Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ пред̾ і҆кѡ́ною «Свѣ́нскаѧ»

Свенской (Печерской) икон Божией Матери (1288) 30 августа 2026

Конда́къ а҃

И҆збра́ннѣй ѿ всѣ́хъ родѡ́въ пречⷭ҇тѣй дв҃ѣ мр҃і́и и҆ мт҃ри бг҃а на́шегѡ соста́вимъ похвалꙋ̀. Ты́ же, влⷣчце, ꙗ҆́кѡ зе́млю рꙋ́сскꙋю под̾ сво́й покро́въ прїи́мшаѧ и҆ ѻ҆би́тєли и҆́ночєскїѧ і҆кѡ́нами чꙋдотво́рными ᲂу҆краси́вшаѧ, сохранѝ ѻ҆би́тель твою̀ и҆ сп҃сѝ всѣ́хъ на́съ, да зове́мъ тѝ:

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

І҆́косъ а҃

А҆рха́гг҃ломъ гаврїи́ломъ воспита́ннаѧ во ст҃а̑ѧ ст҃ы́хъ, бг҃оѻтрокови́це, ст҃ости и҆ бл҃голѣ́пїѧ цр҃ко́внагѡ во страна́хъ хрⷭ҇тїа́нскихъ ревни́тельница быва́еши. Чрез̾ і҆кѡ́нꙋ твою̀ пече́рскꙋю мнѡ́гаѧ чꙋдеса̀ во гра́дѣ кі́евѣ ꙗ҆ви́вшаѧ, по́слѣжде въ зе́млю брѧ́нскꙋю по проше́нїю бл҃говѣ́рнагѡ кнѧ́зѧ рѡма́на, слѣпото́ю недꙋ́гꙋющагѡ, съ по́честьми ѿпра́виласѧ є҆сѝ. Ѻ҆тцы́ же пече́рстїи, провожда́юще ѻ҆́бразъ тво́й, воспѣ́ша тѝ такова̑ѧ:

Ра́дꙋйсѧ, непоро́чнаѧ, ѿ првⷣныхъ і҆ѡакі́ма и҆ а҆́нны ро́ждшаѧсѧ: ра́дꙋйсѧ, цр҃и́це всебл҃га́ѧ, сп҃се́нїе всемꙋ̀ мі́рꙋ ꙗ҆ви́вшаѧ.

Ра́дꙋйсѧ, зе́млю рꙋ́сскꙋю во ᲂу҆дѣ́лъ себѣ̀ и҆збра́вшаѧ: ра́дꙋйсѧ, ѻ҆би́тели пече́рскїѧ ст҃а́ѧ покрови́тельнице.

Ра́дꙋйсѧ, нача́льникѡмъ и҆́ноческагѡ житїѧ̀ а҆нтѡ́нїю и҆ ѳеодо́сїю въ трꙋдѣ́хъ помо́щнице: ра́дꙋйсѧ, і҆кѡ̑ны, пи̑санныѧ и҆збра́нникомъ бж҃їимъ а҆лѵ́пїемъ, чꙋдесы̀ просла́вившаѧ.

Ра́дꙋйсѧ, ко гра́дꙋ брѧ́нскꙋ ѻ҆́бразъ сво́й чꙋ́дный въ лодїѝ прове́дшаѧ: ра́дꙋйсѧ, мѣ́сто но́выѧ ѻ҆би́тели въ низо́вїи свѣ́ны рѣкѝ ᲂу҆каза́вшаѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ в҃

Ви́дѣвше и҆́ноцы и҆ слꙋги̑ кнѧ́зєвы, провожда́вшїи ст҃ꙋ́ю і҆кѡ́нꙋ, стра́нное и҆счезнове́нїе є҆ѧ̀ но́щїю, нача́ша скорбѣ́ти и҆ сле́зы лїѧ́ти, и҆ и҆ска́ти ю҆̀ по гора́мъ и҆ де́бремъ: и҆ преплы́вше деснꙋ̀ рѣкꙋ̀, поидо́ша по гора́мъ. Є҆гда́ же ѡ҆брѣто́ша пречⷭ҇тыѧ ѻ҆́бразъ на дꙋ́бѣ высо́цѣ междꙋ̀ вѣ́твей на верши́нѣ горы̀ стоѧ́щъ, возопи́ша ра́достнѡ: А҆ллилꙋ́їа.

І҆́косъ в҃

Разꙋмѣ́вше всѝ, ꙗ҆́кѡ сїѧ̀ є҆́сть во́лѧ твоѧ̀, прест҃а́ѧ дв҃о, посла́ша тогда̀ вѣ́стника ко бл҃говѣ́рномꙋ кнѧ́зю рѡма́нꙋ возвѣсти́ти бы́вшее чꙋ́до. Кнѧ́зь же ᲂу҆слы́шавъ, воспрѧ́лъ є҆́сть ско́рѡ со ѻ҆дра̀ своегѡ̀ съ ра́достїю вели́кою и҆ повелѣ̀ звони́ти по всѣ̑мъ цр҃квамъ бж҃їимъ, да собере́тсѧ собо́ръ ве́сь сщ҃е́нный и҆ всѝ лю́дїе гра́да брѧ́нска, и҆ да вознесꙋ́тъ мл҃твꙋ, глаго́люще си́це:

Ра́дꙋйсѧ, влⷣчце мі́ра, херꙋві̑мъ пребо́льшаѧ и҆ серафі̑мъ чтⷭ҇нѣ́йшаѧ: ра́дꙋйсѧ, бл҃года́тнаѧ мр҃і́е, ли̑ки а҆́гг҃льскими при́снѡ воспѣва́емаѧ.

