень воскре́сшїй на́шъ животѐ.

Ра́дꙋйсѧ, ски́нїе, ѿ херꙋві́мѡвъ ѡ҆сѣнѧ́емаѧ: ра́дꙋйсѧ, ст҃а́ѧ ст҃ы́хъ, ѿ серафі́мѡвъ глаго́лємаѧ.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Возсїѧ̀ на́мъ сл҃нце пра́вды хрⷭ҇то́съ бг҃ъ, ѿ твои́хъ пречⷭ҇тыхъ ложе́снъ во́лею, и҆ бл҃горазꙋ́мїемъ проповѣ́данїѧ чрез̾ а҆пⷭ҇лы мі́ръ просвѣтѝ, и҆ тѧ̀ бг҃ома́терь ѿ ро́да и҆ въ ро́дъ просла́ви. тѣ́мже и҆ мы̀ всѝ ᲂу҆блажа́емъ тѧ̀, вопїю́ще тѝ:

Ра́дꙋйсѧ, приснобл҃же́ннаѧ ѿ всѣ́хъ родѡ́въ во вѣ́ки: ра́дꙋйсѧ, бл҃гоꙋтро́бнаѧ и҆ млⷭ҇тиваѧ на человѣ́ки.

Ра́дꙋйсѧ, ᲂу҆чени́ческомꙋ ли́кꙋ ѡ҆бѣща́нїе и҆спо́лнившаѧ: ра́дꙋйсѧ, присѣще́нїемъ твои́мъ ѿ сн҃а твоегѡ̀ и҆ бг҃а, ми́ръ томꙋ̀ пода́вшаѧ.

Ра́дꙋйсѧ, всежела́тельное ст҃ы́хъ сла́дкое зрѣ́нїе: ра́дꙋйсѧ, прпⷣбныхъ ма́терей и҆ дѣ́въ ст҃ы́хъ всевеселѧ́щее ра́дованїе.

Ра́дꙋйсѧ, преходѧ́щаѧ ра́йское селе́нїе првⷣныхъ: ра́дꙋйсѧ, посѣща́ющаѧ всѣ́хъ во сла́вѣ нбⷭ҇нѣй сꙋ́щихъ.

Ра́дꙋйсѧ, нача́ло человѣ́ческагѡ сп҃се́нїѧ: ра́дꙋйсѧ, и҆сполне́нїе всѣ́хъ бл҃ги́хъ жела́нїѧ.

Ра́дꙋйсѧ, по бз҃ѣ цр҃ѣ̀ ца́рствꙋющихъ бцⷣе цр҃и́це: ра́дꙋйсѧ, по гдⷭ҇ѣ госпо́дствꙋющихъ, влⷣцѣ на́шемъ, гпⷭ҇жѐ и҆ влⷣчце.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Но́вꙋю показа̀ тва́рь, ꙗ҆́вльсѧ на́мъ всѣ́хъ творе́цъ гдⷭ҇ь тобо́ю, бцⷣе. ты́ же сро́дное промышле́нїе ѡ҆ на́съ къ немꙋ̀ и҆мꙋ́щи, чⷭ҇тнѣ почита́ющихъ пречⷭ҇тно́е твоѐ ᲂу҆спе́нїе, прїимѝ сицєва́ѧ тебѣ̀ вопїю́щихъ:

Ра́дꙋйсѧ, мт҃и бг҃ꙋ и҆збра́ннаѧ ѿ земны́хъ: ра́дꙋйсѧ, превы́шшаѧ земны́хъ и҆ нбⷭ҇ныхъ.

Ра́дꙋйсѧ, херꙋві́мѡвъ и҆ серафі́мѡвъ горѣ̀ превозше́дшаѧ: ра́дꙋйсѧ, ли́къ ᲂу҆чени́ческїй ѻ҆́блакомъ ко погребе́нїю тѝ до́лѣ совокꙋ́пльшаѧ.

Ра́дꙋйсѧ, ѳѡмꙋ̀ по погребе́нїи твое́мъ си́лою бж҃їею предпоста́вившаѧ и҆зрѧ́днѣе: ра́дꙋйсѧ, чрез̾ него̀ ᲂу҆вѣ́рившаѧ твоѐ на нб҃о съ пло́тїю преселе́нїе.

Ра́дꙋйсѧ, красото́ю всѣ́хъ добродѣ́телей ᲂу҆кра́шеннаѧ: ра́дꙋйсѧ, краснѣ́йшемꙋ па́че сынѡ́въ человѣ́ческихъ сн҃ови своемꙋ̀ сопричте́ннаѧ.

