Православный календарь
Размер шрифта:

Ака́ѳістъ

<p>А҆ка́ѳїстъ ст҃и́телю петрꙋ̀, митрополі́тꙋ моско́вскомꙋ, всѣ́ѧ рѡссі́и чꙋдотво́рцꙋ.</p>

Свт. Петра, митр. Киевского (Московск.) (перен. мощ.) (1479) 6 сентября 2026

Конда́къ а҃

И҆збра́нный и҆ ди́вный въ чꙋдесѣ́хъ ст҃и́телю, рѡссі́йскїѧ цр҃кве первопресто́льниче, и҆ ᲂу҆се́рдный ѡ҆ дꙋша́хъ на́шихъ мл҃твенниче, ѻ҆́ч҃е на́шъ пе́тре! въ пѣ́снехъ восхвалѧ́емъ тѧ̀ съ любо́вїю, ст҃а́гѡ застꙋ́пника на́шего: ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, предста́тельствомъ твои́мъ нбⷭ҇нымъ, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, ст҃и́телю пе́тре, вели́кїй чꙋдотво́рче!

І҆́косъ а҃

А҆гг҃лоподо́бнѡ на землѝ пожи́лъ є҆сѝ, ст҃и́телю ѻ҆́ч҃е, и҆ ꙗ҆́кѡ а҆́гг҃лъ благі́й храни́тель ѻ҆те́чествїю твоемꙋ̀ ꙗ҆ви́лсѧ є҆сѝ не то́кмѡ въ житїѝ твое́мъ, но по честнѣ́мъ ᲂу҆спе́нїи твое́мъ, бл҃готворѧ̀ лю́демъ тѝ срѡ́днымъ, ѿ ни́хже слы́шиши бл҃гохвалє́нїѧ такѡва́ѧ:

Ра́дꙋйсѧ, бл҃гочести́выхъ роди́телей пло́де бг҃одарова́нный: ра́дꙋйсѧ, ко́рене бл҃га́гѡ вѣ́тве многопло́днаѧ.

Ра́дꙋйсѧ, пре́жде рожде́нїѧ твоегѡ̀, видѣ́нїемъ бжⷭ҇твеннымъ ро́ждшей тѧ̀ во и҆збра́нника бж҃їѧ пред̾ꙋка́занный.

Ра́дꙋйсѧ, во ᲂу҆тро́бѣ ма́терней ѡ҆сщ҃е́нный: ра́дꙋйсѧ, по рожде́нїи твое́мъ блгⷣтїю дх҃а ст҃а́гѡ просвѣще́нный.

Ра́дꙋйсѧ, сосꙋ́де бж҃їѧ блгⷣти и҆збра́нный.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ в҃

Ви́дѣвше честні́и роди́телїе твоѝ, пе́тре бг҃оизбра́нный, ꙗ҆́кѡ ко́снѡ въ ᲂу҆че́нїи кни́жнѣмъ преꙋспѣва́лъ є҆сѝ, ѡ҆ се́мъ тꙋжа́хꙋ: сїѐ же бы́сть по смотре́нїю бж҃їю, да не ѿ человѣ́къ, но свы́ше ѿ бг҃а, навы́кнеши ᲂу҆че́нїю нбⷭ҇номꙋ: ꙗ҆ви́выйсѧ бо тебѣ̀ мꙋ́жъ свѣ́телъ, въ ст҃и́тєльскїѧ ри̑зы ѡ҆блече́нный, рꙋко́ю коснꙋ́всѧ твоегѡ̀ ѧ҆зы́ка, бл҃гослове́нїемъ свои́мъ разрѣшѝ ко́сность твою̀, и҆ преиспо́лни тѧ̀ ра́зꙋма, ꙗ҆́кѡ пѣ́ти тебѣ̀ разꙋ́мнѡ бг҃ꙋ: А҆ллилꙋ́їа.

І҆́косъ в҃

Ра́зꙋмъ нбⷭ҇ный свы́ше тебѣ̀ дарова́сѧ, ᲂу҆го́дниче бж҃їй, и҆́мже до́брѣ ᲂу҆разꙋмѣ́лъ є҆сѝ, ꙗ҆́кѡ всѧ̑ кра̑снаѧ мі́ра сегѡ̀ ско́рѡ прехо́дѧтъ: тѣ́мже, двадесѧтолѣ́тнꙋ тѝ сꙋ́щꙋ, мі́ръ и҆ всѧ̑ блага̑ѧ є҆гѡ̀ ѡ҆ста́вилъ є҆сѝ, и҆ возжелѣ́лъ є҆сѝ и҆́нокъ бы́ти и҆ є҆ди́номꙋ хрⷭ҇тꙋ̀ рабо́тати. ѡ҆ се́мъ тѧ̀ хва́лимъ и҆ зове́мъ:

Ра́дꙋйсѧ, землѝ волы́нскїѧ ст҃о́е прозѧбе́нїе: ра́дꙋйсѧ, всеѧ̀ страны̀ рѡссі́йскїѧ дꙋхо́внаѧ лѣ́пото.

