Православный календарь
Размер шрифта:

Ака́ѳістъ

А҆ка́ѳїстъ мч҃никѡмъ флѡ́рꙋ и҆ ла́ѵрꙋ.

Мчч. Флора и Лавра, Иллирийских и иже с ними (II) 31 августа 2026

Конда́къ а҃

И҆збра́ннꙋю дво́ицꙋ пресвѣ́тлꙋю, хрⷭ҇тꙋ̀ спострада́вшꙋю да́же до кро́ве, флѡ́ра пребл҃же́ннагѡ и҆ ла́ѵра всечⷭ҇тна́гѡ, въ пѣ́снехъ, вѣ́рнїи, почти́мъ дꙋхо́вныхъ и҆, ꙗ҆́кѡ мл҃твами си́хъ ѿ бѣ́дъ и҆збавлѧ́еми, бл҃года́рственнѡ вопїе́мъ, зовꙋ́ще:

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

І҆́косъ а҃

А҆́гг҃льстїи чи́ни ꙗ҆́кѡ слико́вники прїѧ́ша вы̀, бл҃же́ннїи мч҃ницы, є҆гда̀ по страда́нїи свое́мъ прⷭ҇то́лꙋ гдⷭ҇ню предста́сте, во є҆́же со всѣ́ми, кро́вїю а҆́гнца бж҃їѧ запечатлѣ́нными, взыва́ти ѻ҆са́нна, сѣдѧ́щемꙋ на прⷭ҇то́лѣ. Мы́ же, бре́ннїи, на землѝ, ѡ҆ таково́й сла́вѣ ва́шей дивѧ́щесѧ, восхвалѧ́емъ вы̀ си́це:

Ра́дꙋйтесѧ, хрⷭ҇тꙋ̀ послѣ́довавшїи вѣ́рою: ра́дꙋйтесѧ, крⷭ҇тъ є҆гѡ̀, ꙗ҆́кѡ ꙗ҆ре́мъ, взе́мшїи.

Ра́дꙋйтесѧ, кро́вїю а҆́гнца бж҃їѧ и҆скꙋпле́ннїи: ра́дꙋйтесѧ, и҆ своеѧ̀ кро́ве хрⷭ҇та̀ ра́ди не пощадѣ́вшїи.

Ра́дꙋйтесѧ, сме́ртїю кра́сною хрⷭ҇то́ви спогре́бшїисѧ: ра́дꙋйтесѧ, жи́зни и҆сто́чникъ ѡ҆брѣ́тшїи.

Ра́дꙋйтесѧ, пꙋ́ть ᲂу҆́зкїй, приско́рбный проше́дшїи: ра́дꙋйтесѧ, ꙗ҆́кѡ ѿверзо́шасѧ ва́мъ ра́йскїѧ двє́ри.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ в҃

Ви́дѧще, ꙗ҆́кѡ мно́га мзда̀ на нбⷭ҇ѣ́хъ дана̀ ст҃ы́мъ страстоте́рпцємъ, потщи́мсѧ, вѣ́рнїи, тѣ́хъ житїѐ земно́е приле́жнѡ разсмотрѣ́вше, ѿ сегѡ̀ наꙋчи́тисѧ, коли́ко мо́жетъ вѣ́ра, дѣѧ́ньми споспѣшествꙋ́ема, ка́кѡ воздвиза́етъ ѿ земны́хъ къ нбⷭ҇нымъ и҆ ка́кѡ наꙋча́етъ взыва́ти бг҃ꙋ: А҆ллилꙋ́їа.

І҆́косъ в҃

Ра́зꙋмъ бжⷭ҇твенный ѡ҆зарѝ вы̀, флѡ́ре и҆ ла́ѵре, є҆гда̀ бл҃гоче́стїѧ храни́тели про́клъ и҆ маѯі́мъ не то́кмѡ каменосѣ́чнѣй хи́трости вы̀ наꙋчи́ша, но и҆ на ка́мени вѣ́ры хрⷭ҇то́вой до́брѣ ᲂу҆тверди́ша, на не́мже несокрꙋши́ми да́же до конца̀ пребы́сте, трꙋдолю́бнѡ гдⷭ҇еви рабо́тающе, сегѡ̀ ра́ди ᲂу҆бл҃жа́емъ вы̀, зовꙋ́ще.

