Православный календарь
Размер шрифта:

Ака́ѳістъ

<p>А҆ка́ѳїстъ прпⷣбномꙋ и҆ бг҃оно́сномꙋ ѻ҆тцꙋ̀ на́шемꙋ а҆леѯа́ндрꙋ и҆гꙋ́менꙋ сви́рскомꙋ, чꙋдотво́рцꙋ.</p>

Прп. Александра Свирского (1533) 12 сентября 2026

Конда́къ а҃

И҆збра́нный ᲂу҆го́дниче хрⷭ҇то́въ и҆ чꙋдотво́рче, прпⷣбный ѻ҆́тче а҆леѯа́ндре, возсїѧ́вый мі́рови, ꙗ҆́кѡ ѕвѣзда̀ бг҃освѣ́тлаѧ, житїѧ̀ твоегѡ̀ добро́тою и҆ мно́жествомъ чꙋдотворе́нїй, восхвалѧ́емъ тѧ̀ любо́вїю въ пѣ́снехъ дꙋхо́вныхъ: ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

І҆́косъ а҃

А҆́гг҃льскїй нра́въ и҆мѣ́лъ є҆сѝ, ѻ҆́тче прпⷣбне, и҆ ꙗ҆́кѡ безпло́тный, непоро́чнѡ житїѐ соверши́лъ є҆сѝ на землѝ, ди́вный ѡ҆́бразъ соверше́нства дꙋхо́внагѡ на́мъ ѡ҆ста́вивъ, да подража́емъ добродѣ́телємъ твои̑мъ, и҆ зове́мъ тѝ си́це:

Ра́дꙋйсѧ, бл҃гочести́выхъ роди́телей пло́дъ бг҃одарова́нный: ра́дꙋйсѧ, непло́дїе ро́ждшихъ тѧ̀ разрѣши́вый.

Ра́дꙋйсѧ, сѣ́тованїе и҆́хъ на ра́дость преложи́вый: ра́дꙋйсѧ, ѿ пеле́нъ бг҃омъ и҆збра́нный.

Ра́дꙋйсѧ, ѿ ᲂу҆тро́бы ма́тернїѧ на слꙋ́жбꙋ є҆мꙋ̀ пред̾ꙋста́вленный: ра́дꙋйсѧ, ѿ ю҆́ности є҆го̀ є҆ди́наго всѣ́мъ се́рдцемъ возлюби́вый.

Ра́дꙋйсѧ, всѧ̑ кра̑снаѧ мі́ра сегѡ̀ ни во что́же вмѣни́вый: ра́дꙋйсѧ, посто́мъ и҆ бдѣ́нїемъ мл҃твеннымъ пло́ть твою̀ ᲂу҆дрꙋчи́вый.

Ра́дꙋйсѧ, непоро́чный сосꙋ́де бж҃їѧ бл҃года́ти: ра́дꙋйсѧ, жили́ще дх҃а ст҃а́гѡ, ᲂу҆краше́нное чистото́ю.

Ра́дꙋйсѧ, мꙋ́жꙋ жела́нїй дꙋхо́вныхъ: ра́дꙋйсѧ, главо̀, ѡ҆сщ҃е́ннаѧ десни́цею всевы́шнѧгѡ.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ в҃

Ви́дѧ гдⷭ҇ь дꙋ́шꙋ твою̀, ꙗ҆́кѡ ни́вꙋ бл҃говоздѣ́ланнꙋю къ плодоно́сїю дꙋхо́вномꙋ, ѿ ю҆́ности къ и҆ска́нїю є҆ди́нагѡ на потре́бꙋ, напра́ви тво́й по́мыслъ, прпⷣбне, тѣ́мже любвѐ ра́ди хрⷭ҇то́вы, роди́телей твои́хъ и҆ до́мъ ѻ҆те́ческїй ѡ҆ста́вилъ є҆сѝ, и҆ всѧ́кагѡ пристра́стїѧ сꙋ́етнагѡ свободи́всѧ, прите́клъ є҆сѝ въ пꙋсты́ннꙋю ѻ҆би́тель валаа́мскꙋю на по́двиги и҆́ночєскїѧ, зовы́й сп҃са́ющемꙋ тѧ̀ бг҃ꙋ: А҆ллилꙋ́їа.

І҆́косъ в҃

Ра́зꙋмомъ бг҃опросвѣще́ннымъ пости́глъ є҆сѝ сꙋетꙋ̀ и҆ непостоѧ́нство мі́ра сегѡ̀, въ не́мже ра́дость смѣнѧ́етсѧ ско́рбїю, бл҃гополꙋ́чїе же навѣ́тꙋетсѧ бѣда́ми неча́ѧнными. Тѣ́мже вѣ́чныхъ нетлѣ́нныхъ бл҃гъ возжелѣ́лъ є҆сѝ, ѻ҆́тче прпⷣбне, и҆ сїѧ̑ взыска́ти потща́лсѧ є҆сѝ ѿрече́нїемъ мїрски́хъ бл҃гъ и҆ во́льною нището́ю, подвига́ѧ на́съ зва́ти тебѣ̀:

Ра́дꙋйсѧ, пꙋсты́ннагѡ безмо́лвїѧ люби́телю: ра́дꙋйсѧ, смире́нїѧ и҆ нестѧжа́нїѧ рачи́телю.

Ра́дꙋйсѧ, и҆́стиннагѡ самоѿверже́нїѧ соверше́нный ѡ҆́бразе: ра́дꙋйсѧ, и҆́ноческагѡ равноа́гг҃льскагѡ житїѧ̀ всеизрѧ́дное ꙗ҆вле́нїе.

Ра́дꙋйсѧ, пра́вило вѣ́ры и҆ бл҃гоче́стїѧ: ра́дꙋйсѧ, зерца́ло терпѣли́вагѡ послꙋша́нїѧ.

Ра́дꙋйсѧ, безмо́лвїе и҆́ноческое возлюби́вый: ра́дꙋйсѧ, сле́зы дꙋхѡ́вныѧ стѧжа́вый.