Ра́дꙋйсѧ, свѣ́тлый ѻ҆́блаче, и҆з̾ негѡ́же возсїѧ̀ гдⷭ҇ь: ра́дꙋйсѧ, хра́ме ст҃ѣ́йшїй хрⷭ҇та̀ бг҃а на́шегѡ.

Ра́дꙋйсѧ, ѻ҆́бразомъ твои́мъ чтⷭ҇ны́мъ предѣ́лы брѧ̑нскїѧ посѣти́вшаѧ: ра́дꙋйсѧ, ꙗ҆́кѡ ѻ҆́бразъ се́й на го́рꙋ высо́кꙋ а҆́гг҃ли принесо́ша.

Ра́дꙋйсѧ, покрови́тельница мѣ́ста сегѡ̀ пребыва́ти восхотѣ́вшаѧ: ра́дꙋйсѧ, ро́дꙋ ст҃а́гѡ кнѧ́зѧ мїхаи́ла черни́говскагѡ сꙋгꙋ́бѡ бл҃говоли́вшаѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ г҃

Си́лою и҆ бл҃года́тїю твое́ю, всенепоро́чнаѧ, зе́млю брѧ́нскꙋю ѡ҆сѣни́ла є҆сѝ и҆ ꙗ҆вле́нїемъ і҆кѡ́ны твоеѧ̀ пече́рскїѧ нело́жнѡ показа́ла є҆сѝ, ꙗ҆́кѡ мѣ́ста сегѡ̀ защи́тница и҆ влⷣчца бꙋ́деши.

Позна́вше сїѐ, сщ҃е́нницы и҆ всѝ лю́дїе ве́лїимъ гла́сомъ возопи́ша бг҃ꙋ: А҆ллилꙋ́їа.

І҆́косъ г҃

И҆мѣ́ѧй наде́ждꙋ на и҆сцѣле́нїе, бл҃говѣ́рный кнѧ́зь рѡма́нъ со а҆рхїерє́и и҆ сщ҃є́нники, съ мона̑хи и҆ всѣ́ми людьмѝ ѿ ма́ла до вели́ка, со свѣща́ми и҆ кади́лы прїи́де на го́рꙋ, и҆ не могі́й ᲂу҆зрѣ́ти тропы̀, ведꙋ́щїѧ ко дре́вꙋ, и҆дѣ́же стоѧ́ше і҆кѡ́на сїѧ̀, воздохнꙋ́въ и҆з̾ глꙋбины̀ дꙋшѝ, со слеза́ми взыва́ше:

Ра́дꙋйсѧ, бцⷣе мр҃і́е, мт҃и хрⷭ҇та̀ бг҃а на́шегѡ: ра́дꙋйсѧ, всемлⷭ҇тиваѧ дв҃о, и҆зво́лившаѧ ꙗ҆ви́ти чꙋдотво́рный ѻ҆́бразъ тво́й.

Ра́дꙋйсѧ, пречꙋ́днаѧ влⷣчце, дарова́ти прозрѣ́нїе ѻ҆чесє́мъ вла́сть и҆мꙋ́щаѧ: ра́дꙋйсѧ, бг҃освѣ́тлаѧ свѣщѐ, мра́къ грѣхо́вный ѿгонѧ́ющаѧ.

Ра́дꙋйсѧ, сле́знꙋю мл҃твꙋ не презира́ющаѧ: ра́дꙋйсѧ, ᲂу҆́хо твоѐ ко всѣ̑мъ молѧ́щымъ тѧ̀ въ ско́рби серде́чнѣй приклонѧ́ющаѧ.

Ра́дꙋйсѧ, ꙗ҆́кѡ тобо́ю не то́кмѡ тѣлє́сныѧ, но и҆ дꙋшє́вныѧ ѻ҆́чи ѿверза́ютсѧ: ра́дꙋйсѧ, ꙗ҆́кѡ тобо́ю красотꙋ̀ мі́ра бж҃їѧ созерца́ти наꙋча́емсѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ д҃

Бꙋ́рю сꙋмни́тельныхъ помышле́нїй ѿгна́въ, бл҃говѣ́рный кнѧ́зь ѻ҆бѣ́тъ дадѐ пречⷭ҇тѣй хра́мъ воздви́гнꙋти и҆ ѻ҆би́тель на горѣ̀ се́й, и҆ землѝ ѿмѣ́рити ще́дрѡ, є҆ли́кѡ взо́ръ человѣ́ческїй возмо́жетъ ᲂу҆зрѣ́ти съ мѣ́ста сегѡ̀. Тѣ́мже въ то́й ча́съ ᲂу҆ви́дѣ ма́лꙋ стезю̀ пред̾ собо́ю, и҆ а҆́бїе повелѣ̀ крⷭ҇тъ во ѡ҆снова́нїе ѻ҆би́тели поста́вити, ра́достнѡ поѧ̀: А҆ллилꙋ́їа.

