Православный календарь
Размер шрифта:

Ака́ѳістъ

А҆ка́ѳїстъ бцⷣѣ, ра́ди і҆кѡ́ны є҆ѧ̀ по́ртъ-а҆ртꙋ́рскїѧ.

Феодоровской (1239) и "Торжество Пресвятой Богородицы" (Порт-Артурской) (1904) икон Божией Матери 29 августа 2026

Конда́къ а҃

И҆збра́ннѣй ѿ всѣ́хъ родѡ́въ застꙋ́пницѣ на́шей и҆ цр҃и́цѣ, покро́вомъ своеѧ̀ бл҃гости покрыва́ющей предѣ́лы землѝ дальнерѡссі́йскїѧ, бл҃года́рствєннаѧ пѣ̑нїѧ прино́симъ тѝ, рабѝ твоѝ, бцⷣе. Ты́ же, ꙗ҆́кѡ всемлⷭ҇тиваѧ, влⷣчце, ѿ всѧ́кихъ на́съ бѣ́дъ сп҃сѝ и҆ вѣ́чныхъ мꙋ́къ свободѝ, да ра́дꙋющесѧ зове́мъ тѝ:

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

І҆́косъ а҃

А҆́гг҃лѡвъ творе́цъ и҆збра̀ тѧ̀, влⷣчце, къ бл҃года́тномꙋ человѣ́кѡвъ сп҃се́нїю и҆ дарова̀ тѧ̀ помо́щницꙋ правосла́внымъ лю́демъ, и҆збавлѧ́ющꙋю на́съ ѿ хи́нскихъ наше́ствїй, ѿ гла́да и҆ всѧ́кихъ напа́стей и҆ житїѐ на́ше ᲂу҆строѧ́ющꙋю во всѧ́комъ бл҃гоче́стїи и҆ чистотѣ̀. Тѣ́мже и҆ мы̀, воспомина́юще таково́е ѡ҆ лю́дехъ твоѐ бл҃гопромышле́нїе, со бл҃годаре́нїемъ вопїе́мъ тѝ си́це:

Ра́дꙋйсѧ, непристꙋ́пнагѡ бжⷭ҇тва̀ селе́нїе: ра́дꙋйсѧ, непреста́нное люде́й ᲂу҆дивле́нїе.

Ра́дꙋйсѧ, достоѧ́нїю твоемꙋ̀ по́мощь и҆ застꙋпле́нїе: ра́дꙋйсѧ, хода́таице на́шегѡ сп҃се́нїѧ.

Ра́дꙋйсѧ, бл҃года́тное ѿ нꙋ́ждъ и҆збавле́нїе: ра́дꙋйсѧ, несокрꙋши́мый щи́те во́инѡвъ на́шихъ.

Ра́дꙋйсѧ, мечꙋ̀ и҆ бронѐ и҆́хъ неꙋѧзви́маѧ: ра́дꙋйсѧ, врагѡ́въ пораже́нїе и҆ ᲂу҆страше́нїе.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ в҃

Ви́дѧщи, прест҃а́ѧ влⷣчце, скѡ́рби сердє́чныѧ, мꙋ̑ки дꙋшє́вныѧ и҆ и҆́скреннее покаѧ́нїе люде́й твои́хъ, бл҃говоли́ла є҆сѝ ꙗ҆ви́ти і҆кѡ́нꙋ твою̀, въ бл҃гослове́нїе и҆ зна́менїе торжества̀ хрⷭ҇толюби́вомꙋ во́инствꙋ да́льнїѧ рѡссі́и. Мы́ же, къ не́й припа́дающе съ вѣ́рою и҆ сокрꙋше́ннымъ се́рдцемъ, и҆з̾ глꙋбины̀ дꙋшѝ вопїе́мъ бг҃ꙋ: А҆ллилꙋ́їа.

І҆́косъ в҃

Ра́зꙋмъ нбⷭ҇ный дарова́сѧ и҆́нокѡмъ и҆ бг҃омо́льцємъ землѝ кі́евскїѧ, во є҆́же соѡрꙋди́ти і҆кѡ́нꙋ прест҃ы́ѧ бцⷣы и҆ нарещѝ ю҆̀ по́ртъ-а҆ртꙋ́рскою, да ꙗ҆ви́тсѧ дальнерѡссі́йскаѧ врата́рница и҆ сора́тница хрⷭ҇толюби́вомꙋ во́инствꙋ на́шемꙋ. Тѣ́мже со ᲂу҆миле́нїемъ вопїе́мъ тѝ такова́ѧ:

Ра́дꙋйсѧ, ѿ гра́да Кі́ева прише́дшаѧ къ на́мъ въ застꙋпле́нїе: ра́дꙋйсѧ, правосла́вныѧ вѣ́ры ᲂу҆твержде́нїе.

Ра́дꙋйсѧ, почита́нїѧ ст҃ы́хъ і҆кѡ́нъ ѡ҆сщ҃е́нїе: ра́дꙋйсѧ, хи́нскагѡ ѕловѣ́рїѧ ѡ҆бличе́нїе.

Ра́дꙋйсѧ, горды́ни и҆́хъ низложе́нїе: ра́дꙋйсѧ, ско́рбь на́шꙋ въ ра́дость претворѧ́ющаѧ.