Ра́дꙋйсѧ, пла́чемъ вре́меннымъ бл҃же́нство вѣ́чное сниска́вый: ра́дꙋйсѧ, мл҃твами непреста́нными прило́ги вра̑жїѧ сокрꙋши́вый.

Ра́дꙋйсѧ, бдѣ́нїемъ и҆ трꙋда́ми пло́ть твою̀ дꙋ́хови покори́вый: ра́дꙋйсѧ, посто́мъ и҆ воздержа́нїемъ стра̑сти ᲂу҆кроти́вый.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ г҃

Си́лою всевы́шнѧгѡ ѡ҆сѣне́нный и҆ ᲂу҆крѣплѧ́емый, въ и҆́ночестѣмъ постриже́нїи власѡ́въ главы̀ твоеѧ̀, всѐ плотско́е мꙋдрова́нїе ѿложи́лъ є҆сѝ, прпⷣбне, и҆ ꙗ҆́кѡ во́инъ бл҃гоискꙋ́сный, схи́мꙋ и҆́ноческꙋю въ броню̀ сп҃се́нїѧ стѧжа́въ, и҆ непобѣди́мымъ ѻ҆рꙋ́жїемъ крⷭ҇та̀ хрⷭ҇то́ва воѻрꙋжи́всѧ, крѣ́пкѡ ра́товалъ є҆сѝ проти́вꙋ врага̀ неви́димагѡ дїа́вола, смире́нїемъ глꙋбо́кимъ побѣжда́ѧ є҆гѡ̀ вознесе́ннꙋю горды́ню, и҆ вы́нꙋ вопїѧ̀ ко гдⷭ҇ꙋ: А҆ллилꙋ́їа.

І҆́косъ г҃

И҆мѣ́ѧ сле́зъ и҆сто́чникъ и҆з̾ѻби́льный, ᲂу҆го́дниче бж҃їй, и҆ ᲂу҆миле́нїѧ ве́лїю бл҃года́ть, хлѣ́бъ тво́й слеза́ми ѡ҆роша́лъ є҆сѝ, и҆ питїѐ пла́чемъ растворѧ́лъ, ѿ преизбы́тка жела́нїѧ бж҃е́ственнагѡ и҆ любвѐ ко гдⷭ҇ꙋ. Тѣ́мже и҆ мы̀ ᲂу҆бл҃жа́емъ тѧ̀ зва́нїи си́ми:

Ра́дꙋйсѧ, крѣ́пости и҆ мꙋ́жества тезоимени́тый подви́жниче: ра́дꙋйсѧ, а҆гг҃лоподо́бный человѣ́че.

Ра́дꙋйсѧ, цр҃ѧ̀ нбⷭ҇нагѡ во́ине добропобѣ́дный: ра́дꙋйсѧ, валаа́мскїѧ ѻ҆би́тели пло́де до́брый.

Ра́дꙋйсѧ, пꙋстынножи́телю бл҃гопрїѧ́тный: ра́дꙋйсѧ, мл҃твенниче неꙋсыпа́ющїй.

Ра́дꙋйсѧ, по́стниче и҆зрѧ́дный: ра́дꙋйсѧ, безмо́лвниче ди́вный.

Ра́дꙋйсѧ, по́двигѡмъ дре́внихъ бг҃оно́сныхъ ѻ҆тцє́въ послѣ́дователю: ра́дꙋйсѧ, и҆́хъ терпѣ́нїю и҆ трꙋда́мъ подража́телю.

Ра́дꙋйсѧ, бл҃говре́меннѡ моги́лꙋ себѣ̀ и҆скопа́вый: ра́дꙋйсѧ, ѡ҆ сме́ртнѣмъ часѣ̀ непреста́ннѡ помышлѧ́вый.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ д҃

Бꙋ́рѧ и҆скꙋше́нїй и҆ ᲂу҆стремле́нїй дїа́вольскихъ не возмо́же поколеба́ти хра́мины твоеѧ̀ дꙋше́вныѧ, прпⷣбне ѻ҆́тче, ѡ҆сно́вана бо бѣ̀ на тве́рдомъ ка́мени вѣ́ры во хрⷭ҇та̀, и҆ храни́ма трезве́нїемъ и҆ мл҃твами непреста́нными, и҆́миже вы́нꙋ противобо́рствовалъ є҆сѝ врагꙋ̀ сп҃се́нїѧ человѣ́ческагѡ, и҆ непреткнове́ннѡ восходи́лъ є҆сѝ по стезѧ́мъ добродѣ́телей къ соверше́нствꙋ дꙋхо́вномꙋ въ мѣ́рꙋ во́зраста хрⷭ҇то́ва, воспѣва́ѧ бг҃ꙋ: А҆ллилꙋ́їа.

І҆́косъ д҃

Слы́шавъ похвалѧ́ема себѐ ѿ человѣ̑къ, ᲂу҆боѧ́лсѧ є҆сѝ превозноше́нїѧ сꙋ́етнагѡ, ѻ҆́тче бг҃омꙋ́дре, и҆ ꙗ҆́кѡ и҆́стинный смире́нїѧ ѡ҆́бразъ, ᲂу҆мы́слилъ є҆сѝ ᲂу҆бѣжа́ти въ пꙋсты́ню неизвѣ́даннꙋю, на рѣкꙋ̀ сви́рь, на мѣ́сто свы́ше тебѣ̀ ᲂу҆ка́занное въ видѣ́нїи чꙋ́днѣмъ, да та́мѡ ми́рнѡ и҆ невозбра́ннѡ є҆ди́номꙋ бг҃ꙋ порабо́таеши, и҆дѣ́же мы̀ срѣта́емъ тѧ̀ бл҃гохвале́нїи си́ми:

Ра́дꙋйсѧ, смири́вшагѡсѧ до ра́бїѧ зра́ка хрⷭ҇та̀ гдⷭ҇а бл҃гі́й послѣ́дователю: ра́дꙋйсѧ, ст҃ы́хъ є҆гѡ̀ за́повѣдей ᲂу҆се́рдный и҆сполни́телю.