І҆́косъ д҃

Оу҆слы́ша дв҃а всепѣ́таѧ гла́съ мл҃твы собо́рныѧ, ю҆́же є҆ди́ными ᲂу҆сты̀ вознесо́ша всѝ лю́дїе, тогда́ бо прозрѣ̀ вели́кїй кнѧ́зь рѡма́нъ пе́рвыхъ ѻ҆че́съ ꙗ҆снѣ́йше: тѣ́мже со тре́петомъ повелѣ̀ є҆пⷭ҇кпꙋ со а҆рхїмандрі́томъ и҆ всемꙋ̀ при́чтꙋ цр҃ко́вномꙋ прїѧ́ти со дре́ва ѻ҆́бразъ пречⷭ҇тыѧ и҆ цѣлова́ше чꙋдотво́рнꙋю і҆кѡ́нꙋ, со ᲂу҆миле́нїемъ воспѣва́ѧ си́це:

Ра́дꙋйсѧ, свѣ́тъ и҆́стинный вселе́ннѣй все́й ꙗ҆ви́вшаѧ: ра́дꙋйсѧ, ди́внаѧ на́ша застꙋ́пнице.

Ра́дꙋйсѧ, и҆сто́чниче приснотекꙋ́щїй и҆сцѣле́нїй: ра́дꙋйсѧ, наде́ждо на́шегѡ сп҃се́нїѧ.

Ра́дꙋйсѧ, цѣли́тельнице, слѣпы́хъ ѻ҆че́съ прозрѣ́нїе: ра́дꙋйсѧ, є҆ди́на въ жена́хъ бл҃гослове́ннаѧ.

Ра́дꙋйсѧ, всенепоро́чнаѧ дв҃о, безсѣ́меннѡ хрⷭ҇та̀ бг҃а воплоти́вшаѧ: ра́дꙋйсѧ, свѣ́томъ бжⷭ҇твенныѧ бл҃года́ти возсїѧ́вшаѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ є҃

Бжⷭ҇твеннаѧ бл҃года́ть, і҆кѡ́нѣ твое́й дарова́ннаѧ, созыва́етъ вѣ́рныхъ собо́ры пѣ́сньми дꙋхо́вными сла́вити тѧ̀, пресла́внаѧ приснодв҃о, и҆ покланѧ́тисѧ сн҃ꙋ твоемꙋ̀ бжⷭ҇твенномꙋ: тѣ́мже а҆рхїерє́и и҆ сщ҃е́нницы, мона́си и҆ мїрсті́и согла́снѡ воспѣва́ютъ: А҆ллилꙋ́їа.

І҆́косъ є҃

Ви́дѧ ꙗ҆вле́нное тобо́ю чꙋ́до, бг҃омт҃и, прозрѣ́вый кнѧ́зь рѡма́нъ свои́ма рꙋка́ма на хра́мъ бж҃їй бре́вна рꙋби́ти нача́тъ и҆ лю́демъ всѣ̑мъ повелѣ̀ твори́ти та́кожде. Є҆гда́ же цр҃ковь во и҆́мѧ сла́внагѡ ᲂу҆спе́нїѧ твоегѡ̀ воздви́гнꙋта бы́сть и҆ ѡ҆сщ҃е́на, слꙋжи́ти собо́рнѣ лїтꙋргі́ю бжⷭ҇твеннꙋю а҆рхїере́ю повелѣ̀, всѣ́мъ се́рдцемъ сицева̑ѧ воспѣва́ѧй:

Ра́дꙋйсѧ, ѡ҆дꙋшевле́нный хра́ме бж҃їй: ра́дꙋйсѧ, пречⷭ҇таѧ, премꙋ́дрости сокро́вище.

Ра́дꙋйсѧ, бжⷭ҇твенное жили́ще вели́кагѡ цр҃ѧ̀: ра́дꙋйсѧ, свѣтоза́рнаѧ ски́нїе, бг҃а вмѣсти́вшаѧ.

Ра́дꙋйсѧ, зе́млю брѧ́нскꙋю въ достоѧ́нїе себѣ̀ и҆збра́вшаѧ: ра́дꙋйсѧ, ѻ҆би́тели свѣ́нскїѧ ᲂу҆строи́тельнице бл҃га́ѧ.

Ра́дꙋйсѧ, і҆кѡ́нꙋ свою̀ пече́рскꙋю ѡ҆снова́нїемъ ѻ҆би́тели положи́вшаѧ: ра́дꙋйсѧ, то́ю мнѡ́гаѧ и҆сцѣлє́нїѧ и҆ чꙋдеса̀ ꙗ҆ви́вшаѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ ѕ҃

Проповѣ́дꙋетъ ѻ҆би́тель свѣ́нскаѧ предста́тельство твоѐ, влⷣчце, всѣ̑мъ приходѧ́щымъ съ вѣ́рою, и҆́бо чꙋдотво́рный ѻ҆́бразъ тво́й, ꙗ҆́кѡ кївѡ́тъ завѣ́та, на мѣ́стѣ, и҆збра́ннѣмъ тобо́ю, пребыва́етъ и҆ чꙋдесы̀ бл҃гоꙋха́етъ: твои́мъ бо предста́тельствомъ плѣнє́нныѧ свобожда́еши, ѻ҆чи́ма и҆сцѣле́нїе да́рꙋеши, дꙋхѡ́въ нечи́стыхъ и҆згонѧ́еши. Сегѡ̀ ра́ди и҆зба́вленнїи тобо́ю бл҃года́рственнѡ взыва́ютъ: А҆ллилꙋ́їа.