Ра́дꙋйсѧ, ꙗ҆́кѡ фі́нїѯъ пло́тїю воскре́сшею процвѣ́тшаѧ: ра́дꙋйсѧ, ꙗ҆́кѡ ке́дръ въ лїва́нѣ нбⷭ҇номъ ᲂу҆мно́жившаѧсѧ.

Ра́дꙋйсѧ, дре́во живота̀ насажде́нное посредѣ̀ раѧ̀ превы́шнѧгѡ: ра́дꙋйсѧ, ковче́же мы́сленный, возвы́шенный въ гѡ́рнѧѧ ѿ пото́па сме́ртнагѡ.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Всѧ̀ бы́вши горѣ̀ къ нбⷭ҇нымъ взѧта̀, и҆ земны́хъ не ѡ҆ставлѧ́ѧ, бг҃ома́ти, рꙋка́ма сн҃о́внима носи́ма, въ незаходи̑маѧ вни́де, во ѻ҆́ный гра́дъ всесвѣтѧ́щїй и҆ прекра́сный і҆ерꙋсали́мъ вы́шнїй, херꙋві̑мы ѡ҆бстои́ма, со всѣ́ми нбⷭ҇ными си́лами, и҆дѣ́же слы́шитъ пою́щихъ сїѧ̑:

Ра́дꙋйсѧ, є҆ѧ́же прест҃а́ѧ дꙋша̀ въ вы́шнемъ всесвѣ́тломъ сїѡ́нѣ вселѧ́етсѧ: ра́дꙋйсѧ, є҆ѧ́же и҆ нетлѣ́нное тѣ́ло та́можде съ дꙋше́ю кꙋ́пнѡ прославлѧ́етсѧ.

Ра́дꙋйсѧ, вше́дшаѧ въ престо́льный гра́дъ самагѡ̀ вседержи́телѧ: ра́дꙋйсѧ, возне́сшаѧсѧ въ прекра́сный ра́й вы́шнѧгѡ насади́телѧ.

Ра́дꙋйсѧ, пренесе́ннаѧ во гра́дъ ѡ҆снова́нный ѿ ка́меней всесвѣтѧ́щихъ: ра́дꙋйсѧ, введе́ннаѧ во ѡ҆гра́дꙋ ѡ҆бстои́мꙋю вѡ́и си́лъ превы́шнихъ.

Ра́дꙋйсѧ, превы́шше нб҃съ во благолѣ́пїе бж҃їе взѧ́таѧ: ра́дꙋйсѧ, па́че всѣ́хъ невеще́ственныхъ ᲂу҆мѡ́въ почте́наѧ.

Ра́дꙋйсѧ, приносѧ́щаѧ къ сн҃ꙋ своемꙋ̀ и҆ бг҃ꙋ моле́нїе вѣ́рныхъ: ра́дꙋйсѧ, и҆ сама̀ непреста́ннѡ ᲂу҆ прⷭ҇то́ла сн҃а твоегѡ̀ и҆ бг҃а молѧ́щаѧсѧ ѡ҆ всѣ́хъ.

Ра́дꙋйсѧ, предста́тельнице къ бг҃ꙋ мі́ръ спаса́ющаѧ: ра́дꙋйсѧ, застꙋ́пнице ро́дꙋ хрⷭ҇тїа́нскомꙋ ѿ бг҃а дарова́ннаѧ.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Вѣті̑йства бг҃овѣща́нныхъ проро́ческихъ рече́нїй, ны́нѣ зри́мъ ѡ҆ тебѣ̀ сбы́вшаѧсѧ бцⷣе, ꙗ҆́кѡ вои́стиннꙋ бг҃а пло́тїю родила̀ є҆сѝ на́мъ. тѣ́мже та́инствꙋ словесѐ бж҃їѧ вѣ́рꙋюще, вопїе́мъ:

Ра́дꙋйсѧ, зако́на и҆ прⷪ҇ро́кѡвъ глави́зно соверше́ннаѧ: ра́дꙋйсѧ, ѕвѣздо̀ і҆а́кѡвлѧ, валаа́момъ прⷪ҇рокова́ннаѧ.

Ра́дꙋйсѧ, ѻ҆́дре цр҃ѧ̀ вели́кагѡ, вѣща́нный соломѡ́номъ: ра́дꙋйсѧ, рꙋно̀ ѡ҆роше́нное і҆и҃сомъ, ѡ҆бразова́нное гедеѡ́номъ.