Ра́дꙋйсѧ, дѣ́вственниче дꙋше́ю и҆ тѣ́ломъ: ра́дꙋйсѧ, трꙋдолю́бче нелицемѣ́рный.

Ра́дꙋйсѧ презрѣ́вый сла́вꙋ человѣ́ческꙋю сꙋ́етнꙋю: ра́дꙋйсѧ, сокрꙋши́вый сѣ̑ти тщесла́вїѧ и҆ горды́ни.

Ра́дꙋйсѧ, попра́вый высокоꙋ́мїѧ дꙋшевре́днꙋю пре́лесть: ра́дꙋйсѧ, ᲂу҆сво́ивый себѣ̀ ст҃о́е смире́нїе хрⷭ҇то́во.

Ра́дꙋйсѧ, и҆спо́лнивый всѧ̑ ѻ҆бѣ́ты и҆́ночества: ра́дꙋйсѧ, ᲂу҆краси́выйсѧ дара́ми бл҃года́ти бж҃їей.

Ра́дꙋйсѧ, по бл҃года́ти прїе́мый вла́сть на дꙋ́хи нечи̑стыѧ: ра́дꙋйсѧ, ни во что́же вмѣни́вый тѣ́хъ ᲂу҆страшє́нїѧ и҆ привидѣ̑нїѧ.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ є҃

Свѣтоза́рный лꙋ́чь ѡ҆зарѝ въ нощнѣ́й темнотѣ̀ мѣ́сто пꙋсты́нное, на не́мже всели́тисѧ прише́лъ є҆сѝ, прпⷣбне, зна́менꙋѧ собо́ю свѣ́тлость дꙋшѝ твоеѧ̀, и҆ пламенѣ́ющее любо́вїю ко гдⷭ҇ꙋ се́рдце твоѐ, и҆дѣ́же бл҃гопрїѧ́тно бы́сть творцꙋ̀ твоѐ произволе́нїе рабо́тати є҆мꙋ̀ въ преподо́бїи и҆ ст҃ости, и҆ пѣ́ти є҆мꙋ̀ та́мѡ хвале́бнꙋю пѣ́снь: А҆ллилꙋ́їа.

І҆́косъ є҃

Ви́дѣвше а҆́гг҃льстїи чи́нове равноа́гг҃льское житїѐ твоѐ, ѻ҆́тче бг҃обл҃же́нне, смире́нїѧ твоегѡ̀ глꙋбинꙋ̀, мл҃твы неѿстꙋ́пность, воздержа́нїѧ тве́рдость и҆ ве́лїю ре́вность дꙋ́ха твоегѡ̀ ѡ҆ чистотѣ̀, ᲂу҆диви́шасѧ и҆ просла́виша чл҃вѣколю́бца бг҃а ᲂу҆крѣплѧ́ющаго немощно́е є҆стество̀ человѣ́ческое. Мы́ же ᲂу҆бл҃жа́емъ тѧ̀ и҆ зове́мъ:

Ра́дꙋйсѧ, свѣти́льниче пꙋсты́нный, просвѣти́вый странꙋ̀ каре́льскꙋю сїѧ́нїемъ твои́хъ добродѣ́телей: ра́дꙋйсѧ, и҆́ночествꙋющихъ ди́вное ᲂу҆краше́нїе.

Ра́дꙋйсѧ, крі́не бл҃гоꙋха́нный пꙋсты́ннагѡ прозѧбе́нїѧ: ра́дꙋйсѧ, дре́во бл҃гопло́дное нбⷭ҇нагѡ насаждє́нїѧ.

Ра́дꙋйсѧ, возлюби́вый бл҃голѣ́пїе до́мꙋ бж҃їѧ: ра́дꙋйсѧ, въ самѣ́мъ себѣ̀ хра́мъ трїѷпоста́сномꙋ бжⷭ҇твꙋ̀ ᲂу҆гото́вивый.

Ра́дꙋйсѧ, преподо́бїемъ и҆ пра́вдою ѡ҆дѣ́ѧнный: ра́дꙋйсѧ, сою́зомъ добродѣ́телей ᲂу҆добре́нный.

Ра́дꙋйсѧ, пома́занїе прїе́мый ѿ ст҃а́гѡ дх҃а: ра́дꙋйсѧ, ѡ҆сщ҃е́нный сосꙋ́де бл҃года́ти бж҃їей.

Ра́дꙋйсѧ, ра́бе хрⷭ҇то́въ, бл҃гі́й и҆ вѣ́рный: ра́дꙋйсѧ, слꙋго̀ гдⷭ҇нь и҆́стинный.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ ѕ҃

Проповѣ́дникъ по́двигѡвъ твои́хъ въ пꙋсты́ни сви́рской ꙗ҆ви́лсѧ лове́цъ ѕвѣре́й ди́вїихъ, и҆́же гна́въ є҆ле́нѧ въ дꙋбра́вѣ непроходи́мѣй, смотрѣ́нїемъ бж҃їимъ ѡ҆брѣ́те хра́минꙋ твою̀, прпⷣбне ѻ҆́тче: ви́дѣвъ же тѧ̀ во пло́ти а҆́гг҃ла, зна́менїе бл҃года́тнагѡ ѡ҆заре́нїѧ на лицѣ̀ свое́мъ носѧ́ща, стра́ха и҆ ра́дости и҆спо́лнисѧ, и҆ припа́дъ къ честны̑мъ твои̑мъ стопа́мъ, во ᲂу҆миле́нїи се́рдца возопѝ зижди́телю бг҃ꙋ: А҆ллилꙋ́їа.

