Православный календарь
Размер шрифта:

Ака́ѳістъ

А҆ка́ѳїстъ чита́емый пред̾ нерꙋкотво́рнымъ ѻ҆́бразомъ гдⷭ҇а і҆и҃са хрⷭ҇та̀.

Перенесение Нерукотворного образа Господа Иисуса Христа (Убруса) из Эдессы в Константинополь (944) 29 августа 2026

Конда́къ а҃

Пречⷭ҇томꙋ твоемꙋ̀ ѻ҆́бразꙋ покланѧ́емсѧ, бл҃гі́й, просѧ́ще проще́нїѧ прегрѣше́нїй на́шихъ, хрⷭ҇тѐ бж҃е: во́лею бо бл҃говоли́лъ є҆сѝ пло́тїю взы́ти на крⷭ҇тъ, да и҆зба́виши, ꙗ҆́же созда́лъ є҆сѝ, ѿ рабо́ты вра́жїѧ, тѣ́мъ съ наде́ждою вопїе́мъ тѝ:

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

І҆́косъ а҃

І҆и҃се, сп҃си́телю мо́й, моли́лъ смире́ннѡ а҆́ѵгарь кнѧ́зь є҆де́сскїй, прїидѝ ко мнѣ̀ и҆ и҆сцѣлѝ неисцѣ̑льныѧ болѣ̑зни моѧ̑, въ ни́хже ѿ мно́гихъ лѣ́тъ страждꙋ̀. є҆мꙋ́же подража́ѧ, и҆ а҆́зъ, пораже́нный грѣхо́вною прока́зою, мольбо́ю вопїю̀ си́це:

Гдⷭ҇и мо́й, гдⷭ҇и, поми́лꙋй мѧ̀ по вели́цѣй млⷭ҇ти твое́й, и҆ по мно́жествꙋ щедрѡ́тъ твои́хъ ѡ҆чи́сти беззако́нїе моѐ.

Гдⷭ҇и, сп҃си́телю мо́й, росо́ю млⷭ҇ти твое́й ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀.

Гдⷭ҇и, ѿвратѝ лицѐ твоѐ ѿ грѣ̑хъ мои́хъ и҆ всѧ̑ беззакѡ́нїѧ моѧ̑ ѡ҆чи́сти.

Гдⷭ҇и, се́рдце чи́сто сози́жди во мнѣ̀ и҆ дꙋ́хъ пра́въ ѡ҆бновѝ во ᲂу҆тро́бѣ мое́й.

Гдⷭ҇и, не ѿве́ржи менѐ ѿ лица̀ твоегѡ̀ и҆ дх҃а твоегѡ̀ ст҃а́гѡ не ѿымѝ ѿ менє̀.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ в҃

Ви́дѧ любо́вь и҆ вѣ́рꙋ а҆́ѵгарѧ є҆де́сскагѡ, гдⷭ҇и, ты̀ писа́лъ є҆сѝ є҆мꙋ̀: бл҃же́нъ є҆сѝ, а҆́ѵгарь, не ви́дѣвый мѧ̀ и҆ вѣ́ровавый въ мѧ̀, а҆́зъ пошлю̀ ᲂу҆ченика̀ моегѡ̀ и҆ то́й и҆сцѣли́тъ тѧ̀ и҆ жи́знь вѣ́чнꙋю пода́стъ тѝ и҆ сꙋ́щимъ съ тобо́ю. Посли́ же, гдⷭ҇и, млⷭ҇ть твою̀ и҆ мнѣ̀ вопїю́щемꙋ: А҆ллилꙋ́їа.

І҆́косъ в҃

Ра́зꙋмъ не постига́етъ та́йны, ка́кѡ гдⷭ҇ь приложе́нїемъ къ бжⷭ҇твенномꙋ ли́кꙋ своемꙋ̀ ᲂу҆брꙋ́са, и҆з̾ѡбразѝ на не́мъ подо́бїе своѐ, посыла́ѧ ѻ҆́ное къ а҆́ѵгарю, жела́нїе тогѡ̀ и҆сполнѧ́ѧ. Се́й же ра́дости вели́кой и҆спо́лньсѧ, поклони́сѧ ѻ҆́бразꙋ хрⷭ҇то́вꙋ, є҆мꙋ́же и҆ мы̀ съ бл҃гоговѣ́нїемъ дне́сь покланѧ́емсѧ, съ мольбо́ю и҆ вѣ́рою зовꙋ́ще:

Гдⷭ҇и мо́й, гдⷭ҇и, ᲂу҆стнѣ̀ моѧ̀ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀.

