Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й влⷣчцѣ на́шей бцⷣѣ пред̾ є҆ѧ̀ і҆кѡ́ною и҆менꙋ́емою ѳео́дѡровскаѧ.

Феодоровской (1239) и "Торжество Пресвятой Богородицы" (Порт-Артурской) (1904) икон Божией Матери 29 августа 2026

Конда́къ а҃

Взбра́нной воево́дѣ, пренепоро́чнѣй дв҃ѣ бцⷣе, застꙋ́пницѣ на́шей и҆ предста́тельствꙋ хрⷭ҇тїа́нъ непосты́дномꙋ, ꙗ҆вле́нїемъ чꙋ́дныѧ і҆кѡ́ны своеѧ̀ ра́дованїе пода́вшей землѣ̀ рѡссі́йстѣй и҆ всѧ̑ вѣ̑рныѧ ча̑да цр҃кве просвѣти́вшей, бл҃годаре́нїе ᲂу҆се́рднѡ прино́симъ тѝ, бцⷣе, и҆ припа́дающе пречꙋ́дномꙋ ѡ҆́бразꙋ твоемꙋ̀ ᲂу҆ми́льнѡ глаго́лемъ: спасѝ, гпⷭ҇жѐ, и҆ поми́лꙋй рабы̑ твоѧ̀ зовꙋ́щыѧ:

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

І҆́косъ а҃

А҆рха́гг҃лъ гаврїи́лъ ѿ бг҃а по́сланъ бы́сть во гра́дъ назаре́тъ ко пречⷭ҇тѣй дв҃ѣ мр҃і́и, и҆ вше́дъ къ не́й речѐ: Ра́дꙋйсѧ, блгⷣтнаѧ, гдⷭ҇ь съ тобо́ю, бл҃гослове́нна ты̀ въ жена́хъ. а҆рха́гг҃льскомꙋ гла́сꙋ подража́юще, и҆ мы̀, грѣ́шнїи, ра́дости и҆ бл҃годаре́нїѧ въ срⷣцѣ свое́мъ и҆спо́лнени, пред̾ ꙗ҆вле́ннымъ ѡ҆́бразомъ твои́мъ благохвалє́нїѧ на̑ша возноси́ти къ тебѣ̀ дерза́емъ, прест҃а́ѧ бцⷣе:

Ра́дꙋйсѧ, ѻ҆́трасле ѿ ко́рене даві́дѡва бл҃гослове́ннаѧ: ра́дꙋйсѧ, ѻ҆бѣ́томъ роди́телей въ же́ртвꙋ бг҃ꙋ принесе́ннаѧ.

Ра́дꙋйсѧ, ст҃ы́хъ првⷣныхъ і҆ѡакі́ма и҆ а҆́нны дщѝ бг҃ода́ннаѧ: ра́дꙋйсѧ, трїе́хъ лѣ́тъ во хра́мъ бж҃їй введе́ннаѧ и҆ та́мѡ воспита́ннаѧ.

Ра́дꙋйсѧ, та́мѡ смире́нїемъ и҆ чⷭ҇тото́ю всѣ́хъ ᲂу҆диви́вшаѧ: ра́дꙋйсѧ, та́мѡ а҆рха́гг҃льскїѧ бесѣ́ды сподо́бльшаѧсѧ.

Ра́дꙋйсѧ, дв҃о, ѡ҆ зача́тїи бг҃а сло́ва благовѣ́стїе во смире́нїи прїе́мшаѧ: ра́дꙋйсѧ, и҆збра́ннаѧ ѻ҆трокови́це, къ зача́тїю бг҃а сло́ва си́лою свы́ше ѡ҆сѣне́ннаѧ.

Ра́дꙋйсѧ, та́йнꙋ воплоще́нїѧ сн҃а бж҃їѧ, ѿ вѣкѡ́въ въ бз҃ѣ сокрове́ннꙋю, ѿкры́вшаѧ: ра́дꙋйсѧ, а҆́гнице, ро́ждшаѧ а҆́гнца хрⷭ҇та̀, взе́мшаго грѣхѝ мі́ра.

Ра́дꙋйсѧ, тобо́ю бо и҆збавлѧ́емсѧ мꙋ́къ а҆́довыхъ: ра́дꙋйсѧ, тобо́ю бо сподоблѧ́емсѧ вѣ́чныѧ жи́зни.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ в҃

Ви́дѧ і҆кѡ́нꙋ твою̀, прест҃а́ѧ дв҃о, на дре́вѣ стоѧ́щꙋ, кн҃зь бл҃гочести́вый костромскі́й ᲂу҆́жасомъ мно́гимъ содрога́шесѧ недоꙋмѣ́ѧ, что̀ бы́сть видѣ́нїе сїѐ. Хотѧ́щꙋ же є҆мꙋ̀ прїѧ́ти ю҆̀ и҆ ѿ сегѡ̀ свы́ше ᲂу҆де́ржанꙋ є҆мꙋ̀ бы́вшꙋ, не можа́ше: ᲂу҆вѣ́дѣвъ, ꙗ҆́кѡ чꙋ́днѡ є҆́сть і҆кѡ́ны тоѧ̀ ꙗ҆вле́нїе, воззва̀ къ бг҃ꙋ: А҆ллилꙋ́їа.

І҆́косъ в҃

Ра́зꙋмомъ жела́ѧ разꙋмѣ́ти кн҃зь бл҃гочести́вый прише́ствїе пречꙋ́днагѡ твоегѡ̀ ѡ҆́браза во гра́дъ костромꙋ̀, бцⷣе, дꙋше́ю ра́дованїѧ преиспо́лненною себє̀ предадѐ води́тельствꙋ бж҃їю, и҆ прекло́нь колѣ̑на, со стра́хомъ вопїѧ́ше тебѣ̀:

Ра́дꙋйсѧ, дв҃о, ꙗ҆́вльшаѧ ѡ҆́бразъ сво́й чꙋ́днѡ: ра́дꙋйсѧ, бл҃гослове́ннаѧ, въ ꙗ҆вле́нїи ѡ҆́браза своегѡ̀ млⷭ҇рдїе на́мъ ꙗ҆влѧ́ющаѧ.

Ра́дꙋйсѧ, ѡ҆ всѣ́хъ чтꙋ́щихъ сн҃а твоегѡ̀ промышлѧ́ющаѧ: ра́дꙋйсѧ, всѣ̑мъ просѧ́щымъ ᲂу҆ тебѣ̀ да̑ры, въ мѣ́рꙋ вѣ́ры, ко сп҃се́нїю подаю́щаѧ.