Ра́дꙋйсѧ, неѡпали́маѧ кꙋпино̀, законополо́жникомъ предзри́маѧ: ра́дꙋйсѧ, горо̀ ст҃а́ѧ, мꙋ́жемъ жела́нїѧ ᲂу҆смотре́ннаѧ.

Ра́дꙋйсѧ, лѣ́ствице нбⷭ҇наѧ, і҆а́кѡвомъ предви́димаѧ: ра́дꙋйсѧ, две́ре непроходи́маѧ, і҆езекі́илемъ предзри́маѧ.

Ра́дꙋйсѧ, со́лнце селе́нїѧ хрⷭ҇то́ва, ѱалмопѣ́вцемъ пред̾ѧвле́нное: ра́дꙋйсѧ, та́инство, многоѡбра́знѣ прⷪ҇ро́ки пронарече́нное.

Ра́дꙋйсѧ, проро́ческихъ глагѡ́лъ всѣ́хъ предрече́нныхъ ѡ҆ тебѣ̀, коне́цъ прине́сшаѧ: ра́дꙋйсѧ, вы́шнѧгѡ смотрє́нїѧ всѧ̑ за сп҃се́нїе мі́ра соверши́вшаѧ.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Стѣна̀ є҆сѝ вѣ̑рнымъ, бцⷣе дв҃о, и҆ застꙋпле́нїе всѣ̑мъ къ тебѣ̀ прибѣга́ющымъ: и҆́бо нб҃сѐ и҆ землѝ творе́цъ ѿ тебѐ пло́тїю проше́дъ, пречи́стаѧ, дх҃омъ и҆ тѣ́ломъ въ небє́снаѧ тѧ̀ преселѝ ко ближа́йшемꙋ предста́тельствꙋ ѡ҆ всѣ́хъ, и҆̀хже приглаша́ти наꙋчѝ:

Ра́дꙋйсѧ, гра́де цр҃ѧ̀ вели́кагѡ верхꙋ̀ горы̀ нбⷭ҇ныѧ: ра́дꙋйсѧ, стѣно̀ и҆ покро́ве, не кры́ющїйсѧ ѿ на́шегѡ притека́нїѧ.

Ра́дꙋйсѧ, вѣ̑рнымъ царє́мъ на врагѝ посо́бствꙋющаѧ: ра́дꙋйсѧ, нашє́ствїѧ а҆га̑рѧнскаѧ побѣжда́ющаѧ.

Ра́дꙋйсѧ, вѣ́ры бл҃гочести́выѧ недви́жимое сохране́нїе: ра́дꙋйсѧ, є҆реті́чествꙋющихъ полкѡ́въ разоре́нїе.

Ра́дꙋйсѧ, ра́дость и҆ ᲂу҆мире́нїе мі́рꙋ сꙋ́щаѧ: ра́дꙋйсѧ, всегꙋби́тельнаго а҆́да попра́вшаѧ.

Ра́дꙋйсѧ, во́инствꙋющихъ на пло́ть цѣломꙋ́дрїемъ, и҆зрѧ́дное вѣнча́нїе: ра́дꙋйсѧ, мч҃ническихъ по́двигѡвъ всечⷭ҇тно́е прославле́нїе.

Ра́дꙋйсѧ, прпⷣбныхъ трꙋдѡ́мъ хода́таице бл҃же́ннагѡ ᲂу҆покое́нїѧ: ра́дꙋйсѧ, и҆́нокѡмъ бл҃госкорбѧ́щымъ пода́тельнице вѣ́чнагѡ ра́дованїѧ.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Свѣтопрїе́мнаѧ свѣща̀ и҆́стиннагѡ свѣ́та, сꙋ́щымъ на́мъ на землѝ ꙗ҆́вльшисѧ, дꙋ́шы просвѣща́еши, и҆ чтꙋ́щихъ твоѐ всечестно́е преставле́нїе къ ра́зꙋмꙋ бж҃е́ственномꙋ наставлѧ́еши, да пое́мъ тѝ сицєва́ѧ:

Ра́дꙋйсѧ, свѣщѐ неꙋгаси́маѧ ѻ҆гнѧ̀ невеще́ственнагѡ: ра́дꙋйсѧ, зарѐ незаходи́маѧ свѣ́та невече́рнѧгѡ.

