Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ прпⷣбномꙋ а҆рсе́нїю, коме́льскомꙋ чꙋдотво́рцꙋ.

Прп. Арсения, игум. Комельского, Вологодского (1550) 6 сентября 2026

Конда́къ а҃

И҆збра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, а҆рсе́нїе прпⷣбне, восхвалѧ́емъ тѧ̀, безмо́лвїѧ, терпѣ́нїѧ и҆ нищеты̀ дꙋхо́вныѧ ᲂу҆чи́телѧ. ты́ же ꙗ҆́кѡ и҆мѣ́ѧй дерзнове́нїе ко гдⷭ҇ꙋ, молѝ є҆го̀ и҆зба́вити ѡ҆би́тель твою̀ и҆ на́съ, грѣ́шныхъ, ѿ всѣ́хъ бѣ́дъ и҆ ско́рбныхъ ѡ҆бстоѧ́нїй, да со ᲂу҆миле́нїемъ зове́мъ тѝ:

Ра́дꙋйсѧ, а҆рсе́нїе, коме́льскїй чꙋдотво́рче.

І҆́косъ а҃

А҆́гг҃ла земна́гѡ и҆ нбⷭ҇нагѡ человѣ́ка зри́мъ тѧ̀, прпⷣбне: ты́ бо и҆змла́да ѻ҆ц҃а̀ нбⷭ҇нагѡ возлюби́лъ є҆сѝ и҆ томꙋ̀ є҆ди́номꙋ во́лю твою̀ порабо́тилъ є҆сѝ. сегѡ̀ ра́ди ᲂу҆блажа́емъ тѧ̀ си́це:

Ра́дꙋйсѧ, и҆змла́да гла́сꙋ бж҃їю въ со́вѣсти внима́вый: ра́дꙋйсѧ, ѡ҆́бразъ бж҃їй въ дꙋшѝ твое́й въ чистотѣ̀ храни́вый.

Ра́дꙋйсѧ, земно́е вели́чїе твоѐ по ро́дꙋ ни во что̀ вмѣни́вый: ра́дꙋйсѧ, ѿ ю҆́ности нищетꙋ̀ дꙋхо́внꙋю возлюби́вый.

Ра́дꙋйсѧ, смире́нїѧ ᲂу҆чи́телю: ра́дꙋйсѧ, дѣ́вства ревни́телю.

Ра́дꙋйсѧ, ѡ҆би́тель прпⷣбнагѡ се́ргїа, ꙗ҆́кѡ ти́хое приста́нище, и҆збра́вый: ра́дꙋйсѧ, житїю̀ се́ргїевꙋ ре́вностнѣ подража́вый.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ в҃

Ви́дѣвъ въ и҆́ночествѣ ѡ҆пло́тъ и҆ ѡ҆гражде́нїе ѿ сꙋеты̀ мїрскі́ѧ и҆ дꙋшевре́дныхъ по́мыслѡвъ, прпⷣбне, въ ю҆́ныхъ лѣ́тѣхъ, потща́лсѧ є҆сѝ прїѧ́ти на сѧ̀ а҆́гг҃льскїй ѡ҆́бразъ, смире́ннѣ взыва́ѧ всеви́дѧщемꙋ храни́телю дꙋ́шъ и҆ тѣле́съ: А҆ллилꙋ́їа.

І҆́косъ в҃

Ра́зꙋмъ тво́й, прпⷣбне ѻ҆́ч҃е, хрⷭ҇то́вымъ свѣ́томъ просвѣти́ти возжела́въ, вда́лсѧ є҆сѝ чте́нїю бжⷭ҇твенныхъ писа́нїй: ᲂу҆зрѣ́въ же по́льзꙋ ѿ сегѡ̀ дꙋшѝ твое́й, прїѧ́лъ є҆сѝ трꙋ́дъ списова́ти сщ҃є́нныѧ кни́ги и҆ тѣ́ми бли́жнихъ твои́хъ ᲂу҆мꙋдрѧ́ти. сицево́мꙋ твоемꙋ̀ ᲂу҆се́рдїю дивѧ́щесѧ, взыва́емъ тѝ:

Ра́дꙋйсѧ, пи́щи дꙋхо́вныѧ, па́че тѣле́сныѧ рачи́телю: ра́дꙋйсѧ, сщ҃е́нныхъ кни́гъ списа́телю.

Ра́дꙋйсѧ, ѡ҆ дꙋше́внѣй по́льзѣ собра́тїй твои́хъ ревнова́вый: ра́дꙋйсѧ, молвы̀ жите́йскїѧ и҆збѣжа́вый.

Ра́дꙋйсѧ, трꙋды̀ дꙋшеполє́зныѧ че́стнѣ почита́вый: ра́дꙋйсѧ, и҆́стиною хрⷭ҇то́вою, а҆́ки мече́мъ проти́вꙋ врага̀ дꙋше́внагѡ сп҃се́нїѧ воѻрꙋже́нный.