І҆́косъ ѕ҃

Возсїѧ́вшаѧ бл҃года́ть въ вертогра́дѣ твое́мъ дꙋхо́внѣмъ, всепѣ́таѧ, и҆́щꙋщихъ сп҃се́нїѧ привлека́етъ мно́жество. Ѿѻнꙋ́дꙋже мно́зи і҆ера́рси и҆ ста́рцы честні́и во ᲂу҆едине́нїи ми́рнѡ подвиза́хꙋсѧ на мѣ́стѣ ѻ҆́номъ под̾ покро́вомъ твои́мъ, цр҃и́це нбⷭ҇наѧ, и҆ вели́кихъ чꙋдотво́рцєвъ а҆нтѡ́нїа и҆ ѳеодо́сїа, съ вѣ́рою въ и҆́хъ застꙋпле́нїе, па́че же со ᲂу҆пова́нїемъ на млⷭ҇рдїе бж҃їе. Мы́ же недосто́йнїи, стезе́ю ѻ҆тцє́въ на́шихъ ше́ствꙋюще, со ᲂу҆се́рдїемъ притека́емъ къ чꙋдотво́рномꙋ ѻ҆́бразꙋ твоемꙋ̀, взыва́юще си́це:

Ра́дꙋйсѧ, бл҃года́тныхъ ꙗ҆вле́нїй и҆спо́лненнаѧ: ра́дꙋйсѧ, мл҃твы на́шѧ прїе́млющаѧ.

Ра́дꙋйсѧ, бѣды̑ и҆ скѡ́рби на́шѧ зрѧ́щаѧ: ра́дꙋйсѧ, сле́зы ᲂу҆ны́нїѧ и҆ ѿча́ѧнїѧ и҆зсꙋша́ющаѧ.

Ра́дꙋйсѧ, и҆́ноческагѡ житїѧ̀ покрови́тельнице: ра́дꙋйсѧ, мона́шескагѡ чи́на нбⷭ҇наѧ нача́льнице.

Ра́дꙋйсѧ, вла̑сти предержа́щыѧ къ разꙋмѣ́нїю во́ли бж҃їѧ призыва́ющаѧ: ра́дꙋйсѧ, послꙋша́нїю соверше́нномꙋ наꙋча́ющаѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ з҃

Хотѧ́ще ѡ҆бнови́ти и҆ бл҃гоꙋкраси́ти ѻ҆́бразъ тво́й, бг҃омт҃и, принесо́ша и҆́ноцы ст҃ы́ню сїю̀ въ ца́рствꙋющїй гра́дъ москвꙋ̀, госꙋда́рю вели́комꙋ кнѧ́зю и҆ всеѧ̀ рꙋсѝ самоде́ржцꙋ съ моле́нїемъ вели́кимъ. Оу҆зрѣ́въ, ꙗ҆́кѡ мно́гꙋ вре́мени минꙋ́вшꙋ, потемнѣ̀ сребро̀ и҆ ѡ҆бломи́сѧ зла́то на ѡ҆кла́дѣ і҆кѡ́ны дре́внїѧ, помоли́сѧ госꙋда́рь пречⷭ҇тѣй, и҆ ᲂу҆мили́сѧ се́рдцемъ, и҆ наказа̀ сребродѣ́лателємъ свои̑мъ ѡ҆кла́дъ ѡ҆бнови́ти и҆ ка́менїемъ драгоцѣ́ннымъ ᲂу҆краси́ти: бл҃гочести́вїи же и҆́ноцы воспѣ́ша бл҃года́рственнѡ бг҃ꙋ: А҆ллилꙋ́їа.

І҆́косъ з҃

Но́вое и҆ пресла́вное чꙋ́до ꙗ҆ви́ла є҆сѝ, и҆зба́вительнице, є҆гда̀ въ ка́меннѣй цр҃кви, по велѣ́нїю госꙋда́ревꙋ во ѻ҆би́тели свѣ́нстѣй возводи́мѣй, попꙋще́нїемъ бж҃їимъ паде́нїе сво́дѡвъ бы́сть.

И҆гꙋ́менъ мартїнїа́нъ съ бра́тїею чꙋдодѣ́йствїемъ твои́мъ невреди́мь и҆з̾ ѻ҆́ныѧ цр҃кве и҆зы́де: тѵ́хѡнъ же ста́рецъ и҆ съ ни́мъ шестьна́десѧть и҆скꙋ́сныхъ дѣ́лателей цр҃ко́вныхъ и҆ ѻ҆́троцы то́кмѡ ра̑ны ма̑лыѧ полꙋчи́ша, ѻ҆ба́че ни є҆ди́наго ѿ си́хъ сме́рть ᲂу҆ѧзвѝ. Тѣ́мже всѝ и҆зба́вленнїи ѿ внеза́пныѧ поги́бели воспѣ́ша тѝ такова̑ѧ:

Ра́дꙋйсѧ, мт҃и бж҃їѧ, любо́вїю къ ро́дꙋ человѣ́ческомꙋ преиспо́лненнаѧ: ра́дꙋйсѧ, безвре́меннѡ поги́бнꙋти трꙋжда́ющымсѧ не попꙋсти́вшаѧ.

Ра́дꙋйсѧ, ка́менїе па́дающее незри́мѡ ᲂу҆держа́вшаѧ: ра́дꙋйсѧ, застꙋпле́нїемъ твои́мъ зако́ны є҆стества̀ и҆змѣнѧ́ющаѧ.

Ра́дꙋйсѧ, дв҃о мр҃і́е, ѻ҆трокови́це, чⷭ҇тоты̀ и҆ цѣломꙋ́дрїѧ и҆спо́лненнаѧ: ра́дꙋйсѧ, мт҃и млⷭ҇тиваѧ, ѻ҆трокѡ́въ ѿ сме́рти спаса́ющаѧ.