І҆́косъ ѕ҃

Возсїѧ́лъ є҆сѝ въ пꙋсты́ни сви́рстѣй бг҃освѣ́тлое свѣти́ло, и҆ на сп҃се́нїѧ стезю̀ наста́вилъ є҆сѝ мнѡ́ги дꙋ́шы человѣ̑ческїѧ: ꙗ҆ви́ бо тѧ̀ хрⷭ҇то́съ наста́вника и҆ ᲂу҆чи́телѧ и҆́нокѡмъ пꙋстыннолюби̑вымъ, и҆̀же стека́хꙋсѧ къ тебѣ̀, ꙗ҆́кѡ ѻ҆́вцы къ па́стырю, могꙋ́щꙋ ᲂу҆пастѝ и҆̀хъ на па́жити живоно́снѣй. Тѣ́мже, ꙗ҆́кѡ сотвори́вшаго и҆ наꙋчи́вшаго, чествꙋ́емъ тѧ̀ си́ми похва́льными словесы̀:

Ра́дꙋйсѧ, и҆сто́чниче бг҃одꙋхнове́нныхъ ᲂу҆че́нїй: ра́дꙋйсѧ, храни́лище и҆з̾ѡби́льнагѡ ᲂу҆миле́нїѧ.

Ра́дꙋйсѧ, ѡ҆дꙋшевлє́нныѧ скрижа̑ли зако́на гдⷭ҇нѧ: ра́дꙋйсѧ, немо́лчный проповѣ́дниче є҆ѵⷢ҇лїа хрⷭ҇то́ва.

Ра́дꙋйсѧ, за́пѡвѣди гдⷭ҇ни и҆спо́лнивый, и҆ ѻ҆́нымъ наꙋчи́вый ᲂу҆ченикѡ́въ твои́хъ: ра́дꙋйсѧ, лѣни́выхъ подви́гнꙋвый къ и҆справле́нїю твои́ми хрⷭ҇топодража́тельными нра̑вы.

Ра́дꙋйсѧ, немощны́хъ да́нною тѝ ѿ гдⷭ҇а бл҃года́тїю ᲂу҆крѣпи́вый: ра́дꙋйсѧ, скорбѧ́щихъ сла́достїю твои́хъ слове́съ ᲂу҆тѣ́шивый.

Ра́дꙋйсѧ, грѣ́шныхъ къ покаѧ́нїю напра́вивый: ра́дꙋйсѧ, ю҆́ныѧ ᲂу҆цѣломꙋ́дривый.

Ра́дꙋйсѧ, сострада́нїѧ и҆спо́лненный: ра́дꙋйсѧ, въ млⷭ҇ти бога́тый.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ з҃

Хотѧ̀ чл҃вѣколю́бецъ гдⷭ҇ь просла́вити мѣ́сто по́двигѡвъ твои́хъ, ѻ҆́тче, посла̀ а҆́гг҃ла своего̀ бл҃говѣсти́ти тебѣ̀, ꙗ҆́кѡ бꙋ́детъ на мѣ́стѣ то́мъ ѻ҆би́тель и҆́нокѡмъ во сп҃се́нїе, и҆ въ не́й хра́мъ во и҆́мѧ ст҃ы́ѧ трⷪ҇цы. Ты́ же ꙗ҆вле́нїемъ безпло́тнагѡ просвѣще́нъ, съ ра́достнымъ тре́петомъ внима́лъ є҆сѝ бл҃говѣ́стїю нбⷭ҇номꙋ, зовы́й въ смире́нїи дꙋ́ха влⷣцѣ а҆́гг҃лѡвъ и҆ человѣ́кѡвъ: А҆ллилꙋ́їа.

І҆́косъ з҃

Но́вое зна́менїе бл҃говоле́нїѧ бж҃їѧ дарова́сѧ тебѣ̀, прпⷣбне, є҆гда̀ безмо́лвствꙋющꙋ тѝ въ и҆збра́ннѣй пꙋсты́ни, въ нощѝ свѣ́тъ ве́лїй ѡ҆блиста̀ тѧ̀, и҆ трѝ мꙋ̑жа въ ѻ҆де́ждахъ свѣ́тлыхъ предста́ша пред̾ тобо́ю, ми́ръ тебѣ̀ да́рꙋюще и҆ повелѣва́юще, да ᲂу҆стро́иши та́мѡ ѻ҆би́тель и҆́ноческꙋю, и҆ въ не́й хра́мъ во и҆́мѧ ст҃ы́ѧ трⷪ҇цы. Дивѧ́сѧ ᲂу҆̀бо семꙋ̀ пречꙋ́дномꙋ въ трїе́хъ а҆́гг҃льскихъ ли́цѣхъ трⷪ҇ческомꙋ ꙗ҆вле́нїю, зове́мъ тѝ:

Ра́дꙋйсѧ, таи́нниче прест҃ы́ѧ и҆ є҆диносꙋ́щныѧ трⷪ҇цы: ра́дꙋйсѧ, самови́дче неизрече́ннагѡ бж҃їѧ ꙗ҆вле́нїѧ.

Ра́дꙋйсѧ, собесѣ́дниче свѣтоно́сныхъ а҆́гг҃льскихъ си́лъ: ра́дꙋйсѧ, созерца́телю лꙋчеза́рнагѡ бж҃е́ственнагѡ видѣ́нїѧ.

Ра́дꙋйсѧ, прича́стниче ѻ҆гнезра́чнагѡ трисл҃нечнагѡ сїѧ́нїѧ: ра́дꙋйсѧ, покло́нниче трїѷпоста́снагѡ бжⷭ҇тва̀.

Ра́дꙋйсѧ, въ сме́ртнѣмъ тѣлесѝ безсме́ртїѧ заре́ю просвѣще́нный: ра́дꙋйсѧ, на землѝ нбⷭ҇нагѡ посѣще́нїѧ ᲂу҆досто́енный.

Ра́дꙋйсѧ, смире́нїемъ высѡ́каѧ стѧжа́вый: ра́дꙋйсѧ, нището́ю бога́тꙋю млⷭ҇ть гдⷭ҇ню ᲂу҆лꙋчи́вый.