Ра́дꙋйсѧ, сло́вомъ гдⷭ҇нимъ, ꙗ҆́кѡ хлѣ́бомъ нбⷭ҇нымъ насыще́нный: ра́дꙋйсѧ, въ разли́чныхъ послꙋша́нїѧхъ и҆спы́танный.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ г҃

Си́лою свы́ше преꙋмꙋдре́нный, ты̀ свѧ́те а҆рсе́нїе, и҆збра́нъ бы́лъ є҆сѝ во и҆гꙋ́мена ѡ҆би́тели бг҃оно́снагѡ се́ргїа, и҆ возлага́ѧ наде́ждꙋ на є҆гѡ̀ многомо́щное предста́тельство пред̾ прⷭ҇то́ломъ прест҃ы́ѧ трⷪ҇цы, въ смире́нїи и҆ поко́рности є҆ѧ̀ ст҃ѣ́й во́ли, со стра́хомъ и҆ тре́петомъ взыва́лъ є҆сѝ: А҆ллилꙋ́їа.

І҆́косъ г҃

И҆мѣ́ѧ непреста́нное попече́нїе ѡ҆ ввѣ́ренныхъ твоемꙋ̀ води́тельствꙋ и҆́ноцѣхъ ѡ҆би́тели се́ргїевы, ты̀, прпⷣбне, пе́рвѣе ᲂу҆мно́жилъ є҆сѝ по́двиги твоѧ̑, прилага́ѧ трꙋды̀ ко трꙋдѡ́мъ. сегѡ̀ ра́ди возглаша́емъ тебѣ̀:

Ра́дꙋйсѧ, соверше́ннагѡ терпѣ́нїѧ наста́вниче: ра́дꙋйсѧ, смиренномꙋ́дрїѧ проповѣ́дниче.

Ра́дꙋйсѧ, наде́жный и҆́ночествꙋющихъ рꙋководи́телю: ра́дꙋйсѧ, прпⷣбныхъ се́ргїа, ні́кѡна, са́ввы и҆ про́чихъ ст҃ы́хъ и҆гꙋ́менѡвъ ла́ѵры се́ргїевы досто́йный прїе́мниче.

Ра́дꙋйсѧ, свѣщѐ на свѣ́щнице цр҃кве рѡссі́йскїѧ поста́вленнаѧ: ра́дꙋйсѧ, и҆́нокѡвъ до́брыхъ ѡ҆́бразе и҆ ᲂу҆краше́нїе.

Ра́дꙋйсѧ, бг҃ови вѣ́рный слꙋжи́телю: ра́дꙋйсѧ, прпⷣбныхъ є҆гѡ̀ нбⷭ҇ный сожи́телю.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ д҃

Бꙋ́рю внꙋ́трь и҆мѣ́ѧ помышле́нїй сꙋмни́тельныхъ, вели́кїй кнѧ́зь васі́лїй смꙋти́сѧ, ᲂу҆зрѣ́въ тѧ̀, прпⷣбне, и҆гꙋ́мена вели́кїѧ ла́ѵры въ ве́тсѣй и҆ многошве́йнѣй ѻ҆де́ждѣ: ᲂу҆вѣ́дѣвъ же ѿ бра́тїи ѡ҆ твое́мъ вели́цѣмъ смире́нїи и҆ нелицемѣ́рнѣй простотѣ̀, просла́ви смири́вшагѡ себє̀ до крⷭ҇тныѧ сме́рти гдⷭ҇а, зовы́й: А҆ллилꙋ́їа.

І҆́косъ д҃

Слы́шавше и҆́ноцы и҆ мїрсті́и лю́дїе ѡ҆ по́двизѣхъ твои́хъ, пресла́вне а҆рсе́нїе, прославлѧ́хꙋ гдⷭ҇а и҆ тебѐ, ꙗ҆́кѡ є҆гѡ̀ ᲂу҆го́дника. ты́ же, пребыва́ѧ въ ла́ѵрѣ послꙋша́нїѧ ра́ди и҆ бѣ́гаѧ сла́вы мїрскі́ѧ, поча́стꙋ ᲂу҆далѧ́лсѧ є҆сѝ во ѡ҆би́тель ма́хрищскꙋю, и҆дѣ́же ᲂу҆досто́илсѧ є҆сѝ ꙗ҆вле́нїѧ сла́вы бж҃їей на моще́хъ прпⷣбнагѡ стефа́на и҆ па́мѧть є҆гѡ̀ твори́ти ᲂу҆ста́вилъ є҆сѝ. послѣдѝ же по сло́вꙋ писа́нїѧ, взыскꙋ́ѧ грѧдꙋ́щагѡ гра́да, прпⷣбне, взе́мъ ст҃ы́й крⷭ҇тъ и҆ і҆кѡ́нꙋ пречⷭ҇тыѧ бцⷣы, та́йнѡ ᲂу҆дали́лсѧ є҆сѝ въ пꙋсты́ню, ча́ѧ бг҃а сп҃са́ющагѡ. сегѡ̀ ра́ди прїимѝ бл҃госе́рднѣ похвалы̑ сїѧ̑:

Ра́дꙋйсѧ, самоѿверже́нїѧ ᲂу҆чи́телю: ра́дꙋйсѧ, простоты̀ хрⷭ҇тїа́нскїѧ храни́телю.

Ра́дꙋйсѧ, прославле́нїѧ прпⷣбнагѡ стефа́на свидѣ́телю: ра́дꙋйсѧ, па́мѧти є҆гѡ̀ ᲂу҆станови́телю.