Ра́дꙋйсѧ, бл҃гослове́ннаѧ, двє́ри млⷭ҇рдїѧ бѣ́дствꙋющымъ ѿверза́ющаѧ: ра́дꙋйсѧ, грѣ́шникѡмъ неча́ѧннꙋю ра́дость ѡ҆бновле́нїѧ дꙋшѝ покаѧ́нїемъ да́рꙋющаѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ и҃

Стра́нное и҆ пресла́вное чꙋ́до ꙗ҆ви́ла є҆сѝ, взбра́ннаѧ воево́до, є҆гда̀ во времена̀ ѻ҆́наѧ полкѝ и҆ноплеме́нникѡвъ видѣ́нїемъ гро́знымъ ᲂу҆страши́вши, въ бѣ́гство ѡ҆брати́ла є҆сѝ, и҆ ѿ разоре́нїѧ ѻ҆би́тель твою̀ и҆ гра́дъ брѧ́нскъ сохрани́ла є҆сѝ. Сегѡ̀ ра́ди и҆́ноцы и҆ всѝ лю́дїе возопи́ша ра́достнѡ: А҆ллилꙋ́їа.

І҆́косъ и҃

Во дни̑ наше́ствїѧ га́ллѡвъ и҆ съ ни́ми два́десѧти ꙗ҆зы̑къ, ко гра́дꙋ брѧ́нскꙋ ᲂу҆стреми́вшихсѧ, бл҃говѣ́рнїи лю́дїе ше́ствїе со і҆кѡ́ною твое́ю ѡ҆́крестъ гра́да ᲂу҆стро́иша, и҆ ѽ чꙋдесѐ! пѡ́лчища вра́жєскаѧ ѡ҆брати́шасѧ вспѧ́ть. Тѣ́мже всѝ спасе́ннїи тобо́ю и҆з̾ глꙋбины̀ дꙋшѝ воззва́ша си́це:

Ра́дꙋйсѧ, свѣ́тъ ти́хїй ѿ многочꙋ́днагѡ ѻ҆́браза твоегѡ̀ и҆злива́ющаѧ: ра́дꙋйсѧ, сїѧ́нїемъ ли́ка твоегѡ̀ врагѝ ѡ҆слѣплѧ́ющаѧ.

Ра́дꙋйсѧ, сердца̀ и҆́нокѡвъ ѿгна́нїемъ врагѡ́въ возвесели́вшаѧ: ра́дꙋйсѧ, жи́телей гра́да брѧ́нска въ вѣ́рѣ ᲂу҆тверди́вшаѧ.

Ра́дꙋйсѧ, ꙗ҆́кѡ тобо́ю сопроти̑вныѧ до конца̀ побѣжда́емъ: ра́дꙋйсѧ, ꙗ҆́кѡ тобо́ю сѣте́й неви́димыхъ и҆збѣга́емъ.

Ра́дꙋйсѧ, ꙗ҆́кѡ на бра́нь со страстьмѝ повелѣ́нїемъ твои́мъ ѡ҆полча́емсѧ: ра́дꙋйсѧ, ꙗ҆́кѡ тобо́ю наде́ждꙋ на сп҃се́нїе вѣ́чное ѡ҆брѣта́емъ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ ѳ҃

Всѧ́кое проше́нїе бл҃го́е и҆сполнѧ́еши бл҃говоле́нїемъ твои́мъ, бг҃ороди́тельнице, ꙗ҆́кѡ мт҃и сꙋ́щи зижди́телѧ всѣ́хъ: не ѡ҆ставлѧ́еши млⷭ҇тїю и҆ и҆збра́нный до́мъ тво́й на деснѣ̀ рѣцѣ̀: се́ бо и҆гꙋ́менꙋ варна́вѣ съ бра́тїею ка́меннꙋю цр҃ковь со трапе́зою вно́вь ᲂу҆стро́ити помога́еши, да сверши́вше дѣ́ло бл҃го́е, вознесꙋ́тъ мл҃твꙋ бг҃ꙋ, пою́ще: А҆ллилꙋ́їа.

І҆́косъ ѳ҃

Вѣті̑и многоглаго́ливїи ᲂу҆молко́ша, не могꙋ́ще досто́йнѡ и҆з̾ѧсни́ти чꙋдеса̀ твоѧ̑, приснодв҃о, ѿ і҆кѡ́ны свѣ́нскїѧ происходѧ̑щаѧ. Не то́кмѡ кнѧ́зѧ ѿ слѣпоты̀ и҆зба́вила є҆сѝ, но и҆ дще́рь кꙋпе́ческꙋю, и҆ болѧ́рыню кара́чевскꙋю, и҆ сы́на слꙋгѝ є҆ѧ̀ ѿ болѣ́зни ѻ҆че́съ и҆сцѣли́ла є҆сѝ млⷭ҇тивнѡ, па́че и҆ во и҆ны́хъ болѣ́знехъ цѣли́тельница ꙗ҆влѧ́ешисѧ, є҆ще́ же и҆ мꙋ́чимыхъ ѿ вла́сти те́мныхъ си́лъ свобожда́еши. Сегѡ̀ ра́ди мы̀ бл҃года́рнымъ се́рдцемъ пое́мъ тѝ:

Ра́дꙋйсѧ, скорбѧ́щихъ серде́цъ бл҃га́ѧ ᲂу҆тѣ́шительнице: ра́дꙋйсѧ, бл҃гослове́ннаѧ а҆́гнице и҆ непоро́чнаѧ влⷣчце.

Ра́дꙋйсѧ, раѧ̀ кла́съ невоздѣ́ланный прозѧ́бшаѧ: ра́дꙋйсѧ, навѣ́ты лꙋка̑выѧ до конца̀ низлага́ющаѧ.