Ра́дꙋйтесѧ, въ трꙋдѣ́хъ ѿ ю҆́ности воспита́ннїи: ра́дꙋйтесѧ, хрⷭ҇тꙋ̀ себѣ̀ порабо́тившїи.

Ра́дꙋйтесѧ, лѣ́ность дале́че ѿгна́вшїи: ра́дꙋйтесѧ, да́нный ва́мъ тала́нтъ мно́гѡ ᲂу҆сꙋгꙋби́вшїи.

Ра́дꙋйтесѧ, ра́бства пло́ти и҆збѣ́гшїи: ра́дꙋйтесѧ, дꙋ́хомъ гдⷭ҇еви рабо́тавшїи.

Ра́дꙋйтесѧ, трꙋдолю́бцєвъ ᲂу҆добре́нїе: ра́дꙋйтесѧ, лѣни́выхъ ᲂу҆коре́нїе.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ г҃

Си́ла вы́шнѧгѡ подви́же прави́телѧ страны̀ нѣ́кїѧ призва́ти дѣ́лателей ст҃ы́хъ ко ᲂу҆строе́нїю хра́ма і҆́дѡльскагѡ, ка́пищꙋ бо семꙋ̀ соѻрꙋжа́емꙋ бы́вшꙋ, и҆ны́й хра́мъ нерꙋкотворе́нный созида́шесѧ: лю́дїе страны̀ тоѧ̀, флѡ́ра и҆ ла́ѵра про́повѣдїю наꙋче́ннїи, и҆́стиннагѡ бг҃а позна́ша и҆ томꙋ̀ є҆ди́номꙋ пѣ́ти навыко́ша: А҆ллилꙋ́їа.

І҆́косъ г҃

И҆мꙋ́ще тве́рдꙋю вѣ́рꙋ въ сердца́хъ свои́хъ, небоѧ́зненнѡ ѿыдо́ша бг҃оно́снїи бра́тїѧ во и҆́нꙋ странꙋ̀ на дѣ́ланїе чꙋ́ждое, и҆, по ма́лѣ вре́мени, въ трꙋ́дъ а҆пⷭ҇лѡвъ ѡ҆брати́сѧ дѣ́ланїе и҆̀хъ: лю́дїе, во тмѣ̀ и҆ сѣ́ни сме́ртнѣй сѣдѧ́щїи, свѣ́томъ є҆ѵⷢ҇лїа ѡ҆зари́шасѧ, є҆́же каменосѣ́чцы бг҃омꙋ́дрїи съ собо́ю принесо́ша. Сегѡ̀ ра́ди воспое́мъ си́хъ, зовꙋ́ще:

Ра́дꙋйтесѧ, ꙗ҆зы́кѡвъ просвѣти́тели: ра́дꙋйтесѧ, а҆пⷭ҇лѡвъ подража́тели.

Ра́дꙋйтесѧ, є҆ѵⷢ҇лїа хрⷭ҇то́ва провозвѣ́стницы: ра́дꙋйтесѧ, на ни́вѣ неѡра́ннѣй гдⷭ҇ни рабо́тницы.

Ра́дꙋйтесѧ, въ лю́дѣхъ тѧ́жцѣхъ гдⷭ҇а восхвали́вшїи: ра́дꙋйтесѧ, во ꙗ҆зы́цѣхъ сла́вꙋ є҆гѡ̀ возвѣсти́вшїи.

Ра́дꙋйтесѧ, цр҃кве прекра́сное прозѧбе́нїе: ра́дꙋйтесѧ, нбⷭ҇ныхъ садѡ́въ лѣтора́сленное ᲂу҆краше́нїе.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ д҃

Бꙋ́рю ѕло́бы неи́стовыѧ воздви́же на вы̀ мемерті́нъ, і҆́дѡльскїй жре́цъ, є҆гда̀ сы́нꙋ є҆гѡ̀, на дѣ́ланїе ва́ше неѻпа́снѡ взира́вшꙋ, ѻ҆́ко ка́менцємъ, внеза́пꙋ ѿто́ргшимсѧ, и҆збоде́сѧ, и҆ хꙋлы̀ мно́ги ѿрыга́хꙋ на вы̀, дѣ́лателїе неѕло́бивїи, ᲂу҆ста̀ є҆щѐ не вѣ́дѣвшагѡ пѣ́ти: А҆ллилꙋ́їа.