Ра́дꙋйсѧ, де́мѡнскїѧ полкѝ побѣжда́ющаѧ: ра́дꙋйсѧ, несꙋмнѣ́нною наде́ждою на́съ ᲂу҆веселѧ́ющаѧ.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ г҃

Си́ла вы́шнѧгѡ и҆ бл҃года́ть влⷣчцы ᲂу҆крѣплѧ́ше въ видѣ́нїи нѣ́коего человѣ́ка и҆ подви́же є҆го̀ къ собира́нїю сре́дствъ, во є҆́же написа́ти є҆ѧ̀ пречⷭ҇тый ѡ҆́бразъ, и҆ съ вѣ́рою дерза́ѧ ѡ҆ гдⷭ҇ѣ, пристꙋпѝ къ трꙋдꙋ̀, и҆ и҆сполнѧ́ѧ повелѣ́нїе бцⷣы, ѡ҆брѣ́те подаѧ̑нїѧ ѿ вели́кагѡ мно́жества и҆́нокѡвъ и҆ бг҃омо́льцєвъ. И҆ по́мощїю бг҃омт҃ре соѡрꙋдѝ і҆кѡ́нꙋ и҆ воззва̀ къ бг҃ꙋ: А҆ллилꙋ́їа.

І҆́косъ г҃

И҆мꙋ́щи бл҃гоꙋтро́бное промышле́нїе ѡ҆ лю́дехъ дальнерѡссі́йскїѧ землѝ, въ видѣ́нїи ꙗ҆ви́ла є҆сѝ во́лю свою̀, влⷣчце: да прїе́млютъ і҆кѡ́нꙋ мою̀ хрⷭ҇толюби́вїи вѡ́и по́ртъ-а҆ртꙋ́ра и҆ тоѧ̀ по́мощїю ѡ҆долѣ́ютъ ѕлочести́выхъ хи́нѡвъ! Тѣ́мже и҆ мы̀ вопїе́мъ:

Ра́дꙋйсѧ, моли́твеннице неꙋсыпа́ющаѧ ко хрⷭ҇тꙋ̀ бг҃ꙋ и҆ на млⷭ҇ть є҆гѡ̀ къ на́мъ приклонѧ́ющаѧ: ра́дꙋйсѧ, чрез̾ бл҃гочести́выхъ люде́й сла́вꙋ чꙋде́съ твои́хъ грѣ̑шнымъ ѿкрыва́ющаѧ.

Ра́дꙋйсѧ, гнѣ́въ бж҃їй предста́тельствомъ твои́мъ ѿ на́съ ѿводѧ́щаѧ: ра́дꙋйсѧ, держа́внаѧ скоропомо́щнице, во дни̑ тѧ́жкихъ и҆спыта́нїй сп҃са́ющаѧ.

Ра́дꙋйсѧ, матери́нскимъ покро́вомъ твои́мъ ѿ несча́стїй на́съ сохранѧ́ющаѧ: ра́дꙋйсѧ, ѿ ро́ва поги́бели безнаде́жныхъ млⷭ҇рдїемъ твои́мъ и҆схища́ющаѧ.

Ра́дꙋйсѧ, ѿ наше́ствїѧ и҆ноплеме́нныхъ зе́млю на́шꙋ сохранѧ́ющаѧ: ра́дꙋйсѧ, всемлⷭ҇тиваѧ ᲂу҆слы́шательнице моле́нїй на́шихъ въ ско́рби и҆ ѡ҆бстоѧ́нїихъ.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ д҃

Бꙋ́рю смѧте́нїй и҆ бра́нь, врага́ми воздви́гнꙋтꙋю въ странѣ̀ на́шей, ᲂу҆толи́ти потща́шасѧ бл҃гочести́вїи лю́дїе гра́да кі́ева, и҆сполнѧ́юще повелѣ́нїе бг҃омт҃ре, не ѡ҆бинꙋ́шасѧ посла́ти і҆кѡ́нꙋ твою̀ въ ѡ҆сажде́ннꙋю квантꙋ́нскꙋю во́лость, ꙗ҆́кѡ щи́тъ и҆ побѣ́дное зна́менїе над̾ сꙋпоста̑ты, вопїю́ще бг҃ꙋ: А҆ллилꙋ́їа.

І҆́косъ д҃

Слы́шавше правосла́внїи лю́дїе, ꙗ҆́кѡ і҆кѡ́на цр҃и́цы нбⷭ҇ныѧ ше́ствоваше чрез̾ мнѡ́гїѧ гра́ды и҆ вє́си, и҆ бг҃омо́льцы въ вели́комъ мно́жествѣ стека́хꙋсѧ срѣта́ти и҆ поклонѧ́тисѧ є҆́й, въ моли́твахъ со слеза́ми ᲂу҆миле́нїѧ и҆спроша́ти странѣ̀ на́шей на врагѝ ѡ҆долѣ́нїе, ѿ гла́да и҆ па́гꙋбы и҆збавле́нїе, мі́ра ᲂу҆мире́нїе. Тѣ́мже и҆ мы̀ вопїе́мъ къ пребл҃гослове́ннѣй:

Ра́дꙋйсѧ, го́рнѧгѡ мі́ра ᲂу҆краше́нїе: ра́дꙋйсѧ, до́льнѧгѡ мі́ра застꙋпле́нїе.

Ра́дꙋйсѧ, дщѝ бл҃гослове́ннаѧ ѻ҆ц҃а̀ нбⷭ҇нагѡ: ра́дꙋйсѧ, сн҃а предвѣ́чнагѡ неискꙋсомꙋ́жнаѧ роди́тельнице.

Ра́дꙋйсѧ, бжⷭ҇твенныѧ бл҃года́ти пода́тельнице: ра́дꙋйсѧ, тѣле́съ на́шихъ безме́зднаѧ цѣли́тельнице.

