Православный календарь
Размер шрифта:

Ака́ѳістъ

<p>Ака́ѳїстъ прест҃ѣ́й бцⷣѣ пред̾ і҆ко́ною «Неѡпали́маѧ кꙋпина̀»</p>

Иконы Божией Матери, именуемой "Неопалимая Купина" (1680) 17 сентября 2026

Конда́къ а҃

Взбра́нной воево́дѣ, пречⷭ҇той и҆ бг҃оѡбра́дованной дв҃ѣ бцⷣѣ, ѻ҆гнезра́чныѧ і҆кѡ́ны своеѧ̀ ꙗ҆вле́нїемъ ѡ҆бра́довавшей цр҃ковь хрⷭ҇то́вꙋ и҆ є҆́ю ѿ ѻ҆́гненнагѡ запале́нїѧ защища́ющей вѣ̑рныѧ, похва́льное возглаша́емъ пѣ́нїе. Ты́ же, ѡ҆ бг҃омт҃и, кꙋпино̀ неѡпали́маѧ и҆менꙋ́емаѧ на́ми, ꙗ҆́кѡ и҆мꙋ́щаѧ держа́вꙋ непобѣди́мꙋю и҆ млⷭ҇рдїе мно́гое, ᲂу҆скорѝ на по́мощь къ на́мъ, тре́бꙋющымъ твоегѡ̀ застꙋпле́нїѧ, и҆ ѿ всѧ́кихъ бѣ́дъ свободѝ зовꙋ́щихъ тѝ:

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

І҆́косъ а҃

А҆́гг҃лѡвъ цр҃и́це и҆ всеѧ̀ тва́ри влⷣчце гпⷭ҇жѐ бцⷣе, ѿ а҆́гг҃льскихъ ликѡ́въ горѣ̀ прїе́млющаѧ хвале́бное пѣ́нїе, сподо́би и҆ на́съ, земны́хъ и҆ пе́рстныхъ, возноси́ти къ тебѣ̀ гла̑сы хвалы̀ бл҃годаре́нїѧ за премно́гꙋю млⷭ҇ть твою̀ къ ро́дꙋ чл҃вѣ́ческомꙋ. И҆ а҆́ще недосто́йны є҆смы̀ пѣ́ти тѧ̀ по достоѧ́нїю, ѻ҆ба́че ты̀, ꙗ҆́кѡ бл҃га́ѧ, не возгнꙋша́йсѧ на́шихъ недовлѣ́ющихъ похва́лъ, и҆ ꙗ҆́кѡ сн҃ъ тво́й двѣ̀ лє́птѣ вдови́цы млⷭ҇тивнѡ прїѧ́тъ, та́кѡ любобл҃гоꙋтро́бнѡ ᲂу҆слы́ши на́съ, со ᲂу҆миле́нїемъ къ тебѣ̀ вопїю́щихъ:

Ра́дꙋйсѧ, ѻ҆́гнь бжⷭ҇тва̀ во чре́вѣ твое́мъ неѡпа́льнѡ носи́вшаѧ: ра́дꙋйсѧ, спⷭ҇телѧ па́дшемꙋ чл҃вѣ́чествꙋ ро́ждшаѧ.

Ра́дꙋйсѧ, си́лꙋ а҆́довꙋ пречⷭ҇тны́мъ рождество́мъ твои́мъ ᲂу҆праздни́вшаѧ: ра́дꙋйсѧ, а҆да́ма и҆ є҆́ѵꙋ дре́внѧгѡ проклѧ́тїѧ свободи́вшаѧ.

Ра́дꙋйсѧ, вочл҃вѣ́ченїю є҆ди́нагѡ ѿ трⷪ҇цы непоро́чнѡ послꙋжи́вшаѧ: ра́дꙋйсѧ, творца̀ нб҃сѐ и҆ землѝ безсѣ́меннѡ воплоти́вшаѧ.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ в҃

Ви́дѧ мѡѷсе́й на сїна́и кꙋпинꙋ̀, ѻ҆гне́мъ горѣ́вшꙋю и҆ не сгора́вшꙋю, ᲂу҆жасе́сѧ, и҆ сѐ бы́сть гла́съ къ немꙋ̀ бжⷭ҇твенный ѿ кꙋпины̀: и҆ззꙋ́й сапо́гъ ѿ ногꙋ̑ твоє́ю, мѣ́стѡ бо, на не́мже ты̀ стои́ши, землѧ̀ ст҃а є҆́сть. Сегѡ̀ послꙋ́шаѧ, и҆ мы̀ смире́ннїи та́инство воплоще́нїѧ бг҃а сло́ва ѿ пречⷭ҇тыѧ дв҃ы, чꙋ́домъ неѡпали́мыѧ кꙋпины̀ проѡбразова́нное, и҆сповѣ́дꙋемъ и҆ со стра́хомъ покланѧ́емсѧ мѣ́стꙋ ꙗ҆вле́нїѧ бж҃їѧ, зовꙋ́ще зижди́телю всѧ́ческихъ: А҆ллилꙋ́їа.

І҆́косъ в҃

Ра́зꙋмъ чл҃вѣ́ческїй не мо́жетъ пости́гнꙋти та́инство смотре́нїѧ бж҃їѧ, ѿ сложе́нїѧ мі́ра и҆скꙋпле́нїе па́дшагѡ чл҃вѣ́чества предопредѣли́вшаго въ совѣ́тѣ предвѣ́чнѣмъ трїѷпоста́снагѡ бж҃ества̀, ѻ҆ба́че дх҃омъ ст҃ы́мъ вдохнове́ннїи ст҃і́и бж҃їи прⷪ҇ро́цы и҆здале́че предзрѧ́ще чꙋ́до чꙋде́съ, ꙗ҆́кѡ творе́цъ ра́бїй зра́къ воспрїи́метъ, сп҃стѝ хотѧ̀ дѣ́ло рꙋ́къ свои́хъ ѿ поги́бели вѣ́чныѧ, возвѣща́хꙋ проѻ́бразы и҆ прⷪ҇ро́чествы нело́жными, и҆мꙋ́щее соверши́тисѧ и҆скꙋпле́нїе ро́да чл҃вѣ́ча ѡ҆бѣтова́ннымъ и҆скꙋпи́телемъ. Є҆мꙋ́же ты̀, всечи́стаѧ, пло́ть взаимода́вши, сподо́биласѧ є҆сѝ бы́ти мт҃рїю гдⷭ҇а твоегѡ̀, внꙋша́ющагѡ на́мъ вопи́ти къ тебѣ̀:

Ра́дꙋйсѧ, ѻ҆гнезра́чнаѧ пала́то на херꙋві́мѣхъ сѣдѧ́щагѡ: ра́дꙋйсѧ, свѣтоно́снаѧ ло́жнице серафі́мы повелѣва́ющагѡ.

