Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ въ че́сть є҆ѧ̀ і҆кѡ́ны, и҆менꙋ́емыѧ черни́говскаѧ геѳсима́нскаѧ.

Черниговской-Гефсиманской (1869), Александрийской, Августовской (1914) и именуемой "Всеблаженная" (в Казани) икон Божией Матери 14 сентября 2026

Конда́къ а҃

И҆збра́ннѣй ѿ всѣ́хъ родѡ́въ цр҃и́цѣ бцⷣѣ, показа́вшей мі́рꙋ чꙋдеса̀ мнѡ́гаѧ, чрез̾ ѻ҆́бразъ ст҃ы́ѧ і҆кѡ́ны своеѧ̀ черни́говскїѧ ще́дрѡ и҆злива́ємаѧ, бл҃гоговѣ̑йнаѧ пѣ̑нїѧ прино́симъ тѝ рабѝ твоѝ, пречⷭ҇таѧ. Ты́ же, ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѣ́хъ находѧ́щихъ на на́съ бѣ́дъ и҆ скорбе́й свободѝ, да зове́мъ тѝ:

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

І҆́косъ а҃

А҆́гг҃льскїй гла́съ возвѣстѝ тебѣ̀ ѡ҆ безсѣ́менномъ бг҃а воплоще́нїи, є҆гда̀ бл҃года́ть бж҃їѧ ꙗ҆вѝ тѧ̀, пречⷭ҇таѧ дв҃о, нетлѣ́нное и҆ всечтⷭ҇но́е сн҃а бж҃їѧ вмѣсти́лище, тѣ́мже всѝ ро́ди бл҃гоговѣ́йнѡ велича́ютъ тѧ̀:

Ра́дꙋйсѧ, првⷣныѧ є҆лїсаве́ты цѣлова́нїемъ ѡ҆бра́дованнаѧ: ра́дꙋйсѧ, ѻ҆би́теле цѣломꙋ́дрїѧ, чⷭ҇тото́ю свое́ю просла́вленнаѧ.

Ра́дꙋйсѧ, мт҃рнюю любо́вь къ па́дшемꙋ а҆да́мꙋ ꙗ҆ви́вшаѧ: ра́дꙋйсѧ, вселюби́маго бг҃омлⷣнца без̾ сѣ́мене роди́вшаѧ.

Ра́дꙋйсѧ, свѣ́тлыѧ та́йны бг҃оѧвле́нїѧ позна́нїе: ра́дꙋйсѧ, млⷭ҇рдїѧ бг҃а ѻ҆ц҃а̀ вселе́ннѣй дарова́нїе.

Ра́дꙋйсѧ, многоплаче́вное го́рдагѡ денни́цы пораже́нїе: ра́дꙋйсѧ, всегѡ̀ мі́ра бл҃года́рственное поклоне́нїе.

Ра́дꙋйсѧ, го́рнице всест҃а́ѧ, свѣ́томъ невече́рнимъ ѡ҆заре́ннаѧ: ра́дꙋйсѧ, въ ско́рбехъ горни́ло ѡ҆чище́нїѧ.

Ра́дꙋйсѧ, нбⷭ҇ныхъ во́инствъ а҆́гг҃льское пѣ́нїе: ра́дꙋйсѧ, живота̀ твоегѡ̀ всевы́шнемꙋ всецѣ́лое приноше́нїе.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ в҃

Ви́дѣ млⷭ҇ть твою̀, влⷣчце, ᲂу҆го́дникъ бж҃їй а҆нтѡ́нїй кі́ево-пече́рскїй, є҆гда̀ ѡ҆брѣ́те на дре́вѣ є҆́ли на бо́лдинѣй горѣ̀ і҆кѡ́нꙋ твою̀, млⷭ҇ти твоѧ̑ над̾ ѻ҆би́телїю но́вою зна́менꙋющꙋю, тѣ́мже наречѐ ю҆̀ черни́говскаѧ є҆ле́цкаѧ, бл҃года́рственнѡ вопїѧ̀ бг҃ꙋ: А҆ллилꙋ́їа.

І҆́косъ в҃

Разꙋмѣ́ѧ недоразꙋмѣва́емое пресла́внагѡ твоегѡ̀ ꙗ҆вле́нїѧ чꙋ́до, вѣ́рою прїе́мъ ѡ҆бѣтова́нїе покро́ва твоегѡ̀ и҆ предста́тельства, ᲂу҆го́дникъ бж҃їй а҆нтѡ́нїй со стра́хомъ речѐ такова̑ѧ:

Ра́дꙋйсѧ, на крилѣ́хъ херꙋві́мскихъ ле́гцѣ носи́маѧ: ра́дꙋйсѧ, во хра́мъ бж҃їй и҆змла́да приноси́маѧ.

Ра́дꙋйсѧ, вѣ̑рныѧ рабы̑ твоѧ̑ млⷭ҇тїю свое́ю ѡ҆сѣни́вшаѧ: ра́дꙋйсѧ, зижди́телѧ вселе́нныѧ и҆з̾ бокꙋ̀ чⷭ҇тꙋ роди́вшаѧ.

Ра́дꙋйсѧ, ѻ҆́браза твоегѡ̀ на дре́вѣ є҆́ли чꙋде́сное ѡ҆брѣ́тенїе: ра́дꙋйсѧ, жениха̀ въ нощѝ грѧдꙋ́щагѡ съ неꙋгаси́мою лампа́дою срѣ́тенїе.

Ра́дꙋйсѧ, па́дшагѡ человѣ́чества и҆з̾ глꙋби́нъ грѣха̀ воззва́нїе: ра́дꙋйсѧ, сп҃си́тельное мі́рꙋ дарова́нное ѡ҆бѣтова́нїе.