І҆́косъ д҃

Слы́шавше хꙋле́нїѧ мно́га и҆ пристра́шїѧ свирѣ́па мемерті́на ѡ҆ѕло́бленнаго, без̾ стра́ха прїѧ́ша сїѧ̀ кро́тцѣ флѡ́ръ же и҆ ла́ѵръ и҆, сострада́нїѧ и҆спо́лнени бы́вше, ве́лїе дерзнове́нїе вѣ́ры проѧви́ша, є҆гда̀ ѻ҆́трока ᲂу҆ра́нена цѣ́ла и҆ здра́ва ѻ҆тцꙋ̀ предпоста́вити ѡ҆бѣща́ша: мы́ же, таковѣ́й вѣ́рѣ, кро́тости и҆ ᲂу҆пова́нїю ст҃ы́хъ дивѧ́щесѧ, воспое́мъ и҆́мъ та́кѡ.

Ра́дꙋйтесѧ, равноа́гг҃льныѧ кро́тости воплоще́нїе: ра́дꙋйтесѧ, ве́лїѧ вѣ́ры и҆справле́нїе.

Ра́дꙋйтесѧ, ѕлосло́вѧщагѡ вы̀ бл҃гослови́вшїи: ра́дꙋйтесѧ, кленѧ́щемꙋ ва́съ бл҃готвори́вшїи.

Ра́дꙋйтесѧ, на бг҃а, помо́щника и҆ защи́тника, ᲂу҆пова́вшїи: ра́дꙋйтесѧ, прибѣ́жище и҆ ᲂу҆твержде́нїе въ бз҃ѣ полага́вшїи.

Ра́дꙋйтесѧ, въ неѕло́бїи пред̾ гдⷭ҇емъ ходи́вшїи: ра́дꙋйтесѧ, во ᲂу҆пова́нїи на негѡ̀ николи́же и҆знемо́гшїи.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ є҃

Бг҃отє́чныѧ ѕвѣ̑зды ꙗ҆ви́стесѧ, ст҃і́и, ю҆́ноше томꙋ̀, є҆мꙋ́же ᲂу҆ло́мкомъ ка́мене ѻ҆́ко плотско́е и҆збоде́нѡ бы́сть: ва́съ бо держа́йсѧ, не то́кмѡ ѿ ра́ны и҆сцѣлѣ̀, но и҆ ѻ҆чесы̀ дꙋхо́вными прозрѣ̀, проповѣ́данїемъ ва́шимъ наꙋче́нъ, и҆́стиннагѡ бг҃а позна̀ и҆ томꙋ̀ въ ра́дости возопѝ: А҆ллилꙋ́їа.

І҆́косъ є҃

Ви́дѧ чꙋ́до ве́лїе, въ сы́нѣ ꙗ҆вле́нное, и҆ ѻ҆те́цъ є҆гѡ̀ мемерті́нъ є҆мꙋ̀ спослѣ́дова, і҆́дѡльскꙋю пре́лесть ѿве́ргъ, бг҃а и҆́стинна, ꙗ҆́кѡ же и҆ сы́нъ, позна̀ и҆ по и҆сповѣ́данїи до́брѣмъ дво́ице пресла́вныхъ мч҃никъ спострада̀, ю҆́же и҆ мы̀ ны́нѣ воспѣва́емъ, зовꙋ́ще:

Ра́дꙋйтесѧ, чꙋдотво́рцы преди́внїи: ра́дꙋйтесѧ, вра́чеве дꙋхо́внїи.

Ра́дꙋйтесѧ, і҆́дѡльскꙋю пре́лесть чꙋдесы̀ ниспрове́ргшїи: ра́дꙋйтесѧ, неразꙋ́мныхъ дꙋ́ши свѣ́томъ вѣ́ры ѡ҆зари́вшїи.

Ра́дꙋйтесѧ, і҆́дѡльскагѡ жреца̀ ѿ і҆дѡлобѣ́сїѧ ѿврати́вшїи и҆ хрⷭ҇тꙋ̀ сочета́вшїи: ра́дꙋйтесѧ, и҆ сы́на є҆гѡ̀ и҆з̾ вра́жескихъ сѣте́й и҆звле́кшїи.

