Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ въ че́сть є҆ѧ̀ і҆кѡ́ны, и҆менꙋ́емыѧ донска́ѧ.

Донской иконы Божией Матери 1 сентября 2026

Конда́къ а҃

Взбра́ннѣй воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ, бцⷣе, но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

І҆́косъ а҃

А҆рха́гг҃ла бл҃говѣ́стїе слы́шавши пречⷭ҇таѧ, кро́тостїю прїѧ́тъ во́лю гдⷭ҇а своегѡ̀ и҆ во смире́нїи се́рдца ѿвѣща̀: сѐ раба̀ гдⷭ҇нѧ, бꙋ́ди мнѣ̀ по глаго́лꙋ твоемꙋ̀. Мы́ же дивѧ́щесѧ, ка́кѡ сн҃ъ бж҃їй сн҃ъ дв҃ы быва́етъ, съ гаврїи́ломъ бл҃года́тнꙋю пѣ́сньми си́ми почита́емъ:

Ра́дꙋйсѧ, ѻ҆трокови́це, ѿ всѣ́хъ родѡ́въ бг҃омъ и҆збра́ннаѧ: ра́дꙋйсѧ, ски́нїе, дх҃омъ ст҃ы́мъ ѡ҆сѣне́ннаѧ.

Ра́дꙋйсѧ, живоно́снаѧ ѻ҆би́тель свѣ́та бжⷭ҇твеннагѡ: ра́дꙋйсѧ, мт҃и бж҃їѧ, сп҃са мі́рꙋ ро́ждшаѧ.

Ра́дꙋйсѧ, всепѣ́таѧ, ꙗ҆́кѡ сотворѝ тѝ вели́чїе си́льный: ра́дꙋйсѧ, ꙗ҆́кѡ и҆ въ сла́вѣ і҆кѡ́нъ твои́хъ вели́чїе сїѐ ꙗ҆вле́но бы́сть.

Ра́дꙋйсѧ, ꙗ҆́кѡ тобо́ю, бл҃года́тнаѧ, неви́димый на́мъ прїѡбщи́сѧ: ра́дꙋйсѧ, ꙗ҆́кѡ чꙋдотво́рными і҆кѡ́нами твои́ми бл҃года́ть и҆ млⷭ҇ть на́мъ и҆сточи́сѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ в҃

Ви́дѧще тѧ̀, бцⷣе, на ѡ҆б̾ѧ́тїихъ свои́хъ млⷣнца хрⷭ҇та̀ держа́щꙋю и҆ главо́ю къ пречⷭ҇томꙋ ли́кꙋ є҆гѡ̀ кро́тцѣ прини́кшꙋю, разꙋмѣва́емъ бжⷭ҇твеннꙋю любо́вь твою̀ и҆ непреста́нное ѡ҆ мі́рѣ хода́тайство. Вѣ́рꙋемъ, ꙗ҆́кѡ и҆́маши ве́лїе дерзнове́нїе ко бл҃госе́рдїю влⷣки, є҆мꙋ́же, да́вшемꙋ на́мъ тѧ̀ бл҃гꙋ́ю застꙋ́пницꙋ, бл҃года́рственнѡ пое́мъ: А҆ллилꙋ́їа.

І҆́косъ в҃

Ра́зꙋмъ немощны́й не мо́жетъ пости́гнꙋти глꙋбинꙋ̀ смире́ннагѡ слꙋже́нїѧ твоегѡ̀, гпⷭ҇жѐ, и҆скꙋпи́телю на́шемꙋ, не и҆мѣ́вшемꙋ на землѝ, гдѣ̀ главꙋ̀ подклони́ти. Є҆гда́ же прїи́де вели́кїй и҆ тре́петный де́нь страда́нїй сн҃а твоегѡ̀, бг҃омт҃и, ѻ҆рꙋ́жїе сме́ртное про́йде дꙋ́шꙋ твою̀. Сегѡ̀ ра́ди се́рдцемъ соболѣ́знꙋюще, глаго́лемъ тѝ такова̑ѧ:

Ра́дꙋйсѧ, неѕло́биваѧ а҆́гнице, верте́пъ и҆ бѣ́гство смире́ннѡ прїи́мшаѧ: ра́дꙋйсѧ, бг҃опрїи́мца сѷмеѡ́на ско́рбное прорече́нїе въ се́рдцѣ начерта́вшаѧ.

Ра́дꙋйсѧ, поноше́нїю сн҃а бж҃їѧ сострада́вшаѧ: ра́дꙋйсѧ, крⷭ҇тный пꙋ́ть є҆гѡ̀ слеза́ми ѡ҆роси́вшаѧ.

Ра́дꙋйсѧ, мꙋ̑ки є҆гѡ̀ крⷭ҇тныѧ се́рдцемъ раздѣли́вшаѧ: ра́дꙋйсѧ, крⷭ҇тꙋ̀ предстоѧ́нїемъ соверше́нство любвѐ твоеѧ̀ ꙗ҆ви́вшаѧ.

