Православный календарь
Размер шрифта:

Ака́ѳістъ

Ака́ѳїстъ ст҃о́мꙋ бл҃говѣ́рномꙋ кнѧ́зю данїи́лꙋ, моско́вскомꙋ чꙋдотво́рцꙋ

Св. благов. кн. Даниила Московского (обрет. мощ.) (1652) 12 сентября 2026

Конда́къ а҃

И҆збра́нный чꙋдотво́рче и҆ преди́вный ᲂу҆го́дниче хрⷭ҇то́въ, гра́да москвы̀ и҆ держа́вы рѡссі́йскїѧ крѣ́пкое ѡ҆гражде́нїе, раздо́рѡвъ и҆ нестрое́нїй и҆скорени́телю, бл҃говѣ́рный кнѧ́же данїи́ле, похва̑льнаѧ восписꙋ́емъ тѝ, къ ра́цѣ моще́й твои́хъ притека́юще. Ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, зовꙋ́щихъ:

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

І҆́косъ а҃

А҆́гг҃лѡвъ творе́цъ и҆ гдⷭ҇ь во дни̑ вели́кихъ бѣ́дъ и҆ напа́стей, ѡ҆быше́дшихъ странꙋ̀ на́шꙋ ѿ нечести́вагѡ ца́рства а҆га́рѧнскагѡ, восхотѣ́въ лю́демъ стра́ждꙋщимъ ᲂу҆тѣше́нїе дарова́ти, ꙗ҆вѝ тѧ̀, кн҃же данїи́ле, ꙗ҆́кѡ пло́дъ красе́нъ ѿ чре́слъ вели́кагѡ кн҃зѧ а҆леѯа́ндра: лю́дїе же ѡ҆ рожде́нїи твое́мъ ра́дости и҆спо́лнившесѧ, взыва́хꙋ тѝ сицєва́ѧ:

Ра́дꙋйсѧ, ко́рене бл҃гочести́вагѡ прозѧбе́нїе: ра́дꙋйсѧ, добродѣ́телей ѻ҆тца̀ твоегѡ̀ и҆ ма́тере наслѣ́дниче.

Ра́дꙋйсѧ, рожде́нїемъ твои́мъ лю́ди гра́да влади́мїра возвесели́вый: ра́дꙋйсѧ, грѧдꙋ́щꙋю сла́вꙋ москвы̀ предвозвѣсти́вый.

Ра́дꙋйсѧ, и҆збра́нниче бж҃їй: ра́дꙋйсѧ, пра́вило вѣ́ры бл҃гочести́выѧ.

Ра́дꙋйсѧ, ѡ҆́бразе кро́тости дꙋхо́вныѧ: ра́дꙋйсѧ, бг҃а, ꙗ҆́кѡ и҆́стиннагѡ ѻ҆ц҃а̀ на́шегѡ, и҆здѣ́тска позна́вый.

Ра́дꙋйсѧ, ꙗ҆́кѡ і҆ѡ́сифъ, ѿ бра́тїи твоеѧ̀ досаждє́нїѧ сла́дцѣ претерпѣ́вый: ра́дꙋйсѧ, послѣдѝ и҆ бра́тїю свою̀ въ любо́вь себѣ̀ призва́вый.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ в҃

Ви́дѧще бли́жнїи твоѝ, бл҃же́нне, де́нь ѿ днѐ во бл҃гоче́стїи тѧ̀ возраста́юща, и҆ не то́чїю млеко́мъ ма́тернимъ, но па́че бл҃года́тїю бж҃їею пита́ема, ра́довахꙋсѧ и҆, гдⷭ҇а ѡ҆ се́мъ хва́лѧще, взыва́хꙋ: А҆ллилꙋ́їа.

І҆́косъ в҃

Ра́зꙋмъ бг҃опросвѣще́нъ и҆мѣ́ѧ, ᲂу҆разꙋмѣ́лъ є҆сѝ, всехва́льне, по словесѝ а҆пⷭ҇льскомꙋ, ꙗ҆́кѡ нꙋ́жнѣйши всего̀ є҆́сть бл҃гоче́стїе, и҆́мже и҆ потща́лсѧ є҆сѝ ѡ҆богати́ти дꙋ́шꙋ твою̀, въ мл҃твахъ и҆ наꙋче́нїи словесѝ бж҃їю всеꙋсе́рднѡ пребыва́ѧ. Тогѡ̀ ра́ди лю́дїе ᲂу҆блажа́хꙋ тѧ̀ си́це:

Ра́дꙋйсѧ, мл҃твенниче теплѣ́йшїй: ра́дꙋйсѧ, послꙋ́шниче є҆ѵⷢ҇лїѧ ᲂу҆се́рднѣйшїй.

Ра́дꙋйсѧ, добродѣ́тєли высѡ́кїѧ въ се́рдцѣ твое́мъ вкорени́вый: ра́дꙋйсѧ, въ за́повѣдехъ гдⷭ҇нихъ всѧ̑ дни̑ живота̀ твоегѡ̀ ходи́вый.

