Православный календарь
Размер шрифта:

Ака́ѳістъ

<p>А҆ка́ѳїстъ прест҃ѣ́й бг҃оро́дицѣ прославле́нїѧ ра́ди чꙋдотво́рныѧ є҆ѧ̀ і҆кѡ́ны нарица́емыѧ грꙋзи́нскїѧ</p>

Грузинской иконы Божией Матери (1650) 4 сентября 2026

Конда́къ а҃

И҆збра́ннѣй ѿ всѣ́хъ родѡ́въ, бж҃їей мт҃ри и҆ цр҃и́цѣ пред̾ пречⷭ҇тымъ є҆ѧ̀ ѡ҆́бразомъ, со ᲂу҆миле́нїемъ хвалє́бнаѧ пѣ̑нїѧ прино́симъ: ты́ же, ꙗ҆́кѡ и҆мꙋ́щаѧ къ ро́дꙋ хрⷭ҇тїа́нскомꙋ милосе́рдїе неизрече́нное, ѿ бѣ́дъ и҆ скорбе́й и҆зба́ви всѣ́хъ на́съ тебѐ зовꙋ́щихъ:

Ра́дꙋйсѧ, невѣ́сто неневѣ́стнаѧ.

І҆́косъ а҃

А҆рха́гг҃лѡвъ и҆ а҆́гг҃лѡвъ чи́ни бл҃гоговѣ́йнѡ тебѣ̀ слꙋ́жатъ и҆ всѧ̑ нбⷭ҇ныѧ си́лы немо́лчными гла́сы тѧ̀, бцⷣе дв҃о, воспѣва́ютъ, ꙗ҆́кѡ ро́ждшꙋю нбⷭ҇ныхъ во́инствъ цр҃ѧ̀: мы́ же земноро́днїи, со тре́петомъ предстоѧ́ще чꙋдотво́рномꙋ ли́кꙋ твоемꙋ̀ бре́нными ᲂу҆стна́ми вопїе́мъ тѝ си́це:

Ра́дꙋйсѧ, ѿ всѣ́хъ родѡ́въ ко и҆скꙋпле́нїю ро́да на́шегѡ и҆збра́ннаѧ: ра́дꙋйсѧ, дх҃а ст҃а́гѡ дарова́нїй преиспо́лненнаѧ.

Ра́дꙋйсѧ, херꙋві́мѡвъ и҆ серафі́мѡвъ превозше́дшаѧ: ра́дꙋйсѧ, та́инствꙋ сп҃се́нїѧ ро́да человѣ́ческагѡ послꙋжи́вшаѧ.

Ра́дꙋйсѧ, ст҃о́е вмести́лище сло́ва бж҃їѧ: ра́дꙋйсѧ, неѡпи́санное сло́во ѻ҆́ч҃ее въ ложесна́хъ свои́хъ носи́вшаѧ.

Ра́дꙋйсѧ, прⷪ҇ро́ческихъ глаго́лѡвъ нело́жное и҆сполне́нїе: ра́дꙋйсѧ, винꙋ̀ прароди́телей ро́да на́шегѡ рождество́мъ твои́мъ и҆скꙋпи́вшаѧ.

Ра́дꙋйсѧ, предста́тельство ро́дꙋ хрⷭ҇тїа́нскомꙋ ѿ бг҃а дарова́нное: ра́дꙋйсѧ, сп҃се́нїѧ ро́да человѣ́ческагѡ нача́ло.

Ра́дꙋйсѧ, лѣ́ствице бжⷭ҇твеннагѡ снисхожде́нїѧ: ра́дꙋйсѧ, мо́сте ѿ землѝ къ нб҃сѝ земноро́дныхъ возводѧ́й.

Ра́дꙋйсѧ, невѣ́сто неневѣ́стнаѧ.

Конда́къ в҃

Ви́дѧщи пречⷭ҇таѧ съ высоты̀ нбⷭ҇нагѡ жили́ща своегѡ̀, и҆дѣ́же съ сн҃омъ свои́мъ во сла́вѣ пребыва́етъ, ѡ҆ѕлобле́нїе проти́вꙋ ст҃ы́нь хрⷭ҇тїа́нскихъ во странѣ̀ грꙋзи́нстѣй, попꙋще́нїемъ бж҃їимъ во днѝ ѻ҆́ны бы́вшее ѿ пе́рсскагѡ царѧ̀ а҆бба́са, грꙋзи́нскꙋю странꙋ̀ разори́вшагѡ и҆ хра́мы є҆ѧ̀ хрⷭ҇тїа́нскїѧ ѡ҆скверни́вшагѡ, и҆ хранѧ́щи ст҃ꙋ́ю і҆кѡ́нꙋ ѿ такова́гѡ порꙋга́нїѧ, страны̀ рѡссі́йскїѧ мꙋ́жꙋ вѣ́рнꙋ и҆ бл҃гоговѣ́йнꙋ стефа́нꙋ, бл҃гопромысли́тельнѣ вѣ́дати ю҆̀ вспомоществова́ла є҆сѝ, влⷣчце. стѧжа́въ ᲂу҆́бѡ се́й вѣ́рный ра́бъ ст҃ы́ню твою̀, во ᲂу҆миле́нїи се́рдца, возопѝ бг҃ꙋ: А҆ллилꙋ́їа.

І҆́косъ в҃

Разꙋмѣ́ти хотѧ̀ бл҃гоговѣ́йный мꙋ́жъ геѡ́ргїй недоꙋмѣ́ннꙋю та́йнꙋ ѿкрове́нїѧ твоегѡ̀, влⷣчце, ѡ҆ нѣ́коемъ безцѣ́ннѣмъ би́серѣ, приста́вникомъ и҆мѣ́нїѧ є҆гѡ̀ во странѣ̀ персі́дстѣй приѡбрѣте́ннемъ, съ патрїа́рхомъ фїларе́томъ совѣща́шесѧ. мы́ же та́инственномꙋ вразꙋмле́нїю пребл҃гослове́нныѧ, свы́ше вѣ̑рнымъ рабѡ́мъ подава́емомꙋ, дивѧ́щесѧ, бл҃гоговѣ́йнѡ вопїе́мъ къ не́й:

Ра́дꙋйсѧ, сокровє́нныѧ та̑йны блгⷣти бж҃їѧ вѣ̑рнымъ ѿкрыва́ющаѧ: ра́дꙋйсѧ, ᲂу҆стна́ми правосла́вныхъ хвалꙋ̀ бг҃ови соверша́ющаѧ.

Ра́дꙋйсѧ, невѣ́рныхъ а҆га́рѧнъ, ст҃ы́ню твою̀ презрѣ́вшихъ, посрамлѧ́ющаѧ: ра́дꙋйсѧ, сла́вою чꙋде́съ твои́хъ вѣ́рныхъ смы́слы ѡ҆зарѧ́ющаѧ.

Ра́дꙋйсѧ, почита́нїю ст҃ы́хъ і҆кѡ́нъ на́съ наставлѧ́ющаѧ: ра́дꙋйсѧ, хрⷭ҇то́вꙋ вѣ́рꙋ во странѣ̀ на́шей ᲂу҆твержда́ющаѧ.