Ра́дꙋйтесѧ, де́монѡвъ ѡ҆горче́нїе: ра́дꙋйтесѧ, а҆́гг҃лѡвъ ра́дованїе.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ ѕ҃

Проповѣ́дницы любвѐ и҆́стинныѧ ꙗ҆ви́шасѧ ст҃і́и мч҃ницы, є҆гда̀ при дѣ́ланїи свое́мъ цѣ́нꙋ, за трꙋ́дъ взе́млемꙋю, ни́щимъ раздава́хꙋ и҆, а҆́лчꙋщихъ дово́льнѡ пита́юще, са́ми въ постѣ̀ и҆ лише́нїи не сѣ́тꙋюще пребыва́хꙋ, бо́дрственнѣ воспѣва́юще бг҃ꙋ: А҆ллилꙋ́їа.

І҆́косъ ѕ҃

Возсїѧ̀ свѣ́тъ неизрече́нныѧ сла́вы нбⷭ҇ныѧ и҆ ѡ҆зарѝ хра́мъ, рꙋка́ми флѡ́ра и҆ ла́ѵра созда́нный, и҆ не ꙗ҆́кѡ і҆́дѡлѡвъ вмѣсти́лище, но во сла́вꙋ и҆́мени і҆и҃са хрⷭ҇та̀ ѡ҆сщ҃е́нный, лю́дїе же, свѣ́тъ то́й ви́дѣвше, всѧ̑ кꙋмі́ры і҆́дѡльскїѧ, длѧ хра́ма тогѡ̀ ᲂу҆гото́ванныѧ, сокрꙋ́шше, храмозда́телємъ взыва́хꙋ си́це:

Ра́дꙋйтесѧ, свѣ́томъ бг҃оразꙋ́мїѧ на́съ ѡ҆зари́вшїи: ра́дꙋйтесѧ, мра́къ і҆дѡлослꙋже́нїѧ разсѣ́ѧвшїи.

Ра́дꙋйтесѧ, ѿ ѡ҆бдержа́щїѧ пре́лести ны̀ свободи́вшїи: ра́дꙋйтесѧ, пꙋ́ть жи́зни и҆́стинныѧ на́мъ показа́вшїи.

Ра́дꙋйтесѧ, ꙗ҆́кѡ бл҃гоꙋха́нїѧ чтⷭ҇на́гѡ цр҃ковь и҆спо́лнисте: ра́дꙋйтесѧ, ꙗ҆́кѡ ѕлосмра́дїе вра́жїе дале́че ѿгна́сте.

Ра́дꙋйтесѧ, бѣсѡ́въ дерзнове́нное пораже́нїе: ра́дꙋйтесѧ, бг҃ꙋ кра́сное присвое́нїе.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ з҃

Хотѧ́щимъ бра́тїѧмъ ст҃ы̑мъ по сконча́нїи дѣ́ланїѧ, на не́же зва́ни бы́ша, ми́рнѡ во своѧ̑ ѿитѝ, возбранѝ и҆́мъ работода́вецъ жесто́кїй: свѧза́въ бо и҆̀хъ и҆ би́въ, ꙗ҆́кѡ ѕлодѣ̑и къ прави́телю лѷкїѡ́нꙋ ѿведѐ, занѐ хрⷭ҇та̀ ꙗ҆́кѡ бг҃а и҆сповѣ́дахꙋ и҆ лю́ди наꙋчи́ша взыва́ти є҆мꙋ̀: А҆ллилꙋ́їа.

І҆́косъ з҃

Нѡ́ваѧ и҆ лю̑таѧ мꙋчє́нїѧ ᲂу҆гото́ва ва́мъ, страстоте́рпцы ст҃і́и, прави́тель, є҆гда̀ возврати́стесѧ свѧ́заннїи и҆ ра̑ны за хрⷭ҇та̀ прїи́мшїи во странꙋ̀ свою̀, тве́рдости же вѣ́ры ва́шеѧ ѿню́дъ не поколеба̀, мы́ же, терпѣ́нїе ва́ше ᲂу҆бл҃жа́юще, взыва́емъ къ ва́мъ си́це.

Ра́дꙋйтесѧ, хрⷭ҇то́ви спотерпѣ́вшїи: ра́дꙋйтесѧ, съ ни́мъ и҆ воцари́вшїисѧ.