Ра́дꙋйсѧ, восхожде́нїѧ ѿ добродѣ́тели къ добродѣ́тели неви́димѡ соверши́вый: ра́дꙋйсѧ, соверше́нства ѡ҆ хрⷭ҇тѣ̀ бг҃омꙋ́дреннѡ дости́гнꙋвый.

Ра́дꙋйсѧ, послꙋша́нїѧ до́брый рачи́телю: ра́дꙋйсѧ, смире́нїѧ хрⷭ҇то́ва вѣ́рный подража́телю.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ г҃

Си́лою бж҃їею ᲂу҆крѣплѧ́емь, ѻ҆́ч҃е пе́тре, всѧ̑ послꙋша́нїѧ мнⷭ҇ты́рскаѧ до́брѣ проходи́лъ є҆сѝ во ѡ҆би́тели, и҆ ꙗ҆́кѡ ѕвѣзда̀ бг҃освѣ́тлаѧ, сїѧ́лъ є҆сѝ добродѣ́тельми є҆ѵⷢ҇льскими средѝ бра́тїи твоеѧ̀: тѣ́мже сщ҃е́нства са́номъ почте́нъ бы́лъ є҆сѝ, и҆ непоро́чнѡ возноси́лъ безкро́внꙋю же́ртвꙋ бг҃ꙋ, при́снѡ поѧ̀ є҆мꙋ̀ серафі́мскꙋю пѣ́снь: А҆ллилꙋ́їа.

І҆́косъ г҃

И҆мѣ́ѧ по́мыслъ чи́стъ и҆ непоро́чнꙋю дꙋ́шꙋ, пе́тре бг҃обл҃же́нне, ст҃ы́ѧ і҆кѡ̑ны и҆з̾ѡбража́ти наꙋчи́лсѧ є҆сѝ, и҆ бы́лъ є҆сѝ и҆зо́графъ бл҃гоговѣ́инъ, дѣ́ло рꙋ́къ свои́хъ посвѧща́ѧй бг҃ꙋ, и҆̀же пи̑санныѧ тобо́ю і҆кѡ̑ны чꙋдесы̀ мно́гими просла́ви: сегѡ̀ ра́ди хвале́бнѡ вопїе́мъ тѝ:

Ра́дꙋйсѧ, трꙋдолю́бче бл҃гослове́нный, трꙋди́выйсѧ во сла́вꙋ бж҃їю: ра́дꙋйсѧ, ꙗ҆́кѡ трꙋды̀ твоѧ̑ ст҃ы̑ѧ бг҃омъ просла́влени сꙋ́ть.

Ра́дꙋйсѧ, бжⷭ҇твенномꙋ є҆ѵⷢ҇лі́стꙋ лꙋцѣ̀ въ і҆кѡнописа́нїи подража́вый: ра́дꙋйсѧ, і҆кѡ́ны прест҃ы́ѧ бцⷣы бл҃голѣ́пнѡ написа́вый.

Ра́дꙋйсѧ, въ дꙋшѣ̀ твое́й ѡ҆́бразъ бж҃їй до́брѣ и҆з̾ѡбрази́вый: ра́дꙋйсѧ, се́рдце твоѐ въ хра́мъ трїѷпоста́сномꙋ бг҃ꙋ посвѧти́вый.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ д҃

Бꙋ́ри страсте́й и҆збѣжа́въ, ѻ҆́ч҃е пе́тре, къ ти́хомꙋ приста́нищꙋ безмо́лвїѧ кора́бль дꙋшѝ твоеѧ̀ напра́вилъ є҆сѝ, и҆ съ бл҃гослове́нїѧ настоѧ́телѧ твоегѡ̀, въ мѣ́стѣ безмо́лвнѣмъ, на рѣцѣ̀ ра́тѣ, посели́лсѧ є҆сѝ, да є҆ди́нъ є҆ди́номꙋ бг҃ꙋ порабо́таеши въ постѣ̀ и҆ моли́твѣ, воспѣва́ѧ є҆мꙋ̀ немо́лчнꙋю пѣ́снь хвалы̀: А҆ллилꙋ́їа.

