Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ пред̾ і҆кѡ́ною влади́мїрскою.

Сретение икн. Б.М. Владимирской в память чудесного спасения Москвы от нашествия Тамерлана (1395) 8 сентября 2026

Конда́къ а҃

Взбра́нной воево́дѣ, застꙋ́пнице на́шей, взира́юще на первопи́санный ѻ҆́бразъ тво́й, хвале́бное пѣ́нїе воспѣва́емъ тѝ рабѝ твоѝ, бг҃ома́ти. Ты́ же, ꙗ҆́кѡ и҆мꙋ́щаѧ держа́вꙋ непобѣди́мꙋю, сохранѝ и҆ сп҃сѝ благода́рнѣ тебѣ̀ вопїю́щыѧ:

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

І҆́косъ а҃

А҆́гг҃льскїѧ си́лы на нб҃сѝ немо́лчнѡ воспѣва́ютъ тѧ̀, пречⷭ҇таѧ, зрѧ́ще сла́вꙋ пребж҃е́ственнꙋю, є҆́юже сн҃ъ тво́й просла́ви тѧ̀. но и҆ на́съ, земны́хъ, не ѡ҆ста́вила є҆сѝ, ꙗ҆́кѡ нѣ́кꙋю лꙋчꙋ̀, низпосла́вши на́мъ і҆кѡ́нꙋ твою̀, ст҃ы́мъ лꙋко́ю первопи́саннꙋю. ѡ҆ не́й бо нѣ́когда и҆зрекла̀ є҆сѝ: съ си́мъ ѡ҆́бразомъ бл҃года́ть моѧ̀ и҆ си́ла да пребꙋ́дꙋтъ. Тѣ́мже вѣ́рнїи рабѝ твоѝ, по всѧ̑ дни̑ и҆ на всѧ́комъ мѣ́стѣ сбытїѐ слове́съ твои́хъ зрѧ́ще, ко ѡ҆́бразꙋ твоемꙋ̀ цѣльбоно́сномꙋ притека́емъ и҆, ꙗ҆́коже само́й тѝ, съ на́ми сꙋ́щей, вопїе́мъ:

Ра́дꙋйсѧ, а҆́гг҃лѡвъ цр҃и́це: ра́дꙋйсѧ, всегѡ̀ мі́ра влⷣчце.

Ра́дꙋйсѧ, на нб҃сѝ при́сно сла́вимаѧ: ра́дꙋйсѧ, и҆ на землѝ велича́емаѧ.

Ра́дꙋйсѧ, бл҃года́ть твою̀ і҆кѡ́нѣ твое́й се́й дарова́вшаѧ: ра́дꙋйсѧ, на сп҃се́нїе человѣ́кѡвъ тꙋ́ю поста́вившаѧ.

Ра́дꙋйсѧ, бж҃їѧ бл҃гости ско́раѧ пода́тельнице: ра́дꙋйсѧ, моле́нїй на́шихъ ᲂу҆се́рднаѧ послꙋ́шнице.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ в҃

Ви́дѧ чꙋде́съ мно́жество, ѿ принесе́нныѧ въ вы́шградъ ст҃ы́ѧ і҆кѡ́ны твоеѧ̀ быва́емое, бл҃говѣ́рный кнѧ́зь а҆ндре́й возгорѣ́сѧ дх҃омъ и҆ ᲂу҆молѧ́ше тѧ̀, да ска́жеши ст҃ꙋ́ю во́лю твою̀ и҆ да бл҃гослови́ши є҆гѡ̀ въ предѣ́лы росто́вскїѧ ѿитѝ. Тѣ́мже ᲂу҆лꙋчи́въ жела́емое и҆ і҆кѡ́нꙋ твою̀ взе́мъ, и҆дѧ́ше въ пꙋ́ть сво́й, ра́дꙋѧсѧ и҆ поѧ̀ бг҃ꙋ: А҆ллилꙋ́їа.

І҆́косъ в҃

Разꙋмѣ́ша всѝ лю́дїе ди́вное ше́ствїе твоѐ, цр҃и́це нбⷭ҇наѧ, ѿ кі́ева въ зе́млю росто́вскꙋю, болѧ́щїи бо и҆сцѣлѧ́хꙋсѧ и҆ и҆́на зна́мєнїѧ и҆ чꙋдеса̀ быва́хꙋ всѣ̑мъ съ вѣ́рою притека́ющымъ ко ѡ҆́бразꙋ твоемꙋ̀. Сегѡ̀ ра́ди воспѣ́ша тебѣ̀:

Ра́дꙋйсѧ, чꙋдесы̑ ше́ствїе і҆кѡ́ны твоеѧ̀ зна́менавшаѧ: ра́дꙋйсѧ, мнѡ́ги немощны̑ѧ и҆сцѣли́вшаѧ.