Ра́дꙋйсѧ, пꙋ́ть и҆́стины заблꙋ́ждшымъ показꙋ́ющаѧ: ра́дꙋйсѧ, къ го́рнемꙋ мі́рꙋ чꙋдесы̑ твои́ми ᲂу҆́мъ на́шъ возводѧ́щаѧ.

Ра́дꙋйсѧ, смꙋщє́нїѧ помышле́нїй сꙋмни́тельныхъ ᲂу҆далѧ́ющаѧ: ра́дꙋйсѧ, сла́вѧщихъ тѧ̀ всегда̀ прославлѧ́ющаѧ.

Ра́дꙋйсѧ, чⷭ҇тото́ю твое́ю чистотѣ̀ на́съ наꙋча́ющаѧ: ра́дꙋйсѧ, чⷭ҇тото́ю твое́ю нечистотꙋ̀ на́шꙋ ѡ҆блича́ющаѧ.

Ра́дꙋйсѧ, молє́нїѧ на̑ша прїе́млющаѧ: ра́дꙋйсѧ, рыда́нїй и҆ слѣ́зъ не ѿмета́ющаѧ.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ г҃

Си́лꙋ бж҃їю бл҃гочести́вый кнѧ́зь позна́въ въ восхожде́нїи ѡ҆́браза чꙋ́днагѡ твоегѡ̀, бг҃ома́ти, въ ꙗ҆вле́нїи же ви́дѣвъ млⷭ҇рдїе твоѐ ко всѣ̑мъ, сп҃се́нїе хотѧ́щымъ полꙋчи́ти, речѐ: А҆ллилꙋ́їа.

І҆́косъ г҃

И҆мѣ́въ по́мыслъ стѧжа́ти да́рꙋемое нбⷭ҇ное сокро́вище, ли́къ тво́й свѣ́тлый, бг҃ома́ти, второ́е прострѐ держа́вный рꙋ́кꙋ къ ѡ҆́бразꙋ низше́дшемꙋ: ᲂу҆зрѣ́въ же па́ки є҆го̀ восхожде́нїе, ско́рѡ по́йде во гра́дъ и҆ повѣ́да ѡ҆ бы́вшихъ є҆мꙋ̀ ѡ҆сщ҃е́нномꙋ собо́рꙋ, да прише́дше и҆ ви́дѧще і҆кѡ́ны твоеѧ̀ ꙗ҆вле́нїе возопїю́тъ съ ни́мъ вѣ́рнїи:

Ра́дꙋйсѧ, цр҃и́це нб҃сѐ и҆ землѝ: ра́дꙋйсѧ, прⷭ҇то́ле цр҃ѧ̀ ца́рствꙋющихъ.

Ра́дꙋйсѧ, пренепоро́чнаѧ дв҃о: ра́дꙋйсѧ, мт҃и непристꙋ́пнагѡ свѣ́та.

Ра́дꙋйсѧ, чтⷭ҇нѣ́йшаѧ херꙋві̑мъ: ра́дꙋйсѧ, сла́внѣйшаѧ без̾ сравне́нїѧ серафі̑мъ.

Ра́дꙋйсѧ, нбⷭ҇ными си́лами велича́емаѧ: ра́дꙋйсѧ, ѿ всѣ́хъ земноро́дныхъ ᲂу҆блажа́емаѧ.

Ра́дꙋйсѧ, неизрече́нное весе́лїе а҆́гг҃лѡвъ: ра́дꙋйсѧ, вѣ́нче ца́рственный всѣ́хъ прⷪ҇ро́кѡвъ и҆ а҆пⷭ҇лѡвъ.

Ра́дꙋйсѧ, правосла́вїѧ хрⷭ҇то́вы цр҃кве ѡ҆гражде́нїе: ра́дꙋйсѧ, всѣ́хъ сꙋемꙋ́дрыхъ ᲂу҆че́нїй и҆ є҆ресе́й низложе́нїе.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ д҃

Бꙋ́рю внꙋ́трь и҆мѣ́ѧ помышле́нїй недоꙋмѣ́нныхъ, ѡ҆свѧще́нный собо́ръ со ѱалмы̀ и҆ пѣ́сньми дꙋхо́вными а҆́бїе притечѐ ви́дѣти ѡ҆́бразъ тво́й неискꙋсобра́чнаѧ. Оу҆зрѣ́въ же є҆го̀ на дре́вѣ ди́внѡ стоѧ́ща и҆ благолѣ́пнѡ красото́ю сїѧ́юща, речѐ: А҆ллилꙋ́їа.

І҆́косъ д҃

Слы́шаша лю́дїе, честны́ѧ і҆кѡ́ны твоеѧ̀, бг҃оѻтрокови́це, прише́ствїе, и҆ ко ѻ҆́ной те́кше покланѧ́хꙋсѧ, а҆́ки самѣ́й тебѣ̀ сꙋ́щей, и҆ со ᲂу҆миле́нїемъ и҆ слеза́ми вопїѧ́хꙋ къ тебѣ̀:

Ра́дꙋйсѧ, дв҃о, бл҃гослове́ннаѧ въ жена́хъ, во чре́вѣ твое́мъ носи́телѧ всѧ́ческихъ носи́вшаѧ: ра́дꙋйсѧ, рожде́нїемъ сн҃а твоегѡ̀ сп҃се́нїе мі́рꙋ всемꙋ̀ ꙗ҆́вльшаѧ.

Ра́дꙋйсѧ, человѣ́ки съ бг҃омъ соедини́вшаѧ: ра́дꙋйсѧ, превы́шшаѧ нб҃съ, и҆зба́вльшаѧ на́съ ѿ клѧ́твы.

Ра́дꙋйсѧ, на́съ къ вѣ́чнѣй жи́зни рꙋководѧ́щаѧ: ра́дꙋйсѧ, влⷣчце мі́ра.

Ра́дꙋйсѧ, бж҃їе къ смє́ртнымъ бл҃говоле́нїе: ра́дꙋйсѧ, сме́ртныхъ къ бг҃ꙋ дерзнове́нїе.

Ра́дꙋйсѧ, благи́хъ во бла́гости соблюда́ющаѧ: ра́дꙋйсѧ, лꙋка́выхъ на пꙋ́ть благі́й ѡ҆браща́ющаѧ.