Ра́дꙋйсѧ, ѡ҆би́тель и҆́нокѡвъ кра́сныѧ горы̀ ст҃ы́мъ твои́мъ ѡ҆́бразомъ ѡ҆сщ҃а́ющаѧ: ра́дꙋйсѧ, де́нь принесе́нїѧ честны́ѧ твоеѧ̀ і҆кѡ́ны и҆сцѣле́нїемъ и҆́нока зна́меновавшаѧ.

Ра́дꙋйсѧ, безцѣ́нный би́серъ, ст҃ꙋ́ю твою̀ і҆кѡ́нꙋ, ꙗ҆́кѡже рекла̀ є҆сѝ, на́мъ дарова́вшаѧ: ра́дꙋйсѧ, безцѣ́нный би́серъ, хрⷭ҇та̀, на сп҃се́нїе на́ше ро́ждшаѧ.

Ра́дꙋйсѧ, честны́мъ твои́мъ ѡ҆́бразомъ странꙋ̀ на́шꙋ посѣти́вшаѧ: ра́дꙋйсѧ, ми́рнꙋю ѡ҆би́тель и҆́нокѡвъ неѿ̾е́млемымъ бога́тствомъ ѡ҆богати́вшаѧ.

Ра́дꙋйсѧ, невѣ́сто неневѣ́стнаѧ.

Конда́къ г҃

Си́ла вы́шнѧгѡ ѡ҆сѣнѧ́етъ вы́нꙋ съ вѣ́рою притека́ющихъ къ держа́вномꙋ покро́вꙋ твоемꙋ̀, влⷣчце, и҆ бл҃гоговѣ́йнѡ чтꙋ́щихъ чꙋдотво́рнꙋю і҆кѡ́нꙋ твою̀, бг҃омт҃и: є҆́й бо даде́сѧ блгⷣть ѿ бг҃а всѧ́къ недꙋ́гъ и҆ всѧ́кꙋ ꙗ҆́зю въ лю́дѣхъ врачева́ти, тѣ́мже бл҃года́рственнѡ вопїе́мъ бг҃ꙋ: А҆ллилꙋ́їа.

І҆́косъ г҃

И҆мѣ́ющи промышле́нїе те́плое ѡ҆ лю́дехъ страны̀ зи́мнїѧ полꙋ́нощи, го́рꙋ кра́снꙋю под̾ кро́въ тво́й, бг҃омт҃и, прїѧ́ла є҆сѝ, и҆ ѡ҆би́тели и҆́нокѡвъ тоѧ̀ честны́й ѡ҆́бразъ тво́й ми́лостивнѡ дарова́ла є҆сѝ, да зрѧ́ще то́ки чꙋде́съ, преизоби́льнѡ на молѧ́щихсѧ тебѣ̀ съ вѣ́рою и҆злива́ємыѧ, во ᲂу҆миле́нїи, вопїю́тъ тебѣ̀, влⷣчце:

Ра́дꙋйсѧ, смире́ннꙋю ѡ҆би́тель и҆́нокѡвъ кра́сныѧ горы̀ держа́внымъ покро́вомъ твои́мъ ѡ҆сѣнѧ́ющаѧ: ра́дꙋйсѧ, чꙋдеса́ми ѿ ст҃ы́ѧ твоеѧ̀ і҆кѡ́ны го́рꙋ кра́снꙋю прославлѧ́ющаѧ.

Ра́дꙋйсѧ, подо́бїе бл҃года́тнагѡ а҆ѳѡ́на во странѣ̀ зи́мнѣй полꙋ́нощи ꙗ҆ви́вшаѧ: ра́дꙋйсѧ, го́рꙋ кра́снꙋю житїю̀ и҆́ноческомꙋ чꙋ́днѡ ᲂу҆каза́вшаѧ.

Ра́дꙋйсѧ, въ щи́тъ и҆ ѡ҆гражде́нїе мѣ́ста тогѡ̀ цѣльбоно́снꙋю і҆кѡ́нꙋ твою̀ дарова́вшаѧ: ра́дꙋйсѧ, посели́вшымсѧ на се́й ст҃ѣ́й горѣ̀ и҆́нокѡмъ ѡ҆би́тель ти́хꙋю созда́вшаѧ.

Ра́дꙋйсѧ, житїѐ чи́на и҆́ноческагѡ во сп҃се́нїе дꙋ́шъ ᲂу҆строѧ́ющаѧ: ра́дꙋйсѧ, всѣ̑мъ хотѧ́щымъ ᲂу҆лꙋчи́ти сп҃се́нїе спобо́рствꙋющаѧ.

Ра́дꙋйсѧ, кра́снꙋю го́рꙋ и҆ ѡ҆бита́ющихъ на не́й бл҃года́тнымъ твои́мъ ѡ҆мофо́ромъ покрыва́ющаѧ: ра́дꙋйсѧ, притека́ющихъ къ твоемꙋ̀ покро́вꙋ и҆ застꙋпле́нїю не ѡ҆ставлѧ́ющаѧ.

Ра́дꙋйсѧ, сла́быхъ на пꙋтѝ добродѣ́тели ᲂу҆крѣплѧ́ющаѧ: ра́дꙋйсѧ, заблꙋ́ждшихъ на пꙋ́ть и҆́стинный наставлѧ́ющаѧ.

Ра́дꙋйсѧ, невѣ́сто неневѣ́стнаѧ.

Конда́къ д҃

Бꙋ́рю внꙋ́трь и҆мѣ́ѧ помышле́нїй сꙋмни́тельныхъ слѣпе́цъ пїтѷрі́мъ, є҆гда̀ ѡ҆заре́нъ бѣ̀ сїѧ́нїемъ свѣ́та, ꙗ҆́кѡ со́лнечнымъ, смѧте́сѧ и҆ стра́хомъ ѡ҆бдержи́мъ бѣ̀, мнѧ́ше ѡ҆ се́мъ, ꙗ҆́кѡ ѡ҆ наважде́нии бѣсо́встѣмъ: мно́га бо лѣ̑та слѣ́пъ бѣ̀, съ моли́твою зна́менїе креста̀ сотворѝ, ѡ҆бра́щьсѧ ко хра́мꙋ и҆ ᲂу҆зрѣ̀ чꙋ́днꙋю твою̀, влⷣчце, і҆кѡ́нꙋ, свѣтоза́рными лꙋча́ми во хра́мѣ блиста́вшꙋю, а҆́бїе ᲂу҆разꙋмѣ̀, ꙗ҆́кѡ ѿверзо́шасѧ ѻ҆́чи є҆гѡ̀ и҆ слꙋ́хъ є҆гѡ̀ ѿкры́сѧ, бл҃года́рственное прине́съ бг҃ꙋ, ди́вномꙋ въ дѣ́лѣхъ, пѣ́нїе: А҆ллилꙋ́їа.