Ра́дꙋйсѧ, воздыха̑нїѧ на̑ша не ѿверга́ющаѧ: ра́дꙋйсѧ, недостѡ́йныѧ мл҃твы на̑ша прїе́млющаѧ.

Ра́дꙋйсѧ, мт҃рнїѧ щедрѡ́ты твоѧ̑ на на́съ и҆злива́ющаѧ: ра́дꙋйсѧ, і҆кѡ́ною твое́ю на́мъ бл҃годѣ́ющаѧ.

Ра́дꙋйсѧ, во ѡ҆бстоѧ́нїи сꙋ́щимъ ско́рꙋю по́мощь да́рꙋющаѧ: ра́дꙋйсѧ, ѿча̑ѧннымъ наде́ждꙋ возвраща́ющаѧ.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ г҃

Си́лою твое́ю ѡ҆гражда́емь, бл҃говѣ́рный кнѧ́зь а҆ндре́й предѣ̑лъ влади́мїрскихъ дости́же и҆ здѣ̀ бл҃гꙋ́ю во́лю твою̀, влⷣчце, позна̀. Въ нощно́мъ бо видѣ́нїи томꙋ̀ ꙗ҆́вльшисѧ, повелѣ́ла є҆сѝ ѿ мѣ́ста сегѡ̀ не ѿходи́ти и҆ чꙋдотво́рнꙋю і҆кѡ́нꙋ твою̀ здѣ̀, во гра́де влади́мїре, поста́вити, да бꙋ́детъ сѣ́вернѣй странѣ̀ на́шей въ бл҃гослове́нїе и҆ лю́демъ твои́мъ въ покро́въ, вопїю́щымъ бг҃ꙋ: А҆ллилꙋ́їа.

І҆́косъ г҃

И҆мѣ́ѧ въ себѣ̀ бл҃года́тное сокро́вище, і҆кѡ́нꙋ твою̀ влади́мїрскꙋю, преꙋспѣва́ше ѿ си́лы въ си́лꙋ ѻ҆те́чество на́ше. Во дни́ бо ѡ҆бстоѧ́нїй и҆ напа́стей не ѡ҆ста́вила є҆сѝ ро́дъ на́шъ, влⷣчце, и҆ во бл҃говре́менїи бли́з̾ была̀ є҆сѝ, всеси́льнымъ предста́тельствомъ твои́мъ вѣ̑рныѧ лю́ди твоѧ̑ застꙋпа́ющи, пою́щїѧ тѝ:

Ра́дꙋйсѧ, гнѣ́въ бж҃їй, пра́веднѡ на ны̀ дви́жимый, ᲂу҆толѧ́ющаѧ: ра́дꙋйсѧ, на млⷭ҇ть къ на́мъ, грѣ́шнымъ, гдⷭ҇а преклонѧ́ющаѧ.

Ра́дꙋйсѧ, ꙗ҆́кѡ смире́ннымъ мольба́мъ рабѡ́въ твои́хъ вне́млеши: ра́дꙋйсѧ, ꙗ҆́кѡ ᲂу҆тѣше́нїе твоѐ на́мъ пода́ти поспѣша́еши.

Ра́дꙋйсѧ, ꙗ҆́кѡ і҆кѡ́ною твое́ю ѿ всѧ́кихъ на́съ бѣ́дъ ѡ҆гражда́еши: ра́дꙋйсѧ, ꙗ҆́кѡ то́ю ко́зни вра́жїѧ разрꙋша́еши.

Ра́дꙋйсѧ, въ ча́съ ско́рби лю́ди твоѧ̑ ᲂу҆крѣплѧ́ющаѧ: ра́дꙋйсѧ, ти́хое и҆ безмѧте́жное житїѐ тѣ̑мъ да́рꙋющаѧ.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ д҃

Бꙋ́рю помышле́нїй сꙋмни́тельныхъ про́йде бл҃говѣ́рный кнѧ́зь а҆ндре́й, ѿ мнѡ́жества врагѡ́въ нѣ́когда ѡ҆бстои́мь: ты́ же, всепѣ́таѧ, ди́внымъ ѿ і҆кѡ́ны твоеѧ̀ зна́менїемъ сла́внꙋю побѣ́дꙋ томꙋ̀ пред̾возвѣсти́ла є҆сѝ. тѣ́мже вѣ́рою ѡ҆бнови́сѧ и҆ ѡ҆ и҆́мени твое́мъ дерза́ѧ, воспѣ̀ бг҃ꙋ: А҆ллилꙋ́їа.