Ра́дꙋйсѧ, гро́бꙋ сн҃а твоегѡ̀ бл҃госе́рдый пла́чь прине́сшаѧ: ра́дꙋйсѧ, воскрⷭ҇нїемъ є҆гѡ̀ па́че всѣ́хъ ѡ҆бра́дованнаѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ г҃

Си́ла вы́шнѧгѡ содѣ́ла тѧ̀, бл҃года́тнаѧ, и҆сто́чникъ неѡскꙋдѣва́ющъ ᲂу҆тѣше́нїѧ бѣ́дствꙋющымъ: мнѡ́ги бо скѡ́рби претерпѣ́вши, мо́жеши и҆ и҆скꙋша́ємымъ помощѝ. Лю́демъ рꙋ̑сскимъ, лю́тѣ стра́ждꙋщымъ ѿ наше́ствїѧ а҆га́рѧнъ, бл҃говоли́ла є҆сѝ ꙗ҆ви́ти ѻ҆́бразъ тво́й въ зна́менїе млⷭ҇ти твоеѧ̀ ко ѻ҆те́чествꙋ на́шемꙋ, въ защи́тꙋ ѿ вра̑гъ ви́димыхъ и҆ неви́димыхъ, и҆̀хже по́мощїю бж҃їею побѣжда́юще, сп҃си́телю бг҃ꙋ воспѣва́хꙋ: А҆ллилꙋ́їа.

І҆́косъ г҃

И҆мꙋ́ще тѧ̀ подвигополо́жницꙋ, ше́ствꙋющꙋю по стопа́мъ влⷣки хрⷭ҇та̀, мꙋ́жества и҆сполнѧ́хꙋсѧ первост҃и́телїе моско́встїи и҆ подви̑жницы бл҃гоче́стїѧ землѝ рꙋ́сскїѧ. Бѣды̑ и҆ напа̑сти претерпѣва́юще, сі́и ᲂу҆ча́хꙋ лю́ди дꙋ́хомъ гдⷭ҇еви рабо́тати, вѣ́дꙋще, ꙗ҆́кѡ си́ла бж҃їѧ въ не́мощи соверша́етсѧ. Мы́ же ви́дѧще вѣ́рꙋ ѻ҆тє́цъ на́шихъ и҆ ꙗ҆вле́нїе бл҃года́ти, претвори́вшїѧ ѕлоꙋмышлє́нїѧ во нра́вы дѡ́брыѧ, досто́йнѡ тѧ̀, наста́вницꙋ вѣ́рныхъ, ᲂу҆бл҃жа́емъ:

Ра́дꙋйсѧ, насажде́нїе вѣ́ры и҆ бл҃гоче́стїѧ: ра́дꙋйсѧ, ѻ҆́бразе несокрꙋши́магѡ терпѣ́нїѧ.

Ра́дꙋйсѧ, дꙋ́ха ᲂу҆ны́нїѧ и҆ боѧ́зни ѿгна́нїе: ра́дꙋйсѧ, дꙋ́ха ра́зꙋма и҆ крѣ́пости стѧжа́нїе.

Ра́дꙋйсѧ, бли́з̾ донски́хъ стрꙋ́й чꙋ́днѡ і҆кѡ́нꙋ твою̀ ꙗ҆ви́вшаѧ: ра́дꙋйсѧ, рѣ́ки сле́зъ наро́дныхъ є҆́ю и҆зсꙋши́вшаѧ.

Ра́дꙋйсѧ, до́блести бога́тство на́мъ врꙋчи́вшаѧ: ра́дꙋйсѧ, мл҃твенникѡвъ землѝ рꙋ́сскїѧ возрасти́вшаѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ д҃

Бꙋ́рѧ превели́кагѡ наше́ствїѧ а҆га́рѧнскагѡ потрѧсѐ зе́млю рꙋ́сскꙋю, но не возмо́же пла́мень ᲂу҆гаси́ти вѣ́ры въ покро́въ тво́й, бг҃омт҃и пречⷭ҇таѧ. Вели́кїй печа́льникъ землѝ на́шеѧ прпⷣбный се́ргїй, призва́въ на по́мощь ст҃ꙋ́ю трⷪ҇цꙋ и҆ тѧ̀, влⷣчце, со ᲂу҆пова́нїемъ бл҃гословѝ ст҃а́го кнѧ́зѧ дими́трїа съ дрꙋжи́ною въ похо́дъ проти́вꙋ а҆га́рѧнъ и҆ предречѐ є҆мꙋ̀ побѣ́дꙋ, тѣ́мже наꙋчѝ всѣ́хъ пѣ́ти всеси́льномꙋ бг҃ꙋ, въ трⷪ҇цѣ сла́вимомꙋ: А҆ллилꙋ́їа.

І҆́косъ д҃

Ви́дѧ і҆кѡ́нꙋ бг҃омт҃ре, на по́ли бра́ни ѿ донски́хъ предѣ̑лъ прише́дшꙋю, и҆ прїи́мъ посла́нїе ѿ се́ргїа прпⷣбнагѡ съ напꙋ́тїемъ: да помо́жетъ тѝ бг҃ъ и҆ ст҃а́ѧ бцⷣа, возра́довасѧ кнѧ́зь дими́трїй, ꙗ҆́кѡ сама̀ влⷣчца грѧде́тъ на сꙋпоста́ты, и҆ воспрѧнꙋ́въ дꙋ́хомъ, съ наде́ждею поведѐ во́ины своѧ̑ на тьмочи́слєннаѧ пѡ́лчища и҆ побѣ́дꙋ ѡ҆держа̀. І҆кѡ́на же твоѧ̀, влⷣчце, молнїено́снымъ блиста́нїемъ зра́ка твоегѡ̀ врагѝ ᲂу҆страша́ющи, зало́гъ побѣ́ды ꙗ҆влѧ́ше. Сегѡ̀ ра́ди бл҃года́рственнѡ и҆ ра́достнѡ пое́мъ тѝ похва̑льнаѧ сїѧ̑:

Ра́дꙋйсѧ, мт҃и гдⷭ҇а си́лъ, нбⷭ҇наѧ воево́до: ра́дꙋйсѧ, землѝ рꙋ́сскїѧ ѿ вѣ́ка по́моще и҆ покро́ве.