Гдⷭ҇и мо́й, гдⷭ҇и, возвратѝ мѝ ра́дость сп҃се́нїѧ и҆ дх҃омъ влⷣчнимъ ᲂу҆твердѝ мѧ̀.

Гдⷭ҇и, тебѣ̀ є҆ди́номꙋ согрѣши́хъ и҆ лꙋка́вое пред̾ тобо́ю сотвори́хъ, по млⷭ҇ти твое́й пощадѝ мѧ̀.

Гдⷭ҇и мо́й, гдⷭ҇и, сп҃си́телю мо́й, при́зри на ско́рбь дꙋшѝ моеѧ̀ и҆ поспѣшѝ на по́мощь мнѣ̀.

Гдⷭ҇и мо́й, гдⷭ҇и, ᲂу҆слы́ши мѧ̀ и҆ ѿ всѣ́хъ скорбе́й и҆зба́ви мѧ̀.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ г҃

Си́лою любвѐ и҆ ра́дости преиспо́лненный, поклони́сѧ а҆́ѵгарь нерꙋкотворе́нномꙋ ѻ҆́бразꙋ сп҃си́телѧ мі́ра и҆, полꙋчи́въ свои́хъ болѣ́зней и҆сцѣле́нїе: съ вѣ́рою воззва̀: хрⷭ҇тѐ бж҃е, всѧ́къ ᲂу҆пова́ющїй на тѧ̀ не постыди́тсѧ, си́мъ поꙋча́ѧ и҆ на́съ всегда̀ ᲂу҆пова́ти на млⷭ҇ти гдⷭ҇ни и҆ пѣ́ти є҆мꙋ̀: А҆ллилꙋ́їа.

І҆́косъ г҃

И҆мѣ́ѧ любо́вь къ па́дшемꙋ ро́дꙋ чл҃вѣ́ческомꙋ, ты̀, хрⷭ҇тѐ бж҃е, чрез̾ є҆ди́нагѡ ѿ ᲂу҆чн҃кѡ́въ твои́хъ воззва́лъ є҆сѝ а҆́ѵгарѧ ѿ мра́ка грѣхо́внагѡ и҆ просвѣти́лъ є҆сѝ дꙋ́шꙋ є҆гѡ̀ свѣ́томъ и҆́стины твоеѧ̀. Воззовѝ и҆ менѧ̀ ѿ глꙋбины̀ грѣхо́вныѧ, да и҆ а҆́зъ съ пла́чемъ возопїю̀ тебѣ̀ си́це:

Гдⷭ҇и мо́й, гдⷭ҇и, да́рꙋй мѝ слє́зы ᲂу҆миле́нїѧ, да и҆́ми тѧ̀ ᲂу҆молю̀ ѡ҆чи́сти пре́жде конца̀ всѧ̑ моѧ̑ прегрѣшє́нїѧ.

Гдⷭ҇и, просвѣтѝ мою̀ дꙋ́шꙋ свѣ́томъ твоегѡ̀ бжⷭ҇твеннагѡ позна́нїѧ и҆ введѝ мѧ̀, по млⷭ҇ти твое́й, въ црⷭ҇тво твоѐ.

Гдⷭ҇и мо́й, гдⷭ҇и, просвѣще́нїе моѐ и҆ сп҃си́тель мо́й, къ тебѣ̀ прибѣго́хъ, наꙋчѝ мѧ̀ твори́ти во́лю твою̀.

Гдⷭ҇и мо́й, гдⷭ҇и, бж҃е мо́й, вразꙋмѝ се́рдце моѐ, и҆ ѿженѝ ѿ негѡ̀ и҆скꙋше́нїе лꙋка́вагѡ, и҆ наста́ви мѧ̀ на пꙋ́ть сп҃се́нїѧ.

Гдⷭ҇и мо́й, гдⷭ҇и, не ѿри́ни ᲂу҆́бѡ моле́нїѧ моегѡ̀ и҆ ᲂу҆слы́ши мѧ̀, твое́ю бл҃гостїю ᲂу҆твердѝ се́рдце моѐ стра́хомъ твои́мъ.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ д҃

Бꙋ́рѧ страсте́й и҆ треволне́нїй жите́йскихъ потоплѧ́етъ мѧ̀, и҆ се́рдце, ѡ҆б̾ѧ́тое ᲂу҆́жасомъ сме́рти, вопїе́тъ тѝ: гдⷭ҇и, нѣ́сть помога́ющагѡ мѝ на землѝ, сп҃си́ мѧ, ꙗ҆́коже дре́вле а҆́ѵгарѧ, и҆ да́рꙋй кꙋ́пнѡ съ ни́мъ пѣ́ти тѝ: А҆ллилꙋ́їа.