Ра́дꙋйсѧ, ѻ҆́дре цр҃ѧ̀ вели́кагѡ верхꙋ̀ горы̀ нбⷭ҇ныѧ: ра́дꙋйсѧ, прⷭ҇то́ле ѡ҆дꙋшевле́нный ѡ҆блада́ющагѡ го́рними и҆ до́льними.

Ра́дꙋйсѧ, кївѡ́те ѡ҆сщ҃е́нный бж҃ества̀, ст҃а́ѧ ст҃ы́хъ бо́льшїй: ра́дꙋйсѧ, ста́мно всезлата́ѧ, въ не́йже ма́нна сп҃си́тельнаѧ ᲂу҆гото́васѧ пло́ть и҆ кро́вь бжⷭ҇твеннагѡ а҆́гнца.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ г҃

Си́лою всевы́шнѧгѡ дѣ́йствꙋѧ, влⷣчце пребл҃га́ѧ, си́лꙋ є҆стества̀ ѻ҆́гненнагѡ ᲂу҆кроща́еши ст҃о́ю і҆кѡ́ною твое́ю и҆ мно́га чꙋдеса̀ є҆́ю содѣва́еши во вселе́ннѣй. Тѣ́мже ро́дъ хрⷭ҇тїа́нскїй ᲂу҆бл҃жа́етъ тѧ̀ гла̑сы хвале́бными и҆ въ бѣда́хъ внеза́пныхъ, наипа́че же во вре́мѧ ѻ҆́гненнагѡ запале́нїѧ къ тебѣ̀ мл҃твеннѡ притека́етъ, прїе́млѧ по́мощь ѿ тебє̀ бл҃говре́меннꙋ. Сегѡ̀ ра́ди бл҃года́рственнѡ вопїе́мъ просла́вльшемꙋ тѧ̀ цр҃ю̀ сла́вы, хрⷭ҇тꙋ̀: А҆ллилꙋ́їа.

І҆́косъ г҃

И҆мѣ́ѧ любо́вь ве́лїю къ лю́демъ и҆скꙋпле́ннымъ чтⷭ҇но́ю кро́вїю сн҃а твоегѡ̀ и҆ бг҃а, бг҃омт҃и пречⷭ҇таѧ, прїѧ́ла є҆сѝ ѿ негѡ̀ вла́сть стро́ити и҆ покрыва́ти ро́дъ хрⷭ҇тїа́нскїй: ты́ бо грѣ́шникѡмъ є҆сѝ спорꙋ́чница покаѧ́нїѧ и҆̀хъ пред̾ творце́мъ, ненадѣ̑жднымъ наде́ждо сп҃се́нїѧ, бѣ́дствꙋющымъ по́моще ско́раѧ, поги́бшымъ взыска́нїе держа́вное и҆ всемꙋ̀ мі́рꙋ покро́въ. Тебѣ̀, млⷭ҇рдой и҆ бл҃голюби́вой застꙋ́пницѣ на́шей, за любо́вь любо́вїю воздава́ѧ, смиренномꙋ́дреннѡ глаго́лемъ:

Ра́дꙋйсѧ, ра́досте всемі́рнаѧ, є҆́юже сле́зы ѿ̾е́млютсѧ ѿ ѻ҆че́съ стра́ждꙋщихъ и҆ скорбѧ́щихъ: ра́дꙋйсѧ, прибѣ́жище бл҃гоѡти́шное, въ не́мже сп҃са́ютсѧ ѡ҆бꙋрева́емїи бꙋ́рею страсте́й жите́йскагѡ мо́рѧ.

Ра́дꙋйсѧ, ᲂу҆толи́тельнице всемогꙋ́щаѧ пра́веднѡ дви́жимагѡ на на́съ гнѣ́ва бж҃їѧ: ра́дꙋйсѧ, пла́мень ѻ҆гнѧ̀ ᲂу҆гаша́ющаѧ росо́ю мл҃твъ твои́хъ ᲂу҆ прⷭ҇то́ла вседержи́телѧ.

Ра́дꙋйсѧ, ѿ гро́ма и҆ мо́лнїи соблюда́ющаѧ предста́тельствомъ твои́мъ нбⷭ҇нымъ: ра́дꙋйсѧ, по́мощь твою̀ ст҃ꙋ́ю бл҃говре́меннѡ подаю́щаѧ всѧ́кой дꙋшѝ, вѣ́рнѡ тебѣ̀ молѧ́щейсѧ.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ д҃

Бꙋ́рѧ ѻ҆́гненнаѧ є҆гда̀ на́йдетъ на на́съ внеза́пнѡ и҆ пла́мень гра́ды и҆ ве́си на́ша ѡ҆бы́метъ, тогда̀, гпⷭ҇жѐ всемлⷭ҇тиваѧ, ᲂу҆скорѝ на по́мощь къ на́мъ безпомѡ́щнымъ и҆ і҆кѡ́ною твое́ю чтⷭ҇но́ю защитѝ и҆ и҆зба́ви на́съ ѿ ѻ҆́гненнагѡ наказа́нїѧ, є҆го́же сотвори́хомсѧ досто́йни грѣ̑хъ на́шихъ ра́ди. Тебе́ бо грѣ́шнїи и҆́мамы застꙋ́пницꙋ непосты́днꙋю, на тѧ̀ ᲂу҆пова́нїе на́ше возлага́емъ и҆, прославлѧ́ѧ си́лꙋ мл҃твъ твои́хъ, ро́ждшемꙋсѧ ѿ тебє̀ сп҃сꙋ мі́ра зове́мъ: А҆ллилꙋ́їа.

І҆́косъ д҃

Слы́шимъ и҆ ви́димъ чꙋдеса̀ ве́лїѧ ѿ і҆кѡ́ны твоеѧ̀ быва́емыѧ, цр҃и́це на́ша всебл҃га́ѧ, ю҆́же дарова́ла є҆сѝ на́мъ во ᲂу҆тѣше́нїе и҆ защи́тꙋ въ несча́стїѧхъ: се́ бо и҆ всепоѧда́ющїй ѻ҆́гнь и҆знемога́етъ въ си́лѣ свое́й пред̾ си́лою бл҃года́тною твоегѡ̀ пречⷭ҇тагѡ ѻ҆́браза, ꙗ҆́кѡже мно́гажды ви́дѣхомъ и҆ и҆спыта́хомъ, неѡпали́мою кꙋпино́ю тѧ̀ и҆менꙋ́ѧ въ и҆зѻбраже́нїи сегѡ̀ твоегѡ̀ ѻ҆́браза, и҆ пред̾ ни́мъ тебѣ̀ воспѣва́ѧ гла́сы хвале́бными си́це:

Ра́дꙋйсѧ, мл҃твеннице неꙋсыпа́ющаѧ ко хрⷭ҇тꙋ̀ бг҃ꙋ, на млⷭ҇ть къ на́мъ є҆гѡ̀ преклонѧ́ющаѧ: ра́дꙋйсѧ, ка́рꙋ бж҃їю за беззако́нїѧ на̑ша ѿ гла́въ на́шихъ ѿводѧ́щаѧ.