Ра́дꙋйсѧ, две́ре гдⷭ҇нѧ непроходи́маѧ: ра́дꙋйсѧ, въ бѣда́хъ и҆ напа́стехъ стѣно̀ нерꙋши́маѧ.

Ра́дꙋйсѧ, крѣ́посте ᲂу҆пова́ющымъ на тѧ̀ несꙋмнѣ́ннѡ: ра́дꙋйсѧ, ѿра́до и҆ наде́ждо болѧ́щымъ неисцѣ́льнѡ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ і҃

Сп҃се́нїѧ ра́ди дꙋ́шъ мно́гихъ поста́вленъ бы́сть казначе́й ла́ѵры пече́рскїѧ і҆ѡа́ннъ во и҆гꙋ́мена ѻ҆би́тели свѣ́нскїѧ, и҆дѣ́же ᲂу҆ста́вы ᲂу҆строжа́ше: и҆́ноцы же нѣ́цыи ѡ҆ то́мъ печа́лишасѧ и҆ госꙋда́рю царю̀ на и҆гꙋ́мена сѣ́товаша. Ѻ҆ба́че твои́мъ промышле́нїемъ, всечⷭ҇таѧ, ѻ҆би́тель процвѣта́ше и҆ всѣ̑мъ всѧ̑ на по́льзꙋ бы́сть. Мы́ же мт҃рнее попече́нїе твоѐ зрѧ́ще, пѣ́снь хвале́бнꙋю пое́мъ бг҃ꙋ: А҆ллилꙋ́їа.

І҆́косъ і҃

Стѣна̀ є҆сѝ всѣ̑мъ и҆ прибѣ́жище просѧ́щымъ застꙋпле́нїѧ твоегѡ̀, пребл҃га́ѧ, не то́кмѡ бо ѿ вра̑гъ внѣ́шнихъ ѡ҆гражда́еши, но и҆ ѿ клеветы̀ человѣ́ческїѧ и҆ ко́зней лꙋка́выхъ дꙋхѡ́въ и҆з̾има́еши молѧ́щихъ тѧ̀ и҆ взыва́ющихъ тѝ такова̑ѧ:

Ра́дꙋйсѧ, бл҃года́тнаѧ, въ лѣ́то безлѣ́тнаго породи́вшаѧ: ра́дꙋйсѧ, всенепоро́чнаѧ, млⷣнца хрⷭ҇та̀ млеко́мъ пита́вшаѧ.

Ра́дꙋйсѧ, прⷭ҇то́ле сла́вы ст҃ы́ѧ трⷪ҇цы: ра́дꙋйсѧ, бжⷭ҇твеннаѧ трапе́зо и҆ ста́мно всезлата́ѧ.

Ра́дꙋйсѧ, не́мѡщи на́шѧ дꙋшє́вныѧ и҆ тѣлє́сныѧ вѣ́дꙋщаѧ: ра́дꙋйсѧ, на ѻ҆дрѣ̀ лежа́щыѧ лѣчбо́ю мл҃твы твоеѧ̀ и҆сцѣлѧ́ющаѧ.

Ра́дꙋйсѧ, ꙗ҆́кѡ тобо́ю непра́ведное ѡ҆сꙋжде́нїе ѡ҆блича́етсѧ: ра́дꙋйсѧ, ꙗ҆́кѡ тобо́ю и҆́стина возвыша́етсѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ а҃і

Пѣ́нїе велегла́сное прино́симъ тѝ, храни́тельнице на́ша всемлⷭ҇тиваѧ, ꙗ҆́кѡ во дни̑ ско́рбныхъ ѡ҆бстоѧ́нїй и҆ бѣ́дствїй наро́дныхъ ве́лїю любо́вь къ ро́дꙋ человѣ́чꙋ ꙗ҆влѧ́еши. Ѿѻнꙋ́дꙋже ѡ҆ тебѣ̀, ꙗ҆́кѡ ѡ҆ застꙋ́пницѣ землѝ рꙋ́сскїѧ взыва́емъ во всѧ̑ времена̀: А҆ллилꙋ́їа.

І҆́косъ а҃і

Свѣтопрїе́мнаѧ свѣща̀ ꙗ҆ви́ласѧ є҆сѝ, дв҃о, хрⷭ҇тїа́нѡмъ во дни̑ гоне́нїѧ на цр҃ковь рꙋ́сскꙋю, є҆гда̀ мнѡ́ги ст҃ы̑ни рꙋка́ми безбо́жныхъ ѿѧ̑ты ѿ вѣ́рныхъ бы́ша: ѻ҆ба́че вѣ́рꙋ и҆з̾ серде́цъ молѧ́щихсѧ и҆сто́ргнꙋти никто́же возмо́же: сегѡ̀ ра́ди новомч҃нцы и҆ и҆сповѣ̑дницы, мꙋ̑ки лю̑тыѧ ѿ бг҃обо́рныхъ терпѧ́ще мꙋ́жественнѡ, взыва́ша тѝ:

Ра́дꙋйсѧ, же́зле а҆арѡ́новъ, прозѧ́бшїй нетлѣ́нїе: ра́дꙋйсѧ, лѣ́ствице і҆а́кѡвлѧ, є҆́юже сни́де бг҃ъ.

Ра́дꙋйсѧ, ꙗ҆́кѡ крⷭ҇то́мъ сн҃а твоегѡ̀ низложи́сѧ а҆́дъ: ра́дꙋйсѧ, ꙗ҆́кѡ ѿ мꙋче́нїѧ вѣ́чнагѡ тобо́ю свободи́хомсѧ.