І҆́косъ д҃

Слы́ша, ꙗ҆́кѡ і҆ꙋдє́е ненави́дѧтъ тѧ̀, и҆ хо́щꙋтъ нѣ́что ѕло́е содѣ́ѧти тебѣ̀, гдⷭ҇и, пи́шетъ а҆́ѵгарь: а҆́зъ молю̀: прїидѝ ко мнѣ̀ и҆ ѡ҆бита́й со мно́ю. Тогѡ̀ любвѝ подража́ѧ, и҆ а҆́зъ, возста́въ и҆з̾ глꙋбины̀ паде́нїѧ моегѡ̀, дерзнове́ннѡ молю̀ тѧ̀, хрⷭ҇тѐ бж҃е, си́це:

Гдⷭ҇и, бж҃е мо́й, вни́ди въ до́мъ дꙋшѝ моеѧ̀ и҆ пребꙋ́ди неѿлꙋче́нъ со мно́ю грѣ́шнымъ.

Гдⷭ҇и, бж҃е се́рдца моегѡ̀, прїидѝ и҆ соединѝ мѧ̀ съ тобо́ю на вѣ́ки.

Гдⷭ҇и мо́й, гдⷭ҇и, къ тебѣ̀ прилѣпи́ласѧ є҆сѝ дꙋша̀ моѧ̀, прїидѝ и҆ ра́дости и҆спо́лни се́рдце моѐ.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ є҃

Бл҃гослове́нъ грѧды́й во и҆́мѧ гдⷭ҇не воспѣва́хꙋ дре́вле дѣ́ти є҆вре́йстїи, срѣта́ѧ гдⷭ҇а въ і҆ерⷭ҇ли́мѣ. Мы́ же дне́сь, раскрыва́ѧ двє́ри серде́цъ на́шихъ грѧдꙋ́щемꙋ къ на́мъ сп҃сꙋ, со ᲂу҆миле́нїемъ зове́мъ: А҆ллилꙋ́їа.

І҆́косъ є҃

Ди́вныѧ глаго́лы ты̀ ре́клъ є҆сѝ, гдⷭ҇и, всѣ̑мъ погиба́ющимъ: да не смꙋща́етсѧ се́рдце ва́ше, и҆ да не ᲂу҆страша́етсѧ: вѣ́рꙋѧй въ бг҃а, и҆ въ мѧ̀ вѣ́рꙋйте и҆ наслѣ́дите црⷭ҇тво, ᲂу҆гото́ванное ва́мъ ѿ созда́нїѧ мі́ра. А҆́зъ же, помышлѧ́ѧ своѐ беззако́нїе, молю̀ тѧ̀, бл҃же: ᲂу҆твердѝ се́рдце моѐ и҆ просвѣтѝ ᲂу҆́мъ мо́й, тебѣ̀ вопїю́щїй:

Гдⷭ҇и мо́й, гдⷭ҇и, при́зри на мѧ̀ и҆ просвѣтѝ ѻ҆́чи моѝ, да не ᲂу҆снꙋ̀ въ сме́рть.

Гдⷭ҇и мо́й, гдⷭ҇и, пꙋтеводѧ́й і҆и҃лѧ ѿ землѝ фараѡ́новой, наста́ви мѧ̀ на пꙋ́ть тво́й, да пойдꙋ̀ во и҆́стинѣ твое́й.

Гдⷭ҇и і҆и҃се хрⷭ҇тѐ, сн҃е бж҃їй, вѣ́рꙋю въ тѧ̀, помозѝ моемꙋ̀ невѣ́рїю.

Гдⷭ҇и мо́й, гдⷭ҇и, да не ꙗ҆́ростїю твое́ю ѡ҆бличи́ши менѐ, и҆ не ᲂу҆далѧ́йсѧ ѿ менє̀ за беззако́нїѧ моѧ̀.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ ѕ҃

Воззрѣ́ти ѻ҆чи́ма на ѻ҆́бразъ тво́й, гдⷭ҇и, не смѣ́ю ѡ҆каѧ́нный а҆́зъ ѿ лꙋка́выхъ мои́хъ дѣѧ́нїй, но, ꙗ҆́кѡ мыта́рь, стенѧ̀, взыва́ю тѝ: бж҃е, ѡ҆чи́сти мѧ̀ грѣ́шнагѡ ѿ фарїсе́йскагѡ лицемѣ́рїѧ и҆ наꙋчѝ чи́стымъ се́рдцемъ пѣ́ти млⷭ҇рдїю твоемꙋ̀: А҆ллилꙋ́їа.