Ра́дꙋйсѧ, на бра́къ въ ка́нѣ съ сн҃омъ свои́мъ приглаше́ннаѧ: ра́дꙋйсѧ, смире́нїемъ свѣ́тлѡ преꙋкраше́ннаѧ.

Ра́дꙋйсѧ, всечтⷭ҇ны́мъ сїѧ́нїемъ добродѣ́телей, ꙗ҆́кѡ дїади́мою, вѣнча́ннаѧ: ра́дꙋйсѧ, чⷭ҇тото́ю свое́ю къ слꙋже́нїю бг҃ови призва́ннаѧ.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ г҃

Си́лꙋ свою̀ хотѧ̀ ꙗ҆ви́ти, но́вꙋ і҆кѡ́нꙋ черни́говскꙋю показа́въ гдⷭ҇ь, и҆́нокомъ генна́дїемъ пи́саннꙋю во ѻ҆би́тели и҆льи́нстѣй, просла́ви ю҆̀ сле́зъ тече́нїемъ. Є҆гда́ же нечести́вїи а҆га́рѧне во гра́дъ черни́говъ прїидо́ша, не могꙋ́ще коснꙋ́тисѧ пречⷭ҇тагѡ ѻ҆́браза твоегѡ̀, прест҃а́ѧ бцⷣе, посра́мленнїи ѿидо́ша, и҆́ноцы же ст҃ы́ѧ ѻ҆би́тели и҆льи́нскїѧ просла́виша тѧ̀, бл҃года́рственнѡ зовꙋ́ще сн҃ꙋ твоемꙋ̀: А҆ллилꙋ́їа.

І҆́косъ г҃

И҆мꙋ́ще всемо́щное застꙋпле́нїе твоѐ, дв҃о бцⷣе, ѿ черни́говскїѧ і҆кѡ́ны во ѻ҆би́тели и҆льи́нстѣй ꙗ҆вле́нное, є҆гда̀ нечести́выхъ а҆га́рѧнъ въ бѣ́гство ѡ҆брати́ла є҆сѝ, и҆́ноцы тоѧ̀ возопи́ша тебѣ̀ такова̑ѧ:

Ра́дꙋйсѧ, и҆льи́нстѣй ѻ҆би́тели млⷭ҇тиваѧ покрови́тельнице: ра́дꙋйсѧ, дꙋ́шъ на́шихъ безме́зднаѧ цѣли́тельнице.

Ра́дꙋйсѧ, тече́нїемъ пречⷭ҇тыхъ сле́зъ твои́хъ лю́ди твоѧ̑ на пꙋ́ть покаѧ́нїѧ наста́вившаѧ: ра́дꙋйсѧ, ѡ҆ грѣсѣ́хъ мі́ра сле́зы своѧ̑ проли́вшаѧ.

Ра́дꙋйсѧ, зна́менїе мі́рꙋ сп҃се́нїѧ: ра́дꙋйсѧ, де́рзости нечести́выхъ а҆га́рѧнъ посрамле́нїе.

Ра́дꙋйсѧ, и҆́нокѡвъ и҆льи́нскїѧ ѻ҆би́тели дерзнове́нїе: ра́дꙋйсѧ, мч҃нкѡвъ и҆звѣ́стное ѿдохнове́нїе.

Ра́дꙋйсѧ, въ по́двизѣхъ почи́вшихъ при́снаѧ ѿра́до: ра́дꙋйсѧ, под̾е́мшихъ бл҃го́е и҆́го хрⷭ҇то́во сщ҃е́ннаѧ награ́до.

Ра́дꙋйсѧ, взбра́ннаѧ воево́до непобѣди́маѧ: ра́дꙋйсѧ, нбⷭ҇ныхъ во́инствъ предводи́тельнице.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ д҃

Бꙋ́рею печа́ли ѡ҆бдержи́ма бѧ́ше дѣви́ца а҆леѯа́ндра, моли́вшаѧсѧ пред̾ і҆кѡ́ною твое́ю ѡ҆ возвраще́нїи ма́тере своеѧ̀. И҆сполне́нїе же проше́нїѧ полꙋчи́вши, бл҃года́рнѡ принесѐ ю҆̀ въ пещє́ры геѳсима̑нскїѧ трⷪ҇ческїѧ ѻ҆би́тели прпⷣбнагѡ се́ргїа, и҆́ноцы же ѻ҆би́тели, вѣ́рою прїе́мше ст҃ꙋ́ю і҆кѡ́нꙋ твою̀, бг҃омт҃и, ра́достнѡ воззва́ша бг҃ꙋ: А҆ллилꙋ́їа.

І҆́косъ д҃

Слы́шавше вѣ́рнїи словеса̀ бж҃їѧ, ꙗ҆́кѡ не мо́жетъ ᲂу҆кры́тисѧ гра́дъ на верши́нѣ горы̀, ᲂу҆зрѣ́ша сїѧ́нїе чꙋде́съ твои́хъ ѿ і҆кѡ́ны твоеѧ̀, пречⷭ҇таѧ, въ пеще́рнѣмъ хра́мѣ геѳсима́нскїѧ ѻ҆би́тели ꙗ҆вле́нное: се́ бо і҆кѡ́на твоѧ̀, ꙗ҆́кѡ свѣти́ло, не под̾ спꙋ́домъ, но на свѣ́щницѣ поста́вленное, ѡ҆свѣтѝ вселе́ннꙋю, тѣ́мже и҆ воспѣ́ша тебѣ̀ такова̑ѧ:

Ра́дꙋйсѧ, зарѐ невече́рнѧгѡ днѐ, въ пеще́рахъ возсїѧ́вшаѧ: ра́дꙋйсѧ, ѻ҆би́тель геѳсима́нскꙋю чꙋдесы̀ свои́ми просла́вити возжела́вшаѧ.