Ра́дꙋйсѧ, ѡ҆́бразомъ житїѧ̀ твоегѡ̀ ми́ръ посредѣ̀ бра́тїи водвори́вый: ра́дꙋйсѧ, гдⷭ҇а твоегѡ̀ па́че всѣ́хъ возлюби́вый.

Ра́дꙋйсѧ, положи́ти дꙋ́шꙋ свою̀ за дрꙋ́ги своѧ̑ непреста́нное жела́нїе и҆мѣ́вый: ра́дꙋйсѧ, бл҃года́ть гдⷭ҇ню въ се́рдцѣ своѐ заключи́вый.

Ра́дꙋйсѧ, и҆ тѣ́ло своѐ то́ю просвѣти́вый: ра́дꙋйсѧ, ѻ҆́ное и҆ по сме́рти нетлѣ́ннѡ сохрани́вый.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ г҃

Си́ла вы́шнѧго ᲂу҆крѣплѧ́ше тѧ̀, бл҃же́нне, є҆гда̀ въ кро́тости и҆ въ смире́нїи дꙋшѝ твоеѧ̀ возраста́ѧ, ᲂу҆готовлѧ́лъ є҆сѝ себє̀ на слꙋже́нїе кнѧ́жеское, и҆ ѡ҆ по́мощи нбⷭ҇нѣй моли́лсѧ є҆сѝ, взыва́ѧ бг҃ꙋ: А҆ллилꙋ́їа.

І҆́косъ г҃

И҆мѣ́ѧ при́снѡ въ дꙋшѝ твое́й гл҃го́лъ гдⷭ҇ень, прⷪ҇ро́кꙋ рече́нный: на кого̀ воззрю̀, то́кмѡ на кро́ткаго и҆ смире́ннаго, и҆ трепе́щꙋщаго слове́съ мои́хъ, потща́лсѧ є҆сѝ, ст҃е, ѻ҆́ными добродѣ́тельми себє̀ ᲂу҆краси́ти, тогѡ̀ ра́ди ᲂу҆блажа́емъ тѧ̀ си́це:

Ра́дꙋйсѧ, подви́жниче до́блїй, на высотꙋ̀ добродѣ́телей возше́дый: ра́дꙋйсѧ, нището́ю дх҃о́вною црⷭ҇твїе нбⷭ҇ное стѧжа́вый.

Ра́дꙋйсѧ, кро́тости ра́ди зе́млю ѡ҆бѣтова́нїѧ наслѣ́дивый: ра́дꙋйсѧ, пра́вды и҆ и҆́стины па́че всего̀ и҆ска́вый.

Ра́дꙋйсѧ, чⷭ҇тото́ю се́рдца твоегѡ̀ гдⷭ҇а созерца́вый: ра́дꙋйсѧ, миротво́рецъ наро́читъ въ житїѝ свое́мъ ꙗ҆ви́выйсѧ.

Ра́дꙋйсѧ, и҆згна̑нїѧ пра́вды ра́ди смире́ннѡ претерпѣ́вый: ра́дꙋйсѧ, мздꙋ̀ вѣ́чнꙋю добродѣ́тельми стѧжа́вый.

Ра́дꙋйсѧ, чⷭ҇тоты̀ дꙋше́вныѧ и҆ тѣле́сныѧ сокро́вище: ра́дꙋйсѧ, любвѐ и҆ кро́тости хрⷭ҇то́вы вмѣсти́лище.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ д҃

Бꙋ́рею а҆га́рѧнскагѡ наше́ствїѧ лю́дїе рѡссі́йстїи потрѧса́еми, на тѧ̀, всечⷭ҇тне, ꙗ҆́кѡ на и҆збра́нника бж҃їѧ, взира́хꙋ и҆, под̾ кро́въ тво́й держа́вный прибѣга́юще, защище́нїе и҆ ᲂу҆тѣше́нїе прїима́хꙋ, вкꙋ́пѣ съ тобо́ю взыва́юще бг҃ꙋ: А҆ллилꙋ́їа.

І҆́косъ д҃

Ви́дѧще, ст҃е, бра́тїѧ твоѧ̀ ѻ҆́трока тѧ̀ є҆щѐ ма́ла сꙋ́ща, наслѣ́дїѧ ѻ҆́тча лиши́ти тѧ̀ ᲂу҆мы́слиша и҆ ᲂу҆дѣ́лъ малѣ́йшїй, моско́вскїй, то́чїю вда́ти тѝ и҆зво́лиша: ты́ же, кро́токъ сы́й и҆ неѕло́бивъ, ничто́же противовѣща́лъ є҆сѝ и҆ за ѡ҆би́дѧщихъ тѧ̀ гдⷭ҇еви моли́лсѧ є҆сѝ. Сегѡ̀ ра́ди ᲂу҆бл҃жа́емъ тѧ̀ си́це:

Ра́дꙋйсѧ, кро́тости хрⷭ҇то́вы подража́телю: ра́дꙋйсѧ, преди́вный нестѧжа́телю.