І҆́косъ д҃

Слы́шавъ благовѣ́рный ца́рь всеѧ̀ рѡссі́и а҆леѯі́й, ꙗ҆́кѡ ѿ ст҃ы́ѧ і҆кѡ́ны твоеѧ̀, влⷣчце, ꙗ҆́же на горѣ̀ кра́снѣй, цѣльбы̀ многоразли́чныхъ недꙋ̑гъ ѡ҆би́льнѡ подаю́тсѧ, дадѐ повелѣ́нїе и҆гꙋ́менꙋ ѡ҆би́тели по градѡ́мъ и҆ ве́семъ вели́кїѧ держа́вы своеѧ̀ съ че́стїю подоба́ющею ю҆̀ ѡ҆бноси́ти: да прїе́млютъ стра́ждꙋщїи врачество̀ недꙋ́гѡвъ тѣле́сныхъ и҆ дꙋше́вныхъ и҆ во ᲂу҆миле́нїи серде́цъ взыва́ютъ тебѣ̀, влⷣчце:

Ра́дꙋйсѧ, хрⷭ҇та̀ бг҃а на́шегѡ ѡ҆сщ҃е́нный хра́ме: ра́дꙋйсѧ, неизрече́нныѧ є҆гѡ̀ сла́вы вмести́лище.

Ра́дꙋйсѧ, цр҃ѧ̀ црⷭ҇твꙋющихъ ѡ҆дꙋшевле́нный гра́де: ра́дꙋйсѧ, пала́то и҆ черто́же нбⷭ҇ный.

Ра́дꙋйсѧ, цр҃кви правосла́вныѧ похвало̀: ра́дꙋйсѧ, держа́вы рѡссі́йскїѧ крѣ́посте и҆ ᲂу҆твержде́нїе.

Ра́дꙋйсѧ, градѡ́въ и҆ ве́сей на́шихъ бл҃года́тное ѡ҆хране́нїе: ра́дꙋйсѧ, всѣ́хъ хрⷭ҇тїа́нъ, къ тебѣ̀ притека́ющихъ, непосты́дное ᲂу҆пова́нїе.

Ра́дꙋйсѧ, ѿ всѣ́хъ родѡ́въ досто́йнѡ ᲂу҆блажа́емаѧ: ра́дꙋйсѧ, всѣ́хъ на́съ ѿ бѣ́дъ и҆ скорбе́й прише́ствїемъ честна́гѡ твоегѡ̀ ѡ҆́браза и҆збавлѧ́ющаѧ.

Ра́дꙋйсѧ, сꙋ́щихъ въ стра́нствїи ко взыска́нїю го́рнѧгѡ гра́да направлѧ́ющаѧ: ра́дꙋйсѧ, пꙋтеводи́тельнице на́ша къ вѣ́чнымъ ѡ҆би́телємъ.

Ра́дꙋйсѧ, невѣ́сто неневѣ́стнаѧ.

Конда́къ є҃

Бг҃оте́чнѣй ѕвѣздѣ̀ подо́бна ꙗ҆ви́сѧ твоѧ̀, бг҃омт҃и, і҆кѡ́на, по во́ли твое́й свѧтѣ́й ѿ восто́ка на самꙋ́ю полꙋ́нощь принесе́ннаѧ, ю҆́же, ꙗ҆́кѡ да́ръ нбⷭ҇ный, воспрїе́мше и҆́ноцы красного́рстїи, поста́виша въ собо́рнꙋю це́рковь ѡ҆би́тели, и҆ въ весе́лїи поѧ́хꙋ благи́хъ пода́телю бг҃ꙋ: А҆ллилꙋ́їа.

І҆́косъ є҃

Ви́дѧщи среброковача̀ гаврїи́ла, ѕѣ́льнѣ пла́чꙋща пред̾ твои́мъ чꙋдотво́рнымъ ѡ҆́бразомъ, влⷣчце, ꙗ҆́кѡже бо тогда̀ ᲂу҆милосе́рдисѧ, сы́на є҆гѡ̀ на ѻ҆дрѣ̀ болѣ́зни лежа́ща воздви́гла и҆ здра́ва сотвори́ла є҆сѝ, си́це и҆ ѡ҆ мнѣ̀ ᲂу҆милосе́рдисѧ, пребл҃гослове́ннаѧ бцⷣе, и҆ грѣхмѝ ᲂу҆мерщвле́ннꙋю мою̀ дꙋ́шꙋ воскресѝ, зовꙋ́щꙋ:

Ра́дꙋйсѧ, мт҃и цр҃ѧ̀ живота̀ и҆ побѣди́телѧ сме́рти: ра́дꙋйсѧ, бл҃говоле́нїе сн҃а твоегѡ̀, хрⷭ҇та̀ бг҃а на́шегѡ, на́мъ стѧжа́вшаѧ.

Ра́дꙋйсѧ, свѣ́тлыми лꙋча́ми чꙋде́съ ѿ ст҃ы́ѧ твоеѧ̀ і҆кѡ́ны странꙋ̀ рѡссі́йскꙋю ѡ҆зарѧ́ющаѧ: ра́дꙋйсѧ, бога̑тыѧ да́ры и҆сцѣле́нїй и҆ млⷭ҇ти просѧ́щымъ тѧ̀ пред̾ чꙋ́дною твое́ю і҆кѡ́ною и҆сточа́ющаѧ.

Ра́дꙋйсѧ, молє́нїѧ на̑ша, приноси̑маѧ тебѣ̀ съ вѣ́рою и҆ любо́вїю ми́лостивнѡ прїе́млющаѧ: ра́дꙋйсѧ, тѣле́сныѧ недꙋ̑ги вѣ́рнѡ почита́ющихъ тѧ̀ ско́ро и҆сцѣлѧ́ющаѧ.

Ра́дꙋйсѧ, печа́ль на́шꙋ въ ра́дость претворѧ́ющаѧ: ра́дꙋйсѧ, ѿ сле́зъ и҆ скорбе́й на́съ и҆збавлѧ́ющаѧ.

Ра́дꙋйсѧ, ско́рбныхъ ѡ҆ ча́дѣхъ роди́телей ᲂу҆тѣше́нїе: ра́дꙋйсѧ, ча̑дъ и҆́хъ бл҃года́тное ѡ҆хране́нїе и҆ сп҃се́нїе.

Ра́дꙋйсѧ, покро́ве на́мъ въ животѣ̀ и҆ по сме́рти: ра́дꙋйсѧ, сп҃се́нїе на́ше на пра́ведномъ сꙋдѣ̀ бж҃їемъ.

Ра́дꙋйсѧ, невѣ́сто неневѣ́стнаѧ.

Конда́къ ѕ҃

Проповѣ́дника творѧ́щи кꙋпца̀ геѡ́ргїѧ во́ли своеѧ̀, рекла̀ є҆сѝ къ немꙋ̀, влⷣчце: приста́вникъ и҆мѣ́нїѧ твоегѡ̀ стефа́нъ, сы́й въ персі́дѣ, кꙋпѝ тебѣ̀ безцѣ́нный би́серъ, є҆гда̀ же принесе́тъ къ тебѣ̀, ты̀ послѝ ѻ҆́ный въ дви́нскꙋю ѡ҆́бласть, на чермнꙋ́ю го́рꙋ. позна́въ ᲂу҆́бѡ ѡ҆ се́мъ геѡ́ргїй твоѐ, пречⷭ҇таѧ, къ мѣ́стꙋ томꙋ̀ ѻ҆со́бое бл҃говоле́нїе, воспрѧнꙋ́ воспѣ́ти къ ро́ждшемꙋсѧ ѿ тебє̀ бг҃ꙋ: А҆ллилꙋ́їа.

