Песнь 1
Ирмос
Во́ду проше́д я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Тропарь
Пе́сненный вене́ц тебе́ тщу́ся соплести́, усе́рдствуй же, о́тче, моли́твою твое́ю и пода́ждь благоле́пно воспе́ти твоея́ простоты́ вели́кую красоту́.
Тропарь
Ева́нгельским нра́вом изде́тска обогати́вся, от суеты́ мирски́я уклони́лся еси́ и, я́ко му́дрый купе́ц, пучи́ну премину́в собла́знов, в приста́нищи и́ночестем до́брый би́сер обре́л еси́.
Тропарь
Смиренному́дрием украси́в главу́ твою́ и послуша́нием прилежа́в вели́ким ста́рцем, духо́вному худо́жеству научи́лся еси́, те́мже и мно́гим лю́дем до́брый наста́вник яви́лся еси́.
Богородичен
Но́сиши на рука́х Твои́х, Де́во Всепе́тая, Христа́, Со́лнце Пра́вды, И́же зе́млю просвети́ богозна́ния луча́ми и к Све́ту Невече́рнему наста́ви нас.
Песнь 3
Ирмос
Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.
Тропарь
О́тче преподо́бне, ста́рчества О́птинскаго досто́йный прее́мниче! Ты, во главу́ оби́тели поста́влен быв и игу́менский крест, я́ко корми́ло духо́вное, восприи́м, мно́гия и́ноки в Ца́рствие Христо́во му́дро упра́вил еси́.
Тропарь
Христа́ изде́тска возлюби́в, ве́ру апо́стольскую и любо́вь оте́ческую стяжа́в, а́нгельски на земли́ пожи́л еси́, свя́те Исаа́кие, ны́не же с ли́ки преподо́бных Бо́га прославля́еши.
Тропарь
Ве́рен быв заве́том ста́рцев О́птинских и оби́тель твою́ благоче́стием украси́в, ду́ши, вве́ренныя тебе́, Исаа́кие преподо́бне, испове́данием по́мыслов и слеза́ми покая́ния очища́ти науча́л еси́.
Богородичен
Ада́мова ме́ртвость Тобо́ю оживотвори́ся, Богоневе́стная, зачала́ бо еси́ без се́мене Христа́, всех Воскресе́ние, те́мже истле́вшии во гробе́х улуча́ют безсме́ртия наде́жду Твои́ми, Де́во, моли́твами.
Песнь 4
Ирмос
Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.
Тропарь
Любо́вию безмо́лвия взыску́я и послуша́нию прилежа́, Исаа́кие богоблаже́нне, я́ко ве́рный учени́к Христо́в, в себе́ запечатле́л еси́ нрав ева́нгельский, те́мже и наста́вник яви́лся еси́ прему́дрый.
Тропарь
Истонча́я ве́лиим посто́м плоть твою́, стра́сти душетле́нныя усмири́л еси́ и ду́шу твою́ слеза́ми покая́ния омы́л еси́. Моли́ о нас, преподо́бне, да скве́рны грехо́вныя очи́стимся.
Тропарь
Терпе́нием вооружи́вся, богому́дре, воздержа́нием стре́лы вра́жия отрази́л еси́ и, моли́твою ум окрыли́в, ловле́ния вра́жия избе́гл еси́. Помози́ и нам, преподо́бне, се́тей лука́ваго избе́гнути.
Богородичен
Сотвори́ Тебе́, Де́во, вели́чие Си́льный и свя́то и́мя Его́, И́же в ложесна́ Твоя́ вшед, Плотоно́сец на земли́ яви́ся и ми́ра Засту́пницу Тя показа́.
Песнь 5
Ирмос
От но́щи неве́дения/ по душелови́тельному пути́ при́сно блудя́щаго,/ Све́том ра́зума Твоего́, Го́споди, преднаставля́я мя,// на стезю́ за́поведей Твои́х напра́ви.
Тропарь
Я́ко све́тлая свеща́, преподо́бне Исаа́кие, от любве́ ста́рцев О́птинских возже́глся еси́ и све́том богоразу́мия ду́ши приходя́щих к тебе́ просвети́л еси́.
Тропарь
Простото́ю нра́ва и чи́стым се́рдцем украси́вся, житие́м добронра́вным просия́л еси́, блаже́нне, и мно́гия лю́ди ко Христу́ приве́л еси́. Научи́ и нас путе́м за́поведей Госпо́дних пра́во ходи́ти.
Тропарь
Ре́вность по благоче́стии име́я и игу́менскою вла́стию облече́н, любому́дрие мона́шеское с прилежа́нием насажда́л еси́, о́тче, и кро́ткими обличе́ньми и́ноки вразумля́л еси́.
Богородичен
От Твои́х ложе́сн, Де́во Пречи́стая, Богоро́дице, Со́лнце Пра́вды возсия́, и нощь лука́вых страсте́й отбеже́, у́тро же благоче́стия просия́.
Песнь 6
Ирмос
Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся я́ко Ио́на:// от тли, Бо́же, возведи́ мя.
Тропарь
Свы́ше власть прии́м вяза́ти и реши́ти, о́тче Исаа́кие, соу́зом любве́ бра́тство твое́ связа́л еси́ и, к лу́чшему простира́яся соверше́нству, моли́тву те́плую ко Го́споду возноси́л еси́.