Ра́дꙋйсѧ, ᲂу҆дѣ́лъ тво́й малѣ́йшїй возвели́чивый: ра́дꙋйсѧ, всего̀ себє̀ во́лѣ бж҃їей преда́вый.

Ра́дꙋйсѧ, ѿ него̀ то́кмо є҆ди́наго по́мощи и҆ска́вый: ра́дꙋйсѧ, бога́тство тлѣ́нное презрѣ́вый.

Ра́дꙋйсѧ, сокрѡ́вища дꙋхѡ́внаѧ возлюби́вый: ра́дꙋйсѧ, ѿ ю҆́ности въ бл҃года́ти ᲂу҆ бг҃а и҆ человѣ̑къ возраста́вый.

Ра́дꙋйсѧ, ꙗ҆́кѡ и҆ по сконча́нїи земна́гѡ житїѧ̀ твоегѡ̀ тꙋ́ю же бл҃года́ть сꙋгꙋ́бѡ воспрїѧ́вый: ра́дꙋйсѧ, ꙗ҆́кѡ и҆ мы̀ бл҃года́ти бж҃їѧ по мл҃твамъ твои́мъ сподоблѧ́емсѧ.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ є҃

Бг҃оте́чнѣй ѕвѣздѣ̀ подо́бѧсѧ, на землѝ тече́нїе твоѐ свѣ́тлѡ соверши́лъ є҆сѝ, бл҃говѣ́рный кн҃же данїи́ле, лꙋчѝ ст҃ости и҆ пото́цы млⷭ҇ти всѣ́мъ и҆злива́ѧ: и҆́хже ра́ди и҆ въ со́нмѣ ст҃ы́хъ пребыва́еши, поѧ̀ съ ни́ми: А҆ллилꙋ́їа.

І҆́косъ є҃

Слы́шавше бли́жнїи и҆ да́льнїи, ꙗ҆́кѡ въ ма́лѣмъ є҆щѐ гра́дѣ москвѣ̀ на высотѣ̀ стола̀ кн҃жескагѡ возѡблиста́лъ є҆сѝ, пресла́вне кн҃же данїи́ле, под̾ сѣ́нь крилꙋ̀ твоє́ю притека́хꙋ, похвалы̑ таковы̑ѧ тѝ приносѧ́ще:

Ра́дꙋйсѧ, кн҃же бл҃госе́рдый, любо́вїю свое́ю всѣ́хъ покрыва́ѧй: ра́дꙋйсѧ, влады́ко прелюби́мый, бѣ́дствꙋющыѧ защища́ѧй.

Ра́дꙋйсѧ, мꙋ́дрость ѻ҆тца̀ твоегѡ̀, кн҃зѧ а҆леѯа́ндра, воспрїѧ́вый: ра́дꙋйсѧ, страны̀ моско́вскїѧ ᲂу҆твержде́нїе.

Ра́дꙋйсѧ, держа́вы рѡссі́йскїѧ ᲂу҆краше́нїе: ра́дꙋйсѧ, цр҃кве хрⷭ҇то́вы похвало̀ высо́каѧ.

Ра́дꙋйсѧ, люде́й рѡссі́йскихъ ᲂу҆пова́нїе бл҃гонаде́жное: ра́дꙋйсѧ, тобо́ю бо во є҆ди́но бра́тство совокꙋплѧ́емсѧ.

Ра́дꙋйсѧ, ꙗ҆́кѡ твои́мъ наꙋче́нїемъ ѿ ра́спрей свобожда́емсѧ: ра́дꙋйсѧ, за́повѣдей бж҃їихъ вѣ́рный и҆сполни́телю.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ ѕ҃

Проповѣ́дникъ црⷭ҇твїѧ бж҃їѧ ꙗ҆ви́лсѧ є҆сѝ, бл҃говѣ́рный кн҃же данїи́ле: над̾ людьмѝ бо свои́ми црⷭ҇твꙋѧ, сле́зꙋ всѧ́кꙋ ѿ лица̀ стра́ждꙋщихъ ѿима́лъ є҆сѝ, подвиза́ѧ зва́ти всѣ́хъ: А҆ллилꙋ́їа.

І҆́косъ ѕ҃

Возсїѧ́лъ є҆сѝ, ꙗ҆́кѡ пресвѣ́тлое со́лнце, на престо́лѣ моско́встѣмъ, бл҃говѣ́рный кн҃же данїи́ле, вели́чїемъ дꙋшѝ твоеѧ̀ и҆ добродѣ́тельми всю̀ зе́млю рѡссі́йскꙋю ѡ҆зарѧ́ѧ и҆ подвиза́ѧ всѣ́хъ ᲂу҆блажа́ти тѧ̀ си́це:

Ра́дꙋйсѧ, мꙋ́жꙋ жела́нїй дх҃о́вныхъ: ра́дꙋйсѧ, стѧжа́телю дарѡ́въ нбⷭ҇ныхъ.

Ра́дꙋйсѧ, млⷭ҇рдїѧ сокро́вище неисчерпа́емое: ра́дꙋйсѧ, кро́тости наста́вниче.