Ра́дꙋйтесѧ, въ терпѣ́нїи дꙋ́ши ва̑ша стѧжа́вшїи: ра́дꙋйтесѧ, ѻ҆бѣтова́нїе, є҆́же на нб҃сѣ́хъ, прїи́мшїи.

Ра́дꙋйтесѧ, на нача́льника вѣ́ры и҆ соверши́телѧ, гдⷭ҇а і҆и҃са, взира́вшїи: ра́дꙋйтесѧ, на предлежа́вшїй ва́мъ по́двигъ до́брѣ восте́кшїи.

Ра́дꙋйтесѧ, малодꙋ́шныхъ ѡ҆бодре́нїе: ра́дꙋйтесѧ, стра́ждꙋщихъ ᲂу҆тѣше́нїе.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ и҃

Стра́ннꙋю и҆ ᲂу҆жа́снꙋю сме́рть и҆зѡбрѣ́те людско́е жестокосе́рдїе кротча́йшимъ бра́тїѧмъ флѡ́рꙋ и҆ ла́ѵрꙋ: въ кладене́цъ бо безво́дный вве́ржени и҆ земле́ю въ не́мъ посы́пани бы́ша: та́кѡ мнѧ́хꙋ нечести́вїи заглꙋши́ти ст҃ы́хъ гла́съ, къ бг҃ꙋ вопїю́щихъ: А҆ллилꙋ́їа.

І҆́косъ и҃

Ве́сь мі́ръ не бѣ̀ досто́инъ ва́съ, мч҃ницы ст҃і́и: вы́ бо, на землѝ себѣ̀ мѣ́ста не ѡ҆брѣ́тше, въ нбⷭ҇наѧ пресели́вшесѧ и҆ ꙗ҆́кѡ и҆́стиннїи гра́ждане та́мѡ ѻ҆те́чествїе сниска́вше, непреста́нными бл҃гохвале́нїи цр҃ю̀ своемꙋ̀ и҆ гдⷭ҇ꙋ слꙋ́жите: восхва́лимъ ᲂу҆́бѡ и҆ мы̀ си́хъ бг҃охвалѧ́щихъ похвалє́нїи сицевы́ми.

Ра́дꙋйтесѧ, ѡ҆ земны́хъ небре́гшїи: ра́дꙋйтесѧ, на нбⷭ҇наѧ ᲂу҆́мъ сво́й впери́вшїи.

Ра́дꙋйтесѧ, но́щь житїѧ̀ земна́гѡ до́брѣ преше́дшїи: ра́дꙋйтесѧ, днѐ невече́рнѧгѡ црⷭ҇тва хрⷭ҇то́ва дости́гшїи.

Ра́дꙋйтесѧ, ꙗ҆́кѡ ѕла́то, въ горни́лѣ мꙋче́нїй и҆скꙋше́ннїи: ра́дꙋйтесѧ, ꙗ҆́кѡ всепло́дїе же́ртвенное бг҃омъ прїѧ́тїи.

Ра́дꙋйтесѧ, пред̾ лице́мъ чл҃вѣ́ческимъ мꙋ́ки прїѧ́вшїи: ра́дꙋйтесѧ, ꙗ҆́кѡ ᲂу҆пова́нїе ва́ше безсме́ртїѧ и҆спо́лненѡ.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ ѳ҃

Всѧ́къ, и҆́же и҆сповѣ́сть мѧ̀ пред̾ чл҃вѣ́ки, и҆сповѣ́мъ є҆гѡ̀ и҆ а҆́зъ пред̾ ѻ҆ц҃е́мъ мои́мъ, речѐ гдⷭ҇ь: по гдⷭ҇ню семꙋ̀ словесѝ и҆ вы̀, страстоте́рпцы флѡ́ре и҆ ла́ѵре, ꙗ҆́кѡ до́блїи хрⷭ҇то́ви и҆сповѣ́дницы, пред̾ ѻ҆ц҃е́мъ нбⷭ҇нымъ просла́влени є҆стѐ и҆ со всѣ́ми ст҃ы́ми вы́нꙋ зове́те ст҃ѣ́й трⷪ҇цѣ: А҆ллилꙋ́їа.