Ра́дꙋйсѧ, лꙋно̀ ѿ сл҃нца пра́вды ѡ҆блистава́емаѧ: ра́дꙋйсѧ, свѣ́тлосте во тмѣ̀ свѣтѧ́щаѧ.

Ра́дꙋйсѧ, свѣти́льниче на свѣ́щницѣ превы́шнемъ поста́вленный: ра́дꙋйсѧ, и҆сто́чниче жи́зни, и҆з̾ гро́ба во свѣ́тъ и҆зведе́нный.

Ра́дꙋйсѧ, мт҃и свѣ́та ᲂу҆́мнагѡ, бл҃гочести́выхъ дꙋ́шы просвѣща́ющагѡ: ра́дꙋйсѧ, мт҃и всѣ́хъ бг҃а, ѡ҆ѕло́бленныхъ дꙋ́шы ᲂу҆тѣша́ющагѡ.

Ра́дꙋйсѧ, ᲂу҆пова́ющымъ на тѧ̀ живота̀ коне́цъ непосты́дный да́рꙋющаѧ: ра́дꙋйсѧ, достоѧ́нїе бж҃їимъ и҆ свои̑мъ рабѡ́мъ, на сꙋдѣ̀ сн҃а твоегѡ̀, ѡ҆деснꙋ́ю є҆гѡ̀ ᲂу҆строѧ́ющаѧ.

Ра́дꙋйсѧ, пребл҃же́ннаѧ, ꙗ҆́кѡ тобо́ю бл҃же́ни є҆смы̀ и҆ мы̀, и҆́же помо́щницꙋ тѧ̀ и҆́мамы: ра́дꙋйсѧ, преблгⷭ҇ве́ннаѧ въ ро́дъ и҆ ро́дъ, ꙗ҆́кѡ гдⷭ҇ь съ тобо́ю, и҆ тобо́ю съ на́ми.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Пою́ще всечⷭ҇тно́е твоѐ ᲂу҆спе́нїе, восхвалѧ́емъ всѝ ко пренебє́снымъ возше́ствїе твоѐ, цр҃и́це бг҃омт҃и: ты́ же ѡ҆ст҃ѝ, просла́ви и҆ сп҃сѝ всѣ́хъ любо́вїю пою́щихъ тебѣ̀:

Ра́дꙋйсѧ, ѡ҆чи́стившаѧ зе́млю пречⷭ҇тыми но́гъ твои́хъ стопа́ми: ра́дꙋйсѧ, ѡ҆ст҃и́вшаѧ воздꙋ́хъ восхожде́нїемъ твои́мъ къ нб҃сѝ.

Ра́дꙋйсѧ, на нбⷭ҇ный крꙋ́гъ возстꙋпи́вшаѧ: ра́дꙋйсѧ, всѧ̑ добрѡ́ты неизречє́нныѧ зрѧ́щаѧ.

Ра́дꙋйсѧ, во сла́вѣ присѣдѧ́щаѧ прⷭ҇то́лꙋ сн҃а твоегѡ̀ и҆ бг҃а: ра́дꙋйсѧ, съ сн҃омъ и҆ бг҃омъ вѣ́чнѡ црⷭ҇твꙋющаѧ.

Ра́дꙋйсѧ, красото̀ въ десни́цѣ гдⷭ҇ней, ᲂу҆краша́ющаѧ бл҃жа́щихъ тѧ̀ всѣ́хъ нбⷭ҇ныхъ: ра́дꙋйсѧ, ѡ҆бра́довавшаѧ надѣ́ѧнїемъ на тѧ̀ всѣ́хъ земны́хъ.

Ра́дꙋйсѧ, ѡ҆блече́ннаѧ въ со́лнце, сїѧ́ющаѧ блгⷣтїю и҆ сла́вою все́й вселе́ннѣй: ра́дꙋйсѧ, ѡ҆бѣща́вшаѧ сохранѧ́ти и҆ сп҃са́ти призыва́ющихъ тѧ̀ всѣ́хъ въ поднбⷭ҇нѣй.

Ра́дꙋйсѧ, ѿ хрⷭ҇тїа́нскихъ родѡ́въ мт҃и бж҃їѧ почита́емаѧ, и҆ бцⷣа и҆менꙋ́емаѧ: ра́дꙋйсѧ, ѿ востѡ́къ со́лнца до за̑падъ, пресла́внѡ и҆ правосла́внѡ ѿ всѣ́хъ бл҃гочести́выхъ сла́вимаѧ.

Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.