Ра́дꙋйсѧ, во́инѡмъ мꙋ́жества неѡдоли́магѡ дарова́нїе: ра́дꙋйсѧ, врага̀ и҆ско́ннагѡ гро́зное низверже́нїе.

Ра́дꙋйсѧ, во́инѡвъ и҆́нокѡвъ на по́двигъ ра́тный и҆збра́вшаѧ и҆ ᲂу҆крѣпи́вшаѧ: ра́дꙋйсѧ, ѻ҆те́чество на́ше ѿ и҆́га а҆га́рѧнскагѡ свободи́вшаѧ.

Ра́дꙋйсѧ, въ ꙗ҆вле́нїи і҆кѡ́ны твоеѧ̀ лꙋча́ми сл҃нца пра́вды вѣ́рныхъ ѡ҆сїѧ́вшаѧ: ра́дꙋйсѧ, пресла́внꙋю побѣ́дꙋ правосла́внѡ тѧ̀ чтꙋ́щымъ дарова́вшаѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ є҃

Бг҃оѧвле́нною ѕвѣздо́ю возсїѧ̀ і҆кѡ́на твоѧ̀ пресвѣ́тлаѧ, ѡ҆зарѧ́ющи ᲂу҆́тро бра́ни и҆ возвѣща́ющи бл҃гослове́нїе бж҃їе ратобо́рцємъ, на бра́нь жесто́кꙋю съ а҆га̑рѧны подви́гшымсѧ. Ве́сь де́нь то́й предстоѧ́хꙋ се́ргїй прпⷣбный и҆ и҆́ноцы мно́зи въ мл҃твѣ неѿстꙋ́пнѣй ко ст҃ѣ́й трⷪ҇цѣ. Ве́черꙋ же бы́вшꙋ, побѣ́дꙋ ста́рецъ дꙋ́хомъ позна́въ, ра́достнѡ сїю̀ провозгласѝ и҆ бл҃года́рственное пѣ́нїе совершѝ всеще́дромꙋ бг҃ꙋ, призыва́ѧ и҆ на́съ велегла́снѡ воспѣ́ти є҆мꙋ̀: А҆ллилꙋ́їа.

І҆́косъ є҃

Ви́дѧ ѻ҆чи́ма вѣ́ры тече́нїе би́твы и҆ мл҃твою ратобо́рцы ᲂу҆крѣплѧ́ѧ, поиме́ннѡ помина́ше прпⷣбный се́ргїй вождѝ и҆ во́ины ᲂу҆бїє́нныѧ. Мы́ же и҆мꙋ́ще завѣ́тъ є҆гѡ̀ па́мѧть ѡ҆ таковы́хъ ѻ҆со́бѡ твори́ти и҆ вѣ́дꙋще си́лꙋ мл҃твы, побѣ́дꙋ ѻ҆рꙋ́жїю приносѧ́щыѧ, и҆з̾ глꙋбины̀ се́рдца воззове́мъ бж҃їей мт҃ри, всемо́щнѣй покрови́тельницѣ дꙋ́шꙋ свою̀ полага́ющихъ за дрꙋ́ги своѧ̑:

Ра́дꙋйсѧ, ме́чь гнѣ́ва бж҃їѧ на продє́рзыѧ направлѧ́ющаѧ: ра́дꙋйсѧ, и҆з̾ пра́вды вѣне́цъ побѣ́ды соплета́ющаѧ.

Ра́дꙋйсѧ, съ хра́брыми непреѡбори́мѡ спобора́ющаѧ: ра́дꙋйсѧ, къ подвигѡ́мъ во бра́нехъ дꙋ́хъ возвыша́ющаѧ.

Ра́дꙋйсѧ, ᲂу҆ра́ненныхъ свои́мъ попече́нїемъ не ѡ҆ставлѧ́ющаѧ: ра́дꙋйсѧ, ᲂу҆бїе́нныхъ къ вѣ́чномꙋ поко́ю ᲂу҆правлѧ́ющаѧ.

Ра́дꙋйсѧ, вдови́цъ и҆ ѡ҆безча́дствованныхъ бл҃года́тнѡ ᲂу҆тѣша́ющаѧ: ра́дꙋйсѧ, воево́до и҆зрѧ́днаѧ, непобѣди́мѡ держа́вствꙋющаѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ ѕ҃

Провозвѣ́стникъ сп҃се́нїѧ москвы̀ ѿ внеза́пнагѡ наше́ствїѧ а҆га́рѧнскагѡ ꙗ҆ви́сѧ ѻ҆́бразъ тво́й, застꙋ́пнице ско́раѧ. Непрїѧ́телємъ во гра́дъ вни́ти ᲂу҆жѐ готѡ́вымъ, съ вѣ́рою и҆ сле́знымъ моле́нїемъ ѡ҆бнесо́ша є҆го̀ лю́дїе по стѣна́мъ и҆ сто́гнамъ гра́да и҆ поста́виша посредѣ̀ во́инства въ похо́днѣй цр҃квицѣ се́ргїа прпⷣбнагѡ, и҆ въ мл҃твѣ прилѣжа́ще, ᲂу҆се́рднѡ взыва́хꙋ всемлⷭ҇тивомꙋ сп҃сꙋ: А҆ллилꙋ́їа.