І҆́косъ д҃

Слы́шавше мѧте́жницы ᲂу҆бїе́нїе бл҃говѣ́рнагѡ кнѧ́зѧ а҆ндре́ѧ, гра́дъ влади́мїръ расхи́тити ᲂу҆стреми́шасѧ, но і҆кѡ́нꙋ твою̀ чꙋдотво́рнꙋю, на сто́гны гра́да и҆знесе́ннꙋю, внеза́пꙋ ᲂу҆зрѣ́вше, ᲂу҆мили́шасѧ се́рдцемъ и҆, на колѣ̑на па́дше, во грѣсѣ̀ свое́мъ пока́ѧшасѧ. Бл҃гочести́вїи же лю́дїе, таково́мꙋ ѿ і҆кѡ́ны твоеѧ̀ бл҃года́тномꙋ ꙗ҆вле́нїю ра́дꙋющесѧ, пѣ́снь бл҃года́рственнꙋю воспѣ́ша тебѣ̀:

Ра́дꙋйсѧ, междоꙋсо́бныхъ бра́ней ᲂу҆толе́нїе: ра́дꙋйсѧ, ѡ҆жестѣ́вшыхъ сердє́цъ ᲂу҆мѧгче́нїе.

Ра́дꙋйсѧ, ꙗ҆́кѡ заблꙋ́ждшїѧ на пꙋ́ть пра́вый возвраща́еши: ра́дꙋйсѧ, ꙗ҆́кѡ ѿ собла́знѡвъ сꙋ́етныхъ на́съ ѡ҆гражда́еши.

Ра́дꙋйсѧ, па̑гꙋбы вседꙋше́вныѧ низлага́ющаѧ: ра́дꙋйсѧ, дꙋшеврє́днаѧ наꙋчє́нїѧ ѡ҆блича́ющаѧ.

Ра́дꙋйсѧ, къ црⷭ҇твїю нбⷭ҇номꙋ пꙋ́ть невозбра́нный на́мъ ᲂу҆казꙋ́ющаѧ: ра́дꙋйсѧ, ми́ръ вѣ́чный и҆ ра́дость на́мъ подаю́щаѧ.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ є҃

Бг҃оте́чнаѧ ѕвѣзда̀ ѻ҆тцє́мъ на́шимъ бы́сть і҆кѡ́на твоѧ̀, влⷣчце, є҆ѧ́же свѣ́томъ ведо́ми, мно́гажды побѣжда́хꙋ црⷭ҇твїѧ, возмога́хꙋ ѿ не́мощи, ѡ҆браща́хꙋ въ бѣ́гство полкѝ чꙋжди́хъ и҆ пꙋ́ть къ земно́мꙋ преꙋспѣ́ѧнїю и҆ нбⷭ҇номꙋ сп҃се́нїю ѡ҆брѣта́хꙋ. Сегѡ̀ ра́ди по до́лгꙋ сла́витъ тѧ̀ землѧ̀ рѡссі́йскаѧ, пою́щи бг҃ꙋ: А҆ллилꙋ́їа.

І҆́косъ є҃

Ви́дѣвше нѣ́когда лю́дїе влади́мїрстїи въ чꙋ́днѣмъ видѣ́нїи гра́дъ сво́й на воздꙋ́сѣ вознесе́нъ, и҆ і҆кѡ́нꙋ твою̀ верхꙋ̀ є҆гѡ̀, ꙗ҆́коже со́лнце, сїѧ́ющꙋ, со ᲂу҆миле́нїемъ разꙋмѣ́ша, влⷣчце, неѿстꙋ́пный покро́въ тво́й гра́дꙋ и҆́хъ и҆, твоѐ ми́лостивое промышле́нїе ѡ҆ ни́хъ сла́вѧще, воспѣ́ша тѝ:

Ра́дꙋйсѧ, мт҃и млⷭ҇рдїѧ: ра́дꙋйсѧ, и҆сто́чниче чꙋде́съ.

Ра́дꙋйсѧ, бо́драѧ на́ша храни́тельнице: ра́дꙋйсѧ, гра́дꙋ на́шемꙋ покро́ве.

Ра́дꙋйсѧ, горѣ̀ къ нбⷭ҇нѣмъ сокро́вищемъ ᲂу҆́мъ на́шъ возводѧ́щаѧ: ра́дꙋйсѧ, любо́вь къ бг҃ꙋ въ сердца́хъ вѣ́рныхъ насажда́ющаѧ.