Ра́дꙋйсѧ, сѣ́ѧвый слеза́ми ра́дость присносꙋ́щнꙋю: ра́дꙋйсѧ, прїе́мый и҆сполне́нїе ѡ҆бѣтова́нїй непрело́жныхъ.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ и҃

Страннолѣ́пнѡ ꙗ҆ви́лсѧ тѝ на воздꙋ́сѣ а҆́гг҃лъ гдⷭ҇нь въ ма́нтїи и҆ кꙋ́коли и҆́ночестѣмъ, ᲂу҆казꙋ́ѧй мѣ́сто, на не́мже хра́мъ во и҆́мѧ живонача́льныѧ трⷪ҇цы и҆мѣ́лъ є҆сѝ созда́ти въ пꙋсты́нѣ сви́рстѣй, прпⷣбне ѻ҆́тче, є҆го́же бж҃їимъ поспѣше́нїемъ соверши́въ и҆ ѡ҆ст҃и́въ, со ᲂу҆ченикѝ твои́ми немѡ́лчныѧ хвалы̑ возсыла́лъ є҆сѝ въ не́мъ гдⷭ҇ви, зовы́й: А҆ллилꙋ́їа.

І҆́косъ и҃

Всего̀ себѐ преда́въ во́лѣ гдⷭ҇ней, ᲂу҆ченика́ми твои́ми ᲂу҆моле́нный, сщ҃е́нства бл҃года́ть воспрїѧ́ти не ᲂу҆клони́лсѧ є҆сѝ, ѻ҆́тче, а҆́ще и҆ тꙋжа́ше дꙋ́хъ тво́й, ᲂу҆жаса́ѧсѧ высоты̀ сеѧ̀, но послꙋша́нїе ꙗ҆ви́лъ є҆сѝ дꙋхѡ́внымъ ча́дѡмъ твои̑мъ, подвиза́ѧ и҆̀хъ согла́снѡ зва́ти тебѣ̀:

Ра́дꙋйсѧ, безкро́вныѧ же́ртвы досто́йный соверши́телю: ра́дꙋйсѧ, ѻ҆лтарѧ̀ гдⷭ҇нѧ бл҃гоговѣ́йный слꙋжи́телю.

Ра́дꙋйсѧ, преподо́бныѧ рꙋ́цѣ твоѝ со мно́гимъ дерзнове́нїемъ ко гдⷭ҇ꙋ воздѣѧ́вый: ра́дꙋйсѧ, мл҃твы теплѣ́йшыѧ ѿ се́рдца чи́ста къ прⷭ҇то́лꙋ вседержи́телѧ возноси́вый.

Ра́дꙋйсѧ, ѡ҆́бразъ бл҃гоче́стїѧ бы́вый твои̑мъ ᲂу҆ченикѡ́мъ: ра́дꙋйсѧ, ма́стїю сщ҃е́нства ᲂу҆маще́ннаѧ главо̀.

Ра́дꙋйсѧ, вождю̀ бл҃гоискꙋ́сный во́инѡвъ дꙋхо́вныхъ: ра́дꙋйсѧ, ѻ҆́тче бл҃гомꙋ́дрый ѻ҆бщежи́тїѧ и҆́ноческагѡ.

Ра́дꙋйсѧ, свѣщѐ, въ мл҃твѣ къ бг҃ꙋ возжже́ннаѧ: ра́дꙋйсѧ, ѕвѣздо̀, ко сп҃се́нїю пꙋ́ть вѣ́рный показꙋ́ющаѧ.

Ра́дꙋйсѧ, ма́слино, є҆ле́й млⷭ҇ти бж҃їей и҆сточи́вшаѧ: ра́дꙋйсѧ, ча́ше, жа́ждꙋщихъ ᲂу҆че́нїѧ сп҃си́тельнагѡ напои́вшаѧ.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ ѳ҃

Всѝ и҆́ноцы ѻ҆би́тели твоеѧ̀ въ ра́достный тре́петъ прїидо́ша, є҆гда̀ ᲂу҆стремле́нїе пото́ка во́днагѡ, на ст҃ꙋ́ю ѻ҆би́тель твою̀ дви́жꙋщеесѧ, мл҃твою твое́ю ᲂу҆кроти́лъ є҆сѝ, и҆ призыва́нїемъ всеси́льнагѡ и҆́мене і҆и҃съ хрⷭ҇то́ва, бꙋ́рномꙋ пото́кꙋ тещѝ безвре́днѡ ᲂу҆стро́илъ є҆сѝ на бл҃гꙋ́ю потре́бꙋ и҆́ночествꙋющихъ, є҆́же ви́дѣвше дꙋхѡ́внаѧ ча̑да твоѧ̑, всеꙋмиле́ннѡ возгласи́ша кꙋ́пнѡ съ тобо́ю бг҃ꙋ: А҆ллилꙋ́їа.

І҆́косъ ѳ҃

Вѣті́йство человѣ́ческое не довлѣ́етъ и҆зрещѝ ѻ҆би́лїе ра́дости дꙋхо́вныѧ, є҆́юже преиспо́лнилсѧ є҆сѝ, ѻ҆́тче бг҃оно́сне, є҆гда̀ во вре́мѧ мл҃твы твоеѧ̀ нощны́ѧ, ꙗ҆ви́сѧ тѝ прест҃а́ѧ бцⷣа съ ли́комъ чинѡ́въ а҆́гг҃льскихъ и҆ ѡ҆бѣтова̑нїи непрело́жными дꙋ́шꙋ твою̀ возвеселѝ, ꙗ҆́кѡ при́снаѧ застꙋ́пница ѻ҆би́тели твоеѧ̀ бꙋ́детъ, снабдѣва́ющи и҆ покрыва́ющи ю҆̀ по всѧ̑ дни̑. Тѣ́мже и҆ мы̀ сїѧ̑ ра́дѡстныѧ тебѣ̀ прино́симъ глаго́лы:

Ра́дꙋйсѧ, бл҃говоле́нїемъ бг҃омт҃ре ѡ҆сѣне́нный: ра́дꙋйсѧ, посѣще́нїемъ цр҃и́цы нб҃сѐ и҆ землѝ ᲂу҆тѣ́шенный.