Ра́дꙋйсѧ, ри́зою твое́ю чтⷭ҇но́ю ѿ всѧ́кихъ несча́стїй на́съ сохранѧ́ющаѧ: ра́дꙋйсѧ, мт҃рнимъ покро́вомъ щедрѡ́тъ твои́хъ жили́ща на̑ша ѿ ѻ҆гнѧ̀ и҆ гро́ма соблюда́ющаѧ.

Ра́дꙋйсѧ, всемлⷭ҇тиваѧ ᲂу҆слы́шательнице гла́сѡвъ на́шихъ моле́бныхъ въ ско́рби и҆ ѡ҆бстоѧ́нїи: ра́дꙋйсѧ, держа́внаѧ скоропомо́щнице на́ша во днѝ тѧ́жкихъ и҆спыта́нїй.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ є҃

Бг҃оте́чнаѧ ѕвѣзда̀, і҆кѡ́на твоѧ̀ всечестна́ѧ, бцⷣе дв҃о, во всѣ́мъ мі́рѣ чꙋде́съ мно́жествомъ бл҃года́тнѡ сїѧ́етъ и҆ просвѣща́етъ дꙋ́ши и҆ сердца̀ чл҃вѣ́чєскїѧ къ позна́нїю ве́лїѧ твоегѡ̀ млⷭ҇рдїѧ, и҆́мже ро́дъ хрⷭ҇тїа́нскїй покрыва́еши и҆ застꙋпа́еши, ꙗ҆́кѡ мт҃и бл҃госе́рдаѧ. Ѡ҆ се́мъ ра́дꙋющесѧ, бл҃годари́мъ хрⷭ҇та̀ бг҃а, тебѐ, мт҃рь свою̀ по пло́ти, и҆ на́мъ въ мт҃рь по дꙋ́хꙋ дарова́вшагѡ и҆ зове́мъ є҆мꙋ̀ во ᲂу҆миле́нїи глꙋбо́цѣмъ: А҆ллилꙋ́їа.

І҆́косъ є҃

Ви́димъ і҆кѡ́нꙋ твою̀, влⷣчце, ꙗ҆́кѡ вои́стиннꙋ кꙋпинꙋ̀ неѡпали́мꙋю, во ѻ҆гнѝ несгора́ющꙋю, и҆ присꙋ́тствїемъ свои́мъ жили́ща чл҃вѣ́чєскїѧ въ пла́мени несгора́емыми содѣ́ловающꙋю: тебѣ́ бо даде́сѧ бл҃года́ть свы́ше, си́лꙋ є҆стества̀ ѻ҆́гненнагѡ ᲂу҆кроща́ти, ѻ҆́гнь бж҃ества̀ во чре́вѣ твое́мъ неѡпа́льнѡ вмѣсти́вшей. Сеѧ́ же бл҃года́ти и҆ ѻ҆́бразъ подо́бїѧ твоегѡ̀ прича́стенъ показа́сѧ, тѣ́мже ѿ вѣ́рныхъ неѡпали́мою кꙋпино́ю наименова́сѧ, є҆го́же мы̀ чествꙋ́емъ бл҃голѣ́пнѡ, и҆ тебѣ̀ хвале́бнѡ вопїе́мъ:

Ра́дꙋйсѧ, свѣщѐ неꙋгаси́маѧ, въ мл҃твахъ за на́съ ᲂу҆ прⷭ҇то́ла гдⷭ҇нѧ присногорѧ́щаѧ: ра́дꙋйсѧ, ѻ҆гне́мъ любвѐ бж҃їѧ и҆ на̑ша хла̑днаѧ сердца̀ воспламенѧ́ющаѧ.

Ра́дꙋйсѧ, сѣ́нїю мл҃твъ твои́хъ зно́й страсте́й на́шихъ прохлажда́ющаѧ: ра́дꙋйсѧ, въ ча́съ ско́рби и҆ недоꙋмѣ́нїѧ по́мыслы дꙋшеполє́зныѧ на́мъ низпосыла́ющаѧ.

Ра́дꙋйсѧ, во вре́мѧ безпомо́щїѧ на́шегѡ, є҆гда̀ бѣ́дствꙋемъ и҆ не и҆́мамы помога́ющагѡ, на по́мощь къ на́мъ ᲂу҆скорѧ́ющаѧ: ра́дꙋйсѧ, въ годи́нꙋ несча́стїй внеза́пныхъ держа́вною рꙋко́ю твое́ю ѿ поги́бели на́съ и҆схища́ющаѧ.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ ѕ҃

Проповѣ́дꙋетъ цр҃ковь хрⷭ҇то́ва чꙋдеса̀ твоѧ̑, бг҃ороди́тельнице, ꙗ҆́же па́че песка̀ морска́гѡ и҆ ѕвѣ́здъ нбⷭ҇ныхъ мно́жае сꙋ́ть: ѿ восто́ка бо и҆ до за́пада хва́льнѡ и҆́мѧ твоѐ чꙋдесы̀, и҆ нѣ́сть гра́да и҆лѝ страны̀, и҆дѣ́же не соверши́сѧ тобо́ю дѣ́йство си́лы бж҃їѧ во и҆збавле́нїе и҆ сп҃се́нїе, просвѣще́нїе и҆ и҆сцѣле́нїе люде́й хрⷭ҇тоимени́тыхъ. Наипа́че же чрез̾ і҆кѡ́ны твоѧ̑ ст҃ы̑ѧ ѡ҆бы́кла є҆сѝ чꙋдотвори́ти, и҆злива́ѧ ѿ ни́хъ стрꙋѝ млⷭ҇ти и҆ щедрѡ́тъ бѣ́дствꙋющемꙋ и҆ болѧ́щемꙋ чл҃вѣ́чествꙋ. Сегѡ̀ ра́ди славосло́вимъ тѧ̀ гла́сы пѣ́сней дꙋхо́вныхъ и҆ вопїе́мъ сн҃ꙋ твоемꙋ̀ и҆ бг҃ꙋ на́шемꙋ: А҆ллилꙋ́їа.