І҆́косъ д҃

Слы́шавше лю́дїе бл҃гочести́вїи ѡ҆ твои́хъ добродѣ́телѣхъ, пе́тре прпⷣбне, прихожда́хꙋ къ тебѣ̀, бл҃гослове́нїѧ и҆ моли́твъ ѿ тебѣ̀ и҆́щꙋще, и҆́хже любе́знѡ прїима́лъ є҆сѝ, и҆ ѡ҆би́тель и҆́ноческꙋю на рѣцѣ̀ ра́тѣ ᲂу҆стро́илъ є҆сѝ, въ не́й же сп҃со́шасѧ мно́зи твои́мъ наставле́нїемъ бг҃омꙋ́дрымъ. тѣ́мже, ꙗ҆́кѡ сотвори́вшагѡ и҆ наꙋчи́вшагѡ, ᲂу҆бл҃жа́емъ тѧ̀ и҆ глаго́лемъ:

Ра́дꙋйсѧ, не попꙋсти́вый поги́бнꙋти бг҃омъ врꙋчє́ннымъ тебѣ̀ ѻ҆вца́мъ: ра́дꙋйсѧ, ᲂу҆строи́телю бл҃гоискꙋ́сный ѡ҆бщежи́тїѧ и҆́ноческагѡ.

Ра́дꙋйсѧ, ᲂу҆чи́телю пресла́дкїй бл҃гоче́стїю хрⷭ҇тїа́нскомꙋ: ра́дꙋйсѧ, возше́дый на высотꙋ̀ соверше́нства дꙋхо́внагѡ.

Ра́дꙋйсѧ, дости́гнꙋвый глꙋбины̀ смире́нїѧ хрⷭ҇тїа́нскагѡ.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ є҃

Бг҃оте́чное свѣти́ло бы́въ, во́лею пастыренача́льника хрⷭ҇та̀, на свѣ́щницѣ цр҃кве всерѡссі́йскїѧ поста́вленъ бы́лъ є҆сѝ, пе́тре бг҃оно́сне, да свѣ́тиши ѻ҆те́чествꙋ твоемꙋ̀ земно́мꙋ, и҆ приво́диши къ сл҃нцꙋ пра́вды лю́ди рѡссі̑йскїѧ, наꙋча́ѧ и҆́хъ бл҃гоче́стнѡ воспѣва́ти прест҃ѣ́й трⷪ҇цѣ: А҆ллилꙋ́їа.

І҆́косъ є҃

Ѡ҆щꙋти́въ патрїа́рхъ царѧгра́да, ст҃ѣ́йшїй а҆ѳана́сїй, ꙗ҆́кѡ бл҃гоꙋха́нїемъ ди́внымъ и҆спо́лнисѧ ве́сь хра́мъ є҆гда̀ въ него̀ вше́лъ є҆сѝ, пе́тре досточꙋ́дне, позна̀ тѧ̀ и҆збра́нника бж҃їѧ, досто́йнаго вои́стиннꙋ са́на ст҃и́тельскагѡ, и҆ поста́ви тѧ̀ въ митрополі́та кі́евскагѡ, и҆ всеѧ̀ рѡссі́и: семꙋ́ же быва́ющꙋ, просвѣти́сѧ лицѣ̀ твоѐ свѣ́томъ нбⷭ҇нымъ: мы́ же дивѧ́щесѧ таково́мꙋ чꙋдесѝ, вопїе́мъ тѝ:

Ра́дꙋйсѧ, а҆рхїере́е бж҃їй, ѿ пастыренача́льника хрⷭ҇та̀ свы́ше просла́вленный: ра́дꙋйсѧ, і҆ера́рше хрⷭ҇то́въ дара́ми ст҃а́гѡ дх҃а преиспо́лненный.

Ра́дꙋйсѧ, а҆пⷭ҇лѡвъ прее́мниче и҆ ст҃и́телей сопресто́льниче: ра́дꙋйсѧ, въ рѡссі́йстѣй странѣ̀ свѣ́томъ бл҃горазꙋ́мїѧ возсїѧ́вый.

Ра́дꙋйсѧ, па́ствꙋ всерѡссі́йскꙋю дꙋхо́внѡ ᲂу҆добри́вый: ра́дꙋйсѧ, свѣтоно́сный первопресто́льникъ въ не́й бы́вый.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ ѕ҃

Проповѣ́далъ є҆сѝ па́ствѣ твое́й неле́стное є҆ѵⷢ҇льское ᲂу҆че́нїе, ст҃и́телю приснопа́мѧтне, и҆ всѣ́хъ ᲂу҆чи́лъ є҆сѝ ми́ръ и҆мѣ́ти междꙋ̀ собо́ю: ми́ра люби́тель бы́въ, враждова́вшихъ на тѧ̀ въ любо́вь приве́лъ є҆сѝ кро́тостїю и҆ неѕло́бїемъ твои́мъ, ꙗ҆́кѡ все́й па́ствѣ твое́й ра́доватисѧ ѡ҆ тебѣ̀, и҆ хвале́бнѡ взыва́ти ко гдⷭ҇ꙋ: А҆ллилꙋ́їа.