Ра́дꙋйсѧ, под̾ сѣ́нь кро́ва твоегѡ̀ прибѣга́ющихъ ми́лꙋющаѧ: ра́дꙋйсѧ, ᲂу҆пова́ющымъ на тѧ̀ всѧ̑ потрє́бнаѧ къ животꙋ̀ и҆ бл҃гоче́стїю да́рꙋющаѧ.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ є҃

Ꙗ҆́кѡ бг҃оте́чнꙋю ѕвѣздꙋ̀ ᲂу҆зрѣ́ша лю́дїе і҆кѡ́нꙋ твою̀, безневѣ́стнаѧ дв҃о, и҆ ꙗ҆́кѡ многосвѣ́тлый свѣти́льникъ поста́виша ю҆̀ во ст҃ѣ́мъ собо́рнѣмъ хра́мѣ, ра́дꙋющесѧ и҆ вопїю́ще бг҃ꙋ: А҆ллилꙋ́їа.

І҆́косъ є҃

Ви́дѣвше жи́телїе гра́да городца̀ ѡ҆́бразъ тво́й, влⷣчце, во хра́ме гра́да костромы̀ стоѧ́щїй, и҆ на рꙋкꙋ̑ твоє́ю держи́ма бг҃омладе́нца і҆и҃са, ско́рбїю ѡ҆держи́ми бѣ́ша: занѐ ѿше́ствїе є҆го̀ бы́сть и҆з̾ гра́да и҆́хъ. Мы́ же, ѡ҆бра́довани бл҃говоле́нїемъ твои́мъ ко гра́дꙋ на́шемꙋ, прино́симъ тѝ да̑ры, и҆ съ любо́вїю лобыза́юще тво́й ст҃ы́й ѡ҆́бразъ, вопїе́мъ тѝ:

Ра́дꙋйсѧ, ѕвѣздо̀, сл҃нце пра́вды на́мъ ꙗ҆́вльшаѧ: ра́дꙋйсѧ, возлюби́вшаѧ сїю̀ странꙋ̀.

Ра́дꙋйсѧ, ѡ҆брѣ́тенїе тебѐ и҆́щꙋщихъ: ра́дꙋйсѧ, ра́достїю неизрече́нною вѣ́рныхъ срⷣца̀ и҆сполнѧ́ющаѧ.

Ра́дꙋйсѧ, сокро́вище блгⷣти неистощи́мое: ра́дꙋйсѧ, млⷭ҇ти приснотекꙋ́щїй и҆сто́чниче.

Ра́дꙋйсѧ, ѿ тѧ́жкихъ бѣ́дъ спаса́ющаѧ: ра́дꙋйсѧ, ѿ смертоно́сныѧ ꙗ҆́звы и҆збавлѧ́ющаѧ.

Ра́дꙋйсѧ, всегѡ̀ мі́ра хода́таице: ра́дꙋйсѧ, всѣ́хъ недꙋ́гꙋющихъ цѣли́тельнице.

Ра́дꙋйсѧ, красото̀ несравне́ннаѧ: ра́дꙋйсѧ, добро́то несказа́ннаѧ.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ ѕ҃

Проповѣ̑дницы бг҃оно́снїи бы́ша ви́дѣвшїи ѡ҆́бразъ тво́й, бцⷣе, возвра́щсѧ бо кі́йждо во странꙋ̀ свою̀, возвѣща́ше ѡ҆ прише́ствїи є҆го̀ и҆ чꙋдесѣ́хъ ѿ него̀ быва́емыхъ, воспѣва́ѧ бг҃ꙋ: А҆ллилꙋ́їа.

І҆́косъ ѕ҃

Возсїѧ́вша блгⷣть ѿ чꙋ́днагѡ ѡ҆́браза твоегѡ̀, чⷭ҇таѧ, вѣ́рꙋ немощствꙋ́ющихъ ᲂу҆твердѝ, вѣ́рныхъ же возвеселѝ срⷣца̀ любо́вїю. Сегѡ̀ ра́ди ра́дꙋющесѧ вопїе́мъ тѝ:

Ра́дꙋйсѧ, прест҃а́ѧ дв҃о, свѣ́томъ нбⷭ҇ныѧ и҆́стины на́съ ѡ҆зарѧ́ющаѧ: ра́дꙋйсѧ, мглꙋ̀ грѣхо́внꙋю ѿ на́съ ѿгонѧ́ющаѧ.

Ра́дꙋйсѧ, чꙋдесы̀ твои́ми къ бг҃овѣ́дѣнїю на́съ приводѧ́щаѧ: ра́дꙋйсѧ, всѣ́хъ ка́ющихсѧ грѣ́шникѡвъ ко бл҃гоче́стїю подвиза́ющаѧ.

Ра́дꙋйсѧ, всѣ́хъ притека́ющихъ къ тебѣ̀ крѣ́пкое застꙋпле́нїе: ра́дꙋйсѧ, немощствꙋ́ющихъ ᲂу҆мо́мъ ᲂу҆твержде́нїе.

Ра́дꙋйсѧ, и҆знемога́ющихъ въ вѣ́рѣ возставлѧ́ющаѧ: ра́дꙋйсѧ, ти́хое приста́нище въ мо́рѣ жите́йстѣмъ ѡ҆бꙋрева́ємымъ.

Ра́дꙋйсѧ, ѕлы̑ѧ совѣ́ты сынѡ́въ поги́бельныхъ ѿкрыва́ющаѧ: ра́дꙋйсѧ, вознесе́ннꙋю горды́ню врагѡ́въ ѻ҆те́чества на́шегѡ смирѧ́ющаѧ.

Ра́дꙋйсѧ, правосла́вныхъ царе́й держа́во: ра́дꙋйсѧ, всѣ́хъ хрⷭ҇тїа́нъ похвало̀.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ з҃

Хотѧ̀ просла́вити сн҃ъ тво́й, бцⷣе, ст҃ꙋ́ю і҆кѡ́нꙋ твою̀ во гра́дѣ костромѣ̀, повелѣ̀ ю҆̀ въ де́нь ᲂу҆спе́нїѧ твоегѡ̀ ст҃о́мꙋ великомч҃нкꙋ ѳео́дѡрꙋ стратила́тꙋ носи́ти по гра́дꙋ семꙋ̀, да всѝ ви́дѧще чꙋ́до сїѐ бл҃года́рнымъ срⷣцемъ возопїю́тъ є҆мꙋ̀: А҆ллилꙋ́їа.