І҆́косъ ѳ҃

Вѣті́йство мі́ра сегѡ̀ не мо́жетъ и҆зрещѝ вели́чїе по́двига страстоте́рпцєвъ ст҃ы́хъ, ꙗ҆́коже и҆ премꙋ́дрость вѣ́ка сегѡ̀ сло́ва крⷭ҇тнагѡ вмѣсти́ти ника́коже мо́жетъ: мы́ же, смире́ннїи, бꙋ́йствомъ про́повѣди ѡ҆ распѧ́томъ сп҃са́еми, флѡ́ра и҆ ла́ѵра, ꙗ҆́кѡ себѣ̀ самѣ́хъ ѿве́ргшихсѧ и҆ дꙋ́ши своѧ̑ хрⷭ҇та̀ ра́ди ѿщети́вшихъ, несꙋмне́ннѡ прославлѧ́емъ, зовꙋ́ще къ ни́мъ та́кѡ.

Ра́дꙋйтесѧ, хрⷭ҇та̀ пред̾ чл҃вѣ́ки и҆сповѣ́давшїи: ра́дꙋйтесѧ, ꙗ҆́кѡ и҆ са́мъ гдⷭ҇ь и҆сповѣ́сть вы̀ пред̾ а҆́гг҃лы бж҃їи.

Ра́дꙋйтесѧ, стра́сти гдⷭ҇а і҆и҃са хрⷭ҇та̀ не ᲂу҆стыдѣ́вшїисѧ: ра́дꙋйтесѧ, ра́ди бл҃говѣ́стїѧ хрⷭ҇то́ва пострада́вшїи.

Ра́дꙋйтесѧ, ꙗ҆́кѡ по́двигъ крѣ́покъ подадѐ ва́мъ гдⷭ҇ь: ра́дꙋйтесѧ, ꙗ҆́кѡ и҆ ра́зꙋмъ ст҃ъ даде́сѧ ва́мъ ѿ вы́шнѧгѡ.

Ра́дꙋйтесѧ, ꙗ҆́кѡ и҆́скры по сте́блїю на нб҃о восте́кшїи: ра́дꙋйтесѧ, во вре́мѧ посѣще́нїѧ ва́шегѡ до́брѣ возсїѧ́вшїи.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ і҃

Сп҃се́нїю на́шемꙋ хода́таи мо́лимъ ва́съ бы́ти, ст҃і́и мч҃ницы, до́брѣ страда́вшїи и҆ вѣнча́вшїисѧ, и҆ тогѡ̀ ра́ди блгⷣть прїи́мшїи: ѡ҆ на́съ моли́тесѧ, да, и҆зба́вльшесѧ ѿ сꙋ́етныѧ рабо́ты вра́жїѧ, бл҃года́рственнѡ вопїе́мъ бг҃ꙋ: А҆ллилꙋ́їа.

І҆́косъ і҃

Стѣ́нъ ка́менныхъ зда́тели и҆ногда̀ бы́вше, вѣ́ры же тве́рдостїю, многоразли́чныхъ мꙋ́къ и҆ лю́тыѧ сме́рти за хрⷭ҇та̀ претерпѣ́нїемъ ве́лїе дерзнове́нїе ᲂу҆ негѡ̀ сниска́вше, мо́лѧтсѧ ны́нѣ ѡ҆ чтꙋ́щихъ па́мѧть и҆̀хъ вѣ́рнѡ, и҆ въ бѣда́хъ многоразли́чныхъ и҆ напа́стѣхъ ѡ҆сѣнѧ́ютъ наде́жнѡ пою́щихъ и҆́мъ си́це:

Ра́дꙋйтесѧ, цр҃кве хрⷭ҇то́вы столпѝ непоколеби́мїи: ра́дꙋйтесѧ, вѣ́ры хрⷭ҇тїа́нскїѧ ѡ҆гражде́нїе тве́рдое.

Ра́дꙋйтесѧ, въ вѣ́рѣ коле́блемымъ ᲂу҆твержде́нїе крѣ́пкое: ра́дꙋйтесѧ, въ мо́ри напа́стей ги́бнꙋщимъ приста́нище наде́жное.

Ра́дꙋйтесѧ, фїа́ли ѕлаті́и, ѳѷмїа́ма мл҃твъ и҆спо́лненнїи: ра́дꙋйтесѧ, смра́дныѧ стра́сти дале́чѣ ѿ на́съ прогонѧ́ющїи.