І҆́косъ ѕ҃

Возсїѧ́лъ є҆сѝ въ странѣ̀ рѡссі́йстѣй свѣ́томъ до́брыхъ дѣ́лъ твои́хъ, ст҃и́телю ѻ҆́ч҃е на́шъ пе́тре, и҆ є҆реті́чєскїѧ пле́велы не лѣ́ностнѡ и҆скоренѧ́лъ є҆сѝ въ па́ствѣ твое́й: ча̑да твоѧ̑ поꙋча́ѧ правосла́внѡ вѣ́ровати въ трїеди́наго бг҃а, и҆́же и҆ на́мъ внꙋша́етъ бл҃гохвали́ти тѧ̀ зва̑нїи си́ми:

Ра́дꙋйсѧ, сто́лпе непоколеби́мый а҆пⷭ҇льскихъ преда́нїй: ра́дꙋйсѧ, мечꙋ̀ ѻ҆бою́дꙋ ѡ҆́стрый, є҆́рєси посѣца́ѧй.

Ра́дꙋйсѧ, правосла́вїѧ наста́вниче, всѣ́хъ поꙋча́вый трⷪ҇ческомꙋ поклоне́нїю: ра́дꙋйсѧ, є҆ретїкѡ́въ противобо́рче, бо́дреннѡ стоѧ́вый на стра́же ст҃ы́ѧ хрⷭ҇то́вы цр҃кве.

Ра́дꙋйсѧ, вдо́въ и҆ сирѡ́тъ ми́лостивый пита́телю: ра́дꙋйсѧ, ѡ҆би́димыхъ и҆ гони́мыхъ нелицепрїѧ́тный предста́телю.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ з҃

Хотѧ̀ вра́гъ сп҃се́нїѧ человѣ́ческагѡ нарꙋ́шити ми́ръ дꙋшѝ твоеѧ̀, ст҃и́телю бг҃оꙋго́дне, воздви́же на тѧ̀ клеветника̀ ло́жнагѡ, тверска́гѡ є҆пі́скопа а҆ндре́а, глаго́лавшагѡ на тѧ̀ првⷣнагѡ беззако́нїе. ѡ҆ба́че пра́вда твоѧ̀, ꙗ҆́кѡ со́лнце въ полꙋ́дне, возсїѧ̀ на собо́рѣ, клеветни́къ же ѕло́бный посра́мленъ бы́сть, и҆ досто́йное по дѣ́ломъ свои́мъ полꙋчѝ, ты̀ же бл҃года́рственнѡ взыва́лъ є҆сѝ ко гдⷭ҇ꙋ: А҆ллилꙋ́їа.

І҆́косъ з҃

Но́во мѣ́сто престо́лꙋ твоемꙋ̀ ст҃и́тельскомꙋ и҆збра́лъ є҆сѝ, ᲂу҆го́дниче бж҃їй, во гра́дѣ москвѣ̀: возлюби́въ бо кро́ткаго и҆ бг҃олюби́ваго є҆ѧ̀ кнѧ́зѧ і҆ѡа́нна, та́мѡ посели́лсѧ є҆сѝ, и҆ це́рковь ка́меннꙋ, во и҆́мѧ ᲂу҆спе́нїѧ прест҃ы́ѧ бцⷣы, та́мѡ соѡрꙋди́ти кнѧ́зю і҆ѡа́ннꙋ совѣ́товалъ є҆сѝ, прⷪ҇ро́чески глаго́лѧ є҆мꙋ̀, ꙗ҆́кѡ гра́дъ то́й сла́венъ бꙋ́детъ, ст҃и́тели въ не́мъ поживꙋ́тъ и҆ бг҃ъ въ не́мъ просла́витсѧ, и҆ ꙗ҆́кѡ ко́сти твоѧ̑ въ не́мъ положены̀ бꙋ́дꙋтъ. сїѐ прⷪ҇ро́чество твоѐ и҆спо́лншеесѧ ви́дѧще, ра́достнѡ прино́симъ тѝ сїѧ̑ благохвалє́нїѧ:

Ра́дꙋйсѧ, црⷭ҇твїю рѡссі́йскомꙋ ѡ҆снова́нїе крѣ́пкое положи́вый: ра́дꙋйсѧ, первопресто́льный гра́дъ москвꙋ̀ благослове́нїемъ твои́мъ ѡ҆ст҃и́вый.

Ра́дꙋйсѧ, прозорли́вче бг҃опросвѣще́нный, бꙋ̑дꙋщаѧ, ꙗ҆́кѡ настоѧ̑щаѧ, прови́дѣвый: ра́дꙋйсѧ, хра́мъ прест҃ы́ѧ бцⷣы, честна́гѡ и҆ сла́внагѡ є҆ѧ̀ ᲂу҆спе́нїѧ, ѡ҆снова́вый.