Ра́дꙋйсѧ, за́повѣдей є҆ѵⷢ҇льскихъ дѣ́лателю нелѣ́ностный: ра́дꙋйсѧ, нищетꙋ̀ во́льнꙋю хрⷭ҇та̀ ра́ди возлюби́вый.

Ра́дꙋйсѧ, сирота́мъ и҆ вдови́цамъ ѻ҆́тче бл҃госе́рдый: ра́дꙋйсѧ, лю́демъ твои́мъ помо́щниче бг҃одарова́нный.

Ра́дꙋйсѧ, въ чи́нѣ власти́телѧ кро́тость дѣ́тскꙋю проѧви́вый: ра́дꙋйсѧ, дꙋ́шꙋ твою̀ въ хра́мъ бж҃їй до́брѣ претвори́вый.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ з҃

Хотѧ́й всеви́дѣцъ гдⷭ҇ь просла́вити тѧ̀, бл҃же́нне, поста́ви тѧ̀ влады́кꙋ пресла́вна во смире́нїи лю́демъ свои́мъ, и҆̀же и҆ взира́юще на тѧ̀, и҆ добродѣ́телей твои́хъ бога́тствꙋ чꙋдѧ́щесѧ, поѧ́хꙋ є҆мꙋ̀: А҆ллилꙋ́їа.

І҆́косъ з҃

Но́вагѡ и҆ ди́внагѡ ᲂу҆строи́телѧ землѝ рѡссі́йскїѧ вѣ́мы тѧ̀, кн҃же данїи́ле, кро́тостїю бо, смиренномꙋ́дрїемъ, братолю́бїемъ, и҆ мꙋ́дростїю нбⷭ҇ною кнѧже́нїе моско́вское возвели́чилъ є҆сѝ и҆ си́льнѡ сотвори́лъ є҆сѝ є҆̀. Сегѡ̀ ра́ди прїимѝ ѿ на́съ сицєва́ѧ:

Ра́дꙋйсѧ, мꙋ́дрость соломѡ́новꙋ стѧжа́вый: ра́дꙋйсѧ, кро́тость дв҃довꙋ воспрїѧ́вый и҆ то́ю врагѝ твоѧ̑ побѣди́вый.

Ра́дꙋйсѧ, мно́гїѧ дрꙋ́ги себѣ̀ стѧжа́вый: ра́дꙋйсѧ, сто́льный гра́дъ тво́й хра́мы бж҃їими ᲂу҆краси́вый.

Ра́дꙋйсѧ, вели́чїю москвы̀ тѣ́мъ послꙋжи́вый: ра́дꙋйсѧ, во́ине хрⷭ҇то́въ неѡдолѣ́нный.

Ра́дꙋйсѧ, ѿ бѣ́дъ и҆ скорбе́й всѣ̑мъ ско́рое прибѣ́жище: ра́дꙋйсѧ, ѿ всѣ́хъ ѕѡ́лъ тве́рдое защище́нїе.

Ра́дꙋйсѧ, ᲂу҆ныва́ющымъ до́брое вразꙋмле́нїе: ра́дꙋйсѧ, всѣ̑мъ братолю́бцемъ прⷭ҇ное ѡ҆бодре́нїе.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ и҃

Стра́нника и҆ прише́льца себѐ на землѝ бы́ти помышлѧ́ѧ, ча́съ кончи́ны твоеѧ̀ пред̾ ѻ҆чи́ма твои́ма при́снѡ и҆мѣ́лъ є҆сѝ и҆ сегѡ̀ ра́ди ѡ҆би́тель и҆́нокѡмъ во сла́вꙋ тезоимени́тагѡ тѝ прпⷣбнагѡ данїи́ла возгради́лъ є҆сѝ, и҆дѣ́же мл҃твы твоѧ̀ гдⷭ҇еви возсыла́лъ є҆сѝ, поѧ̀ є҆мꙋ̀: А҆ллилꙋ́їа.

І҆́косъ и҃

Всего̀ себє̀ ѿ ю҆́ности гдⷭ҇ꙋ возложи́въ, всѧ̑ дни̑ живота̀ твоегѡ̀, бл҃говѣ́рный кн҃же, томꙋ̀ ᲂу҆се́рднѡ рабо́талъ є҆сѝ, и҆ ко бл҃же́нномꙋ ᲂу҆спе́нїю дости́гъ, въ ми́рѣ глꙋбо́цѣ дꙋ́хъ сво́й є҆мꙋ̀ преда́лъ є҆сѝ. Лю́дїе же кнѧже́нїѧ твоегѡ̀, ѡ҆́крестъ гро́ба твоегѡ̀ собра́вшесѧ, поѧ́хꙋ тѝ сицєва́ѧ:

Ра́дꙋйсѧ, кн҃же на́шъ превожделѣ́нный, ко гдⷭ҇ꙋ ѿше́дый: ра́дꙋйсѧ, нетлѣ́нное тѣ́ло твоѐ на́мъ ѡ҆ста́вивый.