Ра́дꙋйсѧ, маловѣ̑рныѧ вразꙋмлѧ́ющаѧ: ра́дꙋйсѧ, невѣ́рныхъ смы́слы просвѣща́ющаѧ.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ ѕ҃

Проповѣ́дникъ неизрече́нныхъ чꙋде́съ твои́хъ, влⷣчце, ꙗ҆ви́сѧ собо́рный хра́мъ тво́й во гра́де влади́мїре, ст҃о́ю і҆кѡ́ною твое́ю ᲂу҆кра́шенный. Попꙋще́нїемъ бо бж҃їимъ всѐ бл҃голѣ́пїе є҆гѡ̀ нѣ́когда во ѻ҆гнѝ поги́бе, і҆кѡ́на же ст҃а́ѧ твоѧ̑, ꙗ҆́коже кꙋпина̀ неѡпали́ма пребы́сть, да и҆ ви́дѣвше и҆ ѡ҆сѧза́вше присꙋ́тствїе твоѐ, вѣ́рнїи воспою́тъ: А҆ллилꙋ́їа.

І҆́косъ ѕ҃

Возсїѧ̀ па́ки свѣ́тъ і҆кѡ́ны твоеѧ̀, бцⷣе, во днѝ лю́тагѡ наше́ствїѧ баты́ева. а҆́ще бо нечести́вїи а҆га́рѧне и҆ пожго́ша ѻ҆гне́мъ собо́рный хра́мъ тво́й, и҆ ст҃и́телѧ влади́мїрскагѡ и҆ лю́ди, молѧ́щїѧсѧ въ це́ркви, ᲂу҆мертви́ша, и҆ всѧ̑ коне́чномꙋ и҆стребле́нїю преда́ша, ѻ҆ба́че і҆кѡ́на твоѧ̀ и҆ па́ки неврежде́на ѡ҆брѣ́тесѧ, подвиза́ющи пѣ́ти тебѣ̀:

Ра́дꙋйсѧ, кꙋпино̀ неѡпали́маѧ: ра́дꙋйсѧ, сокро́вище неиждива́емое.

Ра́дꙋйсѧ, стѣно̀ несокрꙋши́маѧ: ра́дꙋйсѧ, прибѣ́жище всѣ̑мъ ᲂу҆пова́ющымъ на тѧ̀.

Ра́дꙋйсѧ, і҆кѡ́нꙋ твою̀ и҆ во пла́мени цѣ́лꙋ сохрани́вшаѧ: ра́дꙋйсѧ, на́мъ во ᲂу҆тѣше́нїе и҆ сп҃се́нїе тꙋ́ю ѡ҆ста́вившаѧ.

Ра́дꙋйсѧ, ты́ бо є҆сѝ на́ше защище́нїе: ра́дꙋйсѧ, ты́ бо є҆сѝ всѣ́хъ бл҃гочести́выхъ непреста́нное ра́дованїе.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ з҃

Хотѧ̀ вели́кїй кнѧ́зь васі́лїй защище́нїе стѧжа́ти сто́льномꙋ гра́дꙋ своемꙋ̀, повелѣ̀ влади́мїрскꙋю і҆кѡ́нꙋ твою̀ въ москвꙋ̀ пренестѝ. и҆ во срѣ́тенїе є҆ѧ̀ ᲂу҆се́рднѡ и҆зше́дше кнѧ́зь и҆ ст҃и́тель моско́вскїй кѷпрїа́нъ со ѡ҆сщ҃е́ннымъ собо́рѡмъ и҆ всѣ̑мъ мно́жествѡмъ люде́й, до землѝ пред̾ не́ю поклони́шасѧ, ꙗ҆́коже бо са́мꙋю тѧ̀, пречⷭ҇таѧ, къ ни́мъ приходѧ́щꙋю, срѣта́хꙋ, зовꙋ́ще тебѣ̀: ѡ҆ ма́ти бж҃їѧ, сп҃сѝ зе́млю рꙋ́сскꙋю. вкꙋ́пѣ же и҆ пою́ще бг҃ꙋ: А҆ллилꙋ́їа.

І҆́косъ з҃

Но́вое зна́менїе сотвори́ла є҆сѝ, пренепоро́чнаѧ, въ де́нь пра́зднованїѧ срѣ́тенїѧ і҆кѡ́ны твоеѧ̀ влади́мїрскїѧ въ москвѣ̀: въ гро́зномъ бо видѣ́нїи, ꙗ҆́кѡ всемогꙋ́щаѧ цр҃и́ца, мно́жествомъ во́инствъ нбⷭ҇ныхъ ѡ҆бстои́ма, со ст҃и́тєли москѡ́вскими ꙗ҆ви́ласѧ є҆сѝ нечести́вомꙋ а҆га́рѧнскомꙋ ха́нꙋ и҆ ѿ предѣ́лъ землѝ рꙋ́сскїѧ ѿитѝ повелѣ́ла є҆сѝ. Тогда̀ вѣ́рнїи лю́дїе твоѝ, врага̀ ви́дѣвше посра́млена и҆ бѣжа́вша, съ весе́лїемъ поѧ́хꙋ тебѣ̀:

Ра́дꙋйсѧ, побѣ́до непобѣди́маѧ: ра́дꙋйсѧ, цр҃и́це нбⷭ҇ныхъ си́лъ.