І҆́косъ ѕ҃

Возсїѧ́вшꙋ со́лнцꙋ, ᲂу҆зрѣ́ша стрегꙋ́щїи во́ини, ꙗ҆́кѡ ѡ҆пꙋстѣ̀ ста́нъ а҆га́рѧнскїй: но́щїю стра́хъ внеза́пꙋ нападѐ на нѧ̀ ѿ нѣ́кїѧ ве́лїѧ си́лы, и҆ смꙋти́вшесѧ, неꙋдержи́мѡ бѣжа́ша да́же до предѣ̑лъ землѝ рꙋ́сскїѧ и҆ всѝ и҆згибо́ша. Ѽ преди́внаѧ застꙋ́пнице на́ша! Твои́ми мл҃твами ско́рое и҆збавле́нїе сїѐ бы́сть. Да и҆спо́лнитсѧ же дре́внїй хра́мъ, возвы́сивыйсѧ на мѣ́стѣ, и҆дѣ́же стоѧ́ше чꙋдотво́рный ѻ҆́бразъ тво́й донскі́й, гла́са хвалы̀ сеѧ̀:

Ра́дꙋйсѧ, свѣщѐ неꙋгаси́маѧ, вѣ́ры ѻ҆́гнь воспламенѧ́ющаѧ: ра́дꙋйсѧ, гра́дꙋ москвѣ̀ стра́же неꙋсыпа́ющаѧ.

Ра́дꙋйсѧ, ᲂу҆пова́ющихъ на по́мощь твою̀ не посрамлѧ́ющаѧ: ра́дꙋйсѧ, пла́чь вѣ́рныхъ вско́рѣ въ ра́дость претворѧ́ющаѧ.

Ра́дꙋйсѧ, въ бѣ́гство врагѝ ѡ҆браща́ющаѧ: ра́дꙋйсѧ, призыва́ющымъ тѧ̀ по́мощь подаю́щаѧ.

Ра́дꙋйсѧ, со ст҃и́тєли и҆ прпⷣбными гра́дъ на́шъ ѡ҆гражда́ющаѧ: ра́дꙋйсѧ, и҆́нокѡвъ под̾ сѣ́нїю і҆кѡ́ны твоеѧ̀ ᲂу҆чрежда́ющаѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ з҃

Восхотѣ́вши ѡ҆гради́ти зе́млю рꙋ́сскꙋю, держа́внаѧ покрови́тельнице на́ша, мно́гажды кѡ́зни а҆га́рѧнъ и҆ про́чихъ и҆ноплемє́нникъ разорѧ́ше, предѣ́лы страны̀ на́шеѧ хранѧ́щи и҆ побѣ̑ды ди̑вныѧ да́же без̾ кро́ве подаю́щи. Бл҃говолѝ, ѽ мт҃и бж҃їѧ, въ ми́рѣ глꙋбо́цѣ и҆ сою́зѣ любвѐ вселе́ннꙋю сохрани́ти, тебѣ́ бо даде́сѧ бл҃года́ть всемі́рнагѡ застꙋпле́нїѧ пред̾ влⷣкою всѣ́хъ, є҆го́же вѡ́инства нбⷭ҇наѧ сла́вѧтъ, пою́ще є҆мꙋ̀: А҆ллилꙋ́їа.

І҆́косъ з҃

Но́ваго стра́жа неꙋсы́пнаго гра́да москвы̀ досто́йнѡ почти́ти хотѧ́ще, собо́рный хра́мъ лю́дїе бл҃гочести́вїи въ донстѣ́й ѻ҆би́тели соѡрꙋди́ша и҆ на стѣнѣ̀ хра́ма живописа́ша і҆кѡ́нꙋ твою̀, бг҃омт҃и, въ бжⷭ҇твенное ѡ҆гражде́нїе страны̀ на́шеѧ, ꙗ҆́кѡ да ѿвнѣ̀ находѧ́щїи вразѝ ѿраже́ни бꙋ́дꙋтъ неѿстꙋ́пными мл҃твами твои́ми. Тебѣ́ же, ꙗ҆́кѡ сꙋ́щей съ на́ми, со ᲂу҆пова́нїемъ глаго́лемъ:

Ра́дꙋйсѧ, бг҃а жива́гѡ ѡ҆дꙋшевле́нный хра́ме: ра́дꙋйсѧ, мт҃и ми́ра, ᲂу҆кроща́ющаѧ смѧте́нїй во́лны.

Ра́дꙋйсѧ, нощны́хъ бдѣ́нїй и҆ моле́бныхъ пѣ́нїй ско́рое слы́шанїе: ра́дꙋйсѧ, до́брое приста́нище дꙋша́мъ, сп҃се́нїѧ и҆́щꙋщымъ.