Ра́дꙋйсѧ, слы́шавый млⷭ҇тивыѧ ѿ ᲂу҆́стъ є҆ѧ̀ глаго́лы: ра́дꙋйсѧ, прїе́мый ѡ҆бѣтова́нїе крѣ́пкагѡ є҆ѧ̀ твоеѧ̀ ѻ҆би́тели застꙋпле́нїѧ.

Ра́дꙋйсѧ, люби́миче є҆ѧ̀ преи́скреннїй: ра́дꙋйсѧ, и҆збра́нниче сн҃а є҆ѧ̀ и҆ бг҃а.

Ра́дꙋйсѧ, да́ромъ чꙋдотворе́нїѧ ѡ҆бл҃года́тствованный: ра́дꙋйсѧ, бꙋ̑дꙋщаѧ, ꙗ҆́кѡ настоѧ́щаѧ прови́дѣвый.

Ра́дꙋйсѧ, ры́барємъ лови́твꙋ чꙋде́снѡ ᲂу҆мно́живый: ра́дꙋйсѧ, неплѡ́днымъ роди́телємъ чадоро́дїе дарова́вый.

Ра́дꙋйсѧ, болѧ́щыѧ здра́вы возста́вивый: ра́дꙋйсѧ, та̑йнаѧ согрѣшє́нїѧ человѣ́чєскаѧ ѡ҆бличи́вый.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ і҃

Сп҃стѝ хотѧ̀ дꙋ́шы ᲂу҆чєни́къ твои́хъ, ѻ҆те́чески назида́лъ є҆сѝ и҆̀хъ, бг҃омꙋ́дре, ѻ҆́ваго сло́вомъ, ѻ҆́ваго примѣ́ромъ житїѧ̀ твоегѡ̀, съ кро́тостїю ѡ҆блича́ѧ, съ любо́вїю ᲂу҆вѣщава́ѧ и҆̀хъ преꙋспѣва́ти въ бл҃гоче́стїи и҆ чистотѣ̀: наипа́че же пред̾ кончи́ною твое́ю, всѧ̑ ко сп҃се́нїю дꙋше́вномꙋ бл҃гопотрє́бнаѧ заповѣ́далъ є҆сѝ и҆̀мъ, и҆ наꙋчи́лъ є҆сѝ и҆̀хъ въ мл҃твахъ бо́дрствовати и҆ немо́лчнѡ пѣ́ти бг҃ꙋ: А҆ллилꙋ́їа.

І҆́косъ і҃

Стѣна̀ застꙋпле́нїѧ бы́ша мл҃твы твоѧ̑, чꙋдотво́рче ст҃ы́й, всѣ̑мъ съ вѣ́рою къ тебѣ̀ притека́ющымъ во всѧ́кой ско́рби, и҆́бо чистоты̀ ра́ди твоеѧ̀ серде́чныѧ, си́ла дꙋхо́внаѧ ѿ бг҃а тебѣ̀ дарова́сѧ, болѧ́щихъ и҆сцѣлѧ́ти, бѣ́дствꙋющымъ помога́ти, бꙋ̑дꙋщаѧ прорица́ти, ꙗ҆́кѡ сла́вити бли̑жнимъ и҆ да̑льнимъ вели̑чїѧ бж҃їѧ, въ тебѣ̀ ꙗ҆влє́ннаѧ, и҆ зва́ти тебѣ̀ си́це:

Ра́дꙋйсѧ, недꙋ́гѡвъ человѣ́ческихъ врачꙋ̀ немздопрїе́мный: ра́дꙋйсѧ, не то́кмѡ тѣле́сныхъ, но и҆ дꙋше́вныхъ болѣ́зней цѣли́телю и҆зрѧ́дный.

Ра́дꙋйсѧ, слѣпы̑мъ прозрѣ́нїе дарова́вый: ра́дꙋйсѧ, слѧче́нныхъ и҆ ᲂу҆вѣ́чныхъ здра́вы сотвори́вый.

Ра́дꙋйсѧ, бѣсны́хъ ѿ дїа́вольскагѡ ᲂу҆дрꙋче́нїѧ свободи́вый: ра́дꙋйсѧ, и҆зстꙋплє́ннымъ ᲂу҆́мъ здра́вый возврати́вый.

Ра́дꙋйсѧ, покры́тыхъ стрꙋ́пами ᲂу҆врачева́вый: ра́дꙋйсѧ, печа́льныхъ ᲂу҆тѣ́шивый.

Ра́дꙋйсѧ, бѣ́дствꙋющымъ на по́мощь ᲂу҆скори́вый: ра́дꙋйсѧ, плѣнє́ннымъ и҆ въ темни́цѣ сѣдѧ́щымъ ѡ҆сла́бꙋ и҆ свобо́дꙋ ꙗ҆вле́нїемъ твои́мъ дарова́вый.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ а҃і

Пѣ́нїе всеꙋмиле́нное прине́слъ є҆сѝ прест҃ѣ́й трⷪ҇цѣ во вре́мѧ кончи́ны твоеѧ̀, прпⷣбне, и҆ въ мл҃твѣ сꙋ́щей на ᲂу҆стѣ́хъ твои́хъ, преда́лъ є҆сѝ ст҃ꙋ́ю дꙋ́шꙋ твою̀ въ рꙋ́цѣ жива́гѡ бг҃а, є҆го́же ѿ ю҆́ности возлюби́лъ є҆сѝ, и҆ є҆мꙋ́же до ста́рости масти́тыѧ рабо́талъ є҆сѝ нелицемѣ́рнѡ, тѣ́мже со ᲂу҆пова́нїемъ бл҃ги́мъ ра́достнѡ преше́лъ є҆сѝ къ ѻ҆би́телемъ нбⷭ҇нымъ, со а҆́гг҃льскими ли́ки пѣ́ти трїѷпоста́сномꙋ бг҃ꙋ: А҆ллилꙋ́їа.