Ра́дꙋйсѧ, врага̀ гро́зное посрамле́нїе: ра́дꙋйсѧ, рабѡ́въ твои́хъ ра́досте неча́ѧннаѧ.

Ра́дꙋйсѧ, наде́ждо всѣ́хъ лише́нныхъ наде́жды: ра́дꙋйсѧ, сп҃се́нїе во дно̀ а҆́дово низше́дшихъ.

Ра́дꙋйсѧ, прише́ствїемъ і҆кѡ́ны твоеѧ̀ москвꙋ̀ возвесели́вшаѧ: ра́дꙋйсѧ, застꙋпле́нїемъ твои́мъ и҆ гра́дъ влади́мїръ не ѡ҆ста́вившаѧ.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ и҃

Стра́ннꙋю побѣ́дꙋ всеси́льною по́мощїю твое́ю, влⷣчце, без̾ бра́ни соверши́вшꙋюсѧ, и҆ доны́нѣ цр҃ковь правосла́внаѧ свѣ́тлѡ прославлѧ́етъ, срѣ́тенїе і҆кѡ́ны твоеѧ̀ влади́мїрскїѧ пра́зднꙋющи и҆ всѧ̑ вѣ̑рнаѧ ча̑да своѧ̑ созыва́ющи млⷭ҇ти твоѧ̑ благода́рнѣ и҆сповѣ́дати, сн҃ꙋ же твоемꙋ̀ и҆ бг҃ꙋ пѣ́ти: А҆ллилꙋ́їа.

І҆́косъ и҃

Всю́ тѧ бг҃ъ ѡ҆свѧтѝ, пренепоро́чнаѧ, и҆, ꙗ҆́кѡ мт҃рь свою̀, въ гото́вое прибѣ́жище и҆ те́плый покро́въ всѣ́мъ на́мъ дарова̀. тѣ́мже ѿ ме́ньшихъ землѝ и҆ незна́емыхъ возвели́чисѧ бл҃гослове́нный тобо́ю гра́дъ москва̀, бл҃гочⷭ҇тнѡ і҆кѡ́нꙋ твою̀ почита́ѧй: всѧ̑ бо племена̀ рꙋ́сскїѧ воеди́но собра̀ и҆ ѻ҆́бласть свою̀ над̾ ѻ҆кре́стными ѧ҆зы̑ки ѿ мо́рѧ и҆ до мо́рѧ и҆ да́же до конє́цъ землѝ распрострѐ, всѣ́мъ вѣ́рꙋ хрⷭ҇то́вꙋ возвѣща́ѧй, тебѣ́ же вопїѧ̀:

Ра́дꙋйсѧ, землѝ на́шеѧ забра́ло: ра́дꙋйсѧ, цр҃кве ᲂу҆твержде́нїе.

Ра́дꙋйсѧ, мл҃твенникѡвъ на́шихъ похвало̀: ра́дꙋйсѧ, люде́й твои́хъ сп҃се́нїе.

Ра́дꙋйсѧ, враги̑ на̑ша ᲂу҆страша́ющаѧ: ра́дꙋйсѧ, полкѝ чꙋжди́хъ дале́че ѿгонѧ́ющаѧ.

Ра́дꙋйсѧ, ꙗ҆́кѡ тобо́ю рꙋ́сь правосла́внаѧ содержи́тсѧ: ра́дꙋйсѧ, ꙗ҆́кѡ тобо́ю ро́дъ хрⷭ҇тїа́нскїй хва́литсѧ.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ ѳ҃

Всѧ́кое є҆стество̀ а҆́гг҃льское восхвалѧ́етъ тѧ̀, бг҃ороди́тельнице, ᲂу҆ престо́ла сн҃а твоегѡ̀ предстоѧ́щꙋю и҆ за странꙋ̀ на́шꙋ и҆ всѧ̑ хрⷭ҇тїа́ны молѧ́щꙋюсѧ. мы́ же, лю́дїе твоѝ, моли́твъ твои́хъ дѣ́йство разꙋмѣва́юще, къ чꙋдотво́рнѣй і҆кѡ́нѣ твое́й съ любо́вїю притека́емъ и҆ бг҃ꙋ прилѣ́жнѡ вопїе́мъ: А҆ллилꙋ́їа.