Ра́дꙋйсѧ дꙋ́шъ на́шихъ къ црⷭ҇твїю го́рнемꙋ пꙋтеводи́тельнице: ра́дꙋйсѧ, ѿ вѣ́чныѧ сме́рти на́ша свободи́тельнице.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ є҃

Бг҃оте́чнаѧ ѕвѣзда̀ ꙗ҆ви́сѧ твоѧ̀, бг҃омт҃и, і҆кѡ́на, всю̀ странꙋ̀ рѡссі́йскꙋю ѿ за́падъ до восто́къ ѡ҆бтека́ющаѧ лꙋча́ми чꙋде́съ твои́хъ, ѡ҆сїѧва́ющаѧ блꙋжда́ющихъ во тьмѣ̀ невѣ́рїѧ и҆ къ покаѧ́нїю и҆̀хъ приводѧ́щаѧ, тьмꙋ̀ недꙋ̑гъ и҆ скорбе́й ѿгонѧ́ющаѧ и҆ наставлѧ́ющаѧ на пꙋ́ть сп҃се́нїѧ всѣ́хъ съ вѣ́рою къ тебѣ̀ прибѣга́ющихъ и҆ вопїю́щихъ къ бг҃ꙋ: А҆ллилꙋ́їа.

І҆́косъ є҃

Во дни̑ лю́тыхъ скорбе́й и҆ ѕлы́хъ ѡ҆бстоѧ́нїй ꙗ҆ви́ла є҆сѝ, влⷣчце, ве́лїю ми́лость ѡ҆брѣ́тенїемъ чⷭ҇тны́ѧ і҆кѡ́ны твоеѧ̀ по́ртъ-а҆ртꙋ́рскїѧ, да всѝ съ вѣ́рою молѧ́щесѧ пред̾ не́ю прїи́мꙋтъ здра́вїе и҆ дꙋ́шъ сп҃се́нїе. Сегѡ̀ ра́ди и҆ мы̀, прославлѧ́юще млⷭ҇рдїе твоѐ неизрече́нное, ᲂу҆се́рднѡ вопїе́мъ тѝ си́це:

Ра́дꙋйсѧ, свѣти́ло незаходи́мое, свѣ́томъ и҆́стиннагѡ бг҃опозна́нїѧ на́съ просвѣща́ющее: ра́дꙋйсѧ, врата́рнице, двє́ри ра̑йскїѧ вѣ̑рнымъ ѿверза́ющаѧ.

Ра́дꙋйсѧ, неистощи́мый и҆сто́чниче ст҃ы́ни: ра́дꙋйсѧ, многотекꙋ́щаѧ рѣко̀ бжⷭ҇твенныѧ бл҃госты́ни.

Ра́дꙋйсѧ, грѣхѡ́въ на́шихъ ѡ҆чище́нїе: ра́дꙋйсѧ, ка́ющихсѧ грѣ́шникѡвъ съ бг҃омъ примире́нїе.

Ра́дꙋйсѧ, дѡ́брыѧ ѡ҆бѣ́ты прїе́млющаѧ: ра́дꙋйсѧ, бл҃ги̑мъ начина́нїємъ спосо́бствꙋющаѧ.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ ѕ҃

Проповѣ́дꙋетъ цр҃ковь хрⷭ҇то́ва чꙋдеса̀ твоѧ̑, бг҃ороди́тельнице, и҆ нѣ́сть гра́да и҆лѝ страны̀, и҆дѣ́же не соверша́шесѧ тобо́ю дѣ́йство си́лы бж҃їѧ: во и҆збавле́нїе, сп҃се́нїе, просвѣще́нїе и҆ и҆сцѣле́нїе люде́й хрⷭ҇тоимени́тыхъ, наипа́че же чрез̾ і҆кѡ̑ны твоѧ̑ ст҃ы̑ѧ ѡ҆бы́кла є҆сѝ чꙋдотвори́ти, и҆злива́ющи ѿ ни́хъ бе́зднꙋ млⷭ҇рдїѧ и҆ щедро́тъ бѣ́дствꙋющемꙋ человѣ́ческомꙋ ро́дꙋ. Сегѡ̀ ра́ди славосло́вѧще тѧ̀, сн҃ꙋ твоемꙋ̀ и҆ бг҃ꙋ на́шемꙋ вопїе́мъ: А҆ллилꙋ́їа.

І҆́косъ ѕ҃

Возсїѧ́ла є҆сѝ ѿ и҆́стиннагѡ со́лнца пра́вды, дв҃о бг҃оѻтрокови́це, твоѧ̀ ст҃а́ѧ і҆кѡ́на по́ртъ-а҆ртꙋ́рскаѧ, дости́гшаѧ гра́да владивосто́ка, и҆ ꙗ҆ви́сѧ ꙗ҆́кѡ ѕвѣзда̀ пресвѣ́тлаѧ, просвѣща́ющаѧ помрачє́нныѧ ѻ҆́чи и҆ ѡ҆каменє́нныѧ сердца̀ и҆ влага́ющаѧ разꙋмѣ́нїе сꙋде́бъ бж҃їихъ хрⷭ҇тоимени̑тымъ лю́демъ. Тѣ́мже съ ни́ми и҆ мы̀ вопїе́мъ:

Ра́дꙋйсѧ, ꙗ҆́кѡ ѡ҆ тебѣ̀ ра́дꙋетсѧ а҆́гг҃льскїй собо́ръ: ра́дꙋйсѧ, ꙗ҆́кѡ ѡ҆ тебѣ̀ торжествꙋ́етъ человѣ́ческїй ро́дъ.