Ра́дꙋйтесѧ, те́плїи къ бг҃ꙋ мл҃твенницы: ра́дꙋйтесѧ, преи́стиннїи хода́таи.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ а҃і

Пѣ́нїе неꙋмо́лчнѡ и҆ ли́ки свѣ́тлы и҆спо́лниша ца́рскїй гра́дъ, є҆гда̀ по ѡ҆брѣ́тенїи принесе́ни и҆ чⷭ҇тнѡ положе́ни въ не́мъ бы́ша многоцѣле́бнїи мо́щи ва́ша, ст҃і́и мч҃ницы флѡ́ре и҆ ла́ѵре, ѿ ни́хже мно́зи цѣльбꙋ̀ чꙋ́днꙋ прїи́мше, бл҃года́рнѡ поѧ́хꙋ бг҃ꙋ: А҆ллилꙋ́їа.

І҆́косъ а҃і

Свѣ́томъ невеще́ственнымъ ѡ҆блиста́еми, въ селе́нїихъ ст҃ы́хъ водворѧ́еми и҆ ра́дости неизрече́нныѧ и҆сполнѧ́еми, ликꙋ́ете ны́нѣ со а҆́гг҃лы свѣ́тло, мч҃ницы гдⷭ҇ни: ѡ҆свѣти́те и҆ на́съ, мра́комъ сꙋ́етствїй покрыва́емыхъ, ѕло́бою мі́ра сегѡ̀ ѡ҆ѕлоблѧ́емыхъ и҆ є҆ди́нꙋ то́кмѡ ѿра́дꙋ и҆мꙋ́щихъ, є҆́же къ ва́мъ прибѣга́ти и҆ си́це вы̀ воспѣва́ти.

Ра́дꙋйтесѧ, мглꙋ̀ пре́лести разгна́вшїи: ра́дꙋйтесѧ, безбо́жїѧ но́щь ѡ҆свѣти́вшїи.

Ра́дꙋйтесѧ, ненавидѣ́нїемъ непрвⷣнымъ возненави́дѣннїи на землѝ: ра́дꙋйтесѧ, въ ра́дость гдⷭ҇а вше́дшїи на нб҃сѝ.

Ра́дꙋйтесѧ, скорбьмѝ мно́гими живо́тъ вѣ́чный наслѣ́дствовавшїи: ра́дꙋйтесѧ, въ ско́рбѣхъ и҆ тѣснота́хъ сꙋ́щимъ ᲂу҆тѣше́нїе ѿ дх҃а ст҃а просѧ́щїи.

Ра́дꙋйтесѧ, ѕвѣ̑зды, блиста́нїѧ терпѣ́нїѧ и҆спꙋща́ющїѧ: ра́дꙋйтесѧ, свѣти̑ла, вѣ́рныхъ дꙋ́ши просвѣща́ющїѧ.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ в҃і

Блгⷣть вели́ка дана̀ є҆́сть ѿ вы́шнѧгѡ ва́мъ, до́блїи страда́льцы, ꙗ҆́кѡ прише́дшимъ ѿ ско́рби вели́кїѧ и҆ ѡ҆кропи́вшимъ въ кро́ви а҆́гнчей ри̑зы своѧ̑: сегѡ̀ ра́ди со всѣ́ми ст҃ы́ми прⷭ҇то́лꙋ бж҃їю предстоитѐ, вы́нꙋ зовꙋ́ще: А҆ллилꙋ́їа.

І҆́косъ в҃і

Пою́ще вы̀ [во хра́мѣ ва́шемъ], хва́лимъ ва́съ, флѡ́ре и҆ ла́ѵре, ꙗ҆́кѡ бл҃гоче́стїѧ мч҃ники, въ трꙋдѣ́хъ ѿ ю҆́ности пребы́вшїѧ, вѣ́рꙋ въ трⷪ҇цꙋ нераздѣ́льнꙋю соблю́дшїѧ и҆ ко хрⷭ҇тꙋ̀ побѣ́днѡ ѿше́дшїѧ, є҆мꙋ́же ны́нѣ предстоѧ́ще, не забꙋ́дите зовꙋ́щихъ къ ва́мъ си́це.

Ра́дꙋйтесѧ, цр҃ѧ̀ нбⷭ҇нагѡ во́ини и҆зрѧ́днїи: ра́дꙋйтесѧ, вѣнцы̀ побѣ́дными до́брѣ вѣнча́ннїи.