І҆́косъ ѕ҃

Возсїѧ́ла сла́ва бж҃їѧ на ст҃ѣ́й горѣ̀ кра́снѣй ѿ пречꙋ́дныѧ твоеѧ̀ і҆кѡ́ны, бг҃омт҃и, пред̾ не́юже предстоѧ́ще, со ᲂу҆миле́нїемъ мо́лимсѧ тѝ: ᲂу҆слы́ши на́съ, вопїю́щихъ тебѣ̀ ᲂу҆се́рднѡ:

Ра́дꙋйсѧ, го́рꙋ полꙋ́нощнꙋю прише́ствїемъ чꙋдотво́рнагѡ твоегѡ̀ ѡ҆́браза ѡ҆сѣни́вшаѧ: ра́дꙋйсѧ, чꙋде́съ неѡскꙋдѣва́ющїй и҆сто́чникъ на не́й ꙗ҆ви́вшаѧ.

Ра́дꙋйсѧ, млⷭ҇рдїе и҆ любо́вь твою̀ къ ѡ҆би́тели и҆́нокѡвъ показа́вшаѧ: ра́дꙋйсѧ, бл҃го́е ѡ҆ не́й промышле́нїе своѐ ꙗ҆ви́вшаѧ.

Ра́дꙋйсѧ, тѣлє́сныѧ недꙋ̑ги на́ша врачꙋ́ющаѧ: ра́дꙋйсѧ, въ дꙋше́вныхъ ско́рбехъ на́съ ᲂу҆тѣша́ющаѧ.

Ра́дꙋйсѧ, бл҃гоче́стїѧ наста́внице: ра́дꙋйсѧ, и҆́ноческагѡ житїѧ̀ рꙋководи́тельнице.

Ра́дꙋйсѧ, дѡ́брыѧ ко сп҃се́нїю дꙋ́шъ ѡ҆бѣ́ты прїе́млющаѧ: ра́дꙋйсѧ, благи̑мъ намѣ́ренїємъ и҆ начина́нїємъ на́шымъ спосо́бствꙋющаѧ.

Ра́дꙋйсѧ, ѕлы́ѧ ѿ наважде́нїѧ врага̀ быва́ємаѧ пѡ́мыслы ѿ на́съ ѿгонѧ́ющаѧ: ра́дꙋйсѧ, вра̑жїѧ кѡ́зни, ꙗ҆́кѡ паꙋчи́нꙋ, расторга́ющаѧ.

Ра́дꙋйсѧ, невѣ́сто неневѣ́стнаѧ.

Конда́къ з҃

Хотѧ̀ да́ти бл҃гослове́нїе новоꙋстро́еннѣй ѡ҆би́тели и҆́нокѡвъ, раі́ѳской нарече́ннѣй, а҆рхїпа́стырь каза́нскїй лаѵре́нтїй, ли́къ тво́й, влⷣчце, ѿ чꙋдотво́рнагѡ твоегѡ̀ красного́рскагѡ ѡ҆́браза тожде́ственнѡ списа́въ, торже́ственнѡ съ моле́бнымъ пѣ́нїемъ, во ѡ҆би́тель раі́фскꙋю внесѐ. свидѣ́телемъ же бы́въ соверши́вшихсѧ ѿ сеѧ̀ ст҃ы́ѧ твоеѧ̀, влⷣчце, і҆кѡ́ны зна́менїй и҆ чꙋде́съ, ра́достнѡ возопѝ бг҃ꙋ: А҆ллилꙋ́їа.

І҆́косъ з҃

Но́вꙋю кꙋпѣ́ль сїлѡа́мскꙋю зри́мъ, пречⷭ҇таѧ бцⷣе, хра́мъ тво́й, и҆́же въ раі́ѳѣ: всѧ́къ бо недꙋ́гъ и҆ всѧ́кꙋ ꙗ҆́зю дꙋше́внꙋю и҆ тѣле́снꙋю врачꙋ́еши съ вѣ́рою и҆ любо́вїю къ тебѣ̀ притека́ющихъ и҆ бл҃гоговѣ́йнѡ чтꙋ́щихъ и҆ лобыза́ющихъ ст҃ы́й ѡ҆́бразъ тво́й. сегѡ̀ ра́ди, и҆мꙋ́ще но́вое неизрече́нное сокро́вище твои́хъ ми́лостей, ра́достнѡ вопїе́мъ тѝ, пречⷭ҇таѧ:

Ра́дꙋйсѧ, кꙋпѣ́ль, въ не́йже дꙋшє́вныѧ недꙋ́ги на̑ша, врачꙋ́ютсѧ: ра́дꙋйсѧ, и҆сто́чниче жа́ждꙋщымъ во́дꙋ жи́зни и҆сточи́вшїй.

Ра́дꙋйсѧ, слѣпы̑мъ тѣле́сныма ѻ҆чи́ма зрѣ́нїе подава́ющаѧ: ра́дꙋйсѧ, глꙋхи̑мъ слꙋ́хъ ѿверза́ющаѧ.

Ра́дꙋйсѧ, разсла́блєнныѧ тѣ́ломъ ᲂу҆креплѧ́ющаѧ: ра́дꙋйсѧ, лежа́щїѧ на ѻ҆дрѣ̀ болѣ́зней возставлѧ́ющаѧ.

Ра́дꙋйсѧ, пла́вающыѧ по вода́мъ ѿ бꙋ́рь и҆ потопле́нїѧ сп҃са́ющаѧ: ра́дꙋйсѧ, вла́ющїѧсѧ въ пꙋчи́нѣ жите́йскагѡ мо́рѧ къ ти́хомꙋ приста́нищꙋ сп҃се́нїѧ направлѧ́ющаѧ.

Ра́дꙋйсѧ, ѡ҆рꙋ́жїе, и҆́мже ᲂу҆страша́ютсѧ полкѝ де́мѡнскїѧ: ра́дꙋйсѧ, щи́те, и҆́мже покрыва́ютсѧ ѡ҆би́тєли и҆́нокѡвъ.

Ра́дꙋйсѧ, ти́хое пꙋстынножи́телей весе́лїе: ра́дꙋйсѧ, ти́хое ѡ҆бꙋрева́емыхъ въ се́мъ вѣ́цѣ приста́нище.

Ра́дꙋйсѧ, невѣ́сто неневѣ́стнаѧ.

Конда́къ и҃

Стра́ннѡ слы́шати и҆ неꙋдо́бнѡ разꙋмѣ́ти ѕлы́мъ невѣ́рїемъ ѡ҆мрачє́ннымъ, ка́кѡ ѿ ст҃ы́хъ і҆кѡ́нъ твои́хъ, влⷣчце, зна̑менїѧ и҆ чꙋдеса̀ быва́ютъ: на́мъ же те́плѣ вѣ́рꙋющымъ словесѝ, тобо́ю къ первоначерта́ннѣй бл҃говѣ́стникомъ є҆ѵⷢ҇льскихъ та́инъ ст҃ѣ́й і҆кѡ́нѣ рече́нномꙋ: блгⷣть ро́ждшагѡсѧ ѿ менє̀ и҆ моѧ̑ съ си́мъ ѡ҆́бразомъ да бꙋ́детъ, ᲂу҆до́бнѡ є҆́сть разꙋмѣ́ти и҆ пра́веднѡ ᲂу҆пова́ти, ꙗ҆́кѡ и҆ со ст҃о́ю твое́ю і҆кѡ́ною грꙋзи́нскою, блгⷣть твоѧ̀ и҆ си́ла пребыва́етъ вы́нꙋ. Сегѡ̀ ра́ди съ бл҃гоговѣ́йнымъ стра́хомъ предстоѧ́ще, чте́мъ и҆ воздае́мъ є҆́й че́сть, ꙗ҆́кѡ тебѣ̀ са́мой, на́мъ присꙋ́щей, ра́достнѡ пою́ще бг҃ꙋ: А҆ллилꙋ́їа.