І҆́косъ з҃

Чꙋ́до но́вое ꙗ҆вѝ на́мъ гдⷭ҇ь мольба́ми твои́ми, бцⷣе, є҆гда̀ сгорѣ́вшꙋ хра́мꙋ, въ не́мже бѣ̀ поста́вленъ ст҃ы́й ѡ҆́бразъ тво́й, сохранѝ є҆го̀ въ пе́плѣ невреди́ма ѿ ѻ҆гнѧ̀, и҆ та́кѡ мнѣ́вшихъ сгорѣ́вша є҆го̀ печа́ль въ ра́дость преложѝ. Мы́ же, чꙋ́до сїѐ вѣ́дѧще, воспѣва́емъ тѝ такѡва́ѧ:

Ра́дꙋйсѧ, кꙋпино̀ неѡпали́маѧ: ра́дꙋйсѧ, ѻ҆́гненный сто́лпе, сꙋ́щыѧ во тьмѣ̀ наставлѧ́ѧй.

Ра́дꙋйсѧ, кївѡ́те, дх҃омъ позлаще́нный, невмѣсти́магѡ бг҃а вмѣсти́вшїй: ра́дꙋйсѧ, кади́льнице злата́ѧ, ꙗ҆́кѡ ѳѷмїа́мъ бл҃гоꙋха́нный, мл҃твы твоѧ̑ за ны̀ къ бг҃ꙋ сн҃ꙋ при́снѡ возносѧ́щаѧ.

Ра́дꙋйсѧ, же́зле а҆арѡ́новъ, къ ꙗ҆вле́нїю въ мі́ръ сн҃а твоегѡ̀ прозѧ́бшїй: ра́дꙋйсѧ, рꙋно̀ гедеѡ́ново, блгⷣтїю бж҃їею во сп҃се́нїе на́ше ѡ҆роше́нное.

Ра́дꙋйсѧ, горо̀ несѣко́маѧ, ѿ неѧ́же ѿсѣче́сѧ краеꙋго́льный ка́мень хрⷭ҇то́съ: ра́дꙋйсѧ, хра́ме ѡ҆дꙋшевле́нный, въ не́мже всели́сѧ бжⷭ҇тво̀ тѣле́снѣ.

Ра́дꙋйсѧ, дѣ́вства ѡ҆хране́нїе: ра́дꙋйсѧ, сꙋпрꙋ́жества бл҃гослове́нїе.

Ра́дꙋйсѧ, па́че всѣ́хъ гдⷭ҇а возлюби́вшаѧ: ра́дꙋйсѧ, па́че всѣ́хъ ѿ негѡ̀ превознесе́ннаѧ.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ и҃

Стра́нное чꙋ́до ви́дѣвше, на воздꙋ́сѣ і҆кѡ́нꙋ бг҃омт҃ри стоѧ́щꙋ, а҆́ки рꙋка́ми а҆́гг҃льскими держи́мꙋ, є҆гда̀ второ́е сгорѣ̀ хра́мъ, въ не́мже стоѧ́ше ꙗ҆вле́ннаѧ сїѧ̀ і҆кѡ́на, ѿве́ржемсѧ, лю́дїе, мі́ра сегѡ̀, ᲂу҆́мъ на нб҃са̀ прело́жше: сегѡ́ бо ра́ди и҆ даде́сѧ на́мъ чꙋ́днаѧ і҆кѡ́на бцⷣы, да взира́юще на ню̀ гѡ́рнѧѧ мꙋ́дрствꙋемъ, а҆ не зємна́ѧ, вопїю́ще къ бг҃ꙋ: А҆ллилꙋ́їа.

І҆́косъ и҃

Въ вы́шнихъ пребыва́ющи селе́нїихъ, и҆ ни́жнихъ не разлꙋчи́ласѧ є҆сѝ, бцⷣе, чꙋдесы̑ твои́ми всѣ́хъ просвѣща́ющи приходѧ́щихъ къ тебѣ̀ вѣ́рою: сегѡ̀ ра́ди и҆ слы́шиши ѿ на́съ сїѧ̑:

Ра́дꙋйсѧ, мт҃и хрⷭ҇та̀ бг҃а на́шегѡ, на нб҃сѝ пребыва́ющаѧ: ра́дꙋйсѧ, на землѝ на́съ не ѡ҆ставлѧ́ющаѧ.

Ра́дꙋйсѧ, ра́ди вели́чества твоегѡ̀ на нб҃сѝ а҆́гг҃лы ѡ҆крꙋже́ннаѧ: ра́дꙋйсѧ, ра́ди сла́вы твоеѧ̀ на землѝ ѿ человѣ̑къ прославлѧ́емаѧ.

Ра́дꙋйсѧ, тебѣ́ бо слꙋ́жатъ всѧ̑ нбⷭ҇ныѧ си̑лы: ра́дꙋйсѧ, тебѣ́ бо, по бз҃ѣ, хвале́нїе возно́сѧтъ херꙋві́ми и҆ серафі́ми.

Ра́дꙋйсѧ, лицѣ̀ бж҃їе вы́нꙋ на нб҃сѝ созерца́ющаѧ: ра́дꙋйсѧ, пред̾ прⷭ҇то́ломъ сн҃а твоегѡ̀ мт҃рнїѧ рꙋ́цѣ твоѝ за ны̀ молѧ́щисѧ простира́ющаѧ.

Ра́дꙋйсѧ, на́съ сꙋ́щихъ на землѝ ѿ всѧ́кагѡ ѕла̀ ѡ҆мофо́ромъ твои́мъ покрыва́ющаѧ: ра́дꙋйсѧ, вѣ́рныхъ ѿ всѧ́кихъ дꙋшепа́гꙋбныхъ дѣ́лъ ᲂу҆далѧ́ющаѧ.

Ра́дꙋйсѧ, рожде́нїемъ сн҃а бж҃їѧ две́ри црⷭ҇тва хрⷭ҇то́ва на́мъ ѿве́рзшаѧ: ра́дꙋйсѧ, наде́ждою прїѧ́ти нбⷭ҇ныхъ бла́гъ вѣ́рныхъ дꙋ́шы ᲂу҆слажда́ющаѧ.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ ѳ҃

Всѧ́кое є҆стество̀ а҆́гг҃льское превозно́ситъ тѧ̀, дв҃о, вели́кїѧ ра́ди любвѐ твоеѧ̀ къ ро́дꙋ хрⷭ҇тїа́нскомꙋ: незри́ма бо и҆ непристꙋ́пна, ꙗ҆́кѡ мт҃и бг҃а ѿ землѝ къ нб҃сѝ возше́дшаѧ, пречⷭ҇тымъ твои́мъ ѡ҆́бразомъ зри́мꙋ и҆ пристꙋ́пнꙋ себє̀ ꙗ҆влѧ́еши всѣ̑мъ воспѣва́ющымъ сн҃ꙋ твоемꙋ̀: А҆ллилꙋ́їа.