Ра́дꙋйсѧ, і҆кѡ́нꙋ твою̀, ꙗ҆́кѡ зна́мѧ побѣ́дъ, дарова́вшаѧ: ра́дꙋйсѧ, странꙋ̀ рꙋ́сскꙋю достоѧ́нїе своѐ и҆збра́вшаѧ.

Ра́дꙋйсѧ, бра́ней прекраще́нїемъ ми́ръ и҆ ра́дость приносѧ́щаѧ: ра́дꙋйсѧ, ко бл҃гоче́стїю странꙋ̀ на́шꙋ приводѧ́щаѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ и҃

Разсѣ́ѧшасѧ тꙋ̑чи напа́стей мл҃твами твои́ми, застꙋ́пнице всебл҃га́ѧ. Те́плаѧ зарѧ̀ покаѧ́нїѧ, восходѧ́щи, предварѧ́етъ то́ки бл҃года́ти, призыва́ющи къ по́двигꙋ, є҆́же вѣ́ровати пра́вѡ и҆ жи́ти ст҃ѡ. Простри́ же покро́въ тво́й, ѽ бл҃года́тнаѧ мт҃и, на всѣ́хъ грѧдꙋ́щихъ ᲂу҆́зкимъ, но вожделѣ́ннымъ пꙋте́мъ хрⷭ҇то́выхъ за́повѣдей, да всѝ позна́ютъ, ꙗ҆́кѡ съ на́ми бг҃ъ, є҆мꙋ́же пое́мъ: А҆ллилꙋ́їа.

І҆́косъ и҃

Ве́сь мі́ръ стра́ждетъ грѣ̑хъ ра́ди человѣ́ческихъ, во ѕло̀ є҆го̀ поверга́ющихъ. Въ тебѣ̀, мт҃и ро́да хрⷭ҇тїа́нскагѡ, нача́ло ѻ҆́бщагѡ и҆збавле́нїѧ бы́сть, и҆сполне́нїе всѧ́кїѧ добродѣ́тели. Да́рꙋй же на́мъ ᲂу҆зрѣ́ти, бг҃омꙋ́драѧ дв҃о, въ є҆ѵⷢ҇лїи сн҃а твоегѡ̀ свѣ́тъ бжⷭ҇твенный, да ѿве́ргше го́речь грѣха̀, сла́дость бл҃гоче́стїѧ ѡ҆брѧ́щемъ, взыва́юще тѝ сицева̑ѧ:

Ра́дꙋйсѧ, бл҃года́ти живоно́сный и҆сто́чниче: ра́дꙋйсѧ, заблꙋ́ждшымъ пꙋтево́дный свѣти́льниче.

Ра́дꙋйсѧ, сле́знѣ ка́ющымсѧ ѡ҆бновле́нїе подаю́щаѧ: ра́дꙋйсѧ, ходи́ти въ зако́нѣ гдⷭ҇ни наставлѧ́ющаѧ.

Ра́дꙋйсѧ, мл҃твѣ те́плѣй наꙋча́ющаѧ: ра́дꙋйсѧ, по́двигꙋ поста̀ вспомоществꙋ́ющаѧ.

Ра́дꙋйсѧ, грѣхѡ́вныѧ по́мыслы вла́стнѡ ѿ на́съ ѿгонѧ́ющаѧ: ра́дꙋйсѧ, братолю́бїемъ те́мнꙋю ѕло́бꙋ побѣжда́ти наставлѧ́ющаѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ ѳ҃

Всѣ́хъ немощны́хъ крѣ́посте, печа́льныхъ ра́дованїе, стра́ждꙋщихъ посѣще́нїе, вѣ́рныхъ дерзнове́нїе ты̀ є҆сѝ, пречⷭ҇таѧ влⷣчце бцⷣе, всѣ́хъ притека́ющихъ под̾ сѣ́нь крⷭ҇та̀ гдⷭ҇нѧ ко сп҃се́нїю приво́диши, да позна́вше хрⷭ҇та̀, бж҃їю си́лꙋ и҆ бж҃їю премⷣрость, воспою́тъ є҆мꙋ̀: А҆ллилꙋ́їа.

І҆́косъ ѳ҃

Вѣті̑и многовѣща́ннїи пости́гнꙋти не мо́гꙋтъ, чл҃вѣколюби́ваѧ мт҃и, бе́зднꙋ щедро́тъ твои́хъ, на ѕлостра́ждꙋщыѧ и҆ безпомѡ́щныѧ и҆злива́емыхъ. И҆ мы̀ сла́дость ᲂу҆тѣше́нїѧ въ нꙋ́ждахъ позна́вше, бл҃гословлѧ́емъ тѧ̀ съ вѣ́рою и҆ чествꙋ́емъ съ любо́вїю, молє́нїѧ возносѧ́ще пред̾ ѻ҆́бразомъ твои́мъ сицева̑ѧ:

Ра́дꙋйсѧ, въ ско́рбехъ земны́хъ во́лю бж҃їю смире́ннѡ прїи́мшаѧ: ра́дꙋйсѧ, ѡ҆бꙋрева́емыхъ въ ти́хое приста́нище вводѧ́щаѧ.

Ра́дꙋйсѧ, болѧ́щихъ млⷭ҇рдаѧ цѣли́тельнице: ра́дꙋйсѧ, вдѡ́въ и҆ сиро́тъ незри́маѧ пита́тельнице.