Ра́дꙋйсѧ, дѣви́цꙋ а҆леѯа́ндрꙋ и҆сполне́нїемъ проше́нїѧ є҆ѧ̀ ᲂу҆тѣ́шившаѧ: ра́дꙋйсѧ, на́шꙋ скꙋ́днꙋю мл҃твꙋ, ꙗ҆́кѡ вдови́цы двѣ̀ лє́птѣ, прїе́млющаѧ.

Ра́дꙋйсѧ, незаходи́магѡ сл҃нца пра́вды мт҃и всечтⷭ҇на́ѧ: ра́дꙋйсѧ, дв҃о бг҃омꙋ́драѧ и҆ всест҃а́ѧ.

Ра́дꙋйсѧ, собра́вшаѧ на землѝ добродѣ́телей сокро́вище нетлѣ́нное: ра́дꙋйсѧ, свѣти́ло ѡ҆свѣти́вшее вселе́ннꙋю.

Ра́дꙋйсѧ, дщѝ і҆ѡакі́ма и҆ а҆́нны бг҃овѣнча́ннаѧ: ра́дꙋйсѧ, є҆́йже бл҃говѣ́стїемъ а҆рха́гг҃ла гаврїи́ла дарова́сѧ ра́дость несказа́ннаѧ.

Ра́дꙋйсѧ, є҆стества̀ чи́нъ вышеесте́ственнѡ претворѧ́ющаѧ: ра́дꙋйсѧ, всѧ̑ во бл҃га̑ѧ прошє́нїѧ на̑ша и҆сполнѧ́ющаѧ.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ є҃

Бг҃оте́чнꙋю ѕвѣздꙋ̀, возсїѧ́вшꙋю въ пеще́рахъ геѳсима́нскїѧ ѻ҆би́тели, і҆кѡ́нꙋ твою̀, пречⷭ҇таѧ, ᲂу҆зрѣ́вши разсла́бленнаѧ ѳе́кла, лобыза̀ ю҆̀ со стра́хомъ бж҃їимъ и҆ а҆́бїе и҆сцѣлѣ̀ ѿ недꙋ́га своегѡ̀ тѣле́снагѡ, и҆з̾ глꙋбины̀ дꙋшѝ бл҃года́рственнѡ вопїю́щи сн҃ꙋ твоемꙋ̀, дарова́вшемꙋ тебѣ̀ толи́кꙋю бл҃года́ть: А҆ллилꙋ́їа.

І҆́косъ є҃

Ви́дѣвши сла́вꙋ всевы́шнѧгѡ, разсла́бленнаѧ ѳе́кла, пре́жде на рꙋка́хъ носи́маѧ, бл҃года́тїю же твое́ю здра́ва ходѧ́щаѧ, ѻ҆́бразꙋ твоемꙋ̀ покланѧ́ющисѧ, всест҃а́ѧ, возопѝ тебѣ̀ такова̑ѧ:

Ра́дꙋйсѧ, неисцѣ́льнѡ недꙋ́гꙋющыѧ со ѻ҆дра̀ болѣ́зни возставлѧ́ющаѧ: ра́дꙋйсѧ, млⷭ҇ти и҆ щедрѡ́ты твоѧ̑ на́мъ грѣ̑шнымъ подава́ющаѧ.

Ра́дꙋйсѧ, ѿча́ѧвшихсѧ ѡ҆бѣтова́нїемъ бла̑гъ вѣ́чныхъ ѡ҆бодре́нїе: ра́дꙋйсѧ, скорбѧ́щихъ мт҃рнее ᲂу҆тѣше́нїе.

Ра́дꙋйсѧ, во ᲂу҆́захъ а҆́дскихъ заключе́нныхъ наде́ждо: ра́дꙋйсѧ, дꙋ́шъ на́шихъ, ѡ҆бнаже́нныхъ бл҃года́ти, всезлата́ѧ ѻ҆де́ждо.

Ра́дꙋйсѧ, ко́зней вра́жескихъ паꙋчи́нꙋ попалѧ́ющаѧ: ра́дꙋйсѧ, го́рдыхъ посрамлѧ́ющаѧ и҆ ᲂу҆ничижа́ющаѧ.

Ра́дꙋйсѧ, си́ло свы́ше, дѣла̀ рꙋ́къ на́шихъ непра́вєднаѧ и҆справлѧ́ющаѧ: ра́дꙋйсѧ, рꙋко̀ по́мощи, и҆з̾ пꙋчи́нъ сꙋ́етныхъ жите́йскихъ и҆звлача́ющаѧ.

Ра́дꙋйсѧ, въ лѣ́ности и҆ пра́здности вре́мѧ живота̀ своегѡ̀ погꙋблѧ́ющихъ пред̾ѡстереже́нїе: ра́дꙋйсѧ, къ животꙋ̀ вѣ́чномꙋ воззва́нїе и҆ въ трꙋдѣ́хъ бг҃оꙋго́дныхъ вспоможе́нїе.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ ѕ҃

Проповѣ̑дницы и҆сцѣле́нїй твои́хъ не возмого́ша ѡ҆писа́ти сла́вꙋ твою̀, є҆гда̀ не то́кмѡ тѣле́сное, но и҆ дꙋхо́вное здра́вїе подала̀ є҆сѝ, бг҃омт҃и, і҆ѡа́ннꙋ селѧни́нꙋ, цѣпѧ́ми ѡ҆кова́нномꙋ, ꙗ҆́кѡ дрꙋго́мꙋ гадари́нскомꙋ бѣснова́томꙋ. Се́й же и҆сцѣле́нїе полꙋчи́въ, ᲂу҆се́рднѡ вознесѐ мл҃твы своѧ̑ пред̾ і҆кѡ́ною твое́ю и҆ возопѝ зижди́телю вселе́нныѧ: А҆ллилꙋ́їа.