Ра́дꙋйсѧ, води́тельствꙋ про́мысла бж҃їѧ поко́рный: ра́дꙋйсѧ, бꙋ́имъ себѐ почита́вый.

Ра́дꙋйсѧ, гра́да грѧдꙋ́щагѡ и҆ска́вый: ра́дꙋйсѧ, го́рлице пꙋстыннолюби́ваѧ, ѿ мі́ра въ пꙋсты́ню возлетѣ́вшаѧ.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ є҃

Бг҃оте́чною ѕвѣздо́ю ꙗ҆ви́лсѧ є҆сѝ, бг҃омꙋ́дре а҆рсе́нїе, странѣ̀ во́логодстѣй, и҆ посели́лсѧ є҆сѝ въ ве́си ма́сленстѣй, и҆дѣ́же пред̾ си́мъ просла́висѧ ꙗ҆вле́нїемъ і҆кѡ́на прест҃ы́ѧ бцⷣы ѻ҆дїги́трїи, къ не́й же ꙗ҆́кѡ бл҃го́й пꙋтеводи́тельницѣ прите́клъ є҆сѝ зовы́й въ восхище́нїи дꙋхо́внѣмъ бг҃ꙋ: А҆ллилꙋ́їа.

І҆́косъ є҃

Ви́дѧще всѝ ѡ҆кре́стнїи и҆ проходѧ́щїи лю́дїе пꙋсты́нное твоѐ житїѐ и҆ по́двиги твоѧ̑, прославлѧ́хꙋ гдⷭ҇а, ꙗ҆ви́вшаго мі́рꙋ сицева́го ᲂу҆го́дника. мы́ же грѣ́шнїи, прино́симъ тѝ похвалы̑ сїѧ̑:

Ра́дꙋйсѧ, ѕвѣздо̀, странꙋ̀ во́логодскꙋю ѡ҆сїѧ́вшаѧ: ра́дꙋйсѧ, лозо̀ вертогра́да се́ргїева.

Ра́дꙋйсѧ, го́рдости прогони́телю: ра́дꙋйсѧ, и҆́га хрⷭ҇то́ва носи́телю.

Ра́дꙋйсѧ, темноты̀ наро́дныѧ просвѣти́телю: ра́дꙋйсѧ, пꙋсты́ни ма́сленскїѧ пе́рвый насе́льниче.

Ра́дꙋйсѧ, ѡ҆бꙋрева́емыхъ страстьмѝ приста́нище бл҃гоꙋти́шное: ра́дꙋйсѧ, ѡ҆би́димыхъ прибѣ́жище наде́жное.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ ѕ҃

Проповѣ́дникъ несꙋмнѣ́ннагѡ пꙋтѝ ко сп҃се́нїю ꙗ҆ви́лсѧ є҆сѝ, премꙋ́дрѣ а҆рсе́нїе, твои́ми трꙋды̀, безкоры́стїемъ и҆ терпе́нїемъ, на ни́хже взира́юще, ᲂу҆се́рднѣ сла́вимъ да́вшагѡ тѝ си́лꙋ и҆ крѣ́пость гдⷭ҇а, вопїю́ще є҆мꙋ̀: А҆ллилꙋ́їа.

І҆́косъ ѕ҃

Возсїѧ̀, ꙗ҆́кѡ со́лнце въ пꙋсты́ни ма́сленстѣй, но бѣ́гаѧ молвы̀ человѣ́ческїѧ, прпⷣбне, ѿше́лъ є҆сѝ въ непрохѡ́дныѧ дє́бри комє́льскїѧ, носѧ̀ смире́нїѧ ра́ди древѧ́ный крⷭ҇тъ, и҆ тꙋ̀ при рѣцѣ̀ ко́хотши, и҆дѣ́же но́ша съ ра́менъ твои́хъ спадѐ и҆ свѣ́тъ нбⷭ҇ный ѡ҆сїѧ̀ тѧ̀, поста́вилъ є҆сѝ крⷭ҇тъ и҆ посели́лсѧ є҆сѝ, ча́ѧ въ безмо́лвїи рабо́тати гдⷭ҇еви со стра́хомъ. сегѡ̀ ра́ди прїимѝ похвалы̑ сїѧ̑:

Ра́дꙋйсѧ, промышле́нїемъ бж҃їимъ въ пꙋсты́ню коме́льскꙋю приведе́нный: ра́дꙋйсѧ, свѣ́томъ нбⷭ҇нымъ здѣ̀ ѡ҆сїѧ́нный.

Ра́дꙋйсѧ, пꙋсты́ню сїю̀ ѿ всеѧ̀ дꙋшѝ возлюби́вый: ра́дꙋйсѧ, ѿ ко́зней вра́жескихъ ст҃ы́мъ крⷭ҇то́мъ себє̀ ѡ҆гради́вый.

Ра́дꙋйсѧ, покро́вꙋ прест҃ы́ѧ бцⷣы сѧ̀ преда́вый: ра́дꙋйсѧ, є҆ди́нагѡ на потре́бꙋ непреста́ннѣ и҆ска́вый.