Тропарь
Твоя́ простота́, о́тче Исаа́кие, обличи́ хитреце́в неве́жество, чистота́ же души́ привлече́ А́нгел мно́жество, ум бо Христо́в стяжа́л еси́, мирско́е худо́жество я́ко сор вменя́я.
Тропарь
Оби́тели Ша́мординския благопопечи́тель изря́ден и О́птинскаго ста́рца Амвро́сия сотаи́нник богому́дрый быв, моли́твенник усе́рдный о па́стве твое́й яви́лся еси́, Исаа́кие.
Богородичен
Испо́лнен храм Твой, Богоро́дице, песнопе́ний духо́вных, я́ко ны́не па́мять преподо́бнаго приспе́, и́же мощьми́ зде упоко́ися и ду́хом неотсту́пно пребыва́ет. Те́мже ра́дуйся, зове́м Ти, Де́во Чи́стая, преподо́бных похвало́.
Песнь 7
Ирмос
От Иуде́и доше́дше, о́троцы,/ в Вавило́не иногда́,/ ве́рою Тро́ическою пла́мень пе́щный попра́ша пою́ще:// отце́в Боже, благослове́н еси́.
Тропарь
Све́тел по́мысл име́я и разсуди́телен, богому́дро па́ству твою́ упа́сл еси́, Исаа́кие о́тче наш, и от кла́дязя живо́творных оте́ческих писа́ний о́вцы твоя́ напоя́л еси́.
Тропарь
А́ще и мно́гими почестьми́ окруже́н и са́ном игу́менским укра́шен был еси́, о́тче Исаа́кие, оба́че, тяготу́ и́ноческаго жития́ люботру́дно подъе́м, о́браз смире́ния и братолю́бия и́ноком показа́л еси́.
Тропарь
А́нгельски на земли́ пожи́в, лице́ Христо́во лице́м твои́м зре́ти сподо́бился еси́, блаже́нне, и, ли́ку преподо́бных сочета́вся, вку́пе с ни́ми прославля́еши Триипоста́сное Божество́.
Богородичен
Ко Твое́й непобеди́мей по́мощи прибега́ем, Богоро́дице, изба́ви оби́тель Твою́ от ересе́й и нестрое́ний, да благоче́стно сла́вится в ней Пречестно́е и́мя Бо́га отце́в на́ших.
Песнь 8
Ирмос
Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во/ и огнь в ро́су претво́ршее/ и превозноси́те всем жизнь подава́ющаго// Ду́ха Всесвята́го во ве́ки.
Тропарь
Исцеле́ния ны́не источа́ет свяще́нная ра́ка моще́й твои́х, о́тче Исаа́кие, и притека́ющии к ней с ве́рою здра́вие улуча́ют душа́м и телесе́м си́лою на тебе́ почи́вшаго Ду́ха Всесвята́го.
Тропарь
Я́ко домоправи́тель иску́сен, подо́бник Моисе́евых дел яви́лся еси́, преподо́бне, ста́рчества О́птинскаго утверди́телю и в нощи́ безпу́тия блужда́ющим ве́рный указа́телю.
Тропарь
Кро́тостию украси́вся, богоблаже́нне Исаа́кие, бра́тию оте́чески возлюби́л еси́ и, изря́дное показа́в милосе́рдие, мно́гое утеше́ние скорбя́щим пода́л еси́.
Богородичен
Ра́дуйся, све́тлая Сло́ва пала́то, ра́дуйся, ча́ше Животворя́щия воды́, по вся дни напая́ющая ве́рных, ра́дуйся, Богома́ти, Предста́тельнице пою́щих Тя.
Песнь 9
Ирмос
Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,// со безпло́тными ли́ки Тя велича́юще.
Тропарь
А́нгельскими чи́нми ны́не окруже́н, в го́рняя взя́лся еси́ с преподо́бными ста́рцы О́птинскими, о́тче Исаа́кие, я́ко ми́ра красоту́ презре́л еси́ и по́двиги по́стническими украси́лся еси́.
Тропарь
Светоза́рен яви́ся днесь день преставле́ния твоего́, о́тче досточу́дне, во́ньже подае́ши изря́дную по́мощь и предста́тельствуеши пред Бо́гом о ве́рою и любо́вию чту́щих тя.
Тропарь
О́птинскаго вертогра́да дре́во многопло́дное яви́лся еси́, о́тче, те́мже и ны́не, духо́вными плоды́ ве́рных насыща́я, исцеле́ния оби́льная источа́еши с те́плою моли́твою притека́ющим к ра́це моще́й твои́х.
Тро́ицы изря́днии уго́дницы яви́шася преподо́бнии ста́рцы О́птинстии, Отца́ бо вои́стину почто́ша, Сы́ну изря́дно порабо́таша и Ду́ха Свята́го стяжа́ша, я́ко сосу́ди богоприя́тнии.
Богородичен
А́нгелов Творе́ц, Сын и Бог Твой, лю́ди спасе́, во гресе́х зле погиба́ющих, те́мже Тя, Де́во Чистая, с безпло́тными ли́ки велича́ем.