Ра́дꙋйсѧ, а҆рѡма́ты добродѣ́телей твои́хъ на́мъ бл҃гоꙋха́ѧй: ра́дꙋйсѧ, сїѧ́нїемъ нбⷭ҇нагѡ свѣ́та ѡ҆заре́нный.

Ра́дꙋйсѧ, ѻ҆би́лїемъ любвѐ твоеѧ̀ всѧ̑ ᲂу҆диви́вый: ра́дꙋйсѧ, и҆ врагѡ́мъ твои̑мъ бл҃го́е ᲂу҆покое́нїе ᲂу҆ себє̀ ᲂу҆строѧ́вый.

Ра́дꙋйсѧ, крѣ́пость держа́вы твоеѧ̀ тѣ́мъ созида́вый: ра́дꙋйсѧ, наслѣ́дникѡмъ твои̑мъ прⷭ҇ное наꙋче́нїе.

Ра́дꙋйсѧ, гро́бъ тво́й, а҆́ки краеꙋго́льный ка́мень, гра́дꙋ москвѣ̀ положи́вый: ра́дꙋйсѧ, ꙗ҆́кѡ мл҃тва твоѧ̑ ѡ҆ лю́дѣхъ и҆ по сме́рти не ѡ҆скꙋдѣва́етъ.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ ѳ҃

Всѝ нбⷭ҇нїи чи́ни и҆ ст҃ы́хъ собо́ри ра́достнѡ тѧ̀ прїѧ́ша, бг҃омꙋ́дре, по́двигъ земна́гѡ тече́нїѧ своегѡ̀ до́брѣ соверши́вша и҆ къ вѣ́чномꙋ животꙋ̀ пресе́льшасѧ, и҆дѣ́же съ ни́ми пое́ши: А҆ллилꙋ́їа.

І҆́косъ ѳ҃

Виті́й человѣ́ческихъ ᲂу҆ста̀ не возмо́гꙋтъ и҆зрещѝ пречꙋ́днагѡ прославле́нїѧ па́мѧти твоеѧ̀, ᲂу҆го́дниче бж҃їй, є҆гда̀ бо гро́ба твоегѡ̀ мѣ́сто забве́нїю предаде́сѧ, са́мъ ꙗ҆́вѣ предста́лъ є҆сѝ ю҆́ноше бл҃гочести́вомꙋ, господи́на мѣ́стꙋ томꙋ̀ себѐ нарица́ѧ, и҆ кнѧ́зѧ і҆ѡа́нна ѡ҆блича́ѧ, и҆ глаго́лѧ: чесѡ̀ ра́ди преда́лъ мѧ̀ є҆сѝ забве́нїю, а҆́ще же и҆ забве́нъ а҆́зъ тобо́ю, не забы̀ мѧ̀ гдⷭ҇ь. Мы́ же, ꙗ҆вле́нїе твоѐ бл҃гоговѣ́йнѡ почита́юще, си́це вопїе́мъ:

Ра́дꙋйсѧ, гра́да на́шегѡ москвы̀ бг҃омъ да́нный покрови́телю: ра́дꙋйсѧ, ѡ҆би́тели твоеѧ̀ неꙋсы́пный храни́телю.

Ра́дꙋйсѧ, ꙗ҆́кѡ и҆ по ᲂу҆спе́нїи твое́мъ на́съ не ѡ҆ставлѧ́еши: ра́дꙋйсѧ, ꙗ҆́кѡ млⷭ҇рдїе бж҃їе ѡ҆ грѣсѣ́хъ на́шихъ ᲂу҆молѧ́еши.

Ра́дꙋйсѧ, мздꙋ̀ трꙋдѡ́въ твои́хъ воспрїѧ́вый: ра́дꙋйсѧ, нбⷭ҇ною сла́вою дꙋ́шꙋ твою̀ ѡ҆сїѧ́вый.

Ра́дꙋйсѧ, наслѣ́дникѡвъ твои́хъ до́брый ᲂу҆чи́телю: ра́дꙋйсѧ, къ добродѣ́тели тве́рдый тѣ̑мъ наста́вниче.

Ра́дꙋйсѧ, всѣ̑мъ лю́демъ бл҃гі́й пред̾ бг҃омъ предста́телю: ра́дꙋйсѧ, мл҃твы и҆̀хъ ко прⷭ҇то́лꙋ є҆гѡ̀ возносѧ́й.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ і҃

Спасти́сѧ всѣ̑мъ хотѧ́й гдⷭ҇ь вельмо́жꙋ нѣ́коего, гро́бъ тво́й, ст҃е, попра́вша, недꙋ́гомъ поразѝ, ѻ҆ба́че согрѣше́нїе своѐ позна́вша и҆ проще́нїе ѿ тебє̀ прїе́мша поми́лова, да и҆ мы̀ всѝ, досто́йнѡ почита́юще тѧ̀, бл҃года́рнѡ вопїе́мъ: А҆ллилꙋ́їа.