Ра́дꙋйсѧ, славолю́бїѧ и҆скорени́телю: ра́дꙋйсѧ, соиме́нномꙋ тебѣ̀ вели́комꙋ а҆рсе́нїю вѣ́рный подража́телю.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ з҃

Хотѧ̀ вра́гъ ро́да человѣ́ча и҆згна́ти тѧ̀, прпⷣбне, и҆з̾ пꙋсты́ни коме́льскїѧ, мнѡ́га и҆скꙋшє́нїѧ тебѣ̀ дѣ́ѧше, но ты̀ ꙗ҆́кѡ тве́рдый а҆дама́нтъ неизмѣ́нне пребыва́лъ є҆сѝ въ любвѝ къ пꙋсты́ни, взыва́ѧ къ распѧ́томꙋ за ны̀ гдⷭ҇ꙋ: А҆ллилꙋ́їа.

І҆́косъ з҃

Нѡ́выѧ трꙋды̀ под̾ѧ́лъ є҆сѝ, блаже́нне а҆рсе́нїе, є҆гда̀, по внꙋше́нїю бж҃їю, ᲂу҆стро́ити ѡ҆би́тель въ пꙋсты́ни коме́льстѣй восхотѣ́лъ є҆сѝ и҆ сеѧ̀ ра́ди вины̀ ше́дъ нелѣ́ностнѣ во гра́дъ москвꙋ̀ и҆ смире́ннѣ пред̾ ѻ҆́чи царѧ̀ васі́лїа і҆ѡа́нновича предста́въ, моли́лъ є҆сѝ ѡ҆гради́ти ᲂу҆строѧ́емꙋю ѡ҆би́тель ѿ ѡ҆би́дъ и҆ ᲂу҆тѣсне́нїй, ꙗ҆̀же наꙋще́нїемъ вра́жескимъ дѣ́ѧша ѡ҆кре́стнїи лю́дїе. ца́рь же, вѣ́даѧ тѧ̀ ꙗ҆́кѡ ᲂу҆го́дника бж҃їѧ, и҆ и҆сполнѧ́ѧ писа́нїе: толкꙋ́щемꙋ ѿве́рзетсѧ, повелѣ̀ да́ти тебѣ̀ гра́мотꙋ во ѡ҆гражде́нїе ѡ҆би́тели. за сицєвы́ѧ твоѧ̑ трꙋды̀ и҆ по́двиги вопїе́мъ тѝ со ᲂу҆миле́нїемъ:

Ра́дꙋйсѧ, зла́то въ горни́лѣ терпѣ́нїѧ и҆скꙋше́нное: ра́дꙋйсѧ, би́сере честны́й, ѿ скве́рны грѣхо́вныѧ безмо́лвїемъ ѡ҆чище́нный.

Ра́дꙋйсѧ, пꙋсты́нныхъ ѡ҆би́телей ѡ҆снова́телю: ра́дꙋйсѧ, вражды̀ и҆ нестрое́нїѧ ᲂу҆страни́телю.

Ра́дꙋйсѧ, се́рдце цр҃е́во на млⷭ҇ть преклони́вый: ра́дꙋйсѧ, безмо́лвїе твоѐ ра́ди спⷭ҇нїѧ бли́жнихъ нарꙋ́шивый.

Ра́дꙋйсѧ, прибѣга́ющымъ къ тебѣ̀ въ нꙋ́ждахъ ᲂу҆се́рдный помо́щниче: ра́дꙋйсѧ, сꙋ́щымъ въ напа́стехъ ско́рый застꙋ́пниче.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ и҃

Стра́ннымъ твои́мъ житїе́мъ, прпⷣбне, пꙋ́стынѧ коме́льскаѧ ѡ҆зари́сѧ, є҆мꙋ́же внима́юще, ᲂу҆страни́мсѧ мі́ра, ᲂу҆́мъ на нб҃са̀ возло́жше, а҆́ще бо сп҃се́нїѧ дꙋше́внагѡ ра́ди и҆ ᲂу҆дали́лсѧ є҆сѝ въ пꙋсты́ню, но мно́зи пꙋстыннолю́бцы сокро́вищами дꙋшѝ твоеѧ̀ привле́клъ є҆сѝ, съ ни́миже ны́нѣ въ невече́рнемъ свѣ́тѣ сла́дкѡ воспѣва́еши свѣтопода́телю хрⷭ҇тꙋ̀: А҆ллилꙋ́їа.