І҆́косъ ѕ҃

Возсїѧ̀ въ ско́рби мое́й ᲂу҆тѣ́шительное сло́во твоѐ, сп҃си́телю мо́й, є҆́же ре́клъ є҆сѝ: не ѡ҆ста́влю ва́съ си́ры, прїидꙋ̀ къ ва́мъ. Тогѡ̀ ра́ди а҆́зъ, и҆збѣ́гши темноты̀ ѿча́ѧнїѧ, съ наде́ждою на твоѐ чл҃вѣколю́бїе прибѣго́хъ къ тебѣ̀, си́це молѧ́сѧ:

Гдⷭ҇и мо́й, гдⷭ҇и, прибѣ́жище моѐ въ бѣдѣ̀ и҆ въ ско́рби, не ѡ҆ста́ви мѧ̀ є҆ди́нагѡ.

Гдⷭ҇и мо́й, гдⷭ҇и, безгрѣ́шный, со беззако́нными вмѣне́нный, и҆змѝ мѧ̀ ѿ рꙋ́къ ненави́дѧщихъ мѧ̀.

Гдⷭ҇и мо́й, гдⷭ҇и, ѿ порꙋга́нїѧ ви́димыхъ и҆ неви́димыхъ врагѡ́въ сохранѝ мѧ̀.

Гдⷭ҇и мо́й, гдⷭ҇и, простѝ мѧ̀ и҆ прїимѝ мѧ̀, ꙗ҆́коже блꙋ́днагѡ дре́вле, во ѡ҆б̾ѧ́тїѧ твоѧ̑.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ з҃

Ди́вныѧ показа́лъ є҆сѝ дѣла̀ твоѧ̀, гдⷭ҇и, въ пречⷭ҇тѣмъ ѻ҆́бразѣ твое́мъ, и҆ чꙋ́дное дарова́лъ є҆сѝ ᲂу҆тѣше́нїе всѣ́мъ земноро́днымъ, наꙋчи́въ и҆̀хъ въ ско́рбныхъ ѡ҆бстоѧ́нїихъ жи́зни прибѣга́ти къ твоемꙋ̀ млⷭ҇рдїю и҆ пѣ́ти тебѣ̀ съ любо́вїю: А҆ллилꙋ́їа.

І҆́косъ з҃

Хра́мъ носѧ́й тѣле́сный ве́сь ѡ҆скверне́нъ, мно́жество содѣ́ѧнныхъ мно́ю лю́тыхъ, трепе́щꙋ стра́шнагѡ сꙋ́днагѡ днѐ и҆ молю̀: покаѧ́нїѧ ѿве́рзи мѝ двє́ри, жизнода́вче, и҆ ꙗ҆́кѡ дв҃дъ вопїю̀ тѝ:

Гдⷭ҇и мо́й, гдⷭ҇и, ᲂу҆слы́ши моле́нїе моѐ, внемлѝ моли́твѣ мое́й и҆ поми́лꙋй мѧ̀.

Гдⷭ҇и бж҃е мо́й, тво́й є҆́смь а҆́зъ, вразꙋмѝ мѧ̀ и҆ жи́ва бꙋ́детъ дꙋша̀ моѧ̀.

Гдⷭ҇и бж҃е мо́й, па́стырю мо́й, заблꙋди́хъ, ꙗ҆́кѡ ѻ҆вча̀ поги́бшее, взыщѝ раба̀ твоегѡ̀ и҆ сп҃сѝ мѧ̀.

Гдⷭ҇и мо́й, гдⷭ҇и, поми́лꙋй мѧ̀, и҆сцѣлѝ дꙋ́шꙋ мою̀, ꙗ҆́кѡ согрѣши́хъ тебѣ̀.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ и҃

Стра́шнагѡ днѐ прише́ствїѧ твоегѡ̀ ᲂу҆жаса́юсѧ, хрⷭ҇тѐ, и҆ трепе́щꙋ, ꙗ҆́кѡ и҆мы́й мно́жество согрѣше́нїй, но ты̀, млⷭ҇тивый бж҃е, пре́жде конца̀ ѡ҆братѝ мѧ̀, пою́щагѡ тѝ: А҆ллилꙋ́їа.