І҆́косъ ѳ҃

Виті́й земны́хъ хꙋдо́жество не довлѣ́етъ по достоѧ́нїю бл҃гохвали́ти тѧ̀, прест҃а́ѧ всенепоро́чнаѧ, и҆ і҆кѡ́ны твоеѧ̀ чꙋдеса̀ и҆счи́слити, и҆́миже цр҃ковь правосла́внаѧ велича́етсѧ, гра́ди на́ши ᲂу҆твержда́ютсѧ и҆ всѝ хрⷭ҇тїа́не бжⷭ҇твенне веселѧ́тсѧ. тѣ́мже, за премно́гꙋю любо́вь твою̀ къ на́мъ и҆ всѧ̑ млⷭ҇ти твоѧ̑, прїимѝ ѿ на́съ сїѐ хвале́бное пѣ́нїе:

Ра́дꙋйсѧ, собо́ромъ ст҃ы́хъ, въ странѣ̀ на́шей просїѧ́вшихъ, ѡ҆крꙋжа́емаѧ и҆ сла́вимаѧ: ра́дꙋйсѧ, предста́телей на́шихъ, чꙋдотво́рцєвъ рѡссі́йскихъ, молє́нїѧ прїе́млющаѧ.

Ра́дꙋйсѧ, хода́тайствомъ твои́мъ ѡ҆ на́съ бг҃а ᲂу҆милостивлѧ́ющаѧ: ра́дꙋйсѧ, чⷭ҇тны́мъ покро́вомъ твои́мъ на́съ при́сно ѡ҆сѣнѧ́ющаѧ.

Ра́дꙋйсѧ, страны̀ на́шеѧ пресла́внаѧ защи́тнице: ра́дꙋйсѧ, призыва́ющимъ тѧ̀ ско́раѧ помо́щнице.

Ра́дꙋйсѧ, трꙋжда́ющихсѧ блгⷣтное ᲂу҆крѣпле́нїе: ра́дꙋйсѧ, ка́ющихсѧ грѣ́шникѡвъ несꙋмнѣ́нное сп҃се́нїе.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ і҃

Спасе́нїѧ и҆́щꙋще, къ тебѣ̀ прибѣга́емъ, млⷭ҇рдаѧ мт҃и, и҆, чꙋдотво́рнꙋю твою̀ і҆кѡ́нꙋ ны́нѣ ѡ҆бстоѧ́ще, всѧ̑ ми́лости твоѧ̑, то́ю ѻ҆тцє́мъ на́шимъ ꙗ҆влє́нныѧ, съ любо́вїю воспомина́емъ. да не тще́тна бꙋ́детъ, влⷣчце, и҆ на́ша наде́жда на тѧ̀, на не́мощь на́шꙋ ᲂу҆милосе́рдисѧ и҆ сп҃сѝ вопїю́щїѧ бг҃ꙋ: А҆ллилꙋ́їа.

І҆́косъ і҃

Стѣна̀ є҆сѝ и҆ застꙋпле́нїе всѣ̑мъ съ вѣ́рою прибѣга́ющымъ къ тебѣ̀, всебл҃же́ннаѧ ѻ҆трокови́це: всегда́ бо млⷭ҇ти твоѧ̑ ро́дꙋ хрⷭ҇тїа́нскомꙋ ꙗ҆влѧ́ла є҆сѝ и҆ ѻ҆тцє́мъ на́шимъ многоча́стнѣ и҆ многоѡбра́знѣ бл҃годѣ́ѧла є҆сѝ, ѿ наше́ствїѧ и҆ноплемє́нникъ и҆ ѿ всѧ́кїѧ бѣды̑ и҆ нꙋ̑жды тѣ́хъ и҆збавлѧ́ющи. не ѡ҆скꙋдѣ́й и҆ ны́нѣ, влⷣчце, ᲂу҆толѧ́ющи лю̑тыѧ на ны̀ возста̑нїѧ грѣхо́вныѧ, и҆ ѻ҆́блакъ и҆скꙋше́нїй ѿженѝ, тебѣ́ бо навыко́хомъ пѣ́ти:

Ра́дꙋйсѧ, мт҃и бж҃їѧ, мт҃рнюю любо́вь къ на́мъ, грѣ́шнымъ, простира́ющаѧ: ра́дꙋйсѧ, си́лою твое́ю на́шꙋ не́мощь восполнѧ́ющаѧ.

Ра́дꙋйсѧ, млⷭ҇рдїе бж҃їе разꙋмѣ́ти на́съ наꙋча́ющаѧ: ра́дꙋйсѧ, къ дѣлѡ́мъ млⷭ҇рдїѧ и҆ на́съ возбꙋжда́ющаѧ.