Ра́дꙋйсѧ, ꙗ҆́кѡ твоѧ̀ сла́ва превосхо́дитъ похвалы̑ земны̑ѧ и҆ нбⷭ҇ныѧ: ра́дꙋйсѧ, ра́досте на́ша, ᲂу҆слажда́ющаѧ скѡ́рбныѧ сердца̀, къ тебѣ̀ ѿвє́рстыѧ.

Ра́дꙋйсѧ, бл҃га́ѧ застꙋ́пнице, на по́мощь къ на́мъ ᲂу҆скорѧ́ющаѧ: ра́дꙋйсѧ, зало́гъ сп҃си́тельный на́мъ въ і҆кѡ́нѣ твое́й дарова́вшаѧ.

Ра́дꙋйсѧ, гра́дъ владивосто́къ прише́ствїемъ свои́мъ ѿ врагѡ́въ сохранѧ́вшаѧ: ра́дꙋйсѧ, пренесе́нїемъ і҆кѡ́ны твоеѧ̀ въ по́ртъ-а҆ртꙋ́ръ побѣ́дꙋ рѡссі́и ѡ҆бѣща́вшаѧ.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ з҃

Хотѧ̀ человѣ́къ нѣ́кїй и҆спо́лнити во́лю бж҃їю и҆ доста́вити въ ѡ҆сажде́ннꙋю ва́рварами крѣ́пость і҆кѡ́нꙋ прест҃ы́ѧ бцⷣы по́ртъ-а҆ртꙋ́рскꙋю, ѿпра́висѧ въ пꙋ́ть, и҆ дости́глъ то́кмѡ гра́да да́льнѧгѡ, не ѡ҆брѣ́те вѣ́ры ᲂу҆ во́євъ на́шихъ въ по́мощь бг҃ома́тере, и҆ со слеза́ми воззва̀ къ бг҃ꙋ: А҆ллилꙋ́їа.

І҆́косъ з҃

Но́вꙋю показа̀ млⷭ҇ть всѣ́хъ творе́цъ и҆ влⷣка на́шъ гдⷭ҇ь, є҆гда̀ положѝ во гнѣ́вѣ свое́мъ наказа́ти человѣ́ческїй ро́дъ: ѻ҆гне́мъ, мече́мъ, гла́домъ и҆ болѣ́зньми, и҆ сотворѝ въ наказа́нїе пораже́нїе рꙋ́сскихъ во́євъ и҆ плѣне́нїе безбо́жными ꙗ҆по́нцами і҆кѡ́ны твоеѧ̀ по́ртъ-а҆ртꙋ́рскїѧ. Сегѡ̀ ра́ди, влⷣчце, припа́даемъ и҆ ᲂу҆се́рднѡ мо́лимъ тѧ̀: не да́ждь на́мъ до конца̀ поги́бнꙋти, но двє́ри млⷭ҇рдїѧ твоегѡ̀ ѿве́рзи на́мъ, вопїю́щымъ:

Ра́дꙋйсѧ, сп҃си́телѧ мі́ра ро́ждшаѧ: ра́дꙋйсѧ, сп҃се́нїѧ на́шегѡ глави́зно.

Ра́дꙋйсѧ, мт҃и бж҃їѧ, ѡ҆брече́ннаѧ на страда́нїе: ра́дꙋйсѧ, мт҃и млⷭ҇рдїѧ, ѿе́млющаѧ всѧ́кꙋю сле́зꙋ ѿ лю́тѣ стра́ждꙋщихъ.

Ра́дꙋйсѧ, сле́зы ᲂу҆миле́нїѧ на́мъ подаю́щаѧ: ра́дꙋйсѧ, ѿ страсте́й на́съ и҆збавлѧ́ющаѧ.

Ра́дꙋйсѧ, погиба́ющихъ грѣ́шникѡвъ сп҃са́ющаѧ: ра́дꙋйсѧ, цр҃и́це нб҃сѝ и҆ землѝ, моли̑твы ра̑бъ свои́хъ прїе́млющаѧ.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ и҃

Стра́нни и҆ прише́льцы є҆смы̀ на землѝ се́й: житїѐ на́ше сꙋ́етно и҆ маловре́менно є҆́сть. Мы́ же сме́рти безвѣ́стное во ᲂу҆́мъ никогда́же прїе́млемъ, ни помышлѧ́емъ ѡ҆ стра́шнѣмъ сꙋди́щи хрⷭ҇то́вѣ, въ не́мже и҆́мамы првⷣномꙋ сꙋдїѝ предста́ти и҆ да́ти ѿвѣ́тъ ѡ҆ всѧ́комъ дѣ́лѣ же и҆ сло́вѣ. Тѣ́мже мо́лимъ тѧ̀, влⷣчце, возбꙋдѝ ны̀ ѿ сна̀ грѣхо́внагѡ, да сподо́бимсѧ твои́мъ хода́тайствомъ полꙋчи́ти проще́нїе грѣхѡ́въ, и҆ во гла́сѣ ра́дованїѧ воспѣва́ти хрⷭ҇тꙋ̀ бг҃ꙋ: А҆ллилꙋ́їа.