І҆́косъ и҃

Ве́сь бы́лъ є҆сѝ любо́вь къ па́дшымъ чл҃вѣ́кѡмъ, ѽ і҆и҃се, и҆ дарова́лъ є҆сѝ ѻ҆́бразъ тво́й ст҃ы́й, ꙗ҆́снѡ глаго́лющїй всѣ̑мъ въ ско́рби и҆ печа́ли сꙋ́щимъ: прїиди́те ко мнѣ̀, всѝ трꙋжда́ющїисѧ и҆ ѡ҆бремене́ннїи, и҆ а҆́зъ ᲂу҆поко́ю вы̀. Сегѡ̀ ра́ди, погиба́ющїй, со дерзнове́нїемъ молю̀ тѧ̀, хрⷭ҇тѐ, си́це глаго́лѧ:

Гдⷭ҇и мо́й, гдⷭ҇и, храни́телю мо́й, сохранѝ мѧ̀ ѿ врагѡ́въ, напа́дающихъ на мѧ̀.

Гдⷭ҇и мо́й, гдⷭ҇и, въ вы́шнихъ живы́й и҆ на смире́нныѧ призира́ѧй, при́зри на мѧ̀ грѣ́шнагѡ и҆ бꙋ́ди ѿра́дою мое́й.

Гдⷭ҇и мо́й, гдⷭ҇и, сп҃сѝ мѧ̀, ᲂу҆топа́ющагѡ въ пꙋчи́нѣ жите́йскихъ и҆скꙋше́нїй.

Гдⷭ҇и мо́й, гдⷭ҇и, да не смꙋща́етсѧ се́рдце моѐ и҆ да не ᲂу҆страша́етсѧ во и҆сповѣ́данїи и҆́мени твоегѡ̀.

Гдⷭ҇и мо́й, гдⷭ҇и, прїимѝ мѧ̀, ꙗ҆́кѡ мытарѧ̀, ꙗ҆́кѡ ханане́ю поми́лꙋй, поми́лꙋй мѧ̀ по млⷭ҇ти твое́й.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ ѳ҃

Всѝ ꙗ҆зы́цы, прїиди́те, съ любо́вїю и҆ тре́петомъ поклони́мсѧ пречⷭ҇томꙋ ѻ҆́бразꙋ сп҃си́телѧ мі́ра, и҆зба́вльшемꙋ на́съ ѿ рабо́ты вра́жїѧ и҆ бл҃года́рственнѡ вопїе́мъ є҆мꙋ̀, побѣди́телю сме́рти и҆ а҆́да: А҆ллилꙋ́їа.

І҆́косъ ѳ҃

Ве́сь пораже́нный прока́зою грѣхо́вною, недоꙋмѣва́ю, ка́кѡ є҆́сть досто́йнѡ велича́ти тѧ̀, ѽ влⷣко многомлⷭ҇тивый, но вѣ́рою серде́чною и҆сповѣ́дꙋю тѧ̀, и҆́стиннагѡ сн҃а бж҃їѧ, смире́ннѡ стою̀ пред̾ ѻ҆́бразомъ твои́мъ ст҃ы́мъ, си́це молѧ́сѧ:

Гдⷭ҇и і҆и҃се, ра́досте моѧ̀, да́ждь мѝ, да возра́дꙋюсѧ ѡ҆ млⷭ҇ти твое́й.

Гдⷭ҇и, сп҃си́телю мо́й пребл҃гі́й, сп҃сѝ раба̀ твоегѡ̀ ѿ невѣ́рїѧ и҆ беззако́нїѧ.

Гдⷭ҇и мо́й, гдⷭ҇и, млⷭ҇ть неизрече́ннаѧ, блгⷣтїю твое́ю потребѝ гнѣ́въ въ се́рдцѣ мое́мъ.

Гдⷭ҇и мо́й, гдⷭ҇и, чистота̀ неѡпи́саннаѧ, чистотꙋ̀ се́рдца и҆ ᲂу҆ма̀ да́ждь мѝ.

Гдⷭ҇и мо́й, гдⷭ҇и, ѡ҆дѣѧ́йсѧ свѣ́томъ ꙗ҆́кѡ ри́зою, ѡ҆ст҃ѝ мѧ̀, печа́льми жите́йскими ѡ҆мраче́ннагѡ.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ і҃

Гдⷭ҇и мо́й, гдⷭ҇и, млⷭ҇рдый сп҃си́телю мо́й, дꙋ́шꙋ мою̀ стꙋ́дными дѣѧ́нїѧми лю́тѣ разсла́бленнꙋю воздви́гни бжⷭ҇твеннымъ твои́мъ млⷭ҇рдїемъ, ꙗ҆́коже дре́вле разсла́бленнагѡ при ѻ҆́вчей кꙋпе́ли, и҆ на сп҃се́нїѧ стезѝ наста́ви ю҆̀, да пое́мъ тѝ: А҆ллилꙋ́їа.