І҆́косъ і҃

Стѣ́нꙋ неѡбори́мꙋю и҆ забра́ло крѣ́пкое гра́дꙋ москвѣ̀ и҆ все́й держа́вѣ рѡссі́йстѣй гдⷭ҇ь дарова̀ тѧ̀, бл҃же́нне, вѣ́рнымъ въ ско́рбѣхъ и҆ нꙋ́ждахъ пребы́строе застꙋпле́нїе, да зове́мъ тѝ си́це:

Ра́дꙋйсѧ, призыва́ющимъ тѧ̀ во бл҃го́е ско́рый помо́щниче: ра́дꙋйсѧ, чⷭ҇тоты̀ дꙋше́вныѧ и҆ тѣле́сныѧ сокро́вище.

Ра́дꙋйсѧ, дꙋше́вныхъ и҆ тѣле́сныхъ недꙋ́гѡвъ цѣли́телю: ра́дꙋйсѧ, держа́вы на́шеѧ ᲂу҆твержде́нїе.

Ра́дꙋйсѧ, це́ркве рѡссі́йскїѧ ᲂу҆краше́нїе: ра́дꙋйсѧ, ꙗ҆́кѡ ѻ҆те́цъ чадолюби́вый, ча̑да твоѧ̑ назира́ѧй.

Ра́дꙋйсѧ, ꙗ҆́кѡ воево́да непобѣди́мый, предѣ́лы землѝ на́шеѧ ѡ҆гражда́ѧй: ра́дꙋйсѧ, небрегꙋ́щыѧ ѡ҆ ст҃ы́нѣ стра́хомъ вразꙋмлѧ́ѧй.

Ра́дꙋйсѧ, ꙗ҆́кѡ ка́ющымсѧ ско́рое проще́нїе и҆спроша́еши: ра́дꙋйсѧ, ꙗ҆́кѡ бл҃ги̑мъ по́двигѡмъ тѣ́хъ наꙋча́еши.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ а҃і

Пѣ́нїе всеꙋмиле́нное прїимѝ ѿ на́съ, прехва́льне, и҆ мл҃твы, приноси́мыѧ тебѣ̀ не пре́зри: къ тебѣ́ бо въ ско́рбехъ прибѣга́емъ и҆ пред̾ гро́бомъ твои́мъ слє́зы пролива́емъ, зовꙋ́ще: А҆ллилꙋ́їа.

І҆́косъ а҃і

Свѣтоза́рна свѣти́льника бл҃года́ти ꙗ҆ви́ тебє̀ всѣ́хъ творе́цъ, си́лою бо, да́нною тѝ свы́ше, ю҆́ношꙋ при гро́бѣ твое́мъ ѿ ѻ҆дра̀ сме́рти возста́вилъ є҆сѝ. Сегѡ̀ ра́ди ᲂу҆бл҃жа́емъ тѧ̀ си́це:

Ра́дꙋйсѧ, ми́лостивый скорбѧ́щимъ помо́щниче: ра́дꙋйсѧ, сосꙋ́де, ст҃а́гѡ дх҃а и҆спо́лненный.

Ра́дꙋйсѧ, дара́ми тогѡ̀ ѡ҆богаще́нный: ра́дꙋйсѧ, си́ми да̑ры и҆ молѧ́щихсѧ тебѣ̀ ѡ҆богаща́ѧй.

Ра́дꙋйсѧ, ко ст҃ѣ́й трⷪ҇цѣ дерзнове́нїе ве́лїе стѧжа́вый: ра́дꙋйсѧ, дерзнове́нїе сїѐ на по́мощь лю́дємъ направлѧ́ѧй.

Ра́дꙋйсѧ, си́лꙋ чꙋде́съ ѿ бг҃а прїѧ́вый: ра́дꙋйсѧ, за грѣ̑шныѧ гдⷭ҇а ᲂу҆молѧ́ѧй.

Ра́дꙋйсѧ, любвѐ и҆ кро́тости хрⷭ҇то́вы вмѣсти́лище: ра́дꙋйсѧ, безпомо́щныхъ ско́рый помо́щниче.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ в҃і

Блгⷣтїю, да́нною тѝ свы́ше, недꙋ̑ги и҆сцѣлѧ́еши, враги̑ и҆ сꙋпоста̑ты ѿ на́съ ѿгонѧ́еши, жи́знь на́шꙋ ᲂу҆мирѧ́еши и҆ дꙋша́мъ на́шимъ полє́знаѧ подае́ши, да бл҃года́рственнѡ взыва́емъ бг҃ꙋ: А҆ллилꙋ́їа.

І҆́косъ в҃і

Пое́мъ чєстны́ѧ по́двиги твоѧ̑, ᲂу҆блажа́емъ чⷭ҇тое житїѐ твоѐ, восхвалѧ́емъ сщ҃е́ннꙋю па́мѧть твою̀, данїи́ле бл҃говѣ́рне, и҆ прославлѧ́юще гдⷭ҇а всѣ́хъ, вопїе́мъ тѝ си́це:

Ра́дꙋйсѧ, ꙗ҆́кѡ крⷭ҇тъ бг҃оꙋго́днагѡ житїѧ̀ до конца̀ поне́слъ є҆сѝ: ра́дꙋйсѧ, ꙗ҆́кѡ ѡ҆ ско́рбехъ твои́хъ бг҃а бл҃годари́лъ є҆сѝ.