І҆́косъ и҃

Всѧ̑ при́снѡ горѣ̀ сꙋ́щи и҆ съ нбⷭ҇ными си́лами вы́нꙋ пребыва́ющи, на́съ, земнорѡ́дныхъ, не ѡ҆ставлѧ́еши, бг҃омт҃и, те́плымъ предста́тельствомъ пред̾ сн҃омъ и҆ бг҃омъ твои́мъ, ма́тернее бо дерзнове́нїе къ немꙋ̀ и҆́маши. сегѡ̀ ра́ди предстоѧ́ще пречи́стомꙋ твоемꙋ̀ ѡ҆́бразꙋ, со слеза́ми покаѧ́нїѧ вопїе́мъ тѝ, бг҃ороди́тельнице:

Ра́дꙋйсѧ, пꙋтеводи́тельнице вѣ́рнаѧ, къ нбⷭ҇номꙋ ѻ҆те́чествꙋ до́брѣ на́съ направлѧ́ющаѧ: ра́дꙋйсѧ, мт҃и цр҃ѧ̀ нб҃сѝ и҆ землѝ, врата̀ ра́йскїѧ на́мъ ѿверза́ющаѧ.

Ра́дꙋйсѧ, домострои́тельнице, житїѐ на́ше къ нбⷭ҇номꙋ ᲂу҆строѧ́ющаѧ: ра́дꙋйсѧ, вѣ̑чнаѧ бла̑га сн҃а твоегѡ̀ на́мъ ꙗ҆влѧ́ющаѧ.

Ра́дꙋйсѧ, ѿ скорбе́й и҆ бѣ̑дъ здѣ̀ на́съ спаса́ющаѧ: ра́дꙋйсѧ, вѣ́чныхъ мꙋ́къ и҆ ѻ҆гнѧ̀ гее́нскагѡ по сме́рти на́съ и҆збавлѧ́ющаѧ.

Ра́дꙋйсѧ, всѣ́хъ притека́ющихъ съ вѣ́рою и҆ любо́вїю къ тебѣ̀ сꙋгꙋ́бѡ ми́лꙋющаѧ: ра́дꙋйсѧ, моли̑твы на̑ша, приноси̑мыѧ тебѣ̀ пред̾ чꙋдотво́рнымъ твои́мъ ѡ҆́бразомъ, ко прⷭ҇то́лꙋ сн҃а твоегѡ̀ и҆ бг҃а на́шегѡ возносѧ́щаѧ.

Ра́дꙋйсѧ, блага́ѧ на́ша помо́щнице: ра́дꙋйсѧ, непосты́дное на́ше ᲂу҆пова́нїе и҆ вѣ́рное сп҃се́нїе.

Ра́дꙋйсѧ, невѣ́сто неневѣ́стнаѧ.

Конда́къ ѳ҃

Всѧ́кагѡ є҆стества̀ а҆рха́гг҃льскагѡ и҆ а҆́гг҃льскагѡ превы́сшаѧ, херꙋві̑мъ и҆ серафі̑мъ честнѣ́йшаѧ, прест҃а́ѧ дв҃о: бг҃а бо цр҃ѧ̀ нбⷭ҇ныхъ си́лъ, невмѣсти́маго во ᲂу҆тро́бѣ свое́й вмѣсти́ла є҆сѝ, носѧ́щаго ве́сь мі́ръ дла́нїю на рꙋка́хъ носи́ла є҆сѝ, и҆ всѧ́кое є҆стество̀ пита́ющаго млеко́мъ пита́ла є҆сѝ. тѣ́мже вои́стиннꙋ ма́терь бж҃їю и҆ хода́таицꙋ ро́да хрⷭ҇тїа́нскагѡ тѧ̀ вѣ́дꙋще, со дерзнове́нїемъ вопїе́мъ бг҃ꙋ: А҆ллилꙋ́їа.

І҆́косъ ѳ҃

Вѣті̑и многовѣща̑нныѧ не вѣ́дѧтъ кі́ими словесы̀ бл҃гохва́льными подоба́етъ велича́ти тѧ̀, бг҃омт҃и, по достоѧ́нїю, недоꙋмѣ́етъ бо всѧ́къ ꙗ҆зы́къ досто́йнѡ пѣ́ти тѧ̀, бцⷣе: ѻ҆ба́че, блага́ѧ сꙋ́щи, прїимѝ ми́лостивнѡ, а҆́ще и҆ немощны́ми смы́слы сложє́ннаѧ, но ѿ чи́стагѡ се́рдца приноси̑маѧ тебѣ̀ въ похвалꙋ̀ сицєва́ѧ пѣ̑нїѧ:

Ра́дꙋйсѧ, пренепоро́чнаѧ ѻ҆трокови́це, превѣ́чнымъ совѣ́томъ ко сп҃се́нїю ро́да на́шегѡ и҆збра́ннаѧ: ра́дꙋйсѧ, же́но, є҆ѧ́же сѣ́мѧ сокрꙋшѝ главꙋ̀ дре́внѧгѡ ѕмі́ѧ.

Ра́дꙋйсѧ, въ жена́хъ пребл҃гослове́ннаѧ: ра́дꙋйсѧ, блгⷣть ᲂу҆ бг҃а ѡ҆брѣ́тшаѧ.

Ра́дꙋйсѧ, а҆рха́гг҃льское вѣща́нїе ѡ҆ воплоще́нїи є҆ди́нагѡ ѿ ст҃ы́ѧ трⷪ҇цы смире́ннѡ прїѧ́вшаѧ: ра́дꙋйсѧ, кро́ткаѧ раба̀ гдⷭ҇нѧ.

Ра́дꙋйсѧ, сосꙋ́де, дх҃омъ бж҃їимъ ѡ҆сщ҃е́нный: ра́дꙋйсѧ, си́лою всевы́шнѧгѡ ѡ҆сѣне́ннаѧ.

Ра́дꙋйсѧ, сп҃си́телѧ на́шихъ дꙋ́шъ ро́ждшаѧ: ра́дꙋйсѧ, па́дшїй ро́дъ на́шъ съ правосꙋ́дїемъ бж҃їимъ примири́вшаѧ.

Ра́дꙋйсѧ, є҆де́мъ затворе́нный рождество́мъ твои́мъ мі́рꙋ ѿве́рзшаѧ: ра́дꙋйсѧ, ѿ плѣне́нїѧ а҆́да рождество́мъ твои́мъ свободи́вшаѧ.

Ра́дꙋйсѧ, невѣ́сто неневѣ́стнаѧ.