І҆́косъ ѕ҃

Возсїѧ́ла є҆сѝ въ свѣтоли́тїи бжⷭ҇твенныѧ сла́вы, дв҃о бг҃оѻтрокови́це, млⷣнца предвѣ́чнагѡ, гдⷭ҇а і҆и҃са хрⷭ҇та̀ на рꙋкꙋ̀ твое́ю держа́щи, и҆ ликѡ́мъ си́лъ а҆́гг҃льскихъ ѡ҆крꙋжа́ема, ꙗ҆́кѡже тѧ̀ ви́димъ на і҆кѡ́нѣ и҆зѡбраже́ннꙋю, мѡѷсе́йскꙋю неѡпали́мꙋю кꙋпинꙋ̀ та́инственнѡ пронарече́ннꙋю, ѿ неѧ́же да̑ры бл҃года̑тныѧ вѣ́рнымъ да́рꙋеши, ѿ ѻ҆гнѧ̀ и҆ гро́ма сп҃са́еши, недꙋ́жныѧ врачꙋ́еши, скорбѧ́щыѧ ᲂу҆тѣша́еши и҆ всѣ́мъ всѧ̑ бл҃га̑ѧ и҆ дꙋшеполє́знаѧ низпосыла́еши, во є҆́же пѣ́ти тебѣ̀ гла́сы немо́лчными си́це:

Ра́дꙋйсѧ, ѡ҆ не́йже ра́дꙋетсѧ и҆ торжествꙋ́етъ а҆́гг҃льскїй собо́ръ и҆ чл҃вѣ́ческїй ро́дъ: ра́дꙋйсѧ, є҆ѧ́же сла́ва превосхо́дитъ похвалы̑ зємны́ѧ и҆ нбⷭ҇ныѧ.

Ра́дꙋйсѧ, ѿ го́рнихъ высо́тъ всю̀ вселе́ннꙋю мт҃рнею любо́вїю твое́ю назира́ющаѧ: ра́дꙋйсѧ, ю҆до́ль земнꙋ́ю многоско́рбнꙋю бл҃годѣѧ̑нїи твои́ми посѣща́ющаѧ.

Ра́дꙋйсѧ, неисче́тною бл҃госты́нею твое́ю не ѡ҆ставлѧ́ющаѧ са́мыхъ презрѣ́нныхъ и҆ ѿве́рженныхъ: ра́дꙋйсѧ, сердобо́лїемъ твои́мъ ѿ ро́ва поги́бельнагѡ и҆схища́ющаѧ безнаде́жныхъ.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ з҃

Хотѧ̀ гдⷭ҇ь ꙗ҆ви́ти любо́вь свою̀ къ лю́демъ, и҆скꙋпле́ннымъ є҆гѡ̀ кро́вїю, дарова̀ на́мъ въ покро́въ и҆ защи́тꙋ мт҃рь свою̀ пренепоро́чнꙋю, и҆ сїю̀ сотворѝ прибѣ́жище бл҃гоѡти́шное всѧ́кой дꙋшѝ хрⷭ҇тїа́нстѣй, скорбѧ́щей и҆ ѡ҆ѕло́бленнѣй, по́мощи и҆ млⷭ҇ти тре́бꙋющей. Вѣ́дꙋще ᲂу҆́бѡ ѡ҆ таково́мъ млⷭ҇рдомъ слꙋже́нїи твое́мъ ро́дꙋ чл҃вѣ́ческомꙋ, влⷣчце всебл҃га́ѧ, къ тебѣ̀ ѻ҆́чи на́ши въ ско́рбехъ возводи́мъ, и҆ рꙋ́цѣ моле́бнѡ простира́емъ, ᲂу҆тѣше́нїѧ ѿ тебє̀ є҆ди́ныѧ просѧ́ще, да сп҃се́ши на́съ предста́тельствомъ твои́мъ ѿ скорбе́й вре́менныхъ и҆ вѣ́чныхъ и҆ сподо́биши на землѝ живы́хъ, въ ра́дости ст҃ы́хъ пѣ́ти бг҃ꙋ: А҆ллилꙋ́їа.

І҆́косъ з҃

Ди́внѡ просла́вила є҆сѝ чꙋдесы̀ і҆кѡ́нꙋ твою̀ ст҃ꙋ́ю неѡпали́мою кꙋпино́ю и҆менꙋ́емꙋю, бцⷣе дв҃о, є҆́юже гра̑ды и҆ вє́си ѿ запале́нїѧ ѻ҆́гненнагѡ и҆ молнїено́снагѡ гро́ма соблюда́еши и҆ до́мы вѣ́рныхъ бл҃гословлѧ́еши, въ ни́хже чествꙋ́етсѧ бл҃гоговѣ́йнѡ пречⷭ҇тагѡ ли́ка твоегѡ̀ подо́бїе. Сегѡ̀ ра́ди ꙗ҆́кѡ да́ръ многоцѣ́ненъ, ѻ҆́бразъ тво́й бл҃года́тный ра́достнѡ прїе́млемъ, достодо́лжнымъ поклоне́нїемъ почита́емъ, и҆ тѧ̀ по до́лгꙋ ᲂу҆бл҃жа́емъ бл҃гохвалє́нїи си́ми:

Ра́дꙋйсѧ, а҆лава́стре врачева́нїѧ, на всѧ́къ недꙋ́гъ врачевство̀ содержа́щїй: ра́дꙋйсѧ, мѷрополо́жнице бл҃гоꙋха́нїѧ хрⷭ҇то́ва, ѡ҆бл҃гоꙋха́вшаѧ па́дшее чл҃вѣ́чество.

Ра́дꙋйсѧ, ᲂу҆́зы грѣхѡ́вныѧ разрѣша́ющаѧ ка́ющымсѧ грѣ́шникѡмъ: ра́дꙋйсѧ, плєни́цы страсте́й сокрꙋша́ющаѧ подвиза́ющымсѧ ѡ҆ чистотѣ̀.

Ра́дꙋйсѧ, дѣ́въ младопита́тельнице и҆ ма́терей ти́хое весе́лїе: ра́дꙋйсѧ, вдо́въ застꙋ́пнице и҆ сиро́тъ бл҃госе́рдое призрѣ́нїе.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ и҃

Стра́ннѡ є҆́сть ви́дѣти, ꙗ҆́кѡ і҆кѡ́на твоѧ̀, влⷣчце, на дсцѣ̀ напи́саннаѧ и҆ по є҆стествꙋ̀ своемꙋ̀ ѻ҆́гненномꙋ дѣ́йствꙋ подве́рженнаѧ, си́лꙋ пачеєсте́ственнꙋю ꙗ҆влѧ́етъ и҆ присꙋ́тствїемъ свои́мъ си́лꙋ ѻ҆гнѧ̀ ᲂу҆кроща́етъ. Въ се́мъ познава́ѧ си́лꙋ бж҃їю и҆ твои́хъ мл҃твъ дѣ́йство, велича́емъ возвели́чившагѡ тѧ̀ зижди́телѧ, всѧ́ческихъ бг҃а, во ѿра́дꙋ и҆ ᲂу҆тѣше́нїе на́мъ дарова́вшагѡ ѻ҆́бразъ тво́й чꙋдотво́рный и҆ си́мъ сп҃са́ющагѡ на́съ ѿ ѻ҆́гненнагѡ запале́нїѧ, да при́снѡ зове́мъ є҆мꙋ̀ бл҃года́рственнѡ и҆ хвале́бнѡ: А҆ллилꙋ́їа.