Ра́дꙋйтесѧ, ка́менїе многоцѣ́нное въ сокро́вищахъ влⷣки нбⷭ҇нагѡ: ра́дꙋйтесѧ, бога́тство неиждива́емое цр҃кве, на землѝ во́инствꙋющїѧ.

Ра́дꙋйтесѧ, зо́дчїи, хра́мъ дх҃а бжⷭ҇твеннагѡ въ себѣ̀ самѣ́хъ ꙗ҆ви́вшїи: ра́дꙋйтесѧ, зда́тели, на недви́жимѣмъ ка́мени вѣ́ры дꙋ́ши мно́гихъ ᲂу҆тверди́вшїи.

Ра́дꙋйтесѧ, блиста́нїемъ нбⷭ҇нымъ ны́нѣ ѡ҆сїѧва́емїи: ра́дꙋйтесѧ, сꙋмра́къ мы́слей тѧ́жкихъ ѿ на́съ прогонѧ́ющїи.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ г҃і

Ѽ пресла́внаѧ мч҃никъ дво́ице флѡ́ре и҆ ла́ѵре, самобра́тное є҆дине́нїе, трⷪ҇цѣ ст҃ѣ́й чⷭ҇тно́е похвале́нїе. Ны́нѣшнее прїи́мши на́ше пѣ́нїе, моли́те гдⷭ҇а за ны̀, да и҆зба́витъ на́съ ѿ всѧ́кихъ бѣ́дъ и҆ скорбе́й, дарова́въ же на́мъ до конца̀ пребыва́нїе во ст҃ѣ́й цр҃кви свое́й, да сподо́битъ по кончи́нѣ и҆ послѣ́днѣмъ сꙋдѣ̀ съ ва́ми и҆ со всѣ́ми ст҃ы́ми воспѣва́ти бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льстїи чи́ни ꙗ҆́кѡ слико́вники прїѧ́ша вы̀, бл҃же́ннїи мч҃ницы, є҆гда̀ по страда́нїи свое́мъ прⷭ҇то́лꙋ гдⷭ҇ню предста́сте, во є҆́же со всѣ́ми, кро́вїю а҆́гнца бж҃їѧ запечатлѣ́нными, взыва́ти ѻ҆са́нна, сѣдѧ́щемꙋ на прⷭ҇то́лѣ. Мы́ же, бре́ннїи, на землѝ, ѡ҆ таково́й сла́вѣ ва́шей дивѧ́щесѧ, восхвалѧ́емъ вы̀ си́це:

Ра́дꙋйтесѧ, хрⷭ҇тꙋ̀ послѣ́довавшїи вѣ́рою: ра́дꙋйтесѧ, крⷭ҇тъ є҆гѡ̀, ꙗ҆́кѡ ꙗ҆ре́мъ, взе́мшїи.

Ра́дꙋйтесѧ, кро́вїю а҆́гнца бж҃їѧ и҆скꙋпле́ннїи: ра́дꙋйтесѧ, и҆ своеѧ̀ кро́ве хрⷭ҇та̀ ра́ди не пощадѣ́вшїи.

Ра́дꙋйтесѧ, сме́ртїю кра́сною хрⷭ҇то́ви спогре́бшїисѧ: ра́дꙋйтесѧ, жи́зни и҆сто́чникъ ѡ҆брѣ́тшїи.

Ра́дꙋйтесѧ, пꙋ́ть ᲂу҆́зкїй, приско́рбный проше́дшїи: ра́дꙋйтесѧ, ꙗ҆́кѡ ѿверзо́шасѧ ва́мъ ра́йскїѧ двє́ри.

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.

Конда́къ а҃

И҆збра́ннꙋю дво́ицꙋ пресвѣ́тлꙋю, хрⷭ҇тꙋ̀ спострада́вшꙋю да́же до кро́ве, флѡ́ра пребл҃же́ннагѡ и҆ ла́ѵра всечⷭ҇тна́гѡ, въ пѣ́снехъ, вѣ́рнїи, почти́мъ дꙋхо́вныхъ и҆, ꙗ҆́кѡ мл҃твами си́хъ ѿ бѣ́дъ и҆збавлѧ́еми, бл҃года́рственнѡ вопїе́мъ, зовꙋ́ще:

Ра́дꙋйтесѧ, флѡ́ре и҆ ла́ѵре, раѧ̀ хрⷭ҇то́ва цвѣ́ти прекра́снїи.