Конда́къ і҃

Спастѝ хотѧ́щи мнѡ́гїѧ лю́ди ѿ бѣ́дъ и҆ скорбе́й, всю́дꙋ ꙗ҆влѧ́еши, бг҃омт҃и, ро́дꙋ на́шемꙋ неѡскꙋдѣва́емый ѿ своеѧ̀ і҆кѡ́ны грꙋзи́нскїѧ и҆сто́чникъ млⷭ҇ти. красного́рскꙋю бо ѡ҆би́тель ѿ запале́нїѧ ѻ҆́гненнагѡ во дни́ ѻ҆́ны неврежде́ннꙋ сохрани́ла є҆сѝ, ᲂу҆гаси́вши свирѣ́пѣющꙋю ѡ҆́крестъ є҆ѧ̀ си́лꙋ ѻ҆́гненнꙋю, въ ца́рствꙋющемъ же гра́дѣ москвѣ̀ и҆ въ пꙋсты́ни раі́ѳстѣй блгⷣти стрꙋѝ ѿ і҆кѡ́ны твоеѧ̀ и҆сточа́еши всѣ̑мъ, съ вѣ́рою покланѧ́ющымсѧ тебѣ̀, и҆ во и҆ны́хъ градѣ́хъ и҆ ве́сехъ на́шихъ чтꙋ́щымъ тѧ̀ поле́зное подае́ши. тѣ́мже, прославлѧ́юще бг҃а, дарова́вшагѡ на́мъ ѡ҆ тебѣ̀ блгⷣть таковꙋ́ю, при́снѡ вопїе́мъ є҆мꙋ̀: А҆ллилꙋ́їа.

І҆́косъ і҃

Стѣна̀ є҆сѝ крѣ́пкаѧ, бцⷣе дв҃о, ѡ҆би́тели красного́рскїѧ и҆ пꙋсты́ни раі́ѳскїѧ ѡ҆гра́да несокрꙋши́маѧ, чи́нꙋ же и҆́ноческомꙋ ᲂу҆краше́нїе и҆ сла́ва. сегѡ̀ ра́ди, молѧ́щесѧ, вопїе́мъ тѝ, пречⷭ҇таѧ: покры́й съ вѣ́рою покланѧ́ющыѧсѧ тебѣ̀ пред̾ твои́мъ чꙋдотво́рнымъ ѡ҆́бразомъ ѿ бѣ́дъ и҆ скорбе́й, съ любо́вїю тебѣ̀ вопїю́щихъ:

Ра́дꙋйсѧ, крѣ́пкаѧ ѿ находѧ́щихъ на ны̀ напа́стей и҆ бѣ́дъ храни́тельнице: ра́дꙋйсѧ, ѻ҆би́телей и҆́ноческихъ неꙋсы́пнаѧ блюсти́тельнице.

Ра́дꙋйсѧ, ѿ свирѣ́пѣющагѡ пла́мене, во днѝ ѻ҆́ны, ѡ҆би́тель красного́рскꙋю, по те́пломꙋ моле́нїю и҆́нокѡвъ, ди́внѡ сохрани́вшаѧ: ра́дꙋйсѧ, бл҃горастворе́нїе воздꙋ́хѡвъ и҆ сп҃си́тельный до́ждь бл҃говре́меннѡ то́й ниспосла́вшаѧ.

Ра́дꙋйсѧ, житїѧ̀ чи́на и҆́ноческагѡ ᲂу҆краше́нїе и҆ добро́то: ра́дꙋйсѧ, въ бꙋ́рю и҆скꙋше́нїй и҆ бѣ́дъ на́съ сп҃са́ющаѧ.

Ра́дꙋйсѧ, помышлє́нїѧ на́ши ѡ҆сщ҃а́ющаѧ: ра́дꙋйсѧ, сердца̀ на̑ша ѡ҆чища́ющаѧ.

Ра́дꙋйсѧ, дꙋшегꙋби́тельный пла́мень страсте́й на́шихъ ᲂу҆гаша́ющаѧ: ра́дꙋйсѧ, мра́къ сатани́нскихъ и҆скꙋше́нїй разсѣѧва́ющаѧ.

Ра́дꙋйсѧ, житїю̀ на́шемꙋ бл҃гослове́нїе бж҃їе низводѧ́щаѧ: ра́дꙋйсѧ, мы́слєннаѧ ѻ҆чеса̀ на̑ша къ гѡ́рнимъ ѡ҆би́телємъ направлѧ́ющаѧ.

Ра́дꙋйсѧ, невѣ́сто неневѣ́стнаѧ.

Конда́къ а҃і

Пѣ́нїе хвале́бное прино́сѧтъ тѝ, влⷣчце, лю́дїе бг҃осп҃са́емагѡ гра́да а҆рха́нгельска, є҆гда̀ гра́дъ и҆́хъ є҆ди́ною въ лѣ́то ѡ҆сщ҃а́етсѧ прише́ствїемъ твоегѡ̀ чꙋдотво́рнагѡ ѡ҆́браза, и҆ со свѣти́льники и҆ кади̑льницы грѧдꙋ́ще во срѣ́тенїе є҆гѡ̀, ра́достнѡ вопїю́тъ бг҃ꙋ: А҆ллилꙋ́їа.

І҆́косъ а҃і

Свѣтоза́рными лꙋча́ми чꙋде́съ і҆кѡ́ны твоеѧ̀, влⷣчце, на ст҃ѣ́й горѣ̀ кра́снѣй немерца́емѡ сїѧ́етъ и҆ рѡссі́йскꙋю странꙋ̀ на́шꙋ правосла́внꙋю бл҃года́тнѡ ѡ҆зарѧ́етъ, прогонѧ́юще всѧ́кое те́мное дѣ́йство вра́жїе си́лою бж҃їею, побꙋжда́ющи на́съ пред̾ не́ю тебѣ̀, бг҃оизбра́ннаѧ ѻ҆трокови́це, хвалє́бнаѧ пѣ́нїѧ возноси́ти:

Ра́дꙋйсѧ, на пꙋтѝ на́шегѡ сп҃се́нїѧ неꙋгаси́мый свѣти́льниче вѣ́ры и҆ бл҃гоче́стїѧ: ра́дꙋйсѧ, лꙋчѐ незаходи́магѡ со́лнца.

Ра́дꙋйсѧ, немерца́ющаѧ во странѣ̀ на́шей правосла́вїѧ ѕвѣздо̀: ра́дꙋйсѧ, добродѣ́тели пꙋ́ть ѡ҆свѣща́ющаѧ.

Ра́дꙋйсѧ, зарѐ, со́лнце пра́вды ꙗ҆влѧ́ющаѧ: ра́дꙋйсѧ, свѣ́те, мра́къ невѣ́дѣнїѧ ѿгонѧ́ющаѧ.

Ра́дꙋйсѧ, кꙋпино̀ неѡпали́маѧ, бг҃а ꙗ҆ви́вшаѧ: ра́дꙋйсѧ, престо́ле ѻ҆́гненный вседержи́телѧ.

Ра́дꙋйсѧ, чистоты̀ сокро́вище: ра́дꙋйсѧ, цвѣ́те неꙋвѧда́емыѧ сла́вы.

Ра́дꙋйсѧ, вы́шнѧгѡ ѡ҆сщ҃е́нное бжⷭ҇твенное селе́нїе: ра́дꙋйсѧ, ꙗ҆́кѡ тобо́ю даде́сѧ ра́дость всѣ́мъ, тѧ̀, бцⷣе, зовꙋ́щымъ.