І҆́косъ і҃

Цр҃ю̀ предвѣ́чный, ᲂу҆тѣ́шителю, хрⷭ҇тѐ и҆́стинный, ѡ҆чи́сти мѧ̀ ѿ всѧ́кїѧ скве́рны, ꙗ҆́коже ѡ҆чи́стилъ є҆сѝ де́сѧть прокаже́нныхъ и҆ и҆сцѣлѝ мѧ̀, ꙗ҆́коже и҆сцѣли́лъ є҆сѝ сребролюби́вꙋю дꙋ́шꙋ закхе́а мытарѧ̀, да воспою̀ тѝ, си́це глаго́лѧ:

Гдⷭ҇и мо́й, гдⷭ҇и, недꙋ́ги на̑ша прїе́мый и҆ болѣ̑зни понесы́й, и҆сцѣлѝ болѣ̑зни се́рдца моегѡ̀.

Гдⷭ҇и мо́й, гдⷭ҇и і҆и҃се, помо́щниче мо́й, помозѝ мѝ, ꙗ҆́кѡ и҆знемога́етъ дꙋша̀ моѧ̀ ѿ ско́рби сеѧ̀.

Гдⷭ҇и мо́й, гдⷭ҇и, ѻ҆́чи да́вый слѣпо́мꙋ во є҆́же ви́дѣти, да́ждь мѝ ѻ҆́ко, да ᲂу҆зрю̀ кро́тость и҆ терпѣ́нїе твоѐ.

Гдⷭ҇и долготерпѣли́вый, и҆зба́ви дꙋ́шꙋ мою̀ ѿ нечести́вагѡ и҆ сп҃сѝ мѧ̀ ра́ди млⷭ҇ти твоеѧ̀.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ а҃і

Пѣ́нїе всеꙋмиле́нное тебѣ̀ приносѧ́ща, и҆ сокрꙋше́ннымъ се́рдцемъ молѧ́щасѧ, не пре́зри мѧ̀, ѽ пребл҃гі́й влⷣко. Ѿвратѝ ᲂу҆́бѡ лицѐ твоѐ ѿ грѣ̑хъ мои́хъ, но не ѿвратѝ лица̀ твоегѡ̀ ѿ раба̀, пою́щагѡ тебѣ̀: А҆ллилꙋ́їа.

І҆́косъ а҃і

Хрⷭ҇тѐ, свѣ́те и҆́стинный, просвѣща́ѧй и҆ ѡ҆сщ҃а́ѧй всѧ́кагѡ чл҃вѣ́ка, грѧдꙋ́щагѡ въ мі́ръ, при́зри на мѧ̀, грѣ́шнагѡ и҆ непотре́бнагѡ раба̀ твоегѡ̀, и҆ и҆спра́ви жи́знь мою̀ по за́повѣдємъ твои́мъ, и҆ дꙋ́шꙋ мою̀ ѡ҆ст҃ѝ, да принесꙋ̀ тѝ моли́твꙋ сицевꙋ́ю:

Гдⷭ҇и, і҆и҃се хрⷭ҇тѐ, ты̀ свѣ́тъ мі́ра, свѣ́томъ твои́мъ ѡ҆сїѧ́й мѧ̀.

Гдⷭ҇и мо́й, гдⷭ҇и, ты̀ и҆сто́чникъ жи́зни, да́рꙋй дꙋшѐ мое́й жи́знь нетлѣ́ннꙋю и҆ ᲂу҆твердѝ ю҆̀ въ за́повѣдехъ твои́хъ.

Гдⷭ҇и, і҆и҃се хрⷭ҇тѐ, ты̀ сл҃нце пра́вды, пра́вдою твое́ю согрѣ́й дꙋ́шꙋ мою̀ и҆ ѡ҆зарѝ ᲂу҆́мъ мо́й.

Гдⷭ҇и мо́й, гдⷭ҇и, ты̀ наста́вникъ мо́й, наꙋчѝ мѧ̀ твори́ти во́лю твою̀ и҆ люби́ти тѧ̀ всѣ́мъ се́рдцемъ.

Гдⷭ҇и мо́й, гдⷭ҇и, ты̀ ѿве́рзлъ є҆сѝ ѻ҆́чи слѣпо́мꙋ, ѿве́рзи и҆ мнѣ̀ двє́ри покаѧ́нїѧ и҆, ꙗ҆́кѡ ще́дръ, ѡ҆чи́сти всѧ̑ грѣхѝ моѧ̑.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ в҃і

Блгⷣтїю твое́ю всеси́льною, ᲂу҆твердѝ се́рдце моѐ въ вѣ́рѣ, наде́ждѣ и҆ любвѝ, да́рꙋй мѝ покаѧ́нїемъ и҆ неѡсла́бнымъ и҆сполне́нїемъ за́повѣдей твои́хъ дости́гнꙋти црⷭ҇твїѧ нбⷭ҇нагѡ, и҆дѣ́же съ ли́ки а҆́гг҃льскими воспою̀ тѝ: А҆ллилꙋ́їа.