Ра́дꙋйсѧ, стра́хъ бж҃їй въ сердца̀ вѣ́рныхъ влага́ющаѧ: ра́дꙋйсѧ, грѣ̑шники къ покаѧ́нїю призыва́ющаѧ.

Ра́дꙋйсѧ, невнима́нїю на́шемꙋ долготерпѧ́щаѧ: ра́дꙋйсѧ, ѿ сна̀ лѣ́ности на́съ возставлѧ́ющаѧ.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ а҃і

Пѣ́нїе похва́льное воспѣ́ша моско́встїи лю́дїе, сп҃се́нїе твоѐ нѣ́когда ᲂу҆лꙋчи́вше: верхꙋ́ бо ꙗ҆́вльшисѧ, свѣтоза́рною ѻ҆де́ждою ѡ҆дѣ́ѧна, хра́мъ тво́й и҆ гра́дъ москвꙋ̀ ѿ запале́нїѧ ѻ҆́гненнагѡ ри́зою твое́ю защити́ла є҆сѝ. неѿстꙋ́пна пребꙋ́ди, всемо́щнаѧ, ѿ мѣ́ста сегѡ̀ и҆ ны́нѣ, и҆ на́мъ и҆збавле́нїе твоѐ ви́дѣти да́рꙋй, да веселѧ́щесѧ воспое́мъ: А҆ллилꙋ́їа.

І҆́косъ а҃і

Свѣ́тъ ра́дости возсїѧ́ла є҆сѝ, влⷣчце, и҆ во дни̑ ты̑ѧ, є҆гда̀ смотре́нїемъ бж҃їимъ дре́внѧѧ красота̀ цр҃ко́внаѧ къ на́мъ па́ки возврати́сѧ и҆ сщ҃е́нный собо́ръ гра́дꙋ москвѣ̀ патрїа́рха, все́й же странѣ̀ на́шей є҆ди́наго па́стырѧ и҆ моли́твенника ᲂу҆твердѝ. ты́ же, пречⷭ҇таѧ, ѿ і҆кѡ́ны твоеѧ̀ влади́мїрскїѧ жре́бїй первосвѧти́тельства сегѡ̀ и҆збра́нникꙋ твоемꙋ̀ дарова́ла є҆сѝ, да расточє́нныѧ ѻ҆́вцы слове́снагѡ ста́да цр҃кве рѡссі́йскїѧ па́ки воеди́но собере́тъ. сегѡ̀ ра́ди вопїе́мъ тебѣ̀:

Ра́дꙋйсѧ, скорбѧ́щихъ ра́досте: ра́дꙋйсѧ, ѡ҆бꙋрева́емыхъ приста́нище.

Ра́дꙋйсѧ, въ напа́стехъ на́съ не ѡ҆ста́вившаѧ: ра́дꙋйсѧ, во ᲂу҆ничиже́нїи на́шемъ свѣ́тъ наде́жды на́мъ возсїѧ́вшаѧ.

Ра́дꙋйсѧ, на смирє́нныѧ призрѣ́вшаѧ: ра́дꙋйсѧ, низше́дшыѧ возвели́чившаѧ.

Ра́дꙋйсѧ, цр҃кве на́шеѧ похвало̀: ра́дꙋйсѧ, люде́й твои́хъ весе́лїе.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ в҃і

Бл҃года́ть твою̀ не ѿимѝ ѿ на́съ, млⷭ҇ти и҆сто́чниче, ꙗ҆́коже во днѝ лихолѣ́тїѧ ст҃и́телей на́шихъ і҆́ѡва и҆ є҆рмоге́на ᲂу҆слы́шала є҆сѝ и҆ зе́млю рꙋ́сскꙋю ѿ коне́чнагѡ расхище́нїѧ, правосла́внꙋю же вѣ́рꙋ въ не́й ѿ и҆стребле́нїѧ спасла̀ є҆сѝ, да и҆зба́вленнїи тобо́ю бг҃ꙋ воспое́мъ: А҆ллилꙋ́їа.

І҆́косъ в҃і

Пою́ще неисчє́тныѧ млⷭ҇ти твоѧ̑, ѿ лѣ́тъ дре́внихъ ро́дꙋ на́шемꙋ ꙗ҆влє́нныѧ и҆ доны́нѣ не ѡ҆скꙋдѣва́ющыѧ, хва́лимъ тѧ̀, пречⷭ҇таѧ, ꙗ҆́кѡ неꙋсы́пнꙋю храни́тельницꙋ на́шꙋ и҆ застꙋпле́нїе, и҆, мт҃рнюю любо́вь твою̀ къ ста́дꙋ сн҃а твоегѡ̀ вѣ́дꙋще, со дерзнове́нїемъ, а҆́ще и҆ рабѝ неключи́ми є҆смы̀, вопїе́мъ тебѣ̀:

Ра́дꙋйсѧ, рꙋ́сь правосла́внꙋю возлюби́вшаѧ: ра́дꙋйсѧ, вѣ́рꙋ и҆́стиннꙋю въ не́й ᲂу҆тверди́вшаѧ.