І҆́косъ и҃

Ве́сь и҆спо́лненъ бы́лъ є҆сѝ любвѐ къ бг҃ꙋ и҆ бли̑жнимъ твои̑мъ, свѧ́те а҆рсе́нїе, и҆ сегѡ̀ ра́ди безро́потнѣ прїима́лъ є҆сѝ неисчє́тныѧ ѡ҆би̑ды ѿ гонѧ́щихъ тѧ̀ и҆з̾ пꙋсты́ни. є҆гда̀ же вре́меннѣ ѿше́дшꙋ тѝ и҆з̾ ке́ллїи твое́й, лю́дїе нечести́вїи нападо́ша на ню̀ и҆ келе́йнагѡ твоегѡ̀ ста́рца ᲂу҆би́ша, ты̀, прпⷣбне, въ вели́цѣй ско́рби и҆ поте́ри бра́та и҆ ѡ҆ дꙋхо́внѣй поги́бели тѣ́хъ бꙋ́їихъ люде́й, да́лъ є҆сѝ мѣ́сто гнѣ́вꙋ и҆ ᲂу҆дали́лсѧ є҆сѝ за три́десѧть по́прищъ въ де́брь шилего́дскꙋю, и҆дѣ́же пожи́лъ є҆сѝ въ соверше́ннѣмъ безмо́лвїи, до́ндеже ѿкры́тъ бы́лъ є҆сѝ ловце́мъ ѕвѣре́й. сицево́мꙋ терпѣ́нїю дивѧ́щесѧ, возглаша́емъ тѝ:

Ра́дꙋйсѧ, любвѐ хрⷭ҇то́вы вѣ́рный носи́телю: ра́дꙋйсѧ, сп҃си́тельнагѡ долготерпѣ́нїѧ ᲂу҆чи́телю.

Ра́дꙋйсѧ, ѡ҆би̑ды, ꙗ҆́кѡ воздаѧ́нїе за грѣхѝ, прїима́вый: ра́дꙋйсѧ, содѣ́ѧнное тебѣ̀ ѕло̀ неѕло́бїемъ покры́вый.

Ра́дꙋйсѧ, пꙋсты́ню шилего́дскꙋю житїе́мъ твои́мъ ѡ҆ст҃и́вый: ра́дꙋйсѧ, ꙗ҆вле́нїемъ твои́мъ ѕвѣре́й дꙋбра́вныхъ ᲂу҆диви́вый.

Ра́дꙋйсѧ, неви́ннѡ стра́ждꙋщихъ твои́мъ примѣ́ромъ ᲂу҆крѣпи́вый: ра́дꙋйсѧ, си́рыхъ и҆ ᲂу҆бо́гихъ покрови́телю.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ ѳ҃

Всѧ́кꙋю на́шꙋ ско́рбь ᲂу҆толѝ твое́ю многомо́щнꙋю по́мощїю, прпⷣбне а҆рсе́нїе, и҆ и҆спросѝ на́мъ ᲂу҆ гдⷭ҇а си́лꙋ и҆ крѣ́пость понестѝ крⷭ҇тъ сво́й до конца̀ живота̀, взыва́ѧ влⷣцѣ всѣ́хъ: А҆ллилꙋ́їа.

І҆́косъ ѳ҃

Вѣті̑ѧ многовѣща̑нныѧ, ꙗ҆́кѡ ры̑бы безгла̑сныѧ, ви́димъ ѡ҆ тебѣ̀, бг҃омꙋ́дре а҆рсе́нїе, недоꙋмѣ́ютъ бо досто́йнѣ восхвали́ти твоѧ̑ по́двиги. мы́ же грѣ́шнїи, любо́вїю къ тебѣ̀ подвиза́емїи, дерза́емъ ᲂу҆блажа́ти тѧ̀ си́це:

Ра́дꙋйсѧ, пꙋсты́нникѡвъ дре́внихъ, а҆нтѡ́нїа, па́ѵла, гера́сїма нелицемѣ́рный подража́телю: ра́дꙋйсѧ, хрⷭ҇та̀, не и҆мѣ́вшагѡ гдѣ̀ главы̀ преклони́ти, тве́рдый послѣ́дователю.

Ра́дꙋйсѧ, ѿ ѕвѣре́й лю́тыхъ почита́емый: ра́дꙋйсѧ, ѿ люде́й ѕвѣронра́вныхъ гони́мый.

Ра́дꙋйсѧ, ловцꙋ̀ ѕвѣре́й себѐ ꙗ҆ви́вый: ра́дꙋйсѧ, безкоры́стїемъ и҆ прозорли́востїю ловца̀ того̀ порази́вый.

Ра́дꙋйсѧ, но́вꙋю ѡ҆би́тель въ де́бри шилего́дстѣй ѡ҆снова́вый: ра́дꙋйсѧ, ꙗ҆́кѡ си́лою моли́твъ твои́хъ ѡ҆би́тель та̀ со всѣ́ми прите́кшими къ не́й ѿ наше́ствїѧ тата́ръ спасе́сѧ.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ і҃

Спастѝ хотѧ̀ дꙋ́шꙋ твою̀ на мѣ́стѣ, бг҃омъ ᲂука́занномъ тѝ, свѧ́те а҆рсе́нїе, вознаме́рилсѧ є҆сѝ возврати́тисѧ въ любе́знꙋю тебѣ̀ пꙋсты́ню коме́льскꙋю и҆ здѣ̀ ѡ҆би́тель ᲂу҆стро́ити: пе́рвѣе же ты̀ напра́вилъ є҆сѝ стѡпы̀ твоѧ̑ во гра́дъ москвꙋ̀ къ царю̀ васі́лїю і҆ѡа́нновичꙋ: и҆спроси́въ же ѿ негѡ̀ но́вꙋю гра́мотꙋ ра́ди пꙋсты́ни коме́льскїѧ, со ᲂу҆ченико́мъ гера́сїмомъ ѿше́лъ є҆сѝ и҆з̾ ѡ҆би́тели шилего́дскїѧ на пре́жнее мѣ́сто въ пꙋсты́ню коме́льскꙋю и҆ нача́лъ є҆сѝ ᲂу҆строѧ́ти ѡ҆би́тель во сла́вꙋ и҆ че́сть прест҃ы́ѧ бцⷣы, ю҆́же, ꙗ҆́кѡ непреста́ннꙋю помо́щницꙋ и҆ ско́рꙋю застꙋ́пницꙋ прославлѧ́ѧ, съ вѣ́рою и҆ наде́ждою взыва́лъ є҆сѝ бг҃ꙋ: А҆ллилꙋ́їа.