І҆́косъ и҃

Ве́сь мі́ръ хрⷭ҇тїа́нскїй сла́витъ и҆́мѧ твоѐ, пребл҃гослове́ннаѧ мр҃і́е бцⷣе, и҆ всѧ́комꙋ вѣ́рномꙋ сла́достнѡ и҆ ᲂу҆тѣ́шительно є҆́сть взира́ти на пречⷭ҇тагѡ ли́ка твоегѡ̀ подо́бїе, и҆́мже ѡ҆бы́кла є҆сѝ ꙗ҆влѧ́ти мнѡ́гаѧ и҆ пресла̑внаѧ чꙋдеса̀. Сѐ и҆ мы̀, смире́ннїи, твою̀ ст҃ꙋ́ю і҆кѡ́нꙋ ви́дѧще, бл҃голѣ́пнѡ є҆́й покланѧ́емсѧ и҆ съ любо́вїю ю҆̀ лобыза́емъ, ча́юще ѿ неѧ̀ по́мощи и҆ застꙋпле́нїѧ твоегѡ̀ держа́внагѡ, наипа́че во вре́мѧ безпомо́щїѧ на́шегѡ, є҆гда̀ грѣ̑хъ ра́ди на́шихъ ѻ҆́гненное запале́нїе на ны̀ на́йдетъ внеза́пнѡ, да сп҃са́еми тобо́ю ѿ поги́бельнагѡ пла́мене бл҃года́рными ᲂу҆сты̑ тебѣ̀ вопїе́мъ:

Ра́дꙋйсѧ, нерꙋкотворе́ннаѧ ски́нїе бг҃а сло́ва, херꙋві́мы превыша́ющаѧ и҆ серафі́мы превосходѧ́щаѧ ст҃ы́нею и҆ чⷭ҇тото́ю: ра́дꙋйсѧ, ѻ҆́блаче ле́гкїй со́лнца пра́вды, и҆́мже нбⷭ҇ный къ земны́мъ прїи́де, да на нб҃о съ собо́ю на́съ возведе́тъ.

Ра́дꙋйсѧ, ра̑йскїѧ две́ри ѿве́рзшаѧ па́дшемꙋ чл҃вѣ́чествꙋ рождество́мъ твои́мъ ст҃ы́мъ: ра́дꙋйсѧ, нб҃о и҆ зе́млю воеди́но совокꙋ́пльшаѧ пѣ́ти тебѣ̀ и҆ ро́ждшемꙋсѧ ѿ тебє̀ немѡ́лчныѧ хвалы̑.

Ра́дꙋйсѧ, бжⷭ҇твенный и҆сто́чниче, во́дꙋ жи́зни и҆сточи́вый, ѿ него́же пїю́щїи ктомꙋ̀ не ᲂу҆мира́ютъ: ра́дꙋйсѧ, гро́здїе сп҃се́нїѧ возрасти́вшаѧ бл҃гослове́ннаѧ лозо̀, вїно̀ безсме́ртїѧ и҆ска́пающїй чл҃вѣ́кѡмъ.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ ѳ҃

Всѧ́кꙋ похвалꙋ̀ превосхо́дитъ сла́ва твоѧ̀, пребл҃гослове́ннаѧ и҆ препросла́вленнаѧ мт҃и гдⷭ҇а на́шегѡ: недоꙋмѣва́ютъ бо и҆ ᲂу҆́ми безпло́тнїи пѣ́ти тѧ̀ по достоѧ́нїю, па́че же на́мъ, земны́мъ и҆ пе́рстнымъ, сїѐ неꙋдо́бнѡ є҆́сть, ѻ҆ба́че любо́вїю къ тебѣ̀ побѣжда́еми, дерза́емъ приноси́ти тебѣ̀ поси́льное пѣ́нїе хвалы̀ и҆ бл҃годаре́нїѧ, за премно́гꙋю млⷭ҇ть твою̀ къ ро́дꙋ чл҃вѣ́ческомꙋ, є҆го́же возлюби́ла є҆сѝ и҆ є҆мꙋ́же бл҃готвори́ти не престае́ши, подвиза́ѧ всѧ́къ во́зрастъ вѣ́рныхъ взыва́ти ро́ждшемꙋсѧ ѿ тебє̀ сп҃сꙋ хрⷭ҇тꙋ̀: А҆ллилꙋ́їа.

І҆́косъ ѳ҃

Вѣті̑и чл҃вѣ́честїи и҆знемога́ютъ пости́гнꙋти ве́лїю та́йнꙋ твоегѡ̀ прⷭ҇нодв҃ства, бг҃ороди́тельнице, ю҆́же ᲂу҆таѝ гдⷭ҇ь ѿ премꙋ́дрыхъ вѣ́ка сегѡ̀, и҆ вѣ́рою ѿкры̀ смире́ннымъ и҆ бл҃гоговѣ́йнымъ, пытли́вагѡ и҆спыта́нїѧ чꙋ́ждымъ, ѿ ни́хже правосла́внѡ и҆ несꙋмнѣ́ннѡ до рождества̀, и҆ въ рождествѣ̀, и҆ по рождествѣ̀ дв҃а проповѣ́дꙋешисѧ. Прїимѝ ᲂу҆́бѡ, ѡ҆ мт҃и и҆ дв҃о, и҆ на́ше ѡ҆ се́мъ и҆сповѣ́данїе вседꙋше́вное и҆ ᲂу҆крѣпѝ на́съ послѣ́довати тебѣ̀ житїе́мъ непоро́чнымъ и҆ серде́чною чистото́ю, да возмо́жемъ бл҃гоꙋго́днѡ воспѣва́ти тебѣ̀ пѣ̑сни сицєвы́ѧ:

Ра́дꙋйсѧ, крі́не бѣлоснѣ́жный дѣ́вства и҆ чⷭ҇тоты̀, неꙋвѧда́емо цвѣтꙋ́щїй горѣ̀: ра́дꙋйсѧ, къ дѣ́вствꙋ и҆ чⷭ҇тотѣ̀ неви́димѡ рꙋково́дствꙋющаѧ живꙋ́щихъ до́лѣ.

Ра́дꙋйсѧ, ма́терство и҆ дѣ́вство въ себѣ̀ чꙋ́днѡ сочета́вшаѧ: ра́дꙋйсѧ, во ѻ҆бою̀ непоро́чнѡ и҆ ст҃ѡ себѐ соблю́дшаѧ.