Ра́дꙋйсѧ, за хрⷭ҇та̀ страда̑нїѧ прїе́млющымъ превели́каѧ помо́щнице: ра́дꙋйсѧ, ꙗ҆́кѡ тобо́ю страда̑нїѧ превозмога́юще, вы́шнїѧ ра́дости и҆сполнѧ́емсѧ.

Ра́дꙋйсѧ, ꙗ҆́кѡ заблꙋ́ждшыѧ и҆ ѿча̑ѧнныѧ ѿ поги́бели тобо́ю и҆збавлѧ́ютсѧ: ра́дꙋйсѧ, ꙗ҆́кѡ тобо́ю є҆стество̀ человѣ́ческое нбⷭ҇ныѧ сла́вы сподоблѧ́етсѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ в҃і

Бл҃года́ть ѿ і҆кѡ́ны твоеѧ̀ и҆злива́етсѧ ѻ҆би́льнѡ, приснодв҃о, ꙗ҆́кѡ пи́санными со ѻ҆́браза твоегѡ̀ свѣ́нскагѡ и҆з̾ѡбражє́нїи ѡ҆сщ҃а́еши странꙋ̀ рѡссі́йскꙋю, и҆́миже сто́льный гра́дъ москва̀, и҆ ꙗ҆росла́вль, и҆ и҆ні́и гра́ды красꙋ́ютсѧ, и҆ да́льнѧѧ сиби́рскаѧ страна̀ ра́дꙋетсѧ, и҆мꙋ́щи тѧ̀ покрови́тельницꙋ. Тѣ́мже ᲂу҆̀бо во всѣ́хъ концѣ́хъ землѝ на́шеѧ велича́емъ тѧ̀, возносѧ́ще пѣ́снь бг҃ꙋ: А҆ллилꙋ́їа.

І҆́косъ в҃і

Пою́ще млⷭ҇ти и҆ чꙋдеса̀ твоѧ̑, приснодв҃о, ꙗ҆влє́ннаѧ во ѻ҆би́тели свѣ́нстѣй ѿ лѣ́тъ дре́внихъ и҆ до ны́нѣ, съ вѣ́рою припа́даемъ пред̾ новопи́саннымъ чтⷭ҇ны́мъ ѻ҆́бразомъ твои́мъ во ѻ҆би́тели возрожде́ннѣй, ꙗ҆́кѡ и҆сцѣлє́нїѧ да́рꙋеши ѻ҆би́льнѡ, и҆ болѣ̑зни всѧ̑кїѧ врачꙋ́еши, и҆ просвѣща́еши, и҆ сп҃са́еши всѣ́хъ, призыва́ющихъ тѧ̀ и҆ вопїю́щихъ тѝ такова̑ѧ:

Ра́дꙋйсѧ, держа́внаѧ мі́ра застꙋ́пнице: ра́дꙋйсѧ, держа́вы на́шеѧ нбⷭ҇наѧ влⷣчце.

Ра́дꙋйсѧ, ѡ҆бра́дованнаѧ, мі́рꙋ вѣ́сть бл҃гꙋ́ю ꙗ҆ви́вшаѧ: ра́дꙋйсѧ, всесвѣ́тлаѧ пала́то всѣ́ми влⷣчествꙋющагѡ.

Ра́дꙋйсѧ, ꙗ҆́кѡ сла́ва ди́вныѧ і҆кѡ́ны свѣ́нскїѧ вѣ́дома все́й землѝ рꙋ́сской: ра́дꙋйсѧ, пи̑санныѧ съ неѧ̀ ѻ҆́бразы чꙋдесы̀ мно́гими просла́вившаѧ.

Ра́дꙋйсѧ, сохрани́ти странꙋ̀ на́шꙋ ѿ междоꙋсо́бныѧ бра́ни бг҃а ᲂу҆молѧ́ющаѧ: ра́дꙋйсѧ, ѡ҆мофо́ромъ свои́мъ зе́млю рꙋ́сскꙋю покрыва́ющаѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ г҃і

ѽ всест҃а́ѧ мт҃и бж҃їѧ, дв҃о пренепоро́чнаѧ, ны́нѣшнее прїимѝ приноше́нїе на́ше, и҆ къ сн҃ꙋ твоемꙋ̀ вознесѝ мл҃твꙋ ѡ҆ на́съ недосто́йныхъ, да ѿ напра́сныѧ поги́бели и҆ всѧ́кїѧ ско́рби и҆зба́витъ на́съ, вопїю́щихъ ѡ҆ тебѣ̀ съ любо́вїю: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆рха́гг҃ломъ гаврїи́ломъ воспита́ннаѧ во ст҃а̑ѧ ст҃ы́хъ, бг҃оѻтрокови́це, ст҃ости и҆ бл҃голѣ́пїѧ цр҃ко́внагѡ во страна́хъ хрⷭ҇тїа́нскихъ ревни́тельница быва́еши. Чрез̾ і҆кѡ́нꙋ твою̀ пече́рскꙋю мнѡ́гаѧ чꙋдеса̀ во гра́дѣ кі́евѣ ꙗ҆ви́вшаѧ, по́слѣжде въ зе́млю брѧ́нскꙋю по проше́нїю бл҃говѣ́рнагѡ кнѧ́зѧ рѡма́на, слѣпото́ю недꙋ́гꙋющагѡ, съ по́честьми ѿпра́виласѧ є҆сѝ. Ѻ҆тцы́ же пече́рстїи, провожда́юще ѻ҆́бразъ тво́й, воспѣ́ша тѝ такова̑ѧ:

Ра́дꙋйсѧ, непоро́чнаѧ, ѿ првⷣныхъ і҆ѡакі́ма и҆ а҆́нны ро́ждшаѧсѧ: ра́дꙋйсѧ, цр҃и́це всебл҃га́ѧ, сп҃се́нїе всемꙋ̀ мі́рꙋ ꙗ҆ви́вшаѧ.