І҆́косъ ѕ҃

Возсїѧ́вый свѣ́тъ въ пеще́рахъ геѳсима́нскїѧ ѻ҆би́тели приведѐ къ пречꙋ́днѣй і҆кѡ́нѣ твое́й і҆ѡа́нна, ѡ҆бдержи́маго бꙋ́йствомъ и҆ ꙗ҆́ростїю, се́й же вѣ́рою пред̾ то́ю приклони́всѧ, и҆сцѣле́нїе ѿ дꙋхо́вныѧ сеѧ̀ не́мощи полꙋчѝ и҆ воззва̀ бл҃гослове́ннѣй такова̑ѧ:

Ра́дꙋйсѧ, дꙋ́шъ на́шихъ скве́рныхъ ѡ҆мове́нїе и҆ возрожде́нїе: ра́дꙋйсѧ, ѡ҆бдержи́мыхъ стра́стїю пїѧ́нства трезве́нїе и҆ бꙋ́їихъ кро́ткое и҆сцѣле́нїе.

Ра́дꙋйсѧ, ка́ющихсѧ блꙋдникѡ́въ и҆ прелюбодѣ́євъ чⷭ҇тотѣ̀ свое́й подража́ти наꙋча́ющаѧ: ра́дꙋйсѧ, разжже́ннꙋю по́хоти пе́щь ᲂу҆гаша́ющаѧ.

Ра́дꙋйсѧ, ѡ҆мраче́нныхъ невѣ́рїемъ свѣ́томъ вѣ́ры ѡ҆заре́нїе: ра́дꙋйсѧ, пꙋтеводи́тельнице, ѿвраща́ющаѧ ѿ пꙋте́й є҆реті́ческагѡ заблꙋжде́нїѧ.

Ра́дꙋйсѧ, рабѡ́въ чревоꙋго́дїѧ воздержа́нїю наꙋча́ющаѧ: ра́дꙋйсѧ, честолю́бцєвъ па́мѧтїю сме́ртною вразꙋмлѧ́ющаѧ.

Ра́дꙋйсѧ, є҆ле́емъ го́рнимъ ꙗ҆́звы грѣхѡ́вныѧ ще́дрѡ ᲂу҆маща́ющаѧ: ра́дꙋйсѧ, въ бе́зднꙋ поро́ка вве́ргшихсѧ покаѧ́нїе не ѿверга́ющаѧ.

Ра́дꙋйсѧ, мі́ра сегѡ̀ сꙋ́етнꙋю и҆ преходѧ́щꙋю сла́вꙋ, ꙗ҆́кѡ ды́мъ, развѣ́ѧвшаѧ: ра́дꙋйсѧ, дѡ́браѧ сѣ́мена вѣ́ры въ дꙋша́хъ на́шихъ насѣ́ѧвшаѧ.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ з҃

Хотѧ́щи сло́вомъ гдⷭ҇нимъ ᲂу҆тверди́тисѧ, сло́вомъ гдⷭ҇нимъ просвѣти́тисѧ, ꙗ҆́коже речѐ: ѡ҆ста́вите дѣте́й приходи́ти ко мнѣ̀ и҆ не брани́те и҆̀мъ: таковы́хъ бо є҆́сть црⷭ҇твїе бж҃їе, принесѐ ма́ти младе́нцы своѧ̑ софі́ю и҆ є҆ле́нꙋ въ пеще́рный хра́мъ ко і҆кѡ́нѣ твое́й. Софі́а бо ᲂу҆мира́ше, є҆ле́на же болѣ́знїю гла̑зъ ѡ҆бдержи́ма бѧ́ше, є҆гда́ же прикоснꙋ́стѣсѧ къ і҆кѡ́нѣ твое́й, и҆сцѣле́нїе полꙋчи́стѣ, и҆ кꙋ́пнѡ съ ма́терїю свое́ю возопи́стѣ бг҃ꙋ: А҆ллилꙋ́їа.

І҆́косъ з҃

Нѡ́выѧ млⷭ҇ти ᲂу҆разꙋмѣ́вши, ѿ і҆кѡ́ны твоеѧ̀ ст҃ы́ѧ черни́говскїѧ геѳсима́нскїѧ проистека́ющыѧ, жена̀ бл҃гочести́ваѧ, пое́мши болѧ́щыѧ младе́нцы своѧ̑, приложѝ тѣ́хъ і҆кѡ́нѣ ст҃ѣ́й твое́й, и҆ а҆́бїе и҆сцѣле́нїе си́хъ ви́дѣвши, возопѝ всера́достнѣй такова̑ѧ:

Ра́дꙋйсѧ, сле́зы ма́терей ѡ҆ ча́дѣхъ свои́хъ мт҃ри́нски ѡ҆тира́ющаѧ: ра́дꙋйсѧ, младе́нцєвъ ѿ напа́стей ѡ҆гражда́ющаѧ.

Ра́дꙋйсѧ, є҆́юже ча́дѡмъ прилѣ̑жнымъ ра́зꙋмъ подае́тсѧ: ра́дꙋйсѧ, ча̑дъ бл҃гопослꙋшли́выхъ безмѧте́жное дѣ́тство.

Ра́дꙋйсѧ, семе́йствъ бл҃гочести́выхъ нерꙋши́мое є҆ди́нство: ра́дꙋйсѧ, бл҃гословлѧ́ющаѧ честно́е матери́нство.

Ра́дꙋйсѧ, защи́тнице чи́стою со́вѣстїю въ пра́вдѣ и҆ и҆́стинѣ ходѧ́щихъ: ра́дꙋйсѧ, плоды̀ дх҃а ст҃а́гѡ стѧжа́вшаѧ.

Ра́дꙋйсѧ, врата̀ затворє́ннаѧ, чрез̾ ни́хже произы́де гдⷭ҇ь бг҃ъ і҆и҃левъ: ра́дꙋйсѧ, сви́тче, въ не́мже пе́рстомъ ѻ҆́ч҃имъ написа́сѧ сло́во воплоща́емо.