І҆́косъ і҃

Стѣна̀ є҆сѝ крѣ́пкаѧ ѡ҆би́тели твое́й и҆ всѣ̑мъ прибѣга́ющымъ, прпⷣбне а҆рсе́нїе, твои́мъ бо ст҃ы́мъ житїе́мъ мнѡ́гїѧ въ пꙋсты́ню привле́клъ є҆сѝ, сегѡ̀ ра́ди вопїе́мъ тѝ:

Ра́дꙋйсѧ, житїѧ̀ и҆́ноческагѡ мꙋ́дрый ᲂу҆строи́телю: ра́дꙋйсѧ, смире́нїѧ, цѣломꙋ́дрїѧ и҆ нестѧжа́тельности ре́вностный насади́телю.

Ра́дꙋйсѧ, земны́й а҆́гг҃ле и҆ нбⷭ҇ный человѣ́че: ра́дꙋйсѧ, къ тебѣ́ бо, ꙗ҆́кѡ мꙋ́дромꙋ наста́вникꙋ, и҆ска́вшїи соверше́нства прибѣга́хꙋ.

Ра́дꙋйсѧ, ꙗ҆́кѡ сло́вꙋ твоемꙋ̀ и҆ ѕвѣ́ри дꙋбра́внїи внима́хꙋ: ра́дꙋйсѧ, ѕлы́хъ серде́цъ ᲂу҆мѧгче́нїе.

Ра́дꙋйсѧ, ѡ҆би́тели твоеѧ̀ неꙋсы́пный попечи́телю: ра́дꙋйсѧ, пречⷭ҇тыѧ бцⷣы вѣ́рный слꙋжи́телю.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ а҃і

Пѣ́нїе ᲂу҆миле́нное а҆́ще и҆ прино́симъ тѝ, достохва́льне а҆рсе́нїе, ничто́же соверша́емъ досто́йнѡ, но ты̀, прпⷣбне, покры́й на́ше недосто́инство твои́мъ снисхожде́нїемъ и҆ наꙋчѝ ны̀ чи́стымъ се́рдцемъ воспѣва́ти просла́вившемꙋ тѧ̀ гдⷭ҇ꙋ: А҆ллилꙋ́їа.

І҆́косъ а҃і

Свѣтоза́рнымъ свѣти́ломъ возсїѧ́лъ є҆сѝ, прпⷣбне а҆рсе́нїе, въ пꙋсты́нѧхъ шилего́дстѣй и҆ коме́льстѣй, а҆́ще и҆ пресели́лсѧ є҆сѝ въ послѣ́днюю, но не забы́лъ є҆сѝ посѣща́ти и҆ пе́рвꙋю, ѡ҆блича́ѧ ѻ҆крє́стныѧ лю́ди въ нарꙋше́нїи и҆́ми за́повѣдей и҆ ᲂу҆ста́вѡвъ цр҃ко́вныхъ. пред̾ конце́мъ же живота̀ твоегѡ̀ ты̀, прпⷣбне, затвори́лсѧ є҆сѝ въ ке́ллїи твое́й и҆ нача́лъ є҆сѝ гото́витисѧ. послѣдѝ же собра́лъ є҆сѝ бра́тїю къ сме́ртномꙋ ѻ҆дрꙋ̀ твоемꙋ̀, молѧ̀ и҆́хъ и҆мѣ́ти любо́вь междꙋ̀ собо́ю, бл҃гослови́въ же и҆́хъ, ми́рнѡ пре́далъ є҆сѝ дꙋ́хъ тво́й бг҃ꙋ, и҆ погребе́нъ бы́лъ є҆сѝ во ѡ҆би́тели коме́льстѣй, и҆дѣ́же мо́щи твоѧ̑ тѡ́ки чꙋде́съ и҆злива́ютъ, подвиза́юще взыва́ти тебѣ̀:

Ра́дꙋйсѧ, свѣти́ло, свѣ́тъ сво́й ѿ хрⷭ҇та̀ воспрїѧ́вшее: ра́дꙋйсѧ, ꙗ҆́кѡ свѣ́томъ те́мъ пꙋсты̑ни ѡ҆свѣти́шасѧ.

Ра́дꙋйсѧ, за́повѣдей гдⷭ҇нихъ стро́гїй и҆сполни́телю: ра́дꙋйсѧ, нарꙋши́телей ѻ҆́ныхъ ско́рый ѡ҆бличи́телю.