І҆́косъ и҃

Всѧ̀ бы́вше горѣ̀ къ нбⷭ҇нымъ взѧта̀, и҆ земны́хъ не ѡ҆ставлѧ́еши, прест҃а́ѧ бцⷣе, ст҃ы́мъ твои́мъ предста́тельствомъ, и҆ и҆́маши ве́лїе дерзнове́нїе къ сн҃ꙋ твоемꙋ̀ и҆ бг҃ꙋ на́шемꙋ. Тѣ́мже ᲂу҆твердѝ въ ми́рѣ глꙋбо́цѣ правосла́вныхъ житїѐ и҆ всѧ̑ полє́знаѧ да́рꙋй рабѡ́мъ твои́мъ, да велича́юще воспѣва́емъ тѝ:

Ра́дꙋйсѧ, ᲂу҆́мнымъ ѻ҆чесє́мъ на́шымъ го́рькїй и҆ стра́шный ча́съ сме́ртный представлѧ́ющаѧ: ра́дꙋйсѧ, на кі́йждо де́нь, а҆́ки ᲂу҆жѐ на послѣ́днїй житїѧ̀ на́шегѡ, взира́ти на́съ наꙋча́ющаѧ.

Ра́дꙋйсѧ, люби́ти мі́ръ и҆ ꙗ҆́же въ мі́рѣ на́мъ воспреща́ющаѧ: ра́дꙋйсѧ, пристра́стїе къ тлѣ́нномꙋ бога́тствꙋ и҆з̾ се́рдца на́шегѡ и҆скоренѧ́ющаѧ.

Ра́дꙋйсѧ, сла́вы человѣ́чи, а҆́ки тѣ́ни преходѧ́щїѧ, и҆ска́ти на́мъ возбранѧ́ющаѧ: ра́дꙋйсѧ, ꙗ҆́кѡ сладча́йшее и҆́мѧ гдⷭ҇а і҆и҃са хрⷭ҇та̀ ᲂу҆сты̀ непреста́ннѡ произноси́ти и҆ въ ᲂу҆мѣ̀ держа́ти на́съ побꙋжда́еши.

Ра́дꙋйсѧ, ꙗ҆́кѡ ѿ праздносло́вїѧ, многоглаго́ланїѧ, па́че же ѿ кощꙋ́нства на́съ ᲂу҆держава́еши: ра́дꙋйсѧ, ꙗ҆́кѡ твоѐ за на́съ хода́тайство си́льно є҆́сть пред̾ бг҃омъ, є҆́же не вве́ржєннымъ бы́ти на́мъ во тьмꙋ̀ кромѣ́шнюю.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ ѳ҃

Всѧ́кое є҆стество̀ а҆́гг҃льское ᲂу҆диви́сѧ вели́комꙋ дѣ́лꙋ твоегѡ̀ млⷭ҇рдїѧ, гдⷭ҇и, є҆гда̀ во дни̑ гнѣ́внагѡ посѣще́нїѧ своегѡ̀, не хотѧ̀ да́ти поги́бнꙋти до конца̀ правосла́внѣй рѡссі́и, дарова̀ держа́внꙋю застꙋ́пницꙋ наро́дꙋ правосла́вномꙋ, неви́димѡ сопребыва́ющꙋ и҆ слы́шащꙋ тебѣ̀ пою́щихъ: А҆ллилꙋ́їа.

І҆́косъ ѳ҃

Вѣті̑и сꙋемꙋ́дрїи, непросвѣще́ннїи свѣ́томъ и҆́стиннагѡ бг҃опозна́нїѧ, поклони́шасѧ злато́мꙋ тельцꙋ̀. Сегѡ̀ ра́ди гнѣ́вное бж҃їе посѣще́нїе всемꙋ̀ мі́рꙋ зрѧ́ще, мы̀, грѣ́шнїи, смире́ннѡ мо́лимъ тѧ̀, влⷣчце: ᲂу҆ми́лостиви созда́телѧ преложи́ти гнѣ́въ сво́й пра́ведный на млⷭ҇ть и҆ поми́ловати на́съ, вопїю́щихъ:

Ра́дꙋйсѧ, твоеѧ̀ по́мощи и҆ застꙋпле́нїѧ никогда́же на́съ лиша́еши: ра́дꙋйсѧ, ᲂу҆́мъ на́шъ, помраче́нный небреже́нїемъ, свѣ́тлымъ твои́мъ покро́вомъ ѡ҆зарѧ́еши.

Ра́дꙋйсѧ, дꙋшє́вныѧ на́ши ра̑ны сп҃си́тельнымъ є҆ле́емъ ᲂу҆маща́еши: ра́дꙋйсѧ, и҆з̾ ро́ва беззако́нїй на́шихъ рꙋко́ю твоеѧ̀ по́мощи и҆схища́еши.

Ра́дꙋйсѧ, грѣхо́вный со́нъ дꙋше́вныѧ на́шеѧ лѣ́ности ѡ҆трѧса́еши: ра́дꙋйсѧ, дꙋше́вное ᲂу҆миле́нїе и҆ серде́чное сокрꙋше́нїе въ на́съ ражда́еши.