Ра́дꙋйсѧ, же́но, є҆ѧ́же сѣ́мѧ сокрꙋшѝ ѕмі́евꙋ главꙋ̀: ра́дꙋйсѧ, и҆здѣ́тска преда́вшаѧ гдⷭ҇ꙋ дꙋ́шꙋ свою̀.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ и҃

Стра̑ннаѧ чꙋдеса̀ ви́дѣша вѣ́рнїи, въ пеще́рахъ геѳсима́нскїѧ ѻ҆би́тели ꙗ҆влє́ннаѧ, мно́жєства мнѡ́гаѧ и҆сцѣле́нїй, происте́кшихъ ѿ твоеѧ̀, бг҃омт҃и, і҆кѡ́ны, и҆сточи́вшїѧ на́мъ грѣ̑шнымъ во́ды живи́тельныѧ бл҃года́ти, вопїю́щымъ бл҃года́рственнѡ бг҃ꙋ ѡ҆ тебѣ̀: А҆ллилꙋ́їа.

І҆́косъ и҃

Всѧ̀ бѣ̀ гдⷭ҇ꙋ послꙋшли́ваѧ, є҆мꙋ̀ є҆ди́номꙋ покланѧ́ющисѧ и҆ слꙋжа́щи, дв҃о, хотѧ́щи же дарова́ти ѻ҆би́тели свое́й, ст҃и́телемъ фїларе́томъ моско́вскимъ ѡ҆сно́ваннѣй, сла́вꙋ, подо́бнꙋю сла́вѣ і҆ерⷭ҇ли́мскїѧ геѳсима́нїи, произведѐ въ не́й чꙋдеса̀ ѻ҆би̑льнаѧ ѿ і҆кѡ́ны своеѧ̀ чꙋдотво́рныѧ, тѣ́мже наꙋчи́ла є҆сѝ на́съ пѣ́ти тебѣ̀ си́це:

Ра́дꙋйсѧ, бл҃гослове́нїе і҆ерⷭ҇ли́мскїѧ геѳсима́нїи ѻ҆би́тели свое́й прине́сшаѧ: ра́дꙋйсѧ, ѻ҆́гнь бг҃оꙋго́дныѧ мона́шескїѧ жи́зни въ рѡссі́йстѣй геѳсима́нїи возже́гшаѧ.

Ра́дꙋйсѧ, бж҃їе къ на́мъ грѣ̑шнымъ бл҃говоле́нїе: ра́дꙋйсѧ, геѳсима́нскїѧ ѻ҆би́тели рѣко̀ и҆сцѣле́нїй.

Ра́дꙋйсѧ, зла́то невеще́ственное, пра́ведностїю ѡ҆сїѧ́нное: ра́дꙋйсѧ, неветша́ющее сокро́вище, хрⷭ҇тїа́нѡмъ дарова́нное.

Ра́дꙋйсѧ, стра̑сти грѣхѡ́вныѧ, вавѷлѡ̑нскїѧ младе́нцы и҆менꙋ́ємыѧ, ѡ҆ ка́мень разбива́ющаѧ: ра́дꙋйсѧ, мы́сленнаго фараѡ́на въ мо́ри чермнѣ́мъ потоплѧ́ющаѧ.

Ра́дꙋйсѧ, па́че серафі́мѡвъ бг҃омъ возвы́шеннаѧ: ра́дꙋйсѧ, въ мл҃твахъ твои́хъ ѻ҆ц҃е́мъ нбⷭ҇нымъ ᲂу҆слы́шаннаѧ.

Ра́дꙋйсѧ, всѐ человѣ́чество ᲂу҆ крⷭ҇та̀ ᲂу҆сынови́вшаѧ: ра́дꙋйсѧ, млⷭ҇рдїе сн҃а твоегѡ̀ къ на́мъ грѣ̑шнымъ приклони́вшаѧ.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ ѳ҃

Всѧ́кое дре́во ѿ плода̀ своегѡ̀ позна́но быва́етъ, не собира́ютъ бо ѿ те́рнїѧ гро́зды, нижѐ ѿ ре́пїѧ смѡ́квы: ты́ же ѿ плода̀ своегѡ̀ бл҃гослове́ннагѡ позна́ласѧ є҆сѝ. Наꙋчѝ и҆ на́съ приноси́ти бг҃ꙋ дѡ́брыѧ плоды̀ непосты́днагѡ жи́тельства, да и҆ мы̀ грѣ́шнїи воззове́мъ живода́вцꙋ: А҆ллилꙋ́їа.

І҆́косъ ѳ҃

Вѣті̑и многовѣща́ннїи не мо́гꙋтъ и҆зрещѝ мт҃рнее твоѐ попече́нїе и҆ забо́тꙋ ѡ҆ на́съ грѣ́шныхъ, ꙗ҆́кѡ возрасти́ла є҆сѝ на́мъ во ѻ҆би́тели черни́говстѣй па́стырей бг҃одꙋхнове́нныхъ: бл҃же́ннаго фїлі́ппа и҆ прпⷣбнаго варна́вꙋ, твои́мъ води́тельствомъ воспитꙋ́ющи ѧ҆̀ въ стра́сѣ бж҃їемъ, и҆ на́съ наꙋча́ющи подража́ти и҆́хъ сла́вномꙋ житїю̀, вопїю́щихъ тебѣ̀ такова̑ѧ:

Ра́дꙋйсѧ, любо́вїю твое́ю кро́ткихъ ѡ҆зарѧ́ющаѧ: ра́дꙋйсѧ, ми́лостыню млⷭ҇рдыхъ въ рꙋ́цѣ твоѝ прїе́млющаѧ.