І҆́косъ ѳ҃

Вѣті̑ѧ многовѣща́нныѧ, ꙗ҆́кѡ ры́бы безгла́сны зри́мъ ѡ҆ тебѣ̀, бцⷣе, недоꙋмѣ́ютъ бо глаго́лати ѡ҆ сла́вныхъ чꙋдесѣ́хъ, ѿ ꙗ҆вле́нныѧ твоеѧ̀ і҆кѡ́ны быва́емыхъ. Мы́ же ѻ҆́нымъ дивѧ́щесѧ бл҃года́рнѡ вопїе́мъ тѝ:

Ра́дꙋйсѧ, слѣпы́хъ прозрѣ́нїе: ра́дꙋйсѧ, хромы́хъ хожде́нїе.

Ра́дꙋйсѧ, ѿ те́мныхъ и҆ лꙋка́выхъ дꙋхѡ́въ и҆сцѣлѧ́ющаѧ: ра́дꙋйсѧ, лꙋча́ми ѿ твоегѡ̀ пречⷭ҇тагѡ ѡ҆́браза и҆зшѣ́дшими врагѡ́въ землѝ на́шеѧ ѿгна́вшаѧ.

Ра́дꙋйсѧ, больны̑мъ видѣ́нїе твоѐ дарова́вшаѧ: ра́дꙋйсѧ, молѧ́щымсѧ ꙗ҆вле́ннѣй і҆кѡ́нѣ твое́й и҆сцѣле́нїе подаю́щаѧ.

Ра́дꙋйсѧ, разсла́бленныхъ ѿ ѻ҆дра̀ болѣ́зни воздвига́ющаѧ: ра́дꙋйсѧ, нѣмы̑мъ разрѣша́ющаѧ ᲂу҆ста̀.

Ра́дꙋйсѧ, ѿ плѣ́на вра́жїѧ возвраща́ющаѧ: ра́дꙋйсѧ, лю̑тыѧ пло́ти стра́сти ᲂу҆толѧ́ющаѧ.

Ра́дꙋйсѧ, дꙋ́шы вѣ́рныхъ неизрече́ннымъ млⷭ҇рдїемъ твои́мъ ᲂу҆милѧ́ющаѧ: ра́дꙋйсѧ, неизглаго́ланнымъ твои́мъ чл҃вѣколю́бїемъ ᲂу҆ныва́ющихъ ѡ҆бодрѧ́ющаѧ.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ і҃

Соблюстѝ хотѧ́щи въ чистотѣ̀ домострои́тельство цр҃кве правосла́вныѧ, чⷭ҇таѧ, и҆ ᲂу҆тверди́ти ски́петръ держа́вы рѡссі́йскїѧ чꙋ́дною і҆кѡ́ною твое́ю вложи́ла є҆сѝ въ срⷣцѣ благовѣ́рнагѡ госꙋда́рѧ мїхаи́ла ѳео́дѡровича прїѧ́ти вѣне́цъ ца́рскїй землѝ рѡссі́йскїѧ, да всѝ ви́дѧщїи ви́дѧтъ, ꙗ҆́кѡ вы́шнїй владѣ́етъ ца́рствомъ, и҆ є҆мꙋ́же хо́щетъ дае́тъ є҆̀, и҆ возопїю́тъ є҆мꙋ̀: А҆ллилꙋ́їа.

І҆́косъ і҃

Стѣна̀ є҆сѝ неѡбори́маѧ, бцⷣе дв҃о, всѣ̑мъ къ тебѣ̀ прибѣга́ющымъ: никто́же бо притека́ѧй къ тебѣ̀ то́щь ѿхо́дитъ. Сегѡ̀ ра́ди ᲂу҆щедрѧ́еми млⷭ҇тїю твое́ю, во ᲂу҆миле́нїи дꙋшѝ возглаша́емъ тебѣ̀:

Ра́дꙋйсѧ, тве́рдаѧ стѣно̀, ѿ вра̑гъ ви́димыхъ и҆ неви́димыхъ ѡ҆хранѧ́ющаѧ: ра́дꙋйсѧ, крѣ́пкаѧ защи́то ᲂу҆пова́нїе на тѧ̀ возложи́вшымъ.

Ра́дꙋйсѧ, позна́нїѧ и҆́стины чи́стое зерца́ло: ра́дꙋйсѧ, сохране́нїѧ вѣ́ры крѣ́пкое забра́ло.

Ра́дꙋйсѧ, гра̑ды и҆ страны̑ хрⷭ҇тїа̑нскїѧ предста́тельствомъ твои́мъ ѿ врагѡ́въ спаса́ющаѧ: ра́дꙋйсѧ, царє́мъ благовѣ̑рнымъ побора́ющаѧ.

Ра́дꙋйсѧ, ми́ръ во гра́дѣхъ селѧ́щаѧ: ра́дꙋйсѧ, благонра́внымъ благопоспѣша́ющаѧ.

Ра́дꙋйсѧ, си́лою мл҃твъ твои́хъ ѕлы̑ѧ по́мыслы въ ничто́же ѡ҆браща́ющаѧ: ра́дꙋйсѧ, си̑лы врагѡ́въ бли́жнѧгѡ сокрꙋша́ющаѧ.

Ра́дꙋйсѧ, ю҆́ности наставле́нїе: ра́дꙋйсѧ, ста́рости поддержа́нїе.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ а҃і

Пѣ́нїе всѧ́кое побѣжда́етсѧ спростре́тисѧ тща́щеесѧ ко мно́жествꙋ мно́гихъ щедрѡ́тъ твои́хъ: равночи́слєнныѧ бо пескꙋ̀ морско́мꙋ пѣ̑сни а҆́ще прино́симъ тѝ, бцⷣе дв҃о, ничто́же соверша́емъ досто́йнѡ, ꙗ҆́же дарова́ла є҆сѝ на́мъ вопїю́щымъ къ бг҃ꙋ: А҆ллилꙋ́їа.