Ра́дꙋйсѧ, зе́млю рꙋ́сскꙋю во ᲂу҆дѣ́лъ себѣ̀ и҆збра́вшаѧ: ра́дꙋйсѧ, ѻ҆би́тели пече́рскїѧ ст҃а́ѧ покрови́тельнице.

Ра́дꙋйсѧ, нача́льникѡмъ и҆́ноческагѡ житїѧ̀ а҆нтѡ́нїю и҆ ѳеодо́сїю въ трꙋдѣ́хъ помо́щнице: ра́дꙋйсѧ, і҆кѡ̑ны, пи̑санныѧ и҆збра́нникомъ бж҃їимъ а҆лѵ́пїемъ, чꙋдесы̀ просла́вившаѧ.

Ра́дꙋйсѧ, ко гра́дꙋ брѧ́нскꙋ ѻ҆́бразъ сво́й чꙋ́дный въ лодїѝ прове́дшаѧ: ра́дꙋйсѧ, мѣ́сто но́выѧ ѻ҆би́тели въ низо́вїи свѣ́ны рѣкѝ ᲂу҆каза́вшаѧ.

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Конда́къ а҃

И҆збра́ннѣй ѿ всѣ́хъ родѡ́въ пречⷭ҇тѣй дв҃ѣ мр҃і́и и҆ мт҃ри бг҃а на́шегѡ соста́вимъ похвалꙋ̀. Ты́ же, влⷣчце, ꙗ҆́кѡ зе́млю рꙋ́сскꙋю под̾ сво́й покро́въ прїи́мшаѧ и҆ ѻ҆би́тєли и҆́ночєскїѧ і҆кѡ́нами чꙋдотво́рными ᲂу҆краси́вшаѧ, сохранѝ ѻ҆би́тель твою̀ и҆ сп҃сѝ всѣ́хъ на́съ, да зове́мъ тѝ:

Ра́дꙋйсѧ, прест҃а́ѧ бцⷣе дв҃о, свѣ́нскаѧ похвало̀ и҆ на́ше при́сное ᲂу҆тѣше́нїе.

Моли́твы

ѽ всемлⷭ҇тиваѧ мт҃и, пречⷭ҇таѧ дв҃о бцⷣе, возбра́ннаѧ воево́до правосла́вныхъ! Бл҃года́рнымъ се́рдцемъ и҆ ᲂу҆сты̀ славосло́вимъ тѧ̀ при́снѡ пред̾ свѣ́нскою і҆кѡ́ною твое́ю, ю҆́же ꙗ҆́кѡ бжⷭ҇твенное ᲂу҆краше́нїе цр҃кве рꙋ́сскїѧ и҆ зало́гъ млⷭ҇ти твоеѧ̀ вѣ̑рнымъ лю́демъ дарова́ла є҆сѝ. Се́ю бо і҆кѡ́ною бл҃года́ть бж҃їю, правосла́внѣй цр҃кви присꙋ́щꙋю, ꙗ҆влѧ́еши, є҆гда̀ то́чиши и҆сцѣлє́нїѧ, напа́стей и҆збавлѧ́еши, бѣсѡ́въ прогонѧ́еши, нашє́ствїѧ и҆ноплеме́нныхъ ѿража́еши.

Тѣ́мже прилѣ́жнѡ мо́лимъ ти сѧ, бг҃омт҃и: проба́ви и҆ на прє́днѧѧ вели̑кїѧ млⷭ҇ти твоѧ̑ любо́вїю чтꙋ́щымъ тѧ̀, правосла́вїе ᲂу҆твердѝ, ѿпа́дшыѧ ѿ пра́выѧ вѣ́ры къ позна́нїю и҆́стины напра́ви и҆ ᲂу҆ста̀ нечести́выхъ, хꙋ́лѧщихъ ст҃ꙋ́ю цр҃ковь, заградѝ.

Ѻ҆те́чествꙋ на́шемꙋ ми́ръ и҆ на врагѝ побѣ̑ды да́рꙋй, ѡ҆градѝ на́съ ѿ нахожде́нїѧ сꙋпоста̑тъ, междоꙋсо́бныѧ бра́ни и҆ всѧ́кагѡ ѕла̀, па́че же ѿ дꙋшегꙋби́тельныхъ страсте́й свободѝ, во є҆́же ᲂу҆мре́ти мі́рꙋ и҆ жи́ти сн҃ꙋ и҆ бг҃ꙋ твоемꙋ̀ въ соблюде́нїи за́повѣдей є҆гѡ̀. И҆ сподо́би на́съ, предста́тельнице на́ша непосты́днаѧ, на стра́шнѣмъ сꙋдѣ̀ ѡ҆деснꙋ́ю прⷭ҇то́ла бж҃їѧ ста́ти и҆ съ ли̑ки а҆́гг҃лѡвъ и҆ ст҃ы́хъ та́мѡ восхвалѧ́ти пречтⷭ҇но́е и҆́мѧ сн҃а твоегѡ̀, со безнача́льнымъ є҆гѡ̀ ѻ҆ц҃е́мъ и҆ прест҃ы́мъ дх҃омъ во вѣ́ки. А҆ми́нь.