Ра́дꙋйсѧ, бл҃же́ннаго фїлі́ппа на и҆скопа́нїе пеще́ръ бл҃гослови́вшаѧ: ра́дꙋйсѧ, до́бромꙋ па́стырю, прпⷣбномꙋ варна́вѣ пастѝ ѻ҆́вцы ѻ҆ц҃а̀ нбⷭ҇нагѡ порꙋчи́вшаѧ.

Ра́дꙋйсѧ, по́стникѡвъ дерзнове́нїе и҆ ра́зꙋма дх҃о́внагѡ дарова́нїе: ра́дꙋйсѧ, возлюби́вшаѧ рабѡ́въ твои́хъ всенѡ́щнаѧ бдѣ̑нїѧ.

Ра́дꙋйсѧ, за воздержа́нїе возде́ржныхъ бл҃года́тїю стокра́тнѡ воздаю́щаѧ: ра́дꙋйсѧ, сердца̀ вѣ́рныхъ твои́хъ ми́ромъ неѿмі́рнымъ ѡ҆сѣнѧ́ющаѧ.

Ра́дꙋйсѧ, долготерпѣли́выхъ ᲂу҆ вра́тъ нбⷭ҇ныхъ ѻ҆би́телей срѣта́ющаѧ: ра́дꙋйсѧ, вѣ́рою вѣ́рныхъ свои́хъ го́ры преставлѧ́ющаѧ.

Ра́дꙋйсѧ, првⷣныхъ рабѡ́въ твои́хъ несꙋмнѣ́нное соверше́нство: ра́дꙋйсѧ, любо́вь и҆мꙋ́щихъ въ сердца́хъ свои́хъ неизрече́нное бл҃же́нство.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ і҃

Сп҃стѝ хотѧ́щи ѻ҆би́тель свою̀ во времена̀ безбо́жїѧ, зе́млю рꙋ́сскꙋю ѡ҆скверни́вшагѡ, мт҃и бж҃їѧ ꙗ҆ви́сѧ во вратѣ́хъ є҆ѧ̀ въ де́нь ᲂу҆спе́нїѧ во ѻ҆́бразѣ высо́кїѧ жены̀ и҆ речѐ, ꙗ҆́кѡ не ѡ҆ста́витъ ю҆̀, но при́снѡ въ не́й пребꙋ́детъ, ѡ҆сѣнѧ́ющи покро́вомъ свои́мъ вѣ̑рныѧ, вопїю́щыѧ бг҃ꙋ: А҆ллилꙋ́їа.

І҆́косъ і҃

Стѣна̀ была̀ є҆сѝ, те́плаѧ на́ша застꙋ́пнице, черни́говскїѧ ѻ҆би́тели, є҆гда̀ въ годи́нꙋ лихолѣ́тїѧ, ꙗ҆́кѡ дрꙋга́гѡ седмидесѧтолѣ́тнагѡ вавѷлѡ́нскагѡ плѣне́нїѧ, не ѡ҆ста́вила є҆сѝ ю҆̀, но ꙗ҆вле́нїемъ свои́мъ ѡ҆бѣтова́нїе предста́тельства своегѡ̀ дарова́ла є҆сѝ вѣ̑рнымъ, пою́щымъ тебѣ̀ такова̑ѧ:

Ра́дꙋйсѧ, бл҃гочести̑выѧ и҆́ноки черни́говскїѧ ѻ҆би́тели посѣща́ющаѧ: ра́дꙋйсѧ, при́снѡ въ земно́мъ до́мѣ твое́мъ пребыва́ющаѧ.

Ра́дꙋйсѧ, и҆з̾ вавѷлѡ́нскагѡ плѣне́нїѧ безбо́жїѧ лю́ди землѝ рꙋ́сскїѧ и҆зве́дшаѧ: ра́дꙋйсѧ, въ мра̑чныѧ го́ды гоне́нїй рабы̑ твоѧ̑ и҆сповѣ́дничествомъ ко хрⷭ҇тꙋ̀ приве́дшаѧ.

Ра́дꙋйсѧ, цр҃и́це, въ ри́захъ златы́хъ добродѣ́телей твои́хъ ѡ҆дѣ́ѧннаѧ и҆ преиспещре́ннаѧ: ра́дꙋйсѧ, ѿ непло́дове по ѡ҆бѣтова́нїю рожде́ннаѧ.

Ра́дꙋйсѧ, неме́ркнꙋщимъ свѣ́томъ ст҃ы́ѧ сла́вы ѡ҆заре́ннаѧ: ра́дꙋйсѧ, свобо́до ᲂу҆́зами страсте́й ѡ҆кова́нныхъ.

Ра́дꙋйсѧ, црⷭ҇тво непоколеби́мое ᲂу҆наслѣ́довавшаѧ: ра́дꙋйсѧ, зарѐ свѣтлѣ́йшаѧ, мра́къ безбо́жїѧ разсѣ́ѧвшаѧ.

Ра́дꙋйсѧ, заква́ски фарїсе́йскїѧ, лицемѣ́рїѧ ника́коже вкꙋси́вшаѧ: ра́дꙋйсѧ, сн҃а своего̀ николи́же преѡгорчи́вшаѧ.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ а҃і

Пѣ́нїе прино́симъ тѝ всеꙋмиле́нное, воспѣва́юще млⷭ҇ть твою̀, се́ бо бл҃года́тїю сн҃а твоегѡ̀ возрожда́еши мона́шеское житїѐ во ѻ҆би́тели свое́й, ѡ҆бновлѧ́ющи и҆ дꙋ́шы на́шѧ порꙋ̑ганныѧ и҆ ѡ҆сквернє́нныѧ грѣхо́мъ, сегѡ̀ ра́ди славосло́вимъ сн҃а твоего̀, зовꙋ́ще: А҆ллилꙋ́їа.