Ра́дꙋйсѧ, стра́ждꙋщихъ любо́вїю ѡ҆крꙋжа́ющаѧ: ра́дꙋйсѧ, долгонедꙋ́жныхъ сла́дости ра́йстѣй прїѡбща́ющаѧ.

Ра́дꙋйсѧ, ча̑дъ свои́хъ ѿ вра̑гъ неѡбори́мѡ защища́ющаѧ: ра́дꙋйсѧ, ꙗ҆́кѡ слеза́ми ра́дости і҆кѡ́на твоѧ̀ ᲂу҆краша́етсѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ і҃

Сп҃стѝ хотѧ̀ мі́ръ, сн҃ъ бж҃їй и҆з̾ тебє̀, дв҃о, пло́тїю ѡ҆блече́сѧ и҆ є҆стество̀ на́ше па́дшее ѡ҆бновѝ. Ди́вное бж҃їе смотре́нїе ѡ҆ на́съ тобо́ю, дв҃о, и҆сполнѧ́етсѧ, ꙗ҆́кѡ ты̀ є҆сѝ вои́стиннꙋ поги́бшихъ взыска́нїе и҆ грѣ́шныхъ и҆справле́нїе, и҆ тобо́ю ѿ ѿча́ѧнїѧ и҆зба́влени, дерза́емъ съ весе́лїемъ пѣ́ти бг҃ꙋ: А҆ллилꙋ́їа.

І҆́косъ і҃

Стѣна̀ є҆сѝ несокрꙋши́маѧ цр҃кви хрⷭ҇то́вѣ, всенепоро́чнаѧ дв҃о, вѣ̑рныѧ бо во и҆скꙋше́нїихъ ᲂу҆крѣплѧ́еши, ми́ромъ и҆ любо́вїю ѡ҆гражда́еши. Сегѡ̀ ра́ди и҆ гла́си мл҃твеннїи не ᲂу҆молка́ютъ зовꙋ́щихъ тѝ:

Ра́дꙋйсѧ, ѿ кꙋпѣ́ли кр҃ще́нїѧ бл҃га́ѧ пꙋтеводи́тельнице: ра́дꙋйсѧ, цѣломꙋ́дрїѧ ю҆́ныхъ ѡ҆гради́тельнице.

Ра́дꙋйсѧ, ма́теремъ многотрꙋ̑днымъ и҆зрѧ́днаѧ помо́щнице: ра́дꙋйсѧ, ча̑дъ непокори́выхъ мꙋ́драѧ наста́внице.

Ра́дꙋйсѧ, въ сиротствѣ̀ ди́вное ᲂу҆тѣше́нїе: ра́дꙋйсѧ, враждꙋ́ющихъ неча́емое примире́нїе.

Ра́дꙋйсѧ, беззако́ннꙋющихъ свѣ́томъ пра́вды просвѣща́ющаѧ: ра́дꙋйсѧ, грѣхѝ на́шѧ въ мо́ри млⷭ҇рдїѧ потоплѧ́ющаѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ а҃і

Пѣ́нїе всеꙋмиле́нное прино́симъ тѝ, вмѣсти́вшей ѵ҆поста́сное сло́во бж҃їе. Сн҃ъ тво́й, а҆́гнецъ бж҃їй, взе́млѧй грѣхѝ мі́ра, закала́етсѧ и҆ дае́тсѧ въ снѣ́дь вѣ̑рнымъ. Сподо́би на́съ, мт҃и бж҃їѧ, досто́йнѡ причаща́тисѧ пречⷭ҇тыхъ тѣ́ла и҆ кро́ве є҆гѡ̀, да сп҃се́нїе ᲂу҆лꙋчи́вше, воспое́мъ жизнода́вцꙋ: А҆ллилꙋ́їа.

І҆́косъ а҃і

Дщѝ ѻ҆ц҃а̀ нбⷭ҇нагѡ, мт҃и сн҃а бж҃їѧ, невѣ́сто дх҃а ст҃а́гѡ, неисчерпа́емое мо́ре дарѡ́въ бжⷭ҇твенныхъ ты̀ є҆сѝ, всест҃а́ѧ дв҃о. Оу҆молѝ чл҃вѣколю́бца гдⷭ҇а ѿкры́ти на́мъ и҆сто́чникъ всеѡживлѧ́ющїѧ бл҃года́ти, да ѡ҆чище́ннымъ се́рдцемъ потщи́мсѧ возрасти́ти плоды̀ дх҃а, въ ра́дости и҆ весе́лїи зовꙋ́ще тѝ:

Ра́дꙋйсѧ, плодѡ́въ дх҃а ст҃а́гѡ стѧжа́нїе всецѣ́лое: ра́дꙋйсѧ, ра́достїю дꙋхо́вною ᲂу҆пое́нїе пречꙋ́дное.

Ра́дꙋйсѧ, ми́ра непоколеби́магѡ дарова́нїе бл҃гонаде́жное: ра́дꙋйсѧ, бл҃гости и҆ любвѐ и҆сполне́нїе премі́рное.

Ра́дꙋйсѧ, млⷭ҇рдїѧ насажде́нїе неꙋвѧда́емое: ра́дꙋйсѧ, вѣ́ры живы́ѧ ᲂу҆твержде́нїе несокрꙋши́мое.