Ра́дꙋйсѧ, невѣ́сто неневѣ́стнаѧ.

Конда́къ в҃і

Блгⷣти твоеѧ̀ никогда́же ѡ҆скꙋдѣва́ющїѧ неизсѧка́емый и҆сто́чникъ ꙗ҆ви́ла є҆сѝ, бг҃ороди́тельнице, чꙋдотво́рнꙋю твою̀ і҆кѡ́нꙋ, ѿ неѧ́же всѝ скорбѧ́щїи и҆ ѡ҆бремене́ннїи грѣхи̑ мно́гими сп҃се́нїе и҆ цѣльбы̀ во всѧ̑ времена̀ прїе́млютъ и҆ ра́достнѡ ѡ҆ тебѣ̀ воспѣва́ютъ всебл҃го́мꙋ бг҃ꙋ: А҆ллилꙋ́їа.

І҆́косъ в҃і

Пою́ще твоѧ̑ пресла̑внаѧ чꙋдеса̀, бг҃омт҃и, ѿ ст҃ы́ѧ твоеѧ̀ і҆кѡ́ны неѡскꙋ́днѡ на́мъ подава́ємаѧ, и҆ всѧ̑ ᲂу҆пова́нїѧ на̑ша на тѧ̀, застꙋ́пнице, возлага́юще, со ᲂу҆миле́нїемъ вопїе́мъ тѝ:

Ра́дꙋйсѧ, непосты́дное хрⷭ҇тїа́нъ ᲂу҆пова́нїе въ бꙋ́дꙋщемъ вѣ́цѣ: ра́дꙋйсѧ, въ дѣ́ланїи за́повѣдей сн҃а твоегѡ̀ пребыва́ющихъ сп҃са́ющаѧ.

Ра́дꙋйсѧ, въ животѣ̀ се́мъ на́съ во здра́вїи сохранѧ́ющаѧ: ра́дꙋйсѧ, въ стра́шный ча́съ сме́рти на́съ не ѡ҆ставлѧ́ющаѧ.

Ра́дꙋйсѧ, вѣ̑рнымъ рабѡ́мъ твои́мъ хрⷭ҇тїа́нскꙋю кончи́нꙋ ᲂу҆строѧ́ющаѧ: ра́дꙋйсѧ, на сꙋдѣ̀ пра́веднѣмъ сн҃а твоегѡ̀ вѣ̑рнымъ слꙋга́мъ твои̑мъ вожделѣ́нный гла́съ є҆гѡ̀ слы́шати сподоблѧ́ющаѧ.

Ра́дꙋйсѧ, всѣ̑мъ хотѧ́щымъ сп҃сти́сѧ и҆ въ ра́зꙋмъ и҆́стины прїитѝ бл҃га́ѧ ѻ҆диги́трїе: ра́дꙋйсѧ, всѣ́хъ, въ сокрꙋше́нїи серде́чнѣмъ ка́ющихсѧ грѣ́шникѡвъ, несомнѣ́нное сп҃се́нїе.

Ра́дꙋйсѧ, рождество́мъ твои́мъ две́ри раѧ̀ мі́рꙋ ѿве́рзшаѧ: ра́дꙋйсѧ, земноро́дныхъ съ нбⷭ҇ными къ вѣ́чномꙋ весе́лїю сочета́вшаѧ.

Ра́дꙋйсѧ, ѿ а҆́гг҃лъ при́снѡ воспѣва́емаѧ: ра́дꙋйсѧ, и҆ ѿ земноро́дныхъ досто́йнѡ ᲂу҆бл҃жа́емаѧ.

Ра́дꙋйсѧ, невѣ́сто неневѣ́стнаѧ.

Конда́къ г҃і

Ѽ, всепѣ́таѧ мт҃и, прест҃а́ѧ гпⷭ҇жѐ, дв҃о бцⷣе, не ѿри́ни сїѐ ма́лое моле́нїе на́ше, смире́ннѡ приноси́мое тебѣ̀ ны́нѣ пред̾ чꙋдотво́рнымъ ѡ҆́бразомъ твои́мъ. презира́ющи бе́зднꙋ грѣхѡ́въ на́шихъ, и҆зба́ви всѣ́хъ на́съ ѿ бѣ́дъ и҆ скорбе́й въ животѣ̀ се́мъ и҆ грѧдꙋ́щыѧ вѣ́чныѧ и҆змѝ мꙋ̑ки нелицемѣ́рнѡ ѡ҆ тебѣ̀ вопїю́щихъ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆рха́гг҃лѡвъ и҆ а҆́гг҃лѡвъ чи́ни бл҃гоговѣ́йнѡ тебѣ̀ слꙋ́жатъ и҆ всѧ̑ нбⷭ҇ныѧ си́лы немо́лчными гла́сы тѧ̀, бцⷣе дв҃о, воспѣва́ютъ, ꙗ҆́кѡ ро́ждшꙋю нбⷭ҇ныхъ во́инствъ цр҃ѧ̀: мы́ же земноро́днїи, со тре́петомъ предстоѧ́ще чꙋдотво́рномꙋ ли́кꙋ твоемꙋ̀ бре́нными ᲂу҆стна́ми вопїе́мъ тѝ си́це:

Ра́дꙋйсѧ, ѿ всѣ́хъ родѡ́въ ко и҆скꙋпле́нїю ро́да на́шегѡ и҆збра́ннаѧ: ра́дꙋйсѧ, дх҃а ст҃а́гѡ дарова́нїй преиспо́лненнаѧ.

Ра́дꙋйсѧ, херꙋві́мѡвъ и҆ серафі́мѡвъ превозше́дшаѧ: ра́дꙋйсѧ, та́инствꙋ сп҃се́нїѧ ро́да человѣ́ческагѡ послꙋжи́вшаѧ.

Ра́дꙋйсѧ, ст҃о́е вмести́лище сло́ва бж҃їѧ: ра́дꙋйсѧ, неѡпи́санное сло́во ѻ҆́ч҃ее въ ложесна́хъ свои́хъ носи́вшаѧ.

Ра́дꙋйсѧ, прⷪ҇ро́ческихъ глаго́лѡвъ нело́жное и҆сполне́нїе: ра́дꙋйсѧ, винꙋ̀ прароди́телей ро́да на́шегѡ рождество́мъ твои́мъ и҆скꙋпи́вшаѧ.

Ра́дꙋйсѧ, предста́тельство ро́дꙋ хрⷭ҇тїа́нскомꙋ ѿ бг҃а дарова́нное: ра́дꙋйсѧ, сп҃се́нїѧ ро́да человѣ́ческагѡ нача́ло.

Ра́дꙋйсѧ, лѣ́ствице бжⷭ҇твеннагѡ снисхожде́нїѧ: ра́дꙋйсѧ, мо́сте ѿ землѝ къ нб҃сѝ земноро́дныхъ возводѧ́й.

Ра́дꙋйсѧ, невѣ́сто неневѣ́стнаѧ.