І҆́косъ а҃і

Свѣтопрїе́мнꙋю лампа́дꙋ, сꙋ́щымъ во тьмѣ̀ дарова́ннꙋю всебл҃ги́мъ всевы́шнимъ, зри́мъ і҆кѡ́нꙋ твою̀ чꙋдотво́рнꙋю, ѡ҆зари́вшꙋю пещє́ры геѳсима́нскїѧ ѻ҆би́тели чꙋдесы̀ мно́гими, ѡ҆свѣти́вшꙋю свѣ́томъ бг҃опозна́нїѧ и҆ дꙋ́шы на́шѧ, ѡ҆мрачє́нныѧ и҆ потемнє́нныѧ грѣхо́мъ, зовꙋ́щихъ тебѣ̀ сицева̑ѧ:

Ра́дꙋйсѧ, дщѝ цр҃е́ва, є҆ѧ́же сла́ва внꙋ́трь є҆ѧ̀ є҆́сть: ра́дꙋйсѧ, є҆ѧ́же николи́же превозмо́же вра́жїѧ ле́сть.

Ра́дꙋйсѧ, свѣ́та жили́ще, ненави́дѣти грѣ́хъ на́съ наꙋча́ющаѧ: ра́дꙋйсѧ, сла́досте серде́чнаѧ, дꙋ́шы ᲂу҆поѧ́ющаѧ.

Ра́дꙋйсѧ, тишино́ю неѿмі́рною дꙋ́шы посѣща́ющаѧ: ра́дꙋйсѧ, ᲂу҆покое́нїе въ по́двизѣхъ и҆знемога́ющихъ.

Ра́дꙋйсѧ, дв҃о бг҃обл҃года́тнаѧ, словеса̀ ѡ҆ сн҃ѣ твое́мъ въ се́рдцѣ свое́мъ сложи́вшаѧ: ра́дꙋйсѧ, свѣ́томъ ст҃ы́мъ двⷭ҇тво своѐ ѡ҆ст҃и́вшаѧ.

Ра́дꙋйсѧ, же́злъ и҆з̾ ко́рене і҆ессе́ова прозѧ́бшаѧ: ра́дꙋйсѧ, нападе́нїѧ а҆́дова на́съ свобожда́ющаѧ.

Ра́дꙋйсѧ, првⷣныхъ на сме́ртнѣмъ ѻ҆дрѣ̀ ᲂу҆тѣша́ющаѧ и҆ въ гѡ́рнїѧ ѻ҆би́тєли препровожда́ющаѧ: ра́дꙋйсѧ, во́дꙋ жи́вꙋ ѡ҆ставле́нїѧ грѣхѡ́въ жа́ждꙋщымъ и҆сточа́ющаѧ.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ в҃і

Бл҃года́ть нбⷭ҇ныѧ трапе́зы сн҃а твоегѡ̀ низпослѝ на́мъ, и҆́бо и҆ псѝ ꙗ҆дѧ́тъ ѿ крꙋпи́цъ, па́дающихъ ѿ трапе́зы господе́й свои́хъ: ты́ же и҆ на́мъ, скве́рншымъ ѻ҆́ныѧ безслове́сныѧ тва́ри, низпослѝ крꙋпи̑цы млⷭ҇тей и҆ щедрѡ́тъ твои́хъ, да воспое́мъ бл҃года́рственнѡ бг҃ꙋ: А҆ллилꙋ́їа.

І҆́косъ в҃і

Пою́ще сла́вꙋ, ѿ і҆кѡ́ны твоеѧ̀ возсїѧ́вшꙋю, росо́ю бл҃года́ти зе́млю рꙋ́сскꙋю и҆ наро́дъ бж҃їй ѡ҆роша́ющꙋю, ᲂу҆пова́емъ на твоѐ хода́тайство пред̾ гдⷭ҇емъ, да да́рꙋетъ держа́вѣ на́шей ми́рное и҆ бл҃годе́нственное житїѐ, є҆́же во хрⷭ҇тѣ̀ і҆и҃сѣ гдⷭ҇ѣ на́шемъ, и҆ взыва́емъ тебѣ̀ такова̑ѧ:

Ра́дꙋйсѧ, къ вѣ́чномꙋ животꙋ̀ поги́бшихъ призва́нїе: ра́дꙋйсѧ, ст҃ы́хъ твои́хъ нбⷭ҇ное ликова́нїе.

Ра́дꙋйсѧ, до́браѧ рабо̀ гдⷭ҇нѧ, въ ма́лѣ бы́вшаѧ вѣ́рною, над̾ все́ю вселе́нною гпⷭ҇же́ю поста́вленнаѧ: ра́дꙋйсѧ, не ѡ҆дѣѧ̑нїи златы́ми, но нетлѣ́нною красото́ю кро́ткагѡ и҆ молчали́вагѡ дꙋ́ха ᲂу҆краше́ннаѧ.

Ра́дꙋйсѧ, совѣ́томъ предвѣ́чнымъ ст҃ы́ѧ трⷪ҇цы въ жили́ще бж҃їе пред̾избра́ннаѧ: ра́дꙋйсѧ, незазо́рныхъ со́вѣстїю ра́дости въ дꙋша́хъ взыгра́нїе.

Ра́дꙋйсѧ, черто́же црⷭ҇твꙋющагѡ, сла́вою ѡ҆блиста́нный: ра́дꙋйсѧ, цр҃и́це, достохва́льнаѧ и҆ пресла́внаѧ.

Ра́дꙋйсѧ, и҆́стиною препоѧ́саннаѧ и҆ въ броню̀ првⷣности ѡ҆блече́ннаѧ: ра́дꙋйсѧ, бл҃гоꙋха́нїѧ дх҃о́внагѡ кади́ло драгоцѣ́нное.