Ра́дꙋйсѧ, къ покаѧ́нїю и҆ и҆справле́нїю на́съ возбꙋжда́еши: ра́дꙋйсѧ, ꙗ҆́кѡ всѣ̑мъ твори́ши сп҃сти́сѧ, въ держа́вный тво́й покро́въ прибѣга́ющымъ.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ і҃

Сп҃стѝ хотѧ̀ лю́ди дальнерѡссі́йскїѧ землѝ, погиба́ющыѧ во тьмѣ̀ невѣ́рїѧ, прест҃а́ѧ бцⷣе, въ пꙋ́ть ᲂу҆пра́ви нѣ́кїѧ и҆́ноки во ст҃ы́й гра́дъ, поклоне́нїѧ ра́ди і҆ерⷭ҇ли́мскимъ свѧты́нѧмъ, и҆ та́мѡ на кре́стнѣмъ пꙋтѝ, ᲂу҆ мѣ́ста рече́ннагѡ лїѳострѡто́нъ, бл҃говоли́ла є҆сѝ ꙗ҆ви́ти млⷭ҇ть свою̀ ѡ҆брѣ́тенїемъ чⷭ҇тны́ѧ і҆кѡ́ны твоеѧ̀ по́ртъ-а҆ртꙋ́рскїѧ, тѣ́мже и҆ мы̀ съ ни́ми ра́достнѡ вопїе́мъ бг҃ꙋ: А҆ллилꙋ́їа.

І҆́косъ і҃

Не бл҃говоли́ла є҆сѝ і҆кѡ́нꙋ твою̀, влⷣчце, пре́жде возврати́ти въ предѣ́лы землѝ дальнерѡссі́йскїѧ, но ᲂу҆тѣ́шила є҆сѝ сє́стры ѡ҆би́тели го́рненскїѧ свои́мъ посѣще́нїемъ, и҆ въ не́й пребы́вши трѝ мѣ́сѧцы, ꙗ҆́коже пе́рвѣе ᲂу҆ сро́дницы своеѧ̀ є҆лїсаве́ты, и҆ ны́нѣ ѡ҆бновле́нїемъ і҆кѡ́ны своеѧ̀ вои́стинꙋ показа́ла є҆сѝ, бцⷣе, стѣ́нꙋ млⷭ҇рдїѧ и҆ щедро́тъ хрⷭ҇толюби̑вымъ лю́демъ, нело́жнѡ ѡ҆бѣща́вши покро́въ своеѧ̀ бл҃гости въ возсозда́нїи рѡссі́йскїѧ страны̀, да врата̀ а҆́дова не ѡ҆долѣ́ютъ правосла́вныѧ цр҃кве хрⷭ҇то́вы. Сегѡ̀ ра́ди припа́даемъ къ вно́вь ѡ҆брѣ́теннѣй і҆кѡ́нѣ твое́й по́ртъ-а҆ртꙋ́рстѣй и҆ ра́достнѡ вопїе́мъ тѝ си́це:

Ра́дꙋйсѧ, рѡссі́йскїѧ страны̀ покро́ве и҆ ѡ҆гражде́нїе: ра́дꙋйсѧ, дальнерѡссі́йскїѧ землѝ забра́ло и҆ похвале́нїе.

Ра́дꙋйсѧ, правосла́вныѧ цр҃кве сто́лпъ и҆ ᲂу҆твержде́нїе: ра́дꙋйсѧ, всѧ́кїѧ ст҃ы́ни защи́то и҆ поклоне́нїе.

Ра́дꙋйсѧ, сꙋ́щихъ въ плѣне́нїи свобожде́нїе: ра́дꙋйсѧ, за пра́вдꙋ гони́мыхъ дерзнове́нїе.

Ра́дꙋйсѧ, за вѣ́рꙋ страда́вшихъ терпѣ́нїе: ра́дꙋйсѧ, ѿ гла́да и҆ болѣ́зней на́ше сп҃се́нїе.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ а҃і

Пѣ́нїемъ хвале́бнымъ и҆ бл҃года́рственнымъ моле́нїемъ вно́вь срѣта́ютъ і҆кѡ́нꙋ твою̀, влⷣчце, по́ртъ-а҆ртꙋ́рскꙋю, ст҃и́тель бж҃їй, сщ҃е́нницы, мона́си и҆ лю́дїе гра́да владивосто́ка, ꙗ҆́кѡ зарю̀ со́лнечнꙋю и҆ непосты́днꙋю наде́ждꙋ свою̀. И҆ мы̀ всѝ ᲂу҆пова́нїе на тѧ̀ возложи́вше, ра́достнѡ вопїе́мъ бг҃ꙋ: А҆ллилꙋ́їа.

І҆́косъ а҃і

Ст҃ы́й ᲂу҆брꙋ́съ сн҃а своегѡ̀, ꙗ҆́кѡ свѣтоѻбра́зный ѡ҆мофо́ръ, неви́димѡ простира́еши над̾ на́шею земле́ю, влⷣчце, нече́стїѧ безлꙋ́ннꙋю но́щь прогонѧ́ющи, зарю́ же пакибытїѧ̀ возсїѧва́ющи, да въ ра́дости немо́лчнѡ зове́мъ:

Ра́дꙋйсѧ, вои́стинꙋ въ со́лнце ѡ҆блаче́ннаѧ: ра́дꙋйсѧ, вѣнце́мъ ѿ ѕвѣ́здъ ᲂу҆вѧзе́ннаѧ.

Ра́дꙋйсѧ, рѧ̑сны златы́ми преиспещре́ннаѧ: ра́дꙋйсѧ, красото̀ неизрече́ннаѧ.

Ра́дꙋйсѧ, теплото̀ со́лнца любе́знѣйшаѧ: ра́дꙋйсѧ, свѣ́те невече́рнїй а҆́гг҃лѡвъ и҆ человѣ́кѡвъ.