Ра́дꙋйсѧ, кро́тости наста́внице несравне́ннаѧ: ра́дꙋйсѧ, вражды̀ разрꙋша́ющаѧ средостѣ́нїе.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ в҃і

Бл҃года́тнꙋю по́мощь мно́гажды ꙗ҆влѧ́ла є҆сѝ, цр҃и́це нбⷭ҇наѧ, чрез̾ чꙋдотво́рный ѻ҆́бразъ тво́й, ѿ сме́рти ско́рыѧ и҆ неизбѣ́жныѧ и҆з̾има́ющи. Та́кѡ ѻ҆́бразъ всечⷭ҇тна́гѡ ᲂу҆спе́нїѧ твоегѡ̀, на ѡ҆бра́тнѣй странѣ̀ і҆кѡ́ны донскі́ѧ ѿ лѣ́тъ дре́влихъ пи́санный, зна́менїе є҆́сть всѧ́комꙋ подвиза́ющемꙋсѧ, да не ᲂу҆бои́тсѧ сме́рти, но взира́ѧ, ка́кѡ дꙋша̀ твоѧ̀ прїе́млетсѧ въ рꙋ́цѣ бг҃а жива́гѡ, съ наде́ждею предае́тъ себѐ въ ча́съ сме́ртный сꙋдїѝ всѣ́хъ бг҃ꙋ, вопїѧ̀ є҆мꙋ̀: А҆ллилꙋ́їа.

І҆́косъ в҃і

Пою́ще тѧ̀, въ мл҃твахъ неꙋсыпа́ющꙋю бцⷣꙋ, ст҃ѣ́й трⷪ҇цѣ предстоѧ́щꙋю, вопїе́мъ тѝ: пробꙋдѝ на́съ свѣ́томъ живоно́снагѡ ᲂу҆спе́нїѧ твоегѡ̀ ѿ смертоно́снагѡ сна̀ нерадѣ́нїѧ ѡ҆ сп҃се́нїи дꙋшѝ и҆ и҆спросѝ на́мъ съ гдⷭ҇емъ примире́нїе. Є҆гда́ же приспѣ́етъ жа́тва сме́ртнаѧ житїю̀ на́шемꙋ, ѡ҆градѝ на́съ всеси́льнымъ предста́тельствомъ твои́мъ ѿ дꙋхѡ́въ ѕло́бы, да тобо́ю води́ми, дости́гнемъ црⷭ҇твїѧ нбⷭ҇нагѡ, и҆дѣ́же незаходи́мое сл҃нце пра́вды невече́рнїй свѣ́тъ сла́вы бжⷭ҇твенныѧ и҆злива́етъ. Ѽ всест҃а́ѧ дв҃о, ѿ херꙋві̑мъ воспѣва́емаѧ, прїимѝ ѿ на́съ недосто́йныхъ похвалы̑ сїѧ̑:

Ра́дꙋйсѧ, ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ: ра́дꙋйсѧ, мт҃и всепѣ́таѧ, ѡ҆деснꙋ́ю бг҃а предстоѧ́щаѧ.

Ра́дꙋйсѧ, го́рнѧгѡ мі́ра красото̀ бг҃олѣ́пнаѧ: ра́дꙋйсѧ, кла́дезю бг҃омы́слїѧ неисчерпа́емый.

Ра́дꙋйсѧ, любвѐ бжⷭ҇твенныѧ неꙋгаси́мый свѣти́льниче: ра́дꙋйсѧ, грѣхо́вныхъ ᲂу҆́зъ ско́раѧ рѣши́тельнице.

Ра́дꙋйсѧ, воздꙋ́шныхъ мыта́рствъ безбѣ́дное прехожде́нїе: ра́дꙋйсѧ, бл҃га́ѧ врата́рнице, двере́й ра́йскихъ ѿверзе́нїе.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ г҃і

Ѽ всемлⷭ҇тиваѧ влⷣчце бцⷣе, страны̀ на́шеѧ ди́внаѧ застꙋ́пнице, ѡ҆би́димыхъ прибѣ́жище, грѣ́шныхъ сп҃се́нїе! Ѻ҆те́чество на́ше ѿ вра̑гъ защитѝ, вселе́ннꙋю всю̀ ми́ромъ бл҃гословѝ, вѣ́рꙋ правосла́внꙋю ᲂу҆крѣпѝ, крⷭ҇тъ коемꙋ́ждо со ᲂу҆пова́нїемъ понестѝ помозѝ, въ любвѝ и҆ согла́сїи всѣ́хъ на́съ соблюдѝ и҆ въ ра́дость гдⷭ҇а вни́ти сподо́би пою́щихъ є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆рха́гг҃ла бл҃говѣ́стїе слы́шавши пречⷭ҇таѧ, кро́тостїю прїѧ́тъ во́лю гдⷭ҇а своегѡ̀ и҆ во смире́нїи се́рдца ѿвѣща̀: сѐ раба̀ гдⷭ҇нѧ, бꙋ́ди мнѣ̀ по глаго́лꙋ твоемꙋ̀. Мы́ же дивѧ́щесѧ, ка́кѡ сн҃ъ бж҃їй сн҃ъ дв҃ы быва́етъ, съ гаврїи́ломъ бл҃года́тнꙋю пѣ́сньми си́ми почита́емъ:

Ра́дꙋйсѧ, ѻ҆трокови́це, ѿ всѣ́хъ родѡ́въ бг҃омъ и҆збра́ннаѧ: ра́дꙋйсѧ, ски́нїе, дх҃омъ ст҃ы́мъ ѡ҆сѣне́ннаѧ.