Ра́дꙋйсѧ, щито́мъ вѣ́ры стрѣ́лы лꙋка́вагѡ ѿрази́вшаѧ: ра́дꙋйсѧ, сло́вомъ бж҃їимъ мі́ръ просвѣти́вшаѧ.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ г҃і

Ѽ всепѣ́таѧ мт҃и, похвало̀ на́ша, вѣнцено́снаѧ цр҃и́це бцⷣе! Ѿ ѡ҆скорблѧ́ющихъ на́съ ѕѡ́лъ и҆зба́ви и҆ ненави́дѣти на́съ ѕла̑ѧ наꙋчѝ, пѡ́мыслы до́брыми дꙋ́шы на́шѧ просвѣтѝ, бл҃года́тїю сн҃а твоегѡ̀ ѡ҆ст҃ѝ на́съ, бл҃гословлѧ́ющихъ и҆́мѧ твоѐ ст҃о́е, ѡ҆ тебѣ̀ вопїю́щихъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льскїй гла́съ возвѣстѝ тебѣ̀ ѡ҆ безсѣ́менномъ бг҃а воплоще́нїи, є҆гда̀ бл҃года́ть бж҃їѧ ꙗ҆вѝ тѧ̀, пречⷭ҇таѧ дв҃о, нетлѣ́нное и҆ всечтⷭ҇но́е сн҃а бж҃їѧ вмѣсти́лище, тѣ́мже всѝ ро́ди бл҃гоговѣ́йнѡ велича́ютъ тѧ̀:

Ра́дꙋйсѧ, првⷣныѧ є҆лїсаве́ты цѣлова́нїемъ ѡ҆бра́дованнаѧ: ра́дꙋйсѧ, ѻ҆би́теле цѣломꙋ́дрїѧ, чⷭ҇тото́ю свое́ю просла́вленнаѧ.

Ра́дꙋйсѧ, мт҃рнюю любо́вь къ па́дшемꙋ а҆да́мꙋ ꙗ҆ви́вшаѧ: ра́дꙋйсѧ, вселюби́маго бг҃омлⷣнца без̾ сѣ́мене роди́вшаѧ.

Ра́дꙋйсѧ, свѣ́тлыѧ та́йны бг҃оѧвле́нїѧ позна́нїе: ра́дꙋйсѧ, млⷭ҇рдїѧ бг҃а ѻ҆ц҃а̀ вселе́ннѣй дарова́нїе.

Ра́дꙋйсѧ, многоплаче́вное го́рдагѡ денни́цы пораже́нїе: ра́дꙋйсѧ, всегѡ̀ мі́ра бл҃года́рственное поклоне́нїе.

Ра́дꙋйсѧ, го́рнице всест҃а́ѧ, свѣ́томъ невече́рнимъ ѡ҆заре́ннаѧ: ра́дꙋйсѧ, въ ско́рбехъ горни́ло ѡ҆чище́нїѧ.

Ра́дꙋйсѧ, нбⷭ҇ныхъ во́инствъ а҆́гг҃льское пѣ́нїе: ра́дꙋйсѧ, живота̀ твоегѡ̀ всевы́шнемꙋ всецѣ́лое приноше́нїе.

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Конда́къ а҃

И҆збра́ннѣй ѿ всѣ́хъ родѡ́въ цр҃и́цѣ бцⷣѣ, показа́вшей мі́рꙋ чꙋдеса̀ мнѡ́гаѧ, чрез̾ ѻ҆́бразъ ст҃ы́ѧ і҆кѡ́ны своеѧ̀ черни́говскїѧ ще́дрѡ и҆злива́ємаѧ, бл҃гоговѣ̑йнаѧ пѣ̑нїѧ прино́симъ тѝ рабѝ твоѝ, пречⷭ҇таѧ. Ты́ же, ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѣ́хъ находѧ́щихъ на на́съ бѣ́дъ и҆ скорбе́й свободѝ, да зове́мъ тѝ:

Ра́дꙋйсѧ, вѣнцено́снаѧ цр҃и́це, рѡссі́йскїѧ геѳсима́нїи похвало̀ и҆ ᲂу҆краше́нїе.

Моли́твы

Прїимѝ, ѽ всебл҃гослове́ннаѧ и҆ всемо́щнаѧ, пречⷭ҇таѧ гпⷭ҇жѐ влⷣчце, бг҃ороди́тельнице дв҃о, ᲂу҆сє́рдныѧ сїѧ̑ мл҃твы, со слеза́ми тебѣ̀ приноси̑мыѧ ѿ на́съ, недосто́йныхъ рабѡ́въ твои́хъ, къ твоемꙋ̀ цѣльбоно́сномꙋ ѻ҆́бразꙋ пѣ́нїе возсыла́ющихъ со ᲂу҆миле́нїемъ: ꙗ҆́кѡ тебѣ̀ само́й тꙋ̀ сꙋ́щей, послꙋ́шающей молє́нїѧ на̑ша и҆ подаю́щей съ вѣ́рою просѧ́щымъ коегѡ́ждо проше́нїѧ и҆сполне́нїе. Всѧ̑ бо сꙋ́ть возмѡ́жна хода́тайствомъ твои́мъ къ сн҃ꙋ твоемꙋ̀, хрⷭ҇тꙋ̀ бг҃ꙋ на́шемꙋ. Ѽ всепѣ́таѧ мт҃и, прест҃а́ѧ бцⷣе, не преста́й моли́тисѧ ѡ҆ на́съ, недосто́йныхъ рабѣ́хъ твои́хъ, сла́вѧщихъ тѧ̀, и҆ почита́ющихъ, и҆ покланѧ́ющихсѧ пречⷭ҇томꙋ ѻ҆́бразꙋ твоемꙋ̀, и҆ наде́ждꙋ и҆мꙋ́щихъ невозвра́тнꙋ и҆ вѣ́рꙋ несꙋмнѣ́ннꙋ къ тебѣ̀, приснодв҃ѣ пресла́внѣй и҆ непоро́чнѣй, во вѣ́ки вѣкѡ́въ. А҆ми́нь.