Конда́къ а҃

И҆збра́ннѣй ѿ всѣ́хъ родѡ́въ, бж҃їей мт҃ри и҆ цр҃и́цѣ пред̾ пречⷭ҇тымъ є҆ѧ̀ ѡ҆́бразомъ, со ᲂу҆миле́нїемъ хвалє́бнаѧ пѣ̑нїѧ прино́симъ: ты́ же, ꙗ҆́кѡ и҆мꙋ́щаѧ къ ро́дꙋ хрⷭ҇тїа́нскомꙋ милосе́рдїе неизрече́нное, ѿ бѣ́дъ и҆ скорбе́й и҆зба́ви всѣ́хъ на́съ тебѐ зовꙋ́щихъ:

Ра́дꙋйсѧ, невѣ́сто неневѣ́стнаѧ.

Моли́твы

Прїимѝ, всебл҃гомо́щнаѧ пречⷭ҇таѧ гпⷭ҇жѐ влⷣчце бг҃ороди́тельнице, сїѧ̑ честны̑ѧ да́ры ѿ на́съ, недосто́йныхъ рабѡ́въ твои́хъ, къ твоемꙋ̀ цѣльбоно́сномꙋ ѡ҆́бразꙋ пѣ́нїе возсыла́ющихъ со ᲂу҆миле́нїемъ, ꙗ҆́кѡ тебѣ̀ само́й сꙋ́щей тꙋ̀ и҆ послꙋ́шающей молє́нїѧ на̑ша и҆ подаю́щей съ вѣ́рою просѧ́щымъ по коемꙋ́ждо проше́нїю и҆ и҆сполне́нїе: скорбѧ́щымъ ско́рби ѡ҆блегча́еши, немощны́мъ здра́вїе да́рꙋеши, разсла́бленныхъ и҆ недꙋ́жныхъ и҆сцѣлѧ́еши и҆ ѿ бѣ́сныхъ бѣ́сы прогонѧ́еши, ѡ҆би̑димыѧ ѿ ѡ҆би́дъ и҆збавлѧ́еши, и҆ наси́лꙋемыхъ сп҃са́еши, грѣ́шныхъ проща́еши, прокаже́нныхъ ѡ҆чища́еши и҆ ма́лыхъ дѣте́й ми́лꙋеши, и҆ неплѡ́дныѧ ѿ непло́дства разрѣша́еши. є҆щѐ, гпⷭ҇жѐ влⷣчце, ѿ ᲂу҆́зъ и҆ темни́цъ свобожда́еши и҆ всѧ́кїѧ многоразли̑чныѧ стра̑сти и҆сцѣлѧ́еши и҆ ѻ҆́чныѧ болѣ̑зни врачꙋ́еши и҆ ѿ смертонѡ́сныѧ ꙗ҆́звы и҆збавлѧ́еши: всѧ̑ бо возмѡ́жна сꙋ́ть хода́тайствомъ твои́мъ къ сн҃ꙋ твоемꙋ̀, хрⷭ҇тꙋ̀ бг҃ꙋ на́шемꙋ. Ѽ всепѣ́таѧ мт҃и, пречⷭ҇таѧ бцⷣе! не преста́й моли́ти ѡ҆ на́съ, недосто́йныхъ рабѣ́хъ твои́хъ, сла́вѧщихъ тѧ̀ и҆ почита́ющихъ, и҆ поклонѧ́ющихсѧ пречи́стомꙋ ѡ҆́бразꙋ твоемꙋ̀ и҆ наде́ждꙋ и҆мꙋ́щихъ невозвра́тнꙋ, и҆ вѣ́рꙋ несꙋмнѣ́ннꙋ, къ тебѣ̀, приснодв҃ѣ, пресла́внѣй и҆ непоро́чнѣй, сла́вѧщихъ и҆ чтꙋ́щихъ и҆ пою́щихъ тѧ̀ во вѣ́ки вѣкѡ́въ. А҆ми́нь.

Къ тебѣ̀, бг҃оизбра́ннаѧ ѻ҆трокови́це, прест҃а́ѧ дв҃о бцⷣе, нб҃сѐ и҆ землѝ цари́це, припа́дающе вопїе́мъ: ᲂу҆слы́ши моле́нїй на́шихъ гла́съ и҆ не ѿвратѝ лица̀ твоегѡ̀ ѿ на́съ, недосто́йныхъ. прїимѝ, всебл҃га́ѧ, ѿ недосто́йныхъ ра̑бъ твои́хъ, чтꙋ́щихъ всече́стное и҆́мѧ твоѐ, и҆ съ вѣ́рою покланѧ́ющихсѧ тебѣ̀ пред̾ чꙋдотво́рнымъ твои́мъ ѡ҆́бразомъ, приноси́мое ны́нѣ те́плое моле́нїе на́ше: вознесѝ є҆̀ къ прⷭ҇то́лꙋ сн҃а твоегѡ̀, хрⷭ҇та̀ бг҃а на́шегѡ, да ми́лостивъ бꙋ́детъ къ непра́вдамъ на́шымъ и҆ не возда́стъ на́мъ по дѣлѡ́мъ на́шымъ, но да проба́витъ щедрѡ́ты своѧ̑. вѣ́мы, ꙗ҆́кѡ нѣ́смы досто́йни, по грѣхѡ́мъ на́шымъ, ѿ негѡ̀ поми́ловани бы́ти, а҆́ще не ты̀, влⷣчце, ᲂу҆мо́лиши є҆гѡ̀ ѡ҆ на́съ: всѧ̑ бо мо́жеши и҆спроси́ти ᲂу҆ негѡ̀, ма́тернее бо къ немꙋ̀ и҆́маши дерзнове́нїе. сегѡ̀ ра́ди къ тебѣ̀, ꙗ҆́кѡ всемо́щнѣй и҆ всебл҃го́й застꙋ́пницѣ на́шей прибѣга́емъ, ᲂу҆се́рднѡ молѧ́щесѧ: и҆спросѝ ᲂу҆ ро́ждшагѡсѧ ѿ тебѣ̀ є҆диноро́днагѡ сн҃а бж҃їѧ, хрⷭ҇та̀ бг҃а на́шегѡ, всѣ̑мъ на́мъ въ ст҃оѻте́честѣй правосла́вной вѣ́рѣ тве́рдое, до конца̀ дні́й на́шихъ пребыва́нїе и҆ во всѣ́хъ за́повѣдехъ гдⷭ҇нихъ неꙋкло́нное хожде́нїе, да про́чее вре́мѧ живота̀ на́шегѡ пожи́вше во всѧ́комъ бл҃гоче́стїи и҆ чистотѣ̀, сподо́бимсѧ ми́рныѧ хрⷭ҇тїа́нскїѧ кончи́ны и҆ до́брагѡ ѿвѣ́та на страшнѣ́мъ сꙋдѣ̀ сн҃а твоегѡ̀ и҆ бг҃а на́шегѡ. и҆ та́кѡ дости́гнемъ, под̾ кро́вомъ твоеѧ̀ по́мощи, живота̀ вѣ́чнагѡ во црⷭ҇твїи ѻ҆ц҃а̀ свѣ́тѡвъ, є҆мꙋ́же, кꙋ́пнѡ со є҆диноро́днымъ є҆гѡ̀ сн҃омъ и҆ ст҃ы́мъ дх҃омъ, подоба́етъ сла́ва, че́сть и҆ поклоне́нїе, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.