Ра́дꙋйсѧ, всѧ́кꙋ добродѣ́тель въ себѣ̀ и҆зѡбрази́вый: ра́дꙋйсѧ, и҆́го хрⷭ҇то́во возлюби́вый.

Ра́дꙋйсѧ, не́мощи немощны́хъ на себѣ̀ носи́вый: ра́дꙋйсѧ, бл҃говоле́нїе бж҃їе лю́демъ твои̑мъ и҆спроси́вый.

Ра́дꙋйсѧ, прⷭ҇нѡ на нб҃сѝ торжествꙋ́ѧй: ра́дꙋйсѧ, на землѝ пресла́внѡ чꙋдодѣ́йствꙋѧй.

Ра́дꙋйсѧ, лю́демъ твои̑мъ помо́щниче бг҃одарова́нный: ра́дꙋйсѧ, а҆́гг҃лѡмъ собесѣ́дниче досто́йный.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ г҃і

Ѽ пресла́вный ᲂу҆го́дниче хрⷭ҇то́въ и҆ чꙋдотво́рче, прпⷣбне кн҃же данїи́ле, ѿра́до и҆ ᲂу҆тѣше́нїе всѣ́хъ съ вѣ́рою къ тебѣ̀ прибѣга́ющихъ! Прїимѝ ѿ на́съ, недосто́йныхъ, сїѐ ма́лое моле́нїе, съ любо́вїю тебѣ̀ приноси́мое, и҆ те́плымъ хода́тайствомъ твои́мъ ко гдⷭ҇ꙋ ѡ҆градѝ ст҃ꙋ́ю ѡ҆би́тель твою̀, ᲂу҆мирѝ жи́знь на́шꙋ и҆ да́рꙋй на́мъ покаѧ́нїе соверше́нное, и҆зба́ви на́съ ѿ бѣ́дъ и҆ вѣ́чныѧ мꙋ́ки, да кꙋ́пнѡ съ тобо́ю бл҃года́рственнѡ вопїе́мъ: а҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ и҆ гдⷭ҇ь во дни̑ вели́кихъ бѣ́дъ и҆ напа́стей, ѡ҆быше́дшихъ странꙋ̀ на́шꙋ ѿ нечести́вагѡ ца́рства а҆га́рѧнскагѡ, восхотѣ́въ лю́демъ стра́ждꙋщимъ ᲂу҆тѣше́нїе дарова́ти, ꙗ҆вѝ тѧ̀, кн҃же данїи́ле, ꙗ҆́кѡ пло́дъ красе́нъ ѿ чре́слъ вели́кагѡ кн҃зѧ а҆леѯа́ндра: лю́дїе же ѡ҆ рожде́нїи твое́мъ ра́дости и҆спо́лнившесѧ, взыва́хꙋ тѝ сицєва́ѧ:

Ра́дꙋйсѧ, ко́рене бл҃гочести́вагѡ прозѧбе́нїе: ра́дꙋйсѧ, добродѣ́телей ѻ҆тца̀ твоегѡ̀ и҆ ма́тере наслѣ́дниче.

Ра́дꙋйсѧ, рожде́нїемъ твои́мъ лю́ди гра́да влади́мїра возвесели́вый: ра́дꙋйсѧ, грѧдꙋ́щꙋю сла́вꙋ москвы̀ предвозвѣсти́вый.

Ра́дꙋйсѧ, и҆збра́нниче бж҃їй: ра́дꙋйсѧ, пра́вило вѣ́ры бл҃гочести́выѧ.

Ра́дꙋйсѧ, ѡ҆́бразе кро́тости дꙋхо́вныѧ: ра́дꙋйсѧ, бг҃а, ꙗ҆́кѡ и҆́стиннагѡ ѻ҆ц҃а̀ на́шегѡ, и҆здѣ́тска позна́вый.

Ра́дꙋйсѧ, ꙗ҆́кѡ і҆ѡ́сифъ, ѿ бра́тїи твоеѧ̀ досаждє́нїѧ сла́дцѣ претерпѣ́вый: ра́дꙋйсѧ, послѣдѝ и҆ бра́тїю свою̀ въ любо́вь себѣ̀ призва́вый.

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Конда́къ а҃

И҆збра́нный чꙋдотво́рче и҆ преди́вный ᲂу҆го́дниче хрⷭ҇то́въ, гра́да москвы̀ и҆ держа́вы рѡссі́йскїѧ крѣ́пкое ѡ҆гражде́нїе, раздо́рѡвъ и҆ нестрое́нїй и҆скорени́телю, бл҃говѣ́рный кнѧ́же данїи́ле, похва̑льнаѧ восписꙋ́емъ тѝ, къ ра́цѣ моще́й твои́хъ притека́юще. Ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, зовꙋ́щихъ:

Ра́дꙋйсѧ, прпⷣбне кн҃же данїи́ле, моско́вскїй чꙋдотво́рче.