Ра́дꙋйсѧ, въ не́мъ гро́бъ себѣ̀ ᲂу҆стро́ивый: ра́дꙋйсѧ, свѧ́тѡ и҆ бг҃оꙋго́днѡ на землѝ пожи́вый.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ и҃

Стра́нника и҆ прише́льца въ мі́рѣ се́мъ себѐ помышлѧ́ѧ ст҃и́телю ѻ҆́ч҃е на́шъ пе́тре, свои́ма рꙋка́ма гро́бъ ка́менный себѣ̀ ᲂу҆стро́илъ є҆сѝ, и҆ вы́нꙋ помина́лъ є҆сѝ ѡ҆ и҆схо́дѣ твое́мъ, къ немꙋ́же приꙋготовлѧ́лсѧ є҆сѝ мл҃твами непреста́нными, зовы́й бг҃ꙋ во ᲂу҆миле́нїи серде́чнѣмъ: А҆ллилꙋ́їа.

І҆́косъ и҃

Ве́сь въ бз҃ѣ бы́въ, ча́съ кончи́ны твоеѧ̀ прови́дѣлъ є҆сѝ дꙋ́хомъ, ѻ҆́ч҃е пе́тре, и҆ бжⷭ҇твеннꙋю лїтꙋргі́ю соверши́въ, ѡ҆ всѣ́хъ живы́хъ и҆ ᲂу҆со́пшихъ помоли́лсѧ є҆сѝ, себѐ же бра́шномъ неги́блющимъ пречⷭ҇тыхъ хрⷭ҇то́выхъ та́инъ напита́лъ є҆сѝ, и҆ ми́лостыню мно́гꙋ ни́щымъ и҆ ᲂу҆бѡ́гимъ разда́лъ є҆сѝ, приꙋготовлѧ́ѧсѧ къ срѣ́тенїю жениха̀ безсме́ртнагѡ хрⷭ҇та̀. сїѐ воспомина́юще, диви́мсѧ прозорли́вости твое́й, и҆ глаго́лемъ:

Ра́дꙋйсѧ, до́брое напꙋ́тствїе длѧ дꙋшѝ твое́й прїе́мый: ра́дꙋйсѧ, со хрⷭ҇то́мъ жи́ти на вѣ́ки возжела́вый.

Ра́дꙋйсѧ, любо́вїю бжⷭ҇твенною стра́хъ сме́ртный побѣди́вый: ра́дꙋйсѧ, ми́рнѡ и҆ ра́достнѡ ча́съ кончи́ны твоеѧ̀ срѣ́тивый.

Ра́дꙋйсѧ, ꙗ҆́кѡ пра́веднѡ и҆ непоро́чнѡ тече́нїе земно́е соверши́лъ є҆сѝ: ра́дꙋйсѧ, ꙗ҆́кѡ ᲂу҆спе́нїе прпⷣбное во мздꙋ̀ трꙋдѡ́мъ твои̑мъ, ѿ гдⷭ҇а полꙋчи́лъ є҆сѝ.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ ѳ҃

Всѝ царедво́рцы вели́кагѡ кнѧ́зѧ і҆ѡа́нна собра́шасѧ къ ѻ҆дрꙋ̀ твоемꙋ̀, ст҃и́телю хрⷭ҇то́въ: ты́ же, чрез̾ старѣ́йшаго и҆з̾ ни́хъ прота́сїа, ми́ръ и҆ благослове́нїе бж҃їе вели́комꙋ кнѧ́зю і҆ѡа́ннꙋ препо́далъ є҆сѝ, не бы́вшꙋ томꙋ̀ во гра́дѣ, и҆ съ свѣ́тлымъ лице́мъ воздѣ́въ горѣ̀ прпⷣбнѣи рꙋ́цѣ твоѝ, ᲂу҆се́рднѡ помоли́лсѧ є҆сѝ, и҆ та́кѡ въ мл҃твѣ бг҃ꙋ дꙋ́шꙋ твою̀ пре́далъ є҆сѝ, ю҆́же а҆́гг҃лы ст҃і́и въ гѡ́рнїѧ ѡ҆би́тєли вознесо́ша, съ пѣ́нїемъ ра́достнымъ: А҆ллилꙋ́їа.

І҆́косъ ѳ҃

Виті́и любомꙋ́дрїи прославлѧ́ютъ сла́вныхъ мі́ра сегѡ̀ дѣѧ̑нїѧ, мы́ же твои́мъ житїе́мъ честны́мъ красꙋ́емсѧ, ст҃и́телю бж҃їй, и҆ прославлѧ́емъ преставле́нїе твоѐ ст҃о́е и҆ мнѡ́гаѧ чꙋдеса̀, тобо́ю содѣ̑ѧннаѧ и҆ содѣва́ємаѧ ѿ ро́да въ ро́дъ: вои́стиннꙋ бо не вотщѐ чꙋдотво́рецъ и҆менꙋ́ешисѧ, пребл҃же́нне, и҆ досто́йнѡ слы́шиши хвалє́бныѧ пѣ̑сни такѡвы́ѧ:

Ра́дꙋйсѧ, въ мл҃твѣ ᲂу҆се́рднѣй дꙋ́хъ тво́й бг҃ꙋ преда́вый: ра́дꙋйсѧ, погребе́нїемъ честны́мъ ѿ вели́кагѡ кнѧ́зѧ і҆ѡа́нна почте́нный.