І҆́косъ а҃і

Свѣтопрїе́мнꙋю свѣщꙋ̀, дре́вле ꙗ҆́вльшꙋюсѧ, зри́мъ во ст҃ѣ́й і҆кѡ́нѣ твое́й, бцⷣе дв҃о, є҆гда̀ гра́дъ на́шъ защити́ла є҆сѝ ѿ разоре́нїѧ врагѡ́въ землѝ на́шеѧ лꙋча́ми, ѿ ст҃ы́ѧ твоеѧ̀ і҆кѡ́ны и҆сходѧ́щими. Сегѡ̀ ра́ди съ вѣ́рою припа́дающе къ не́й и҆ съ любо́вїю лобыза́юще ю҆̀, вопїе́мъ тѝ:

Ра́дꙋйсѧ, мт҃и, превѣ́чнагѡ свѣ́та хрⷭ҇та̀, ᲂу҆че́нїемъ є҆гѡ̀ дꙋ́шы просвѣща́ющаѧ: ра́дꙋйсѧ, блгⷣтїю бж҃їею невѣ́рꙋющихъ къ вѣ́рѣ въ бг҃а приводѧ́щаѧ.

Ра́дꙋйсѧ, пꙋтеше́ствꙋющымъ спꙋтешѣ́ствꙋющаѧ: ра́дꙋйсѧ, нꙋ́жднѡ пла́вающихъ ко́рмчаѧ.

Ра́дꙋйсѧ, ѿ всѧ́кїѧ ско́рби, гнѣ́ва и҆ нꙋ́жды спаса́ющаѧ: ра́дꙋйсѧ, ѿ гла́да, гꙋби́тельства, трꙋ́са и҆ ѻ҆гнѧ̀ сохранѧ́ющаѧ.

Ра́дꙋйсѧ, и҆збавлѧ́ющаѧ ѿ и҆ноплеме́нныхъ: ра́дꙋйсѧ, ѡ҆хранѧ́ющаѧ ѿ междоꙋсо́бныѧ бра́ни.

Ра́дꙋйсѧ, во ст҃ѣ́й і҆кѡ́нѣ твое́й ꙗ҆́кѡ сл҃нце въ костромски́хъ предѣ́лѣхъ возсїѧ́вшаѧ: ра́дꙋйсѧ, здѣ̀ ѿрасль ца́рственнꙋю возвели́чившаѧ.

Ра́дꙋйсѧ, тобо́ю бо ᲂу҆твержда́ютсѧ ца̑рства: ра́дꙋйсѧ, тобо́ю бо вѣнча́ютсѧ ца́рїе.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ в҃і

Блгⷣть прїѧ́вшаѧ ѿ бг҃а сн҃а твоегѡ̀, дв҃о бцⷣе, и҆ тꙋ̀ дре́вле и҆злїѧ́вшаѧ на всѣ́хъ прибѣга́ющихъ къ ѡ҆́бразꙋ твоемꙋ̀, не лишѝ ны́нѣ и҆ на́съ бога́тыѧ твоеѧ̀ млⷭ҇ти, да́рꙋй на́мъ покаѧ́нїе ѡ҆ грѣсѣ́хъ, да чи́стымъ срⷣцемъ и҆ ᲂу҆стны̀ взыва́емъ къ возлю́бленномꙋ сн҃ꙋ твоемꙋ̀ и҆ бг҃ꙋ на́шемꙋ: А҆ллилꙋ́їа.

І҆́косъ в҃і

Пою́ще твоѧ̑ млⷭ҇ти и҆ чꙋдеса̀, хва́лимъ тѧ̀ всѝ, бцⷣе, и҆ ꙗ҆́кѡ дре́вле і҆и҃ль къ кївѡ́тꙋ завѣ́та притека́емъ ко ѡ҆́бразꙋ лица̀ твоегѡ̀, и҆ и҆з̾ глꙋбины̀ дꙋшѝ вопїе́мъ: воздви́гни рꙋ́цѣ твоѧ̑ къ сн҃ꙋ твоемꙋ̀, да пода́стъ на́мъ всѧ̑ блага̑ѧ и҆ спаси́тєльнаѧ съ вѣ́рою и҆ любо́вїю вопїю́щымъ тѝ:

Ра́дꙋйсѧ, ᲂу҆тѣше́нїе на́ше въ ско́рбѣхъ: ра́дꙋйсѧ, ᲂу҆толе́нїе печа́лей на́шихъ.

Ра́дꙋйсѧ, ра́досте на́ша безконе́чнаѧ: ра́дꙋйсѧ, свѣ́тлосте и҆ ѿра́до серде́чнаѧ.

Ра́дꙋйсѧ, наде́ждо на́ша крѣ́пкаѧ: ра́дꙋйсѧ, си̑рымъ прїѧ́телище.

Ра́дꙋйсѧ, стра̑ннымъ прибѣ́жище: ра́дꙋйсѧ, ѡ҆би̑димымъ покрови́тельнице.

Ра́дꙋйсѧ, ѡ҆клевета́емыхъ ѡ҆правда́нїе: ра́дꙋйсѧ, благи́хъ защище́нїе.

Ра́дꙋйсѧ, тѣ́ла моегѡ̀ врачева́нїе: ра́дꙋйсѧ, дꙋшѝ моеѧ̀ сп҃се́нїе.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ г҃і

Ѽ, премлⷭ҇рдаѧ застꙋ́пнице на́ша, вели́кїѧ ра́ди млⷭ҇ти твоеѧ̀ дарова́вшаѧ ѻ҆те́чествꙋ и҆ гра́дꙋ на́шемꙋ чꙋдотво́рнꙋю і҆кѡ́нꙋ твою̀ во ѡ҆свѧще́нїе, ᲂу҆тѣше́нїе и҆ ѡ҆гражде́нїе на́ше, ны́нѣшнее прїе́мши славосло́вїе, ѿ всѧ́кагѡ ѕла́гѡ ѡ҆бстоѧ́нїѧ и҆зба́ви на́съ, ра̑бъ твои́хъ, да́рꙋѧ на́мъ здра́вїе и҆ сп҃се́нїе, на врагѝ побѣ́дꙋ и҆ ѡ҆долѣ́нїе, и҆ всѣ́хъ на́съ вѣ́чныхъ мꙋ́къ свободѝ, ᲂу҆стна́ми, дꙋше́ю же и҆ срⷣцемъ вопїю́щихъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆рха́гг҃лъ гаврїи́лъ ѿ бг҃а по́сланъ бы́сть во гра́дъ назаре́тъ ко пречⷭ҇тѣй дв҃ѣ мр҃і́и, и҆ вше́дъ къ не́й речѐ: Ра́дꙋйсѧ, блгⷣтнаѧ, гдⷭ҇ь съ тобо́ю, бл҃гослове́нна ты̀ въ жена́хъ. а҆рха́гг҃льскомꙋ гла́сꙋ подража́юще, и҆ мы̀, грѣ́шнїи, ра́дости и҆ бл҃годаре́нїѧ въ срⷣцѣ свое́мъ и҆спо́лнени, пред̾ ꙗ҆вле́ннымъ ѡ҆́бразомъ твои́мъ благохвалє́нїѧ на̑ша возноси́ти къ тебѣ̀ дерза́емъ, прест҃а́ѧ бцⷣе:

Ра́дꙋйсѧ, ѻ҆́трасле ѿ ко́рене даві́дѡва бл҃гослове́ннаѧ: ра́дꙋйсѧ, ѻ҆бѣ́томъ роди́телей въ же́ртвꙋ бг҃ꙋ принесе́ннаѧ.

Ра́дꙋйсѧ, ст҃ы́хъ првⷣныхъ і҆ѡакі́ма и҆ а҆́нны дщѝ бг҃ода́ннаѧ: ра́дꙋйсѧ, трїе́хъ лѣ́тъ во хра́мъ бж҃їй введе́ннаѧ и҆ та́мѡ воспита́ннаѧ.

Ра́дꙋйсѧ, та́мѡ смире́нїемъ и҆ чⷭ҇тото́ю всѣ́хъ ᲂу҆диви́вшаѧ: ра́дꙋйсѧ, та́мѡ а҆рха́гг҃льскїѧ бесѣ́ды сподо́бльшаѧсѧ.

Ра́дꙋйсѧ, дв҃о, ѡ҆ зача́тїи бг҃а сло́ва благовѣ́стїе во смире́нїи прїе́мшаѧ: ра́дꙋйсѧ, и҆збра́ннаѧ ѻ҆трокови́це, къ зача́тїю бг҃а сло́ва си́лою свы́ше ѡ҆сѣне́ннаѧ.

Ра́дꙋйсѧ, та́йнꙋ воплоще́нїѧ сн҃а бж҃їѧ, ѿ вѣкѡ́въ въ бз҃ѣ сокрове́ннꙋю, ѿкры́вшаѧ: ра́дꙋйсѧ, а҆́гнице, ро́ждшаѧ а҆́гнца хрⷭ҇та̀, взе́мшаго грѣхѝ мі́ра.

Ра́дꙋйсѧ, тобо́ю бо и҆збавлѧ́емсѧ мꙋ́къ а҆́довыхъ: ра́дꙋйсѧ, тобо́ю бо сподоблѧ́емсѧ вѣ́чныѧ жи́зни.

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Конда́къ а҃

Взбра́нной воево́дѣ, пренепоро́чнѣй дв҃ѣ бцⷣе, застꙋ́пницѣ на́шей и҆ предста́тельствꙋ хрⷭ҇тїа́нъ непосты́дномꙋ, ꙗ҆вле́нїемъ чꙋ́дныѧ і҆кѡ́ны своеѧ̀ ра́дованїе пода́вшей землѣ̀ рѡссі́йстѣй и҆ всѧ̑ вѣ̑рныѧ ча̑да цр҃кве просвѣти́вшей, бл҃годаре́нїе ᲂу҆се́рднѡ прино́симъ тѝ, бцⷣе, и҆ припа́дающе пречꙋ́дномꙋ ѡ҆́бразꙋ твоемꙋ̀ ᲂу҆ми́льнѡ глаго́лемъ: спасѝ, гпⷭ҇жѐ, и҆ поми́лꙋй рабы̑ твоѧ̀ зовꙋ́щыѧ:

Ра́дꙋйсѧ, мт҃и бж҃їѧ, предста́тельнице и҆ застꙋ́пнице на́ша ᲂу҆се́рднаѧ.