І҆́косъ в҃і

Ты̀, па́стырю до́брый, ре́клъ є҆сѝ всѣ̑мъ, въ ско́рби и҆ печа́ли сꙋ́щимъ: дрꙋ́зи моѝ, а҆́зъ и҆дꙋ̀ ко ѻ҆ц҃ꙋ̀ моемꙋ̀ и҆ ѻ҆ц҃ꙋ̀ ва́шемꙋ ᲂу҆гото́вити мѣ́сто ва́мъ, но па́ки прїидꙋ̀ и҆ возьмꙋ̀ ва́съ къ себѣ̀, а҆́ще за́повѣди моѧ̑ соблюде́те. Семꙋ̀ бл҃гоговѣ́йнѡ внима́ѧ, дерзнꙋ̀ и҆ а҆́зъ, погрꙋже́нный въ лю́тꙋю ско́рбь, пристꙋпи́ти къ тебѣ̀, си́це молѧ́сѧ:

Гдⷭ҇и мо́й, гдⷭ҇и, млⷭ҇рдый сп҃си́телю мо́й, сп҃сѝ мѧ̀ погиба́ющагѡ.

Гдⷭ҇и мо́й, гдⷭ҇и, ѿженѝ ѿ менє̀ тꙋ́чи невѣ́рїѧ, ѕла̀ и҆ вражды̀ и҆ дх҃омъ твои́мъ бл҃ги́мъ наста́ви мѧ̀ на пꙋ́ть пра́вды.

Гдⷭ҇и мо́й, гдⷭ҇и, ᲂу҆тѣше́нїе дꙋшѝ моеѧ̀, ᲂу҆тѣ́ши мѧ̀ въ печа́ли сꙋ́щагѡ.

Гдⷭ҇и бж҃е мо́й, и҆́мене ра́ди твоегѡ̀, ѡ҆живѝ мѧ̀ и҆ пра́вдою твое́ю и҆зведѝ и҆з̾ печа́ли дꙋ́шꙋ мою̀.

Гдⷭ҇и, цр҃ю̀ преси́льный, помѧнѝ мѧ̀, є҆гда̀ прїи́деши во црⷭ҇твїи твое́мъ.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ г҃і

Ѽ премлⷭ҇рдый и҆ пребл҃гі́й гдⷭ҇и бж҃е, сп҃си́телю мо́й, прише́дый въ мі́ръ длѧ сп҃се́нїѧ па́дшагѡ чл҃вѣ́ка, не возгнꙋша́йсѧ менѐ, па́че всѣ́хъ чл҃вѣ̑къ прегрѣши́вшаго, и҆ не ѿвратѝ ѿ менє̀ лица̀ твоегѡ̀, но при́зри на лю́тꙋю ско́рбь и҆ печа́ль дꙋшѝ моеѧ̀, и҆сцѣлѝ и҆ ᲂу҆твердѝ въ свѣ́тѣ и҆́стины и҆ любвѐ, да пое́мъ тѝ: А҆ллилꙋ́їа.

Ѽ сп҃се мо́й премлⷭ҇рдый, прише́дый въ мі́ръ длѧ сп҃се́нїѧ па́дшагѡ чл҃вѣ́ка, взыщѝ мѧ̀ погиба́ющагѡ и҆ блгⷣтїю твое́ю дꙋ́шꙋ мою̀ ѡ҆ст҃ѝ, тѣ́ло ѡ҆чи́сти и҆ жи́знь и҆спра́ви по за́повѣдємъ твои́мъ, да воспою̀ тѝ чи́стымъ се́рдцемъ: А҆ллилꙋ́їа.

Ѽ сп҃се мо́й премлⷭ҇тивый, при́зри на раба̀ твоегѡ̀, ᲂу҆топа́ющаго въ мо́ри жите́йскихъ и҆скꙋше́нїй и҆ бѣ́дъ, и҆, ꙗ҆́коже дре́вле петра̀ ᲂу҆топа́юща, сп҃сѝ блгⷣтїю твое́ю, ѡ҆ст҃ѝ дꙋ́шꙋ и҆ ᲂу҆твердѝ на стези̑ за́повѣдей твои́хъ, да чи́стымъ се́рдцемъ и҆ ᲂу҆сты̀ вопїю̀ тѝ съ любо́вїю: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