Ра́дꙋйсѧ, во хра́мѣ бг҃омт҃ри ᲂу҆ ст҃а́гѡ же́ртвенника положе́нный: ра́дꙋйсѧ, видѣ́нїемъ ди́внымъ, невѣ́ровавшаго въ свѧ́тость твою̀, въ вѣ́рꙋ ѡ҆брати́вый.

Ра́дꙋйсѧ, со ѻ҆дра̀ погреба́льнагѡ бл҃гословлѧ́ющий па́ствꙋ твою̀ ви́дѣнъ бы́вый: ра́дꙋйсѧ, во гро́бѣ тобо́ю ᲂу҆гото́ванномъ, ми́рнѡ почи́вый.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ і҃

Спа́са хрⷭ҇та̀ ᲂу҆молѧ́ти не престава́й за гра́дъ и҆ лю́ди, тѧ̀ почита́ющыѧ, ᲂу҆го́дниче бж҃їй, ст҃и́телю ѻ҆́ч҃е на́шъ пе́тре: тебѐ бо дарова̀ на́мъ гдⷭ҇ь помо́щника и҆ предста́телѧ во всѧ́кихъ бѣда́хъ и҆ напа́стехъ, и҆ гро́бъ тво́й ст҃ы́й содѣ́ла враче́бницꙋ безме́зднꙋю недꙋ́гѡвъ человѣ́ческихъ: къ немꙋ́же съ вѣ́рою и҆ любо́вїю припа́дающе, вопїе́мъ просла́вльшемꙋ тѧ̀ и҆ ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.

І҆́косъ і҃

Стѣно́ю мл҃твъ твои́хъ нбⷭ҇ныхъ, первопресто́льный гра́дъ москва̀ бл҃года́тнѡ ѡ҆гражда́етсѧ, и҆ свѣ́тлѡ красꙋ́етсѧ, и҆мѣ́ѧ въ себѣ̀ многоцѣле́бнꙋю ра́кꙋ ст҃ы́хъ твои́хъ моще́й, пе́тре чꙋдотво́рче, ꙗ҆́кѡ крі́нъ нетлѣ́нїемъ процвѣ́тшихъ, и҆ бл҃гоꙋха́нїе ст҃ы́ни и҆спꙋща́ющихъ: и҆́мже покланѧ́ющесѧ, ᲂу҆ми́льнѡ тебѣ̀ глаго́лемъ:

Ра́дꙋйсѧ, сме́рть вкꙋси́вый, тлѣ́нїѧ же не позна́вый: ра́дꙋйсѧ, и҆сцѣлє́нїѧ мнѡ́гаѧ ѿ ст҃ы́хъ твои́хъ моще́й и҆сточи́вый.

Ра́дꙋйсѧ, ю҆́ношꙋ разсла́бленнаго и҆ недви́жимаго ᲂу҆ гро́ба твоегѡ̀ здра́ва возста́вивый: ра́дꙋйсѧ, слѧче́ннаго и҆ ѿню́дъ восклони́тисѧ немо́гшаго, та́мѡ же прѧ́мѡ ходи́ти сотвори́вый.

Ра́дꙋйсѧ, глꙋхо́мꙋ слꙋ́хъ ѿве́рзый: ра́дꙋйсѧ, слѣпо́мꙋ зрѣ́нїе ми́лостивнѡ дарова́вый.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ а҃і

Пѣ́нїе моле́бное немо́лчнѡ бы́сть при гро́бѣ твое́мъ, ст҃и́телю ѻ҆́ч҃е на́шъ пе́тре, ѿ днѐ честна́гѡ преставле́нїѧ твоегѡ̀ до ны́нѣ, чꙋдесе́мъ свидѣ́тельствꙋющымъ ст҃ость твою̀, ю҆́же всѧ̀ рѡссі́йскаѧ цр҃ковь и҆сповѣ́дꙋетъ ꙗ҆́снѡ: мы́ же, ча̑да твоѧ̑ и҆ ѻ҆́вцы словє́сныѧ па̑ствы твоеѧ̀, ра́дꙋющесѧ ѡ҆ твое́мъ прославле́нїи на нб҃сѝ и҆ на землѝ, бл҃года́рственнѡ вопїе́мъ ст҃ы́хъ ст҃ѣ́йшемꙋ хрⷭ҇тꙋ̀ бг҃ꙋ: А҆ллилꙋ́їа.