Моли́твы

Ѽ премлⷭ҇рдаѧ гпⷭ҇жѐ, цр҃и́це бцⷣе! Прїимѝ смире́нное моле́нїе на́ше, и҆ не ѿри́ни на́съ, застꙋпле́нїе и҆ прибѣ́жище на́ше, и҆ не возгнꙋша́йсѧ на́съ недосто́йныхъ, но, ꙗ҆́кѡ млⷭ҇рдаѧ мт҃и, не преста́ни молѧ́щи, є҆го́же родила̀ є҆сѝ, да да́рꙋетъ на́мъ проще́нїе мно́гихъ согрѣше́нїй на́шихъ, да сп҃се́тъ на́съ и҆́миже вѣ́сть сꙋдьба́ми. Поми́лꙋй на́съ, влⷣчце, поми́лꙋй на́съ, нѣ́сть бо на́мъ сп҃се́нїѧ ѿ дѣ̑лъ. Тѣ́мже вѣ́рнѡ вопїе́мъ тѝ: поми́лꙋй рабы̑ твоѧ̑, и҆ непло́дное срⷣце на́ше покажѝ плодоно́сно дѣ́лы бл҃ги́ми. При́зри на на́съ недосто́йныхъ, ты́ бо є҆сѝ ᲂу҆пова́нїе и҆ покро́въ на́шъ, жи́знь и҆ свѣ́тъ срⷣцꙋ на́шемꙋ. Ꙗ҆́кѡ невече́рнїй свѣ́тъ ѿ чре́ва твоегѡ̀ воздви́гшаѧ, ѡ҆зарѝ дꙋ́шꙋ на́шꙋ, чⷭ҇таѧ, и҆ ѿженѝ всѧ́кꙋ мглꙋ̀ ѿ срⷣца на́шегѡ. Да́рꙋй на́мъ ᲂу҆миле́нїе, покаѧ́нїе и҆ сокрꙋше́нїе серде́чное. Сподо́би на́съ по всѧ̑ дни̑ живота̀ на́шего твори́ти во́лю сн҃а твоегѡ̀ и҆ бг҃а на́шегѡ и҆ во всѣ́мъ бл҃гоꙋгожда́ти є҆мꙋ̀ є҆ди́номꙋ. Ѽ бг҃омт҃и! Не преста́ни молѧ́щи ро́ждшагосѧ ѿ тебє̀ за всѧ̑ притека́ющыѧ съ вѣ́рою къ семꙋ̀ ст҃о́мꙋ ѡ҆́бразꙋ твоемꙋ̀, и҆ подава́й и҆̀мъ ско́рꙋю по́мощь и҆ ᲂу҆тѣше́нїе въ ско́рбехъ и҆ напа́стехъ и҆ ѕлострада́нїихъ: и҆зба́ви и҆́хъ ѿ клеветы̀ и҆ ѕло́бы чл҃вѣ́ческїѧ, ѿ вра̑гъ ви́димыхъ и҆ неви́димыхъ и҆ всѧ́кїѧ нꙋ́жды и҆ печа́ли. Спасѝ ѻ҆те́чество на́ше, гра́дъ се́й и҆ всѧ̑ гра́ды и҆ страны̑ ѿ всѧ́кихъ бѣ́дъ и҆ нꙋ́ждъ, и҆ сотворѝ млⷭ҇тива на́мъ бы́ти бг҃а на́шего, ѿвратѝ всѧ́кїй гнѣ́въ є҆гѡ̀, на ны̀ дви́жимый, и҆ и҆зба́ви ны̀ ѿ належа́щагѡ и҆ пра́веднагѡ є҆гѡ̀ преще́нїѧ. Ѽ бг҃олюби́ваѧ влⷣчце, а҆́гг҃лѡвъ ᲂу҆краше́нїе, мч҃нкѡвъ сла́во и҆ всѣ́хъ ст҃ы́хъ ра́досте! Съ ни́ми молѝ гдⷭ҇а, да сподо́битъ на́съ въ покаѧ́нїи сконча́ти живота̀ на́шегѡ тече́нїе. Въ сме́рти же ча́съ, прест҃а́ѧ дв҃о, и҆зба́ви на́съ ѿ вла́сти бѣсо́вскїѧ, и҆ ѡ҆сꙋжде́нїѧ, и҆ ѿвѣ́та, и҆ стра́шнагѡ и҆спыта́нїѧ, и҆ мыта́рствъ го́рькихъ, и҆ ѻ҆гнѧ̀ вѣ́чнагѡ, да сподо́бльшесѧ сла́внагѡ црⷭ҇твїѧ бж҃їѧ, велича́емъ тѧ̀ и҆ сла́вимъ вопло́щшагосѧ ѿ тебє̀ хрⷭ҇та̀ бг҃а на́шего, є҆мꙋ́же сла́ва со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Ѽ прест҃а́ѧ влⷣчце бцⷣе и҆ приснодв҃о мр҃і́е, є҆ди́наѧ наде́ждо на́мъ, грѣ̑шнымъ, къ тебѣ̀ прибѣга́емъ и҆ тебє̀ мо́лимъ, ꙗ҆́кѡ ве́лїе и҆́маши дерзнове́нїе пред̾ ро́ждшимсѧ ѿ тебѣ̀ по пло́ти гдⷭ҇омъ бг҃омъ и҆ сп҃си́телемъ на́шимъ і҆и҃сомъ хрⷭ҇то́мъ. не пре́зри сле́зъ на́шихъ, не возгнꙋша́йсѧ воздыха́нїй на́шихъ, не ѿри́ни ско́рби на́шеѧ, не посрамѝ ᲂу҆пова́нїѧ на́шегѡ на тѧ̀, но мт҃рними молє́нїи твои́ми ᲂу҆молѝ гдⷭ҇а бг҃а, да сподо́битъ на́съ грѣ́шныхъ и҆ недосто́йныхъ свободи́тисѧ ѿ грѣхѡ́въ и҆ страсте́й дꙋше́вныхъ и҆ тѣле́сныхъ, ᲂу҆мре́ти мі́рꙋ и҆ жи́ти є҆мꙋ̀ є҆ди́номꙋ во всѧ̑ дни̑ живота̀ на́шего.

Ѽ прест҃а́ѧ влⷣчце бцⷣе, пꙋтеше́ствꙋющымъ спꙋтеше́ствꙋй и҆ ѡ҆гражда́й и҆ ѡ҆хранѧ́й ѻ҆́ныѧ, и҆зба́ви плѣне́нныхъ ѿ плѣне́нїѧ, свободѝ стра́ждꙋщихъ ѿ бѣ́дъ, ᲂу҆тѣ́ши сꙋ́щихъ въ печа́ли, ско́рбѣхъ и҆ напа́стѣхъ, ѡ҆блегчѝ нищетꙋ̀ и҆ всѧ́ко ѕлострада́нїе тѣле́сное и҆ да́рꙋй всѣ̑мъ всѧ̑ потрє́бнаѧ къ животꙋ̀, бл҃гоче́стїю и҆ жи́зни вре́меннѣй. сп҃сѝ, влⷣчце, всѧ̑ страны̑ и҆ гра̑ды и҆ сїю̀ странꙋ̀ и҆ се́й гра́дъ, и҆́мже сїѧ̑ чꙋдотво́рнаѧ и҆ ст҃а́ѧ і҆кѡ́на твоѧ̀ даде́сѧ во ᲂу҆тѣше́нїе и҆ ѡ҆гражде́нїе, и҆зба́ви ѧ҆̀ ѿ гла́да, гꙋби́тельства, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нныхъ, междоꙋсо́бныѧ бра́ни и҆ ѿвратѝ всѧ́кїй гнѣ́въ на ны̀ пра́веднѡ дви́жимый. да́рꙋй на́мъ вре́мѧ на покаѧ́нїе и҆ ѡ҆браще́нїе, и҆зба́ви на́съ ѿ внеза́пныѧ сме́рти и҆ во вре́мѧ и҆схо́да на́шегѡ предста́ни на́мъ ꙗ҆́вльшисѧ, дѣ́во бг҃оро́дице, и҆ и҆зба́ви на́съ ѿ воздꙋ́шныхъ мыта́рствъ кнѧзе́й вѣ́ка сегѡ̀, сподо́би на стра́шнѣмъ сꙋди́щи хрⷭ҇то́вѣмъ ста́ти ѡ҆деснꙋ́ю и҆ содѣ́лай на́съ снаслѣ́дники вѣ́чныхъ бл҃гъ, да сла́вимъ во вѣ́ки великолѣ́пое и҆́мѧ сн҃а твоегѡ̀ и҆ бг҃а на́шегѡ со безнача́льнымъ є҆гѡ̀ ѻ҆ц҃е́мъ и҆ ст҃ы́мъ и҆ бл҃ги́мъ и҆ животворѧ́щимъ є҆гѡ̀ дх҃омъ, ны́нѣ и҆ при́снѡ и҆ во вѣ́ки вѣкѡ́въ. а҆ми́нь.