Ра́дꙋйсѧ, и҆́ноческихъ ликѡ́въ предводи́тельнице въ дѣ́вствѣ бг҃оꙋго́днѣмъ: ра́дꙋйсѧ, дѣ́вственныхъ полкѡ́въ нача́льнице въ чⷭ҇тотѣ̀ дꙋшѝ и҆ тѣ́ла.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ і҃

Сп҃се́нїе чл҃вѣ́ческое ᲂу҆строѧ́ѧ є҆ди́нъ ѿ трⷪ҇цы воплоти́тисѧ ѿ тебє̀ и҆зво́ли, бг҃оневѣ́сто влⷣчце, є҆стество̀ чл҃вѣ́ческое просла́вивъ сѣдѣ́нїемъ ѡ҆деснꙋ́ю ѻ҆ц҃а̀ на прⷭ҇то́лѣ бж҃ества̀, ꙗ҆́кѡ сн҃ъ є҆диноро́дный, то́йже и҆ сн҃ъ тво́й по пло́ти бы́сть, и҆ тебѐ съ собо́ю просла́ви сла́вою превы́шшею всѧ́кїѧ сла́вы, є҆ѧ́же добро́тою ѡ҆сѣнѧ́ема, не забыва́еши млⷭ҇тивнѡ ро́дъ чл҃вѣ́ческїй, но мл҃твеннѡ предста́тельствꙋеши пред̾ творце́мъ въ трⷪ҇цѣ є҆ди́нымъ, ѡ҆ всѣ́хъ вѣ́рнѡ пою́щихъ є҆мꙋ̀ славосло́вїѧ пѣ́снь: А҆ллилꙋ́їа.

І҆́косъ і҃

Стѣна̀ є҆сѝ дѣ́вственнымъ ликѡ́мъ и҆ и҆́ноческимъ собо́рѡмъ, бцⷣе дв҃о, и҆ всѣ́мъ ᲂу҆се́рднѡ къ тебѣ̀ въ мл҃твахъ притека́ющымъ, і҆кѡ́нꙋ же твою̀ ст҃ꙋ́ю бл҃гоговѣ́йнѡ чествꙋ́ющымъ: тебѣ́ бо є҆ди́нѣй дарова́сѧ ѿ гдⷭ҇а бл҃года́ть всемі́рнагѡ застꙋпле́нїѧ, и҆ вѣ́рныхъ въ дѣ́вствѣ и҆ чⷭ҇тотѣ̀ ᲂу҆твержде́нїѧ. Тѣ́мже непоро́чнагѡ житїѧ̀ рачи́телїе под̾ мт҃рнїй покро́въ тво́й ѿ бꙋ́ри страсте́й прибѣга́ютъ и҆ бл҃гоѡти́шїе дꙋше́вное нахо́дѧтъ, согла́снѡ тебѣ̀ взыва́ѧ:

Ра́дꙋйсѧ, и҆́нокѡвъ и҆ и҆́нокинь бл҃гочести́выхъ и҆зрѧ́днаѧ покрови́тельнице и҆ те́плаѧ къ бг҃ꙋ ѡ҆ ни́хъ хода́таице: ра́дꙋйсѧ, та́йныхъ средѝ мі́ра рабѡ́въ бж҃їихъ всегда́шнѧѧ помо́щнице и҆ въ по́двизѣхъ дꙋхо́вныхъ рꙋководи́тельнице.

Ра́дꙋйсѧ, ю҆́ныхъ наста́внице цѣломꙋ́дрїѧ и҆ воздержа́нїѧ: ра́дꙋйсѧ, ста́рцєвъ бл҃гоговѣ́йныхъ ᲂу҆покое́нїе и҆ ѿра́до.

Ра́дꙋйсѧ, до́мы и҆ семе́йства хрⷭ҇тїа̑нскїѧ ѡ҆сѣнѧ́ющаѧ бл҃ги́мъ твои́мъ покро́вомъ: ра́дꙋйсѧ, всѧ́къ во́зрастъ вѣ́рныхъ сподоблѧ́ющаѧ твоегѡ̀ бл҃госе́рдагѡ попече́нїѧ.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ а҃і

Пѣ́нїе хвале́бное прино́ситъ тебѣ̀ немо́лчнѡ ст҃а́ѧ хрⷭ҇то́ва цр҃ковь, всепѣ́таѧ влⷣчце, возвѣща́ѧ млⷭ҇ти твоѧ̑ и҆ чꙋдеса̀, и҆́миже ѡ҆богати́сѧ всѧ̀ вселе́ннаѧ. Вои́стиннꙋ, кто́ бо ꙗ҆́кѡже ты̀ скоропослꙋшли́ва є҆́сть къ мл҃твеннымъ проше́нїѧмъ на́шымъ: но и҆ са́мыѧ проше́нїѧ ѡ҆бы́кла є҆сѝ предварѧ́ти, ми́лꙋѧ и҆ ᲂу҆щедрѧ́ѧ тре́бꙋющихъ по́мощи твоеѧ̀ ст҃ы́ѧ, є҆ѧ́же не лишѝ и҆ на́съ, смире́нныхъ, въ ча́съ се́й пою́щихъ во сла́вꙋ и҆́мене твоегѡ̀, и҆ вопїю́щихъ бг҃ꙋ: А҆ллилꙋ́їа.

І҆́косъ а҃і

Свѣтоза́рнаѧ твоѧ̀ і҆кѡ́на, бг҃омт҃и пречⷭ҇таѧ, просвѣща́етъ потемнє́нныѧ грѣхмѝ дꙋ́шы на́шѧ сїѧ́нїемъ бж҃е́ственныхъ чꙋде́съ, въ ни́хже познае́мъ бж҃їѧ всемогꙋ́щества си́лꙋ и҆ твоѐ млⷭ҇рдїе неисче́тное, при́снѡ гото́вое спосо́бствовати на́мъ въ покаѧ́нїи и҆ ѡ҆браще́нїи ѿ ѕлы́хъ дѣ́лъ на пꙋ́ть сп҃се́нїѧ. Мо́лимъ ᲂу҆́бѡ тебѐ, всебл҃га́ѧ, не ѡ҆ста́ви на́съ заблꙋжда́ти въ де́брѣхъ грѣхѡ́въ и҆ страсте́й, но приведѝ къ ти́хомꙋ приста́нищꙋ бл҃гоче́стнагѡ и҆ бг҃оꙋго́днагѡ житїѧ̀, да возмо́жемъ досто́йнѡ приноси́ти тебѣ̀ сїѧ̑ пѣ́снєнныѧ да́ры:

Ра́дꙋйсѧ, врагѝ на́шѧ неви̑димыѧ запина́ющаѧ бо́дренною твое́ю мл҃твою: ра́дꙋйсѧ, си́мъ не попꙋска́ющаѧ ѡ҆блада́ти на́ми наси́лїемъ сме́ртнагѡ сегѡ̀ тѣлесѐ.

Ра́дꙋйсѧ, ꙗ҆́кѡ бѣ́си и҆́мени твоегѡ̀ ст҃а́гѡ боѧ́тсѧ и҆ трепе́щꙋтъ: ра́дꙋйсѧ, ꙗ҆́кѡ і҆кѡ́на твоѧ̀ чтⷭ҇на́ѧ всѧ́кꙋ си́лꙋ дїа́волю присꙋ́тствїемъ свои́мъ прогонѧ́етъ.