І҆́косъ а҃і

Свѣтопода́тельный свѣти́льникъ бж҃їѧ блгⷣти, вои́стиннꙋ ꙗ҆влѧ́ешисѧ и҆ по сме́рти, пе́тре чꙋдотво́рче: тѣ́мже, сїѧ́нїемъ чꙋде́съ твои́хъ ѡ҆зарѧ́еми, съ любо́вїю чествꙋ́емъ ст҃ꙋ́ю па́мѧть, ꙗ҆́кѡ торжество̀ вѣ́ры и҆ бл҃гоче́стїѧ, и҆ ѿ ᲂу҆се́рдїѧ на́шегѡ прино́симъ тѝ пѣ̑нїѧ такѡва́ѧ:

Ра́дꙋйсѧ, а҆пⷭ҇лѡвъ во бл҃говѣ́стїи хрⷭ҇то́вѣ не лѣ́ностный подража́телю: ра́дꙋйсѧ, пе́рвагѡ і҆ера́рха мїхаи́ла досто́йный прїе́мниче.

Ра́дꙋйсѧ, прее́мникѡмъ твои̑мъ во ст҃и́тельствѣ до́брый споспѣ́шниче: ра́дꙋйсѧ, ѡ҆ всѣ́хъ лю́дехъ рѡссі́йскихъ ᲂу҆се́рдный мл҃твенниче.

Ра́дꙋйсѧ, пра́вило вѣ́ры и҆́стинныѧ и҆ ѡ҆́бразе кро́тости дꙋхо́вныѧ: ра́дꙋйсѧ, врачꙋ̀ безме́здный и҆ цѣле́бниче бл҃госострада́тельный.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ в҃і

Блгⷣть гдⷭ҇ню и҆ бл҃говре́меннꙋ по́мощь и҆спросѝ на́мъ, ᲂу҆го́дниче бж҃їй, во дни̑ безпомо́щїѧ на́шегѡ и҆ бꙋ́ди на́мъ въ ско́рбехъ ᲂу҆тѣ́шитель, въ бѣда́хъ застꙋ́пникъ, въ недꙋ́зѣхъ вра́чъ, тꙋ́не подава́ѧй на́мъ да̑ры цѣлє́бныѧ ѿ ст҃ы́хъ твои́хъ моще́й, къ ни́мъ же ᲂу҆се́рднѡ притека́юще, не тщы̀ ѿхо́димъ, но ᲂу҆ще́дреннїи тобо́ю вопїе́мъ бг҃ꙋ хвале́бнѡ: А҆ллилꙋ́їа.

І҆́косъ в҃і

Пою́ще чꙋдеса̀ твоѧ̑ и҆ мно́гое сострада́нїе твоѐ къ лю́демъ, ѻ҆́ч҃е на́шъ пе́тре, ᲂу҆се́рднѡ про́симъ твоегѡ̀ многомо́щнагѡ ко гдⷭ҇ꙋ предста́тельства: вѣ́мы бо, ꙗ҆́кѡ мл҃тва твоѧ̀, подо́бнѡ ѳѷмїа́мꙋ восхо́дитъ пред̾ вседержи́телѧ бг҃а, и҆ низво́дитъ на на́съ є҆гѡ̀ бл҃гослове́нїе, по́мощь и҆ млⷭ҇ть. тѣ́мже и҆ взыва́емъ къ тебѣ̀:

Ра́дꙋйсѧ, прест҃ы́ѧ трⷪ҇цы вѣ́рный и҆сповѣ́дниче: ра́дꙋйсѧ, прест҃ы́ѧ бцⷣы и҆зрѧ́дный слꙋжи́телю.

Ра́дꙋйсѧ, а҆́гг҃льскихъ во́инствъ собесѣ́дниче: ра́дꙋйсѧ, всѣ́хъ ст҃ы́хъ при́сный дрꙋ́же.

Ра́дꙋйсѧ, ѿ го́рнихъ высо́тъ къ земнорѡ́днымъ ми́лостивѡ приника́ѧй: ра́дꙋйсѧ, дꙋ́шы и҆ тѣлеса̀ на̑ша бл҃гоꙋтро́бнѡ врачꙋ́ѧй.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ г҃і

Ѽ чꙋдотво́рче пресла́вный и҆ помо́щниче всѣ̑мъ на́мъ ско́рый, и҆ ми́лостивый, ст҃и́телю ѻ҆́ч҃е на́шъ пе́тре! ми́лостивѡ прїе́мъ сїѐ ма́лое моле́нїе на́ше, въ похвалꙋ̀ тебѣ̀ приноси́мое, ᲂу҆молѝ гдⷭ҇а бг҃а дарова́ти на́мъ тѣле́сное здра́вїе и҆ дꙋше́вное сп҃се́нїе, да во црⷭ҇твїи нбⷭ҇нѣмъ сподо́бимсѧ пѣ́ти є҆мꙋ̀ со ст҃ы́ми: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆гг҃лоподо́бнѡ на землѝ пожи́лъ є҆сѝ, ст҃и́телю ѻ҆́ч҃е, и҆ ꙗ҆́кѡ а҆́гг҃лъ благі́й храни́тель ѻ҆те́чествїю твоемꙋ̀ ꙗ҆ви́лсѧ є҆сѝ не то́кмѡ въ житїѝ твое́мъ, но по честнѣ́мъ ᲂу҆спе́нїи твое́мъ, бл҃готворѧ̀ лю́демъ тѝ срѡ́днымъ, ѿ ни́хже слы́шиши бл҃гохвалє́нїѧ такѡва́ѧ:

Ра́дꙋйсѧ, бл҃гочести́выхъ роди́телей пло́де бг҃одарова́нный: ра́дꙋйсѧ, ко́рене бл҃га́гѡ вѣ́тве многопло́днаѧ.