Ра́дꙋйсѧ, ѻ҆тцы̑ на̑ша во бл҃гоче́стїи сохрани́вшаѧ: ра́дꙋйсѧ, и҆ на́ше неможе́нїе не ѿри́нꙋвшаѧ.

Ра́дꙋйсѧ, ᲂу҆твержде́нїе на́ше незы́блемое: ра́дꙋйсѧ, наде́ждо на́ша непосты́днаѧ.

Ра́дꙋйсѧ, мл҃твеннице на́ша те́плаѧ: ра́дꙋйсѧ, застꙋ́пнице ᲂу҆се́рднаѧ.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ г҃і

Ѡ҆ всепѣ́таѧ мт҃и, застꙋ́пнице всемлⷭ҇тиваѧ, дв҃о бцⷣе, ѻ҆бы́чнымъ твои́мъ млⷭ҇рдїемъ ма́лое моле́нїе сїѐ на́ше прїе́млющи, ꙗ҆́коже дре́вле, та́кѡ и҆ ны́нѣ поми́лꙋй зе́млю на́шꙋ рꙋ́сскꙋю и҆ ѿ всѧ́кихъ бѣ́дъ рабы̑ твоѧ̑ и҆зба́ви, ѡ҆ тебѣ̀ вопїю́щїѧ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льскїѧ си́лы на нб҃сѝ немо́лчнѡ воспѣва́ютъ тѧ̀, пречⷭ҇таѧ, зрѧ́ще сла́вꙋ пребж҃е́ственнꙋю, є҆́юже сн҃ъ тво́й просла́ви тѧ̀. но и҆ на́съ, земны́хъ, не ѡ҆ста́вила є҆сѝ, ꙗ҆́кѡ нѣ́кꙋю лꙋчꙋ̀, низпосла́вши на́мъ і҆кѡ́нꙋ твою̀, ст҃ы́мъ лꙋко́ю первопи́саннꙋю. ѡ҆ не́й бо нѣ́когда и҆зрекла̀ є҆сѝ: съ си́мъ ѡ҆́бразомъ бл҃года́ть моѧ̀ и҆ си́ла да пребꙋ́дꙋтъ. Тѣ́мже вѣ́рнїи рабѝ твоѝ, по всѧ̑ дни̑ и҆ на всѧ́комъ мѣ́стѣ сбытїѐ слове́съ твои́хъ зрѧ́ще, ко ѡ҆́бразꙋ твоемꙋ̀ цѣльбоно́сномꙋ притека́емъ и҆, ꙗ҆́коже само́й тѝ, съ на́ми сꙋ́щей, вопїе́мъ:

Ра́дꙋйсѧ, а҆́гг҃лѡвъ цр҃и́це: ра́дꙋйсѧ, всегѡ̀ мі́ра влⷣчце.

Ра́дꙋйсѧ, на нб҃сѝ при́сно сла́вимаѧ: ра́дꙋйсѧ, и҆ на землѝ велича́емаѧ.

Ра́дꙋйсѧ, бл҃года́ть твою̀ і҆кѡ́нѣ твое́й се́й дарова́вшаѧ: ра́дꙋйсѧ, на сп҃се́нїе человѣ́кѡвъ тꙋ́ю поста́вившаѧ.

Ра́дꙋйсѧ, бж҃їѧ бл҃гости ско́раѧ пода́тельнице: ра́дꙋйсѧ, моле́нїй на́шихъ ᲂу҆се́рднаѧ послꙋ́шнице.

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.

Конда́къ а҃

Взбра́нной воево́дѣ, застꙋ́пнице на́шей, взира́юще на первопи́санный ѻ҆́бразъ тво́й, хвале́бное пѣ́нїе воспѣва́емъ тѝ рабѝ твоѝ, бг҃ома́ти. Ты́ же, ꙗ҆́кѡ и҆мꙋ́щаѧ держа́вꙋ непобѣди́мꙋю, сохранѝ и҆ сп҃сѝ благода́рнѣ тебѣ̀ вопїю́щыѧ:

Ра́дꙋйсѧ, пречⷭ҇таѧ, ѿ і҆кѡ́ны твоеѧ̀ млⷭ҇ти на́мъ и҆сточа́ющаѧ.