Ра́дꙋйсѧ, тє́мныѧ де́мѡнскїѧ полкѝ дале́че ѿгонѧ́ющаѧ: ра́дꙋйсѧ, тьмꙋ̀ невѣ́рїѧ просвѣща́ющаѧ.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ в҃і

І҆кѡ́на твоѧ̀, бл҃года́ти прича́стнаѧ, ꙗ҆́кѡ сокро́вище драгоцѣ́нное цр҃кве хрⷭ҇то́вы ѿ тебє̀, бцⷣе, подаде́сѧ, въ не́й бо ѡ҆бѣща́ласѧ є҆сѝ пребыва́ти съ на́ми до сконча́нїѧ вѣ́ка, ре́кши къ первопи́саннѣй і҆кѡ́нѣ твое́й: съ не́ю моѧ̀ бл҃года́ть и҆ си́ла. Вѣ́рꙋемъ, пречⷭ҇таѧ, ꙗ҆́кѡ не ѡ҆скꙋдѣ́етъ глаго́лъ се́й и҆ во і҆кѡ́нѣ твое́й по́ртъ-а҆ртꙋ́рстѣй: на всѧ́цѣмъ мѣ́стѣ и҆ здѣ̀ съ на́ми пребыва́еши, и҆дѣ́же вѣ́рнѡ пое́тсѧ сн҃ꙋ твоемꙋ̀ и҆ бг҃ꙋ хвале́бнаѧ пѣ́снь: А҆ллилꙋ́їа.

І҆́косъ в҃і

Пою́ще твоѧ̑ чꙋдеса̀, бы̑вшаѧ въ дрє́внѧѧ и҆ настоѧ̑щаѧ времена̀, хва́лимъ тѧ̀, влⷣчце, и҆ ᲂу҆се́рднѡ припа́даемъ къ і҆кѡ́нѣ твое́й по́ртъ-а҆ртꙋ́рстѣй, съ любо́вїю лобыза́емъ ю҆̀ и҆ ꙗ҆́кѡ при́снѡ сꙋ́щей съ на́ми мо́лимъ ти сѧ: ми́лостивѡ воззрѝ на ны̀, мт҃и бж҃їѧ, и҆ ꙗ҆́коже ны́нѣ зри́мъ тѧ̀ на і҆кѡ́нѣ и҆з̾ѡбраже́ннꙋю, та́кѡ сподо́би на́съ ᲂу҆зрѣ́ти тѧ̀ въ гро́зный ча́съ сме́ртный, ѿ рꙋкѝ дїа́воли на́съ и҆схища́ющꙋю и҆ въ црⷭ҇твїе нбⷭ҇ное приводѧ́щꙋю держа́вною десни́цею твое́ю, да тебѣ̀ бл҃года́рственнѡ воззове́мъ:

Ра́дꙋйсѧ, цр҃кве нбⷭ҇ныѧ и҆ земны́ѧ ᲂу҆краше́нїе: ра́дꙋйсѧ, по бз҃ѣ на́ше пе́рвое прибѣ́жище и҆ ᲂу҆тѣше́нїе.

Ра́дꙋйсѧ, дѣ́вства чⷭ҇тны́й покро́ве и҆ ѡ҆гражде́нїе: ра́дꙋйсѧ, во ст҃ѣ́мъ житїѝ вѣ́рныхъ ᲂу҆твержде́нїе.

Ра́дꙋйсѧ, въ црⷭ҇твїе нбⷭ҇ное лю́бѧщымъ тѧ̀ хода́тайствꙋеши вхожде́нїе: ра́дꙋйсѧ, ѿ вла́сти лю́тагѡ мїроде́ржца ᲂу҆пова́ющихъ на тѧ̀ и҆збавле́нїе.

Ра́дꙋйсѧ, на воздꙋ́шныхъ мыта́рствахъ сла́вѧщихъ тѧ̀ и҆збавле́нїе: ра́дꙋйсѧ, на́мъ ра́йскихъ вра́тъ ѿверзе́нїе.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ г҃і

Ѽ всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во, ѿ а҆́гг҃лъ восхвалѧ́емаѧ на нб҃сѝ, ѿ человѣ̑къ воспѣва́емаѧ на землѝ! При́зри на смире́нное на́ше моле́нїе пред̾ пречⷭ҇тымъ твои́мъ ѡ҆́бразомъ и҆ всѧ̑ полє́знаѧ да́рꙋй рабѡ́мъ твои̑мъ, да сп҃са́емїи тобо́ю, вопїе́мъ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ и҆збра̀ тѧ̀, влⷣчце, къ бл҃года́тномꙋ человѣ́кѡвъ сп҃се́нїю и҆ дарова̀ тѧ̀ помо́щницꙋ правосла́внымъ лю́демъ, и҆збавлѧ́ющꙋю на́съ ѿ хи́нскихъ наше́ствїй, ѿ гла́да и҆ всѧ́кихъ напа́стей и҆ житїѐ на́ше ᲂу҆строѧ́ющꙋю во всѧ́комъ бл҃гоче́стїи и҆ чистотѣ̀. Тѣ́мже и҆ мы̀, воспомина́юще таково́е ѡ҆ лю́дехъ твоѐ бл҃гопромышле́нїе, со бл҃годаре́нїемъ вопїе́мъ тѝ си́це:

Ра́дꙋйсѧ, непристꙋ́пнагѡ бжⷭ҇тва̀ селе́нїе: ра́дꙋйсѧ, непреста́нное люде́й ᲂу҆дивле́нїе.

Ра́дꙋйсѧ, достоѧ́нїю твоемꙋ̀ по́мощь и҆ застꙋпле́нїе: ра́дꙋйсѧ, хода́таице на́шегѡ сп҃се́нїѧ.