Ра́дꙋйсѧ, пре́жде рожде́нїѧ твоегѡ̀, видѣ́нїемъ бжⷭ҇твеннымъ ро́ждшей тѧ̀ во и҆збра́нника бж҃їѧ пред̾ꙋка́занный.

Ра́дꙋйсѧ, во ᲂу҆тро́бѣ ма́терней ѡ҆сщ҃е́нный: ра́дꙋйсѧ, по рожде́нїи твое́мъ блгⷣтїю дх҃а ст҃а́гѡ просвѣще́нный.

Ра́дꙋйсѧ, сосꙋ́де бж҃їѧ блгⷣти и҆збра́нный.

Ра́дꙋйсѧ, ст҃и́телю пе́тре, вели́кїй чꙋдотво́рче!

Конда́къ а҃

И҆збра́нный и҆ ди́вный въ чꙋдесѣ́хъ ст҃и́телю, рѡссі́йскїѧ цр҃кве первопресто́льниче, и҆ ᲂу҆се́рдный ѡ҆ дꙋша́хъ на́шихъ мл҃твенниче, ѻ҆́ч҃е на́шъ пе́тре! въ пѣ́снехъ восхвалѧ́емъ тѧ̀ съ любо́вїю, ст҃а́гѡ застꙋ́пника на́шего: ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, предста́тельствомъ твои́мъ нбⷭ҇нымъ, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, ст҃и́телю пе́тре, вели́кїй чꙋдотво́рче!

Моли́твы

Ѽ вели́кїй ст҃и́телю, пресла́вный чꙋдотво́рче, рѡссі́йскїѧ цр҃кве первопресто́льниче, гра́да москвы̀ храни́телю и҆ ѡ҆ всѣ́хъ на́съ ᲂу҆се́рдный мл҃твенниче, ѻ҆́ч҃е на́шъ пе́тре! къ тебѣ̀ смире́ннѡ припа́даемъ и҆ мо́лимсѧ: прострѝ рꙋ́цѣ твоѝ ко гдⷭ҇ꙋ бг҃ꙋ, и҆ помоли́сѧ за ны̀ грѣ́шныѧ и҆ недосто́йныѧ рабы̀ є҆гѡ̀: да проба́витъ на́мъ млⷭ҇ть свою̀ и҆ низпо́слетъ на́мъ всѧ̑ бл҃гопотрє́бнаѧ къ вре́менномꙋ житїю̀ и҆ вѣ́чномꙋ сп҃се́нїю на́шемꙋ да̑ры бл҃гости є҆гѡ̀, наипа́че же, да ѡ҆гради́тъ на́съ ми́ромъ, братолю́бїемъ и҆ бл҃гоче́стїемъ ѿ всѣ́хъ и҆скꙋше́нїй врага̀ дїа́вола, и҆ да́рꙋетъ на́мъ бы́ти вѣ́рными ча́ды твои́ми, не по и҆́мени то́кмѡ, но и҆ всѣ́мъ житїе́мъ на́шимъ. мо́лимъ тѧ̀, ст҃и́телю хрⷭ҇то́въ, просѝ предста́тельствомъ твои́мъ ᲂу҆ нбⷭ҇нагѡ влⷣки: стра́ждꙋщꙋю странꙋ̀ рѡссі́йскꙋю въ ми́рѣ сохрани́ти. є҆́й, ᲂу҆го́дниче бж҃їй! ᲂу҆слы́ши на́съ бл҃гоꙋтро́бнѡ, и҆ бꙋ́ди на́мъ помо́щникъ и҆ застꙋ́пникъ во всѧ́кихъ бѣда́хъ и҆ напа́стехъ, не забꙋ́ди на́съ и҆ въ ча́съ кончи́ны на́шеѧ, є҆гда̀ наипа́че твоегѡ̀ застꙋпле́нїѧ потре́бꙋемъ, да при по́мощи мл҃твъ твои́хъ ст҃ы́хъ, сподо́бимсѧ и҆ мы̀ грѣ́шнїи, кончи́нꙋ бл҃гꙋ́ю полꙋчи́ти и҆ црⷭ҇твїе нбⷭ҇ное ᲂу҆наслѣ́дити, сла́вѧще ди́внагѡ во ст҃ы́хъ свои́хъ бг҃а на́шего, ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.