Моли́твы

Цр҃кве хрⷭ҇то́вы похвало̀ высо́каѧ, гра́да москвы̀ стѣно̀ неѡбори́маѧ, держа́вы рѡссі́йскїѧ бжⷭ҇твенное ᲂу҆твержде́нїе, прпⷣбне кн҃же данїи́ле! Къ ра́цѣ моще́й твои́хъ притека́юще, ᲂу҆се́рднѡ мо́лимъ тѧ̀: при́зри на на́съ, па́мѧть твою̀ воспѣва́ющихъ и҆ съ вѣ́рою под̾ кро́въ мл҃твъ твои́хъ прибѣга́ющихъ. Проле́й те́плое твоѐ хода́тайство ко сп҃сꙋ всѣ́хъ, ꙗ҆́кѡ да ᲂу҆тверди́тъ ми́ромъ странꙋ̀ на́шꙋ, гра̑ды и҆ вє́си є҆ѧ̀ и҆ ѡ҆би́тель сїю̀ до́брѣ да сохрани́тъ, бл҃гоче́стїе и҆ любо́вь въ лю́дехъ твои́хъ насажда́ѧ, ѕло́бꙋ же, междоꙋсо́бїе и҆ нра́вѡвъ развраще́нїе и҆скоренѧ́ѧ. Всѣ́мъ же на́мъ всѧ̑ блага̑ѧ ко вре́менномꙋ животꙋ̀ и҆ вѣ́чномꙋ спасе́нїю да́рꙋй мл҃твами твои́ми, ꙗ҆́кѡ да прославлѧ́емъ ди́внагѡ во ст҃ы́хъ свои́хъ хрⷭ҇та̀ бг҃а на́шегѡ во вѣ́ки вѣкѡ́въ. А҆ми́нь.

Ѽ ᲂу҆го́дниче бж҃їй, ст҃ы́й бл҃говѣ́рный кн҃же данїи́ле, са́да хрⷭ҇то́ва бл҃гово́нный цвѣ́те, нб҃сѐ цр҃ко́внагѡ кро́ткаѧ ѕвѣздо̀, землѝ на́шеѧ нбⷭ҇ный ᲂу҆́ме, гра́да москвы̀ и҆ держа́вы на́шеѧ мꙋ́дрый зда́телю, те́плый къ бг҃ꙋ моли́твенниче, ско́рый въ по́мощи, млⷭ҇тивый въ нꙋ́ждахъ. Къ тебѣ̀ припа́даемъ, и҆ тебѣ̀ мо́лимсѧ: бꙋ́ди предста́тель на́шъ пред̾ прⷭ҇то́ломъ бж҃їѧ сла́вы неꙋсы́пный. Соберѝ на́съ дрꙋ́гъ ко дрꙋ́гꙋ, да печа́ли бли́жнѧгѡ своегѡ̀ кі́йждо любо́вїю нелицемѣ́рною прїѡбща́етсѧ. Ѡ҆нб҃сѝ ᲂу҆́мъ на́шъ, да, и҆́го тѧ́жкое земны́хъ попече́нїй ѿве́ргше, бре́мѧ ле́гкое хрⷭ҇то́ва є҆ѵⷢ҇лїѧ возлю́бимъ. Ѿкры́й ѻ҆́чи на̑ша, да ᲂу҆́зримъ нетлѣ́ннꙋю красотꙋ̀ гдⷭ҇ню и҆ да не ѿчꙋжде́ни бꙋ́демъ жи́зни бж҃їѧ. Ти́хость дх҃а бж҃їѧ да соблюде́тъ се́рдце на́ше. Весна̀ покаѧ́нїѧ да ᲂу҆краси́тъ дѣла̀ на̑ша. Кн҃же млⷭ҇тивый и҆ ще́дрый, сохранѝ странꙋ̀ на́шꙋ, гра́дъ тво́й и҆ здѣ̀ молѧ́щихсѧ тебѣ̀ ѿ всѧ́кїѧ напа́сти, ѿ вра̑гъ ви́димыхъ и҆ неви́димыхъ, ѿ гꙋби́тельства и҆ гла́да, ѿ междоꙋсо́бныѧ ра́спри и҆ внеза́пныѧ сме́рти. Ѿве́рзи на́мъ двє́ри млⷭ҇рдїѧ бж҃їѧ и҆ и҆зба́ви на́съ ѿ всѧ́кагѡ ѕла̀. Под̾ крѣ́пкїй покро́въ бл҃госты́ни твоеѧ̀ прибѣга́юще, мо́лимъ: бꙋ́ди на́мъ ти́хое приста́нище въ ско́рбехъ. Ѡ҆стѣнѝ на́съ мл҃твами твои́ми. Соблюдѝ на́съ ѿ паде́нїй грѣхо́вныхъ и҆ заблꙋжде́нїй, да се́рдцемъ сокрꙋше́ннымъ, дх҃омъ смире́ннымъ въ печа́ли и҆ ра́дости вы́нꙋ зове́мъ: гдⷭ҇и, предста́тельствомъ прпⷣбнагѡ твоегѡ̀ поми́лꙋй на́съ. А҆ми́нь.