І҆́косъ а҃і

Ми́рнꙋю кончи́нꙋ твою̀ ви́дѣвше твоѝ ᲂу҆ченицы̀, вели́кїй ᲂу҆го́дниче бж҃їй, ско́рбь разлꙋче́нїѧ съ тобо́ю ᲂу҆тѣше́нїемъ бл҃года́тнымъ раствори́ша, въ ᲂу҆пова́нїи всеси́льнагѡ предста́тельства твоегѡ̀ горѣ̀ ᲂу҆ престо́ла бж҃їѧ, и҆дѣ́же слы́шиши съ любо́вїю тебѣ̀ зовꙋ́щихъ:

Ра́дꙋйсѧ, вѣне́цъ безсме́ртныѧ жи́зни ѿ рꙋкѝ вседержи́телѧ прїе́мый: ра́дꙋйсѧ, въ черто́зѣ нбⷭ҇нагѡ домовлⷣки ликовствꙋ́ѧй.

Ра́дꙋйсѧ, ѿкрове́ннымъ лице́мъ сла́вꙋ трисїѧ́ннагѡ бжⷭ҇тва̀ созерца́ѧй: ра́дꙋйсѧ, со ста́рцы бѣлори́зными творцꙋ̀ покланѧ́ѧйсѧ.

Ра́дꙋйсѧ, всесвѣ́тлагѡ црⷭ҇твїѧ хрⷭ҇то́ва наслѣ́дниче: ра́дꙋйсѧ, і҆ерⷭ҇ли́ма го́рнѧгѡ граждани́не.

Ра́дꙋйсѧ, нбⷭ҇нагѡ сїѡ́на жи́телю: ра́дꙋйсѧ, нерꙋкотворе́нныхъ ски́нїй ра́йскихъ ѻ҆бита́телю.

Ра́дꙋйсѧ, по трꙋдѣ́хъ вре́менныѧ жи́зни, поко́й вѣ́чный полꙋчи́вый: ра́дꙋйсѧ, бл҃же́нство, ѿ вѣ́ка првⷣнымъ ᲂу҆гото́ванное, пра́веднѡ воспрїѧ́вый.

Ра́дꙋйсѧ, лꙋча́ми невече́рнѧгѡ свѣ́та свы́ше ѡ҆сїѧ́нный: ра́дꙋйсѧ, до́лꙋ вели́чїемъ чꙋде́съ блиста́ѧй.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ в҃і

Бл҃года́ти прича́стна ꙗ҆ви́сѧ сщ҃е́ннаѧ ра́ка, содержа́щаѧ многоцѣлє́бныѧ мо́щи твоѧ̑, чꙋдотво́рче ст҃ы́й, и҆̀хже по лѣ́тѣхъ мно́зѣхъ ꙗ҆вѝ гдⷭ҇ь въ нѣ́драхъ земны́хъ нетлѣ́нными, и҆сцѣлє́нїѧ неѡскꙋ́днѡ и҆сточа́ющыѧ, и҆ всѧ́къ недꙋ́гъ врачꙋ́ющыѧ си́лою бг҃а, ди́внагѡ во ст҃ы́хъ свои́хъ, ди́внѡ просла́вльшагѡ тѧ̀ на нб҃сѝ и҆ на землѝ, є҆мꙋ́же воспѣва́емъ: А҆ллилꙋ́їа.

І҆́косъ в҃і

Пою́ще ра́достнꙋю пѣ́снь хвалы̀ и҆ бл҃годаре́нїѧ чл҃вѣколю́бцꙋ бг҃ꙋ, просла́вльшемꙋ тѧ̀ въ странѣ̀ рѡссі́йстѣй чꙋдотво́рца ди́внаго и҆ ми́лостиваго, мо́лимъ тѧ̀, прпⷣбне ѻ҆́тче на́шъ: бꙋ́ди хода́тай къ немꙋ̀ и҆ мл҃твенникъ при́сный ѡ҆ на́съ, зовꙋ́щихъ тѝ:

Ра́дꙋйсѧ, ро́да хрⷭ҇тїа́нскагѡ застꙋ́пниче: ра́дꙋйсѧ, дарѡ́въ многоразли́чныхъ сокро́вищнице.

Ра́дꙋйсѧ, покро́ве, бг҃омъ зда́нный: ра́дꙋйсѧ, ѿ бг҃а бл҃года́ть и҆сцѣле́нїй воспрїѧ́вый.

Ра́дꙋйсѧ, цвѣ́те нетлѣ́нїѧ, ѡ҆бл҃гоꙋха́вый ст҃ꙋ́ю цр҃ковь: ра́дꙋйсѧ, зарѐ безсме́ртїѧ, ѿ гро́ба пресла́внѡ возсїѧ́вшаѧ.

Ра́дꙋйсѧ, щедрѡ́тъ и҆ ми́лованїѧ стрꙋѐ неизсѧка́емаѧ: ра́дꙋйсѧ, бл҃гоꙋтро́бїѧ и҆сто́чниче неѡскꙋдѣва́емый.

Ра́дꙋйсѧ, любвѐ и҆ сострада́нїѧ ꙗ҆вле́нїе многочꙋде́сное: ра́дꙋйсѧ, тѣле́съ на́шихъ бг҃одарова́нное врачева́нїе.

Ра́дꙋйсѧ, ѡ҆ дꙋша́хъ на́шихъ бл҃гопрїѧ́тное предста́тельство.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ г҃і

Ѽ вели́кїй и҆ пресла́вный чꙋдотво́рче, прпⷣбне ѻ҆́тче на́шъ а҆леѯа́ндре! ми́лостивнѡ прїимѝ сїѐ ма́лое моле́нїе на́ше, и҆ мл҃твами твои́ми сохранѝ на́съ ѿ недꙋ́гѡвъ дꙋше́вныхъ и҆ тѣле́сныхъ въ жи́зни се́й, и҆ ѿ грѧдꙋ́щихъ мꙋче́нїй вѣ́чныхъ и҆зба́ви, и҆ сподо́би на́съ вкꙋ́пѣ съ тобо́ю во црⷭ҇твїи нбⷭ҇нѣмъ вы́нꙋ пѣ́ти бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льскїй нра́въ и҆мѣ́лъ є҆сѝ, ѻ҆́тче прпⷣбне, и҆ ꙗ҆́кѡ безпло́тный, непоро́чнѡ житїѐ соверши́лъ є҆сѝ на землѝ, ди́вный ѡ҆́бразъ соверше́нства дꙋхо́внагѡ на́мъ ѡ҆ста́вивъ, да подража́емъ добродѣ́телємъ твои̑мъ, и҆ зове́мъ тѝ си́це:

Ра́дꙋйсѧ, бл҃гочести́выхъ роди́телей пло́дъ бг҃одарова́нный: ра́дꙋйсѧ, непло́дїе ро́ждшихъ тѧ̀ разрѣши́вый.