Ра́дꙋйсѧ, подви́жникѡвъ бл҃гоче́стїѧ ᲂу҆крѣплѧ́ющаѧ въ бра́ни дꙋхо́вной со врага́ми сп҃се́нїѧ чл҃вѣ́ческагѡ: ра́дꙋйсѧ, въ ча́съ кончи́ны помога́ющаѧ любо́вь и҆ вѣ́рꙋ къ тебѣ̀ и҆мꙋ́щымъ.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ в҃і

Бл҃года́ти бж҃їѧ прича́стнꙋ и҆сповѣ́дꙋемъ твою̀ ст҃ꙋ́ю і҆кѡ́нꙋ, бг҃обл҃года́тнаѧ дв҃о, и҆ свѣ́тлѡ торжествꙋ́емъ пра́здникъ є҆ѧ̀ ꙗ҆вле́нїѧ: во ѻ҆́бразѣ бо неѡпали́мыѧ кꙋпины̀ сїѧ̀ ꙗ҆́вльшисѧ, то́жде и҆ дѣ́йство показꙋ́етъ свои́ми чꙋдесы̑, ѿ ѻ҆́гненнагѡ пла́мене сохранѧ́ѧ и҆ соблюда́ѧ жили́ща на̑ша свои́мъ присꙋ́тствїемъ. Сїю̀ ᲂу҆́бѡ, ꙗ҆́кѡ щи́тъ и҆ забра́ло, и҆мꙋ́ще, тебѐ, помо́щницꙋ на́шꙋ держа́внꙋю хвала́ми пѣ́сненными ᲂу҆бл҃жа́емъ и҆ ро́ждшемꙋсѧ ѿ тебє̀ сп҃си́телю на́шемꙋ вопїе́мъ: А҆ллилꙋ́їа.

І҆́косъ в҃і

Пое́мъ тѧ̀, бг҃ороди́тельнице, є҆ди́нꙋ наде́ждꙋ и҆ ᲂу҆пова́нїе на́ше, и҆сповѣ́дꙋемъ млⷭ҇ти твоѧ̑ и҆ не таи́мъ чꙋде́съ твои́хъ, прославлѧ́емъ неисче́тнꙋю бл҃гость твою̀ къ ро́дꙋ хрⷭ҇тїа́нскомꙋ, бл҃гословлѧ́емъ и҆́мѧ твоѐ ст҃о́е, є҆́же вои́стиннꙋ мѵ́ро и҆злїѧ́нное є҆́сть лю́бѧщимъ тѧ̀, бл҃гоꙋха́нїемъ дꙋхо́внымъ и҆сполнѧ́ющее бл҃гочєсти́выѧ дꙋ́шы. Ѡ҆бл҃гоꙋха́й ᲂу҆̀бо и҆ на́съ, влⷣчце, смердѧ́щихъ страстьмѝ грѣхо́вными, и҆ сподо́би чи́стымъ се́рдцемъ и҆ нескве́рными ᲂу҆сты̀ взыва́ти къ тебѣ̀:

Ра́дꙋйсѧ, мѵ́ро и҆сточа́ющаѧ сла́достное и҆ дꙋшеспаси́тельное, и҆́мже ᲂу҆маща́ютсѧ сердца̀ бг҃олюби̑ваѧ: ра́дꙋйсѧ, недꙋ́ги дꙋшє́вныѧ и҆ тѣлє́сныѧ врачꙋ́ющаѧ є҆ди́нымъ прикоснове́нїемъ къ і҆кѡ́нѣ твое́й ст҃ѣ́й.

Ра́дꙋйсѧ, води́тельнице бл҃га́ѧ, на пꙋ́ть бг҃оꙋгожде́нїѧ и҆ сп҃се́нїѧ направлѧ́ющаѧ ка́ющихсѧ грѣ́шникѡвъ: ра́дꙋйсѧ, лѣ́ствицею добродѣ́телей возводѧ́щаѧ подви́жникѡвъ хрⷭ҇то́выхъ ко врата́мъ црⷭ҇твїѧ нбⷭ҇нагѡ.

Ра́дꙋйсѧ, смире́нныхъ и҆ терпѣли́выхъ страда́льцевъ вѣнча́ющаѧ ᲂу҆тѣше́нїемъ бл҃года́тнымъ: ра́дꙋйсѧ, и҆згна́нныхъ и҆ гони́мыхъ безви́ннѡ, ᲂу҆слажда́ющаѧ предвкꙋше́нїемъ бл҃же́нства ра́йскагѡ.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ г҃і

Ѽ, всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во и҆ неѡпали́мою кꙋпино́ю и҆менꙋ́емаѧ ѿ на́съ недосто́йныхъ, вонмѝ гла́сꙋ моле́нїй и҆ пѣ́нїй на́шихъ, пред̾ ст҃о́ю і҆кѡ́ною твое́ю ᲂу҆се́рднѡ тебѣ̀ возноси́момꙋ, и҆ те́плою мл҃твою твое́ю ко гдⷭ҇ꙋ ѻ҆гнѧ̀ вре́меннагѡ и҆ вѣ́чнагѡ и҆зба́ви на́съ, хва́лѧщихъ и҆́мѧ твоѐ и҆ прославлѧ́ющихъ чꙋдеса̀ твоѧ̑, сн҃ꙋ же твоемꙋ̀ и҆ бг҃ꙋ на́шемꙋ вопїю́щихъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ цр҃и́це и҆ всеѧ̀ тва́ри влⷣчце гпⷭ҇жѐ бцⷣе, ѿ а҆́гг҃льскихъ ликѡ́въ горѣ̀ прїе́млющаѧ хвале́бное пѣ́нїе, сподо́би и҆ на́съ, земны́хъ и҆ пе́рстныхъ, возноси́ти къ тебѣ̀ гла̑сы хвалы̀ бл҃годаре́нїѧ за премно́гꙋю млⷭ҇ть твою̀ къ ро́дꙋ чл҃вѣ́ческомꙋ. И҆ а҆́ще недосто́йны є҆смы̀ пѣ́ти тѧ̀ по достоѧ́нїю, ѻ҆ба́че ты̀, ꙗ҆́кѡ бл҃га́ѧ, не возгнꙋша́йсѧ на́шихъ недовлѣ́ющихъ похва́лъ, и҆ ꙗ҆́кѡ сн҃ъ тво́й двѣ̀ лє́птѣ вдови́цы млⷭ҇тивнѡ прїѧ́тъ, та́кѡ любобл҃гоꙋтро́бнѡ ᲂу҆слы́ши на́съ, со ᲂу҆миле́нїемъ къ тебѣ̀ вопїю́щихъ:

Ра́дꙋйсѧ, ѻ҆́гнь бжⷭ҇тва̀ во чре́вѣ твое́мъ неѡпа́льнѡ носи́вшаѧ: ра́дꙋйсѧ, спⷭ҇телѧ па́дшемꙋ чл҃вѣ́чествꙋ ро́ждшаѧ.