Ра́дꙋйсѧ, кончи́нꙋ твою̀ пред̾ꙋзна́вый: ра́дꙋйсѧ, мо́щи твоѧ̑ во бл҃гослове́нїе ѡ҆би́тели да́вый.

Ра́дꙋйсѧ, ꙗ҆́кѡ мо́щи сїѧ̑ тѡ́ки чꙋде́съ и҆сточа́ютъ: ра́дꙋйсѧ, ꙗ҆́кѡ чꙋдеса̀ та̑ѧ восхвалѧ́ти тѧ̀ бл҃года́рнѣ подвиза́ютъ.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ в҃і

Благода́ти и҆сто́чникъ ст҃ы̑ѧ мо́щи твоѧ̑ и҆́мамы и҆ до дне́сь, бл҃же́нне а҆рсе́нїе, а҆́ще бо и҆ ѡ҆би́тель твоѧ̀ ᲂу҆бѣ́жищемъ и҆́нокинь ны́нѣ содѣ́лана бы́сть: въ црⷭ҇твїи бо нбⷭ҇нѣмъ нѣ́сть мꙋ́жескъ по́лъ, ни же́нскъ, но всѝ ро́ди, є҆ди́нымъ се́рдцемъ и҆ є҆ди́ными ᲂу҆сты̀, немо́лчнѣ славосло́вѧтъ пода́телѧ всѣ́хъ бла̑гъ ст҃а́гѡ дх҃а ᲂу҆тѣ́шителѧ, пою́ще є҆мꙋ̀: А҆ллилꙋ́їа.

І҆́косъ в҃і

Пою́ще твоѧ̑ по́двиги и҆ чꙋдеса̀, славосло́вимъ просла́вльшаго тѧ̀ гдⷭ҇а и҆ про́симъ тѧ̀, прпⷣбне а҆рсе́нїе, ѡ҆свѧтѝ, вразꙋмѝ и҆ наꙋчѝ ны̀, грѣ̑шныѧ, со ᲂу҆миле́нїемъ взыва́ти тебѣ̀:

Ра́дꙋйсѧ, бꙋ́їихъ вразꙋми́телю: ра́дꙋйсѧ, разсла́бленныхъ возстанови́телю.

Ра́дꙋйсѧ, слепы̑мъ зрѣ́нїе, глꙋхи̑мъ слы́шанїе, нѣмы̑мъ разрѣше́нїе ѧ҆зы́ка дарова́вый: ра́дꙋйсѧ, тре́звости ᲂу҆тверди́телю.

Ра́дꙋйсѧ, враждꙋ́ющихъ примири́телю: ра́дꙋйсѧ, со́вѣсти пробꙋди́телю.

Ра́дꙋйсѧ, дꙋшеполе́зныхъ бла̑гъ пода́телю: ра́дꙋйсѧ, не то́чїю ѡ҆би́тели твоеѧ̀, но и҆ всеѧ̀ ѡ҆́бласти во́логодскїѧ покрови́телю.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ г҃і

Ѽ прпⷣбне и҆ бг҃оно́сне ѻ҆́ч҃е на́шъ а҆рсе́нїе, прїимѝ ѿ на́съ недосто́йныхъ, ма́лое сїѐ моле́нїе и҆ бг҃опрїѧ́тнымъ хода́тайствомъ твои́мъ ᲂу҆молѝ гдⷭ҇а и҆зба́вити цр҃ковь правосла́внꙋю ѿ безвѣ́рїѧ, є҆ресе́й и҆ раско́лѡвъ, ѻ҆те́чество на́ше ѿ наше́ствїѧ и҆ноплеме́нныхъ, ѿ недꙋ́га и҆ гла́да, ѿ всѧ́кїѧ скѡ́рби и҆ смертоно́сныѧ ра́ны, ѡ҆би́тель же твою̀ и҆ на́съ всѣ́хъ ѿ вра̑гъ ви́димыхъ и҆ неви́димыхъ. да твои́мъ всемо́щнымъ застꙋпле́нїемъ ᲂу҆крѣплѧ́еми и҆ твое́ю любо́вїю согрѣва́еми съ вѣ́рою и҆ наде́ждою бл҃года́рнѣ вопїе́мъ творцꙋ̀ нб҃сѐ и҆ землѝ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃ла земна́гѡ и҆ нбⷭ҇нагѡ человѣ́ка зри́мъ тѧ̀, прпⷣбне: ты́ бо и҆змла́да ѻ҆ц҃а̀ нбⷭ҇нагѡ возлюби́лъ є҆сѝ и҆ томꙋ̀ є҆ди́номꙋ во́лю твою̀ порабо́тилъ є҆сѝ. сегѡ̀ ра́ди ᲂу҆блажа́емъ тѧ̀ си́це:

Ра́дꙋйсѧ, и҆змла́да гла́сꙋ бж҃їю въ со́вѣсти внима́вый: ра́дꙋйсѧ, ѡ҆́бразъ бж҃їй въ дꙋшѝ твое́й въ чистотѣ̀ храни́вый.

Ра́дꙋйсѧ, земно́е вели́чїе твоѐ по ро́дꙋ ни во что̀ вмѣни́вый: ра́дꙋйсѧ, ѿ ю҆́ности нищетꙋ̀ дꙋхо́внꙋю возлюби́вый.