Ра́дꙋйсѧ, сѣ́тованїе и҆́хъ на ра́дость преложи́вый: ра́дꙋйсѧ, ѿ пеле́нъ бг҃омъ и҆збра́нный.

Ра́дꙋйсѧ, ѿ ᲂу҆тро́бы ма́тернїѧ на слꙋ́жбꙋ є҆мꙋ̀ пред̾ꙋста́вленный: ра́дꙋйсѧ, ѿ ю҆́ности є҆го̀ є҆ди́наго всѣ́мъ се́рдцемъ возлюби́вый.

Ра́дꙋйсѧ, всѧ̑ кра̑снаѧ мі́ра сегѡ̀ ни во что́же вмѣни́вый: ра́дꙋйсѧ, посто́мъ и҆ бдѣ́нїемъ мл҃твеннымъ пло́ть твою̀ ᲂу҆дрꙋчи́вый.

Ра́дꙋйсѧ, непоро́чный сосꙋ́де бж҃їѧ бл҃года́ти: ра́дꙋйсѧ, жили́ще дх҃а ст҃а́гѡ, ᲂу҆краше́нное чистото́ю.

Ра́дꙋйсѧ, мꙋ́жꙋ жела́нїй дꙋхо́вныхъ: ра́дꙋйсѧ, главо̀, ѡ҆сщ҃е́ннаѧ десни́цею всевы́шнѧгѡ.

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Конда́къ а҃

И҆збра́нный ᲂу҆го́дниче хрⷭ҇то́въ и҆ чꙋдотво́рче, прпⷣбный ѻ҆́тче а҆леѯа́ндре, возсїѧ́вый мі́рови, ꙗ҆́кѡ ѕвѣзда̀ бг҃освѣ́тлаѧ, житїѧ̀ твоегѡ̀ добро́тою и҆ мно́жествомъ чꙋдотворе́нїй, восхвалѧ́емъ тѧ̀ любо́вїю въ пѣ́снехъ дꙋхо́вныхъ: ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, прпⷣбне а҆леѯа́ндре, сви́рскїй чꙋдотво́рче.

Моли́твы

Ѽ сщ҃е́ннаѧ главо̀, а҆́гг҃ле земны́й и҆ человѣ́че нбⷭ҇ный, прпⷣбне и҆ бг҃оно́сне ѻ҆́тче на́шъ а҆леѯа́ндре, и҆зрѧ́дный ᲂу҆го́дниче прест҃ы́ѧ и҆ є҆диносꙋ́щныѧ трⷪ҇цы, ꙗ҆влѧ́ѧй мнѡ́гїѧ млⷭ҇ти живꙋ́щымъ во ст҃ѣ́й ѻ҆би́тели твое́й, и҆ всѣ̑мъ, съ вѣ́рою и҆ любо́вїю притека́ющымъ къ тебѣ̀. И҆спросѝ на́мъ всѧ̑ бл҃гопотрє́бнаѧ къ житїю̀ семꙋ̀ вре́менномꙋ, и҆ нꙋ̑жнаѧ къ вѣ́чномꙋ сп҃се́нїю на́шемꙋ. Посо́бствꙋй предста́тельствомъ твои́мъ, ᲂу҆го́дниче бж҃їй, на враги̑ ви̑димыѧ и҆ неви̑димыѧ, да въ ми́рѣ глꙋбо́цѣ пребꙋ́детъ ст҃а́ѧ правосла́внаѧ цр҃ковь хрⷭ҇то́ва и҆ бл҃гострое́нїи зи́ждетсѧ, во всѧ́комъ бл҃гоче́стїи нерꙋши́мѡ. Бꙋ́ди всѣ̑мъ на́мъ, чꙋдотво́рче ст҃ы́й, помо́щникъ ско́рый во всѧ́кой ско́рби и҆ ѡ҆бстоѧ́нїи. Наипа́че же въ ча́съ кончи́ны на́шеѧ ꙗ҆ви́сѧ на́мъ застꙋ́пникъ бл҃госе́рдый, да не пре́дани бꙋ́демъ на мыта́рствахъ воздꙋ́шныхъ вла́сти ѕло́бнагѡ мїроде́ржца, но да сподо́бимсѧ непреткнове́ннагѡ восхо́да въ црⷭ҇твїе нбⷭ҇ное. Є҆́й, ѻ҆́тче, мл҃твенниче на́шъ при́сный! Не посрамѝ ᲂу҆пова́нїѧ на́шегѡ, не пре́зри смирє́ннаѧ молє́нїѧ на̑ша, и҆ предста́тельствꙋй за на́съ пред̾ престо́ломъ живонача́льныѧ трⷪ҇цы, да сподо́бимсѧ вкꙋ́пѣ съ тобо́ю и҆ со всѣ́ми ст҃ы́ми, мы̀ недосто́йнїи, въ селе́нїѧхъ ра́йскихъ сла́вити вели́чїе, бл҃года́ть и҆ млⷭ҇ть є҆ди́нагѡ въ трⷪ҇цѣ бг҃а, ѻ҆ц҃а̀ и҆ сн҃а и҆ ст҃а́гѡ дх҃а, во вѣ́ки вѣкѡ́въ. А҆ми́нь.