Ра́дꙋйсѧ, бл҃года́тное ѿ нꙋ́ждъ и҆збавле́нїе: ра́дꙋйсѧ, несокрꙋши́мый щи́те во́инѡвъ на́шихъ.

Ра́дꙋйсѧ, мечꙋ̀ и҆ бронѐ и҆́хъ неꙋѧзви́маѧ: ра́дꙋйсѧ, врагѡ́въ пораже́нїе и҆ ᲂу҆страше́нїе.

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Конда́къ а҃

И҆збра́ннѣй ѿ всѣ́хъ родѡ́въ застꙋ́пницѣ на́шей и҆ цр҃и́цѣ, покро́вомъ своеѧ̀ бл҃гости покрыва́ющей предѣ́лы землѝ дальнерѡссі́йскїѧ, бл҃года́рствєннаѧ пѣ̑нїѧ прино́симъ тѝ, рабѝ твоѝ, бцⷣе. Ты́ же, ꙗ҆́кѡ всемлⷭ҇тиваѧ, влⷣчце, ѿ всѧ́кихъ на́съ бѣ́дъ сп҃сѝ и҆ вѣ́чныхъ мꙋ́къ свободѝ, да ра́дꙋющесѧ зове́мъ тѝ:

Ра́дꙋйсѧ, цр҃и́це препросла́вленнаѧ, предѣ́лы дальнерѡссі́йскїѧ землѝ млⷭ҇тїю свое́ю не ѡ҆ставлѧ́ющаѧ.

Моли́твы

Ѽ прест҃а́ѧ гпⷭ҇жѐ дв҃о бцⷣе, превы́шшаѧ херꙋві́мѡвъ и҆ серафі́мѡвъ и҆ ст҃ѣ́йшаѧ всѣ́хъ ст҃ы́хъ! Припа́дающе къ ст҃ѣ́й і҆кѡ́нѣ твое́й, смире́ннѡ мо́лимсѧ: вонмѝ гла́сꙋ моле́нїѧ на́шегѡ, ви́ждь скѡ́рби, ви́ждь бѣды̑ на́шѧ, и҆ ꙗ҆́кѡ любвеѻби́льнаѧ мт҃и, потщи́сѧ на по́мощь на́мъ безпомѡ́щнымъ, ᲂу҆молѝ сн҃а твоего̀ и҆ бг҃а на́шего, да не преда́стъ землѝ на́шеѧ на порꙋга́нїе ва́рварѡвъ, да не погꙋби́тъ на́съ за беззакѡ́нїѧ на̑ша, но ꙗ҆ви́тъ человѣколю́бнѡ на́мъ млⷭ҇ть свою̀. И҆спросѝ на́мъ, влⷣчце, ᲂу҆ бл҃гости є҆гѡ̀ тѣле́сное здра́вїе и҆ дꙋше́вное сп҃се́нїе, ми́рное житїѐ и҆ землѝ плодоно́сїе, воздꙋ́ха бл҃горастворе́нїе и҆ бл҃гослове́нїе свы́ше на всѧ̑ бл҃га̑ѧ дѣла̀ и҆ начина̑нїѧ на̑ша. И҆ ꙗ҆́коже дре́вле млⷭ҇тивѡ млⷭ҇тивнѡ ꙗ҆ви́ла є҆сѝ на́мъ і҆кѡ́нꙋ свою̀ по́ртъ-а҆ртꙋ́рскꙋю, ꙗ҆́кѡ защи́тницꙋ землѝ дальнерѡссі́йскїѧ, но за невѣ́рїе и҆ неблагоговѣ́нїе къ ст҃ы́нѧмъ цр҃кѡ́внымъ ꙗ҆зы́чники плѣне́ннꙋю, та́кѡ и҆ ны́нѣ припа́даемъ къ вно́вь ѡ҆брѣ́тенномꙋ твоемꙋ̀ ѡ҆́бразꙋ и҆ прино́симъ на́ше ᲂу҆се́рдное мл҃твосло́вїе.

Ѽ цр҃и́це всепѣ́таѧ! Прострѝ ко гдⷭ҇ꙋ бг҃онѡ́сныѧ рꙋ́цѣ твоѝ, и҆́миже бг҃омлⷣнца і҆и҃са хрⷭ҇та̀ носи́ла є҆сѝ, и҆ ᲂу҆молѝ є҆го̀ и҆зба́вити на́съ ѿ всѧ́кагѡ ѕла̀. Ꙗ҆вѝ, влⷣчце, млⷭ҇ть твою̀ на́мъ: болѧ́щыѧ и҆сцѣлѝ, скорбѧ́щыѧ ᲂу҆тѣ́ши, бѣ́дствꙋющымъ помозѝ и҆ сподо́би на́съ бл҃гоче́стнѡ житїѐ земно́е соверши́ти, хрⷭ҇тїа́нскꙋю кончи́нꙋ полꙋчи́ти и҆ црⷭ҇твїе нбⷭ҇ное наслѣ́дити, мт҃рнимъ твои́мъ хода́тайствомъ къ ро́ждшемꙋсѧ ѿ тебє̀ хрⷭ҇тꙋ̀ бг҃ꙋ на́шемꙋ, є҆мꙋ́же со безнача́льнымъ є҆гѡ̀ ѻ҆ц҃е́мъ и҆ прест҃ы́мъ дх҃омъ подоба́етъ всѧ́каѧ сла́ва, че́сть и҆ поклоне́нїе, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.