Ра́дꙋйсѧ, си́лꙋ а҆́довꙋ пречⷭ҇тны́мъ рождество́мъ твои́мъ ᲂу҆праздни́вшаѧ: ра́дꙋйсѧ, а҆да́ма и҆ є҆́ѵꙋ дре́внѧгѡ проклѧ́тїѧ свободи́вшаѧ.

Ра́дꙋйсѧ, вочл҃вѣ́ченїю є҆ди́нагѡ ѿ трⷪ҇цы непоро́чнѡ послꙋжи́вшаѧ: ра́дꙋйсѧ, творца̀ нб҃сѐ и҆ землѝ безсѣ́меннѡ воплоти́вшаѧ.

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Конда́къ а҃

Взбра́нной воево́дѣ, пречⷭ҇той и҆ бг҃оѡбра́дованной дв҃ѣ бцⷣѣ, ѻ҆гнезра́чныѧ і҆кѡ́ны своеѧ̀ ꙗ҆вле́нїемъ ѡ҆бра́довавшей цр҃ковь хрⷭ҇то́вꙋ и҆ є҆́ю ѿ ѻ҆́гненнагѡ запале́нїѧ защища́ющей вѣ̑рныѧ, похва́льное возглаша́емъ пѣ́нїе. Ты́ же, ѡ҆ бг҃омт҃и, кꙋпино̀ неѡпали́маѧ и҆менꙋ́емаѧ на́ми, ꙗ҆́кѡ и҆мꙋ́щаѧ держа́вꙋ непобѣди́мꙋю и҆ млⷭ҇рдїе мно́гое, ᲂу҆скорѝ на по́мощь къ на́мъ, тре́бꙋющымъ твоегѡ̀ застꙋпле́нїѧ, и҆ ѿ всѧ́кихъ бѣ́дъ свободѝ зовꙋ́щихъ тѝ:

Ра́дꙋйсѧ, бл҃года́тнаѧ, кꙋпино̀ неѡпали́маѧ, ѻ҆́гненнагѡ запале́нїѧ на́съ и҆збавлѧ́ющаѧ.

Моли́твы

Ѽ, прест҃а́ѧ и҆ пребл҃гослове́ннаѧ мт҃и сладча́йшагѡ гдⷭ҇а на́шегѡ і҆и҃са хрⷭ҇та̀, припа́даемъ и҆ покланѧ́емсѧ тебѣ̀ пред̾ ст҃о́ю и҆ пречтⷭ҇но́ю і҆кѡ́ною твое́ю, є҆́юже ди̑внаѧ и҆ пресла̑внаѧ чꙋдеса̀ содѣва́еши, ѿ ѻ҆́гненнагѡ запале́нїѧ и҆ молнїено́снагѡ гро́ма жили́ща на̑ша сп҃са́еши, недꙋ́жныѧ и҆сцѣлѧ́еши и҆ всѧ́кѡ бл҃го́е проше́нїе на́ше во бл҃го и҆сполнѧ́еши. Смире́ннѡ мо́лимъ тѧ̀, всеси́льнаѧ ро́да на́шегѡ застꙋ́пнице: сподо́би на́съ, немощны́хъ и҆ грѣ́шныхъ, твоегѡ̀ мт҃рнѧгѡ ᲂу҆ча́стїѧ и҆ бл҃гопопече́нїѧ. Спасѝ и҆ сохранѝ, влⷣчце, под̾ кро́вомъ млⷭ҇ти твоеѧ̀ бг҃охрани́мꙋю странꙋ̀ на́шꙋ, вла́сти и҆ во́инство є҆ѧ̀, цр҃ковь ст҃ꙋ́ю, хра́мъ се́й, (и҆лѝ ѻ҆би́тель сїю̀), и҆ всѧ̀ ны̀ припа́дающыѧ къ тебѣ̀ съ вѣ́рою и҆ любо́вїю, и҆ ᲂу҆миле́ннѡ просѧ́щыѧ со слеза́ми твоегѡ̀ застꙋпле́нїѧ. Є҆́й, гпⷭ҇жѐ всемлⷭ҇тиваѧ, ᲂу҆милосе́рдисѧ на на́съ, ѡ҆бꙋрева́емыхъ грѣха́ми мно́гими и҆ не и҆мꙋ́щихъ дерзнове́нїѧ ко хрⷭ҇тꙋ̀ бг҃ꙋ проси́ти є҆го̀ ѡ҆ поми́лованїи и҆ проще́нїи, но тебѣ̀ предлага́емъ къ немꙋ̀ на ᲂу҆моле́нїе, мт҃рь є҆гѡ̀ по пло́ти. Ты́ же, всебл҃га́ѧ, прострѝ къ немꙋ̀ бг҃опрїи́мнїи рꙋ́цѣ твоѝ и҆ предста́тельствꙋй за на́съ пред̾ бл҃гостїю є҆гѡ̀, просѧ̀ на́мъ проще́нїѧ прегрѣше́нїй на́шихъ, бл҃гоче́стнагѡ ми́рнагѡ житїѧ̀, бл҃гі́ѧ хрⷭ҇тїа́нскїѧ кончи́ны и҆ до́брагѡ ѿвѣ́та на стра́шнѣмъ сꙋдѣ̀ є҆гѡ̀. Наипа́че же въ ча́съ гро́знагѡ посѣще́нїѧ бж҃їѧ, є҆гда̀ ѻ҆гне́мъ возгорѧ́тсѧ до́мы на́шѧ и҆лѝ молнїено́снымъ гро́момъ ᲂу҆страша́еми бꙋ́демъ, ꙗ҆вѝ на́мъ млⷭ҇тивное твоѐ застꙋпле́нїе и҆ держа́вное вспоможе́нїе, да сп҃са́еми всеси́льными твои́ми ко гдⷭ҇ꙋ мл҃твами, вре́меннагѡ наказа́нїѧ бж҃їѧ здѣ̀ и҆збѣ́гнемъ и҆ вѣ́чное бл҃же́нство ра́йское та́мѡ ᲂу҆наслѣ́дꙋемъ, и҆ со всѣ́ми ст҃ы́ми воспое́мъ пречтⷭ҇но́е и҆ великолѣ́пое и҆́мѧ покланѧ́емыѧ трⷪ҇цы, ѻ҆ц҃а̀, и҆ сн҃а, и҆ ст҃а́гѡ дх҃а, и҆ твоѐ ве́лїе къ на́мъ млⷭ҇рдїе, во вѣ́ки вѣкѡ́въ. А҆ми́нь.