І҆и҃се, сп҃си́телю мо́й, моли́лъ смире́ннѡ а҆́ѵгарь кнѧ́зь є҆де́сскїй, прїидѝ ко мнѣ̀ и҆ и҆сцѣлѝ неисцѣ̑льныѧ болѣ̑зни моѧ̑, въ ни́хже ѿ мно́гихъ лѣ́тъ страждꙋ̀. є҆мꙋ́же подража́ѧ, и҆ а҆́зъ, пораже́нный грѣхо́вною прока́зою, мольбо́ю вопїю̀ си́це:

Гдⷭ҇и мо́й, гдⷭ҇и, поми́лꙋй мѧ̀ по вели́цѣй млⷭ҇ти твое́й, и҆ по мно́жествꙋ щедрѡ́тъ твои́хъ ѡ҆чи́сти беззако́нїе моѐ.

Гдⷭ҇и, сп҃си́телю мо́й, росо́ю млⷭ҇ти твое́й ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀.

Гдⷭ҇и, ѿвратѝ лицѐ твоѐ ѿ грѣ̑хъ мои́хъ и҆ всѧ̑ беззакѡ́нїѧ моѧ̑ ѡ҆чи́сти.

Гдⷭ҇и, се́рдце чи́сто сози́жди во мнѣ̀ и҆ дꙋ́хъ пра́въ ѡ҆бновѝ во ᲂу҆тро́бѣ мое́й.

Гдⷭ҇и, не ѿве́ржи менѐ ѿ лица̀ твоегѡ̀ и҆ дх҃а твоегѡ̀ ст҃а́гѡ не ѿымѝ ѿ менє̀.

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Конда́къ а҃

Пречⷭ҇томꙋ твоемꙋ̀ ѻ҆́бразꙋ покланѧ́емсѧ, бл҃гі́й, просѧ́ще проще́нїѧ прегрѣше́нїй на́шихъ, хрⷭ҇тѐ бж҃е: во́лею бо бл҃говоли́лъ є҆сѝ пло́тїю взы́ти на крⷭ҇тъ, да и҆зба́виши, ꙗ҆́же созда́лъ є҆сѝ, ѿ рабо́ты вра́жїѧ, тѣ́мъ съ наде́ждою вопїе́мъ тѝ:

Гдⷭ҇и бж҃е, сп҃си́телю мо́й, прїидѝ ко мнѣ̀ погиба́ющемꙋ и҆ и҆сцѣлѝ болѣ̑зни моѧ̑ неисцѣ̑льныѧ.

Моли́твы

Ѽ пребл҃гі́й гдⷭ҇и і҆и҃се хрⷭ҇тѐ, бж҃е на́шъ. Ты̀ дре́вле лицѐ твоѐ прест҃о́е водо́ю ѡ҆мы́въ и҆ ѡ҆те́ръ ᲂу҆брꙋ́сомъ, чꙋде́снѣ ѻ҆́ное на то́мъ же ᲂу҆брꙋ́сѣ и҆зѻбрази́лъ и҆ є҆де́сскомꙋ кнѧ́зю а҆́ѵгарю во и҆сцѣле́нїе недꙋ́га є҆гѡ̀ посла́ти бл҃говоли́лъ є҆сѝ. Сѐ и҆ мы̀ ны́нѣ, грѣ́шнїи рабѝ твоѝ, дꙋше́вными и҆ тѣле́сными недꙋ́ги на́шими ѡ҆держи́ми, лица̀ твоегѡ̀, гдⷭ҇и, и҆́щемъ и҆ съ дв҃домъ во смире́нїи дꙋ́шъ на́шихъ зове́мъ: не ѿвратѝ лица̀ твоегѡ̀ ѿ на́съ и҆ не ѿклони́сѧ гнѣ́вомъ ѿ рабѡ́въ твои́хъ, помо́щникъ на́мъ бꙋ́ди, не ѿри́ни на́съ и҆ не ѡ҆ста́ви на́съ.

Ѽ всемлⷭ҇тивый гдⷭ҇и, сп҃си́телю на́шъ, воѡбразѝ са́мъ себє̀ въ дꙋша́хъ на́шихъ, да, во ст҃ы́нѣ и҆ пра́вдѣ жи́тельствꙋюще, бꙋ́демъ сы́нове твоѝ и҆ наслѣ́дницы црⷭ҇твїѧ твоегѡ̀, и҆ та́кѡ тебѣ̀, премлⷭ҇тивагѡ бг҃а на́шегѡ, кꙋ́пнѡ со безнача́льнымъ ѻ҆ц҃е́мъ твои́мъ и҆ прест҃ы́мъ дх҃омъ сла́вити не преста́немъ во вѣ́ки вѣкѡ́въ. А҆ми́нь.