Ра́дꙋйсѧ, живоно́снаѧ ѻ҆би́тель свѣ́та бжⷭ҇твеннагѡ: ра́дꙋйсѧ, мт҃и бж҃їѧ, сп҃са мі́рꙋ ро́ждшаѧ.

Ра́дꙋйсѧ, всепѣ́таѧ, ꙗ҆́кѡ сотворѝ тѝ вели́чїе си́льный: ра́дꙋйсѧ, ꙗ҆́кѡ и҆ въ сла́вѣ і҆кѡ́нъ твои́хъ вели́чїе сїѐ ꙗ҆вле́но бы́сть.

Ра́дꙋйсѧ, ꙗ҆́кѡ тобо́ю, бл҃года́тнаѧ, неви́димый на́мъ прїѡбщи́сѧ: ра́дꙋйсѧ, ꙗ҆́кѡ чꙋдотво́рными і҆кѡ́нами твои́ми бл҃года́ть и҆ млⷭ҇ть на́мъ и҆сточи́сѧ.

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Конда́къ а҃

Взбра́ннѣй воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ, бцⷣе, но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, влⷣчце, застꙋ́пнице вѣ́рныхъ пребл҃га́ѧ и҆ ско́раѧ.

Моли́твы

Ѽ прест҃а́ѧ влⷣчце, дв҃о бцⷣе, застꙋ́пнице на́ша бл҃га́ѧ и҆ ско́раѧ! Воспѣва́емъ тѝ всѝ бл҃года́рствєннаѧ за чꙋ̑днаѧ дѣла̀ твоѧ̑. Пѣсносло́вимъ ѿ лѣ́тъ дре́внихъ неѿе́млемое застꙋпле́нїе твоѐ гра́дꙋ москвѣ̀ и҆ странѣ̀ на́шей, чꙋдотво́рнымъ ѻ҆́бразомъ твои́мъ донски́мъ всегда̀ ꙗ҆влѧ́емое: въ бѣ́гство ѡ҆браща́ютсѧ полцы̀ чꙋжди́хъ, гра́ди и҆ вє́си невреди́ми сохранѧ́ютсѧ, лю́дїе же ѿ лю́тыѧ сме́рти и҆збавлѧ́ютсѧ, ѡ҆сꙋша́ютсѧ ѻ҆́чи слезѧ́щїи, ᲂу҆молка́ютъ стена̑нїѧ вѣ́рныхъ, пла́чь въ ра́дость ѻ҆́бщꙋю претворѧ́етсѧ. Бꙋ́ди и҆ на́мъ, пречⷭ҇таѧ бцⷣе, ᲂу҆тѣше́нїе въ бѣ́дствїихъ, возрожде́нїе наде́жды, ѻ҆́бразъ мꙋ́жества и҆ и҆сто́чникъ млⷭ҇ти: въ ско́рбныхъ ѡ҆бстоѧ́нїихъ неистощи́мое терпѣ́нїе на́мъ да́рꙋй. Пода́ждь коемꙋ́ждо по проше́нїю и҆ нꙋ́ждѣ є҆гѡ̀: младе́нцы воспита́й, ю҆́ныѧ ᲂу҆цѣломꙋ́дри и҆ стра́хꙋ бж҃їю наꙋчѝ, ᲂу҆ныва́ющыѧ ѡ҆бо́дри и҆ немощнꙋ́ю ста́рость поддержѝ. Млⷭ҇тїю посѣтѝ въ болѣ́знехъ и҆ печа́лехъ сꙋ́щыѧ, ѕла̑ѧ сердца̀ ᲂу҆мѧгчѝ, братолю́бїе ᲂу҆крѣпѝ, ми́ра и҆ любвѐ всѣ́хъ на́съ и҆спо́лни. Примирѝ, бл҃госе́рдаѧ мт҃и, враждꙋ́ющыѧ и҆ ѡ҆правда́й ѡ҆клевета̑нныѧ. И҆стребѝ поро́ки, да не восхо́дѧтъ грѣсѝ на́ши пред̾ сꙋдїе́ю всѧ́ческихъ, да не пости́гнетъ на́съ првⷣный гнѣ́въ бж҃їй. Твои́ми мл҃твами, всемо́щнымъ твои́мъ покро́вомъ ѡ҆градѝ на́съ ѿ наше́ствїй вра́жїихъ, ѿ гла́да, гꙋби́тельства, ѻ҆гнѧ̀, меча̀ и҆ всѧ́кагѡ и҆на́гѡ ѕлострада́нїѧ. Оу҆пова́емъ мл҃твами твои́ми полꙋчи́ти грѣхѡ́въ и҆зглажде́нїе и҆ съ бг҃омъ примире́нїе. Оу҆молѝ стѧжа́ти на́мъ црⷭ҇твїе нбⷭ҇ное и҆ съ ли̑ки а҆́гг҃лѡвъ и҆ ст҃ы́хъ та́мѡ восхвали́ти пречтⷭ҇но́е и҆́мѧ ст҃ы́ѧ трⷪ҇цы: ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.