Ра́дꙋйсѧ, смире́нїѧ ᲂу҆чи́телю: ра́дꙋйсѧ, дѣ́вства ревни́телю.

Ра́дꙋйсѧ, ѡ҆би́тель прпⷣбнагѡ се́ргїа, ꙗ҆́кѡ ти́хое приста́нище, и҆збра́вый: ра́дꙋйсѧ, житїю̀ се́ргїевꙋ ре́вностнѣ подража́вый.

Ра́дꙋйсѧ, а҆рсе́нїе, коме́льскїй чꙋдотво́рче.

Конда́къ а҃

И҆збра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, а҆рсе́нїе прпⷣбне, восхвалѧ́емъ тѧ̀, безмо́лвїѧ, терпѣ́нїѧ и҆ нищеты̀ дꙋхо́вныѧ ᲂу҆чи́телѧ. ты́ же ꙗ҆́кѡ и҆мѣ́ѧй дерзнове́нїе ко гдⷭ҇ꙋ, молѝ є҆го̀ и҆зба́вити ѡ҆би́тель твою̀ и҆ на́съ, грѣ́шныхъ, ѿ всѣ́хъ бѣ́дъ и҆ ско́рбныхъ ѡ҆бстоѧ́нїй, да со ᲂу҆миле́нїемъ зове́мъ тѝ:

Ра́дꙋйсѧ, а҆рсе́нїе, коме́льскїй чꙋдотво́рче.

Моли́твы

Ѽ сщ҃е́ннаѧ главо̀, прпⷣбне ѻ҆́ч҃е, и҆ преблаже́нный а҆́вво а҆рсе́нїе! не забꙋ́ди ни́щихъ на́съ до конца̀, но помина́й всегда̀ во ст҃ы́хъ твои́хъ и҆ бл҃гопрїѧ́тныхъ мл҃твахъ къ бг҃ꙋ. помѧнѝ ста́до твоѐ, є҆́же са́мъ ᲂу҆па́слъ є҆сѝ, и҆ не забꙋ́ди посѣща́ти ча́дъ твои́хъ: молѝ за ны̀, ѻ҆́ч҃е сщ҃е́нный, за дѣ́ти твоѧ̑ дꙋхѡ́вныѧ, ꙗ҆́кѡ и҆мѣ́ѧй дерзнове́нїе къ нбⷭ҇номꙋ цр҃ю̀. не премолчѝ за ны̀ ко гдⷭ҇ꙋ и҆ не пре́зри на́съ, вѣ́рою и҆ любо́вїю чтꙋ́щихъ тѧ̀, помѧнѝ на́съ недосто́йныхъ ᲂу҆ прⷭ҇то́ла вседержи́телева, и҆ не преста́й молѧ́сѧ ѡ҆ на́съ хрⷭ҇тꙋ̀ бг҃ꙋ: дана́ бо тебѣ̀ блгⷣть за ны̀ моли́тисѧ. Не мни́мъ тѧ̀ сꙋ̑ща ме́ртва, а҆́ще тѣ́ломъ и҆ преста́вилсѧ є҆сѝ ѿ на́съ, но и҆ по сме́рти ᲂу҆́бѡ жи́въ сы́й пребыва́еши: не ѿстꙋпа́й ѿ на́съ дꙋ́хомъ, сохранѧ́й на́съ ѿ стрѣ́лъ вра́жїихъ, и҆ всѧ́кїѧ пре́лести бѣсо́вскїѧ и҆ ко́зней дїа́вольскихъ, па́стырю на́шъ до́брый! а҆́ще моще́й твои́хъ ра́ка пред̾ ѻ҆чи́ма и҆ ви́дима є҆́сть всегда̀, но ст҃а́ѧ твоѧ̀ дꙋша̀, со а҆́гг҃льскими во́инствы, со безпло́тными ли́ки, съ нбⷭ҇ными си́лами, ᲂу҆ прⷭ҇то́ла вседержи́телева предстоѧ́щи, досто́йнѡ весели́тсѧ. тѣ́мже къ тебѣ̀ припа́даемъ, и҆ тебѣ̀ мо́лимъ, и҆ тебѣ̀ ми́ли сѧ дѣ́емъ, моли́сѧ ѡ҆ на́съ всеси́льномꙋ бг҃ꙋ ѡ҆ сп҃се́нїи дꙋ́шъ на́шихъ, и҆спросѝ на́мъ вре́мѧ на покаѧ́нїе, и҆ є҆́же невозбра́ннымъ прейтѝ ѿ землѝ на нб҃о, мыта́рствъ же го́рькихъ воздꙋ́шныхъ кнѧзе́й и҆ вѣ́чныѧ мꙋ́ки и҆зба́витисѧ, и҆ нбⷭ҇номꙋ црⷭ҇твїю наслѣ́дники бы́ти, со всѣ́ми пра́ведными, ѿ вѣ́ка ᲂу҆годи́вшими гдⷭ҇ꙋ на́шемꙋ і҆и҃сꙋ хрⷭ҇тꙋ̀, є҆мꙋ́же подоба́етъ всѧ́каѧ сла́ва, че́сть и҆ поклоне́нїе, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.